មន្ត្រីជំនាញបានប្រើប្រាស់រថយន្តមន្ទីរពិសោធន៍ចល័ត ដើម្បីដកសំណាកគំរូម្ហូបអាហារចំនួន ១៦សំណាក យកមកវិភាគរកសារធាតុគីមីហាមឃាត់ដែលបង្កគ្រោះថ្នាក់ដល់សុខភាព៖ ការពិនិត្យរកសារធាតុហ្វ័រម៉ាលីន (Formalin): បានពិនិត្យលើបង្គា និងមឹក (ចំនួន ៥គំរូ) ជាលទ្ធផលគឺ “អវិជ្ជមាន”។ ការពិនិត្យរកសារធាតុបូរ៉ាក់ (Borax): បានពិនិត្យលើសាច់ក្រក, ប្រហិតសាច់គោ, ប្រហិតត្រី, ហតដក, សរសៃគុយទាវ និងលត (ចំនួន ១៣ គំរូ) ជាលទ្ធផលគឺ “អវិជ្ជមាន” ទាំងអស់។ ជារួម គំរូដែលបានដកមកធ្វើតេស្តនៅនឹងកន្លែង គឺពុំមានវត្តមានសារធាតុគីមីហាមឃាត់ឡើយ ដែលនេះ ជាសញ្ញាវិជ្ជមានសម្រាប់សុវត្ថិភាពម្ហូបអាហារនៅតំបន់កម្សាន្តដ៏សំខាន់មួយនេះ។

ក្រៅពីការធ្វើតេស្តគុណភាព លោក ហៀង ដារ៉ា និងក្រុមការងារក៏បានចុះតាមភោជនីយដ្ឋាន តូបលក់ដូរ និងរទេះរុញ ដើម្បីពង្រឹងវិធានអនាម័យ ក្នុងនោះបានណែនាំអំពីការរក្សាទុកដាក់ម្ហូបអាហារឱ្យបានត្រឹមត្រូវតាមបច្ចេកទេស។ បន្ថែមពីនេះ ក៏បានបិទស្លាកផ្សព្វផ្សាយ ដោយបិទរូបភាពអប់រំស្តីពីការជ្រើសរើសម្ហូបអាហារដែលមានសុវត្ថិភាព ដើម្បីឱ្យអ្នកលក់ និងអ្នកទិញមានការយល់ដឹងកាន់តែច្បាស់ ព្រមទាំងបានជំរុញឱ្យអាជីវករលក់ដូរក្នុងតម្លៃសមរម្យ មិនត្រូវឆ្លៀតឱកាសតម្លើងថ្លៃក្នុងថ្ងៃបុណ្យទានឡើយ។

សូមជម្រាបថា តំបន់មាត់ទន្លេវ៉ៃគោ គឺជាបេះដូងនៃលម្ហែកាយរបស់ក្រុងស្វាយរៀង។ ការចុះត្រួតពិនិត្យនេះ មិនមែនជាការរឹតត្បិតអាជីវកម្មឡើយ ប៉ុន្តែគឺជាការ “ការពារ និងលើកកម្ពស់” កិត្តិយសរបស់ខេត្ត។ លោក ហៀង ដារ៉ា បានបញ្ជាក់ថា ការធានាបាននូវម្ហូបអាហារមានគុណភាព និងសុវត្ថិភាព គឺជាកាដូដ៏ល្អបំផុតដែលមន្ត្រីជំនាញ និងអាជីវកររួមគ្នាផ្តល់ជូនប្រជាពលរដ្ឋ មុនថ្ងៃចូលឆ្នាំថ្មីចូលមកដល់។ លោកបានអំពាវនាវដល់អាជីវករទាំងអស់ ត្រូវប្រកាន់ខ្ជាប់នូវក្រមសីលធម៌វិជ្ជាជីវៈ ដោយលក់តែចំណីអាហារដែលមានគុណភាព និងសុវត្ថិភាព ព្រោះវាជាផ្នែកមួយដ៏សំខាន់ក្នុងការលើកកម្ពស់សោភណភាព និងទំនុកចិត្តសម្រាប់ភ្ញៀវទេសចរដែលមកលេងកម្សាន្តក្នុងខេត្តស្វាយរៀង ។

