មន្ទីរទេសចរណ៍ខេត្តសៀមរាប Archives - Kampuchea Thmey Daily

ទេសចរអាមេរិកឈរលំដាប់ទី ១ មកទស្សនាខេត្តសៀមរាប ១០ ខែ ឆ្នាំ ២០២៤ មានជិត ៨ ម៉ឺននាក់

Dy Bunnara — Wed, 13 Nov 2024 03:08:36 +0000

បើតាមរបាយការណ៍របស់មន្ទីរទេសចរណ៍ខេត្តសៀមរាប ក្នុងរយៈពេល ១០ ខែ ឆ្នាំ២០២៤ ខេត្តសៀមរាបទទួលបានភ្ញៀវទេសចរអន្តរជាតិចំនួន ៧៧៤ ២០៣ នាក់ មានការកើនឡើង ២៨,៤៨% បើប្រៀបធៀបរយៈពេលដូចគ្នាឆ្នាំ ២០២៣។

ក្នុងចំណោមទេសចរចម្រុះជាតិសាសន៍មកទស្សនាខេត្តសៀមរាប ទេសចរអាមេរិកនាំមុខគេដោយក្នុងរយៈពេល ១០ ខែ មានចំនួន ៧៨ ១៤៨ នាក់។ ក្រៅពីទេសចរអាមេរិកដែលនាំមុខគេឈរលំដាប់ទី ១ ទេសចរអន្តរជាតិដែលមកទស្សនាច្រើនបន្តបន្ទាប់ មានអង់គ្លេស បារាំង កូរ៉េខាងត្បូង ចិន ជប៉ុន អាល្លឺម៉ង់ អូស្ត្រាលី វៀតណាម និងឥណ្ឌា។ នេះបើតាមមន្ទីរទេសចរណ៍ខេត្តសៀមរាប។

ស្របពេលនេះជារដូវវិស្សមកាលមានទេសចរដើរកម្សាន្តច្រើន នៅអាកាសយានដ្ឋានអន្តរជាតិសៀមរាបអង្គរ កំពុងមានភាពមមាញឹកដោយមានជើងហោះហើរអន្តរជាតិចេញចូលច្រើនជាងមុន។

លោក យឹម សានីរាន មន្ត្រីសម្របសម្រួលនៅអាកាសយានដ្ឋានសៀមរាបអង្គរបានប្រាប់កម្ពុជាថ្មីថា បច្ចុប្បន្ន អាកាសយានដ្ឋានអន្តរជាតិសៀមរាប ទទួលបានជើងហោះហើរទាំងឡើងទាំងចុះមួយថ្ងៃពី ៥០ ដល់ ៥៦ ជើង បើប្រៀបធៀបពីមុនមានត្រឹម ៣០ ទៅ ៣៤ ជើងប៉ុណ្ណោះ ហើយភ្ញៀវធ្វើដំណើរមានកំណើនមួយថ្ងៃពី ៥ ០០០ ទៅ ៦ ០០០ នាក់។

ថ្មីៗនេះមានការស្ទង់មតិមួយ ដែលចុះផ្សាយដោយសារព័ត៌មានអូស្រ្តាលី SBS បង្ហាញថា ជនជាតិអូស្រ្តាលីបានជ្រើសរើសយកខេត្តសៀមរាប ជាគោលដៅទេសចរណ៍ជាមួយនឹងការស្ទង់មតិរហូតដល់ ៥២៩% នៃភ្ញៀវទេសចរសរុប។

ស្ថានភាពអាកាសធាតុ ភាពទាក់ទាញនៃភ្ញៀវទេសចរ ម្ហូបអាហារ និងវប្បធម៌ប្រពៃណីជាផ្នែកមួយដែលធ្វើឲ្យភ្ញៀវទេសចរអូស្រ្តាលីចង់មកទស្សនានៅប្រទេសកម្ពុជាសម្រាប់ឆ្នាំ ២០២៥។ នេះបើតាមរបាយការណ៍ស្ទង់មតិដដែលនេះ។

