រត់ប្រណាំងអន្តរជាតិពាក់កណ្តាលម៉ារ៉ាតុងអង្គរ Archives - Kampuchea Thmey Daily

មនុស្សប្រមាណ២ពាន់នាក់ ចូលគ្នារត់ប្រណាំងប្រមូលថវិកាជូនអង្គការគ្រួសារថ្មី គាំទ្រការអប់រំជនមានពិការភាព

Sokhom Khon — Sun, 15 Dec 2024 12:36:42 +0000

នាព្រឹកថ្ងៃទី១៥ ខែធ្នូ ឆ្នាំ២០២៤ លោកជំទាវ ហេង សុខា បានដឹកនាំក្រុមរត់ប្រណាំងដែលជាគណៈគ្រប់គ្រងនិងនិយោជិតរបស់ក្រុមហ៊ុន អាយអិនជី ហូលឌីង និងក្រុមហ៊ុនញាតិសម្ព័ន្ធ សរុបជាង១៣០នាក់ ក្នុងព្រឹត្តិការណ៍រត់ប្រណាំងសប្បុរសធម៌ ដើម្បីអនាគត ចម្ងាយ៥គីឡូម៉ែត្រ និង១០គីឡូម៉ែត្រ នៅក្នុងតំបន់អភិវឌ្ឍន៍ទីក្រុងរណប អុឹង ស៊ីធី ING CITY ស្ថិតនៅភូមិសាស្ត្រ ខណ្ឌដង្កោ និងខណ្ឌមានជ័យ រាជធានីភ្នំពេញ ដែលមានអ្នកចូលរួមសរុបប្រមាណ ២០០០នាក់ (ឆ្នាំ២០២៣ ចំនួន១២០០នាក់) ដោយចាប់ផ្ដើមនិងបញ្ចប់ការរត់នៅលើមហាវិថី ឈុន គង់ ត្រង់ចំណុចផ្សារទំនើប អ៊ីអន មានជ័យ និងរត់កាត់លើមហាវិថី សម្ដេច ហ៊ុន សែន ផងដែរ។

នេះជាលើកទី២ នៃការរៀបចំព្រឹត្តិការណ៍រត់ប្រណាំងសប្បុរសធម៌ ក្នុងតំបន់អភិវឌ្ឍន៍ទីក្រុងរណប អុឹង ស៊ីធី (ING CITY) ដែលត្រូវបានរៀបចំដោយក្លឹបSUSU ក្លឹបKKRC និងក្លឹបSheRuns ដោយទទួលបានការអនុញ្ញាតនិងផ្ដល់កិច្ចសហការបច្ចេកទេសពីសហព័ន្ធខ្មែរអត្តពលកម្មស្ម័គ្រចិត្ត ព្រមទាំងសហការផ្ដល់ទីតាំងរៀបចំដោយក្រុមហ៊ុន អាយអិនជី ហូលឌីង (ING Holdings) ហើយថវិកាដែលបានពីការរត់ប្រណាំងនេះនឹងផ្ដល់ជូនដល់អង្គការគ្រួសារថ្មីរបស់យើង ដើម្បីគាំទ្រការអប់រំផ្នែកកីឡាសម្រាប់កុមារពិការភ្នែក និងគរថ្លង់។

សូមបញ្ជាក់ផងដែរថា ព្រឹត្តិការណ៍រត់ប្រណាំងសប្បុរសធម៌នេះ មានបញ្ចូល ១៨វិញ្ញាសារ ដែលអ្នកចូលរួមប្រកួតមានឱកាសទទួលបានពានរង្វាន់ និងប្រាក់រង្វាន់ទៅតាមក្រុមអាយុ ដោយមានសម្រាប់កុមារអាយុក្រោម ១៨ឆ្នាំ (ស្រីនិងប្រុស) ក្រុមមហាជនទូទៅអាយុពី១៨ឆ្នាំ ដល់៥០ឆ្នាំ (ស្រីនិងប្រុស) និងក្រុមជើងចាស់អាយុលើស ៥០ឆ្នាំ (ស្រីនិងប្រុស)។

The post មនុស្សប្រមាណ២ពាន់នាក់ ចូលគ្នារត់ប្រណាំងប្រមូលថវិកាជូនអង្គការគ្រួសារថ្មី គាំទ្រការអប់រំជនមានពិការភាព appeared first on Kampuchea Thmey Daily.

