តាមការបញ្ជាក់ពីអាជ្ញាធរ គិតមកដល់ថ្ងៃទី២៣ ខែមេសា ឆ្នាំ២០២៦ តូបលក់ដូរទាំងអស់ត្រូវបានរុះរើចេញបានសម្រេច១០០ភាគរយ ហើយតំបន់ជុំវិញសាលាបានក្លាយជាទីធ្លាធំទូលាយសម្រាប់អ្នកថ្មើរជើង។ ជាពិសេស សិស្សានុសិស្សអាចធ្វើដំណើរចេញចូលសាលាបានយ៉ាងងាយស្រួល និងមានសុវត្ថិភាពជាងមុន។

សូមបញ្ជាក់ថា មុនពេលអនុវត្តវិធានការនេះ សិស្សជាច្រើនត្រូវបង្ខំចិត្តដើរលើផ្លូវបេតុងដែលជាផ្លូវសម្រាប់ម៉ូតូ និងរថយន្ត ដោយសារតែចិញ្ចើមផ្លូវត្រូវបានកាន់កាប់ដោយតូបលក់ដូរ។ ស្ថានភាពនេះធ្វើឱ្យកើនឡើងនូវហានិភ័យគ្រោះថ្នាក់ចរាចរណ៍ ជាពិសេសនៅម៉ោងចូលរៀន និងចេញពីរៀន ដែលមានការកកស្ទះខ្លាំង។

ក្រោយការរុះរើ សិស្សានុសិស្សជាច្រើនបានបង្ហាញការសប្បាយចិត្ត និងគាំទ្រចំពោះវិធានការរបស់អាជ្ញាធរ។ ដែលពួកគេអាចដើរលើចិញ្ចើមផ្លូវបានដោយមិនបារម្ភពីយានយន្តទៀតឡើយ ហើយក៏អាចប្រើសម្រាប់ឈររង់ចាំឪពុកម្តាយ ឬអាណាព្យាបាលបានយ៉ាងងាយស្រួលផងដែរ។

មាតាបិតា និងប្រជាពលរដ្ឋនៅជុំវិញតំបន់ក៏បានសាទរដល់សកម្មភាពនេះ ដោយចាត់ទុកថាជាជំហានសំខាន់មួយក្នុងការរៀបចំសណ្តាប់ធ្នាប់សាធារណៈ។ វិធានការនេះត្រូវបានគេរំពឹងថា នឹងជាគំរូល្អសម្រាប់តំបន់ផ្សេងៗទៀតក្នុងរាជធានីភ្នំពេញ ក្នុងការរៀបចំចិញ្ចើមផ្លូវ និងបង្កើនសុវត្ថិភាពសម្រាប់អ្នកថ្មើរជើង ជាពិសេសសិស្សានុសិស្ស៕ អត្ថបទ សំណាង

The post តូបលក់ដូរនៅជាប់របង វិទ្យាល័យ ជម្ពូវ័ន ត្រូវអាជ្ញាធរឱ្យរុះរើចេញ ដើម្បីរំដោះយកចិញ្ចើមផ្លូវសម្រាប់សិស្សថ្មើរ ជើង appeared first on Kampuchea Thmey Daily.

អាជ្ញាធរ​ខេត្ត​កំពត​ បាន​បន្ត​អភិវឌ្ឍ​តំបន់ឆ្នេរព្រែក​កំពង់​បាយ​ត្រើយ​ខាងលិច ក្នុងដំណាក់កាលទី២ ដោយស្ថាបនាផ្លូវចាប់ពីចំណុចគល់ស្ពានឥន្ទធនូដល់គល់ស្ពានមិត្តភាពកម្ពុជា-កូរ៉េ (ស្ពានកំពង់បាយ) ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ហើយតម្រូវ​ឱ្យ​ប្រជាពលរដ្ឋ​ទាំង ៣៥​គ្រួសារ​ដែល​រស់​នៅ​ជាប់​ព្រែក​ចូលរួម​រុះរ៉ើ​សំណង់​ដែល​ប៉ះពាល់​ចំណី​ព្រែក​ដែល​ជាដី​សាធារណៈរបស់រដ្ឋ។

