ភ្ជុំបិណ្ឌ ២០២៣ Archives - Kampuchea Thmey Daily

ហេតុអ្វីគេចាត់ទុកបិណ្ឌ ១ និងភ្ជុំធំ ជាថ្ងៃសំខាន់មិនអាចអាក់ខានបាន?

សាង ស្រីល័ក្ខ — Mon, 02 Oct 2023 01:00:00 +0000

ចំពោះអ្នកកាន់ព្រះពុទ្ធសាសនានៅក្នុងប្រទេសកម្ពុជា ប្រាកដជាបានដឹងច្បាស់ពីប្រពៃណីទំនៀមទម្លាប់ និងការប្រារព្ធពិធីទៅតាមជំនឿពីបរមបុរាណរៀងមក។ ជាក់ស្ដែងថ្ងៃនេះ គឺជាថ្ងៃកាន់បិណ្ឌទី៣ តាមវត្តអារាមនីមួយៗ នឹងឮសូរសណ្ដាប់ធម៌ទេសនារបស់ព្រះសង្ឃ និងការឲ្យពរ ពីតាជី យាយជី មិនខាន។

បើតាមជំនឿពីដូនតាខ្មែរមក បិណ្ឌ១ គឺថ្ងៃពិសេសមិនអាចអាក់ខានបានឡើយ ជាពិសេសនោះគឺថ្ងៃភ្ជុំធំតែម្ដង។ មូលហេតុដែលកូនខ្មែរគ្រប់រូបតែងមានជំនឿលើសាសនាព្រះពុទ្ធមិនចោលបិណ្ឌ១ និងភ្ជុំធំ គឺដោយសារតែពួកគេខ្លាចថាដូនតាដែលបានចែកឋានទៅកាន់បរលោក មិនអាចរកសាច់ញាតិ្តខ្លួនឃើញ។ ដោយគេជឿថា វិញ្ញាណទាំងឡាយណាដែលគ្មានសាច់ញត្តិ ត្រូវបានគេដោះលែងពីឋាននរកឲ្យមកកាន់វត្តអារាម ដើម្បីមកទទួលយកអាហារពីសាច់ញត្តិរបស់ពួកគេ ដែលបានបង្សុកូលឧទិសកុសលផលបុណ្យទៅឲ្យ។ ពពួកប្រេតនឹងទៅគ្រប់ ៧ វត្ត ដើម្បីរកមើលសាច់ញត្តិពួកគេ ប្រសិនបើវិញ្ញាណទាំងនោះ មិនឃើញកូនចៅខ្លួនមកវត្តទេ នោះនឹងដាក់បណ្ដាសាតាមអារម្មណ៍ដែលខឹងមិនខានឡើយ។ នេះហើយជាមូលហេតុដែលសាច់ញត្តិកូនចៅខ្មែរ គួរតែយកចង្ហាន់ទៅវត្ត បើទោះបីជាច្រើនឬក៏តិចក៏ដោយ ក្នុងអំឡុងពេលដាក់បិណ្ឌទី១ ឬភ្ជុំធំនេះតែម្ដង។

បើទោះបីជាបិណ្ឌទី១ សំខាន់មិនអាចខ្វះបាន ប៉ុន្តែពុទ្ធសាសនិកខ្មែរគ្រប់រូប ចូរកុំភ្លេចមនុស្សពីរនាក់ដែលបានធ្វើឲ្យអ្នកមានថ្ងៃនេះមកបាន។ ពួកលោកជាព្រះរស់ ដែលយើងគ្រប់គ្នាមិនត្រូវភ្លេចធ្វើបុណ្យជាមួយមុនគេបង្អស់ មុននឹងអ្នករៀបចង្ហាន់ទៅប្រគេនព្រះសង្ឃ ដែលគង់នៅទីវត្តអារាម។

ថ្វីបើ បិណ្ឌមួយនិងភ្ជុំសំខាន់ក៏ពិតមែន ក៏ប៉ុន្តែសម្រាប់ពុទ្ធសាសនិកដែលមានការរវល់ នៅតែអាចទៅធ្វើបុណ្យគ្រប់ថ្ងៃដែលលាន់បិណ្ឌបានដដែល។ថ្ងៃណាក៏សំខាន់ដែរសម្រាប់យើងឲ្យតែមានចិត្តជ្រះថ្លាក្នុងព្រះពុទ្ធសាសនាគឺជាកុសលផលបុណ្យរបស់អ្នកហើយ៕

គ្រូ ណុប

ចុចអាន៖ការពិត ៥ យ៉ាង ទាក់ទងនឹងពិធីបុណ្យភ្ជុំបិណ្ឌ

The post ហេតុអ្វីគេចាត់ទុកបិណ្ឌ ១ និងភ្ជុំធំ ជាថ្ងៃសំខាន់មិនអាចអាក់ខានបាន? appeared first on Kampuchea Thmey Daily.

