សម្ដេចធិបតី ហ៊ុន ម៉ាណែត យល់ឃើញថា រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី គួរតែរៀបចំផ្ដល់មេដាយ ឬគ្រឿងឥស្សរិយស ទៅដល់មន្ត្រីជាប់កិច្ចសន្យា និងគ្រូបង្រៀនជាប់កិច្ចសន្យា ព្រោះគ្រូបង្រៀន ចូលរួមបណ្ដុះបណ្ដាលកុមារកម្ពុជាឱ្យក្លាយជាទំពាំងស្នងឬស្សី និងជាធនធានមនុស្សមានតម្លៃ។ សម្ដេចធិបតី ហៅការងារបង្រៀនរបស់គ្រូបង្រៀនកិច្ចសន្យាថាមានតម្លៃ មិនខុសពីអ្នកមានធនធានចូលរួមបរិច្ចាគថវិកាក្នុងកិច្ចការសង្គមឡើយ។

នៅក្នុងវេទិកា សម្ដេចធិបតី ឱ្យគោលការណ៍ទៅលោក វង្ស៊ី វិស្សុត ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីដូច្នេះ ៖«គួរតែរៀបចំផ្ដល់មេដាយ ខ្ញុំថាមិនមានអ្វីពិបាកទេ សូម្បីតែស៊ីវិល ដែលគាត់ចេញមកចូលរួមក្នុងការងារសង្គមក៏បានមេដាយដែរ។ អញ្ចឹងមន្ត្រីកិច្ចសន្យារបស់យើង គ្រូកិច្ចសន្យាគួរតែផ្ដល់ឱ្យគាត់ទៅ មិនមានអីត្រូវលំបាកទេ ព្រោះការងារចូលរួមជួយសង្គម ជួយបង្រៀនកូនសិស្សនេះហើយ គឺជួយសង្គមខ្លាំងណាស់»៕

The post សម្ដេចធិបតី ឱ្យសិក្សារៀបចំផ្ដល់មេដាយ ដល់គ្រូបង្រៀនជាប់កិច្ចសន្យា ខណៈកន្លងមកអាចបានត្រឹមបណ្ណសសើរ appeared first on Kampuchea Thmey Daily.

បណ្ឌិតសភាចារ្យ ហង់ជួន ណារ៉ុន មានប្រសាសន៍ថា សាលារៀននៅទីជនបទ ជាសាលារៀនខ្វះខាតរួចទៅហើយ ប្រសិនជាជ្រើសរើសគ្រូជាប់កិច្ចសន្យាដែលមិនមានគុណភាព គឺយើងនឹងធ្វើបាបសាលារៀន ហើយធ្វើបាបដល់ប្រជាជន និងសហគមន៍ទៅវិញ។

បណ្ឌិតសភាចារ្យ ហង់ជួន ណារ៉ុន បញ្ជាក់ថា៖ “មានន័យថា ប្រសិនបើប្រជាជននៅទីជនបទបញ្ចូលកូនទៅរៀន ហើយសាលារៀនជ្រើសរើសគ្រូជាប់កិច្ចសន្យាដែលមិនមានគុណវុឌ្ឍិគ្រប់គ្រាន់ បង្រៀនទៅ អត់ចេះអាន និងសរសេរច្បាស់លាស់ ដូច្នេះរៀនបាន ៦ ឆ្នាំដែរ ប៉ុន្តែចុងក្រោយមក រៀនមិនចេះ ប្រឈមមុខការបោះបង់ចោលការសិក្សា ហើយប្រសិនបើ ឪពុកម្ដាយក្រ កូនរៀនមិនចប់សាលារៀន មានន័យថា ក្មេងនោះ គ្រួសារនោះនឹងក្រតពូជ”។

រដ្ឋមន្ត្រីក្រសួងអប់រំ លើកឡើងបន្ថែមថា ការអប់រំជាអាវុធមួយដ៏សំខាន់ដែលអាចរំដោះយើងទាំងអស់គ្នាឱ្យចាកចេញពីភាពក្រីក្របាន គឺប្រសិនបើទទួលបានការអប់រំមួយដែលមានគុណភាព យើងអាចទទួលបានការងារល្អ ហើយអាចធ្វើការទទួលកម្រៃដែលសក្ដិសម តែប្រសិនបើការអប់រំនោះមិនល្អ យើងមិនអាចរកកម្រៃនោះបាន បោះបង់ចោលការសិក្សា ហើយភាពក្រីក្រនេះនឹងបន្តទៅដល់កូន ចៅ ចៅទួតតទៅទៀត។

