មូលនិធិរូបិយវត្ថុអន្តរជាតិ IMF Archives - Kampuchea Thmey Daily

IMF៖ គោលនយោបាយពន្ធពាណិជ្ជកម្មដូចរបស់ ត្រាំ អាចប៉ះពាល់កំណើនសេដ្ឋកិច្ចសកល

Huon Dina — Wed, 23 Oct 2024 08:18:51 +0000

មូលនិធិរូបិយវត្ថុអន្តរជាតិ (IMF) បានព្រមានក្នុងរបាយការណ៍ទស្សនវិស័យសេដ្ឋកិច្ចពិភពលោកចុងក្រោយរបស់ខ្លួន ថា វិធានការពន្ធលើពាណិជ្ជកម្ម ដែលជាទំនោរគោលនយោបាយការពារនិយមរបស់បេក្ខជនប្រធានាធិបតីអាមេរិក លោក ដូណាល់ ត្រាំ អាចប៉ះពាល់ដល់កំណើនសេដ្ឋកិច្ចសកល។ នេះបើតាមការចុះផ្សាយរបស់សារព័ត៌មានអន្តរជាតិធំផ្សេងៗ។

ស្ថាប័នផ្ដល់ប្រាក់កម្ចីអន្តរជាតិ ដែលមានមូលដ្ឋាននៅទីក្រុងវ៉ាស៊ីនតោនដដែល មិនបានចុចចំឈ្មោះលោក ត្រាំ នោះទេ ប៉ុន្តែថា វិធានការដំឡើងពន្ធបង្កឱ្យមានសង្រ្គាមពាណិជ្ជកម្មសងសឹកគ្នាទៅវិញទៅមក ដែលធ្វើឱ្យខូចខាតសេដ្ឋកិច្ចដល់ប្រទេសដែលពាក់ព័ន្ធក្នុងជម្លោះ និងសេដ្ឋកិច្ចពិភពលោកទាំងមូល។

IMF បានឱ្យដឹងថា មានការកើនឡើងយ៉ាងខ្លាំងនៃចំនួន «វិធានការបង្ខូចទ្រង់ទ្រាយពាណិជ្ជកម្ម» ដែលបានអនុវត្តដោយប្រទេសនានាក្នុងរយៈពេល ៥ ឆ្នាំចុងក្រោយ ដោយកើនឡើងពី ១ ០០០ ករណី នៅឆ្នាំ ២០១៩ ដល់ ៣ ០០០ ករណី នៅឆ្នាំ ២០២៤ ខណៈរលកថ្មីនៃវិធានការពន្ធ នឹងបង្កើតគ្រោះថ្នាក់បន្ថែមទៀត។

ប្រធានសេដ្ឋវិទូរបស់ IMF លោក Pierre-Olivier Gourinchas បានថ្លែងថា ពិភពលោកកំពុងស្ថិតនៅលើផ្លូវឆ្ពោះទៅរកចំណុចដែលធ្វើឱ្យព្រួយបារម្ភយ៉ាងខ្លាំង ដោយ «វិធានការបង្ខូចទ្រង់ទ្រាយពាណិជ្ជកម្មទាំងនេះជាច្រើន អាចឆ្លុះបញ្ចាំងពីការសម្រេចចិត្តរបស់ប្រទេសដែលអាត្មានិយម ហើយទីបំផុត អាចនឹងប៉ះពាល់ដល់សេដ្ឋកិច្ចពិភពលោក ក៏ដូចជាប្រទេសខ្លួនឯងផ្ទាល់ដែលអនុវត្តវា»។ លោកបន្តថា ផលប៉ះពាល់លើពាណិជ្ជកម្មពិភពលោក ក៏ធ្វើឱ្យប្រជាជនក្នុងប្រទេសដែលអនុវត្តវិធានការពន្ធ កាន់តែក្រីក្រផងដែរ។

របាយការណ៍របស់ IMF ដែលចេញផ្សាយកាលពីថ្ងៃអង្គារ បានព្យាករថា ពិភពលោកនឹងមើលឃើញពីកំណើនសេដ្ឋកិច្ច ៣,២ ភាគរយ សម្រាប់ឆ្នាំ ២០២៤ និងឆ្នាំ ២០២៥។ យ៉ាងណាមិញ ស្ថាប័នហិរញ្ញវត្ថុដដែលបានលើក វិធានការពន្ធខ្ពស់លើពាណិជ្ជកម្មពិភពលោកត្រឹមពាក់កណ្តាលឆ្នាំក្រោយ អាចកាត់បន្ថយ ០,៨ ភាគរយ នៃកំណើនសេដ្ឋកិច្ចឆ្នាំ ២០២៥ និង ១,៣ ភាគរយ នៅឆ្នាំ ២០២៦។

ការព្រមានរបស់ IMF ដែលចាត់ទុកសហរដ្ឋអាមេរិកថាជា «ម៉ាស៊ីនសម្រាប់កំណើនសេដ្ឋកិច្ចសកល» ធ្វើឡើងចំពេលដែលសហរដ្ឋអាមេរិកត្រៀមការបោះឆ្នោតប្រធានាធិបតីនាដើមខែវិច្ឆិកាខាងមុខ។

លោក ត្រាំ ដែលជាគូប្រជែងរបស់លោកស្រី កាម៉ាឡា ហារីស លើការបោះឆ្នោត កន្លងមកបានបង្កើនវោហាសាស្រ្តរបស់ខ្លួនម្ដងហើយម្ដងទៀតស្ដីពីការដំឡើងពន្ធលើទំនិញនាំចូល ជាពិសេសពីម៉ិកស៊ិក និងចិន។ លោក ត្រាំ បានប្តេជ្ញាដាក់ពន្ធ ១០ ភាគរយ លើគ្រប់មុខទំនិញដែលនាំចូលទៅអាមេរិក និង ៦០ ភាគរយ លើទំនិញនាំចូលពីប្រទេសចិន ខណៈរដ្ឋបាលអាមេរិក ដែលបច្ចុប្បន្នដឹកនាំដោយគណបក្សប្រជាធិបតេយ្យរបស់លោកប្រធានាធិបតី ចូ បៃដិន ក៏ពង្រឹងលើវិធានការពន្ធផងដែរ។

