លោក Jacques Guichandut ដែលជាស្ថាបនិក និងនាយកគ្រប់គ្រងនៃក្រុមហ៊ុន All Dreams Cambodia បានសម្តែងការចាប់អារម្មណ៍អំពីការរៀបចំកម្មវិធីនៃការប្រកួតចម្រៀងជាពួកអន្តរជាតិលើកទី១ នៅរាជធានីភ្នំពេញ ឆ្នាំ២០២៤ ដោយផ្សារភ្ជាប់តន្ត្រី និងការចូលរួមចំណែកក្នុងការបណ្តុះស្មារតីចូលរួមគិតគូរដល់វិស័យបរិស្ថាន និងវិស័យអំណាន ដែលជាចំណែកមួយយ៉ាងសំខាន់ ក្នុងការចូលរួមអភិវឌ្ឍន៍ប្រកបដោយចីរភាព។

ចំណែក អ្នកស្រី Catherine Germier-Hamel មកពីស្ថាប័ន Destination Mekong បានគូសបញ្ជាក់ថា «យើងទាំងអស់គ្នា មានកាតព្វកិច្ចចូលរួមចំណែកជាវិជ្ជមាន ដើម្បីរក្សាការពារបរិស្ថាន យើងមិនអាចបញ្ចៀសផលប៉ះពាល់ជាអវិជ្ជមានបានទាំងស្រុង តែយើងគ្រប់គ្នាអាចរួមគ្នា ដើម្បីកាត់បន្ថយផលអវិជ្ជមានលើបរិស្ថាន»។

ក្រុមហ៊ុន All Dreams Cambodia បានគណនាចំនួនឧស្ម័នកាបូនិច ដែលគ្រប់សកម្មភាពនៃកម្មវិធីនេះទាំងមូលបានបញ្ចេញ ដែលមានចំនួនឧស្ម័នកាបូនិចសរុប ១៣៩តោន ដែលគិតជាទឹកប្រាក់ចំនួនប្រមាណជា ៣ ២០០ដុល្លារអាមេរិក ហើយក្រុមហ៊ុន All Dreams Cambodia នឹងប្រគល់ជូនទឹកប្រាក់នេះ ដល់គម្រោងកែវសីមានៃក្រសួងបរិស្ថាន។

ក្រៅពីនេះ ស្របតាមចំនួនអ្នកចូលរួមនៃកម្មវិធីប្រកួតចម្រៀងជាពួកនេះដែរ ក្រុមហ៊ុន All Dreams Cambodia ក៏បានជូនកញ្ចប់ថវិកាចំនួន ៤៣៨ដុល្លារអាមេរិក (២ដុល្លារអាមេរិក ក្នុងអ្នកចូលរួមមួយនាក់ x ២១៩នាក់) ដល់អង្គការទឹកស្អាត ១០០១ ក្នុងគម្រោងទឹកស្អាតដល់សិស្សសាលាក្នុងសហគមន៍រយៈពេលមួយឆ្នាំ ព្រមទាំងជូនកញ្ចប់ថវិកាចំនួន ៦៥៧ ដុល្លារអាមេរិក (៣ដុល្លារអាមេរិក ក្នុងអ្នកចូលរួមមួយនាក់ x ២១៩នាក់) ដល់អង្គការស៊ីប៉ា ដើម្បីចូលរួមចំណែកក្នុងគម្រោងបណ្ណាល័យទូក។ 

កម្មវិធីនេះដែរ ក៏មានការប្រកាសផ្តល់វិញ្ញាបនប័ត្រដល់ក្រុមចម្រៀងជាពួកអន្តរជាតិ ដែលមកពីបណ្តាប្រទេសនានា រួមមានព្រះរាជាណាចក្រកម្ពុជា ឥណ្ឌូនេស៊ី ម៉ាឡេស៊ី និងថៃ។ គ្រប់ក្រុមចម្រៀងជាពួកដែលពោរពេញទៅដោយសមត្ថភាព សុទ្ធតែទទួលបានការវាយតម្លៃខ្ពស់ ហើយទទួលបានរង្វាន់តាមភាពល្អវិសេសរបស់ខ្លួនរាងៗខ្លួន ហើយក្រុមដែលឈ្នះដាច់គេនៅក្នុងកម្មវិធីនេះ គឺក្រុម Gita Suara Choir ISBI Bandung ដែលមកពីប្រទេសឥណ្ឌូនេស៊ី ដោយទទួលបានវិញ្ញាបនបត្រ ពានរង្វាន់ថវិកាចំនួន ១ពាន់ដុល្លារអាមេរិក និងរង្វាន់អនុស្សាវរីយ៍។

សូមរម្លឹកផងដែរថា កម្មវិធីនេះត្រូវបានរៀបចំឡើងដោយ ស្ថាប័ន INTERKULTUR និងក្រុមហ៊ុន ALL DREAMS CAMBODIA ដោយមានការគាំទ្រពីក្រសួងវប្បធម៌និងវិចិត្រសិល្បៈ ក្រសួងបរិស្ថាន ក្រសួងទេសចរណ៍ ក្រសួងព័ត៌មាន និងសាលារាជធានីភ្នំពេញ វិទ្យាស្ថានបច្ចេកវិទ្យាកម្ពុជា ព្រមទាំងផ្សារទំនើបអ៊ីអន១៕

The post ព្រឹត្តិការណ៍ការប្រកួតចម្រៀង «ជាពួកអន្តរជាតិ» លើកទី១ ដែលកម្ពុជាធ្វើជាម្ចាស់ផ្ទះ បិទបញ្ចប់ដោយជោគជ័យ appeared first on Kampuchea Thmey Daily.

