ព្រៃលិចទឹក Archives - Kampuchea Thmey Daily

ភ្លើងឆេះព្រៃលិចទឹក និងព្រៃត្រែង៣កន្លែងក្នុងតំបន់៣ អស់៣៦ហិកតា

Sokhom Khon — Thu, 02 May 2024 06:51:11 +0000

ភ្លើងឆេះព្រៃលិចទឹក និងព្រៃត្រែងចំនួន ៣កន្លែង ដីតំបន់៣ នៅក្នុងភូមិសាស្ត្រឃុំពាមឆ្កោក ឃុំពាមឆ្កោក ស្រុកជល់គិរីអស់៣៦ហិកតា នេះបើយោងតាមរបាយការណ៍របស់ក្រុមការងារចម្រុះនៃគណៈបញ្ជាការឯកភាពរដ្ឋបាលស្រុកជលគីរីដែលបានចុះត្រួតពិនិត្យនៅព្រឹកថ្ងៃទី០១ ខែឧសភា ឆ្នាំ២០២៤។

ក្រុមការងារចម្រុះបានឲ្យដឹងថា ការចុះត្រួតពិនិត្យភ្លើងឆេះព្រៃនៅចំណុចខាងលើនេះដឹកនាំដោយលោក ម៉េង ហួតអភិបាលរងស្រុក នៃគណៈបញ្ជាការឯកភាពរដ្ឋបាលស្រុកជលគីរី ដោយមានការចូលរួមពីមន្ត្រីជំនាញជលផល មន្ត្រីនគរបាលស្រុក មន្ត្រីកងរាជអាវុធហត្ថស្រុក អាជ្ញាធរឃុំពាមឆ្កោក សហគមន៍នេសាទនៅក្នុងមូលដ្ឋានផងដែរ សរុបមាន ចំនួន៨នាក់។

លទ្ធផលនៃការចុះត្រួតពិនិត្យឃើញនៅចំណុចទី១ ព្រែកក្បាលក្របីត្រើយខាងកើតត្រូវភ្លើងឆេះព្រៃអស់ប្រមាណ ១៥ ហិកតា។ ចំណុចទី២ ព្រែកតូចខាងកើតត្រូវភ្លើងឆេះព្រៃអស់ប្រមាណ ១៧ ហិកតា។ ចំណុចទី៣ ព្រែកតូចខាងលិចត្រូវភ្លើងឆេះព្រៃអស់ប្រមាណ ៤ ហិកតា។ សរុបទាំង៣កន្លែងនេះ ពិតជាត្រូវភ្លើងឆេះព្រៃលិចទឹក និងព្រៃត្រែងក្នុងតំបន់៣ អស់ប្រមាណ ៣៦ ហិកតា។

រដ្ឋបាលខេត្តកំពង់ឆ្នាំង រដ្ឋបាលស្រុកជលគីរី និងអាជ្ញាធរភូមិឃុំសូមអំពាវនាវដល់ប្រជាពលរដ្ឋប្រជានេសាទទាំងអស់នៅក្នុងមូលដ្ឋានសូមជួយថែរក្សាការពារព្រៃលិចទឹកកុំឲ្យភ្លើងឆេះ ដូចជាកុំចោលភ្លើងបារីក្នុងព្រៃ ពេលដាំបាយក្នុងព្រៃ ត្រូវពន្លត់ភ្លើងឲ្យអស់ ការយកឃ្មុំក្នុងព្រៃក៏ត្រូវប្រយ័ត្នកុំឱ្យភ្លើងឆេះព្រៃ ដែលនាំឲ្យខូចខាតបាត់បង់ជំរកត្រីពងកូន ក៏ដូចជាព្រៃ លិចទឹក ដែលមានសារៈសំខាន់ណាស់សម្រាប់ជីវភាពរស់នៅរបស់យើងទាំងអស់គ្នា។ បើឃើញមានភ្លើងឆេះព្រៃត្រូវរា យការណ៍ជាបន្ទាន់ដល់អាជ្ញាធរដែលមានដើម្បីមានវិធានការពន្លត់ភ្លើងព្រៃឲ្យបានទាន់ពេលវេលា៕

អត្ថបទ៖ ឈៀងថារិទ្ធ

The post ភ្លើងឆេះព្រៃលិចទឹក និងព្រៃត្រែង៣កន្លែងក្នុងតំបន់៣ អស់៣៦ហិកតា appeared first on Kampuchea Thmey Daily.

ប្រធានមន្ទីរកសិកម្មខេត្តកំពង់ឆ្នាំងថានឹងមិនលើកលែងជាដាច់ខាតចំពោះជនល្មើសដែលលួចឈូសឆាយដីព្រៃលិចទឹក

Kang Tola — Mon, 10 Jul 2023 15:18:29 +0000

កំពង់ឆ្នាំង ៖ បន្ទាប់ពីមានសេចក្តីរាយការណ៍ពីប្រជាពលរដ្ឋ មន្ត្រីជំនាញរដ្ឋបាលជលផលដឹកនាំដោយលោក តាត សីហាក់ នាយផ្នែករដ្ឋបាលជលផលកំពង់ឆ្នាំង នៅព្រឹកថ្ងៃទី០៦ ០៧ ២០២៣ បានដឹកនាំក្រុមការងារចុះពិនិត្យទៅលើទីតាំងដីព្រៃលិចទឹកក្នុងតំបន់ ៣មួយកន្លែងនៅចំណុចយាយភាជ ស្ថិតក្នុងឃុំច្រណូក ស្រុកកំពង់លែង មន្ត្រីជំនាញបានឃើញសកម្មភាពគ្រឿងចក្រ៣គ្រឿងកំពុងធ្វើ សកម្មភាពឈូសឆាយនៅចំណុចខាងលើ នេះបើតាមការបញ្ជាក់ពីមន្ត្រីជំនាញរដ្ឋបា លជលផលម្នាក់ នៅរសៀលថ្ងៃទី១០ ខែកក្កដា ឆ្នាំ២០២៣ ដែលបានចូលរួមក្នុងការចុះពិនិត្យសកម្មភាពឈូសឆាយ ដីព្រៃលិចទឹកក្នុងតំបន់ចំណុចខាងលើនេះ។