មិនត្រឹមតែសហរដ្ឋអាមេរិកប៉ុណ្ណោះទេ ដែលពង្រឹងគោលនយោបាយការពារនិយមរបស់ខ្លួន ប្រទេសលោកខាងលិចផ្សេងៗទៀត ដូចជា សហភាពអឺរ៉ុប និងកាណាដា ក៏ប្រកាន់ខ្ជាប់នូវវិធានការដូចគ្នាផងដែរ ដោយភាគច្រើនផ្ដោតគោលដៅលើប្រទេសចិន។ ការណ៍នេះ បានបង្កជាការសងសឹកពីក្រុងប៉េកាំង ដែលកន្លងមក បានដាក់វិធានការឆ្លើយតបមួយចំនួន ជាពិសេសលើទំនិញដែលនាំចូលពីអឺរ៉ុបទៅចិន។

ក្រៅតែហានិភ័យពាណិជ្ជកម្ម របាយការណ៍ទស្សនវិស័យសេដ្ឋកិច្ចពិភពលោករបស់ IMF ក៏បានគូសបញ្ជាក់ពីហានិភ័យផ្សេងៗទៀត រួមមានទាំងលទ្ធភាពនៃការកើនឡើងតម្លៃប្រេង និងទំនិញផ្សេងៗ ដែលរួមចំណែកដោយជម្លោះនៅមជ្ឈិមបូព៌ា និងអ៊ុយក្រែនជាដើម៕

The post IMF៖ គោលនយោបាយពន្ធពាណិជ្ជកម្មដូចរបស់ ត្រាំ អាចប៉ះពាល់កំណើនសេដ្ឋកិច្ចសកល appeared first on Kampuchea Thmey Daily.

IMF៖ បំណុលសាធារណៈទូទាំងសកល នឹងកើនលើស ១០០ ទ្រីលានដុល្លារ ឆ្នាំនេះ

Huon Dina — Tue, 15 Oct 2024 09:32:21 +0000

មូលនិធិរូបិយវត្ថុអន្តរជាតិ (IMF) បាននិយាយក្នុងរបាយការណ៍ចុងក្រោយរបស់ខ្លួនចេញផ្សាយនាថ្ងៃអង្គារនេះថា បំណុលសាធារណៈសរុបរបស់ពិភពលោកនឹងកើនលើស ១០០ទ្រីលានដុល្លារ ជាលើកដំបូងនៅឆ្នាំ២០២៤នេះ ហើយអាចនឹងបន្តកើនឡើងយ៉ាងរហ័ស ដោយសារតែទំនោរនយោបាយលើការចំណាយខ្ពស់របស់បណ្ដារដ្ឋាភិបាល កំណើនសេដ្ឋកិច្ចយឺតយ៉ាវដែលជំរុញតម្រូវការខ្ចីប្រាក់ និងថ្លៃអត្រាការប្រាក់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

របាយការណ៍តាមដានសារពើពន្ធរបស់ IMF បានបង្ហាញថា បំណុលសាធារណៈសកលនឹងកើនឡើងដល់ ៩៣ ភាគរយ ធៀបនឹងផលិតផលក្នុងស្រុកសរុប (GDP) នាដំណាច់ឆ្នាំ២០២៤ និងឈានដល់១០០ភាគរយ ធៀបនឹង GDP នៅឆ្នាំ២០៣០។ នោះនឹងធ្វើឱ្យវាកើនលើសកម្រិតខ្ពស់បំផុត (៩៩ ភាគរយ ធៀបនឹង GDP) ក្នុងអំឡុងវិបត្តិកូវីដ១៩ និងខ្ពស់ជាង១០ភាគរយ ធៀបនឹងអត្រានៅឆ្នាំ ២០១៩ ពោលគឺមុនពេលវិបត្តិកូវីដចូលមកដល់ ហើយបំប៉ោងការចំណាយរបស់រដ្ឋាភិបាល។

របាយការណ៍ដដែលបានលើកឡើងថា មានហេតុផលសមទំនងជាច្រើនដែលថា កម្រិតបំណុលនាពេលអនាគត នឹងហក់ឡើងខ្ពស់ជាងការព្យាករនាពេលបច្ចុប្បន្ន ដែលជំរុញដោយទំនោរចំណាយច្រើនរបស់រដ្ឋាភិបាលសហរដ្ឋអាមេរិក ដែលជាប្រទេសមានសេដ្ឋកិច្ចធំជាងគេបំផុតរបស់ពិភពលោក។

IMF បានបន្តនិយាយក្នុងរបាយការណ៍យ៉ាងដូច្នេះថា៖«ភាពមិនប្រាកដប្រជានៃគោលនយោបាយសារពើពន្ធ បានកើនឡើង ហើយបន្ទាត់ក្រហមនយោបាយស្តីពីការយកពន្ធ បានកាន់តែមានភាពជាក់ស្តែង។ សម្ពាធក្នុងការចំណាយដើម្បីដោះស្រាយការផ្លាស់ប្តូរបៃតង វ័យចំណាស់នៃប្រជាសាស្រ្ត ការព្រួយបារម្ភអំពីសុវត្ថិភាព និងបញ្ហាប្រឈមនៃការអភិវឌ្ឍន៍យូរអង្វែងកំពុងកើនឡើង»។

ក្នុងសេណារីយ៉ូអវិជ្ជមានដ៏ធ្ងន់ធ្ងរបំផុត បំណុលសាធារណៈសកលអាចឡើងដល់ ១១៥ភាគរយ ធៀបនឹង GDP ដោយខ្ពស់ជាងការព្យាករនាពេលបច្ចុប្បន្នរហូតដល់ ២០ភាគរយ។ IMF លើកឡើងថា សេណារីយ៉ូដ៏អាក្រក់នេះ អាចកើតឡើងដោយសារតែកំណើនសេដ្ឋកិច្ចទន់ខ្សោយ គោលនយោបាយហិរញ្ញវត្ថុកាន់តែតឹងរ៉ឹង និងភាពមិនច្បាស់លាស់នៃគោលនយោបាយសារពើពន្ធ និងរូបិយវត្ថុកាន់តែច្រើនក្នុងប្រទេសមានសេដ្ឋកិច្ចសំខាន់ៗជាប្រព័ន្ធ ដូចជាសហរដ្ឋអាមេរិក និងប្រទេសចិនជាដើម។

បើតាមរ៉យទ័រ ក្តីបារម្ភរបស់ IMF អំពីការកើនឡើងកម្រិតបំណុល ចេញផ្សាយឡើង៣សប្តាហ៍មុនការបោះឆ្នោតប្រធានាធិបតីសហរដ្ឋអាមេរិក ដែលបេក្ខជនជាគូប្រជែងទាំង២បានសន្យាថានឹងកាត់បន្ថយពន្ធ និងការចំណាយថ្មី ដែលអាចបន្ថែមឱនភាពថវិការាប់ទ្រីលានដុល្លារ ខណៈសហរដ្ឋអាមេរិករួចចំណែកធំជាងគេបំផុតលើទំហំបំណុលសាធារណៈសកល៕

The post IMF៖ បំណុលសាធារណៈទូទាំងសកល នឹងកើនលើស ១០០ ទ្រីលានដុល្លារ ឆ្នាំនេះ appeared first on Kampuchea Thmey Daily.

