រដ្ឋបាលខណ្ឌទួលគោក Archives - Kampuchea Thmey Daily

អាជ្ញាធរខណ្ឌទួលគោក បន្តចុះរៀបចំសណ្ដាប់ធ្នាប់ក្នុងមូលដ្ឋាន បញ្ចៀសការកកស្ទះចរាចរណ៍រំខានដល់អ្នកដំណើរឆ្លងកាត់

អ៊ិន ពិសី — Wed, 01 Oct 2025 09:07:59 +0000

អាជ្ញាធរខណ្ឌទួលគោក បានបន្តចុះរៀបចំសណ្ដាប់ធ្នាប់ដែលក្រុមអាជីវករមួយចំនួនយកចំណីផ្លូវធ្វើជាកន្លែងលក់ដូរ ដើម្បីបញ្ចៀសការកកស្ទះដល់ប្រជាពលរដ្ឋធ្វើដំណើរឆ្លងកាត់។

លោក ជា ពិសី អភិបាល នៃគណៈអភិបាលខណ្ឌទួលគោក ប្រគល់ភារកិច្ចជូន លោក ស៊ឹប សុផង់ អភិបាលរងខណ្ឌ ទទួលបន្ទុកសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ បានដឹកនាំកម្លាំងគណៈបញ្ជាការឯកភាពចុះរៀបចំសណ្ដាប់ធ្នាប់របៀបរៀបរយ អនាម័យ បរិស្ថាន និងអនុវត្តវិធានការរដ្ឋបាល ចំពោះអាជីវករលក់ដូរផ្លែឈើ ការចតយានយន្តគ្រប់ប្រភេទ និងការចតយានយន្តលើកដាក់ ឬផ្ទេរទំនិញនៅលើចិញ្ចើមផ្លូវ និងទ្រូងផ្លូវលេខ ២៣០ ផ្លូវលេខ ៣៣៦ និងផ្លូវ ២៣៩ ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ។

លោកអភិបាលរងខណ្ឌទួលគោក បានឲ្យដឹងថា កន្លងមក អាជ្ញាធរតែងតែចុះធ្វើសណ្ដាប់ធ្នាប់នៅតាមបណ្ដោយផ្លូវ ២៣០ នេះ ច្រើនលើកសាដែរហើយ ហើយថ្មីៗ នេះ ក៏ទើបតែចុះរួចដែរ។ ចំពោះបញ្ហានេះ អាជ្ញាធរ តែងមានការយោគយល់ចំពោះអាជីវករ ដោយអនុញ្ញាតឲ្យពួកគាត់លក់តែពេលយប់ ហើយអាចលក់បានតែនៅលើចិញ្ចើមផ្លូវ ប៉ុន្តែត្រឹមម៉ោង ៦ ព្រឹក គឺ ទីតាំងលក់ដូរទាំងអស់ ត្រូវវេចខ្ចប់ប្រមូលកាកសំណល់សេសសល់ពីការលក់ដូរឲ្យមានអនាម័យ ដើម្បីថែរក្សាបរិស្ថានសាធារណៈផងដែរ និងជួយកាត់បន្ថយការកកស្ទះចរាចរណ៍ផង។

ជាមួយនេះ លោកអភិបាលរងខណ្ឌទួលគោក បានចុះអនុវត្តវិធានការរដ្ឋបាល ដោយមិនអនុញ្ញាតឲ្យមានការលក់ដូរនៅតាមបណ្ដោយផ្លូវលេខ ២៣០ ផ្លូវលេខ ៣៣៦ និងផ្លូវ ២៣៩។ បន្ថែមនោះ លោក បានចាត់វិធានការរដ្ឋបាលដោយដកហូតសម្ភារៈតាំងលក់លើផ្លូវ និងមិនអនុញ្ញាតឲ្យអាជីវករអ្នកប្រកបអាជីវកម្មលក់ដូរនៅតាមបណ្ដោយផ្លូវលេខ ២៣០ នេះ បន្តលក់លើផ្លូវទៀតនោះទេ ក្នុងករណីដែលក្រុមពួកគាត់នៅតែបន្តលក់នោះ អាជ្ញាធរនឹងចាត់វិធានការច្បាប់៕

អត្ថបទ ៖ ម៉េង

The post អាជ្ញាធរខណ្ឌទួលគោក បន្តចុះរៀបចំសណ្ដាប់ធ្នាប់ក្នុងមូលដ្ឋាន បញ្ចៀសការកកស្ទះចរាចរណ៍រំខានដល់អ្នកដំណើរឆ្លងកាត់ appeared first on Kampuchea Thmey Daily.