បើយោងតាមរបាយការណ៍របស់ក្រសួងទេសចរណ៍ ក្នុងរយៈពេល ៩ ខែដើមឆ្នាំ២០២៤ កម្ពុជាទទួលបានភ្ញៀវទេសចរអន្តរជាតិប្រមាណ ៤,៨ លាននាក់ ពោលមានការកើនឡើង ២២,២% បើធៀបនឹងឆ្នាំ ២០២៣៕

The post ទេសចរអាមេរិកឈរលំដាប់ទី ១ មកទស្សនាខេត្តសៀមរាប ១០ ខែ ឆ្នាំ ២០២៤ មានជិត ៨ ម៉ឺននាក់ appeared first on Kampuchea Thmey Daily.

វិស័យទេសចរណ៍ក្នុងខេត្តសៀមរាប ទើបតែស្តារឡើងវិញបាន ៣០%

Dy Bunnara — Thu, 10 Oct 2024 04:08:23 +0000

បើតាមមន្រ្តីក្រសួងទេសចរណ៍បានឲ្យកម្ពុជាថ្មីដឹងថា វិស័យទេសចរណ៍ក្នុងខេត្តសៀមរាបនៅតែរងសម្ពាធនៃវិបត្តិសកល និងឥទ្ធិពលនៃការរីករាលដាលនៃជំងឺកូវីដ ១៩។

«វិស័យទេសចរណ៍ក្នុងខេត្តទេសចរណ៍ដ៏ធំមួយនេះ ទើបតែស្តារឡើងវិញបានជាង ៣០%»។ នេះបើតាម លោក តុប សុភ័ក្រ មន្រ្តីអ្នកនាំពាក្យក្រសួងទេសចរណ៍បានឲ្យកម្ពុជាថ្មីដឹងនៅរសៀលថ្ងៃទី ០៧ ខែតុលា ឆ្នាំ២០២៤។

លោក តុប សុភ័ក្រ មន្រ្តីអ្នកនាំពាក្យក្រសួងទេសចរណ៍បានបញ្ជាក់ថា វិបត្តិនៃជំងឺកូវីដជាសកល បានជះផលប៉ះពាល់យ៉ាងធ្ងន់ធ្ងរដល់វិស័យទេសចរណ៍ក្នុងខេត្តសៀមរាប។ ស្ថានភាពវិស័យទេសចរណ៍ក្នុងខេត្តសៀមរាប នៅតែទទួលរងវិបត្តិមិនទាន់ងើបល្អប្រសើរឡើងវិញដូចមុនឆ្នាំ២០១៩ នៅឡើយទេ។

ខណៈដែលខេត្តសៀមរាបទទួលរងផលប៉ះពាល់ធ្ងន់ធ្ងរជាងគេ នៅក្នុងចំណោមបណ្តាគោលដៅទេសចរណ៍ផ្សេងៗទៀតរាជរដ្ឋាភិបាលកម្ពុជាបានកំណត់យកឆ្នាំ ២០២៤ ជាឆ្នាំជំរុញវិស័យទេសចរណ៍ក្នុងខេត្តសៀមរាប។ រដ្ឋាភិបាលបានដាក់ចេញ «ឆ្នាំទស្សនាសៀមរាប ២០២៤» អមដោយវិធានការពិសេសនានា ដើម្បីជំរុញវិស័យទេសចរណ៍នៅក្នុងខេត្តសៀមរាបឱ្យមានសន្ទុះងើបឡើងវិញ។ ក្នុងនោះឆ្នាំ២០២៤ ត្រូវបានកំណត់ជាឆ្នាំនៃការផ្លាស់ប្តូររវាងប្រជាជន និងប្រជាជនកម្ពុជា-ចិន និងឆ្នាំទេសចរណ៍កម្ពុជា-ឥណ្ឌា លើកទី១ ដើម្បីលើកស្ទួយវិស័យទេសចរណ៍ក្នុងខេត្តសៀមរាប និងជួយជំរុញឱ្យទេសចរណ៍ដ៏មានសក្តានុពលពីប្រទេសទាំងពីរ ចូលមកទស្សនានៅកម្ពុជាកាន់តែច្រើន។

