ភ្នំគូលែន Archives - Kampuchea Thmey Daily

លែងលំបាកដូចមុន! ផ្លូវទៅស្រះដំរីលើខ្នងភ្នំគូលែនបញ្ចប់ការស្ថាបនាកែលម្អ ១០០% ទេសចរទៅកម្សាន្តទីបុរាណស្ថានដ៏ពិសិដ្ឋកាន់តែងាយស្រួល

Dy Bunnara — Sat, 25 Apr 2026 02:01:59 +0000

ផ្លូវទៅស្រះដំរីនៅលើខ្នងភ្នំគូលែនបានបញ្ចប់ការស្ថាបនាកែលម្អ ១០០% ដែលបានជួយសម្រួលដល់ភ្ញៀវទេសចរអាចធ្វើដំណើរទៅកម្សាន្តនៅទីបុរាណស្ថានដ៏ពិសិដ្ឋលើខ្នងភ្នំគូលែនលែងពិបាកដូចមុន។

លោក គង់ វ៉ារ៉ុង ប្រធានការិយាល័យឧទ្យានជាតិព្រះជ័យវរ្ម័ន-នរោត្តម ភ្នំគូលែនបានឲ្យកម្ពុជាថ្មីដឹងថា ក្រោយទទួលបានការណែនាំពីសម្តេចធិបតីនាយករដ្ឋមន្រ្តី កងវិស្វកម្មបានដាក់គ្រឿងចក្រដើម្បីកែលម្អផ្លូវឆ្ពោះទៅស្រះដំរី ដែលជាតំបន់ទេសចរណ៍ប្រវត្តិសាស្រ្តដ៏ទាក់ទាញលើខ្នងភ្នំគូលែនដែលទេសចរកម្រទៅដល់។

លោកថា កន្លងទៅភ្ញៀវទេសចរជួបការលំបាកសម្រាប់ការទៅកម្សាន្តនៅទីបុរាណស្ថានស្រះដំរី ដោយសារស្ថានភាពផ្លូវពិបាកធ្វើដំណើរទៅដល់។

«តាមការណែនាំពីសម្តេចធិបតី កងវិស្វកម្មបានដាក់គ្រឿងចក្រ ដើម្បីកែសម្រួលផ្លូវឲ្យបានល្អប្រសើរ ប៉ុន្តែនៅរក្សាទម្រង់ដើមគ្រាន់តែធ្វើយ៉ាងណាឲ្យការធ្វើដំណើរងាយស្រួលជាងមុន»។ លោក គង់ វ៉ារ៉ុង បញ្ជាក់។

ផ្លូវទៅតំបន់ទេសចរណ៍ស្រះដំរី ត្រូវបានកងវិស្វកម្មចាប់ផ្តើមឈូសកែលម្អឡើងវិញមានប្រវែងជាង ៦ គីឡូម៉ែត្រ ចាប់ចេញពីសហគមន៍អន្លង់ធំ។ លោក គង់ វ៉ារ៉ុង បន្តថា ឥឡូវផ្លូវប្រវែងជាង ៦ គីឡូម៉ែត្របានបញ្ចប់ការស្ថាបនាកែលម្អ ១០០% ដែលអាចឲ្យភ្ញៀវទៅកម្សាន្តមិនពិបាកទៀតទេ។

បើតាមលោក គង់ វ៉ារ៉ុង ការកែលម្អផ្លូវនេះបានជួយជំរុញឲ្យភ្ញៀវទេសចរជាតិ និងអន្តរជាតិអាចទៅទស្សនាតំបន់ប្រវត្តិសាស្ត្រកាន់តែច្រើនថែមទៀត។

ក្នុងឱកាសចុះជួបសំណេះសំណាលជាមួយពលរដ្ឋនៅសហគមន៍ទេសចរណ៍អន្លង់ធំ ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ កាលពីថ្ងៃទី ២៥ ខែកុម្ភៈ ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឲ្យកងវិស្វកម្មសម្តេចតេជោ ហ៊ុន សែន ខេត្តសៀមរាប ពិភាក្សាជាមួយអាជ្ញាធរអប្សរា ក្នុងការធ្វើឱ្យប្រសើរឡើងផ្លូវពីសហគមន៍អន្លង់ធំរហូតដល់ស្រះដំរី ដើម្បីផ្តល់ភាពងាយស្រួលនិងសុវត្ថិភាពដល់ភ្ញៀវទេសចរទៅកម្សាន្ត។

សម្តេចនាយករដ្ឋមន្រ្តីបានគូសបញ្ជាក់ថា ការធ្វើឲ្យប្រសើរឡើងផ្លូវពីសហគមន៍ឆ្ពោះទៅកាន់ស្រះដំរី ត្រូវឈរលើគោលការណ៍ថែរក្សាសណ្ឋានផ្លូវដើម ដោយមិនធ្វើឱ្យប៉ះពាល់ដល់គុណតម្លៃវប្បធម៌របស់ជាតិ ពិសេសក៏ត្រូវមានការឯកភាពពីតំណាងសហគមន៍ផងដែរ។

នៅក្នុងឧទ្យានជាតិ ព្រះជ័យវរ្ម័ន-នរោត្តម «ភ្នំគូលែន» មានគោលដៅទេសចរណ៍សរុបចំនួន ៨៥ កន្លែង ដែលមានទឹកជ្រោះ ប្រាសាទបុរាណ បុរាណស្ថាន និងពើងធម្មជាតិ។

ក្នុងចំណោមតំបន់ទេសចរណ៍នៅលើភ្នំគូលែន «ស្រះដំរី» ជាទីតាំងទេសចរណ៍ដ៏ទាក់ទាញបំផុតមួយ ដែលមានទីតាំងស្ថិតនៅឃុំខ្នងភ្នំ ស្រុកស្វាយលើ ខេត្តសៀមរាប។

ទីនោះស្រស់ស្អាតហួសពីការស្មាន ដែលមានរូបសំណាកស្ដេចដំរីដែលមានអក្សរបុរាណចារឹកថា «ឥន្រ្ទតបតិសិហ» រួមមានស្ដេចកង្កែប ស្ដេចតោ ២ និងព្រះគោ ហើយនៅខាងមុខរូបសំណាកដែលឆ្លាក់ពីថ្មភ្នំធម្មជាតិទាំងនេះ ក៏មានស្រះទឹកមួយទៀត ដែលអ្នកស្រុកហៅថា «ស្រះដំរី»។

ស្រះដំរីជាឈ្មោះដែលពលរដ្ឋក្នុងមូលដ្ឋានហៅ ដោយសារមានរូបដំរីធំមួយ និងនៅពីមុខនោះមានស្រះទឹក។

ទេសចរពេលទៅទស្សនានៅស្រះដំរី ក្រៅពីសិក្សាពីប្រវត្តិសាស្រ្តពីរមណីយដ្ឋានបុរាណនេះ ក៏អាចសម្រាកលំហែនៅទីនោះដើម្បីស្រូបយកខ្យល់អាកាសបរិសុទ្ធ និងគយគន់ទេសភាពពីលើទីខ្ពស់ថែមទៀតផង៕

The post លែងលំបាកដូចមុន! ផ្លូវទៅស្រះដំរីលើខ្នងភ្នំគូលែនបញ្ចប់ការស្ថាបនាកែលម្អ ១០០% ទេសចរទៅកម្សាន្តទីបុរាណស្ថានដ៏ពិសិដ្ឋកាន់តែងាយស្រួល appeared first on Kampuchea Thmey Daily.

