ពិធី​នេះ​ប្រព្រឹត្ត​ឡើង​ក្រោម​អធិបតីភាព លោក សេង សីលា អភិបាល​រង​ខេត្ត តំណាង​ដ៏​ខ្ពង់ខ្ពស់ លោក​អភិបាល នៃ​គណៈ​អភិបាល​ខេត្ត​ស្វាយរៀង ដោយ​មាន​ការ​អញ្ជើញ​ចូលរួម​ពី​សំណាក់​ព្រះសង្ឃ មន្ត្រីរាជការ​ជុំវិញ​ខេត្ត កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស យុវជន ស.ស.យ.ក និង​ប្រជាពលរដ្ឋ​យ៉ាង​ច្រើន​កុះករ។

ថ្លែង​ក្នុង​ឱកាស​នោះ លោក​អភិបាល​រង​ខេត្ត បាន​គូស​បញ្ជាក់​ថា ការ​រៀបចំ​យុទ្ធនាការ នា​ថ្ងៃនេះ ធ្វើឡើង​ក្នុង​គោលបំណង​បង្កើន​ការ​យល់ដឹង​ដល់​សាធារណជន ឲ្យ​កាន់តែ​យល់​ច្បាស់​អំពី​តម្លៃ នៃ​អនាម័យ បរិស្ថាន និង​សោភ័ណភាព​ទីក្រុង។

លោក​បាន​បន្ត​ថា ទីក្រុង​ស្អាត មិនមែន​ជា​ភារកិច្ច​របស់​បុគ្គល​ណា​ម្នាក់​នោះ​ទេ ប៉ុន្តែ​ទាមទារ​ឲ្យ​មាន​ការ​ចូលរួម​ដោយ​ស្មារតី «សាមគ្គី» និង​ការ​ទទួល​ខុសត្រូវ​ខ្ពស់​ពី​គ្រប់​មជ្ឈដ្ឋាន​ទាំងអស់ ដើម្បី​ធ្វើ​ឲ្យ​ក្រុង​ស្វាយរៀង ក្លាយ​ជា​ទីក្រុង​ដែល​គួរ​ឲ្យ​ចង់​រស់នៅ និង​មាន​ភាព​ទាក់ទាញ​សម្រាប់​ភ្ញៀវ​ទេសចរ។

យោង​តាម​សេចក្ដីណែនាំ​របស់​រដ្ឋបាល​ខេត្ត យុទ្ធនាការ​នេះ រួមមាន​សកម្មភាព​សំខាន់ៗ ដូចជា ៖ -ការ​អប់រំ​ផ្សព្វផ្សាយ ៖ បញ្ជ្រាប​ការ​យល់ដឹង​អំពី​ការ​ទុកដាក់​សំរាម​ឲ្យ​បាន​ត្រឹមត្រូវ និង​ការ​កាត់បន្ថយ​ការ​ប្រើប្រាស់​ប្លាស្ទិក។ -សកម្មភាព​អនាម័យ​ផ្ទាល់ ៖ ការ​ចុះ​ប្រមូល​សំរាម​តាម​ដង​ផ្លូវ សួន​ច្បារ​សាធារណៈ និង​តាម​បណ្ដា​ផ្សារ​នានា ក្នុង​ក្រុង​ស្វាយរៀង។ -ការ​លើក​សោភ័ណភាព ៖ ការ​រៀបចំ​ទង់ជាតិ ទង់​សាសនា ទង់​ព្រះមហាក្សត្រ និង​បដា​ពាក្យស្លោក​នៅ​តាម​មន្ទីរ អង្គភាព និង​សាលា​ក្រុង-ស្រុក។

