តាមព័ត៌មានទទួលបានពីជិតចំនុចកើតហេតុ បានឱ្យដឹងថា ការផ្ទុះនេះ បានឮសម្លេងខ្លាំងដល់ភូមិ ជាសម្លេងផ្ទុះមីនតោន។

តាមសមត្ថកិច្ច ពលរដ្ឋរងគ្រោះ ឈ្មោះ លឹម ស៊ីនួន ភេតប្រុស អាយុ ២៥ឆ្នាំ រស់នៅភូមិថ្មឆ័ត្រ ឃុំគោករមៀត ស្រុកថ្មពួក ខេត្តបន្ទាយមានជ័យ ស៊ីឈ្នួលកាន់ត្រាក់ទ័រឱ្យម្ចាស់ឈ្មោះឃុត នី ភេទស្រី អាយុ៥៨ ឆ្នាំ រស់នៅភូមិអណ្ដូងខ្លុង ឃុំគំរូ ស្រុកថ្មពួក ខេត្តបន្ទាយមានជ័យ បានទៅជួលដីស្រែម្តុំព្រំដែនជិតបង្គោលសីមាលេខ៣២ ភូមិសាស្រ្តភូមិសាមគ្គី ឃុំគោករមៀត ស្រុកថ្មពួក ពេលកំពុងភ្ជួរដីក៏បានជាន់មីនបណ្ដាលឱ្យផ្ទុះរបួសធ្ងន់ និងត្រាក់ទ័រខូចខាតធ្ងន់។

បច្ចុប្បន្ន ជនរងគ្រោះត្រូវបានបញ្ជូនមកមន្ទីរពេទ្យបង្អែកស្រុកថ្មពួក ហើយបញ្ជូនបន្តទៅព្យាបាលនៅមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរី ខេត្តបន្ទាយមានជ័យ៕

ដោយ៖ អេម ពៅ

The post ពលរដ្ឋខ្មែរម្នាក់ ភ្ជួរស្រែក្បែរព្រំដែនបង្គោលសីមា៣២ ប៉ះមីនតោនផ្ទុះបណ្តាលឱ្យរងរបួសធ្ងន់ appeared first on Kampuchea Thmey Daily.

កិច្ចប្រជុំនេះ ធ្វើឡើងក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន នៅសាលព្រះវិហារ ទីស្ដីការក្រសួងព័ត៌មាន។

កិច្ចពិភាក្សានេះ បានលើកយកប្រធានបទ សង្គម និងនយោបាយ ដើម្បីជាការតម្រង់ទិស លើកិច្ចការបូរណភាពដែនដី និងបញ្ហាទំនាស់ព្រំដែន ដល់អ្នកផលិតមាតិការ និងអ្នកអត្ថាធិប្បាយព័ត៌មាន តាមបណ្ដាញសង្គមប្រមាណ ២៩រូប៕

The post ក្រសួងព័ត៌មាន ប្រជុំពិភាក្សាតម្រង់ទិស ជាមួយអ្នកផលិតមាតិកា លើបញ្ហាព្រំដែន appeared first on Kampuchea Thmey Daily.

មានប្រសាសន៍នាឱកាសនោះ លោកឧត្តមសេនីយ៍ឯក តុប នេត បានក្រើនរម្លឹកដល់កងកម្លាំងនគរបាលការពារព្រំដែនទាំងអស់ ឱ្យបន្តបង្កើនការប្រុងប្រយ័ត្នខ្ពស់គ្រប់ពេលវេលា គ្រប់គ្រងថែរក្សាអាវុធ យុទ្ធោបករណ៍ ឧបករណ៍ សម្ភារសឹក ដែលបានបំពាក់ ត្រៀមលក្ខណៈឆ្លើយតបរហ័សនៅពេលមានបទបញ្ជា និងបន្តរក្សាសាមគ្គីភាព ជួយទុក្ខធុរៈគ្នា រួមសុខរួមទុក្ខដូចជាបងជាប្អូនក្នុងគ្រួសារតែមួយ និងសហការជិតស្និទជាមួយអាជ្ញាធរដែនដី និងប្រជាពលរដ្ឋមូលដ្ឋាន ដើម្បីធានាសន្តិសុខសណ្តាប់ធ្នាប់នៅក្នុងតំបន់ឈរជើង ត្រូវថែទាំសុខភាព រក្សាអនាម័យ ទាំងម្ហូបអាហារ ទឹកបរិភោគ ការពារជំងឺដង្កាត់ផ្សេងៗ។

