មិត្តភក្តិ Archives - Kampuchea Thmey Daily

បង្អាប់ សើចចំអកឲ្យមិត្តភក្ដិ យើងអាចសោកស្ដាយថ្ងៃក្រោយ

Sonya — Tue, 07 Sep 2021 09:36:28 +0000

ចំអន់ ឬបង្អាប់លេង អាចជារឿងលេងសើច តែវាបែរជាអាចបង្កឲ្យជោគវាសនាមនុស្សមួយចំនួនឈានដល់គ្រោះថ្នាក់ទៅវិញ បើលេងសើចដោយមិនបានថ្លឹងថ្លែងពិចារណា។

តាមប្រភពទិន្នន័យពីការស្ទង់មតិស្រាវជ្រាវ រដ្ឋកាលីហ្វ័រញ៉ា សហរដ្ឋអាមេរិក ការបង្អាប់ ឬចំអក មានច្រើនរូបភាព ច្រើនទម្រង់ ដូចជា ឆាឆៅលេង ដាក់ឈ្មោះហៅក្រៅ (រហស្សនាម) និយាយដើម បំភ័យ ឬសម្លុតលេង រើសអើង ឬមួយធ្វើឲ្យនរណាម្នាក់ខ្មាសគេ នៅកន្លែងមានមនុស្សច្រើនជាដើម ហើយការចំអន់លេងនេះ អាចធ្វើឡើងដោយផ្ទាល់ ឬការបង្ហោះលើអនឡាញ ក៏ត្រូវបានរាប់បញ្ចូលផងដែរ។

ត្រឹមការស្រាវជ្រាវ ១ ឆ្នាំពេញ ពីឆ្នាំ២០១៧-២០១៨ ទៅលើសិស្សសាលា នៅអាមេរិក បង្ហាញថា ៧នាក់ ក្នុងចំណោម ៥០នាក់ ជួបបញ្ហាចំអន់លេង និងរើសអើងពីសំណាក់មិត្តភក្តិ ភាគច្រើនការចំអន់។

ប៉ុន្តែបញ្ហាគួរឲ្យចាប់អារម្មណ៍ គឺក្រុមអ្នកជំនាញសុខភាពមកពីសមាគមវេជ្ជសាស្រ្តអាមេរិក បានវិភាគលើទិន្នន័យស្រាវជ្រាវនេះ រកឃើញថា សិស្សត្រូវបានគេសើចចំអក មានអត្រាទាក់ទងនឹងការជក់បារី ញ៉ាំស្រា ច្រើនជាងអ្នកមិនត្រូវបានគេចំអន់ច្រើន។ ហើយអត្រានេះកើតឡើងត្រឹមរយៈពេល ១២ខែ ពោលគឺអំឡុងពេលសិស្សទាំងនោះ ត្រូវគេបង្អាប់ ធ្វើបាប។

មិនតែប៉ុណ្ណោះ អ្នកជំនាញសុខភាពរកឃើញទៀតថា សិស្សត្រូវបានគេបង្អាប់ មានអត្រាបាក់ទឹកចិត្តកើន ១១% និងបាត់បង់ស្មារតីយកចិត្តទុកដាក់ប្រហែល ១២% បើធៀបនឹងសិស្សមិនទទួលការបង្អាប់។

ពាក់ព័ន្ធនឹងករណីនេះ ក្រុមអ្នកជំនាញដដែល ក៏បានបន្ថែមទៀតថា តាមការតាមដានជាប្រចាំចំពោះករណីនេះ ត្រឹមតែការបណ្តុះបង្អាប់ សិស្សបានរងផលប៉ះពាល់ ដោយការគិតច្រើន ដំណេកមិនស្កប់ស្កល់ ការប្រលងរបស់ពួកគេ ហើយបើសិស្សទទួលការលេងសើចបែបនេះច្រើន ពិសេសពីមិត្តភក្តិអាយុប្រហែលគ្នា នឹងអាចប៉ះពាល់ធ្ងន់ធ្ងរ ដល់បញ្ហាខួរក្បាល សតិបញ្ញា រងគ្រោះរយៈពេលវែងទៀតផង។

ផ្អែកតាមការសិក្សាលើទិន្នន័យនៅរដ្ឋដដែល កាលពីឆ្នាំ២០១៥ ក្មេងៗ និងយុវវ័យរងការបណ្តុះបង្អាប់ ឈានដល់ដំណើរធ្លាក់ទឹកចិត្ត ធ្វើបាបខ្លួនឯង (ទារុណកម្មដោយវត្ថុផ្សេងៗ) និងឈានដល់ការធ្វើអត្តឃាតខ្លួនឯងទៀតផង។

ដោយបញ្ហាខាងលើ ជាអាចឈានដល់កម្រិតធ្ងន់ធ្ងរ ក្រុមអ្នកស្រាវជ្រាវមកពីរដ្ឋខាងលើនេះ ក៏កំពុងស្វែងរកវិធានការមានប្រសិទ្ធភាពចំពោះបញ្ហាខាងលើនេះផងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ វិធីដោះស្រាយដោយសន្តិ នៅពេលមានមនុស្សប៉ងចង់ធ្វើបាបយើងដោយចេតនា (Bullying)

ចុចអាន៖ ដោះស្រាយជាមួយមនុស្សច្រណែន ដែលប៉ងបំផ្លាញយើង

The post បង្អាប់ សើចចំអកឲ្យមិត្តភក្ដិ យើងអាចសោកស្ដាយថ្ងៃក្រោយ appeared first on Kampuchea Thmey Daily.

