យោធាមីយ៉ាន់ម៉ា Archives - Kampuchea Thmey Daily

ក្រោយបោះឆ្នោត ជនស៊ីវិលយ៉ាងហោចណាស់ ១៧នាក់ស្លាប់ និងរបួស ១៤នាក់នៅមីយ៉ាន់ម៉ា

Minea Neu — Thu, 26 Feb 2026 02:39:05 +0000

ការវាយប្រហារតាមអាកាសរបស់យោធាមីយ៉ាន់ម៉ាក្នុងរដ្ឋរ៉ាឃីន(Rakhine) សម្លាប់មនុស្សយ៉ាងហោចណាស់ ១៧ នាក់ និងរបួស១៤នាក់ ជាការសម្លាប់ដ៏ព្រៃផ្សៃចុងក្រោយបំផុតក្នុងសង្គ្រាមស៊ីវិលរយៈពេលប៉ុន្មានសប្តាហ៍នេះ បន្ទាប់ពីជ័យជម្នះនៃការបោះឆ្នោតរបស់គណបក្សកាន់អំណាចគាំទ្រដោយយោធា ត្រូវបានអ្នកសង្កេតការណ៍អន្តរជាតិច្រានចោល និងចោទថា «ជាការក្លែងបន្លំ»។ នេះបើយោងតាមប្រព័ន្ធផ្សព្វផ្សាយក្នុងស្រុក។

យោធាមីយ៉ាន់ម៉ា។ រូបភាព៖ Reuters

Al Jazeera ចុះផ្សាយថ្ងៃ២៤ខែកុម្ភៈ ឆ្នាំ២០២៦ ឱ្យដឹងថា ស្ត្រី និងកុមារស្ថិតក្នុងចំណោមអ្នកដែលបានសម្លាប់ តាមរយៈការវាយប្រហារតាមអាកាស ជាពិសេសបានវាយប្រហារភូមិ Yoengu ក្នុងឃុំ Ponnagyun កាលពីថ្ងៃអង្គារក្នុងសប្តាហ៍នេះ។ នេះបើយោងតាមការចុះផ្សាយរបស់សារព័ត៌មានសំឡេងប្រជាធិបតេយ្យភូមា (DVB)។

ភូមិនេះស្ថិតនៅចម្ងាយប្រហែល ៣៣ គីឡូម៉ែត្រ ពីភាគឦសាននៃទីក្រុង Sittwe រដ្ឋធានីរដ្ឋ Rakhine។ វាត្រូវបានកាន់កាប់ដោយកងទ័ព Arakan (AA) ជាក្រុមប្រដាប់អាវុធជនជាតិភាគតិចក្នុងរដ្ឋ Rakhine វាយប្រឆាំងនឹងយោធាមីយ៉ាន់ម៉ា នៅក្នុងខែមីនា ឆ្នាំ ២០២៤។

សេចក្តីថ្លែងការណ៍របស់ AA បានឱ្យដឹងថា៖ «ជនស៊ីវិលស្លូតត្រង់ចំនួន១៧នាក់ រួមទាំងកុមារបីនាក់ ត្រូវបានសម្លាប់និងមានមនុស្ស ១៥ នាក់រងរបួស នៅក្នុងការវាយប្រហារនេះ។

គួរបញ្ជាក់ថា ប្រទេសមីយ៉ាន់ ធ្លាក់ក្នុងភាពចលាចលនយោបាយចាប់តាំងពីរដ្ឋប្រហារយោធាឆ្នាំ ២០២១ ជាមួយនឹងការបង្ក្រាបការតវ៉ាគាំទ្រលទ្ធិប្រជាធិបតេយ្យដ៏ខ្លាំងក្លា នាំឱ្យមានការបះបោរទូទាំងប្រទេស។

យោងតាមអង្គការសហប្រជាជាតិ មនុស្សរាប់ពាន់នាក់ត្រូវបានសម្លាប់ និងប្រហែល ៣.៦ លាននាក់ត្រូវផ្លាស់ទីលំនៅ។ សង្គ្រាមនេះបង្កឱ្យមានការតស៊ូប្រដាប់អាវុធពីសកម្មជនប្រជាធិបតេយ្យ និងក្រុមជនជាតិភាគតិច ដែលតាំងនៅជាយូរមកហើយ ក្នុងតំបន់ជាយក្រុងនៃប្រទេស៕

ប្រែសម្រួល៖ ណឺ មិនា

The post ក្រោយបោះឆ្នោត ជនស៊ីវិលយ៉ាងហោចណាស់ ១៧នាក់ស្លាប់ និងរបួស ១៤នាក់នៅមីយ៉ាន់ម៉ា appeared first on Kampuchea Thmey Daily.

