មន្ត្រីជំនាញបរិស្ថានខេត្តព្រះវិហារ បានឲ្យដឹងថា ប្រតិបត្តិការនេះដឹកនាំដោយ លោក នៅ ប្រុស អនុប្រធានការិយាល័យដែនជម្រកសត្វព្រៃព្រះរកា-ឆែប រួមជាមួយមន្ត្រីឧទ្យានុរក្សប្រចាំស្នាក់ការក្បាលដំរី។ កម្លាំងជំនាញបានធ្វើការឃាត់រថយន្តដឹកជញ្ជូនបទល្មើសធនធានធម្មជាតិ(ឈើជ្រុង) នៅចំណុចនិយាមកា (៥៣៦៧០៦-១៥៦១១៣៨) ស្ថិតក្នុងភូមិសែនតេជៈ ឃុំមរកត ស្រុកជាំក្សាន្ត ខេត្តព្រះវិហារ។

បើតាមរបាយការណ៍បានបង្ហាញទៀតថា សមត្ថកិច្ចបានធ្វើការដកហូតបានវត្ថុតាងបទល្មើស រួមមាន៖ រថយន្ត១គ្រឿង ម៉ាក Highlander ពណ៌ស្ករ ពាក់ផ្លាកលេខ ភ្នំពេញ 2AP-1443 ,ឈើប្រភេទសុក្រំ ចំនួន ០.៨៦៧ ម៉ែត្រត្រីគុណ។ ដោយឡែក តៃកុងរថយន្តដឹកឈើ មិនត្រូវបានឃាត់ខ្លួននោះឡើយ សង្ស័យរត់គេចក្នុងពេលសមត្ថកិច្ចស្ទាក់ចាប់រថយន្ត។ក្រោយការបង្ក្រាបវត្ថុតាងរថយន្ត និងឈើទាំងអស់ ត្រូវបានកម្លាំងសមត្ថកិច្ចនាំយកទៅរក្សាទុកជាបណ្តោះអាសន្ននៅស្នាក់ការក្បាលដំរី ដើម្បីរៀបចំសំណុំរឿងតាមនីតិវិធីច្បាប់ស្តីពីតំបន់ការពារធម្មជាតិ។

ទោះជាយ៉ាងនេះក្តី សកម្មភាពបង្ក្រាបរថយន្តដឹកឈើនេះ គេបានចាត់ទុក គឺជាផ្នែកមួយនៃកិច្ចខិតខំប្រឹងប្រែងយ៉ាងសកម្មរបស់មន្ត្រីឧទ្យានុរក្ស ក្នុងការការពារធនធានធម្មជាតិ និងទប់ស្កាត់បទល្មើសព្រៃឈើក្នុងតំបន់ដែនជម្រកសត្វព្រៃ ឱ្យមានប្រសិទ្ធភាពខ្ពស់បំផុត។

ជុំវិញការបង្ក្រាបបទល្មើសធនធានធម្មជាតិនៅតាមបណ្ដោយក្រវ៉ាត់ព្រំដែននៃខេត្តព្រះវិហារ នេះដែរ មហាជនបានកោតសរសើរដល់មន្ត្រីជំនាញនៃមន្ទីរបរិស្ថានខេត្តព្រះវិហារ ដែលបានចុះបង្ក្រាបទាន់ពេលវេលានៅការកាប់ឈើនិងទន្ទ្រានដីព្រៃរបស់រដ្ឋ។ការណ៍នេះគឺបានធ្វើឲ្យធនធានធម្មជាតិអាចនឹងកើនឡើងវិញដើម្បីជាគម្របព្រៃឈើដ៏ធំល្វឹងល្វើយនេះ ការពារខ្យល់ព្យុះ និងជាពិសេសការពារកុំឲ្យសត្រូវ មើលឃើញពីយុទ្ធសាស្ត្រនៅក្នុងខ្សែបន្ទាត់ព្រំដែនរបស់កម្ពុជា៕ដោយ៖ជុន កុសល

The post មន្ត្រីឧទ្យានុរក្សខេត្តព្រះវិហារ បង្ក្រាបរថយន្តដឹកឈើ ១ គ្រឿង ក្នុងដែនជម្រកសត្វព្រៃព្រះរការ-ឆែប ដើម្បីរក្សាគម្របព្រៃឈើឲ្យនៅគង់វង្ស appeared first on Kampuchea Thmey Daily.

ការបំផ្លិចបំផ្លាញនេះភាគច្រើនបណ្ដាលមកពីការប្រែប្រួលអាកាសធាតុ គ្រោះរាំងស្ងួតខ្លាំង និងការពង្រីកការប្រើប្រាស់ដីសម្រាប់កសិកម្ម។ នេះបើយោងតាមការចេញផ្សាយរបស់ការសែត Bangkok Post នៅថ្ងៃទី២១ខែឧសភានេះ។

យោងតាមរបាយការណ៍ ពិភពលោកបានបាត់បង់ព្រៃឈើចំនួន ៦.៧ លានហិកតា នៃព្រៃត្រូពិចក្នុងឆ្នាំ ២០២៤ កើនឡើង ៨០% ធៀបនឹងឆ្នាំមុន។ ភ្លើងឆេះព្រៃគឺជាមូលហេតុចំបង​បំផុត​​នៃការបាត់បង់ព្រៃឈើនៅតំបន់ត្រូពិច ជាពិសេសបង្កឱ្យមានការព្រួយបារម្មណ៍ចំពោះប្រព័ន្ធអេកូឡូស៊ី ដូចជា ព្រៃអាម៉ាហ្សូន ដែលមានលក្ខណៈសើមដោយធម្មជាតិ និងមិនងាយឆេះ។

