តាមការរៀបរាប់ពីយុវជន ណេត សក្កដា ដែលជាម្ចាស់ហាងលក់សម្លៀកបំពាក់ NT SAKDA នៅក្នុងភូមិត្រពាំងត្រយឹង ឃុំចំបក់ ស្រុកបាទី ខេត្តតាកែវ បានឲ្យដឹងថា មុនឈានដល់ជោគជ័យក្នុងមុខរបរនេះ ក្នុងវ័យទើបតែ១៦ឆ្នាំដំបូងឡើយខ្លួនមានលុយត្រឹម១០ម៉ឺនរៀលប៉ុណ្ណោះដែលសល់ពីការសន្សំពេលម្ដាយឲ្យទៅរៀន តែដោយមានចំណង់ចំណូចចិត្តក្នុងរបរលក់ដូរ ខ្លួនក៏បានខ្ចីលុយពីម្ដាយចំនួន១០០ដុល្លារដើម្បីទិញសម្លៀកបំពាក់បន្តពីហាងលក់ដូរមួយនៅក្រុងសៀមរាបយកមកលក់បន្តតាមប្រព័ន្ធOnline ដែលពេលនោះ ខ្លួនលក់ដូរនៅតែក្នុងផ្ទះមិនទាន់មានហាងត្រឹមត្រូវនោះទេ។

ដោយមានការគាំទ្រច្រើនពីអតិថិជនជាយុវវ័យដូចគ្នាពីមួយថ្ងៃទៅមួយថ្ងៃ យុវជន ណេត សក្កដា ក៏សម្រេងបើកហាងតូចមួយជាមួយរោងលក់ដូរចាប់ហ៊ួយរបស់ម្ដាយ ធ្វើឲ្យអតិថិជនជាយុវវ័យចាប់ផ្ដើមមកទិញសម្លៀកបំពាក់ដល់ហាងផ្ទាល់កាន់តែច្រើន និងអ្នកនៅតាមបណ្ដាខេត្តនៅតែបន្តទំនាក់ទំនងទិញតាមOnline មិនចេះដាច់។ មកដល់បច្ចុប្បន្ន ម្ចាស់ហាងលក់សម្លៀកបំពាក់វ័យក្មេងដែលមនុស្សភាគច្រើនមិនអាចធ្វើបាននោះ បានបង្រីកហាងកាន់ធំទ្វេគុណនឹងបីដងនៃហាងចាស់ ខណៈអតិថិជនកាន់តែស្គាល់ច្រើនមកដល់ទីតាំងផ្ទាល់។

បើតាមយុវជន ណេត សក្កដា មកដល់សព្វថ្ងៃនេះ ក្នុងមួយថ្ងៃខ្លួនអាចលក់បានចន្លោះពីជាង១០០ដុល្លារ ទៅជាង២០០ដុល្លារ ទាំងOnline និងលក់នៅហាងផ្ទាល់ តែបើនៅថ្ងៃកម្មររោងចក្របើកលុយ ឬថ្ងៃមានបុណ្យទាន ខ្លួនអាចលក់បានចន្លោះពីជាង៣០០ដុល្លារ ដល់ក្បែរ៥០០ដុល្លារក្នុងមួយថ្ងៃ។ ក្នុងការលក់ដូរ ម្ចាស់ហាងរូបនេះបញ្ជាក់ថា ខ្លួនផ្ដោតតែលើសម្លៀកបំពាក់បែបយុវវ័យប៉ុណ្ណោះ ក្នុងនោះមានដូចជា ខោអាវ ស្បែកជើង មួក ខ្សែក្រវ៉ាត់ ស្រោមទូរស័ព្ទ បន្តោងសោ និងរបស់មួយចំនួនទៀត។ ម្ចាស់ហាងក៏មានគម្រោងបង្រីកសាខាបន្ថែមទៀតដែរ តែកំពុងរង់ចាំមើលឱកាសសិន។

លោក ង៉ែត ប៉ុន្នី និងអ្នកស្រី ថុន រ៉ា ដែលជាឪពុកម្ដាយរបស់យុវជន ណេត សក្កដា បានលើកឡើងថា ពួកគាត់មានអារម្មណ៍សប្បាយចិត្តនៅពេលឃើញប្រុសចេះមានគំនិតរកស៊ីរហូតជោគជ័យបែបនេះ ហើយក៏គិតថា ខ្លួនមានសំណាងដែលមានកូនដើរកន្លងធម៌ចេះស្ដាប់បង្គាប់មិនធ្វើឲ្យពួកគាត់ពិបាកចិត្តដូចក្មេងមួយចំនួន។ អ្នកទាំងពីរក៏ចង់ឲ្យកូនពង្រីកសាខាបន្ថែមទៀតដែរ តែបើពង្រីកក៏ត្រូវចំណាយច្រើន ទាំងការជួលកន្លែង ជួលកម្មករលក់ដូរ ហើយអ្វីដែលសំខាន់គឺពិបាកទុកចិត្តលើអ្នកគ្រប់គ្រងមើលការខុសត្រូវហាង៕

អត្ថបទ៖ សុខុម

The post វ័យទើប២០ឆ្នាំ យុវជន ណេត សក្កដា ជោគជ័យលើមុខរបរលក់សម្លៀកបំពាក់បែបយុវវ័យ appeared first on Kampuchea Thmey Daily.

យុវជន អេល ស្លាម៉ាត់ អាយុ២៣ឆ្នាំ ជានិស្សិតឆ្នាំទី២ ជំនាញកសិកម្ម នៃសាកលវិទ្យាភូមិន្ទកសិកម្មចំការដូង បានប្រាប់ កម្ពុជាថ្មី ថា គាត់ចាប់ផ្ដើមចិញ្ចឹមឃ្មុំបែបធម្មជាតិ នៅស្រុកកំណើតរបស់គាត់ ស្របពេលដែលគាត់ទើបចូលរៀនឆ្នាំទី២ ប៉ុណ្ណោះ។ អ្វីដែលជំរុញទឹកចិត្តឱ្យ ស្លាម៉ាត់ ជ្រើសរើសមុខរបរចិញ្ចឹមឃ្មុំ ក៏ដោយសារតែគាត់មាន​ជំនាញកសិកម្មស្រាប់ និងមានបទពិសោធន៍ខ្លះ ទាក់ទងនឹងការចិញ្ចឹមឃ្មុំនៅក្នុងសហគមន៍របស់គាត់ ផងដែរ។

ស្លាម៉ាត់ បានប្រាប់ឱ្យដឹងទៀតថា ទោះបីការចិញ្ចឹមឃ្មុំ ក្នុងកសិដ្ឋានរបស់គាត់មិនទាន់មានស្ដង់ដា និងទំហំធំ ដូចជា កសិដ្ឋានផ្សេងទៀត ប៉ុន្តែ ស្លាម៉ាត់ នៅតែបន្តធ្វើវា ខណៈដែលចំណូលបានមកពីការចិញ្ចឹមឃ្មុំ បានត្រឹមតែ ៣០០ដុល្លារ ក៏គាត់សប្បាយចិត្តនឹងខិតខំធ្វើវាបន្តទៀត។