តុលាការ ICJ នឹងបើកសវនាការសំណុំរឿងប្រល័យពូជសាសន៍ប្រឆាំងមីយ៉ាន់ម៉ានៅខែក្រោយ

Rann Reuy — Sat, 20 Dec 2025 05:21:16 +0000

តុលាការកំពូលរបស់អង្គការសហប្រជាជាតិបាននិយាយនៅថ្ងៃទី១៩ខែធ្នូថា តុលាការយុត្តិធម៌អន្តរជាតិ (ICJ) នឹងបើកសវនាការលើសំណុំរឿងដ៏សំខាន់មួយ ដែលចោទប្រកាន់ប្រទេសមីយ៉ាន់ម៉ាពីបទប្រព្រឹត្តអំពើប្រល័យពូជសាសន៍ប្រឆាំងនឹងក្រុមជនជាតិភាគតិចមូស្លីមរបស់ខ្លួន គឺជនជាតិរ៉ូហ៊ីងយ៉ា ចាប់ពីថ្ងៃទី១២ដល់២៩ខែមករាឆ្នាំ២០២៦។ យោងទីភ្នាក់ងារព័ត៌មានរ៉យទ័រ។

ដំណើរការនេះត្រូវបានគេរំពឹងថានឹងធ្វើជាគំរូដែលអាចប៉ះពាល់ដល់សំណុំរឿងរបស់អាហ្រ្វិកខាងត្បូងប្រឆាំងនឹងអ៊ីស្រាអែលជុំវិញសង្គ្រាមនៅតំបន់ហ្គាហ្សា ព្រោះនេះនឹងក្លាយជាករណីប្រល័យពូជសាសន៍ដំបូងដែល តុលាការ ICJ បានបើកសវនាការរបស់ខ្លួនក្នុងរយៈពេលជាងមួយទសវត្សរ៍។

នៅក្នុងសប្តាហ៍ដំបូងនៃសវនាការ តំណាងប្រទេស ហ្គាំប៊ី (Gambia) ដែលជាប្រទេសកាន់សាសនាឥស្លាមច្រើនជាងគេនៅអាហ្វ្រិកខាងលិច នឹងរៀបរាប់អំពីករណីរបស់ខ្លួនចាប់ពីថ្ងៃទី ១២ដល់ថ្ងៃទី១៥ ខែមករា។

គាំទ្រដោយអង្គការសម្រាប់កិច្ចសហប្រតិបត្តិការឥស្លាម ប្រទេសហ្គាំប៊ី បានប្តឹងសំណុំរឿងនេះនៅ ICJ ក្នុងឆ្នាំ២០១៩ ដោយចោទប្រកាន់មីយ៉ាន់ម៉ាពីបទប្រព្រឹត្តអំពើប្រល័យពូជសាសន៍ប្រឆាំងនឹងជនជាតិរ៉ូហ៊ីងយ៉ា។

ប្រទេសមីយ៉ាន់ម៉ា ដែលបានបដិសេធអំពើប្រល័យពូជសាសន៍ អាចតំណាងក្រុមខ្លួនពីថ្ងៃទី ១៦ ដល់ថ្ងៃទី ២០ ខែមករា។

នៅក្នុងការវិវត្តមិនធម្មតាមួយ តុលាការយុត្តិធម៌អន្តរជាតិ ដែលត្រូវបានគេស្គាល់ថាជាតុលាការពិភពលោក (World Court) ក៏បានបែងចែកពេលវេលារយៈពេលបីថ្ងៃសម្រាប់ការស្តាប់សាក្សី។ សវនាការទាំងនេះនឹងត្រូវបិទជាសាធារណៈ និងប្រព័ន្ធផ្សព្វផ្សាយ។

