លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលសាលារាជធានីភ្នំពេញ បានឱ្យដឹងថា អនុវត្តតាមការណែនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ រដ្ឋបាលខណ្ឌកំបូលបានសហការជាមួយក្រុមហ៊ុនមីនេបៀ (ខេមបូឌា) ធ្វើការសម្អាតអនាម័យបរិស្ថាននៅតាមដងផ្លូវសំខាន់ៗ ស្ថិតក្នុងសង្កាត់ចំនួន៤ រួមមាន សង្កាត់កន្ទោក សង្កាត់កំបូល សង្កាត់ភ្លើងឆេះរទេះ និងសង្កាត់បឹងធំ ខណ្ឌកំបូល រាជធានីភ្នំពេញ។

សកម្មភាពនេះបានផ្តោតលើការប្រមូលសំរាម ការបោសសម្អាតតាមចិញ្ចើមផ្លូវ និងការរៀបចំបរិស្ថានសាធារណៈឱ្យមានសណ្តាប់ធ្នាប់ និងសោភណភាពល្អប្រសើរ។ ការសម្អាតដងផ្លូវជាប្រចាំ មិនត្រឹមតែជួយធ្វើឱ្យបរិស្ថានមានភាពស្អាតប៉ុណ្ណោះទេ ប៉ុន្តែថែមទាំងជួយកាត់បន្ថយការកកស្ទះសំរាម ការស្ទះប្រព័ន្ធលូ និងការបង្ការហានិភ័យនៃជំងឺផ្សេងៗ ដែលអាចប៉ះពាល់ដល់សុខភាពសាធារណៈផងដែរ។

ទន្ទឹមនឹងនេះ សកម្មភាពសម្អាតអនាម័យបរិស្ថានក៏ជាការលើកកម្ពស់ស្មារតីចូលរួមរបស់ប្រជាពលរដ្ឋ សហគមន៍ និងវិស័យឯកជន ក្នុងការថែរក្សាបរិស្ថានឱ្យបានស្អាត មានអនាម័យ និងប្រកបដោយចីរភាព ស្របតាមទិសដៅរបស់រាជធានីភ្នំពេញក្នុងការកសាងទីក្រុងស្អាត និងរស់នៅប្រកបដោយគុណភាព។

រដ្ឋបាលខណ្ឌកំបូល នឹងបន្តសហការយ៉ាងជិតស្និទ្ធជាមួយក្រុមហ៊ុន និងដៃគូពាក់ព័ន្ធ ក្នុងការរៀបចំសកម្មភាពសម្អាតអនាម័យបរិស្ថាន ក៏ដូចជាសកម្មភាពសង្គមនានាផ្សេងទៀត ដើម្បីរួមចំណែកអភិវឌ្ឍមូលដ្ឋានឱ្យកាន់តែស្អាត មានសណ្តាប់ធ្នាប់ និងទាក់ទាញ៕

ដោយ៖ ស្រីរ័ត្ន

The post រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ appeared first on Kampuchea Thmey Daily.

លោក​ ថា​ រិទ្ធ​ ជាប្រជាពលរដ្ឋរស់នៅតំបន់នោះបានលើកឡើងថា​ ទីតាំងខាងលើនេះ​ មិនមានភ្លៀងធ្លាក់មកនោះទេ​ តែមានទឹកខ្មៅកខ្វក់ហៀរ​ ហូរចេញពីប្រព័ន្ធលូដក់លិចលើដងផ្លូវអស់រយះពេលប្រហែល២សប្តាហ៍មកហើយ​ ប៉ះពាល់ដល់ការធ្វើដំណើរ​ ក៏ដូចជាអ្នករស់នៅតំបន់នោះ។

អាជ្ញាធរបានឱ្យដឹងថា​ ក្រោយពីទទួលបានដំណឹងអំពីបញ្ហាខាងលើរដ្ឋបាលសង្កាត់ចោមចៅទី១​ បានស្នើដល់ប្រធានមន្ទីរសាធារណការនិងដឹកជញ្ជូន ដើម្បីសុំរថយន្តបូមលូមកស្តារនិងសម្អាតកាកសំណល់ចេញពីប្រព័ន្ធលូដើម្បីឱ្យចរន្តទឹកហូរបានលឿន។

