រៀបការ Archives - Kampuchea Thmey Daily

អ្នកគាំទ្រ យឿន ពិសី ជូនពរគូជីវិតថ្មីលោក បានស្រលាញ់គ្នាដល់ចាស់កោងខ្នង ខណៈត្រៀមចូលរោងការឆាប់ៗ

Chan Sotheavy — Wed, 08 Jan 2025 03:02:44 +0000

បន្ទាប់ពីផ្តាច់ចំណងស្នេហាប្តីប្រពន្ធជាមួយអតីតភរិយាបានប៉ុន្មានឆ្នាំ តារាចម្រៀងលោក យឿន ពិសី ក៏បានប្រកាសពីដំណឹងត្រៀមចូលរោងការឆាប់ៗជាមួយគូស្នេហ៍ អំឡុងចុងខែមករា ឆ្នាំ២០២៥ ខាងមុខនេះ។

ចំណងស្នេហ៍របស់លោក យឿន ពិសី និងអនាគតភរិយារហូតឈានដល់ការត្រៀមចូលរោងជ័យឆាប់ៗនេះ ក្រោយពេលអ្នកទាំងពីរបានស្វែងយល់ចិត្តគ្នាអស់មួយរយ:ពេលកន្លងទៅ។ ជាការពិតគេចាំបានថា តារាចម្រៀងវ័យក្មេង យឿន ពិសី ធ្លាប់ទម្លាយនូវទំនាក់ទំនងស្នេហាថ្មីជាមួយនារីម្នាក់ បន្ទាប់ពីប្រកាសចែកផ្លូវគ្នាជាមួយអតីតភរិយាមុនបានប្រហែល ២ខែប៉ុណ្ណោះ។

ជាដំណឹងដ៏រំភើបរបស់ យឿន ពិសី ពេលនេះ ក៏បានប្រកាសថាខ្លួននិងគូស្នេហ៍ត្រូវចូលរោងការនៅថ្ងៃទី ២៥ ខែមករាឆ្នាំ២០២៥។ ក្នុងនោះ ពិសី ក៏បានសូមពរជ័យពីអ្នកគាំទ្រនិងមហាជនផងដែរ។

លោក យឿន ពិសី បានបញ្ជាក់ឱ្យដឹងថា “យើងខ្ញុំទាំងពីរនាក់សូមគោរពអញ្ជើញពុកម៉ែបងប្អូន និង Fan គាំទ្ររូបខ្ញុំបាទយឿន ពិសីទាំងអស់សម្រាប់ថ្ងៃមង្គលសិរីរបស់ខ្ញុំ នៅថ្ងៃទី២៥ ខែមករា ឆ្នាំ២០២៥។ គោរពអញ្ជើញពុកម៉ែបងប្អូនចូលរួមដោយរីករាយនៅក្នុងកម្មវិធីរបស់ពួកខ្ញុំទាំងពីរនាក់ផងបាទ”។

តាមរយ:ដំណឹងនេះ គេឃើញមានមហាជនអ្នកគាំទ្រមួយចំនួនបានបង្ហាញការចូលរួមអបអរសាទរ និងជូនពរដល់ពួកគេទាំងពីរផងដែរ។ ទោះបីយ៉ាងណាក៏មានការលើកឡើងថាគេសង្ឃឹមចំណងស្នេហ៍ទី២របស់ យឿន ពិសី និង អ្នកថ្មីគឺជាស្នេហាស្មោះស្ម័គ្រ និងស្រលាញ់មើលថែគ្មារហូតចាស់រៀងខ្លួន៕ អត្ថបទ៖ ចាន់រ៉ា

The post អ្នកគាំទ្រ យឿន ពិសី ជូនពរគូជីវិតថ្មីលោក បានស្រលាញ់គ្នាដល់ចាស់កោងខ្នង ខណៈត្រៀមចូលរោងការឆាប់ៗ appeared first on Kampuchea Thmey Daily.

ជំនាន់ឆ្នាំ ១៩៩៦ ដល់ ២០១០ នៅ វៀតណាម មនុស្សស្រីជាអ្នកនាំមុខសុំបុរសរៀបការ

Mean Ratana — Wed, 17 Jan 2024 09:36:53 +0000

សារព័ត៌មាន VietNam News ថ្មីៗនេះបានចុះផ្សាយពីនិន្នាការថ្មីមួយ ដែលចាប់ផ្តើមពីអ្នកជំនាន់ថ្មី Generation Z ដែលកើតចន្លោះពីឆ្នាំ ១៩៩៦ ដល់ ២០១០ ឬហៅថាអ្នកយុគសម័យឌីជីថល ដែលមាននារីជាអ្នកនាំមុខក្នុងការស្នើសុំខាងបុរសដើម្បីរៀបការ ។