ប្រទេសប្រេស៊ីលគឺជាប្រទេសដែលរងគ្រោះខ្លាំងជាងគេ ដោយបានបាត់បង់ព្រៃឈើត្រូពិចចំនួន ២.៨ លានហិកតា។ បញ្ហានេះបានកត់សម្គាល់ពីការផ្លាស់ប្តូរដ៏គួរឱ្យព្រួយបារម្ភនៃវឌ្ឍនភាពដែលបានធ្វើឡើងក្នុងឆ្នាំ ២០២៣ ក្រោមការដឹកនាំរបស់ប្រធានាធិបតី Luiz Inacio Lula da Silva ដែលបានសន្យាថា នឹងការពារព្រៃអាម៉ាហ្សូនជាងមុន។ ឥឡូវនេះមន្ត្រីរដ្ឋាភិបាលក្នុងប្រទេសប្រេស៊ីល បាន​និយាយថា ការទប់ស្កាត់ភ្លើងឆេះព្រៃត្រូវតែក្លាយជាគោលនយោបាយកំពូល។

នៅកន្លែងផ្សេងទៀតនៅអាមេរិកឡាទីន ដូចជាប្រទេសបូលីវី ក៏មានការកើនឡើងយ៉ាងខ្លាំងនៃការបាត់បង់ព្រៃឈើរហូតដល់ ២០០%។ ចំណែកប្រទេសផ្សេងទៀត ដូចជា ម៉ិកស៊ិក ប៉េរូ នីការ៉ាហ្គា និងហ្គាតេម៉ាឡា ក៏បាត់បង់ព្រៃឈើស្រដៀងគ្នានេះដែរ។

នៅទ្វីបអាហ្រ្វិក ការបាត់បង់ព្រៃឈើក៏បានកើនឡើងដែរនៅសាធារណរដ្ឋប្រជាធិបតេយ្យកុងហ្គោ ដែលមួយផ្នែកដោយសារជម្លោះប្រដាប់អាវុធដែលបង្កើនសម្ពាធលើធនធានធម្មជាតិ។

ចំពោះព្រៃឈើភាគខាងជើង តំបន់ដូចជាប្រទេសកាណាដា និងរុស្ស៊ីក៏បានកត់ត្រាការបាត់បង់ដើមឈើដែលបំបែកកំណត់ត្រាផងដែរ។ ដោយសារភ្លើងឆេះព្រៃដែលរីករាលដាល និងមិនអាចគ្រប់គ្រងបានបានបំផ្លាញព្រៃឈឺ ៥.២ លានហិកតា ។

យ៉ាងណាមិញ​អាស៊ី​អាគ្នេយ៍​បែរជាមាន​ភាព​ប្រសើរ​ឡើង​ដ៏​កម្រ ដោយ ប្រទេសឥណ្ឌូនេស៊ី ម៉ាឡេស៊ី និងឡាវបានកាត់បន្ថយការបាត់បង់ព្រៃឈើ តាមរយៈគោលនយោបាយអភិរក្សតឹងរឹង ការខិតខំប្រឹងប្រែងរបស់សហគមន៍ និងការគាំទ្រពីវិស័យឯកជន។

អ្នកជំនាញព្រមានថា ត្រូវការវិធានការជាសកលជាបន្ទាន់ដើម្បីតប់ស្កាត់ការបាត់បង់នេះ។ លោក Rod Taylor ប្រធាន WRI បានសង្កត់ធ្ងន់ថា រដ្ឋាភិបាលត្រូវតែបង្កើតយន្តការផ្តល់មូលនិធិឱ្យកាន់តែប្រសើរឡើង ដើម្បីគាំទ្រដល់ការអភិរក្សព្រៃឈើ។

លើសពីនេះកិច្ចប្រជុំកំពូលស្តីពីអាកាសធាតុពិភពលោកដែលគ្រោងនឹងធ្វើឡើងនៅទីក្រុង Belem ប្រទេសប្រេស៊ីលក្នុងខែវិច្ឆិកា មេដឹកនាំពិភពលោកកំពុងត្រូវបានជំរុញឱ្យចាត់ទុកវិបត្តិនេះជាអាទិភាពកំពូល៕

អត្ថបទ៖ ប៊ុន សុភាព

The post ពិភពលោកបាត់បង់ព្រៃឈើច្រើន​បំផុតក្នុងឆ្នាំ ២០២៤ ដោយសារភ្លើងឆេះនិងវិបត្តិអាកាសធាតុ appeared first on Kampuchea Thmey Daily.

មុននឹង សម្ដេចធិបតី សម្រេចជ្រើសរើសទីតាំងក្នុងខេត្តស្ទឹងត្រែងនេះ សម្រាប់ឱ្យពលរដ្ឋដែលក្រីក្រពិតប្រាកដទៅរស់នៅ គឺសម្ដេចធិបតី ហ៊ុន ម៉ាណែត នាយករដ្ឋមន្ត្រី បានឱ្យភាគីពាក់ព័ន្ធ បានសិក្សាលក្ខណៈបច្ចេកទេសបម្រើឱ្យជីវភាពដោយវិភាគប្រព័ន្ធក្សេត្រ-បរិស្ថាន សិក្សាពីគុណភាពដឹកសិកម្ម ស្រាវជ្រាវពីប្រភពទឹក និងវាយតម្លៃហេដ្ឋារចនាសម្ព័ន្ធចាំបាច់។