សម្ដេចធិបតី៖ រត់ពាក់កណ្ដាលម៉ារ៉ាតុងអន្តរជាតិអង្គរវត្ត គឺដើម្បីគាំទ្រសកម្មភាពមនុស្សធម៌

Thoeun Vansong — Sun, 01 Dec 2024 02:05:40 +0000

នៅព្រឹកថ្ងៃទី១ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញចូលរួមរត់ប្រណាំងអន្តរជាតិពាក់កណ្តាលម៉ារ៉ាតុងអង្គរវត្តលើកទី២៩ នៅរមណីយដ្ឋានអង្គរ។ សម្ដេចធិបតី ថ្លែងថា កម្មវិធីរត់ពាក់កណ្ដាលម៉ារ៉ាតុងអន្តរជាតិអង្គរវត្តនេះ ដើម្បីគាំទ្រសកម្មភាពមនុស្សធម៌។

សម្ដេចធិបតី ហ៊ុន ម៉ាណែត បានសម្ដែងសេចក្តីសប្បាយរីករាយដែលបានចូលរួមរត់ក្នុងកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងអង្គរវត្តលើកទី២៩ ដែលមានការចូលរួមពីប្រជាពលរដ្ឋខ្មែរ និងបរទេសប្រមាណ ១៤ ០០០នាក់ មកពី ៨៧ប្រទេស។

សម្ដេចធិបតី បញ្ជាក់ថា កម្មវិធីរត់ពាក់កណ្ដាលម៉ារ៉ាតុងអន្តរជាតិអង្គរវត្តលើកទី២៩នេះ រៀបចំឡើងក្នុងគោលបំណង ដើម្បីគាំទ្រដល់សកម្មភាពមនុស្សធម៌ ជាអាទិ៍ ការជួយដល់កុមារកម្ពុជា ប្រជាជនមានការលំបាក និងជនពិការភាពជាពិសេសជនរងគ្រោះដោយសារគ្រាប់មីន។

សម្ដេចធិបតី បានអរគុណចំពោះគណៈកម្មការរៀបចំ សប្បុរសជន កម្លាំងសមត្ថកិច្ច និងអ្នកពាក់ព័ន្ធទាំងអស់ដែលបានសហការគ្នារៀបចំកម្មវិធីនេះប្រព្រឹត្តទៅដោយរលូន។ ជាមួយគ្នានេះ សម្ដេច ក៏បានថ្លែងអំណរគុណដល់អត្តពលិកជាតិអន្តរជាតិទាំងអស់ ដែលបានចូលរួមរត់ប្រណាំងយ៉ាងច្រើនកុះកុះករនៅពេលនេះផងដែរ។

ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអង្គរវត្តលើកទី២៩ ចែកចេញជា ៤វិញ្ញាសា រួមមាន៖ វិញ្ញាសាចម្ងាយ៣គីឡូម៉ែត្រ វិញ្ញាសា៥គីឡូម៉ែត្រ វិញ្ញាសា១០គីឡូម៉ែត្រ និងវិញ្ញាសា២១គីឡូម៉ែត្រ។

យោងតាមរបាយការណ៍ពីគណៈកម្មាធិការជាតិអូឡាំពិកកម្ពុជា ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអង្គរវត្ត លើកទី២៩ មានអ្នកចូលរួមសរុបប្រមាណ ១៤ ៣៧០នាក់ មកពី៨៧ប្រទេស ដែលក្នុងនោះ ប្រទេសដែលមានអត្តពលិកចុះឈ្មោះចូលរួមរត់ប្រណាំងច្រើនជាងគេរួមមាន អង់គ្លេស អូស្ត្រាលី បារាំង ជប៉ុន អាមេរិក ចិន ម៉ាឡេស៊ី សឹង្ហបុរី ហុងកុង និងថៃ៕

The post សម្ដេចធិបតី៖ រត់ពាក់កណ្ដាលម៉ារ៉ាតុងអន្តរជាតិអង្គរវត្ត គឺដើម្បីគាំទ្រសកម្មភាពមនុស្សធម៌ appeared first on Kampuchea Thmey Daily.

ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌

chean virakbot — Sat, 28 Sep 2024 00:32:30 +0000

ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអង្គរ លើកទី២៩ នៅថ្ងៃទី១ ខែធ្នូ ឆ្នាំ២០២៤ នៅមុខប្រាសាទអង្គរវត្ត ខេត្តសៀមរាប រំពឹងរៃអង្គាសបានប្រាក់ជាង១០ម៉ឺនដុល្លារអាមេរិកដើម្បីកិច្ចការមនុស្សធម៌។

ព្រឹត្តិការណ៍លើកទី២៩ នឹងមានអ្នកចូលរួមជាងម៉ឺននាក់ដែលជាចំនួនច្រើនបំផុតមិនធ្លាប់មាន ក្រោយពេលវិបត្តិជំងឺកូវីដ-១៩ និងកាន់តែវិសេសវិសាលជាមួយវត្តមានដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាចូលរួមរត់កម្សាន្តដើម្បីសុខភាព។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានថ្លែងក្នុងសន្និសីទសារព័ត៌មានកាលពីរសៀលថ្ងៃទី២៧ ខែកញ្ញា ឆ្នាំ២០២៤ ថា វត្តមានចូលរួមរត់របស់សម្តេចធិបតីនាយករដ្ឋមន្ត្រីនៃកម្ពុជាគឺជាមហាកិត្តិយសសម្រាប់ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី២៩ និងអ្នកចូលរួមទាំងអស់។ ការចូលរួមរបស់សម្តេចធិបតីគឺរឹតតែជំរុញឲ្យព្រឹត្តិការណ៍ទទួលបានជោគជ័យ និងមានអ្នកចូលរួមច្រើនទ្វេឡើង។

