លោកជំទាវ ម៉ែន សំអន Archives - Kampuchea Thmey Daily

សម្តេច ម៉ែន សំអន សំណេះសំណាលជាមួយក្រុមសម្តែងហាត់សម ត្រៀមក្នុងពិធីបិទព្រឹត្តិការណ៍ស៊ីហ្គេមលើកទី៣២

Ken Malis — Mon, 15 May 2023 06:53:19 +0000

នៅក្នុងឱកាសទិវាអ្នកម្តាយ កាលពីរសៀលថ្ងៃអាទិត្យ ម្សិលមិញ សម្តេច ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជួបសំណេះសំណាលជាមួយក្រុមសម្តែងដែលកំពុងហាត់សម ត្រៀមក្នុងពិធីបិទព្រឹត្តិការណ៍ស៊ីហ្គេមលើកទី៣២ នៅពហុកីឡដ្ឋានជាតិមរតកតេជោ។

នៅក្នុងឱកាសនោះ សម្តេច ម៉ែន សំអន បានសម្តែងការនឹករលឹក និងអរគុណដល់ក្រុមសំដែងទាំងអស់ដែលបាននឹងកំពុងហាត់សម និងបានផ្តាំផ្ញើឲ្យក្រុមសម្តែងទាំងអស់ ត្រូវយកចិត្តទុក្ខដាក់ខ្ពស់ក្នុងការហ្វឹកហាត់ ដើម្បីត្រៀមបញ្ចេញឲ្យអស់ពីសមត្ថភាព នៅថ្ងៃបិទព្រឹត្តិការណ៍ស៊ីហ្គេមលើកទី៣២ នាពេលខាងមុខនេះ ។

ពិធីបិទព្រឹត្តិការណ៍ស៊ីហ្គេមលើកទី៣២ នឹងប្រព្រឹត្តទៅនៅថ្ងៃទី ១៧ ខែឧសភា ឆ្នាំ២០២៣ នៅពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន៕

The post សម្តេច ម៉ែន សំអន សំណេះសំណាលជាមួយក្រុមសម្តែងហាត់សម ត្រៀមក្នុងពិធីបិទព្រឹត្តិការណ៍ស៊ីហ្គេមលើកទី៣២ appeared first on Kampuchea Thmey Daily.

លោកជំទាវ ម៉ែន សំអន បួងសួងដល់ទេវតាឆ្នាំថ្មី ជួយថែរក្សាថ្នាក់ដឹកនាំប្រទេស ក៏ដូចពលរដ្ឋទាំងអស់ ទទួលបានសេចក្ដីសុខ នាឱកាសបុណ្យចូលឆ្នាំថ្មីនេះ

អ៊ិន ពិសី — Sat, 08 Apr 2023 02:39:12 +0000

លោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានធ្វើការបួងសួងដល់ទេវតាឆ្នាំថ្មីជួយថែរក្សាថ្នាក់ដឹកនាំប្រទេស មន្ត្រីរាជការកងកម្លាំងប្រដាប់អាវុធ ក៏ដូចពលរដ្ឋទាំងអស់ទទួលបានសេចក្តីសុខនាឱកាសបុណ្យចូលឆ្នាំថ្មីនេះ។

លោកជំទាវកិត្តិសង្គហបណ្ឌិត ម៉ែន សំអន បួងសួងបែបនេះ ខណៈអញ្ជើញជាអធិបតីក្នុងពិធីសូត្រមន្ត ប្រោះព្រំលើករាសី ទទួលអំណរសាទរទេវតាឆ្នាំថ្មី ឆ្នាំថោះ ដែលនឹងឈានមកដល់ នៅថ្ងៃសុក្រ ៩ រោច ខែចេត្រ ឆ្នាំថោះ បញ្ចស័ក ព.ស. ២៥៦៦ ត្រូវនឹងថ្ងៃទី ១៤ ខែមេសា ឆ្នាំ ២០២៣ នាពេលខាងមុខនេះ នាស្នាក់ការកណ្ដាលគណបក្សប្រជាជនកម្ពុជា (វិមាន៧មករា) កាលពីរសៀល ថ្ងៃសុក្រ ១ រោច ខែផល្គុន ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ៧ ខែមេសា ឆ្នាំ ២០២៣។

ពិធីនេះផងដែរបានរៀបចំឡើងតាមបែបប្រពៃណីព្រះពុទ្ធសាសនា គឺក្នុងគោលបំណងសុំពរជ័យ សិរីសួស្ដីគ្រប់ប្រការពីទេវតាឆ្នាំថ្មី និង សុំជួយដល់ សម្តេច ឯកឧត្តម លោកជំទាវ អ្នកឧកញ៉ា ឧកញ៉ា អស់លោក លោកស្រី ថ្នាក់ដឹកនាំមន្ទីរ អង្គភាព មន្ត្រីរាជការ និងប្រជាពលរដ្ឋខ្មែរនៅទូទាំងប្រទេស ជួបតែសេចក្តីសុខចម្រើន ទទួលបានជោគជ័យបន្ថែមទៀតគ្រប់ភារកិច្ចរបស់ខ្លួន៕

អត្ថបទ ៖ វិមាន

The post លោកជំទាវ ម៉ែន សំអន បួងសួងដល់ទេវតាឆ្នាំថ្មី ជួយថែរក្សាថ្នាក់ដឹកនាំប្រទេស ក៏ដូចពលរដ្ឋទាំងអស់ ទទួលបានសេចក្ដីសុខ នាឱកាសបុណ្យចូលឆ្នាំថ្មីនេះ appeared first on Kampuchea Thmey Daily.