សកម្មភាពនេះ បានទទួលការអបអរសាទរ និងគាំទ្រយ៉ាងខ្លាំងពីសំណាក់មហាជន ដែលធ្វើឱ្យពួកគាត់កាន់តែមានទំនុកចិត្តក្នុងការមកទទួលទានអាហារ និងកម្សាន្តនៅតំបន់មាត់ទន្លេវ៉ៃគោ ប្រកបដោយភាពសប្បាយរីករាយ និងសុវត្ថិភាព៕

ដោយ​៖ ភក្ដី

The post មន្ត្រីខេត្តស្វាយរៀង ចុះត្រួតពិនិត្យសុវត្ថិភាពម្ហូបអាហារនៅមាត់ទន្លេវ៉ៃគោ ដើម្បីការពារសុខភាពពលរដ្ឋ appeared first on Kampuchea Thmey Daily.

ក្រៅពី​បញ្ហា​តម្លៃ​គុណភាព​ប្រេងសាំង គុណភាព​ចំណីអាហារ​ ក៏ត្រូវបានមន្រ្តីជំនាញនៅ​ខេត្ត​កោះកុង​យកចិត្តទុកដាក់​ត្រួតពិនិត្យ​តាម​លក្ខណៈ​បច្ចេកទេស ដោយ​យក​គំរូ​សំណាក​បន្លែ​ផ្លែឈើ​ចំនួន ១០ មុខ មក​ធ្វើតេស្ត។

លោក ជា នី អនុ​ប្រធាន​ការពារ​អ្នក​ប្រើប្រាស់ ការ​ប្រកួតប្រជែង និង​ការ​បង្ក្រាប​ក្លែងបន្លំ​ខេត្ត និង​មន្រ្តី​រ៉ែ​ខេត្ត​កោះកុង បាន​ថ្លែង​ឲ្យ​ដឹង​កាលពី​ថ្ងៃ​ទី ១១ ខែ​មីនា ឆ្នាំ ២០២៦ ថា ការ​ត្រួតពិនិត្យ​ផលិតផល​ទំនិញ ម្ហូបអាហារ នៅ​ផ្សារ​ប៉ាក់ខ្លង គឺ​មាន​សារៈសំខាន់ ដើម្បី​ផ្តល់​សុវត្ថិភាព​ចំណី​ជូន​ប្រជាពលរដ្ឋ​ជា​អតិថិជន ស្រប​ទៅ​តាម​អនុលោម​ភាព​ដែល​កំណត់​ដោយ​ក្រសួង​ពាណិជ្ជកម្ម។

លោក ជា នី សង្កត់​ធ្ងន់​ថា មន្ត្រី​របស់​លោក​បាន​ពិនិត្យ​គំរូ​សំណាក​បន្លែ និង​គ្រឿងទេស​ចំនួន ១០ មុខ ស្មើនឹងតូបលក់ទំនិញចំនួន ១២ យកមកធ្វើតេស្ត ជាលទ្ធផលមិនមាន​សារធាតុ​គីមី​ហាម​ឃាត់( Sodium Hydrosulfite និង Borax) លើ​បន្លែ ឬ​បាន​រក​ឃើញ​ទំនិញ​ហួស​កាលបរិច្ឆេទ​ប្រើប្រាស់ ឬ​ខូច​គុណភាព​នោះ​ទេ។ ទោះ​យ៉ាងណា មន្ត្រី ក.ប.ប ខេត្ត​កោះកុង នៅតែ​បន្ត​ពន្យល់​ណែនាំ​ដល់​អាជីវករ​ក្នុង​ផ្សារប៉ាក់ខ្លង​ទាំងអស់ ចូលរួម​តាំង​លក់​ផលិតផល​ណា​មាន​គុណភាព និង​សុពលភាព​ប្រើប្រាស់​ត្រឹមត្រូវ ជៀសវាង​លក់ដូរ​ផលិតផល​ខូចគុណភាព​ដែល​បង្កគ្រោះថ្នាក់ដល់​អ្នក​ប្រើប្រាស់ ករណី​រក​ឃើញ​ថា ល្មើស​ នឹង​រង​ការ​ផាក​ពិន័យ ឬ​បញ្ជូន​សំណុំរឿង​ទៅ​តុលាការ​អនុវត្ត​តាម​នីតិវិធី៕

