បើភ្ញៀវទេសចរទៅលេងខេត្តភូមិភាគឦសាន ពិសេស ខេត្តរតនគិរី នៅពេលគេទៅកម្សាន្តនៅទីជនបទចុងកាត់មាត់ញក គេនឹងបានស្តាប់ឮភាសា គ្រឹង ទំពួន ដែលភាសាទាំងនេះជនជាតិដើមភាគតិច ចូលចិត្តនិយាយរកគ្នាណាស់។ ពួកគេចូលចិត្តដំណាលគ្នាពីបុណ្យភូមិ ការសែនព្រេនពេលមានអ្នកឈឺថ្កាត់ សែនព្រេនកូនចៅយកគ្នាជាប្តីប្រពន្ធ ការផឹកស្រាពាង ជិះម៉ូតូតាមផ្លូវស្ពាយកាផា ទៅចម្ការទៅស្រែ ខ្លះក៏ដើរទៅចម្ការក៏មានដែរ។ ជីវិតបែបអ្នកស្រុកស្រែចម្ការ គឺងើបពីព្រឹកទៅចម្ការ លុះល្ងាចវិលទៅផ្ទះវិញ ការធ្វើដំណើរនេះមានរយៈពេលរាប់សិបគីឡូម៉ែត្រក៏មាន ព្រោះដីស្រែចម្ការភាគច្រើនស្ថិតនៅលើភ្នំតូចធំ ឬជើងភ្នំ។

ព្រោះតែការទៅធ្វើស្រែចម្ការមានចម្ងាយឆ្ងាយ និងរយៈពេលយូរបែបនេះហើយ ទើបកើតចេញនូវរឿងរ៉ាវផ្ទះខ្មោចនេះឯង។ តាំងពីដើមឡើយ ការធ្វើចម្ការវិលជុំ ផ្លាស់ប្ដូរទីកន្លែងកាប់ព្រៃ ធ្វើចម្ការពីកន្លែងមួយទៅកន្លែងមួយទៀត។ ចម្ការទាំងនោះទម្រាំដល់ពេល ត្រូវដាំស្រូវមានរយៈពេល៧ទៅ៨ឆ្នាំក៏មានដែរ ហើយវាមានចម្ងាយឆ្ងាយពីភូមិស្រុក ឬផ្ទះសម្បែង។ ហេតុនេះហើយ នៅពេលចាប់កាប់ព្រៃឈើធ្វើចម្ការ ជនជាតិដើមភាគតិចក៏ចាប់ផ្តើមធ្វើផ្ទះអំពីឈើចាប់ពី៦ ម៉ែត្រ និង៧ម៉ែត្រ អារឈើធ្វើជញ្ជាំង និងប្រក់សង្ក័សី មួយដាច់ដោយឡែកទៀតនៅត្រង់កន្លែងនោះតែម្តងទៅ។

អ្នកស្រី នាង គឺជាជនជាតិគ្រឹងដែលតែងតែទៅធ្វើរបរកសិកម្មឆ្ងាយ ហើយបានសង់ផ្ទះជាបន្តបន្ទាប់នៅលើដីធ្វើកសិកម្មនោះ។ គាត់ បានរៀបរាប់ប្រាប់ថា ពីដំបូងឡើយ គាត់់នៅក្នុងទីក្រុងបានលុង មានផ្ទះ២ខ្នង ទទឹង ៦ ម៉ែត្រ និង៧ ម៉ែត្រ នៅជិតសាលាក្មេងរៀន ដោយបានទិញជាមួយបងបង្កើតសម្រាប់រស់នៅ។ ក្រោយមកទៀត គាត់មានដីចម្ការនៅភូមិរបស់ម្តាយ គាត់ព្រមទាំងគ្រួសារក៏ទុកចោលផ្ទះនោះ មិនដែលទៅរស់នៅ និងជូតសម្អាត អស់រយៈពេល១៥ឆ្នាំមកហើយ។ បច្ចុប្បន្ន ផ្ទះកណ្តៀរស៊ី និងពុកផុយជិតរលំហើយ ពីព្រោះនៅស្រុកកំណើតខាងម្តាយ មានដីស្រែ និងចម្ការច្រើនកន្លែង សម្រាប់ដាំស្រូវ ដំឡូងមី និងស្វាយចន្ទី និងប្រកបលក់ដូរបាយម្ហូបឱ្យសិស្សសាលាផង។ ចំណែកកូនៗមិនទាន់មានគ្រួសារ ជាប់នៅរៀនសូត្រ ម៉្យាងវិញទៀត ពីមួយឆ្នាំទៅមួយឆ្នាំ មានអ្នកស្រុកភូមិលក់ដីឱ្យ គាត់ក៏បន្តទិញ ដើម្បីពង្រីកដាំដំឡូងមី និងស្រូវបន្លែមទៀត។

លោកស្រីបញ្ជាក់ថា ការខិតខំប្រឹងប្រែងនេះ ពីព្រោះចង់ផ្គត់ផ្គង់គ្រួសារ កូនៗ និងចៅទៅជំនាន់ក្រោយ កុំឱ្យខ្វះខាត។ ស្រ្តីជនជាតិដើមភាគតិចរូបនេះ ក៏បានប្រាប់ទៀតថា នៅតាមចម្ការនីមួយៗ គាត់ក៏មានផ្ទះ២ទៅ៣កន្លែងដែរ សព្វថ្ងៃគ្មានអ្នករស់នៅទេ ពីព្រោះផ្ទះទាំងនេះ ជាប្រភេទផ្ទះចម្ការ ដល់ពេលធ្លាក់ទឹកភ្លៀង ទើបទៅជូតសម្អាត និងធ្វើចម្ការម្តងម្កាលប៉ុណ្ណោះ។