លោកជំទាវ ម៉ែន សំអន ៖ ក្រោយបញ្ចប់ការជួសជុលកំណាត់ផ្លូវជាតិលេខ ៧៣ និងផ្លូវខេត្តលេខ ៣៧៧ និង ៣៧៧A នេះ នឹងផ្ដល់អត្ថប្រយោជន៍យ៉ាងច្រើនដល់ពលរដ្ឋ

អ៊ិន ពិសី — Tue, 04 Apr 2023 04:06:46 +0000

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា ក្រោយការជួសជុលថែទាំត្រូវបានបញ្ចប់ កំណាត់ផ្លូវជាតិលេខ ៧៣ ,ផ្លូវខេត្តលេខ ៣៧៧ និង ៣៧៧A នេះ នឹងផ្ដល់អត្ថប្រយោជន៍យ៉ាងច្រើនដល់ប្រជាពលរដ្ឋរស់នៅភូមិសាស្ត្រខេត្តក្រចេះ ក៏ដូចជាបងប្អូនប្រជាពលរដ្ឋ ដែលធ្វើដំណើរឆ្លងកាត់ទាំងការធ្វើដំណើរទៅមកប្រចាំថ្ងៃផងដែរ។

លោកជំទាវកិត្តិសង្គហបណ្ឌិត ម៉ែន សំអន ថ្លែងបែបនេះក្នុងពេលអញ្ជើញជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីបើកការដ្ឋានគម្រោងលើកកម្រិត និងជួសជុលថែទាំកំណាត់ផ្លូវជាតិលេខ ៧៣ ,ផ្លូវខេត្តលេខ ៣៧៧ និង ៣៧៧A ក្រោមឥណទានសម្បទានរបស់ធនាគារពិភពលោក ដែលបានរៀបចំពិធីនៅក្នុងវត្តសណ្តាន់ ស្រុកសំបូរ ខេត្តក្រចេះ នាព្រឹកថ្ងៃអង្គារ ១៤ កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ០៤ ខែមេសា ឆ្នាំ ២០២៣។

លោកជំទាវកិត្តិសង្គហបណ្ឌិត ក៏បានមានប្រសាសន៍ថា គម្រោងលើកកម្រិត និងជួសជុលថែទាំខ្សែផ្លូវទាំង ៣ នេះ គឺជាចំណងដៃថ្មីបន្ថែមទៀតសម្រាប់ប្រជាពលរដ្ឋរស់នៅខេត្តក្រចេះ បន្ទាប់ពីការ ប្រកាសបើកការដ្ឋានគម្រោងសាងសង់ស្ពានឆ្លងកាត់ទន្លេមេគង្គ ខេត្តក្រចេះ និងផ្លូវតភ្ជាប់កាលពីដើមឆ្នាំ ២០២៣ នេះ ក្រោមអធិបតីភាពដ៏ខ្ពង់ខ្ពស់របស់ សម្ដេចតេជោនាយករដ្ឋមន្ត្រី ដែលក្នុងឱកាសនោះ សម្ដេចតេជោ ក៏បានប្រកាសសន្យាអំពីការត្រៀមបើកការដ្ឋានខ្សែផ្លូវទាំង ៣ នេះ ឲ្យបានឆាប់ ដើម្បីបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋនាពេលខាងមុខផងដែរ។

យោងតាមរបាយការណ៍របស់ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ បានឲ្យដឹងថា ការលើកកម្រិត និងជួសជុលថែទាំកំណាត់ផ្លូវជាតិទាំង ៣ ខ្សែនេះ ស្ថិតនៅក្នុងភូមិសាស្ត្រខេត្តក្រចេះ ប្រវែងសរុប ៩៨,៤ គ.ម ដែលគ្រោងប្រើថវិកាសរុបប្រមាណជាង ៤០ លានដុល្លារអាមេរិក ក្រោមឥណទានសម្បទានរបស់ធនាគារពិភពលោក ដោយប្រើប្រាស់រយៈពេលសាងសង់ចំនួន ១៨ ខែ។

កំណាត់ផ្លូវជាតិលេខ ៧៣ ៖ មានប្រវែង ៤៩,៨១ គីឡូម៉ែត្រ ស្ថិតក្នុងភូមិសាស្ត្រខេត្តត្បូងឃ្មុំ ចាប់ផ្ដើមពីគីឡូម៉ែត្រលេខ(០+០០) ផ្លូវបំបែកប្រធាតុ ភូមិប្រធាតុ ឃុំស្រឡប់ ស្រុកត្បូងឃ្មុំ ទៅដល់ស្ពានកំពង់រាំង ឃុំសេដា ស្រុកតំបែរ (ព្រំប្រទល់ខេត្តក្រចេះ) គីឡូម៉ែត្រលេខ(៤៩+៨១២) នឹងត្រូវស្ដារពង្រីក និងលើកកម្រិតគុណភាពជាប្រភេទផ្លូវ ក្រាលកៅស៊ូAC កម្រាស់ ៥ សង់ទីម៉ែត្រ និងក្រាលបេតុងសរសៃដែក កម្រាស់ ២០ សង់ទីម៉ែត្រ មានទទឹង ១០ ម៉ែត្រ និង ១៣ ម៉ែត្រ (សម្រាប់ផ្លូវ ២ គន្លង) និងទទឹង ១៥,៧ ម៉ែត្រ និង ១៦ ម៉ែត្រ (សម្រាប់ផ្លូវ ៤ គន្លង នៅក្នុងទីប្រជុំជន)។ ចំណែកឯ ផ្លូវខេត្តលេខ ៣៧៧ និង ៣៧៧A ៖ មានប្រវែងសរុប ៤៨,៦ គីឡូម៉ែត្រ ក្នុងនោះ ផ្លូវខេត្តលេខ ៣៧៧ មានប្រវែង ៣៥ គីឡូម៉ែត្រ ចាប់ពីរង្វង់មូលព្រាប ស (ក្រុងក្រចេះ) ដល់ ស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦ គីឡូម៉ែត្រ ចាប់ពីផ្សារសណ្ដាន់ ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។ ផ្លូវខេត្តទាំង ២ ខ្សែនេះ នឹងត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលកៅស៊ូ AC កម្រាស់ ៥ សង់ទីម៉ែត្រ និងក្រាលបេតុងសរសៃដែក កម្រាស់ ២០ សង់ទីម៉ែត្រ មានទទឹងចាប់ពី ៧ ម៉ែត្រ ដល់ ១១ ម៉ែត្រ មាន ២ គន្លងទៅមក ព្រមទាំងការសាងសង់ស្ពានថ្មីចំនួន ៩ កន្លែង ប្រវែងសរុប ៤១៣ ម៉ែត្រ (នៅលើផ្លូវខេត្តលេខ ៣៧៧)។