ជាមួយគ្នាផងដែលអាជ្ញាធរមូលដ្ឋានក៏បានអំពាវនាវដល់ពលរដ្ឋទាំងអស់មេត្តាវិចខ្ចប់ទុកដាក់សំរាមឱ្យបានត្រឹមត្រូវជៀសវាងហើរ​ និងធ្លាក់ចូលប្រព័ន្ធលូបង្កមានការស្ទះចរន្តទឹកហូរ៕ដោយ៖សុខា

The post អាជ្ញាធរសង្កាត់ចោមចៅទី១ សហការជាមួយមន្ត្រីសាលារាជធានីភ្នំពេញចុះបូមស្តារប្រព័ន្ធលូជូនប្រជាពលរដ្ឋ appeared first on Kampuchea Thmey Daily.

អ្នកស្រី ភិមា វិច្ឆិកាល អភិបាល​រងរាជធានី​ភ្នំពេញបាន​ឲ្យ​ដឹង​ថា ចំនួនយានយន្តដែលចុះបញ្ជីផ្លាកលេខភ្នំពេញមានការកើនឡើងខ្លាំង ដោយ​ក្នុងនោះ​រថយន្ត​មាន​ចំនួន ៧៥ ម៉ឺនគ្រឿង និងម៉ូតូ​មាន​ចំនួន ២,៥ លានគ្រឿង។

ដោយសារកំណើនយានយន្តដ៏ច្រើនលើសលប់ស្ទើរតែច្រើនជាង​ចំនួន​ប្រជាជន ​វាបានបង្ហាញពីតម្រូវការចាំបាច់សម្រាប់ក្រុមហ៊ុនដឹកជញ្ជូនទំនិញ អ្នកដំណើរ និង​ក្រុមហ៊ុន​សាងសង់ ក្នុងការអនុវត្តការធានារ៉ាប់រងជាកាតព្វកិច្ច ដើម្បីធានាលើ​បន្ទុកហិរញ្ញវត្ថុ​នៅ​ពេល​មានហានិភ័យកើតឡើង។ អ្នកស្រី ភិមា វិច្ឆិកាល បញ្ជាក់។

បន្ថែមពីនេះ អ្នកស្រី​បាន​លើកឡើង​ពីសមិទ្ធផល​សំខាន់ៗ​នៃការ​អភិវឌ្ឍ​នៅ​រាជធានី​ភ្នំពេញ ដូចជាវិស័យទេសចរណ៍​ ដែល​​នៅក្នុងឆ្នាំ ២០២៥ រាជធានីភ្នំពេញទទួលបានភ្ញៀវទេសចរជាតិ និង​អន្តរជាតិ​សរុប​ចំនួន ១១ លាន​នាក់ ដែល​ចំនួននេះ​មានការកើន​ឡើង​ប្រមាណ ៥% បើ​ធៀប​នឹង​ឆ្នាំ ២០២៤។

ភ្នំពេញជាទីក្រុងនៃបេតិកភណ្ឌវប្បធម៌ និងប្រវត្តិសាស្ត្រ មាន​តំបន់​ទេសចរណ៍​សំខាន់ៗ​ដូចជា ព្រះបរមរាជវាំង វត្តភ្នំ និង​សារមន្ទីរជាដើម ហើយ​​​កន្លងទៅ​សារព័ត៌មាន BBC បានចាត់ទុកភ្នំពេញជាទីក្រុង​មួយ​ក្នុងចំណោម​ទីក្រុង​ទាំង ២០ ដែលជាគោលដៅទេសចរណ៍ល្អបំផុតសម្រាប់ឆ្នាំ ២០២៦។

រដ្ឋបាលរាជធានី​ភ្នំពេញ​បានដាក់​ឲ្យដំណើរការ​ផ្លូវថ្មើរជើងចតុមុខដែល​ក្នុង​មួយ​សប្តាហ៍ (ថ្ងៃសៅរ៍-អាទិត្យ) អាចទាក់ទាញភ្ញៀវទេសចរបានពី ៨ ម៉ឺន ទៅ ១៥ ម៉ឺននាក់។ សមិទ្ធផល​ដ៏ធំធេង​មួយ​ទៀត​គឺការសម្ពោធដាក់​ឱ្យ​ប្រើប្រាស់​ជាផ្លូវការ​នូវ អាកាសយានដ្ឋានអន្តរជាតិតេជោ ដែលបាននាំ​ការ​តភ្ជាប់​ការ​​ដំណើរ​ពី​គ្រប់ទិសទី​​មក​ប្រទេស​កម្ពុជា។