កម្ពុជាថ្មី សូមសង្ខេបព្រឹត្តិការណ៍សំខាន់ៗដែលកើតឡើងក្នុងឆ្នាំ២០២១៖

ប្រធានាធិបតី​ ហៃទី​ ត្រូវ​បាន​គេ​ធ្វើឃាត

នៅខែកក្កដា បុរសមួយក្រុមបានសម្រុកចូលវិមានប្រធានាធិបតីក្នុងប្រទេសហៃទី និងធ្វើឃាតលោកប្រធានាធិបតី Jovenel Moise។

ប៉ុន្មានខែមុនពេលគាត់ស្លាប់ លោក Moise បានចាប់ផ្តើមចងក្រងបញ្ជីអ្នកជំនួញ និងឥស្សរជននយោបាយហៃទីដ៏មានឥទ្ធិពល ដែលជាប់ពាក់ព័ន្ធក្នុងបណ្តាញជួញដូរគ្រឿងញៀន។

លោកប្រធានាធិបតី​ បាន​ចាត់វិធានការ​ជាច្រើន​ដើម្បី​ប្រឆាំង​គ្រឿងញៀន និង​អ្នករត់ពន្ធ​អាវុធ។ មន្ត្រី​ខ្លះ​គិតថា ​គាត់​ត្រូវ​គេ​សម្លាប់ដោយសារតែរឿងនេះ។

អំពើហិង្សា អ៊ីស្រាអែល-ហ្គាហ្សា

ជម្លោះ​នៅ​មជ្ឈិមបូព៌ា​បាន​ផ្ទុះ​ឡើង​ជា​ថ្មី​ម្តង​ទៀត ហើយ​ក្លាយ​ជា​អំពើ​ហិង្សា​ដ៏​អាក្រក់​បំផុត​មួយ​រវាង​ ហ្គាហ្សានិង​អ៊ីស្រាអែល។

កងទ័ពអ៊ីស្រាអែលបានចាប់ផ្តើមការវាយប្រហារយោធាទ្រង់ទ្រាយធំ លើជ្រោយហ្គាហ្សា ដែលអូសបន្លាយពេល១១ថ្ងៃ។ ក្នុងអំឡុងពេលនោះ ពួកគេបានធ្វើការវាយប្រហារតាមអាកាស និងកាំភ្លើងធំរាប់ពាន់លើកទៅលើតំបន់ឡោមព័ទ្ធតូចមួយ ដែលមានប្រជាជន២ លាននាក់រស់នៅ។

ការវាយប្រហារនោះ បានសម្លាប់ជនជាតិប៉ាឡេស្ទីនចំនួន២៥៤នាក់ បំផ្លាញលំនៅដ្ឋានរាប់ពាន់ខ្នង និងបណ្តាលឲ្យខូចខាតហេដ្ឋារចនាសម្ព័ន្ធធ្ងន់ធ្ងរ។

រដ្ឋប្រហារនៅមីយ៉ាន់ម៉ា

​យោធា​មីយ៉ាន់ម៉ា​ បាន​ដណ្តើម​អំណាច​នៅ​ក្នុង​រដ្ឋប្រហារ​ទម្លាក់​មេដឹកនាំ​លោកស្រី​ អ៊ុងសាន ស៊ូជី។

ការតវ៉ាទ្រង់ទ្រាយធំ កំពុងកើតឡើងនៅទូទាំងប្រទេស ខណៈកងកម្លាំងសន្តិសុខបានបង្រ្កាបដោយបើកការបាញ់ប្រហារទៅលើបាតុករគ្មានអាវុធ ដោយសម្លាប់មនុស្សជាង ១,៣០០នាក់ និងចាប់ខ្លួនជាង ១០០ នាក់។

ក្នុងរយៈពេលប៉ុន្មានខែចាប់តាំងពីរដ្ឋប្រហារមក មេដឹកនាំស៊ីវិលរបស់ប្រទេសនេះ បានប្រឈមមុខនឹងការចោទប្រកាន់នៅក្នុងតុលាការសម្ងាត់។

សង្គ្រាមអ៊ុយក្រែន-រុស្ស៊ី

នៅពេលដែលសង្រ្គាមក្នុងប្រទេសអ៊ុយក្រែនឈានចូលដល់ឆ្នាំទី៨ មនុស្សជាច្រើនមានការភ័យខ្លាចថា ទីក្រុងមូស្គូអាចនឹងកំពុងរៀបចំការវាយលុកយោធាទ្រង់ទ្រាយធំ។

ក្នុងរយៈពេលប៉ុន្មានសប្តាហ៍កន្លងមកនេះ សម្ព័ន្ធមិត្តអាមេរិក អឺរ៉ុប និងអង្គការណាតូ ក៏ដូចជាមន្ត្រីអ៊ុយក្រែន បានព្រមានថា រុស្ស៊ីបានប្រមូលផ្តុំកម្លាំងយោធា និងឧបករណ៍សំខាន់ៗនៅជិតព្រំដែនរបស់ខ្លួនជាប់អ៊ុយក្រែន។

ការ​រាតត្បាតនៃជំងឺកូវីដ១៩ជាសកល

ឆ្នាំថ្មីបាននាំមកជាមួយនូវក្តីសង្ឃឹមដ៏អស្ចារ្យ សម្រាប់ការបញ្ចប់នៃជំងឺរាតត្បាតកូវីដ១៩ ដោយសារតែយុទ្ធនាការចាក់វ៉ាក់សាំងដ៏ធំធេង ប៉ុន្តែមេរោគនៅតែបន្តបំប្លែងខ្លួន ដោយបានសម្លាប់មនុស្សរាប់លាននាក់នៅជុំវិញពិភពលោក។

វីរុសបំប្លែងខ្លួន ដែលតា ត្រូវបានរកឃើញជាលើកដំបូងនៅក្នុងប្រទេសឥណ្ឌា ហើយវានាំឲ្យមានរលកទីពីរនៃករណីកូវីដដ៏ធំនៅក្នុងប្រទេសនានា និងទូទាំងពិភពលោក។