បន្ទាប់ពី​កិច្ចប្រជុំ​ជួបជុំ លោក​អភិបាល​រង​ខេត្ត រួម​ជាមួយ​មន្ត្រីរាជការ និង​យុវជន បាន​ចុះ​ធ្វើ​យុទ្ធនាការ​សម្អាត​តាម​ដង​ផ្លូវ​សំខាន់ៗ ក្នុង​ក្រុង​ស្វាយរៀង ប្រកប​ដោយ​ភាព​ស្និទ្ធស្នាល និង​ស្មារតី​សាមគ្គីភាព​ខ្ពស់។ សកម្មភាព​នេះ មិន​ត្រឹម​តែ​ជា​ការ​អបអរសាទរ​ទិវា​ជាតិ​ទីក្រុង​ស្អាត​ប៉ុណ្ណោះ​ទេ ប៉ុន្តែ​ក៏​ជា​ការ​ដាស់តឿន​ស្មារតី​ឲ្យ​ប្រជាពលរដ្ឋ​គ្រប់រូប​បន្ត​ចូលរួម​ថែរក្សា​អនាម័យ​បរិស្ថាន​ជា​ប្រចាំ ដើម្បី​លើក​កម្ពស់​មុខមាត់​ខេត្ត​ស្វាយរៀង ឲ្យ​កាន់តែ​ស្រស់បំព្រង​បន្ថែម​ទៀត៕

អត្ថបទ ៖ ភក្ដី

The post រដ្ឋបាលខេត្តស្វាយរៀង រៀបចំយុទ្ធនាការសម្អាតក្រុង អបអរសាទរ ទិវាជាតិទីក្រុងស្អាត លើកទី ១៣ ក្រោមប្រធានបទ«សាមគ្គីដើម្បីទីក្រុងស្អាត» appeared first on Kampuchea Thmey Daily.

លោក ខ្វៃ អាទិត្យា បានមានប្រសាសន៍ថា ក្រសួងបរិស្ថានបានដាក់​ចេញយុទ្ធនាការ​កាត់បន្ថយ​ការប្រើប្រាស់​ប្លាស្ទិក ក្រោម​ប្រធានបទ «ថ្ងៃនេះ ខ្ញុំមិនប្រើ ថង់ប្លាស្ទិកទេ» កាលថ្ងៃទី០១ ខែកញ្ញា ឆ្នាំ២០២៣ កន្លងទៅ ហើយរហូតមកដល់ពេលនេះ មានអ្នកចូលរួម ៩,៧០៦,២៦៨ អង្គ/នាក់។ ​យុទ្ធនាការបានចាប់ផ្តើមពី​សាលារៀន ដែលជាថ្នាលបណ្តុះកោសិកា​សង្គម និងបានចូលរួមកាត់បន្ថយការប្រើប្រាស់ថង់ប្លាស្ទិកក្នុង ១ថ្ងៃ ប្រមាណជាង ៣០ លានថង់។

បន្ថែមពីនេះ ក្រសួងបរិស្ថានបានដាក់ចេញនូវយុទ្ធនាការទី ២ បន្ថែមទៀតគឺយុទ្ធនាការ «កម្ពុជាស្អាត ខ្មែរធ្វើបាន» នៅថ្ងៃទី១៥ ខែឧសភា ឆ្នាំ២០២៤ រហូតមកដល់ពេលនេះ មានអ្នកចូលរួមក្នុងយុទ្ធនាការចំនួន ៥,០៦០,៣៦៩អង្គ/នាក់។ យុទ្ធនាការ «កម្ពុជាស្អាត ខ្មែរធ្វើបាន» បាននាំឱ្យសិស្សានុសិស្ស លោកគ្រូអ្នកគ្រូ ព្រះសង្ឃ អាជ្ញាធរមូលដ្ឋានគ្រប់ថ្នាក់ រួមជាមួយប្រជាពលរដ្ឋ នៅតាមមូលដ្ឋានភូមិ ឃុំ នៅតាមស្រុក ក្រុង ស្រុក ខណ្ឌ នានាទូទាំងប្រទេស ចេញមកព្រមគ្នារើសសំរាមជុំវិញបរិវេណផ្ទះ សាលារៀន វត្តអារាម តាមទីសាធារណៈ និងនៅតាមដងផ្លូវក្នុងមូលដ្ឋាន រៀងរាល់ ១ថ្ងៃក្នុង ១សប្តាហ៍ យ៉ាងតិច ដោយធ្វើការប្រមូល និងទុកដាក់សំរាមឱ្យបានត្រឹមត្រូវ។