ជាមួយគ្នានេះ លោកអគ្គនាយក បានថ្លែងគាំទ្រយ៉ាងពេញទំហឹងនូវចំណាត់ការរបស់រាជរដ្ឋាភិបាលកម្ពុជា ក្នុងការដោះស្រាយបញ្ហា ព្រំដែនទាំងដំណោះស្រាយការទូត និងលើកយកករណីវិវាទនៅតំបន់មុំបី ប្រាសាទ តាមាន់ធំ តាមាន់តូច និងប្រាសាទតាក្របី ទៅកាន់តុលាការយុត្តិធម៌អន្តរជាតិ (ICJ)។

ក្នុងឱកាសនោះដែរ លោកអគ្គនាយក បាននាំយកសម្ភារ និងថវិកា ដែលជាអំណោយដ៏ថ្លៃថ្លារបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ដើម្បីផ្តល់ជូនដល់មន្ត្រី ដែលកំពុងបំពេញការងារនៅព្រំដែនមួយចំនួន។ បន្ទាប់ពី សំណេះសំណាល និងសួរសុខទុក្ខជាមួយកងកម្លាំងនគរបាលការពារព្រំដែនចប់ លោក តុប នេត ក៏បានដឹកនាំគណៈប្រតិភូ បន្ដចុះពិនិត្យស្ថានភាពជាក់ស្ដែងច្រកព្រំដែនកម្ពុជា-ថៃ (តំបន់បឹងត្រកួន)ផងដែរ៕

The post លោក តុប នេត ក្រើនរម្លឹកដល់កងកម្លាំងការពារព្រំដែន ឱ្យបង្កើនការប្រុងប្រយ័ត្នខ្ពស់ក្នុងតំបន់ឈរជើង appeared first on Kampuchea Thmey Daily.

ឯកឧត្តម ហ៊ុន ម៉ានី មានប្រសាសន៍ថា ជាមួយនឹងការចូលរួមគាំទ្រ ពីគ្រប់មជ្ឈដ្ឋាននៅទូទាំងប្រទេស ស.ស.យ.ក. បាននិងកំពុងពង្រឹងនូវតួនាទី និងការរួមចំណែករបស់ខ្លួនកាន់តែខ្លាំងក្លាថែមទៀតក្នុងការចូលរួមអភិវឌ្ឍសង្គម។  ឯកឧរ្រម បានគូសបញ្ជាក់ផងដែរថា ក្រុមគ្រួសារស.ស.យ.ក. បេ្តជ្ញាថានឹងរៀបចំកម្មវិធីសំខាន់ៗបន្តទៀតសំដៅបង្កើន ក្តីស្រឡាញ់ សមានចិត្ត ការគាំទ្រ និងជួយលើកតម្កើងឱ្យកាន់តែខ្ពស់ថែមទៀតនូវ មោទនភាពរបស់យុវជន និងប្រជាជននៅទូទាំងប្រទេសចំពោះជាតិមាតុភូមិ ក្រោមការដឹកនាំដ៏ត្រឹមត្រូវរបស់រាជរដ្ឋាភិបាល ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាប្រធានកិត្តិយសនៃសហភាពសហព័ន្ធយុវជនកម្ពុជា ដើម្បីដឹកនាំនាវាកម្ពុជា ឈានទៅសម្រេចចក្ខុវិស័យកម្ពុជាក្លាយទៅជា ប្រទេសមានចំណូលខ្ពស់នៅឆ្នាំ២០៥០។