សារព័ត៌មានដដែលនេះបានបង្ហាញពី បទពិសោធនៃគូស្នេហា ២ គូ ដែលមាននារីជាអ្នកសុំភាគីបុរសរៀបការមុន។ ឧទាហរណ៍ជាក់ស្តែង កញ្ញា Thu Sang វ័យ ២៧ ឆ្នាំបានចែករំលែកបទពិសោធថា កញ្ញាគឺជាអ្នកសុំទៅមិត្តប្រុសរៀបការផ្ទាល់ ក្នុងពេលដែលពួកគេធ្វើខួបនៃទំនាក់ទំនងក្តីស្រលាញ់របស់ពួកគេ។

“មិត្តប្រុសខ្ញុំពិតជាភ្ញាក់ផ្អើលដែរ តែវាពិតជាធូរស្រាលក្នុងខួរក្បាលមែនទែន។ ពេលមុន ខ្ញុំតែងត្រូវបានបង្រៀនថា មនុស្សស្រី មិនគួរចេញមុខមុនទេក្នុងរឿងស្នេហានេះ ជាមួយគ្នានេះ ពួកយើងបង្រៀនឲ្យចេះរង់ចាំ និងមិនបង្ខំ”។ នេះបើតាមសម្តីរបស់កញ្ញា Sang ប្រាប់សារព័ត៌មាន។

រូបតំណាង

កញ្ញា Thu Sang មានទំនាក់ទំនងស្នេហាជាមួយមិត្តប្រុសរបស់នាងរយៈពេលជាង៤ឆ្នាំមកហើយ នាងគិតថាវាជាវេលាសមស្របមួយ ហើយនាងអាចធ្វើរឿងនេះបាន ដោយមិនចាំបាច់រង់ចាំមិត្តប្រុសរបស់នាងធ្វើមុន។

“ឆ្នាំក្រោយវាដល់ពេលល្មមដែលពួកយើងរៀបការ ហើយខ្ញុំគិតថា វាពិតជារឿងអនុស្សាវរីយ៍គួរឲ្យចងចាំ ប្រសិនបើខ្ញុំជាអ្នកចាប់ផ្តើមមុន (សុំរៀបការ)។ ជាសំណាងល្អមែន អ្វីៗទៅរលូនល្អ ដូចការគិតរបស់ខ្ញុំ ហើយឥលូវពួកយើងត្រៀមរៀបចំអាពាហ៍ពិពាហ៍ ហើយក៏មានការគាំទ្រកក់ក្តៅពីគ្រួសារពួកយើងផងដែរ”។ កញ្ញា Sang បានបញ្ជាក់។

អ្នករៀបចំកម្មវិធីអាពាហ៍ពិពាហ៍ម្នាក់ឈ្មោះ Tuan Ngoc វ័យ២៨ឆ្នាំ បាននិយាយថា សព្វថ្ងៃនេះនៅវៀតណាម អ្នកសុំរៀបការជានារីដូច Sang គឺមានចំនួនច្រើន។ គិតចាប់ពីដើមឆ្នាំ២០២៣ ដល់ពេលនេះ ក្រុមរបស់ Ngoc ទទួលរៀបចំសេវាកម្មកម្មវិធីអាពាហ៍ពិពាហ៍ ខួបចំណងស្នេហ៍ ស្នើសុំរៀបការរបស់គូស្នេហ៍ជាច្រើនរយគូ ដែលក្នុងនោះក៏មាននារីជាអ្នកសុំរៀបការក៏មានច្រើនផងដែរ ។

“មនុស្សស្រីជាច្រើន លែងរង់ចាំនរណាម្នាក់ទៀតហើយ ដើម្បីមកសម្រេចលើជីវិតរបស់ពួកគេ។ ពួកផ្លាស់ប្តូរ ហើយពួកយើងក៏ត្រៀមផ្តល់សេវាកម្មជួយពួកគេឲ្យបានឥតខ្ចោះផងដែរ។ ភាគច្រើនពួកគេជា អ្នកមានភាពល្បីលើបណ្តាញសង្គម ហើយកម្មវិធីពួកគេក៏ត្រូវថតចងក្រងជាអនុស្សាវីរយ៍ទុកជាពិសេសផងដែរ ។ Ngoc បានបន្ថែម ។

រូបតំណាង

ដោយឡែកកញ្ញា Ong Anh វ័យ ២៨ ឆ្នាំ ដែលត្រៀមរៀបចំសុំភាគីខាងប្រុសរៀបការដែរនោះ ក៏បានចែករំលែកថា នាងមិនខ្វល់ខ្វាយច្រើនទេចំពោះសង្គមដែលគិតមកលើនាង។ អ្វីដែលនាងគិតគឺ បុរសដែលនាងស្រលាញ់មិនបដិសេធក្តីស្នេហារបស់នាង ក្នុងការសុំជាដៃគូជីវិត១០០ឆ្នាំ។

សម្រាប់និន្នាការខាងលើនេះ អ្នកចិត្តវិទ្យាវៀតណាម Tran Huong Thao លើកឡើងថា ចំនួនកើនឡើងដែលស្រ្តីសកម្មក្នុងការស្នើសុំដៃគូរៀបការ គឺជាសញ្ញាសមភាពយេនឌ័របានប្រសើរឡើងនៅប្រទេសវៀតណាម។ ក្នុងន័យនេះ គឺសង្គមបានទៅដល់ចំនុចមួយនៃការយល់ដឹងអំពីសេចក្តីសុខរបស់ខ្លួន និងសិទ្ធិដើម្បីការពារសេចក្តីសុខផ្ទាល់ខ្លួនរបស់បុគ្គលម្នាក់ៗ៕

អត្ថបទដោយ៖ មាន រតនា

The post ជំនាន់ឆ្នាំ ១៩៩៦ ដល់ ២០១០ នៅ វៀតណាម មនុស្សស្រីជាអ្នកនាំមុខសុំបុរសរៀបការ appeared first on Kampuchea Thmey Daily.