គម្រោងនេះ នឹងរួមបញ្ចូលនូវការដាក់លូគ្រប់ប្រភេទ ព្រមទាំងការបំពាក់ស្លាកសញ្ញា គំនូសសញ្ញា បង្គោលគីឡូម៉ែត្រ និងបង្គោលសុវត្ថិភាពទៅតាមបទដ្ឋានបច្ចេកទេសផ្លូវថ្នល់ផងដែរ។

លោកជំទាវកិត្តិសង្គហបណ្ឌិត សង្ឃឹមយ៉ាងមុតមាំថា ក្រោយការលើកកម្រិត និងជួសជុលថែទាំត្រូវបានបញ្ចប់ កំណាត់ផ្លូវជាតិលេខ ៧៣ និងផ្លូវខេត្តលេខ ៣៧៧ និង ៣៧៧A នេះ នឹងផ្ដល់អត្ថប្រយោជន៍យ៉ាងច្រើនដល់ប្រជាពលរដ្ឋរស់នៅភូមិសាស្ត្រខេត្តក្រចេះ ក៏ដូចជាប្រជាពលរដ្ឋ ដែលធ្វើដំណើរឆ្លងកាត់ទាំងការធ្វើដំណើរទៅមកប្រចាំថ្ងៃផង និងទាំងការដឹកជញ្ជូនទំនិញ កសិផលផ្សេងៗផង ជាពិសេសភ្ញៀវទេសចរដែលធ្វើដំណើរមកកម្សាន្តនៅតំបន់រមណីយដ្ឋាននានា ក្នុងទឹកដីខេត្តក្រចេះ និងខេត្តជាប់ព្រំប្រទល់គ្នា។ ខ្សែផ្លូវទាំង ៣ នេះ ក៏មានការតភ្ជាប់ប្រទាក់ក្រឡាគ្នាជាមួយផ្លូវជាតិ ផ្លូវខេត្ត តំបន់ទីប្រជុំជនសំខាន់ៗ និងតំបន់ដាច់ស្រយាលផងដែរ៕

អត្ថបទ ៖ វិមាន

The post លោកជំទាវ ម៉ែន សំអន ៖ ក្រោយបញ្ចប់ការជួសជុលកំណាត់ផ្លូវជាតិលេខ ៧៣ និងផ្លូវខេត្តលេខ ៣៧៧ និង ៣៧៧A នេះ នឹងផ្ដល់អត្ថប្រយោជន៍យ៉ាងច្រើនដល់ពលរដ្ឋ appeared first on Kampuchea Thmey Daily.

ផ្លូវកៅស៊ូចំនួន ៣ ខ្សែ ប្រវែងជិត ១០០ គីឡូម៉ែត្រ បើកការដ្ឋានសាងសង់នៅខេត្តក្រចេះ

Dy Bunnara — Tue, 04 Apr 2023 03:10:23 +0000

កំណាត់ផ្លូវចំនួន ៣ ខ្សែ ប្រវែងជាង ៩៨គ.ម នៅក្នុងខេត្តក្រចេះបានបើកការដ្ឋានសាងសង់នៅព្រឹកមិញនេះ ដែលរំពឹងថានឹងចូលរួមលើកកម្ពស់ការតភ្ជាប់ប្រទាក់ក្រឡា ជាមួយបណ្តាញផ្លូវជាតិសំខាន់ៗ ឆ្ពោះទៅរាជធានីនិងតំបន់ព្រំដែន។

គម្រោងលើកកម្រិតគុណភាព និងជួសជុលថែទាំកំណាត់ផ្លូវទាំង ៣ ខ្សែ ដែលប្រកាសបើកការដ្ឋាននាព្រឹកមិញនេះ ក្នុងនោះរួមមាន៖ កំណាត់ផ្លូវជាតិលេខ៧៣ ប្រវែង ៤៩,៨១គីឡូម៉ែត្រ ចាប់ពីផ្លូវបំបែកប្រធាតុ ភូមិប្រធាតុ ឃុំស្រឡប់ ស្រុកត្បូងឃ្មុំ ទៅដល់ស្ពានកំពង់រាំង ឃុំសេដា ស្រុកតំបែរ (ព្រំប្រទល់ខេត្តក្រចេះ) ដែលនឹងត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលកៅស៊ូAC កម្រាស់ ៥ សង់ទីម៉ែត្រ និងក្រាលបេតុងសរសៃដែកកម្រាស់២០សង់ទីម៉ែត្រ ទទឹង ១០-១៣ម៉ែត្រ (សម្រាប់ផ្លូវ ២គន្លង) និងទទឹង១៥,៧-១៦ម៉ែត្រ (សម្រាប់ផ្លូវ ៤ គន្លង ក្នុងទីប្រជុំជន)។

