លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាលបានណែនាំឱ្យមន្ត្រីសុខាភិបាលតាមព្រំដែនទឹក គោកនិងអាកាសត្រូវត្រួតពិនិត្យរាល់ជំងឺឆ្លងនានាហើយក្នុងករណីរកឃើញសង្ស័យជំងឺឆ្លងណាមួយត្រូវបញ្ជួនអ្នកជំងឺទៅដាក់ដាច់ដោយឡែកនិងយកសំណាកទៅធ្វើតេស្តនៅមន្ទីរពិ សោធន៍ដើម្បីរកជំងឺឆ្លងនោះដើម្បីព្យាបាលឱ្យទាន់ពេលវេលានិងកាត់បន្ថយការចម្លងទៅមនុស្សផ្សេងទៀត។

លោកវេជ្ជបណ្ឌិត លី សូវ៉ាន់បានមានប្រសាសន៍នៅព្រឹកថ្ងៃទី១៣ឧសភានេះថាទោះបីជាបច្ចុប្បន្ននេះវីរុហាន់តាមិនទាន់មានឆ្លងនៅកម្ពុជាឬក្នុងតំបន់យើងនៅឡើយក៏ដោយក៏យើងត្រូវប្រុងប្រយ័ត្នធ្វើយ៉ាងណាកុំឱ្យមានឆ្លងនាំចូលមកប្រទេសយើងព្រោះថារហូតមកដល់ពេលនេះនៅមិនទាន់មានវ៉ាក់សាំងឬឱសថព្យាបាលជំងឺនេះនៅឡើយទេប៉ុន្តែអាចព្យាបាលគាំទ្រវេជ្ជសាស្ត្របានអាស្រ័យទៅលើការមកមន្ទីរពេទ្យទាន់ពេលវេលារបស់អ្នកជំងឺ។

លោកវេជ្ជបណ្ឌិត លី សូវ៉ាន់បានបន្តថាយ៉ាងណាក៏ដោយជំងឺហាន់តា នេះតាមអង្គការសុខភាពពិភពលោកការឆ្លងមានកម្រិតទាបណាស់បើធៀបនឹងជំងឺផ្តាសាយបក្សីនិងជំងឺកូវីដ១៩។រីឯអត្រាស្លាប់ក៏តិចជាងដែរ។មនុស្សអាចឆ្លងវីរុសនេះតាមរយៈការប៉ះពាល់ជាមួយសត្វកកេរ(កណ្តុរ កំប្រុក ស្កា សំពោច)ជាពិសេសទឹកនោម លាមក និងទឹកមាត់របស់វា។ ការឆ្លងតាមរយៈការខាំ ឬខ្វាចដោយសត្វកកេរ អាចកើតមាន ប៉ុន្តែកម្រ។ មនុស្សវីរុសនេះមានរោគសញ្ញាដូចជាអស់កម្លាំង គ្រុនក្តៅ ឈឺសាច់ដុំ ឈឺក្បាល វិលមុខ ឈឺពោះ ចង្អោ ក្អួត រាក ក្អក ពិបាកដកដង្ហើម។ករណីធ្ងន់ធ្ងរអាចបណ្តាលឱ្យរលាកសួត និងខ្សោយប្រព័ន្ធដកដង្ហើម និងហូរឈាមក្នុងសរីរាង្គ ។

លោកវេជ្ជបណ្ឌិត លីសូវ៉ាន់ បានណែនាំឱ្យប្រជាពលរដ្ឋត្រូវរក្សាអនាម័យផ្ទះសម្បែង កន្លែងធ្វើការ និងបរិស្ថានជុំវិញឱ្យស្អាត។បិទច្រកចូលរបស់សត្វកកេរជាពិសេសកណ្តុរ និងកម្ចាត់កន្លែងដែលអាចជាជម្រករបស់សត្វកកេរ។ក្នុងករណីមានអាការៈសង្ស័យដូចជា គ្រុនក្តៅ ក្អក ពិបាកដកដង្ហើម និងមានប្រវត្តិត្រូវបានខាំ ឬប៉ះ ពាល់ជាមួយសត្វកកេរ (កណ្តុរ កំប្រុក ស្តា សំពោច) ទឹករងៃ ទឹកនោម លាមក ឬមានប្រវត្តិធ្វើ ដំណើរមកពីតំបន់ដែលរាតត្បាតដោយជំងឺបង្កដោយវីរុសហាន់តា ក្នុងរយ:ពេលពី១ទៅ៨សប្តាហ៍ កន្លងមក សូមទៅពិនិត្យនិងពិគ្រោះយោបល់ ជាមួយមណ្ឌលសុខភាព ឬមន្ទីរពេទ្យដែលនៅជិតលោក អ្នកជាបន្ទាន់។

គួរបញ្ជាក់ថា ថ្មីៗនេះមានការឆ្លងជំងឺបង្កដោយវីរុសហាន់តា រកឃើញលើភ្ញៀវធ្វើដំណើរនៅលើនាវា ទេសចរណ៍មួយគ្រឿងដែលមានទង់ជាតិហូឡង់ និងផ្ទុកអ្នកដំណើរមកពី២៨ប្រទេស ដោយមានករណីសង្ស័យ ៨នាក់ បញ្ជាក់វិជ្ជមាន ៥នាក់ និងស្លាប់ ៣នាក់។ ការឆ្លងត្រូវបានសង្ស័យថាពាក់ព័ន្ធនិងការប៉ះពាល់សត្វកណ្តុរ នៅភាគខាងត្បូងប្រទេសអាហ្សង់ទីន៕

អត្ថបទ ៖ សំអឿន

The post មន្ត្រីជាន់ខ្ពស់ជំរុញឱ្យបង្កើនការយកចិត្តទុកដាក់ខ្ពស់ចំពោះវីរុសឆ្លងថ្មីៗពិសេសវីរុសហាន់តា appeared first on Kampuchea Thmey Daily.