អង្គការភ្លែន កំពុងធ្វើការអប់រំពលរដ្ឋ ដើម្បីបញ្ឈប់ការរៀបការទាំងវ័យក្មេងក្នុងខេត្តចំនួន២

អុន ស្រីមាន — Wed, 29 Mar 2023 02:02:40 +0000

អង្គការភ្លែនអន្តរជាតិ ប្រកាសពីការបើកគម្រោងមួយឈ្មោះថា “ដល់ពេលធ្វើសកម្មភាព” ដើម្បីអប់រំដល់ប្រជាជន និងបញ្ឈប់ការរៀបអាពាហ៍ពិពាហ៍ទាំងវ័យក្មេងដែលមិនទាន់គ្រប់អាយុរៀបការ។ គម្រោងនេះមានរយៈពេល២ឆ្នាំ ហើយធ្វើនៅខេត្តរតនគិរី និងស្ទឹងត្រែង។ នេះបើតាមការប្រកាសរបស់អង្គការភ្លែន អន្តរជាតិ។

ប្រភពដដែលលើកឡើងថា គម្រោង “ដល់ពេលធ្វើសកម្មភាព”នេះ ធ្វើឡើងក្រោមការផ្តល់មូលនិធិដោយក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (BMZ) និងអង្គការភ្លែនអន្តរជាតិអាល្លឺម៉ង់។ គម្រោងនេះ មានគោលបំណងគាំទ្រដល់ក្មេងស្រី និងក្មេងប្រុសវ័យជំទង់ចំនួន ៦ពាន់នាក់ ដើម្បីផ្សព្វផ្សាយឱ្យពួកគេបានយល់ដឹង និងបញ្ឈប់ការរៀបអាពាហ៍ពិពាហ៍ទាំងវ័យក្មេង។ វា នឹងជួយឱ្យពួកគេអភិវឌ្ឍខ្លួនជាមនុស្សពេញវ័យប្រកបដោយសក្តានុពលនៅក្នុងតំបន់ជួបការលំបាក ជាពិសេស តំបន់ដាច់ស្រយាលនៃខេត្តភាគឦសានទាំងពីរនេះ។

ការស្រាវជ្រាវរបស់អង្គការភ្លែនអន្តរជាតិកាលពីឆ្នាំ២០២០ បង្ហាញថា អត្រាអាពាហ៍ពិពាហ៍នៅវ័យក្មេង ក្នុងខេត្តរតនគិរី មានប្រមាណ ៤៨% មុនអាយុ ១៨ ឆ្នាំ (៨% មុនអាយុ ១៥ ឆ្នាំ) និង ២៥% មុនអាយុ១៨ឆ្នាំ នៅខេត្តស្ទឹងត្រែង។

ជុំវិញបញ្ហានេះ លោកស្រី គ្វីននេត វ៉ង នាយិកាប្រចាំប្រទេសនៃអង្គការភ្លែនអន្តរជាតិកម្ពុជា បានលើកឡើងថា អាពាហ៍ពិពាហ៍នៅវ័យក្មេង និងបោះបង់ការសិក្សា នៅតែជាបញ្ហាដែលបង្អាក់ការអភិវឌ្ឍរបស់ក្មេងស្រីជំទង់។ កុមារី ជាពិសេសរស់នៅតំបន់ជនបទ ប្រឈមមុខនឹងហានិភ័យ មិនត្រឹមតែចំពោះសុខភាព រាងកាយ និងការមានផ្ទៃពោះវ័យក្មេងប៉ុណ្ណោះទេ ថែមទាំងមានអំពើហិង្សាក្នុងគ្រួសារ និងការប្រឈមកាន់តែខ្លាំងឡើងចំពោះការពង្រឹងសេដ្ឋកិច្ចរបស់ពួកគេផងដែរ។

លោកស្រី គ្វីននេត មានប្រសាសន៍៖ “ការរៀបអាពាហ៍ពិពាហ៍នៅវ័យក្មេង គឺជាការអនុវត្តដ៏គ្រោះថ្នាក់ និងជាបញ្ហាសិទ្ធិមនុស្សដែលប៉ះពាល់ដល់ក្មេងស្រី។ ក្មេងស្រីដែលប្រឈមនឹងគ្រោះថ្នាក់ច្រើនបំផុត មកពីគ្រួសារក្រីក្រ ជាក្រុមជនងាយរងគ្រោះ និងរស់នៅតាមតំបន់ជនបទ”។