ឯកឧត្តមបន្ថែមថា ទន្ទឹមនឹងស្ថានភាពតានតឹងនៃបញ្ហាព្រំដែន  ស.ស.យ.ក. នឹងប្តេជ្ញាបន្តចូលរួម និងគាំទ្រយ៉ាងពេញទំហឹងនូវ គ្រប់ចំណាត់ការរបស់រាជរដ្ឋាភិបាល និងស្ថាប័នកំពូលៗរបស់ជាតិ ពាក់ព័ន្ធនឹង ស្ថានការណ៍នយោបាយ និងបញ្ហាបូរណភាពទឹកដីជាមួយប្រទេសជិតខាង។ ជាក់ស្តែង កាលពីថ្ងៃទី១៨ ខែមិថុនា កន្លងទៅ ស.ស.យ.ក បានរៀបចំដំណើរថ្មើរជើង(Solidarity March) ដោយបានបង្ហាញពីឆន្ទៈ មនសិការស្នេហាជាតិ និងទឹកដី និង រួមគ្នាជាធ្លុងមួយ គាំទ្រដល់រាជរដ្ឋាភិបាល និងកងកម្លាំងនៅជួរមុខ ដែលជាការចូលរួម ចំណែកក្នុងខឿនការពារជាតិប្រជាជនផងដែរ។

ថ្លែងក្នុងពិធីបើកនាឱកាសនេះ ឯកឧត្តម ហ៊ុន ម៉ានីបានកោតសរសើរ និងវាយតម្លៃខ្ពស់ ចំពោះគណៈកម្មាធិការ ស.ស.យ.ក រាជធានី ខេត្ត ក្រុង ស្រុក ខណ្ឌ ឃុំ សង្កាត់ ក្រុមការងារ តាមបណ្តា វិស័យនានា អង្គការ សមាគម ចំណុះគណៈកម្មាធិការកណ្តាល និងសមាជិក សមាជិកា ទាំងអស់នៅទូទាំងប្រទេស ដែលបានយកអស់កម្លាំងកាយចិត្ត បញ្ញា ស្មារតី លះបង់ពេលវេលា និងធនធានផ្ទាល់ខ្លួន បំពេញតួនាទីភារកិច្ចយ៉ាងសកម្ម ប្រកបដោយស្មារតីទទួលខុសត្រូវ និងមនសិការស្នេហាជាតិខ្ពស់ រហូតសម្រេចបាន នូវសមិទ្ធផលជាច្រើនគួរជាទីមោទនៈ ស្របតាមទិសដៅ និងផែនការសកម្មភាព ដែលបានដាក់ចេញនៅក្នុង «ផែនការយុទ្ធសាស្ត្រស្តីពីយុវជនក្នុងបុព្វហេតុជាតិ មាតុភូមិ ២០២៣-២០២៨» ។

កិច្ចប្រជុំនេះ ត្រូវបានរៀបចំឡើងក្នុងគោលបំណងតាមដាន ត្រួតពិនិត្យវឌ្ឍនភាពការងារផែនការយុទ្ធសាស្រ្ត និងកម្មវិធីផ្សេងៗ ដែល ស.ស.យ.ក. បានអនុវត្តកន្លងមក រួមទាំងកំណត់អាទិភាព លើកទិសដៅសកម្មភាពបន្ត ស្វែងរកធាតុចូលបន្ថែម តាមរយៈកិច្ចពិភាក្សា និងបទអន្តរាគមន៍នានា ដើម្បីផ្សាភ្ជាប់ផែនការការងារឲ្យស្របតាមការវិវត្តជាក់ស្តែងរបស់សង្គម ។ ការជួបជុំគ្នានាឱកាសនេះ ក៏ជាការពង្រឹង និងពង្រីកសាមគ្គីភាពនៃក្រុមគ្រួសារសហភាពសហព័ន្ធយុវជនកម្ពុជាផងដែរ។

សូមជម្រាបថា កិច្ចប្រជុំគណៈកម្មាធិការកណ្តាល ស.ស.យ.ក. នឹងប្រព្រឹត្តទៅក្នុងរយៈពេល ៤ ថ្ងៃ នៅខេត្តសៀមរាប ដោយរូមបញ្ចូលរបៀបវារៈមានចំនួនរួមមានពិធីបើក  ដោយផ្តោតលើរបាយការណ៍ កិច្ចពិភាក្សា និងបទអន្តរាគមន៍ កម្មពិធីពង្រឹងស្មារតីក្រុមដោយផ្សាភ្ជាប់នឹងការចូលរួមរបស់សមាជិក សមាជិកា ក្នុងបុព្វហេតុសប្បុសធម៌ និងពិធីបិទ៕