នៅ​រាជធានី​ភ្នំពេញមាន​មជ្ឈមណ្ឌលពាណិជ្ជកម្មមានផ្សារទំនើប និងទីតាំងបោះដុំដោះដូរទំនិញសរុបជាង ៥០០ ទីតាំង រួមទាំង​គ្រឹះស្ថានសិក្សាក្រៅពីឧត្តមសិក្សាចំនួន ៨៨២ ទីតាំង និងគ្រឹះស្ថានឧត្តម​សិក្សា​មាន​​ចំនួន ៦៤ ទីតាំង ដែលឆ្លុះបញ្ចាំងពីសកម្មភាពអាជីវកម្មដ៏មមាញឹក។

បើតាមមន្រ្តី​រដ្ឋបាល​រាជធានី​ភ្នំពេញ ភាពរីកចម្រើនទាំងនេះបានទាក់ទាញអ្នកវិនិយោគជាតិ និងអន្តរជាតិឱ្យ​មកបោះ​ទុនបង្កើតក្រុមហ៊ុន រោងចក្រ និងសហគ្រាសធំៗកាន់តែច្រើន៕

The post រថយន្ត​ចុះ​បញ្ជីផ្លាកលេខភ្នំពេញមានជាង ៧៥ ម៉ឺនគ្រឿង ​គិត​ត្រឹមឆ្នាំ ២០២៥ appeared first on Kampuchea Thmey Daily.

លោកស្រី ដោ សម្ផស្ស នាយិការង និងជាអ្នកនាំពាក្យសាលារាជធានីភ្នំពេញ នាព្រឹកថ្ងៃទី ២០ ខែមេសា ឆ្នាំ ២០២៦ នេះ បានឱ្យដឹងថា ព្រឹត្តិការណ៍ «នគរសង្ក្រាន្ត» នៅរាជធានីភ្នំពេញ នាថ្ងៃទី ៦ ត្រូវថ្ងៃទី ១៩ មេសា មានភ្ញៀវជាតិ និងអន្តរជាតិ រួមជាមួយប្រជាពលរដ្ឋមកពីគ្រប់ទិសទីយ៉ាងច្រើនកុះករបានមកដើរលេងកម្សាន្ត និងចូលរួមអបអរសាទរ សរុបចំនួន ១,៤៤០,៧១២ នាក់ ក្នុងនោះ ប្រជាពលរដ្ឋ មកដើរលេងកម្សាន្តចំនួន ១,៤១៧,៤៨០ នាក់ និងភ្ញៀវទេសចរបរទេស មានចំនួន ២៣,២៣២ នាក់។

លោកស្រី ដោ សម្ផស្ស បានឱ្យដឹងទៀតថា ទោះបីពិធីបុណ្យចូលឆ្នាំថ្មី បានបញ្ចប់ទៅក៏ដោយ ប៉ុន្តែសម្រាប់ ព្រឹត្តិការណ៍ «នគរសង្ក្រាន្ត» នៅរាជធានីភ្នំពេញ នៅតែបន្តទទួលបានភ្ញៀវទេសចរជាតិ និងអន្តរជាតិ ចូលរួមលេងកម្សាន្តយ៉ាងច្រើនកុះករ ប្រមាណជាង ១ លាននាក់ រៀងរាល់ថ្ងៃ ពោលនៅថ្ងៃទី ១៧ មានចំនួន ១,៣៨៤,៥១១ នាក់ សម្រាប់ថ្ងៃទី ១៨ មានចំនួន ១,៥៥៧,២៥០ នាក់ និងថ្ងៃទី ១៩ មានចំនួន ១,៤១៧,៤៨០ នាក់ បើទោះបីជាមានភ្លៀងធ្លាក់ក៏ដោយ។