មែនទែនទៅ តាមការនិយមធ្វើផ្ទះស្រែនេះ មានមកតាំងពីដូនតាមកដល់ពេលបច្ចុប្បន្ន ក៏នៅតែបន្តទៀត ពីព្រោះការវិលទៅវិញមក ផ្លូវពិបាកធ្វើដំណើរ យប់ព្រលប់ និងត្រូវចំណាយពេលវេលាយូរម៉ោង។ ការទៅធ្វើចម្ការកន្លែងផ្សេងនេះ មិនត្រឹមតែ១ ឬ២គ្រួសារទេ ពោល គឺនៅពេលធ្លាក់ទឹកភ្លៀងនៅតាមភូមិពុំសូវមានមនុស្ស រស់នៅផឹកស៊ីអ៊ូអរ ដូចរដូវប្រាំងបុណ្យទានផ្សេងៗឡើយ៕

ដោយ៖ ខៀវ ចាប

The post មកស្គាល់រឿងរ៉ាវផ្ទះខ្មោច គ្មានអ្នករស់នៅជាច្រើនកន្លែងរបស់ជនជាតិដើមភាគតិច ខេត្តរតនគិរី appeared first on Kampuchea Thmey Daily.

គោព្រៃ គឺជាសត្វចតុប្បាទដែលត្រូវបានចាត់ទុកសម្រាប់ជានិមិត្តរូបនៃព្រះរាជាណាចក្រកម្ពុជា ដោយបានទទួលស្គាល់ដោយព្រះរាជក្រឹត្យ។ តាមរយៈនៃការយកគោព្រៃធ្វើជាសត្វនិមិត្តរូបរបស់ប្រទេសកម្ពុជា គឺដើម្បីចង់បង្ហាញនូវមរតកធម្មជាតិដ៏មានតម្លៃ និងលើកតម្កើងនូវមោទនភាពជាតិ។ គោព្រៃ គឺជាប្រភេទថនិកសត្វស្លូត រស់នៅជាហ្វូងៗអាចឃើញមាននៅលាយឡំជាមួយហ្វូងសត្វទន្សោង ខ្ទីង ឬប្រើស។ គោព្រៃជាសត្វដែលមានភាពវាងវៃ រហ័សរហួន ឆាប់ភ្ញាក់ផ្អើលជាងប្រភេទសត្វក្នុងត្រកូលគោសាទិសដូចគ្នា ពូកែស្រង់ក្លិន និងគេចវេសចេញពីមនុស្ស។ គោព្រៃ ជាសត្វដែលមានកម្លាំងខ្លាំង ពូកែធន់នឹងកម្តីថ្ងៃ អត់ធន់នឹងចំណីអាហារដែលមានគុណភាពទាប និងធន់នឹងជំងឺគោឆ្គួត។

ចំណែក សត្វខ្ទីង មានមាឌធំ ខ្លួនខ្មៅ បូកក្រាស់លាតសន្ធឹងរហូតដល់ស្ទើរពាក់កណ្តាលខ្នង រីឯកវិញ ខ្លីបន្តិច រាងមាំ ដោយមានបួរនៅផ្នែកខាងក្រោម។ ជើងទាំងបួនរបស់វាចាប់ពីជង្គង់ចុះក្រោម មានពណ៌ប្រផេះ។ នៅលើថ្ងាស មានរោមវែងពណ៌ប្រផេះ ឬពណ៌លឿងមាសស្រាល។ កូនរបស់វាមានពណ៌ត្នោតរហូតដល់វាមានអាយុពី៤ទៅ៥ខែ ទើបក្លាយទៅជាពណ៌ខ្មៅ។ ខ្ទីងញីមានមាឌ និងស្នែងតូចជាងខ្ទីងឈ្មោល ហើយពុំសូវមានបូក និងបួរដូចខ្ទីងឈ្មោលទេ។ សត្វខ្ទីង អាចរស់នៅបានពីតំបន់ទំនាបរហូតដល់រយៈកម្ពស់២ ០០០ម៉ែត្រ (តំបន់ខ្ពង់រាប និងជួរភ្នំក្រវាញ)។ ខ្ទីងរស់នៅក្នុងព្រៃស្រោង ព្រៃរបោះៗ វាលស្មៅ និងអាចរស់នៅរយៈកម្ពស់ខ្ពស់ជាងទន្សោង។ ជាធម្មតា ខ្ទីងចេញរកស៊ីនៅពេលព្រឹក និងពេលល្ងាច។ វាចូលចិត្តរស់នៅជាហ្វូង ហើយអាហាររបស់វា គឺល្បាស់ខ្ចី ទំពាំង ស្មៅ និងវល្លិជាដើម។ ខ្ទីងញី អាចបង្កើតកូនបាន១ បន្ទាប់ពីពពោះរយៈពេល៩ខែ។