អ្នកនាំពាក្យ រូប​នេះ បានអះអាងថា «តាមរយៈយុទ្ធនាការទាំងពីររបស់ក្រសួងបរិស្ថានខាងលើ បានទទួលការគាំទ្រពីសាធារណជនសរុបជាង ១៤ លាននាក់ ក្នុងការប្តេជ្ញាចិត្ត និងចូលរួមសកម្មភាពកាត់បន្ថយការប្រើប្រាស់ប្លាស្ទិក រើសសំរាម ប្រមូលទុកដាក់សំរាម សំណល់ប្លាស្ទិក យ៉ាងផុសផុល ដែលជាជោគជ័យ លើស ពីការរំពឹងទុក ដែលធ្វើឱ្យប្រទេសកម្ពុជា​អាចកាត់​បន្ថយថង់ប្លាស្ទិក​បាន​យ៉ាងច្រើនសន្ធឹកសន្ធាប់ និងការទុកដាក់សំរាម តាមរយៈការចូលរួមសាមគ្គីគញនាពីសំណាក់ប្រជាពលរដ្ឋ​គ្រប់​ស្រទាប់ និង​សិស្សានុសិស្ស​ជា​ដើម»។

អ្នកនាំពាក្យក្រសួអបរិស្ថានរូបនេះ បានបន្ថែមថា បច្ចុប្បន្ននេះ នៅ​តែ​មាន​សាលារៀន វត្តអារាមនានា នៅតាមរោងចក្រ សហគ្រាស គ្រឹះស្ថានរដ្ឋនិងឯកជន នៅតាមមូលដ្ឋាន បានកំពុងចូល​រួមនៅក្នុង​យុទ្ធនាការនេះ​ជាបន្តបន្ទាប់​​ជា​រៀងរាល់ថ្ងៃ។

លើស​ពីនេះទៀយ តាមរយៈការដាក់ចេញយុទ្ធនការជាជំហានៗរបស់ក្រសួអបរិស្ថាន ដែលឆ្លើយតប​នឹងសរសរ​ស្តម្ភ «ភាពស្អាត» នៃ​យុទ្ធសាស្រ្តចក្រាវិស័យបរិស្ថាន ក្នុង​គោលបំណងដើម្បីឱ្យកម្ពុជា មានភាពស្អាត មិនមានសំរាម និងសំណល់ប្លាស្ទិក រាយប៉ាយ ប្រយុទ្ធទប់ស្កាត់សំរាមនៅលើដងផ្លូវ កាត់បន្ថយការប្រើប្រាស់ថង់ប្លាស្ទិក និងការបំពុលដោយសំរាម និង​សំណល់ប្លាស្ទិក​ទៅលើសុខភាព និង​លើកកម្ពស់សោភ័ណភាពទីក្រុង ទីប្រជុំជន ព្រមទាំងក្នុងមូលដ្ឋាន ជុំវិញផ្ទះ កន្លែង​ធ្វើការ គ្រឹះស្ថាន​សាធារណៈនិងឯកជន ជាពិសេសនៅតាមដងផ្លូវនានា ដែលនឹងបន្តក្លាយទៅជាវប្បធម៌ និងទម្លាប់ល្អ របស់ប្រជាជនកម្ពុជាក្នុងការរក្សាភាពស្អាត៕

​​​

The post សាធារណជនជាង ១៤ លាននាក់ ចូលរួម​យុទ្ធនាការ​ប្រយុទ្ធសំរាម សំណល់ប្លាស្ទិក​តាមមូលដ្ឋាន appeared first on Kampuchea Thmey Daily.