IMF៖កំណើនសេដ្ឋកិច្ចកម្ពុជានឹងកើនឡើង៥,៥ ភាគរយនៅឆ្នាំនេះ

May Kunmakara — Fri, 04 Oct 2024 02:12:54 +0000

ស្ថាប័នមូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចកម្ពុជាត្រូវនឹងមានកំណើន ៥,៥ ភាគរយនៅឆ្នាំ ២០២៤ ដោយកើនឡើងពី ៥ ភាគរយនៅឆ្នាំ ២០២៣ ដែលត្រូវបានជំរុញដោយការស្ទុះងើបឡើងវិញយ៉ាងរឹងមាំនៃការនាំចេញសម្លៀកបំពាក់ កសិកម្ម និងការស្ទុះងើបឡើងវិញនៃវិស័យទេសចរណ៍។

លោក Kenichiro Kashiwase ប្រធានបេសកកម្មរបស់ IMF ប្រចាំកម្ពុជា បាននិយាយនៅចុងបញ្ចប់នៃដំណើរទស្សនកិច្ចនៅកម្ពុជាពីថ្ងៃទី ១៧ ដល់ថ្ងៃទី ៣០ ខែកញ្ញាថា៖« ទោះជាយ៉ាងណាក៏ដោយ វិស័យសំណង់ និងអចលនទ្រព្យកំពុងឆ្លងកាត់នូវការកែតម្រូវមួយ បន្ទាប់ពីមានកំណើនយ៉ាងឆាប់រហ័សកាលពីឆ្នាំមុន» ។

លោកបានមានប្រសាសន៍ថា កំណើនឥណទានបានធ្លាក់ចុះយ៉ាងខ្លាំង ស្របពេលដែលគុណភាពទ្រព្យសកម្មកាន់តែយ៉ាប់យ៉ឺន និងបំណុលក្នុងវិស័យឯកជនខ្ពស់។ លោកបានបន្ថែមថា ក្នុងត្រីមាសទី ១ ឆ្នាំ ២០២៤ កម្ចីមិនដំណើរការ (NPLs) បានកើនឡើងដល់ ៦ ភាគរយននៃចំនួនឥណទានសរុប ដែលឆ្លុះបញ្ចាំងពីភាពងាយរងគ្រោះដែលកំពុងលេចឡើងជាមួយនឹង វិធានដ៏ហ្មត់ចត់ក្រោយកូវីដ១៩។

Kashiwase បាននិយាយថា ហានិភ័យចំពោះទស្សនវិស័យបានផ្លាស់ប្តូរទៅជាការធ្លាក់ចុះ ជាពិសេសដោយសារតែតម្រូវការខ្សោយជាងការព្យាករណ៍ពីប្រទេសដែលមានសេដ្ឋកិច្ចជឿនលឿន ការឡើងកំដៅណៃភូមិសាស្ត្រ និងបំណុលឯកជនក្នុងស្រុកខ្ពស់។

លោកបានមានប្រសាសន៍ថា៖«ការកើនឡើង NPLs នៅក្នុងវិស័យទេសចរណ៍ និងអចលនទ្រព្យក៏បង្កហានិភ័យដល់កំណើន និងស្ថិរភាពហិរញ្ញវត្ថុផងដែរ។ ផ្ទុយទៅវិញ ការបន្តបន្ធូរបន្ថយលក្ខខណ្ឌហិរញ្ញវត្ថុសកលនឹងគាំទ្រដល់ការងើបឡើងវិញ»។

Kashiwase បាននិយាយថាអតិផរណាបានធ្លាក់ចុះមកត្រឹមជាមធ្យម១,៦ ភាគរយនៅក្នុងឆមាសទីមួយនៃឆ្នាំ ២០២៤ ធ្លាក់ចុះពី ២,១ ភាគរយក្នុងឆ្នាំ ២០២៣ ដែលឆ្លុះបញ្ចាំងពីនិន្នាការតម្លៃទំនិញសកល និងកំណើនតម្រូវការក្នុងស្រុកខ្សោយ។

លោកបានមានប្រសាសន៍ថា៖«សម្រាប់រយៈពេលពេញមួយឆ្នាំ អតិផរណាត្រូវបានព្យាករណ៍ថានឹងមានកំណើនប្រហែល ១,៥ ភាគរយ មុនពេលឈានដល់និន្នាការរយៈពេលវែង ៣ ភាគរយ» ។

កាលពីថ្ងៃទី២៥ ខែកញ្ញា ធនាគារអភិវឌ្ឍន៍អាស៊ី (ADB) បានរក្សាការព្យាករកំណើនសេដ្ឋកិច្ចរបស់ខ្លួនសម្រាប់កម្ពុជា នៅកម្រិត ៥,៨% សម្រាប់ឆ្នាំ ២០២៤ ឆ្លុះបញ្ចាំងពីការកើនឡើងតិចតួចនៃថ្លៃម្ហូបអាហារ និង ការធ្លាក់ចុះនៃថ្លៃប្រេងឥន្ធនៈនៅក្នុងឆមាសទី១ ឆ្នាំ ២០២៤។

យោងតាមនេះបើយោងតាមទស្សនវិស័យសអភិវឌ្ឍន៍អាស៊ី(ADO) ADB ក៏បានកាត់បន្ថយការព្យាករ អតិផរណាពីមុនរបស់ខ្លួនពី ២,0% មក ០,៥% សម្រាប់ឆ្នាំ ២០២៤។ ជាមួយគ្នានេះដែរ ADB ក៏បានព្យាករណ៍ថា សម្រាប់កំណើនសេដ្ឋកិច្ចកម្ពុជានឹងសម្រេចបាន ៦,0% សម្រាប់ឆ្នាំ ២០២៥៕

The post IMF៖កំណើនសេដ្ឋកិច្ចកម្ពុជានឹងកើនឡើង៥,៥ ភាគរយនៅឆ្នាំនេះ appeared first on Kampuchea Thmey Daily.