មាន​មតិ​សំណេះសំណាល​ក្នុង​ឱកាស​នោះ លោក ម៉ៅ ធនិន អភិបាលខេត្ត បាន​លើក​ឡើង​ថា ក្នុង​អាណត្តិ​ទី​៧ ក្រោម​ការ​ដឹកនាំដ៏ឈ្លៀសវៃរបស់សម្តេចធិបតី ហ៊ុន ម៉ាណែត សម្តេច​បាន​ចង្អុល​ទិស​ឱ្យនៅតាមបណ្តាខេត្តដែលជាគោលដៅទេសចរណ៍ ត្រូវ​ពង្រីក​សក្តានុពល ដើម្បីស្រូបយកទេសចរ​ឱ្យមកលេងកម្សាន្តកាន់តែច្រើន ទាំងក្នុងប្រទេស ក្រៅប្រទេស ទាំងក្នុងតំបន់ និងក្រៅតំបន់ ដើម្បីលើកកម្ពស់ជីវភាពរស់នៅរបស់បងប្អូនប្រជាពលរដ្ឋ។

លោក​បាន​បន្ត​ថា ការអភិវឌ្ឍលើវិស័យទេសចរណ៍​នេះ គឺ​ជា​គោលនយោបាយរបស់រាជរដ្ឋាភិបាល ដូច្នេះគឺតម្រូវឱ្យបងប្អូនប្រជាពលរដ្ឋចូលរួមសហការជាមួយអាជ្ញាធរមូលដ្ឋាន ដើម្បីធ្វើការ​រុះរ៉ើ​សំណង់​ដែលប៉ះពាល់ដល់ចំណីព្រែកកំពង់បាយ ហើយការ​អភិវឌ្ឍនេះ គឺមិន​ឱ្យ​ប៉ះពាល់ដល់ដីកម្មសិទ្ធិស្របច្បាប់របស់ពលរដ្ឋនោះឡើយ។

ក្រោយ​ពី​កិច្ចប្រជុំរួចមក លោកអភិបាលខេត្ត ក៏បានដឹកនាំមន្ត្រីជំនាញពាក់ព័ន្ធ រួមនឹងប្រជាពលរដ្ឋទាំង ៣៥គ្រួសារចុះពិនិត្យទីតាំង និងផលប៉ះពាល់ជាក់ស្តែង និងទទួលយកសំណើ សំណូមពររបស់ពលរដ្ឋផងដែរ។

ក្រោយ​ពី​បាន​ពិភាក្សា ក៏​ដូច​ជា​ទទួល​យក​មតិ​យោបល់​ពី​ពលរដ្ឋទាំង ៣៥គ្រួសាររួចមក ប្រជាពលរដ្ឋទាំងអស់ ក៏​យល់​ព្រម​ឯកភាព​តាមការកំណត់របស់អាជ្ញាធរខេត្ត​ក្នុងការរុះរ៉ើសំណង់ដែលប៉ះពាល់ដល់ការអភិវឌ្ឍ និង​សំដែង​ក្តី​សប្បាយរីករាយក្នុងការ​ចូលរួមផងដែរ។

សូម​បញ្ជាក់​ថា រដ្ឋបាលខេត្ត​បាន​បែងចែក​ការ​អភិវឌ្ឍតំបន់ឆ្នេរព្រែកកំពង់បាយ​ត្រើយខាង​លិចជា​៣​ដំណាក់​កាល ដែល​ដំណាក់​កាលទី១ ចាប់​ពី​គល់​ស្ពានត្រើយកោះដល់គល់ស្ពានឥន្ទធនូ, ដំណាក់កាលទី២ ចាប់ពីគល់ស្ពានឥន្ទធនូដល់គល់ស្ពានមិត្តភាពកម្ពុជា-កូរ៉េ (ស្ពានកំពង់បាយ) និងដំណាក់កាលទី៣ ចាប់ពីគល់ស្ពានមិត្តភាពកម្ពុជា-កូរ៉េ (ស្ពានកំពង់បាយ)រហូតដល់ស្ពានរថភ្លើង។