ដោយ៖ គឿនវេត

The post ឯកឧត្តម ហ៊ុន ម៉ានី៖ ស.ស.យ.ក ប្តេជ្ញាចូលរួម និងគាំទ្រពេញទំហឹងជាមួយរាជរដ្ឋាភិបាល ជុំវិញភាពតានតឹងនៃបញ្ហាព្រំដែន appeared first on Kampuchea Thmey Daily.

ការណែនាំនេះ ធ្វើឡើងក្នុងឱកាសលោករដ្ឋមន្ត្រី ដឹកនាំកិច្ចប្រជុំពង្រឹងគុណភាពនៃការបម្រើសេវាសុខាភិបាល នៅគ្រប់កម្រិតមណ្ឌលសុខភាព ដល់មន្ទីរពេទ្យជាតិ ខេត្ត ស្រុក ដែលមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួង មន្ទីរពេទ្យជាតិ និងតាមប្រព័ន្ធ Zoom មន្ទីរសុខាភិបាលនៃរដ្ឋបាលខេត្ត កាលពីរសៀលទី១៦ ខែមិថុនា ឆ្នាំ២០២៥ នៅទីស្តីការក្រសួងសុខាភិបាល។

បន្ថែមពីនេះ ថ្នាក់ដឹកនាំក្រសួង មន្ទីរពេទ្យជាតិ និងមន្ទីរសុខាភិបាលខេត្ត ត្រូវត្រៀមលក្ខណៈឱ្យបានល្អ ដោយត្រូវរៀបចំផែនការ និងសហការជាមួយស្ថាប័ន អង្គភាពពាក់ព័ន្ធ ដើម្បីធានាឱ្យបានសេវាថែទាំសុខភាពសាធារណៈជូនប្រជាពលរដ្ឋ ជាពិសេសនៅតាមតំបន់ព្រំដែន ប្រកបដោយគុណភាព ប្រសិទ្ធភាព និងសមធម៌។ ព្រមទាំង ត្រៀមលក្ខណៈក្នុងការគាំទ្រដល់ប្រជាពលរដ្ឋ ដែលត្រូវធ្វើការចល័តទីតាំង ទៅទីកន្លែងមានសុវត្ថិភាព ដោយត្រៀមរៀបចំនូវស្បៀងអាហារ ឱសថ ទឹកស្អាត មុង ក្រមា និងសម្ភារ ឱសថប្រើប្រាស់សំខាន់ ជាពិសេសជំងឺឆ្លងផ្សេងៗ។

ត្រូវពង្រឹង និងយកចិត្តទុកដាក់បន្ថែមទៀត នូវការបម្រើសេវាពិនិត្យ និងព្យាបាល នៅតាមមន្ទីរពេទ្យខេត្ត និងមន្ទីរពេទ្យបង្អែកស្រុក ជាពិសេសនៅតាមតំបន់ព្រំដែន។ ធ្វើការសហការជាមួយមន្រ្តីរដ្ឋបាលរាជធានី ខេត្ត គ្រប់លំដាប់ថ្នាក់ក្នុងគោលបំណងធ្វើកិច្ចសហប្រតិបត្តិការរួមគ្នាដោយស្មារតីសាមគ្គី។ រក្សានូវការទំនាក់ទំនងគ្នា និងផ្តល់ព័ត៌មានជូនក្រុមការងារឱ្យបានជាប់ជានិច្ច ដើម្បីទទួលបានកិច្ចអន្តរាគមន៍ទាន់ពេលវេលា នៅពេលចាំបាច់។ រៀបចំផែនការសកម្មភាព និងបត់បែនទៅតាមសភាពការជាក់ស្តែង ស្របតាមពេលវេលា និងធនធានដែលមាន ដើម្បីឱ្យការងារកាន់តែមានប្រសិទ្ធភាព។