មិត្តរួមការងារ ៣ ប្រភេទអ្នកណាៗក៏ចង់ធ្វើការជាមួយ

សាង ស្រីល័ក្ខ — Tue, 09 Mar 2021 07:30:33 +0000

ជាធម្មតាគ្រប់កន្លែងការងារសុទ្ធតែមានមិត្តរួមការងារដែលល្អនិងមិនល្អពុំខានឡើយ។ មានមិត្តល្អអាចចាត់ទុកថាសំណាងក៏ថាបាន ព្រោះយើងក៏មិនចាំបាច់មានសម្ពាធបន្ថែមពីលើការងារទៀត។

ប្រសិនបើយើងមានមិត្តរួមការងារដែលមានលក្ខណៈសម្បត្តិ ៣ យ៉ាងដូចខាងក្រោមនេះ យើងមិនគួរមើលរំលងពួកគេទេ៖

១. មិត្តគាំទ្រ

មិត្តរួមការងារដែលចេះគាំទ្រយើង ពិតជាមិត្តម្នាក់ដែលមិនអាចខ្វះបាននោះទេ នៅកន្លែងការងារនានា។ ហេតុផលនោះដោយសារ មនុស្សគ្រប់គ្នារមែងត្រូវការការគាំទ្រជាជាងការបង្អាក់លើសកម្មភាពអ្វីមួយ។ មិត្តប្រភេទនេះតែងជម្រុញទឹកចិត្តនៅពេលមិត្តមានបញ្ហា និងជួយទុក្ខធុរៈមិនដែលខាន។ ពួកគេជាក្រុមមនុស្សដែលមិនសូវប្រកាន់ខ្លួន ព្រមទាំងចេះជួយគ្នាមិនខ្លាចនឿយខ្លួនឯង។

២. មិត្តនៅខាងយើង

មិនខ្វល់ថាយើងធ្វើខុស ឬធ្វើត្រូវឡើយ នៅចំពោះមុខអ្នកដទៃពួកគេនឹងឈរនៅខាងយើងជាមុនសិន។ ក្រោយពីអ្នកដទៃចេញទៅបាត់ មិត្តប្រភេទនេះនឹងចាប់ផ្តើមប្រាប់ពីកំហុសរបស់យើង ដោយមិនខ្លាចរអា និងមិនមែនក្នុងន័យជាន់ពន្លិច ប៉ុន្តែកែលម្អដើម្បីឲ្យយើងកាន់តែប្រសើរ។

៣. មិត្តយល់ចិត្ត

មិត្តរួមការងារចេះយល់ចិត្តយើង ជាមិត្តដែលមិនងាយជួបប្រទះឡើយ។ ពួកគេតែងតែយល់ថា យើងជួបការលំបាកអ្វី ស្មុគស្មាញអ្វី និងត្រូវការអ្វី។ មិត្តប្រភេទនេះ រមែងបង្កភាពសប្បាយរីករាយដល់ក្រុម និងចូលរួមជួយដោះសា្រយវិបត្តិមិត្ត ក៏ដូចជាមិនបន្ថែមបន្ទុកផ្លូវអារម្មណ៍ដល់យើងឡើយ៕

ប្រែសម្រួល៖ សន្យា

ប្រភព៖ liveaboutdotcom

ចុចអាន៖ចិត្តសាស្ត្រលើកទឹកចិត្តបុគ្គលិកតាមភោជនីយដ្ឋាន យកបេះដូងទៅធ្វើការ

ចុចអាន៖បុគ្គលិកលក្ខណៈដែលនឹងក្លាយជាមេដឹកនាំបាន ទាំងវ័យក្មេងខ្ចី

The post មិត្តរួមការងារ ៣ ប្រភេទអ្នកណាៗក៏ចង់ធ្វើការជាមួយ appeared first on Kampuchea Thmey Daily.

មិត្ត ៣ ប្រភេទដែលគួរឱបក្រសោបឱ្យបានក្នុងជីវិតរស់នៅ

Sonya — Fri, 19 Feb 2021 01:58:13 +0000

ពាក្យថា មិត្តល្អ មិនមែនចេះរកបានមកធ្វើភឿនម្រាក់ឡើយ។ ក្នុងជីវិតនេះ យើងនឹងជួបមិត្តច្រើននាក់ តែនោះអាចគ្រាន់តែជាតួលេខប៉ុណ្ណោះ។ ហេតុនេះ បើបានប្រទះនឹងមិត្តដែលមានចរិតលក្ខណៈ ៣ ប្រភេទដូចខាងក្រោម គួរតែរក្សាពួកគេឲ្យបានជាប់។

១. មិត្តចូលចិត្តធ្វើឲ្យយើងសើច

មិត្តប្រភេទនេះ ពិតជាកម្ររកបានណាស់ ទោះបីមានរឿងអ្វី ក៏ពួកគេរមែងធ្វើឲ្យយើងសើចចេញបាន ពេលនៅជាមួយ។ ពួកគេអាចធ្វើឲ្យថ្ងៃមិនល្អរបស់មិត្តប្រែក្លាយជាថ្ងៃដ៏សប្បាយរីករាយ ដោយសារតែពួកគេអាចធ្វើឲ្យយើងបំភ្លេចនូវទុក្ខកង្វល់ទាំងឡាយដែលកំពុងតានតឹង។

២. មិត្តមានគំនិតវិជ្ជមាន

ពិភពលោកបច្ចុប្បន្ន សំបូរមនុស្សគិតតែផលប្រយោជន៍ខ្លួនឯង ដោយពេលខ្លះអាចធ្វើឲ្យយើង មើលពិភពលោកនេះក្នុងផ្លូវអវិជ្ជមានតាមនោះក៏ថាបាន។ ប៉ុន្តែបើមានមនុស្សរាប់អានម្នាក់ដែលមើលពិភពលោកក្នុងផ្លូវវិជ្ជមាន គួរតែថែរក្សាចំណងមិត្តភាពជាមួយពួកគេឲ្យបានល្អ ព្រោះថាមិត្តប្រភេទនេះ អាចធ្វើឲ្យយើងមានអារម្មណ៍ល្អ ធ្វើរឿងត្រឹមត្រូវ និងទាញយើងមកមើលពិភពលោកក្នុងផ្លូវល្អ។