សហគមន៍កសិកម្មទំនើបស្វាយចន្ទីភ្នំគូលែន គ្រោងពង្រីកខ្សែច្រវាក់ផលិតកម្មឱ្យដល់ការកែច្នៃ

deth leng — Sat, 24 Jan 2026 02:10:03 +0000

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាជាមួយសមាជិកនៃ សហគមន៍កសិកម្មទំនើបស្វាយចន្ទីភ្នំគូលែន នៅខេត្តសៀមរាប ដើម្បីពិភាក្សាអំពីផែនការការអាជីវកម្មទំហំជិត៦០ ម៉ឺនដុល្លារ និងផែនការគ្រប់គ្រប់ ការតភ្ជាប់ទីផ្សារទុកជាមុន និងគម្រោងកម្ចីឥណទានដើមទុន។

លោក ឃឹម ហ្វីណង់ ថ្លែងថា៖ «សហគមន៍ដែលមានសមាជិកជាង១០០គ្រួសារនេះគ្រោងនឹងពង្រឹកខ្សែច្រវាក់ផលិតកម្មស្វាយចន្ទីរបស់ខ្លួនឱ្យដល់ការកែច្នៃតែម្តង ដើម្បីទទួលបានតម្លៃបន្ថែមច្រើនពីដាំដុះស្វាយចន្ទីពូជប្រពៃណី ដែលច្រើនមានទិន្នផលទាបតែមិនប្រើប្រាស់សារជាតិគីមីឡើយ ហើយអាចនឹងមានភាពទាក់ទាញសម្រាប់អ្នកបរិភោគចុងក្រោយ។ ភ្ញៀវទេសចរដែលឡើងមកទស្សនាផ្ទាល់នៅលើភ្នំគូលែនគឺជាអតិថិជនគោលដៅមួយដ៏សំខាន់»។

ឃុំខ្នងភ្នំនៃភ្នំគូលែន មានអ្នកដាំស្វាយចន្ទីប្រមាណ៨០០គ្រួសារ នៅលើផ្ទៃដីជាង៣០០០ហិកតា ប៉ុន្តែភាគច្រើនមានទិន្នផលទាប ពូជប្រពៃណី ដាំខុសស្តង់ដាបច្ចេកទេស និងជាប្រភេទកសិកម្មយថាផល។

លោក ឃឹម ហ្វីណង់ ធ្លាប់លើកឡើងថា នៅទីនេះមានទាំងបញ្ហាប្រឈម និងឱកាស ជាពិសេសសក្តានុពលពាក់ព័ន្ធនឹងវិស័យទេសចរណ៍ ដែលអាចអនុញ្ញាតឱ្យបងប្អូនកសិករកែច្នៃរួចនាំចេញនៅនឹងកន្លែង។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជានាំចេញគ្រាប់ស្វាយចន្ទីឆៅ ប្រមាណ ១ លានតោន កើនឡើង ២៧% គិតជាទឹកប្រាក់ ១,៥ ពាន់លានដុល្លារ។

កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺនហិកតា (១៤៧ ៧០៣) ខេត្តក្រចេះជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្តត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

The post សហគមន៍កសិកម្មទំនើបស្វាយចន្ទីភ្នំគូលែន គ្រោងពង្រីកខ្សែច្រវាក់ផលិតកម្មឱ្យដល់ការកែច្នៃ appeared first on Kampuchea Thmey Daily.

ភ្នំគូលែន និងកំពង់ភ្លុក បើមានការកែច្នៃបន្ថែម មានសក្តានុពលទាក់ទាញទេសចរ ស្នាក់នៅខេត្តសៀមរាបកាន់តែយូរ

Dy Bunnara — Thu, 29 May 2025 00:16:20 +0000

តំបន់ទេសចរណ៍ភ្នំគូលែន និងកំពង់ភ្លុក បើសិនមានការរៀបចំកែលម្អឲ្យល្អប្រសើរថែមទៀត នឹងអាចទាក់ទាញទេសចរអាចស្នាក់នៅខេត្តសៀមរាបកាន់តែយូរថ្ងៃថែមទៀត។ នេះបើតាមលោក កៅ ហ្វីលីព ប្រធានសមាគមក្លិបទេសចរណ៍ខេត្តសៀមរាប។

ប្រធានសមាគមក្លិបទេសចរណ៍ខេត្តសៀមរាប បានមើលឃើញពីសក្ដានុពលទេសចរណ៍នៅតំបន់ភ្នំគូលែន និងកំពង់ភ្លុកដែលនៅជាប់មាត់បឹងទន្លេសាបគឺជាគោលដៅទេសចរដ៍ទាក់ទាញបំផុត ប៉ុន្តែបច្ចុប្បន្ននៅមិនទាន់រៀបចំបានល្អនៅឡើយទេ។

បើតាមប្រធានសមាគមក្លិបទេសចរណ៍ខេត្តសៀមរាប ទេសចរបរទេសដែលមកទស្សនាខេត្តសៀមរាបជាធម្មតាស្នាក់នៅជាមធ្យមត្រឹម ២ ទៅ ៣ ថ្ងៃប៉ុណ្ណោះ ហើយបើសិនទីតាំងទេសចរណ៍ទាំងពីររៀបចំកែច្នៃបន្ថែមទៀត នឹងក្លាយជាគោលដៅដ៏ទាក់ទាញ ដែលអាចជំរុញឲ្យភ្ញៀវទេសចរបន្តស្នាក់នៅ និងដើរកម្សាន្តក្នុងខេត្តសៀមរាបជាច្រើនថ្ងៃបន្ថែមទៀត៕

The post ភ្នំគូលែន និងកំពង់ភ្លុក បើមានការកែច្នៃបន្ថែម មានសក្តានុពលទាក់ទាញទេសចរ ស្នាក់នៅខេត្តសៀមរាបកាន់តែយូរ appeared first on Kampuchea Thmey Daily.

គោលដៅលំហែបៃតង ចេញជារូបរាងនៅលើភ្នំគូលែន រង់ចាំទទួលទេសចរទៅសម្រាកកម្សាន្ត

Dy Bunnara — Sun, 11 May 2025 02:30:25 +0000

ទីលំហែបៃតងរបស់សហគមនាគមន៍ចំនួន ១០ កន្លែង បានបញ្ចប់ការសាងសង់ជាស្ថាពរ និងកំពុងរង់ចាំទទួលភ្ញៀវទេសចរដែលនិយមការសម្រាកលំហែកម្សាន្តជាមួយធម្មជាតិបៃតង នៅលើខ្នងភ្នំនៃឧទ្យានជាតិព្រះជ័យវរ្ម័ន នរោត្តម«ភ្នំគូលែន» ក្នុងខេត្តសៀមរាប។

លោក អ៊ាង សុផល្លែត រដ្ឋមន្រ្តីក្រសួងបរិស្ថានបានមានប្រសាសន៍ថា ពេលនេះគោលដៅលំហែបៃតង ចាប់ផ្តើមចេញជារូបរាងហើយនៅលើភ្នំគូលែន បន្ទាប់គម្រោងរបស់ក្រសួងបរិស្ថានបានជួយសាងសង់ទីលំហែបៃតងរបស់សហគមន៍ តាមរចនាបទខ្មែរនិងមានលក្ខណៈទំនើប ហើយរួចរាល់និងគ្រោងប្រគល់ជូនទៅសហគមន៍តំបន់ការពារធម្មជាតិព្រៃធំអន្លង់ ដើម្បីផ្តល់ជូនសេវាកម្ម ការលំហែកម្សាន្តប្រកបដោយសុខុដុមរមនា ជាមួយធម្មជាតិដល់ភ្ញៀវជាតិនិងអន្តរជាតិ ដែលមកសម្រាកលំហែ បោះតង់ និងទស្សនាជុំវិញតំបន់ភ្នំគូលែន។

បើតាមលោក រដ្ឋមន្រ្តី ការបង្កើតការអភិវឌ្ឍគោលដៅ «លំហែបៃតង» ដើម្បីជួយលើកកម្ពស់ជីវភាពសហគមន៍នៅតាមតំបន់ការពារធម្មជាតិ ដើម្បីពង្រឹងការអភិរក្សព្រៃឈើ និងលើកកម្ពស់ជីវភាពសហគមន៍ ស្របតាមអនុសាសន៍ណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

នៅក្នុងភូមិសាស្រ្ត ឧទ្យានជាតិព្រះជ័យវរ្ម័ន នរោត្តម «ភ្នំគូលែន» រដ្ឋមន្រ្តីក្រសួងបរិស្ថានបានផ្តួចផ្តើមបង្កើតជារបៀងគោលដៅលំហែបៃតង ដោយមានសហគមន៍តំបន់ការពារធម្មជាតិចំនួន ៥ ដែលមានសក្តានុពលធម្មជាតិខុសៗគ្នា។ ក្រសួងបរិស្ថានបានរៀបចំសាងសង់ហេដ្ឋារចនាសម្ព័ន្ធ ផ្លូវថ្នល់ អភិវឌ្ឍន៍ការទាក់ទាញទេសចរទៅទស្សនាកន្លែងធម្មជាតិ ប្រវត្តិសាស្រ្ត វប្បធម៌ ប្រាសាទបុរាណ តំបន់ទេសភាព ព្រៃឈើ ទស្សនាសត្វព្រៃ ទឹកធ្លាក់ និងការសម្រាកកម្សាន្ត។

ដោយឡែក ទីលំហែបៃតងរបស់សហគមនាគមន៍ ជាគម្រោងមួយទើបតែចាប់ផ្តើមជាមួយសហគមន៍តំបន់ការពារធម្មជាតិលើខ្នងភ្នំគូលែន ដែលបានដើរតួនាទីសំខាន់ក្នុងការគ្រប់គ្រងធនធានធម្មជាតិ ការអភិរក្សជីវៈចម្រុះ ដែលក្នុងនោះការកសាងភាពស្អាត ភាពបៃតង ដែលបានចែងក្នុងយុទ្ធសាស្រ្តចក្រាវិស័យបរិស្ថាន ឆ្ពោះទៅការរស់នៅប្រកបដោយចីរភាព។