លោក សែម ផល្លា នាយកប្រតិបត្តិម៉ារ៉ាតុងកម្ពុជា បានលើកឡើងថា ទិវារត់ពាក់កណ្តាលម៉ារ៉ាតុងអន្តរជាតិអង្គរគឺជាព្រឹត្តិការណ៍រត់ដែលទទួលបានជោគជ័យបំផុត។ កាលពីជិត៣០ឆ្នាំមុន អ្នកចូលរួមប្រមាណក្រោម៥០០នាក់ប៉ុណ្ណោះសម្រាប់ព្រឹត្តិការណ៍លើកទី១ ប៉ុន្តែឆ្នាំបន្តបន្ទាប់មកអ្នកចូលរួមបានកើនឡើងជាលំដាប់រហូតដល់ជាង១ម៉ឺននាក់។

ទោះជាយ៉ាងណា ក្រោយវិបត្តិកូវីដ-១៩ អ្នកចូលរួមបានថយចុះខ្លះ ប៉ុន្តែសម្រាប់លើកទី២៩ នាថ្ងៃអាទិត្យ ទី១ ខែធ្នូ ឆ្នាំ២០២៤ នឹងមានអ្នកចូលរួមជាង១ម៉ឺននាក់ ហើយរំពឹងមានអ្នកចូលរួមច្រើនបំផុតរហូតបំបែកកំណត់ត្រាប្រវត្តិសាស្ត្ររបស់ខ្លួនក្នុងរយៈពេល៣០ឆ្នាំកន្លងទៅ។

ការចូលរួមយ៉ាងច្រើនពីជនជាតិខ្មែរ និងអន្តរជាតិជាចំណែកដ៏សំខាន់ក្នុងការប្រមូលបានថវិកាដើម្បីកិច្ចការមនុស្សធម៌។ ក្នុងសន្និសីទសារព័ត៌មានតំណាងក្រុមហ៊ុន មេនូឡាយហ្វ៍ ខេមបូឌា ដែលដៃគូឧបត្ថម្ភបានថ្លែងថា ក្រុមហ៊ុនរំពឹងប្រមូលបានថវិកាប្រមាណ១០ម៉ឺនដុល្លារអាមេរិក។ ថវិកាដែលរំពឹងនេះគឺទទួលបានពីការចូលរួមរបស់បុគ្គលិកក្រុមហ៊ុនទូទាំងពិភពលោកដូចដែលធ្លាប់ធ្វើកន្លងមក។

តំណាងក្រុមហ៊ុនបានបញ្ជាក់ថា ចាប់ពីបានឧបតត្ថម្ភទិវារត់ពាក់កណ្តាលម៉ារ៉ាអន្តរជាតិអង្គរតាំងពីឆ្នាំ២០១៤មកពោលគឺរយៈពេល១១ឆ្នាំហើយ ក្រុមហ៊ុនប្រមូលបានថវិកាប្រមាណ៦៥ម៉ឺនដុល្លារអាមេរិកដើម្បីកិច្ចការមនុស្សធម៌។

ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរនេះមាន៤វិញ្ញាសាគឺ មានចម្ងាយ២១គីឡូម៉ែត្រ ចម្ងាយ១០គីឡូម៉ែត្រ ចម្ងាយ៥គីឡូម៉ែត្រ និងរត់កម្សាន្ដ៣គីឡូម៉ែត្រ ខណៈសម្តេចធិបតីនាយករដ្ឋមន្ត្រីនឹងចូលរួមរត់ចម្ងាយ៥គីឡូម៉ែត្រ។

ក្នុងសន្និសីទសារព័ត៌មានកាលពីថ្ងៃទី២៧ ខែកញ្ញា ឆ្នាំ២០២៤ ក៏មានការប្រគល់ថវិកាសប្បុរសធម៌ដែលជាថវិកាព្រឹត្តិការណ៍ឆ្នាំ២០២៣។ មន្ទីរពេទ្យកុមារគន្ធបុប្ផាទទួលបាន៥០០០ដុល្លារ អង្គការ Cambodia Trust ទទួលបាន២៥០០ដុល្លារ អង្គការជនពិការអន្តរជាតិ (Handicap International) ទទួលបាន២០០០ដុល្លារ និង អង្គការបេះដូងមាសទទួលបាន១០៥០០ដុល្លារសម្រាប់បែងចែកបន្តដល់អង្គការសប្បុរសធម៌ចំនួន៦ផ្សេងទៀត៕

អត្ថបទ៖ វីរបុត្រ

The post ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌ appeared first on Kampuchea Thmey Daily.