ការពិត ៥ យ៉ាង ទាក់ទងនឹងពិធីបុណ្យកាន់បិណ្ឌ និងភ្ជុំបិណ្ឌ

សាង ស្រីល័ក្ខ — Sat, 30 Sep 2023 00:50:00 +0000

ភ្ជុំបិណ្ឌ ជាពិធីបុណ្យមួយក្នុងចំណោមពិធីបុណ្យធំៗដទៃទៀត ចំពោះអ្នកកាន់ព្រះពុទ្ធសាសនាក្នុងប្រទេសកម្ពុជា។ ប្រជាជនខ្មែរតាំងពីបុរាណរៀងមក តែងប្រារព្ធពិធីនេះឡើងចាប់ពីថៃ្ង ១រោច ខែភទ្របទ រហូតដល់ថៃ្ងទី ១៥រោច មានរយៈពេល ១៥ ថៃ្ង ដែលយើងហៅថាបិណ្ឌ១, បិណ្ឌ២ និងថៃ្ងបញ្ចប់ គឺជា ថៃ្ង “ភ្ជុំបិណ្ឌ”។

យ៉ាងណាមិញ ក្នុងនាមជាពុទ្ធសាសនិកខ្មែរ នៃអ្នកកាន់សាសនាព្រះពុទ្ធ តែងមានទម្លាប់អុជធូបទានថ្វាយបង្គំព្រះ ក៏គួរដឹង និងស្វែងយល់ពីពិធីបុណ្យសាសនាដ៏ធំនេះដូចខាងក្រោមផងដែរ។

១ ជាបុណ្យប្រពៃណីដ៏ពេញនិយម

ភ្ជុំបិណ្ឌគឺជាពិធីបុណ្យព្រះពុទ្ធសាសនាដ៏សំខាន់បំផុតមួយ នៅក្នុងប្រទេសកម្ពុជា ព្រោះពិធីនេះ បាននាំគ្រួសារនៅទូទាំងរាជធានីខេត្ត មកជួបជុំគ្នា បន្ទាប់ពីបែកគ្នាជាយូរមកហើយ។

២ ជាបុណ្យដែលមានប្រវត្តិនិងអត្ថន័យពីបុរាណកាល

“ ភ្ជុំ” មានន័យថា“ ប្រមូលផ្ដុំគ្នា” និង“ បិណ្ឌ” មានន័យថា“ បាយដែលមូលជាដុំៗដូចបាល់” ។ ដូច្នេះបានបញ្ជាក់យ៉ាងពេញន័យថា ពិធីបុណ្យកាន់បិណ្ឌ និងភ្ជុំបិណ្ឌ គឺជាការជួបជុំមូលគ្នា។

៣ តំណាងឲ្យការគោរពដល់ឪពុកម្ដាយ (ព្រះរស់)

ពិធីបុណ្យនេះអប់រំមនុស្សវ័យក្មេងស្រករក្រោយ ឲ្យដឹងអំពីរបៀបដែលពួកគេគួរផ្ដល់ការគោរពចំពោះសាច់ញាតិចាស់ទុំ ឬឪពុកម្ដាយ។ ដែលជាទូទៅគឺការជូនគ្រឿងឧបភោគបរិភោគ ឬលុយកាក់ ឲ្យព្រះរស់បានទៅវត្តរក្សាទានសិលនៅតាមទីវត្តអារាម ជាមួយយាយជីតាជី។

រូបភាពពី Google

៤ ថ្ងៃចុងក្រោយជាថ្ងៃជួបជុំនិងពិសេសជាងគេ

ថ្ងៃទី ១៥ គឺជាថ្ងៃដ៏សំខាន់បំផុតនៃភ្ជុំបិណ្ឌ ហើយក៏ជាថ្ងៃចុងក្រោយនៃពិធីដែលប្រារព្ធធ្វើឡើងអស់រយៈពេលកន្លះខែ។ ជាពិសេសគ្រួសារនីមួយៗ នឹងបានទទួលទានអាហារជុំគ្នា ក្រោយខកខានជួបគ្នាអស់រយៈកាលយូរក៏ព្រោះតែរវល់កិច្ចការងារ។

៥ ហាមដាច់ខាតកុំប្រើសំលៀកបំពាក់ពណ៌សពេលជួបជុំ

ពណ៌សគឺជាពណ៌បុណ្យសពនៅក្នុងប្រទេសកម្ពុជាយើង (អាចប្រើបានពេលទៅវត្ត)។ ដូច្នេះក្នុងឱកាសបុណ្យភ្ជុំបិណ្ឌ ចាស់ៗហាមផ្ដាច់កុំប្រើពណ៌ស ស្លៀកចូលរួមពិធីជួបជុំគ្រួសារឲ្យសោះ។ គួរស្លៀកឈុតចម្រុះពណ៌ ឬឈុតភ្លឺៗ ដើម្បីនាំសេចក្ដីសុខនាំសុខសប្បាយដល់ខ្លួនឯងនិងក្រុមគ្រួសារ៕

គ្រូ ណុប

ចុចអាន៖ចុងខែកញ្ញា ឆ្នាំទាំង ៥ នេះ នឹងទទួលបានលាភសំណាងផ្នែកលុយកាក់

The post ការពិត ៥ យ៉ាង ទាក់ទងនឹងពិធីបុណ្យកាន់បិណ្ឌ និងភ្ជុំបិណ្ឌ appeared first on Kampuchea Thmey Daily.