ការលើកឡើងរបស់ លោកសាស្ត្រាចារ្យ រដ្ឋមន្ត្រីនេះ បានធ្វើឡើងកាលពីថ្ងៃទី ៨ ខែមេសា ឆ្នាំ ២០២៦ ក្នុងឱកាសដឹកនាំគណៈប្រតិភូក្រសួងសុខាភិបាល អញ្ជើញទស្សនកិច្ចនៅវិទ្យាស្ថានប៉ាស្ទ័រ ក្រុងប៉ារីស សាធារណរដ្ឋបារាំង ដោយទទួលការស្វាគមន៍ដោយលោក អ៊ីវ សាំងហ្សួរ ប្រធានក្រុមប្រឹក្សាភិបាល លោកស្រីសាស្ត្រាចារ្យ យ៉ាសមីន បែលកេដ អគ្គនាយិកា និង លោកស្រី អូដែត តូម៉េសគុយអាត់តូ ទទួលទំនាក់ទំនងអន្តរជាតិ នៃវិទ្យាស្ថានប៉ាស្ទ័រទីក្រុងប៉ារីស រួមទាំងសហការី និងអ្នកស្រាវជ្រាវវិទ្យាសាស្ត្រជាច្រើនទៀត។

នៅក្នុងឱកាសនោះ លោកសាស្រ្តាចារ្យរដ្ឋមន្រ្តី បានសម្តែងអំណរគុណដល់លោកប្រធានក្រុមប្រឹក្សាភិបាល និងថ្នាក់ដឹកនាំវិទ្យាស្ថានប៉ាស្ទ័រ ដែលបានរៀបចំការទទួលស្វាគមន៍គណ:ប្រតិភូសុខាភិបាលយ៉ាងកក់ក្តៅ និងប្រកបដោយភាតរភាពយ៉ាងជ្រាលជ្រៅ។

លោកសាស្រ្តាចារ្យ ក៏បានថ្លែងអំណរគុណវិទ្យាស្ថានប៉ាស្ទ័រប៉ារីស ដែលបានខិតខំ និងកំពុងបន្តគាំទ្រវិស័យសុខាភិបាលកម្ពុជា តាមរយ:វិទ្យាស្ថានប៉ាស្ទ័រកម្ពុជា ដែលបាន និងកំពុងដើរតួនាទីយ៉ាងសំខាន់ចូលរួមជាមួយសុខាភិបាលកម្ពុជា ទប់ស្កាត់ បង្ការ ស្រាវជ្រាវរួមគ្នាលើផ្នែកជាច្រើន ពិសេសលើផ្នែកជំងឺឆ្លង ផ្នែកបណ្តុះបណ្តាលធនធានមនុស្ស គម្រោងសិក្សាស្រាវជ្រាវ និងទំនើបកម្មមន្ទីរពិសោធន៍កម្រិតស្តង់ដារសកល។

ជាការឆ្លើយតប លោក អ៊ីវ សាំងហ្សួរ ប្រធានក្រុមប្រឹក្សាភិបាលវិទ្យាស្ថានប៉ាស្ទ័រទីក្រុងប៉ារីស បានសម្តែងនូវការកោតសរសើរ និងថ្លែងអំណរគុណ លោកសាស្ត្រាចារ្យរដ្ឋមន្ត្រី សហភាតរៈសុខាភិបាល ដែលតែងតែសហការគាំទ្រវិទ្យាស្ថានប៉ាស្ទ័រកម្ពុជាលើការងារនានា ពិសេសការងារសិក្សាស្រាវជ្រាវ បណ្តុះបណ្តាល និងប្តេជ្ញាសហការគាំទ្រលើកម្មវិធីសុខភាពតែមួយ (One Health) ដែលកម្ពុជាបាន និងកំពុងដើរតួជាប្រទេសគំរូ៕
អត្ថបទ ៖ សំអឿន

The post រដ្ឋមន្ត្រីសុខាភិបាល ៖ វិទ្យាស្ថានប៉ាស្ទ័រប៉ារីស ដើរតួនាទីយ៉ាងសំខាន់ក្នុងការធ្វើទំនើបកម្មមន្ទីរពិសោធន៍កម្ពុជា ឆ្ពោះទៅកម្រិតស្តង់ដារសកល appeared first on Kampuchea Thmey Daily.