យុវជនរូបនេះ បន្តថា បច្ចុប្បន្នកសិដ្ឋានរបស់លោក មានធុងសម្រាប់ជាផ្ទះ និងជាជម្រកសត្វឃ្មុំ ត្រឹមតែ ១០ធុង ដោយក្នុង ១ធុង គាត់បានទិញពីគេមកមានតម្លៃ ១១០ដុល្លារ។

អ្វីដែលគួរឱ្យសរសើរនោះ កសិដ្ឋានខ្នាតតូចរបស់ ស្លាម៉ាត់ អាចផលិតផលទឹកឃ្មុំបែបធម្មជាតិបានចន្លោះពី ៥០លីត្រ ទៅ ៦០លីត្រ ក្នុងមួយខែ សម្រាប់លក់ចេញទៅកាន់ទីផ្សារ។

ទាក់ទងនឹងការចិញ្ចឹមឃ្មុំវិញ ស្លាម៉ាត់ បានបញ្ជាក់ដែរថា វាមានការលំបាកបន្តិចបន្ដួច ស្របពេលអាកាសធាតុប្រែប្រួលកម្ដៅខ្លាំង ជាក់ស្ដែងនៅពេលដែលមេឃ្មុំចេញក្រេបលម្អងផ្កា ក៏ត្រូវនឹងកម្ដៅខ្លាំង ម្យ៉ាងទៀតពេលស្វែងរកចំណី មេឃ្មុំ ក៏ត្រូវជួបប្រទះចំការដំណាំខ្លះ ត្រូវបាញ់ថ្នាំ ដំណាំផ្សេងៗ ដែលធ្វើឱ្យមេឃ្មុំ ត្រូវងាប់អស់ប្រមាណជាង ៧០% នាំឱ្យការផលិតទឹកឃ្មុំមានការថយចុះ គួរឱ្យកត់សម្គាល់ ផងដែរ។

សម្រាប់ពេលបច្ចុប្បន្ននេះ ទឹកឃ្មុំ របស់​ស្លាម៉ាត់ ទើបតែអាចលក់ចេញទៅកាន់ទីផ្សារក្នុងស្រុក ក្នុងនោះមានដូចជា៖ ដូចជាហាងកាហ្វេ ភោគជនីយដ្ឋាន និងអ្នកបរិភោគតាមផ្ទះ ដែលតម្លៃលក់ចេញក្នុងទឹកឃ្មុំ១លីត្រ ស្មើនឹង ៨០០០០ រៀល។

គួរបញ្ជាក់ថា កសិដ្ឋានចិញ្ចឹមឃ្មុំបែបធម្មជាតិនេះ មានទីតាំងស្ថិតនៅ ភូមិថ្លុកក្រវ៉ាន់ ឃុំបុសខ្នរ ស្រុកចំការលើ ខេត្តកំពង់ចាម៕

អត្ថបទ ៖ សួស សិត

The post ធុងចិញ្ចឹមឃ្មុំ១០ យុវជនម្នាក់ អាចរកប្រាក់ចំណូលបាន ៣០០ដុល្លារ ក្នុងមួយខែ appeared first on Kampuchea Thmey Daily.

របាយការណ៍ដដែលបង្ហាញថា បច្ចុប្បន្នក្នុងថ្ងៃបុណ្យនៃសេចក្តីស្រឡាញ់ យុវវ័យមានការផ្លាស់ប្តូរផែនការច្រើន ​ប្តូរពីការទៅច្រៀងនៅខារ៉ាអូខេ ទៅកៀនស្វាយ កោះដាច់ ចូលផ្ទះសំណាក់ ឬ សណ្ឋាគារ មកដើរលេងនៅផ្សារទំនើប និងមើលកុនវិញ។ ចំពោះកន្លែងទីតាំងថ្មីទាំង២នេះ គឺមានលក្ខណៈបែបវិជ្ជមាន បង្ហាញពីក្តីស្រឡាញ់ និងបែបរ៉ូមែនទិចដែលមានលក្ខណៈស្រើបស្រាលផ្លូវភេទតិចជាង។​ ចំពោះការទិញអំណោយឲ្យគ្នាសម្រាប់យុវវ័យមានគូសង្សារ ក៏មានការធ្លាក់ចុះជាងពាក់​​កណ្តាលដែរ​​​​​​ គឺកាលពីឆ្នាំ២០០៩​ មាន​៧៦,៦%​ ​ទល់​នឹង​​ឆ្នាំ​២០២៤​ មាន ៤២,៥% ជាពិសេស ការ​ឲ្យ​ផ្កាតែម្តងមានការធ្លាក់ចុះជាងគេ។​ ​​យុវវ័យ​ដែល​មាន​គូ​ គឺប្តូរពីការទិញផ្កា មកទិញ​​​ជា​កាដូរ​​ថ្លៃៗ ដូចជាខោអាវ តុក្កតា និងគ្រឿអលង្ការ​ឲ្យ​មិត្ត​ស្រី និងមិត្តប្រុស​របស់​ពួក​គេទៅវិញ​។​ ​វា​មាន​ការ​ថយចុះគួរឱ្យកត់សម្គាល់ចំពោះ​យុវវ័យ​ដែល​​ធ្វើ​សកម្មភាព​រ៉ូមែនទិក​ ​ដូចជា​ ​​ញ៉ាំ​បាយ​ថ្ងៃ​ត្រង់​ ​​និង​ពេល​ល្ងាច​ ​​និង​ទៅ​ក្លិប​កម្សាន្ត​នានា​ ​នៅ​​ថ្ងៃនៃ​ក្តី​ស្រឡាញ់​​ ប្រៀបធៀប​ទៅនឹងការ​សិក្សា​ស្រាវជ្រាវ​លើក​មុនៗ។