ចំណែកឯផ្លូវខេត្តលេខ ៣៧៧ និង ៣៧៧A មានប្រវែងសរុប ៤៨,៦គីឡូម៉ែត្រ ក្នុងនោះផ្លូវខេត្តលេខ ៣៧៧ មានប្រវែង ៣៥គីឡូម៉ែត្រ ចាប់ពីរង្វង់មូលព្រាប ស (ក្រុងក្រចេះ) ដល់ស្រុកសំបូរ និងផ្លូវខេត្តលេខ៣៧៧A មានប្រវែង ១៣,៦គីឡូម៉ែត្រ ចាប់ពីផ្សារសណ្តាន់ឃុំសណ្តាន់ ដល់ភូមិសង្គម ឃុំសណ្តាន់ នៃស្រុកសំបូរ។ ផ្លូវខេត្តទាំង ២ ខ្សែនេះ នឹងត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលបេតុងកៅស៊ូ(AC) កម្រាស់៥សង់ទីម៉ែត្រ និងក្រាលបេតុងសរសៃដែកកម្រាស់ ២០សង់ទីម៉ែត្រ មានទទឹងចាប់ពី ៧-១១ម៉ែត្រ មាន ២ គន្លងទៅមក ព្រមទាំងការសាងសង់ស្ពានថ្មីចំនួន ៩កន្លែង (នៅលើផ្លូវខេត្តលេខ៣៧៧)។

របាយការណ៍ពីក្រសួងសាធារណការនិងដឹកជញ្ជូនបានលើកពីសារសំខាន់នៃកំណាត់ផ្លូវទាំង ៣ ខ្សែនេះ ជាខ្សែផ្លូវសេដ្ឋកិច្ចដ៏មានសារៈសំខាន់ ដែលបានតភ្ជាប់ជាមួយបណ្តាញផ្លូវជាតិសំខាន់ផ្សេងៗឆ្ពោះទៅកាន់រាជធានី និងខេត្តភាគឦសាន និងទៅកាន់ទីប្រជុំជន តំបន់សេដ្ឋកិច្ច និងតំបន់ព្រំដែនរបស់កម្ពុជា។

ការលើកកម្រិតគុណភាព និងជួសជុលថែទាំកំណាត់ផ្លូវទាំង ៣ ខ្សែនេះ ដើម្បីឆ្លើយតបទៅនឹងស្ថានភាពទ្រុឌទ្រោម និងខូចខាតរបស់ខ្សែផ្លូវ ជាពិសេសការប្រឈមនឹងគ្រោះទឹកជំនន់ ដែលបង្កឡើងនៅរៀងរាល់រដូវវស្សា។ កំណាត់ផ្លូវទាំង៣ខ្សែនេះ ជាខ្សែផ្លូវសេដ្ឋកិច្ចដ៏មានសារៈសំខាន់ ដែលបានតភ្ជាប់ជាមួយបណ្តាញផ្លូវជាតិសំខាន់ផ្សេងៗ ឆ្ពោះទៅកាន់រាជធានី និងខេត្តភាគឦសាន និងទៅកាន់ទីប្រជុំជន តំបន់សេដ្ឋកិច្ច និងតំបន់ព្រំដែនរបស់កម្ពុជាយើង។ បើពិនិត្យទៅលើក្របខ័ណ្ឌនៃការតភ្ជាប់ប្រទាក់ក្រឡាវិញ ផ្លូវខេត្តលេខ៣៧៧ និង៣៧៧A គឺតភ្ជាប់ពីទីប្រជុំជនក្នុងខេត្តក្រចេះ(ពីរង្វង់មូលព្រាបស) ឆ្ពោះទៅកាន់តំបន់ទេសចរណ៍ធម្មជាតិព្រែកកាំពី និងទេសចរណ៍ប្រវត្តិសាស្រ្តវិហារសសរ១០០ និងតភ្ជាប់ទៅកាន់ផ្លូវជាតិលេខ៧ ឆ្ពោះទៅខេត្តស្ទឹងត្រែង រតនគិរី និងមណ្ឌលគិរី។

ការបើកការដ្ឋានលើកកម្រិតគុណភាព និងជួសជុលថែទាំកំណាត់ផ្លូវទាំង ៣ខ្សែនៅខេត្តក្រចេះ ដែលធ្វើឡើងនៅព្រឹកមិញនេះ ក្រោមវត្តមានលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូនធ្វើ រួមទាំង លោកស្រី Maryam Salim ប្រធានគ្រប់គ្រងធនាគារពិភពលោក(World Bank) ប្រចាំកម្ពុជា។

កំណាត់ផ្លូវជាតិលេខ៧៣ ត្រូវសាងសង់ដោយក្រុមហ៊ុន Nimmeng-Proco Joint Venture ដោយឡែកផ្លូវខេត្តលេខ ៣៧៧ និង ៣៧៧A សាងសង់ដោយក្រុមហ៊ុន Poly Changda Engineering Co., Ltd គ្រោងចំណាយរយៈពេលសាងសង់ចំនួន ១៨ ខែ និងរយៈពេលថែទាំចំនួន ៦០ខែ ដោយចំណាយថវិកាសាងសង់សរុបប្រមាណ ៤០ លានដុល្លារអាមេរិក ក្រោមក្របខ័ណ្ឌឥណទានសម្បទានរបស់ធនាគារពិភពលោក ក្នុងនោះរួមបញ្ចូលទាំងការងារបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗផងដែរ៕

The post ផ្លូវកៅស៊ូចំនួន ៣ ខ្សែ ប្រវែងជិត ១០០ គីឡូម៉ែត្រ បើកការដ្ឋានសាងសង់នៅខេត្តក្រចេះ appeared first on Kampuchea Thmey Daily.