បេសកកម្មស្វែងរកការពិតរបស់អង្គការសហប្រជាជាតិ បានបញ្ចប់សេចក្តីសន្និដ្ឋានរបស់ខ្លួនថា យុទ្ធនាការយោធាកាលឆ្នាំ២០១៧ ដោយប្រទេសមីយ៉ាន់ម៉ា បានរុញច្រានជនជាតិភាគតិចរ៉ូហ៊ីងយ៉ាង៧៣ម៉ឺននាក់ ទៅក្នុងប្រទេសបង់ក្លាដែសនៅជាប់ព្រំដែន រួមទាំងការប្រព្រឹត្តប្រល័យពូជសាសន៍៕

The post តុលាការ ICJ នឹងបើកសវនាការសំណុំរឿងប្រល័យពូជសាសន៍ប្រឆាំងមីយ៉ាន់ម៉ានៅខែក្រោយ appeared first on Kampuchea Thmey Daily.

របបយោធាមីយ៉ាន់ម៉ា វាយបកទៅអន្តរជាតិចំពោះការរិះគន់ការបោះឆ្នោត

Minea Neu — Wed, 17 Dec 2025 09:16:07 +0000

ចាប់តាំងពីពេលដែលសង្គ្រាមរវាងប្រទេសថៃនិងកម្ពុជាដែលស្ថិតនៅក្នុងប្លុកអាស៊ានដូចគ្នា សម្ពាធលើរបបសឹកមីយ៉ាន់ម៉ាហាក់បានធ្លាក់ថយ ស្របពេលដែលប្រទេសនេះបានរៀបចំការបោះឆ្នោតតាមការគ្រោងទុកដើម្បីធ្វើយ៉ាងណាធ្វើឲ្យស្របច្បាប់នៅរបបកើតចេញពីរដ្ឋប្រហារកាលពីជិត៦ឆ្នាំមុន។

មេដឹកនាំរបបយោធា លោក Min Aung Hlaing ពេលទៅទស្សនកិច្ចនៅរុស្ស៊ី។ Myanmar News

រដ្ឋាភិបាលយោធាមីយ៉ាន់ម៉ាកាលពីពេលថ្មីៗនេះ បានបរិហារតបតចំពោះការរិះគន់របស់អន្តរជាតិ ដែលចាត់ទុកការបោះឆ្នោតរបស់ខ្លួននាពេលខាងមុខថាមិនសេរី និងគ្មានអព្យាក្រិត ប៉ុន្តែក៏បានណែនាំដល់មេដឹកនាំរបបយោធា លោក Min Aung Hlaing ឱ្យមានភាពជាអ្នកដឹកនាំក្រោយការបោះឆ្នោត។

ការប្រើប្រាស់វោហាស័ព្ទធ្ងន់ៗរបស់អ្នកដឹកនាំរបបសឹកមីយ៉ាន់ម៉ា ដែលត្រូវបានគេមើលឃើញថា ជម្លោះរវាងថៃនិងកម្ពុជា បានធ្វើឲ្យតំបន់អាស៊ានញាំញីដោយវិបត្តិដែលលើសពីវិបត្តិនៅមីយ៉ាន់ម៉ាដែលអន្តរជាតិដាក់សម្ពាធយ៉ាងខ្លាំងទៅលើរបបសឹកមីយ៉ាន់ម៉ា។

រដ្ឋាភិបាលយោធាកំពុងត្រួតពិនិត្យការបោះឆ្នោតជាដំណាក់កាល ដែលគ្រោងនឹងចាប់ផ្តើមនៅថ្ងៃទី២៨ខែធ្នូ ដោយសន្យាថានឹងវិលទៅរកលទ្ធិប្រជាធិបតេយ្យ និងមានឱកាសដើម្បីបញ្ចប់ការប្រយុទ្ធគ្នា។

អ្នកនាំពាក្យរបបយោធា លោក Zaw Min Tun បានប្រាប់សន្និសីទសារព័ត៌មានដ៏កម្រមួយនៅទីក្រុងយ៉ាំងហ្គូនថា៖ «ការបោះឆ្នោតត្រូវបានធ្វើឡើងសម្រាប់ប្រទេសមីយ៉ាន់ម៉ា។ វាមិនមែនធ្វើឡើងសម្រាប់សហគមន៍អន្តរជាតិទេ។ អ្នកដែលចង់រិះគន់អាចរិះគន់បាន ប៉ុន្តែយើងនឹងនៅតែបន្តសម្រេចគោលបំណងរបស់យើងដដែល គឺការវិលទៅរកប្រព័ន្ធប្រជាធិបតេយ្យពហុបក្សវិញ»។