លោក តុប សុភ័ក្រ បានអះអាងថា នៅពេលដែលស្ថានភាពទេសចរណ៍ខេត្តសៀមរាបមានភាពល្អប្រសើរ ក៏នឹងជះឥទ្ធិពលដល់ខេត្តផ្សេងទៀតនៅទូទាំងប្រទេសផងដែរ។

រាជរដ្ឋាភិបាលកម្ពុជា នីតិកាលទី៧ នៅតែបន្តចាត់ទុកវិស័យទេសចរណ៍ ជាវិស័យអាទិភាព ដែលរួមចំណែកដល់ការអភិវឌ្ឍសង្គម សេដ្ឋកិច្ចជាតិ តាមរយៈការបង្កើតឱកាសការងារ, ការបង្កើនប្រាក់ចំណូលជូនប្រជាជនដោយផ្ទាល់ និង ដោយប្រយោល, ការជំរុញការនាំចេញនៅនឹងកន្លែង, ការទ្រទ្រង់កំណើនសេដ្ឋកិច្ច, ការបង្កើនចំណូលជាតិ, ការចូលរួមដល់ការអភិរក្ស វប្បធម៌ និង ការថែរក្សាការពារបរិស្ថាន ធនធានធម្មជាតិរបស់យើង ប្រកបដោយប្រសិទ្ធភាព និងការទទួលខុសត្រូវខ្ពស់។

យ៉ាងណាមិញ ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានឲ្យកម្ពុជាថ្មីដឹងថា លោកមិនទាន់ហ៊ានរំពឹងទុកថា កំណើនទេសចរមកកម្សាន្តប្រទេសកម្ពុជា អាចនឹងមានស្ថានភាពល្អប្រសើរដូចមុនកូវីដ ដោយសារលោកមើលឃើញបញ្ហាមួយចំនួនបានសម្អុយឈ្មោះប្រទេសកម្ពុជា ឲ្យទេសចរបរទេសរារែកចិត្តក្នុងការធ្វើដំណើរមកទស្សនាប្រទេសកម្ពុជា។

លោកលើកឡើងករណីការផ្សព្វផ្សាយពីករណីឆបោកតាមអនឡាញ បញ្ហាចាប់ជំរិតរួមទាំងបញ្ហាអសន្តិសុខមួយចំនួន ដែលបានប៉ះពាល់ដល់អារម្មណ៍ភ្ញៀវទេសចរ។

ជាមួយគ្នានេះ កង្វះខាតការតភ្ជាប់នៃការធ្វើដំណើររបស់ទេសចរ ដែលត្រូវចំណាយខ្ពស់បើធៀបប្រទេសជិតខាង ក៏បង្អាក់ទាក់ទាញទេសចរមកកម្សាន្តប្រទេសកម្ពុជាមួយចំណែកធំផងដែរ។

បើតាមតួលេខពីមន្ទីរទេសចរណ៍ខេត្តសៀមរាប ក្នុងរយៈពេល ០៧ ខែ ឆ្នាំ២០២៤ ខេត្តសៀមរាបទទួលបានភ្ញៀវទេសចរសរុបប្រមាណ ២,០២៤,០៧៤ នាក់ កើនឡើងប្រមាណ ៤១២% បើប្រៀបធៀបរយៈពេលដូចគ្នាឆ្នាំ២០២៣ ក្នុងនោះភ្ញៀវទេសចរជាតិមានចំនួនប្រមាណ ១,៤៣៩,៧០០ នាក់ កើនឡើងប្រមាណ ៤៤.៨៤% និងភ្ញៀវទេសចរអន្តរជាតិមានចំនួន ៥៨៤,៣៧៤ នាក់ មានការកើនឡើង ៣៣%។

ទីផ្សារទេសចរប្រទេសសំខាន់ៗ ដែលមកទស្សនាខេត្តសៀមរាបច្រើនជាងគេក្នុងរយៈពេល ៧ ខែ ឆ្នាំ ២០២៤ មានអាមេរិក អង់គ្លេស បារាំង កូរ៉េ ចិន ជប៉ុន អាល្លឺម៉ង់ អូស្រ្តាលី វៀតណាម និងឥណ្ឌា៕

The post វិស័យទេសចរណ៍ក្នុងខេត្តសៀមរាប ទើបតែស្តារឡើងវិញបាន ៣០% appeared first on Kampuchea Thmey Daily.