អាជ្ញាធរខណ្ឌទួលគោក ដឹកនាំមន្ត្រីជំនាញ ចុះពិនិត្យជួសជុលជង្ហុកសំបុកមាន់ ក្នុងមូលដ្ឋាន

អ៊ិន ពិសី — Mon, 29 Sep 2025 01:48:51 +0000

ដើម្បីសម្រួលដល់ការធ្វើដំណើររបស់ប្រជាពលរដ្ឋ អាជ្ញាធរខណ្ឌទួលគោក បានចុះធ្វើការជួសជុលជង្ហុកសំបុកមាន់ដែលកើតមានលើកដងផ្លូវក្នុងមូលដ្ឋានខណ្ឌ។

ជាក់ស្ដែង នៅថ្ងៃទី ២៩ ខែកញ្ញា ឆ្នាំ ២០២៥ ម្សិលមិញ លោក ជា ពិសី អភិបាល នៃគណៈអភិបាលខណ្ឌទួលគោក បានដឹកនាំមន្ត្រីជំនាញការិយាល័យសាធារណការ ដឹកជញ្ជូន អនាម័យបរិស្ថាន និងសណ្ដាប់ធ្នាប់សាធារណៈខណ្ឌទួលគោក ចុះពិនិត្យ និងធ្វើការជួសជុលជង្ហុកសំបុកមាន់ បើសិនជង្ហុកធំៗ មិនអាចជួសជុលបាន នឹងរាយការណ៍បន្តទៅសាធារណៈរាជធានី ដើម្បីជួសជុល។

បើតាមការបញ្ជាក់ពីអាជ្ញាធរបានឲ្យដឹងថា ជង្ហុកសំបុកមាន់ទាំងអស់ដែលកើតមានក្នុងមូលដ្ឋាន តែងតែបង្កគ្រោះថ្នាក់ដល់ប្រជាពលរដ្ឋធ្វើដំណើរ ហេតុដូចនេះហើយទើបអាជ្ញាធរធ្វើការចុះជួសជុលជាបន្ទាន់ ដើម្បីកាត់បន្ថយគ្រោះថ្នាក់នៅពេលមានទឹកដក់ក្នុងជង្ហុកដែលធ្វើឲ្យពលរដ្ឋធ្វើដំណើរមើលមិនឃើញ គ្រោះថ្នាក់ជាយថាហេតុ។

ជង្ហុកដែលអាជ្ញាធរខណ្ឌកំពុងធ្វើការជួសជុលនេះស្ថិតនៅតាមបណ្តោយផ្លូវលេខ ២៤៥ ស្ថិតក្នុងសង្កាត់ផ្សារដើមគ ខណ្ឌទួលគោក មានទំហំ ២ ម៉ែត្រ គុណនឹង ១.៥ ម៉ែត្រ។ ក្នុងនោះ អាជ្ញាធរខណ្ឌ នឹងបន្តធ្វើការជួសជុលជាបន្តបន្ទាប់ទៀត នៅតាមផ្លូវសំខាន់ៗ ដែលមានជង្ហុកសំបុកមាន់៕

អត្ថបទ ៖ ម៉េង

The post អាជ្ញាធរខណ្ឌទួលគោក ដឹកនាំមន្ត្រីជំនាញ ចុះពិនិត្យជួសជុលជង្ហុកសំបុកមាន់ ក្នុងមូលដ្ឋាន appeared first on Kampuchea Thmey Daily.

អាជ្ញាធរខណ្ឌទួលគោក ជួសជុលផ្លូវជង្ហុកសំបុកមាន់ដែលតែងបង្កគ្រោះថ្នាក់ដល់ អ្នកដំណើរ

អ៊ិន ពិសី — Mon, 15 Sep 2025 07:50:34 +0000

អាជ្ញាធរខណ្ឌទួលគោក ធ្វើការជួសជុលផ្លូវជង្ហុកសំបុកមាន់ដ៏ធំដែលតែងតែបង្កការរំខានដល់អ្នកធ្វើដំណើរ ក្រោយទទួលបានការរាយការណ៍ពីប្រជាពលរដ្ឋក្នុងមូលដ្ឋាន។

ទីតាំងជង្ហុកខាងលើដែលតែងតែបង្កគ្រោះថ្នាក់ដល់អ្នកដំណើរ ស្ថិតនៅតាមបណ្ដោយផ្លូវលេខ ២៣០ កែង ២២៣ ជិតស្តុកក្បាលមាន់ចែ សង្កាត់ផ្សារដើមគ ខណ្ឌទួលគោក រាជធានីភ្នំពេញ។