ទោះជាយ៉ាងណាក៏ដោយ អ្នកឃ្លាំមើលអន្តរជាតិបាននិយាយថា ការបោះឆ្នោតនេះជាសមយុទ្ធមួយក្នុងការប្តូរឈ្មោះការគ្រប់គ្រងយោធា ខណៈដែលអង្គការសហប្រជាជាតិ ចក្រភពអង់គ្លេស និងថៃបាននិយាយថាវានឹងមិនសេរី ហើយយុត្តិធម៌នោះទេ។ នេះបើយោងតាមការចេញផ្សាយរបស់ទីភ្នាក់ងារព័ត៌មានបារាំង AFP។

របបយោធាបានកាន់កាប់អំណាចរដ្ឋប្រហារក្នុងឆ្នាំ២០២១ ដោយបានផ្តួលរំលំរដ្ឋាភិបាលស៊ីវិល និងចាប់មេដឹកនាំរបស់ខ្លួនដាក់គុក ហើយបង្កឱ្យមានសង្រ្គាមស៊ីវិលដ៏អាក្រក់ ដែលបានគ្រប់គ្រងប្រទេស។ ប្រមុខរដ្ឋាភិបាលរបបយោធាមីយ៉ាន់ម៉ា លោកឧត្តមសេនីយ៍ Min Aung Hlaing បានប្រកាសច្បាប់អាជ្ញាសឹក និងបានគ្រប់គ្រងប្រទេសក្នុងឋានៈជាប្រមុខយោធាចាប់តាំងពីរដ្ឋប្រហារនោះ។

លោក បានបញ្ចប់តួនាទីរបស់របស់ខ្លួនយ៉ាងតក់ក្រហល់ ដោយបានផ្ទេរអំណាចទៅឱ្យអ្នកផ្សេងទៀតដែលមានតួនាទីប្រហាក់ប្រហែល ដើម្បីបន្តការបោះឆ្នោត ដែលបានសន្យាជាយូរកន្លងមក ហើយរូបលោកក៏កាន់តំណែងជាប្រមុខរដ្ឋស្តីទីផងដែរ។

ចំណែក លោក Zaw Min Tun អនុរដ្ឋមន្ត្រីក្រសួងព័ត៌មានមីយ៉ាន់ម៉ា បាននិយាយថា នៅពេលដែលគេសួរថា យោធាអាចមានការប៉ងធ្វើនយោបាយបន្ទាប់ពីការបោះឆ្នោតដែរឬទេ វាត្រូវការពេលប្រហែលមួយខែ។ លោកបានលើកឡើងពីបទពិសោធន៍ក្នុងកាតព្វកិច្ចរដ្ឋ របស់លោក។

លោកបានបន្តថា៖«មានសេចក្តីថ្លែងការណ៍ដែលបាននិយាយកន្លងមកថា ប្រសិនបើរដ្ឋប្រគល់ភារកិច្ចឱ្យ ខ្ញុំនឹងអនុវត្តបទពិសោធន៍ដែលមានទាំងឡាយសម្រាប់ប្រទេសជាតិជានិច្ច»។

គួរឱ្យដឹងផងដែរថា យោធាបានអនុវត្តច្បាប់ថ្មីដ៏តឹងរ៉ឹងនៅក្នុងមូលដ្ឋានដែលខ្លួនគ្រប់គ្រង ដោយដាក់ទណ្ឌកម្មលើការតវ៉ា ឬការនិយាយប្រឆាំងនឹងការបោះឆ្នោតដោយជាប់ពន្ធនាគាររហូតដល់មួយទសវត្សរ៍។

គណបក្សសម្ព័ន្ធជាតិដើម្បីប្រជាធិបតេយ្យ ដែលបានឈ្នះការបោះឆ្នោតចុងក្រោយក្នុងឆ្នាំ២០២០ និងមានអ្នកគាំទ្រភ្លូកទឹកភ្លូកដីត្រូវបានរំលាយចោលដោយរបបសឹកក្រោយរដ្ឋប្រហារ។ ចំណែកមេដឹកនាំ លោកស្រី អ៊ុងសាន ស៊ូជី (Aung San Suu Kyi) ដែលទទួលបានជ័យលាភីរង្វាន់ណូបែលសន្តិភាព នៅតែស្ថិតក្នុងការឃុំឃាំងដោយរបបយោធាមីយ៉ាន់ម៉ា នៅឡើយ៕

ណឺ មិនា

The post របបយោធាមីយ៉ាន់ម៉ា វាយបកទៅអន្តរជាតិចំពោះការរិះគន់ការបោះឆ្នោត appeared first on Kampuchea Thmey Daily.

