រោងចក្រ Archives - Kampuchea Thmey Daily

មន្ត្រីជាន់ខ្ពស់ ជំរុញរោងចក្រលើកកម្ពស់សុវត្ថិភាព និងសុខភាពការងារ ដើម្បីកាត់បន្ថយគ្រោះថ្នាក់នៅកន្លែងធ្វើការ

អ៊ិន ពិសី — Mon, 08 Apr 2024 01:54:11 +0000

មន្ត្រីជាន់ខ្ពស់ នៃក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឱ្យរោងចក្រសហគ្រាស ចូលរួមលើកកម្ពស់សុវត្ថិភាព និងសុខភាពការងារ ដើម្បីកាត់បន្ថយគ្រោះថ្នាក់នៅកន្លែងធ្វើការកាន់តែប្រសើរបន្ថែមទៀត។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ កាលពីថ្ងៃទី ៧ មេសា នេះថា ការជំរុញឱ្យរោងចក្រចូលរួមលើកកម្ពស់សុវត្ថិភាព និងសុខភាពការងារ ដើម្បីកាត់បន្ថយគ្រោះថ្នាក់នៅកន្លែងធ្វើការនេះ ដោយសារតែបច្ចុប្បន្ន កម្មករ-និយោជិត នៅបន្តមានគ្រោះថ្នាក់ការងារនៅកន្លែងធ្វើការ និងជំងឺវិជ្ជាជីវៈជាបន្តបន្ទាប់។

លោក កត្តា អ៊ន បានបន្តថា ដើម្បីជាការក្រើនរំលឹកដល់វិញ្ញាណក្ខន្ធ កម្មករ-និយោជិត ដែលបានបាត់បង់ជីវិតដោយសារគ្រោះថ្នាក់ការងារ និងជំងឺវិជ្ជាជីវៈនៅកម្ពុជា ក៏ដូចជានៅលើពិភពលោក ក្រសួងការងារ នឹងប្រារព្ធទិវាពិភពលោក ដើម្បីសុវត្ថិភាព និងសុខភាពការងារ នៅថ្ងៃទី ២ ខែឧសភា ឆ្នាំ ២០២៤ ខាងមុខ ក្រោមប្រធានបទ“ផលប៉ះពាល់ នៃការប្រែប្រួលអាកាសធាតុលើផ្នែកសុវត្ថិភាព និងសុខភាពការងារ” ខណៈទិវានេះ ប្រារព្ធជាផ្លូវការ នាថ្ងៃទី ២៨ មេសា ជារៀងរាល់ឆ្នាំ ដោយប្រទេសជាសមាជិក នៃអង្គការអន្តរជាតិខាងការងារ។

លោកបានបន្តទៀតថា សម្រាប់ឆ្នាំ ២០២៤ នេះ ទិវាពិភពលោកដើម្បីសុវត្ថិភាព និងសុខភាពការងារ នឹងរៀបចំឡើងនៅក្រុមហ៊ុន ថូភេក អេឡិកទ្រិក ឯក ស្ថិតនៅភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ដោយមានការចូលរួមពីតំណាងស្ថាប័នពាក់ព័ន្ធ អង្គការអន្តរជាតិ ខាងការងារ គម្រោងរោងចក្រកាន់តែប្រសើរនៅកម្ពុជា អង្គការវិជ្ជាជីវៈ ម្ចាស់ ឬនាយកសហគ្រាស គ្រឹះស្ថាននានា និងកម្មករ-និយោជិត សរុបចំនួន ១ ៣០០ នាក់។

បើយោងតាមសេចក្ដីជូនដំណឹងរបស់ក្រសួងការងារ បានណែនាំដល់រោងចក្រសហគ្រាសថា ដើម្បីចូលរួមអបអរសាទរទិវាពិភពលោកនេះ និងរួមចំណែកក្នុងការផ្សព្វផ្សាយ ការលើកកម្ពស់ សុវត្ថិភាព និងសុខភាពការងារ ព្រមទាំងការបង្ការគ្រោះថ្នាក់ការងារ និងជំងឺវិជ្ជាជីវៈ ជាយថាហេតុដល់ កម្មករ-និយោជិត សូមលោក លោកស្រី ម្ចាស់ ឬនាយកសហគ្រាស គ្រឹះស្ថានទាំងអស់ រៀបចំចងបដាពាក្យស្លោកមួយចំនួននៅតាមរបងខាងមុខសហគ្រាស គ្រឹះស្ថានដូចជា ៖ ១.អបអរសាទរទិវាពិភពលោក ដើម្បីសុវត្ថិភាព និងសុខភាពការងារ ២៨ មេសា។ ២.ផលប៉ះពាល់ នៃការប្រែប្រួលអាកាសធាតុលើផ្នែកសុវត្ថិភាព និងសុខភាពការងារកម្ពុជា។ ៣.ធ្វើសកម្មភាពរួមគ្នា ដើម្បីកសាងវប្បធម៌សុវត្ថិភាព និងសុខភាពការងារជាវិជ្ជមាន។ ៤.ត្រូវរៀបចំឱ្យមានប្រព័ន្ធគ្រប់គ្រងសុវត្ថិភាព និងសុខភាពការងារនៅគ្រប់កន្លែងធ្វើការ។ ៥.មានសុវត្ថិភាពការងារ គឺ គ្មានគ្រោះថ្នាក់ការងារ។ ៦.ធានាឱ្យគ្រប់កន្លែងការងារនៅក្នុងព្រះរាជាណាចក្រកម្ពុជា មានសុវត្ថិភាពល្អ។ ៧.រួមគ្នាកាត់បន្ថយគ្រោះថ្នាក់ការងារ និងជំងឺវិជ្ជាជីវៈ។ ៨.ជីវិតរបស់ខ្ញុំ ការងាររបស់ខ្ញុំ និងការងារប្រកបដោយសុវត្ថិភាពរបស់ខ្ញុំ។ ៩.ការងារសមរម្យ គឺជាការងារប្រកបដោយសុវត្ថិភាព និង ១០.បរិយាកាសការងារ ប្រកបដោយសុវត្ថិភាព និងសុខភាពការងារ គឺជាសិទ្ធិ និងគោលការណ៍គ្រឹះ នៅកន្លែងធ្វើការ៕

អត្ថបទ ៖ សំអឿន

The post មន្ត្រីជាន់ខ្ពស់ ជំរុញរោងចក្រលើកកម្ពស់សុវត្ថិភាព និងសុខភាពការងារ ដើម្បីកាត់បន្ថយគ្រោះថ្នាក់នៅកន្លែងធ្វើការ appeared first on Kampuchea Thmey Daily.