អត្ថបទ ៖ សិរីវឌ្ឍនៈ

The post មន្ត្រី ក.ប.ប ខេត្តកោះកុង ចុះពិនិត្យស្វែងរកសារធាតុគីមីហាមឃាត់បន្លែផ្លែឈើ នៅផ្សារប៉ាក់ខ្លង appeared first on Kampuchea Thmey Daily.

នៅ​ព្រឹក​ថ្ងៃ​ទី ២០ ខែ​សីហា ឆ្នាំ ២០២៤ តាម​ការ​បញ្ជាក់​ពី លោក លៀង សុភា ប្រធាន​សាខា​ការពារ​អ្នក​ប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ «​ក​.​ប​.​ប​.» ខេត្ត​តាកែវ បាន​ឱ្យ​ដឹង​ថា កាលពី​ល្ងាច​ថ្ងៃ​ទី ១៨ ខែ​សីហា មាន​ករណី​ដោយ​សង្ស័យ​ពុល​ស្រា​ថ្នាំ មន្ត្រី​ស៊ើបអង្កេត នៃ​សាខា ក​.​ប​.​ប​. ខេត្ត​តាកែវ សហការ​ជាមួយ​មន្ត្រី​មន្ទីរ​ពាណិជ្ជកម្ម អធិការ​ស្រុក​ទ្រាំង និង​មន្ត្រី​នគរបាល​ប៉ុស្តិ៍​រដ្ឋបាល​ឃុំ​ស្រ​ង៉ែ បាន​ចុះទៅ​សាកសួរ​ព័ត៌មាន​លម្អិត និង​យក​សំណាក​គំរូ (​ស្រា​ថ្នាំ​) ទៅ​ធ្វើ​ពិសោធន៍។

លោក លៀង សុភា បាន​បន្ត​ថា ក្រោយ​មន្ត្រី​ជំនាញ​បាន​យក​សំណាក​ទៅ​ពិនិត្យ ពិសោធន៍ និង​វិភាគ ជា​លទ្ធផល ស្រា​ថ្នាំ​នោះ មាន​ជាតិ​មេតាណុល​ក្នុង​ស្រា កម្រិត ១៥% ប្រសិន​ពិសា​ចាប់ពី ៦៦០ មីលីលីត្រ ឡើង​ទៅ អាច​ស្លាប់​បាន។

គួរ​រំឭក​ដែរ​ថា ករណី​ពុល​ស្រា.ស ស្រា​ថ្នាំ តែងតែ​កើត​មាន​ជា​ញឹកញាប់ បើ​ទោះបី​ជា​មន្ត្រី​ជំនាញ​ពាក់ព័ន្ធ​ធ្វើការ​ផ្សព្វផ្សាយ អប់រំ ណែនាំ ដល់​ម្ចាស់​សិប្បកម្ម​ផលិត​ស្រា​ក្នុង​ខេត្ត និង​អាជីវករ​លក់​ស្រា.ស​-​ស្រា​ថ្នាំ​យ៉ាងណាក៏ដោយ។

