លោក ស៊ិន ចាន់សិរីវុត្ថា រដ្ឋលេខាធិការ និងជា​អ្នកនាំ​ពាក្យ​រដ្ឋលេខាធិការដ្ឋានអាកាសចរស៊ីវិលកម្ពុជា បាន​គូស​បញ្ជាក់​ឱ្យ​ដឹង​ថា ការវិវត្តន៍នៃជម្លោះនៅតំបន់មជ្ឈិមបូព៌ា បាន​បង្ក​ឱ្យ​សេវាកម្ម​ការ​តភ្ជាប់​ជើង​ហោះហើរ​មួយ​ចំនួន​ដែល​ភ្ជាប់​តាម​មជ្ឈមណ្ឌល​ដឹកជញ្ជូន​ជាក់​លាក់​នៅទីក្រុង ដូហា ឌូបៃ និងអាប៊ូដាប៊ី ជួបប្រទះការផ្អាក (ផ្នែកខ្លះ) ឬមានការកែសម្រួលកាលវិភាគហោះហើជាបណ្តោះអាសន្ន។

ថ្លែង​ប្រាប់​ «កម្ពុជា​ថ្មី» នៅ​ថ្ងៃ​ទី​០៣​ ខែ​មិនា ឆ្នាំ​២០២៦ លោក ស៊ិន ចាន់​សិរីវុត្ថា បាន​​ឱ្យ​ដឹង​ថា ​ការកើនឡើង​នៃសកម្មភាពជម្លោះយោធាថ្មីៗ នៅតំបន់មជ្ឈិមបូព៌ា បាន​ធ្វើ​ឱ្យ​ស្ថាភាពនៃការតភ្ជាប់ជើងហោះ​ហើរ​បច្ចុប្បន្ន​រវាង​កម្ពុជា ជាមួយតំបន់មជ្ឈិមបូព៌ា មាន​ការ​ប្រែប្រួល ដោយ​ក្នុង​នោះ​​មាន​ការ​បិទដែន​អាកាស​ជា​បណ្តោះអាសន្ន,​ ការ​រំខាន​ប្រតិបត្តិការ​នៅ​អាកាសយានដ្ឋាន​មជ្ឈមណ្ឌល​សំខាន់ៗក្នុងតំបន់ឈូងសមុទ្រ (Gulf) ការប្តូរផ្លូវហោះ​ហើរ​នៅ​លើ​ច្រក​អាកាស​ចរណ៍​រវាងអឺរ៉ុប-អាស៊ី និង​ការកើនឡើងនៃចំណាយប្រេងឥន្ធនៈ និង​ថ្លៃធានា​រ៉ាប់រង​ហានិភ័យសង្គ្រាម ជា​ដើម​។

ក្នុងនោះ ផលប៉ះពាល់រវាងការតភ្ជាប់ជើងហោះហើរដោយផ្ទាល់ ឬ ដោយប្រយោលទៅកាន់កម្ពុជា តាមរយៈមជ្ឈមណ្ឌលអាកាសចរណ៍ក្នុងតំបន់ឈូងសមុទ្រ ចំនួន ៣ គឺ Qatar Airways-QR (តារយៈ Hub-មជ្ឈមណ្ឌលទីក្រុងដូហា), Emirates Airlines-EK (តារយៈ Hub-មជ្ឈមណ្ឌលទីក្រុងឌូបៃ) និង Etihad Airways-EY (តារយៈ Hub-មជ្ឈមណ្ឌលទីក្រុងអាប៊ូដាប៊ី)។

ពាក់ព័ន្ធទៅនឹងជើងហោះហើរទាំង ៣ នេះ បច្ចុប្បន្ន កម្ពុជាប្រតិបត្តិការហោះហើរដែលភ្ជាប់ជាមួយតំបន់មជ្ឈិមបូព៌ាចំនួន ៥២ ជើង/សប្ដាហ៍ (ទ្វេរទិស) ដោយចំនួនចលនាជើងហោះហើរ ៤៦ ជើង/សប្តាហ៍ (ទ្វេរទិស) នៅអាកាសយានដ្ឋានអន្តរជាតិតេជោ (រាប់បញ្ជួលជើងហោះហើរដឹកជញ្ជូនទំនិញតាមផ្លូវអាកាស ៨ ជើង/សប្តាហ៍ (ទ្វេរទិស)) និង ៦ ជើង/សប្តាហ៍ (ទ្វេរទិស) នៅអាកាសយានដ្ឋានអន្តរជាតិសៀមរាបអង្គរ។ មជ្ឈមណ្ឌលអាកាសចរណ៍(Hubs)ទាំងនេះ បម្រើជាច្រកផ្លាស់ប្តូរជើងហោះហើរ សម្រាប់ចរាចរណ៍អ្នកដំណើរចូល និងចេញពីកម្ពុជា។

តាមការប៉ាន់ស្មានផលប៉ះពាល់ជាអវិជ្ជមានបឋម អាចមានអ្នកដំណើរ ប្រហែល ១២,៩៦០ នាក់ ក្នុងមួយសប្ដាហ៍ និង​ប្រហែល ៥១,៨៤០ នាក់ ក្នុងមួយខែ។

លោក ស៊ិន ចាន់ បាន​ពន្យល់ថា មិនមែនបានន័យថា ភ្ញៀវទាំងអស់មិនអាចធ្វើដំណើរបាននោះទេ ប៉ុន្តែគ្រាន់តែប៉ះពាល់ទៅដល់ការធ្វើដំណើររបស់ពួកគេ ដោយ​ភ្ញៀវទេសចរទាំងអស់នោះអាចធ្វើដំណើរទៅតាមផ្លូវផ្សេងៗមកកាន់ប្រទេស កម្ពុជា។ ចំពោះផលប៉ះពាល់នេះ មិនមែនសម្រាប់តែប្រទេសកម្ពុជាមួយនោះទេ គឺប៉ះពាល់ជាសកល។