IMF ទំនងផ្ដល់កម្ចីបន្ថែម៣ប៊ីលានដុល្លារដល់បង់ក្លាដែស ប៉ុន្តែចោទសួរពីកំណែទម្រង់របស់រដ្ឋាភិបាលបណ្ដោះអាសន្ន

Huon Dina — Mon, 02 Sep 2024 04:29:43 +0000

មូលនិធិរូបិយវត្ថុអន្តរជាតិ (IMF) បានបង្ហាញពីភាពវិជ្ជមានអំពីការផ្តល់ប្រាក់កម្ចីបន្ថែមចំនួន ៣ ប៊ីលានដុល្លារ ដល់ប្រទេសបង់ក្លាដែស ប៉ុន្តែស្ថាប័នប្រាក់កម្ចីពហុភាគីនេះ ចង់ដឹងថាតើរដ្ឋាភិបាលបណ្តោះអាសន្នគ្រោងនឹងធ្វើកំណែទម្រង់អ្វីខ្លះ។ នេះបើតាមការចុះផ្សាយរបស់កាសែតក្នុងស្រុក The Daily Star នាថ្ងៃចន្ទនេះ។

ការពិភាក្សាលើប្រធានបទនេះ ត្រូវបានលើកឡើងក្នុងជំនួបតាមប្រព័ន្ធវិដេអូរវាងទីប្រឹក្សាហិរញ្ញវត្ថុបង់ក្លាដែស លោក Salehuddin Ahmed និងប្រធានបេសកកម្មបុគ្គលិក IMF លោក Chris Papageorgiou ដែលទទួលបន្ទុកត្រួតពិនិត្យកម្មវិធីកម្ចី ៤,៧ ប៊ីលានដុល្លារ សម្រាប់បង់ក្លាដែស កាលពីថ្ងៃព្រហស្បតិ៍សប្ដាហ៍មុន។

ថ្លែងជាមួយអ្នកសារព័ត៌មាននៅលេខាធិការដ្ឋានកាលពីថ្ងៃអាទិត្យ លោក Salehuddin បាននិយាយថា IMF ចង់ដឹងអំពីផែនការកំណែទម្រង់ និងថាតើសមាមាត្រពន្ធធៀបនឹងផលិតផលក្នុងស្រុកសរុប (GDP) នឹងកើនឡើងដែរឬទេ។ លោកបានយល់ព្រមនឹងសំណើចង់ដឹងរបស់ IMF។ ទីប្រឹក្សាហិរញ្ញវត្ថុបង់ក្លាដែសដដែល បាននិយាយថា ធនាគារបង់ក្លាដែសបានផ្លាស់ប្តូររួចហើយសម្រាប់សំណើប្រាក់កម្ចីចំនួន ៣ ប៊ីលានដុល្លារ ដោយបន្ថែមថា ព័ត៌មានលម្អិតនឹងត្រូវបានពិភាក្សានៅពេលដែលបេសកកម្មរបស់ IMF ធ្វើទស្សនកិច្ចទៅបង់ក្លាដែសនៅចុងខែកញ្ញានេះ។

គួរគូសបញ្ជាក់ថា ក្រោយត្រូវបានតែងតាំងជាទេសាភិបាលធនាគារកណ្ដាលបង់ក្លាដែសកាលពីខែមុន លោក Ahsan H Mansur បានផ្តួចផ្តើមការពិភាក្សាលើប្រាក់កម្ចីបន្ថែមពី IMF ដើម្បីសងបំណុលបរទេស និងជំរុញទុនបំរុងប្តូរប្រាក់បរទេស។

កន្លងមក មន្ត្រី IMF បានជូនដំណឹងដល់ក្រសួងហិរញ្ញវត្ថុ និងមន្ត្រីធនាគារកណ្តាលថា ពួកគេកំពុងវាយតម្លៃថាតើខ្លួនអាចផ្តល់ប្រាក់កម្ចីដល់បង់ក្លាដែសបានចំនួនប៉ុន្មាន ដោយមិនលើសកូតាសម្រាប់ប្រទេសនេះ។ តាមការគណនារបស់ក្រសួងហិរញ្ញវត្ថុ បង់ក្លាដែសអាចទទួលប្រាក់បន្ថែមចំនួន ៣ ប៊ីលានដុល្លារទៀត ដោយមិនចាំបាច់លើសពីកូតានោះទេ។

រហូតមកដល់ពេលនេះ IMF បានបញ្ចេញទឹកប្រាក់ចំនួន ២,៣ ប៊ីលានដុល្លារ ក្រោមកម្មវិធីកម្ចី ៤,៧ ប៊ីលានដុល្លារ ចាប់តាំងពីគម្រោងនេះត្រូវបានអនុម័តកាលពីខែមករា ដើមឆ្នាំ។

បច្ចុប្បន្ន រដ្ឋាភិបាលបណ្តោះអាសន្ន ដែលគ្រប់គ្រងប្រទេសក្រោយរដ្ឋាភិបាលចាស់ត្រូវបានផ្ដួលរំលំដោយបាតុកម្មដឹកនាំដោយក្រុមនិស្សិត ត្រូវប្រឈមមុខនឹងបញ្ហាសេដ្ឋកិច្ចផ្សេងៗ រួមទាំងអតិផរណាខ្ពស់ ការថយចុះទុនបំរុងរូបិយប័ណ្ណបរទេស ដែលជាបញ្ហាដ៏ធំអស់រយៈពេលជិត២ឆ្នាំមកហើយ។

អតិផរណាបន្តខ្ពស់ក្នុងខែកក្កដា ដល់ ១១,៦៦ ភាគរយ ខណៈអតិផរណាម្ហូបអាហារនៅខែកក្កដា បានហក់លើស ១៤ ភាគរយ ខ្ពស់បំផុតក្នុងរយៈពេលជាង ១០ ឆ្នាំ។ ទន្ទឹមនឹងនេះ ទុនបំរុងអន្តរជាតិរបស់បង់ក្លាដែស ដែលមានចំនួនជាង ៤០ ប៊ីលានដុល្លារក្នុងឆ្នាំ ២០២២ បានធ្លាក់ចុះស្ទើរតែពាក់កណ្ដាលត្រឹម ២០,៥ ប៊ីលានដុល្លារ គិតត្រឹមថ្ងៃ ២១ ខែសីហា។ រដ្ឋាភិបាលបណ្តោះអាសន្នបានចាត់វិធានការមួយចំនួនដើម្បីដោះស្រាយស្ថានការណ៍ ដូចជាការដំឡើងអត្រាការប្រាក់ និងការអនុវត្តវិធានការតឹងរ៉ឹងមួយចំនួនសម្រាប់វិស័យធនាគារ៕

The post IMF ទំនងផ្ដល់កម្ចីបន្ថែម៣ប៊ីលានដុល្លារដល់បង់ក្លាដែស ប៉ុន្តែចោទសួរពីកំណែទម្រង់របស់រដ្ឋាភិបាលបណ្ដោះអាសន្ន appeared first on Kampuchea Thmey Daily.