៣. មិត្តចេះជួយយកអាសារ

មិត្តភក្តិបែបនេះ តែងតែចេះយល់សុខទុក្ខ និងយកចិត្តទុកដាក់នឹងធ្វើអ្វីដើម្បីជួយយើង សូម្បីតែរឿងបន្តិចបន្តួចក៏ដោយ។ ពួកគេឧស្សាហ៍ផ្ញើសារ អ៊ីម៉ែល ឬ ហៅទូរសព្ទ មកនិយាយជាមួយ ដើម្បីរក្សាចំណងមិត្តភាព ទោះបីជារៀនសាលាខុសគ្នា ឫធ្វើការកន្លែងផ្សេងគ្នាក៏ដោយ។ គ្រប់ពេលយើងជួបការលំបាក ពួកគេរមែងស្វះស្វែងជួយតាមលទ្ធភាពមិនទុកយើងចោលឡើយ។

ប្រែសម្រួល៖ សន្យា

ប្រភព៖ EF

ចុចអាន៖ មនុស្ស ៤ នាក់ដែលគ្រប់គ្នាចង់មានជាចាំបាច់ ត្រូវមានក្នុងជីវិតខ្លួន

ចុចអាន៖ នៅក្មេងមានមិត្តល្អច្រើន ជួយកាត់បន្ថយជំងឺភ្លេចភ្លាំងពេលដល់វ័យចំណាស់

The post មិត្ត ៣ ប្រភេទដែលគួរឱបក្រសោបឱ្យបានក្នុងជីវិតរស់នៅ appeared first on Kampuchea Thmey Daily.

មិនសូវមានមិត្ត? បង្កើតមិត្តថ្មី លែងឲ្យខ្លួនឯកោតាមវិធី៥នេះ ធានា!

សាង ស្រីល័ក្ខ — Wed, 03 Feb 2021 09:41:34 +0000

គ្នាយើងខ្លះមានអារម្មណ៍ថា ខ្លួនឯងដូចជាឯកោ នៅឆ្ងាយដាច់ពីគេម៉េចមិនដឹង! អារម្មណ៍បែបនេះ អាចមកពីមិនសូវមានមិត្តភក្តិជជែកលេង ដើម្បីផ្លាស់ប្ដូរយោបល់នោះឯង!

មិនថ្វីទេ! ពីពេលនេះទៅ គ្នាយើងនឹងលែងកណ្ដោចកណ្ដែងទៀតហើយ ដោយចាប់ផ្ដើមបង្កើតមិត្តថ្មីតាមរយៈសកម្មភាពទាំង ៥ ខាងក្រោម៖

១. ធ្វើការងារស្ម័គ្រចិត្ត

ការងារស្ម័គ្រចិត្ត ជាការងារអាចជួបមនុស្សច្រើន មកពីកន្លែងខុសគ្នា មានជំនាញខុសគ្នា ចំណេះដឹងនិងតំណែងផ្សេងៗពីគ្នា ដោយអាចឲ្យយើងជជែក និងផ្លាស់ប្ដូរយោបល់គ្នា ដើម្បីបង្កើតបានមិត្តភាពថ្មីៗជាមួយអ្នកដទៃ។

កិច្ចការនេះ មិនត្រឹមតែអាចបង្រៀនឲ្យយើងក្លាយជាមនុស្សពូកែខាងទំនាក់ទំនងប៉ុណ្ណោះទេ ប៉ុន្តែនឹងធ្វើឲ្យយើងក្លាយជាមនុស្សមានទំនួលខុសត្រូវ ចេះគោរពពេលវេលា និងទទួលបានបទពិសោធន៍ថ្មីៗពីមនុស្សដែលនៅក្នុងក្រុមស្ម័គ្រចិត្តដូចគ្នា។

២. ដើរទិញឥវ៉ាន់

Young woman reading information about the product on the phone

ការទិញឥវ៉ាន់នឹងធ្វើឲ្យជួបមនុស្សច្រើនគ្រប់ប្រភេទដែលមានចំណូលចិត្តផ្សេងៗគ្នា ដោយអាចជជែកគ្នាលេងតាមរយៈការជ្រើសរើសសម្លៀកបំពាក់ថ្មីតាមទីផ្សារ ឬតាមអ៊ិនធរណេតជាដើម។ ការសួរគ្នាពីសម្លៀកបំពាក់ គ្រឿងសម្អាង និងសម្ភារផ្សេងៗទៀត ក៏ជាវិធីដែលអាចធ្វើឲ្យយើងមានភាពសិ្នទ្ធស្នាលជាមួយអ្នកដទៃបានដែរ។

៣. ទៅមើលកុន

ការទៅមើលកុន ពិតជាអាចឲ្យយើងរាប់អានមិត្តភក្ដិថ្មីបន្ថែម ដោយការជជែកជាមួយអ្នកដែលអង្គុយនៅក្បែរខ្លួនបាន។ ពេលទៅមើលកុន យើងនឹងអាចរកបានមិត្តមានអត្តចរិតច្រើនប្រភេទ ហើយបើនិយាយពីអ្នកដែលចង់បានមិត្តដែលមានចិត្តដូចគ្នា ឬស្រដៀងគ្នាគឺមិនខុសនោះទេ។