សេចក្ដីប្រកាសព័ត៌មាន នៃលទ្ធផលកិច្ចប្រជុំពេញអង្គគណៈរដ្ឋមន្ត្រី ឱ្យដឹងថា ៖«សម្តេចធិបតីនាយករដ្ឋមន្ត្រី បានសម្រេចកំណត់ យកចំណុចអូរសែវ ភូមិហាងសារ៉ាត ឃុំសាមហួយ ស្រុកសេសាន ខេត្តស្ទឹងត្រែង ជាទីតាំងជំហានទី១ ដោយគ្រោង ផ្តល់ដីជូនប្រជាពលរដ្ឋក្រីក្រីគ្មានដីពិតប្រាកដ ហើយមានបំណងទៅរស់នៅទីតាំងនេះ ចំនួន ៥០០គ្រួសារ ដោយ ក្នុងមួយគ្រួសារទទួលបានដីលំនៅឋាន និងដឹកសិកម្មទំហំសរុប ៣ហិកតា។ ជំហានបន្ទាប់នឹងផ្តល់ជូនចំនួន ៥០០គ្រួសារ បន្ថែមទៀតនៅទីតាំងដដែល។ តំបន់នេះ មានទំហំជិត ១០ ០០០ហិកតា ស្ថិតនៅជាប់ទីតាំងគម្រោង ដីសម្បទានសង្គមកិច្ច»។

គួរឱ្យដឹងថា  កាលពីថ្ងៃទី០៦ ខែវិច្ឆិកា ឆ្នាំ២០២៤   ព្រះមហាក្សត្រ នៃកម្ពុជា ទ្រង់ចេញព្រះរាជក្រឹត្យ បង្កើតគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃដើម្បីរួមគ្នាអភិវឌ្ឍដោយចីរភាព។

ការបង្កើតគណៈកម្មាធិការជាតិ ក្រោមគំនិតផ្ដួចផ្ដើមដ៏ខ្ពង់ខ្ពស់ដោយ សម្តេចមហាបវរធិបតី ហ៊ុន  ម៉ាណែត នាយករដ្ឋមន្ត្រី  ក្រោមគោលបំណងក្នុងការអនុវត្តកម្មវិធីផ្តល់ដីក្រោមទម្រង់សម្បទានដីសង្គមកិច្ចជូនប្រជាពលរដ្ឋក្រីក្រ គ្មានទីលំនៅ សម្រាប់សង់លំនៅឋាន និងខ្វះដីសម្រាប់ធ្វើកសិកម្មជាលក្ខណៈគ្រួសារ និងគាំទ្រគម្រោងអភិវឌ្ឍន៍សហគមន៍ ព្រមទាំងការពារព្រៃឈើនៅជិតទីតាំងផ្តល់ដីប្រកបដោយចីរភាព។

គណៈកម្មាធិការជាតិនេះ ជាយន្តការដឹកនាំ សម្របសម្រួល និងអនុវត្តកម្មវិធីផ្តល់ដី ការពារព្រៃដើម្បីរួមគ្នាអភិវឌ្ឍ ដោយចីរភាព ក្នុងគោលដៅផ្តល់ដីក្រោមទម្រង់សម្បទានដីសង្គមកិច្ច ជូនប្រជាពលរដ្ឋក្រីក្រគ្មានដីពិតប្រាកដ និង គាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។ យន្តការនេះមិនទៅ ជំនួសយន្តការដែលមានស្រាប់ (ថ្នាក់ជាតិ រាជធានី ខេត្ត ស្រុក ខណ្ឌ ឃុំ សង្កាត់) នោះទេ តែជាយន្តការបំពេញបន្ថែ ហើយទន់ភ្លន់ មានតម្លាភាព ដែលអាចប្រើប្រាស់បានទៅតាមកន្លែង និងស្ថានភាពខុសៗគ្នា។ គណៈកម្មាធិការនេះ ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាប្រធាន អមដោយអនុប្រធានចំនួន ១១រូប និងសមាជិកចំនួន ៥១រូប និងមានលេខាធិការដ្ឋានមួយជាសេនាធិការ។

ជាលទ្ធផល លេខាធិការដ្ឋាន ផ.ក.អ. បានចុះកំណត់ទីតាំងដី និងផ្ទៀងផ្ទាត់នៅទីតាំងតំបន់អូរឃ្លៀង អូរសែវ អូរចំបក់ ក្រឡាពស់ ស្ថានីយ៍ផ្សព្វផ្សាយភូតតាគាម និងអូរប្រាំដំឡឹង ក្នុងខេត្តស្ទឹងត្រែង និងបានសហការជាមួយ រដ្ឋបាលថ្នាក់ក្រោមជាតិចុះសម្រង់បញ្ជីឈ្មោះអ្នកទន្ទ្រានដីនិងដាំដុះ និងកំណត់និយាមការផ្ទះ ទីតាំងដីនៅ តំបន់អូរចំបក់ និងអូរសែវ។ លេខាធិការដ្ឋាន ផ.ក.អ. បានចុះបណ្តុះបណ្តាលផ្ទៃក្នុងតម្រង់ទិសជាប្រចាំដល់មន្ត្រី លេខាធិការដ្ឋាន និងបានចុះបណ្តុះបណ្តាលនិងផ្សព្វផ្សាយស្តីពីការអនុវត្ត “កម្មវិធីផ្តល់ដី ការពារព្រៃដើម្បី រួមគ្នាអភិវឌ្ឍដោយចីរភាព» ចំនួន ៦ទីតាំង (ភូមិភាគ) មាន ២៥រាជធានី ខេត្ត ដែលមានអ្នកចូលរួមសរុបចំនួន ៣ ៥១៩នាក់ ដោយចាប់ផ្តើមពីថ្ងៃទី១៥ ដល់ ២១ ខែមករា ឆ្នាំ២០២៥។