កន្លងមក អគ្គនាយកដ្ឋាន​ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ «​ក​.​ប​.​ប» នៃ​ក្រសួងពាណិជ្ជកម្ម បាន​រៀបចំ​ធ្វើ​សិក្ខាសាលា​ផ្សព្វផ្សាយ​ស្ដីពី​សុវត្ថិភាព​ម្ហូបអាហារ ច្បាប់​ស្ដីពី​កិច្ច​ការពារ​អ្នកប្រើប្រាស់ និង​គោលការណ៍​ណែនាំ​មួយ​ចំនួន​ពាក់ព័ន្ធ​នឹង​ការ​ផលិត​ស្រា​ប្រកប​ដោយ​សុវត្ថិភាព នៅ​តាម​បណ្ដា​ខេត្ត​គោលដៅ​ចំនួន ៦ រួមមាន ៖ ខេត្ត​សៀមរាប ខេត្ត​កំពង់ធំ ខេត្ត​ព្រៃវែង ខេត្ត​ស្វាយរៀង ខេត្ត​តាកែវ និង​ខេត្ត​កំពត ដោយ​ធ្វើការ​អញ្ជើញ​ម្ចាស់​សិប្បកម្ម​ផលិត​ស្រា​ក្នុង​ខេត្ត និង​អាជីវករ​លក់​ស្រា.ស​-​ស្រា​ថ្នាំ ក្នុង​ខេត្ត​ចូលរួម​ផង​ដែរ៕

អត្ថបទ ៖ វីរៈ

The post ក.ប.ប ខេត្តតាកែវ បង្ហាញថា ពលរដ្ឋស្លាប់ ៣ នាក់ និងម្នាក់កំពុង​សង្គ្រោះនៅមន្ទីរពេទ្យ ពិតជាពុលស្រាថ្នាំប្រាកដមែន appeared first on Kampuchea Thmey Daily.

ការចុះពិនិត្យ និងដកហូតផលិតផលទាំងនេះ គឺធ្វើឡើងក្រោមការសម្របសម្រួលដោយលោក ស៊ីន រក្សា ព្រះរាជអាជ្ញារងរាជធានីភ្នំពេញ រកឃើញផលិតផលអំបោះដេររបួសម៉ាក ETHILON ក្លែងបន្លំចំនួន១០៩៥ប្រអប់ គ្មានប្រភពច្បាស់លាស់ និងរំលោភកម្មសិទ្ធបញ្ញា របស់ក្រុមហ៊ុន Johnson &Johnson ។

ផលិតផលទាំងអស់ត្រូវបានមន្ត្រីជំនាញដកហូត និងបញ្ជូនទៅរក្សារទុកនៅនាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ដើម្បីបន្តនីតិវិធី៕

អត្ថបទ៖ សំណាង

The post មន្ត្រីជំនាញរកឃើញអំបោះដេររបួសក្លែងក្លាយជាង​១ពាន់ប្រអប់នាំចូលគ្មានប្រភពច្បាស់លាស់ appeared first on Kampuchea Thmey Daily.

ការស្រាវជ្រាវរបស់ “ក.ប.ប.” ធ្វើឡើងនៅក្រោយពេលសារព័ត៌មានមួយចំនួន បានចុះផ្សាយក្នុងបណ្តាញទំនាក់ទំនងសង្គម អំពីករណី មានការនាំចូលផ្លែទុរេនពីប្រទេសជិតខាង ដាក់លក់លើទីផ្សារកម្ពុជា ដោយប្រកាសថាជាផលិតផលដែលដាំដុះក្នុងប្រទេស និងបាន ប្រើប្រាស់សារធាតុគីមីដើម្បីជ្រលក់លើផ្លែទុរេនទាំងនោះ។ ក្រោយទទួលព័ត៌មានដូច្នេះ លោកស្រីរដ្ឋមន្ត្រីក្រសួងពាណិជ្ជកម្ម បានបញ្ជាឱ្យមន្ត្រីជំនាញនៃ “ក.ប.ប.” ចុះស៊ើបអង្កេតនិងស្រាវជ្រាវជាបន្ទាន់នៅលើទីផ្សារ និង តាមបណ្តាច្រកព្រំដែនមួយចំនួននៃប្រទេសកម្ពុជា។