ហើយថ្មីៗនេះ អ្នកវិទ្យាសាស្ត្រអាហ្រ្វិកខាងត្បូងបានរកឃើញវីរុសបំប្លែងខ្លួនប្រភេទថ្មីឈ្មោះ អូមីក្រុង និងរីករាលដាលយ៉ាងឆាប់រហ័សនៅក្នុងប្រទេសជាច្រើន។

អាមេរិក ដកទ័ពចេញពីប្រទេស អាហ្វហ្គានីស្ថាន

យន្តហោះយោធាអាមេរិកចុងក្រោយ បានចាកចេញពីប្រទេសអាហ្វហ្គានីស្ថាន ដែលសម្គាល់ជាការបញ្ចប់សង្រ្គាមដ៏យូរបំផុតរបស់ខ្លួន។

ក្រុមតាលីបង់ បានវាយលុកពាសពេញប្រទេសនេះ ដោយដណ្តើមបានទីក្រុងធំៗទាំងអស់ក្នុងរយៈពេលត្រឹមតែប៉ុន្មានថ្ងៃប៉ុណ្ណោះ ខណៈសន្តិសុខអាហ្វហ្គានីស្ថានដែលទទួលការបណ្តុះបណ្តាល និងបំពាក់បំប៉នដោយសហរដ្ឋអាមេរិក និងសម្ព័ន្ធមិត្ត បានរលាយបាត់អស់។

ប្រជាជនអស់សង្ឃឹម បាននាំគ្នារត់ចេញពីប្រទេស ខណៈក្រុមបះបោរបានដណ្តើមអំណាចមកវិញ៕

ប្រែសម្រួល៖ Vann Vann

ចុចអាន៖ ជម្លោះធំៗក្នុងឆ្នាំ២០២០ដែលសឹងតែផ្ទុះសង្គ្រាមលោកលើកទី៣ទៅហើយ

The post ព្រឹត្តិការណ៍ពិភពលោកល្បីបំផុតប្រចាំឆ្នាំ២០២១ appeared first on Kampuchea Thmey Daily.

កម្ពុជាថ្មី សូមនាំលោកអ្នកមកមើលអំពីរបៀបដែលវិបត្តិនេះបានកើតឡើង និងរបៀបដែលវារាលដាលពាសពេញ​ពិភពលោក ។

ថ្ងៃទី ៣១ ខែធ្នូ ឆ្នាំ  ២០១៩ ការិយាល័យរបស់ចិនរកឃើញរោគរលាកសួត

ជំងឺដ៏អាថ៌កំបាំងនេះត្រូវបានគេរាយការណ៍នៅភាគកណ្តាលប្រទេសចិននៅចុងឆ្នាំ ២០១៩ ។ អ្នកជំងឺសរុបចំនួន ៤៤ នាក់មានជំងឺរលាកសួតដោយមិនដឹងមូលហេតុត្រូវបានគេរាយការណ៍ទៅ​អង្គការសុខភាពពិភពលោក ។

នៅមន្ទីរពេទ្យក្នុងទីក្រុង អ៊ូហាន ពួកគេបានបដិសេធអ្នកជំងឺទាំងអស់លើកលែងតែអ្នកដែល​សង្ស័យថាមានផ្ទុកវីរុសនេះ ខណៈពួកគេកំពុងដោះស្រាយជាមួយនឹងការផ្ទុះវីរុសដំបូង ។

ទីផ្សារម្ហូបអាហារត្រូវបានគេចាត់ទុកថាជាប្រភពនៃការផ្ទុះឡើងនេះ ខណៈសត្វព្រៃខុសច្បាប់កំពុង​លក់នៅទីនោះ ។

ថ្ងៃទី ១១ ខែមករា ឆ្នាំ ២០២០ ចិនបានរាយការណ៍អំពីករណីស្លាប់របស់ខ្លួនលើកដំបូង

បុរសអាយុ ៦១ ឆ្នាំម្នាក់បានក្លាយជាមនុស្សដំបូងគេដែលបានស្លាប់នៅក្នុងប្រទេសចិនដោយសារ​ជំងឺផ្លូវដង្ហើមដែលត្រូវបានគេជឿថាបណ្តាលមកពីវីរុសថ្មីពីក្រុមតែមួយជាមួយជំងឺសា (SARS) ។ បុរសនោះជាអ្នកទិញជាប្រចាំនៅផ្សារអាហារសមុទ្រ ។

ប៉ុន្តែវាមិនមែនកើតឡើងតែក្នុងទីក្រុង អ៊ូហាន និងក្នុងប្រទេសចិនប៉ុណ្ណោះទេ ។ ក្នុងរយៈពេលប៉ុន្មានថ្ងៃករណីនៃវីរុសនេះត្រូវបានគេរាយការណ៍នៅក្នុងប្រទេសដទៃទៀត ។

ថ្ងៃទី ១៣ ដល់ថ្ងៃទី ២០ ខែមករា ឆ្នាំ ២០២០ ប្រទេសថៃ ជប៉ុន កូរ៉េខាងត្បួង និងសហរដ្ឋអាមេរិក បញ្ជាក់ករណីឆ្លង

ស្ត្រីជនជាតិចិនម្នាក់ត្រូវបានធ្វើចត្តាឡីស័កនៅក្នុងប្រទេសថៃដែលជាការរកឃើញវីរុសដំបូងនៅខាងក្រៅប្រទេសចិន ខណៈអ្នកជំងឺនោះមកពីទីក្រុង អ៊ូហាន ដែលមានការផ្ទុះឡើងនៃវីរុស ។