ប្រៀបធៀបស្ថានភាពទេសចរនៅខេត្តសៀមរាប ៦ ឆ្នាំ ចុងក្រោយប្រែប្រួលយ៉ាងណា?

Dy Bunnara — Tue, 13 Aug 2024 03:47:55 +0000

ខេត្តសៀមរាបជាខេត្តគោលដៅទេសចរដ៏សំខាន់របស់ប្រទេសកម្ពុជា ខណៈដែលខេត្តនេះមានភាពទាក់ទាញបំផុតលើកេរតំណែលវប្បធម៌ ជាពិសេសសំណង់ប្រាសាទបុរាណជាសម្បត្តិបេតិកភណ្ឌពិភពលោកដែលទេសចរបរទេសមិនអាចរំលងបាន។

វិស័យទេសចរក្នុងខេត្តសៀមរាបបានរងសម្ពាធពីសេដ្ឋកិច្ចនិងវិបត្តិសកលនៃជំងឺកូវីដ ១៩ ដែលបានប៉ះពាល់ដល់លំហូរទេសចរមកទស្សនានៅប៉ុន្មានឆ្នាំមកនេះ។

ទេសចរជិះរថយន្ត Jeep កម្សាន្តក្នុងក្រុងសៀមរាប

តើក្នុងរយៈពេល ៦ ឆ្នាំចុងក្រោយ (ពីឆ្នាំ ២០១៨ ដល់ ២០២៣) ស្ថានភាពវិស័យទេសចរណ៍ក្នុងខេត្តសៀមរាបមានការប្រែប្រួលយ៉ាងណា?

I- ស្ថានភាពភ្ញៀវទេសចរឆ្នាំ ២០១៨

ក្នុងឆ្នាំ២០១៨ ខេត្តសៀមរាបទទួលបានភ្ញៀវទេសចរសរុប ៥.៨៤០.៥៦២ នាក់ ក្នុងនោះ៖

-ភ្ញៀវទេសចរអន្តរជាតិមានចំនួន ២,៥៩០,៨១៥ នាក់
-ភ្ញៀវទេសចរជាតិមានចំនួន ៣,២៤៩,៧៤៧ នាក់

II- ស្ថានភាពភ្ញៀវទេសចរឆ្នាំ ២០១៩

ក្នុងឆ្នាំ២០១៩ ខេត្តសៀមរាបទទួលបានភ្ញៀវទេសចរសរុប ៤.២៦២.៣០៦ នាក់ ថយចុះ -២៧,០២% បើប្រៀបធៀបនឹងឆ្នាំ ២០១៨ មានចំនួនសរុប ៥.៨៤០.៥៦២ នាក់ ក្នុងនោះ៖

– ភ្ញៀវទេសចរអន្តរជាតិមានចំនួន ២.២០៥.៦៩៧ នាក់ ថយចុះ -១៤,៨៦% បើប្រៀបធៀបនឹងឆ្នាំ២០១៨ មានចំនួន ២. ៥៩០.៨១៥ នាក់។
-ភ្ញៀវទេសចរជាតិមានចំនួន ២.០៥៦.៦០៩នាក់ ថយចុះ-៣៦,៥៩% បើប្រៀបធៀបនឹងឆ្នាំ ២០១៨ មានចំនួន ៣.២៤៩.៧៤៧ នាក់។