ករណីនេះ លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង នៅរសៀលថ្ងៃទី ១០ ខែកក្កដានេះឲ្យដឹងថា ករណីនេះលោកគ្រាន់តែបានទទួលដំណឹងតាមប្រព័ន្ធផ្សព្វផ្សាយរប ស់បណ្ដាញសង្គមមួយចំនួនតែប៉ុណ្ណោះលោកពុំទាន់ទទួលបានរបាយការណ៍ពីមន្ត្រីជំនាញរបស់លោកច្បាស់លាស់នៅឡើយទេ លោកនឹងរង់ចាំមើលរបាយការណ៍ពីមន្ត្រីជំនាញរបស់លោកសិន ប្រសិនបើរកឃើញមានការចូលឈូសឆាយដីព្រៃ លិចទឹករបស់រដ្ឋពិតមែន លោ កនិងសុំគោលការណ៍ពីលោកអភិ បាលខេត្តដើម្បីរៀបចំគណៈកម្មការចម្រុះចុះពិនិត្យ ទីតាំងភូមិសាស្ត្រខាងលើនេះនឹងទីតាំងមួយ ចំនួនទៀតស្ថិតក្នុងចំណុចក្បែរៗគ្នាដែលមានការឈូសឆាយនោះ។

លោកប្រធានមន្ទីរបានបញ្ជាក់ឲ្យដឹងទៀតថា លោកនិងអនុវត្តនីតិវិធីច្បាប់ទី១.រៀប ចំរបាយការណ៍បញ្ជូនទៅតុលាការ, ទី២- លោកនិងធ្វើការស្រាវជ្រាវរកអ្នកពាក់ព័ន្ធទាំងអស់ដើម្បីនាំខ្លួនយកមកអនុវត្តទោសតាមនីតិវិធីរបស់តុលាការដោយមិនមាន ការលើកលែងនោះឡើយ ។ព្រោះករណី នេះមិនត្រឹមតែផ្គើនច្បាប់តែប៉ុណ្ណោះទេ ថែម ទាំងបានប្រឆាំងយ៉ាងធ្ងន់ធ្ងរជាមួយ នឹងបទបញ្ជារបស់សម្ដេចតេជោទៀត ផង។

ដោយឡែកលោក លី ឡា នាយខណ្ឌរដ្ឋ បាលជលផលកំពង់ឆ្នាំង បានបញ្ជាកឱ្យដឹងថា ករណីនេះលោកបានទទួលសេចក្តីរាយការណ៍ពីលោកនាយផ្នែករដ្ឋបាលជលផលកំពង់ឆ្នាំងខ្លះៗហើយ ដែលបានបញ្ជាក់ថា មន្ត្រីជំនាញរបស់លោកបានរកឃើញការឈូសឆាយដីព្រៃលិចទឹករបស់រដ្ឋមានទំហំ ខូចខាតដីតំបន់បីជាដីព្រៃ លិចទឹកហូតជាង៥០ហិកតា ក្នុងនោះមន្ត្រីជំនាញរបស់លោកក៏បានរឹបអូសបានវត្ថុតាងមានម៉ូតូចំនួន៣គ្រឿងរបស់ជនសង្ស័យបានបន្សល់ទុកនៅកន្លែងកើតហេតុផងដែរ។ ករណីនេះមន្ត្រីជំនាញរបស់លោកមានវត្ថុតាងនៅក្នុងដៃស្រាប់ ហើយ សម្រាប់ស្រាវជ្រាវវែកមុខរកជនល្មើសយកមកផ្ដន្ទាទោសទៅតាមច្បាប់។

ជុំវិញករណីខាងលើនេះ លោក តាត សីហាក់ នាយផ្នែករដ្ឋបាលជលផលកំពង់ ឆ្នាំង ដែលលោកបានដឹកនាំកម្លាំងចុះទៅពិនិត្យទី តាំងដែលជនល្មើសលួចចូលឈូសឆាយបំផ្លិចបំផ្លាញដីព្រៃលិ ចទឹករបស់រដ្ឋខាងលើនេះ លោកក៏បានប្រាប់ តាមទូរស័ព្ទនៅរសៀលថ្ងៃទី១០ ខែកក្កដា ឆ្នាំ២០២៣ នេះថា ករណីខាងលើនេះបន្ទាប់ពីលោកទទួលបានការណែនាំរបស់លោកប្រធានមន្ទីរកសិកម្ម លោកក៏បានដឹកនាំកម្លាំងចុះ ទៅពិនិត្យនិងចុចរកលេខកូដនិយាមកានៅលើទីតាំងដីនោះជាក់ ស្ដែង ជាលទ្ធផលរកឃើញថា ដីនោះជាដីព្រៃលិចទឹករបស់រដ្ឋ(ដីតំបន់៣)ស្ថិតក្នុងចំណុចយាយភាជ ក្នុងភូមិឯលិច ឃុំច្រ ណូក ស្រុកកំពង់លែងត្រូវបានគេលួចឈូសឆាយទំហំ៥ ២.៩៦ ហិកតា។

ក្នុងកិច្ចប្រតិបត្តិការខាងលើនេះដែរ លោកក៏បានឃើញគ្រឿងចក្រចំនួន៣គ្រឿងកំពុងធ្វើសកម្មភាព តែនៅពេលដែលឃើញក្រុមសមត្ថកិច្ចរបស់លោកចុះទៅដល់ ពួកគេក៏បានបើកគ្រឿងចក្រគេចអស់ ដោយបន្សល់ទុកម៉ូតូចំនួន៣ គ្រឿងដែលជារបស់ក្រុមជនសង្ស័យនៅ កន្លែងកើតហេតុ៕

ដោយ ៖ ឈៀងថារិទ្ធ

The post ប្រធានមន្ទីរកសិកម្មខេត្តកំពង់ឆ្នាំងថានឹងមិនលើកលែងជាដាច់ខាតចំពោះជនល្មើសដែលលួចឈូសឆាយដីព្រៃលិចទឹក appeared first on Kampuchea Thmey Daily.