លោក អ៊ាង សុផល្លែត បានថ្លែងថា យុទ្ធសាស្រ្តចក្រាវិស័យបរិស្ថាន បានកំពុងធ្វើឱ្យសហគមន៍ មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី ក្នុងនោះរួមមាន ការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់សហគមន៍ថែមទៀត។

ជាមួយគ្នានេះ លោករដ្ឋមន្រ្តី បានជំរុញឱ្យសហគមន៍មានការអភិវឌ្ឍជីវភាពប្រកបដោយនិរន្តរភាព នោះត្រូវធ្វើយ៉ាងណាថែរក្សាបរិស្ថានឱ្យស្អាត មានផ្នត់គំនិតគំនិត និងស្អាតនៅក្រៅខ្លួន ដែលបម្រើសេវាកម្ម ដោយភាពស្មោះត្រង់ រៀបចំម្ហូបអាហារត្រូវមានអនាម័យ និងមានតម្លៃសមរម្យ ដែលជាទីទាក់ទាញអ្នកទេសចរណ៍ មកកម្សាន្តបានច្រើនជាប្រចាំ។

រដ្ឋមន្រ្តីក្រសួងបរិស្ថាន បានប្រកាសដាក់ចេញការអភិវឌ្ឍ «គោលដៅលំហែបៃតង» នៅឧទ្យានជាតិព្រះជ័យវរ្ម័ន នរោត្តម «ភ្នំគូលែន» តាមរយៈការរៀបចំបង្កើតជារបៀងសហគមន៍តំបន់ការពារធម្មជាតិ ទាំងអស់នៅលើភ្នំគូលែន ដោយជួយរៀបចំកសាងផ្លូវតភ្ជាប់សហគមន៍ ហេដ្ឋរចនាសម្ព័ននានា កន្លែងគ្រប់គ្រងទុកដាក់សំណល់រឹង រៀបចំបង្កើនជីវភាពគ្រួសារ របស់ប្រជាសហគមន៍ តាមរយៈមុខរបរចិញ្ចឹមសត្វ ដាំបន្លែ និងគោលដៅលំហែបៃតង ដែលក្នុងនោះ បានផ្តល់ទីលំហែបៃតងរបស់សហគមនាគមន៍ ជំហានដំបូង ចំនួន១០ កន្លែង ហើយជាបន្តបន្ទាប់ គម្រោងនឹងពង្រីកបន្ថែមជូនទៅសហគមន៍ ដើម្បីបង្កើនជីវភាពកាន់តែប្រសើរឡើងថែមទៀត។

ដោយឡែក នៅឧទ្យានជាតិ ព្រះសុរាម្រិតកុសុមៈ«គិរីរម្យ» ក្នុងភូមិសាស្រ្តខេត្តកំពង់ស្ពឺ ក្រសួងបរិស្ថាន បានជួយសាងសង់កន្លែងវបស្សនា ចំនួន ៥០ ទីតាំង ក្នុងបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដែលមានភ្ញៀវទេសចរណ៍ជាច្រើន មកសម្រាក ធ្វើសមាធិ ធ្វើឱ្យចិត្តស្អាត ស្អាតទាំងគំនិត និងស្អាតទាំងបរិស្ថានខាងក្រៅ ជាមួយធម្មជាតិស្រស់ស្អាតព័ទ្ធជុំវិញ។ លើសពីនេះ ក្រសួងបរិស្ថានបានពង្រីកគម្រោង«គោលដៅលំហែបៃតងនៅតំបន់ទេទឹកពុះ និងតំបន់ខ្នងផ្សារនៃតំបន់ជួរភ្នំក្រវាញ និងតាមតំបន់ការពារធម្មជាតិមួយចំនួនទៀត ដើម្បីបង្កើនជីវភាពសហគមន៍ និងពង្រឹងការការពារនិងអភិរក្សធនធានធម្មជាតិ ប្រកបដោយនិរន្តរភាព៕

The post គោលដៅលំហែបៃតង ចេញជារូបរាងនៅលើភ្នំគូលែន រង់ចាំទទួលទេសចរទៅសម្រាកកម្សាន្ត appeared first on Kampuchea Thmey Daily.

កសិករដាំចន្ទីនៅភ្នំគូលែន ចង់ចងក្រងជាសហគមន៍កសិកម្មទំនើប

deth leng — Mon, 28 Apr 2025 03:45:58 +0000

ប្រជាកសិករដាំស្វាយចន្ទីប្រមាណជាង ១០០ គ្រួសារ នៅឃុំខ្នងភ្នំ ស្រុកខ្នងភ្នំ លើភ្នំគូលែន ខេត្តសៀមរាប ចាប់អារម្មណ៍ចង់ចងក្រងគ្នាជាសហគមន៍កសិកម្មទំនើប។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា នៅទីនេះមានទាំងបញ្ហាប្រឈម និងមានទាំងឱកាស ជាពិសេសសក្តានុពលពាក់ព័ន្ធនឹងវិស័យទេសចរណ៍ ដែលអាចអនុញ្ញាតឱ្យបងប្អូនកសិករយើងអាច«កែច្នៃរួចនាំចេញនៅនឹងកន្លែង»។

លោក ឃឹម ហ្វីណង់ បន្ថែមថា៖ «វាមានសក្ដានុពលក្នុងការចងក្រងពួកគាត់ឱ្យទៅជាសហគមន៍កសិកម្មទំនើប ហើយធ្វើយ៉ាងណា ដើម្បីឱ្យពួកគាត់ទទួលបានប្រាក់ចំណេញពីសក្ដានុពលដែលពួកគាត់មាន»។

អ្នកស្រី នាង ណេត កសិករដាំស្វាយចន្ទីភូមិអន្លង់ធំ ស្រុកស្វាយលើ ខេត្តសៀមរាបប្រាប់ថា ខ្លួននឹងចូលសហគមន៍កសិកម្មទំនើប ដោយសារកន្លងមកទិន្នផលដាំដុះរបស់នាងមិនទទួលបានទិន្នផលច្រើន។

លោក តូច យន់ មេភូមិខ្លាឃ្មុំ ស្រុកខ្នងភ្នំ ខេត្តសៀមរាបថ្លែងថា៖ «ពីដើមមកយើងធ្លាប់ធ្វើចម្ការចន្ទីលក្ខណៈប្រពៃណី ពេលឯកឧត្តមមកគាត់ចង់បង្កើតសហគមន៍កសិកម្មទំនើប ខ្ញុំចង់ចូលរួមដោយសារតែយើងអាចប្រើប្រាស់ថ្នាំ ជី ក្នុងសហគមន៍បានដើម្បីបង្កើនទិន្នផលយើង»។

យោងតាមសមាគមស្វាយចន្ទីកម្ពុជា នៅឆ្នាំ ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុងនោះនាំចេញគ្រាប់ឆៅបានចំនួន ៨១ ម៉ឺន ៥ ពាន់តោន កើនឡើង ២១% គិតជាទឹកប្រាក់ ១,១៥០ ពាន់លានដុល្លារ កើន ២៦,១៥%។ ក្នុងនោះនាំចេញទៅវៀតណាមចំនួន ៧៩ ម៉ឺន ៥ ពាន់តោន។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺនហិកតា (១៤៧ ៧០៣) ខេត្តក្រចេះជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្តត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត

The post កសិករដាំចន្ទីនៅភ្នំគូលែន ចង់ចងក្រងជាសហគមន៍កសិកម្មទំនើប appeared first on Kampuchea Thmey Daily.