មនុស្សជាង១ម៉ឺននាក់រត់ពាក់កណ្តាលម៉ារ៉ាតុងអន្តរជាតិអង្គរព្រឹកថ្ងៃអាទិត្យនេះ

chean virakbot — Sun, 03 Dec 2023 00:16:43 +0000

អត្តពលិកជាតិ និងអន្តរជាតិជាង១ម៉ឺននាក់បានចូលរួមរត់ពាក់កណ្តាលម៉ារ៉ាតុងអន្តរជាតិអង្គរវត្ត លើកទី២៨ នៅព្រឹកថ្ងៃអាទិត្យ ទី៣ ខែធ្នូ ឆ្នាំ២០២៣ នៅមុខប្រាសាទអង្គរវត្ត ខេត្តសៀមរាប នៃព្រះរាជាណាចក្រកម្ពុជា។

តាមការឲ្យដឹងពីលោកបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា (NOCC)ថា ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី២៨នេះបានទាក់ទាញអ្នកចូលរួមសរុប១០១៥៤នាក់ ក្នុងនោះមានជនជាតិខ្មែរ៦៥០០នាក់ និងជនជាតិបរទេស៣៦៥៤នាក់ ដែលមកពី៧៨ប្រទេសផ្សេងគ្នា។ ប្រទេសដែលមានប្រជាពលរដ្ឋចូលរួមច្រើនគឺអង់គ្លេស សហរដ្ឋអាមេរិក និងបារាំង។ បើប្រៀបធៀបនឹងឆ្នាំ២០២២កន្លងកន្លងទៅ នៅឆ្នាំ២០២៣នេះមានការកើនឡើង៤០%។

គោលបំណងនៃការរៀបចំរត់ប្រណាំងពាក់កណ្តាលម៉ារ៉ាតុងអន្តរជាតិអង្គរដែលត្រូវបានធ្វើឡើងរៀងរាល់ខែធ្នូនៃឆ្នាំនីមួយៗ និយាយជារួមគឺដើម្បីទាក់ទាញភ្ញៀវទេសចរជាតិ-អន្តរជាតិ បំផុសសកម្មភាពកីឡា បង្កើនសាមគ្គីភាព សុខភាពទាំងប្រជាពលរដ្ឋសាមញ្ញក៏ដូចជាអត្តពលិកអាជីព។ ជាពិសេសទៀតនោះដើម្បីមនុស្សធម៌ និងរត់ដើម្បីជនរងគ្រោះដោយសារមីន។

និយាយដោយឡែក ព្រឹត្តិការណ៍ឆ្នាំ២០២៣ ដើម្បីចូលរួមអបអរសាទរដល់ខួបអនុស្សាវរីយ៍លើកទី៧០ នៃទំនាក់ទំនងការទូតរវាងកម្ពុជា-ជប៉ុន និងខួបលើកទី២៨ នៃកិច្ចសហការរវាងគណៈកម្មាធិការជាតិអូឡាំពិកកម្ពុជា និងអង្គការបេះដូងមាស៕

អត្ថបទ៖ ជាន ចាន់រ៉ា

The post មនុស្សជាង១ម៉ឺននាក់រត់ពាក់កណ្តាលម៉ារ៉ាតុងអន្តរជាតិអង្គរព្រឹកថ្ងៃអាទិត្យនេះ appeared first on Kampuchea Thmey Daily.

រត់ប្រណាំងអន្តរជាតិពាក់កណ្តាលម៉ារ៉ាតុងអង្គរ Archives - Kampuchea Thmey Daily

សម្ដេចធិបតី៖ រត់ពាក់កណ្ដាលម៉ារ៉ាតុងអន្តរជាតិអង្គរវត្ត គឺដើម្បីគាំទ្រសកម្មភាពមនុស្សធម៌

ទិវារត់​ម៉ារ៉ាតុង​អង្គរនាខែធ្នូ រំពឹង​រក​បាន​ប្រាក់​ជាង​១០ម៉ឺន​ដុល្លារដើម្បី​សប្បុរសធម៌

មនុស្ស​ជាង១ម៉ឺននាក់រត់ពាក់កណ្តាលម៉ារ៉ាតុងអន្តរជាតិអង្គរព្រឹកថ្ងៃអាទិត្យនេះ

ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌

មនុស្សជាង១ម៉ឺននាក់រត់ពាក់កណ្តាលម៉ារ៉ាតុងអន្តរជាតិអង្គរព្រឹកថ្ងៃអាទិត្យនេះ