មន្ត្រីជំនាញ ចុះបង្ក្រាបការឈូសឆាយដីព្រៃលិចទឹក នៅឃុំល្វា ស្រុកព្រៃឈរ

Kang Tola — Tue, 30 May 2023 15:00:07 +0000

កំពង់ចាម ៖ លោក អ៊ុក ណារិន នាយខណ្ឌរដ្ឋបាលជលផល នៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ចាម បានអោយដឹងថា នៅថ្ងៃទី៣០ ខែឧសភា ឆ្នាំ២០២៣ ក្រោយទទួលបានការណែនាំរបស់ លោក អ៊ុន ចាន់ដា អភិបាល នៃគណៈអភិបាល ខេត្តកំពង់ចាម ក្នុងការចុះពិនិត្យ និងទប់ស្កាត់បទល្មើស ដែលកើតមានឡើង ចំនួន ០២កន្លែងស្ថិតនៅក្នុងស្រុកព្រៃឈរ លោកក៏បានដឹកនាំក្រុមការងារ សហការជាមួយ អាជ្ញាធរមូលដ្ឋាន ចុះទៅបង្ក្រាប និងដកហូតវត្ថុតាង ពីជនល្មើស ដោយផ្ទាល់ភ្លាមៗ។

លោកនាយខណ្ឌ បានបញ្ជាក់ថា ជាក់ស្ដែង កាលពីថ្ងៃទី១០ ខែឧសភា កន្លងទៅ ក្រុមការងារចម្រុះ ក៏បានចុះពិនិត្យលើសកម្មភាពឈូសឆាយ ពង្រីកដីកសិកម្ម ចំនួន ២ទីតាំង គឺ ៖ ទីតាំងទី១ ស្ថិតនៅភូមិតាចាក់ ឃុំល្វា ស្រុកព្រៃឈរ ដោយ ឈ្មោះ សូត្រ ឃី អាយុ ៥០ឆ្នាំ និងប្រពន្ធ ឈ្មោះ ជាប សេង អាយុ ៥៥ឆ្នាំ ឈូសឆាយព្រៃលិចទឹកប្រហែល ៤០អា ដែលទីតាំងនេះ បានខកខានអាស្រ័យផល ១០ឆ្នាំ មកហើយ ។ និងឈ្មោះ ស៊ឹម ភឿន និងឈ្មោះ គ្រឹង ថុល ត្រូវជាប្រពន្ធ បានឈូសឆាយ នៅចំណុចត្រពាំងជីនាង ភូមិជីនាង ឃុំល្វា ស្រុកព្រៃឈរ ។ ចំពោះ ករណីកើតឡើង នៅទីតាំងទី២ គឺស្ថិតនៅភូមិមេមាំង ឃុំល្វា ឈ្មោះ សុង ឆុន បានរុញដីពង្រីកថ្នាលសំណាបចាស់ ធ្លាប់អាស្រ័យផលរហូតដល់ព្រៃ ក្នុងអាងទឹកតាខៅបួន សរុបទំហំដីចាស់ និងថ្មីចំនួន ១៦.៧៤៣ម៉ែត្រការ៉េ ។ និងឈ្មោះ ស្តើង ចំរើន, ឡាច គិន និងឈ្មោះ ខឹម ប៉ុង ដែលបានឈូសឆាយយកដីក្នុងអាងទឹកតាខៅបួន អស់ទំហំ ១០.៨៤៦ម៉ែត្រការ៉េ ។

បន្ទាប់មក ក្រុមការងារចម្រុះ ក៏បានកោះហៅបុគ្គលទាំងនោះ មកធ្វើការណែនាំ និងធ្វើកិច្ចសន្យាបញ្ឈប់សកម្មភាពនេះ ព្រមទាំង ដកហូតមកវិញនូវដីសាធារណៈរបស់រដ្ឋ មិនឲ្យអាស្រ័យផល នៅកន្លែងដែលមានការប៉ះពាល់ ដល់ធនធានជលផល ផងដែរ។

ក្នុងករណីមិនរាងចាលនៅតែប្រព្រឹត្តជាងលើកទីពីរ និងធ្វើផ្ទុយពីកិច្ចសន្យា មន្ត្រីមានសមត្ថកិច្ចនឹងកសាងសំណុំរឿងបញ្ជូនទៅតុលាការ។

ដោយឡែក ក្រៅពីករណីខាងលើនេះកាល ពីថ្ងៃទី១៥ ខែឧសភា ឆ្នាំ២០២៣ ខណ្ឌរដ្ឋបាលជលផលកំពង់ចាម សហការជាមួយរដ្ឋបាលស្រុក អធិការនគរបាលស្រុក និងកងរាជអាវុធហត្ថស្រុកព្រៃឈរ រួមជាមួយ កម្លាំងប៉ុស្តិ៍នគរបាលរដ្ឋបាលឃុំល្វា បានចុះប្រតិបត្តិការ បង្ក្រាបបទល្មើសជលផល ដោយបានផ្អាកសកម្មភាពឃាត់គ្រឿងចក្រ(ត្រាក់ទ័រ) ចំនួន ០៣គ្រឿង ដែលបានធ្វើសកម្មភាពគាស់កកាយយកដី ដែលមានក្នុងដែននេសាទ ដោយគ្មានការអនុញ្ញាត។

លោក អ៊ុក ណារិន បានអះអាងដែរថា ក្រោយពីកសាងសំណុំរឿង តាមនីតិវិធីហើយនោះ កាលពីថ្ងៃទី១៧ ខែឧសភា កន្លងទៅ ជនសង្ស័យទាំងអស់ ក៏បានចូលខ្លួនមកសារភាពកំហុស ហើយយើងក៏បានធ្វើការពិន័យអន្តរការណ៍ ស្របតាមមាត្រា៩៦ ចំណុច ៤ នៃច្បាប់ស្តីពីជលផល ព្រមទាំង បានប្រគល់វត្ថុតាងគ្រឿងចក្រ មានត្រាក់ទ័រ ចំនួន ០៣គ្រឿង ត្រឡប់ឲ្យទៅម្ចាស់ដើមវិញ ផងដែរ៕

អត្ថបទនិងរូបភាព ឡេក ចាន់ពេជ្រ

The post មន្ត្រីជំនាញ ចុះបង្ក្រាបការឈូសឆាយដីព្រៃលិចទឹក នៅឃុំល្វា ស្រុកព្រៃឈរ appeared first on Kampuchea Thmey Daily.