តាម ក.ប.ប ក្នុងពេលចុះស្រាវជ្រាវ មន្ត្រីជំនាញបានសាកសួរឈ្មួញរលក់ផ្លែទុរេន ហើយអ្នកទាំងនោះបានអះអាងថា ផ្លែទុរេនដែលពួក គាត់ដាក់តាំងលក់ គឺជាផលិតផលខ្មែរ ដែលមានប្រភពមកពីខេត្តកំពត ខេត្តកំពង់ចាម ខេត្តបាត់ដំបង ខេត្តត្បូងឃ្មុំ។ ផ្ទុយពីចម្លើយរបស់ឈ្មួញ ក.ប.ប បានឱ្យដឹងថា តាមការស្រាវជ្រាវ គឺមានផ្លែទុរេនមួយចំនួនដែលកំពុងដាក់លក់លើទីផ្សារ គឺនាំចូលពីប្រទេសជិតខាង ក្រោមរូបភាពតូចៗ នៅតាមបណ្តាច្រកទ្វារព្រំដែនមួយចំនួននៃប្រទេស។

ជាមួយគ្នានេះ មន្ត្រីស៊ើបអង្កេត នៃអគ្គនាយកដ្ឋាន ក.ប.ប. ក៏បានសង្កេតឃើញថា ផ្លែទុរេនដែលនាំចូលមួយចំនួន ត្រូវបានជ្រលក់សារធាតុម៉្យាង ដែលមន្ត្រីជំនាញមិនទាន់អាចកំណត់អត្តសញ្ញាណនិង ផលប៉ះពាល់ដល់សុខភាពអ្នកប្រើប្រាស់បាននៅឡើយ។ អគ្គនាយកដ្ឋាន ក.ប.ប. និងបន្តធ្វើការស្រាវជ្រាវដើម្បី កំណត់អត្តសញ្ញាណនៃសារធាតុនោះ ដោយសហការជាមួយក្រសួង និងស្ថាប័នជំនាញពាក់ព័ន្ធ។

ជុំវិញការលក់ផ្លែទុរេនជ្រលក់ថ្នាំបន្លំថាទុរេនក្នុងស្រុករបស់ឈ្មួញ បែបនេះ ក.ប.ប. បានអំពាវនាវដល់អាជីវករដែលប្រកបអាជីវកម្ម លក់ផ្លែទុរេនទាំងអស់ កុំប្រើប្រាស់សារធាតុដែលមិនមានអត្តសញ្ញាណច្បាស់លាស់ និងត្រូវប្រកបអាជីវកម្មដោយស្មោះត្រង់ កុំបន្លំប្រភពនៃការដាំដុះ។

ក្នុងករណីពលរដ្ឋជួបប្រទះ ឬសង្ស័យថាមានការធ្វើអាជីវកម្មដែលមិនសុចរិត មានដូចជាការ ប្រើប្រាស់សារធាតុមិនស្គាល់អំពីអត្តសញ្ញាណ ក្លែងបន្លំប្រភព ពលរដ្ឋអាចផ្តល់ព័ត៌មាន ឬដាក់ពាក្យបណ្ដឹងទៅកាន់ក្រសួងពាណិជ្ជកម្មតាមខ្សែទូរស័ព្ទលេខ ០៩២ ៨៣០​ ៨៥៦ ឬបណ្ដាញទំនាក់ទំនងរបស់ ក.ប.ប៕

The post ក.ប.ប រកឃើញថាឈ្មួញនាំចូលផ្លែទុរេនពីប្រទេសជិតខាង និងមានជ្រលក់ថ្នាំ ហើយលក់បន្លំថាជាទុរេនក្នុងស្រុក appeared first on Kampuchea Thmey Daily.

ក្រោម​ការ​ចង្អុលបង្ហាញ​ពី​សំណាក់ លោក ផាន អូន ប្រតិភូ​រាជរដ្ឋាភិបាល ទទួល​បន្ទុក​ជា​អគ្គនាយក នៃ​អគ្គនាយកដ្ឋាន ក​.​ប​.​ប មន្ត្រី​សាខា ក​.​ប​.​ប រាជធានី​ភ្នំពេញ បាន​ប្រារព្ធ​ពិធី​ដុត​កម្ទេច​ចោល​សាច់​បង្កក មើម​ខ្ញី និង​ខ្ញី​ហាន់​រួច ខូចគុណភាព កង្វះ​អនាម័យ មិន​អនុលោម​តាម​បទប្បញ្ញត្តិ​បច្ចេកទេស និង​មាន​ការ​ត្រាំ​នូវ​សារធាតុ​គីមី Sodium Hydrosulfite ដែល​មន្ត្រី​ជំនាញ​បង្ក្រាប​បាន នា​ពេល​ថ្មីៗ​នេះ។