គម្រោងនេះ ត្រូវបានចាប់ផ្តើមពីថ្ងៃទី០១ ខែមករា ឆ្នាំ ២០២៣ ដល់ថ្ងៃទី ៣១ ខែធ្នូ ឆ្នាំ២០២៤ ដោយធ្វើការយ៉ាងជិតស្និទ្ធក្នុងភាពជាដៃគូជាមួយអង្គការមិនមែនរដ្ឋាភិបាលក្នុងស្រុកចំនួន២ គឺអង្គការវឌ្ឍភាព (WP) និងសមាគមយុវជនខ្មែរ (KYA) នៅក្នុងឃុំគោលដៅចំនួន ១៦ ហើយរំពឹងថា នឹងផ្តល់អត្ថប្រយោជន៍ដោយផ្ទាល់ដល់ស្ត្រីចំនួន ៥,៣២៧នាក់ និងក្មេងស្រីចំនួន ៣,៣៦១នាក់ តាមរយៈការកែលម្អបរិយាកាសរៀនសូត្រក្នុងសាលារៀន ដើម្បីកាត់បន្ថយហានិភ័យនៃការបោះបង់ការសិក្សា និងអាពាហ៍ពិពាហ៍នៅវ័យក្មេង។

បន្ថែមលើនេះ ភាគីពាក់ព័ន្ធថ្នាក់ឃុំ នឹងចូលរួមជាមួយគម្រោងនេះដូចគ្នា ដើម្បីធានាថា ក្មេងស្រី ក្មេងប្រុសវ័យជំទង់ ស្ត្រីដែលរៀបការវ័យក្មេង និងឪពុកម្តាយមានភាពយល់ដឹង និងការពារ ព្រមទាំងរាយការណ៍ពីបញ្ហាណាមួយតាមរយៈបណ្តាញទូរស័ព្ទទាន់ហេតុការណ៍ក្នុងស្រុកក្នុង ១៦ឃុំគោលដៅផងដែរ៕

The post អង្គការភ្លែន កំពុងធ្វើការអប់រំពលរដ្ឋ ដើម្បីបញ្ឈប់ការរៀបការទាំងវ័យក្មេងក្នុងខេត្តចំនួន២ appeared first on Kampuchea Thmey Daily.

ទម្លាយអត្ថន័យយល់សប្តិរៀបការ ឬចូលរួមពិធីមង្គលការ

Sonya — Thu, 16 Feb 2023 14:24:07 +0000

ពិធីអាពាហ៍ពិពាហ៍ក្នុងសុបិន ចាត់ទុកជាព្រឹត្តិការណ៍ដ៏អស្ចារ្យមួយដែលម្ចាស់ខ្លួននឹងជួបរឿងសប្បាយរីករាយ ព្រមទាំងសមបំណងជាមួយកិច្ចការសព្វយ៉ាង។ ជាទូទៅ សុបិនរៀបការ ឬឃើញខ្លួនឯងចូលរួមមង្គលការ វាមានន័យថា អ្នកនឹងទទួលបានលាភសំណាងពីមនុស្សភេទផ្ទុយ ឬអាចមានឱកាសឈ្នះរង្វាន់ទៀតផង។

សុបិនរៀបការជាមួយមនុស្សមិនស្គាល់

អំឡុងពេលនេះនឹងមានការរីកចម្រើន ហើយអ្នកនឹងបានទទួលតែរឿងល្អៗចូលមកក្នុងជីវិត។

សុបិនចូលរួមពិធីមង្គលការរបស់មិត្ត

វាជាតំណាងថា ជីវិតស្នេហាក្នុងរយៈពេលនេះនឹងមានផ្លែផ្កាល្អណាស់។ មនុស្សនៅលីវ នឹងបានជួបគូនិស្ស័យតាមរយៈមិត្តភក្តិ ឬអ្នកស្គាល់គ្នា។

សុបិនចូលរួមមង្គលការជាមួយមនុស្សច្រើននាក់

អ្នកនឹងទទួលបានដំណឹងល្អ ឬទំនាក់ទំនងពីញាតិមិត្ត ឬអ្នកស្គាល់ពីចម្ងាយ។

សុបិនចូលរួមពិធីមង្គលការរបស់អ្នកដទៃ

សុបិននេះ ជានិមិត្តរូបនៃឱកាសការងារល្អៗ និងលទ្ធផលជោគជ័យក្នុងភារកិច្ច។

សុបិនចួលរួមពិធីមង្គលការរបស់សាច់ញាតិ

វាជាសញ្ញាល្អដែលមានន័យថា អ្នកនឹងទទួលបានការជ្រោមជ្រែងពីអ្នកដទៃ។

សុបិនចូលរួមពិធីមង្គលការអ្នកស្គាល់គ្នា

ទស្សន៍ទាយថា អ្នកនឹងបានជួបតែរឿងល្អៗ ហើយមានមិត្តផ្តល់ឱកាសការងារមកឱ្យទៀតផង។

សុបិនចូលរួមពិធីមង្គលការរបស់អតីតសង្សារ

ជីវិតពិតនឹងទទួលបានតែលាភសំណាងចូលមកជានិច្ច បើហៀបនឹងមានបញ្ហា នោះនឹងមានអ្នកចាំជួយគាំទ្រ៕

អត្ថបទ៖ សន្យា

ចុចអាន៖ សុបិនងូតទឹក ជីវិតពិតនឹងធូរស្រាលពីបញ្ហាស្មុគស្មាញ

The post ទម្លាយអត្ថន័យយល់សប្តិរៀបការ ឬចូលរួមពិធីមង្គលការ appeared first on Kampuchea Thmey Daily.

