​លោក ​ឈឿ​ម សេរី​វុ​ធ ប្រធាន​មន្ទីរ​ទេសចរណ៍​ខេត្តបន្ទាយមានជ័យ​ បានប្រាប់​ឲ្យ​ដឹងកាលពីថ្ងៃទី ២៦ ​ខែកញ្ញា​​ថា នៅថ្ងៃទី​ ២៥​ ខែកញ្ញា ​ឆ្នាំ​ ២០២២​ នេះ មាន​ភ្ញៀវ​ជាតិ​មកលេង មាន​ចំនួន ១៨,៨៣៦ នាក់ ភ្ញៀវ​បរទេស​ចំនួន ៤ នាក់ ថ្ងៃទី​ ២៤​ ខែកញ្ញា ឆ្នាំ​ ២០២២ ភ្ញៀវ​ជាតិ​ចំនួន ៤,៧៨២ ​នាក់ ភ្ញៀវ​បរទេស​ចំនួន ៣ នាក់ ភ្ញៀវ​ភាគច្រើន ទៅ​លែង​នៅ​តំបន់​មានទឹក​ និង​រមណីយដ្ឋាន​កែច្នៃ និង​តាម​ប្រាសាទ​បូរាណ និង​កន្លែង​ផ្សេងទៀត​មាន​តិច​។

​លោក​ ឈឿ​ម សេរី​វុ​ធ បានបញ្ជាក់​ឲ្យ​ដឹង​បន្តទៀតថា មន្ទីរ​ទេសចរណ៍​បានរៀបចំ​កន្លែង រមណីយដ្ឋាន និង​គោលដៅទេសចរណ៍​បាន​ស្អាត​មាន​ភាពល្អប្រសើរ​ជាង​មុន ធ្វើ​ឲ្យ​ចំនួន​ភ្ញៀវ​ទេសចរណ៍​មកលេង​កាន់តែ​កើនឡើង ក្នុងនោះ​មាន​កន្លែង​លេង អាង​ជើង​គ្រុស ប្រាសាទបន្ទាយឆ្មា ប្រាសាទមេបុណ្យ បារាយណ៍ មេបុណ្យ ប្រាសាទបន្ទាយទ័ព និង​កន្លែង​ផ្សេងៗ​ទៀត។​ជាងនេះទៀត​ មន្ត្រី​ទេសចរណ៍​អាច​ទប់ស្កាត់​ការដំឡើងថ្លៃ​ហួសហេតុ​លើ​ម្ហូបអាហារ និង​សេវាកម្ម​ទេសចរណ៍ ដោយមាន​ការបិទ​តម្លៃ​ជម្រាប់ជូន​ភ្ញៀវ​ជាមុន​បាន​ត្រឹមត្រូវ ស្របតាម​សារាចរ​ណែនាំ​របស់​ក្រសួងទេសចរណ៍​ផងដែរ​។

​លោ​កក៏បានបញ្ជាក់ឲ្យដឹងថា រយៈពេល ​២ ​ថ្ងៃនេះ បញ្ហា​បរិស្ថាន​អនាម័យ បានល្អ​ប្រសើរ​ជាង​មុន ដោយ​ភ្ញៀវ​ទេសចរណ៍ និង​ប្រជាពលរដ្ឋ​មានការ​យល់ដឹង ​និង​ភ្ញាក់រលឹក ទុកដាក់​សំរាម​បាន​ត្រឹមត្រូវ​។ ដោយឡែក​បញ្ហា​សន្តិសុខ​សុវត្ថិភាព​ ក៏មាន​ភាពល្អប្រសើរ ដោយ​មន្ទីរ​ទេសចរណ៍ បាន​សហ​ការណ៍​យ៉ាង​ជិតស្និទ្ធ​ជាមួយ​កម្លាំង​មាន​សមត្ថកិច្ច ចាត់តាំង​ក្រុមការងារ​ប្រចាំការ​នៅតាម​គោលដៅ ទេសចរណ៍​សំខាន់ៗ និង​មាន​ការលើក​ស្លាក​សញ្ញា​គ្រោះថ្នាក់​នៅតាម​តំបន់​ដែល​ងាយ​រងគ្រោះ​ផងដែរ​៕

អត្ថបទ៖ វ៉ាន់ ណា​ង​

The post ភ្ញៀវទេសចរជិត ៣ ម៉ឺននាក់ បានទៅកម្សាន្តនៅខេត្តបន្ទាយមានជ័យ អំឡុងពេលភ្ជុំបិណ្ឌ appeared first on Kampuchea Thmey Daily.

