រាគរូស Archives - Kampuchea Thmey Daily

ហេតុអ្វីបានជាមនុស្សមួយចំនួន ផឹកកាហ្វេហើយទៅរាគរូស ?

សាង ស្រីល័ក្ខ — Thu, 15 Jun 2023 01:05:00 +0000

មនុស្សជាច្រើនប្រហែលជាបានកត់សម្គាល់ឃើញថាផលិតផលសម្រកទម្ងន់ ឬថ្នាំបញ្ចុះលាមកសម្រាប់អ្នកដែលមានការទល់លាមក ជាធម្មតាវាមកក្នុងទម្រង់ជាកាហ្វេ។ អ្នកខ្លះថាផឹកកាហ្វេត្រូវតែបន្ទោបង់ ប៉ុន្តែសម្រាប់អ្នកខ្លះដែលផឹកកាហ្វេហើយមិនមានរោគសញ្ញាអ្វីឡើយ។ ហេតុអ្វីបានជាអញ្ចឹង?

លោកវេជ្ជបណ្ឌិត Pirat Lokapattana វេជ្ជបណ្ឌិតឯកទេសផ្នែកជំងឺខាងក្នុង ឬ Doctor Cat ពន្យល់ថា
“កាហ្វេ និងជាតិកាហ្វេអ៊ីនជំរុញអ្នកទទួលប្រូតេអ៊ីន muscarinic រំញោច peristalsis ពោះវៀន លើសពីនេះ ការផឹកកាហ្វេលើសពី៣កែវ ឬច្រើនជាងនេះ ធ្វើឲ្យក្រពះលាតសន្ធឹង។ រំញោចការឆ្លុះក្រពះពោះវៀន ដែលនាំទៅដល់ការបន្ទោរបង់ញឹកញាប់ឬរាគតែម្ដង។

ទោះយ៉ាងណាក៏ដោយ រឿងនេះនឹងកើតឡើងតែនៅពេលដែលអ្នកដែលមិនធ្លាប់ពិសាកាហ្វេពីមុនមក ឬយូរៗម្តងផឹកកាហ្វេដែលមិនផឹកកាហ្វេជាប្រចាំ។ លើសពីហានិភ័យនៃជំងឺរាគ អ្នកនៅតែអាចទទួលរងឥទ្ធិពលនៃជាតិកាហ្វេអ៊ីន ក្នុងករណីខ្លះ ដូចជាញ័រទ្រូង បេះដូងលោតញាប់ គេងមិនលក់ ថប់បារម្ភ ឈឺក្បាល ឬមនុស្សខ្លះអាចមានអាឡ័កស៊ីទៅនឹងជាតិកាហ្វេអ៊ីន ដូចជាបបូរមាត់ហើម ឬអណ្ដាត កន្ទួល ហើមមុខ ថប់ដង្ហើម ចង្អោរនិងក្អួត និងវិលមុខផងដែរ។

ដូច្នេះ គន្លឹះខ្លះៗសម្រាប់អ្នកដែលកម្រផឹកកាហ្វេ ប៉ុន្តែចង់ផឹកដើម្បីបំបាត់ភាពងងុយគេង ឬចង់ផឹកដើម្បីភ្លក់រសជាតិ គួរជ្រើសរើសផឹកកាហ្វេក្នុងរូបមន្តដែលមិនមានកំហាប់ខ្លាំង អាចចាប់ផ្តើមជាមួយកាហ្វេ ឡាតេ ម៉ូចា ឬកាត់បន្ថយបរិមាណកាហ្វេ។ កុំផឹកលើសពី ១ កែវក្នុងពេលតែមួយ កុំផឹកលើសពី ៣ កែវ ឬក៏អាចរកអាហារញ៉ាំពេលផឹកកាហ្វេក៏បាន។ វានឹងជួយឲ្យរាងកាយរបស់អ្នកស្រូបយកជាតិកាហ្វេអ៊ីនកាន់តែយឺត៕

ប្រែសម្រួល៖ សាង ស្រីល័ក្ខ

ចុចអាន៖អត្ថប្រយោជន៍ទទួលបាន បន្ទាប់ពីញ៉ាំសូកូឡាជារៀងរាល់ព្រឹក

The post ហេតុអ្វីបានជាមនុស្សមួយចំនួន ផឹកកាហ្វេហើយទៅរាគរូស ? appeared first on Kampuchea Thmey Daily.