IMF រិះគន់អាមេរិកពាក់ព័ន្ធនឹងបំណុលជាតិ ឱនភាពលើវិស័យផ្សេងៗ និងរបាំងពាណិជ្ជកម្ម

Huon Dina — Mon, 01 Jul 2024 08:29:19 +0000

មូលនិធិរូបិយវត្ថុអន្តរជាតិ (IMF) កាលពីសប្តាហ៍មុន បានរិះគន់សហរដ្ឋអាមេរិកចំៗ និងបានសម្ដែងការព្រួយបារម្ភ ធ្ងន់ធ្ងរអំពីបំណុលជាតិ គោលនយោបាយពាណិជ្ជកម្មបែបការពារនិយម និងឱនភាពលើវិស័យផ្សេងៗរបស់ប្រទេសនេះ ក្រោមហេតុផលថាវានឹងជះឥទ្ធិពលខ្លាំងដល់កំណើនសេដ្ឋកិច្ចទាំងក្នុងស្រុក និងសកល។ នេះបើតាមការចុះផ្សាយរបស់សារព័ត៌មាន Business Insider កាលពីថ្ងៃអាទិត្យ។

IMF បាននិយាយក្នុងរបាយការណ៍វាយតម្លៃប្រចាំឆ្នាំរបស់ខ្លួនថា សេដ្ឋកិច្ចរបស់អាមេរិកដំណើរការទៅល្អគួរឱ្យកត់សម្គាល់ ហើយរំពឹងថានឹងមានកំណើនបន្ថែមទៀត។ ប៉ុន្តែស្ថាប័នដដែល បានព្រមានថា បញ្ហាមួយចំនួនកំពុងក្លាយជាសម្ពាធខ្លាំងហួសហេតុ ដែលមិនអាចមិនអើពើបាន។

សេចក្តីសង្ខេបការវាយតម្លៃ បាននិយាយថា ឱនភាពសារពើពន្ធមានទំហំធំពេក ដែលធ្វើឱ្យបំណុលជាតិ ធៀប នឹងផលិតផលក្នុងស្រុកសរុប (GDP) មានគម្លាតខុសគ្នាខ្លាំង ហើយមានរយៈពេលយូរ។ ស្ថាប័នផ្ដល់ប្រាក់កម្ចីអន្តរជាតិដដែល បន្តថា៖ «ការពង្រីកការរឹតបន្តឹងពាណិជ្ជកម្មជាបន្តបន្ទាប់ និងការបញ្ចេញសកម្មភាពមិនគ្រប់គ្រាន់ដើម្បីដោះស្រាយភាពងាយរងគ្រោះ ដែលបង្ហាញឱ្យឃើញក្នុងការបរាជ័យរបស់ធនាគារនៅឆ្នាំ ២០២៣ បង្កឱ្យមានហានិភ័យធ្លាក់ចុះយ៉ាងធ្ងន់ធ្ងរ»។

IMF គូសបញ្ជាក់ថា ឱនភាពរ៉ាំរ៉ៃ នឹងធ្វើឱ្យអសមាមាត្រនៃបំណុលជាតិធៀបនឹង GDP កើនឡើងរហូតដល់ ១៤០ ភាគរយ ត្រឹមឆ្នាំ ២០៣២ ដែលនេះជាបញ្ហាត្រូវការការដោះស្រាយជាបន្ទាន់។ តាមការប៉ាន់ប្រមាណរបស់សហរដ្ឋអាមេរិក បំណុលជាតិនឹងកើនឡើងដល់ ៥៦,៩ ទ្រីលានដុល្លារ ក្នុងឆ្នាំ ២០៣៤ ដែលជាការកើនឡើងយ៉ាងខ្លាំងពីការព្យាករកាលពីឆ្នាំមុន។

អ្វីដែលលើសពីនេះទៀត IMF បាននិយាយថា ការប្រឈមមុខដាក់គ្នាក្នុងនយោបាយអាមេរិក ពាក់ព័ន្ធនឹងដែនកំណត់បំណុលជាតិ ត្រូវតែបញ្ឈប់។ ព្រឹត្តិការណ៍ដ៏អាក្រក់បំផុត បានកើតឡើងនៅឆ្នាំ ២០២៣ នៅពេលដែលគណបក្សសាធារណរដ្ឋ និងគណបក្សប្រជាធិបតេយ្យ ចម្រូងចម្រាស់គ្នាលើការផ្ដល់មូលនិធិ ដែលប៊ិះនឹងធ្វើឱ្យសហរដ្ឋអាមេរិកធ្លាក់ចូលទៅក្នុងវិបត្តិសងបំណុលមិនរួច។

របាយការណ៍ IMF បាននិយាយថា៖ «បញ្ហាដែលអាចជៀសបានទាំងអស់នេះ បង្កើតហានិភ័យជាប្រព័ន្ធដល់សហរដ្ឋអាមេរិក និងសេដ្ឋកិច្ចពិភពលោក»។

យ៉ាងណាមិញ IMF ការគំរាមកំហែងដល់ស្ថិរភាពហិរញ្ញវត្ថុ មិនបញ្ចប់ងាយៗនោះទេ ដោយសកម្មភាពជាក់ស្តែងមានភាពខ្វះខាត ពេលនិយាយអំពីការពង្រឹងសុវត្ថិភាពធនាគាររបស់សហរដ្ឋអាមេរិក ជាពិសេសពាក់ព័ន្ធនឹងវិបត្តិរយៈពេលខ្លីក្នុងឆ្នាំ ២០២៣ ដែលធ្វើឱ្យធនាគារ Silicon Valley ដួលរលំ។ ដោយការណ៍នេះ សហរដ្ឋអាមេរិកត្រូវបន្តការត្រួតពិនិត្យធនាគារឱ្យកាន់តែតឹងរ៉ឹង ហើយបន្ថយប្រាក់បញ្ញើ ដែលគ្មានការធានារ៉ាប់រង។