បើ​តាម​មន្ត្រី​ជំនាញ ផលិតផល​ដែល​ត្រូវ​បាន​បំផ្លាញ​ចោល​ទាំងនោះ​រួមមាន ៖ សាច់​បង្កក​ខូច​គុណភាព ចំនួន ២,២២៨ គីឡូក្រាម និង មើម​ខ្ញី ខ្ញី​ហាន់​ត្រាំ (​មាន​ផ្ទុក​សារធាតុ​គីមី​ហាមឃាត់ Sodium Hydrosulfite) ចំនួន ១០ ការុង ស្មើនឹង ១៧០ គីឡូក្រាម។

គួរ​ជម្រាប​ថា ក្នុង​ពិធី​ដុត​កម្ទេច​ចោល​សាច់​បង្កក មើម​ខ្ញី និង​ខ្ញី​ហាន់​រួច ខូចគុណភាព កង្វះ​អនាម័យ មិន​អនុលោម​តាម​បទប្បញ្ញត្តិ​បច្ចេកទេស និង​មាន​ការ​ត្រាំ​នូវ​សារធាតុ​គីមី Sodium Hydrosulfite នេះ ក៏​មាន​ការ​សម្របសម្រួល និង​ចូលរួម​ពី​អាជ្ញាធរ​ដែនដី និង​ការិយាល័យ​នគរបាល​ប្រឆាំង​បទល្មើស​សេដ្ឋកិច្ច នៃ​ស្នងការដ្ឋាន​នគរបាល​រាជធានី​ភ្នំពេញ ផង​ដែរ៕

អត្ថបទ ៖ ពិសី

The post មន្ត្រី ក.ប.ប ដុតកម្ទេចចោលសាច់បង្កក មើមខ្ញី និង ខ្ញីហាន់ ខូចគុណភាព លាយសារធាតុគីមី ជាង ២ ពាន់គីឡូក្រាម appeared first on Kampuchea Thmey Daily.

កាលពី​ថ្ងៃ​ទី ១១ ខែ​ធ្នូ ឆ្នាំ ២០២៣ សាខា ក​.​ប​.​ប រាជធានី​ភ្នំពេញ សហការ​ជាមួយ​មន្ត្រី​បច្ចេកទេស នៃ​នាយកដ្ឋាន​មន្ទីរ​ពិសោធន៍ នៃ​អគ្គនាយកដ្ឋាន ក​.​ប​.​ប បាន​នាំ​យក​រថយន្ត​មន្ទីរ​ពិសោធន៍​ចល័ត​ផ្នែក​ម្ហូបអាហារ ចុះ​ត្រួតពិនិត្យ​ទីតាំង​កែច្នៃ និង​ចែកចាយ​ខ្ញី​ហាន់ ១ ទីតាំង នៅ​ខណ្ឌ​ដង្កោ រាជ​ធានី​ភ្នំពេញ ដោយ​គោលបំណង​ការពារ​សុខភាព​ប្រជាពលរដ្ឋ​ស្រប​តាម​តួនាទី និង​ភារកិច្ច​របស់​អគ្គនាយកដ្ឋាន ក​.​ប​.​ប ក្រែង​ម្ចាស់​ទីតាំង​មាន​ដាក់​លាយ​សារធាតុ​គីមី​ហាមឃាត់​ណាមួយ​ក្នុង​ខ្ញី​ទាំង​នោះ។