ស្រុក ៣ ប៉ុណ្ណោះនៃខេត្តត្បូងឃ្មុំ មានតំបន់ព្រៃលិចទឹក

Din Thary — Thu, 27 Apr 2023 07:27:35 +0000

លោក ជាម ច័ន្ទសោភណ្ឌ អភិបាលនៃគណៈអភិបាលខេត្តត្បូងឃ្មុំ បានអះអាងថា បច្ចុប្បន្ននេះ នៅភូមិសាស្រ្តនៃខេត្តត្បូងឃ្មុំ មានស្រុក ៣ប៉ុណ្ណោះ ដែលមានតំបន់ព្រៃលិចទឹក គឺនៅស្រុកក្រូចឆ្មារ ស្រុកត្បូងឃ្មុំ និងស្រុកអូររាំងឪ។

ក្នុងឱកាសថ្លែងពីភាពជោគជ័យរបស់ខេត្តត្បូងឃ្មុំ រយៈពេល ៥ឆ្នាំកន្លងមក នៅអង្គភាពអ្នកនាំពាក្យ លោក ជាម ច័ន្ទសោភណ្ឌ លើកឡើងថា បច្ចុប្បន្ននេះខេត្តត្បូងឃ្មុំ មានតំបន់អភិរក្សចំនួន ៣ ទី១ តំបន់ប្រើប្រាស់ច្រើនយ៉ាងបឹងការដេរ ស្ថិតនៅក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ មានផ្ទៃដីប្រមាណ ១៦៤៣ហិតា។

នៅតំបន់ព្រៃលិចទឹកបឹងការដេរ មាននៅវត្តមានសត្វល្មូនជាច្រើនប្រភេទ ក៏ដូចជាសត្វស្លាបប្រមាណជិត ៤០ប្រភេទ ព្រមទាំងវត្តមានសត្វខ្លាត្រី ដែលជាសត្វកម្រ និងស្ទើរផុតពូជផងដែរ។ ដោយឡែកទី២ តំបន់ព្រៃឫស្សីវត្តឃ្មួង មានផ្ទៃដីប្រមាណជា ១២៥៤ហិតា ដែលស្ថិតនៅក្នុងភូមិសាស្ត្រស្រុកត្បូងឃ្មុំ ខេត្តត្បូងឃ្មុំ។ និង ទី៣ តំបន់ព្រៃលិចទឹកបឹងកាពិត ដែលស្ថិតនៅក្នុងភូមិសាស្ត្រស្រុកអូររាំងឪ ខេត្តត្បូងឃ្មុំ មានផ្ទៃដីប្រមាណ ១២៤៨ហិតា។

លោក ជាម ច័ន្ទសោភណ្ឌ អះអាងថា ដោយសារនៅក្នុងភូមិសាស្ត្រនាខេត្តត្បូងឃ្មុំ មាននៅតំបន់ព្រៃលិចទឹកតែ ៣កន្លែងខាងលើនេះ ហេតុដូចនេះក្នុងនាមជារដ្ឋបាលខេត្ត ក៏ដូចជាកងកម្លាំងទាំង ៣ប្រភេទ និងមន្ត្រីគ្រប់សេនាធិការទាំងអស់ នឹងខិតខំព្យាយាមធ្វើយ៉ាងរក្សានូវតំបន់ទាំងនេះឱ្យបានគង់វង្ស ដើម្បីអាចបន្សល់ទុកឱ្យយុវជនជំនាន់ក្រោយបានស្គាល់ និងបានដឹង ក៏ដូចជាស្នើឲ្យមានការចូលរួមសហការពីប្រជាពលរដ្ឋសម្រាប់មុខមាត់ខេត្តត្បូងឃ្មុំទាំងមូល។

គួរបញ្ជាក់ដែរថា កាលពីពេលកន្លងទៅ រដ្ឋបាលខេត្តត្បូងឃ្មុំ ដែលដឹកនាំដោយលោក ជាម ច័ន្ទសោភណ្ឌ បានរៀបចំនូវកិច្ចប្រជុំមួយ ដើម្បីសិក្សាពីលទ្ធភាពនៃការដាក់តំបន់ព្រៃលិចទឹក ព្រៃឫស្សីមាត់ឃ្មួង ក្នុងភូមិសាស្ត្រស្រុកត្បូងឃ្មុំ ព្រមទាំងតំបន់បឹងកាពិត ក្នុងភូមិសាស្ត្រស្រុកត្បូងឃ្មុំ ជាតំបន់ការពារធម្មជាតិបន្ថែមទៀតផងដែរ។ ជាក់ស្ដែងនៅក្នុងតំបន់ប្រើប្រាស់ច្រើនយ៉ាងបឹងការដេរ ជាដែនជម្រកសត្វស្លាបកម្រ មច្ឆា ចំណីអាហារ (ត្រី ជលផល និងអនុផល) ដែលជាប្រភពទឹកដ៏សំខាន់សម្រាប់ការប្រើប្រាស់របស់ប្រជាសហគមន៍ និងដំណាំកសិកម្ម៕

The post ស្រុក ៣ ប៉ុណ្ណោះនៃខេត្តត្បូងឃ្មុំ មានតំបន់ព្រៃលិចទឹក appeared first on Kampuchea Thmey Daily.

កូនឈើ ១៥,០០០ដើម ត្រូវបានដាំនៅតំបន់ព្រៃលិចទឹក ជុំវិញបឹងទន្លេសាបក្នុងភូមិសាស្រ្តខេត្តសៀមរាប

sopheak khoun — Thu, 05 May 2022 08:30:33 +0000

នៅព្រឹកថ្ងៃទី ៥ ខែឧសភា ឆ្នាំ ២០២២នេះ ក្រសួងបរិស្ថាន បានបន្តដាំកូនឈើ ១៥, ០០០ដើម នៅតំបន់ព្រៃលិចទឹក តំបន់៣ នៃតំបន់បឹងទន្លេសាប ក្នុងភូមិសាស្រ្តខេត្តសៀមរាប។ ពិធីដាំកូនឈើនេះ ធ្វើឡើងក្រោមអធិបតីភាពលោក សេន ណាស៊ី អនុរដ្ឋលេខាធិការក្រសួងបរិស្ថាន ដោយមានការចូលរួមពីថ្នាក់ដឹកនាំក្រសួង តំណាងគណៈអភិបាលខេត្តសៀមរាប មន្ទីរពាក់ព័ន្ធ កងកម្លាំងប្រដាប់អាវុធគ្រប់ប្រភេទ អាជ្ញាធរមូលដ្ឋាន យុវជន ប្រជាពលរដ្ធ និងសិស្សានុសិស្សជាច្រើននាក់ នៅភូមិទី ៦ សង្កាត់ចុងឃ្នាស់ ក្រុងសៀមរាប ខេត្តសៀមរាប។