របាយការណ៍ដដែល បានបញ្ជាក់ថា តួលេខនេះមានកំណើន ៨៩.៤៣% ធៀបនឹងរយៈពេល៣ថ្ងៃនៃពិធី​ភ្ជុំបិណ្ឌកាលពីឆ្នាំ២០២១។ ចរន្តភ្ញៀវនាឱកាសពិធីបុណ្យភ្ជុំបិណ្ឌឆ្នាំនេះ មានសភាពផុសផុលខ្លាំង ដោយសាររាជរដ្ឋាភិបាលបានអនុញ្ញាតឱ្យមានការកម្សាន្តនៅគ្រប់រមណីយដ្ឋានទេសចរណ៍ទាំងអស់ ហើយប្រជាពលរដ្ឋអាចទៅធ្វើបុណ្យទាននៅតាមទីវត្តអារាមនានា ដោយពុំមានការរឹតត្បិត ខុសពីឆ្នាំ២០២១កន្លងមក ដែលប្រជាពលរដ្ឋបានត្រឹមយកចង្ហាន់ទៅប្រគេនព្រះសង្ឃ នៅត្រឹមមុខខ្លោងទ្វារចូលវត្ត ដោយសារវិបត្តិជំងឺកូវីដ-១៩។

បើតាមក្រសួងទេសចរណ៍ ប្រជាពលរដ្ឋបានសម្រុកចូលរាជធានីភ្នំពេញវិញនាល្ងាចថ្ងៃចន្ទម្សិលមិញ ដែលធ្វើឱ្យចរាចរណ៍​នៅតាមដងផ្លូវជាតិនានា មានការមមាញឹកខ្លាំង ខណៈប្រជាពលរដ្ឋខ្លះទៀត នឹងបន្តចូលរាជធានីភ្នំពេញនាថ្ងៃនេះ ពិសេសកម្មករ/កម្មការី ដែលទទួលបានច្បាប់ឈប់សម្រាកពី៤-៥ថ្ងៃ។

ចំពោះបញ្ហាសន្តិសុខ សណ្ដាប់ធ្នាប់សាធារណៈ សុវត្ថិភាព ចរាចរណ៍វិញ សង្កេតឃើញថា គណៈបញ្ជាការឯកភាព រដ្ឋបាលរាជធានី/ខេត្ត និងកម្លាំងមានសមត្ថកិច្ចគ្រប់លំដាប់ថ្នាក់បានសម្រួលចរាចរណ៍ និងថែរក្សាសន្តិសុខ​សណ្តាប់ធា្នប់នៅតាមដងផ្លូវជាតិ និងទីតាំងសំខាន់ៗ។

ដោយឡែក មន្ទីរទេសចរណ៍គ្រប់រាជធានី/ខេត្តក៏បានចុះផ្ទាល់ដល់មូលដ្ឋានអាជីវកម្ម និងគោលដៅទេសចរណ៍សំខាន់ៗ ដើម្បីផ្តល់សេវាកម្មប្រកបដោយគុណភាព តម្លៃសមរម្យ និងបន្តពង្រឹងការអនុវត្តវិធានសុវត្ថិភាព​ទេសចរណ៍ក្នុងការទប់​ស្កាត់ការរីករាលដាលជំងឺកូវីដ១៩ ពិសេសបញ្ចៀសការកកកុញខ្លាំងដូចដែលធ្លាប់កើតមាននាឆ្នាំកន្លងមក។

សម្រាប់រយៈពេល៣ថ្ងៃនេះ សភាពការណ៍ទេសចរណ៍ជារួម រាប់តាំងពីសន្តិសុខសណ្តាប់ធ្នាប់ និងការដើរកម្សាន្តរបស់​ភ្ញៀវទេសចរមានភាពល្អប្រសើរធម្មតា និងមិនមានបញ្ហាធំដុំណាមួយកើតឡើងទេ បើទោះបីបណ្តារាជធានី​/ខេត្តភាគច្រើនមានភ្លៀងធ្លាក់ខ្លាំង និងបណ្តាលឱ្យមានជំនន់ទឹកភ្លៀង និងការកកស្ទុះនៅតាមតំបន់ និងផ្លូវជាតិ​សំខាន់ៗមួយចំនួន។ នេះបើតាមក្រសួងទេសចរណ៍៕

The post ក្រសួងទេសចរណ៍៖ មនុស្សជាង ១លាន ២សែននាក់ ចេញកម្សាន្តនៅទូទាំងប្រទេស​ថ្ងៃភ្ជុំបិណ្ឌ៣ថ្ងៃ appeared first on Kampuchea Thmey Daily.