ជង្ហុកទាំងអស់នេះ តូចៗ នោះទេ តែដោយសារមានភ្លៀងធ្លាក់ ក៏មានទឹកដក់កើតជាជង្ហុកធំទៅៗ។ ជង្ហុកទាំងនេះ តែងតែបង្កគ្រោះថ្នាក់ដល់អ្នកធ្វើដំណើរឆ្លងមើលមិនឃើញធ្លាក់ដួលផងដែរ។ នៅពេលឃើញមានអ្នកដួលច្រើន ប្រជាពលរដ្ឋបានយកដី ឬ កម្ទេចថ្ម ទៅចាក់បំពេញ ដើម្បីបញ្ចៀសកុំឲ្យមានអ្នកដួល តែមិនយូរប៉ុន្មាន ជង្ហុកមួយនេះក៏មកជាសភាពដើមវិញ។

ប្រជាពលរដ្ឋ និងអ្នកដំណើរ បានសម្ដែងក្ដីសប្បាយរីករាយយ៉ាងខ្លាំងចំពោះការយកចិត្តទុកដាក់ពីអាជ្ញាធរមូលដ្ឋាន នៅពេលពួកគាត់សំណូមពរសុំឲ្យជួសជុលជង្ហុកនេះ មិនយូរប៉ុន្មានក៏ឃើញមានការអ៊ុតកៅស៊ូបានយ៉ាងស្អាត ងាយស្រួលក្នុងការធ្វើដំណើរ។

ជាមួយនេះ អាជ្ញាធរ បានអំពាវនាវដល់ប្រជាពលរដ្ឋ ប្រសិនបើឃើញមានផ្លូវខូចខាតក្នុងមូលដ្ឋាន សូមរាយការណ៍មកកាន់អាជ្ញាធរជាបន្ទាន់ ដើម្បីធ្វើការជួសជុលសម្រួលការធ្វើដំណើរ៕

អត្ថបទ ៖ ម៉េង

The post អាជ្ញាធរខណ្ឌទួលគោក ជួសជុលផ្លូវជង្ហុកសំបុកមាន់ដែលតែងបង្កគ្រោះថ្នាក់ដល់ អ្នកដំណើរ appeared first on Kampuchea Thmey Daily.

រដ្ឋបាលខណ្ឌទួលគោក ជួសជុលអ៊ុតកៅស៊ូផ្លូវ ១ ខ្សែ ជូនប្រជាពលរដ្ឋ សម្រួលការធ្វើដំណើរ

អ៊ិន ពិសី — Thu, 07 Aug 2025 07:13:27 +0000

រដ្ឋបាលខណ្ឌទួលគោក បានធ្វើការជួសជុលអ៊ុតកៅស៊ូលើផ្លូវ ១ ខ្សែ ជូនប្រជាពលរដ្ឋ ដែលជាកញ្ចប់ទឹកប្រាក់សម្រាប់អភិវឌ្ឍន៍ភូមិឃុំសង្កាត់ឆ្នាំ ២០២៥ ដើម្បីសម្រួលដល់ការធ្វើដំណើរ និងងាយស្រួលប្រកបអាជីវកម្ម។

លោក ជា ពិសី អភិបាល នៃគណៈអភិបាលខណ្ឌទួលគោក បានអញ្ជើញចុះត្រួតពិនិត្យកំណាត់ផ្លូវលេខ ២០២ (២៤៥-២៥៣) ស្ថិតក្នុងសង្កាត់ទឹកល្អក់ទី ៣ ប្រវែង ២៤៥ ម៉ែត្រ ទទឹង ៨ ម៉ែត្រ គម្រោងរបស់រដ្ឋបាលខណ្ឌទួលគោក ឆ្នាំ ២០២៥។

លោកអភិបាលខណ្ឌទួលគោក បានឲ្យដឹងថា ចំពោះគម្រោងអភិវឌ្ឍន៍ភូមិឃុំសង្កាត់ដែលកំពុងចាប់ផ្ដើមជួសជុលនេះ គឺជាកញ្ចប់ថវិកាដេញថ្លៃពីសំណាក់ក្រុមហ៊ុនឯកជន ដើម្បីយកមកជួសជុលផ្លូវខូចក្នុងមូលដ្ឋានខណ្ឌទួលគោក។

លោកបានអំពាវនាវអាជ្ញាធរសង្កាត់ និងភូមិ ត្រូវជួយបន្តផ្សព្វផ្សាយដល់ប្រជាពលរដ្ឋមានលំនៅឋានជាប់ផ្លូវ សូមសម្រួលផលប៉ះពាល់ទាំងឡាយ ដើម្បីឲ្យក្រុមហ៊ុនងាយស្រួលដំណើរការការដ្ឋានជួសជុល។

ជាមួយនេះ លោកក៏បានណែនាំឲ្យក្រុមហ៊ុនទទួលម៉ៅការ ត្រូវអនុវត្តគម្រោងឲ្យបានល្អ តាមបទដ្ឋានបច្ចេកទេស ធានាបាននូវភាពរឹងមាំ និង ទឹកហួត ដើម្បីកាត់បន្ថយភាពលិចលង់តាមបណ្ដោយផ្លូវខាងលើនេះឲ្យបាន ១០០ ភាគរយ៕

អត្ថបទ ៖ ម៉េង

The post រដ្ឋបាលខណ្ឌទួលគោក ជួសជុលអ៊ុតកៅស៊ូផ្លូវ ១ ខ្សែ ជូនប្រជាពលរដ្ឋ សម្រួលការធ្វើដំណើរ appeared first on Kampuchea Thmey Daily.

