មេទ័ព Archives - Kampuchea Thmey Daily

មេទ័ពម៉ាឡេស៊ី កោតសរសើរកម្ពុជា ចំពោះការរីកចម្រើនយ៉ាងឆាប់រហ័សលើគ្រប់វិស័យ

Kang Tola — Tue, 22 Apr 2025 12:35:37 +0000

នាយឧត្ដមសេនីយ៍ Tan Sri Dato Wira Muhammad Hafizuddeain Bin Jantan មេបញ្ជាការកងទ័ពជើងគោកម៉ាឡេស៊ី នារសៀលថ្ងៃទី២២ ខែមេសា ឆ្នាំ២០២៥នេះ ត្រូវបានសម្ដេចមហាបវធិបតី ហ៊ុន ម៉ាណែត អនុញ្ញាតឱ្យចូលជួបសម្ដែងការគួរសម និងពិភាក្សាការងារ នៅវិមានសន្តិភាព។

ក្នុងឱកាសជំនួបនេះ លោកនាយឧត្តមសេនីយ៍មេបញ្ជាការបានកោតសរសើរកម្ពុជាចំពោះការរីកចម្រើនយ៉ាងឆាប់រហ័សលើគ្រប់វិស័យ។ លោកក៏បានបង្ហាញនូវសុទិដ្ឋិនិយមថា ក្រោមការដឹកនាំប្រកបដោយភាពឈ្លាសវៃ និងចក្ខុវិស័យវែងឆ្ងាយរបស់សម្តេចបវរធិបតី កម្ពុជានឹងបន្តអភិវឌ្ឍបន្ថែមទៀត ដែលក្នុងនោះវិស័យកងទ័ពក៏នឹងមានការអភិវឌ្ឍនិងរីកចម្រេីន ផងដែរ។

លោកមេបញ្ជាការបានគោរពរាយការណ៍ជូនសម្តេចបវរធិបតីអំពីលទ្ធផលប្រកបដោយផ្លែផ្កានៃជំនួបពិភាក្សាការងាររបស់លោក ជាមួយថ្នាក់ដឹកនាំកងទ័ពកម្ពុជា និងបានសម្តែងការពេញចិត្ត ចំពោះការរីកចម្រើននៃចំណងមិត្តភាពម៉ាឡេស៊ី-កម្ពុជា ជាពិសេសកិច្ចសហប្រតិបត្តិការ រវាងកងទ័ពនៃប្រទេសទាំងពីរ។ លោកបានប្តេជ្ញាពង្រឹង និងពង្រីកកិច្ចសហប្រតិបត្តិការនេះបន្ថែមទៀត តាមរយៈការផ្លាស់ប្តូរបទពិសោធន៍, ការហ្វឹកហាត់ និងការសិក្សារៀនសូត្រទៅវិញទៅមក រវាងកងទ័ពនៃប្រទេសទាំងពីរ។

លោកក៏បានគូសបញ្ជាក់ជូនថា កងទ័ពម៉ាឡេស៊ីមានបំណងចង់សិក្សារៀនសូត្រពីបទពិសោធន៍ជោគជ័យរបស់កម្ពុជា ចំពោះកងទ័ពរក្សាសន្តិភាពក្រោមឆ័ត្រអង្គការសហប្រជាជាតិ និងការបោសសម្អាតមីន។

ជាការឆ្លើយតប សម្តេចបវរធិបតីបានសម្តែងក្តីរីករាយ ចំពោះការរីកចម្រើន នៃកិច្ចសហប្រតិបត្តិការរវាងកងទ័ពប្រទេសទាំងពីរ និងជឿជាក់ថា លទ្ធផលនៃជំនួបពិភាក្សាការងាររវាងថ្នាក់ដឹកនាំកងទ័ព នឹងជំរុញកិច្ចសហប្រតិបត្តិការ បន្ថែមទៀត។