III- ស្ថានភាពភ្ញៀវទេសចរឆ្នាំ ២០២០

ក្នុងឆ្នាំ២០២០ ខេត្តសៀមរាបទទួលបានភ្ញៀវទេសចរសរុបចំនួន ១.១០៤.០៣៦ នាក់ ថយចុះ -៧៤,០៩% បើប្រៀបធៀបនឹងឆ្នាំ២០១៩ មានចំនួន ៤.២៦២. ៣០៦ នាក់ ក្នុងនោះ៖

-ភ្លៀងទេសចរអន្តរជាតិមានចំនួន ៤០០.៨៨ នាក់ ថយចុះ -៨១,៨២% បើប្រៀបធៀបនឹងឆ្នាំ ២០១៥ មានចំនួន ២.២០៥.៦៩៧ នាក់ ។

– ភ្ញៀវទេសចរជាតិមានចំនួន ៧០៣.១៤៧ នាក់ ថយចុះ-៦៥,៨១% បើប្រៀបធៀបនឹងឆ្នាំ២០១៩ មានចំនួន ២.០៥៦,៦០៨នាក់។

IV- ស្ថានភាពភ្ញៀវទេសចរឆ្នាំ ២០២១

ក្នុងឆ្នាំ២០២១ ខេត្តសៀមរាបទទួលបានទេសចរសរុបប្រមាណ ៥៣៤, ០០៥ នាក់ មានការថយចុះ ៥១, ៦៣% (ឆ្នាំ ២០២០ មានចំនួន ១.១០៤.០៣៦ នាក់) ក្នុងនោះ៖

-ទេសចរបរទេស (ទេសចរផ្ទៃក្នុង) មានចំនួន ១២.៨៧៣ នាក់ ថយចុះ ៩៦,៧៨% (ឆ្នាំ២០២០ មានចំនួន ៤០០,៨៨៩ នាក់)។
-ទេសចរក្នុងស្រុកមានចំនួនប្រមាណ ៥២១,១៣២ នាក់ ថយចុះប្រមាណ ២៥,៨៨% បើប្រៀបធៀបរយៈពេលដូចគ្នាឆ្នាំ ២០២០ ចំនួនប្រមាណ ៧០៣,១៤៧នាក់)។

V- ស្ថានភាពភ្ញៀវទេសចរឆ្នាំ ២០២២

ឆ្នាំ២០២២ ខេត្តសៀមរាបទទួលបានភ្ញៀវទេសចរមកកម្សាន្តចំនួនប្រមាណ ២,៦៩២.៤២៣ នាក់ កើនឡើង ៤០៤.១៩% (ឆ្នាំ២០២១ ប្រមាណ ៣៨៣,៥៥៧ នាក់) ) ក្នុងនោះ៖

-ភ្ញៀវទេសចរអន្តរជាតិមានចំនួន ២៨៧.៤៥៤ នាក់ កើន ២១៣២,៩៩% បើប្រៀបធៀបរយៈពេលដូចគ្នាឆ្នាំ ២០២១ ចំនួន ១២. ៤៨៧៣ នាក់។
-ទេសចរជាតិមានចំនួនប្រមាណ ២.៤០៤.៩៦៨ នាក់ កើនឡើង ៣៦១,៤៨% បើប្រៀបធៀបរយៈពេលដូចគ្នាឆ្នាំ ២០២១ ចំនួនប្រមាណ ៣៧០, ៦៨៤ នាក់។

VI. ស្ថានភាពភ្ញៀវទេសចរឆ្នាំ ២០២៣

ក្នុងឆ្នាំ២០២៣ ខេត្តសៀមរាបទទួលបានភ្ញៀវទេសចរសរុបប្រមាណ ២,៥២៩,៥១៤ នាក់ មានការកើនឡើងប្រមាណ ៣២.៣៥% បើប្រៀបធៀបនឹងរយៈពេលដូចគ្នាឆ្នាំ ២០២២ ចំនួន ១,៩១១,២៩១ នាក់ ក្នុងនោះ៖