ស្វែងយល់ពីឧទ្យានជាតិភ្នំគូលែន «ប្រវត្តិ ភូមិសាស្រ្ត វប្បធម៌ សក្តានុពលទេសចរណ៍»

Dy Bunnara — Sun, 16 Mar 2025 04:43:38 +0000

១. ស្ថានភាពទូទៅ

ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» បង្កើតឡើងតាមព្រះរាជក្រឹត្យ ចុះថ្ងៃទី១ ខែវិច្ឆិកា ឆ្នាំ១៩៩៣ គ្របដណ្តប់លើផ្ទៃដីទំហំ ៣៧.៥០០ហិកតា ស្ថិតក្នុងភូមិសាស្រ្តស្រុកចំនួន៤ គឺ ស្រុកស្វាយលើមានផ្ទៃដីទំហំ ២១.៧៧០ ហិកតា (ឃុំខ្នងភ្នំ ឃុំស្វាយលើ ឃុំតាសៀម និងឃុំកន្ទួត) ស្រុកបន្ទាយស្រីមានផ្ទៃដីទំហំ ១២.៣៨២ ហិកតា (ឃុំត្បែង និងឃុនរាម) ស្រុកវ៉ារិនមានផ្ទៃដីទំហំ ៣.១២១ ហិកតា (ឃុំស្រែណូយ) និងស្រុកសូទ្រនិគមមានផ្ទៃដីទំហំ ១០២ ហិកតា (ឃុំខ្នារពោធិ៍ ឃុំចាន់ស និងឃុំពពេល)។

នៅឆ្នាំ២០០៤ ក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលខេត្តសៀមរាប បានធ្វើបច្ចុប្បន្នភាពព្រំប្រទល់ឧទ្យានជាតិព្រះជ័យវរ្ម័ន-នរោត្តម «ភ្នំគូលែន»។ ជាក់ស្ដែងឧទ្យានជាតិនេះមានផ្ទៃដីទំហំ ៣៧.៣៧៣ ហិកតា។ នៅឆ្នាំ២០២៣ តាមរយៈអនុក្រឹត្យលេខ ១៨៨ អនក្រ.បក ចុះថ្ងៃទី១៧ ខែកក្កដា ឆ្នាំ២០២៣ របស់រាជរដ្ឋាភិបាលកម្ពុជា ឧទ្យានជាតិព្រះជ័យវរ្មន័-នរោត្តម «ភ្នំគូលែន» មានផ្ទៃដីទំហំ ៦២ ៨៨៣ ស្ថិតក្នុងភូមិសាស្រ្តខេត្តសៀមរាប ដែលគ្របដណ្តប់ចំនួន ០៥ ស្រុក ១៤ ឃុំ និង ៤៥ភូមិ។

ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» មានរយៈកម្ពស់អតិបរមា ៤៩៨ ម៉ែត្រ ស្ថិតនៅប៉ែកពាយ័ព្យ និងមានចម្ងាយប្រមាណ ៥0 គីឡូម៉ែត្រ ពីក្រុងសៀមរាប ដែលសម្បូរទៅដោយសម្បត្តិបេតិកភណ្ឌវប្បធម៌ ធនធានធម្មជាតិ និងជាទីតាំងប្រវត្តិសាស្ត្រទីក្រុងបុរាណដើមសម័យអង្គរ «មហេន្ទ្របព៌ត»។ ឧទ្យានជាតិនេះ ពុះចែកជាពីរផ្នែកដោយផ្លូវជាតិលេខ ៦៧ ផ្នែកខាងលិចហៅថា «ភ្នំក្បាលស្ពាន» និងផ្នែកខាងកើតហៅថា «ជួរភ្នំគូលែន»។

២. ព័ត៌មានទូទៅ

– ឈ្មោះតំបន់ការពារធម្មជាតិ ៖ ឧទ្យានជាតិព្រះជ័យវរ្ម័ន-នរោត្តម «ភ្នំគូលែន»
– ព្រះរាជក្រឹត្យ/អនុក្រឹត្យ ៖ អនុក្រឹត្យលេខ១៨៨អនក្រ.បកចុះថ្ងៃទី១៧ខែកក្កដា ឆ្នាំ២០២៣
– មានផ្ទៃដីទំហំ ៖ ទំហំ ៦២ ៨៨៣ ហិកតា
– មានព្រំប្រទល់
• ខាងជើងជាប់នឹង ៖ ស្រុកស្វាយលើ បន្ទាយស្រី និងស្រុកវ៉ារិន
• ខាងកើតជាប់នឹង ៖ ស្រុកស្វាយលើ
• ខាងត្បូងជាប់នឹង ៖ ស្រុកបន្ទាយស្រី ស្រុកស្វាយលើ និងស្រុកសូទ្រនិគម
• ខាងលិចជាប់នឹង ៖ ស្រុកបន្ទាយស្រី និងស្រុកវ៉ារិន និងស្រុកអង្គរជុំ
– ភូមិសាស្ត្រខេត្តសៀមរាប ៖ សរុបមាន ០៥ ស្រុក

៣. លក្ខណៈពិសេស និងសារៈសំខាន់របស់តំបន់៖

យោងតាមការសិក្សាស្រាវជ្រាវកន្លងមក ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» គ្របដណ្តប់ដោយព្រៃស្រោង ព្រៃពាក់កណ្តាលស្រោង និងព្រៃស្រោងដែលដុះលាយឡំជាមួយនឹងព្រៃរបោះ ជាទីជម្រកយ៉ាងសំខាន់សម្រាប់ពពួកសត្វព្រៃជាច្រើនប្រភេទ រួមមាន ថនិកសត្វចំនួន ៤៤ ប្រភេទ ដែលមានជាអាទិ៍ ទោចម្កុដ ស្វាព្រាម ស្វាត្រោស កំប្រុកធំ រញីប្រផេះ សំពោចក្រអូប ឆ្មាដាវ សត្វស្លាបមានចំនួន ១៩៨ ប្រភេទ ដូចជា ស្តេចកូលីត កេងកងតូច ឧរង្គសត្វមានចំនួន ៦០ ប្រភេទ និងថលជលិកសត្វមានចំនួន ៦០ ប្រភេទ ដែលក្នុងចំណោមសត្វព្រៃទាំងនេះ មានចំនួន ២៨ ប្រភេទ កំពុងទទួលរងការគំរាមកំហែងនៅលើពិភពលោក ស្ថិតក្នុងស្ថានភាពជិតផុតពូជ និងរងគ្រោះថ្នាក់ (Hayes B. at al., 2013)។

រុក្ខជាតិមានចំនួន ៧៧៥ ប្រភេទត្រូវបានកត់ត្រា។ កាលពីខែមិថុនាឆ្នាំ ២០១៨ ក្រុមការងាររបស់នាយកដ្ឋានអភិរក្សតំបន់ការពារធម្មជាតិដីគោកខាងជើងបឹងទន្លេសាប បានចុះសិក្សាស្រាវជ្រាវរយៈពេលខ្លី (Rapid Survey) បានរកឃើញប្រភេទឈើប្រណិតមាន ០៣ ប្រភេទ (កកោះ ក្រឡាញ់ គគីរថ្មី) ប្រភេទឈើលេខ ១ មាន ៧ ប្រភេទ (បេង ច្រេស តាត្រាវ ត្រសេក បុសនាគ ស្រឡៅ និងធ្នង់) ប្រភេទឈើលេខ ២ មាន ៥ ប្រភេទ (ឈើទាលទឹក ច្រម៉ាស ជ័រចុង ក្រាយ និងផ្ដៀក) ប្រភេទឈើលេខ ៣ មាន ៨ ប្រភេទ (ត្រមូង ធ្លក ផ្អុង ព្រីង ព្រូស ល្ងៀង កំពីងរាជ និងខ្នុរ)។

តំបន់បេតិកភណ្ឌវប្បធម៌ក្នុងឧទ្យានជាតិភ្នំគូលែន ជាទីតាំងប្រវត្តិសាស្ត្រដ៏មានសារសំខាន់មួយ ដែលបានរក្សាទុកនូវសំណង់ប្រវត្តិសាស្ត្រច្រើនប្រភេទដូចជា សំណង់ប្រាសាទ និងស្ថានីយបុរាណជាច្រើនកន្លែង រួមទាំងសហគមន៍មនុស្សផងដែរ។ តំបន់ទេសចរណ៍សំខាន់ៗទាំងនោះរួមមាន៖

-ប្រាសាទបុរាណ មានសរុបចំនួន ៤២ កន្លែង
-ពើងមានសរុបចំនួន ៣០ កន្លែង (ពើងឆត្រ ពើងត្បាល់ ពើងគំនូរ ពើងព្រះពុទ្ធលើ)
-តំបន់បុរាណដ្ឋាន មានសរុបចំនួន ៤២៦ កន្លែង (ស្រះដំរី ស្រះព្រះគោ ចម្លាក់ កូនដំរី ។ល។)
-ចម្លាក់ព្រះពុទ្ធរូប «ចូលបរិនិពា្វន» (ព្រះអង្គធំ)

ប្រព័ន្ធអេកូឡូស៊ី (ប្រភពក្បាលទឹក ឬកន្លែងស្តុកទឹក) ក្នុងតំបន់ឧទ្យានជាតិព្រះជ័យវរ្ម័ន-នរោត្តម “ភ្នំគូលែន” រួមមាន៖