នៅក្នុងឱកាសនោះលោក ពិន ប្រាកដ អភិបាលរងខេត្តសៀមរាប បានឲ្យដឹងថា ស្របតាមយុទ្ធសាស្រ្តរបស់រាជរដ្ឋាភិបាលកម្ពុជា រដ្ឋបាលខេត្តសៀមរាប បានចូលរួមការពារ និងអភិរក្សព្រៃលិចទឹកតំបន់ ៣ ក្នុងភូមិសាស្រ្តខេត្តសៀមរាន ដើម្បីធ្វើឲ្យមានជីវៈចម្រុះសម្បូរបែប លើកស្ទួយជីវភាពសហគមន៍ឲ្យរុងរឿង និងចូលរួមអភិវឌ្ឍសេដ្ឋកិច្ចជាតិ ។

ចំណែកលោក សេន ណាស៊ី បានលើកឡើងថា ការដាំស្តារឡើងវិញដើមឈើ នៅតំបន់ព្រៃលិចទឹកតំបន់ ៣ នៃបឹងទន្លេសាបនាពេលនេះ ស្របនឹងការប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ក្រោមប្រធានបទ «ថែភពផែនដី ដើម្បីសុខភាពយើង ដែលបំផុសគំនិតចូលរួមថែរក្សាព្រៃឈើឲ្យបានគង់វង្ស ដែលជាប្រយោជន៍ដល់អ្នកជំនាន់ក្រោយ»។

លោកអនុរដ្ឋលេខាធិការ បានចាត់ទុកថា ការចូលរួមពីអ្នកពាក់ព័ន្ធដាំស្តារព្រៃលិចទឹក គឺការទទួលខុសត្រូវ លើការគ្រប់គ្រងធនធានធម្មជាតិ អនាគតភូមិ ឃុំ និងជាជោគវាសនានៃមាតុភូមិយើង។

សូមបញ្ជាក់ថា នេះជាលើកទី២ ដែលការដាំស្តារឡើងវិញ នៅតំបន់ព្រៃលិចទឹកតំបន់ ៣ នៃតំបន់បឹងទន្លេសាប រៀបចំក្នុងភូមិសាស្រ្តខេត្តសៀមរាប ដោយមានកូនឈើ ១៥,០០០ដើម រួមមានដើមសណ្តាន់ និងម្តេញ នៅលើដីចំនួន ៣៥ហិកតា។

ក្រសួងបរិស្ថាន បានសហការជាមួយរដ្ឋបាលខេត្តសៀមរាប បានរៀបចំដាំស្តារព្រៃលិចទឹក នៅតំបន់៣ នៃបឹងទន្លេសាប លើកទី ១ កាលពីថ្ងៃទី ២៥ ខែមករា ឆ្នាំ ២០២២ មានកូនឈើចំនួន ២,០០០ដើម លើដីទំហំ ៥ហិចតា៕

The post កូនឈើ ១៥,០០០ដើម ត្រូវបានដាំនៅតំបន់ព្រៃលិចទឹក ជុំវិញបឹងទន្លេសាបក្នុងភូមិសាស្រ្តខេត្តសៀមរាប appeared first on Kampuchea Thmey Daily.

វិធានការដកដីព្រៃលិចទឹកតំបន់៣ គឺដើម្បីការពារធនធានមច្ឆាជាតិក្នុងបឹងទន្លេសាបសម្រាប់ពលរដ្ឋទូទាំងប្រទេស

Sokhom Khon — Fri, 25 Mar 2022 00:42:14 +0000

ឯកឧត្តម ស៊ុនសុ វណ្ណារិទ្ធិ អភិបាល នៃគណៈអភិបា លខេត្តកំពង់ឆ្នាំង មានប្រសាសន៍បែបនេះ នៅក្នុងឱកាសអញ្ជើញជួបសំណេះសំណាលជាមួយបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ចំនួន ៨៨នាក់ នៅស្រុកកំពង់លែងនៅព្រឹកថ្ងៃទី២៤ ខែមីនា ឆ្នាំ២០២២ ជាមួយក្រុមការងារថ្នាក់ជាតិ ថ្នាក់ខេត្ត និងថ្នាក់ស្រុកជាច្រើនរូបផងដែរ ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានពន្យល់ដល់បេក្ខជនឈរឈ្មោះបោះឆ្នោតក្រុមប្រឹក្សាឃុំ ដើម្បីឲ្យពួកគាត់ជួយអប់រំដល់បងប្អូនប្រជាពលរដ្ឋនៅក្នុងមូលដ្ឋានយល់ដឹងដើម្បីទប់ស្កាត់ចំពោះការវាយប្រហារពីក្រុមជនអគតិថា ប្រសិនបើយើងបន្តអោយដីព្រៃលិច ទឹកតំបន់៣ ជុំវិញបឹងទន្លេសាបចំនួន ៦៤ ម៉ឺនហិកតារងការកាប់បំ ផ្លាញពីជនខិលខូចទៀតនោះ យើ ងនឹងបាត់បង់ត្រីក្នុងបឹងទន្លេសាបទាំងមូល ។ និងតើប្រជាពលរដ្ឋខ្មែរជាង១៦លាននាក់ នឹងក្នុងពេលខា ងមុខនិងកើនឡើង ៣០ ឬ៤០សិបលាននាក់នោះ តើកូនចៅយើងជំនា ន់ក្រោយមានអីហូប ។

យើងត្រូវគិតថា ការដកដីព្រៃលិច ទឹកនេះ បើយើងបានដាំដុះដើមឈើព្រៃលិចទឹកឡើងវិញ សម្រាប់ជាជម្រ កត្រីពងកូន និងសម្រាប់ជីវៈនៅជុំវិញបឹងទ ន្លេសាប នោះមច្ឆាជាតិយើងនិងសម្បូរឡើងវិញ ប្រជានេ សាទអាចចាប់ត្រីលក់មួយគីឡូបានប៉ុន្មាន!! និងបើធ្វើស្រែលក់ស្រូវ ១ គី ឡូបានប៉ុន្មាន ហើយការធ្វើស្រែនេះ យើងដាក់ជីគីមីពេលភ្លៀងទៅជីគីមីទាំងនោះហូរចូលទៅក្នុងបឹងបួរនិងទន្លេសាបតើមច្ឆាជាតិអាចសំបូរបានទេ ។