ជំងឺ ៣ប្រភេទ កំពុងយាយីដល់កុមារកម្ពុជា

Sophal Tuon — Sun, 28 May 2023 03:08:33 +0000

លោក សាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ បានមានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២៨ ឧសភានេះថា បច្ចុប្បន្នជំងឺដែលតែងតែយាយីមកលើកុមារកម្ពុជា ភាគច្រើន គឺជំងឺផ្លូវដង្ហើម ជំងឺរាគ និងជំងឺគ្រុនឈាម។

លោកសាស្ត្រាចារ្យ បានបន្តថា ជាធម្មតាកុមារកម្ពុជា កើតមកភាគច្រើនតែងតែប្រឈមនឹងជំងឺផ្លូវដង្ហើមដូចជា រលាកទងសួត រលាកសួត ក្អក រលាកបំពង់ក គ្រុនក្តៅនិងជំងឺផ្តាសាយជាដើម។ ក្រៅពីនេះកុមារក៏ជួបប្រទះនឹងជំងឺរាគរួស ដែលបណ្តាលមកពីកត្តាអនាម័យដែលអាណាព្យាបាលឬឪពុកម្តាយមួយចំនួន នៅមិនទាន់ចេះពីរបៀបថែទាំ និងផ្តល់ចំណីអាហារដល់ទារក និងកូនៗប្រកបដោយអនាម័យធ្វើឱ្យមានបញ្ហាជំងឺរាគរួសនិងមួយទៀតជំងឺគ្រុនឈាម ដែលជំងឺនេះកើតឡើងនៅរដូវភ្លៀងធ្លាក់ចម្លងពីមូសខ្លា។

លោកសាស្ត្រាចារ្យបានពន្យល់ថា មូសខ្លាវាកើតឡើងពីដង្កូវទឹក ដែលប្រជាពលរដ្ឋមិនបានអនាម័យនៅតាមបរិវេណលំនៅដ្ឋានបានល្អដូចជា មានវត្ថុដក់ទឹកដែលជាប្រភពនៃការកកើតដង្កូវទឹកវិវត្តន៍ទៅជាមូសខ្លាជាភ្នាក់ងារចម្លងជំងឺគ្រុនឈាម។

លោកសាស្ត្រាចារ្យបានណែនាំឱ្យប្រជាពលរដ្ឋចូលរួមសំអាតបរិស្ថាននៅតាមលំនៅដ្ឋានឱ្យបានស្អាតលុបបំបាត់ជម្រកមូសខ្លាដើម្បីការពារកូនចៅរបស់យើងឱ្យចៀសផុតពីជំងឺគ្រុនឈាមដោយសារឆ្នាំនេះជាឆ្នាំដល់វដ្តនៃការផ្ទុះជំងឺគ្រុនឈាមទ្រង់ទ្រាយធំ ខណៈផ្ទុះលើកចុងក្រោយនៅឆ្នាំ២០១៩។

លោកសាស្ត្រាចារ្យបានបញ្ជាក់ថា ក្រៅពីជំងឺទាំង៣ខាងលើមន្ទីរពេទ្យ ក៏ទទួលបានកុមារកើតមកមិនគ្រប់ខែផងដែរ ដោយក្នុង១ថ្ងៃៗ មានកុមារកើតមកមិនគ្រប់ខែ ចូលសម្រាកពេទ្យប្រមាណជាង១០នាក់ ក្នុងចំណោមអ្នកជំងឺសម្រាកពេទ្យថ្មីប្រមាណពី៧០ទៅ៨០នាក់ និងមានអ្នកជំងឺមកពិគ្រោះជំងឺក្រៅមានប្រមាណពី៨០០ទៅជិត១០០០នាក់ក្នុង១ថ្ងៃ៕

អត្ថបទ៖ សំអឿន

The post ជំងឺ ៣ប្រភេទ កំពុងយាយីដល់កុមារកម្ពុជា appeared first on Kampuchea Thmey Daily.