នៅក្នុងប្រទេសជប៉ុន និងកូរ៉េខាងត្បូង អ្នកធ្វើដំណើរតម្រូវឲ្យពាក់ម៉ាស់ដើម្បីទៅធ្វើការដើម្បីបញ្ចៀស​ការពាក់ព័ន្ធជាមួយហ្វូងមនុស្ស នៅពេលដែលករណីនាំចូលដំបូងត្រូវបានគេរាយការណ៍ ។

ចំណែកករណីដំបូងគេដែលត្រូវបានបញ្ជាក់នៅសហរដ្ឋអាមេរិកគឺជាបុរសម្នាក់អាយុ ៣០ ឆ្នាំជាមួយរោគសញ្ញានៃវីរុសនេះ បន្ទាប់ពីគាត់បានធ្វើដំណើរត្រឡប់មកពីប្រទេសចិន ។

ថ្ងៃទី ២៣ ខែមករា ឆ្នាំ ២០២០ ​អ៊ូហានប្រកាសបិទទីក្រុង

នៅតាមដងផ្លូវនៃទីក្រុងអ៊ូហានមានវត្តមានមន្ត្រីជាន់ខ្ពស់ដើម្បីព្យាយាមទប់ស្កាត់វីរុស ។ ការធ្វើដំណើរ​ចេញពីទីក្រុងត្រូវបានរឹតត្បិត មុនពេលការបិទទីក្រុងទាំងមូល ។

ទីក្រុងអ៊ូហានបានក្លាយជាទីក្រុងដំបូងគេនៅលើពិភពលោកដែលត្រូវបានបិទ ។ ផ្លូវត្រូវបានបិទ រថភ្លើងត្រូវបានបញ្ឈប់ ហើយជើងហោះហើរត្រូវបានលុបចោល ។

ទីក្រុងមួយដែលមានប្រជាជនចំនួន ១១ លាននាក់ត្រូវបានដាក់នៅក្នុងការធ្វើចត្តាឡីស័ក ខណៈមនុស្សមួយចំនួនប្រញាប់ប្រញាល់ចាកចេញពីទីក្រុង ។

ថ្ងៃទី ៣០ ខែមករា ឆ្នាំ២០២០ WHO ប្រកាសអាសន្នផ្នែកសុខភាពសាធារណៈ

ក្នុងចំណោមករណីថ្មីរាប់ពាន់ករណីនៅក្នុងប្រទេសចិន ការប្រកាសអាសន្នផ្នែកសុខភាពសាធារណៈ​ចំពោះការព្រួយបារម្ភជាអន្តរជាតិត្រូវបានប្រកាសជាផ្លូវការដោយ WHO ។

ការជម្លៀសប្រជាជនបរទេសរាប់រយនាក់ដោយស្ម័គ្រចិត្តចេញពីក្រុងអ៊ូហានត្រូវបានបង្កើនល្បឿនដោយប្រទេសផ្សេងៗគ្នា ។

ថ្ងៃទី ៤ ខែកុម្ភៈ ឆ្នាំ ២០២០ ករណីឆ្លងរាប់រយករណីលើនាវាទេសចរណ៍ Diamond Princess

នាវាទេសចរណ៍ Diamond Princess ត្រូវបានបង្ខំចិត្តចូលចតនៅទីក្រុង Yokohama ប្រទេសជប៉ុន ហើយស្នាក់នៅទីនោះ បន្ទាប់ពីបុរសម្នាក់ដែលចុះពីលើនាវានៅហុងកុងត្រូវបានគេរកឃើញថា​មានផ្ទុកវីរុសនេះ ។

មនុស្សជាង ៦០០ នាក់នៅលើនាវានោះក៏បានធ្វើតេស្តវិជ្ជមានផងដែរ ។ វាជាករណីដ៏ធំមួយក្នុង​ចំណោមករណីជាច្រើននៅក្រៅប្រទេសចិន ។

ការធ្វើដំណើរតាមផ្លូវអាកាសជាសកលត្រូវបានដាក់កម្រិត ។ ទោះយ៉ាងណាភ្ញៀវទេសចរ​ចិនដីគោកនឹងត្រូវឆ្លងកាត់ការពិនិត្យសុខភាពនៅពេលពួកគេត្រឡប់មកវិញ ហើយជនជាតិបរទេស​ត្រូវបានបដិសេធមិនឲ្យចូលមកប្រទេសនេះផងដែរ ។

ថ្ងៃទី ២២ ខែកុម្ភៈ ឆ្នាំ ២០២០ អ៊ីតាលីប្រកាសដាក់ប្រទេសក្នុងភាពអាសន្ន

ប្រទេសអ៊ីតាលីបានរកឃើញករណី ២ ដំបូងរបស់ខ្លួន ខណៈអ្នកទាំងពីរគឺភ្ញៀវទេសចរចិន ។

នាយករដ្ឋមន្រ្តីលោក Giuseppe Conte បានប្រកាសដាក់ប្រទេសក្នុងស្ថានភាពអាសន្នរយៈពេល ៦ ខែ ។ ហើយប្រទេសអ៊ីតាលីក្លាយជាប្រទេសដំបូងគេនៅលើពិភពលោកដែលរារាំងការហោះហើរ​ពីប្រទេសចិន ។

ក្រោយមកប្រទេសនេះមានចំនួនអ្នកឆ្លងខ្ពស់បំផុតទី ២ នៅខាងក្រៅប្រទេសចិន ។

ថ្ងៃទី ១១ ខែមីនា ឆ្នាំ ២០២០ WHO ប្រកាសពីវីរុសកូរ៉ូណារាតត្បាតជាសកល

អង្គការសុខភាពពិភពលោក (WHO) បានប្រកាសជាផ្លូវការនូវការរាតត្បាតជាសកលនៃវីរុសកូរ៉ូណា ។

ប្រធាន WHO លោក Tedros Adhanom Ghebreyesus បាននិយាយថា ចំនួនករណីឆ្លងនៅក្រៅប្រទេសចិនបានកើនឡើង ១៣ ដងក្នុងរយៈពេលពីរសប្តាហ៍ ។