លោកជំទាវ ម៉ែន សំអន បួងសួងសូមទេវតាឆ្នាំថ្មីជួយនាំនូវសេចក្តីសុខសប្បាយ ចូលមានដល់ប្រមុខដឹកនាំប្រទេស និងពលរដ្ឋទាំងអស់ នាឱកាសបុណ្យចូលឆ្នាំថ្មីប្រពៃណីជាតិខ្មែរ

អ៊ិន ពិសី — Mon, 03 Apr 2023 04:28:45 +0000

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានបួងសួងសូមទេវតាឆ្នាំថ្មីជួយនាំនូវសេចក្តីសុខសប្បាយចូលមានដល់ប្រមុខដឹកនាំប្រទេស និងពលរដ្ឋទាំងអស់ នាឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងមកដល់ក្នុងពេលឆាប់ៗខាងមុខនេះ។

លោកជំទាវកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈអញ្ជើញអុជធូប និងបួងសួងសុំសេចក្តីសុខ សេចក្តីចម្រើនជូនប្រទេសជាតិ នៅខេត្តសៀមរាប កាលពីថ្ងៃអាទិត្យ ១២ កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ២ ខែមេសា ឆ្នាំ ២០២៣។

កម្មវិធីបួងសួងរួមមាន ៖

១.ពិធីអុជធូប ថ្វាយផ្កានៅព្រះអង្គចេកព្រះអង្គចម (មុខព្រះរាជដំណាក់)។

២.បួងសួងនៅមុខរូបសំណាកមេទ័ពទាំង ១២។

៣.ថ្វាយគ្រឿងសក្ការៈ លោកយាយទេព។

៤.ថ្វាយគ្រឿងសក្ការៈ ព្រះឥន្ទ្រកោសីយ៍។

ពិធីនោះផងដែរ ក៏មានវត្តមាន លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ, លោកជំទាវ ហង់ ភារី អ៊ឹម សិទ្ធី, ឯកឧត្ដម អ៊ាន ឃុន ប្រធានក្រុមប្រឹក្សាខេត្តសៀមរាប ឯកឧត្ដម ទៀ សីហា គណៈអភិបាល នៃអភិបាលខេត្តសៀមរាប និងលោកជំទាវ, និង មន្ត្រីរាជការអង្គភាពជុំវិញខេត្ត។

លោកជំទាវកិត្តិសង្គហបណ្ឌិត ម៉ែន សំអន បានបួងសួងថ្វាយព្រះពរជ័យថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃគ្រប់ព្រះអង្គ និង ជូនពរសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំ សមាជិក សមាជិកា ព្រឹទ្ធសភា រដ្ឋសភា ព្រមទាំងប្រជាពលរដ្ឋនៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នា។ ជាពិសេស សូមឲ្យប្រទេសជាតិរួចផុតពីជំងឺតម្កាត់ ជំងឺកូវីដ-១៩ គ្រោះកាចចង្រៃ ជៀសផុតពីគ្រោះរាំងស្ងួត និងសម្បូរសប្បាយជានិច្ចនិរន្ត។ ជាពិសេស សូមឲ្យពិធីអង្គរសង្ក្រាន្តបានដំណើរការទៅដោយរលូន និងការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេមដំណើរការទៅតាមផែនការដែលបានគ្រោងទុក៕

អត្ថបទ ៖ វិមាន

The post លោកជំទាវ ម៉ែន សំអន បួងសួងសូមទេវតាឆ្នាំថ្មីជួយនាំនូវសេចក្តីសុខសប្បាយ ចូលមានដល់ប្រមុខដឹកនាំប្រទេស និងពលរដ្ឋទាំងអស់ នាឱកាសបុណ្យចូលឆ្នាំថ្មីប្រពៃណីជាតិខ្មែរ appeared first on Kampuchea Thmey Daily.

លោកជំទាវ ម៉ែន សំអន សូត្រមន្តបួងសួងសូមសេចក្តីសុខដល់ថ្នាក់ដឹកនាំ និងពលរដ្ឋទូទាំងប្រទេសនាឱកាសបុណ្យចូលឆ្នាំថ្មីប្រពៃណីជាតិខ្មែរ

Sokhom Khon — Fri, 31 Mar 2023 08:51:47 +0000

លោកជំទាវកិត្តិសង្គហបណ្ឌិត ម៉ែន សំអន ឧបនាករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការិច្ចបានប្រារព្ធពិធីសូត្រមន្ត បួងសួងសូមសេចក្តីសុខសប្បាយចូលមានដល់ថ្នាក់ដឹកនាំគ្រប់ជាន់ថ្នាក់និងពលរដ្ឋទូទាំងប្រទេសនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរឆាប់ៗខាងមុខនេះ។

លោកជំទាវកិត្តិសង្គហបណ្ឌិត ម៉ែន សំអន បួងសូងបែបនេះក្នុងពេលអញ្ជេីញសូត្រមន្ត នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីសេចក្តីសុខសេចក្តីចម្រើនកើតមានដល់ក្រុមគ្រួសារមន្ត្រីរាជការក្រោមឱវាទក្រសួង ក៏ដូចជាប្រជាពលរដ្ឋទូទាំងប្រទេស ព្រឹកថ្ងៃ សុក្រ ១០កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី៣១ ខែមីនា ឆ្នាំ២០២៣ ។