-ស្ទឹងសៀមរាប អូរខ្លាឃ្មុំ អូរតាពេញ អូរដា អូរល្ហ អូររហាល អូរពាមគ្រែ អូរថ្មដាប់ អូរហុង អូរព្រីង អូរដីខ្មៅ អូរអណ្តែង អូរអណ្តែងធំ អូរក្បាលស្ពាន។
-ភូមិថ្មី អូរក្បាលស្ទឹង អូរស្នូក អូរពក អូរប៉ាហាវ អូរផ្នាក់ដៃ អូរថ្នៀញ អូរបាតហួត អូររងារ ត្រពាំងបុរាណ អូរផ្លូវឫស្សី អូរជើងចាប។
-ភូមិពពេល អូរធំពពេល អូរតាណេ អូរផ្អុង អូរព្រះបាត អូរគូលែន អូរកន្ទួត អូរក្បាលដំរី អូរត្រាវគាត អូរតាអាំង អូរតាចាន់។
-ទំនប់ ទំនប់ថ្នល់ដាច់ ទំនប់ស្រែត្បូង ទំនប់តាពេញ ទំនប់ស្ពានព្រីង ទំនប់ម្រេច ទំនប់ថ្នល់ធំ ទំនប់ស្រះដំរី ទំនប់ខ្មែរក្រហម ទំនប់ផ្លូវឫស្សី ទំនប់អូរស្រែ ទំនប់សង្កែឡាក់។

មុខងារប្រព័ន្ធអេកូឡូស៊ីក្នុងតំបន់នេះ បានដើរតួយ៉ាងសំខាន់ក្នុងការថែរក្សាលំនឹងបរិស្ថាន ផ្ទៃរងទឹកភ្លៀង និងនិរន្ដរភាពទឹកសម្រាប់ស្រោចស្រពទីជំរាលខាងជើងបឹងទន្លេសាប ជាពិសេសនិរន្ដភាពទឹកស្ទឹងសៀមរាប និងតំបន់អង្គរ ។

ប្រភេទជីវៈចម្រុះ៖ មានព្រៃពីរក្រុម ដាច់ដោយឡែកពីគ្នា គឺព្រៃស្រោង និងព្រៃពាក់កណ្តាលស្រោង ឬព្រៃជ្រុះស្លឹក។

ព្រៃស្រោង មានរុក្ខជាតិដូចជា៖ ដូនចាស់ ប្រភេទនៃអំបូរឈើទាលដូចជា ដេង/នាងដេង យាង/ឈើទាលទឹក គគីរថ្ម ច្រម៉ាស់ ប៉ា/ដើមប៉ា ឆ្អឹងកុក ស្រឡៅ ថ្លុង ឆាំឆា កណ្តឹងដំរី ខ្នុរ/ខ្នុរព្រៃ ជ្រៃ/ជ្រៃធំ ល្វា ព្រីងមួយរយស្រទាប់ ព្រីងក្បាល តោ ស្មាច់ដោម ព្រីងថ្ម គ្រញង ស្នូល ធ្នង់ ក្រឡាញ់ បេង ស្មាក្របី គូលែន សិរមាន់ ឈើភ្លើង ពពេលខែ ចំបក់ ដួងចែម/បីសន្លឹក ពព្លា ក្រាំងកោះឬកោះហូបផ្លែ ឆ្កែស្រែង ព្រស់ រកា បុសនាគ គ្លាយ/ក្រស្នា គុយ ក្លែងព័រ វល្លិ៍បារី ផ្តៅទន្សាយ វល្លិ៍ខ្លូត វល្លិ៍យាវ វល្លិ៍ឯម ផ្តៅដំបង ផ្តៅស្នូរ ប្រភេទក្រាកែវ រំដេងព្រៃ ក្រគី ក្រវ៉ាញ ត្រាតុក សេដជីស ត្បាល់ដាក់ ជាដើម។

ព្រៃពាក់កណ្តាលស្រោង ឬព្រៃជ្រុះស្លឹកចម្រុះ មានស្ពង់ ចំបក់ សុក្រំ កកោះ ជ្រៃ សិរមាន់ ស្រឡៅ ព្រុស ទ្រមូង ពោន ស្វាយព្រៃ ឈើភ្លើង ផាត្យា ផ្ចឹក រាំងភ្នំ/រាំងផ្ចឹក ក្លុង ត្រាច ទ្រយឹង ព្រីងជាដើម។

ប្រភេទព្រៃតាមមាត់ទឹក មានដូចជា រំដេង រាំងទឹក ទន្លៀរ ប្របៅទន្លេ/ប្រា្លធំ សណ្តាន់ ព្រីងទឹក សោម/ផ្តៅសោម

ប្រភេទសត្វមាន៖ ថលជលិក និងល្មូន ដូចជាកង្កែប ហ៊ីងគ្រោត ឬហ៊ីងជ័រ អណ្តើក អណ្តើកព្រេច ថ្លែន ពស់ថ្លាន់ ប្រចៀវ ចំពោះថនិកសត្វ មាន៖ កំប្រុកធំ ឆ្មាដាវ រញី ស្វាត្រោស ទោចម្កុដ ស្វាព្រាម ឈ្លុសប្រែង ឬសំពោចភ្នំ ខ្លាឃ្មុំ ជ្រូកពោន ឬជ្រូកព្រុល ជាដើម។

សហគមន៍តំបន់ការពារធម្មជាតិមាន៖

១ ព្រៃភ្នំក្តួច លេខ២៣៧ ចុះថ្ងៃទី០៧ ខែធ្នូ ឆ្នាំ២០២០ ផ្ទៃដីគ្រប់គ្រងទំហំ ១០១ ហិកតា
២ ព្រៃភ្នំម្នាស់ លេខ២៣៩ ចុះថ្ងៃទី០៧ ខែធ្នូ ឆ្នាំ២០២០ ផ្ទៃដីគ្រប់គ្រងទំហំ ៩២ ហិកតា
៣ ព្រៃធំអន្លង់ធំ លេខ២៣៨ ចុះថ្ងៃទី០៧ ខែធ្នូ ឆ្នាំ២០២០ ផ្ទៃដីគ្រប់គ្រងទំហំ ៣៦៥ ហិកតា
៤ ព្រៃធំពពេល លេខ១៩៥ ចុះថ្ងៃទី១៩ ខែតុលា ឆ្នាំ២០២០ ផ្ទៃដីគ្រប់គ្រងទំហំ ៧៩៨ ហិកតា
៥ ជប់តាសុខ លេខ២៤០ ចុះថ្ងៃទី០៧ ខែធ្នូ ឆ្នាំ២០២០ ផ្ទៃដីគ្រប់គ្រងទំហំ ៣៥៩ ហិកតា

៤. សហគមន៍ព្រៃឈើមាន៖

១ ចង្ក្រានរយ លេខ ២៣៧ ចុះថ្ងៃទី០៧ ខែធ្នូ ឆ្នាំ២០២០ ផ្ទៃដីគ្រប់គ្រងទំហំ ៩ ៥៤៤ ហិកតា
២ ឆក់បាស លេខ៩៤២មករ ចុះថ្ងៃទី១៨ ខែតុលា ឆ្នាំ២០១៧ ផ្ទៃដីគ្រប់គ្រងទំហំ ៧១៣ ហិកតា
៣ ភ្នំមាស លេខ៩៤៣មករ ចុះថ្ងៃទី១៨ ខែតុលា ឆ្នាំ២០១៧ ផ្ទៃដីគ្រប់គ្រងទំហំ ៥៦០ ហិតា

មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន

យោងតាមសេចក្តីសម្រេចរបស់រាជរដ្ឋាភិបាលកម្ពុជាតាមរយៈ លិខិតលេខ ៨៧ សជណ.ដប ចុះថ្ងៃទី២៣ ខែមករា ឆ្នាំ២០១៩ មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ត្រូវបានបង្កើតឡើង ក្នុងគោលបំណងសិក្សាស្រាវជ្រាវ អភិរក្ស អប់រំផ្សព្វផ្សាយ និងកំសាន្ត និងត្រូវបានទទួលស្គាល់ជាផ្លូវការ ដោយប្រកាសលេខ ១៦៨ប្រក.បស្ថ ចុះថ្ងៃទី២ ខែតុលា ឆ្នាំ២០២០ របស់ក្រសួងបរិស្ថាន ដែលលាតសន្ធឹងលើផ្ទៃដីសរុប ២០២០ (ពីរពាន់ម្ភៃ) ហិកតា ស្ថិតនៅក្នុងឃុំត្បែង និងឃុំឃុនរាម ស្រុកបន្ទាយស្រី ខេត្តសៀមរាប។