សម្តេចបវរធិបតីបានលើកទឹកចិត្តឱ្យកងទ័ពនៃប្រទេសទាំងពីរបន្តកិច្ចសហប្រតិបត្តិការ ទាំងក្នុងក្របខ័ណ្ឌទ្វេភាគី និងតំបន់ ជាពិសេសលើការបណ្តុះបណ្តាល, លំហាត់ស្តីពីការសង្គ្រោះគ្រោះមហន្តរាយ, ការប្រយុទ្ធប្រឆាំងភេរវកម្ម និងការចែករំលែកបទពិសោធន៍ជោគជ័យនានា ដើម្បីពង្រឹងចំណងមិត្តភាពឱ្យកាន់តែជិតស្និទ្ធថែមទៀត។

សម្តេចបវរធិបតីក៏បានគូសបញ្ជាក់ពីការកែទម្រង់សាលាហ្វឹកហ្វឺនកងទ័ពនៅកម្ពុជា ដើម្បីពង្រឹងសមត្ថភាពកងយោធពលខេមរភូមិន្ទ៕

The post មេទ័ពម៉ាឡេស៊ី កោតសរសើរកម្ពុជា ចំពោះការរីកចម្រើនយ៉ាងឆាប់រហ័សលើគ្រប់វិស័យ appeared first on Kampuchea Thmey Daily.

មេទ័ពរុស្ស៊ីម្នាក់ទៀត ដែលមានបទពិសោធន៍សង្គ្រាមជោកជាំ ត្រូវស្លាប់ក្នុងសមរភូមិ

Sok Sovann — Tue, 08 Mar 2022 00:48:22 +0000

យោងតាមក្រសួងការពារជាតិអ៊ុយក្រែនបានឲ្យដឹងថា មេទ័ពកំពូលម្នាក់ នៅក្នុងកងទ័ពរុស្ស៊ីត្រូវបានសម្លាប់ក្នុងអំឡុងពេលប្រយុទ្ធនៅជិតទីក្រុង Kharkov។

យោងតាមសេចក្តីថ្លែងការណ៍របស់ក្រសួងការពារជាតិអ៊ុយក្រែន, លោក Vitaly Gerasimov គឺជាឧត្តមសេនីយ៍ឯក ជាអគ្គសេនាធិការ និងជាមេបញ្ជាការរងទីមួយ នៃកងពលលេខ៤១ក្នុងស្រុកយោធាមជ្ឈិមនៃប្រទេសរុស្ស៊ី។

មន្ត្រីយោធាជាន់ខ្ពស់រុស្ស៊ីមួយចំនួនទៀត ក៏ត្រូវបានសម្លាប់ និងរងរបួសផងដែរក្នុងការប្រយុទ្ធគ្នានោះ។

គួរបញ្ជាក់ថា Gerasimov មានបទពិសោធន៍សង្គ្រាមយ៉ាងជោកជាំ ដោយបានចូលរួមប្រយុទ្ធក្នុងសង្រ្គាម Chechen លើកទីពីរ និងប្រតិបត្តិការយោធារុស្ស៊ីនៅក្នុងប្រទេសស៊ីរី។ លោកថែមទាំងបានទទួលមេដាយ សម្រាប់ការយកបានតំបន់គ្រីមៀផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ កងទ័ពអ៊ុយក្រែន វាយយកបានទីក្រុងមួយមកវិញ ហើយសម្លាប់មេបញ្ជាការជាន់ខ្ពស់រុស្ស៊ី ២នាក់

The post មេទ័ពរុស្ស៊ីម្នាក់ទៀត ដែលមានបទពិសោធន៍សង្គ្រាមជោកជាំ ត្រូវស្លាប់ក្នុងសមរភូមិ appeared first on Kampuchea Thmey Daily.