៤. ទៅហាត់ប្រាណ

ការធ្វើលំហាត់ប្រាណមិនត្រឹមតែធ្វើឡើងដើម្បីទទួលបានសុខភាពល្អនោះទេ តែវាក៏ជាវិធីសាស្រ្តមួយដ៏មានប្រសិទ្ធភាពក្នុងការបង្កើតទំនាក់ទំនងថ្មី ដោយចាប់ផ្ដើមតាមរយៈការនិយាយសួរនាំគ្នា។ វិធីនេះមានភាពសាមញ្ញបំផុត និងងាយស្រួលក្នុងការអនុវត្ត ជាពិសេសបានផលចំណេញទាំងផ្នែកសុខភាពនិងទំនាក់ទំនង។

៥. ភ្ជាប់ទំនាក់ទំនងតាមបណ្ដាញសង្គម

ទំនាក់ទំនងតាមបណ្ដាញសង្គម កំពុងមានការពេញនិយមបំផុតនាពេលបច្ចុប្បន្ន។ គ្នាយើងអាចស្គាល់មិត្តភក្តិដែលមកពីបណ្ដាខេត្ត-ក្រុងផ្សេងៗ និងប្រទេសនានា។ បណ្ដាញសង្គមមិនត្រឹមតែជាកន្លែងដែលរាប់អានមិត្តប៉ុណ្ណោះទេ វាក៏ជាកន្លែងដែលអាចរកការងារ រកដៃគូ កន្លែងបន្ធូរអារម្មណ៍ និង កន្លែងចែករំលែកចំណេះដឹងនិងបទពីសោធន៍ជាច្រើនថែមទៀត៕

ប្រែសម្រួល៖ សន្យា

ប្រភព៖ Lifehack

ចុចអាន៖រឿង ៤ ដ៏សំខាន់ទាក់ទិននឹងអាជីវកម្មវាល់លានដុល្លារ

ចុចអាន៖គ្រប់គ្នាជានាយកប្រតិបត្តិ នៃជីវិតខ្លួនឯង កុំរស់ព្រោះអ្នកដទៃ

The post មិនសូវមានមិត្ត? បង្កើតមិត្តថ្មី លែងឲ្យខ្លួនឯកោតាមវិធី៥នេះ ធានា! appeared first on Kampuchea Thmey Daily.

មូលហេតុ ៦ យ៉ាងដែលអ្នកមិនសូវមានមិត្តច្រើនដូចគេដទៃ

Sonya — Mon, 01 Feb 2021 02:49:10 +0000

ស្វែងរក ឬរក្សាមិត្តភាពនៅពេលពេញវ័យ គឺខុសគ្នាជាងកាលនៅតូចៗ។ ឧបមាថាបច្ចុប្បន្ន អ្នកជាមនុស្សមិនមានមិត្តច្រើនទេ ហើយតែងតែសួរខ្លួនឯងជានិច្ចថា ហេតុអ្វីមិនមានគេរាប់អានដូចអ្នកផ្សេងទៀត។

នេះជាអ្វី ដែលអ្នកគួរពិចារណា៖

១. ពូកែត្អូញត្អែររកលេខដាក់គ្មាន

ប្រសិនបើអ្នកជាមនុស្សពូកែត្អូញត្អែរឥតឈប់ឈរ អំពីការងារ ឬក្នុងខ្លួនអត់មានប្រាក់ទេ ឬក៏ជីវិតជួបតែរឿងអយុត្តិធម៌ច្រើនជាងគេ។ល។

ជាការពិត មនុស្សជុំវិញខ្លួននឹងមិនចំណាយពេលច្រើនជាមួយអ្នកដាច់ខាត។ ព្យាយាមកែប្រែអាកប្បកិរិយាអវិជ្ជមានទាំងនោះចោលភ្លាម មិនអ៊ីចឹង កុំបន្ទោសថាគ្មានអ្នកណាមករាប់រកឲ្យសោះ។

២. បោះបង់មិត្តចោលនៅពេលមានទំនាក់ទំនងជាមួយអ្នកផ្សេង

នៅពេលអ្នកមានស្នេហា ឬចាប់ផ្ដើមជួបនរណាថ្មី អ្នកក៏ទុកមិត្តចាស់ចោល។ ពេលមួយបើបែកបាក់ស្នេហា អ្នកក៏មកនិយាយឲ្យពួកគេស្ដាប់។ នោះហើយជាមូលហេតុដែលគ្មាននរណាទំនេរមកអង្គុយស្ដាប់រឿងបែកបាក់របស់អ្នក។ ធ្លាប់ធ្វើយ៉ាងម៉េចដាក់មិត្ត នោះគេនឹងធ្វើបែបនោះដាក់អ្នកវិញ។

៣. ជាមនុស្សអាត្មានិយម

ភាពអាត្មានិយម ចូលរួមចំណែកយ៉ាងធំក្នុងការបំបែកមិត្តភាព។ មិត្តភាពគឺតម្រូវឱ្យផ្ដល់ពេលវេលាខ្លះដល់គ្នា សូម្បីតែពេលអ្នកមិនចង់នៅជាមួយក្រុមមិត្តក៏ដោយ។ តែបើសិនអ្នក ជាមនុស្សមានសំពាយអាត្មានិយម ជាប់ខ្លួនមកហើយ ធានាថា គ្មាននរណាគេ ហ៊ានមកក្បែរឡើយ។

៤. មិនខ្វល់ពីមិត្ត

ប្រសិនបើអ្នកមិនខ្វល់ពីអ្វីដែលកំពុងកើតឡើងចំពោះមិត្តទេ គេក៏មិនខ្វល់ពីអ្នកវិញដូចគ្នា។ ការជួយយកអាសារ ការយកចិត្តទុកដាក់ លើកទឹកចិត្ត សុទ្ធតែជាការសំខាន់ត្រូវផ្ដល់ឱ្យគ្នាទាំងគ្រាសប្បាយឬទុក្ខព្រួយ។ បើសិនអ្នកទៅរកមិត្តតែពេលអាសន្ន លុះស្រណុករត់ចោលគ្នា ច្បាស់ណាស់ថា អ្នកគ្មានមិត្តសូម្បីម្នាក់ឡើយ។