កម្មកររោងចក្រ Y&W និងសហជីព ស្ញប់ស្ញែងរដ្ឋាភិបាលដែលបើកប្រាក់ឈ្នួល ទាំងថ្ងៃសៅរ៍-អាទិត្យ

អ៊ិន ពិសី — Mon, 25 Mar 2024 06:31:59 +0000

កម្មករ-និយោជិត នៃរោងចក្រ Y&W អរគុណរាជរដ្ឋាភិបាលដែលធ្វើការទាំងថ្ងៃសៅរ៍-អាទិត្យ ដើម្បីបើកប្រាក់ឈ្នួល និងប្រាក់អត្ថប្រយោជន៍ផ្សេងៗ ទៀត ជូនកម្មករ ខណៈសហជីពវាយតម្លៃខ្ពស់អំពីដំណោះស្រាយរបស់ក្រសួងការងារលើករណីរោងចក្រ Y&W នេះ។

កញ្ញា ឡាយ ថាវង្ស ដែលជាកម្មការិនី Y&W ថា «ខ្ញុំសូមអរគុណរាជរដ្ឋាភិបាល បើទោះបីថ្ងៃសៅរ៍-អាទិត្យ ក៏ដោយ ក៏នៅតែធ្វើការដើម្បីបើកប្រាក់ឈ្នួលជូនកម្មករទាំងអស់ផងដែរ។ ខ្ញុំសប្បាយចិត្តខ្លាំងណាស់នៅពេលដែលទទួលបានប្រាក់ឈ្នួលនៅពេលនេះ»។

លោក ធន ពន្លឺ ដែលជាកម្មករ នៃរោងចក្រ Y&W លើកឡើងដែរថា ខ្លួនសប្បាយចិត្តយ៉ាងខ្លាំងដែលទទួលបានប្រាក់ឈ្នួល និងប្រាក់អត្ថប្រយោជន៍ផ្សេងៗ ទៀត ពី រាជរដ្ឋាភិបាលកម្ពុជា ក៏ដូចជាក្រសួងការងារ។ លោកអរគុណរាជរដ្ឋាភិបាលដែលធ្វើការទាំងថ្ងៃសៅរ៍-អាទិត្យ ដើម្បីបើកប្រាក់ឈ្នួលឱ្យកម្មករ-និយោជិត នៃរោងចក្រ Y&W ទាំងអស់ ផងដែរ។

ដោយឡែក លោកស្រី ឱក ចន្ថា កម្មការិនី នៃរោងចក្រ Y&W ក៏បានកោតសរសើររាជរដ្ឋាភិបាល តាមរយៈក្រសួងការងារ និងបណ្ដុះបណ្ដាលវិជ្ជាជីវៈ ដែលដោះស្រាយករណីរោងចក្រ Y&W ហើយកម្មករ-និយោជិត ទាំងអស់ ទទួលបានការដោះស្រាយដ៏សមស្របមួយ។

លោកស្រី ថា «ខ្ញុំមិននឹងស្មានថាក្រសួងធ្វើការនៅថ្ងៃសៅរ៍-អាទិត្យ ដើម្បីបើកប្រាក់ឈ្នួលជូនកម្មករទេ។ ខ្ញុំពិតជាអរគុណខ្លាំងមែនទែន ដែលក្រសួងខិតខំធ្វើការដើម្បីបើកប្រាក់ឈ្នួលជូនកម្មករពួកខ្ញុំ។ ខ្ញុំសប្បាយចិត្តណាស់នៅពេលនេះ ខ្ញុំបានទាំងកូន និងសំណងផងដែរ ពីព្រោះខ្ញុំទើបសម្រាលកូនថ្មីៗ នេះ»។

ទន្ទឹមនឹងនេះ លោក ហ្វា សាលី ប្រធានសម្ព័ន្ធសហជីពជាតិ មើលឃើញថា ការបំពេញការងារទាំងថ្ងៃសៅរ៍-អាទិត្យ ទាំងយប់ ទាំងថ្ងៃ លើករណីរោងចក្រ Y&W ជាពិសេសអំឡុងពេលបើកប្រាក់ឈ្នួល និងប្រាក់អត្ថប្រយោជន៍ផ្សេងៗ ជូនកម្មករ នៅពេលនេះ បានបង្ហាញឱ្យឃើញពីការយកចិត្តទុកដាក់ពីសំណាក់រាជរដ្ឋាភិបាលលើសុខទុក្ខរបស់កម្មករ-និយោជិត។

គូសបញ្ជាក់ផងដែរថា ចាប់តាំងពីរសៀលថ្ងៃទី ២២ ខែមីនា ឆ្នាំ ២០២៤ មក ក្រសួងការងារ និងបណ្ដុះបណ្ដាលវិជ្ជាជីវៈ បានចាប់ផ្ដើមបើកប្រាក់ឈ្នួល និងប្រាក់បំណាច់ផ្សេងៗ ជូន កម្មករ-និយោជិត នៃក្រុមហ៊ុន Y & W នៅសាលាខណ្ឌដង្កោ។ ក្នុងនោះ គិតត្រឹមថ្ងៃទី ២៣ ខែមីនា ឆ្នាំ ២០២៤ នេះ មានកម្មករ-និយោជិត នៃរោងចក្រ Y&W សរុបចំនួន ៣ ៧២៤ នាក់ បានមកបើកប្រាក់ឈ្នួល និងប្រាក់អត្ថប្រយោជន៍ផ្សេងៗ ពីរាជរដ្ឋាភិបាល។