ដោយឡែកចំពោះអនុសាសន៍ថ្មីៗនេះរបស់សម្ដេចតេជោនាយករដ្ឋម ន្ត្រី ទាក់ទងនឹងការបង្ក្រាបបទល្មើសនេសាទវិញនោះ ឯកឧត្តមអភិបាល ខេត្ត ក៏បានថ្លែងអំណរគុណដល់ប្រ ជាពលរដ្ឋក្នុងនៅក្នុងខេត្តដែលបានស្វ័យភ្ញាក់រលឹកប្រគល់នូវអាំងវ៉ាត់ទ័រឆក់ត្រីជាង ៣០០គ្រឿង តាមការអំ ពាវនាវរបស់អាជ្ញាធរខេត្ត និងសមត្ថ កិច្ច ។ ចំពោះយុទ្ធនាការបង្ក្រាបបទ ល្មើសនេសាទវិញនោះ គឺយើងផ្ដោតសំខាន់លើបទល្មើសដាក់របាំងសាច់អួន និងរបាំងស្បៃមុងវែងវែងរាប់គី ឡូម៉ែត្រ ការដាក់សម្រាស់ចាប់ត្រី របស់មេឈ្មួញទុច្ចរិតធំៗ ដែលដា ច់ខាតត្រូវតែបង្ក្រាបចាប់ខ្លួនឲ្យបាន ដោយមិនទុកឲ្យកើតមានបទល្មើសនេះបន្តទៀតទេ ។ តាមគោលការណ៍របស់សម្ដេចតេជោ បើសិនចាំបាច់នោះ គឺសម្តេសអាចឲ្យប្រើយន្ត ហោះ ដើម្បីប្រតិបត្តិការបង្ក្រាបបទល្មើសធំៗទាំងនេះផងដែរ ។ ចំពោះប្រេងសាំងឡើងថ្លៃវិញនោះគឺ ជាសភាពការសកលលោ កដែលរងផលប៉ះពាល់ទាំងអស់គ្នាដោយសារ តែសង្គ្រាមរស្សីវាយប្រទេសអ៊ុយក្រែន មិនមែនជាកំហុសរបស់ប្រមុខរាជរ ដ្ឋាភិបាលកម្ពុជាយើងនោះទេ ។

ឯកឧត្តម ស៊ុន សុវណ្ណារិទ្ធ នៅក្នុងពិធីនេះក៏បានអំពាវនាវដល់ក្រុមប្រឹ ក្សាឃុំសង្កាត់ ជួយអប់រំណែនាំឱ្យប្រជាពលរដ្ឋអនុវត្តនូវវិធានការការ ពារជំងឺកូវីដ១៩ ដោយអនុវត្តនូវវិធា នការ៣កុំ និង៣ ការពារ និងសូមចូលរួមចាក់វ៉ាក់សាំងជាបន្តឲ្យបានគ្រប់គ្នាដើម្បីរួមគ្នាបំបាត់ជំងឺកូវីដ ១៩ នៅគ្រប់មូលដ្ឋាន ។ ជាមួយគ្នានេះដែរឯកឧត្តមអភិបាលខេត្ត និងក្រុមការងារក៏បានចែកអំណោយជូនបេក្ខជនឈរឈ្មោះបោះឆ្នោតក្រុម ប្រឹក្សាឃុំ ចំនួន ៨៨ នាក់ ដោយក្នុងម្នាក់ៗទទួលបានអង្ករ ២៩ គីឡូ , ទឹ កស៊ីអ៊ីវ ១ យួរ , ទឹកត្រី ១ យួរ និងថវិកា ៤ ម៉ឺនរៀល ៕

អត្ថបទ៖ ឈៀងថារិទ្ធ

The post វិធានការដកដីព្រៃលិចទឹកតំបន់៣ គឺដើម្បីការពារធនធានមច្ឆាជាតិក្នុងបឹងទន្លេសាបសម្រាប់ពលរដ្ឋទូទាំងប្រទេស appeared first on Kampuchea Thmey Daily.

ឧបនាយករដ្ឋមន្ត្រី ជា សុផារ៉ា ស្នើឲ្យ ACU បន្តចាត់វិធានការចំពោះមន្ត្រីស៊ីវិល និងកងកម្លាំង ដែលទន្ទ្រានព្រៃលិចទឹក

Kang Tola — Fri, 11 Mar 2022 13:53:48 +0000

ការស្នើនេះ បានធ្វើឡើងនៅក្នុងកិច្ចប្រជុំក្រុមការងារអន្តរក្រសួង ដើម្បីត្រួតពិនិត្យលទ្ធផល នៃការអនុវត្តវិធានការបង្ក្រាបការទន្ទ្រានដីរដ្ឋក្នុងដែនព្រៃលិចទឹកនៃតំបន់ទន្លេសាប និងលើកទិសដៅការងារបន្ត កាលពីថ្ងៃទី១០ ខែមីនា ម្សិលមិញ។

កិច្ចប្រជុំនោះ ដឹកនាំដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងមានការចូលរួមពីលោក ឱម យ៉ឺនទៀង ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គភាពប្រឆាំងអំពើពុករលួយ, លោក វង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ, លោក អ៊ូក ក៏ប៉ិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង និងមានការចូលរួមពីអង្គភាពជុំវិញខេត្ត កងកម្លាំង និងមន្ត្រី ជំនាញពាក់ព័ន្ធ។

កិច្ចប្រជុំបានលើកឡើងអំពីលទ្ធផលនៃការអនុវត្តបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២៨ ខែវិច្ឆិកា ឆ្នាំ២០២១ ក្នុងការបង្ក្រាបការទន្ទ្រានដីរដ្ឋក្នុងដែនព្រៃលិចទឹកនៃតំបន់ទន្លេសាប ហើយកិច្ចប្រជុំបានដាក់ចេញទិសដៅការងារបន្តចំនួន៨ ចំណុចរួមមាន៖

ទី១. ក្រសួង ស្ថាប័នពាក់ព័ន្ធ និងរដ្ឋបាលខេត្ត ត្រូវបន្តអនុវត្តបទបញ្ជារបស់សម្តេចតេជោនាយករដ្ឋមន្តី នាថ្ងៃទី២៨ ខែវិច្ឆិកា ឆ្នាំ២០២១។

Chea Sophara, Minister of Land Management, Urban Planning and Construction at an encroached site. MLMUPC