ចំពោះចំណុចរសើបនៅក្នុងសង្គមនោះ ទំនាក់​ទំនង​ផ្លូវ​ភេទ​ក្នុង​ចំណោម​​យុវវ័យ​ ​ដែល​អាច​នឹង​រួម​ភេទ​នៅ​ថ្ងៃនៃ​​ក្តី​ស្រឡាញ់​ខាង​មុខ​នេះ ដើម្បីបង្ហាញពីក្តីស្រឡាញ់មានការធ្លាក់ចុះ​៥ដង ​បើ​​ប្រៀបធៀប​ជា​មួយ​​នឹង​ការ​​សិក្សា​កាលពី១៥ឆ្នាំមុន​​ ​គឺកាលពី២០០៩ ​(១២,៤​%)​ ​ទល់​នឹង​​ឆ្នាំ​២០២៤​ (២,២%)។ ប៉ុន្តែ របៀបដែលយុវជនមានបំណងបង្ខំមិត្តស្រីរបស់ពួកគេឱ្យរួមភេទជាមួយ ប្រសិនបើមិត្តស្រីមិនយល់ព្រម នៅតែមិនផ្លាស់ប្តូរចំនួនករណីទេតាំងពីឆ្នាំ២០០៩ ដល់ឆ្នាំ២០២៤។ យ៉ាងហោចណាស់ ២៤ ភាគរយនៃយុវជនមានបំណងរួមភេទ ដែលរំពឹងថា នឹងមានការរួមភេទនៅថ្ងៃបុណ្យនៃក្តីស្រឡាញ់ មានបំណងទិញកាដូថ្លៃៗ ដើម្បីដាក់សម្ពាធលើមិត្តស្រី ឬដៃគូរបស់ពួកគេ ហើយសមាមាត្រស្រដៀងគ្នានេះ គឺគ្រោងនឹងនាំដៃគូ​របស់ខ្លួនចេញពីទីក្រុង ដើម្បីគេងជាមួយ។​

ផ្ទុយ​ទៅ​វិញ មួយភាគបី(៣២.០%) នៃយុវជន​​បាន​បង្ហាញ​ថា ​ពួក​គេ​នឹងរួមភេទ តែ​មិន​រួម​ភេទ បើ​មិនមានការ​យល់​ព្រមពីដៃគូរបស់គាត់​ដោយ​បញ្ជាក់​ថា៖ «ទេ! ខ្ញុំ​នឹង​មិន​អើពើ​នឹង​ការ​រួម​ភេទ ហើយ​​គ្រាន់​តែដើរ​លេងជាមួយគ្នា ​ដើម្បី​សប្បាយ»។ របាយណ៍ការបញ្ជាក់ទៀតថា ភាគច្រើន យុវវ័យកង្វះចំណេះដឹងក្នុងការប្រើប្រាស់ស្រោមអនាម័យ មិនសូវមានចំណេះដឹងពីសិទ្ធិក្នុងការរួមភេទឡើយ។

សូមជម្រាបថា ការ​សិក្សា​ស្រាវជ្រាវ​របស់លោក តុង សុប្រាជ្ញ ត្រូវ​បាន​រៀបចំ ​ដើម្បី​​ធ្វើ​ការ​ពិនិត្យ​តាម​ដានបែប​បរិមាណ​វិស័យ​ ​ដើម្បី​ប្រៀប​ធៀប​លទ្ធផល​នៃ​ការ​ស្រាវជ្រាវ​ចំនួន៣ ​កាល​ពី​​១៥ឆ្នាំមុននៅឆ្នាំ២០០៩ និងពី១០ឆ្នាំ​មុននៅឆ្នាំ២០១៤ និងនៅ៥ឆ្នាំមុននៅឆ្នាំ២០១៩។​ គម្រោង​ស្រាវជ្រាវនេះ ​​គឺធ្វើការស្រាវជ្រាវទៅលើយុវវ័យដែលមានទ្រព្យសម្បតិ្តបង្គួរដែលមានអាយុពី ១៥ ទៅ២៤ឆ្នាំ រស់នៅរាជធានីភ្នំពេញ។​ ចំនួនយុវវ័យសរុបក្នុងការសិក្សាស្រាវជ្រាវ គឺ១ ៤៦៩នាក់ ក្នុងនោះប្រុសចំនួន៦៦៤ (៤៥,២%) និងស្រីចំនួន៨០៥ (៥៤,៨%)។ ពួកគេត្រូវបានបែងចែកចេញជា៤ផ្នែក គឺយុវជនដែលមានគូសង្សារ យុវជនដែលមិនមានគូសង្សារ យុវនារីដែលមានគូសង្សារ និងយុវនារីដែលមិនមានគូសង្សារ៕

The post របាយការណ៍៖ ឆ្នាំ២០២៤ យុវវ័យចាប់អារម្មណ៍ថ្ងៃ១៤ កុម្ភៈ តិចជាងជិតពាក់កណ្តាល បើធៀបនឹង១៥ឆ្នាំមុន appeared first on Kampuchea Thmey Daily.

យុទ្ធនាការនេះ ធ្វើឡើងថ្ងៃទី២៥ ខែសីហា ឆ្នាំ២០២៣ នៅខេត្តសៀមរាប។ លោកស្រី សាផន សុមោលីរស្មី នាយិការងប្រតិបត្តិការអង្គការរ៉ាក់ បានប្រាប់អ្នកកាសែតថា ការផ្សព្វផ្សាយពីសុខភាពផ្លូវភេទ សុខភាពបន្តពូជ និងសិទ្ធិនេះ គឺស្របតាមគោលនយោបាយរបស់រដ្ឋាភិបាល ក្នុងការធានាឱ្យបានយុវវ័យលើសពី ៣.៥លាននាក់ ទទួលបាន និងយល់ដឹងពីការផ្សព្វផ្សាយនេះ។

លោកស្រីបន្តថា ក្រុមយុវវ័យបានធ្វើការដោះស្រាយលើបញ្ហាជាច្រើន ដែលយុវវ័យកំពុងជួបប្រទះ។ ក្នុងនោះ រួមមាន បញ្ហារៀបការវ័យក្មេង អំពើហិង្សាផ្លូវភេទ និងយេនឌ័រ ការទទួលបានសេវា និងព័ត៌មានត្រឹមត្រូវស្តីពីសេវាពន្យារកំណើត ការរំលូតដោយសុវត្ថិភាព និងជំនឿ បទដ្ឋានសង្គមអវិជ្ជមានមួយចំនួនដែលជាឧបសគ្គរារាំងយុវវ័យមិនអាចឱ្យពួកគេទទួលបានចំណេះដឹងពេញលេញស្តីអំពីសុខភាពផ្លូវភេទ សុខភាពបន្តពូជ និងសិទ្ធិ។

ចំណែក កញ្ញា រឿន ស្រីណាត់ អនុប្រធានបណ្តាញយុវវ័យរ៉ាក់ដើម្បីសុខភាព នៃអង្គការរ៉ាក់ ចង់ឱ្យយុវជនចូលរួមឱ្យបានច្រើនព្រោះចំណេះដឹងពាក់ព័ន្ធសុខភាពផ្លូវភេទ សុខភាពបន្តពូជ និងសិទ្ធិ គឺមានសារៈសំខាន់ណាស់។ នៅពេលដែលយុវវ័យបានយល់ដឹងពីបញ្ហាសុខភាពផ្លូវភេទ សុខភាពបន្តពូជ កាន់តែច្រើន នោះនឹងអាចកាត់បន្ថយជំងឺកាមរោគកាន់តែច្រើន និងដឹងពីរបៀបនៃការការពារ និងវិធីព្យាបាលផ្សេងៗអំពីបញ្ហាទាក់ទងសុខភាពរបស់ពួកគេ។ អង្គការរ៉ាក់ បានប្តេជ្ញាអនុវត្តនូវសិទ្ធិផ្លូវភេទ និងចង់ឃើញ បណ្តាញយុវវ័យរ៉ាក់ដើម្បីសុខភាព អាចធ្វើការដើម្បីលើកកម្ពស់នូវការចូលរួម និងផ្តល់សិទ្ធិអំណាចទៅដល់យុវវ័យពាក់ព័ន្ធជាមួយសិទ្ធិសុខភាពផ្លូវភេទ សុខភាពបន្តពូជ នៅក្នុងប្រទេសតាមរយៈបណ្តាញយុវវ័យស្ម័គ្រចិត្តដែលជាសមាជិករបស់បណ្តាញយុវវ័យរ៉ាក់ដើម្បីសុខភាព៕