អាជ្ញាធរខណ្ឌទួលគោក ដាំបង្គោលជាប់របងសាលាសន្ធរម៉ុក ការពារកុំឲ្យរថយន្តចតលើផ្លូវថ្មើរជើង

អ៊ិន ពិសី — Mon, 16 Jun 2025 03:29:57 +0000

ក្រោយកម្លាំងគណៈបញ្ជាការឯកភាពខណ្ឌទួលគោក បានចុះចាត់វិធានការក្ដៅចំពោះម្ចាស់រថយន្តដែលយកចិញ្ចើមផ្លូវជាប់របងសាលារៀនសន្ធរម៉ុកធ្វើជាកន្លែងចតរថយន្ត ថ្មីៗ នេះ អាជ្ញាធរខណ្ឌទួលគោក បានដាំបង្គោលការពារមិនអនុញ្ញាតឲ្យចតរថយន្តលើផ្លូវថ្មើរជើងឡើយ។

ជាក់ស្ដែងកាលពីថ្ងៃទី ១៤ ខែមិថុនា ឆ្នាំ ២០២៥ ថ្មីៗ នេះ លោក ជា ពិសី អភិបាលខណ្ឌទួលគោក បានដឹកនាំមន្ត្រីការិយាល័យសាធារណការ ដឹកជញ្ជូន អនាម័យបរិស្ថានខណ្ឌទួលគោក ចុះដាំបង្គោលលើចិញ្ចើមផ្លូវ ជាប់របងសាលារៀនសន្ធរម៉ុក នៅមហាវិថីកម្ពុជាក្រោម ស្ថិតក្នុងសង្កាត់ទឹកល្អក់ទី ១ ដើម្បីការពារកុំឲ្យមានការចតយានយន្តដោយអនាធិបតេយ្យទៀត ជាពិសេសនេះជាការរំដោះចិញ្ចើមផ្លូវសម្រាប់ការធ្វើដំណើរថ្មើរជើងរបស់សិស្សានុសិស្ស និងប្រជាពលរដ្ឋទូទៅ។

ក្រោយអាជ្ញាធរចុះដាំបង្គោលដែកដូច្នេះរួច សិស្សានុសិស្ស បានសម្ដែងក្ដីសប្បាយរីករាយ ដោយរក្សាបានចិញ្ចើមផ្លូវសម្រាប់អ្នកថ្មើរជើង ងាយស្រួលធ្វើដំណើរ មិនខ្លាចបង្កគ្រោះថ្នាក់ណាមួយដូចពេលកន្លងទៅដែលដើរលើផ្លូវសិទ្ធអាទិភាពរថយន្ត។ បន្ថែមទៀតនោះ ពួកគាត់ សង្ឃឹមជាក់ថា យានយន្តទាំងនោះ មិនអាចយកមកចតបន្តទៀតបានឡើយ។

គួរជម្រាបថា កាលពីព្រឹកថ្ងៃទី ១១ ខែមិថុនា ឆ្នាំ ២០២៥ លោកអភិបាល នៃគណៈអភិបាលខណ្ឌទួលគោក បានដឹកនាំកម្លាំងគណៈបញ្ជាការឯកភាពខណ្ឌ ចុះចាត់វិធានការក្ដៅលើម្ចាស់រថយន្តដែលយករថយន្តមកចតលើផ្លូវជាប់របងសាលាសន្ធរម៉ុក ធ្វើឲ្យបាត់បង់សណ្ដាប់ធ្នាប់ និងបង្កផលលំបាកដល់សិស្សានុសិស្សចេញចូលសាលាត្រូវដើរលើផ្លូវ ដែលអាចបង្កគ្រោះថ្នាក់ជាយថាហេតុ។ កន្លែងដែលរថយន្តចតយ៉ាងអានាធិបតេយ្យនេះ ស្ថិតនៅតាមបណ្ដោយមហាវិថីកម្ពុជាក្រោម ត្រង់ចំណុចជាប់របងសាលាវិទ្យាល័យសន្ធរម៉ុក សង្កាត់ទឹកល្អក់ ១ ខណ្ឌទួលគោក រាជធានីភ្នំពេញ។