តាមការគ្រោងទុកកម្មវិធីនេះ នឹងដាក់ឱ្យដំណើរការជំហានទី១ ចាប់ពីថ្ងៃទី០១ ខែកុម្ភៈ ឆ្នាំ២០២៥ តទៅ ដោយមានចំនួន ៥ដំណាក់កាលសំខាន់ៗ រួមមាន ទី១. ដំណាក់កាលរៀបចំ (ការកំណត់ទីតាំងផ្តល់ដី ការផ្សព្វផ្សាយ និងផ្តល់ពត៌មាន) ទី២. ដំណាក់កាលបច្ចេកទេស ទី៣. ដំណាក់កាលពិនិត្យភាពសមស្រប (ការជ្រើសរើស) ទី៤. ដំណាក់កាលពិនិត្យ សម្រេច និងផ្តល់សុពលភាព និង ទី៥. ដំណាក់កាលផ្តល់ដី ការពារព្រៃ និងការអភិវឌ្ឍ៕

ដោយ៖ ង៉ិល ណារ៉ាត់

The post កម្មវិធីផ្ដល់ដីការពារព្រៃ៖ ពលរដ្ឋក្រីក្រពិត ក្នុង១គ្រួសារនឹងបានដី៣ហិកតា បើសិនទៅរស់នៅស្រុកសេសាន ខេត្តស្ទឹងត្រែង appeared first on Kampuchea Thmey Daily.

ព្រឹត្តិការណ៍នេះរៀបចំឡើងដោយអង្គការកម្ពុជាអភិវឌ្ឍន៍សហគមន៍ និងបរិស្ថាន ដោយបាននាំយកកូនឈើ ចំនួន ៣ពាន់ដើម មានកូនរាំង តាអួរ ផ្ទោល កន្សែង ម្តេញ និងសណ្តាន់ យកទៅដាំលើផ្ទៃដីព្រៃលិចទឹករេចរឹលចំនួន ២ ហិកតា នៅចំណុចស្រែខ្យង ឃុំសសរស្តម្ភ ស្រុកពួក ខេត្តសៀមរាប។

ថ្លែងនាឱកាសនោះ លោក អ៊ឹង គឹមលាង បានលើកឡើងថា ព្រៃឈើ គឺជាសរសៃឈាមក្នុងវិស័យ កសិកម្ម ដែលជាអាយុជីវិតរបស់ប្រជាកសិករ និងជាប្រភពនៃកំណើននៃសេដ្ឋកិច្ចជាតិ។ ដូច្នេះត្រូវរួមគ្នាថែរក្សា ការពារព្រៃឈើ សត្វព្រៃ និងដំាដើមឈើឱ្យបានគ្រប់ៗគ្នា។ លោកថា ការដាំកូនឈើព្រៃលិចទឹកនេះ គឺជាការស្តារឡើង វិញនូវតំបន់ព្រៃរេចរឹល ដើមី្បបង្កើននូវធនធានធម្មជាតិ និងជាទីកន្លែងជម្រងពូជមច្ឆាជាតិពងកូន នៅក្នុងរដូវវស្សា និងជាទីជម្រកស្នាក់នៅរបស់សត្វស្លាបគ្រប់ប្រភេទទៀតផង។

លោកអភិបាលរងខេត្ត បានគូសបញ្ជាក់ទៀតថា គោលដៅរបស់អាជ្ញាធរខេត្ត ក្នុងស្តារឡើងវិញនូវព្រៃលិចទឹក ដោយបានចលនាប្រជាពលរដ្ឋ អាជ្ញាធរមូលដ្ឋានគ្រប់លំដាប់ថ្នាក់ កងកម្លាំង និងសិស្សានុសិស្ស ក៏ដូចជាអង្គការដៃគូរ ដើមី្បធ្វើការដាំដុះកូនឈើព្រៃលិចទឹក នៅតាមតំបន់ព្រៃរេចរឹល ក្នុងមួយឆ្នាំឱ្យបាន ២ម៉ឺនដើម។ តែមកដល់ពេលនេះ រដ្ឋបាលខេត្ត សហការជាមួយ អង្គការដៃគូរ ធ្វើការដាំដុះកូនឈើព្រៃលិចទឹក បានចំនួន៣ គោលដៅ ស្មើ ១ម៉ឺន ៣ពាន់ដើម ព្រមទាំងបន្តធ្វើការដាំដុះនៅកន្លែងផ្សេងៗទៀតនៅក្នុងតំបន់ព្រៃលិចទឹក មាត់បឹងទន្លេសាបនេះ។

លោក អ៊ឹង គឹមលាង បានសង្កត់ធ្ងន់ថា ព្រៃឈើពិតជាផ្តល់នូវអត្ថប្រយោជន៍ និងមានសារៈសំខាន់ណាស់ ចំពោះសង្គមមនុស្ស និងសត្វ ព្រោះវាអាចស្រូបយកឧស្ម័នការបូនិច្ច និងបញ្ចេញមកវិញនូវឧស្ម័នអុកស៊ីសែន កាត់បន្ថយកំដៅ ផ្តល់នូវទីជម្រករបស់មនុស្ស សត្វ ជួយបង្កើននូវជីវជាតិដី ទប់ទល់ការហូរច្រោះនិយ័តកម្ម ផ្តល់នូវប្រភពទឹក និងជារបាំងការពារខ្យល់ព្យុះទៀតផង។ ទន្ទឹមនេះ ព្រៃឈើលិចទឹកក៏បានរួមចំណែកដល់អេកូទេសចរណ៍ និងបង្កើតការងារ ដល់ប្រជាពលរដ្ឋ និងជាប្រភពចំណូលដ៏សំខាន់សម្រាប់សហគមន៍មូលដ្ឋាន តាមរយៈការទាក់ទាញភ្ញៀវទេសចរណ៍ជាតិ អន្តរជាតិ មកទស្សនាកំសាន្តជាដើម។