បើតាមរបាយការណ៍របស់មន្ទីរទេសចរណ៍ខេត្ត បានបង្ហាញឲ្យដឹងថា ក្នុងរយៈពេល៣ថ្ងៃនេះ ភ្ញៀវទេសចរក្នុងឱកាសបុណ្យភ្ជុំបិណ្ឌ គិតចាប់ពីថ្ងៃទី២៤-២៥- ២៦ ខែកញ្ញា ឆ្នាំ២០២២ មានប្រមាណ ៨,៣៦៨នាក់ ស្រី ៣,៧២៦នាក់។

នៅក្នុងពិធីបុណ្យភ្ជុំបិណ្ឌនេះ អាជ្ញាធរ ក៏បានដាក់ពង្រាយកម្លាំង ដើម្បីរៀបចំសណ្តាប់ធ្នាប់ និងការពារសុវត្ថិភាព ជូនដល់ប្រជាពលរដ្ឋ នៅក្នុងមូលដ្ឋាន ជាពិសេសភ្ញៀវទេសចរ ដែលមកកម្សាន្តនៅក្នុងខេត្តស្វាយរៀងនាឱកាសនេះ។

ខេត្តស្វាយរៀង មានតំបន់ទេសចរណ៍ចំនួន៥កន្លែង ដែលប្រជាពលរដ្ឋចាប់អារម្មណ៍ និងតែងតែទៅលេងកម្សាន្ត រួមមាន៖

ទី១៖ រមណីយដ្ឋានប្រាសាទព្រៃបាសាក់៖ ព្រៃបាសាក់ ឬព្រៃប្រាសាទ មានទីតាំងស្ថិតនៅក្នុងភូមិបាសាក់ ឃុំបាសាក់ ស្រុកស្វាយជ្រំ ខេត្តស្វាយរៀង និងមានចម្ងាយ ៨.៥គីឡូម៉ែត្រ ពីទីរួមខេត្តស្វាយរៀង។

ទី២៖ ប្រាសាទជីហោ៖ ប្រសាទជីហោ គឺជាប្រាសាទមួយដែលមានវ័យចំណាស់ជាងគេក្នុងខេត្តស្វាយរៀង ស្ថិតនៅតំបន់ឦសាននៃទីរួមខេត្តស្វាយរៀង ចម្ងាយប្រមាណ ៥៨គីឡូម៉ែត្រ។

ទី៣៖ រមណីយដ្ឋានធម្មជាតិព្រៃគគីរ៖ ព្រៃគគីរ គឺជារមនីយដ្ឋានធម្មជាតិដែលសម្បូរទៅដោយដើមគគីរជាច្រើនដើម​ដុះព័ទ្ធជុំវិញ មានទីតាំងស្ថិតនៅក្នុងបរិវេណ សហគមន៍ ព្រៃឈើចម្ការកូនគគីរ ក្នុងភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង និងចម្ងាយ ៣២គីឡូម៉េត្រពីទីរួមខេត្តស្វាយរៀង។ ភ្ញៀវទេសចរអាចធ្វើដំណើរ ទៅទីនោះបានដោយចំណាយពេលត្រឹមតែ ៣០នាទីប៉ុណ្ណោះ។