នៅក្នុងថ្ងៃដដែល​ម៉ៅ ធនិន អភិបាលខេត្ត ក៏​បានបន្តចុះពិនិត្យទីតាំងស្ពានក្បាលរមាសចាស់ ស្ថិតក្នុងស្រុកទឹកឈូ ដើម្បីរៀបចំធ្វើជាផ្សារគ្រឿងសមុទ្រនាពេលឆាប់ៗខាងមុខនេះផងដែរ៕

ដោយ ៖ សឹង រ៉ាត់

The post អាជ្ញាធរខេត្ត​កំពត​ឱ្យ​ពលរដ្ឋ ៣៥គ្រួសារ ចូល​រួម​រុះរ៉ើ​សំណង់​ដែល​ប៉ះពាល់​ចំណី​ព្រែកត្រើយ​ខាងលិច ដើម្បី​រៀបចំ​សោភ័ណភាព​ក្រុង appeared first on Kampuchea Thmey Daily.

បើតាមលិខិតរបស់រដ្ឋបាលបាលខេត្តស្វាយរៀង បានបញ្ជាក់ថា ការរុះរើនេះធ្វើឡើង ដើម្បីធានាឱ្យមានសណ្តាប់ធ្នាប់ល្អ ចូលរួមកាត់បន្ថយការសេពគ្រឿងស្រវឹង កាត់បន្ថយអំពើហិង្សា និងគ្រោះថ្នាក់បង្កដោយគ្រឿងស្រវឹង ជាពិសេសលើកកម្ពស់ រក្សាភាពថ្លៃថ្នូរ និងរក្សាសោភណភាពខេត្តស្វាយរៀង។ លោក ប៉េង ពោធិ៍សា ក៏បានណែនាំចំណុចសំខាន់៣ ដូចខាងក្រោម៖

ចំណុចទី១ ត្រូវចាត់វិធានការរុះរើផ្ទាំងផ្សព្វផ្សាយពាណិជ្ជកម្មគ្រឿងស្រវឹងគ្រប់ប្រភេទ នៅតាមដងផ្លូវសាធារណៈ ដោយចាប់អនុវត្តពីថ្ងៃជូនដំណឹងនេះតទៅ។ ទី២ ចំពោះផ្ទាំងផ្សព្វផ្សាយគ្រឿងស្រវឹងនៅតាមហាង ភោជនីយដ្ឋាន អាហារដ្ឋាន និងតូបលក់ដូរនានា ជាកម្មសិទ្ធិរបស់ឯកជន ត្រូវបានលើកលែងដើម្បីសម្រួលដល់ការប្រកបអាជីវកម្មរបស់ប្រជាពលរដ្ឋ។ ប៉ុន្តែ ត្រូវណែនាំឱ្យមានការរៀបចំឱ្យបានត្រឹមត្រូវ សមរម្យ ចៀសវាងការប្រើប្រាស់ចំណីផ្លូវសាធារណៈជាការតាំងបង្ហាញ។ ចំណុចទី៣ ត្រូវជំរុញការផ្សព្វផ្សាយពីការអភិវឌ្ឍ និងតំបន់ទេសចរណ៍នានានៅតាមដងផ្លូវសាធារណៈ។  

ជាមួយគ្នានេះ លោក ប៉េង ពោធិ៍សា អភិបាលខេត្តស្វាយរៀង បានស្នើឱ្យលោកអភិបាលក្រុង ស្រុក ចាត់ចែងអនុវត្តឱ្យមានប្រសិទ្ធភាពប្រកបដោយស្មារណីទទួលខុសត្រូវខ្ពស់៕

The post អភិបាលខេត្តស្វាយរៀង ណែនាំឱ្យរុះរើផ្ទាំងផ្សព្វផ្សាយពាណិជ្ជកម្មគ្រឿងស្រវឹងគ្រប់ប្រភេទតាមផ្លូវសាធារណៈ appeared first on Kampuchea Thmey Daily.