៥. ពូកែដ្រាម៉ា

បើអ្នកជាមនុស្សពូកែដ្រាម៉ា ដូចកុនល្ខោន ស្អីបន្តិចក៏ស្ដីបន្ទោសអ្នកដទៃ ហើយពូកែយករឿងសម្ងាត់របស់គេមកផ្សព្វផ្សាយជាសាធារណៈ ឬព្យាយាមធ្វើឱ្យនរណាម្នាក់ខឹងសម្បារ ឬពូកែខាងបញ្ចុះបញ្ចូលឲ្យបង្កជម្លោះរវាងគ្នា ធានាថា គ្រប់គ្នានឹងរត់ទៅឲ្យឆ្ងាយពីអ្នកមិនខាន។

៦. ពូកែច្រណែន

ពូកែច្រណែននៅពេលដែលមិត្តទិញសម្ភារថ្មី ឬបានធ្វើការនៅកន្លែងល្អ? ប្រាកដណាស់ អ្នកមិនអាចរកអ្នកណាបានមកធ្វើជាមិត្តឡើយ ព្រោះគេរអានឹងអ្នក។ ផ្ទុយទៅវិញ ក្នុងនាមជាមិត្តល្អ អ្នកគួរតែអបអរជាមួយមិត្តភក្ដិ ហើយមានចិត្តសាទរចំពោះពួកគេ នៅពេលពួកគេទទួលបានជោគជ័យ នោះទើបទំនាក់ទំនងកាន់ល្អទ្វេរឡើង៕

ប្រែសម្រួល៖ សាង ស្រីល័ក្ខ

ចុចអាន៖ មកអានទស្សនៈអំពីមិត្តភាពក្នុងគំនិតសេដ្ឋីៗ ស្តាប់ទៅភ្ញាក់ខ្លួន

ចុចអាន៖ ហេតុផលធំៗដែលមិនគួរឲ្យមិត្តភក្ដិ និង សង្សារខ្ចីលុយ

The post មូលហេតុ ៦ យ៉ាងដែលអ្នកមិនសូវមានមិត្តច្រើនដូចគេដទៃ appeared first on Kampuchea Thmey Daily.

មិត្តភក្ដិរៀបការចោលអស់ មិនមែនជាចុងបញ្ចប់នៃពិភពលោកទេ

Sonya — Fri, 29 Jan 2021 09:01:29 +0000

អាចជាជារឿងដែលមិនមែនរីករាយ នៅពេលដែលយើងរស់នៅក្នុងជីវិតនៅលីវតែឯង ហើយមិត្តភក្ដិទាំងអស់មានគ្រួសារ រីឯអ្នកខ្លះកំពុងតែមានកូន ។

កុំមានទុក្ខព្រួយនាំសៅហ្មង មកអានពីរបៀបដោះស្រាយស្ថានភាពស្មុគស្មាញ ហើយត្រឡប់មកជាមានអារម្មណ៍ល្អឡើងវិញ។

១ . រស់នៅតាមពេលវេលាកំពុងមាន

ខណៈយើងនៅលីវ ស្របពេលមិត្តភក្ដិមានផ្ទៃពោះឬចិញ្ចឹមកូនតូច ជឿថាស្រីៗគ្នាយើងខ្លះ ប្រាកដជាមានអារម្មណ៍អាណិតខ្លួនឯង នេះគេហៅថា អន្ទាក់ប្រៀបធៀប។ ជាការពិតមិនមានអ្វីខុស តែក៏មិនចាំបាច់ប្រៀបធៀបខ្លួនឯងទៅនឹងមិត្តរបស់យើងដែរ។

រស់នៅតាមពេលវេលាផ្ទាល់ខ្លួនដែលកំពុងមាន ហើយធ្វើការជ្រើសរើសនូវអ្វីដែលសមនឹងយើង។ នៅពេលចាប់ផ្ដើមផ្ដោតអារម្មណ៍លើខ្លួនឯង ក៏ដូចជាឈប់គិតច្រើនពីអ្វីដែលអ្នកផ្សេងទៀតកំពុងមាន នោះភាពរីករាយជាមួយខ្លួនឯងនឹងមានកាន់តែច្រើនទ្វេរ។ រីឯការប្រៀបធៀបនឹងលែងចាំបាច់ ឬគួរឲ្យចាប់អារម្មណ៍ទៀតដែរ។

២. ចងចាំនូវរាល់របស់ល្អដែលមានក្នុងជីវិត

ជំនួសឱ្យការគិត “មិត្តភក្ដិរបស់ខ្ញុំទាំងអស់សុទ្ធតែមានកូន ហើយខ្ញុំនៅតែនៅលីវដដែល” ចូរគិតតែពីអ្វីដែលយើងមានបានហើយ។ ប្រាកដណាស់ ពេលនេះយើងមិនអាចចិញ្ចឹមកូនអាយុ ២ ឆ្នាំឬមិនទាន់មានផ្ទៃពោះពិតមែន ហើយក៏រកសង្សារមិនទាន់ឃើញ ប៉ុន្តែយើងមានផ្ទះ មានការងារ ហើយមានប្រាក់ខែចាយ។