លោក​ អ៊ាង សុផល្លែត បាន​បង្ហាញសុទិដ្ឋិនិយម​បែប​នេះ ក្រោយ​​ពេល​ដែល​ចលនាមហាជន​កាន់តែ​ច្រើន​ឡើង​បាន​ចូលរួម​គាំទ្រ​ដល់​គម្រោង​សាកល្បង​របស់​ក្រសួងបរិស្ថាន​ដើម្បី​​សំអាត​ផ្លូវជាតិ​ជា​ប្រចាំឆ្ពោះទៅកម្ពុជាសមានភាពស្អាត គ្មាន​សំរាម និង​សំណល់​ប្លាស្ទិករាយប៉ាយ។

គម្រោង​សាកល្បង​ដើម្បី​ផ្លូវ​ជាតិ​ស្អាត គ្មាន​សំរាម​រាយប៉ាយ កំពុង​ទទួល​បាន​ជោគជ័យ ដោយ​សារ​មហាជន​បាន​និង​​កំពុង​ចូលរួម​ចេញ​រើស​សំរាម និង​សំអាត​តាម​ផ្លូវជាតិ យ៉ាង​ផុលផុស​នាពេល​កន្លង​មក។

ជាក់ស្ដែង កាល​ពី​ថ្ងៃ​ទី២២ ខែ​ធ្នូ កន្លង​ទៅ​នេះ​ មន្រ្តី​ជំនាញ​ក្រសួងបរិស្ថាន បានចុះត្រួតពិនិត្យ និង​វាយ​តម្លៃ​លើភាពស្អាត នៅតាមផ្លូវជាតិលេខ៣ លេខ៤ លេខ៤១ និង៥១ ហើយបានបញ្ជាក់​ថា ផ្លូវជាតិទាំងនោះ​មាន​​សម្រស់​ស្រស់​ស្អាត​ជាបណ្តើរៗ បន្ទាប់​ពីមានការចូលរួម​សំអាត​ពីប្រជាពលរដ្ឋ អាជ្ញាធរមូលដ្ឋាន សិស្សានុសិស្ស កម្មករ កម្មការិនី យុវជន តំណាង​អង្គការសង្គមស៊ីវិល វិស័យឯកជន និងប្រជាពលរដ្ឋនៅតាមមូលដ្ឋាន។

ក្នុង​នោះ​ ផ្លូវជាតិលេខ៣ ចាប់ពី​គល់​ស្ពាន​អាកាស​ចោមចៅ ដល់​គីឡូម៉ែត្រលេខ៥០ ស្ថិតក្នុង​ភូមិសាស្រ្ត​ស្រុក​សំរោង ស្រុក​ត្រាំកក់ នៃ​ខេត្តតាកែវ ស្រុក​​បសេដ្ឋ ខេត្តកំពង់ស្ពឺ និងផ្លូវឆ្ពោះទៅស្រុកឈូក ស្រុកទឹកឈូ និង​ក្រុងកំពត ខេត្ត​កំពត មាន​សោភ័ណភាព​ល្អ​ប្រសើរ មិន​មាន​​សំរាម​រាយប៉ាយ​តាមសងខាងផ្លូវ និងគ្មាន​គំនរ​សំរាមនោះ​​ទេ។

ដោយឡែក តាមការចុះពិនិត្យផ្លូវជាតិលេខ៤១ ចន្លោះពីគីឡូម៉ែត្រលេ៣ ទៅគីឡូម៉ែលេ៣២ មានគំនសំរាម ដោយអន្លើៗ បន្ទាប់មក ចន្លោះគីឡូម៉ែត្រលេខ២៥ ដល់លេខ៣២ ក្នុងភូមសាស្រ្តខេត្តកំពង់ស្ពឺ  និងចន្លោះពីគីឡូម៉ែត្រលេខ៣២ រហូតដល់ផ្លូវបំបែកផ្លូវជាតិលេខ៣ តាមដងផ្លូវមានសភាពល្អប្រសើរ មិនមានសំរាមរាយប៉ាយតាមផ្លូវទេ។

សូមបញ្ជាក់ថា គម្រោងសាកល្បងរៀបចំឱ្យផ្លូវជាតិស្អាត គ្មានសំរាម និងសំណល់ប្លាស្ទិក រាយប៉ាយ បាន​ចាប់​ផ្តើម​អនុវត្ត​តាំងពី​​ពាក់កណ្តាល​ខែវិច្ឆិកា ឆ្នាំ២០២៤ មកម្ល៉េះ ដោយ​មានការចូលរួមពីមហាជនគ្រប់ទិសទី ទូទាំងប្រទែស ជាពិសេសប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ អាជ្ញាធរដែនដី សិស្សានុសិស្ស សម្អាតមូលដ្ឋាន លំនៅដ្ឋាន ទីប្រជុំជន និងតាមដងផ្លូវជាតិ៕

​

The post រដ្ឋមន្រ្តីបរិស្ថាន បង្ហាញសុទិដ្ឋិនិយមថា ការដាក់ចេញយុទ្ធនាការសំអាតផ្លូវជាតិ នឹងទទួលបានជោគជ័យនៅទូទាំងប្រទេស appeared first on Kampuchea Thmey Daily.