បណ្ឌិតសភាចារ្យ ហង់ជួន ណារ៉ុន មានប្រសាសន៍បន្តថា៖ “ប្រសិនបើ អស់លោក លោកស្រី ជាអភិបាល នៃគណៈអភិបាលក្រុង ស្រុក ខណ្ឌ ជាប្រធាន អនុប្រធានមន្ទីរ ឬការិយាល័យ អប់រំ យុវជន និងកីឡា ក្រុងស្រុក ចង់ឱ្យមូលដ្ឋានអភិវឌ្ឍ ត្រូវចាប់ផ្ដើមពីការអភិវឌ្ឍសាលារៀន។ ការជ្រើសរើសគ្រូល្អមកបង្រៀន ហើយអនុវត្តកម្មវិធីសិក្សាឱ្យបានពេញលេញ ប្រសិនបើ មិនដូច្នោះទេ សហគមន៍នោះនឹងបន្តរស់នៅក្នុងភាពក្រីក្រដដែល និងមិនមានការក្រែប្រែខ្លាំងឡើយ។ ដូច្នេះ ការជ្រើសរើសគ្រូជាប់កិច្ចសន្យានេះ គឺជាកត្តាគន្លឹះ”។

គួរបញ្ជាក់ថា ក្នុងនីតិកាលទី៧ នៃរដ្ឋសភា ក្រសួងអបរំ យុវជន និងកីឡា នៅតែបន្តមាគ៌ានយោបាយរបស់សម្តេចតេជោ ក្នុងការអនុវត្តកំណែទម្រង់វិស័យអប់រំ ដើម្បីបន្តពង្រឹងគុណភាពគ្រឹះស្ថានសិក្សា រដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា តបតាមអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដាក់ឱ្យអនុវត្តស្តង់ដាសាលាគំរូ ៥ រួមមាន៖ ស្តង់ដា ទី១. ផ្តោតលើ លទ្ធផលសិក្សារបស់សិស្ស ទី២. ផ្តោតលើ ការបង្រៀននិងរៀន ទី៣. ផ្តោតលើ ការចូលរួមរបស់សហគមន៍ ទី៤. ផ្តោតលើ ដំណើរប្រតិបត្តិការ និងរដ្ឋបាលសាលារៀន ទី៥. ផ្តោតលើ គណនេយ្យភាពរបស់សាលារៀន៕

អត្ថបទ៖ ច័ន្ទ វីរៈ

The post ជ្រើសរើសគ្រូជាប់កិច្ចសន្យាមិនមានគុណភាព គឺធ្វើបាបសាលារៀន និងប្រជាជន appeared first on Kampuchea Thmey Daily.

ការលើកឡើងនេះធ្វើឡើង ខណៈ លោក កើត ឆែ តំណាង លោក ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំមួយនៅសាលារាជធានីភ្នំពេញ ជាអាជ្ញាធរ មន្ទីរ អង្គភាពមួយចំនួនដែលគ្រប់គ្រងមន្ត្រីជាប់កិច្ចសន្យានៅរាជធានីភ្នំពេញ នៅថ្ងៃទី១២ ខែកញ្ញា ឆ្នាំ២០២២ នេះ។

លោក កើត ឆែ បានមានប្រសាសន៍ថា ការបើកឱ្យមានកិច្ចប្រជុំនេះឡើង គឺក្នុងគោលបំណងដើម្បីពង្រឹង និងគ្រប់គ្រងប្រសិទ្ធភាពការងាររបស់មន្ត្រីជាប់កិច្ចសន្យាឱ្យបានល្អ និងការជំរុញឱ្យអាជ្ញាធរខណ្ឌ មន្ទីរ អង្គភាពដែលគ្រប់គ្រងមន្ត្រីជាប់កិច្ចសន្យាទាំងអស់ ចាត់ចែងរៀបចំផែនការ នៃការប្រើប្រាស់មន្ត្រីជាប់កិច្ចសន្យា បញ្ជូនមកសាលារាជធានីភ្នំពេញ ឱ្យទាន់ពេលវេលាកំណត់។