ការជំរុញនេះ ក្នុងឱកាស លោកសាស្ត្រាចារ្យ ឈាង រ៉ា​ រដ្ឋមន្ត្រីក្រសួងសុខាភិបាល បានអញ្ជើញចូលរួមក្នុងពិធីប្រកាសចូលកាន់តំណែងជាប្រធានមន្ទីរសុខាភិបាល នៃរដ្ឋបាលខេត្តកំពង់ចាមថ្មី​ ដោយលោកវេជ្ជបណ្ឌិត វ៉ា សាវុធ ត្រូវបានជាប្រធានមន្ទីរសុខាភិបាល នៃរដ្ឋបាលខេត្តកំពង់ចាម ជំនួសលោកវេជ្ជបណ្ឌិត គឹមសួរ ភីរុណ ដែលត្រូវបានចូលនិវត្តន៍ កាលពីព្រឹកថ្ងៃទី ៣១ ខែមីនា ឆ្នាំ ២០២៦ នៅសាសាខេត្តកំពង់ចាម។

នាឱកាសនោះ លោកសាស្ត្រាចារ្យ ឈាង រ៉ា​ បានជំរុញណែនាំដល់លោកប្រធានមន្ទីរសុខាភិបាល នៃរដ្ឋបាលខេត្តកំពង់ចាម ដែលទើបតែទទួលបានការតែងតាំងថ្មី ត្រូវបង្កើនការយកចិត្តទុកដាក់ និងត្រួតពិនិត្យមើលផងដែរថា មានកត្តាច្រើនណាស់ជះឥទ្ធិពលមកលើសមិទ្ធផល នៃវិស័យសុខាភិបាល។ ក្នុងនោះ ទាមទារឲ្យមានការខិតខំប្រឹងប្រែងយ៉ាងខ្លាំង ធ្វើយ៉ាងណាឲ្យមាននូវកិច្ចសហការសម្របសម្រួល និងឲ្យមានការចូលរួមយ៉ាងស្មោះស្ម័គ្រ អស់ពីកម្លាំងកាយ កម្លាំងចិត្ត ពីសំណាក់មន្ត្រីរាជការ និងបុគ្គលិកសុខាភិបាល គ្រប់លំដាប់ថ្នាក់ ដើម្បីធានាបាននូវជោគជ័យក្នុងការលើកកម្ពស់សុខភាព និងសុខមាលភាពជូនប្រជាជន ជាពិសេសនៅតាមទីជនបទដាច់ស្រយាល និងជាអាទិ៍ មានការចូលរួមកិច្ចសហប្រតិបត្តិការល្អក្នុងការប្រយុទ្ធប្រឆាំងនឹងជំងឺគ្រប់ប្រភេទ ដែលកើតមានក្នុងដំណាក់កាលនេះជាដើម។

លោកសាស្ត្រាចារ្យ ឈាង រ៉ា​ បានរំពឹងទុក មានជំនឿយ៉ាងមុតមាំ និងសង្ឃឹមយ៉ាងជាក់ច្បាស់ថា លោកប្រធានមន្ទីរសុខាភិបាល នៃរដ្ឋបាលខេត្តកំពង់ចាម ដែលទើបទទួលបានការតែងតាំងថ្មី នឹងយកចិត្តទុកដាក់ខិតខំប្រឹងប្រែងអស់សមត្ថភាពរបស់ខ្លួន អនុវត្តការងារឲ្យទទួលបានលទ្ធផលល្អត្រចះត្រចង់ ស្របតាមកម្មវិធីគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕
អត្ថបទ និង រូបភាព ៖​ ឡេក​ ចាន់ពេជ្រ

The post រដ្ឋមន្ត្រីសុខាភិបាល ជំរុញ ប្រធានមន្ទីរសុខាភិបាលខេត្តកំពង់ចាមថ្មី​ ត្រូវពិនិត្យបញ្ហាដែលជះឥទ្ធិពលលើវិស័យសុខាភិបាល appeared first on Kampuchea Thmey Daily.