-ភ្ញៀវទេសចរជាតិមានចំនួនប្រមាណ ១,៧៣១,៤៤៥ នាក់ កើនឡើងប្រមាណ ៦.៦២% ប្រៀបធៀបរយៈពេលដូចគ្នាឆ្នាំ២០២២ ចំនួន ១,៦២៣,៨៣៧ នាក់។
-ភ្ញៀវទេសចរអន្តរជាតិមានចំនួន ៧៨៨,០៦៩ នាក់ មានការកើនឡើង ១៧៧.៦៣% បើប្រៀបធៀបនឹងរយៈពេលដូចគ្នាឆ្នាំ២០២២ ចំនួន ២៨៧,៤៥៤ នាក់។

សហគមន៍ទេសចរកំពង់ភ្លុក

ដោយឡែកក្នុងឆមាសទី១ ឆ្នាំ២០២៤ ខេត្តសៀមរាបទទួលបានភ្ញៀវទេសចរសរុបប្រមាណ ១,៩១៧,០៥០ នាក់ មានការកើនឡើងប្រមាណ ៤៤.៥២% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ១,៣២៦, ៤៩៩ នាក់។ ក្នុងនោះភ្ញៀវទេសចរជាតិមានចំនួនប្រមាណ ១,៣៩៥,១០០ នាក់ កើនឡើងប្រមាណ ៤៨.៣០% ប្រៀបធៀបរយៈពេលដូចគ្នាឆ្នាំ២០២៣ ចំនួន ៩៤០,៧៣០ នាក់ និងភ្ញៀវទេសចរអន្តរជាតិមានចំនួន ៥២១,៩៥០ នាក់ កើនឡើង ៣៥.៣០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ៣៨៥,៧៦៩ នាក់។

លោក ធិម សេរីវុឌ្ឍ ប្រធានស្តីទីមន្ទីរទេសចរណ៍ខេត្តសៀមរាបបានឲ្យកម្ពុជាថ្មីដឹងថា ទេសចរបរទេសដែលនាំមុខគេមកកម្សាន្តក្នុងខេត្តសៀមរាបក្នុងឆមាសទី ១ ឆ្នាំ ២០២៤ គឺទេសចរអាមេរិកមានជាង ៥ ម៉ឺន ៥ ពាន់ នាក់ អង់គ្លេសមានជាង ៤ ម៉ឺន ៨ ពាន់នាក់ បារាំងមានជាង ៤ ម៉ឺន ៣ ពាន់នាក់ កូរ៉េមានជាង ៤ ម៉ឺន ៣ ពាន់នាក់ ចិនមានជាង ៣ ម៉ឺន ៨ ពាន់នាក់ និងទេសចរជប៉ុនមានជាង ៣ ម៉ឺន ៣ ពាន់នាក់។

មន្ត្រីសម្របសម្រួលនៅអាកាសយានដ្ឋានសៀមរាបអង្គរ បានប្រាប់ពីស្ថានភាពនៃអ្នកដំណើរនៅអាកាសយានដ្ឋានសៀមរាបអង្គរ។

លោក យឹម សានីរាន មន្ត្រីសម្របសម្រួលអ្នកដំណើរនៅអាកាសយានដ្ឋានសៀមរាបអង្គរបានឲ្យកម្ពុជាថ្មីដឹងតាមតេលេក្រាមថា បច្ចុប្បន្នអាកាសយានដ្ឋានសៀមរាបអង្គរ ទទួលបានជើងហោះហើរជាមធ្យមប្រមាណ ៤០ ជើងក្នុងមួយថ្ងៃ។

មន្រ្តីរូបនេះរំពឹងពីកំណើនទេសចរបរទេសច្រើនថែមទៀតមកកម្សាន្តខេត្តសៀមរាប ខណៈនៅចុងឆ្នាំនេះនឹងមានក្រុមហ៊ុនអាកាសចរណ៍ថ្មីៗតភ្ជាប់ជើងហោះហើរមកអាកាសយានដ្ឋានសៀមរាបអង្ករ ស្របពេលជារដូវ high season ដែលមានមានភ្ញៀវទេសចរសម្រុកមកកម្សាន្តច្រើន៕

The post ប្រៀបធៀបស្ថានភាពទេសចរនៅខេត្តសៀមរាប ៦ ឆ្នាំ ចុងក្រោយប្រែប្រួលយ៉ាងណា? appeared first on Kampuchea Thmey Daily.