នៅលីវ អាចធ្វើរឿងអ្វីដែលចង់ធ្វើ មិនចាំបាច់ស្មុគស្មាញរឿងប្ដីសី។ យើងចូលចិត្តហាត់យូហ្គាឬចូលចិត្តអាន គឺធ្វើបានភ្លាមៗ ឥតបង្អង់។ ឃើញទេ? យើងអាចធ្វើរឿងផ្សេងទៀតដោយមិនខ្វល់ច្រើន។

៣. កុំស្មានថាជីវិតមិត្តមានគ្រួសារងាយស្រួលជាង

មិនមែនមិត្តភក្ដិបានរៀបការនិងមានកូន មានន័យថា ពួកគេពិតជាសប្បាយរីករាយនោះទេ។ និយាយរួមពួកគេមិនដូចយើងឡើយ។

ការពិត មិត្តយើងអាចជាច្រណែននឹងយើងវិញផងមិនដឹង។ ពួកគេមិនបានសប្បាយចិត្តរាល់ថ្ងៃឡើយ ពីព្រោះពួកគេមានគ្រួសារត្រូវរ៉ាប់រងនិងបញ្ហាផ្ទាល់ខ្លួន សឹងរាល់ថ្ងៃ។ គ្រាន់តែថា បញ្ហារបស់ពួកគេមើលទៅខុសគ្នាពីយើង។

៤. បន្តឈោងចាប់អ្វីដែលចង់បាន

ចូរបន្តឈោងចាប់អ្វីដែលយើងធ្លាប់ចង់បាន! មិនថាជារឿងអ្វី ត្រូវតែខិតខំ និងជឿជាក់លើខ្លួនឯង ហើយរឿងតែមួយគត់ដែលអាចបរាជ័យ លុះណាតែយើងឈប់ព្យាយាមប៉ុណ្ណោះ។

បន្តដំណើរទៅមុខទៀត នោះយើងនឹងមិនច្រណែនមិត្តយើងទេ ពីព្រោះយើងមានអ្វីដែលចង់បានរួចហើយ។

៥. កុំមានអារម្មណ៍ខឹងឬអន់ចិត្ត

មិត្តភក្ដិមានកូននៅពេលដែលយើងនៅលីវ មិនមានន័យថា ពួកគេបានធ្វើអ្វីដែលត្រឹមត្រូវ ហើយយើងបានធ្វើអ្វីខុស ។

សូមរក្សាការផ្ញើសារនិងដើរលេងជាមួយមិត្តដូចដែលយើងធ្វើពីមុន។ មិត្តភាពនៅតែមានសារៈសំខាន់ ហើយពួកគេមិនភ្លេចឬព្រងើយកន្តើយចំពោះយើង ដរាបណាយើងមិនភ្លេចគេដែរ។ ណាមួយដោយសារតែពួកគេមានកូន ទើបរវល់ ចងចាំរឿងនេះ ហើយរក្សាមិត្តភាពដដែល។

គន្លឹះទាំងនេះអាចជួយយើងដោះស្រាយបញ្ហាយើងបាន នៅពេលដែលមិត្តគ្រប់គ្នាសុទ្ធតែមានគ្រួសារ។ ចូរចងចាំថា មិត្តភក្ដិរៀបការ មិនមែនជាចុងបញ្ចប់នៃពិភពលោកទេ ចុងបញ្ចប់គឺជាអ្វីដែលយើងតែងគិតអគតិលើខ្លួនឯងទៅវិញទេ៕

ប្រែសម្រួល៖ សាង ស្រីល័ក្ខ

ប្រភព៖ youqueen

ចុចអាន៖ សង្សារខ្ចីលុយ គួរឱ្យដែរ?

ចុចអាន៖ ឧត្តមភរិយា ដែលបុរសទាំងឡាយគេងស្រមៃប៉ុនប៉ង

The post មិត្តភក្ដិរៀបការចោលអស់ មិនមែនជាចុងបញ្ចប់នៃពិភពលោកទេ appeared first on Kampuchea Thmey Daily.

មូលហេតុដែលមិនគួរយកមិត្តភក្ដិ មកចូលធ្វើការជាមួយ ឬមកជាកូនចៅ

សាង ស្រីល័ក្ខ — Mon, 04 Jan 2021 06:48:11 +0000

រើសនិយោជិកមិនងាយស្រួលទេ ចំណែកខ្សែបន្ទាត់រវាងចៅហ្វាយនិងមិត្តភក្ដិជួនកាលអាចពិបាកទៅថ្ងៃមុខឬអាចខូចខាតមិត្តភាពទាំងស្រុងបាន។ មនុស្សជាច្រើនយល់ថាគេត្រូវការមនុស្សទុកចិត្តតែមិត្តភក្ដិតាមពិតភាគច្រើនជាមនុស្សដំបូងដែលនិយមប្រៀបធៀប ហើយចុងក្រោយ គេនឹងយល់ថា ចំណេះគេ មិនសមមកនៅក្រោមយើងឡើយ។

ហេតុអ្វីការយកមិត្តភក្ដិមកធ្វើការក្រោមខ្លួនភាគច្រើននាំតែស្មុគស្មាញនិងខកបំណង?