លោកអភិបាលរងខេត្ត បានអំពាវនាវ ដល់ប្រជាពលរដ្ឋទាំងអស់ រួមទាំងព្រះសង្ឈ មន្ត្រីរាជការ សិស្ស កងកម្លាំង ប្រជាពលរដ្ឋ ត្រូវយកចិត្តទុកដាក់ដាំដើមឈើគ្រប់ប្រភេទឱ្យបានច្រើនជាអតិបរិមា នៅតាមវត្តអារាម ភូមិដ្ឋាន ទីសាធារណៈ តាមប្រព័ន្ធទំនប់ប្រឡាយ តាមដងផ្លូវនានា និងត្រូវខិតខំថែរក្សារុក្ខជាតិទាំងអស់នេះឱ្យបានល្អ ដើម្បីជាផលប្រយោជន៍ដល់ខ្លួនឯងផ្ទាល់ ក៏ដូចជាមនុស្សជាតិទាំងមូល។

ចំណែក លោក ស៊ិន ចាន់ថុល អភិបាលស្រុកពួក បានបញ្ជាក់ថា ការដាំដើមឈើមានអត្ថន័យដ៏ជ្រាលជ្រៅសម្រាប់ចលនាបំផុសស្មារតីប្រជាពលរដ្ឋ ឱ្យចេះស្រឡាញ់ព្រៃឈើ ចូលរួមក្នុងការដាំដុះ និងការពារព្រៃឈើ ក៏ដូចជាការជួយផ្ដល់ផលប្រយោជន៍ឱ្យប្រជាពលរដ្ឋ ក្នុងការរស់នៅប្រចាំថ្ងៃ ដើម្បីបង្កបង្កើនផលកសិកម្ម បង្កើនសុខមាលភាពគ្រួសារ ព្រមទាំងជួយលើកស្ទួយបរិស្ថានសង្គម និងមូលដ្ឋានរបស់ខ្លួនផងដែរ៕ 

អត្ថបទ៖ គឿន វេត

The post អភិបាលរងខេត្តសៀមរាប៖ ព្រៃឈើជាសរសៃឈាមក្នុងវិស័យកសិកម្ម និងជាប្រភពនៃកំណើនសេដ្ឋកិច្ចជាតិ appeared first on Kampuchea Thmey Daily.

ការ​លើក​ឡើង​នេះ ក្នុង​ឱកាស ឯកឧត្ដម ហ៊ុន ម៉ានី បាន​អញ្ជើញ​ជា​អធិបតី​ដ៏​ខ្ពង់ខ្ពស់​ក្នុង​ពិធី​បើក​ពិព័រណ៍​ផ្សព្វផ្សាយ និង​ចែក​កូន​ឈើ ក្រោម​មូលបទ«ពន្លក​បៃតង» និង​វេទិកា​កេសរ​កូល​ជាតិ​លើក​ទី ៤ នៅ​ទីស្ដីការ​ក្រសួងបរិស្ថាន កាលពី​រសៀល​ថ្ងៃ​ទី ១០ ខែ​កក្កដា ឆ្នាំ ២០២៤ ម្សិលមិញ។

នា​ឱកាស​នោះ​ដែរ ឯកឧត្ដម ហ៊ុន ម៉ានី បាន​លើក​ឡើង​បន្ត​ថា សាធារណជន អាច​អញ្ជើញ​ទៅ​ទស្សនា និង​ទទួល​យក​កូន​ឈើ​ដោយ​ឥតគិតថ្លៃ​នៅ​ទីស្ដីការ​ក្រសួង​បរិស្ថាន។

ឯកឧត្ដម ហ៊ុន ម៉ានី លើក​ឡើង​បន្ត​ទៀត​ថា មិន​ថា​មន្ត្រីរាជការ មិន​ថា​កុមារា កុមារី ឬក៏​សាធារណជន​ទូទៅ សុទ្ធតែ​ផ្សារភ្ជាប់​ទៅ​នឹង​បរិស្ថាន ហើយ​មាន​តួនាទី​គ្រប់ៗគ្នា ក្នុង​ការ​ចូលរួម​ថែរក្សា​បរិស្ថាន។ ចាប់ពី​ថ្ងៃនេះ រហូត​ដល់​ថ្ងៃ​ទី ១២ ខែ​កក្កដា ឆ្នាំ ២០២៤ សាធារណជន​ទាំងអស់ អាច​អញ្ជើញ​ទៅ​ទស្សនា​ពិព័រណ៍​ផ្សព្វផ្សាយ និង​ចែក​កូន​ឈើ ក្រោម​មូលបទ «ពន្លក​បៃតង» និង​វេទិកា​កេសរ​កូល​ជាតិ​លើក​ទី ៤ នៅ​មុខ​ទីស្ដីការ​ក្រសួង​បរិស្ថាន ដើម្បី​ចូលរួម​ក្នុង​ការ​ថែរក្សា​បរិស្ថាន និង​ចូលរួម​បង្កើត​ទម្លាប់​ល្អ ដើម្បី​ជួយ​ដល់​បរិស្ថាន​របស់​យើង។