ចំពោះសត្វឈ្លូសយក្សវិញ វាអាចមានទម្ងន់៣៤គ.ក ឬក៏លើសពីនេះ។ ជាមធ្យមស្នែងវាមានប្រវែងរហូតដល់ទៅ២៨ស.ម មានរាងស្រួចនៅខាងចុង និងពីគល់ស្នែងដល់ខ្នែងមានប្រវែង១០ស.ម។ សត្វឈ្លូស មានរោមពណ៌ប្រផេះត្នោតរហូតដល់ពណ៌ដាំដែង និងមានឆ្នូតខ្មៅនៅថ្ងាស ព្រមទាំង មានពណ៌សនៅផ្នែកពោះ។ វាមានកន្ទុយខ្លីរាងត្រីកោណ និងមានពណ៌សនៅផ្នែកខាងក្រោម។ សម្រាប់សត្វទោម ឬ ឍាមរាវិញ វាច្រើនរស់នៅ និងធ្វើសំបុកនៅតាមតំបន់វាលភក់ ពិសេស តាមលើរុក្ខជាតិអណ្តែតទឹក និងតំបន់ស្រូវឡើងទឹក គេអាចរកឃើញវាដោយងាយនៅតាមតំបន់ជុំវិញបឹងទន្លេសាប នៅតំបន់អាងត្រពាំងថ្ម។ គេសនិដ្ឋានថា វាអាចមានរហូតដល់១ ៨០០ក្បាលឯណោះ (ឆ្នាំ២០០៥) និងនៅព្រែកទាល់ មានប្រហែល ១ ៧៨៤ក្បាល (ឆ្នាំ២០០៣) នៅកំពង់ឆ្នាំងមានប្រហែល១ ៥០០ក្បាល(ឆ្នាំ១៩៩៣)។ សត្វទោម មានវត្តមាននៅទូទាំងប្រទេសកម្ពុជា ហើយរដូវបន្តពូជចាប់ពីខែកុម្ភៈ ដល់ មិថុនា និងពងម្តងចន្លោះពី៣ទៅ៧ស៊ុត។

ដោយឡែក សត្វខ្លាឃ្មុំព្រះអាទិត្យ គេដាក់ឈ្មោះវាភ្ជាប់ជាមួយព្រះអាទិត្យ គឺដោយសារនៅផ្នែករោមទ្រូងពណ៌ក្រហមរបស់ពួកវា ដែលមានរាងជាអក្សរយូ (U) ឬរាងជារង្វង់មូល ដែលដូចទៅនឹងព្រះអាទិត្យ។ វាជាប្រភេទសត្វខ្លាឃ្មុំតូចជាងគេបំផុតក្នុងប្រទេសកម្ពុជា។ ពួកវាត្រូវបានគេប្រទះឃើញមានវត្តមាននៅក្នុងព្រៃក្រាស់ ជាកន្លែងដែលពួកវាអាចលាក់ខ្លួន និងចេញរកអាហារបន្ទាប់ពីមេឃងងឹត។ អាហាររបស់ខ្លាឃ្មុំប្រភេទនេះ គឺបន្លែ ផ្លែឈើ និងសត្វល្អិតដូចជា សត្វកណ្តៀរជាដើម។ ខ្លាឃ្មុំនេះ វាមានក្រញ៉ាំរឹងមាំណាស់ ហើយក្រញ៉ាំនេះអាចឱ្យពួកវាបំបែកសំបុកសត្វកណ្តៀរ សំបុកឃ្មុំ និងផ្លែដូងបានយ៉ាងងាយស្រួល។

ប្រភេទរូបសំណាកសត្វដែលដាក់បង្ហាញនៅរម្មណីយដ្ឋានបឹងកន្សែងនេះ ជាប្រភេទសត្វងាយរងគ្រោះ និងដោយកម្រដែលត្រូវបានចុះក្នុងបញ្ជីក្រហមរបស់សហភាពអន្តរជាតិដើម្បីអភិរក្សធនធានធម្មជាតិ(International Union for Conservation of Nature)។ លោក ញ៉ែម សំអឿន អភិបាលខេត្តរតនគិរី បានលើកឡើងថា បឹងធម្មជាតិមួយនេះ បានប្រែមុខមាត់ថ្មីដ៏ស្រស់ត្រកាល និងបានក្លាយជាកន្លែងដែលមានបរិស្ថានស្អាត សោភណ្ឌភាពល្អ និងជារមណីយដ្ឋានល្អឯកប្រកបដោយភាពទាក់ទាញ ដោយមានការរៀបចំដាក់ឧបករណ៍ហាត់ប្រាណ និងឧបករណ៍សម្រាប់ក្មេង ជិះលេងតាមមាត់បឹង មានខ្សែរ៉តជិះលេងកម្សាន្ត មានរៀបចំសួនច្បារស្រស់បំព្រង និងបំពាក់ភ្លើងបំភ្លឺសាធារណៈ សាងសង់រូបសំណាកគ្រួសារដំរី រូបសំណាក់សត្វ អក ព្រមទាំងរូបសំណាកសត្វដ៏ទៃច្រើនទៀត គួរជាទីចាប់អារម្មណ៍យ៉ាងខ្លាំង។