ថ្លែងក្នុងពិធីបិទ​សន្និបាត​បូកសរុបការងារសុខាភិបាលឆ្នាំ ២០២៥ និងលើកទិសដៅឆ្នាំ ២០២៦ របស់​មន្ទីរ​សុខាភិបាល នៃរដ្ឋបាលខេត្តកំពង់ឆ្នាំង កាលពីថ្ងៃទី ១៩ ខែមីនា លោក​សាស្ត្រាចារ្យ ឈាង រ៉ា បាន​ជំរុញ​ឲ្យ​មន្ត្រីត្រូវបន្តបង្កើនគុណភាពសេវា​ឲ្យ​ប្រសើរ​តាមរយៈ​ការ​អនុវត្ត​ស្តង់ដារ និង​គោលការណ៍​បច្ចេកទេស​សុខាភិបាល , ពង្រឹង​សមត្ថភាព​សង្គ្រោះបន្ទាន់នៅមន្ទីរពេទ្យបង្អែក , ធ្វើ​ទំនើបកម្ម​ប្រព័ន្ធ​ព័ត៌មាន​សុខាភិបាល , គ្រូពេទ្យ និង​អ្នក​វិជ្ជាជីវៈ ត្រូវរក្សាសេចក្តីថ្លៃថ្នូរ និង​ក្រម​សីលធម៌​វិជ្ជាជីវៈ។ លើសពីនេះទៀត ត្រូវយកចិត្តទុកដាក់ កែលម្អ​ហេដ្ឋារចនាសម្ព័ន្ធ និង​សម្ភារ​បរិក្ខារ​នៅ​គ្រប់មន្ទីរពេទ្យ មណ្ឌលសុខភាព និងថែទាំអគារ និងបន្ទប់បម្រើសេវាឲ្យបានសមស្រប រួម​ទាំង​អនាម័យល្អ , បរិក្ខារពេទ្យ និង​ប្រព័ន្ធ​​ការ​គ្រប់គ្រង​ឲ្យ​បាន​ត្រឹមត្រូវ។ បន្ថែម​ពី​នេះ ត្រូវ​បង្ការ​ជំងឺ​ឆ្លង និងស្រាវជ្រាវជំងឺមិនឆ្លងតាមរយៈការពង្រឹងការតាមដាន និងឆ្លើយតបជំងឺឆ្លង​រាតត្បាត​ឲ្យ​បាន​ឆាប់ និងដោយ​បុរេ​សកម្ម និងបន្តកម្មវិធីចាក់វ៉ាក់សាំងបង្ការដល់កុមារឲ្យបានគ្រប់ៗ គ្នា និង​ការ​អប់រំ​សុខភាព​ដល់​ប្រជាពលរដ្ឋ។ បង្កើនការថែទាំមុនពេលសម្រាល និងក្រោយសម្រាល ធានា​ការ​សម្រាល​ដោយ​សុវត្ថិភាព និងពង្រីកកម្មវិធី​អាហារូបត្ថម្ភ​កុមារ​ដើម្បី​លើក​កម្ពស់​សុខភាព​មាតា ទារក និង​កុមារ​កាន់តែ​ប្រសើរ។ លើកទឹកចិត្ត​សហគមន៍​ចូល​រួម​ក្នុង​ការ​ថែទាំ​សុខភាព និង​ការ​ផ្សព្វផ្សាយ​អប់រំ​សុខភាព​ដល់​ប្រជាពលរដ្ឋ ពង្រឹងតួនាទី​គណៈកម្មការ​គ្រប់គ្រង​មណ្ឌល​សុខភាព និង​ក្រុម​ទ្រទ្រង់​សុខភាព​ភូមិ​ដើម្បីលើកកម្ពស់ការចូលរួមរបស់សហគមន៍ និងបង្កើនកិច្ចសហការគ្រប់វិស័យ អាជ្ញាធរ​មូលដ្ឋាន អង្គការដៃគូនានា។

លោក​រដ្ឋមន្ត្រី បានណែនាំថ្នាក់ដឹកនាំ និងមន្ត្រីសុខាភិបាលទាំងអស់ មិនត្រូវមើលរំលងចំណុច​ខ្សោយ​របស់​ខ្លួន​ឡើយ ព្រោះថាការទទួលស្គាល់ចំណុចទាំងនោះ គឺជា​ជំហានឆ្ពោះទៅរកការ​កែលម្អ​បាន​ប្រសើរ​ឡើង៕

អត្ថបទ ៖ សំអឿន

The post រដ្ឋមន្ត្រីសុខាភិបាល ណែនាំពង្រឹងសមត្ថភាពមណ្ឌលសុខភាព និងមន្ទីរពេទ្យបង្អែក ឲ្យបានរឹងមាំ appeared first on Kampuchea Thmey Daily.

លោករដ្ឋមន្រ្តី បានបន្តថា លើសពីនេះទៀត សន្តិភាព និងសន្តិសុខ នឹងជួយការពារស្រ្តី និង​ក្មេងស្រី​ពី​អំពើ​ហិង្សា​ទាក់ទង​នឹង​យេនឌ័រ ការពារ​សិទ្ធិ​ស្រ្តី និង​ក្មេងស្រី និង​ការ​ផ្តល់​កាលានុវត្តភាព​ពេញលេញ​សម្រាប់​ស្ត្រី​ក្នុង​ការ​ចូលរួម​ធ្វើ​សេចក្តី​សម្រេច​ចិត្តកសាង និង​ថែរក្សាសន្តិភាព និង​សន្តិសុខ ជាពិសេសរួមចំណែកពន្លឿន​ការ​អភិវឌ្ឍ សេដ្ឋកិច្ចជាតិ លើកកម្ពស់​សុខុមាលភាព និង​វិបុលភាព​គ្រួសារ និង​សង្គម​ផងដែរ។

ថ្លែង​ក្នុង​ពិធី​អបអរសាទរ​ខួប​អនុស្សាវរីយ៍​លើក​ទី ១១៥ ទិវា​អន្តរជាតិ​នារី ៨ មីនា ឆ្នាំ ២០២៦ ក្រោម​ប្រធានបទ ៖ «សន្តិភាព និង​សន្តិសុខ​សម្រាប់​ស្រ្តី និង​គ្រួសារ» កាលពី​ថ្ងៃ​ទី ២ មីនា លោក​រដ្ឋមន្ត្រី បាន​បន្ថែម​ថា ស្ត្រី បាន​ដើរ​តួនាទី​យ៉ាង​សំខាន់ ដែលមានលក្ខណៈសម្បត្តិ និងគុណតម្លៃជាច្រើន រួមមាន ស្រ្តីមានភាពល្អ ដោយការយល់ដឹង ចរិយាសម្បត្តិ ចំណេះដឹង និងគុណធម៌។ ស្រ្តី​តំណាង​ឱ្យ​ជីវិត ដែល​ជា​ការ​លះបង់​ក្នុងការងារប្រចាំថ្ងៃ។ ស្រ្តីវ័យកាន់តែច្រើន បទពិសោធ​កាន់តែខ្លាំង បង្កប់​ការ​យល់ដឹង​កាន់តែច្រើន និងមានភាពច្បាស់លាស់ និងឥទ្ធិពលស្រ្តីនៅក្នុងគ្រួសារ និងសង្គម បង្ហាញ​ពីភាពខ្លាំង និងការគោរពស្រឡាញ់។