ឯកឧត្ដម ហ៊ុន ម៉ានី លើក​ឡើង​បន្ថែម​ថា ព្រឹត្តិការណ៍​នេះ គឺជា​ការ​ឆ្លុះ​បញ្ចាំង​នូវ​សកម្មភាព​ជា​យុទ្ធសាស្ត្រ ស្រប​តាម «មុំ នៃ​ភាព​បៃតង​ក្នុង​យុទ្ធសាស្ត្រ​ច​ក្រា​វិស័យ​បរិស្ថាន ឆ្នាំ ២០២៣-២០២៨» ដែល​ជា​យុទ្ធសាស្ត្រ​រៀបចំ​ឡើង​ដោយ​អនុលោម​យុទ្ធសាស្ត្រ​បញ្ចកោណ​ដំណាក់កាល​ទី ១ ក្រោម​ការ​ដឹកនាំ​របស់ សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា សំដៅ​តម្រង់​ទិស និង​ចង្អុលបង្ហាញ​អាទិភាព​ការងារ ក្នុង​ការ​លើក​កម្ពស់​កិច្ច​គាំពារ​បរិស្ថាន ការ​ការពារ​ធនធាន​ធម្មជាតិ និង​ការ​អភិវឌ្ឍ​ដោយ​ចីរភាព ដើម្បី​ឆ្ពោះ​ទៅ​សម្រេច​ការ​អភិវឌ្ឍ​ប្រកប​ដោយ​អព្យាក្រឹត​កាបូន​នៅ​ត្រឹម​ឆ្នាំ ២០៥០។

ជាមួយ​នេះ ឯកឧត្ដម​ឧបនាយករដ្ឋមន្ត្រី ក៏បាន​លើក​ឡើង​បន្ថែម​ទៀត​ថា លើស​ពី​នេះ ការ​រៀបចំ​ពិព័រណ៍​ផ្សព្វផ្សាយ ចែក​កូនឈើ និង​វេទិកា​កេសរ​កូ​ល​ជាតិ​លើក​ទី ៤ នា​ពេលនេះ ក៏​ជា​ការ​បង្ហាញ​អំពី​សុ​ឆន្ទៈ និង​ការ​ប្ដេជ្ញា​ចិត្ត​របស់​រាជរដ្ឋាភិបាល អាណត្តិ​ទី ៧ និង​គោល​នយោបាយ​របស់​ក្រសួង​បរិស្ថាន ក៏ដូចជា​ការ​ចូលរួម​របស់​ដៃគូ​ពាក់ព័ន្ធ​ទាំងអស់ ក្នុង​ការ​អនុវត្ត​អនុសញ្ញា​សហប្រជាជាតិ​ស្ដីពី​ជីវចម្រុះ និង​អនុសញ្ញា​ក្របខណ្ឌ​សហប្រជាជាតិ​ស្ដីពី​ការ​ប្រែប្រួល​អាកាសធាតុ​ក្នុង​នាម​កម្ពុជា ជា​រដ្ឋ​ភាគី​មួយ​ផង​ដែរ។

គួរ​ជម្រាប​ថា ពិធី​បើក​ពិព័រណ៍​ផ្សព្វផ្សាយ និង​ចែក​កូន​ឈើ ក្រោម​មូលបទ «ពន្លក​បៃតង» និង​វេទិកា​កេសរ​កូល​ជាតិ​លើក​ទី ៤ ក៏​មាន​ការ​អញ្ជើញ​ចូលរួម​ពី លោក​បណ្ឌិត អ៊ាង សុផល្លែត រដ្ឋមន្ត្រី​ក្រសួង​បរិស្ថាន លោក សុខ សុកេន រដ្ឋមន្ត្រី​ក្រសួង​ទេសចរណ៍ លោក ហែម វណ្ណឌី រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ រួម​ជាមួយ​ថ្នាក់​ដឹកនាំ​មកពី​ក្រសួង-ស្ថាប័ន​ពាក់ព័ន្ធ ឯកអគ្គរាជទូត ឯកអគ្គរដ្ឋទូត សមាជិក​ក្រុម​ប្រឹក្សា​ពិគ្រោះ និង​ផ្តល់​យោបល់ ដៃគូ​អភិវឌ្ឍន៍ វិស័យ​ឯកជន អង្គការ​ជា​ដៃគូ បណ្ដាញ​កេសរ​កូល​នៅ​កម្ពុជា ថ្នាក់​ដឹកនាំ​ក្រសួង​បរិស្ថាន និង​មន្ទីរ​បរិស្ថាន​ទាំង ២៥ រាជធានី-ខេត្ត ព្រមទាំង​សាស្ត្រាចារ្យ អ្នក​សិក្សា​ស្រាវជ្រាវ សិស្ស និស្សិត និង​ប្រជាពលរដ្ឋ​ចូលរួម​យ៉ាង​ច្រើន​កុះករ​ផង​ដែរ៕

The post ឯកឧត្ដម ហ៊ុន ម៉ានី ៖ ការចែកកូនឈើជូនសាធារណជនដោយឥតគិតថ្លៃ ជាការជំរុញសម្រេចឲ្យបានគម្របព្រៃឈើ ៦០ ភាគរយ នៃផ្ទៃប្រទេស ត្រឹមឆ្នាំ ២០៥០ appeared first on Kampuchea Thmey Daily.

តាមព្រះរាជសុន្ទរកថា ព្រះករុណា ព្រះមហាក្សត្រកម្ពុជា បានមានព្រះរាជបន្ទូលថា រុក្ខទិវា ជាវប្បធម៌ដ៏ប្រសើរ ដែលព្រះថេរានុត្ថេរៈគ្រប់ព្រះអង្គ អាជ្ញាធរជាតិគ្រប់ថ្នាក់ និងប្រជាពលរដ្ឋទាំងអស់នៅទូទាំងប្រទេសបានចូលរួមដាំដើមឈើ ដោយមានទស្សនរួមគឺ «ការចូលរួមដាំដើមឈើ និងការពារព្រៃឈើ គឺជាការជួយដល់ខ្លួនឯង ទាំងជីវភាពរស់នៅប្រចាំថ្ងៃ ទាំងសុវត្ថិភាពពីគ្រោះធម្មជាតិ ទាំងក្តីសង្ឃឹមសម្រាប់កូនចៅជំនាន់ក្រោយ»។