បឹងកន្សែង គឺជាបឹងធម្មជាតិមួយស្ថិតនៅចំកណ្តាលបេះដូងនៃខេត្តរតនគិរី និងជាតំបន់រមណីយដ្ឋានទេសចរណ៍ដ៏មានសក្តានុពលបំផុតមួយនៅក្នុងខេត្តនេះ។ បច្ចុប្បន្ន រមណីយដ្ឋានបឹងកន្សែង ជាកន្លែងដ៏ទាក់ទាញបំផុតរបស់ប្រជាពលរដ្ឋក្នុងក្រុងបានលុង និងភ្ញៀវទេសចរជាតិ អន្តរជាតិ ឱ្យមកគយគន់ជាមួយសម្រស់ធម្មជាតិដ៏ស្រស់ត្រកាល និងជាទីកន្លែងហាត់ប្រាណដ៏ពេញនិយមរបស់មន្រ្តីរាជការ និងប្រជាពលរដ្ឋក្នុងក្រុងបានលុង។ បឹងកន្សែង មានបរិស្ថានស្អាត សោភណ្ឌភាពល្អ ប្រកបដោយអនាម័យខ្ពស់ ហេដ្ឋារចនាសម្ព័ន្ធជុំវិញបរិវេណមាត់បឹងស្រស់ស្អាត មានរៀបចំសួនច្បារស្រស់បំព្រង និងបំពាក់ភ្លើងបំភ្លឺសាធារណៈយ៉ាងព្រោងព្រាត។ ភ្ញៀវទេសចរដែលបានទៅលេងកម្សាន្តនៅបឹងនេះហើយ គឺទទួលបានអារម្មណ៍ស្រស់ស្រាយ និងបង្កើតអនុស្សាវរីយ៍ល្អៗជាច្រើនដែលមិនអាចបំភ្លេចបាន៕

ដោយ៖ ខៀវ ចាប

The post មុនបុណ្យចូលឆ្នាំថ្មីមកដល់ ខេត្តរតនគិរី បន្ថែមរូបសំណាកសត្វថ្មីៗ ដើម្បីលម្អបឹងកន្សែងឱ្យកាន់តែទាក់ទាញ appeared first on Kampuchea Thmey Daily.

គម្រោងអាហារូបត្ថម្ភនៅកម្ពុជា គឺជាការផ្តួច ផ្តើមមួយដ៏សំខាន់របស់រាជរដ្ឋាភិបាលកម្ពុជា ក្នុងគោលបំណងជំរុញការវិនិយោគ និងការកសាងធនធានមនុស្សដើម្បីរួមចំណែកពន្លឿនការអភិវឌ្ឍសេដ្ឋកិច្ចជាតិ ជាពិសេស ឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលបានកំណត់អាទិភាពគន្លឹះ ចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ដើម្បីពង្រឹងការអនុវត្តគម្រោងអាហារូបត្ថម្ភនៅកម្ពុជាផ្សាយសេចក្តីណែនាំស្តីពីការអនុវត្តគម្រោងប្រចាំឆ្នាំ២០២៥។

គម្រោងអាហារូបត្ថម្ភនៅកម្ពុជានេះ ត្រូវបានសហការឧបត្ថម្ភ ថវិកាដោយរាជរដ្ឋាភិបាលកម្ពុជា និងធនាគារពិភពលោក ព្រមទាំងដៃគូអភិវឌ្ឍន៍នានា ដើម្បីធ្វើឱ្យប្រសើរឡើង នូវគុណភាពនៃការផ្តល់សេវាជាអាទិភាព សម្រាប់សុខភាពមាតា ទារក កុមារ និងអាហារូបត្ថម្ភប្រកបដោយប្រសិទ្ធភាព។

លោកស្រី ញាន ទិត្យចិន្តា មានប្រសាសន៍ថា ខេត្តរតនគិរី បានចាប់ផ្តើមអនុវត្តគម្រោងនេះ ចាប់តាំងពីឆ្នាំ២០២០ នៅស្រុកអណ្តូងមាស ហើយរហូត មកដល់ពេលនេះ បានពង្រីកគ្រប់ទាំង ៥០ឃុំ សង្កាត់ និង ៩ក្រុង ស្រុក រួចហើយ។ ប៉ុន្តែ ឆ្លងតាមរយៈការបណ្តុះបណ្តាលបណ្តើរ និងអនុវត្តបណ្តើរកន្លងមកនេះ ថ្នាក់ដឹកនាំខេត្តបានពិនិត្យឃើញថា មានក្រុង ស្រុក ឃុំ សង្កាត់ មួយចំនួនអនុវត្តមិនទាន់បានល្អនៅឡើយ មានន័យថា នៅមានចន្លោះខ្វះខាតមួយចំនួនដែលត្រូវកែលម្អឡើងវិញ។ ដូច្នេះទើប ក្រុមការងារបច្ចេកទេសថ្នាក់ខេត្ត ប្រជុំផ្សព្វផ្សាយសេចក្តីណែនាំស្តីពីការអនុវត្តគម្រោង អាហារូបត្ថម្ភនៅកម្ពុជា ប្រចាំឆ្នាំ២០២៥ និងការងារចាំបាច់មួយចំនួនទៀត ដែលទាក់ទងទៅនឹងការវាយតម្លៃ នៅក្នុងឆមាសទី១ ឆ្នាំ២០២៥៕

ដោយ៖ ខៀវ ចាប

The post រដ្ឋបាលខេត្តរតនគិរី ប្រជុំពង្រឹងការអនុវត្តគម្រោងអាហារូបត្ថម្ភនៅកម្ពុជា ប្រចាំឆ្នាំ២០២៥ appeared first on Kampuchea Thmey Daily.