សូមបញ្ជាក់ថា កន្លងទៅ ពាក់ព័ន្ធបញ្ហានេះ អាណាព្យាបាលសិស្ស ក៏ដូចជាសិស្សានុសិស្ស បានសំណូមពរឲ្យអាជ្ញាធរខណ្ឌទួលគោក មេត្តាជួយពិនិត្យមើល និង ចាត់វិធានការផង ព្រោះជារៀងរាល់ថ្ងៃនៅពេលចេញពីរៀនម្ដងៗ សិស្សានុសិស្សទាំងអស់ដែលដើរចេញពីរៀន ត្រូវដើរលើផ្លូវឡាន ម៉ូតូ ដោយសារជាប់របងសាលាមានរថយន្តចតជាច្រើននៅលើនោះ នេះជាហេតុនាំឲ្យមានគ្រោះថ្នាក់កើតឡើងជាយថាហេតុ។

មតិពលរដ្ឋ បានបន្តថា ចំពោះបញ្ហានេះ អាជ្ញាធរគួរយកចិត្តទុកដាក់ពីបញ្ហាគ្រោះថ្នាក់កើតលើសិស្សានុសិស្ស ម្យ៉ាងទៀត ការចតរថយន្តយ៉ាងអនាធិបតេយ្យនេះធ្វើឲ្យខូចការ៉ូឡា បាត់បង់សណ្ដាប់ធ្នាប់ និង សោភ័ណភាពផងដែរ។

យ៉ាងណាមិញ ក្រោយទទួលបានសំណូមពរនេះ អាជ្ញាធរខណ្ឌទួលគោក បានចុះមកចាក់សោកង់រថយន្ត និងធ្វើកិច្ចសន្យាជាមួយម្ចាស់រថយន្ត មិនអនុញ្ញាតឲ្យយករថយន្តមកចតបែបនេះបន្តទៀតឡើយ ក្នុងករណីនៅតែបំពាន នោះអាជ្ញាធរនឹងមានវិធានរដ្ឋបាល ដោយយករថយន្តទៅរក្សាទុកនៅសាលាខណ្ឌ៕

អត្ថបទ ៖ សុភា

The post អាជ្ញាធរខណ្ឌទួលគោក ដាំបង្គោលជាប់របងសាលាសន្ធរម៉ុក ការពារកុំឲ្យរថយន្តចតលើផ្លូវថ្មើរជើង appeared first on Kampuchea Thmey Daily.

អភិបាលខណ្ឌទួលគោក៖ «សន្តិភាព» ជាបាយ និងជាអុកស៊ីសែន សម្រាប់មនុស្សគ្រប់រូប

Ken Malis — Sun, 09 Mar 2025 03:55:12 +0000

លោក ជា ពិសី អភិបាលនៃគណៈអភិបាលខណ្ឌទួលគោក បានលើកឡើងថា «សន្តិភាព គឺជាបាយ និងជាអុកស៊ីសែន សម្រាប់មនុស្សគ្រប់រូប ដូច្នេះយើងត្រូវរួមគ្នា រក្សាការពារសន្តិភាពនេះឱ្យបានគង់វង្ស ទោះបីក្នុងតម្លៃណាក៏ដោយ»។

លោកបានលើកឡើងបែបនេះ ខណៈលោក និងលោកស្រី ភឹម សម្ផស្ស អនុប្រធានក្រុមការងារចុះជួយមូលដ្ឋានសង្កាត់ទឹកល្អក់ទី១ អញ្ជើញជាធិបតីភាពក្នុងពិធីសំណេះសំណាលជាមួយនារីសង្កាត់ និងការជួបសំណេះសំណាលសួរសុខទុក្ខគ្រួសារក្រីក្រចំនួន ៣៥៧គ្រួសារ ក្នុងឱកាសអបអរសាទរទិវានារីអន្តរជាតិ ៨មីនា ខួបលើកទី១១៤ ក្រោមប្រធានបទសិទ្ធិ សមភាព និងភាពអង់អាចចំពោះស្ត្រី និងក្មេងស្រីគ្រប់រូបនៅសង្កាត់ទី១ នារសៀលថ្ងៃទី ៨មីនាឆ្នាំ២០២៥ នៅសាលាសង្កាត់ទឹកល្អក់ទី១ ខណ្ឌទួលគោក។