តាមរយៈលិខិតនេះ រដ្ឋបាលខេត្តកំពង់ធំ បានប្រាប់ទៅ ម្ចាស់អាជីវកម្ម ភោជនីដ្ឋាន អាហារដ្ឋាន ក្រុមហ៊ុនផ្សព្វផ្សាយពាណិជ្ជកម្ម ក្រុមហ៊ុនស្រាបៀរ និងគ្រឿងស្រវឹងគ្រប់ប្រភេទ ដែលបានលើកប៉ាណូ ឬស្លាកផ្សព្វផ្សាយពាណិជ្ជកម្មអំពីស្រាបៀរ ឬគ្រឿងស្រវឹង ដោយគ្មានច្បាប់អនុញ្ញាតនៅលើចំណីផ្លូវសាធារណៈ។ ជាពិសេសលើកំណាត់ផ្លូវជាតិលេខ៦ (ព្រំប្រទល់កំពង់ចាម-កំពង់ធំ ដល់ព្រំប្រទល់កំពង់ធំ-សៀមរាប) កំណាត់ផ្លូវជាតិលេខ៦២ (ពីផ្លូវបំបែកដាវដែក កំពង់ស្វាយ ដល់ព្រំប្រទល់កំពង់ធំ-ព្រះវិហារ) និងកំណាត់ផ្លូវ៦០B (ទីប្រជុំជនកំពង់ថ្ម ដល់ព្រំប្រទល់ស្រុកចំការលើខេត្តកំបង់ចាម) ធ្វើការរុះរើប៉ាណូ ឬស្លាកផ្សព្វផ្សាយពាណិជ្ជកម្មទាំងនោះ ដោយទុករយៈពេល ១០ថ្ងៃ គិតចាប់ពីថ្ងៃជូនដំណឹងនេះ។

ក្នុងករណីផុតកាលបរិច្ឆេទកំណត់ខាងលើ គ្រប់ម្ចាស់អាជីវកម្ម ភោជនីដ្ឋាន អាហារដ្ឋាន ក្រុមហ៊ុនផ្សព្វផ្សាយពាណិជ្ជកម្ម ក្រុមហ៊ុនស្រាបៀរ និងគ្រឿងស្រវឹងទាំងអស់ ពុំធ្វើការរុះរើតាមសេចក្តីជូនដំណឹងនេះ រដ្ឋបាលខេត្តកំពង់ធំ នឹងចាត់វិធានការរដ្ឋបាលធ្វើការរុះរើ ដោយមិនទទួលខុសត្រូវលើការខូចខាតនោះឡើយ។

សូមជម្រាបថា ក្រោយរដ្ឋមន្ត្រីក្រសួងមហាផ្ទៃ លោក ស សុខា បានដាក់គោលការណ៍ឱ្យរដ្ឋបាលខេត្តទាំងអស់ ពិនិត្យសើរើឡើងវិញរាល់ឯកសារព្រមព្រៀងជាមួយក្រុមហ៊ុនផលិត និងទទួលផ្សព្វផ្សាយគ្រឿងស្រវឹងទាំងអស់ ដើម្បីឈានទៅបញ្ចប់រាល់ការផ្សព្វផ្សាយផលិតផលគ្រឿងស្រវឹងតាមដងផ្លូវ និងទីសាធារណៈ រដ្ឋបាលខេត្តមួយចំនួន បានចាត់វិធានការ ឱ្យម្ចាស់អាជីវកម្មផ្សព្វផ្សាយគ្រឿងស្រវឹងទាំងនោះធ្វើការរុះរើជាបន្តបន្ទាប់៕

The post រដ្ឋបាលខេត្តកំពង់ធំ ទុកពេល ១០ថ្ងៃ ឱ្យម្ចាស់អាជីវកម្មរុះរើផ្ទាំងផ្សព្វផ្សាយគ្រឿងស្រវឹង appeared first on Kampuchea Thmey Daily.