៥ថ្ងៃ មីយ៉ាន់ម៉ាចាប់ខ្លួន១៦០០នាក់ក្នុងការបង្គ្រាបល្បែងអនឡាញនៅពំ្រដែនជាប់ថៃ

Rann Reuy — Sun, 23 Nov 2025 08:29:06 +0000

របបសឹកយោធាមីយ៉ាន់ម៉ា បាននិយាយកាលពីថ្ងៃទី ២៣ខែវិច្ឆិកាថា ខ្លួនបានចាប់ខ្លួនជនបរទេសជិត១៦០០នាក់ក្នុងរយៈពេល៥ថ្ងៃនៅក្នុងការបង្រ្កាបជាសាធារណៈលើមជ្ឈមណ្ឌលឆបោកតាមអ៊ីនធឺណិតដ៏ល្បីមួយនៅតាមជាប់ព្រំដែនថៃ។

ទីតាំងរោងចក្រក្លែងបន្លំដ៏ច្រើនបានរីកដុះដាលនៅតំបន់ព្រំដែននៃប្រទេសមីយ៉ាន់ម៉ាដែលហែកហួរដោយសង្រ្គាម អ្នកឆបោកដែលកំណត់គោលដៅអ្នកប្រើប្រាស់អ៊ិនធឺណិតជាមួយនឹងស្នេហា និងគុណវិបត្តិអាជីវកម្មដែលមានតម្លៃរាប់សិបពាន់លានដុល្លារជារៀងរាល់ឆ្នាំ។

តាមសេចក្តីរាយការណ៍របស់ទីភ្នាក់ងារបារាំង AFP ក្រុមអ្នកជំនាញបាននិយាយថា របបយោធារបស់មីយ៉ាន់ម៉ាត្រូវបានចោទប្រកាន់ជាយូរមកហើយថា បានសម្លឹងមើលផ្លូវផ្សេងទៀតនៅពេលដែលឧស្សាហកម្មខុសច្បាប់រីកចម្រើនកាន់តែខ្លាំង ប៉ុន្តែបានបង្រ្កាបយ៉ាងចាស់ដៃចាប់តាំងពីខែកុម្ភៈ បន្ទាប់ពីត្រូវបានបញ្ចុះបញ្ចូលដោយប្រទេសចិនដែលជាអ្នកគាំទ្រយោធាដ៏សំខាន់៕

The post ៥ថ្ងៃ មីយ៉ាន់ម៉ាចាប់ខ្លួន១៦០០នាក់ក្នុងការបង្គ្រាបល្បែងអនឡាញនៅពំ្រដែនជាប់ថៃ appeared first on Kampuchea Thmey Daily.

មួយសប្តាហ៍ យោធាមីយ៉ាន់ម៉ា វាយប្រហារសម្លាប់ជនស៊ីវិលយ៉ាងហោចណាស់ ២០ នាក់ក្នុងរដ្ឋRakhine

Bun sopheap — Wed, 12 Nov 2025 09:15:20 +0000

យ៉ោងតាមការចេញផ្សាយរបស់សារព័ត៌មាន Mizzima News នៅថ្ងៃទី១២ខែ វិច្ឆិកា យ៉ាងហោចណាស់ជនស៊ីវិល ២០ នាក់ រួមទាំងកុមារ និងគ្រូបង្រៀន ត្រូវបានសម្លាប់ និងមនុស្សជាច្រើននាក់ទៀតរងរបួស បន្ទាប់ពីការវាយប្រហារតាមអាកាសរយៈពេលមួយសប្តាហ៍ដោយយោធាមីយ៉ាន់ម៉ានៅក្នុងរដ្ឋRakhine។

(រូបភាព៖ The Irrawaddy)