ព្រះករុណា ព្រះមហាក្សត្រ បានយកឱកាសនេះថ្លែងអំណរគុណចំពោះប្រទេសជាមិត្ត និងអង្គការជាតិ-អន្តរជាតិនានាដែលបានចូលរួមគាំទ្រដល់ការងារដាំដើមឈើ និងការថែរក្សាការពារធនធានព្រៃឈើ-សត្វព្រៃ និងបានអំពាវនាវឱ្យបន្តសកម្មភាពដ៏ថ្លៃថ្លាទាំងនេះ ដើម្បីជួយគាំទ្រកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងដើម្បីជាប្រយោជន៍ដល់ពិភពលោកទាំងមូល។

ព្រះមហាក្សត្រនៃកម្ពុជា ក៏បានឧទ្ទិសឱ្យពិធីរុក្ខទិវា ស្ថិតក្នុងបេះដូងរបស់ប្រជាជនកម្ពុជាគ្រប់ៗរូប និងក្លាយជាប្រពៃណីនៃការរួមសាមគ្គីគ្នាដាំដើមឈើគ្រប់ប្រភេទ និងការថែរក្សាការពារ និងអភិវឌ្ឍធនធានព្រៃឈើ និងសត្វព្រៃ ដែលជាមរតកជាតិឱ្យបានគង់វង្សរហូតតទៅ។ ព្រះមហាក្សត្រ បានសង្កត់ធ្ងន់ថា ការដាំដើមឈើ គឺមានផលប្រយោជន៍ដ៏ធំធេងណាស់ សម្រាប់ប្រទេសជាតិ ដែលធ្វើឱ្យមានគម្របបៃតងលើធម្មជាតិ ហើយមានអត្ថប្រយោជន៍សម្រាប់មនុស្សជាតិទាំងអស់គ្នា និងសត្វគ្រប់ប្រភេទនៅលើភពផែនដី។

គួរជម្រាបថា ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត បានផ្តួចផ្តើមរៀបចំ ពិធីរុក្ខទិវា គឺជាព្រះរាជតំរិះផ្តួចផ្តើមរៀបចំដោយព្រះករុណាព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ដែលស្ដេចទ្រង់សព្វព្រះរាជហឫទ័យយាងជាព្រះរាជាធិបតីក្នុងពិធីនេះជារៀងរាល់ឆ្នាំនៅតាមបណ្តាខេត្តនានាចាប់តាំងពីសម័យសង្គមរាស្ត្រនិយម ដើម្បីបំផុស និងលើកទឹកចិត្តកូនចៅរបស់ព្រះអង្គ ចូលរួមថែរក្សាការពារព្រៃឈើ និងដាំដើមឈើនៅទូទាំងប្រទេស។ រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន ជាអតីតនាយករដ្ឋមន្ត្រី និងបច្ចុប្បន្ន សម្តេចធិបតី ហ៊ុន ម៉ាណែត ជានាយករដ្ឋមន្ត្រី បានបន្តរៀបចំជារៀងរាល់ឆ្នាំចាប់ពីឆ្នាំ ១៩៩២មក៕

The post ព្រះមហាក្សត្រ អំពាវនាវឱ្យបន្តការដាំដើមឈើ និងថែរក្សាការពារធនធានព្រៃឈើ-សត្វព្រៃឱ្យបានគង់វង្ស appeared first on Kampuchea Thmey Daily.

ទីតាំងកាប់ទន្ទ្រានដីព្រៃខាងលើស្ថិតនៅចំណុចអូរវល្លិ៍ប្រាំដំឡឹង ក្នុងតំបន់ភូមិសាស្រ្តអូរតាឡាស ឃុំសំអាង ស្រុកថាឡា បរិវ៉ាត់ និងឃុំព្រះ រំកិល ស្រុកបុរីអូរស្វាយសែនជ័យ ខេត្តសឹ្ទងត្រែង និងភូមិកំពុងព្រះអិន ឃុំកំពុងស្រឡៅ ស្រុកឆែប ខេត្តព្រះវិហារ។

លោក ភីវ មេឃុំព្រះរំកិល ស្រុកបុរីអីរស្វាយសែនជ័យ ខេត្តសឹ្ទ ងត្រែងបានឲ្យដឹងថា រឿងក្រុមអនាធិបតេយ្យដែលមកពីតាមបណ្តាលខេត្តនានា ដែលកាប់បំផ្លាញព្រៃរបស់រដ្ឋរាប់សិបហិកតា ខាងលើនោះ សមត្ថកិច្ចបានចុះធ្វើការត្រួតពិនិត្យមើលហើយ កាលពីប៉ុន្មានថ្ងៃមុននេះ។

លោកមេឃុំព្រះរំកិលបានបញ្ជាក់បន្ថែមថា ករណីកាប់រុករានទន្រ្ទានព្រៃរបស់រដ្ឋខាងលើនោះ ប្រមាណជាង១០០គ្រួសារលោកបានជម្រាបនិងរាយការ ណ៍ដល់លោកអភិបាលស្រុកអស់ហើយ ត្រង់គេចាត់វិធានការយ៉ាងណានោះ លោកក៍មិនសូវដឹងច្បាស់ដែរ។

លោក លី មីណា អភិបាលស្រុកបុរីអូរស្វាយសែនជ័យ ខេត្តសឹ្ទងត្រែង បានញ្ជាក់អ្នកយកព័ត៌មានថា
មេក្លោង​កាត់​​ទន្ទ្រានដីព្រៃខាងលើនោះ យើងបានកំណត់មុខសញ្ញាបានហើយ គឺឈ្មោះ អ៊ិន ភុំ ជាមេក្លោងបានឃោសនាថា ចែកដីឲ្យប្រជាពលរដ្ឋក្នុងមួយគ្រួសារទទួលបានក្បាលដី៥០ បណ្តោយ៦០០ម៉ែត្រ។