តាមរយៈលិខិតនេះ រដ្ឋបាលខេត្តកំពង់ចាម បានជម្រាបលោកអភិបាលនៃគណៈអភិបាល ក្រុង-ស្រុក ថា ការផ្សព្វផ្សាយគ្រឿងស្រវឹងតាមដងផ្លូវ ទីតាំងលក់ភេសជ្ជៈ និងតាមទីតាំងសាធារណៈ នានាបានជះឥទ្ធិពលអវិជ្ជមានដល់សង្គម ពិសេសជាការអូសទាញដល់យុវជនឱ្យសេពគ្រឿងស្រវឹង ដែលឈានដល់ការបង្កអំពើហឹង្សា អំពើពាលា និងការបង្កគ្រោះថ្នាក់ដល់សង្គម និងគ្រោះថ្នាក់ចរាចរណ៍ ដែលបង្កឡើងដោយសារសេពគ្រឿងស្រវឹងជាដើម។ ការស់នៅប្រកបដោយសុខដុមនីយកម្ម ដើម្បីចូលរួមចំណែកការលើកកម្ពស់សីលធម៌សង្គម ក្នុងគ្រួសារខ្មែរ គ្មានអំពើហឹង្សា អំពើពាលា និងចូលរួមរក្សាសណ្តាប់ធ្នាប់ សោភ័ណភាព នៅតាមដងផ្លូវ ទីប្រជុំជននានាក្នុងភូមិសាស្ត្រខេត្តកំពង់ចាម។

ក្នុងន័យនេះ រដ្ឋបាលខេត្តកំពង់ចាម បានធ្វើការណែនាំដល់ លោកអភិបាលនៃគណៈអភិបាលក្រុង-ស្រុក ត្រូវចុះអប់រំផ្សព្វផ្សាយអំពីផលប៉ះពាល់អវិជ្ជមាននៃការផ្សព្វផ្សាយគ្រឿងស្រវឹង តាមរយៈផ្ទាំងរូបភាពពាណិជ្ជកម្មជាដើម ជូនប្រជាពលរដ្ឋ ម្ចាស់អាជីវកម្មដែលមានលើកផ្លាកយីហោផ្សព្វផ្សាយគ្រឿងស្រវឹង ឱ្យធ្វើការរុះរើ ឬឱ្យធ្វើការផ្លាស់ប្តូរផ្លាកយីហោដែលមានរូបភាពផ្សព្វផ្សាយស្រាបៀរ ឬគ្រឿងស្រវឹង ទៅជាផ្លាកយីហោដែលរូបភាពផ្សព្វផ្សាយភេសជ្ជៈវិញ។

ព្រមទាំង ធ្វើការណែនាំដល់ប្រជាពលរដ្ឋម្ចាស់អាជីវកម្ម ម្ចាស់ផ្លាកយីហោ ឱ្យជូនដំណឹងដល់ក្រុមហ៊ុនដែលផ្សព្វផ្សាយពាណិជ្ជកម្ម មករុះរើប៉ាណូ ឬផ្លាកពាណិជ្ជកម្ម ដែលមានរូបភាពស្រាបៀរ ឬគ្រឿងស្រវឹងចេញ ដោយទុករយៈពេល ១សប្តាហ៍ មុននឹងអាជ្ញាធរចុះអនុវត្ត វិធានការរុះរើ។ បន្ថែមពីនេះ លោកអភិបាលក្រុង-ស្រុក ត្រូវចុះអនុវត្តវិធានការ អប់រំផ្សព្វផ្សាយ បំផុសស្មារតីឱ្យមានការចូលរួមសហការពីប្រជាពលរដ្ឋ ម្ចាស់អាជីវកម្ម ក្នុងការអនុវត្តវិធានការនេះ។

លើសពីនេះ លោកអភិបាលក្រុង-ស្រុក ត្រូវណែនាំដល់ប្រធានការិយាល័យច្រកចេញ ចូលតែមួយ ឱ្យត្រួតពិនិត្យសំណើបើកអាជីវកម្ម ឬលើកផ្លាកយីហោនានា ដោយត្រូវជៀសវាងដាច់ខាតការផ្សព្វផ្សាយគ្រឿងស្រវឹង ឬស្រាបៀរ និងត្រូវចាត់តាំងអនុវត្ត ចាប់ពីពេលនេះ និងធ្វើរបាយការណ៍ឱ្យរដ្ឋបាលខេត្តជារៀងរាល់ខែ៕

The post រដ្ឋបាលខេត្តកំពង់ចាម ទុកពេល ១សប្តាហ៍ មុនអាជ្ញាធរចាត់វិធានការរុះរើផ្ទាំងផ្សព្វផ្សាយគ្រឿងស្រវឹង appeared first on Kampuchea Thmey Daily.