រដ្ឋមន្ត្រីក្រសួងមុខងារសាធារណៈ ឯកឧត្តម ហ៊ុន ម៉ានី និងជាប្រធានក្រុមប្រឹក្សាភិបាលគម្រោងស្អាត ថ្លែងកោតសរសើរ និងវាយតម្លៃខ្ពស់ចំពោះក្រុមការងារ និងយុជនសុឆន្ទៈនៃគម្រោងស្អាត​ទាំងអស់ ដែលបានខិតខំប្រឹងប្រែងរៀបចំ និងបន្តឱ្យមាននូវយុទ្ធនាការភ្នំពេញស្អាត នៅឆ្នាំនេះ ខណៈយុទ្ធនាការនេះ បានចាប់ផ្ដើមតាំងពីឆ្នាំ២០១៧ ហើយសម្រេចបានលទ្ធផលជាទីមោទន។ ឯកឧត្តម បានបញ្ជាក់ថា យុទ្ធនាការភ្នំពេញស្អាត បាននឹងកំពុងរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ជាពិសេសជាមួយអាជ្ញាធរមូលដ្ឋាន នៃរដ្ឋបាលរាជធានីភ្នំពេញ ក៏ដូចជាក្រសួងស្ថាប័នពាក់ព័ន្ធក្នុងការចូលរួមដោះស្រាយបញ្ហាសំរាម។

បើតាមឯកឧត្តម ហ៊ុន ម៉ានី យុទ្ធនាការភ្នំពេញស្អាត គឺជាផ្នែកមួយរបស់គម្រោងស្អាត ដែលត្រូវបង្កើតឡើងក្នុងគោល បំណងប្រមូលផ្ដុំតួអង្គពាក់ព័ន្ធបង្កើតឱ្យមានសំឡេងតែមួយ សំដៅអនុវត្តតាមចក្ខុវិស័យរួមគ្នាមួយ គឺការចូលរួមចំណែកលើកកម្ពស់មេត្រីបរិស្ថាន សិក្សាអំពីបញ្ហាប្រឈម ហើយខិតខំស្វែងរកដំណោះស្រាយរួមស្ដីពីការទុកដាក់សំរាមឱ្យបានត្រឹមត្រូវ ក៏ដូចជាការបំផុតស្មារតីរួមចំណែកជាមួយរាជរដ្ឋាភិបាលក្នុងការថែរក្សា និងលើកកម្ពស់បរិស្ថាន សោភ័ណ្ឌភាពកម្ពុជាឱ្យកាន់តែប្រសើរឡើង។ ក្នុងន័យនេះ ឯកឧត្តម សង្កត់ធ្ងន់ថា គោលដៅចម្បងមួយនៃគម្រោងនេះ គឺកិច្ចសហការជាមួយក្រសួងស្ថាប័នរដ្ឋ ឯកជន ដៃគូសហការពាក់ព័ន្ធ ដើម្បីផ្សព្វផ្សាយអំពីសារសំខាន់នៃភាពស្អាត វិធីសាស្ត្រក្នុងការទុកដាក់សំរាមឱ្យបានត្រឹមត្រូវ ក្នុងគោលដៅជំរុញកិច្ចការពារបរិស្ថានល្អ អនាម័យស្អាត សោភ័ណ្ឌភាពស្រស់បំព្រង និងផាសុខភាព ដែលជាភាពស៊ីវិល័យរបស់សង្គមសម័យទំនើប។