លោករដ្ឋមន្រ្តីបន្តទៀតថា «ស្ត្រី ពិតប្រាកដណាស់ គឺកំពុង​វិវត្តន៍​លូតលាស់ រីកចម្រើន ជាមួយប្រាជ្ញា និងបទពិសោធលើគន្លងផ្លូវ​គតិបណ្ឌិត»។

លោករដ្ឋមន្រ្តី បាន​ផ្ដាំផ្ញើ​ដល់ថ្នាក់ដឹកនាំ មន្រ្តីរាជការ និងបុគ្គលិកទាំងអស់ បន្ត​ខិតខំ​បំពេញ​ការងារ​ប្រកប​ដោយ សាមគ្គីភាព ក្តីស្រឡាញ់ និង​ប្រាស្រ័យ​ទាក់ទងគ្នាកាន់តែល្អប្រសើរ និង​ចេះ​ជួយ​យក​អាសា​គ្នាទៅវិញទៅមក​ដោយ​ទឹកចិត្ត​រាប់អាន​ដ៏​ស្មោះស្ម័គ្រ និង​បាន​បំពាក់​គ្រឿង​ឥស្សរិយយស​មេដាយ​ដល់ ថ្នាក់ដឹកនាំ មន្រ្តីរាជការ បុគ្គលិកសុខាភិបាលជានារី​ដែល​បម្រើ​ការងារ​នៅ​ទីស្តីការ​ក្រសួងសុខាភិបាល និង​អង្គភាព​ថ្នាក់​កណ្តាល នៃ​ក្រសួងសុខាភិបាល​ដែល​បាន​ខិតខំ​បំពេញ​ការងារ​នា​ពេល​កន្លងមក៕

អត្ថបទ ៖ សំអឿន

The post រដ្ឋមន្ត្រីសុខាភិបាល ៖ សន្តិភាព សន្តិសុខ គឺជាមូលដ្ឋានគ្រឹះ នៃសុខុមាលភាពរបស់ស្ត្រី និងក្រុមគ្រួសារ រស់នៅដោយសុវត្ថិភាព appeared first on Kampuchea Thmey Daily.

នៅក្នុង​ឱកាស​ដឹកនាំ​ប្រតិភូ​សុខាភិបាល ចុះ​ពិនិត្យ​សួន​រុក្ខជាតិ​ឱសថ នៅ​ឧទ្យាន​ជាតិ​ព្រះ​សុរាម្រិត​-​កុសុមៈ (​គីរីរម្យ​) របស់​មជ្ឈមណ្ឌល​ជាតិ​ស្រាវជ្រាវ​វេជ្ជសាស្ត្រ​បូរាណ នៃ​ក្រសួងសុខាភិបាល លោក​រដ្ឋមន្ត្រី​ បាន​មានប្រសាសន៍ថា ​ការជំរុញ​នេះ​ដោយសារតែ​វេជ្ជសាស្ត្រ​បូរាណ ​ឬ​ឱសថ ឬ​ថ្នាំ​បូរាណ​គឺជា​កេរដំណែល​របស់​ជាតិ ហើយ​ជា​មរតក​ដែលមាន​តម្លៃ​ជា​ប្រវត្តិសាស្ត្រ តម្លៃ​ប្រពៃណី ដែល​យើងទាំងអស់គ្នា​ត្រូវខិតខំ​ថែរក្សា និង​ផ្តល់​ការយកចិត្តទុកដាក់​ខ្ពស់ ដោយ​ត្រូវខិតខំ​បន្ត​ស្រាវជ្រាវ​ស៊ីជម្រៅ​បន្ថែមទៀត​។

បន្ថែម​ពីនេះ លោក​រដ្ឋមន្ត្រី លើកទឹកចិត្ត​ដល់​អ្នកមាន​ជំនាញ និង​លោកគ្រូ​អ្នកគ្រូ​ដែលមាន​ជំនាញ​ផ្នែក​រុក្ខជាតិ​ឱសថ​នេះ ដោយ​ត្រូវ​ចូលរួម​ជួយ​គាំទ្រ អភិរក្ស និង​ថែរក្សា​រុក្ខជាតិ​ឱសថ ដោយ​ត្រូវ​រៀបចំ​ចក្ខុវិស័យ ផែនការ​យុទ្ធសាស្ត្រ និង​ការដឹកនាំ​ដែលនាំឱ្យ​កាន់តែ​មានការ​រីកចម្រើន ដែល​អាច​ឈានទៅ​ការផលិត​ជា​ឱសថ និង​ផលិត​ជា​គ្រឿងសម្អាង​នានា ដើម្បី​ជា​អត្ថប្រយោជន៍​ដល់​សង្គម​ជាតិស្របតាមតម្រូវការ​បច្ចុប្បន្ន​។