សម្ដេចតេជោ ហ៊ុន សែន ៖ ការរៀបអាពាហ៍ពិពាហ៍ឆ្នាំនេះមានចំនួនច្រើន រហូតដល់មានការខ្វះអាចារ្យ

sopheak khoun — Mon, 09 Jan 2023 01:54:56 +0000

ប្រមុខរាជរដ្ឋាភិបាល សម្ដេចតេជោ ហ៊ុន សែន បានកត់សម្គាល់ថា ការរៀបអាពាហ៍ពិពាហ៍របស់ប្រជាជនកម្ពុជា នាឆ្នាំនេះមានចំនួនច្រើន រហូតដល់មានការខ្វះអាចារ្យ ខ្វះក្រុមភ្លេង និងខ្វះកន្លែងរៀបចំអាពាហ៍ពិពាហ៍ ផងដែរ។

សម្ដេចតេជោ ហ៊ុន សែន នៅក្នុងពិធីបើកការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ ៧ នាព្រឹកថ្ងៃទី ៩ ខែមករានេះ បានថ្លែងថា នាឆ្នាំនេះ ការរៀបអាពាហ៍ពិពាហ៍មានចំនួនច្រើនគួរឲ្យកត់សម្គាល់ រហូតដល់មានការខ្វះអាចារ្យ ខ្វះក្រុមភ្លេង និងខ្វះកន្លែងរៀបចំអាពាហ៍ពិពាហ៍ ជាដើម។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ឆ្នាំទៅ ក៏មានរៀបអាពាហ៍ពិពាហ៍ច្រើនដែរ តែឆ្នាំនេះ សម្រុករៀបអាពាហ៍ពិពាហ៍ហ្នឹង រហូតដល់ខ្វះអាចារ្យ ខ្វះក្រុមភ្លេង ខ្វះកន្លែង ការ(រៀបការ)នោះការ ដល់សួរទៅឆ្ងល់អំពីការប្រៀប ធៀបថា ហេតុអីបានជាៗច្រើនម្លេះ គេថា ចង់បានកូនឆ្នាំថោះៗ»។

សូមជម្រាបថា ការដែលប្រជាជនកម្ពុជា អាចរៀបចំពិធីអាពាហ៍ពិពាហ៍ឡើងវិញ ក្នុងចំនួនដ៏ច្រើនបែបនេះ ក៏ព្រោះតែការទប់ស្កាត់ជំងឺកូវីដ-១៩ របស់កម្ពុជាបានល្អប្រសើរ រហូតដល់បានបើកប្រទេសឡើងវិញលើគ្រប់វិស័យ មកដល់ពេលនេះ៕

The post សម្ដេចតេជោ ហ៊ុន សែន ៖ ការរៀបអាពាហ៍ពិពាហ៍ឆ្នាំនេះមានចំនួនច្រើន រហូតដល់មានការខ្វះអាចារ្យ appeared first on Kampuchea Thmey Daily.

ដឹងអត់! មានប្រទេស ២០ លើលោកនេះដែលអនុញ្ញាតឱ្យរៀបការប្តី ឬប្រពន្ធច្រើននាក់ដោយស្របច្បាប់

vann sokunthea — Wed, 29 Jun 2022 09:15:14 +0000

ពហុពន្ធភាព (Polygamy )មានន័យថា ចំណងអាពាហ៍ពិពាហ៍ដែលដៃគូទាំងសងខាងអាចមានប្តី ឬប្រពន្ធច្រើននាក់បានស្របពេលតែមួយ។ បើសិនជាភាគីខាងប្តីមានប្រពន្ធចាប់ពី ២ នាក់ ឡើងទៅ គេហៅថា Polygyny។ ចំណែក ប្រពន្ធអាចរៀបការជាមួយប្តីច្រើននាក់វិញ គេហៅថា Polyandry។ ខាងក្រោមនេះ គឺជាប្រទេសចំនួន២០លើពិភពលោកដែលអនុញ្ញាតឲ្យរៀបការប្តី ឬប្រពន្ធច្រើនដោយស្របច្បាប់៖

១. អាហ្គានីស្ថាន ៖ ប្តីអាចរៀបការប្រពន្ធ ៤ នាក់ឡើងទៅ

២. កេនយ៉ា ៖ ប្តីអាចរៀបការប្រពន្ធ ៤ នាក់ឡើងទៅ

៣. ឥណ្ឌា ៖ ប្តីអាចរៀបការប្រពន្ធ ៤ នាក់ឡើងទៅ(សម្រាប់ ម៉ូស្លីមតែប៉ុណ្ណោះ)