សម្រាប់យុទ្ធនាការភ្នំពេញស្អាត ឆ្នាំ២០២៣នេះ ត្រូវបានឯកឧត្តមរដ្ឋមន្ត្រី ហ៊ុន ម៉ានី ថ្លែងឱ្យដឹងថា អនុវត្តក្រោមពាក្យស្លោក សីលធម៌យើងប្រពៃខ្មែរយើងថ្លាថ្លៃ ដោយផ្ដោតលើគោលគំនិតសំខាន់ៗ៣ គឺចិត្តគំនិតស្អាត អាកប្បកិរិយាស្អាត និងប្រតិបត្តិការស្អាត រួមនិងផែនការសកម្មភាពចំនួន៤ គឺចិត្តខ្ញុំស្អាត ខ្មែរស្អាត ការងារខ្ញុំស្អាត ខ្មែរស្អាត ខ្ញុំទំពាំងស្អាត ខ្មែរស្អាត និងធុរកិច្ចយើងស្អាត ខ្មែរស្អាត។

តាមរយៈយុទ្ធនាការនេះ​ ឯកឧត្តមរដ្ឋមន្រ្តី ជឿជាក់យ៉ាងមុតមាំថា នឹងទទួលបានប្រជាប្រិយភាព និងជះឥទ្ធិពលវិជ្ជមាន ដើម្បីបង្កើតភាពជាគម្រូដល់យុវជនជំនាន់ក្រោយ និងផ្នត់គំនិតចូលរួមជាដំណោះស្រាយលើបញ្ហាប្រឈម ដែលសង្គមជាតិទាំងមូលកំពុងជួបប្រទះ។ បន្ថែមពីនេះ ឯកឧត្តម ក៏ជឿជាក់ថា បទពិសោធ និងដំណើរវិវឌ្ឍទៅមុខកន្លងមករបស់គម្រោងស្អាត នឹងអាចក្លាយជាមូលដ្ឋាន និងជាធាតុចូលបន្ថែមទៀតដល់ក្រុមការងារ ក៏ដូចជាក្រុមយុវជនសុឆន្ទៈស្អាតទាំងអស់ ក្នុងការបន្តបេសកកម្មសម្រាប់ឆ្នាំនេះ និងឆ្នាំបន្តបន្ទាប់។

បើតាមរបាយការណ៍របស់លោក ហៃ ភិរម្យ សហស្ថាបនិកនៃគម្រោងស្អាត យុទ្ធនាការភ្នំពេញស្អាតនេះ បានវិវត្តពីការ ផ្តោតលើការបញ្ជ្រាបសារអប់រំលើឥរិយាបថក្នុងការគ្រប់គ្រងសំរាម ការលើកទឹកចិត្តឱ្យកាត់បន្ថយការប្រើប្រាស់របស់របរដែលបង្កើតជាសំរាម និងការកែច្នៃសំរាមទៅជាសម្ភារៈដែលអាចប្រើប្រាស់បានម្ដងទៀត។ លោក ហៃ ភិរម្យ ថា នៅក្នុងឆ្នាំ២០២៣នេះ គម្រោងស្អាត នឹងផ្តោតបន្ថែមទៅលើការបញ្ជ្រាបសារអប់រំ ដើម្បីលើកតម្កើនវប្បធម៌ និងសីលធម៌សង្គម ដោយប្រតិបត្តិស្របនឹងយន្តការដែលរាជរដ្ឋាភិបាលកំពុងអនុវត្ត។ ក្នុងនោះ យុទ្ធនាការភ្នំពេញស្អាត ឆ្នាំ២០២៣ ផ្តោតសំខាន់ទៅលើគោលគំនិងសំខាន់ចំនួន៣ គឺចិត្តស្អាត អាកប្បកិរិយាស្អាត ប្រតិបត្តិស្អាត៕

The post ឯកឧត្តម ហ៊ុន ម៉ានី៖ យុទ្ធនាការភ្នំពេញស្អាត នឹងជះឥទ្ធិពលវិជ្ជមាននូវការប្ដូរឥរិយាបថពលរដ្ឋលើកិច្ចការពារបរិស្ថាន appeared first on Kampuchea Thmey Daily.