ដោយ៖ កុសល

The post អ្នកស្ម័គ្រចិត្តជាង១០០នាក់ ធ្វើយុទ្ធនាការជិះកង់ផ្សព្វផ្សាយពីសុខភាពបន្តពូជ សុខភាពផ្លូវភេទ និងសិទ្ធិរបស់យុវវ័យ appeared first on Kampuchea Thmey Daily.

តាមរយៈការផ្តល់សម្ភាសជាមួយក្រុមការងារ កម្ពុជាថ្មី យុវវ័យភាគច្រើន បានបញ្ជាក់ស្រដៀងគ្នា អំពីមូលហេតុដែលខ្លួននិយម​មក​​សម្រាក​លំហែកាយ និងអានសៀវភៅ នៅក្នុងបរិវេណ​សាកលវិទ្យាល័យ​​ចំណាស់​មួយនេះ ក៏ព្រោះតែ​មានទីធ្លា​ធំទូលាយ បរិយាកាសល្អ ស្ងប់ស្ងាត់ ស័ក្តិសមនឹងការអង្គុយអានសៀវភៅ និងជួបជុំធ្វើកិច្ចការ​ជាក្រុម​បំផុត។

កញ្ញា ចំរើន សាលីតា អតីតនិស្សិតនៃសាកលវិទ្យាល័យភូមិន្ទកសិកម្ម បានឱ្យដឹងថា កញ្ញាមិនមែនជានិស្សិតសាកលវិទ្យាល័យ​មួយនេះទេ ប៉ុន្តែនៅរៀងរាល់ចុងសប្តាហ៍ កញ្ញាចូលចិត្តចំណាយពេលវេលាអានសៀវភៅ និងអង្គុយលេង​នៅទីនេះ ជាមួយមិត្តភក្តិ ឬម្នាក់ឯង។

អតីតនិស្សិតរូបនេះ បញ្ជាក់ទៀតថា ជាទូទៅកញ្ញា​ចូលចិត្ត​ចំណាយ​ពេលចុងសប្តាហ៍​នៅ​ហាង​កាហ្វេ ព្រោះមិនក្តៅ ហើយអាចអង្គុយធ្វើកិច្ចការ ឬពិភាក្សាការងារបានយូរម៉ោង ប៉ុន្តែបរិយាកាសនៅហាងកាហ្វេ ពេលខ្លះ​មិនជា​ស្ងប់ស្ងាត់​ប៉ុន្មានទេ។ ហេតុនេះ កញ្ញាក៏ងាកមកប្តូរបរិយាកាស នៅទីធ្លាសាកលវិទ្យាល័យភូមិន្ទភ្នំពេញ​វិញ ព្រោះមានទីតាំងច្រើន ដែលអាចជ្រើស​អង្គុយ​តាមបែបចំណូលចិត្តបាន និងមានកាហ្វេនិស្សិត សម្រាប់អ្នកដែលនិយម​ផឹកកាហ្វេ​អានសៀវភៅ ដូចជាខ្លួនផងដែរ។

ជាមួយគ្នានេះ អ្នកនិពន្ធមួយក្រុម ដែលជាអ្នកចូលចិត្តចំណាយពេលនៅសាកលវិទ្យាល័យភូមិន្ទភ្នំពេញ បានឱ្យដឹងដែរ​ថា មកទីនេះ ធ្វើឱ្យខ្លួនមានអារម្មណ៍ថា បានជួបមនុស្សមួយក្រុមធំ ដែលមានចំណូលចិត្តដូចគ្នា ព្រោះយុវវ័យភាគច្រើន ដែលមកទីនេះ គឺអង្គុយអានសៀវភៅ ឬពិភាក្សាកិច្ចការសាលា ហើយក្រៅពីនេះ ក៏នៅធ្វើសកម្មភាពផ្សេងទៀត ដូចជាលេងកីឡា អង្គុយលំហែកាយជាដើម បន្ទាប់ពីហត់នឿយនឹងការសិក្សា។

ក្នុងនោះ កញ្ញា មិត្ត រស្មី យល់ឃើញថា ការបង្កើតទម្លាប់នៃការរៀនសូត្រជាក្រុមធំបែបនេះ ជាគំរូមួយដែលល្អសម្រាប់ យុវវ័យ ពិសេសសិស្សនិស្សិតតែម្តង។ កញ្ញា បន្តថា អ្វីដែលអំណោយផលសម្រាប់ការរៀនសូត្រនៅទីនោះ គឺបរិយាកាស ក៏ព្រោះតែបរិវេណសាកលវិទ្យាល័យហ៊ុំព័ទ្ធដោយធម្មជាតិ មានស្រះទឹក មានដើមឈើជាម្លប់ ផ្តល់ខ្យល់ត្រជាក់ ធ្វើឱ្យអារម្មណ៍កាន់តែធូរស្រាល និងមិនមានអារម្មណ៍ថានឿយហត់។

គួរបញ្ជាក់ថា សាកលវិទ្យាល័យភូមិន្ទភ្នំពេញ (RUPP) ត្រូវបានគេស្គាល់ថា ជាគ្រឹះស្ថានឧត្តមសិក្សាចំណាស់​ជាងគេ នៅកម្ពុជា ដែលកសាងឡើង​ក្នុងឆ្នាំ១៩៦០ ។ ក្នុងបរិវេណដីដ៏ធំ ដោយ​មាន​អាគារសិក្សា សាលកម្មវិធី បណ្ណាល័យ និងសំណង់សំខាន់ៗជាច្រើនទៀត បូករួមទាំងសួនច្បារ ក៏ដូចជា ស្រះទឹក​ប៉ុន្មាន​កន្លែងទៀត នៅក្នុងបរិវេណសាកលវិទ្យាល័យ​ផងដែរ។ នៅរៀងរាល់ចុងសប្តាហ៍ តំបន់សាកលវិទ្យាល័យភូមិន្ទភ្នំពេញ និង វិទ្យាស្ថានភាសាបារាំង បានក្លាយជាកន្លែងជួបជុំដ៏ធំ ពិសេស​សម្រាប់​សិស្សនិស្សិត និងយុវវ័យ មកពីគ្រប់ទិសទី៕

អត្ថបទ៖ សុធាវី

The post សាកលវិទ្យាល័យភូមិន្ទភ្នំពេញ ជាកន្លែងលំហែកាយអានសៀវភៅ របស់យុវវ័យ មកពីគ្រប់មជ្ឈដ្ឋាន appeared first on Kampuchea Thmey Daily.