ហើយ​នៅ​ថ្ងៃទី​០៥ ខែកក្កដា ឆ្នាំ​២០២១ ជា​លទ្ធផល ក្រុមការងារ​បាន​ប្រាប់​អ្នកសារព័ត៌មាន​ប្រចាំខេត្ត​ឲ្យ​ដឹង​ថា -​ទី​១ គឺ​ការសាងសង់​សំណង់​អត់​ច្បាប់ នៅក្នុង​ព្រែក​សាធារណ​របស់​រដ្ឋ អាជ្ញាធរ​សម្រេច​ដាក់​ឱ​សា​នុ​វាទ​៧​ថ្ងៃ​ឲ្យ​ម្ចាស់​សំណង់​រុះរើ​សំណង់​ចេញ​ឲ្យ​អស់ គិត​ចាប់​ពីថ្ងៃ​ប្រកាស​នេះ​តទៅ​។

-​ទី​២ ដី​មិនទាន់​បាន​ចុះបញ្ជី ចំពោះ​សំណង់​នៅលើ​ដី គឺ​ឲ្យ​ផ្អាក​ការសាងសង់​ទាំងអស់ ដោយ​ដី​នេះ​មិនទាន់បាន​ចុះបញ្ជី ជា​លក្ខណៈ​ប្រព័ន្ធ និង​មិនទាន់​បានកំណត់​ព្រំដី កំណត់​ចំណី​ព្រែក​ប្រសូត្រ និង​ការប៉ះពាល់​។

-​ទី​៣ ដូច្នេះ​ម្ចាស់​ដី​ត្រូវ​រៀបចំ​ឯកសារ សុំ​ចុះបញ្ជី​ដីធ្លី​ឲ្យ​បាន​ស្របច្បាប់ រួច​ដាក់​សំណើ​សុំ​ធ្វើការ​អភិវឌ្ឍន៍​ឬ អាហា​រដ្ឋា​ន រមណីយដ្ឋាន​ត្រូវ​ដាក់​សំណើ​សុំ ជាថ្មី តាម​ឋានានុក្រម អាជ្ញាធរ មន្ទីរ​ជំនាញ​ពាក់​ព័ន្ធ ដោយមាន​ភ្ជាប់​ជាមួយ​ប្លង់​មេ «Master Plan»​នៃ​គម្រោង​ដើម្បី​មន្ត្រី​ជំនាញ​ចុះ​ពិនិត្យ​បញ្ជូន​តាម​នីតិវិធី។

ទាក់ទិន​ករណីនេះ​ដែរ លោក ហេង ចំណូល ជា​ម្ចាស់​សំណង់ បាន​យល់ព្រម​និង​ធ្វើ​កិច្ចសន្យា រុះរើ​សំណង់​ដែល​សង់​ក្នុង​ព្រែក​ចេញ និង​ផ្អាក​ការសាងសង់​បណ្តោះអាសន្ន៕

ដោយ ៖ ភក្ដី

The post ត្រឹម​រយៈពេល​៧​ថ្ងៃ ម្ចាស់​សំណង់​ត្រូវ​រុះរើ​សំណង់​ចេញ​ឲ្យ​រួចរាល់ ពី​ក្នុង​ព្រែក​ប្រសូត្រ ស្រុក​ស្វាយទាប appeared first on Kampuchea Thmey Daily.