លោក​រដ្ឋមន្ត្រី បាន​ណែនាំ​ដល់​ថ្នាក់ដឹកនាំ​ទទួលបន្ទុក និង​មជ្ឈមណ្ឌល​ជាតិ​ស្រាវជ្រាវ​វេជ្ជសាស្ត្រ​បូរាណ ត្រូវខិតខំ​ថែរក្សា និង​អភិវឌ្ឍន៍​សួន​រុក្ខជាតិ​នេះ​ឱ្យ​ក្លាយជា​សួនពណ៌​បៃតង ចម្រុះ​ពណ៌ ដែល​មាន​រុក្ខជាតិ​ឱសថ​ជាច្រើន​ប្រភេទ ដែល​ប្រមូល​ពី​គ្រប់​ទីកន្លែង ដើម្បី​រក្សា​នូវ​តម្លៃ​ផ្នែក​រុក្ខជាតិ​ឱសថ​បូរាណ​ខ្មែរ ដែលមាន​ដើមកំណើត​ពី​ដូនតា​ជំនាន់​មុន ដែលមាន​ប្រាសាទនាគព័ន្ធ តំណាងឱ្យ​វិស័យ​សុខាភិបាល​ខ្មែរ​នា​ជំនាន់​នោះ​។

លើសពីនេះ​ទៀត​ថ្នាក់ដឹកនាំ និង​មជ្ឈមណ្ឌល​ជាតិ​ស្រាវជ្រាវ​វេជ្ជសាស្ត្រ​បូរាណ បាន​ប្តេជ្ញាចិត្ត​រួមគ្នា សហការគ្នា សាមគ្គី​គ្នា ដើម្បី​ប្រែក្លាយ​សួន​រុក្ខជាតិ​ឱសថ​នេះ ឱ្យក្លាយ​ជា​សួន​ចម្រុះ​ពណ៌ ក្នុងការ​បម្រើ​ជា​អត្ថប្រយោជន៍​ដល់ និស្សិត អ្នកស្រាវជ្រាវ បម្រើ​ក្នុង​ផ្នែក​វេជ្ជសាស្ត្រ និង​ជាពិសេស​សង្គម​ជាតិ។

គួរ​បញ្ជាក់ថា សួន​រុក្ខជាតិ​ឱសថ​(​គីរីរម្យ​) មាន​ផ្ទៃដី​ទំហំ ៥​ ហិតា ស្ថិតនៅ​ឧទ្យាន​ជាតិ ព្រះ​សុរាម្រិត​-​កុសុមៈ គីរីរម្យ ភូមិ​ចាន់ ឃុំ​ចំបក់ ស្រុក​ភ្នំស្រួច ខេត្តកំពង់ស្ពឺ។ សួន​រុក្ខជាតិ​នេះ ជា​ផ្នែក​មួយ​ដ៏​សំខាន់​ក្នុងការ​ចូលរួម​ថែរក្សា​ការពារ និង​អភិរក្ស​រុក្ខជាតិ ដែល​បាន​កំពុង​ប្រើប្រាស់​ជា​ឱសថ ក្នុងការ​ថែទាំ និង​ព្យាបាល​ជំងឺ ​ជាពិសេស​រុក្ខជាតិ​ឱសថ​ដែល​កម្រ​កំពុង​រង​ការ​គំរាម​កំហែង​ និង​ជិត​ផុត​ពូជ និង​ជា​សួន​រុក្ខជាតិ​ឱសថ​គំរូ​ថ្នាក់ជាតិ និង​ប្រើប្រាស់​ជា​ថ្នាល​សម្រាប់​ការ​ស្រាវជ្រាវ​ទស្សនកិច្ច​សិក្សា​របស់​និស្សិត គ្រូ​បូរាណ និង​ក្រុម​អ្នកស្រាវជ្រាវ​ជាតិ-អន្តរជាតិ៕

អត្ថបទ ៖ សំអឿន

The post រដ្ឋមន្ត្រីសុខាភិបាល ជំរុញចូលរួមថែរក្សាអភិរក្សរុក្ខជាតិឱសថ ដើម្បីជាប្រយោជន៍សម្រាប់ព្យាបាលជំងឺ ក៏ដូចជាសង្គមជាតិ appeared first on Kampuchea Thmey Daily.

ក្នុងពិធីអបអរសាទរទិវាជាតិសុខភាពមាតា ទារក និងកុមារ ២១ កុម្ភៈ ២០២៦ លោករដ្ឋមន្ត្រីបានមានប្រសាសន៍ថា៖ «តាមវេជ្ជសាស្រ្ត ទារកនឹងមានក្តីប្រាថ្នាកើតមកតាមបែបធម្មជាតិ ដែលនឹងទទួលបានការថែទាំសុខភាពពេញលេញ ក្នុងពេលសម្រាលមួយដ៏លំបាក ហើយទារកទទួលក៏បានសំណាង ដោយនៅពេលកើតមក បានកើយលើទ្រូងម្តាយ និងទទួលទឹកដោះដំបូង ដែលនេះជាការរស់រានដ៏ល្អប្រពៃមួយសម្រាប់អនាគតគាត់ ក៏ដូចជាអនាគតគ្រួសារ និងសង្គមជាតិទាំងមូល»។

លោករដ្ឋមន្ត្រីបានបន្តថា «យើងទាំងអស់គ្នាមានក្តីប្រាថ្នាដូចគ្នាគឺ ស្មារតីនៃកិច្ចសហប្រតិបត្តិការអភិវឌ្ឍន៍ ការរក្សាបាននូវ ស្ថិរភាព ភាពត្រឹមត្រូវ ភាពរីកចម្រើន និងក្តីសង្ឃឹមសម្រាប់មាតា ទារក កុមារ និងយុវវ័យកម្ពុជា»។ 