លោក ជា ពិសី បានមានប្រសាសន៍ថា ទុក្ខលំបាករបស់ប្រជាពលរដ្ឋ គឺជាទុក្ខលំបាករបស់មន្ត្រីគណបក្សប្រជាជនកម្ពុជា។ រាជរដ្ឋាភិបាលដែលកើតចេញពីគណបក្សប្រជាជនកម្ពុជាបានដឹនាំប្រទេសឱ្យមានការអភិវឌ្ឍរីកចម្រើនលើគ្រប់វិស័យ ហើយជាមហិចតារបស់គណបក្សប្រជាជនកម្ពុជា និងធ្វើឱ្យប្រទេសកម្ពុជាក្លាយ ជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ ជាប្រទេសអ្នមាននៅឆ្នាំ ២០៥០។ លោកបន្តថា «ដើម្បីឱ្យប្រទេសជាតិដើរចំណុចនេះលុះត្រាតែប្រទេសជាតិរបស់យើង មានសុខមានសន្តិភាពពេញលេញ ដូច្នេះសូមបងប្អូនប្រជាពលរដ្ឋទាំងអស់ រួមគ្នាការពារថែរក្សាសន្តិភាពនេះឱ្យបានគង់វង្ស»។ លោកថា សន្តិភាព គឺជាបាយជាម្ហូប និងជាអុកស៊ីសែនរបស់មនុស្សគ្រប់រូប ដូច្នេះហើយទើបសម្ដេចហ៊ុនសែនអតីតនាយករដ្ឋមន្ត្រី បានដាក់ចេញជាវិធានការដើម្បីការពារសន្តិភាពនេះឱ្យបានគង់ បើទោះបីក្នុងតម្លៃណាក៏ដោយ។

ចំណែក លោក ប៉ិច សុខឃឿន ចៅសង្កាត់ទឹកល្អក់ទី១ បានលើកឡើងដែរថា ក្នុងឱកាសទិវាសិទ្ធិនារី ៨មីនា នេះ ក៏មានការផ្តល់ជាអំណោយពី លោកស្រី ភឹម សម្ផស្ស អនុប្រធានក្រុមការងារចុះជួយមូលដ្ឋានសង្កាត់ទឹកល្អក់ទី១ និងពីសមាគមសភាពាណិជ្ជកម្មយុវជនកម្ពុជាចិន ចែកជូនប្រជាពលរដ្ឋចំនួន ៣៥៧គ្រួសារ ដោយក្នុងមួយគ្រួសារទទួលបានទឹកត្រី មី អង្គរ និងថវិកាមួយចំនួន។

លោកបានបន្តថា អនុវត្តតាមអនុសាសន៍របស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា គឺមិនទុកឱ្យប្រជាពលរដ្ឋណាម្នាក់ស្លាប់ដោយការអត់បាយនោះទេ។ ដោយអនុវត្តតាមអនុសាសន៍ដ៏ខ្ពង់ខ្ពស់នេះ លោកថា សម្រាប់សង្កាត់ទឹកល្អក់ទី១ តែងផ្ដល់ជូននូវគ្រឿងឧបភោគបរិភោគជូនដល់ប្រជាពលរដ្ឋ ដែលមានជីវភាពក្រីក្រលំបាកជាបន្តបន្ទាប់មិនដែលដាច់ឡើយ។

លោកស្រី ភឹម សម្ផស្ស បានមានប្រសាសន៍ផងដែរថា ប្រទេសមានសន្តិភាព ស្ត្រីមានសិទ្ធិសេរីភាពស្មើនឹងបុរស ប៉ុន្តែ លោកស្រី បានណែនាំឱ្យស្ត្រីទាំងអស់ ត្រូវប្រើប្រាស់សិទ្ធិនេះឱ្យបានត្រឹមត្រូវប្រកបដោយគុណធម៌ សច្ចធម៌ និងសុជីវធម៌។ បន្ថែមពីនេះ លោកស្រី ក៏បានសន្យាថានឹងជួយជួសជុលអាគារច្រក ចេញចូលតែមួយនៃសង្កាត់ទឹកល្អក់ទី១នេះផងដែរ ដើម្បីឱ្យសង្កាត់ងាយស្រួលបម្រើការងារផ្ដល់សេវាជូនប្រជាពលរដ្ឋ បានកាន់តែល្អថែមទៀត។សម្រាប់ប្រជាពលរដ្ឋនៅសង្កាត់ទឹកល្អក់ទី១ ក៏និងទទួលបាននូវអំណោយរបស់លោកស្រី និងក្រុមការងារនៅថ្ងៃ ៨មីនានេះ នៅឆ្នាំក្រោយបន្តទៀត៕

ដោយ៖ ស្រីរ័ត្ន

The post អភិបាលខណ្ឌទួលគោក៖ «សន្តិភាព» ជាបាយ និងជាអុកស៊ីសែន សម្រាប់មនុស្សគ្រប់រូប appeared first on Kampuchea Thmey Daily.