មជ្ឈមណ្ឌលនេះ ស្ថិតក្រោមការគ្រប់គ្រងរបស់ក្រសួងបរិស្ថាន ដែលមានមន្ទីរបរិស្ថានខេត្តសៀមរាប ជាសេនាធិការសម្រាប់ការថែទាំ និងប្រតិបត្តិការប្រចាំថ្ងៃ ដោយមានការគាំទ្រ និងតម្រង់ទិសអនុវត្តពីអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព និងនាយកដ្ឋានពាក់ព័ន្ធចំណុះក្រសួងបរិស្ថាន។

៥.តំបន់សក្តានុពលទេសចរណ៍

តំបន់ប្រាសាទ (ឈ្មោះ ទីតាំង ភូមិ ឃុំ ស្រុក)

១ ប្រាសាទភ្នំហប់ ឃុនរាម ឃុនរាម បន្ទាយស្រី
២ ប្រាសាទក្រោលរមាស ព្រះអង្គធំ ខ្នងភ្នំ ស្វាយលើ
៣ ប្រាសាទស្តេចគម្លង់ ព្រះអង្គធំ ខ្នងភ្នំ ស្វាយលើ
៤ ប្រាសាទពាមគ្រែ (ជើង) អន្លង់ធំ ខ្នងភ្នំ ស្វាយលើ
៥ ប្រាសាទពាមគ្រែ (ត្បូង) អន្លង់ធំ ខ្នងភ្នំ ស្វាយលើ
៦ ប្រាសាទប្រាំ អន្លង់ធំ ខ្នងភ្នំ ស្វាយលើ
៧ ប្រាសាទជប់ អន្លង់ធំ ខ្នងភ្នំ ស្វាយលើ
៨ ប្រាសាទរូបអារក្ស អន្លង់ធំ ខ្នងភ្នំ ស្វាយលើ
៩ ប្រាសាទអូរផ្អុង អន្លង់ធំ ខ្នងភ្នំ ស្វាយលើ
១០ ប្រាសាទរោងចិន អន្លង់ធំ ខ្នងភ្នំ ស្វាយលើ
១១ ប្រាសាទអូរតូប អន្លង់ធំ ខ្នងភ្នំ ស្វាយលើ
១២ ប្រាសាទក្របីក្រាប អន្លង់ធំ ខ្នងភ្នំ ស្វាយលើ
១៣ ប្រាសាទបួសនាគ អន្លង់ធំ ខ្នងភ្នំ ស្វាយលើ
១៤ ប្រាសាទអ្នកតា អន្លង់ធំ ខ្នងភ្នំ ស្វាយលើ
១៥ ប្រាសាទជ្រៃ អន្លង់ធំ ខ្នងភ្នំ ស្វាយលើ
១៦ ប្រាសាទខ្លាឃ្មុំ ខ្លាឃ្មុំ ខ្នងភ្នំ ស្វាយលើ
១៧ ប្រាសាទក្រហម ខ្លាឃ្មុំ ខ្នងភ្នំ ស្វាយលើ
១៨ ប្រាសាទថ្មដាប់ អន្លង់ធំ ខ្នងភ្នំ ស្វាយលើ
១៩ ប្រាសាទកញ្ឆា អន្លង់ធំ ខ្នងភ្នំ ស្វាយលើ
២០ ប្រាសាទខ្ទីងស្លាប់ អន្លង់ធំ ខ្នងភ្នំ ស្វាយលើ
២១ ប្រាសាទជប់ជ្រៃ អន្លង់ធំ ខ្នងភ្នំ ស្វាយលើ
២២ ប្រាសាទបល្ល័ង្គ ថ្មី ខ្នងភ្នំ ស្វាយលើ
២៣ ប្រាសាទតាដុង តាពេញ ខ្នងភ្នំ ស្វាយលើ

តំបន់ទេសភាព ពើងថ្ម និងបុរាណដ្ឋាន (ឈ្មោះ ទីតាំង ភូមិ ឃុំ ស្រុក)

១ ព្រះអង្គធំ ព្រះអង្គធំ ខ្នងភ្នំ ស្វាយលើ
២ ពើងតាខុ វីរៈកាត់ ត្បែង បន្ទាយស្រី
៣ ពើងព្រះ៥អង្គ ព្រះអង្គធំ ខ្នងភ្នំ ស្វាយលើ
៤ ពើងងងឹត ពពេល ខ្នងភ្នំ ស្វាយលើ
៥ ពើងតាហាស់ តាពេញ ខ្នងភ្នំ ស្វាយលើ
៦ ពើងទុកព្រះ តាពេញ ខ្នងភ្នំ ស្វាយលើ
៧ ពើងតារដ្ឋ តាពេញ ខ្នងភ្នំ ស្វាយលើ
៨ ពើងបល្ល័ង្គ ថ្មី ខ្នងភ្នំ ស្វាយលើ
៩ ពើងលិង្គ៥ អន្លង់ធំ ខ្នងភ្នំ ស្វាយលើ
១០ ពើងបន្ទុំចេក សង្កែឡាក់ ខ្នងភ្នំ ស្វាយលើ
១១ ពើងឆត្រ គ្រញង ស្វាយលើ ស្វាយលើ
១២ ពើងគំនូរ បិតផ្កា ស្វាយលើ ស្វាយលើ
១៣ ពើងអំពិល ថ្មជ្រួញ ខ្នងភ្នំ ស្វាយលើ
១៤ ពើងព្រះបាទ ព្រះអង្គធំ ខ្នងភ្នំ ស្វាយលើ
១៥ ពើងឥសី១ អន្លង់ធំ ខ្នងភ្នំ ស្វាយលើ
១៦ ពើងឥសី២ អន្លង់ធំ ខ្នងភ្នំ ស្វាយលើ
១៧ ពើងតាថ្លាង ព្រះអង្គធំ ខ្នងភ្នំ ស្វាយលើ
១៨ ពើងដៃរា ថ្មជ្រួញ ខ្នងភ្នំ ស្វាយលើ
១៩ ពើងល្អាងធំ ថ្មជ្រួញ ខ្នងភ្នំ ស្វាយលើ
២០ ពើងត្បាល់ អន្លង់ធំ ខ្នងភ្នំ ស្វាយលើ
២១ ពើងកែវណាម៉ា ថ្មី ខ្នងភ្នំ ស្វាយលើ
២២ ពើងតាខាប ថ្មី ខ្នងភ្នំ ស្វាយលើ
២៣ ពើងប្រចៀវ អន្លង់ធំ ខ្នងភ្នំ ស្វាយលើ
២៤ ពើងទឹកស្រក់ អន្លង់ធំ ខ្នងភ្នំ ស្វាយលើ
២៥ ពើងទឹកជ័រ អន្លង់ធំ ខ្នងភ្នំ ស្វាយលើ
២៦ ពើងព្រះពុទ្ធក្រោម គ្រញង តាសៀម ស្វាយលើ
២៧ ពើងថ្មជ្រួញ ថ្មជ្រួញ ខ្នងភ្នំ ស្វាយលើ
២៨ ពើងបល្ល័ង្គ ថ្មី ខ្នងភ្នំ ស្វាយលើ
២៩ ស្រះដំរី អន្លង់ធំ ខ្នងភ្នំ ស្វាយលើ
៣០ ព្រះគោ អន្លង់ធំ ខ្នងភ្នំ ស្វាយលើ
៣១ ដំរីក្រាប អន្លង់ធំ ខ្នងភ្នំ ស្វាយលើ
៣២ អ្នកតាដេកផ្អៀង (ចម្លាក់ព្រះវិស្ណុផ្ទុំ) ត្រពាំងទឹម តាសៀម ស្វាយលើ
៣៣ អ្នកតាត្រចៀកធំ (ព្រះគណេស) ត្រពាំងទឹម តាសៀម ស្វាយលើ
៣៤ គោកចិន អន្លង់ធំ ខ្នងភ្នំ ស្វាយលើ
៣៥ ខ្នងល្អាង(ពើងល្អាង) អន្លង់ធំ ខ្នងភ្នំ ស្វាយលើ
៣៦ វាលព្រះបាទ ថ្មជ្រួញ ខ្នងភ្នំ ស្វាយលើ
៣៧ ក្បាលស្ពាន ខ្នាររង្វាស ឃុនរាម បន្ទាយស្រី
៣៨ ជណ្តើរចែរ៉ែ តាហាន ខ្នងភ្នំ ស្វាយលើ
៣៩ អាស្រមពើងវត្តចាស់ សង្កែឡាក់ ខ្នងភ្នំ ស្វាយលើ
៤០ អាស្រមព្រះក្រាល ថ្មី ខ្នងភ្នំ ស្វាយលើ
៤១ អាស្រមព្រះអង្គជប់ តាហាន ខ្នងភ្នំ ស្វាយលើ
៤២ អាស្រមពើងតាអេវ សង្កែឡាក់ ខ្នងភ្នំ ស្វាយលើ
៤៣ ចង្រ្កានរយ បាយដុត ស្វាយលើ វ៉ារិន
៤៤ ភ្នំចន្ទក្រហម បាយដុត ស្វាយលើ វ៉ារិន
៤៥ ស្ទឹងលិង្គ១០០០ ព្រះអង្គធំ ខ្នងភ្នំ ស្វាយលើ
៤៦ ទឹកផុស៧ពណ៌ ព្រះអង្គធំ ខ្នងភ្នំ ស្វាយលើ
៤៧ ទឹកធ្លាក់ភ្នំគូលែន (ទឹកធ្លាក់ជាន់ទី៣) ព្រះអង្គធំ ខ្នងភ្នំ ស្វាយលើ
៤៨ ទឹកធ្លាក់អន្លង់រុន ពពេល ខ្នងភ្នំ ស្វាយលើ
៤៩ ទឹកធ្លាក់ស្មាន់ទៀង ពពេល ខ្នងភ្នំ ស្វាយលើ
៥០ ទឹកធ្លាក់ធ្នស់ពក ពពេល ខ្នងភ្នំ ស្វាយលើ
៥១ អូរពាមគ្រែ អន្លង់ធំ ខ្នងភ្នំ ស្វាយលើ
៥២ អូរតាចក់ អន្លង់ធំ ខ្នងភ្នំ ស្វាយលើ
៥៣ ទឹកធ្លាក់ក្បាលស្ទឹង ថ្មី ខ្នងភ្នំ ស្វាយលើ
៥៤ ទឹកធ្លាក់ជើងចាប ថ្មី ខ្នងភ្នំ ស្វាយលើ
៥៥ ទឹកធ្លាក់ល្បើក សង្កែឡាក់ ខ្នងភ្នំ ស្វាយលើ
៥៦ ទឹកធ្លាក់ស្ពានព្រីង អន្លង់ធំ ខ្នងភ្នំ ស្វាយលើ
៥៧ ទឹកធ្លាក់ពាមសូរហោះ វីរៈកាត់ ត្បែង បន្ទាយស្រី
៥៨ ទំនប់ស្រែត្បូង អន្លង់ធំ ខ្នងភ្នំ ស្វាយលើ
៥៩ ទំនប់អូរស្រែ ខ្លាឃ្មុំ ខ្នងភ្នំ ស្វាយលើ
៦០ ទំនប់ថ្នល់ម្រេច អន្លង់ធំ ខ្នងភ្នំ ស្វាយលើ
៦១ ទំនប់តាពេញ តាពេញ ខ្នងភ្នំ ស្វាយលើ
៦២ ទំនប់ថ្នល់ដាច់ អន្លង់ធំ ខ្នងភ្នំ ស្វាយលើ
៦៣ ឡដុតកុលាលភាជន៍ អន្លង់ធំ ខ្នងភ្នំ ស្វាយលើ