លោកជំទាវកិត្តិសង្គហបណ្ឌិត ម៉ែន សំអន បានបួងសួងដល់ទេវតាឆ្នាំថ្មីជួយបីបាច់ កាតពារថែរក្សាថ្នាក់ដឹកនាំប្រទេសកម្ពុជាគ្រប់ជាន់ថ្នាក់និងប្រជាពលរដ្ឋទាំងអស់ជួបតែមហាសេចក្តីសប្បាយធ្វើដំណើរទៅលេងស្រុកកំណើតបានសុខសុវត្ថិភាពនាឪកាសពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងចូលមកដល់ក្នុងពេលឆាប់ៗខាងមុខនេះ។

សូមបញ្ចាក់ថា មហាសង្ក្រាន្តឆ្នាំថោះ បញ្ចស័ក នឹងចូលមកនៅក្នុងថ្ងៃសុក្រ ៩រោច រនោចខែចេត្រត្រូវនឹងថ្ងៃទី១៤ ខែមេសា ឆ្នាំ២០២៣ វេលាម៉ោង ១៦៖០០នាទីរសៀល ។ នោះព្រះអាទិត្យចរចេញពីមីនរាសី ទៅស្ថិតនៅមេសរាសី ដើរតាមគោវិថី គឺផ្លូវកណ្តាល ទើបមានទេពធីតាមួយព្រះអង្គ ជាមគ្គនាយិកា ព្រះនាម កិមិរាទេវី (បុត្រទី៦) គង់នៅចាតុម្មហារាជិកា ទ្រង់អម្ពរពណ៌ សេត(ពណ៌ស)សៀតផ្កាចង្កុលណី (វារីជាតិប្រភេទឈូក) អាភរណៈ បុស្បរាគ័ម (ត្បូងថ្មពណ៌លឿង) ភក្សាហារ ចេកណាំវ៉ា ឬចេកទឹក ព្រះហស្តស្ដាំទ្រង់ព្រះខ័ន ព្រះហស្តឆ្វេងទ្រង់ ពិណ(ចាបុី) គង់លើខ្នង មាហឹសៈ (សត្វក្របី) ជាពាហនៈ៕

អត្ថបទ៖ វិមាន

The post លោកជំទាវ ម៉ែន សំអន សូត្រមន្តបួងសួងសូមសេចក្តីសុខដល់ថ្នាក់ដឹកនាំ និងពលរដ្ឋទូទាំងប្រទេសនាឱកាសបុណ្យចូលឆ្នាំថ្មីប្រពៃណីជាតិខ្មែរ appeared first on Kampuchea Thmey Daily.

លោកជំទាវ ម៉ែន សំអន សាទរនូវសមិទ្ធផលនានាថ្មីសន្លាងរបស់គណបក្ស តម្លៃ ៥៨ ម៉ឺនដុល្លារ

អ៊ិន ពិសី — Thu, 30 Mar 2023 06:49:01 +0000

លោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានសម្ដែងការអបអរសាទរចំពោះសមិទ្ធផលនានាថ្មីសន្លាងរបស់គណបក្សប្រជាជនកម្ពុជាដែលមានតម្លៃ ៥៨ ម៉ឺនដុល្លារឯណោះ សម្រាប់បម្រើការជូនពលរដ្ឋ គណបក្ស និងសង្គមជាតិ ឲ្យកាន់តែរីកចម្រើនថែមទៀត។ លោកជំទាវកិត្តិសង្គហបណ្ឌិត ម៉ែន សំអន ថ្លែងអបអរសាទរបែបនេះខណៈអញ្ជើញជាអធិបតី ក្នុងពិធីកាត់ខ្សែបូសម្ពោធដាក់ឲ្យប្រើប្រាស់អគារស្នាក់ការគណបក្ស និងសមិទ្ធផលនានា នៃស្រុកចន្ទ្រា កាលពីព្រឹកថ្ងៃព្រហស្បតិ៍ ៩ កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ៣០ ខែមីនា ឆ្នាំ ២០២៣។

លោកជំទាវបានពាំនាំនូវការផ្ដាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់សមាជិកទាំងអស់ នៃអង្គពិធគ ដោយក្តីនឹករលឹក និងការគិតគូរយកចិត្តទុកដាក់ដក់ប្រជាពលរដ្ឋនៅទូទាំងប្រទេស។

សូមបញ្ជាក់ថា សមិទ្ធផលដែលសម្ពោធដាក់ឲ្យប្រើប្រាស់ក្នុងថ្ងៃនេះ រួមមាន ៖ អគារទីស្នាក់ការគណបក្សស្រុក ចំនួន ០១ ខ្នង កម្ពស់ ០២ ជាន់ ដែលមានប្រវែង ២៥ ម៉ែត្រ x ៣៧ ម៉ែត្រ ខ្លោងទ្វារ និងរបង ក្រាលឥដ្ឋការ៉ូ ម៉ាបនៅបរិវេណខាងមុខអគារទីស្នាក់ការ ស្តូបមិត្តភាពចំនួន ១ រូបសំណាកអប្សរាចំនួន ២ រូបសំណាកព្រាបស(ធំ)ចំនួន ២ ស្រះទឹកចំនួន ១ ដាំដើមត្នោត ដើមឈើ ចាក់ដីបំពេញទីធ្លា ការបំពាក់គ្រឿងបរិក្ខារ សង្ហារិម រួមមាន តុឈើ កៅអីឈើ ទូឈរ និយាយ LED Screen ទំហំ ៨៥ អ៊ីង ចំនួន ០១ គ្រឿង សាឡុង ម៉ាស៊ីនត្រជាក់ ចំណាយអស់ថវិកាសរុប ៥៨០,០០០ $ (ប្រាំរយប៉ែតសិបពាន់ដុល្លារសហរដ្ឋអាមេរិកគត់) ដែលជាអំណោយរបស់ លោកនាយឧត្ដមសេនីយ៍ ម៉ឹង សំផន រដ្ឋមន្ត្រីប្រតិភូអមនាយករដ្ឋមន្ត្រី សមាជិកគណៈកម្មាធិការកណ្ដាល និងជាប្រធានក្រុមការងារគណបក្សចុះមូលដ្ឋានស្រុកចន្ទ្រា និងសហការី។