លើសពីនេះ នៅតាមមន្ទីរពេទ្យជាតិ និងមន្ទីរពេទ្យបង្អែកស្រុក ខេត្ត ត្រូវត្រៀមនូវការសង្រ្គោះបន្ទាន់ គ្រូពេទ្យប្រចាំការ ការរៀបចំសម្ភារបរិក្ខារពេទ្យ ការផ្គត់ផ្គង់ឱសថ និងឈាម សម្រាប់ត្រៀមក្នុងជួយសង្រ្គោះអាយុជីវិត ក្នុងករណីមានការកើតឡើងមួយជាយថាហេតុ ដើម្បីធានាការបម្រើសេវាសុខាភិបាលដល់ប្រជាជន និងពលករដោយការយកចិត្តទុកដាក់ខ្ពស់៕

The post រដ្ឋមន្ត្រីសុខាភិបាល ណែនាំដល់មន្ទីរសុខាភិបាលរាជធានី-ខេត្ត ត្រៀមលក្ខណៈជួយពលរដ្ឋនៅតាមតំបន់ព្រំដែន appeared first on Kampuchea Thmey Daily.

ក្នុង​ឱកាសនោះ លោករដ្ឋមន្ត្រី បានលើកពីវីរៈភាពរបស់មន្រ្តីសុខាភិបាលដែលកំពុងតែបន្តខិតខំផ្តល់សេវាដល់ប្រជាជន និងគ្រួសារកងទ័ពនៅតាមតំបន់ព្រំដែនក្នុងខេត្តព្រះវិហារ។ ទន្ទឹមនេះ លោកបានពាំនាំជូនថ្នាក់ដឹកនាំគ្រប់ឋានានុក្រមពីសមិទ្ធិផល ដែលគណៈប្រតិភូក្រសួងសុខាភិបាលទទួលបាននៅក្នុងកិច្ចប្រជុំ មហាសន្និបាតអង្គការសុខភាពពិភពលោក (78th World Health Assembly) លើកទី៧៨។

ជាមួយគ្នានេះដែរ លោករដ្ឋមន្ត្រី បាននាំយកនូវសេចក្តីស្រឡាញ់រាប់អាន ការកោតសើរពីនាយកប្រចាំតំបន់ (WHO-Western Pacific Region, Regional Director) និងអគ្គនាយកអង្គការសុខភាពពិភពលោក Dr Tedros នាជំនួបទ្វេភាគី មកដល់គ្រប់បុគ្គលិកសុខាភិបាលកម្ពុជាផងដែរ។

បន្ថែមពីលើនេះ លោក ឈាង រ៉ា ក៏បានលើយកប្រធានបទ “ភាពចាំបាច់ និងភាពចៃដន្យ” ជាផ្នែកមួយនៃវិចារវិទ្យាបែបសម្ភារៈនិយម មកធ្វើការពន្យល់សម្រាប់ជួយឱ្យថ្នាក់ដឹកនាំ អាចស្វែងយល់ស៊ីជម្រៅថែមទៀតពីអង្គវត្ថុឬបាតុភូតិ។ គោលគំនិតនេះអាចជួយឱ្យអ្នកដឹកនាំ អាចទទួលយកអ្វីដែលមានភាពចាំបាច់ និងមានភាពបុរេសកម្ម ក្នុងការត្រៀមខ្លួនសម្រាប់ភាពចៃដន្យដែលអាចកើតមានឡើង៕

The post លោក ឈាង រ៉ា អំពាវនាវឱ្យមន្ត្រីសុខាភិបាលត្រៀមខ្លួនផ្តល់សេវានៅជួរព្រំដែន ជាពិសេសក្នុងគ្រាអាសន្ន appeared first on Kampuchea Thmey Daily.