លោករដ្ឋមន្រ្តី បានណែនាំដល់ថ្នាក់ដឹកនាំមន្ទីរពេទ្យ និងបុគ្គលិកសុខាភិបាលត្រូវចូលរួមលើកកម្ពស់សុខភាពមាតា ទារក និងកុមារឱ្យកាន់តែប្រសើរក្នុងនោះ ត្រូវធ្វើការពិនិត្យ ពិភាក្សា ធ្វើបច្ចុប្បន្នភាពលើពិធីសារជាតិសម្រាប់ការពិនិត្យថែទាំផ្ទៃពោះមុនសម្រាល ដោយបញ្ជាក់អំពីសកម្មភាពដែលត្រូវធ្វើ និងចំនួនដងនៃការពិនិត្យ ផ្អែកតាមគោលការណ៍ណែនាំរបស់អង្គការសុខភាពពិភពលោក។

លោក បន្ថែមថា ត្រូវជួយគាំទ្រការពិនិត្យ ថែទាំ ព្យាបាលស្ត្រីមានផ្ទៃពោះ ជាអន្តរាគមន៍ចាំបាច់ អនុវត្តបន្តជាប់មិនដាច់ ចាប់ពីពេលមានផ្ទៃពោះ ដល់ពេលសម្រាល និងបន្តរហូតដល់ពេលក្រោយសម្រាល ដើម្បីសុខភាពមាតា និងទារក។ បន្តធ្វើការបណ្តុះបណ្តាលដល់មន្ត្រីបុគ្គលិកសុខាភិបាល ដែលជាអ្នកផ្តល់សេវាអំពីការពិនិត្យថែទាំផ្ទៃពោះ មុនសម្រាលដែលមានគុណភាព ប្រសិទ្ធភាព និងពិសេសការបង្វឹកអំពីការអប់រំ ពន្យល់ ពិគ្រោះយោបល់ជាមួយស្ត្រីមានផ្ទៃពោះ និងគ្រួសារឱ្យយល់ពីសារៈសំខាន់នៃការពិនិត្យផ្ទៃពោះ ភាពចាំបាច់នៃការមកពិនិត្យឱ្យត្រូវតាមពេលកំណត់ និងការត្រៀមជាមុន បង្ការហានិភ័យ។

ជាមួយគ្នានេះអង្គភាពពាក់ព័ន្ធត្រូវ បង្កើតសារអប់រំអំពីភាពចាំបាច់ នៃការពិនិត្យថែទាំផ្ទៃពោះត្រូវតាមពេលវេលាកំណត់ ហើយដែលមានខ្លឹមសារងាយយល់ ងាយចាំ និងធ្វើការផ្សព្វផ្សាយឱ្យបានទូលំទូលាយជូនដល់ប្រជាពលរដ្ឋ។ទន្ទឹមនឹងនេះត្រូវពង្រឹងកិច្ចសហការយ៉ាងរឹងមាំគ្រប់ស្ថាប័នពាក់ព័ន្ធ ក្នុងការជួយសម្រួលឱ្យគ្រប់ស្ត្រីទាំងអស់បានមកពិនិត្យផ្ទៃពោះ និងសម្រាលនៅមូលដ្ឋានសុខាភិបាល។ចំណែកនៅមន្ទីរពេទ្យឯកជន ត្រូវមានផ្នែកសង្រ្គោះបន្ទាន់ និងមានសមត្ថភាព ក្នុងការជួយសង្រ្គោះទារក ទើបនឹងកើត ដែលមិនប្រក្រតី។

យោងតាមរបាយការណ៍របស់ក្រសួងសុខាភិបាលបានឱ្យដឹងថាឆ្នាំ២០២៥ មានស្ត្រីចំនួន២៥៣,៣០៨នាក់បានសម្រាលកូន ក្នុងនោះ ៣៦,៧១% សម្រាលនៅមណ្ឌលសុខភាព ៥៦,៥៧%សម្រាលនៅមន្ទីរពេទ្យបង្អែក ៦,០៩%សម្រាល់នៅពេទ្យេកជន ០,៥៩%សម្រាលនៅផ្ទះដោយបុគ្គលិកសុខាភិបាល និង០,០៤%សម្រាលដោយឆ្មបបុរាណ៕

អត្ថបទ៖សំអឿន

The post រដ្ឋមន្ត្រី លើកទឹកចិត្តស្ត្រីមានផ្ទៃពោះសម្រាលកូនដោយធម្មជាតិ ដើម្បីឱ្យទារកមានសុភាពល្អ appeared first on Kampuchea Thmey Daily.