ទោះ​បី​ជា​មាន​ផល​រំខាន​បែប​នេះ​ក្តី អ្នក​នាំ​ពាក្យ​អាកាសចរណ៍​ស៊ីវិល​រូប​នេះ បាន​​អះអាង​ថា ប្រទេសកម្ពុជា​នៅ​តែ​មានសុវត្ថិភាព មានដំណើរការជាប្រក្រតី និងមិនរងផលប៉ះពាល់ពីទស្សនៈសន្តិសុខ ឬការគ្រប់គ្រងដែនអាកាសឡើយ។ អាកាសយានដ្ឋាន និងដែនអាកាស​ជាតិរបស់យើ​ង​នៅតែ​បន្តដំណើរ​ការ​តាម​ស្ថានភាពធម្មតា។

ប៉ុន្តែ ដោយសារការវិវត្តន៍នៃជម្លោះនៅតំបន់មជ្ឈិមបូព៌ា និងការអភិវឌ្ឍពាក់ព័ន្ធនឹងដែនអាកាសក្នុងតំបន់នេះ សេវាកម្មមួយចំនួនដែលភ្ជាប់តាមមជ្ឈមណ្ឌលដឹកជញ្ជូនជាក់លាក់នៅទីក្រុង ដូហា ឌូបៃ និងអាប៊ូដាប៊ី បានជួបប្រទះការផ្អាក (ផ្នែកខ្លះ) ឬមានការកែសម្រួលកាលវិភាគហោះហើជាបណ្តោះអាសន្ន។

សេចក្តី​សម្រេចប្រតិបត្តិការទាំងនេះ គឺធ្វើឡើងដោយក្រុមហ៊ុនអាកាសចរណ៍ ដើម្បីឆ្លើយតបនឹងស្ថានភាពខាងក្រៅតំបន់ ហើយមិនពាក់ព័ន្ធនឹងបញ្ហាណាមួយនៅក្នុងព្រះរាជាណាចក្រកម្ពុជាទេ។

អាកាសចរស៊ីវិលកំពុងសម្របសម្រួលយ៉ាងជិតស្និទ្ធ និងសហការបន្តជាមួយក្រុមហ៊ុនអាកាសចរណ៍ដែលពាក់ព័ន្ធ និងអាជ្ញាធរអាកាសយានដ្ឋាន ដើម្បីតាមដានការវិវត្តន៍ស្ថានការណ៍ និងសម្របសម្រួលក្នុងការរៀបចំ​ការធ្វើ​ដំណើរ​ជាក់ស្តែង នៅក្នុងករណីចាំបាច់។

«អ្នកដំណើរត្រូវបានណែនាំ​ឱ្យពិនិត្យកាលវិភាគ​ថ្មីដោយ​ផ្ទាល់​ជា​មួយ​ក្រុមហ៊ុន​អាកាសចរណ៍​របស់ខ្លួន​ផង​ដែរ​។ ប្រព័ន្ធអាកាសចរណ៍របស់កម្ពុជា នៅតែមានស្ថិរភាព និងសុវត្ថិភាព។ វិធានការបច្ចុប្បន្នមានលក្ខណៈបង្ការ និងបណ្តាលមកពីកត្តាខាងក្រៅ»។ លោក ស៊ិន ចាន់​បន្ថែម​បែប​នេះ​៕

ដោយ៖ ឌិន ថារី

The post សង្គ្រាមនៅមជ្ឈិមបូព៌ា ប៉ះពាល់អ្នកដំណើរចេញ-ចូល កម្ពុជាជាង ១ ម៉ឺននាក់ មួយសប្ដាហ៍ appeared first on Kampuchea Thmey Daily.

​លោកបណ្ឌិត ​ម៉ៅ ​ហាវណ្ណាល់ ​រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានលើកឡើងក្នុងពិធី​សន្និ​បាត​បូកសរុបលទ្ធផលការងារ ​ឆ្នាំ ២០២៥ ​និងលើកទិសដៅការងារឆ្នាំ ២០២៦ ​នៅថ្ងៃទី ២៧ ខែកុម្ភៈថា ​វិស័យអា​កា​ស​​ចរណ៍ ​នៅ​តែបន្ត​ទទួល​​ផល​ប្រយោជន៍​ នៃកេរ្ដិ៍ដំណែលរបស់សម្ដេចតេជោ ហ៊ុន ​សែន ​ប្រធានព្រឹទ្ធសភា និង​ជា​អតីតនាយករដ្ឋមន្ត្រី ​ក្នុង​ការដាក់​ឱ្យអនុវត្ត​គោល​នយោ​បាយ​បើកចំហជើងមេឃ​នៅឆ្នាំ ១៩៩៩ ​និងកំពុងបន្ត​ក្រោមការដឹក​នាំ​របស់សម្ដេចធិបតី ​ហ៊ុន ​ម៉ាណែត នាយករដ្ឋមន្ត្រីកម្ពុជា ដោយបាន​ជំរុញ​ឱ្យ​មាន​សន្ទុះ​រីក​ចម្រើន​ដល់ការដឹកជញ្ជូនតាមផ្លូវអាកាស ឆ្លើយតប​នឹងតម្រូវការទេសចរណ៍ ​ធុរកិច្ច ​ពាណិជ្ជកម្ម ​និង​ការ​ផ្សារភ្ជាប់ទំនាក់ទំនងសង្គម-វប្បធម៌​។​

នៅក្នុងសន្និបាតនោះ លោករដ្ឋមន្ត្រីក៏បានលើកឡើងនូវបញ្ហាប្រឈម និងដំណោះស្រាយមួយចំនួនរួមាន៖