នៅលើបណ្តាញសង្គមហ្វេសប៊ុកនៅព្រឹកថ្ងៃទី០៩ ខែមិថុនា ឆ្នាំ២០២៥នេះ លោកបណ្ឌិត គិន ភា បានសរសេរថា៖ «ក្នុងនយោបាយជាតិ ក្នុងប្រព័ន្ធអប់រំ និងក្នុងផែនទី ខ្មែរយើងមិនដែលមានមហិច្ឆតាទៅឈ្លានពានប្រទេសណាមួយទេ សូម្បីតែដើរកាត់ព្រំដែនគេដោយគ្មានការអនុញ្ញាតមិនដែលផង។ ខ្មែរយើងនេះណា គឺចង់បានតែសុខទេ។ ក្នុងនយោបាយជាតិ ចាប់ពីក្រោយសម័យអង្គរមក ខ្មែរគ្មាននយោបាយពង្រីកទឹកដីទេ គឺមាននយោបាយត្រឹមតែការពារទឹកដី និងប្រាថ្នារួមស់ដោយសន្តិភាព និងសុខុដមរមនាជាមួយអ្នកជិតខាង»។

តែទោះជាយ៉ាងណា លោកបណ្ឌិតថា  ទឹកដីកម្ពុជា គឺកម្ពុជាការពារមិនសូវបានគង់វង្សទេ ព្រោះអ្នកជិតខាងចេះតែលេបត្របាក់ និងច្រឹបយកជាបន្តបន្ទាប់រហូតសល់ដូចសព្វថ្ងៃនេះ។ ឯការចង់ត្រឹមតែរស់នៅស្ងប់សុខវិញ ក៏អ្នកជិតខាងមិនសូវឱ្យកម្ពុជាសុខទៀត គេលូកខាងលិច លូកខាងកើត គេអុកឡុករុកគួន ចូលកកូរកកាយផ្ទៃក្នុងកម្ពុជា និងបង្កជម្លោះគ្រប់បែបយ៉ាងអត់ឈប់ឈរ។ លោកបណ្ឌិត គិន ភា គូសបញ្ជាក់ថា៖ «ឯអ្នកខាងនោះវិញ គេមាននយោបាយយូរអង្វែង ម្នាក់មាននយោបាយមកទិសខាងលិច ម្នាក់មាននយោបាយមកទិសខាងកើត។ យើងប្រៀបដូចដុំសាច់នៅក្នុងហ្វូងត្មាត»។

ចំណែក នៅក្នុងប្រព័ន្ធអប់រំផ្លូវការវិញ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានអះអាងថា មិនសូវឱ្យកូនចៅខ្មែររៀនប្រវត្តិសាស្ដ្រ និងនិយាយរឿងព្រំដែនទេ ដោយចាត់ទុកថា ជារឿងនយោបាយ ដែលមិនគួរមាននៅក្នុងប្រព័ន្ធអប់រំ។ ហេតុដែលមិនឱ្យក្មេងរៀនបានយល់ដឹងហ្នឹងហើយ បានអ្នកនយោបាយខ្លះយកបញ្ហាព្រំដែន ជាសន្លឹកបៀនយោបាយយុទ្ធសាស្ត្ររបស់ខ្លួន។ បើក្មេងខ្មែរដឹង ពួកគេលែងជឿអ្នកនយោបាយភូតហើយៗប្រហែលមានទឹកចិត្តស្នេហាជាតិយូរអង្វែង និងមានស្ថិរភាពជាងនេះ។ ប៉ុន្តែ ខាងគេវិញ ទាំងសងខាង កម្មវិធីអប់រំផ្លូវការរបស់គេចាប់តាំងពីថ្នាក់បឋមសិក្សា បង្កប់គំនិតឈ្លានពាន និងកាឡៃប្រវត្តិសាស្ត្រគ្រប់បែបយ៉ាង ដើម្បីជំរុញមោទនភាពជាតិ លើកកម្ពស់ទឹកចិត្តស្នេហាជាតិ និងរហូតដល់ជានិយមជ្រុល ក៏គេនៅតែចាត់ទុកថាល្អ។ នេះបើតាមលោកបណ្ឌិត គិន ភា ដដែល។