ដោយឡែក កម្មករ-និយោជិត ដែលមិនទាន់បានបើកប្រាក់ឈ្នួល និងប្រាក់បំណាច់មុខងារផ្សេងៗ អាចបន្តបើកនៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ ដោយផ្ទាល់ ចាប់ពីថ្ងៃទី ២៥ ខែមីនា ឆ្នាំ ២០២៤ ដោយភ្ជាប់មកជាមួយនឹងឯកសារតម្រូវដូចមានក្នុងសេចក្ដីណែនាំ៕

The post កម្មកររោងចក្រ Y&W និងសហជីព ស្ញប់ស្ញែងរដ្ឋាភិបាលដែលបើកប្រាក់ឈ្នួល ទាំងថ្ងៃសៅរ៍-អាទិត្យ appeared first on Kampuchea Thmey Daily.

កម្ពុជា លែងអនុញ្ញាតចំពោះសំណើអភិវឌ្ឍរោងចក្រផលិតអគ្គិសនីដុតធ្យូងថ្ម ទៀតហើយ

sopheak khoun — Thu, 30 Nov 2023 02:33:01 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា រាជរដ្ឋាភិបាលកម្ពុជា លែងអនុញ្ញាតចំពោះសំណើអភិវឌ្ឍរោងចក្រផលិតអគ្គិសនីដុតធ្យូងថ្ម និងពិនិត្យលទ្ធភាពដាក់ឲ្យរោងចក្រផលិតដុតធ្យូងថ្ម ដែលមានស្រាប់ បញ្ឈប់ដំណើរការមុនកំណត់នៅកម្ពុជា។

ការបញ្ជាក់នេះ ធ្វើឡើងក្នុងពិធីបិទស្ទឹង និងបើកការដ្ឋានសាងសង់ទំនប់វារីអគ្គីសនីស្ទឹងតាតៃលើ នៅស្រុកថ្មបាំង ខេត្តកោះកុង នាព្រឹកថ្ងៃទី ៣០ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងថា កាលពី ១ខែមុននេះ សម្ដេច បានប្រគល់ភារកិច្ចឲ្យក្រសួងរ៉ែ និងថាមពល ដឹកនាំសម្របសម្រួលការងារអន្តរកាលវិស័យថាមពល មួយចំនួន។ ទីមួយជំរុញការអនុវត្តការងរប្រសិទ្ធភាពថាមពល ស្របតាមគោលនយោបាយជាតិ ស្ដីពី ប្រសិទ្ធភាពថាមពលឆ្នាំ ២០២២-២០៣០ ដែលរាជរដ្ឋាភិបាលបានអនុវត្ត និងស្របទៅតាមផែនការសកម្មភាព ដែលបានគ្រោងទុក។

ទីពីរបញ្ឈប់ការអភិវឌ្ឍរោងចក្រផលិតអគ្គិសនីដុតធ្យូងថ្ម និងពិនិត្យលទ្ធភាពដាក់ឲ្យរោងចក្រផលិតដុតធ្យូងថ្ម ដែលមានស្រាប់បញ្ឈប់ដំណើរការមុនកំណត់នៅកម្ពុជា ដែលជាគោលដៅធំមួយ។ «ចឹងរាល់សំណើផ្សេងៗ ដែលសុំ សុំប្រកាសឲ្យហើយ ប្រសិនបើអ្នកណាមកចង់ធ្វើការវិនិយោគ ធ្វើរោងចក្រផលិតអគ្គិសនីដើរដោយធ្យូងថ្មនៅកម្ពុជា កុំមកនាំតែខាតលុយជិះយន្ដហោះមកទេ»។ នេះជាការគូសបញ្ជាក់បន្ថែមរបស់សម្ដេចធិបតី ហ៊ុន ម៉ាណែត។

សម្ដេចនាយករដ្ឋមន្ត្រី ក៏បានបញ្ជាក់បន្ថែមថា កន្លងមក រាជរដ្ឋាភិបាលកម្ពុជា ធ្លាប់បានបញ្ឈប់មិនឲ្យមានការអភិវឌ្ឍរោងចក្រផលិតអគ្គិសនីដុតធ្យូងថ្ម មួយចំនួនរួចមកហើយ៕

The post កម្ពុជា លែងអនុញ្ញាតចំពោះសំណើអភិវឌ្ឍរោងចក្រផលិតអគ្គិសនីដុតធ្យូងថ្ម ទៀតហើយ appeared first on Kampuchea Thmey Daily.

ក្រុមហ៊ុនចិនដែលបំពុលទឹកស្ទឹងសង្កែ ត្រូវប្ដូរទីតាំង និងរងពិន័យ ជាង ៤៦ម៉ឺនដុល្លារ

KC Virak — Sun, 13 Aug 2023 01:41:44 +0000

ក្រុមហ៊ុនចិនផលិតម្សៅដំឡូងមី សំបកគ្រាប់ថ្មាំ អេតាណុល ជីវគីមី និងសារធាតុបន្ថែមអាហារ ដែលបានបំពុលទឹកស្ទឹងសង្កែ នៅខេត្តបាត់ដំបង ត្រូវបានក្រសួងបរិស្ថានសម្រេចពិន័យជាទឹកប្រាក់ជាង ៤៦ម៉ឺនដុល្លារ និង ១៥០លានរៀល។

ការពិន័យនេះ ដោយសារតែក្រសួងពាក់ព័ន្ធរកឃើញថា ក្រុមហ៊ុននេះ បានធ្វើឱ្យបែកធ្លាយសំណល់រាវ ឬ ទឹកកខ្វក់ មានសារធាតុពុល ហូរចូលក្នុងស្ទឹងសង្កែ កាលពីដើមខែសីហានេះ ដែលធ្វើឱ្យទឹកស្ទឹងសង្កែប្រែជាព័ណ៍ខ្មៅ និងធ្វើឱ្យងាប់ត្រីមួយចំនួន។

ព័ត៌មានពិស្ដារ៖

The post ក្រុមហ៊ុនចិនដែលបំពុលទឹកស្ទឹងសង្កែ ត្រូវប្ដូរទីតាំង និងរងពិន័យ ជាង ៤៦ម៉ឺនដុល្លារ appeared first on Kampuchea Thmey Daily.