លោកជំទាវកិត្តិសង្គហបណ្ឌិត បានបន្តទៀតថា អគារស្នាក់ការគណបក្សប្រជាជនកម្ពុជា ដែលសម្ពោធដាក់ឲ្យប្រើប្រាស់នៅថ្ងៃនេះ គឺជាសមិទ្ធផលថ្មីសន្លាងមួយទៀត នៅក្នុងស្រុកចន្ទ្រា ដែលបម្រើឲ្យរដ្ឋបាលគណបក្សនៅថ្នាក់មូលដ្ឋាន ហើយអគារនេះក៏បានបង្ហាញពីភាពរឹងមាំ និងជាគណបក្សដែលមានភាពចាស់ទុំខាងនយោបាយក្នុងការដឹកនាំប្រទេស ដែលមានសម្តេចតេជោ ហ៊ុន សែន ជាស្ថាបនិកមគ្គុទ្ទេសក៍ឯក និងជាប្រតិបត្តិករ នយោបាយ ឈ្នះ ឈ្នះ ដែលបាននាំមកនូវសុខ សន្តិភាពពេញលេញជូនជាតិ និងមាតុភូមិ។

ថ្លែងក្នុងឱកាសនោះផងដែរ លោកជំទាវបានអំពាវនាវដល់បងប្អូនទាំងអស់គ្នាត្រូវ ៖

១.រួមគ្នាថែរក្សាសុខសន្តិភាព និងការអភិវឌ្ឍ និងរួមគ្នា ថែរក្សា នូវសមិទ្ធផលនានារបស់រាជរដ្ឋាភិបាល និងរបស់គណបក្ស ដែលបានផ្តល់ជូនឲ្យបានគង់វង្សសម្រាប់ទុកដល់កូនចៅជំនាន់ក្រោយៗទៀត។

២.មន្ត្រីរាជការគ្រប់លំដាប់ថ្នាក់ ជាពិសេស មេឃុំ មេប៉ុស្តិ៍ ស្មៀន និងមេភូមិ ត្រូវបម្រើសេវាសាធារណៈឲ្យបានល្អប្រសើរជូនប្រជាពលរដ្ឋនៅក្នុងមូលដ្ឋានរបស់ខ្លួន។

៣.ត្រូវចូលរួមជាមួយរាជរដ្ឋាភិបាលកម្ពុជា ក្នុងការចូលរួមថែរក្សា ភូមិ-ឃុំមានសុវត្ថិភាព និងអប់រំកូនចៅឲ្យជៀសផុតពីគ្រឿងញៀន ចំណុចនេះ ជាពិសេស មេប៉ុស្តិ៍នគរបាល និងមេឃុំ ត្រូវពង្រឹងនូវការទទួលខុសត្រូវបន្ថែមទៀត។

៤.យើងទាំងអស់គ្នាត្រូវបន្តអនុវត្តវិធានការរបស់ក្រសួងសុខាភិបាល ៣ ការពារ ៣ កុំ ដើម្បីទប់ស្កាត់នូវការឆ្លងរីករាលដាល នៃជំងឺកូវីដ-១៩។ ចំណែកឯរដ្ឋបាលខេត្ត និងសមត្ថកិច្ចពាក់ព័ន្ធ ត្រូវជំរុញប្រជាពលរដ្ឋក្នុងការចាក់វ៉ាក់សាំងឲ្យបានគ្រប់ៗគ្នា។

៥.បន្ទាប់ពីមានទីស្នាក់ការបក្សហើយ ខ្ញុំក៏ស្នើសុំឲ្យថែរក្សាអនាម័យ បរិស្ថាន និងសោភណភាពនៅក្នុងបរិវេណនេះឲ្យបានស្អាត សក្ដិសមជាគណបក្សដឹកនាំប្រទេស។

៦.រួមគ្នាកៀរគរជីដូន ជីតា ឪពុក ម្ដាយ បងប្អូនញាតិសន្ដាន អ្នកភូមិផងរបងជាមួយ ទៅបោះឆ្នោតជូនគណបក្សប្រជាជនកម្ពុជាសម្រាប់នីតិកាលទី ៧ នៅថ្ងៃ ២៣ កក្កដា ២០២៣ ខាងមុខនេះ។

៧.គោរពច្បាប់ចរាចរណ៍ទាំងអស់គ្នា កុំសេពគ្រឿងស្រវឹង និងកុំបើកបរពេលស្រវឹង និងមិនត្រូវឲ្យសមាជិកណាម្នាក់បាត់បង់ជីវិតដោយសារគ្រោះថ្នាក់ចរាចរណ៍នោះទេ។

៨.ត្រូវប្រយ័ត្ននូវភ្លើងទៀន ធូប និងអគ្គិសនីផ្សេងៗ ដែលអាចបង្កជាអគ្គិភ័យក្នុងអំឡុងពេលទទួលទេវតាឆ្នាំថ្មី៕

អត្ថបទ ៖ វិមាន

The post លោកជំទាវ ម៉ែន សំអន សាទរនូវសមិទ្ធផលនានាថ្មីសន្លាងរបស់គណបក្ស តម្លៃ ៥៨ ម៉ឺនដុល្លារ appeared first on Kampuchea Thmey Daily.