ដោយឡែក ពាក់ព័ន្ធនឹងបញ្ហាផែនទីវិញ លោកបណ្ឌិត គិន ភា បញ្ជាក់ដូច្នេះថា៖ «យើងគោរពយ៉ាងខ្ជាប់ខ្ជួននូវផែនទីដែលបន្សល់ដោយសម័យអាណានិគម និងគោលការណ៍ច្បាប់អន្តរជាតិនៃខ្សែព្រំដែនអន្តរជាតិមិនកែប្រែ។ ឯគេខាងនោះវិញ គេប្រើផែនទីណាដែលគេគិតថាគេមានប្រៀប ឬគេគូស និងប្រើប្រាស់ផែនទីជាឯកតោភាគី ដើម្បីឈ្លានពានយើង។ ថ្នាក់ដឹកនាំយើង គឺសម្តេចតេជោ ហ៊ុន សែន ធ្លាប់បានហៅផែនទីនោះថា ជាផែនទីចោរ និងបានបញ្ជាឱ្យដកចេញពីទឹកដីយើង បើមិនដក វាយ»។

សម្រាប់លោកបណ្ឌិត គិន ភា ទាំងទិដ្ឋភាពនយោបាយ អប់រំ និងផែនទី កម្ពុជាឈរលើគោលការណ៍ច្បាប់ ភាពត្រឹមត្រូវ និងសច្ចភាពប្រវត្តិសាស្ត្រ ឯខាងគេ ឈរលើមហិច្ឆតាឈ្លានពាន ភាពក្រឡិចក្រឡុច ការកាឡៃប្រវត្តិសាស្ត្រ និងកម្លាំងបាយ។ ដូច្នេះ ដើម្បីការពារអធិបតេយ្យជាតិ បូរណភាពទឹកដី និងសុខសន្តិភាពស្រុកទេស លោកបណ្ឌិត គិន ភា ឱ្យយោបល់ថា ត្រូវតែកែទម្រង់ជាក់ស្តែងមែនទែនលើប្រព័ន្ធអភិបាលកិច្ចរដ្ឋ ពង្រឹងគុណភាពធនធានមនុស្ស សមត្ថភាពយោធា សមត្ថភាពសេដ្ឋកិច្ច សមត្ថភាពការទូត និងឥទ្ធិពលលើសាធារណមតិអន្តរជាតិតាមរយ:ប្រព័ន្ធផ្សព្វផ្សាយអន្តរជាតិធំៗ។ លោកថា៖ «បើមិនដូច្នោះទេ យើងនឹងបន្តចាញ់ប្រៀបអ្នកជិតខាងរាប់សតវត្សរ៍ទៅមុខទៀត។ សន្តិភាពគ្មាននរណាដាក់លើជើងពានយកមកឱ្យយើងទេ ហើយទឹកដីយើង ក៏គ្មាននរណាគេជួយការពារយើងដែរ គឺយើង គឺយើងទាំងអស់គ្នា»៕

The post បណ្ឌិត គិន ភា៖ ខ្មែរមិនដែលចេះចង់ឈ្លានពានគេ ណាស់តែគេទេដែលចេះតែចង់ឈ្លានពាន និងមិនចង់ឱ្យខ្មែររស់នៅបានសុខ appeared first on Kampuchea Thmey Daily.

អញ្ជើញបើកកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា លើកទី១ នៅថ្ងៃទី ០២ ខែមិថុនានេះ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភា​និងព្រឹទ្ធសភា បានលើកឡើងថា ពាក់ព័ន្ធព្រំដែន កម្ពុជាបានធ្វើការចរចាជាមួយវៀតណាម​ ក្នុងការបោះបង្គោលរួចជាស្រេចចំនួន ៨៤ %ទៅហើយនៅសល់តែ ១៦ % ទៀត កំពុងតែធ្វើការចរចា ហើយភាគីទាំងពីរគោរពគ្នាទៅវិញទៅមក។

