ការព្រមានអំពីអាកាសធាតុ បាន​បង្ហាញ​ថា ខ្យល់ព្យុះនៅក្នុងប្រទេសអង់គ្លេស និងវែលបានផុតកំណត់នៅល្ងាចថ្ងៃអាទិត្យ ហើយ​ព្យុះនេះបានរំកិលទៅអឺរ៉ុប ខណៈព្យុះនេះមានល្បឿនខ្យល់បក់រហូតដល់ ៩៣​គីឡូម៉ែត្រក្នុងមួយម៉ោង​និង១០៨​គីឡូម៉េត្រក្នុងមួយម៉ោង នៅតំបន់ឆ្នេរ។

ទោះ​យ៉ាងណា ការព្រមានទឹកជំនន់រាប់សិបនៅតែកើតមាននៅទូទាំងចក្រភពអង់គ្លេស ដោយសារកម្រិតទឹកទន្លេបាន​ហក់​ឡើងបន្ទាប់ពីមានភ្លៀងធ្លាក់ជាច្រើនថ្ងៃ ខណៈដែលកិច្ចខិតខំប្រឹងប្រែងសម្អាតមូលដ្ឋានកំពុងបន្តដើម្បីសម្អាតដើមឈើ និងកម្ទេចកម្ទីដែលដួលរលំ។

សមាគមបណ្តាញថាមពលដែលតំណាងឱ្យបណ្តាញថាមពលនៅចក្រភពអង់គ្លេសបាននិយាយថា អតិថិជនប្រហែល ១១៨០០០ នាក់បានគ្មានថាមពលអគ្គិសនីប្រើប្រាស់កាលពីថ្ងៃអាទិត្យ ដោយសារតែព្យុះDarragh។ ទោះយ៉ាងណា អតិថិជន ១.៨ លាននាក់ នៃអ្នកដែលរងផលប៉ះពាល់ដោយការដាច់ចរន្តអគ្គិសនីទាក់ទងនឹងព្យុះនេះទទូលបានការផ្គត់ផ្គង់របស់ពួកគេឡើងវិញហើយ។

គួរបញ្ជាក់ថាមនុស្សរាប់លាននាក់បានជួបប្រទះភ្លៀង និងខ្យល់បន្ថែមទៀតកាលពីថ្ងៃអាទិត្យ បើទោះបីជាស្ថានភាពមិនសូវធ្ងន់ធ្ងរជាងកាលពីថ្ងៃសៅរ៍ដែលបានឃើញការព្រមានរបស់ការិយាល័យ Met ពណ៌ក្រហមដ៏កម្រ និងខ្យល់ខ្លាំងរហូតដល់ ១៥៤គីឡូម៉ែត្រក្នុងមួយម៉ោង។

លក្ខខណ្ឌនេះបានបណ្ដាលឲ្យមនុស្សពីរនាក់បានស្លាប់ក្នុងអំឡុងពេលព្យុះដោយសារដើមឈើបានដួលរលំលើរថយន្តនៅ Lancashire និង West Midlands នៅក្នុងឧប្បត្តិហេតុដាច់ដោយឡែក។ ជាមួយគ្នានេះពេញមួយយប់កាលពីថ្ងៃសៅរ៍ សត្វគោចំនួន ៩ ក្បាលត្រូវបានសម្លាប់បន្ទាប់ពីខ្សែភ្លើងដាច់នៅឯកសិដ្ឋាន Cornwall ភាគខាងលិចអំឡុងពេលព្យុះ។

ការ​ព្រួយ​បារម្ភ​អំពី​ទឹក​ជំនន់​នៅ​តែ​មាន​ការ​ព្រមាន​ចំនួន ៤៨ សម្រាប់​សហគមន៍​មាត់​ទន្លេ។ ការ​ប្រកាស​អាសន្ន​គ្រោះ​ទឹក​ជំនន់​មិន​សូវ​ធ្ងន់ធ្ងរ​ចំនួន ១៣៧ ផ្សេង​ទៀត​ក៏​ត្រូវ​បាន​ចេញ​ដោយ​ទីភ្នាក់ងារ​បរិស្ថាន​ផង​ដែរ។ ចំណែកនៅទីក្រុងប្រទេវែលដែលទើបតែងើបឡើងវិញពីទឹកជំនន់ដែលបណ្តាលមកពីព្យុះ Bert កាលពីខែមុន ក៏មានការព្រមានអំពីទឹកជំនន់ចំនួនប្រាំបួន និងការជូនដំណឹងចំនួន ១៦ ត្រូវបានដាក់ជាធរមានផងដែរ៕

អត្ថបទ៖ ប៊ុន សុភាព

The post ​​​​​ព្យុះ Darragh ​​បង្ក​ប៉ះពាល់​ដល់​​​មនុស្ស​រាប់​ម៉ឺន​នាក់ ខណៈ២នាក់ស្លាប់​​នៅ​អង់គ្លេស​​ appeared first on Kampuchea Thmey Daily.