លោកបានអំពាវនាវឲ្យរដ្ឋាភិបាលផ្លាស់ប្តូរទិសដៅនៃការផ្ទុះឡើងនេះដោយចាត់វិធានការបន្ទាន់ និងខ្លាំងក្លា ។

ថ្ងៃទី ១៧ ខែមីនា ឆ្នាំ ២០២០ អឺរុបត្រូវបានប្រកាសជាចំណុចកណ្ដាលនៃការផ្ទុះថ្មីរបស់ពិភពលោក

ការឆ្លើយតបរបស់អឺរ៉ុបមានភាពស្ងប់ស្ងាត់ និងមានវិធានការណ៍ច្បាស់លាស់ ប៉ុន្តែគ្មាននរណា​ម្នាក់អាចព្យាករណ៍ពីការរឹតត្បិតដែលនឹងកើតឡើងនាពេលឆាប់ៗនេះទេ ។

រោគរាតត្បាតបានរីករាលដាលយ៉ាងឆាប់រហ័សដល់ប្រទេសដទៃទៀតដែលមានបារាំង អាល្លឺម៉ង់ អេស្ប៉ាញ និងអង់គ្លេស ។

មេដឹកនាំសហភាពអ៊ឺរ៉ុបបានយល់ព្រមបិទព្រំដែននៅខាងក្រៅអឺរ៉ុបដើម្បីការពារការរីករាលដាលនៃវីរុសនេះ ។

ថ្ងៃទី ២៦ ខែមីនា ឆ្នាំ ២០២០ អាមេរិកជាកន្លែងផ្ទុះវីរុសធំបំផុតលើពិភពលោក

សូម្បីតែប្រទេសដែលមានអំណាចបំផុតនៅលើពិភពលោកដែលមានប្រព័ន្ធថែទាំសុខភាពទំនើបបំផុតក៏មិនអាចគេចផុតពីការឆ្លងវីរុសកូរ៉ូណាដែរ ។

សហរដ្ឋអាមេរិកបានក្លាយជាប្រទេសដែលរងការវាយប្រហារយ៉ាងធ្ងន់ធ្ងរបំផុតពីរោគរាតត្បាតនេះដោយយ៉ាងហោចណាស់មានករណីឆ្លងចំនួន ៨១,៣២១ ករណីត្រូវបានបញ្ជាក់ និងជាង ១,០០០ នាក់ស្លាប់ ។

ករណីឆ្លងបន្ថែមត្រូវបានរាយការណ៍ច្រើនជាងនៅប្រទេសចិន អ៊ីតាលី ឬប្រទេសដទៃទៀត​នៅពេលនោះ ។

ថ្ងៃទី ២ ខែមេសា ឆ្នាំ ២០២០ ករណីឆ្លងទូទាំងពិភពលោកឈានដល់ ១ លានករណី

វាចំណាយពេលត្រឹមតែ ៣ ខែប៉ុណ្ណោះដែលករណីឆ្លងឈានដល់ ១ លានករណីនៅក្នុង ១៧១ ប្រទេសនៅទូទាំងទ្វីបចំនួន ៦ ហើយបានសម្លាប់មនុស្សយ៉ាងតិច ៥១,០០០ នាក់ដោយសារវីរុសនេះ ។

នៅពេលដែលសេដ្ឋកិច្ចត្រូវបានប៉ះពាល់ដោយការបិទប្រទេសនៅជុំវិញពិភពលោកនោះភាពអត់ការងារធ្វើនៅលើពិភពលោកបានកើនឡើង ។ ប្រជាជនចំនួន ២០.៥ លាននាក់បានបាត់បង់ការងារនៅក្នុងខែមេសា ។ អ្នកវិភាគជាច្រើនជឿជាក់ថា វាអាចចំណាយពេលច្រើនឆ្នាំដើម្បីស្ដារឡើងវិញ ។

ថ្ងៃទី ២៦ ខែមេសា ឆ្នាំ ២០២០ ការស្លាប់នៅទូទាំងពិភពលោកកើនលើស ២០០,០០០ នាក់

នៅទូទាំងពិភពលោកវាជាព្រឹត្តិការណ៍មួយគួរឲ្យកត់សម្គាល់ ខណៈអ្នកឆ្លងវីរុសនេះត្រូវបានបញ្ជូន​ចូលព្យាបាលនៅមន្ទីរពេទ្យជាបន្តបន្ទាប់ ហើយបង្ខំឲ្យសាងសង់មន្ទីរពេទ្យបណ្តោះអាសន្នបន្ថែម ។

ស្ទើរតែពេញខែមេសា ការរាតត្បាតនៃវីរុសកូរ៉ូណាបានសម្លាប់មនុស្សជាង ២០០,០០០ នាក់ ហើយមានអ្នកជំងឺច្រើនជាង ២.៨ លាននាក់នៅទូទាំងពិភពលោក ខណៈដែលចំនួនពិត​ប្រាកដគឺអាចខ្ពស់ជាងនេះ ។

ថ្ងៃទី ១១ ខែឧសភា ឆ្នាំ ២០២០ បណ្តាប្រទេសជាច្រើនចាប់ផ្តើមកាត់បន្ថយការរឹតត្បិតការបិទប្រទេស

បន្ទាប់ពីរយៈពេលជាច្រើនខែនៃការបិទសាលារៀន ហាងទំនិញ មជ្ឈមណ្ឌលកម្សាន្ត និងព្រះវិហារ ហើយមនុស្សត្រូវបានប្រាប់ឲ្យស្នាក់នៅក្នុងផ្ទះ ប្រទេសមួយចំនួនបានផ្លាស់ប្តូរជាបណ្តើរៗក្នុងការ​បន្ធូរបន្ថយការរឹតត្បិតការបិទប្រទេសរបស់ពួកគេ ។