ការវាយប្រហារនេះបានចាប់ផ្តើមនៅថ្ងៃទី ៧ ខែវិច្ឆិកា ដោយបានកំណត់គោលដៅលើទីក្រុងដែលគ្រប់គ្រងដោយកងទ័ពអារ៉ាកាន (AA) ដែលជាក្រុមប្រដាប់អាវុធជនជាតិភាគតិចប្រយុទ្ធប្រឆាំងនឹងរបបយោធា។ គ្រាប់បែកទាំងនោះបានវាយប្រហារសាលារៀន និងផ្ទះសម្បែងនៅក្នុងទីក្រុងដូចជា Pauktaw, Ponnagyun និង Minbya។

ការប្រយុទ្ធគ្នារវាងយោធា និងកងទ័ពអារ៉ាកានក៏នៅតែបន្តនៅក្នុងតំបន់ជាច្រើននៃរដ្ឋRakhine ជាកន្លែងដែល AA ឥឡូវនេះគ្រប់គ្រងទីក្រុងប្រហែល ១៥ទៅហើយ។

គួរបញ្ជាក់ថារបបយោធាមីយ៉ាន់ម៉ាបានបង្កើនការវាយប្រហារកាន់តែខ្លាំងមុនការបោះឆ្នោតដែលបានគ្រោងទុកនៅក្នុងខែធ្នូនិងខែមករាខាងមុខ។ ទោះយ៉ាងណាការបោះឆ្នោតនេះមានការរិះគន់យ៉ាងធ្ងន់ធ្ងរពីអន្តរជាតិ និងរងការបដិសេដពីពលរដ្ឋក្នុងស្រុកមិនចូលរួមធ្វើការបោះឆ្នោតនោះទេ៕

អត្ថបទ៖ ប៊ុន សុភាព

The post មួយសប្តាហ៍ យោធាមីយ៉ាន់ម៉ា វាយប្រហារសម្លាប់ជនស៊ីវិលយ៉ាងហោចណាស់ ២០ នាក់ក្នុងរដ្ឋRakhine appeared first on Kampuchea Thmey Daily.

ថៃសុំមីយ៉ាន់ម៉ាចរចា ដើម្បីបើកច្រកព្រំដែនសំខាន់ឡើងវិញ

Huon Dina — Wed, 20 Aug 2025 09:39:58 +0000

មន្រ្តីរដ្ឋាភិបាលថៃឥឡូវនេះកំពុងខ្នះខ្នែងដុតដៃដុតជើង សុំការចរចាជាមួយរបបយោធាមីយ៉ាន់ម៉ា ដើម្បីបើកច្រកព្រំដែន Mae Sot-Myawaddy 2 ឡើងវិញ ក្រោយយោធាមីយ៉ាន់ម៉ាបិទជាឯកតោភាគីដោយមិនជូនដំណឹងកាលពីថ្ងៃចន្ទ ដើម្បីដោះស្រាយបញ្ហាគេចពន្ធ និងគ្រប់គ្រងលំហូរចំណូលសម្រាប់រដ្ឋតាមរយៈប្រតិបត្តិការពាណិជ្ជកម្មច្រកព្រំដែនជាប់ថៃ។

រដ្ឋមន្ត្រីក្រសួងពាណិជ្ជកម្មថៃ លោក Jatuporn Buruspat បាននិយាយនៅថ្ងៃពុធនេះថា ចំណាត់ការរបស់យោធាមីយ៉ាន់ម៉ា បានបង្កការកកស្ទះនូវរថយន្តដឹកទំនិញជាច្រើនគ្រឿងនៅក្រុង Mae Sot របស់ថៃ។

តាមការចុះផ្សាយរបស់កាសែត The Nation មជ្ឈមណ្ឌលពាណិជ្ជកម្មថៃប្រចាំទីក្រុងយ៉ាំងហ្គោន (មីយ៉ាន់ម៉ា) បាននិយាយថា ដំណើរការព្រំដែនរំពឹងថានឹងបើកឡើងវិញនៅថ្ងៃទី ២១ ខែសីហា បន្ទាប់ពីមជ្ឈមណ្ឌលបានពិភាក្សាជាមួយធុរកិច្ចក្នុងស្រុក និងក្រុមហ៊ុនដឹកជញ្ជូន។ ប៉ុន្តែថា យោធាមីយ៉ាន់ម៉ានឹងបង្កើនកិច្ចខិតខំប្រឹងប្រែងដើម្បីបញ្ឈប់ការរត់ពន្ធ ដោយរឹតបន្តឹងលើការត្រួតពិនិត្យអាជ្ញាប័ណ្ណនាំចូលពីថៃ។