ទី២. រដ្ឋបាលខេត្ត ត្រូវពង្រឹងការចុះល្បាត ទប់ស្កាត់ការចូលទន្ទ្រាន និងផ្សព្វផ្សាយអំពីវិធានការបង្ក្រាបការទន្ទ្រានដីក្នុងតំបន់៣ ឱ្យបានម៉ឺងម៉ាត់ ដើម្បីឱ្យប្រជាពលរដ្ឋដែលបានចូលទន្ទ្រានប្រគល់ដីជូនរដ្ឋវិញ។

ទី៣. រដ្ឋបាលខេត្ត និងមន្ទីរអង្គភាពជុំវិញខេត្ត បន្តចាត់វិធានការការពារ និងបង្ក្រាបការទន្ទ្រានកាន់កាប់ដីរដ្ឋ នៅក្នុងដែនព្រៃលិចទឹកជុំវិញបឹងទន្លេសាប ដើម្បីធានានិរន្តរភាព និងត្រូវពង្រឹងការអនុវត្តឱ្យបានម៉ឺងម៉ាត់ នូវលិខិតបទដ្ឋានគតិយុត្ត និងបទបញ្ជានានារបស់រាជរដ្ឋាភិបាល ដែលនៅជាធរមាន។

ទី៤. រដ្ឋបាលខេត្ត ត្រូវជំរុញការចុះបញ្ជីដីរដ្ឋតាមសំណើរបស់ក្រសួងធនធានទឹក។

ទី៥. រដ្ឋបាលខេត្ត និងស្ថាប័នពាក់ព័ន្ធ ត្រូវថែទាំបង្គោល ដែលបានបោះរួច និងជំរុញការបោះបង្គោល ដែលនៅខ្វះចំនួន១៤១ បង្គោល ក្នុងនោះខេត្តបាត់ដំបងចំនួន៣បង្គោល និងខេត្តសៀមរាបចំនួន១៣៨ បង្គោល។

ទី៦. រដ្ឋបាលខេត្ត និងស្ថាប័នពាក់ព័ន្ធ ត្រូវថែទាំដើមឈើ និងគ្រាប់ត្នោត ដែលបានដាំកន្លងមក និងបន្តដាំដើមឈើដែលស៊ាំជាមួយភូមិសាស្ត្រ។

ទី៧. រដ្ឋបាលខេត្ត ត្រូវបន្តជំរុញនីតិវិធីតុលាការលើករណីសំណុំរឿងបទល្មើសទន្ទ្រានកាន់កាប់ដីរដ្ឋក្នុងដែនព្រៃលិចទឹក នៃតំបន់ទន្លេសាប ហើយព្រះរាជអាជ្ញាអមសាលាដំបូងខេត្តត្រូវបន្តជួយជំរុញការអនុវត្តនីតិវិធី ក្រោយពេលទទួលបានបណ្ដឹង

ទី៨. អង្គភាពប្រឆាំងអំពើពុករលួយ ត្រូវបន្តចាត់វិធានការចំពោះមន្ត្រីស៊ីវិល និងកងកម្លាំង ប្រព្រឹត្តបទល្មើសទន្ទ្រានដែនព្រៃលិចទឹកនៃតំបន់ទន្លេសាប។

បើតាមរបាយការណ៏របស់ក្រសួងដែនដីបានឲ្យដឹងថា ទី១, ខេត្តកំពង់ឆ្នាំង ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន១៥ ២៨៥, ២៧ ហិកតា ឃាត់ខ្លួនចំនួន២ នាក់។ ទី២, ខេត្តពោធិ៍សាត់ ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន១២៧៦,២៣ ហិកតា ឃាត់ខ្លួនអ្នកពាក់ព័ន្ធចំនួន០៥នាក់។ ទី៣, ខេត្តបន្ទាយមានជ័យ ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន៤៧៦៧ ហិកតា ។ទី៤, ខេត្តសៀមរាប ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន៣២៤១,៥២ ហិកតា ឃាត់ខ្លួនអ្នកពាក់ព័ន្ធចំនួន០៨នាក់ ។ ទី៥, ខេត្តកំពង់ធំប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន៥១ ៨៨៨,៩៥ ហិកតា ឃាត់ខ្លួនអ្នកពាក់ព័ន្ធចំនួន០២នាក់ ។ ទី៦, ខេត្តបាត់ដំបង ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន១៣ ៨២៥ ហិកតា ឃាត់ខ្លួនអ្នកពាក់ព័ន្ធចំនួន១៧ នាក់។

សរុបទាំង៦ ខេត្តជុំវិញបឹងទន្លេសាប ប្រជាពលរដ្ឋបានស្ម័គ្រចិត្តប្រគល់ដីជូនរដ្ឋវិញចំនួន៨៧ ០៤២,៤៥ហិកតា ឃាត់ខ្លួនអ្នកពាក់ព័ន្ធចំនួន៣៤ នាក់ និងដោះលែងវិញ៥ នាក់ នៅសល់២៩នាក់៕

ដោយ ៖ កោះកែវ

The post ឧបនាយករដ្ឋមន្ត្រី ជា សុផារ៉ា ស្នើឲ្យ ACU បន្តចាត់វិធានការចំពោះមន្ត្រីស៊ីវិល និងកងកម្លាំង ដែលទន្ទ្រានព្រៃលិចទឹក appeared first on Kampuchea Thmey Daily.

ព្រៃលិចទឹកប្រមាណ៣០ហិកតា ត្រូវក្រុមទុច្ចរិតកាប់បំផ្លាញ

KC Virak — Tue, 03 Aug 2021 08:32:00 +0000

ខេត្តបាត់ដំបង៖ តាមការអះអាងពីមន្រ្តីសហគមន៍បានឱ្យដឹងថា ដីព្រៃលិចទឹកនៅចំណុចផ្លូវចូលបឹងបែកឆ្នាំង ស្ថិតនៅភូមិបាក់រទេះ ឃុំព្រែកហ្លួង ស្រុកឯកភ្នំ ខេត្តបាត់ដំបង ត្រូវបានក្រុមទុច្ចរិតមិនស្គាល់មុខ កាប់រុករាន ថ្មីៗនេះអស់ប្រហែល៣០ហិកតា ដើម្បីធ្វើកម្មសិទ្ធ រឺ លក់បន្ត។