ប្រទេសអេស្ប៉ាញ អ៊ីរ៉ង់ អ៊ីតាលី ដាណឺម៉ាក អ៊ីស្រាអែល អាល្លឺម៉ង់ នូវែលហ្សេឡង់ និងថៃបានចាប់ផ្តើមវិលមករកជីវិតធម្មតាវិញ បើទោះបីជាមានការកើនឡើងនូវចំនួនអ្នកឆ្លង​វីរុសនេះក៏ដោយ ដោយសារតែសម្ពាធកើនឡើងក្នុងការស្តារសេដ្ឋកិច្ច ។

ប៉ុន្តែការសម្រេចចិត្តរបស់រដ្ឋាភិបាលរបស់ពួកគេបានបន្ថែមហានិភ័យនៃការរីករាលដាលនៃជំងឺកូវីដ ១៩ ដែលធ្វើឲ្យស្មុគស្មាញដល់កិច្ចខិតខំប្រឹងប្រែងជាសកលដើម្បីទប់ស្កាត់ជំងឺនេះ ។

ថ្ងៃទី ៣១ ខែឧសភា ឆ្នាំ ២០២០ ការតវ៉ាធំៗធ្វើឲ្យមានការព្រួយបារម្ភអំពីការឆ្លងថ្មី

ហ្វូងមនុស្សយ៉ាងច្រើននៅទូទាំងសហរដ្ឋអាមេរិក និងបណ្តាប្រទេសដទៃទៀតកំពុងជ្រើសរើស​យុត្តិធម៌សង្គមជាជាងការធ្វើគម្លាតសង្គម ។

មនុស្សរាប់ពាន់នាក់ចូលរួមធ្វើបាតុកម្មប្រឆាំងនឹងអំពើហិង្សារបស់ប៉ូលីសប្រឆាំងនឹងជនជាតិអាមេរិកដើមកំណើតស្បែកខ្មៅ បន្ទាប់ពីការស្លាប់របស់លោក George Floyd នៅក្នុងមន្ទីរឃុំឃាំងរបស់ប៉ូលិស Minneapolis បានជំរុញឲ្យមានការព្រួយបារម្ភថាការប្រមូលផ្តុំទាំងនេះអាចនាំឲ្យមានការផ្ទុះឡើងថ្មី ។

ថ្ងៃទី ២២ ខែមិថុនាឆ្នាំ ២០២០ អារ៉ាប៊ីសាអូឌីតបានដាក់កម្រិតយ៉ាងតឹងរឹងលើពិធីបុណ្យ Hajj នៅឆ្នាំនេះ

វិហារឥស្លាមដ៏ធំរបស់ទីក្រុម Mecca មានសភាពទទេស្អាត ។ អ្នកគោរពបូជា ២.៥ លាននាក់ធ្វើដំណើរមកទីនេះជារៀងរាល់ឆ្នាំ ប៉ុន្តែជំងឺកូវីដ ១៩ បានធ្វើឲ្យផែនការរបស់​មនុស្សគ្រប់គ្នាប្រែប្រួល ។

អាជ្ញាធរអារ៉ាប៊ីសាអ៊ូឌីតមិនអាចទទួលយកហានិភ័យនៃការរីករាលដាលនៃជំងឺរាតត្បាតនេះនោះទេ ពួកគេបានរារាំងប្រជាជនទាំងអស់ដែលធ្វើដំណើរមកពីបរទេសក្នុងការចូលរួមពិធីបុណ្យនេះ ។

ពិធីបុណ្យ Hajj គឺជាពិធីបុណ្យ​ដ៏អស្ចារ្យបំផុតនៃការគោរពបូជាដ៏ធំនៅក្នុងភពផែនដី ។

ថ្ងៃទី ៧ ខែកក្កដា ឆ្នាំ ២០២០ ប្រធានាធិបតីប្រេស៊ីលតេស្តវិជ្ជមានកូវីដ ១៩ ខណៈប្រជាជាតិមួយនេះក្លាយជាប្រទេសទី ២ ដែលរងគ្រោះខ្លាំងបំផុតនៅលើពិភពលោក

ប្រទេសនៅតំបន់អាមេរិកឡាទីនក៏ទទួលរងករណីឆ្លងជំងឺកូវីដ ១៩ ដ៏អាក្រក់បំផុតផងដែរ ។ នៅប្រទេសប្រេស៊ីលសេវាសុខភាពរៀបចំមិនបានល្អ ហើយបានវ៉ាដាច់ប្រទេសរុស្ស៊ីក្នុងករណី​ឆ្លងខ្ពស់បំផុតទីពីរនៅទូទាំងពិភពលោក ។

មេដឹកនាំរបស់ប្រទេសនេះមិនបានគេចផុតពីវីរុសនេះនោះទេ ខណៈលោកប្រធានាធិបតី Jair Bolsonaro បានប្រកាសនៅក្នុងបទសម្ភាសន៍មួយថា គាត់បានធ្វើតេស្តវិជ្ជមានកូវីដ ១៩ បន្ទាប់ពីបាននិយាយមើលងាយម្តងហើយម្តងទៀតពីភាពធ្ងន់ធ្ងរនៃជំងឺនេះ ។

លោក Bolsonaro ក្លាយជាមេដឹកនាំពិភពលោកទី ២ បន្ទាប់ពីនាយករដ្ឋមន្រ្តីអង់គ្លេសបានឆ្លងជំងឺនេះកាលពីខែមេសា ។