ទី៤៖ រមណីដ្ឋានធម្មជាតិទឹកវិល៖ ទឹកវិល គឺជារមណីយដ្ឋានធម្មជាតិស្ថិតនៅក្នុងភូមិទឹកវិល ឃុំអំពិល ស្រុករមាសហែក ខេត្តស្វាយរៀង មានចម្ងាយប្រមាណ ៤២គីឡូ ម៉ែត្រ ពីទីរួមខេត្តស្វាយរៀង។ទឹកវិលជាទំនប់កម្សាន្តបែបលក្ខណៈ​គ្រួសារ ដែលមានបឹងមួយដ៏ធំដែលអាចឲ្យភ្ញៀវអញ្ជើញមកជិះទូកលេង និងគយគន់មើលទេសភាព ដ៏ខៀវស្រងាត់ ជុំវិញបឹងនេះ និងមានខ្ចុះសម្រាប់ភ្លៀវសម្រាក់ពិសារអាហារ​ដ៏មានឱជារសឈ្ងុយឆ្ងាញ់បែបធម្មជាតិ។ ពីមួយថ្ងៃទៅមួយ​ថ្ងៃរមណីដ្ឋាននោះ ទទួលភ្ញៀវ ទេសចរណ៍ អញ្ជើញមកកម្សាន្តច្រើនគួរសម។

ទី៥៖ ស្ពានព្រែកត្នោត គឺជារមណីយដ្ឋានបែបធម្មជាតិនិងកែច្នៃមួយដែលខណ្ឌព្រំប្រទល់គ្នាដោយព្រែកត្នោត និងតភ្ជាប់គ្នាដោយស្ពានត្នោត (ពីមុនស្ពានឈើ បច្ចុប្បន្ន ស្ពានដែកបេឡេ)។ ដោយភ្ញៀវទេសចរអាចធ្វើដំណើរ​ចេញពីក្រុងស្វាយរៀងឆ្ពោះទៅទិសខាងលិច តាមផ្លូវជាតិលេខ១ គឺស្ថិតនៅខាងត្បូងសាកលវិទ្យាល័យស្វាយរៀង ចម្ងាយប្រមាណជាង ២គីឡូម៉ែត្រ ហើយទីតាំងនេះគឺស្ថិតនៅត្រើយខាងជើងក្នុងភូមិព្នៅ ឃុំតាសួស ស្រុកស្វាយជ្រំ ឬអាចធ្វើដំណើរតាមផ្លូវលំលេខ ៣១៤B ខាងលិច ក្រុងស្វាយរៀងប្រហែល ៤គីឡូម៉ែត្រ ទីតាំងនេះគឺនៅត្រើយខាងត្បូង ស្ថិតក្នុងភូមិឫស្សីព្រៃ ឃុំកំពង់ចម្លង ស្រុកស្វាយជ្រំដូចគ្នាផងដែរ៕

ដោយ:ភក្ដី

The post ខេត្តស្វាយរៀង ទទួលបានភ្ញៀវទេសចរជាង ៨ពាន់នាក់ ថ្ងៃភ្ជុំបិណ្ឌ appeared first on Kampuchea Thmey Daily.

យោងតាមរបាយការណ៍របស់មន្ទីរទេសចរខត្តបាត់ដំបង បានឱ្យដឹងថា ភ្ញៀវទេសចរដែលមកកម្សាន្ត ក្នុងឱកាស​ពិធីបុណ្យភ្ជុំបិណ្ឌប្រពៃណីជាតិខ្មែរ ក្នុងខេត្តបាត់ដំបង សរុបរយៈពេល ៣ថ្ងៃ ត្រូវនឹងថ្ងៃទី២៤ ដល់២៦ ខែកញ្ញា ឆ្នាំ២០២២ គឺមានចំនួន ២១០,១២២ នាក់ គឺបានកើនឡើង ៤៥៧% បើប្រៀបធៀបទៅនឹងឆ្នាំ២០២១ ដែលមានភ្ញៀវទេសចរតែចំនួន ៣៧.៧២៤ នាក់ ។