៤. ហ្វីលីពីន ៖ ប្តីអាចរៀបការប្រពន្ធច្រើននាក់បាន(សម្រាប់ ម៉ូស្លីមតែប៉ុណ្ណោះ)

៥. សិង្ហបុរី ៖ប្តីអាចរៀបការប្រពន្ធច្រើននាក់បាន(សម្រាប់ម៉ូស្លីមតែប៉ុណ្ណោះ)

៦. លីបង់ ៖ ប្តីអាចរៀបការប្រពន្ធ ៤ នាក់ឡើងទៅ(សម្រាប់ម៉ូស្លីមតែប៉ុណ្ណោះ)

៧. ម៉ាឡេស៊ី ៖ ប្តីអាចរៀបការប្រពន្ធច្រើននាក់បាន(សម្រាប់ម៉ូស្លីម និងត្រូវមានលិខិតបញ្ជក់ពីតុលាការ)

៨. ម៉ារ៉ុក ៖ រៀបការស្របច្បាប់ ប៉ុន្តែប្តីត្រូវមានលទ្ធភាពផ្នែកហិរញ្ញវត្ថុគ្រប់គ្រាន់ និងសុំអនុញ្ញាតពីប្រពន្ធទី១

៩. អេហ្សីប ៖ ប្តីអាចមានប្រពន្ធច្រើនទទួលស្គាល់ដោយស្របច្បាប់

១០. ស្រីលង្កា ៖ ប្តី ឬប្រពន្ធអាចមានដៃគូលើសពីម្នាក់ ទទួលស្គាល់ដោយស្របច្បាប់

១១. អារ៉ាប៊ី សាអូឌីត ៖ ប្តីអាចមានប្រពន្ធច្រើន ទទួលស្គាល់ដោយស្របច្បាប់

១២. អារ៉ាប់រួម ៖ ប្តីអាចរៀបការប្រពន្ធ ៤ នាក់ឡើងទៅ

១៣. ឥណ្ឌូនេស៊ី ៖ ប្តីអាចមានប្រពន្ធច្រើន ស្របច្បាប់ ប៉ុន្តែអាចប្រែប្រួលនៅតាមខេត្ត

១៤. អ៊ីរ៉ង់ ៖ ប្តីអាចមានប្រពន្ធច្រើន ទទួលស្គាល់ដោយស្របច្បាប់

១៥. អ៊ីរ៉ាក់ ៖ ប្តីអាចមានប្រពន្ធច្រើន ទទួលស្គាល់ដោយស្របច្បាប់ លើកលែងតែតំបន់ Kurdistan

១៦. គុយវេត ៖ ប្តីអាចមានប្រពន្ធច្រើន ទទួលស្គាល់ដោយស្របច្បាប់

១៧. បង់ក្លាដែស ៖ ប្តីអាចមានប្រពន្ធច្រើន ទទួលស្គាល់ដោយស្របច្បាប់

១៨. ប៉ាគីស្ថាន ៖ ប្តីអាចរៀបការប្រពន្ធ ៤ នាក់ឡើងទៅ សម្រាប់ម៉ូស្លីមតែប៉ុណ្ណោះ ដោយប្តីត្រូវមានលទ្ធភាពផ្នែកហិរញ្ញវត្ថុគ្រប់គ្រាន់ និងចុះកិច្ចព្រមព្រៀងជាមួយប្រពន្ធទី១

១៩. ប៉ាឡេស្ទីន ៖ ប្តីអាចរៀបការប្រពន្ធ ៤ នាក់ឡើងទៅ ដោយចុះកិច្ចព្រមព្រៀងជាមួយប្រពន្ធទី១

២០. កាមេរុន ៖ ប្តីអាចយកប្រពន្ធច្រើនដោយមិនកំណត់

ការរៀបការប្តី ឬប្រពន្ធលើសពីម្នាក់បែបនេះ ភាគច្រើនត្រូវបានកត់សម្គាល់ឃើញថា កើតមាននៅក្នុងប្រទេសដែលកាន់សាសនាឥស្លាម និងនៅប៉ែកខាងអាហ្រ្វិក ប្រទេសក្នុងតំបន់មជ្ឃិមបូព៌ា រួមទាំងផ្នែកខ្លះនៅប្រទេសអាស៊ីអាគ្នេយ៍។ ចំពោះប្រទេសដែលកាន់សាសនាឥស្លាមខ្លះ ប្តីត្រូវសុំអនុញ្ញាតពីប្រពន្ធទី១សិន ទើបអាចរៀបការយកប្រពន្ធក្រោយទៀតបាន រួមជាមួយលទ្ធភាពផ្នែកហិរញ្ញវត្ថុគ្រប់គ្រាន់សម្រាប់ផ្គត់ផ្គង់ប្រពន្ធច្រើននាក់របស់ខ្លួន។