១ គេច្រើនភ្លេចថា នរណាជាចៅហ្វាយ

សូមចងចាំថានៅកន្លែងធ្វើការសំខាន់ក្នុងការធ្វើជាចៅហ្វាយ ជាជាងធ្វើជាមិត្ត។ ភាពរាក់ទាក់ពេក អាចធ្វើឲ្យអន្តរាយដល់សិទ្ធិអំណាចនិងរូបភាពជាអ្នកដឹកនាំ។

លោក Devora Zack នាយកប្រតិបត្តិនៃក្រុមហ៊ុន Only Connect Consulting, Inc ក៏ជាអ្នកនិពន្ធសៀវភៅដ៏ល្បី «ចិត្តសាស្ត្រនៃការគ្រប់គ្រងមនុស្ស»បានមានប្រសាសន៍ថា“ ការចង់ធ្វើជាមិត្តភក្តិជាមួយនិយោជិកធ្វើឲ្យការផ្ដល់មតិត្រឡប់លំបាក គេក៏មិននិយាយត្រង់យើងក៏ពិបាកវាយតម្លៃគេ ទោះគេធ្វើមិនបានល្អ។

ហានិភ័យ គឺបុគ្គលិកផ្សេងៗទៀត លែងមានចិត្តនឹងខិតខំព្រោះមិត្តរបស់យើង បានយកប្រៀបលើពួកគេបានជានិច្ច ដោយប្រើទំនាក់ទំនងនោះទៅសង្កត់ពួកគេឬកាត់មុខពួកគេ នេះជាអន្តរាយធំមួយ សម្រាប់ការដឹកនាំនិងការរកស៊ី។

“ ក្រុមរបស់យើងដែលចង់ជោគជ័យ គេត្រូវការអ្នកដឹកនាំមិនមែនមិត្តភក្ដិទេ! មានតែមនុស្សគ្មានសមត្ថភាពតែប៉ុណ្ណោះ ដែលចង់បានមិត្តភក្តិក្នុងជួរអ្នកដឹកនាំនឹងអាលយោងពួកគេ” ។ នៅចុងបញ្ចប់ពួកគេក្ដាប់អំណាចដែលបំផ្លាញរូបភាពពិតរបស់អ្នកនៅក្នុងសង្គមការងារ។

អ្នកពិគ្រោះយោបល់ក្រុមហ៊ុនលោក Carlann Fergusson ស្ថាបនិកក្រុមហ៊ុន Propel Forward LLC មានប្រសាសន៍ថា អន្ទាក់នៃការចូលមកក្បែររបស់មិត្ត គឺពឹងពាក់។ ជួយពួកគេចុះកុំយកមកក្បែរ។ បុគ្គលិកឆ្នើមរបស់យើងទៅវិញទេ រើសយកអ្នកណាមិនយើងមិនធ្លាប់ស្គាល់សោះ ស្រាប់តែធ្វើការល្អ នឹងក្លាយជាមនុស្សជិតស្និទ្ធបាន ហើយគេនាំគ្នាទទួលស្គាល់ព្រោះនេះបង្ហាញថាយើងមិនបានប្រើអារម្មណ៍ក្នុងការងារឬការតែងតាំង។

២ ស្គាល់ចំណុចខ្សោយយើង

ជាចៅហ្វាយ គួរកុំទៅញ៉ាំបាយថ្ងៃត្រង់ស្និទ្ធស្នាលជាមួយអ្នកនេះអត់អ្នកនោះ។ សួរថារង្វាន់ស្និទ្ធជាមួយចៅហ្វាយគួរបានទៅមនុស្សអែបអបឬមនុស្សធ្វើការពិតៗ?

ជាការពិតការស្គាល់បុគ្គលិកតាមកម្រិតផ្ទាល់ខ្លួន ដែលគេនោះក៏ដឹងរឿងចំណុចខ្សោយរបស់យើងច្រើនដូចជា ស្នេហា ពិន្ទុកាលនៅរៀន ចរិតផ្ទាល់ខ្លួនរបស់យើង តើចំណេញអ្វីដល់ការងារដឹកនាំ?

លោក Deb Hornell ប្រធានក្រុមហ៊ុនប្រឹក្សាយោបល់ HRCool មូលដ្ឋាននៅទីក្រុងឈីកាហ្គោ Hornell Partners មានប្រសាសន៍ថា អ្នកគ្រប់គ្រងត្រូវការចំណាយពេលវេលាជាមួយបុគ្គលិកដើម្បីស្គាល់ពួកគេ និងបង្ហាញពីទេពកោសល្យនិងការលើកទឹកចិត្តរបស់ពួកគេមិនមែនយកមនុស្សស្គាល់គ្នាស្រាប់មកកកូរទេ។

អ្នកនិពន្ធនិងអ្នកពិគ្រោះយោបល់ផ្នែកអាជីវកម្មលោក Bob Papes មានប្រសាសន៍ដែរ ថាអ្នកដឹកនាំគួរតែប្រឹងប្រែងទាក់ទងនឹងនិយោជិកថ្មីៗ ព្រោះគ្មានថ្មីគឺគ្មានការរីកចម្រើន។

៣ បុគ្គលិកល្អ សំខាន់ជាងមិត្តភក្តិ

លោក Elster ផ្តល់យោបល់ដល់អ្នកគ្រប់គ្រង់ថា ពេលរកស៊ី យើងចង់បានធនធានឆ្នើមឬចង់បាន មិត្តភាពការងារដែល មិនមែន“ មិត្តភក្តិ”គួរតែមិនយកមនុស្សជាមិត្តមកដាច់ខាត ។

«ជាការសមរម្យទេ ដែលឃើញអ្វីៗគ្រប់យ៉ាងកំពុងកើតឡើងជាមួយនិយោជិកហើយហារមិនបាន ព្រោះមនោសញ្ចេតនាមិត្តភក្តិ?» មិត្តភក្តិផ្ទាល់ខ្លួន គួរមានដែនកំណត់មិនពាក់ព័ន្ធការងារ។ “ កុំប្រើបុគ្គលិកមកគិតឈឺក្បាលនិងពិភាក្សាអំពីបញ្ហាផ្ទាល់ខ្លួនឬក្រៅវិជ្ជាជីវៈដោយសារយកមិត្តភក្តិមកបង្ក អ្នកនឹងបរាជ័យ!»