ការប្រឈមក្នុងការបណ្តុះបណ្តាលមន្ត្រីបច្ចេកទេស និងអធិការកិច្ច នៅរាយប៉ាយតាមបណ្តាអង្គភាព លោកបានប្រគល់ភារកិច្ចជូនអគ្គនាយកដ្ឋានរដ្ឋបាលនិងហិរញ្ញវត្ថុ ពង្រឹងការងារនេះបន្ថែម ដើម្បីឲ្យឆ្លើយតបនឹងការតម្រូវរបស់ ICAO។

ការប្រឈមទី សម្រាប់ថវិកាបណ្តុះបណ្តាលមន្រ្តីបច្ចេកទេសចាំបាច់ និងអធិការកិច្ច ជាពិសេសសម្រាប់វគ្គបណ្តុះបណ្តាលរក្សាជំនាញ (Recurrent Training) នៅមានកម្រិត។

លោកបណ្ឌិត ​ម៉ៅ ​ហាវណ្ណាល់បានស្នើឱ្យអគ្គនាយកដ្ឋានរដ្ឋបាលនិងហិរញ្ញវត្ថុ សិក្សាសេចក្តីត្រូវការថវិកាបណ្តុះបណ្តាល​មន្រ្តីបច្ចេកទេសចាំ​បាច់ និងមន្រ្តីអធិការកិច្ចរួមទាំងវគ្គបណ្តុះបណ្តាលរក្សាជំនាញ (Recurrent Training) ដើម្បីលើកសំណើសុំទៅរាជរដ្ឋាភិបាល។

​យោងតាមអាកាសចរណ៍ស៊ីវិល ​នៅក្នុងឆ្នាំ ​២០២៥ ​កម្ពុជា​ទទួល​បាន​អ្នក​ដំណើរ​ចេញ-ចូលតាម​ផ្លូវ​អាកាស​ជិត ៧ ​លាន​នាក់ (​៦ ៩៨៨ ២៥៩) កើនឡើង ​១២% ​និងទំនិញតាមផ្លូវអាកាសចំនួនជាង ៩៣ ពាន់តោន (៩៣ ៨៨៩) កើនឡើង ២១% ប្រៀបធៀបនឹងឆ្នាំ ២០២៤៕

អត្ថបទ៖ ឡេង ដេត

The post ​កម្ពុជា​ ដាក់​គោលដៅ​ដឹក​អ្នក​ដំណើរ​តាម​ផ្លូវ​អាកាស ៨ លាននាក់ ​នៅឆ្នាំ​ ២០២៦​ appeared first on Kampuchea Thmey Daily.

ការប្រារព្ធទិវាជាតិអាកាសចរណ៍ស៊ីវិលលើកទី១ នៅថ្ងៃទី៧ ខែធ្នូ ឆ្នាំ២០២៥ រៀបចំឡើង គឺដើម្បីចូលរួមអនុវត្ត គោលនយោបាយជាតិ ស្តីពីការដឹកជញ្ជូនតាមផ្លូវអាកាស ឆ្នាំ២០២៥-២០៣៥ ដែលបានសម្រេច ដោយកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី៤ ខែមេសា ឆ្នាំ២០២៥ និងស្របតាមស្មារតីរបស់អង្គការអាកាសចរណ៍ស៊ីវិលអន្តរជាតិ (International Civil Aviaiton Organization – ICAO) ផងដែរ ដែលបានបង្កើត និងប្រារព្ធពិធី «ទិវាអាកាសចរណ៍ស៊ីវិលពិភពលោក» ជារៀងរាល់ឆ្នាំ នៅថ្ងៃទី៧ ខែធ្នូ។

ទិវានេះ ធ្វើឡើងក្នុងគោលបំណងប្រារព្ធខួប នៃការចុះហត្ថលេខាអនុសញ្ញា ស្តីពីអាកាសចរណ៍ស៊ីវិលអន្តរជាតិ (ដែលត្រូវបានគេស្គាល់ថា ជាអនុសញ្ញាឈឺកាហ្គោ Chicago Convention) និងបង្កើនការទាក់ទាញវិស័យអាកាសចរណ៍ស៊ីវិលពិភពលោក។ លើសពីនេះទៀត គោលបំណងក្នុងការប្រារព្ធទិវានេះ ដើម្បីជួយបង្កើត និងពង្រឹងការយល់ដឹងនៅកម្ពុជា និងទូទាំងពិភពលោក អំពីសារៈសំខាន់នៃអាកាសចរណ៍ស៊ីវិល ក្នុងការចូលរួមជំរុញសេដ្ឋកិច្ច ទេសចរណ៍ សង្គម និងវប្បធម៌ ឱ្យមានការរីកចម្រើនប្រកបដោយចីរភាព។

នៅក្នុង«ទិវាជាតិអាកាសចរស៊ីវិល» លើកទី១ ឆ្នាំ២០២៥ លោកបណ្ឌិត ម៉ៅ ហាវណ្ណាល់ បានអានសារលិខិតរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាដោយបានគូសបញ្ជាក់ថា ក្នុងរយៈពេល៣ឆ្នាំចុងក្រោយនេះ វិស័យអាកាសចរណ៍ស៊ីវិលកម្ពុជា បានសម្រេចដាក់ដំណើរការ អាកាសយានដ្ឋានអន្តរជាតិថ្មីចំនួន ៣ ក្រោមទឹកប្រាក់វិនិយោគសរុប ៣,៦០០ លានដុល្លារអាមេរិក រួមមាន
ទី១៖ អាកាសយានដ្ឋានអន្តរជាតិសៀមរាបអង្គរ ប្រភេទ 4E ក្រោមទឹកប្រាក់វិនិយោគ ១,១០០លានដុល្លារអាមេរិក ជាគម្រោង Build – Operate – Transfer (BOT) ដែលបានសម្ពោធដាក់ដំណើរការឆ្នាំ២០២៣។ទី២ អាកាសយានដ្ឋានអន្តរជាតិតារាសាគរ ប្រភេទ 4D ក្រោមទឹកប្រាក់វិនិយោគ ២០០ លានដុល្លារអាមេរិក ជាគម្រោង Build – Own – Operate (BOO) ដែលបានសម្ពោធដាក់ដំណើរការឆ្នាំ២០២៤និងទី៣ អាកាសយានដ្ឋានអន្តរជាតិតេជោ ប្រភេទ 4F និងហេដ្ឋារចនាសម្ព័ន្ធតភ្ជាប់នានា ក្រោមទឹកប្រាក់វិនិយោគ ២,៣០០ លានដុល្លារអាមេរិក ដែលបានសម្ពោធដាក់ដំណើរកាលពីថ្ងៃទី២០ ខែតុលា ឆ្នាំ២០២៥។