បន្តចុចអាន៖ គ្រោងអភិវឌ្ឍឧទ្យានជាតិ «ភ្នំគូលែន» ជាគោលដៅទេសចរណ៍ធម្មជាតិ

The post ស្វែងយល់ពីឧទ្យានជាតិភ្នំគូលែន «ប្រវត្តិ ភូមិសាស្រ្ត វប្បធម៌ សក្តានុពលទេសចរណ៍» appeared first on Kampuchea Thmey Daily.

ផ្លូវទៅស្រះដំរីលើខ្នងភ្នំគូលែន ចាប់ផ្តើមឈូសឆាយសម្រួល សហគមន៍រំពឹងនឹងទាក់ទាញទេសចរថែមទៀត

Dy Bunnara — Wed, 12 Mar 2025 04:41:12 +0000

ផ្លូវទៅស្រះដំរី កំពុងត្រូវបានឈូសឆាយដោយកងវិស្វកម្មសម្តេចតេជោ ហ៊ុន សែន ខេត្តសៀមរាប ដើម្បីសម្រួលការធ្វើដំណើររបស់ទេសចរទៅកម្សាន្តនៅទីបុរាណស្ថានដ៏ពិសិដ្ឋលើខ្នងភ្នំគូលែន ដែលកម្រមានទេសចរទៅដល់។

លោក គង់ វ៉ារ៉ុង ប្រធានការិយាល័យឧទ្យានជាតិព្រះជ័យវរ្ម័ន-នរោត្តម ភ្នំគូលែនបានឲ្យកម្ពុជាថ្មីដឹងថា ក្រោយទទួលបានការណែនាំពីសម្តេចធិបតីនាយករដ្ឋមន្រ្តី កងវិស្វកម្មបានកំពុងឈូសសម្រួលផ្លូវឆ្ពោះទៅស្រះដំរី ដែលជាតំបន់ទេសចរណ៍ប្រវត្តិសាស្រ្តដ៏ទាក់ទាញលើខ្នងភ្នំគូលែន។

កន្លងទៅភ្ញៀវទេសចរមួយចំនួនបានទៅកម្សាន្តនៅទីបុរាណស្ថានស្រះដំរី ប៉ុន្តែស្ថានភាពផ្លូវពិបាកធ្វើដំណើរទៅដល់។ តាមការណែនាំពីសម្តេចធិបតី កងវិស្វកម្មកំពុងឈូសសម្រួល ដើម្បីបង្កភាពងាយស្រួលដល់ទេសចរទៅទស្សនា ប៉ុន្តែនៅរក្សាទម្រង់ដើមគ្រាន់តែធ្វើយ៉ាងណាឲ្យការធ្វើដំណើរងាយស្រួលជាងមុន។ លោក គង់ វ៉ារ៉ុង បញ្ជាក់បន្ថែម។

ផ្លូវទៅតំបន់ទេសចរណ៍ស្រះដំរី ដែលកងវិស្វកម្មចាប់ផ្តើមឈូសកែលម្អឡើងវិញមានប្រវែងជាង ៦ គីឡូម៉ែត្រ ចាប់ចេញពីសហគមន៍អន្លង់ធំ។ បើតាមលោក គង់ វ៉ារ៉ុង ការកែលម្អផ្លូវនេះ នឹងជួយជំរុញឲ្យភ្ញៀវទេសចរជាតិនិងអន្តរជាតិអាចទៅទស្សនាតំបន់ប្រវត្តិសាស្រ្តដ៏ទាក់ទាញនេះកាន់តែច្រើនថែមទៀត។

ក្នុងឱកាសចុះជួបសំណេះសំណាលជាមួយពលរដ្ឋនៅសហគមន៍ទេសចរណ៍អន្លង់ធំ ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ កាលពីថ្ងៃទី ២៥ ខែកុម្ភៈ ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឲ្យកងវិស្វកម្មសម្តេចតេជោ ហ៊ុន សែន ខេត្តសៀមរាប ពិភាក្សាជាមួយអាជ្ញាធរអប្សរា ក្នុងការធ្វើឱ្យប្រសើរឡើងផ្លូវសម្រាប់អ្នកទេសចរធ្វើដំណើរពីសហគមន៍អន្លង់ធំរហូតដល់ស្រះដំរី ដើម្បីផ្តល់ភាពងាយស្រួលនិងសុវត្ថិភាពដល់ភ្ញៀវទេសចរ។

សម្តេចនាយករដ្ឋមន្រ្តីបានគូសបញ្ជាក់ថា ការធ្វើឲ្យប្រសើរឡើងផ្លូវពីសហគមន៍ឆ្ពោះទៅកាន់ស្រះដំរី ដែលជាផ្លូវចរាចរណ៍ទេសចរដ៏សំខាន់របស់សហគមន៍អន្លង់ធំ ដែលមានប្រវែងប្រមាណជាង ៦ គីឡូម៉ែត្រការជួសជុលត្រូវឈរលើគោលការណ៍ថែរក្សាសណ្ឋានផ្លូវដេីម ដោយមិនធ្វើឱ្យប៉ះពាល់ដល់គុណតម្លៃវប្បធម៌របស់ជាតិ ពិសេសក៏ត្រូវមានការឯកភាពពីតំណាងសហគមន៍ផងដែរ។

នៅក្នុងឧទ្យានជាតិ ព្រះជ័យវរ្ម័ន-នរោត្តម «ភ្នំគូលែន» បើតាមអាជ្ញាធរ មានគោលដៅទេសចរណ៍សរុបចំនួន ៨៥ កន្លែង ដែលមានទឹកជ្រោះ ប្រាសាទបុរាណ បុរាណស្ថាន និងពើងធម្មជាតិ។