ការអះអាងរបស់លោក រដ្ឋមន្ត្រីនេះបានធ្វើឡើងកាលពីថ្ងៃទី៦ ខែកម្ភៈ ឆ្នាំ២០២៦ ក្នុងជំនួបសម្តែងការគួរសម និងពិភាក្សាការងារជាមួយលោកវេជ្ជបណ្ឌិត Adrian Guadarrama អ្នកគ្រប់គ្រងកម្មវិធីប្រចាំប្រទេសកេនយ៉ា តង់ហ្សានី អ៊ុយក្រែន កៀហ្ស៊ីស៊ីស្ថាន កាហ្សាក់ស្ថាន ហ្វីលីពីន និង កម្ពុជា នៃអង្គការគ្រូពេទ្យគ្មានព្រំដែនស្វីសនៅទីស្តីការក្រសួង។

លោករដ្ឋមន្ត្រី បានលើកឡើងថា កិច្ចសហប្រតិបត្តិការដ៏ល្អរវាងក្រសួងសុខាភិបាល និងអង្គការ MSF Switzerland បានចូលរួមចំណែកយ៉ាងសំខាន់ក្នុងនាមជាដៃគូបច្ចេកទេស និងវេជ្ជសាស្ត្រ ក្នុងការគាំទ្រក្រសួងសុខាភិបាល ដើម្បីផ្ដល់សេវាសុខភាពចាំបាច់បំផុតជូនដល់ប្រជាជននៅមូលដ្ឋាន។

លោករដ្ឋមន្ត្រីបានបន្តថា «ក្រសួងសុខាភិបាលតែងតែចងចាំនូវការរួមចំណែករបស់អង្គការ MSF ដែលជានិមិត្តរូបនៃការជួយសង្គ្រោះ និងជាកម្លាំងចលករ ក្នុងការលើកកម្ពស់គុណភាពសេវាសុខាភិបាលឱ្យកាន់តែប្រសើរឡើង»។

ទន្ទឹមនេះ លោករដ្ឋមន្ត្រី ក៏បានលើកទឹកចិត្តដល់អង្គការ ឱ្យបន្តធ្វើការងារជិតស្និទ្ធជាមួយមន្ទីរសុខាភិបាលខេត្តគោលដៅ ដើម្បីកំណត់នូវមណ្ឌលសុខភាពអាទិភាពដែលត្រូវការការគាំទ្រ ក្នុងគោលដៅពង្រឹងការត្រៀមលក្ខណៈឆ្លើយតបគ្រាអាសន្នផ្នែកវេជ្ជសាស្ត្រ និងការសង្គ្រោះបន្ទាន់ ក៏ដូចជាការផ្តល់សេវាសុខភាពសំខាន់ៗ ដោយផ្តោតលើការពង្រឹងសមត្ថភាពមណ្ឌលសុខភាព និងការិយាល័យស្រុកប្រតិបត្តិ។

ទន្ទឹមនេះ លោករដ្ឋមន្ត្រី ក៏បានលើកទឹកចិត្តដល់អង្គការ ឱ្យបន្តធ្វើការងារជិតស្និទ្ធជាមួយមន្ទីរសុខាភិបាលខេត្តគោលដៅ ដើម្បីកំណត់នូវមណ្ឌលសុខភាពអាទិភាពដែលត្រូវការការគាំទ្រ ក្នុងគោលដៅពង្រឹងការត្រៀមលក្ខណៈឆ្លើយតបគ្រាអាសន្នផ្នែកវេជ្ជសាស្ត្រ និងការសង្គ្រោះបន្ទាន់ ក៏ដូចជាការផ្តល់សេវាសុខភាពសំខាន់ៗ ដោយផ្តោតលើការពង្រឹងសមត្ថភាពមណ្ឌលសុខភាព និងការិយាល័យស្រុកប្រតិបត្តិ។

ជាការឆ្លើយតប លោកវេជ្ជបណ្ឌិត Adrian Guadarrama លើកឡើងថា បេសកកម្មរបស់អង្គការ MSF ជាអង្គការមនុស្សធម៌អន្តរជាតិ ឯករាជ្យ អព្យាក្រឹត និងផ្នែកវេជ្ជសាស្ត្រ ដែលផ្តល់ជំនួយវេជ្ជសាស្រ្តសង្គ្រោះជីវិត ដោយមិនគិតពីសាសនា ឬនិន្នាការនយោបាយ។ បច្ចុប្បន្ន អង្គការកំពុងបំពេញបេសកកម្មក្នុងប្រទេសចំនួន ១៦៩ ដែលនឹងបន្តតួនាទីជាដៃគូបច្ចេកទេស ដើម្បីគាំទ្រក្រសួងសុខាភិបាល ក្នុងការសម្រេចឱ្យបាននូវគោលដៅសុខាភិបាលជាតិ។

នៅក្នុងជំនួបនោះភាគីទាំងពីរបានប្ដេជ្ញាចិត្តយ៉ាងមុតមាំ ក្នុងការបន្តពង្រឹងកិច្ចសហប្រតិបត្តិការគ្រប់ជ្រុងជ្រោយ ទាំងនៅថ្នាក់ជាតិ និងថ្នាក់មូលដ្ឋាន ដើម្បីធានាឱ្យបាននូវសេវាសុខភាពដែលមានគុណភាព សមធម៌ និងប្រសិទ្ធភាពសម្រាប់ប្រជាពលរដ្ឋគ្រប់រូប ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា៕ អត្ថបទ៖សំអឿន

The post រដ្ឋមន្ត្រីសុខាភិបាល ៖ អង្គការ MSF ជានិមិត្តរូបនៃសង្គ្រោះ និងកម្លាំងចលករ ក្នុងការលើកកម្ពស់គុណភាពសេវាសុខាភិបាលនៅកម្ពុជា appeared first on Kampuchea Thmey Daily.