ទន្ទឹមជាមួយគ្នានេះផងដែរ IMF បាននិយាយថា យុទ្ធសាស្រ្តបែបការពារនិយមកាន់តែខ្លាំងឡើងៗរបស់អាមេរិកចំពោះពាណិជ្ជកម្ម គឺជាហានិភ័យដល់កំណើនសេដ្ឋកិច្ចរបស់សហរដ្ឋអាមេរិក និងពិភពលោក។

គួរគូសបញ្ជាក់ថា ការរិះគន់របស់ IMF ធ្វើឡើងក្រោយប្រធានាធិបតីអាមេរិក លោក ចូ បៃដិន ប្រកាសបង្កើនពន្ធលើមុខទំនិញនាំចូលពីចិន រួមទាំងពន្ធ ១០០ ភាគរយលើរថយន្តអគ្គិសនីចិន។ តែនេះគ្រាន់តែជាផ្នែកមួយនៃសង្រ្គាមពាណិជ្ជកម្ម ដែលផ្ទុះឡើងក្នុងឆ្នាំ ២០១៨ ក្រោមអាណត្តិរបស់អតីតប្រធានាធិបតីអាមេរិក លោក ចូ បៃដិន។ ហើយប្រសិនបើលោក ត្រាំ ឈ្នះឆ្នោតនាពេលខាងមុខម្ដងទៀត លោកបានសន្យាថានឹងអនុវត្តពន្ធទូទៅលើការនាំចូលទាំងអស់ ដែលអ្នកសេដ្ឋកិច្ចបានព្រមានថា នឹងបង្កជាអតិផរណាធ្ងន់ធ្ងរ៕

The post IMF រិះគន់អាមេរិកពាក់ព័ន្ធនឹងបំណុលជាតិ ឱនភាពលើវិស័យផ្សេងៗ និងរបាំងពាណិជ្ជកម្ម appeared first on Kampuchea Thmey Daily.

IMF ឲ្យ អ៊ុយក្រែន ខ្ចីលុយរាប់ពាន់លានដុល្លារបន្ថែមទៀតក្នុងកិច្ចសន្យា ៤ ឆ្នាំ

Sok Chivon — Sat, 01 Jun 2024 01:47:01 +0000

មូលនិធិរូបិយវត្ថុអន្តរជាតិ (IMF) បានប្រកាសយល់ព្រមផ្ដល់ប្រាក់កម្ចីចំនួន ២.២ ពាន់លានដុល្លារទៅឲ្យអ៊ុយក្រែនក្នុងកិច្ចសន្យារយៈពេល ៤ ឆ្នាំ ខណៈសេដ្ឋកិច្ចប្រទេសមួយនេះកាន់តែហៅលែងឮ ក្រោយផ្ទុះឆេះភ្លើងសង្គ្រាមជាមួយរុស្ស៊ី ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី៣១ ខែឧសភាកន្លងទៅ ។

IMF បាននិយាយនៅក្នុងសេចក្តីថ្លែងការណ៍មួយថា ភាគីទាំងពីរបានឈានដល់កិច្ចព្រមព្រៀងប្រាក់កម្ចីក្នុងរយៈពេល ៤៨ ខែ ខណៈកិច្ចព្រមព្រៀងនេះត្រូវបានអនុម័តតាំងតែខែមីនា ឆ្នាំ ២០២៣ មកម្ល៉េះ ហើយរដ្ឋាភិបាលទីក្រុងកៀវក៏អាចមានលទ្ធភាពទទួលបានទឹកប្រាក់ប្រហែល ១៥.៦ ពាន់លានដុល្លារឯណោះក្នុងផ្នែកមួយនៃកញ្ចប់ជំនួយចំនួន ១២២ ពាន់លានដុល្លារសម្រាប់ប្រទេសដែលហែកហួរដោយសង្រ្គាម ។

IMF បាននិយាយទៀតថា “សេដ្ឋកិច្ចរបស់ប្រទេសអ៊ុយក្រែនសម្រេចបាននូវកំណើន និងអតិផរណាក្នុងកម្រិតមួយនៅត្រីមាសទីមួយនៃឆ្នាំនេះ ។ ទោះជាយ៉ាងណាក៏ដោយ ហានិភ័យគឺនៅតែមានខ្ពស់ ដោយសារតែភ្លើងសង្រ្គាមជាមួយរុស្ស៊ីនៅតែបន្តឆេះរោលរាល ហើយទស្សនវិស័យទាំងប៉ុន្មានក្នុងឆ្នាំនេះនៅតែមិនប្រាកដប្រជា” ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលជាង ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Volodymyr Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

The post IMF ឲ្យ អ៊ុយក្រែន ខ្ចីលុយរាប់ពាន់លានដុល្លារបន្ថែមទៀតក្នុងកិច្ចសន្យា ៤ ឆ្នាំ appeared first on Kampuchea Thmey Daily.

ទោះអឺរ៉ុប និងមជ្ឈិមបូព៌ាកំពុងផ្ទុះសង្គ្រាម តែ IMF ព្យាករណ៍ថា សេដ្ឋកិច្ចពិភពលោកនៅតែមានកំណើនក្នុងឆ្នាំនេះ

Sok Chivon — Thu, 18 Apr 2024 03:11:27 +0000

មូលនិធិរូបិយវត្ថុអន្តរជាតិ (IMF) បានបង្កើនការព្យាករណ៍សម្រាប់សេដ្ឋកិច្ចពិភពលោកក្នុងឆ្នាំ ២០២៤ នេះ បើទោះបីជាកំពុងផ្ទុះភ្លើងសង្គ្រាមរុស្ស៊ី-អ៊ុយក្រែន និងភាពតានតឹងនៅតំបន់មជ្ឈិមបូព៌ាក៏ដោយ ប៉ុន្តែ IMF ក៏ព្រមានហានិភ័យនៃការឡើងថ្លៃទំនិញផងដែរ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី១៧ ខែមេសាកន្លងទៅ ។

IMF បានដាក់ការព្យាករណ៍ថា ផលិតផលក្នុងស្រុកសរុប (GDP) របស់ពិភពលោកនឹងហក់ឡើង ៣.២ ភាគរយនៅឆ្នាំ ២០២៤ នេះ ពោលកើនឡើងមួយភាគដប់ដែលមូលនិធិមួយនេះធ្លាប់បានព្យាករណ៍កាលពីខែមករាកន្លងទៅ ខណៈសេដ្ឋកិច្ចសហរដ្ឋអាមេរិករំពឹងនឹងស្ទុះងើប ២.៧ ភាគរយ ខណៈការព្យាករណ៍ពីមុនគឺមានត្រឹម ២.១ ប៉ុណ្ណោះ ។