ក្រុមប្រឹក្សាជាតិប្រាក់ឈ្នួលអប្បបរមា នឹងបើកកិច្ចប្រជុំ ដើម្បីកំណត់ប្រាក់ឈ្នួលដល់កម្មករ សម្រាប់ឆ្នាំ២០២២

Sorn Phanith — Tue, 07 Sep 2021 06:40:51 +0000

ក្រុមប្រឹក្សាជាតិប្រាក់ឈ្នួលអប្បបរមា ដែលមានភាគី រដ្ឋាភិបាល ភាគីនិយោជកនិងភាគីសហជីព នឹងជួបប្រជុំគ្នាជាបន្តបន្ទាប់នៅក្នុងខែកញ្ញាឆ្នាំ២០២១នេះ ដើម្បីពិភាក្សាកំណត់ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០២២។

ថ្លែងក្នុងពិធីបើកកិច្ចប្រជុំក្រុមប្រឹក្សាជាតិប្រាក់ ឈ្នួលអប្បបរមា អាណត្តិទី២ ឆ្នាំទី១ លើកទី១ នាព្រឹកថ្ងៃទី៧កញ្ញា តាមប្រព័ន្ធអនឡាញ (Zoom) លោកបណ្ឌិត អ៉ិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង ជាប្រធានក្រុមប្រឹក្សាជាតិប្រាក់ឈ្នួលអប្បបរមា បានមានប្រសាសន៍ថា ការប្រជុំកំណត់ប្រាក់ឈ្នួលកម្មករអប្បបរមារបស់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២២ ធ្វើយ៉ាងណា ត្រូវបញ្ចប់មុនពិធីបុណ្យភ្ជុំបិណ្ឌខាងមុខ។

លោករដ្ឋមន្ត្រីបានបន្តថា ក្រុមប្រឹក្សាជាតិប្រាក់ឈ្នួលអប្បបរមា បានដើរតួនាទីជាយន្តការត្រីភាគី ក្នុងការកំណត់ប្រាក់ឈ្នួលអប្បបរមានៅកម្ពុជា ស្របតាមច្បាប់ស្តីពីប្រាក់ឈ្នួលអប្បបរមា និងទទួលបានការទទួលស្គាល់ដោយទូលំទូលាយពីគ្រប់ភាគីពាក់ព័ន្ធថា ជាយន្តការដ៏គំរូមួយប្រកបដោយតម្លាភាព និងមានការចូលរួមពីគ្រប់ភាគី ជាពិសេសការយកចិត្តទុកដាក់ខ្ពស់ក្នុងការលើកកម្ពស់សុខដុមរមនានៃទំនាក់ទំនងវិជ្ជាជីវៈ និងសុខុមាលភាពរបស់កម្មករនិយោជិត។

លោករដ្ឋមន្ត្រី បានបញ្ជាក់បន្ថែមថា ទោះបីជាយន្តការត្រីភាគីនេះ ទទួលបានវឌ្ឍនភាពជាទីមោទនៈនាពេលកន្លងមកក៏ដោយ រាជរដ្ឋាភិបាលកម្ពុជា នៅតែបន្តការយកចិត្តទុកដាក់ខ្ពស់ក្នុងការពង្រឹង និងកែលម្អយន្តការនេះជាប្រចាំដើម្បីឆ្លើយតបទៅនឹងស្ថានភាពសេដ្ឋកិច្ច និងសង្គមដែលមានការផ្លាស់ប្តូរយ៉ាងឆាប់រហ័ស។

យោងតាម អង្គការអន្តរជាតិខាងការងារ (ILO) ក្នុងរបាយការណ៍ស្តីពី “ប្រាក់ឈ្នួលនៅលើពិភពលោក ឆ្នាំ២០២០-២០២១” បានផ្តល់អនុសាសន៍ថា ៖ «ការកែសម្រួលប្រាក់ឈ្នួលទាមទារឲ្យមានការរក្សាតុល្យភាព និងធានាដល់ការរក្សាបានការងារ និងស្ថេរភាពរបស់រោងចក្រ សហគ្រាស និងរក្សាបាននូវប្រាក់ចំណូលសម្រាប់កម្មករនិយោជិត និងគ្រួសាររបស់ពួកគេ»។ ហេតុដូច្នេះ ការពិចារណាលើអនុសាសន៍របស់ ILO ជាការចាំបាច់ដើម្បីរក្សាការងាររបស់កម្មករ និងការបង្កើតឱកាសការងារដល់យុវជន ដែលដល់អាយុនឹងចូលទីផ្សារការងារ ពីព្រោះការបញ្ចប់វិបត្តិកូវីដ-១៩ នៅពេលអនាគតខាងមុខ មិនទាន់មានពន្លឺនៅឡើយ ស្របពេល មានការផ្ទុះឡើងជាបន្តបន្ទាប់នូវវីរុស បំប្លែងខ្លួនថ្មី ដែលនាំឲ្យមានហានិភ័យកាន់តែខ្ពស់ក្នុងការចម្លង។