ទិវាអាកាសចរណ៍ស៊ីវិលកម្ពុជា ជាលើកទី១ មានការរៀបចំពិធីអបអរសារទរជាច្រើនដូចជា កម្មវិធី រត់ប្រណាំងលើផ្លូវយន្តហោះ (ចំងាយ៥គីឡូនៅផ្លូវយន្តហោះ នៃអតីតអាកាសយានដ្ឋានអន្តរជាតិភ្នំពេញនិង កម្មវិធីពិព័រណ៍ទិវាអាកាសចរណ៍ស៊ីវិលកម្ពុជា ទីតាំងអតីតអាកាសយានដ្ឋានអន្តរជាតិភ្នំពេញព្រមទាំងមានសកម្មភាព តាំងពិព័រណ៍បង្ហាញផលិតផលសេវាកម្មអាកាសចរណ៍, ទស្សនាការដាក់តាំងយន្តហោះ ធន់តូច និងការបង្ហោះគ្រូន, ម្ហូបអាហារផលិតផលខ្មែរ (ផ្គត់ផ្គង់តាមអាកាសយានដ្ឋាន និងអាកាសយាន), ការប្រគុំតន្ត្រី និងការផ្តល់ជូនកាដូអនុស្សាវរីយ៍ជាច្រើន ពីក្រុមហ៊ុនអាកាសចរណ៍នានា៕

អត្ថបទ៖ សំអឿន

The post កម្ពុជា ប្រារព្ធទិវាជាតិអាកាសចរណ៍ស៊ីវិលលើកដំបូងដើម្បីជំរុញសេដ្ឋកិច្ច ទេសចរណ៍សង្គមនិងវប្បធម៌ appeared first on Kampuchea Thmey Daily.

យោងតាមលោក ស៊ីន ចាន់សិរីវុត្ថា ​ រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល​បានថ្លែងប្រាប់កម្ពុជាថ្មីថា ស្ថាប័នមានសមត្ថកិច្ចនៃប្រទេសទាំង២ (កម្ពុជា និងជប៉ុន) បានឯកភាព និងអនុម័តលើការស្នើសុំរបស់ក្រុមហ៊ុនអាកាសចរណ៍ជាតិកម្ពុជា (Air Cambodia/ K6) សម្រាប់ប្រតិបត្តិការអាជីវកម្មដឹកជញ្ជូនតាមផ្លូវអាកាសទៅកាន់ប្រទេសជប៉ុន កាលពីថ្ងៃទី៤ ខែមេសា ឆ្នាំ២០២៥ កន្លងមកនេះ។​

លោកថា ក្រុមហ៊ុនអាកាសចរណ៍ជាតិកម្ពុជា (Air Cambodia/ K6) នឹងចាប់ផ្តើមប្រតិបត្តិការហោះហើរដឹកអ្នកដំណើរក្នុងពេលឆាប់ៗនេះ (ឆ្នាំ២០២៥) រវាង ភ្នំពេញ-កាន់សៃ (អូសាកា-ប្រទេសជប៉ុន) ដោយឆ្លងកាត់ក្រុង ហ្វូចូវ (Fuzhou) នៃប្រទេសចិន (ភ្នំពេញ/PNH – ហ្វូចូវ/FOC – កាន់សៃ/KIX)។ ប្រតិបត្តិការនោះនឹងមានចំនួន៤ជើង/ក្នុងមួយសប្តាហ៍ ពោលគឺ ថ្ងៃចន្ទ ពុធ សុក្រ និងអាទិត្យ  ដោយប្រើប្រាស់យន្តហោះប្រភេទ Airbus A321។

​អ្នកនាំពាក្យរូបនេះបានថ្លែងបន្តទៀតថា៖«បច្ចុប្បន្នក្រុមហ៊ុនអាកាសចរណ៍ជាតិកម្ពុជា ​កំពុង​បន្ត​សហការ​យ៉ាង​ជិតស្និទ្ធ​ជាមួយ​ប្រតិបត្តិករអាកាសយានដ្ឋាន​ពាក់ព័ន្ធ ​ដើម្បី​សម្រួលដល់ការផ្តល់សេវាកម្មចុះចតនៅតាមអាកាសយានដ្ឋានទាំងនោះ។ បើគ្មានអ្វីប្រែប្រួលនៅះទេ ​ក្រុមហ៊ុនអាកាសចរណ៍ជាតិកម្ពុជា  ​​អាចនឹងចាប់ផ្តើមដំណើរការប្រតិបត្តិការហោះដឹកជញ្ជូនអ្នកដំណើរ​របស់ខ្លួននៅអំឡុង​ខែ​តុលា ឆ្នាំ២០២៥​ខាងមុខនេះ»។