ដោយឡែករយៈពេល ៣ ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ និងព្រឹត្តិការណ៍ «នគរសង្ក្រាន្ត» កន្លងមកនេះ នៅទូទាំងរាជធានីភ្នំពេញ មានភ្ញៀវជាតិ និងអន្តរជាតិ មកដើរលេងកម្សាន្ត រហូតដល់ជាង ៤ លាននាក់ ពោរពេញដោយភាពសប្បាយរីករាយ និងសាមគ្គីភាព ក្រោមម្លប់សន្តិភាព ប្រកបដោយសុខសុវត្ថិភាព។ ក្នុងនោះ សម្រាប់ថ្ងៃទី ១ នៃពិធីបុណ្យចូលឆ្នាំថ្មី មានប្រជាពលរដ្ឋមកពីគ្រប់ទិសទី បានមកដើរលេងកម្សាន្ត មានចំនួន ៩៨៣,០៨០ នាក់ ក្នុងនោះ ភ្ញៀវទេសចរបរទេស ចំនួន ៧,០៦៨ នាក់។ នៅថ្ងៃទី ២ នៃពិធីបុណ្យចូលឆ្នាំថ្មី មានប្រជាពលរដ្ឋមកពីគ្រប់ទិសទី បានមកដើរលេងកម្សាន្ត ១,៥៦៥,៣៦៧ នាក់ ក្នុងនោះ ភ្ញៀវទេសចរបរទេស ចំនួន ១៧,៩៤០ នាក់ និងសម្រាប់ថ្ងៃទី ៣ មានចំនួន ១,៨២៧,៩៩០ នាក់។ នេះបើតាមលោកស្រីអ្នកនាំពាក្យរដ្ឋបាលរាជធានីភ្នំពេញ បញ្ជាក់បន្ថែម។

សរុប ៦ ថ្ងៃ ទាំងពិធីបុណ្យចូលឆ្នាំថ្មី និងព្រឹត្តិការណ៍នគរសង្ក្រាន្ត ដែលរៀបចំដោយ សហភាពសហព័ន្ធយុវជនកម្ពុជា (ស.ស.យ.ក) ចូលរួមសហការដោយរដ្ឋបាលរាជធានីភ្នំពេញ នៅរាជធានីភ្នំពេញ ទាំង ៦ ទីតាំង និងអតីតអាកាសយានដ្ឋានអន្តរជាតិភ្នំពេញ មានភ្ញៀវទេសចរជាតិ និងអន្តរជាតិ ប្រមាណជិត ៩ លាននាក់។

ជាមួយគ្នានេះដែរក៏មានការអរគុណ និងកោតសរសើរដល់អាជ្ញាធរ និងគណៈអភិបាលរាជធានីភ្នំពេញដែលដឹកនាំដោយលោក ឃួង ស្រេង អភិបាលរាជធានី និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ ក្នុងរយៈពេល ៦ ថ្ងៃ នៃព្រឹត្តិការណ៌«នគរសង្ក្រាន»នៅរាជធានីភ្នំពេញ ពីថ្ងៃទី ១៤ រហូតដល់ថ្ងៃទី ១៩ មេសា
២០២៦ បានរៀបចំសណ្តាប់ធ្នាប់សាធារណៈ ជាពិសេសជូនប្រជាពលរដ្ឋអាចដើរកម្សាន្តដោយសេចក្តីសុខ ហើយមានការមើលថែការពារសន្តិសុខសណ្ដាប់បានយ៉ាងល្អ ពីសំណាក់សមត្ថកិច្ច និងអាជ្ញាធរដែនដី៕
អត្ថបទ ៖ ស្រីរ័ត្ន

The post ៦ ថ្ងៃ នៃព្រឹត្តិការណ៍«នគរសង្ក្រាន្ត» រាជធានីភ្នំពេញ មានភ្ញៀវជាតិ-អន្តរជាតិ មកដើរលេងកម្សាន្តសប្បាយជិត ៩ លាននាក់ appeared first on Kampuchea Thmey Daily.