បវរកញ្ញា សារី ស្រីពេជ្រ បាននិយាយទៅកាន់អ្នកគាំថា នាងមានតែអរគុណ Fan ចំពោះការគាំទ្រជួយលើកទឹកចិត្តនាងតាំងពីផ្ដើមកម្មវិធីប្រកួតដំបូង រហូតទទួលបានជោគជ័យ។ ដូច្នេះនាង ក៏បានជំរុញលើកទឹកចិត្តដល់អ្នកជំនាន់ក្រោយ ត្រូវតាំងចិត្តខ្ពស់បើស្រលាញ់ ហើយចង់ចូលប្រកួតក្នុងវិស័យមួយនេះ។

ងាកមកស្រីស្អាត សំអុល អែនណាអូមី Teen Star Cambodia 2022 For Wining 3 rd Runner Up In National Custom ក៏យល់ឃើញថា ការប្រកួតអន្ដរជាតិជាបទពិសោធន៍ធំ សម្រាប់ជីវិតនាងដែលទើបតែមានវ័យ ១៦ឆ្នាំនេះ។ កញ្ញា ក៏ជំរុញ និងលើកទឹកចិត្តឲ្យយុវវ័យជំនាន់ក្រោយ ជួយពង្រឹងសមត្ថភាពនិងការតាំងចិត្ដ ក៏ដូចជាស្មារតីឲ្យបានល្អ ក្នុងការប្រឡងបវរកញ្ញាលើកក្រោយៗ ទៀត។ បវរកញ្ញារូបនេះ បាននញ្ជាក់បន្ថែមដែរថា អ្វីដែលគូឲ្យយកចិត្តទុកដាក់នោះ គឺត្រូវរៀនសូត្រឲ្យបានខ្លាំង យកគំរូតាមរៀមច្បងដើម្បីឈានទៅសម្រេចគោលដៅ។

សូមបញ្ជាក់ថា ការចែករំលែកពីបទពិសោធន៍ផ្ទាល់ខ្លួន របស់ម្ចាស់ពានខាងលើនេះ ធ្វើឡើងតាមរយ:ការបង្ហាញខ្លួនក្នុងកម្មវិធី Fan Meeti ngs កាលថ្ងៃទី ១១ ខែសីហា ឆ្នាំ ២០២២ ដើម្បីជាការអបអរសាទរដល់បេក្ខភាពកម្ពុជា ដែលទទួលបានចំណាត់ថ្នាក់ល្អលើវេទិការអន្ដរជាតិ ទើបបង្កើតឲ្យមាន”Fan Meeting “នេះឡើង។

កម្មវិធីនេះ គឺជាការផ្តួចផ្តើមឡើងដោយ CIM or Cambodia International Models ដោយមានការចូលរួមអបអរយ៉ាងច្រើនកុះករ ពីអ្នកគាំទ្រនៅកម្ពុជាដោយក្តីរំភើបជាមួយម្ចាស់ជ័យលាភី ដែលបាននាំយក លទ្ធផលល្អជូនជាតិ។ ការជួបជុំនោះ គឺមានម្ចាស់ពានចំនួន ៥រូប ផ្សេងៗគ្នា។

លោក ម៉ែន និមលរតន៍ ដែលជាស្ថាបនិក បានដឹកនាំក្រុមម៉ូឌែលរបស់ខ្លួន ទៅប្រកួតលើឆាកអន្ដរជាតិជាបន្ដបន្ទាប់ទើបធ្វើឲ្យវិស័យ Models នៅកម្ពុជា កាន់តែរីកចម្រើនជាលំដាប់ រហូតពេលនេះក្រុមហ៊ុនដែលជាថ្នាលបណ្ដុះបណ្ដាលសិល្បៈមួយនេះ រៀបចំដើម្បីឲ្យអ្នកគាំទ្រជួបបវរកញ្ញាដែលគេគាំទ្រ តែម្ដង៕

អត្ថបទ៖ ចាន់រ៉ា

The post ម្ចាស់មកុដ Miss Petite Global 2022 ចែករំលែកបទពិសោធន៍ដល់យុវវ័យជំនាន់ក្រោយ ដែលចង់​សម្រេចក្ដីសុបិនធំ appeared first on Kampuchea Thmey Daily.

ប៉ុន្តែ ឆ្លងតាមរយៈការស្រាវជ្រាវ ក្នុងអត្ថបទ​ខាងក្រោម ​នឹង​បង្ហាញ​ថា​ការ​គិតបែបនោះគឺខុស​ទាំងស្រុង។ ដោយវាមានហេតុផលសំខាន់ៗទាំង១២ ដែលអ្នកគួរតែរីករាយ និងអបអរក្នុង​ជីវិត​នៅ​លីវ​របស់អ្នក។

១. សេរីភាព​ពេញលេញ បុរសនិង​ស្ត្រី​ដែល​នៅ​លីវ ត្រូវ​មាន​សិទ្ធ​សេរីភាព​រៀងៗខ្លួន។ អ្នក​នឹង​មាន​សេរីភាព​លេញលេញ ក្នុងការធ្វើអ្វីដែលអ្នកចង់ ដោយមិនចាំបាច់ ត្រូវខ្លាចថាដៃគូ​ម្ខាងៗ​នឹង​អន់ចិត្ត។ ម៉្យាង អ្នក​មិន​បាន​ក្លាយ​ជា មនុស្សយន្ត​របស់​អ្នកណា ដែល​គេ​ចង់​បញ្ជា​បាន​តាមចិត្ត ដោយសារ​ឥទ្ធិពល​នៃ​ក្ដី​ស្រឡាញ់។

២. អ្នក​នឹង​រឹងមាំ​ខ្លាំង អ្នកនឹងមានភាពជឿជាក់លើ​ខ្លួនឯង​កាន់​តែ​ច្រើន ពីព្រោះ មិនចាំបាច់​ពឹងផ្អែក​លើនរណាម្នាក់​ក្នុងការធ្វើអ្វីមួយ។ វា​នឹង​ផ្ដល់​ភាព​រឹងមាំ​បន្តិច​ម្តងៗ រហូត​ដល់​អ្នក​ក្លាយ​ជា​មនុស្ស​ឯករាជ្យ មិន​ចាំបាច់​វេទនាចិត្ត ចាំ​សុំ​ជំនួយ​ពី​អ្នក​ផ្សេង។  ជាពិសេស សម្រាប់​យុវវ័យ​នៅ​វ័យ ២០ឆ្នាំ អ្នក​ពុំទាន់​គួរ​គិត​ពី​រឿង​ស្នេហាឡើយ ពីព្រោះ ក្រៅពីស្ថិតក្នុងវ័យក្មេងពេក វា​នៅ​មាន​រឿង​សំខាន់ៗ​ជាច្រើន​ទៀត​ដែល​អ្នក​ត្រូវ​រៀន​សូត្រ។