គណៈប្រតិភូខេត្តរតនគិរី ដឹកនាំដោយលោក ញ៉ែម សំអឿន អភិបាលខេត្តរតនគិរី កាលពីថ្ងៃទី០៨ ខែមីនា ឆ្នាំ២០២៥ បានចុះសួរសុខទុក្ខពិនិត្យវឌ្ឍនភាពការងារស្ថាបនាផ្លូវក្រវាត់ព្រំដែនទិសរតនគិរី ក្នុងភូមិសាស្រ្តស្រុកអណ្តូងមាស ដែលកំពុងស្ថាបនាដោយកងឯកភាពស្ថាបនាថ្នល់-ស្ពាន ញ្ជាការដ្ឋានវិស្វកម្ម អគ្គបញ្ជាការដ្ឋានកងយោធពលខេមរភូមិន្ទ។

នៅក្នុងឱកាសនោះ លោក ញ៉ែម សំអឿន បានកោតសរសើរចំពោះ មេបញ្ជាការ មេបញ្ជាការរង និងនាយទាហាន នាយទាហានរង ពលទាហាន កងឯកភាព នៃបញ្ជាការដ្ឋានវិស្វកម្ម ដែលក្នុងរយៈពេលកន្លងមក បានយកចិត្តទុកដាក់ ពុះពារជម្នះរាល់ឧបសគ្គ គ្រោះថ្នាក់ ការលំបាកនិងធ្វើពលិកម្មគ្រប់បែបយ៉ាង ខិតខំប្រឹងប្រែង ធ្វើការស្ថាបនាផ្លូវខ្សែក្រវាត់ព្រំដែនកម្ពុជា-វៀតណាម ក្នុងភូមិសាស្ត្រខេត្តរតនគិរី ដែលរហូតមកដល់ថ្ងៃនេះគឺសម្រេចបានលទ្ធផលយ៉ាងច្រើន។

លោកអភិបាលខេត្ត បន្តថា សមិទ្ធផលផ្លូវខ្សែក្រវាត់ព្រំដែនទាំងអស់នេះ គឺជាមរតកប្រវត្តិសាស្រ្ត មានតម្លៃជាយុទ្ធសាស្ត្រមិនអាចកាត់ថ្លៃបាន ហើយសម្រេចចេញជារូបរាងយ៉ាងល្អរឹងមាំពីម្លប់សន្តិភាព ក្រោមការដឹកនាំរបស់រាជរដ្ឋាភិបាល នីតិកាលទី៧ មានសម្តេចធិបតី ហ៊ុន ម៉ាណែត ជាប្រមុខដឹកនាំ បានបន្តអនុវត្តនយោបាយកសាងព្រំដែនដែលសម្ដេចតេជោ ហ៊ុន សែន បានដាក់ចេញការកសាងខ្សែព្រំដែនជាប់ជាមួយប្រទេសជិតខាង ជាព្រំដែនសន្តិភាព មិត្តភាព សហប្រតិបត្តិការ និងកាអភិវឌ្ឍ ប្រកបដោយចីរភាព៕

The post កម្លាំងវិស្វកម្ម កំពុងពន្លឿនការស្ថាបនាផ្លូវក្រវាត់ព្រំដែនក្នុងភូមិសាស្រ្តស្រុកអណ្តូងមាស appeared first on Kampuchea Thmey Daily.

ការរៀបចំព្រឹត្តិការណ៍នេះឡើង ដោយមានគំនិត្តផ្តួចផ្តើមពីប្រជាពលរដ្ឋ សហការជាមួយរដ្ឋបាលខេត្ត ដើម្បីបង្កើតព្រឹត្តិការណ៍សប្បាយៗ។ បើតាមលិខិត កម្មវិធីរត់ពាក់កណ្ដាលម៉ារ៉ាតុងនេះ ក្នុងគោលបំណងលើកស្ទួយកីឡានាំមកនូវសុខភាព កីឡានាំមកនូវសន្តិភាព និងដើម្បីលើកស្ទួយវិស័យទេសចរណ៍ ក្នុងខេត្តរតនគិរី។

សូមបញ្ជាក់ថា ព្រឹត្តិការណ៍នេះ ប្រព្រឹត្តទៅនាថ្ងៃសៅរ៍ ទី០១ ខែកុម្ភៈ ឆ្នាំ២០២៥ វេលាម៉ោង ៤៖០០នាទីរសៀល នៅទីតាំងវាលថ្មដារអូរជុំ មកដល់បឹងកន្សែងថែម ៤ជុំ ទីផ្តាច់ព្រ័តនៅទីតាំងរូបសំណាកគ្រួសារដំរី ដែលមានចំងាយសរុប ២១គីឡូម៉ែត្រ។ ជាមួយគ្នានេះ រដ្ឋបាលខេត្តក៏បានអំពាវនាវឱ្យប្រជាពលរដ្ឋចូលរួមក្នុងកម្មវិធីនេះឱ្យបានច្រើកុះករផងដែរ៕

The post រដ្ឋបាលខេត្តរតនគិរី នឹងរៀបចំព្រឹត្តិការណ៍រត់ពាក់កណ្តាលម៉ារ៉ាតុង នៅដើមខែកុម្ភៈ ដើម្បីលើកស្ទួយវិស័យទេសចរណ៍ appeared first on Kampuchea Thmey Daily.