គួររំលឹកថា ចាប់ពីឆ្នាំ២០១៩ យោងតាមច្បាប់ស្តីពីប្រាក់ឈ្នួលអប្បបរមា ក្រុមប្រឹក្សាជាតិប្រាក់ឈ្នួលអប្បបរមា(ក.ជ.ប.អ) ដែលជាយន្តការត្រីភាគី ដែលមានសំឡេងស្មើៗគ្នា ពីគ្រប់ភាគី (១៧-១៧-១៧) ត្រូវបានបង្កើតឡើង ស្របតាមច្បាប់ស្តីពីប្រាក់ឈ្នួលអប្បរបមា។ ជាលទ្ធផល កាលពីអាណត្តិទី១ ក.ជ.ប.អ បានរៀបចំកិច្ចប្រជុំចំនួន២០លើក នៅក្នុងឆ្នាំ២០១៩ និងចំនួន១១លើក នៅក្នុងឆ្នាំ២០២០ ដោយបានកំណត់ប្រាក់ឈ្នួលអប្បបរមា សម្រាប់ឆ្នាំ២០២០ ចំនួន១៩០ដុល្លារក្នុង១ខែខែ និងឆ្នាំ២០២១ ចំនួន ១៩២ដុល្លារក្នុង១ខែ។ប៉ុន្តែប្រសិនបើបូកនឹងប្រាក់ឧបត្ថម្ភផ្សេងៗបន្ថែម កម្មករនិយោជិតម្នាក់អាចទទួលបានប្រាក់ឈ្នួលចន្លោះពី២០៩ ទៅ ២២០ដុល្លារក្នុង១ខែ។

ទោះបីជាយ៉ាងណាក៏ដោយការ តំឡើងប្រាក់ឈ្នួលអប្បបរមាក្នុងឆ្នាំ២០២១ នៅកម្ពុជាធ្វើឡើងនៅពេលដែលសកលលោកកំពុងជួបវិបត្តិ នៃជំងឺកូវីដ-១៩ ខណៈប្រទេសក្នុងតំបន់ និងប្រទេសប្រកួតប្រជែងផ្សេងទៀតមិនមានការប្រែប្រួលប្រាក់ឈ្នួលអប្បបរមានោះទេ៕

អត្ថបទ៖ សំអឿន

The post ក្រុមប្រឹក្សាជាតិប្រាក់ឈ្នួលអប្បបរមា នឹងបើកកិច្ចប្រជុំ ដើម្បីកំណត់ប្រាក់ឈ្នួលដល់កម្មករ សម្រាប់ឆ្នាំ២០២២ appeared first on Kampuchea Thmey Daily.

រោងចក្រណាមានឆ្លងជំងឺកូវីដ១៩ ត្រូវផ្អាកសកម្មភាពអាជីវកម្មនិងផលិតកម្មរយៈពីរថ្ងៃជាបណ្ដោះអាសន្ន

Kang Tola — Fri, 07 May 2021 11:39:54 +0000

ភ្នំពេញ ៖ រោងចក្រសហគ្រាសណាដែលរកឃើញថា មានឆ្លងជំងឺកូវីដ១៩ អភិបាលគណៈអភិបាលរាជធានីខេត្តអាចផ្អាកសកម្មភាពអាជីវកម្មនិងផលិតកម្មជាបណ្ដោះអាសន្នរយៈពេលពីរថ្ងៃដើម្បីទប់ស្កាត់ការឆ្លងរាលដាជំងឺកូវីដ១៩។

យោងតាមសេចក្តីណែនាំរួមរបស់ក្រសួងការងារនិងក្រសួងសុខាភិបាលស្តីណែនាំស្តីពីលក្ខណៈវិនិច្ឆ័យក្នុងការផ្អាក និងបើកឡើងវិញនូវ សកម្មភាពអាជីវកម្ម ផលិតកម្មបានឲ្យដឹងថា ក្នុងករណីរកឃើញមានករណីវិជ្ជមានកូវីដ១៩ ក្នុងរោងចក្រសហគ្រាសណាមួយអភិបាលគណៈអភិបាលខេត្តអាចផ្អាកជាបណ្ដោះអាសន្នចំនួនពីរថ្ងៃនូវកម្មភាពអាជីវកម្មផលិតកម្មរបស់រោងចក្រសហគ្រាសនោះឬផ្នែកខ្លះនៃរោងចក្រឧស្សាហកម្មនោះដើម្បីអនុវត្តវិធានការសុខាភិបាលនឹងចាត់មន្ត្រីសុខាភិបាលចុះយកសំណាកនិងដើម្បីក្រុមការងារបច្ចេកទេសចម្រុះចុះពិនិត្យវាយតម្លៃអំពីកម្រិតហានិភ័យនិងកំណត់រយៈពេលនៃការផ្អាកសកម្មភាពអាជីវកម្មផលិតកម្មរបស់រោងចក្រសហគ្រាស។

យោងតាមសេចក្តីណែនាំរួមបានបន្តទៀតថា រោងចក្រសហគ្រាសអាចត្រូវបានផ្អាកសកម្មភាពអាជីវកម្មផលិតកម្មដោយវិធានការដ្ឋបាលរយៈពេល១៤ថ្ងៃឬតិចជាងនេះ អាស្រ័យនូវការវាយតម្លៃជាក់ស្ដែងរបស់ក្រុមការងារបច្ចេកទេសដូចជារោងចក្រនោះមានឆ្លងករណីវិជ្ជមានកូវីដ ១៩ មានអគារផលិតកម្ម ឬ ប្រតិបត្តិការតែមួយមានភាពតូចចង្អៀតគ្មានខ្យល់ចេញចូលគ្រប់គ្រាន់។