មេទ័ពរុស្ស៊ី ២នាក់ទៀត ត្រូវអ៊ុយក្រែន បាញ់សម្លាប់

Sok Sovann — Sun, 06 Mar 2022 02:51:09 +0000

មន្ត្រីលោកខាងលិចម្នាក់បានអះអាងថា មេទ័ពរុស្ស៊ីពីរនាក់ទៀត ត្រូវបានសម្លាប់នៅសមរភូមិជួរមុខក្នុងប្រទេសអ៊ុយក្រែន បន្ទាប់ពីមេទ័ពកំពូលម្នាក់ ត្រូវបានសម្លាប់ដោយអ្នកបាញ់ស៊ីប។

ឧត្តមសេនីយ៍ Andrey Sukhovetsky

លោកឧត្តមសេនីយ៍ Andrey Sukhovetsky អាយុ៤៧ឆ្នាំ ត្រូវបានសម្លាប់ដោយអ្នកបាញ់ស៊ីបអ៊ុយក្រែន ខណៈដែលអ្នកស្លាប់ចុងក្រោយបំផុត២នាក់ទៀត ក៏ជាមន្ត្រីជាន់ខ្ពស់ផងដែរ ថ្វីបើភ្លាមៗឈ្មោះរបស់ពួកគេ មិនទាន់ត្រូវបានបញ្ជាក់ក៏ដោយ។

សារព័ត៌មាន Telegraph បានរាយការណ៍ថា ម្នាក់ជាមេបញ្ជាការកងពល និងម្នាក់ទៀតជាមេបញ្ជាការកងវរសេនាធំ។

លោក Sukhovetsky (ឆ្វេង) និងសហការី

លោក Sukhovetsky ដែលជាមេបញ្ជាការរងនៃកងកម្លាំងប្រដាប់អាវុធ យោធាមជ្ឈិមរុស្ស៊ីលេខ៤១ បានទទួលមរណភាពកាលពីថ្ងៃពុធ ខណៈដែលកងកម្លាំងការពារជាតិអ៊ុយក្រែន វាយបកទប់ទល់ការវាយលុករបស់រុស្ស៊ី។

ការស្លាប់របស់គាត់ ត្រូវបានប្រកាសនៅលើប្រព័ន្ធផ្សព្វផ្សាយសង្គមដោយសហការីឈ្មោះ Sergey Chipilyov ហើយត្រូវបានរាយការណ៍យ៉ាងទូលំទូលាយដោយសារព័ត៌មានរុស្ស៊ី និងអ៊ុយក្រែន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ុយក្រែន ថា ទាហានរុស្ស៊ី កំពុងចាប់រំលោភស្រីៗ ក្នុងទីក្រុងដែលពួកគេកាន់កាប់

The post មេទ័ពរុស្ស៊ី ២នាក់ទៀត ត្រូវអ៊ុយក្រែន បាញ់សម្លាប់ appeared first on Kampuchea Thmey Daily.

មេទ័ពកម្ពុជា ប្រាប់អនុព័ន្ធយោធាមីយ៉ាន់ម៉ា អំពីជំហររបស់កម្ពុជា

Kang Tola — Wed, 24 Feb 2021 10:09:11 +0000

ការបញ្ជាក់ជំហររបស់កម្ពុជានេះ បានធ្វើឡើងខណៈនាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យឧត្តមសេនីយ៍ត្រី ទូរៈ ហ្លាមីន (THURA HLAMIN) អនុព័ន្ធយោធាថ្មី នៃសាធារណរដ្ឋសហភាពមីយ៉ាន់ម៉ា ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម នៅអគ្គបញ្ជាការដ្ឋាន កាលពីព្រឹកថ្ងៃទី២៤ ខែកុម្ភៈ នេះ។

នៅក្នុងជំនួបនោះ លោកឧត្តមសេនីយ៍ត្រី THURA HLA MIN បានសម្តែងនូវក្តីមោទនៈ ដែលបានមកបំពេញបេសកកម្មការទូតនៅកម្ពុជា ដោយក្នុងនោះលោកឧត្តមសេនីយ៍ បានថ្លែងអំណរគុណដល់កងយោធពលខេមរភូមិន្ទ ដែលបានជួយឧបត្ថម្ភដល់កម្មសិក្សាមីយ៉ាន់ម៉ា កំពុងសិក្សានៅសកលវិទ្យាល័យការពារជាតិ។ នៅក្នុងជំនួបនោះដែរ លោក THURA HLA MIN បានជម្រាបជូនអគ្គមេបញ្ជាការ ពីសភាពការណ៍មួយចំនួនដែលកំពុងកើតមាននៅសាធារណរដ្ឋមីយ៉ាន់ម៉ា ដោយបានបញ្ជាក់ថា ប្រទេសមីយ៉ាន់ម៉ានឹងរៀបចំការបោះឆ្នោតឡើងវិញ ដើម្បីឲ្យមានសេរីភាពត្រឹមត្រូវ និងធានាដល់គោលនយោបាយបរទេស។