ថ្ងៃទី ១៧ ខែកក្កដា ឆ្នាំ ២០២០ ប្រទេសឥណ្ឌាមានករណីឆ្លងឡើងដល់មួយលានករណី

ប្រទេសឥណ្ឌាមានករណីឆ្លងជំងឺកូវីដ ១៩ ឡើងដល់មួយលានករណី ។ ជាមួយនឹងករណីឆ្លងថ្មីជិត ៣៥,០០០ ករណីត្រូវបានកត់ត្រាក្នុងមួយថ្ងៃ ប្រទេសឥណ្ឌាគឺជាប្រទេសដែលរងផល​ប៉ះពាល់អាក្រក់បំផុតទី ៣ នៅលើពិភពលោក ។

ប្រជាជននៅប្រទេសអាស៊ីខាងត្បូងមួយនេះមានប្រហែល ១.៣ ពាន់លាននាក់ ដូច្នេះអ្នកជំនាញបាននិយាយថា ករណីឆ្លងចំនួន ១ លាននាក់នៅទាបនៅឡើយ ប៉ុន្តែការឆ្លងកំពុងតែរីករាលដាលបន្ថែមទៀត ។

កិច្ចខិតខំប្រឹងប្រែងដើម្បីទប់ស្កាត់វីរុសនេះត្រូវបានអាជ្ញាធរដាក់ការបិទប្រទេស ខណៈតំបន់ខ្លះបាន​ប្រាប់ប្រជាជនឲ្យស្នាក់នៅក្នុងផ្ទះ ។

ថ្ងៃទី ១១ ខែសីហា ឆ្នាំ ២០២០ រុស្ស៊ីក្លាយជាប្រទេសដំបូងបង្អស់ក្នុងការអនុម័តវ៉ាក់សាំងកូវីដ ១៩

ប្រធានាធិបតីរុស្ស៊ីលោក វ្លាឌីមៀ ពូទីន និយាយថា ប្រទេសរុស្ស៊ីបានអនុម័ត​វ៉ាក់សាំងប្រឆាំងនឹងជំងឺកូវីដ ១៩ ទោះបីមិនទាន់បានបញ្ចប់ការសាកល្បងព្យាបាលដំណាក់កាលទី ៣ ក៏ដោយ ។

វ៉ាក់សាំងនោះមានឈ្មោះថា SputnikV ។ វ៉ាក់សាំងនេះត្រូវបានធ្វើតេស្តលើមនុស្សតែ ១៣៨ នាក់ប៉ុណ្ណោះដែលមួយក្នុងចំណោមនោះគឺជាកូនស្រីរបស់លោក ពូទីន តែម្ដង ។

វ៉ាក់សាំងនេះត្រូវបានគេដឹងថាផ្តល់ភាពស៊ាំប្រឆាំងនឹងជំងឺនេះរយៈពេលពីរឆ្នាំ ។ ប៉ុន្តែអ្នកជំនាញផ្នែក​វេជ្ជសាស្រ្តនិយាយថា វាលឿនពេកដើម្បីធានាសុវត្ថិភាព ។

ថ្ងៃទី ២៨ ខែកញ្ញា ឆ្នាំ ២០២០ អ្នកស្លាប់ទូទាំងពិភពលោកកើនលើស ១ លាននាក់

នេះគឺជាអ្វីដែលជំងឺកូវីដ ១៩ បានធ្វើលើយើង ថង់ខ្ចប់សាកសពនៅពាសពេញដី និងវាលស្រែរបស់យើងជាមួយនឹងផ្នូរធំៗ ។ ការស្លាប់នេះបានរាលដាលពីទីក្រុង Sao Paolo ប្រទេសប្រេស៊ីលរហូតទៅព្រៃ Amazon និងរយៈពេលពីរបីខែមុនទៅដល់ទីក្រុងញូវយ៉ក ។

ចំនួនអ្នកស្លាប់ដោយសារវីរុសកូរ៉ូណាបានកើនឡើងលើសពីមួយលាននាក់ ខណៈប្រទេសជាច្រើនមានការគ្រប់គ្រងមិនល្អ និងការធ្វើតេស្តតិចតួច ។

វីរុសនេះជាសង្គ្រាមលោកឆ្នាំ ២០២០ ប៉ុន្តែមិនដូចនៅសមរភូមិនោះទេ ជនរងគ្រោះភាគច្រើន​បានស្លាប់តែម្នាក់ឯង ។

ថ្ងៃទី ២ ខែតុលា ឆ្នាំ ២០២០ ប្រធានាធិបតីអាមេរិក ដូណាល់ ត្រាំ តេស្តវិជ្ជមានជំងឺកូវីដ ១៩

ជាថ្មីម្តងទៀតពិភពលោកមានការភ្ញាក់ផ្អើលចំពោះព័ត៌មានអំពីប្រធានាធិបតី ដូណាល់ ត្រាំ ។ លោក ត្រាំ បានប្រកាសថា គាត់បានធ្វើតេស្តវិជ្ជមានជំងឺកូវីដ ១៩ ។

បន្ទាប់ពីនិយាយមើលងាយពីភាពធ្ងន់ធ្ងរនៃការគំរាមកំហែងនេះអស់រយៈពេលជាច្រើនខែក្រោយមកលោក ត្រាំ គឺជាមេដឹកនាំចុងក្រោយនៃពិភពលោកដែលត្រូវបានគេធ្វើរោគវិនិច្ឆ័យថា​មានវីរុសនេះរួមជាមួយស្ត្រីទីមួយលោកស្រី Melania Trump ។

ការធ្វើរោគវិនិច្ឆ័យរបស់គាត់មិនដល់មួយខែនោះទេមុនការបោះឆ្នោតប្រធានាធិបតីខែវិច្ឆិកា ហើយបានធ្វើឲ្យមានភាពមិនប្រាកដប្រជាបន្ថែមទៀតនៅសប្តាហ៍ចុងក្រោយនៃយុទ្ធនាការឃោសនាបោះឆ្នោតចំពេលមានរោគរាតត្បាត ។