រាកធម្មតា និងរាកមួលខុសគ្នាយ៉ាងម៉េចខ្លះ? បង្ការបែបណា?

សាង ស្រីល័ក្ខ — Mon, 20 Feb 2023 01:44:44 +0000

រាកធម្មតា និងរាកមួលជាបញ្ហាសុខភាពដែលប៉ះពាល់ដល់ប្រព័ន្ធរំលាយអាហារដូចគ្នា។ ចំពោះរោគសញ្ញាវិញ រាកធម្មតា និងរាកមួលមានលក្ខណៈស្រដៀងគ្នាមួយចំនួន ដូចជាចុកពោះ ចង្អោរ និងហើមពោះ។ ស្របពេលដែលការរាកធម្មតា ជាស្ថានភាពដែលលាមករាវខ្លាំង បញ្ហារាកមួលជាការឆ្លងមេរោគ ឬរលាកពោះវៀន ដែលអាចនាំឲ្យមានឈាមក្នុងលាមករាវ។

រោគសញ្ញានៃរាកធម្មតា និងរាកមួល

រាកធម្មតា

លាមករាវ
បន្ទោបង់ញឹកញាប់ និងភ្លាមៗ
ចង្អោរ
ចុកពោះ

រាកមួល

ឈឺបន្ទោបង់ភ្លាមៗ
លាមករាវ
ចុកពោះ
ក្អួត
ចុកសាច់ដុំ
គ្រុនក្តៅ

មូលហេតុបង្កនៃរាកធម្មតា

ជាទូទៅ រាកធម្មតា អាចបង្កឡើងដោយកត្តាជាច្រើន រួមមាន៖

ប្រើប្រាស់ថ្នាំមួយចំនួន
បញ្ហាប្រព័ន្ធរំលាយអាហារ
ការឆ្លងប៉ារ៉ាស៊ីត
ជំងឺរលាកពោះវៀនធំ
អាហារមួយចំនួន
ការព្យាបាលដោយកាំរស្មី

មូលហេតុនៃបញ្ហារាគមួល

ផ្ទុយនឹងការរាករូសធម្មតា រាកមួល បណ្តាលមកពីមេរោគ ឬបាក់តេរីដែលមាននៅក្នុងចំណីអាហារ។ ពពួកបាក់តេរីដែលបណ្តាលឲ្យរាកមួលរួមមាន Shigella, Salmonella, Escherichia coli និងCampylobacter។

វិធីបង្ការរាកធម្មតា និងរាកមួល

ញ៉ាំទឹកស្អាត
ញ៉ាំអាហារដែលឆ្អិនល្អ
លាងសម្អាតដៃមុនពេលញ៉ាំអាហារ និងក្រោយបន្ទោបង់រួច។

គន្លឹះដោះស្រាយបញ្ហារាកធម្មតា និងរាកមួល

ញ៉ាំទឹកឲ្យបានច្រើន
ញ៉ាំអាហារដែលមានជាតិProbiotics ដើម្បីប្រឆាំងនឹងបាក់តេរី ដូចជាសូកូឡាពណ៌ខ្មៅ ទឹកដោះគោជូរ
ជៀសវាងញ៉ាំគ្រឿងស្រវឹង និងភេសជ្ជៈដែលមានជាតិកាហ្វេអ៊ីន។

ពេលណាគួរទៅជួបគ្រូពេទ្យ?