រដ្ឋបាលខណ្ឌទួលគោក បន្តចុះរៀបចំសណ្ដាប់ធ្នាប់ដូចភ្លៀងរលឹម លើផ្លូវ ២៣០ និង ផ្លូវ ២៣៩ តំបន់ផ្សារនាគមាស

អ៊ិន ពិសី — Sat, 28 Dec 2024 02:14:19 +0000

គណៈបញ្ជាការឯកភាពខណ្ឌទួលគោក បានចុះចាត់វិធានការរដ្ឋបាល និងកំណត់ព្រំឲ្យអ្នកលក់ដូរ នៅកំណាត់ផ្លូវលេខ ២៣៩ បរិវេណផ្សារនាគមាស កែងនឹងផ្លូវ ២៣០។

ជាក់ស្ដែងកាលពីព្រឹកថ្ងៃទី ២៧ ខែធ្នូ ឆ្នាំ ២០២៤ ម្សិលមិញនេះ រដ្ឋបាលខណ្ឌទួលគោក ដឹកនាំដោយ លោក ស៊ឹម សុផង់ អភិបាលរងទទួលបន្ទុកបរិស្ថានអនាម័យ សន្តិសុខសណ្ដាប់ធ្នាប់សាធារណៈ បានដឹកនាំកម្លាំងគណៈបញ្ជាការឯកភាពខណ្ឌទួលគោក ចុះចាត់វិធានការរៀបចំសណ្ដាប់ធ្នាប់ និងបាញ់ថ្នាំកំណាត់ព្រំ នៅកំណាត់ផ្លូវលេខ ២៣៩ បរិវេណផ្សារនាគមាស ដល់ផ្លូវម៉ៅសេទុង។

លោក ស៊ឹម សុផង់ អភិបាលរងខណ្ឌទួលគោក បានបញ្ជាក់ថា ការចុះរៀបចំសណ្ដាប់ធ្នាប់នេះ ចុះរៀបចំដូចភ្លៀងរលឹមតែម្ដង ដើម្បីណែនាំដល់ប្រជាពលរដ្ឋដែលលក់ដូរលើកំណាត់ផ្លូវលេខ ២៣០ និងផ្លូវលេខ ២៣៩ អាជ្ញាធរបានណែនាំ និងជូនដំណឹងជាច្រើនលើកច្រើនសាមកហើយ តែក្រុមអាជីវករទាំងនោះ ហាក់មិនចូលរួមសហការជាមួយអាជ្ញាធរ តែពេលនេះអាជ្ញាធរបានចុះលើកយកសម្ភារៈកល់តាំងលក់ មិនអនុញ្ញាតឲ្យបន្តយកផ្លូវតាំងលក់បែបនេះទៀតទេ។

លោកអភិបាលរង បន្ដទៀតថា ចំពោះរថយន្តដឹកទំនិញដែលនៅតែបន្តមកចតលើផ្លូវ ២៣៩ ក៏ដូចជាផ្លូវអាជ្ញាធរហាមឃាត់ ពេលដែលចត កម្លាំងសមត្ថកិច្ច នឹងចុះមកយករថយន្តទៅរក្សាទុកនៅសាលាខណ្ឌជាបណ្ដោះអាសន្ន។

សូមបញ្ជាក់ផងដែរថា កាលពីពេលថ្មីៗ មកនេះ អាជ្ញាធរខណ្ឌទួលគោក បានចុះអនុវត្តវិធានរដ្ឋបាលចំពោះអាជីវកលក់ដូរលើកំណាត់ផ្លូវលេខ ២៣០ ដោយអនុវត្តបានល្អប្រសើរ អាចធ្វើចរាចរណ៍ងាយស្រួលជាង ដោយអាជ្ញាធរអនុញ្ញាតឲ្យក្រុមអាជីវករលក់ពេលយប់បណ្ដោះអាសន្ន នៅចិញ្ចើមផ្លូវ តែត្រូវរក្សាសណ្ដាប់ធ្នាប់ ហើយព្រឹកឡើង នៅវេលាម៉ោង ៦ ព្រឹក ត្រូវតែរើចេញឲ្យអស់ បរិស្ថានអនាម័យ ត្រូវតែស្អាត៕

អត្ថបទ ៖ រដ្ឋា

The post រដ្ឋបាលខណ្ឌទួលគោក បន្តចុះរៀបចំសណ្ដាប់ធ្នាប់ដូចភ្លៀងរលឹម លើផ្លូវ ២៣០ និង ផ្លូវ ២៣៩ តំបន់ផ្សារនាគមាស appeared first on Kampuchea Thmey Daily.