ទីនោះស្រស់ស្អាតហួសពីការស្មាន ដែលមានរូបសំណាកស្ដេចដំរីដែលមានអក្សរបុរាណចារឹកថា «ឥន្រ្ទតបតិសិហ» រួមមានស្ដេចកង្កែប ស្ដេចតោ ២ និងព្រះគោ ហើយនៅខាងមុខរូបសំណាកដែលឆ្លាក់ពីថ្មភ្នំធម្មជាតិទាំងនេះ ក៏មានស្រះទឹកមួយទៀត ដែលអ្នកស្រុកហៅថា «ស្រះដំរី»។

ស្រះដំរីជាឈ្មោះដែលពលរដ្ឋក្នុងមូលដ្ឋានហៅដោយសារមានរូបដំរីធំមួយ និងនៅពីមុខនោះមានស្រះទឹក។

អ្នកទេសចរពេលទៅទស្សនានៅស្រះដំរី ក្រៅពីសិក្សាពីប្រវត្តិសាស្រ្តពីរមណីយដ្ឋានបុរាណនេះ ក៏អាចសម្រាកលំហែនៅទីនោះដើម្បីស្រូបយកខ្យល់អាកាសបរិសុទ្ធ និងគយគន់ទេសភាពពីលើទីខ្ពស់ថែមទៀតផង៕

The post ផ្លូវទៅស្រះដំរីលើខ្នងភ្នំគូលែន ចាប់ផ្តើមឈូសឆាយសម្រួល សហគមន៍រំពឹងនឹងទាក់ទាញទេសចរថែមទៀត appeared first on Kampuchea Thmey Daily.

ខ្នងភ្នំគូលែនមានព្រៃឈើក្រាស់ អាចបោះតង់សម្រាកក្បែរមាត់ទឹក និងទស្សនាប្រាសាទក្នុងព្រៃ

Din Thary — Mon, 02 Dec 2024 03:25:28 +0000

លោក អ៊ាង សុផល្លែត រដ្ឋមន្ត្រីក្រសួងបរិស្ថានបានគូសបញ្ជាក់ថា សហគមន៍តំបន់ការពារធម្មជាតិនៅលើខ្នងភ្នំគូលែន ជាតំបន់ដែលមានព្រៃឈើក្រាស់ មានទេសភាពស្រស់ស្អាត ដែលអាចឱ្យភ្ញៀវទេសចរបោះតង់សម្រាកក្បែរមាត់ទឹក និងទស្សនាប្រាសាទនានាក្នុងព្រៃជាច្រើនទៀតផង។

នៅក្នុងឱកាសជួបសំណេះសំណាលជាមួយអាជ្ញាធរដែនដី និងពលរដ្ឋនៅក្នុងសហគមន៍ តំបន់ការពារធម្មជាតិព្រៃធំអន្លង់ធំ ស្ថិតនៅលើខ្នងភ្នំគូលែន នៃឧទ្យានជាតិព្រះជ័យវរ្ម័ន នរោត្តម«ភ្នំគូលែន» ក្នុងភូមិសាស្រ្តខេត្តសៀមរាប កាលពីពេលថ្មីៗនេះ លោករដ្ឋមន្ត្រី អ៊ាង សុផល្លែត បានមានប្រសាសន៍ថា ការពារនិងអភិរក្សព្រៃឈើសហគមន៍ ក៏ជាកន្លែងដែលសហគមន៍ត្រូវធ្វើជាម្ចាស់ សម្រាប់ការអភិវឌ្ឍគោលដៅលំហែបៃតង ដែលត្រូវស្វាគមន៍ ភ្ញៀវទេសចរមកកម្សាន្ត តាមរយៈការបោះតង់សម្រាក និងទស្សនាទេសភាពធម្មជាតិ ទីតាំងវប្បធម៌ ប្រវត្តិសាស្រ្ត សាសនា ជាដើម នៅក្នុងព្រៃសហគមន៍។ មិនតែមិនប៉ុណ្ណោះ សហគមន៍តំបន់ការពារធម្មជាតិ នៅលើខ្នងភ្នំគូលែន ជាតំបន់ដែលមានព្រៃឈើក្រាស់ មានទេសភាពស្រស់ស្អាត អាចឱ្យភ្ញៀវទេសចរបោះតង់សម្រាកក្បែរមាត់ទឹកផងដែរ។

លោករដ្ឋមន្ត្រី ក៏បានបន្ថែមដែរថា តាមរយៈគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា ដែលហៅកាត់ថា CSLEP ដែលដឹកនាំអនុវត្តដោយក្រសួងបរិស្ថាន និងក្រសួងអភិវឌ្ឍជនបទ ក្រោមហិរញ្ញប្បទានធនាគារពិភពលោក មូលនិធិបរិស្ថានសកល និងរាជរដ្ឋាភិបាលកម្ពុជា ក្រសួងបរិស្ថាន បានផ្តល់ផ្ទះតង់ ចំនួន ១០ផ្ទះ ជាជំហានដំបូង ដល់សហគមន៍តំបន់ការពារធម្មជាតិព្រៃធំអន្លង់ធំ ដែលការសាងសង់នឹងចាប់ផ្តើមនៅថ្ងៃចន្ទ ទី០២ ខែធ្នូ ឆ្នាំ២០២៤ នេះ។

ជាក់ស្តែង តង់ស្នាក់សម្រាប់ទេសចរណ៍ សាងសង់ឡើងតាមរចនាបទខ្មែរ និងមានលក្ខណៈទំនើប មានអនាម័យ សោភ័ណភាពស្អាត ការលំហែកម្សាន្ត ប្រកបដោយសុខុដុមរមនាជាមួយធម្មជាតិ សម្រាប់ឱ្យភ្ញៀវជាតិ ឬអន្តរជាតិ ដែលមកកម្សាន្ត បោះតង់ និងដើរទស្សនាជុំវិញព្រៃសហគមន៍ តំបន់ទីទួលបុរាណ ប្រាសាទបុរាណ កន្លែងវប្បធម៌ ប្រវត្តិសាស្រ្ត និងតំបន់ទេសភាពធម្មជាតិផ្សេងទៀត លើខ្នងភ្នំគូលែន។

គួរបញ្ជាក់ថា ក្រសួងបរិស្ថាន បាននិងកំពុងអភិវឌ្ឍគោលដៅលំហែបៃតង នៅតាមសហគមន៍តំបន់ការពារធម្មជាតិ ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា ហើយយុទ្ធសាស្រ្តចក្រាវិស័យបរិស្ថាន បានកំពុងធ្វើឱ្យសហគមន៍មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី ដូចជាការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់សហគមន៍៕

The post ខ្នងភ្នំគូលែនមានព្រៃឈើក្រាស់ អាចបោះតង់សម្រាកក្បែរមាត់ទឹក និងទស្សនាប្រាសាទក្នុងព្រៃ appeared first on Kampuchea Thmey Daily.

ភ្នំគូលែន Archives - Kampuchea Thmey Daily

សហគមន៍កសិកម្មទំនើបស្វាយចន្ទីភ្នំគូលែន​ គ្រោងពង្រីកខ្សែ​ច្រវាក់ផលិតកម្មឱ្យដល់​ការ​កែច្នៃ

គោលដៅលំហែបៃតង ចេញជារូបរាងនៅលើភ្នំគូលែន រង់ចាំ​ទទួល​ទេសចរ​ទៅ​សម្រាកកម្សាន្ត

កសិករដាំចន្ទីនៅភ្នំគូលែន ចង់ចងក្រងជាសហគមន៍កសិកម្មទំនើប

ស្វែងយល់ពី​ឧទ្យានជាតិ​ភ្នំគូលែន «ប្រវត្តិ ភូមិសាស្រ្ត ​វប្បធម៌ សក្តានុពលទេសចរណ៍»

ខ្នងភ្នំគូលែនមានព្រៃឈើក្រាស់ អាច​បោះតង់​សម្រាក​​ក្បែរមាត់ទឹក និងទស្សនាប្រាសាទ​ក្នុងព្រៃ

សហគមន៍កសិកម្មទំនើបស្វាយចន្ទីភ្នំគូលែន គ្រោងពង្រីកខ្សែច្រវាក់ផលិតកម្មឱ្យដល់ការកែច្នៃ

គោលដៅលំហែបៃតង ចេញជារូបរាងនៅលើភ្នំគូលែន រង់ចាំទទួលទេសចរទៅសម្រាកកម្សាន្ត

ស្វែងយល់ពីឧទ្យានជាតិភ្នំគូលែន «ប្រវត្តិ ភូមិសាស្រ្ត វប្បធម៌ សក្តានុពលទេសចរណ៍»

ខ្នងភ្នំគូលែនមានព្រៃឈើក្រាស់ អាចបោះតង់សម្រាកក្បែរមាត់ទឹក និងទស្សនាប្រាសាទក្នុងព្រៃ