លោក កើត ឆែ មានប្រសាសន៍បន្តថា៖ “ការជ្រើសរើសមន្ត្រីជាប់កិច្ចសន្យាយកមកប្រើប្រាស់ ដាច់ខាតត្រូវជ្រើសរើសមើលទៅលើមូលដ្ឋានគ្រឹះ បើគ្រឹះយើងរឹងមាំ ធនធានមនុស្សនោះនឹងប្រើប្រាស់បានយូរអង្វែង និងមានប្រសិទ្ធភាព មិនខុសពីយើងសាងសង់អគារ និងផ្ទះសំបែង ដើម្បីរស់នៅឡើយ”។

លោក កើត ឆែ បានបន្តទៀតថា មន្ត្រីជាប់កិច្ចសន្យានៅរាជធានីភ្នំពេញ មានចំនួនច្រើន មានទាំងនៅរដ្ឋបាលរាជធានី នៅតាមរដ្ឋបាលខណ្ឌទាំង១៤ និងនៅតាមអង្គភាពប៉ូលីស ដែលកិច្ចការងារគ្រប់គ្រងមន្ត្រីជាប់កិច្ចសន្យានេះត្រូវតែធ្វើឡើងឱ្យបានហ្មត់ចត់ ជាមួយការពង្រឹងប្រសិទ្ធភាពការងារកាន់តែល្អ ដើម្បីផ្តល់ក្តីសុខ និងភាពកក់ក្តៅជូនប្រជាពលរដ្ឋ។

លោក កើត ឆែ បានបញ្ជាក់ថា ការរៀបចំផែនការប្រើប្រាស់មន្ត្រីជាប់កិច្ចសន្យានៃរដ្ឋបាលរាជធានីភ្នំពេញសម្រាប់ឆ្នាំ២០២៣ លោក សូមឱ្យអាជ្ញាធរខណ្ឌ មន្ទីរ អង្គភាព ដែលគ្រប់គ្រងមន្ត្រីជាប់កិច្ចសន្យាទាំងអស់ ត្រូវចាត់ចែងរៀបចំផែនការ នៃការប្រើប្រាស់មន្ត្រីជាប់កិច្ចសន្យា ដោយភ្ជាប់មកជាមួយនឹងឯកសារតម្រូវឱ្យបានគ្រប់គ្រាន់ រួចបញ្ជូនមកសាលារាជធានីភ្នំពេញ ឱ្យបានយ៉ាងយូរត្រឹមថ្ងៃទី៣០ ខែកញ្ញា ឆ្នាំ២០២២ ជាកំណត់ ដើម្បីយើងមានមូលដ្ឋានក្នុងការបូកសរុបរៀបចំផែនការប្រើប្រាស់ថវិកា និងគ្រប់គ្រងផែនការប្រើប្រាស់មន្ត្រីជាប់កិច្ចសន្យាសម្រាប់ឆ្នាំ២០២៣ ជូនទៅក្រសួងមហាផ្ទៃឱ្យបានទាន់ពេលវេលា៕

អត្ថបទ៖ ស្រីរ័ត្ន

The post មន្ត្រីជាប់កិច្ចសន្យា ត្រូវជ្រើសរើសយកមូលដ្ឋានគ្រឹះ ដើម្បីប្រសិទ្ធភាពការងារយូរអង្វែង appeared first on Kampuchea Thmey Daily.

សេចក្ដីជូនដំណឹងរបស់ គ.ជ.ប បានឲ្យដឹងថា លេខាធិការដ្ឋានរាជធានី-ខេត្ត រៀបចំការបោះឆ្នោត (លធ.ខប) ទាំង ២៥ ត្រូវការជ្រើសរើសមន្ត្រីជាប់កិច្ចសន្យារយៈពេលខ្លីចំនួន ៥២៧រូប សម្រាប់ការពិនិត្យបញ្ជីឈ្មោះ និងការចុះឈ្មោះបោះ ឆ្នោតឆ្នាំ ២០២២។

សេចក្ដីជូនដំណឹង បានបន្តថា សាធារណជន ដែលមានបំណងដាក់ពាក្យសុំចូលបម្រើការងារ តាមមុខតំណែងខាងលើ សូមអញ្ជើញទៅទទួល និងដាក់ពាក្យសុំចូលបម្រើការងារនៅរៀងរាល់ម៉ោងធ្វើការ នៅតាមលេខាធិការដ្ឋានរាជធានី-ខេត្ត រៀបចំការបោះឆ្នោត (លធ.ខប)៕

The post គ.ជ.ប ប្រកាសជ្រើសរើសមន្ត្រីជាប់កិច្ចសន្យាជាង ៥០០នាក់ សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២២ appeared first on Kampuchea Thmey Daily.