នាល្ងាចនិងរាត្រីថ្ងៃទី១៩មេសា ដែលជាថ្ងៃបញ្ចប់ ព្រឹត្តិការណ៍ «នគរសង្ក្រាន្ត» លោក ឃួង ស្រេង អភិបាលរាជធានីភ្នំពេញ,លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ,លោក ថោង ខុន ទេសរដ្ឋមន្ត្រី ទទួលបន្ទុកបេសកម្មពិសេស និងជាប្រធានគណៈកម្មាធិការអូឡាំពិកកម្ពុជា,លោក ហួត ហាក់ រដ្ឋមន្ត្រីក្រសួងទេសចរណ៍ និងលោកស្រី ដាំ ដារ៉ានី រដ្ឋលេខាធិការក្រសួងការពារជាតិ និងជាអនុប្រធានសហភាពសហព័ន្ធយុវជនកម្ពុជា (ស.ស.យ.ក.) បានអញ្ជើញជាអធិបតីភាព ក្នុងកម្មវិធីប្រកួត កីឡាអុកចត្រង្គ យកចំណាត់ថ្នាក់លេខ១ និងលេខ២ នៅភូមិវប្បធម៌។

សម្រាប់ការប្រកួតនេះ ធ្វើឡើងរវាងលោក សុខ លឹមហេង អាយុ២៤ឆ្នាំ និងលោក ជា ស៊ីដេត អាយុ៤១ឆ្នាំដើម្បីដណ្តើមយកពានរង្វាន់សម្តេចតេជោ លេខ១ និងលេខ២ ។ ជាលទ្ធផលចំណាត់ថ្នាក់លេខ១បានទៅលើ លោកសុខ លឹមហេង។ ចំណែកការប្រកួតកាលពីម្សិលម៉ិញ ជាកម្មវិធីប្រកួត កីឡាអុកចត្រង្គ វ័យកុមារ យកចំណាត់ថ្នាក់លេខ១ និងលេខ២ ហើយចំណាត់ថ្នាក់លេខ១ បានទៅលើកុមារា សេង វុត្រា អាយុ១២ឆ្នាំ។

សូមបញ្ជាក់ថា ពិធីអបអរសាទរបុណ្យចូលឆ្នាំថ្មី ប្រពៃណីខ្មែរ ឆ្នាំមមី ឆ្នាំ២០២៦នេះ ក្រោមកិច្ចសហការរវាងសហភាពសហព័ន្ធយុវជនកម្ពុជា ជាមួយ រដ្ឋបាលរាជធានីភ្នំពេញ បានរៀបចំព្រឹត្តិការណ៍នគរសង្ក្រាន្ត រយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ហើយថ្ងៃនេះ ជាថ្ងៃបញ្ចប់ ព្រឹត្តិការណ៍ «នគរសង្ក្រាន្ត »ហើយ នៅតាមទីតាំងទាំង៦ ដូចជា នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ តំបន់ជុំវិញវត្តភ្នំ បរិវេណសួនច្បារវឌ្ឍនៈ សួនច្បារអតីតទីលានប្រជាធិបតេយ្យ ស្ពាននាគភ្លោះរមណីយដ្ឋានវត្តភ្នំ រហូតដល់ផ្សាររាត្រី ផ្លូវថ្មើរជើងចតុមុខរាជធានី ភ្នំពេញ (Walk Street) និងកម្មវិធីអមនៅបរិវេណបាសាក់លែន (Bassac Lane) និងបរិវេណផ្សារទួលទំពូង៕

អត្ថបទ៖ ស្រីរ័ត្ន

The post ថ្ងៃបញ្ចប់ពិធី «នគរសង្ក្រាន្ដ» រាជធានីភ្នំពេញមានពលរដ្ឋសម្រុកដើរលេងកាន់តែច្រើន appeared first on Kampuchea Thmey Daily.