យោងតាមអាកាសចរណ៍ស៊ីវិល នៅក្នុងត្រីមាសទី១ ឆ្នាំ ២០២៥ អាកាសយានដ្ឋានអន្តរជាតិទាំង ៣ របស់កម្ពុជា ទទួលបានជើងហោះហើរចំនួន ១៧ ៤៣៤ ជើង កើន ១៩ ភាគរយ ក្នុងនោះអ្នក​ដំណើរ​ចំនួន ១ ៩៦០ ៦៣៥ នាក់ កើន ១៩ ភាគរយ និងទំនិញចេញ-ចូលជិត ២ ម៉ឺនតោន ១០ ភាគរយ ធៀបនឹងរយៈពេលដូចគ្នាលកាលពីឆ្នាំមុន។

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល​ប្រាប់កម្ពុជាថ្មី​នៅ​ថ្ងៃ​ទី ២៥ ខែមេសា ឆ្នាំ ២០២៥ថា វិស័យដឹកជញ្ជូនតាមផ្លូវអាកាស ទើបតែងើប​ឡើងវិញ​ជាលំដាប់​បានប្រមាណ ៦៨ ភាគរយ ធៀបនឹងស្ថាន​ភាព​​​មុនវិបត្តិជំងឺកូវីដ១៩៕

The post Air Cambodia នឹងបើក​ជើងហោះហើរទៅកាន់​ជប៉ុននាខែតុលាខាងមុខនេះ appeared first on Kampuchea Thmey Daily.

សម្ដេចធិបតី ហ៊ុន ម៉ាណែត ថ្លែងដូច្នេះ ក្នុងឱកាសអញ្ជើញបើក “សន្និសីទចក្ខុវិស័យប្រទេសកម្ពុជា ឆ្នាំ២០២៥ ស្តីពី យុទ្ធសាស្ត្រកំណើនថ្មីរបស់ប្រទេសកម្ពុជា ៖ អាទិភាពសម្រាប់ការអភិវឌ្ឍប្រកបដោយគុណភាពខ្ពស់ និងនិរន្តរភាព” ។
រាជធានីភ្នំពេញ នាថ្ងៃទី៤ ខែមីនា ឆ្នាំ២០២៥។

សម្ដេចធិបតី ហ៊ុន ម៉ាណែត ថ្លែងឱ្យដឹងអំពីការជជែកគ្នាជាមួយអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ដើម្បីដោះស្រាយបញ្ហាក្នុងវិស័យអាកាសចរណ៍ដូច្នេះ៖« ជជែកជាមួយឯកឧត្ដម អគ្គបណ្ឌិតសភាចារ្យ វិស័យយន្តហោះរបស់យើង អញ្ចឹងយើងត្រូវថែមអីទៀតជួយគាត់? ទម្លាក់ពន្ធ កាត់ទុក ទម្លាក់អី ដើម្បីឱ្យគាត់ជួយនៅក្នុងរយៈពេលប៉ុន្មាន ដើម្បីឱ្យគាត់ហោះបាន ប្រមូលទេសចរមក ដឹកធ្វើcharter flight អីទៅ។ »។

កាលពីពេលទៅថ្មីៗនេះ សម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា អះអាងថា រាជរដ្ឋាភិបាល នីតិកាលទី ៧ នៃរដ្ឋសភា នៅតែបន្តចាត់ទុកវិស័យទេសចរណ៍ ជាវិស័យអាទិភាព ដែលបាន និងកំពុងដើរតួនាទីយ៉ាងសំខាន់ ​ក្នុងការរួមចំណែកដល់ការអភិវឌ្ឍសង្គម-សេដ្ឋកិច្ចជាតិ។

សម្ដេចធិបតី ហ៊ុន ម៉ាណែត ធ្លាប់អះអាងថា រាជរដ្ឋាភិបាលសុខចិត្តខាតរាប់លានដុល្លារ ដើម្បីទម្លាក់ថ្លៃ VISA, ដាក់ចេញ e-VISA ក្នុងគោលដៅកាត់បន្ថយភាពកកស្ទះនៅអាកាសយានដ្ឋាន កាត់បន្ថយពន្ធសួយសារអាករ រៀបចំកញ្ចប់ផ្សេងៗ  ដើម្បីបង្កភាពងាយស្រួលដល់វិស័យអាកាសចរណ៍ ទាក់ទាញភ្ញៀវទេសចរឱ្យមកកាន់ប្រទេសកម្ពុជា។

កម្ពុជា មានអាកាសយានដ្ឋានអន្តរជាតិចំនួន៣ ដូចជាអាកាសយានដ្ឋានអន្តរជាតិភ្នំពេញ​ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិព្រះសីហនុ។ តាមរយៈអាកាសយានដ្ឋានអន្តរជាតិទាំង៣នេះ នៅក្នុងរយៈពេលពេញ១ឆ្នាំ២០២៤

 កម្ពុជាទទួលបានជើងហោះហើរសរុបចំនួន៥៨ ៣៥៤ជើង និងអ្នកដំណើរជាង៦លាន២សែននាក់​។ តាមរបាយការណ៍របស់អាកាសចរណ៍ស៊ីវិលចំនួននេះ គឺកើនជាង ៧ពាន់ជើងហោះហើរ បើធៀបទៅនឹងរយៈពេលដូចគ្នាក្នុងឆ្នាំ ២០២៣។