ក្នុង​ការចុះ​អនុវត្តតាម​លិខិត​លេខ ០៣៨/២១ សជណ​.​ច ចុះ​ថ្ងៃទី​០២ ខែមិថុនា ឆ្នាំ​២០២១ របស់​រដ្ឋបាល​រាជធានី​ភ្នំពេញ ស្តីពី​ការរុះរើ ឬ​ចល័ត​បែ​ចិ​ញ្ជឹ​ម​ត្រី ផ្ទះ​បណ្ដែត​ទឹក ផ្ទះ​ទូក​តូចៗ និង​សំណង់​មិន​រៀបរយ​លើ​ផ្ទៃ​ទឹក​នេះ គណៈបញ្ជាការ​ឯកភាព​ខណ្ឌ​ព្រែក​ព្នៅ ដឹកនាំ​ដោយ លោក សុខ សម្បត្តិ អភិបាល នៃ​គណៈ​អភិបាលខណ្ឌ​ព្រែក​ព្នៅ បាន​ចុះ​ផ្សព្វផ្សាយ​និង​ព​ន្លឿន​ឲ្យ​ប្រជាពលរដ្ឋ​ដែល​ស្ម័គ្រ​ចិត្ត​រុះរើ​ដោយ​ខ្លួនឯង​រុះរើ​ឲ្យ​បាន​ឆាប់​ដើម្បី​អាជ្ញាធរ​ស្រួល​គ្រប់គ្រង​។

ជា​លទ្ធផល​ជនជាតិ​វៀតណាម​ដែល​បាន​រុះរើ និង​ចល័ត​ដោយ​ស្ម័គ្រចិត្ត​ផ្ទះ​បណ្តែត​ទឹក និង​បែ​ត្រី​ក្នុងភូមិ​សាស្ត្រ​ខណ្ឌ​ព្រែក​ព្នៅ រាជធានី​ភ្នំពេញ គិត​ត្រឹម​ថ្ងៃទី​១៤ ខែមិថុនា ឆ្នាំ​២០២១ នេះ​១-​សង្កាត់​ព្រែក​ព្នៅ មាន​សរុប​២៥៩​ផ្ទះ និង​បែ ក្នុងនោះ​យើង​បាន​ចុះ​ធ្វើ​កំណត់ហេតុ​រុះរើ​ម្ចាស់​ផ្ទះទឹក ចំនួន​២៤២​ផ្ទះ នៅសល់​១៧​ផ្ទះ​ទៀត កំពុង​រុះរើ​លើ​១០០% ប៉ុន្តែ​រុះរើ​ពុំទាន់​ហើយ បើ​គិត​ជា​ភាគរយ​ស្មើ​៩៣%​។ ២-​សង្កាត់​សំរោង មាន​សរុប​ចំនួន​៦៣​ផ្ទះ និង​បែ បាន​ចុះ​ធ្វើ​កំណត់ហេតុ​រុះរើ និង​ចល័ត​ចេញ ដោយ​ខ្លួនឯង​ចំនួន​៦៣​បែ​ស្មើ​១០០%. សរុប​ផ្ទះទឹក​ចំនួន​ផ្ទះ និង​បែ​ត្រី​ចំនួន ៣២២​ផ្ទះ និង​បែ ក្នុង​នោះបាន​រុះរើ​ដោយ​ខ្លួនឯង​ចំនួន​៣០៥​ផ្ទះ និង​បែ នៅសល់​១៧​ផ្ទះ​បែ​ទៀត​កំពុង​រុះរើ​១០០%​ដោយ​ខ្លួនឯង ប៉ុន្តែ​ពុំ​ទាន់​រុះរើ​ហើយ បើ​គិត​ជា​ភាគរយ​ស្មើ​៩៥%៕

ដោយ ៖ លី មុន្នីឧត្តម

The post ថ្ងៃទី​១៤​មិថុនា​នេះ ​ផ្ទះ​បណ្តែត​ទឹក និង​បែ​ត្រី​ដែល​ព្រម​ស្ម័គ្រ​ចិត្ត​រុះរើ និង​ចល័ត​ចេញ​ដោយ​ខ្លួនឯង​សង្កាត់​ព្រែក​៩៣% សង្កាត់​សំរោង​១០០% appeared first on Kampuchea Thmey Daily.