ជាការឆ្លើយតប នាយឧត្ដមសេនីយ៍ វង្ស ពិសេន បានថ្លែងនូវការស្វាគមន៍ចំពោះអនុព័ន្ធយោធាថ្មីប្រទេសមីយ៉ាន់ម៉ា ហើយនាយឧត្ដមសេនីយ៍ បានគូសបញ្ជាក់ថា ប្រទេសមីយ៉ាន់ម៉ា និង កម្ពុជា ធ្លាប់មានទំនាក់ទំនងការទូតជាមួយគ្នាតាំងពីឆ្នាំ១៩៥៥ ដែលទំនាក់ទំនងនេះមានភាពល្អប្រសើរ ទាំងវិស័យនយោបាយ និងយោធា។

នាយឧត្ដមសេនីយ៍បញ្ជាក់ថា គោលនយោបាយដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ តែងគោរពលើអធិបតេយ្យភាពប្រទេសជាមិត្ត មិនជ្រៀតជ្រែកកិច្ចការផ្ទៃក្នុងផងគ្នា ពិសេសការគោរពចំពោះធម្មនុញ្ញអាស៊ាន។

នាយឧត្ដមសេនីយ៍ វង្ស ពិសេន បានមានជំនឿថា នៅពេលខាងមុខ សាធារណរដ្ឋមីយ៉ាន់ម៉ា និងរក្សាបាននូវស្ថេរភាពល្អឡើងវិញ ហើយអ្វីដែលកងទ័ពប្រទេសទាំងពីរត្រូវប្រកាន់ភ្ជាប់ទៅថ្ងៃខាងមុខ គឺការទំនាក់ទំនងល្អជាមួយគ្នា ទាំងការផ្លាស់ប្តូរព័ត៌មានកិច្ចសហប្រតិបត្តិការបង្ក្រាបបទល្មើសឆ្លងដែន ក៏ដូចជាកិច្ចសហការបណ្តុះបណ្តាលធនធានមនុស្ស និងការផ្លាស់ប្ដូរទស្សនកិច្ចនៅគ្រប់កំរិត៕

ដោយ ៖ កោះកែវ

The post មេទ័ពកម្ពុជា ប្រាប់អនុព័ន្ធយោធាមីយ៉ាន់ម៉ា អំពីជំហររបស់កម្ពុជា appeared first on Kampuchea Thmey Daily.

មេទ័ព Archives - Kampuchea Thmey Daily

មេទ័ព​ម៉ាឡេស៊ី កោតសរសើរ​កម្ពុជា​ ចំពោះការរីក​ចម្រើន​យ៉ាងឆាប់​រហ័ស​លើ​គ្រប់វិស័យ

មេទ័ពរុស្ស៊ីម្នាក់ទៀត ដែលមានបទពិសោធន៍សង្គ្រាមជោកជាំ ត្រូវស្លាប់ក្នុងសមរភូមិ

មេទ័ពរុស្ស៊ី ២នាក់ទៀត ត្រូវអ៊ុយក្រែន បាញ់សម្លាប់

មេទ័ព​កម្ពុជា ប្រាប់​អនុព័ន្ធយោធា​មី​យ៉ាន់​ម៉ា អំពី​ជំហរ​របស់​កម្ពុជា​

មេទ័ពម៉ាឡេស៊ី កោតសរសើរកម្ពុជា ចំពោះការរីកចម្រើនយ៉ាងឆាប់រហ័សលើគ្រប់វិស័យ

មេទ័ពកម្ពុជា ប្រាប់អនុព័ន្ធយោធាមីយ៉ាន់ម៉ា អំពីជំហររបស់កម្ពុជា