តាមរយៈកំណើនជើងហោះហើរនៅកម្ពុជានេះ អ្នកនាំពាក្យអាកាសចរណ៍ស៊ីវិល លោក ស៊ីន ចាន់សិរីវុត្ថា ឱ្យដឹងថា កំណើននេះ គឺកើតចេញពីការខិតខំប្រឹងប្រែងរបស់រដ្ឋាភិបាលកម្ពុជា ក៏ដូចជាភាគីក្រុមហ៊ុនអាកាសចរណ៍ក្នុងការជួយសម្របសម្រួលលក្ខខណ្ឌជាច្រើនដល់អ្នកធ្វើដំណើរតាមផ្លូវអាកាស។ អ្នកនាំពាក្យរូបនេះ ដាក់ក្ដីរំពឹងថា ចំនួនជើងហោះហើរ និងចំនួនអ្នកធ្វើដំណើរនឹងបន្តកើនឡើងថែមទៀតក្នុងឆ្នាំ២០២៥ ស្របពេលដែលរាជរដ្ឋាភិបាលកំពុងធ្វើទំនើបកម្មហេដ្ឋារចនាសម្ព័ន្ធអាកាសយានដ្ឋាន លើកកម្ពស់សេវាកម្មអាកាសចរណ៍ និងពង្រើកបន្ថែមការហោះហើរទៅកាន់ប្រទេសផ្សេងៗ។

គួរឱ្យដឹងថា ពេញ១ឆ្នាំ២០២៤ កម្ពុជា ទទួលបា​នភ្ញៀវទេសចរណ៍អន្តរជាតិជាង ៦,៧ លាននាក់ ​ដោយកើន​ឡើង ២២,៩ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។ ភ្ញៀវទេស​ចរ​បរទេសមកលេងកម្ពុជា​​ច្រើនជាងគេរួមាន ភ្ញៀវទេសចរថៃ វៀតណាម ចិន ឡាវ និងអាមេរិក។ ការណ៍នេះ នាំឱ្យកម្ពុជារកចំណូលបានជាង ៣,៦៣ ពាន់លានដុល្លារ ពីភ្ញៀវទេសចរអន្តរជាតិ៕

ដោយ៖ ង៉ិល ណារ៉ាត់

The post សម្ដេចធិបតី៖ រដ្ឋកំពុងដោះស្រាយបញ្ហាក្នុងវិស័យអាកាសចរណ៍ ដើម្បីនាំភ្ញៀវទេសចរមកកម្ពុជាឱ្យបានច្រើន appeared first on Kampuchea Thmey Daily.

ក្នុងមតិស្វាគមន៍អង្គសិក្ខាសាលា បណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានជម្រាបជូនអង្គសិក្ខាសាលាថា រដ្ឋលេខាធិការដ្ឋានអាកាសចរណ៍ស៊ីវិល សូមធ្វើការគាំទ្រ និងសូមចូលរួមអនុវត្តយ៉ាងពេញលេញ ប្រកបដោយស្មារតីទទួលខុសត្រូវខ្ពស់ នូវយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ធ្វើឱ្យស្ថាប័នរដ្ឋក្លាយទៅជាអង្គភាពរដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ ដើម្បីបម្រើនូវផលប្រយោជន៍ជូនប្រជាជនឱ្យកាន់តែប្រសើរ តាមរយៈការដាក់ចេញនូវវិធានគន្លឹះចំនួន៣ ក្នុងការកែទម្រង់រដ្ឋបាលសាធារណៈ។

 ក្នុងរបាយការណ៍សង្ខេបនៃសមិទ្ធផលរបស់រដ្ឋលេខាធិការដ្ឋានសម្រេចបាននាពេលកន្លងមក រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានបញ្ជាក់ថា ក្នុងការងារកែទម្រង់រដ្ឋបាលសាធារណៈ រដ្ឋលេខាធិការដ្ឋានអាកាសចរណ៍ស៊ីវិល បានខិតខំចូលរួមអនុវត្តវិធានការគន្លឹះទាំង៣ ដោយសម្រេចបាននូវសមិទ្ធផលសំខាន់ៗមួយចំនួនរួមមាន៖ ការបង្កើតក្រុមការងារកែទម្រង់រដ្ឋបាលសាធារណៈនៃរដ្ឋលេខាធិការដ្ឋានអាកាសចរណ៍ស៊ីវិល, ក្រុមការងារបច្ចេកទេសពិនិត្យឡើងវិញ និងវិភាគមុខងារនិងរចនាសម្ព័ន្ធ, ក្រុមការងារបច្ចេកទេសធ្វើបច្ចុប្បន្នភាព រចនាសម្ព័ន្ធ និងទិន្នន័យមន្ត្រីរាជការរដ្ឋលេខាធិការដ្ឋានអាកាសចរណ៍ស៊ីវិល។

បន្ថែមពីនេះ រដ្ឋលេខាធិការដ្ឋានអាកាសចរណ៍ស៊ីវិល បានរៀបចំរបាយការណ៍ស្តីពីការគ្រប់គ្រងមន្ត្រី និងរបាយការណ៍ស្តីពីការរៀបចំការប្រើប្រាស់ប្រព័ន្ធលើកទឹកចិត្តមន្ត្រីរាជការ និងបានផ្ញើជូនអគ្គលេខាធិការដ្ឋានកំណែទម្រង់រដ្ឋបាលសាធារណៈរួចរាល់ និងបានធ្វើរបាយការណ៍វឌ្ឍនភាពស្តីពីការពិនិត្យឡើងវិញ ការវិភាគមុខងារនិងរចនាសម្ព័ន្ធ តាមការណែនាំរបស់រាជរដ្ឋាភិបាល ដោយបានបំពេញទិន្នន័យចប់សព្វគ្រប់ និងបានផ្ញើជូនក្រសួងមុខងារសាធារណៈរួចរាល់។ ទន្ទឹមនេះ រដ្ឋលេខាធិការដ្ឋានអាកាសចរណ៍ស៊ីវិល បាន និងកំពុងរៀបចំអនុក្រឹត្យស្តីពី ការរៀបចំនិងការប្រព្រឹត្តទៅរបស់ការិយាល័យចំណុះនាយកដ្ឋាន ឱ្យស្របទៅនឹងអនុក្រឹត្យស្តីពី ការរៀបចំនិងការប្រព្រឹត្តទៅនៃរដ្ឋលេខាធិការដ្ឋានអាកាសចរណ៍ស៊ីវិល និងលទ្ធផលនៃការពិនិត្យឡើងវិញ ការវិភាគមុខងារនិងរចនាសម្ព័ន្ធនៃរដ្ឋលេខាធិការដ្ឋានអាកាសចរណ៍ស៊ីវិល។