លើសពីនេះ កម្ពុជាក៏បានចរចាជាមួយភាគីឡាវ បោះបង្គោលព្រំដែនចំនួន ៨៦ ភាគរយហើយ នៅសល់ តែ១៤ % ទៀត កំពុងបន្តការចរចា ដោយមានការគោរពគ្នាទៅវិញទៅមក។ ប៉ុន្តែសម្តេចតេជោ ដាក់ជាចម្ងល់ថា ហេតុអ្វីបានជាការចរចាបោះបង្គោលព្រំដែនជាមួយភាគីថៃរយៈពេល ២៥ឆ្នាំហើយ នៅតែមិនទាន់ទៅមុខ។ សម្តេចតេជោ មានប្រសាសន៍ថា៖« ក៏ប៉ុន្តែបញ្ហាព្រំដែនកម្ពុជា-ថៃ ២៥ ឆ្នាំ គឺអត់ទាន់បានធ្វើអី ក្រៅតែពីដើររកបង្គោល ប៉ុន្មាននោះតែប៉ុណ្ណោះ ហើយចំណុចរសើបទាំងប៉ុន្មាន គឺបើមិនដោះស្រាយទេ រឿងនេះនៅតែបន្ត»។

សម្តេចក៏បានអះអាងថា ៖«កម្ពុជាគ្មានត្រូវការទឹកដីអ្នកណាទេ កម្ពុជាបាត់បង់ទឹកដីច្រើនណាស់ហើយ កម្ពុជាក៏មិនទាមទារយកដីត្រឡប់មកវិញដែរ តែកម្ពុជាសូមរក្សាសិទ្ធិការពារទឹកដីរបស់ខ្លួនតែប៉ុណ្ណោះ មិនអាចឱ្យអ្នកណាផ្សេងមកដណ្តើមទេ»។

ជាមួយគ្នានេះ សម្តេចតេជោ លើកទឹកចិត្តដល់នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត យកបញ្ហាព្រំដែនកម្ពុជា-ថៃ ប្តឹងទៅតុលាការយុត្តិធម៌អន្តរជាតិ បើមិនដូច្នេះទេ បញ្ហាព្រំដែនទាំងពីរ ដោះស្រាយមិនចេះចប់ ហើយអាចឈានដល់ជម្លោះដូចជានៅតំបន់ហ្កាហ្សា រវាងប៉ាឡេស្ទីន និងអ៊ីស្រាអែល ដែលសង្គ្រាមបន្តអូសបន្លាយរាំរ៉ៃ។
សម្តេចតេជោ បន្ថែមថា៖«ខ្ញុំសូមបញ្ជាក់ថា មិនមែនយកបញ្ហាការប្តឹងមួយនេះ ហើយបញ្ចប់នូវកិច្ចសហប្រតិបត្តិការរវាងកម្ពុជា និងថៃ លើគ្រប់វិស័យដែលមានរួចមកហើយនោះទេ រឿងក្តីគឺក្តី​តែរឿងសហប្រតិបត្តិការ នៅតែសហប្រតិបត្តិការ មិត្តភាពរបស់យើងត្រូវតែមាន» ។

ជាមួយគ្នានេះ សម្តេចតេជោ អំពាវនាវបងប្អូនជនរួមជាតិ កុំឈានដល់ការរើសអើងជាតិសាសន៍ កុំឱ្យមានជម្លោះរាល ដាលទៅតំបន់ផ្សេង ឬផ្ទេរពីផ្នែកយោធាទៅកាន់ផ្នែកសេដ្ឋកិច្ច  ពាណិជ្ជកម្ម វិនិយោគ ទេសចរណ៍ វប្បធម៌ ឬវិស័យអប់រំ និងវិស័យដទៃផ្សេងទៀត សូមយកចិត្តទុកដាក់ទៅលើបញ្ហានេះ។

គួរជម្រាបថា កម្ពុជាតែងតែជំរុញឱ្យគណៈកម្មការព្រំដែនកម្ពុជា-ថៃ រៀបចំពិនិត្យបង្គោលព្រំដែន និងបោះបង្គោលព្រំដែនឡើងវិញឱ្យបានលឿន ព្រមទាំងការដោះមីនចេញពីព្រំដែន ដើម្បីសុវត្ថិភាពរបស់ប្រជាជនទាំងសងខាង ក្នុងការចេញចូលរកស៊ី៕

The post សម្តេច ហ៊ុន សែន ៖ កម្ពុជាបាត់បង់ទឹកដីច្រើនហើយក៏មិនទាមទារត្រឡប់មកវិញ តែកម្ពុជារក្សាសិទ្ធិការពារទឹកដីបច្ចុប្បន្ន appeared first on Kampuchea Thmey Daily.