៣. មើល​ឃើញ​តម្លៃ​របស់​ខ្លួន​ច្រើន​ជាង​មុន ជាការពិតណាស់ អ្នកគួរតែ​ផ្តល់​អាទិភាព​ចម្បង​សម្រាប់​ខ្លួនឯង​មុន​នរណាៗ​ទាំងអស់ ហើយ​នេះ​មិនមែន​ជា​រឿង ដែល​អាត្មានិយម​ទេ។ អ្នក​ជា​ស្ថាបនិក​ដែល​​កាច់​ចង្កូត​នាំផ្លូវ​នៅ​ក្នុង​ជីវិត​ផ្ទាល់ខ្លួន។ ដូចនេះ ជោគវាសនា​ទាំងមូល ទាមទារ​ការ​ទទួលខុស​ត្រូវរបស់អ្នក​ស្ទើ​ទាំងស្រុង។ មួយវិញទៀត ពេលដែលអ្នកមានពេល​សម្រាប់​ខ្លួនឯង​កាន់តែច្រើន អ្នកនឹងរៀនស្វែងយល់ ក៏ដូចជា អភិវឌ្ឍ​ខ្លួនឯង​បាន​ទាំងស្រុង។

៤. ប្រឈម​នឹង​បញ្ហា​ស្នេហា និង​អារម្មណ៍​ខូចចិត្ត​កាន់​តែ​ទាប នៅពេលអ្នក​នៅលីវ អ្នកនឹងមិនជួបបញ្ហាខាង​អារម្មណ៍​ច្រើន ចូល​មក​ក្នុង​ជីវិត​នោះទេ។ ការ​ឈ្លោះ​ប្រកែក​គ្នា សេចក្ដី​ឈឺចាប់​អន់ចិត្ត ភាព​តានតឹង ដែលគូស្នេហ៍​ភាគច្រើន​ប្រឈមដាក់គ្នា​ជាមួយដៃគូម្ខាងៗ​នឹងមិន​មានវត្តមាន​ឱ្យ​អ្នក​ឈឺក្បាលឡើយ។ ដោយពេលខ្លះ គ្រាន់តែជីវិត និងបញ្ហាផ្ទាល់ខ្លួន មានភាពស្មុគស្មាញណាស់ទៅហើយ។ ជាពិសេស អ្នកមិនចាំបាច់ តាមដានសកម្មភាពរបស់ដៃគូអ្នកនៅលើបណ្តាញសង្គម ថាគេគិតអ្វីខ្លះចំពោះអ្នក នោះទេ។

៥. ទំនួលខុសត្រូវតិច ចំណែកឯ រឿងមួយទៀតនោះ គឺថាអ្នកនឹងមានទំនួលខុសត្រូវតិចជាងមុន ដូចជា ការជូនទៅញាំអី ទៅសាសារៀន ទៅការិយាល័យធ្វើការជាដើម។ ទន្ទឹមនឹងនេះ អ្នកនឹងមិនចាំបាច់ ផ្ញើសារជារៀងរាល់ថ្ងៃ រាល់វេលា ដូចជា “ អរុណសួស្តី៉” នៅពេលភ្ញាក់ពីដេក  “រាត្រីសួស្តី” រៀងរាល់ពេលចូលគេង។

៦. មាន​ពេល​ផ្ដោត​អារម្មណ៍​បាន​ល្អ សេចក្តីស្នេហាមិនមែនមានតែភាពផ្អែមល្ហែមរហូតនោះទេ។ ពេលខ្លះ គូស្នេហ៍មួយចំនួន ក៍ប្រឈមទៅនឹងជម្លោះ ប្រតាយប្រតប់គ្នា ដែលធ្វើឱ្យ​ពួកគេ​បាត់បង់​ការ​ផ្តោត​អារម្មណ៍​ទៅ​ធ្វើអ្វី​ផ្សេងទៀត។ រីឯ អ្នកដែលនៅលីវ អ្នកនឹង​ផ្តោត​អារម្មណ៍បានយ៉ាងល្អ ដោយសារ​គ្មាន​ការ​រំខាន ឬត្រូវរកនឹកវិធីដោះស្រាយបញ្ហាស្នេហា នៅពេលអ្នកធ្វើការ និង​ទៅ​សាលារៀន ជាដើម។ អ្នកមាន ទាំងពេលវេលា និងកម្លាំងចិត្តច្រើនក្នុងការផ្តោតលើគោលដៅ និង​តម្រូវការ​ផ្ទាល់ខ្លួន។

៧. មិនមានបញ្ហារឿងទំនុកចិត្ត ការពិតដែលមិនអាចប្រកែកបាននោះ គឺ​ថា បើសិន​ជាអ្នកមានទំនាក់ទំនងស្នេហា អ្នកនឹងមានបញ្ហាជឿទុកចិត្តគ្នាជានិច្ច តិច ឬច្រើន អាស្រ័យ​តាម​នោះ។ ជាសំណាង​ល្អ ចំពោះអ្នកនៅលីវ អ្នកអាច​ចៀស​ផុតពីបញ្ហាទាំងនោះបាន ជាមួយ​ជីវិតគ្មាន​កង្វល់​រឿង​ទំនាក់ទំនង​ស្នេហា​ស៊ីជម្រៅ។

៨. សល់លុយ ជាទូទៅ នៅ​ពេលដែលស្ថិតក្នុងទំនាក់ទំនងស្នហា វាតែងតម្រូវឱ្យមានការណាត់​ជួប​គ្នា​ទៅ​តាម​ចំណង់ចំណូលចិត្ត និងលទ្ធភាពរបស់ដែគូម្ខាងៗ។ ជាពិសេស រាល់ពេលគម្រប់ខួប​ស្នេហា ម្តងៗ ដែល​ភាគី​ខាង​ប្រុស​ភាគ​ច្រើនជាអ្នកចេញលុយ ពេល​ញាំអីជាមួយមិត្តស្រី។ ដូច្នេះ បើ​អ្នក​នៅលីវ អ្នក​នឹង​មាន​ពេល​ទំនេរ​ច្រើន អាច​សន្សំ​ប្រាក់​បន្ថែម ចៀសវាង​ពី​ការ​ដាច់​លុយ ឬបំណុល ក៏​ថា​បាន។