មិនថាគ្នាយើងមានអាការៈរាកធម្មតា ឬរាកមួលនោះទេ ក្នុងករណីដែលយើងមានរោគសញ្ញាទាំងនេះ គួរទៅជួបជាមួយនឹងគ្រូពេទ្យភ្លាមៗ។

ឈឺពោះធ្ងន់ធ្ងរ
ក្តៅខ្លួនខ្លាំង
រាករូសច្រើនជាង២ ទៅ៣ថ្ងៃ
មានអាការៈដូចជាស្ងួតមាត់ និងធីងធោង។
ទឹកនោមមានពណ៌ក្រមៅ និងមានក្លិនខ្លាំង៕

អត្ថបទផ្ដល់ដោយ៖ Hello Krupet

ចុចអាន៖ប្រុសៗញ៉ាំអាហារទាំងនេះច្រើន អាចប៉ះពាល់ អរម៉ូនភេទ

ចុចអាន៖ផ្លែឈើ ៥ ប្រភេទ ល្អសម្រាប់ខួរក្បាល ហើយក៏សម្បូរលើទីផ្សារ

The post រាកធម្មតា និងរាកមួលខុសគ្នាយ៉ាងម៉េចខ្លះ? បង្ការបែបណា? appeared first on Kampuchea Thmey Daily.

ជំងឺ ១០ មុខ ឧស្សាហ៍កើតបំផុតអំឡុងខែភ្លៀង គ្រប់គ្នាត្រូវប្រយ័ត្ន

Sonya — Thu, 24 Jun 2021 07:30:24 +0000

ដូចដឹងស្រាប់ហើយ រដូវភ្លៀងទោះបីជាសីតុណ្ហភាពត្រជាក់ស្រួលមែន ប៉ុន្តែបាក់តេរី មេរោគ និងជំងឺឆ្លងផ្សេងៗ ក៏ងាយកើតឡើងដែរ ហេតុនេះប៉ាម៉ាក់ត្រូវប្រយ័ត្នកូនៗឲ្យបានច្រើន។ អត្ថបទនេះនឹងលើកឡើងពីជំងឺមួយចំនួន ដែលឧស្សាហ៍កើតមាន ពិសេសកើតលើក្មេងៗ និងរោគសញ្ញាឲ្យបានដឹងទាំងអស់គ្នា។

១- ជំងឺគ្រុនឈាម

គ្រុនឈាម ជាជំងឺឧស្សាហ៍កើតមានបំផុតអំឡុងពេលរដូវវស្សា ឆ្លងរាលដាលតាមរយៈមូសខាំ ដែលជាពពួកមូសខ្លា ខណៈរោគសញ្ញាមានដូចជា៖

– ក្តៅខ្លួនខ្លាំង
– ឡើងកន្ទួលលើស្បែក
– ចំនួនប្លាកែតធ្លាក់ចុះ
– ងាយរងប្រតិកម្មលើស្បែក ឬច្រមុះជាដើម។

២- ជំងឺបង្កដោយវីរុស Chikungunya

ជំងឺ Chikungunya គឺបង្កឡើងដោយសត្វមូស ដែលរស់នៅក្នុងថ្លុកទឹក ហើយមូសទាំងនោះ ត្រូវប្រទះឃើញមានគ្រប់ទីកន្លែងជុំវិញបរិវេណផ្ទះរបស់យើង មានទាំងក្នុងផើងផ្កា ទុយោទឹក នឹងវត្ថុផ្សេងៗទៀតដែលដក់ទឹកបាន ខណៈភ្នាក់ងារចម្លងជំងឺនេះ គឺជាពពួកមូសខ្លា។ រោគសញ្ញាមានដូចជា៖

– ឈឺសន្លាក់ស្រួចស្រាវ
– គ្រុនក្តៅខ្លាំង
– រងារញាក់
– អស់កម្លាំង។

៣- ជំងឺគ្រុនចាញ់

ជំងឺគ្រុនចាញ់ គឺចម្លងពីមូសដែកគោល ខណៈករណីឆ្លងជំងឺនេះ តែងកើនឡើងខ្លាំងអំឡុងពេលរដូវភ្លៀងចូលមកដល់ ដោយពពួកមូសនឹងបន្តពូជនៅតាមកន្លែងដក់ទឹកផ្សេងជុំវិញព្រៃក្បែរៗផ្ទះរបស់យើង ខណៈរោគសញ្ញាមានដូចជា៖