លោកអភិបាលស្រុកបុរីអូរស្វាយសែនជ័យ ខេត្តសឹ្ទងត្រែងបញ្ជាក់បន្ថែមថា:កម្លាំងមន្រ្តីបរិស្ថានបានចុះឃ្លាំមើលពីសកម្មភាព​​​ក្រុមកាប់ព្រៃ បើសិននៅតែធ្វើសកម្មភាពកាប់រុករានព្រៃរបស់រដ្ឋបន្តទៀត អញ្ចឹងចំណាត់ការរបស់តុលាការបន្តប្រហែលជាចុះរុះរើឬដុតកម្ទេចចោលទីតាំងខាងលើនោះ ជាក់ជាមិនខានឡើយ។

លោកបន្តថា ក្រោយពីក្រុមអនាធិតេយ្យជាច្រើនគ្រួសារនៅតែកាប់រុករានទន្រ្ទានព្រៃរបស់រដ្ឋរាប់សិបហិកតា ដែលនៅភូមិ -ឃុំខាងលើនោះ លោកបានចុះណែនាំអប់រំរួចហើយរហូតមកទល់ពេលនេះ គឺនៅតែដេកចងតង់ និងសាសង់ខ្ទម-ផ្ទះលាក់ខ្លួនពួនសម្ងំនៅក្នុងព្រៃដោយមានឈ្មោះ អ៊ិន ភុំជាមេខ្លោង ដោយសារតែសកម្មភាពខាងលើនេះ នៅតែបន្ត តុលា​ការខេត្តស្ទឹងត្រែងបានចេញដីកាបង្គាប់ឲ្យមេខ្លោងចូលខ្លួនបំភ្លឺក្នុងករណីខាងលើនេះហើយ បើមិនអនុវត្តទៅតាមដីកានោះទេ តុលាការ និងបន្តមតិវិធីតាមផ្លូវច្បាប់៕

អត្ថបទ៖ ងិនលីម

The post តុលាការខេត្តស្ទឹងត្រែងចេញដីកាបង្គាប់ឲ្យមេខ្លោងកាប់ទន្ទ្រានដីព្រៃរបស់រដ្ឋបំភ្លឺ appeared first on Kampuchea Thmey Daily.

ព្រឹត្តិការណ៍ដំណើរទេសចរណ៍សត្វព្រៃ ក៏រៀបចំឡើងដើម្បីដើរតួនាទីជាបទប្បញ្ញត្តិអាកាសធាតុ បង្កើតជាប្រភពថាមពល និងបានជួយគាំទ្រដល់ជីវភាពរស់នៅរបស់ប្រជាពលរដ្ឋ។ បន្ថែមពីនេះ ព្រឹត្តិការណ៍នេះ ក៏នឹងផ្តោតសំខាន់លើខ្លឹមសារ សំខាន់ៗចំនួនបី គឺ១)មានព្រៃឈើមានប្រភពទឹក ២)សត្វខ្លាធំជួយរក្សាលំនឹងប្រព័ន្ធអេកូឡូស៊ី និង៣)គ្មានអន្ទាក់គ្មានការបរិភោគសាច់សត្វព្រៃ។

ក្នុងព្រឹត្តិការណ៍នេះ នឹងមានការលេងល្បែងកំសាន្ត ការសម្ដែងសៀកបែបវិទ្យាសាស្ត្រ រួមទាំងមានការចាប់រង្វាន់ផងដែរ។ ការសម្ដែងសៀកបែបវិទ្យាសាស្ត្រនេះ គឺមានការចូលរួមសម្ដែងដោយដៃគូសហការរបស់អង្គការសម្ព័ន្ធមិត្តសត្វព្រៃមកពីក្រៅប្រទេស គឺ«ក្រុម BASEET» និងការសម្តែងដោយតារាចម្រៀងល្បីប្រចាំខេត្តកោះកុង លោក រាជ វិចិត្រ។

អង្គការសម្ព័ន្ធមិត្តសត្វព្រៃ ត្រូវបានបង្កើតឡើងដោយកញ្ញាបណ្ឌិត ស៊ូវណ្ណា ហ្គោនឡែត ដើម្បីផ្តល់ការការពារដោយផ្ទាល់ដល់ព្រៃឈើ និងសត្វព្រៃ តាមរយៈកម្មវិធីអភិរក្សបែបទំនើប។

អង្គការនេះបានផ្តល់ជំនួយបច្ចេកទេសដល់រាជរដ្ឋាភិបាល ក៏ដូចជាកិច្ចខិតខំឲ្យមានការឯកភាពគ្នារវាងភាគីពាក់ព័ន្ធក្នុងការសម្រេចបានដំណោះស្រាយចំពោះការគំរាមកំហែងបញ្ហាបរិស្ថាន ដែលរួមមាន ការជួញដូរសត្វ ការផ្ដល់ដីសម្បទានសេដ្ឋកិច្ចសម្រាប់ដំណាំកសិឧស្សាហកម្ម ការជីកយករ៉ែ និងការទន្ទ្រានយកដីព្រៃ។ អង្គការសម្ព័ន្ធមិត្តសត្វព្រៃ គឺជាអ្នកដឹកនាំក្នុងការចាត់វិធានការផ្ទាល់នៅក្នុងតំបន់ខ្សែក្រវ៉ាត់ត្រូពិចអាស៊ីអាគ្នេយ៍៕

ដោយ៖ ធឿន វ៉ាន់សុង

The post អង្គការសម្ព័ន្ធមិត្តសត្វព្រៃរៀបចំព្រឹត្តិការណ៍ទេសចរណ៍ដើម្បីផ្សព្វផ្សាយពីព្រៃឈើ appeared first on Kampuchea Thmey Daily.