ថ្ងៃទី ៩ ខែវិច្ឆិកា ឆ្នាំ ២០២០ វ៉ាក់សាំងក្រុមហ៊ុន Pfizer-BioNTech ប្រកាសពីប្រសិទ្ធភាព ៩០ ភាគរយ

វ៉ាក់សាំងដែលត្រូវបានបង្កើតឡើងដោយក្រុមហ៊ុនឱសថអាមេរិក Pfizer និងក្រុមហ៊ុនដៃគូ BioNtech របស់អាល្លឺម៉ង់បានបង្ហាញពីអត្រាប្រសិទ្ធភាព ៩០ ភាគរយនៅក្នុងការសាកល្បងរបស់អ្នកចូលរួមជាង ៤៣,០០០ នាក់ ។

ក្រុមហ៊ុននេះក៏បាននិយាយដែរថាមិនមានការព្រួយបារម្ភអំពីសុវត្ថិភាពធ្ងន់ធ្ងរនោះទេ ហើយលទ្ធផល​នោះត្រូវបានវិភាគដោយគណៈកម្មាធិការឯករាជ្យ ។

នេះជាកាលបរិច្ឆេទជោគជ័យដំបូងពីការសាកល្បងព្យាបាលទ្រង់ទ្រាយធំ ហើយការចាក់វ៉ាក់សាំង​នឹងចាប់ផ្តើមនៅចុងខែធ្នូ ។

ថ្ងៃទី ១៦ ខែវិច្ឆិកា ឆ្នាំ ២០២០ ក្រុមហ៊ុនឱសថអាមេរិក Moderna និយាយថា វ៉ាក់សាំងខ្លួនមានប្រសិទ្ធភាព ៩៤ ភាគរយ

វាជាដំណឹងល្អបន្ថែមទៀតក្នុងការប្រយុទ្ធប្រឆាំងនឹងរោគរាតត្បាតនេះ បន្ទាប់ពីក្រុមហ៊ុនផលិតឱសថ​អាមេរិក Moderna បង្ហាញថា វ៉ាក់សាំងរបស់ខ្លួនមានប្រសិទ្ធភាព ៩៤ ភាគរយ ។

នេះគឺជាវ៉ាក់សាំងទី ២ នៅសហរដ្ឋអាមេរិកដែលមានអត្រាជោគជ័យខ្ពស់គួរឲ្យកត់សម្គាល់ ។ មនុស្សចំនួន ១៥,០០០ នាក់បានទទួលការចាក់វ៉ាក់សាំង ហើយក្នុងការចាក់នោះក៏បានធ្វើឡើង​លើមនុស្ស ១១ នាក់ដែលឆ្លងវីរុសនេះផងដែរ និងគ្មាននរណាម្នាក់មានជំងឺធ្ងន់ធ្ងរនោះទេ​ក្រោយការចាក់វ៉ាក់សាំងនេះ ខណៈវាអាចត្រូវបានដាក់ឲ្យប្រើប្រាក់មុនដំណាច់ឆ្នាំនេះ ។

ថ្ងៃទី ៨ ខែធ្នូ ឆ្នាំ ២០២០ អង់គ្លេសចាប់ផ្ដើមកម្មវិធីចាក់វ៉ាក់សាំងជាប្រវត្តិសាស្ត្រ

នេះគឺជាពេលដែលពិភពលោកទាំងមូលកំពុងរង់ចាំ ។ ចក្រភពអង់គ្លេសគឺជាប្រទេសដំបូងគេ​ដែលបានចាក់វ៉ាក់សាំងកូវីដ ១៩ របស់ក្រុមហ៊ុន Pfizer-Biontech ។

លោកយាយអាយុ ៩០ ឆ្នាំបានក្លាយជាមនុស្សដំបូងគេនៅលើពិភពលោកដែលបានទទួល​ការចាក់វ៉ាក់សាំងដែលមិនមែនជាការសាកល្បងព្យាបាល ។

វាជាពេលវេលាដ៏សំខាន់សម្រាប់ប្រទេសដែលមានចំនួនអ្នកស្លាប់ខ្ពស់បំផុតនៅអឺរ៉ុប និងផ្តល់នូវក្តី​សង្ឃឹមសម្រាប់ប្រជាជននាពេលអនាគត ។

សរុបមកក្នុងរយៈពេលមួយឆ្នាំ វីរុសនេះបានរាលដាលកាន់តែខ្លាំងឡើង ។ យើងបានឃើញ​ពីរបៀបដែលរដ្ឋាភិបាលនៅជុំវិញពិភពលោកមានប្រតិកម្មចំពោះវា ។

ឥឡូវនេះយើងកំពុងមើលឃើញពីរបៀបដែលមនុស្សត្រូវបានបង្ខំឲ្យផ្លាស់ប្តូរគ្រប់ផ្នែកនៃជីវិតរបស់ពួកគេ ។ នេះគឺជាស្ថានភាពដែលមានការវិវត្តយ៉ាងឆាប់រហ័ស ហើយគ្មាននរណាម្នាក់ដឹងថាតើ​នឹងមានអ្វីកើតឡើងបន្ទាប់នោះទេ ។

ប៉ុន្តែមានរឿងមួយច្បាស់ថាជំងឺកូវីដ ១៩ បានផ្លាស់ប្តូរឆ្នាំ ២០២០ ហួសពីការ​រំពឹងទុកសម្រាប់មនុស្សគ្រប់គ្នា និងនៅគ្រប់ទីកន្លែង ៕

ប្រែសម្រួលដោយ ៖ ជីវ័ន្ត

The post ព្រឹត្តិការណ៍សំខាន់ៗដែលវីរុសកូរ៉ូណាធ្វើឲ្យពិភពលោកភ័យខ្លាចក្នុងឆ្នាំ ២០២០ appeared first on Kampuchea Thmey Daily.