មានសភាពធ្ងន់ធ្ងរនិងស្មុគស្មាញនៃការឆ្លងជំងឺកូវីដ ១៩ក្នុងរោងចក្រសហគ្រាសដោយមិនអាចគ្រប់គ្រងនិងទប់ស្កាត់ការរាលដាលបន្តជាពិសេសមិនអាចដឹងអំពីប្រភពនៃការចម្លងនិងអាចញែកអ្នកដែលពាក់ព័ន្ធផ្ទាល់និងប្រយោល។ មិនមានប្រព័ន្ធថែរក្សានិងគ្រប់គ្រងអនាម័យសុវត្ថិភាពនិងសុខភាពរបស់កម្មករនិយោជិតមិនមានការបាញ់អាកុលលើដៃដងខ្លួន។ ខ្វះកន្លែងលាងដៃមិនមានសាប៊ូឬអាកុលគ្រប់គ្រាន់នៅតាមកន្លែងលាងសម្អាតដៃមិនមានការផ្ដល់ម៉ាសជូនកម្មករមិនមានការបាញ់ថ្នាំសម្លាប់មេរោគប្រចាំសប្ដាហ៍ក្នុងរោងចក្រនិងមានអាហារដ្ឋានតូចចង្អៀតមិនអាចចែកចេញជាវេនផ្សេងៗបានមានការដឹកជញ្ជូនកម្មករនិយោជិតចេញពីតំបន់ដែលកំពុងផ្ទុះកូវីដ១៩កន្លែងស្នាក់នៅរបស់កម្មករនៅជិតស្ថិតនៅតំបន់ដែលមានកំពុងហានិភ័យឬមានហានិភ័យខ្ពស់មិនមានគ្រូពេទ្យប្រចាំរោងចក្រឬមិនបានចាត់តាំងអ្នកគ្រប់គ្រងផ្នែកអនាម័យមិនផ្ដល់កិច្ចសហការជាមួយក្រុមការងារបច្ចេកទេស ឬ អាជ្ញាធរសមត្ថកិច្ចខកខានមិនបានធ្វើការកែតម្រូវតាមការស្នើសុំរបស់ក្រុមការងារបច្ចេកទេសនិងអាជ្ញាធរសមត្ថកិច្ចនិងភាពខ្វះចន្លោះនានាពាក់ព័ន្ធនឹងវិធានការអនាម័យសុវត្ថិភាពនិងសុខភាពការងារនៅក្នុងអំឡុងពេលដាក់ឲ្យផ្អាកសកម្មភាពអាជីវកម្មផលិតកម្មនាពីថ្ងៃដំបូង។

យោងតាមសេចក្តីណែនាំរួមបានបន្ថែមទៀតថា ចំពោះវិធានការបើកដំណើរការអាជីវកម្មផលិតកម្មឡើងវិញរោងចក្រនោះ ត្រូវតែបែងចែកកម្មករនិយោជិតចំនួន៥០ភាគរយនៃកម្មករនិយោជិតសរុបឲ្យធ្វើការឆ្លាស់វេនគ្នារៀងរាល់ពីរសប្ដាហ៍ម្ដងក្នុងរយៈពេលមួយខែដំបូងនៃការបើកដំណើរការឡើងវិញ ក្នុងនោះជ្រើសរើសកម្មករនិយោជិតដែលត្រូវចូលធ្វើការវេនទី១រយៈពេល២សប្តាហ៍ដំបូងត្រូវផ្ដល់អាទិភាពទៅលើកម្មករនិយោជិតដែលបានចាក់វ៉ាក់សាំងកូវីដ១៩ដូសទី២ ចាក់បាក់សាំងដូសទី១ កម្មករមិនបន្ដឋិតនៅក្នុងតំបន់ដែលតម្រូវផ្ដល់សំណាកដើម្បីវិភាគរកកូវីដ ១៩ឬបានផ្ដល់សំណាកដើម្បីវិភាគរកកូវីដ ១៩។

ចំពោះរោងចក្រផ្នែកវាយនភ័ណ្ឌកាត់ដេរនិងផលិតស្បែកជើងនិងផលិតផលធ្វើដំណើរនិងកាបូបអាចបើកដំណើរការឡើងវិញពេញលេញ១០០% ប្រសិនបើជារោងចក្រនោះមានកម្មករនិយោជិតបានចាក់វ៉ាក់សាំងកូវីដ១៩ បានដូសទី២យ៉ាងតិច៨០ភាគរយនៃចំនួនកម្មករនិយោជិតសរុបនិងបើសិនជារោងចក្រមានការអនុវត្តត្រឹមត្រូវតាមវិធានសុខាភិបាលវិធានសុខភាពការងារវិធានសុវត្ថិភាពនិងសុខភាពការងារនិងមានការផ្ដល់អាហារថ្ងៃត្រង់ឬសម្របសម្រួលឲ្យមានការលក់ម្ហូបអាហារប្រកបដោយអនាម័យនិងសុវត្ថិភាពនៅក្នុងបរិវេណរោងចក្រ។

ការដាក់ចេញវិធានការទាំងនេះធ្វើឡើងបន្ទាប់ពីរាជរដ្ឋាភិបាលបានអនុញ្ញាតឲ្យរោងចក្រសហគ្រាសក្រុមហ៊ុនដែលស្ថិតនៅតំបន់លឿងអាចបើកដំណើរឡើងវិញ ជាប្រក្រតីបានលើកលែងតែនៅតំបន់លឿងទុំនិងតំបន់ក្រហម។ ប៉ុន្តែទោះបីជារៀងចក្រនៅតំបន់លឿងតែកម្មករនៅតំបន់លឿងទុំ ឬ តំបន់ក្រហមក៏មិនអាចធ្វើដំណើរទៅធ្វើការនៅតំបន់លឿងទុំបានដែរ៕

ដោយ ៖ សំអឿន

The post រោងចក្រណាមានឆ្លងជំងឺកូវីដ១៩ ត្រូវផ្អាកសកម្មភាពអាជីវកម្មនិងផលិតកម្មរយៈពីរថ្ងៃជាបណ្ដោះអាសន្ន appeared first on Kampuchea Thmey Daily.