របាយការណ៍បានបញ្ជាក់ថា រមណីយដ្ឋានទេសចរណ៍ និងគោលដៅទេសចរណ៍នានា ក្នុងខេត្តបាត់ដំបង ដែលភ្ញៀវសម្រុកចូលទៅកម្សាន្ត រួមមាន ÷ រមណីយដ្ឋាន ប្រាសាទបាណន់  រមណីយដ្ឋាន ភ្នំសំពៅ រមណីយដ្ឋាន ប្រាសាទឯកភ្នំ
-រមណីយដ្ឋាន ចំការស្វាយ រមណីយដ្ឋាន ស្ទឹងថ្មដាចំការធុរេន រមណីយដ្ឋាន ទឹកធ្លាក់ ៥៣ ភ្នំព្រឹក រមណីយដ្ឋាន នគរជុំ ភ្នំព្រឹក រមណីយដ្ឋាន ចំការធុរេនអូរតង រមណីយដ្ឋាន វាលចម្បាំង ខេមសាយ សហគមន៍អេកូទេសចរណ៍​ទឹកធ្លាក់អូរជាំ មណ្ឌលកម្សាន្ត ឡូរីជើងភ្នំបាណន់ រមណីយដ្ឋាន ស្ទឹងក្រញូង មណ្ឌលកម្សាន្ត សួនទឹកសុភមង្គល ផ្ទះផ្កា Begonia ចំការទំពាំងបាយជូរ ស្រុករតនមណ្ឌល កោះចាក់សោរបេះដូង ឡេង ណាវ៉ាត្រា វាលស្រែឯកភ្នំ វត្តអារាមទូទាំងខេត្ត និងគោលដៅទេសចរណ៍នានាក្នុងខេត្តបាត់ដំបង។
លោក អ៊ុចអ៊ុំ ភីនីស្សារ៉ា ប្រធាមន្ទីរទេសចរខេត្ត បានបញ្ជាក់ថា នៅគ្រប់ទីតាំងកម្សាន្តទាំងអស់  ក្រុមការងារមន្ទីរទេសចរណ៍បានបែកចែកកម្លាំងចុះត្រួតពិនិត្យចរន្តទេសចរ ស្ថានភាពទេសចរណ៍ និងពង្រឹងការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្ដង់ដារជាអប្បបមា (SOP) តាមគន្លងក្រតីភាពថ្មី តាមរមណីយដ្ឋាន និងគោលដៅទេសចរណ៍សំខាន់ៗក្នុងខេត្ត។

លោកប្រធានមន្ទីរបានបន្ថែមថា បញ្ហាប្រឈមនៅតែមាន ដូចជា ÷ ប្រជាពលរដ្ឋ និងភ្ញៀវទេសចរមានច្រើន ធ្វើឲ្យមានការពិបាកក្នុងការចូលរួមអនុវត្ត នូវវិធានសុវត្ថិភាព ដើម្បីការពារខ្លួនពីជំងឺកូវីដ ១៩ និងមានការកកស្ទះ​ចរាចរណ៍នៅតាមផ្លូវទៅកាន់រមណីយដ្ឋាន និងគោលដៅទេសចរណ៍ក្នុងខេត្ត។ តំបន់គោលដៅនៅជាប់មាត់​ស្ទឹងមួយចំនួន លិចទឹក ដែលមិនអនុញ្ញាតឱ្យភ្ញៀវលេងទឹកឡើយ ៕ អត្ថបទ : សោ និយមរ័ត្ន

The post បុណ្យភ្ជុំបិណ្ឌ៣ថ្ងៃ ខេត្តបាត់ដំបង ទទួលភ្ញៀវទេសចរ​ជាង២០ម៉ឺននាក់ appeared first on Kampuchea Thmey Daily.

របាយការណ៍ ដែលផ្សព្វផ្សាយនៅថ្ងៃច័ន្ទនេះ បានឲ្យដឹងថា កាលពីថ្ងៃទី ២៥ ខែកញ្ញា ឆ្នាំ ២០២២ មានករណីគ្រោះថ្នាក់ចរាចរណ៍ផ្លូវគោក ទូទាំងប្រទេសកើតឡើងចំនួន ១៣លើក (យប់ ៦លើក) បណ្តាលឲ្យមនុស្សស្លាប់ចំនួន ១១នាក់ (ស្រី ៣នាក់) រងរបួសសរុបចំនួន ១៩នាក់(ស្រី ២នាក់) រងរបួសធ្ងន់ ១២នាក់ (ស្រី ១នាក់) រងរបួសស្រាល ៧នាក់ (ស្រី ១នាក់) មិនពាក់មួកសុវត្ថិភាព ២១នាក់ (យប់ ១២នាក់)។