៩.​ មាន​ពេលវេលា​ច្រើន​ជាមួយ​គ្រួសារ និង​មិត្តភ័ក្ដិ

នៅពេលដែលអ្នកមានមិត្តស្រី ឬ​មិត្តប្រុស ពិភពលោករបស់អ្នក​ហាក់ដូចជាវិលជុំពួកគេ។ ពេលខ្លះ អ្នក​អាច​នឹង​ភ្លេច​ចំណាយ​ពេលវេលា ជាមួយ​អ្នក​មានគុណ មិត្តភ័ក្ដិ បងប្អូន ដែល​ជា​អ្នក​គាំទ្រ​ដំបូង​របស់អ្នក។ ហើយការនៅលីវអាចផ្តល់ឱ្យ​អ្នកនូវពេលវេលាបន្ថែមទៀត ដើម្បី​កសាង​មិត្តភាព និង​ទំនាក់ទំនង​ជាមួយគ្រួសារ កាន់​តែ​ប្រសើរ​ជាង​មុន។

១០. មិនចាំបាច់ពន្យល់រៀបរាប់ច្រើន អ្នកមិនចាំបាច់ឈ្លោះជាមួយនរណាម្នាក់ជាមួយហេតុផលផ្ទាល់ខ្លួន ដូចជា ហេតុអ្វីចូលគេងយប់ជ្រៅម៉្លេះ? ហេតុអ្វីមិនផ្ញើសារ ឬក៏ចំណាយពេលជាមួយ​មិត្តភក្តិយូរ​យ៉ាងនេះ? ដោយអ្នកមិនបាច់រកលេស ដោះសារច្រើន ដើម្បីរក្សាទំនាក់ទំនងរបស់អ្នក។ ជាពិសេស ជីវិតនៅលីវ ជារឿងដែលងាយស្រួលបំផុតនៅក្នុងពិភពលោកនេះ។

១១. មានពេលផ្ទាល់ខ្លួនកាន់តែច្រើន អ្នកអាចធ្វើដំណើរបានគ្រប់ពេលវេលា ទៅកន្លែងដែលអ្នកចង់ ដោយមិនចាំបាច់សុំការអនុញ្ញាត ឬមានអារម្មណ៍ថាទើសទាល់ឡើយ។ ជាការពិត ការចំណាយពេលវេលាសម្រាប់ខ្លួនឯង ជួយឱ្យអ្នកស្វែងយល់នូវអ្វីដែលសំខាន់ៗក្នុងជិវិតផ្ទាល់ខ្លួន។

១២. មានឱកាសច្រើនក្នុងការជ្រើសរើសដៃគូដែលល្អ អត្ថប្រយោជន៍ដ៏ធំធេងសម្រាប់អ្នកនៅលីវ គឺអាចណាត់ជួប ឬស្គាល់នរណាម្នាក់គ្រប់ពេលវេលា។ ការធ្វើបែបនេះ ផ្តល់ឱកាសច្រើនក្នុងការស្វែងរកនរណាដែលល្អ យល់ចិត្ត និងមានចិត្តស្មោះ យ៉ាងពិតប្រាកដ ចំពោះអ្នក។ ចៀសវាងការរើសមនុស្សខុស ដោយសារភាពប្រញាប់ប្រញាល់របស់អ្នក ព្រោះថាអ្វីៗនឹងមកដល់ បើសិនជាអ្នកចេះរង់ចាំប្រកបដោយភាពវៃឆ្លាត៕

ប្រែសម្រួល៖ លីលី

ចុចអាន៖ឥរិយាបថ ៥ របស់បុរស បញ្ជាក់ថា គេស្រលាញ់នាងពិត មិនមែនលេងសើច

ចុចអាន៖៥ វិធី ដើរចេញពីស្នេហាតែម្ខាង ដែលយើងគិតថា មិនអាចទៅរួច

The post យុវវ័យដែលនៅលីវ នឹងទទួលបានអត្ថប្រយោជន៍ទាំង ១២ នេះក្នុងជីវិត appeared first on Kampuchea Thmey Daily.

១. ពេលវេលា​ត្រូវ​និយាយ​អំពី​រឿង​មក​រដូវ​

​ជាក់​ស្ដែង​ ក្មេង​ស្រី​មាន​ការ​អៀនខ្មាស​ច្រើន​ ដូច្នេះ​ហើយ​​​ម៉ាក់​ៗ​ត្រូវ​ស្វែងរក​ពេលវេលា​ដ៏​ល្អ​បំផុត​ក្នុង​ការ​ប្រាប់​កូន​អំពី​រឿង​​នេះ​ ដើម្បី​ឲ្យ​ពួក​គេ​បាន​ត្រៀម​ខ្លួន​ជា​មុន​ចំពោះ​ការ​​​មក​រដូវ​ដំបូង​ ចៀសវាង​​មាន​ការតក់ស្លុត​ ឬ​ភិតភ័យ​។

​អ្នក​ជំនាញ​បាន​ណែនាំ​ថា​ ​ម៉ាក់​ៗ​គួរ​ចាប់ផ្ដើម​ការ​សន្ទនា​​សាមញ្ញ​ធម្មតា​ ​ជាជាង​ការ​ពិភាក្សា​លក្ខណៈ​ប្រៀនប្រដៅ​។​ ការ​ដែល​ម៉ាក់ៗ​ប្រាប់​ឲ្យ​កូន​ស្រី​​ដោយ​ត្រង់ៗ​អំពី​រឿង​​មក​រដូវ​ប្រចាំ​ខែ​ អាច​នឹង​ធ្វើ​ឲ្យ​ពួក​គេ​មាន​អារម្មណ៍​តានតឹង​ខ្លាំង​​។​ ដូចនេះ​ យើង​គប្បី​ប្រាប់​ពួកគេ​បន្តិច​ម្ដង​ៗ​​អំពី​ព័ត៌មាន​ចាំបាច់​ នៅ​ពេល​ដែល​មាន​ឱកាស​។​ ​​នៅ​ពេល​ដែល​ពួកគេ​ចាប់ផ្ដើម​មាន​រដូវ​ដំបូង​ ​ម៉ាក់​ៗ​អាច​ធ្វើការ​ពន្យល់​លម្អិត​​អំពី​រឿងរ៉ាវ​ជាក់លាក់​​មួយ​ចំនួន​ដូចជា​ ការ​តាមដាន​រយៈពេល​ និង​រោគ​សញ្ញា​មុន​ពេល​មាន​រដូវ​(PMS) ជាដើម​។

២.​ ប្រាប់​អំពី​ព័ត៌មាន​​មូលដ្ឋាន​ជា​មុន​

​​​​​​​​មុន​ពេល​ដែល​កូន​ស្រី​​យើង​មក​រដូវ​ជា​លើក​ដំបូង​ ​យើង​អាច​ពិភាក្សា​អំពី​ចំណេះ​ដឹង​​មូលដ្ឋានមួយ​ចំនួន​​ នៅ​ពេល​​មាន​ឱកាស​ល្អ​។​ ឧទាហរណ៍​ បើ​ឃើញ​មា​នការ​ផ្សព្វផ្សាយពាណិជ្ជកម្ម​​អំពីសំឡីអនាម័យ​យើងអាចចាប់​ផ្ដើម​​និយាយ​ធម្មតា​អំពី​ការ​មក​រដូវ​ជាមួយ​កូ​ន​។​ ​

តើ​ក្មេង​ស្រី​​អាច​ដឹង​ដោយ​របៀប​ណា​ នៅ​ពេល​ចាប់ផ្ដើម​មាន​រដូវ​ដំបូង​?