តាមការឱ្យដឹងពីលោកស្រី ដោ សម្ផស្ស នាយិការរង និងជាអ្នកនាំពាក្យសាលារាជធានីភ្នំពេញ បានឲ្យដឹងនាព្រឹកថ្ងៃទី១៨មេសា នេះថា នៅថ្ងៃទី០៤នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៧០ គ.ស ២០២៦ ដែលត្រូវនឹងថ្ងៃទី១៧ ខែមេសា ឆ្នាំ២០២៦ នៅរាជធានីភ្នំពេញ មានភ្ញៀវជាតិ និងអន្តរជាតិចូលរួមអបអរសាទរ ព្រឹត្តិការណ៍ «នគរសង្ក្រាន្ត »នៅទូទាំងរាជធានីភ្នំពេញសរុបចំនួន ១៣៨៤៥១១នាក់ រួមមាន៖ ប្រជាពលរដ្ឋមកដើរលេងកម្សាន្តចំនួន ១៣៧៤៧២០នាក់ និងទេសចរបរទេស៩៧៩១នាក់។

គួរបញ្ជាក់ថា រយៈពេល៣ថ្ងៃនៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៧០ គ.ស ២០២៦ និងព្រឹត្តិការណ៍ «នគរសង្ក្រាន្ត»កន្លងមកនេះនៅទូទាំងរាជធានីភ្នំពេញ មានភ្ញៀវជាតិ និងអន្តរជាតិមកដើរលេងកម្សាន្ត មានចំនួនរហូតដល់ជាង៤លាន៣សែននាក់ ពោរពេញដោយភាពសប្បាយរីករាយ និងសាមគ្គីភាព ក្រោមម្លប់សន្តិភាពប្រកបដោយសុខសុវត្ថិភាព។ ក្នុងនោះសម្រាប់ថ្ងៃទី១ នៃពិធីបុណ្យចូលឆ្នាំថ្មី មានបងប្អូនប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត មានចំនួន ៩៨៣,០៨០នាក់ ក្នុងនោះភ្ញៀវទេសចរបរទេស ចំនួន៧,០៦៨នាក់ នៅថ្ងៃទី២ នៃពិធីបុណ្យចូលឆ្នាំថ្មី មានបងប្អូនប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត ១,៥៦៥,៣៦៧នាក់ ក្នុងនោះភ្ញៀវទេសចរបរទេស ចំនួន១៧,៩៤០នាក់និងសម្រាប់ថ្ងៃទី៣មានចំនួន ១,៨២៧,៩៩០នាក់។ បន្ថែមលើនេះ ទាក់ទិននឹងសុខសុវត្ថិភាព ក្នុងអំឡុងពេលអបអរសាទរឆ្នាំថ្មីនេះ ក៏មានភាពល្អប្រសើរ ប្រជាពលរដ្ឋដើរលេងកម្សាន្តដោយភាពសប្បាយរីករាយ ក្រោមម្លប់សន្តិភាព និងប្រកបដោយសុខសុវត្ថិភាព ពោលគឺពុំមានហេតុការណាមួយ បង្កជាគ្រោះថ្នាក់ធំដុំឡើយ។

សូមបញ្ជាក់ផងដែរថា ឆ្នាំនេះព្រឹត្តិការណ៍ «នគរសង្ក្រាន្ត» ត្រូវបានរៀបចំឡើង រយៈពេល៦ថ្ងៃនៅរាជធានីភ្នំពេញ ចាប់ពីថ្ងៃទី១៤ដល់ថ្ងៃទី១៩ ខែមេសា ឆ្នាំ២០២៦ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក.) និងរដ្ឋបាលរាជធានីភ្នំពេញ ដែលគិតមកដល់ពេលនេះ បានឈានដល់ថ្ងៃទី០៥ហើយ នៅសល់តែថ្ងៃនេះនិងស្អែកប៉ុណ្ណោះ
។ដូច្នេះសូមអញ្ជើញបងប្អូនប្រជាពលរដ្ឋបន្តមកលេងកំសាន្តឱ្យបានច្រើនកុះករបន្ថែមទៀត៕

អត្ថបទ៖ ស្រីរ័ត្ន

The post ថ្ងៃទី០៤ នៃពិធីបុណ្យចូលឆ្នាំថ្មី រាជធានីភ្នំពេញមានភ្ញៀវទេសចរចូលរួមក្នុងព្រឹត្តិការណ៍ «នគរសង្ក្រាន្ត » ជាង១លាន៣សែននាក់ appeared first on Kampuchea Thmey Daily.