របាយការណ៍ដដែល បានបញ្ជាក់ទៀតថា មូលហេតុបណ្តាលឲ្យកើតគ្រោះថ្នាក់ចរាចរណ៍នេះ រួមមាន៖ ល្មើសល្បឿន ៤ករណី, មិនគោរពសិទ្ធិ ៤ករណី, មិនប្រកាន់ស្តាំ ១ករណី, ប្រជែងគ្រោះថ្នាក់ ២ករណី, ស្រវឹង ១ករណី, សុខភាព/ងងុយ ១ករណី៕

The post ថ្ងៃបុណ្យភ្ជុំបិណ្ឌ មានករណីគ្រោះថ្នាក់ចរាចរណ៍កើតឡើង ១៣លើក បណ្ដាលឲ្យមនុស្សស្លាប់ ១១នាក់ និងរងរបួស ១៩នាក់  appeared first on Kampuchea Thmey Daily.

នៅក្នុងឱកាសនៃពិធីបុណ្យភ្ជុំបិណ្ឌឆ្នាំនេះ ប្រជាពលរដ្ឋបានបង្ហាញអារម្មណ៍សប្បាយរីករាយ និងមាន ទឹកមុខស្រស់ថ្លា ជាមួយនឹងសម្លៀកបំពាក់ជាប្រពៃណីខ្មែរយ៉ាងស្រស់ស្អាត ក្នុងការទៅធ្វើបុណ្យទានប្រកបដោយចិត្តសទ្ធាជ្រះថ្លា។

ព្រះចៅអធិការវត្ត មានថេរដីថា ប្រជាពលរដ្ឋជាពុទ្ធបរិស័ទយ៉ាងច្រើន បាននាំគ្នាអញ្ជើញមកវត្តទួលខ្សាច់ ហៅវត្តកោះផ្តៅ ដោយនាំយកចង្ហាន់ និងគ្រឿងទេយ្យទានទៅប្រគេនព្រះសង្ឃ ដែលបានគង់នៅទីវត្តអារាមនោះ ដើម្បីឧទ្ទិសកុសលផលបុណ្យទៅដល់បុព្វការីជន ដែលបានចែកឋានទៅ។  

ចំណែកប្រជាពលរដ្ឋវិញ បាននិយាយថា រៀងរាល់ឆ្នាំ នៅពេលដល់ថ្ងៃដែលត្រូវប្រារព្ធពិធីបុណ្យកាន់បិណ្ឌ និងភ្ជុំបិណ្ឌ គ្រប់បងប្អូន កូនចៅ សាច់ញាតិសន្ដានទាំងអស់ តែងតែធ្វើដំណើរទៅស្រុកកំណើត ដើម្បីជួបជុំក្រុមគ្រួសារ ដើម្បីរៀបចំម្ហូបអាហារ បាយនំបង្អែម និងចង្ហាន់យកទៅប្រគេនដល់ព្រះសង្ឃដែលគង់ចាំព្រះវស្សានៅទីវត្តអារាម៕

អត្ថបទ៖ សឹង រ៉ាត់

The post ពលរដ្ឋយ៉ាងច្រើនកុះករចូលរួមបោះបាយបិណ្ឌ និងនាំយកចង្ហាន់ប្រគេនព្រះសង្ឃ នៅវត្តទួលខ្សាច់ ហៅវត្តកោះផ្ដៅ   appeared first on Kampuchea Thmey Daily.

ជាក់ស្ដែងដូចជានៅវត្តឥសាន្តរតនារាមហៅវត្តភ្នំស្វាយ ដែលជាវត្តមួយនៅក្នុងក្រុងបានលុងក៏មានសភាពមមារញឹកខ្លាំង  កំឡុងពេលបុណ្យភ្ជុំបិណ្ឌនេះ។ ប្រជាពលរដ្ឋដែលចូលរួមនៅក្នុងថ្ងៃដ៏ពិសេសនេះ បានអនុវត្តយ៉ាងខ្ជាប់ខ្ជួននូវសីលធម៌  និងទំនៀមទម្លាប់ ដែលខ្មែរមានតាំងពីបុរាណកាលមក។

នៅក្នុងពិធីបុណ្យភ្ជុំបិណ្ឌនាឆ្នាំនេះ បើទោះជាខេត្តរតនគិរីមានភ្លៀងធ្លាក់ជារៀងរាល់ថ្ងៃក្តី តែក៏នៅមានបងប្អូនប្រជាពលរដ្ឋយ៉ាងច្រើនបានធ្វើដំណើរទៅវត្តអារាម យកចង្ហាន់ទៅប្រគេនព្រះសង្ខ ស្តាប់ព្រះសង្ឃសូត្រធម៌បង្សុកូលនិងចម្រើនព្រះបរិត្ត ខ្លះសមាទាននូវសីល៥ និងធ្វើពិធីរាប់បាត្រទៅតាមប្រពៃណីព្រះពុទ្ធសាសនា។