ទន្ទឹមនោះ ការព្យាករណ៍ពីកំណើនសេដ្ឋកិច្ចពិភពលោករបស់ IMF ក៏កើតមានឡើង ស្របពេលដែល GDP របស់ប្រទេសបានកើនឡើង ៥.៣ ភាគរយក្នុងរយៈពេល ៣ ខែដំបូងនៃឆ្នាំ ២០២៤ ហើយនេះក៏ជាកំណើនដ៏មិននឹកស្មានដល់មួយ ខណៈការរំពឹងទុកមានត្រឹម ៤.៦ ភាគរយប៉ុណ្ណោះ ។

ទោះបីជាមានកំណើនខ្លាំងបែបនេះក៏ដោយ ប៉ុន្តែប្រទេសចិនក៏បន្តប្រឈមមុខនឹងវិបត្តិទីផ្សារអចលនទ្រព្យដែលវិស័យមួយនេះគ្របដណ្ដប់លើសេដ្ឋកិច្ចចិនប្រមាណជា ២០ ភាគរយឯណោះ ។ ជាក់ស្ដែង ក្រុមហ៊ុនអចលនទ្រព្យរបស់ចិនជាច្រើនកំពុងប្រកាសក្ស័យធន និងបិទទ្វារក្រុមហ៊ុនជាហូរហែ ដោយសារតែភាពជាប់គាំង ក៏ដូចជាជំពាក់បំណុលបរទេស ។

ដោយឡែកពាក់ព័ន្ធនឹងអតិផរណារបស់ពិភពលោកវិញ មូលនិធិរូបិយវត្ថុអន្តរជាតិ (IMF) ក៏បានព្យាករណ៍ផងដែរថា នឹងធ្លាក់ចុះមកត្រឹម ២.៨ ភាគរយនៅចុងឆ្នាំ ២០២៤ ពោលធ្លាក់ពី ៤ ភាគរយកាលពីឆ្នាំមុន និងចុះដល់ ២.៤ ភាគរយសម្រាប់ឆ្នាំ ២០២៥ ហើយនេះក៏សញ្ញាល្អមួយសម្រាប់សេដ្ឋកិច្ចពិភពលោកផងដែរ ៕

ដោយ ៖ សុខ ជីវ័ន្ត

ចុចអាន ៖ មេក្រុមហ៊ុន Apple ចង់បង្កើនការវិនិយោគបន្ថែមទៀតនៅ វៀតណាម

The post ទោះអឺរ៉ុប និងមជ្ឈិមបូព៌ាកំពុងផ្ទុះសង្គ្រាម តែ IMF ព្យាករណ៍ថា សេដ្ឋកិច្ចពិភពលោកនៅតែមានកំណើនក្នុងឆ្នាំនេះ appeared first on Kampuchea Thmey Daily.

មកស្គាល់ប្រទេសជំពាក់បំណុលសាធារណៈច្រើនជាងគេលើលោកក្នុងឆ្នាំ ២០២៤ នេះ

Sok Chivon — Tue, 06 Feb 2024 02:45:00 +0000

វិបត្តិបំណុលសកល គឺជារឿងដ៏ស្មុគស្មាញមួយសម្រាប់អ្នកធ្វើគោលនយោបាយ ជាពិសេសគឺការទប់និរន្តរភាពបំណុល ខណៈយោងតាមមូលនិធិរូបិយវត្ថុអន្តរជាតិ (IMF) បានឲ្យដឹងថា បំណុលសាធារណៈប្រៀបធៀបជាមួយចំណូលជាតិវាស់វែងដោយផលិតផលក្នុងស្រុកសរុប (GDP) ដែលពិភពលោកជំពាក់កាលពីឆ្នាំ ២០២៣ កន្លងទៅមានប្រមាណ ៣០៥ ពាន់ពាន់លានដុល្លារ ពោលកើនឡើងជាង ៤៥ ពាន់ពាន់លានដុល្លារ បើធៀបនឹងសម័យកាលមុនផ្ទុះវិបត្តិកូវីដ ១៩ ។

ខាងក្រោមនេះគឺជាបញ្ជីរាយនាមបណ្ដាប្រទេសដែលជំពាក់បំណុលសាធារណៈលើអត្រា GDP ច្រើនជាងគេបំផុតនៅលើពិភពលោកក្នុងឆ្នាំ ២០២៤ និងចុះផ្សាយដោយសារព័ត៌មាន Insider Monkey ជាគេហទំព័រវិនិយោគតាមដានសកម្មភាពក្រុមហ៊ុនសាជីវកម្ម និងមូលនិធិការពារហានិភ័យ៖

១. ជប៉ុន ជាប្រទេសខ្លាសេដ្ឋកិច្ចធំជាងគេមួយនៅលើពិភពលោកដែលមានផលិតផលក្នុងស្រុកសរុប (GDP) ៦.៧១ ពាន់ពាន់លានដុល្លារ ហើយប្រទេសនេះក៏មានទំហំបំណុលសាធារណៈ ប្រៀបធៀបជាមួយចំណូលជាតិវាស់វែងដោយ GDP សរុបច្រើនជាងគេបំផុតផងដែរ ពោលមានប្រមាណ ២៥១.៩ ភាគរយនៅឆ្នាំ ២០២៤ នេះ ។

២. ស៊ូដង់ គឺជាប្រទេសមាន GDP ចំនួន ១១៧.០៩ ពាន់លានដុល្លារ និងមានកញ្ចប់បំណុលលើអត្រា GDP ប្រមាណ ២៣៨.៨ ភាគរយនៃចំណូលជាតិ ។

៣. សិង្ហបុរី ដែលជាប្រទេសខ្លាសេដ្ឋកិច្ចនៅអាស៊ានមាន GDP សរុប ៧៨៦.៨៧ ពាន់លានដុល្លារ និងមានបំណុលលើអត្រា GDP ចំនួន ១៦៨.៣ ភាគរយនៃចំណូលជាតិនៅឆ្នាំ ២០២៤ នេះ ។