៦ ខែ ឆ្នាំ ២០២៤ ទេសចរបរទេសជាង ៥២ ម៉ឺននាក់បានមកកម្សាន្តនៅខេត្តសៀមរាប

Dy Bunnara — Thu, 08 Aug 2024 02:59:01 +0000

បើតាមរបាយការណ៍ពីមន្ទីរទេសចរណ៍ខេត្តសៀមរាបដែលផ្តល់ឲ្យកម្ពុជាថ្មី ក្នុងឆមាសទី ១ ឆ្នាំ ២០២៤ ខេត្តសៀមរាបទទួលបានទេសចរបរទេសមកកម្សាន្តសរុបជាង ៥២ ម៉ឺននាក់។

ខណៈខេត្តគោលដៅទេសចរដ៏ល្បីនេះទទួលបានទេសចរក្នុងស្រុកជាង ១ លាន ៣ សែន នាក់ ក្នុងឆមាសទី ១ ឆ្នាំ ២០២៤ ភ្ញៀវទេសចរបរទេសដែលមកកម្សាន្តក្នុងខេត្តសៀមរាបកើនឡើងជាង ៣៥ % បើធៀបរយៈពេលដូចគ្នាក្នុងឆ្នាំ ២០២៣។

ក្នុងរបាយការណ៍ក៏បានបង្ហាញភ្ញៀវទេសចរបរទេសដែលនាំមុខគេ ដែលមកកម្សាន្តក្នុងខេត្តសៀមរាបក្នុងឆមាសទី ១ ឆ្នាំ ២០២៤ គឺទេសចរអាមេរិកមានជាង ៥ ម៉ឺន ៥ ពាន់ នាក់ អង់គ្លេសមានជាង ៤ ម៉ឺន ៨ ពាន់នាក់ បារាំងមានជាង ៤ ម៉ឺន ៣ ពាន់នាក់ កូរ៉េមានជាង ៤ ម៉ឺន ៣ ពាន់នាក់ ចិនមានជាង ៣ ម៉ឺន ៨ ពាន់នាក់ និងទេសចរជប៉ុនមានជាង ៣ ម៉ឺន ៣ ពាន់នាក់។

មន្ត្រីសម្របសម្រួលនៅអាកាសយានដ្ឋានសៀមរាបអង្គរ បានលើកឡើងពីស្ថានភាពនៃអ្នកធ្វើដំណើរនៅអាកាសយានដ្ឋានសៀមរាបអង្គរ។

លោក យឹម សានីរាន មន្ត្រីសម្របសម្រួលអ្នកដំណើរនៅអាកាសយានដ្ឋានសៀមរាបអង្គរបានឲ្យកម្ពុជាដឹងតាមតេលេក្រាមថា បច្ចុប្បន្នអាកាសយានដ្ឋានសៀមរាបអង្គរទទួលបានជើងហោះហើរជាមធ្យមប្រមាណ ៤០ ជើងក្នុងមួយថ្ងៃ ។

បើតាមលោក សានីរាន នៅចុងឆ្នាំនេះនឹងមានក្រុមហ៊ុនអាកាសចរណ៍ថ្មីៗជាច្រើនទៀត ភ្ជាប់ជើងហោះហើរមកអាកាសយានដ្ឋានសៀមរាបអង្ករ ស្របពេលជារដូវ high season ដែលមានមានភ្ញៀវទេសចរបុកមកកម្សាន្តច្រើន។