ទោះជាយ៉ាងណាប្រទេសដែលកាន់សាសនាឥស្លាមមួយចំនួនដូចជា ប្រទេសទួគី ទុយណេស៊ី សាធារណរដ្ឋអាល់បានី កូសូវ៉ូ និងប្រទេសក្នុងតំបន់អាស៊ីកណ្តាលបានហាមឃាត់នូវទំនៀមទម្លាប់មួយនេះ។ ខណៈ ប្រទេសមួយចំនួននៅក្នុងទ្វីបអាហ្រ្វិក បានចាត់ទុកទំនៀមទម្លាប់ Polygamy នេះថា គឺខុសច្បាប់ស៊ីវិល ប៉ុន្តែត្រូវបានអនុញ្ញាតដោយច្បាប់ប្រពៃណី។

ដោយឡែក នៅក្នុងប្រទេសកម្ពុជាវិញ អាពាហ៍ពិពាហ៍ដែលស្របច្បាប់ គឺកើតឡើងរវាងប្តីមួយ និងប្រពន្ធមួយ ដោយមិនទាន់មានច្បាប់អនុញ្ញាតឱ្យរៀបការប្តី ឬប្រពន្ធលើសពីម្នាក់បានទេ លុះត្រាតែភាគីទាំងសងខាងលែងលះជាមួយអតីតប្តី ឬប្រពន្ធឱ្យដាច់ស្រេចទៅតាមផ្លូវច្បាប់សិន៕

ដោយ៖ លីលី

The post ដឹងអត់! មានប្រទេស ២០ លើលោកនេះដែលអនុញ្ញាតឱ្យរៀបការប្តី ឬប្រពន្ធច្រើននាក់ដោយស្របច្បាប់ appeared first on Kampuchea Thmey Daily.

ម្តាយតារាស្រីម្នាក់ វ័យជាង ៥០ ឆ្នាំ ដឹកដៃកូនកម្លោះជាង ៣០ ឆ្នាំ ចូលរោងការ

Sorn Phanith — Tue, 08 Feb 2022 03:37:48 +0000

ពិតជារឿងដ៏គួរឲ្យចាប់អារម្មណ៍ថ្មីមួយទៀតហើយ ម្តាយតារាសម្តែងស្រី អេមី ដែលមានវ័យប្រមាណ ៥៥ ឆ្នាំទៅហើយនោះ បានសម្រេចដឹកដៃជាមួយកូនកម្លោះវ័យ ៣៦ ឆ្នាំចូលរោងការផ្អើលអ្នកសិល្បៈនិងអ្នកភូមិ។

ប្រភពបានបង្ហើបថា ម្តាយរបស់តារាស្រីកញ្ញា អេមី ដែលគ្រងឈុតកូនក្រមុំ គឺមានឈ្មោះ ឡុង សោភ័ណ្ឌ អាយុ ៥៥ ឆ្នាំ ជាស្ត្រីមេម៉ាយច្រើនឆ្នាំ មានកូន ២ នាក់ប្រុស ១។ ចំណែកខាងប្រុសជាកម្លោះឈ្មោះ ញឹក រដ្ឋា អាយុ ៣៦ ឆ្នាំមុខរបរលក់ខ្សាច់នៅខេត្ត។

ប្រភពបានបន្តថាជាការពិតកញ្ញា អេមី ពេលនេះបានសម្រេចរឿងមួយដែលនាងចង់បាននឹងត្រូវតែធ្វើឲ្យបាននោះ គឺតាមរយៈការរៀបចំពិធីមង្គលការយ៉ាងអធិកអធម និងសប្បាយរីករាយឲ្យអ្នកម្តាយមេម៉ាយច្រើនឆ្នាំ។ ពិធីមង្គលការនេះ បានធ្វើឡើងកាលពីថ្ងៃទី ០៧ ខែកុម្ភៈ ឆ្នាំ ២០២២ ម្សិលមិញ។

ដោយឡែកនៅលើទំព័រហ្វេសប៊ុករបស់តារាស្រីកញ្ញា អេមី ដែលមានឈ្មោះថា Ami Adama ក៏បង្ហោះរូបភាពនៃមង្គលការអមដោយសំណេរខ្លីថា ថ្ងៃនេះការម្តាយរបស់ខ្ញុំគឺជាថ្ងៃលាភជ័យកូនជូនពរម្តាយស្រលាញ់គ្នាដល់ចាស់កោងខ្នង។ បើតាមការបញ្ជាក់ពីកញ្ញា អេមី ដែលបានជះលុយក្បែរម៉ឺនដុល្លារចាត់ចែងមង្គលការអ្នកមានគុណ ដើម្បីបំពេញសេចក្តីសុខឲ្យគាត់បានប្រាប់ថា បំណងនាងចង់ឲ្យអ្នកមានគុណមានសេចក្តីសុខ គាត់ពេញចិត្តគ្នាហើយមិនអាចពន្យារពេលបានទៀតទេ ត្រូវតែចាត់ចែងឲ្យហើយ។ ៥ ឆ្នាំហើយដែលស្គាល់គ្នា ហើយនៅតែអឹមអៀនទើបនាងសម្រេច ចិត្តចាប់ដៃគ្នាក្រោមចំណងផ្កាស្លាតែម្តង៕

អត្ថបទ៖ ចាន់រ៉ា

The post ម្តាយតារាស្រីម្នាក់ វ័យជាង ៥០ ឆ្នាំ ដឹកដៃកូនកម្លោះជាង ៣០ ឆ្នាំ ចូលរោងការ appeared first on Kampuchea Thmey Daily.