ដើម្បីដោះស្រាយបញ្ហាកកស្ទះរថយន្តដឹកទំនិញថៃ លោក Jatuporn បាននិយាយថា៖ «ខ្ញុំបានណែនាំនាយកដ្ឋានពាណិជ្ជកម្មសម្រាប់កិច្ចការបរទេស ឱ្យជួបជាមួយអនុព័ន្ធពាណិជ្ជកម្មមីយ៉ាន់ម៉ាប្រចាំប្រទេសថៃ»។ លើសពីនេះ ថៃនឹងសម្របតាមការទាមទាររបស់យោធាមីយ៉ាន់ម៉ា ដោយលោកបានបន្តថា៖ «ទំនិញថៃទាំងអស់ដែលចូលមីយ៉ាន់ម៉ា នឹងត្រូវមានអាជ្ញាប័ណ្ណនាំចូល ស្របតាមបទប្បញ្ញត្តិរបស់មីយ៉ាន់ម៉ា»។

គួរគូសបញ្ជាក់ថា ច្រក Mae Sot-Myawaddy 2 គឺជាច្រកដឹកជញ្ជូនទំនិញដ៏សំខាន់រវាងថៃ និងមីយ៉ាន់ម៉ា ដែលមួយច្រកព្រំដែនរួមសរុបចំនួន ២១ កន្លែង។ ការបិទច្រកសំខាន់នាពេលនេះ ធ្វើឡើងចំពេលដែលពាណិជ្ជកម្មរវាងប្រទេសទាំង២ បានធ្លាក់ចុះជាបន្តបន្ទាប់រួចហើយ។

សម្រាប់រយៈពេល ៦ ខែដើមឆ្នាំ ២០២៥ ពាណិជ្ជកម្មទ្វេភាគីរវាងថៃ និងមីយ៉ាន់ម៉ា មានតម្លៃ ១០៥,១៤ ប៊ីលានបាត ដោយធ្លាក់ចុះ ២៤,៩១ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ថៃនាំចេញទៅមីយ៉ាន់ម៉ា មានប្រមាណ ៦៣,៥៧ ប៊ីលានបាត ដោយធ្លាក់ចុះជាង ១៦ ភាគរយ។

ក្នុងពាណិជ្ជកម្មទ្វេភាគីផងដែរ បើគិតតាមច្រកគយ ព្រំដែន Mae Sot-Myawaddy រួមចំណែកធំជាងគេ ក្នុងតម្លៃសរុបប្រមាណ ៤៥,៣៧ ប៊ីលានបាត៕

The post ថៃសុំមីយ៉ាន់ម៉ាចរចា ដើម្បីបើកច្រកព្រំដែនសំខាន់ឡើងវិញ appeared first on Kampuchea Thmey Daily.

យោធាមីយ៉ាន់ម៉ា​ ​​ Archives - Kampuchea Thmey Daily

​ក្រោយ​បោះឆ្នោត ​ជនស៊ីវិល​​យ៉ាងហោច​ណាស់​ ១៧នាក់ស្លាប់​ និង​របួស ១៤នាក់​នៅមីយ៉ាន់ម៉ា​

​តុលាការ​ ICJ ​នឹង​បើកសវនាការ​សំណុំរឿង​​ប្រល័យ​ពូជសាសន៍​ប្រឆាំង​​មីយ៉ាន់ម៉ានៅខែក្រោយ​

​​របបយោធា​មីយ៉ាន់ម៉ា ​វាយ​បក​ទៅ​អន្តរជាតិ​​ចំពោះការ​រិះគន់​ការ​​បោះ​ឆ្នោត​​​

​​៥ថ្ងៃ មីយ៉ាន់ម៉ា​ចាប់​ខ្លួន​១៦០០​នាក់​​​ក្នុងកា​រ​បង្គ្រាប​​ល្បែងអនឡាញនៅពំ្រ​ដែន​ជាប់​​ថៃ