លោក John KC LEE ប្រធានប្រតិបត្តិនៃតំបន់រដ្ឋបាលពិសេសហុងកុង នៅក្នុងជំនួបជាមួយនាយករដ្ឋមន្រ្តីកម្ពុជានៅក្នុងដំណើរទស្សនកិច្ចមកកាន់ប្រទេសកម្ពុជាកាលពីពេលថ្មីៗនេះ បានលើកឡើងអំពីការពង្រីកកិច្ចសហការលើវិស័យដ៏សក្តានុពលមានទាំងផ្នែកធុរកិច្ច ការវិនិយោគ និងការតភ្ជាប់រវាងប្រជាជននិងប្រជាជន រួមទាំងពិនិត្យលទ្ធភាពក្នុងការបង្កើតជើងហោះហើរត្រង់ពីទីក្រុងហុងកុងមកខេត្តសៀមរាបប្រទេសកម្ពុជា។

នាឱកាសនោះ ក៏មានការចុះអនុស្សរណៈនៃការយោគយល់គ្នា (MoU) រវាងតំណាងក្រុមហ៊ុនអាកាសចរណ៍ Cathay Pacific ដែលមានមូលដ្ឋាននៅទីក្រុងហុងកុង ជាមួយអាកាសយានដ្ឋានកម្ពុជា ដើម្បីបង្កើនការតភ្ជាប់ជើងហោះហើរពីកម្ពុជានិងទីក្រុងហុងកុង។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានប្រាប់កម្ពុជាថ្មីនៅថ្ងៃទី ០១ ខែសីហា ឆ្នាំ ២០២៤ នេះថា ទីក្រុងហុងកុងជាតំបន់ស្នូលអន្តរជាតិ ដែលជាច្រកចេញចូលរបស់ភ្ញៀវចិន និងអន្តរជាតិផ្សេងទៀត។ ការបង្កើនជើងហោះហើរនេះជាសញ្ញាល្អ ដែលនឹងជួយកែប្រែស្ថានភាពនិងពង្រឹងវិស័យអាកាសចរណ៍ប្រទេសកម្ពុជាឲ្យកាន់ល្អប្រសើរថែមទៀត៕

The post ៦ ខែ ឆ្នាំ ២០២៤ ទេសចរបរទេសជាង ៥២ ម៉ឺននាក់បានមកកម្សាន្តនៅខេត្តសៀមរាប appeared first on Kampuchea Thmey Daily.

មន្ទីរទេសចរណ៍ខេត្តសៀមរាប Archives - Kampuchea Thmey Daily

ទេសចរ​អាមេរិក​ឈរលំដាប់ទី ១ ​មក​ទស្សនា​ខេត្ត​សៀមរាប ១០ ខែ ឆ្នាំ ២០២៤ មាន​ជិត ៨ ម៉ឺន​នាក់

វិស័យ​ទេសចរណ៍​ក្នុង​ខេត្ត​សៀមរាប​ ទើប​តែ​ស្តារ​ឡើង​វិញ​បាន ៣០%

ប្រៀបធៀប​ស្ថានភាព​​ទេសចរ​នៅ​ខេត្ត​សៀមរាប ៦ ឆ្នាំ ចុងក្រោយ​ប្រែប្រួល​យ៉ាង​ណា?

៦ ខែ ឆ្នាំ ២០២៤ ​ទេសចរ​បរទេស​ជាង ៥២ ម៉ឺន​នាក់​បាន​មក​កម្សាន្ត​នៅ​ខេត្ត​សៀមរាប

ទេសចរអាមេរិកឈរលំដាប់ទី ១ មកទស្សនាខេត្តសៀមរាប ១០ ខែ ឆ្នាំ ២០២៤ មានជិត ៨ ម៉ឺននាក់

វិស័យទេសចរណ៍ក្នុងខេត្តសៀមរាប ទើបតែស្តារឡើងវិញបាន ៣០%

ប្រៀបធៀបស្ថានភាពទេសចរនៅខេត្តសៀមរាប ៦ ឆ្នាំ ចុងក្រោយប្រែប្រួលយ៉ាងណា?

៦ ខែ ឆ្នាំ ២០២៤ ទេសចរបរទេសជាង ៥២ ម៉ឺននាក់បានមកកម្សាន្តនៅខេត្តសៀមរាប