ម៉ាក់​ៗ​គួរ​ប្រាប់​កូន​​ថា​ ពួក​គេ​អាច​មក​រដូវ​ដំបូង​ បន្ទាប់​ពី​ពួកគេ​​ដុះ​រោម​ក្លៀក​ និង​រោម​​ប្រដាប់​ភេទ​។​ បន្ថែម​ពី​នេះ​ ការ​មក​រដូវ​​​ដំបូង​អាច​ចាប់ផ្ដើម​រយៈពេល​២​ឆ្នាំ​ បន្ទាប់​ពី​​សុដន់ពួកគេ​ចាប់​ផ្ដើម​ឡើង​ធំ​។​

តើ​វា​មាន​ការ​ឈឺចាប់​ទេ?​​​​​

​យើង​​អាច​ប្រាប់​កូន​ស្រី​ថា​ វា​មាន​ការ​ឈឺចាប់​ខ្លះ​ៗ​នៅ​​​ពេល​មក​រដូវ​​។​ ប៉ុន្តែ​ បញ្ហា​នេះ​​យើង​អាច​ដោះស្រាយ​បាន​​ដោយ​ការ​​ស្អំ​ទឹក​ក្ដៅ​ ​​ឬ​លេប​ថ្នាំ​បំបាត់​ការ​ឈឺចាប់​។​ ចំពោះ​ការ​ធ្លាក់​ឈាម​តិច​ៗ​មុន​មក​រដូវ​ដែល​មាន​ការ​ឈឺ​ចាប់​ខ្លាំង​ គឺ​មិន​មែន​ជា​រឿង​​ធម្មតា​នោះ​ទេ​ ដូច្នេះ​ហើយ​​កូន​ស្រី​​ត្រូវ​តែ​ប្រាប់​ដល់​យើង​ភ្លាម​ៗ​ បើសិនជា​​មាន​បញ្ហា​នេះ​កើត​ឡើង​។

តើ​ពួកគេ​​នឹង​បាត់បង់​ឈាម​ប៉ុន្មាន​?

​ជាមួយ​គ្នា​នេះ​ដែរ​ ម៉ាក់​ៗ​គួរ​លួងលោម​កូន​ៗ​ ​ដោយ​និយាយ​ថា​ ទោះ​បី​ជា​​​ការ​ធ្លាក់​ឈាម​​មើល​ទៅ​ដូចជា​ច្រើន​យ៉ាង​ណា​ក្តី​ ប៉ុន្តែ​ជា​ទូទៅ​ ពួកគេ​បាត់បង់​ឈាម​ប្រហែល​ជា​៣​ ទៅ​៥​មិល្លីលីត្រ​តែ​ប៉ុណ្ណោះ​។​

តើ​ការ​មក​រដូវ​មាន​រយៈពេល​ប៉ុន្មាន​ថ្ងៃ​?

​ម៉ាក់ៗ​គួរ​ពន្យល់​ប្រាប់​​កូន​ថា​ កត្តា​នេះ​គឺ​អាស្រ័យ​ទៅ​លើ​ក្មេង​ស្រី​ម្នាក់​ៗ​ ប៉ុន្តែ​​វា​អាច​មាន​រយៈ​ពេល​ប្រហែល​ជា​៣​ ទៅ​៧​ថ្ងៃ​។

៣. ពន្យល់​លម្អិត​ពាក់ព័ន្ធ​នឹង​ការ​មក​រដូវ

ក្រោយ​ពី​ពន្យល់​អំពី​ចំណុច​មូលដ្ឋាន​រួច​ យើង​អាច​ចាប់ផ្ដើម​ប្រាប់​កូន​អំពី​រឿងរ៉ាវ​លម្អិត​ដែល​ពាក់ព័ន្ធ​នឹង​ការ​មក​រដូវ​ដូចជា​ការ​តាម​ដាន​វដ្ដ​រដូវ​ ដែល​វដ្ត​រដូវ​​ធម្មតា​ គឺ​មាន​រយៈ​ពេល​២៨​ថ្ងៃ និង​​​ប្រាប់​ពួកគេ​អំពី​សញ្ញា​មួយ​ចំនួន​ដែល​កើត​ឡើង​មុន​ពេល​មក​រដូវ ដូចជា​ហើម​ពោះ​ កើត​មុន​ ចុកពោះ​ ឈឺ​ដើមទ្រូង​ ហត់​នឿយ​ ឬ​ប្រែប្រួល​អារម្មណ៍​ជាដើម​។

មួយ​វិញ​ទៀត​ នៅ​អំឡុង​ពេល​មក​រដូវ​ ក្មេង​ស្រី​ជំទង់​នៅ​តែ​អាច​បន្ត​​សកម្មភាព​កីឡា​ ឬ​លំហាត់​ប្រាណ​​របស់​ខ្លួន​បាន​​ដូច​ធម្មតា​ ដោយ​ពុំ​ចាំបាច់​ព្រួយ​បារម្ភ​ឡើយ​។​ លើស​ពី​នេះ​ ម៉ាក់​ៗ​គួរ​ប្រាប់​កូន​ឲ្យ​ចៀសវាង​ប្រើប្រាស់​ផលិតផល​លាង​សម្អាត​ប្រដាប់​ភេទ​ នៅ​អំឡុង​ពេល​មក​រដូវ​ ពីព្រោះ​​ទ្វារមាស​របស់​ស្រីៗ​យើង​ គឺ​ជា​សរីរាង្គ​ដែល​សម្អាត​ដោយ​ខ្លួន​ឯង​ ហើយ​ការ​ប្រើ​ប្រាស់​ផលិតផល​ទាំង​នោះ ​ជា​ពិសេស​ផលិតផល​ដែល​មាន​សារធាតុ​គីមី​ គឺ​អាច​​​បង្ក​​គ្រោះថ្នាក់​ដល់​​ស្រីៗ​យើង​​ថែម​ទៀត​ផង​៕

អត្ថបទផ្ដល់ដោយ៖ Hello Krupet

ចុចអាន៖ទើបពេញវ័យ ក្មេងជំទង់គួរថែទាំស្បែកបែបណា កុំឲ្យឡើងមុន?​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

ចុចអាន៖ប្អូនៗជិតពេញវ័យ ត្រូវដឹងរឿងទាំងនេះ

The post ម៉ាក់ៗត្រូវនិយាយម៉េចខ្លះ ឲ្យកូនស្រីដឹងពីរឿងមករដូវដំបូង? appeared first on Kampuchea Thmey Daily.