– គ្រុនក្តៅខ្លាំង
– ឈឹចុកចាប់រាងកាយ
– គ្រុនរងារញាក់
– បែកញើសខ្លាំង។

៤- ជំងឺអាសន្នរោគ

ជំងឺអាសន្នរោគ គឺបណ្តាលមកពីការញ៉ាំអាហារ និងទឹកដែលមានផ្ទុកមេរោគ។ កង្វះអនាម័យ ក៏ជាមូលហេតុចម្បងបង្កឲ្យកើតជំងឺនេះដូចគ្នា។ អាសន្នរោគ គឺត្រូវការការព្យាបាលឲ្យបានឆាប់បំផុត ព្រោះអាចបណ្តាលឲ្យស្លាប់ក្នុងរយៈពេលប៉ុន្មានម៉ោងប៉ុណ្ណោះ ខណៈរោគសញ្ញាជាទូទៅមានដូចជា៖

– ធ្លាក់ចុះសម្ពាធឈាម
– រមួលសាច់ដុំ
– ចង្វាក់បេះដូងលោតញាប់
– ស្ងួត ភ្នាសសើមនៅត្រង់បំពង់ក និងច្រមុះជាដើម។

៥- ជំងឺគ្រុនពោះវៀន

គ្រុនពោះវៀន ជាជំងឺឆ្លងឧស្សាហ៍កើតមានដូចគ្នាអំឡុងរដូវភ្លៀងចូលមកដល់។ ជំងឺនេះ ធម្មតាបង្កឡើងដោយការញ៉ាំអាហារ និងទឹកមិនមានអនាម័យ ហើយរោគសញ្ញាមានដូចជា៖

– គ្រុនក្តៅរយៈពេលយូរ
– អស់កម្លាំង
– ឈឺពោះ
– ទល់លាមក
– ឈឺក្បាល
– ក្អួត។

៦- គ្រុនក្តៅដោយសារឆ្លងរោគ (Viral fever)

ជំងឺនេះ អាចកើតឡើងគ្រប់ពេលវេលាពេញមួយឆ្នាំតែម្ដង ប៉ុន្តែហានិភ័យកើតជំងឺនេះ នឹងកើនឡើងកាន់តែខ្ពស់អំឡុងពេលរដូវភ្លៀង ដោយរោគសញ្ញាជាទូទៅមានដូចជា៖

– គ្រុនក្តៅ
– អស់កម្លាំង
– វិលមុខ
– ល្ហិតល្ហៃ
– គ្រុនញាក់
– ឈឺចាប់រាងកាយ សាច់ដុំ និងសន្លាក់។

៧- រាក

រាក ជាបញ្ហាសុខភាពមួយឧស្សាហ៍កើតមាន និងអាចកើតលើមនុស្សគ្រប់វ័យ ពិសេសអំឡុងពេលរដូវវស្សាតែម្តង។ ជំងឺរាកអាចបណ្តាលមកពីញ៉ាំអាហារ ឬទឹកគ្មានអនាម័យ ហើយរោគសញ្ញាមានដូចជា៖

– លាមករាវ (សុទ្ធតែទឹក)
– រមួលពោះ
– គ្រុនក្តៅ
– ហើមពោះ
– ក្អួតចង្អោរ
– ឈាមក្នុងលាមក។

៨- ផ្តាសាយធម្មតា និងផ្តាសាយធំ

នៅពេលអាកាសធាតុប្រែប្រួលភ្លាមៗ នឹងបង្កឲ្យសីតុណ្ហភាពរាងកាយយើងប្រែប្រួលដូចគ្នា ហើយបញ្ហាចម្បងអាចកើតមានឡើងចំពោះសុខភាព គឺផ្តាសាយធម្មតា និងផ្តាសាយធំ។ អំឡុងពេលរដូវភ្លៀង ប្រព័ន្ធការពារក្នុងរាងកាយយើងនឹងចុះខ្សោយ ដែលជាកត្តាកាន់តែងាយធ្វើឲ្យកើតផ្តាសាយ ក្អក និងផ្តាសាយធំ ខណៈរោគសញ្ញាជាទូទៅមានដូចជា៖

– ក្តៅខ្លួន
– ឈឺសាច់ដុំ
– ហៀរសំបោរ
– កណ្តាស់
– តឹងច្រមុះ។

៩- ជំងឺ Leptospirosis (ឆ្លងមេរោគពីសត្វ)