ខំគេចទៅរៀបការដល់លើអាកាសហើយ នៅមិនរួចខ្លួនទៀត

Sok Sovann — Thu, 27 May 2021 06:18:13 +0000

និយតករអាកាសចរណ៍ស៊ីវិលឥណ្ឌា កំពុងស៊ើបអង្កេតវីដេអូឃ្លីបមួយ ដែលត្រូវបានគេចែកចាយពាសពេញបណ្តាញសង្គមដែលបង្ហាញពី គូស្នេហ៍មួយគូជិះយន្តហោះទៅរៀបការលើអាកាស ដោយមានការចូលរួមពីសំណាក់ ក្រុមគ្រួសារនិងមិត្តភក្តិ។

នៅក្នុងវីដេអូនោះ ភ្ញៀវនិងអ្នកថតរូប ត្រូវបានគេមើលឃើញ កកកុញនៅជុំវិញកូនក្រមុំនិងកូនកំលោះ ដែលភាគច្រើនមិនពាក់ម៉ាស់។

ប្រទេសឥណ្ឌា កំពុងជាប់ក្នុងរលកទី២ដ៏សាហាវនៃ ជំងឺកូវីដ-១៩។ នៅរដ្ឋ Tamil Nadu ដែលជាកន្លែងពិធីមង្គលការនេះរៀបចំឡើង ប្រាសាទនិងសាលប្រជុំនានាត្រូវបានបិទ ហើយពិធីរៀបអាពាហ៍ពិពាហ៍និងព្រឹត្តិការណ៍សង្គមដទៃទៀត បានកំណត់ចំនួនអ្នកចូលរួមអតិបរមា ៥០នាក់។

មន្ត្រីនៅអគ្គនាយកដ្ឋានអាកាសចរណ៍ស៊ីវិលបាននិយាយថា ក្រុមហ៊ុន SpiceJet ត្រូវបានគេស្នើសុំឲ្យដាក់ពាក្យបណ្តឹងប្រឆាំងនឹងអ្នកដែលរំលោភគោលការណ៍ណែនាំសុវត្ថិភាព ហើយបុគ្គលិកទាក់ទងទាំងអស់ត្រូវផ្អាកការងារ។

មន្ត្រីដដែលនិយាយថា “យើងនឹងធ្វើការស៊ើបអង្កេតលម្អិត ហើយនឹងចាត់វិធានការបន្ថែមទៀត”។

អ្នកនាំពាក្យក្រុមហ៊ុន SpiceJet បាននិយាយថា យន្ដហោះនេះត្រូវបានជួល ដោយភ្នាក់ងារទេសចរណ៍មួយក្នុងទីក្រុង Madurai កាលពីថ្ងៃទី២៣ខែឧសភា សម្រាប់ការហោះហើរបន្ទាប់ពីរៀបអាពាហ៍ពិពាហ៍។ លោកលើកឡើងថា ក្រុមហ៊ុនអាកាសចរណ៍ កំពុងចាត់វិធានការចំពោះអ្នកទាំងឡាយណាដែលរំលោភច្បាប់សុវត្ថិភាព កូវីដ ។

ភ្នាក់ងារនិងភ្ញៀវ ត្រូវបានគេប្រាប់យ៉ាងល្អិតល្អន់អំពីបទដ្ឋានគម្លាតសង្គម និងសុវត្ថិភាព ដោយយោងតាមគោលការណ៍ណែនាំស្តីពីការការពារកូវីដ និងច្បាប់អាកាសចរណ៍ស៊ីវិល។

អ្នកនាំពាក្យបន្តថា “ទោះបីជាមានការស្នើសុំដដែលៗនិងការរំលឹកក៏ដោយ ក៏អ្នកដំណើរមិនបានគោរពតាមគោលការណ៍ណែនាំដែរ ហើយក្រុមហ៊ុនអាកាសចរណ៍កំពុងចាត់វិធានការសមស្របតាមច្បាប់”៕

ប្រែសម្រួលដោយ៖ Vann Vann

ប្រភព៖ CNN

ចុចអាន៖ និយតករអាកាសចរណ៍ស៊ីវិលឥណ្ឌា កំពុងស៊ើបអង្កេតវីដេអូឃ្លីបមួយ ដែលត្រូវបានគេចែកចាយពាសពេញបណ្តាញសង្គមដែលបង្ហាញពី

The post ខំគេចទៅរៀបការដល់លើអាកាសហើយ នៅមិនរួចខ្លួនទៀត appeared first on Kampuchea Thmey Daily.