ជាក់់ស្តែងបច្ចុប្បន្ន មានរៀបចំសណ្ដាប់ធ្នាប់ ការតុបតែងលំអតាមទីសាធារណៈ ការតុបតែងដាក់់ភ្លើងចម្រុះពណ៌តាមដងវិថីសំខាន់ៗប្រកបដោយភាពទាក់ទាញ។

ជាមួយគ្នានេះ មានរៀបចំដាក់រូបដំរី នៅទល់មុខសណ្ឋាគារតេរ៉ូ ដើម្បីឱ្យប្រជាពលរដ្ឋ ចូលមកថតទុកជាអនុស្សាវរីយ៍ ហើយមួយផ្នែកទៀតមានការ ស្ដារបាតបឹងដែលមានដីច្រើន ឱ្យមានជម្រៅទឹកឡើងវិញ និងឈូសឆាយបរិវេណជុំវិញមាត់បឹងកន្សែង ឱ្យមានសោភ័ណភាពល្អប្រសើរជាងមុន។

គួរបញ្ជាក់ថា រដ្ឋបាលខេត្តរតនគិរី នឹងរៀបចំព្រឹត្តិការណ៍ «សង្ក្រាន្តរតនគិរី» ឆ្នាំ២០២៤ រយៈពេល ៤ថ្ងៃ ចាប់ពីថ្ងៃទី១៣ ដល់ ១៦ ខែមេសា ឆ្នាំ២០២៤ នៅក្នុងបរិវេណមន្ទីរវប្បធម៌ និងវិចិត្រសិល្បៈខេត្តរតនគិរី ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង។

អត្ថបទ៖ វុទ្ធឦសាន

The post រដ្ឋបាលខេត្តរតនគិរី ត្រៀមរួចស្រេចស្វាគមន៍ភ្ញៀវទេសចរនាឱកាសបុណ្យចូលឆ្នាំ appeared first on Kampuchea Thmey Daily.

ពិធី​ប្រកាស​តែង​តាំង​នេះ ​បាន​រៀប​ចំ​ឡើង​នា​រសៀល​ថ្ងៃ​ទី​១៥ ​ខែ​មីនា ​ឆ្នាំ២០២៤ នៅ​សាល​ប្រជុំ​សាលា​ខេត្ត​អគារ D ដែល​មាន​វត្តមាន លោក ណាប់ ប៊ុនហេង ប្រធាន​ក្រុមប្រឹក្សាខេត្ត ​និង​លោក ញ៉ែម សំអឿន អភិបាលខេត្ត ជា​គណៈ​អធិបតី ព្រម​ទាំង​មាន​ការ​ចូល​រួម​ពី​សំណាក់​ លោក លោកស្រី អភិបាល​រង​ខេត្ត ​លោក​មេ​បញ្ជាការ​កង​កម្លាំង​ទាំង​បី ​និង​លោក​អភិបាល​ក្រុង​ស្រុកផងដែរ។

បន្ទាប់​ពី​អាន​ដី​កាប្រកាស​តែង​តាំង​របស់​រដ្ឋបាល​ខេត្ត លោក ជា សានិត ប្រធាន​មន្ទីរ​សុខាភិបាល ដែល​ទើប​តែង​តាំង​ថ្មី ​ក៏​បាន​ឡើង​ប្ដេជ្ញា​ចិត្ត​ថា ​គោរព​ប្រតិបត្តិ​ឲ្យ​បាន​ម៉ឺងម៉ាត់​នូវ​ច្បាប់ ​រដ្ឋធម្មនុញ្ញ លិខិត​បទដ្ឋាន​គតិ​យុត្តិនានា​ចូល​ជា​ធរមាន ​ជាពិសេស​ចូល​រួម​អនុវត្ត​តាម​កម្មវិធីនយោបាយ និង​យុទ្ធសាស្ត្រ ​បញ្ចកោណ​ដំណាក់​កាល​ទី​១​ នីតិកាល​ទី៧​របស់​រាជរដ្ឋាភិបាល​កម្ពុជា ​សំដៅ​ទៅ​លើ​ការ​ ធានា​គុណភាព ​ប្រសិទ្ធភាព​ក្នុង​ការ​ផ្តល់​សេវា​សុខភាព​សាធារណៈ​ជូន​ប្រជាពលរដ្ឋ​ ជាពិសេ​ស​បន្ត​អភិវឌ្ឍវិស័យ​សុខាភិបាលក្នុងខេត្តរតនគិរី​ ឲ្យ​ស្រប​តាម​ប្រសាសន៍​ដ៏​ខ្ពង់​ខ្ពស់ ​របស់​ សម្តេច​មហាបវធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជាណាចក្រកម្ពុជា។

ប្តេជ្ញាគោរព ​និង​អនុវត្តឲ្យ​បាន​ម៉ឺងម៉ាត់ នូវ​គោល​ការ​ណែ​នាំ​ ​របស់​ថ្នាក់​ដឹក​នាំ​រដ្ឋបាល​ខេត្ត​ និង​ក្រសួង​សុខាភិបាល ​ដោយ​ប្រកាន់​ភ្ជាប់​នូវ ​ឆន្ទៈ​ម្ចាស់​ការ ​មន​សិការ​វិជ្ជាជីវៈ ​ភក្តីភាព​ និង​វប្បធម៌​សេវាសាធារណៈ ​ដោយ​អនុវត្ត​តាម​ប្រសាសន៍​ណែ​នាំ​ដ៏​ខ្ពង់​ខ្ពស់​របស់ ​លោក​សាស្ត្រាចារ្យ ឈាង រ៉ា រដ្ឋមន្ត្រី​ក្រសួងសុខាភិបាល “ទុក្ខ​លំបាក​របស់​អ្នក​ជំងឺ​ក៏​ជា ​ទុក្ខ​លំបាក​របស់​គ្រូពេទ្យ”។