វីរនារីដោះមីន ២ រូប គោរពថ្លែងអំណរគុណ សម្ដេចតេជោ និងសម្ដេចកិត្តិព្រឹទ្ធបណ្ឌិត ដែលតែងតែគិតគូរអំពីសុខទុក្ខគ្រួសារពួកគាត់

អ៊ិន ពិសី — Thu, 30 Mar 2023 00:38:11 +0000

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយ រដ្ឋសភា-ព្រឹទ្ធសភា និងអធិការកិច្ច ចុះសួរសុខទុក្ខវីរនារីអង្គភាពដោះមីនខេត្តស្វាយរៀងចំនួន ២ រូប បានធ្វើការគោរពថ្លែងអំណរគុណយ៉ាងពន់ពេកចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលតែងតែគិតគូរអំពីសុខទុក្ខគ្រួសារពួកគាត់ដោយមិនទុកឲ្យនៅឯកោឡើយ។ ការសម្តែងដោយក្តីរំភើបបែបនេះធ្វើឡើងខណៈពេលលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានចុះសួរសុខទុក្ខពួកគាត់ផ្ទាល់ កាលពីរសៀល ថ្ងៃពុធ ៨ កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ២៩ ខែមីនា ឆ្នាំ ២០២៣។

លោកជំទាវកិត្តិសង្គហបណ្ឌិត ក៏បានពាំនាំនូវការផ្ដាំផ្ញើការសាកសួរសុខទុក្ខពីសំណាក់ សម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់នារីដោះមីនទាំងពីររូប ដោយក្តីនឹករលឹក និងការគិតគូរសុខទុក្ខ និងសុខុមាលភាពរបស់ប្រជាពលរដ្ឋនៅទូទាំងប្រទេស។

លោកជំទាវកិត្តិសង្គហបណ្ឌិត បានកោតសរសើរដល់វីរនារីដោះមីន និងសូមថ្លែងអំណរគុណយ៉ាងជ្រាលជ្រៅជូនចំពោះលោកស្រីទាំងពីររូប ដែលមានស្នាដៃល្អ និងបានចូលរួមចំណែកយ៉ាងសកម្ម ក្នុងការបោសសម្អាតមីននៅខេត្តស្វាយរៀងកន្លងមក។ បន្ទាប់មក លោកជំទាវ ក៏បានប្រគល់ផ្ទះ ១ ខ្នង និងថវិការបស់សម្តេចតេជោ និងសម្តេចកិត្តិព្រឹទ្ធបណ្ឌិត ចំនួន ៥ លានរៀល រួមជាមួយសម្ភារៈប្រើប្រាស់មួយចំនួន ជូន លោកស្រី គង់ សារឿន បច្ចុប្បន្នស្នាក់នៅ ភូមិអូក្អាម ឃុំសំបួរ ស្រុកស្វាយទាប ខេត្តស្វាយរៀង និង ជូនថវិកាចំនួន ២ លានរៀល រួមជាមួយសម្ភារៈប្រើប្រាស់មួយចំនួន ដល់ លោកស្រី អ៊ុង យឿន បច្ចុប្បន្នស្នាក់នៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

ស្ថិតក្នុងឱកាសនោះលោកស្រី គង់ សារឿន និង លោកស្រី អ៊ុង យឿន សូមគោរពថ្លែងអំណរគុណយ៉ាងជ្រាលជ្រៅជូនចំពោះ សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែគិតគូរអំពីសុខទុក្ខ និងបានជួយដោះស្រាយការលំបាកដល់គ្រួសារគាត់ទាំងពីរ៕

អត្ថបទ ៖ វិមាន

The post វីរនារីដោះមីន ២ រូប គោរពថ្លែងអំណរគុណ សម្ដេចតេជោ និងសម្ដេចកិត្តិព្រឹទ្ធបណ្ឌិត ដែលតែងតែគិតគូរអំពីសុខទុក្ខគ្រួសារពួកគាត់ appeared first on Kampuchea Thmey Daily.

លោកជំទាវ ម៉ែន សំអន Archives - Kampuchea Thmey Daily

សម្តេច ម៉ែន សំអន សំណេះសំណាលជាមួយក្រុមសម្តែងហាត់សម ត្រៀមក្នុងពិធីបិទព្រឹត្តិការណ៍ស៊ីហ្គេមលើកទី៣២

ផ្លូវកៅស៊ូចំនួន​ ៣ ខ្សែ ប្រវែង​ជិត ១០០ គីឡូម៉ែត្រ​ បើកការដ្ឋាន​សាងសង់​នៅ​ខេត្តក្រចេះ

លោកជំទាវ ម៉ែន សំអន សាទរនូវសមិទ្ធផលនានាថ្មីសន្លាងរបស់គណបក្ស តម្លៃ ៥៨ ម៉ឺនដុល្លារ

ផ្លូវកៅស៊ូចំនួន ៣ ខ្សែ ប្រវែងជិត ១០០ គីឡូម៉ែត្រ បើកការដ្ឋានសាងសង់នៅខេត្តក្រចេះ