ក្នុង​ខណៈ​ចុះ​ត្រួតពិនិត្យ និង​ផ្សព្វផ្សាយ​នៅ​តាម​ទន្លេ​ដែល​មាន ផ្ទះ​បណ្តែត​ទឹក បែ​ចិញ្ចឹម​ត្រី ផ្ទះ​ទូក​តូចៗ និង​សំណង់​មិន​រៀបរយ​នៅលើ​ផ្ទៃ​ទន្លេសាប នៅ​ក្នុង​មូលដ្ឋាន​ខណ្ឌ​ព្រែក​ព្នៅ នា​ថ្ងៃទី​១១ ខែមិថុនា ឆ្នាំ​២០២២១​នេះ លោក​ជា ខេ​មា អភិបាលខណ្ឌ​ព្រែក​ព្នៅ បាប​ប្រាប់​ឲ្យ​ដឹង​ថា យើង​ចុះទៅ​ជូនដំណឹង និង​ផ្សព្វផ្សាយ​បន្ថែម​ដើម្បី​ជំរុញ​ឲ្យ​ពួកគាត់​រុះរើ​តាម​សេចក្តី​ជូនដំណឹង​នេះ ជាក់ស្តែង​ប្រជាពលរដ្ឋ​ដែល​បែ​ចិ​ញ្ចឹម​ត្រី ផ្ទះ​បណ្ដែត​ទឹក ផ្ទះ​ទូក​តូចៗ និង​សំណង់​មិន​រៀបរយ​លើ​ផ្ទៃ​ទឹក នៅ​ភូមិសាស្ត្រ​ខណ្ឌ​ព្រែក​ព្នៅ បាន​រុះរើ​យកចេញ​ប្រមាណ​ជា​២០​ភាគរយ​ប៉ុណ្ណោះ ហើយ​ថ្ងៃស្អែក​យើង​និង​ចុះ​ជា​ទ្រង់ទ្រាយ​ធំ ​ដើម្បី​ឲ្យ​ពួកគាត់​រុះរើ​ចេញ​ឲ្យ​អស់​។

គួរ​បញ្ជាក់​ថា តាម​ការ​ស្រង់​ស្ថិតិ​របស់​រដ្ឋបាល​ខណ្ឌ​ព្រែក​ព្នៅ បាន​ឲ្យ​ដឹង​ថា ប្រជាពលរដ្ឋ​ដែល​រស់នៅ​លើ​ផ្ទះ​បណ្តែត​ទឹក បែ​ចិញ្ចឹម​ត្រី ផ្ទះ​ទូក​តូចៗ និង​សំណង់​មិន​រៀបរយ​លើ​ផ្ទៃ​ទន្លេ​នេះ​ភាគច្រើន​ជា​ជនជាតិ​វៀតណាម មាន​ចំនួន​២៩២​ខ្នង​ផ្ទះ និង​មាន​ចំនួន​៣០៨​គ្រួសារ នៅក្នុង​ភូមិ​គ្រួស​នៃ​សង្កាត់​សំរោង និង​ក្នុងភូមិ​ឌួង ភូមិ​ពោធិ​មង្គល ភូមិ​ផ្សារ​លិច និង​ភូមិ​កណ្តាល នៃ​សង្កាត់​ព្រែក​ព្នៅ ដែល​បានមក​សង់ផ្ទះ បែ​ចិញ្ចឹម​ត្រី​រស់នៅ​យ៉ាង​អនាធិបតេយ្យ​នៅ​តាម​ដង​ទន្លេ ស្ថិត​ក្នុង​សង្កាត់​ព្រែក​ព្នៅ និង​សង្កាត់​សំរោង ខណ្ឌ​ព្រែក​ព្នៅ​ រាជធានី​ភ្នំពេញ​៕

ដោយ ៖ ឧ​ត្ត​រ៉ា

The post មកដល់​ថ្ងៃទី​១១​មិថុនា​នេះ​ សំណង់​មិន​រៀបរយ​លើ​ផ្ទៃ​ទឹក នៅ​ខណ្ឌ​ព្រែក​ព្នៅ បាន​រុះរើ​ចេញ​ប្រមាណ​ជា​២០​ភាគរយ appeared first on Kampuchea Thmey Daily.