៤. ក្រិក ជាប្រទេសអឺរ៉ុបកំពូលគេដែលជាប់បំណុលលើអត្រា GDP ប្រមាណ ១៦០.២ ភាគរយ បើទោះបីជាមាន GDP សរុប ៤៣៤.៨៣ ពាន់លានដុល្លារក៏ដោយ ។

៥. អ៊ីតាលី ជាប្រទេសនាគសេដ្ឋកិច្ចដ៏ខ្លាំងក្លាមួយរបស់អឺរ៉ុបដែលមាន GDP ចំនួន ៣.២៩ ពាន់ពាន់លានដុល្លារ ហើយជាប់បំណុលសាធារណៈលើអត្រា GDP ចំនួន ១៤៣.២ ភាគរយ ។

៦. សហរដ្ឋអាមេរិក ដែលជាប្រទេសមហាអំណាចសេដ្ឋកិច្ច ក៏មានបំណុលច្រើនផងដែរ ។ សេដ្ឋកិច្ចអាមេរិកមាន GDP សរុបចំនួន ២៧.៩៧ ពាន់ពាន់លានដុល្លារ និងជាប់បំណុលលើអត្រា GDP ចំនួន ១២៦.៩ ភាគរយ ។

៧. ប៊ូតង់ មាន GDP ចំនួន ១១.៥៦ ពាន់ពាន់លានដុល្លារ និងកាន់បំណុលលើអត្រា GDP ប្រមាណ ១២២.៨ ភាគរយ ។

៨. បារ៉ែន ជាប្រទេសអ្នកមានជាងគេបំផុតមួយប្រចាំតំបន់មជ្ឈិមបូព៌ាមាន GDP ចំនួន ១១.៥៦ ពាន់លានដុល្លារ ប៉ុន្តែជាប់បំណុលលើអត្រា GDP ចំនួន ១១៩ ភាគរយ ។

៩. ឡាវ ជាប្រទេសអាស៊ានមាន GDP សរុប ៧៨.៩៣ ពាន់លានដុល្លារ និងមានបំណុលលើអត្រា GDP ចំនួន ១១៨.៧ ភាគរយ ។

១០. ម៉ាល់ឌីវ មាន GDP សរុប ១៥.៨៣ ដុល្លារ ហើយមានបំណុលលើអត្រា GDP ចនួន ១១១.៨ ភាគរយ ។

ចំណែកបារាំងស្ថិតនៅលេខរៀងទី ១១ មាន GDP សុរប ៤.០១ ពាន់ពាន់លានដុល្លារ និងជាប់បំណុលលើអត្រា GDP ចំនួន ១១០.៥ ភាគរយ ។ រីឯសេដ្ឋកិច្ចរបស់ប្រទេសអ៊ុយក្រែនស្ទើរតែហៅលែងឮទៅហើយ ដោយសាររដ្ឋាភិបាលទីក្រុងកៀវកំពុងជាប់ដៃធ្វើសឹកសង្គ្រាមជាមួយរុស្ស៊ី ហើយប្រទេសរបស់លោក Volodymy Zelensky ឈរនៅលំដាប់ទី ១៩ ជាប្រទេសជាប់បំណុលច្រើនជាងគេលើពិភពលោក ពោលមានបំណុលលើអត្រា GDP ចំនួន ៩៨.៦ ភាគរយ បើទោះបីជាមាន GDP សរុបប្រមាណ ៥០១.០៧ ពាន់លានដុល្លារក៏ដោយ ខណៈមហាអំណាចចិនស្ថិតនៅចំណាត់ថ្នាក់ទី ២៨ មាន GDP សរុប ៣៥.០៤ ពាន់ពាន់លានដុល្លារ និងមានបំណុលលើអត្រា GDP ចំនួន ៨៧.៤០ ភាគរយ ៕

ដោយ ៖ សុខ ជីវ័ន្ត

ចុចអាន ៖ លោក Zelensky ចុះផ្ទាល់ទៅសមរភូមិជួរមុខ ចំពេលលេចឮព័ត៌មាន បណ្ដេញមេទ័ពកំពូលរបស់ប្រទេស

The post មកស្គាល់ប្រទេសជំពាក់បំណុលសាធារណៈច្រើនជាងគេលើលោកក្នុងឆ្នាំ ២០២៤ នេះ appeared first on Kampuchea Thmey Daily.

មូលនិធិរូបិយវត្ថុអន្តរជាតិ IMF Archives - Kampuchea Thmey Daily

IMF៖ គោលនយោបាយពន្ធពាណិជ្ជកម្មដូចរបស់ ត្រាំ អាច​ប៉ះពាល់​កំណើនសេដ្ឋកិច្ចសកល

IMF៖ បំណុលសាធារណៈទូទាំង​សកល នឹង​កើន​លើស ១០០ ទ្រីលាន​ដុល្លារ ឆ្នាំ​នេះ​

IMF៖កំណើនសេដ្ឋកិច្ចកម្ពុជានឹងកើនឡើង៥,៥ ភាគរយនៅឆ្នាំនេះ

IMF ​រិះ​គន់​អាមេរិក​ពាក់​ព័ន្ធ​នឹង​​បំណុល​ជាតិ​ ឱនភាពលើ​វិស័យ​ផ្សេង​ៗ​ និង​របាំង​ពាណិជ្ជកម្ម​

IMF ឲ្យ អ៊ុយក្រែន ខ្ចីលុយរាប់ពាន់លានដុល្លារបន្ថែមទៀតក្នុងកិច្ចសន្យា ៤ ឆ្នាំ

ទោះអឺរ៉ុប និងមជ្ឈិមបូព៌ាកំពុងផ្ទុះសង្គ្រាម តែ IMF ព្យាករណ៍ថា សេដ្ឋកិច្ចពិភពលោកនៅតែមានកំណើនក្នុងឆ្នាំនេះ

មកស្គាល់ប្រទេសជំពាក់បំណុលសាធារណៈច្រើនជាងគេលើលោកក្នុងឆ្នាំ ២០២៤ នេះ

IMF៖ គោលនយោបាយពន្ធពាណិជ្ជកម្មដូចរបស់ ត្រាំ អាចប៉ះពាល់កំណើនសេដ្ឋកិច្ចសកល

IMF៖ បំណុលសាធារណៈទូទាំងសកល នឹងកើនលើស ១០០ ទ្រីលានដុល្លារ ឆ្នាំនេះ

IMF រិះគន់អាមេរិកពាក់ព័ន្ធនឹងបំណុលជាតិ ឱនភាពលើវិស័យផ្សេងៗ និងរបាំងពាណិជ្ជកម្ម