លោក ភី ហឿត ប្រធានសហគមន៍ស្តីក្រោមរហាលសួង បានឱ្យដឹងថា ខណៈលោកដឹកនាំមន្រ្តីសហគមន៍ចុះពិនិត្យនិងស្រាវជ្រាវ ដីព្រៃក្នុងសហគមន៍ ទទួលបានការផ្ដល់ដំណឹងថា មានក្រុមជនមិនស្គាល់មុខបានមកកាប់រានដីព្រៃលិចទឹកនៅចំណុចខាងលើនេះក្នុងចន្លោះពាក់កណ្តាលខែមិថុនា និង ចុងខែកក្កដា ឆ្នាំ២០២១នេះប៉ុណ្ណោះ ដោយឃើញមែកឈើដែលកាប់រលំនៅខៀវនៅឡើយ។

លោកបញ្ជាក់ថា ចំណុចដែលជនមិនស្គាល់មុខកាប់រុករានព្រៃរនាមនេះ នៅចំណុចខាងត្បូងឈាងខាង កើត បឹងបែកឆ្នាំង ចំនួនប្រហែល១០ហិកតា និងខាងជើងបឹងបែកឆ្នាំង ប្រហែល២០ហិចតា។

លោក ហោ សំអាត អនុប្រធានសហគមន៍រហាលសួង ឃុំព្រែកហ្លួង បានឱ្យដឹងបន្ថែមថា ព្រៃលិចទឹកដែលស្ថិតនៅក្រោមការគ្រប់គ្រងរបស់សហគមន៍ ស្តីក្រោម គឺសហគមន៍បានគ្រប់គ្រងតាំងពីឆ្នាំ២០១១ មកមាន ១,៣៩០ហិកតា ដែលចំនួននេះមានព្រៃប្រមាណ៦៥ភាគរយ។

លោកបញ្ជាក់ថា បច្ចុប្បន្ននេះព្រៃលិចទឹក៦៥ភាគរយនេះ ខ្លះត្រូវភ្លើងព្រៃឆេះ និងខ្លះត្រូវបាន អ្នកភូមិនាំគ្នា ទៅកាប់រុករានធ្វើស្រែ និងលក់បន្ត នៅសល់តែ២០ភាគរយប៉ុណ្ណោះ។

មន្រ្តីសហគមន៍ខាងលើបានបញ្ជាក់ថា ប្រជាពលរដ្ឋនៅភូមិបាក់រទេះប្រមាណ៧០ភាគរយហើយដែលទៅកាប់រុករានព្រៃលិចទឹកខាងលើដើម្បីធ្វើស្រែ ហើយខ្លះកាប់ហើយលក់ និង បន្តកាប់ទៀត ក្រៅពីនោះ ក៏មានប្រជាជននៅភូមិរហាលសួងខ្លះទៅកាប់រុករានផងដែរ។

មន្រ្តីសហគមន៍បញ្ជាក់ថា កន្លងមកសហគមន៍ អាជ្ញាធរ មន្រ្តីជលផល ធ្លាប់ហៅក្រុមអ្នកកាប់រុករានព្រៃលិចទឹកនេះមកធ្វើកិច្ចសន្យា ជាច្រើនដង និងរហូតដល់បញ្ជូនសំណុំរឿងទៅតុលាការទៀត នៅតែមិនរាងចាល ដោយសារឃើញតែតុលាការកោះហៅទៅសួរនាំ ក្រោយមកឃើញជន ល្មើសនោះ ចេញមកវិញ កាប់រុករានដដែល មិនដឹងថាមូលហេតុអ្វី។

លោក ភី ហឿត បន្ថែមថា ដោយសារតែការធ្វើកិច្ចសន្យា និង គ្មានការអនុវត្តច្បាប់លើជនល្មើសនេះ ធ្វើឱ្យអ្នកភូមិផ្សេងទៀត មិនខ្លាច និងមើលបំណាំគ្នា ហើយនាំគ្នាមកបន្តកាប់រុករានពពាក់ពពូន ដោយមិនខ្លាចរអារ អាជ្ញាធរ មន្រ្តីជំនាញ និង សហគមន៍ឡើយ។

មន្រ្តីសហគមន៍បានប្រទះឃើញការរុករានដីព្រៃរនាមថ្មីៗខាងលើនេះ ខណៈដែលអាជ្ញាធរឃុំមន្រ្តី ភូមិបាលស្រុក មន្រ្តីជលរដ្ឋ និងសហគមន៍នេសាទ ស្តីក្រោមរហាលសួង បានចុះចុច GPS វាស់វែងទំហំនៃការបាត់បង់ ព្រៃលិចទឹក នៅចំណុចតំបន់បី នាព្រឹកថ្ងៃទី០២ ខែសីហានេះ។

លោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានឱ្យដឹងថា ចាប់ពីឆ្នាំ២០១៩មក មន្រ្តីជលផលបានបញ្ជូនករណីកាប់រុករានព្រៃលិចទឹក ទៅកាន់តុលាការជិត៣០ករណី ដោយឡែកឆ្នាំ ២០២១ មានជាង១០ករណី។ លោកនាយខណ្ឌទទួលស្គាល់ថា កន្លងទៅការដាក់ទោសទណ្ឌរបស់តុលាការលើជនល្មើសដែលកាប់រុករានព្រៃលិចទឹកនៅធូរស្រាល ហាក់មិនមានភាព ធ្ងន់ធ្ងរនៅឡើយ ដែលធ្វើឱ្យជនល្មើសមិនរាងចាល។ ទោះបីយ៉ាងណាលោកបញ្ជាក់ថា ថ្មីៗនេះក្នុងកិច្ចប្រជុំគណៈ បញ្ជាការឯកភាពខេត្ត ឯកឧត្តមអភិបាលខេត្តបាន ជំរុញឱ្យតុលាការ ពង្រឹងការដាក់ទោស ទណ្ឌចំពោះជនល្មើសដែលកាប់ព្រៃលិចទឹក ឱ្យបានធ្ងន់ធ្ងរ និងជំរុញឱ្យមន្រ្តី អាជ្ញាធរពាក់ព័ន្ធ ពង្រឹងការទប់ស្កាត់ការរុករានទន្រ្ទានព្រៃលិចទឹក នៅភូមិសាស្រ្តខេត្តបាត់ដំបងឱ្យមានប្រសិទ្ធភាព៕

អត្ថបទ៖ សោ និយមរ័ត្ន

The post ព្រៃលិចទឹកប្រមាណ៣០ហិកតា ត្រូវក្រុមទុច្ចរិតកាប់បំផ្លាញ appeared first on Kampuchea Thmey Daily.