កិច្ច​ប្រតិបត្តិការ​នេះ​ដែរ ជា​លទ្ធផល ក្រុម​មន្ត្រី​ជំនាញ បាន​រក​ឃើញ​ខ្ញី​ដុំ​មិន​ទាន់​ហាន់​ចំនួន ៩៤០ គីឡូក្រាម ខ្ញី​ហាន់​រួច ដែល​មាន​លាយ​សារធាតុ Sodium Hydrosulfite ២០ គីឡូក្រាម និង​មើម​ខ្ញី​ត្រាំ ៦០ គីឡូក្រាម រួម​ទាំង​សារធាតុ Sodium Hydrosulfite ៣.៨ គីឡូក្រាម ផង​ដែរ។ ដូចនេះ មន្ត្រី​ជំនាញ បាន​សម្រេច​ចាត់​វិធានការ​បន្ត​តាម​នីតិវិធី​ភ្លាមៗ។

គួរ​បញ្ជាក់​ថា «សារធាតុ Sodium Hydrosulfite ជា​ប្រភេទ​សារធាតុ​គីមី​ហាមឃាត់ និង​មិន​ត្រូវ​បាន​អនុញ្ញាត​ឲ្យ​ប្រើប្រាស់​ជា​សារធាតុ​បន្ថែម​ក្នុង​ម្ហូបអាហារ​ទេ។ ហើយ​ការ​ទទួលទាន​នូវ​សារធាតុ​នេះ អាច​បណ្ដាល​ឲ្យ​ពិបាក​ដកដង្ហើម សម្ពាធ​ឈាម​ចុះ​ទាប វិលមុខ ឈឺពោះ ក្អួតចង្អោរ រាករូស ឬ​គ្រោះថ្នាក់​ដល់​ជីវិត​ផ្សេងៗ ទៀត​ផង»៕

អត្ថបទ ៖ ពិសី

The post ត្រួតពិនិត្យទីតាំងកែច្នៃ និងចែកចាយខ្ញី ១ កន្លែង រកឃើញលាយសារធាតុគីមីហាមឃាត់ appeared first on Kampuchea Thmey Daily.

កាលពី​ថ្ងៃ​ទី ១៨ ខែ​តុលា ឆ្នាំ ២០២៣ មន្ត្រី​សាខា ក​.​ប​.​ប ខេត្ត​ត្បូងឃ្មុំ សហការ​ជាមួយ​សាខា​គយ និង​រដ្ឋាករ​ខេត្ត បាន​ធ្វើការ​កម្ទេច​ចោល​នូវ​ពងមាន់​ខូចគុណភាព​ប្រមាណ ៣២,០០០ គ្រាប់ នៅ​ទីតាំង​ដី​ឡូត៍​មួយ​កន្លែង ក្នុង​ភូមិ​ស្រះ​ទឹក ឃុំ​កោង​កាង ស្រុក​ពញាក្រែក ខេត្ត​ត្បូងឃ្មុំ។

ជាមួយ​នោះ ចំពោះ​ពងមាន់​ខូច​គុណភាព​ខាង​លើ ត្រូវ​បាន​ការិយាល័យ​ស្រាវជ្រាវ និង​បង្ក្រាប​អំពើ​រត់​គេច​ពន្ធ​ប្រចាំ​តំបន់ ៦ នៃ​សាខា​គយ និង​រដ្ឋាករ​ខេត្ត ស្ទាក់​ចាប់​បាន ខណៈ​ឈ្មួញ​ទុច្ចរិត​លួច​នាំ​ចូល​ដោយ​ខុស​ច្បាប់​ពី​ប្រទេសជិតខាង ហើយ​ដើម្បី​ចៀសវាង​កុំ​ឲ្យ​មាន​ការ​ចរាចរ​ចូល​ទីផ្សារ​ជាយថាហេតុ​នាំ​ឲ្យ​ប៉ះពាល់​ដល់​សុខភាព មន្ត្រី​ជំនាញ ឯកភាព​ចាត់វិធានការ​កម្ទេច​ចោល​តាម​នីតិវិធី៕

អត្ថបទ ៖ ពិសី

The post មន្ត្រីជំនាញ កម្ទេចចោលពងមាន់ខូចគុណភាពជាង ៣ ម៉ឺនគ្រាប់ ដែលឈ្មួញទុច្ចរិតលួចនាំចូលខុសច្បាប់ពីប្រទេសជិតខាង appeared first on Kampuchea Thmey Daily.