ជំងឺ Leptospirosis សំដៅលើការឆ្លងបាក់តេរីមួយប្រភេទដែលជាការចម្លងពីសត្វមកលើមនុស្ស នៅពេលមានស្បែកយើងមានការដាច់រលាត់កន្លែងណាមួយ។ ជំងឺនេះជាធម្មតាឆ្លងរាលដាលតាមរយៈមុខរបួស អំឡុងពេលយើងធ្វើដំណើរលុយទឹកមានមេរោគ ប៉ះលើមុខរបួស ខណៈរោគសញ្ញាមានដូចជា៖

– គ្រុនក្តៅខ្លាំង
– ឈឺក្បាល
– ឈឺសាច់ដុំ
– ឈឺពោះ និងរាក
– ឡើងកន្ទួលលើស្បែក។

១០- ឆ្លងមេរោគក្នុងក្រពះ

ឆ្លងមេរោគក្នុងក្រពះ កើតឡើងនៅពេលយើងញ៉ាំអាហារ ឬផឹកទឹកដែលមិនស្អាតល្អ។ ជំងឺក្រពះពោះវៀន ជាជំងឺមួយ ជាទូទៅកើតឡើងពេលក្រពះមានឆ្លងមេរោគ និងឧស្សាហ៍កើតមានបំផុតអំឡុងពេលរដូវភ្លៀង។ សូមផឹកទឹកដាំពុះឲ្យបានគ្រប់គ្រាន់ និងញ៉ាំអាហារចម្អិនឆ្អិនល្អ ដើម្បីអាចបង្ការបញ្ហាទាំងនេះ។ រោគសញ្ញាជំងឺនេះមានដូចជា៖

– គ្រុនញាក់ដោយសារសីតុណ្ហភាពរាងកាយធ្លាក់ចុះ
– ក្អួត និងចង្អោរ
– រមួល ឬឈឺពោះ
– រាក។

* វិធីបង្ការជំងឺរដូវភ្លៀង

មានតិចនិកមួយចំនួនជួយយើងចៀសឆ្ងាយពីជំងឺឧស្សាហ៍កើតមានអំឡុងរដូវភ្លៀង ដោយគ្រាន់តែអនុវត្តដូចខាងក្រោម៖

– ព្យាយាមនៅក្នុងផ្ទះ និងកន្លែងដែលគ្មានមូស
– ប្រើថ្នាំបាញ់មូស និងស្លៀកពាក់ជិតៗពេលចេញទៅក្រៅផ្ទះ
– កុំព្យាយាមទៅកន្លែងមានមនុស្សកកកុញច្រើន ដើម្បីកាត់បន្ថយអត្រាឆ្លងមេរោគ
– ផឹកទឹកដាំពុះ
– ញ៉ាំអាហារស្រស់ៗធ្វើឲ្យផ្ទាល់ដៃ
– ត្រូវប្រាកដថា ផ្ទះរបស់យើងមានខ្យល់ចេញចូលគ្រប់គ្រាន់
– លាងដៃឲ្យបានស្អាតមុនពេលញ៉ាំអាហារ
– កុំយកដៃប៉ះច្រមុះ ឬមាត់មុនលាងសម្អាត៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ភេសជ្ជៈ ៤ មុខជួយពង្រឹងប្រព័ន្ធភាពស៊ាំបានល្អ សក្តិសមបំផុតសម្រាប់រដូវភ្លៀង

ចុចអាន៖ ឆ្ងល់ទេ ខែភ្លៀង សីតុណ្ហភាពចុះត្រជាក់ តែសម្បូរអ្នកឈឺច្រើន? នេះមូលហេតុ

The post ជំងឺ ១០ មុខ ឧស្សាហ៍កើតបំផុតអំឡុងខែភ្លៀង គ្រប់គ្នាត្រូវប្រយ័ត្ន appeared first on Kampuchea Thmey Daily.