នេះបើតាមការបញ្ជាក់ឱ្យដឹងពីលោកស្រី ដោ សម្ផស្ស នាយិការរង និងជាអ្នកនាំពាក្យរដ្ឋបាលរាជធានីភ្នំពេញ នាព្រឹកថ្ងៃទី១៧មេសា ឆ្នាំ២០២៦នេះ។

លោកស្រីឱ្យដឹងថា នៅតាមទីតាំងរៀបចំទាំង៦ទីតាំង និងអតីតព្រលានយន្តហោះអន្តរជាតិភ្នំពេញ សុទ្ធតែទទួលបានភ្ញៀវទេសចរជាតិ និងអន្តរជាតិ ចូលរួមលេងល្បែងប្រជាប្រិយ យ៉ាងច្រើនកុះករ បន្ថែមពីនេះនៅតាមទីវត្តអារាម និងបណ្តាខណ្ឌទាំង១៤ ក៏មានការរៀបចំព្រឹត្តិការណ៍សង្ក្រាន្តដូចគ្នាដែរ។ សម្រាប់រយៈពេល៣ថ្ងៃនៃពិធីបុណ្យចូលឆ្នាំពោលថ្ងៃទី១៤ដល់១៦ខែមេសា ឆ្នាំ២០២៦ ពោលគឺថ្ងៃទី១ នៃពិធីបុណ្យចូលឆ្នាំថ្មី នៅរាជធានីភ្នំពេញ មានបងប្អូនប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត មានចំនួន៩៨៣,០៨០នាក់ ក្នុងនោះភ្ញៀវទេសចរបរទេស ចំនួន៧,០៦៨នាក់។ នៅថ្ងៃទី២ នៃពិធីបុណ្យចូលឆ្នាំថ្មី មានបងប្អូនប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត១,៥៦៥,៣៦៧នាក់ ក្នុងនោះភ្ញៀវទេសចរបរទេស ចំនួន១៧,៩៤០នាក់។ និងសម្រាប់ថ្ងៃទី៣មានចំនួន ១,៨២៧,៩៩០នាក់ ។

លោកស្រីបន្តទៀតថា នេះបានបង្ហាញឱ្យឃើញថា ការរៀបចំព្រឹត្តិការណ៍«នគរសង្ក្រាន្ត »នៅរាជធានីភ្នំពេញ បានផ្តល់ភាពសប្បាយរីករាយ និងកក់ក្តៅលើសន្តិសុខសណ្តាប់ធ្នាប់ ក៏ដូចជាសុខសុវត្ថិភាពជូនពលរដ្ឋយ៉ាងល្អប្រសើរ។ បន្ថែមលើនេះ ទាក់ទិននឹងសុខសុវត្ថិភាព ក្នុងអំឡុងពេលអបអរសាទរឆ្នាំថ្មីនេះ មានភាពល្អប្រសើរ ប្រជាពលរដ្ឋដើរលេងកម្សាន្តដោយសប្បាយរីករាយ ក្រោមម្លប់សន្តិភាព និងប្រកបដោយសុខសុវត្ថិភាព ពោលពុំមានហេតុការណាមួយ បង្កជាគ្រោះថ្នាក់ធំដុំឡើយ។

លោកឧត្តមសេនីយ៍ ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាក់ថា ការថែរក្សាសន្តិសុខ សុវត្ថិភាព សណ្តាប់ធ្នាប់ ក្នុងព្រឹត្តិការណ៍នគរសង្ក្រាន្ត នៃពិធីបុណ្យចូលឆ្នាំថ្មី ប្រពៃណីជាតិខ្មែរ រយៈពេលបីថ្ងៃនេះបានប្រព្រឹត្តទៅដោយរលូន និងមិនមានបញ្ហាអ្វីកើតឡើងនោះទេ ខណៈកម្លាំងសមត្ថកិច្ច បានដាក់ពង្រាយការពារសន្តិសុខយ៉ាងតឹងរ៉ឹងគ្រប់ពេលវេលា។

សូមបញ្ជាក់ថា ឆ្នាំនេះព្រឹត្តិការណ៍ «នគរសង្ក្រាន្ត» ត្រូវបានរៀបចំឡើង រយៈពេល៦ថ្ងៃនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក.) និងរដ្ឋបាលរាជធានីភ្នំពេញ៕

អត្ថបទ៖ ស្រីរ័ត្ន

The post ភ្នំពេញទទួលបានអ្នកទេសចរជាង៤លាន ៣សែននាក់ ក្នុងរយៈពេល៣ថ្ងៃនៃពិធីបុណ្យចូលឆ្នាំ appeared first on Kampuchea Thmey Daily.