ការពិនិត្យឡើងវិញ និងការវិភាគមុខងារនិងរចនាសម្ព័ន្ធ មិនមែនជាយន្តការវះកាត់រចនាសម្ព័ន្ធ ឬធ្វើឱ្យប៉ះពាល់ផលប្រយោជន៍របស់មន្ត្រីដែលមានចែងដោយច្បាប់នោះទេ។ នេះបើតាមការគូសបញ្ជាក់ដោយឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ (គ.វ.រ.) ។

រាប់ពីខែមិថុនា ឆ្នាំ២០២៤ មកដល់ខែកុម្ភៈ ឆ្នាំ២០២៥ នេះ ក្រសួងមុខងារសាធារណៈ បានរៀបចំការវិភាគមុខងារសាធារណៈទៅលើក្រសួង-ស្ថាប័នចំនួនដូចជា ក្រសួងមហាផ្ទៃ, ក្រសួងសង្គមកិច្ច អតីតយុទ្ធជន និងយុវនីតិសម្បទា​, ក្រសួងអប់រំ យុវជន និងកីឡា ,​ក្រសួងយុត្តិធម៌, ក្រសួងសេដ្ឋកិច្ច​ និងហិរញ្ញវត្ថុ, ក្រសួងសុខាភិ​បាល, ទីស្ដីការគណរដ្ឋមន្ត្រី, ក្រសួងរៀបចំ ដែនដី នគរូបនីយកម្ម និងសំណង់, ក្រសួងការងារ និងបណ្ដុះបណ្ដាលវិជ្ជាជីវៈ,ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍,ក្រសួងធនធានទឹក និងឧតុនិយម, ក្រសួងអភិវឌ្ឍន៍ជនបទ, ក្រសួងបរិស្ថាន, ក្រសួងសាធារណៈការ និងដឹកជញ្ជូន, ក្រសួងពាណិជ្ជកម្ម, ក្រសួងប្រៃសណីយ៍ និងរដ្ឋលេខាធិការដ្ឋានអាកាសចរស៊ីវិលនាពេលនេះ។

ឯកឧត្ដម ហ៊ុន ម៉ានី ធ្លាប់បានអះអាងថា ក្រោយពីបានប្រមូលព័ត៌មានតាមរយៈការវិភាគមុខងារលើក្រសួងស្ថាប័នរួចរាល់ គណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នឹងរៀបចំរបាយការណ៍ ជូនសម្ដេចធិបតី ហ៊ុន​ ម៉ាណែត នាយករដ្ឋមន្ត្រីកម្ពុជា និងរងចាំការតម្រង់ទិសពីសំណាក់សម្ដេចធិបតីប្រមុខរាជរដ្ឋាភិបាល៕

The post ជៀសវាងជាន់ការងារ៖ ក្រសួងមុខងារ បន្តពិនិត្យ ពង្រឹងរចនាសម្ព័ន្ធការងាររដ្ឋលេខាធិការដ្ឋានអាកាសចរស៊ីវិល appeared first on Kampuchea Thmey Daily.

ផែនការនេះត្រូវបានលើកឡើងក្នុងជំនួបកាលពីពេលថ្មីៗនេះរវាងលោកឯកអគ្គរដ្ឋទូតសហភាបអឺរ៉ុបប្រចាំនៅកម្ពុជា Igor Driesmans ជាមួយ  លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល (SSCA) រួមជាមួយតំណាងមកពីទីភ្នាក់ងារសុវត្ថិភាពអាកាសចរណ៍សហភាពអឺរ៉ុប (EASA) ផងដែរ។

បើយោងតាមសហភាបអឺរ៉ុបប្រចាំនៅកម្ពុជាចេញផ្សាយកាលពីថ្ងៃទី១៥ ខែមករា ដោយមានការគាំទ្រពីកម្មវិធីការសាងសង់អាកាសយានដ្ឋាន ការធ្វើផែនការផ្លូវអាកាស និងការអភិវឌ្ឍន៍ស្តង់ដារ  និងសុវត្ថិភាព (SCOPE) ដែលផ្តល់មូលនិធិដោយទីភ្នាក់ងារសុវត្ថិភាពអាកាសចរណ៍សហភាពអឺរ៉ុប(EASA) នឹងជួយដល់ SSCA ក្នុងការបង្កើតផែនការមេអាកាសចរណ៍កម្ពុជា ដែលស្របតាមស្តង់ដារអន្តរជាតិ។

«ផែនការនេះមានគោលបំណងលើកកំពស់សមត្ថភាពអាកាសយានដ្ឋាន និងប្រតិបត្តិការដែនអាកាស ជំរុញសុវត្ថិភាព និងនិរន្តរភាព ដែលធ្វើឲ្យប្រទេសកម្ពុជាកាន់តែមានភាពទាក់ទាញចំពោះក្រុមហ៊ុនអាកាសចរណ៍អន្តរជាតិ និងក្នុងស្រុក»។ នេះបើតាមសហភាពអឺរ៉ុបប្រចាំនៅកម្ពុជា។

លោក ស៊ីន ចាន់សេរីវត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលបានឱ្យដឹងកាលពីពេលថ្មីៗនេះថា គិតចាប់ពីខែមករា ដល់ខែវិច្ឆិកា ឆ្នាំ ២០២៤ កម្ពុជាទទួលបានអ្នក​ដំណើរ​ចេញ-ចូលតាម​ជើង​ហោះ​ហើរ​ជាង ៥ លាននាក់ (៥ ៥៩៩ ៨៣១) មានការកើនឡើង ២១ ភាគរយ បើធៀបនឹង​រយៈពេល​ដូច​គ្នា​នៅឆ្នាំ ២០២៣។