មុនបើកឡើងវិញថៅកែរោងចក្រទាំងអស់ ត្រូវត្រៀមលក្ខណៈឲ្យរួចរាល់ជាមុនសិនចៀសវាងបិទម្តងទៀត

Sorn Phanith — Thu, 06 May 2021 01:50:23 +0000

លោក ហេងសួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានណែនាំដល់ថៅកែរោងចក្រសហគ្រាស ដែលត្រូវបើកដំណើរការឡើងវិញ ត្រូវត្រៀមលក្ខណៈឲ្យរួចរាល់ជាមុនសិន ដើម្បីកុំឲ្យមានឆ្លងជំងឺកូវីដ១៩ ចៀសវាងផ្អាកដំណើរការផលិតកម្ម។

ថ្លែងតាមរយៈសារសំឡេងពាក់ព័ន្ធនឹងវិធានការសំខាន់ៗមួយចំនួននាយប់ថ្ងៃទី០៥ ខែឧសភា ឆ្នាំ២០២១នេះ លោក ហេងសួរបានបន្តថា«ខ្ញុំសូមរោងចក្រទាំងអស់ កុំធ្វើឲ្យការផ្តើមសកម្មភាពអាជីវកម្មឡើងវិញនេះ ទៅជាឱកាសធ្វើឲ្យមានការឆ្លងរាលដាលជំងឺកូវីដ-១៩ នៅក្នុងរោងចក្ររបស់ខ្លួន ហើយដែលនឹងនាំឲ្យមានការបិទរោងចក្រនោះឡើងវិញ ដោយរដ្ឋបាលរាជធានី ឬខេត្ត»។ លោកហេងសួរបានបានណែនាំដល់អ្នកគ្រប់គ្រងរោងចក្រ ត្រូវយកថ្ងៃទីទី១ ដែលត្រូវជាថ្ងៃទី៦ ខែឧសភានៃការផ្តើមដំណើរការរបស់ខ្លួនឡើងវិញនេះ ដើម្បីប្រជុំកំណត់ឈ្មោះ និងចំនួនកម្មករ ៥០% ដែលត្រូវធ្វើការវេនដំបូង ដែលមានរយៈពេល ២សប្តាហ៍ និង៥០%ទៀត ដែលត្រូវធ្វើក្នុងវេនបន្ទាប់ ដែលមានរយៈពេល២សប្តាហ៍ដូចគ្នា។ លោកបានបន្តទៀតថា«ខ្ញុំសូមរំឮកថាគ្រប់ម្ចាស់ម៉ាក និងអ្នកបញ្ជាទិញ ព្រមទាំងគម្រោងរោងចក្រកាន់តែប្រសើរនៅកម្ពុជាបានគាំទ្រការផ្តើមសង្វាក់ផលិតកម្មនៃរោងចក្រក្នុងវិស័យកាត់ដេរជាជំហានៗ ដោយផ្តើមចេញពី ៥០% នៃកម្លាំងកម្មករនិយោជិកសរុប និងឆ្លាស់វេនគ្នារៀងរាល់ពេល ២សប្តាហ៍»។

ទន្ទឹមនឹងនេះលោក ហេង សួរ បានណែនាំឲ្យត្រួតពិនិត្យលើស្ថានភាពអនាម័យ និងសុវត្ថិភាពនៃគ្រឿងម៉ាស៊ីនបម្រើឲ្យសង្វាក់ផលិតកម្មរបស់ខ្លួន និងប្រព័ន្ធបញ្ចេញបញ្ចូលចរន្តខ្យល់ក្នុងអាគារផលិតកម្ម។ វិធានអនាម័យ និងសុវត្ថិភាពការងារ ដូចជាផ្តល់ម៉ាសឲ្យកម្មករនិយោជិតយ៉ាងតិច១ ក្នុង១ថ្ងៃ ,ការបាញ់អាល់កុលពេលចូលនិងចេញពីការងារ, ការបន្ថែមម៉ាស៊ីនបាញ់អាល់កុលនៅក្នុងអាគារផលិតកម្ម, ការវាស់កម្ដៅ, សាប៊ូលាងដៃនៅក្នុងបន្ទប់ទឹក និងកន្លែងហូបបាយ។

ជាងនេះទៀត ត្រូវធ្វើការការបែងចែកវេនអាហារថ្ងៃត្រង់ និងលើកទឹកចិត្តឲ្យកម្មករនិយោជិតយកម្ហូបមកពីផ្ទះ។ ត្រៀមរំឭកកម្មករនិយោជិតឲ្យពាក់ម៉ាសជានិច្ចពេលជិះរថយន្ត និងពេលធ្វើការ ព្រមទាំងរក្សាឲ្យបាននូវ គោលការណ៍ ៣កុំ ៣ការពារ។ លោក ហេង សួរ បានណែនាំដល់អ្នកគ្រប់គ្រងរោងចក្រសហគ្រាសគួរពិនិត្យលើសេចក្ដីថ្លែងការរបស់គណៈកម្មការក្រុមប្រឹក្សាការងារនាថ្ងៃទី៤ ខែឧសភា ឆ្នាំ២០២១កន្លងទៅ។

គួរបញ្ជាក់ថា គិតត្រឹមចុងខែមេសាឆ្នាំ២០២១កន្លងទៅមានកម្មករកម្មការិនី ចំនួន១៦៧៣នាក់ក្នុងនោះនៅរាជធានីភ្នំពេញចំនួន១៥៩៨នាក់បានឆ្លងជំងឺកូវីដ១៩ នៅតាមរោងចក្រសហគ្រាសចំនួន២០៦រោងចក្រ។ ក្នុងចំណោមកម្មករឆ្លងទាំងនោះ មានឆ្លងនៅរាជធានីភ្នំពេញចំនួន១៣៤រោងចក្រ កណ្តាលចំនួន២៣រោងចក្រ តាកែវ២៣រោងចក្រ ព្រះសីហនុ១៦រោងចក្រ កំពង់ចាម១រោងចក្រនិងកំពង់ឆ្នាំង១រោងចក្រ។ ក្រៅពីនេះមានកម្មករកម្មការិនីជាង១៧០០០រោងចក្រកំពុងធ្វើចត្តាឡីស័កផងដែរ៕

អត្ថបទ៖ សំអឿន

សូមចុចអាន៖ ការិយាល័យសុខាភិបាលខណ្ឌច្បារអំពៅបញ្ជាក់ អ្នករើសអេតចាយម្នាក់នោះពុំមានផ្ទុកកូវីដ-១៩ទេ

The post មុនបើកឡើងវិញថៅកែរោងចក្រទាំងអស់ ត្រូវត្រៀមលក្ខណៈឲ្យរួចរាល់ជាមុនសិនចៀសវាងបិទម្តងទៀត appeared first on Kampuchea Thmey Daily.