ពិធីបុណ្យភ្ជុំបិណ្ឌឆ្នាំនេះ ក៏មិនខុសពីឆ្នាំមុនៗដែរ គឺមានបងប្អូនប្រជាពលរដ្ឋខ្លះបានចេញដំណើរទៅដាក់បិណ្ឌជិតឫនៅទីឆ្ងាយៗ និងនៅតាមស្រុកកំណើតរបស់ពួកគាត់ ខ្លះទៀតក៏ឆ្លៀតពេលទៅដើរលេងនៅតាមរម្មណីយដ្ឋាននានា តាមតែខ្លួនចង់ទៅ។

ជាពិសេសក្នុងថ្ងៃភ្ជុំធំនេះតែម្តង ប្រជាពលរដ្ឋបាននាំគ្នាយកចង្ហាន់ទៅវត្តគ្រប់ៗគ្នា ទៅលទ្ឌភាពធនធាន និងសទ្ធាជ្រះថ្លារបស់ខ្លួន។ ដោយឡែកសន្តិសុខសណ្តាប់ធ្នាប់ក៏ល្អប្រសើរ ទាំងនៅតាមគេហដ្ឋានប្រជាពលរដ្ឋ តាមវត្តអារាម និងនៅតាមទីសាធារណៈនានា។

គួររំលឹកថា បុណ្យភ្ជុំបិណ្ឌជាពិធីដ៏សំខាន់សម្រាប់ប្រជាពលរដ្ឋខ្មែរនិងក្នុងវប្បធម៌ខ្មែរ។ ក្នុងរយៈពេល១៥ថ្ងៃ គឺចាប់ពី ថ្ងៃ កាន់បិណ្ឌទី១រហូតដល់ថ្ងៃទី១៥ឬហៅថាថ្ងៃភ្ជុំធំ ប្រជាពលរដ្ឋខ្មែរនៅតាមភូមិនីមួយៗបានចែកវេនគ្នាធ្វើបាយម្ហូប ជាចង្ហាន់ យកទៅប្រគេនព្រះសង្ឃដើម្បីឧទ្ទិសកុសល ដល់ញាតិការទាំងប្រាំពីរសន្ដានដែលបានចែកឋានទៅ។ 

គេមានជំនឿថា ពេលមនុស្សស្លាប់ទៅព្រលឹង អ្នកស្លាប់នោះអាចទៅកើតនៅឋានទេវលោក ឬក៏ឋាននរក ប្រេតជាដើម។ 

ចំពោះករណីអ្នកទៅកើតនៅឋាននរក ប្រេត  គឺមានតែការ ប្រគេនចង្ហាន់ដល់ព្រះសង្ឃឲ្យលោក ឧទ្ទិសកុសលជូនទៅ ប៉ុណ្ណោះទើបអាចទៅដល់។ 

អាស្រ័យដោយពិធីបុណ្យនេះ ក្នុងមួយឆ្នាំមាន រយៈពេល១៥ថ្ងៃ  ហេតុដូច្នេះហើយ ទើបពលរដ្ឋខ្មែរនាំគ្នាធ្វើបុណ្យនេះ តាមជំនឿពីដូនតា មកដើម្បីឲ្យចិត្តជ្រះថ្លា៕

អត្ថបទ៖ វុទ្ធឦសាន

The post ពលរដ្ឋជាច្រើនបាននាំគ្នាអញ្ជើញទៅចូលរួមពិធីបុណ្យភ្ជុំបិណ្ឌនៅតាមវត្តអារាមនានា ក្នុងខេត្តរតនគិរី appeared first on Kampuchea Thmey Daily.

The post ភ្ញៀវទេសចរ​ជាង ៣ ម៉ឺននាក់ទៅលេងរមណីយដ្ឋានខេត្តកែប​ថ្ងៃបិណ្ឌទី ១៤​ appeared first on Kampuchea Thmey Daily.