ក្មេងតូចក្រោម២ឆ្នាំ ពេលរាករូស មិនអាចឲ្យទឹកផ្លែឈើស្រស់ទេ

lazuly — Sat, 24 Oct 2020 04:56:20 +0000

កូនក្មេង កាលណារាក ឬក្តៅខ្លួន មិនចង់ញ៉ាំចំណីអាហារនោះទេ តែបើបានទឹកផ្លែឈើផ្អែមៗវិញ ដឹងតែដាក់ចូលបានហ្មង។ ពេលកូនរាករូស ឬក្តៅខ្លួន ម៉ាក់ប៉ាអាចឲ្យកូនញ៉ាំទឹកផ្លែឈើបានអត់?

បើតាមការបកស្រាយនៅក្នុងសៀវភៅ សំណួរ និងចម្លើយ ដែលអ្នកថែទាំកុមារតែងសួរជាញឹកញាប់ ចងក្រងដោយមន្ទីរពេទ្យកុមារជាតិ ក្មេងតូចៗអាយុក្រោម២ឆ្នាំ ដែលមានជំងឺរាករូស ឬក្តៅខ្លួន យើងមិនអាចឲ្យញ៉ាំទឹកផ្លែឈើនោះទេ ទោះជាទឹកផ្លែឈើស្រស់ក៏ដោយ។

ខាងក្រោមនេះ ជារបបអាហារពេលកូនរាករូស ឬក្តៅខ្លួន ទៅតាមអាយុ៖

១. កូនអាយុ ០-៦ ខែ
– បំបៅដោះញឹកជាងធម្មតា
– ឲ្យកូនញ៉ាំទឹកអូរ៉ាលីត
– ម៉ាក់ៗដែលកំពុងបំបៅដោះកូន ត្រូវញ៉ាំអាហារមានតុល្យភាព និងបន្ថែមអាហារសម្បូរជីវជាតិ ដើម្បីបំពេញតម្រូវការថាមពលរាងកាយ អាចផលិតទឹកដោះគ្រប់គ្រាន់សម្រាប់កូន។

២. កូនអាយុ ៦-១៣ ខែ
– បំបៅដោះញឹកជាងធម្មតា
– ឲ្យកូនញ៉ាំទឹកអូរ៉ាលីត។

២. កូនអាយុ ២៤ ខែ
ម៉ាក់ប៉ាអាចឲ្យកូនផឹកទឹកផ្លែឈើស្រស់ៗ និងទឹកដូង ព្រោះវាផ្តល់ថាមពល វីតាមីន និងសារធាតុរ៉ែ ថែមអាចញ៉ាំទឹកផ្លែឈើសុទ្ធ ១០០% ប្រអប់។ ចំពោះទឹកក្រូច ទឹកផ្លែឈើមិនសុទ្ធ ១០០% និងកាហ្វេ ហាមឲ្យញ៉ាំដាច់ខាត។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់ដោយ៖ Hello Krupet

The post ក្មេងតូចក្រោម២ឆ្នាំ ពេលរាករូស មិនអាចឲ្យទឹកផ្លែឈើស្រស់ទេ appeared first on Kampuchea Thmey Daily.

រាគរូស Archives - Kampuchea Thmey Daily

ហេតុអ្វីបានជាមនុស្សមួយចំនួន ផឹកកាហ្វេហើយទៅរាគរូស ?

ជំងឺ ៣ប្រភេទ កំពុងយាយីដល់កុមារកម្ពុជា

រាកធម្មតា និងរាកមួលខុសគ្នាយ៉ាងម៉េចខ្លះ? បង្ការបែបណា?

ជំងឺ ១០ មុខ ឧស្សាហ៍កើតបំផុតអំឡុងខែភ្លៀង គ្រប់គ្នា​ត្រូវ​ប្រយ័ត្ន

១- ជំងឺ​គ្រុន​ឈាម

២- ជំងឺ​បង្ក​ដោយ​វីរុស Chikungunya

៣- ជំងឺ​គ្រុនចាញ់

៤- ជំងឺ​អាសន្នរោគ

៥- ជំងឺ​គ្រុន​ពោះ​វៀន

៦- គ្រុន​ក្តៅ​ដោយ​សារ​ឆ្លង​រោគ (Viral fever)