ជាមួយ​នឹង​បង្កើន​ស្មារតី​ទទួល​ខុស​ត្រូវ​ខ្ពស់ ​ក្នុង​ការ​ការ​ពារ​ថែ​ រក្សា​ឲ្យ​បាន​គង់​វង្ស​នូវ​សមិទ្ធិផល​នានា​ដែល​បាន​កសាង​មក ​និង​បន្ត​អភិវឌ្ឍ​មូលដ្ឋានសេវា សុខាភិបាលឲ្យកាន់ តែល្អប្រសើរ។

ក្នុងឱកាសនោះ លោក ញ៉ែម សំអឿន ក៏បានធ្វើការណែនាំឱ្យ​លោក​ប្រធាន​មន្ទីរ​សុខាភិបាល​ខេត្ត​ដែល​ចូល​កាន់​មុខ​តំណែង​​ថ្មី រួម​ទាំង​ថ្នាក់ដឹកនាំ មន្ត្រីរាជការ ​នៃ​វិស័យ​សុខាភិបាល​ ត្រូវ​រួម​សហការ​គ្នា​អនុវត្ត​ការងារ​សំខាន់ៗ ​ជា​អាទិភាព​ចំនួន​៧​ចំណុច​រួម​មាន​ ​៖

១.ត្រូវចូលរួមសហការពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ទំនាក់ ទំនង​ការងារ​ឲ្យ​បាន​ល្អ​នៅ​ក្នុង​អង្គភាព​របស់​ខ្លួន​ ដោយ​ឈរ​លើ​មូលដ្ឋាន​នៃ​ការ​លើក​កម្ពស់​ប្រសិទ្ធភាព ​និង​ធានា​និរន្តរភាព​ការងារ​របស់​ខ្លួន​ឲ្យ​កាន់​តែ​មាន​ភាព​ល្អ​ប្រសើរ​។​

២.ត្រូវចូលរួមលើកកម្ពស់ការផ្តល់សេវាសាធារណៈជូនប្រជាពលរដ្ឋឲ្យបានល្អប្រសើរ មាន​ប្រសិទ្ធភាព ​និង​មិន​រើស​អើង ដើម្បី​ឆ្លើយ​តប​តាម​តម្រូវ​ការ​របស់​មូលដ្ឋាន​។​

៣.ត្រូវ​យក​ចិត្ត​ទុក​ដាក់​រៀប​ចំ​គ្រូ​ពេទ្យ​វេជ្ជបណ្ឌិត​ប្រចាំ​ការ​ជាប់​គ្រប់​វេន​យាម​ពេល​ថ្ងៃ ​និង​ពេល​យប់​,​ ត្រូវ​ប្រើ​ប្រាស់​មន្ត្រី​ឲ្យ​ស្រប​តាម​ជំនាញ​វិជ្ជាជីវៈ​របស់​មន្ត្រីម្នាក់ៗ, ត្រូវ​មាន​អាកប្បកិរិយា​ សីលធម៌​ប្រើ​ពាក្យ​សំដី ​ទន់​ភ្លន់​គួរ​សម ​អត់​ធ្មត់​ជាមួយ​អ្នក​ជំងឺ ត្រូវ​គោរព​វិន័យ​ម៉ោង​បម្រើ​ការងារ​ និង​ត្រូវ​យក​ចិត្ត​ទុក​ដាក់​ពិនិត្យ​រាល់​ការ​ផ្ទេរ​ផ្លាស់​ប្តូរ​កន្លែង​​បម្រើ​ការងារ​របស់​មន្ត្រី​កុំ​ឲ្យ​ខ្វះ​មន្ត្រី​ផ្តល់​សេវា។​

៤.ត្រូវការពារផលប្រយោជន៍មន្ត្រីរាជការស៊ីវិល ដោយ​ផ្អែក​លើច្បាប់​សហលក្ខន្តិកៈ​មន្ត្រី​រាជការ​ស៊ីវិល ឬ​លិខិតបទដ្ឋានគតិយុត្តជាធរមាន។

៥-ត្រូវ​សហការ​ជាមួយ​មន្ទីរ អង្គភាព​ជំនាញ​ជុំ​វិញខេត្ត សមត្ថកិច្ច​ពាក់ព័ន្ធ ​និង​អាជ្ញាធរ​គ្រប់​ ជាន់​ថ្នាក់​ឲ្យ​បាន​ល្អ​ប្រសើរ​។​

៦-ត្រូវ​មាន​គំនិត​ផ្តួច​ផ្តើម ​សិក្សា​ស្រាវ​ជ្រាវ ​ស្វែង​យល់​បន្ថែម​ពាក់ព័ន្ធ​នឹង​ច្បាប់​ និង​លិខិត​បទដ្ឋាន​បន្ថែម​ទៀត។