លោក​បន្តថា​ ក្នុងដំណាក់កាល​នេះ​ភ្ញៀវទេសចរ​បរទេស​ដែល​មក​កម្ពុជា ភាគច្រើន​ជា​ប្រជាជន​ក្នុង​តំបន់ ឬ​មកពី​ប្រទេស​មាន​ព្រំដែន​ជាប់​គ្នា​តែប៉ុណ្ណោះ ព្រោះ​ងាយស្រួល​ធ្វើដំណើរ​ដោយ​អាច​តាម​ផ្លូវគោក ផ្លូវទឹក និង​ផ្លូវអាកាស​។​

​លោក​ថ្លែងថា​៖ «​យើងទាំងអស់គ្នាដឹងហើយថាសារ​ស្ថានភាព​ពិភពលោក​បន្ត​ស្ថិតក្នុង​ភាពមិន​ច្បាស់​លាស់ ដូច្នេះ​ខ្ញុំ​ពិតជា​ពិបាក​ព្យាករ​ថា វិស័យ​ទេសចរណ៍​កម្ពុជា ក៏ដូចជា​ការ​មកដល់​របស់​ភ្ញៀវ​តាមផ្លូវ​អាកាស​នឹងមាន​ស្ថានភាព​បែបណា​នោះទេដោយសារតែបណ្តាប្រទេសនានាជិតខាងយើងក៏គេបានព្យាយាមទាក់ទាញភ្ញៀវទេចរខ្លាំងណាស់នាពេលបច្ចុប្បន្ន​ដើម្បីជួយស្តារសេដ្ឋកិច្ចរបស់គេ»៕

​

The post សហភាពអឺរ៉ុបប្តេជ្ញាផ្តល់ហិរញ្ញប្បទានក្នុងជួយអភិវឌ្ឍន៍វិស័យអាកាសចរណ៍កម្ពុជា appeared first on Kampuchea Thmey Daily.

លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអកាសចរណ៍ស៊ីវិលមាន​ប្រសា​សន៍​​​ថា ការអភិវឌ្ឍន៍​វិស័យ​​អាកាស​ចរណ៍នៅតែជារបៀបវារៈនៃគោលនយោបាយ​របស់រាជរដ្ឋា​ភិបាល​​​​​កម្ពុជា ដើម្បីជំរុញការតភ្ជាប់ទីផ្សារក្នុងស្រុក និងអន្តរជាតិ ជំរុញវិស័យទេសចរណ៍ និង​ពាណិជ្ជ​កម្ម, ជំរុញកំណើនសេដ្ឋកិច្ច តាមរយៈការវិនិយោគបរទេស និងបង្កើតការងារ។

លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិក (PATA) ប្រាប់កម្ពុជាថ្មី នៅថ្ងៃទី ២៥ ខែវិច្ឆិកា ឆ្នាំ ២០២៤ ថា លោកសាទរចំពោះកំណើនអ្នកដំណើរចេញ-ចូល​តាមជើង​ហោះហើរ ដែលជាគោលដៅសម្រាប់យើងគ្រប់គ្នាចង់បាន ខណៈរដ្ឋាភិបាល និងវិស័យ​ឯកជន​​ត្រូវខិតខំ​ប្រឹង​ប្រែង​​បន្ថែមទៀត នៅចំពេលដែលពិភពលោកកាន់តែរួមតូចនៅក្នុងទីផ្សារ ដែលមានការ​ប្រកួត​​​ប្រជែងកាន់តែច្រើន។

លោក ធួន ស៊ីណាន ថ្លែងថា៖ «ពិភពលោកកាន់តែរួមតូចទៅនៅក្នុងទីផ្សារ អញ្ចឹងការប្រកួត​ប្រ​ជែង​​​មានកាន់តែច្រើន អ្វីដែលយើងត្រូវធ្វើប្រឹងប្រែងបន្ថែមទៀត ទាំងរដ្ឋ និងឯកជន យើង​អត់​ដឹង​ថា ថ្ងៃស្អែកវាមានរឿងអ្វីកើតឡើងទេ ប្រសិនបើមិនមានភូមិសាស្ត្រនយោបាយ យើងអាចប៉ាន់​ស្មាន​​បាន ប៉ុន្តែនៅពេលដែលយើងជាប់នឹងភូមិសាស្ត្រនយោបាយយើងមិនអាចវាយ​តម្លៃបាន​ទេ»។

យោងតាមរដ្ឋលេខាធិការដ្ឋានអាកាស​ចរណ៍ស៊ីវិល គិតចាប់ពីខែមករា ដល់ខែតុលា កម្ពុជាទទួល​បាន​ជើងហោះហើរចេញ-ចូល (ទ្វេទិស) ចំនួនជិត ៥ ម៉ឺនជើង (៤៧ ៤៤៧)  កើនឡើង ១៤ ភាគរយ​។

អ្នកដំណើរចេញ-ចូល ជិត ៥ លាននាក់ កើនឡើង ២១ ភាគរយ និងទំនិញតាមផ្លូវ​អាកាស​ចេញ-ចូល​ជាង ៦ ម៉ឺនតោន កើនឡើង ៣៧ ភាគរយ៕

អត្ថបទ៖ ឡេង ដេត

The post កម្ពុជាទទួលបានអ្នកដំណើរចេញ-ចូល តាមជើង​ហោះ​​ហើរជិត ៥ លាននាក់ ក្នុងរយៈពេល ១០ ខែ appeared first on Kampuchea Thmey Daily.