រដ្ឋបាលខេត្តកំពង់ស្ពឺ សម្រេចបិទកម្មករ៣ក្រុម នៅរោងចក្រ ហ្វាស មេកឃីង ឯ.ក ដោយមានការឆ្លងនៃជំងឺកូវីដ-១៩

Sorn Phanith — Wed, 05 May 2021 06:48:23 +0000

រដ្ឋបាលខេត្តកំពង់ស្ពឺ បានចេញសេចក្តីសម្រេច ស្ដីពី ការផ្អាកក្រុមទី 8B 9B 10B ជាបណ្ដោះអាសន្ន នៃក្រុមហ៊ុន ហ្វាស មេកឃីង ឯ.ក (Fast Making) ស្ថិតនៅក្នុងភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ ដែលមានការឆ្លងរាលដាលនៃជំងឺកូវីដ-១៩។

ការសម្រេច បិទក្រុមទាំង៣ នៃរោងចក្រ Fast Making ធ្វើឡើងនៅថ្ងៃទី០៥ ខែមេសា ឆ្នាំ២០២១ ដោយមានពាក់ព័ន្ធការឆ្លងរាលដាល នៃជំងឺកូវីដ-១៩ ក្នុងសហគមន៍។

អាជ្ញាធរខេត្តកំពង់ស្ពឺ បានតម្រូវឲ្យកម្មករកម្មការនី ដែលធ្វើការក្នុងក្រុម8B,9B, និង10B ត្រូវចូលរួមសហការជាមួយមន្ត្រីសុខាភិបាល ដើម្បីយកសំណាករកមេរោគកូវីដ-១៩ ព្រមទាំងធ្វើចត្តាឡីស័កឲ្យបានត្រឹមត្រូវ តាមវិធានការរបស់ក្រសួងសុខាភិបាល។ ចំពោះនយោជក នៃក្រុមហ៊ុន ត្រូវចូលរួមជាមួយអាជ្ញាធរក្នុងការទប់ស្កាត់ ស្រាវជ្រាវ និងរុករកអ្នកប៉ះពាល់ផ្សេងៗទៀតដើម្បីយកសំណាក។ ក្នុងករណីបងប្អូនខកខានមកផ្តល់សំណាកតាមការកំណត់ទេ អាចទៅផ្តល់សំណាកនៅមន្ទីរពេទ្យបង្អែក ដែលនៅក្បែរផ្ទះបំផុត។

រដ្ឋបាលខេត្តកំពង់ស្ពឺ ក៏ដាក់កំហិតថា ក្នុងករណីបងប្អូនកម្មករ កម្មការនី និងនិយោជកមិនចូលរួមអនុវត្តតាមសេចក្តីសម្រេចនេះទេ នឹងត្រូវមានទោសទណ្ឌដូចមានក្នុងច្បាប់ ស្តីពីវិធានការទប់ស្កាត់ការរីករាលដាលជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀត៕

អត្ថបទ៖ ភួង រដ្ឋា

សូមចុចអាន៖ ស្នងការរងនគរបាលខេត្តម្នាក់ ស្លាប់ដោយសារកូវីដ ១៩

The post រដ្ឋបាលខេត្តកំពង់ស្ពឺ សម្រេចបិទកម្មករ៣ក្រុម នៅរោងចក្រ ហ្វាស មេកឃីង ឯ.ក ដោយមានការឆ្លងនៃជំងឺកូវីដ-១៩ appeared first on Kampuchea Thmey Daily.

រោងចក្រ Archives - Kampuchea Thmey Daily

កម្មកររោងចក្រ Y&W និងសហជីព ស្ញប់ស្ញែងរដ្ឋាភិបាលដែលបើក​ប្រាក់ឈ្នួល ទាំងថ្ងៃសៅរ៍-អាទិត្យ

កម្ពុជា លែងអនុញ្ញាតចំពោះសំណើអភិវឌ្ឍរោងចក្រផលិតអគ្គិសនីដុតធ្យូងថ្ម ទៀតហើយ

ក្រុមហ៊ុនចិនដែលបំពុលទឹកស្ទឹងសង្កែ ត្រូវប្ដូរទីតាំង និងរងពិន័យ ជាង ៤៦ម៉ឺនដុល្លារ

មុន​បើក​ឡើងវិញ​ថៅកែ​រោងចក្រ​ទាំងអស់ ​ត្រូវ​ត្រៀមលក្ខណៈ​ឲ្យ​រួចរាល់​ជា​មុន​សិន​ចៀសវាង​បិទ​ម្តងទៀត

កម្មកររោងចក្រ Y&W និងសហជីព ស្ញប់ស្ញែងរដ្ឋាភិបាលដែលបើកប្រាក់ឈ្នួល ទាំងថ្ងៃសៅរ៍-អាទិត្យ

មុនបើកឡើងវិញថៅកែរោងចក្រទាំងអស់ ត្រូវត្រៀមលក្ខណៈឲ្យរួចរាល់ជាមុនសិនចៀសវាងបិទម្តងទៀត