លោកស្រីឱ្យដឹងទៀតថា នៅតាមទីតាំងរៀបចំទាំង៦ទីតាំង និងទីតាំងថ្មីមួយទៀត នៅអតីតព្រលានយន្តហោះអន្តរជាតិភ្នំពេញ សុទ្ធតែទទួលបានភ្ញៀវទេសចរជាតិ និងអន្តរជាតិ ចូលរួមលេងល្បែងប្រជាប្រិយ យ៉ាងច្រើនកុះករ។ បន្ថែមពីនេះនៅតាមទីវត្តអារាម និងបណ្តាខណ្ឌទាំង១៤ ក៏មានការរៀបចំព្រឹត្តិការណ៍សង្ក្រាន្តដូចគ្នាដែរ។

លោកស្រី ដោ សម្ផស្ស បានបញ្ជាក់ទៀតថា ថ្ងៃទី១៥ ខែមេសា ឆ្នាំ២០២៦ មានប្រជាពលរដ្ឋ ដើរលេងកម្សាន្តចំនួន ១,៥៨៣,៣០៧នាក់ និងមានភ្ញៀវទេសចរបរទេស ចំនួន ១៧,៩៤០នាក់ ។ បន្ថែមលើនេះ ទាក់ទិននឹងសុខសុវត្ថិភាព ក្នុងអំឡុងពេលអបអរសាទរឆ្នាំថ្មីនេះ មានភាពល្អប្រសើរ ពលរដ្ឋដើរលេងកម្សាន្តដោយសប្បាយរីករាយ ក្រោមម្លប់សន្តិភាព និងប្រកបដោយសុខសុវត្ថិភាព ពោលពុំមានហេតុការណាមួយកើតឡើង គួរឱ្យកត់សម្គាល់នោះឡើយ។

សូមបញ្ជាក់ថា ឆ្នាំនេះព្រឹត្តិការណ៍ «នគរសង្ក្រាន្ត» ត្រូវបានរៀបចំឡើង រយៈពេល៦ថ្ងៃនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក.) និងរដ្ឋបាលរាជធានីភ្នំពេញ។

ព្រឹត្តិការណ៍ «នគរសង្ក្រាន្ត» នៅរាជធានីភ្នំពេញមានកម្មវិធីបង្ហាញពីទស្សនីយភាពតាមបែបវប្បធម៌ សិល្បៈ សាសនា ប្រមាណជាង២០ទស្សនីយភាពធំៗ នៅតាមទីតាំងធំៗរួមមាន៖ រមណីយដ្ឋានវប្បធម៌ ប្រវត្តិសាស្ត្រវត្តភ្នំ ភូមិវប្បធម៌នៅជិតផ្សាររាត្រី សួនច្បារវឌ្ឍនៈ អតីតសួនទីលានធិបតេយ្យ តំបន់ផ្លូវថ្មើរជើងចតុមុខជាដើម ខណៈនៅតំបន់ផ្លូវថ្មើរជើងចតុមុខ ដែលលាតសន្ធឹង ចាប់ពីមុខផ្សាររាត្រី រហូតមកដល់មុខព្រះបរមរាជវាំង គឺមានរៀបចំស្តង់តាំងបង្ហាញ ផលិតផលខ្មែរជាច្រើន អមដោយមានឆាកប្រគំតន្ត្រីតូចធំ ចំនួនបីកន្លែងនិងមាននៅតំបន់ផ្សេងៗទៀតជាច្រើន ដើម្បីបង្កលក្ខណៈឱ្យតំបន់នេះ មានភាពសប្បាយរីករាយ ថែមទៀត៕

អត្ថបទ៖ ស្រីរ័ត្ន

The post ថ្ងៃវារៈវ័នបតនៃពិធីបុណ្យចូលឆ្នាំថ្មី នៅទូទាំងរាជធានីមានភ្ញៀវមកលេងកំសាន្តជិត១លាន​៦សែននាក់ appeared first on Kampuchea Thmey Daily.