៧-ត្រូវ​យក​ចិត្ត​ទុក​ដាក់​ ក្នុង​ការ​កែ​លំអរសោភ័ណភាព អនាម័យ បរិស្ថានក្នុង និងក្រៅបរិវេណមន្ទីរ។

​យោង​តាម​ដីកា​របស់​រដ្ឋបាលខេត្តរតនគិរី លេខ០០១/២៤ ដក.តត ចុះថ្ងៃទី៥ ​ខែ​មករា ​ឆ្នាំ​២០២៤​ ស្តី​ពី​ការ​តែង​តាំង​មន្រ្តីរាជការសម្រេចតែងតាំងលោក ជា សានិត ជា​ប្រធាន​មន្ទីរសុខាភិបាល​នៃ​រដ្ឋបាល​ខេត្តរតនគិរី ជំនួស​លោក អ៊ុង រតនា ដែល​ត្រូវ​បានបញ្ចប់មុខ​តំណែង និងទទួលភារកិច្ចថ្មី៕

អត្ថបទ៖ វុទ្ធឦសាន

The post លោក​ ជា សានិត ​ត្រូវ​បាន​ប្រកាស​ចូល​កាន់​តំណែង​ជា​ប្រធាន​មន្ទីរសុខាភិបាល ជំនួស​លោក​ អ៊ុង រតនា ត្រូវ​បាន​បញ្ចប់​ពី​តួនាទី​ appeared first on Kampuchea Thmey Daily.

រដ្ឋបាលខេត្តបានចេញមកស្នើសុំទៅកាន់ប្រជាពលរដ្ឋបែបនេះ គឺបន្ទាប់ពីរដ្ឋបាលខេត្តសង្កេតឃើញថា មានពលរដ្ឋ បានជឿលើមេក្លោង មេខ្យល់  ដែលញុះញង់ឱ្យទន្រានដី និងមានអ្នកប៉ុនប៉ងទន្រានដីព្រៃដោយខុសច្បាប់លើដីស្ថានីយស្ដារព្រៃឈើឡើងវិញដែលស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ។

គួរឱ្យដឹងថា រាជរដ្ឋាភិបាលកម្ពុជា បានប្រគល់ទីតាំងដីស្ថានីយស្តារព្រៃឈើឡើងវិញ ដែលស្ថិតនៅស្រុកកូនមុំ ខេត្តរតនគិរីនេះ  ជូនក្រសួងកសិកម្ម រុក្ខាប្រមាញ់ និងនេសាទ ប៉ុន្តែកន្លងមកគេសង្កេត ឃើញថាមានសកម្មភាពរំលោភទន្ទ្រានកាន់កាប់ដីនេះដោយខុសច្បាប់។

នៅមុនការចេញសេចក្ដីជូនដំណឹងនាពេលនេះ ពោលគឺកាលពីថ្ងៃទី២៦ ខែមករា ឆ្នាំ២០២៤ អភិបាលរងខេត្តរតនៈគិរី លោក ខ័ណ្ឌ ចំណន បានដឹកនាំកម្លាំងសមត្ថកិច្ចជំនាញចម្រុះស្ថាប័នចុះពិនិត្យជាក់ស្ដែងអំពីស្ថានភាពកាប់បំផ្លាញទន្រ្ទានដីព្រៃរបស់រដ្ឋយកធ្វើជាកម្មសិទ្ធិឯកជន នៅទីតាំងចំនួន ៤ ស្ថិតក្នុងភូមិកាំបាក់ ឃុំតឺន ស្រុកកូនមុំ ខេត្តរតនគិរី។  

ជាលទ្ធផល សមត្ថកិច្ចជំនាញបានរកឃើញថា ទីតាំងទី១ ត្រង់ចំណុចទំពាំងកំភេន និយាមកាលេខ០៦៨៣២១០-១៥១៦៧៦៩ ទីតាំងទី២ ត្រង់ចំណុចជើងភ្នុំគ្រែខាងត្បូងនិយាមកាលេខ០៦៨២៨១៩-១៥១៧២៧៤ ទីតាំងទី៣ ត្រង់ចំណុចខ្នងភ្នុំគ្រែនិយាមកាលេខ០៦៨២៤៣៦-១៥១៩១៤៣ និងទីតាំងទី៤ ស្ថិតនៅជើងភ្នុំគ្រែខាងជើងនិយាមកាលេខ០៦៨២៣៣៩-១៥២០១៧៩ ត្រូវបានកាប់ទន្ទ្រានភាគច្រើនជាដីកាប់ទន្រានរានចាស់ និងថ្មី ប៉ុន្តែបច្ចុប្បន្នដីខ្លះ ត្រូវបានប្រជាពលរដ្ឋដាំដំឡូងមី ដីខ្លះទៀតដាំកៅស៊ូ ស្វាយចន្ទី ហើយត្រង់ទីតាំងទី៤ គឺមានពលរដ្ឋកសាងសាលាបុណ្យ ដោយមិនទាន់ប្រក់ដំបូល ថែមមានព្រះសង្ឃគង់នៅទីនោះ៕

អត្ថបទ៖ វុទ្ធឦសាន

The post អាជ្ញាធរ ឱ្យពលរដ្ឋឈប់រំលោភយកដីព្រៃ តាមមេក្លោងញុះញង់ និងចាកចេញពីដីស្ថានីយស្ដារព្រៃឈើជាបន្ទាន់ appeared first on Kampuchea Thmey Daily.