ចុងក្រោយ « កុំពិភាក្សាអំពីព័ត៌មានសម្ងាត់របស់ក្រុមហ៊ុនជាមួយមិត្តភក្តិ ព្រោះពួកគេមិនស្រលាញ់ក្រុមហ៊ុនអ្នកដូចបុគ្គលិកឆ្នើមរបស់អ្នកដែលអនុវត្តរាល់ថ្ងៃឡើយ៕»

ប្រែសម្រួល៖ស្រស់

ប្រភព៖ mediabistro

ចុចអាន៖អង់គ្លេស នៅតែជាភាសាកំពូលតារាងក្នុងពិភពពាណិជ្ជកម្ម និងអាជីព

ចុចអាន៖អនុវត្ត ៥ ជំហាននេះ នឹងទទួលបានអាជីពដែលយើងស្រលាញ់ពេញចិត្ត

The post មូលហេតុដែលមិនគួរយកមិត្តភក្ដិ មកចូលធ្វើការជាមួយ ឬមកជាកូនចៅ appeared first on Kampuchea Thmey Daily.

រៀនស្គាល់មុខមាត់ពិត មនុស្សប្រភេទមិត្តទ្រុស្តមិត្ត

Sonya — Mon, 07 Dec 2020 03:27:46 +0000

សង្គមបច្ចុប្បន្ន មានមនុស្សខ្លះ ចូលមកក្នុងគោលបំណងជាមិត្តល្អ ប៉ុន្តែតខ្លះទៀតមកក្នុងគោលបំណងមិនល្អ ដោយប្រើឈ្មោះថា មិត្ត។

មិនមែនជាភាពងាយស្រួលនោះទេ ដែលយើងរកបាននូវមិត្តភក្ដិដ៏ល្អ ប៉ុន្តែវាក៏កាន់តែពិបាកទៅទៀត ចំពោះមិត្តភក្ដិដែលមានអត្តចរិតពិស ចាំតែចាក់យើងនៅពីក្រោយខ្នង នឹងតែងតែព្យាយាមរកគ្រប់មធ្យោបាយដើម្បីវាយប្រហារ បង្អាប់បង្អោន បន្ទោសបង្អាប់យើង។

ធម្មតាមិត្តសម្លាញ់គឺ ជួយគ្នាទៅវិញទៅមក ដូច្នេះ នៅពេលយើងមានបញ្ហា មិត្តភក្ដិល្អតែងតែនៅក្បែរ និងមិនចោលគ្នាឡើយ។ គេតែងផ្ញើសាររកគ្នា ជាពិសេសនៅពេលដែលយើងមានអារម្មណ៍ បាក់ទឹកចិត្ត ម្នាក់នោះតែងតែសួរថា “មានកើតអ្វីអត់?” ចង់និយាយគ្នារឿងមិនសូវសប្បាយចិត្តជាមួយគ្នាអត់?។ល។

មិត្តបែបនេះមានន័យថាមិនត្រឹមតែរួសរាយរាក់ទាក់និដឹងសុខទុក្ខប៉ុណ្ណោះទេ ប៉ុន្តែថែមទាំងគិតដល់យើង ដឹងពីយើង ស្គាល់ចិត្តយើង ទុកចិត្តទៅលើមត្ថភាពរបស់យើង គាំទ្រយើងមិនថាកាលៈទេសៈណាក៏ដោយ មិនថានៅចំណុចណាលំបាកយ៉ាងណាក្តី។

ទន្ទឹមនឹងនេះមិត្តភក្តិក្លែងក្លាយមិនដែលមានចំណាប់អារម្មណ៍ពីបេះដូងរបស់យើង អំពើល្អរបស់យើងទេ គេចូលមកស្និទ្ធហួសហេតុ ពេលដែលយើងមានអ្វីមួយគេកំពុងចង់បាន ហើយមិត្តភក្តិក្លែងក្លាយ នោះនឹងបាត់ទៅវិញនៅពេលដែលយើងចុះខ្សោយ ហើយត្រូវការពួកគេបំផុត។ ពេលខ្លះយើងពិបាកសម្គាល់ណាស់ថាអ្នកណាជាមិត្តពិត អ្នកណាជាមិត្តលាក់ពុត។

កាលៈទេសៈខ្លះដែលយើងលំបាកបំផុត វត្តមានរបស់គេនៅសែនឆ្ងាយពីយើង។ មិត្តភក្ដិទាំងអស់នោះមិនបានឱ្យតម្លៃនិងផ្ដល់ការយកចិត្តទុកដាក់ ឬចាំជួយយើងឡើយ ហើយគេនឹងអាចប្រើចំណុចខ្សោយមកវាយបកយើងវិញក៏ថាបាន។

មិត្តភក្តិក្លែងក្លាយ អាចធ្វើឱ្យប៉ះពាល់ដល់សុខុមាលភាពទំនុកចិត្ត និងសូម្បីតែបំផ្លាញកេរ៍ឈ្មោះយើងបាន។ វាគ្រោះថ្នាក់ជាជាងភាពឯកោគ្មានមិត្តទៅទៀត។ ដូច្នេះគួរដើរចេញឱ្យឆ្ងាយ ជាការល្អហើយ!

ប្រែសម្រួល៖ សន ផានិត

ចុចអាន៖ ឧបសគ្គក្នុងជីវិត ៥ យ៉ាង បើយកឈ្នះបាន យើងនឹងក្លាយជាមនុស្សខ្លាំង

ចុចអាន៖ ប្រសិនសង្ស័យថា មិត្តភក្តិកំពុងលេងល្បិច កេងចំណេញលើយើង

The post រៀនស្គាល់មុខមាត់ពិត មនុស្សប្រភេទមិត្តទ្រុស្តមិត្ត appeared first on Kampuchea Thmey Daily.