អាជ្ញាធរខណ្ឌទួលគោក ចុះរុះរើតូបលក់ដូរតាមរបងមន្ទីរពេទ្យកុមារជាតិ ដើម្បីរៀបចំសណ្ដាប់ធ្នាប់ បញ្ចៀសការស្ទះចរាចរ

Sous Sith — Fri, 22 Dec 2023 07:38:42 +0000

អាជ្ញាធរខណ្ឌទួលគោក បានដាក់កម្លាំងចុះរុះរើតូបលក់ដូររបស់អាជីវករ និងអ្នកលក់ដូរ នៅតាមរបងមន្ទីរពេទ្យកុមារជាតិ ដើម្បីរៀបចំសណ្ដាប់ធ្នាប់ និងបញ្ចៀសការស្ទះចរាចរ។

ការចុះរៀបចំសណ្ដាប់ធ្នាប់នេះ ធ្វើឡើងនាថ្ងៃទី ២២ ខែធ្នូ ឆ្នាំ ២០២៣នេះ ក្រោយពីអាជ្ញាធរខណ្ឌទួលគោក បានចេញសេចក្ដីជូនដំណឹង ដល់ក្រុមអាជីវករលក់ដូរនៅតំបន់នេះ ជាច្រើនលើកច្រើនសារ រួចមកហើយ។

លោក ស៊ឹម សុផង់ អភិបាលរង ខណ្ឌទួលគោក បានមានប្រសាសន៍ប្រាប់កម្ពុជាថ្មី ឱ្យដឹងថា មូលហេតុដែលអាជ្ញាធរចុះមករុះរើ និងរៀបចំសណ្ដាប់ធ្នាប់ នៅទីតាំងជុំវិញបរិវេណមន្ទីរពេទ្យកុមារជាតិ ក្នុងបំណងធ្វើយ៉ាងណា មិនឱ្យកើតមានគ្រោះថ្នាក់ចរាចរជាយថាហេតុណាមួយ និងមិនឱ្យកើតមានការកកស្ទះចរាចរ នៅបណ្ដាផ្លូវមួយចំនួន ដែលស្ថិតនៅជុំវិញមន្ទីរពេទ្យកុមារជាតិនេះ។

លោកអភិបាលរង បន្ថែមថា ការចុះអនុវត្តរបស់អាជ្ញាធរនៅថ្ងៃនេះ គឺអ្នកលក់ដូរនៅទីនោះ បានចូលរួមសហការផុលផុស ខណៈអាជ្ញាធរបានចេញសេចក្ដីជូនដំណឹង ណែនាំពួកគាត់កន្លងមករួចមកហើយនោះ។

លោក ស៊ឹម សុផង់ បញ្ជាក់ទៀតថា ការចុះរៀបចំសណ្ដាប់ធ្នាប់នេះ មិនមែនសំដៅតែទីតាំងក្បែររបងមន្ទីរពេទ្យកុមារជាតិប៉ុណ្ណោះទេ។ ប៉ុន្តែកន្លងមក អាជ្ញាធរខណ្ឌទួលគោក បានចុះរៀបសណ្ដាប់ធ្នាប់ នៅតាមទីសាធារណៈផ្សេងៗទៀត ក្នុងភូមិសាស្រ្តខណ្ឌទួលគោក ជាបន្តបន្ទាប់ រហូតមក។ លោក បន្តថា រាល់ការលក់ដូរ ដែលយកចញ្ចើមផ្លូវធ្វើជាកន្លែងលក់ដូរ និងអាជីវកម្ម ផ្សេងៗ គឺមិនត្រូវបានអនុញ្ញាតឱ្យមានសកម្មភាពបែបនេះ តទៅទៀតឡើយ។

លោក ស៊ឹម សុផង់ ក៏សុំអំពាវនាវដល់អាជីវករ និងអ្នកលក់ដូរនានាទាំងអស់ សូមយោគយល់ អាធ្យាស្រ័យ និងចូលរួមសហការជាមួយអាជ្ញាធរ ដើម្បីរៀបចំសណ្ដាប់ធ្នាប់ នៅតាមដងវិថីទាំងអស់ ក្នុងភូមិសាស្រ្ដ ខណ្ឌទួលគោក ជៀសវាងកើតមាននូវការកកស្ទះចរាចរ និងគ្រោះថ្នាក់ចរាចរជាយថាហេតុ ជាដើម។

សូមជម្រាបជូនថា កន្លងមកអាជ្ញាធរខណ្ឌទួលគោក បានចេញសេចក្ដីជូនដំណឹង និងណែនាំដល់អាជីវករ និងអ្នកលក់ដូរ នៅតាមរបងមន្ទីរពេទ្យកុមារជាតិ ឱ្យរុះរើតូបលក់ដូររបស់ខ្លួនចេញ ដើម្បីឲ្យអាជ្ញាធររៀបចំសណ្ដាប់ធ្នាប់ និងបញ្ចៀសការកកស្ទះចរាចរ ផងដែរ៕

អត្ថបទ៖ សួស សិត

The post អាជ្ញាធរខណ្ឌទួលគោក ចុះរុះរើតូបលក់ដូរតាមរបងមន្ទីរពេទ្យកុមារជាតិ ដើម្បីរៀបចំសណ្ដាប់ធ្នាប់ បញ្ចៀសការស្ទះចរាចរ appeared first on Kampuchea Thmey Daily.