លោកស្រី ជា សិរី Archives - Kampuchea Thmey Daily

លោកស្រី ជា សិរី៖ ប្រសិនបើអតិថិជនសម្រុកដកប្រាក់ នឹងធ្វើឱ្យធនាគារបង្វិលសងមិនទាន់

deth leng — Tue, 17 Mar 2026 03:09:42 +0000

លោកស្រី ជា សិរី ទេសាភិបាលធនាគារជាតិនៃកម្ពុជា នៅថ្ងៃទី ១៦ ខែមីនា ឆ្នាំ ២០២៦ បានអំពាវនាវកុំឱ្យអតិថិជនដែលបានដាក់ប្រាក់បញ្ញើនៅក្នុងគ្រឹះស្ថានធនាគារនាំគ្នាសម្រុកទៅដកប្រាក់ទាំងអស់ចេញពីធនាគារក្នុងពេលតែមួយ នឹងធ្វើឱ្យធនាគារខ្វះសាច់ប្រាក់សងត្រឡប់។

ការអំពាវនាវរបស់លោកស្រី ជា សិរី កើតមានឡើងបន្ទាប់ពីអតិថិជនរបស់ធនាគារ អេភីឌី រាប់សិបនាក់បានសម្រុកទៅដកប្រាក់ចេញពីធនាគារ ដោយសារបារម្ភពាក្យចចាមអារ៉ាមមួយចំនួនពាក់ព័ន្ធនឹងការលាងលុយ និងការដកអាជ្ញាបណ្ណ។

លោកស្រី ជា សិរី ពន្យល់ថា តួនាទីរបស់ធនាគារគឺអន្តរការីយកម្ម បានន័យថា គាត់ទទួលប្រាក់បញ្ញើពីអ្នកដែលមានលុយលើសមិនទាន់មានតម្រូវការ ហើយគាត់ផ្ដល់លុយនោះទៅឱ្យអ្នកដែលមានតម្រូវការចាំបាច់ប្រើប្រាស់ ដើម្បីវិនិយោគនៅក្នុងវិស័យសេដ្ឋកិច្ច ដូចជាទិញផ្ទះ សាងសង់សណ្ឋាគារ និងសាងសង់រោងចក្រជាដើម។

លោកស្រី ជា សិរី បានប្រាប់ឱ្យដឹងថា ជាទូទៅប្រតិបត្តិការធនាគារ ទទួលប្រាក់បញ្ញើមក គឺគាត់ទុកមួយផ្នែកតូច ដើម្បីបម្រើតម្រូវការរបស់អតិថិជនដាក់ប្រាក់បញ្ញើ អ្នកដាក់ប្រាក់បញ្ញើមួយចំនួនមិនទាន់ត្រូវការប្រើប្រាស់លុយគាត់ គាត់អាចយកទៅដាក់ជាប្រាក់បញ្ញើមានកាលកំណត់ ឬក៏រយៈពេលណាមួយ ដែលមានរយៈពេល ៣ ខែ ៦ ខែ ៩ ខែ ឬក៏មួយឆ្នាំ។ ប៉ុន្តែគាត់ក៏ត្រូវការលុយមួយចំនួនដើម្បីចាយវាយប្រចាំថ្ងៃ ដូចជាបង់ថ្លៃផ្ទះ ទិញទំនិញជាដើម។ ធនាគារដឹងច្បាស់ ថា ត្រូវមានសាច់ប្រាក់ប៉ុន្មានដើម្បីបើកឱ្យអតិថិជននោះ។

លោកស្រី ជា សិរី បានពន្យល់ថា ប្រាក់បញ្ញើអតិថិជន គឺធនាគារយកទៅផ្ដល់កម្ចីដល់អតិថិជនដែលមានតម្រូវការ ហើយអតិថិជនទាំងនោះ មានតម្រូវការរយៈពេលវែង បើអ្នកទិញផ្ទះ គាត់ខ្ចីអាចរហូដល់ ២០ ឆ្នាំ។ ចំណែកអ្នកខ្ចីទៅពង្រីករោងចក្រអាច ៥ ឆ្នាំ ឬយូរជាងនេះ។

ទេសាភិបាលធនាគារជាតិនៃកម្ពុជារូបនេះ បន្ថែមថា ធនាគារត្រូវធ្វើយ៉ាងម៉េចឱ្យពេលវេលានៃកាលកំណត់ការប្រាក់បញ្ញើ និងការខ្ចីឱ្យស្របគ្នា។

លោកស្រី ជា សិរីបញ្ជាក់ថា៖ «លោក សុខ គាត់ដាក់មួយឆ្នាំ អញ្ចឹងធនាគារឱ្យទៅលោក សៅរ៍ ខ្ចី លុះដល់ពេលវេលារបស់លោកសុខត្រូវដកលុយ គាត់យកលុយរបស់លោក ចន្ទ ដែលដាក់មោ មួយឆ្នាំក្រោយមក ឱ្យទៅលោកសុខ»។

លោកស្រី ជា សិរី ប្រាប់ថា ក្នុងរយៈពេលវែង ធនាគារតែងតែមានសាច់ប្រាក់គ្រប់គ្រាន់ក្នុងការបើកឱ្យអតិថិជនដាក់ប្រាក់បញ្ញើ ក៏ប៉ុន្តែក្នុងពេលដែលអតិថិជនសម្រុកដកលុយពីគ្រឹះស្ថានធនាគារទាំងអស់ក្នុងពេលតែមួយនឹងធ្វើឱ្យធនាគារខ្វះសាច់ប្រាក់បង្វិលសង ដោយសារលុយទាំងអស់នោះគាត់បានយកទៅផ្ដល់កម្ចីដែលមានរយៈពេលវែង។

លោកស្រី ជា សិរីថា៖ «លុយគាត់បង្វិលអត់ទាន់ មិនមែនគាត់អត់មានលុយសងទេ ក៏ប៉ុន្តែគាត់បង្វិលអត់ទាន់ ដោយសារលុយទាំងអស់នោះ គាត់បានផ្ដល់ទៅឱ្យអ្នកដែលខ្ចី ហើយអ្នកដែលខ្ចីនោះ គាត់ខ្ចីរយៈពេលវែង ដូច្នេះហើយប្រសិនបើទាំងអស់គ្នាមកទារប្រាក់ទាំងអស់ក្នុងពេលតែមួយ ធនាគារគាត់ក៏ត្រូវតែទារពីអ្នកដែលគាត់ឱ្យខ្ចីនោះទាំងអស់ក្នុងពេលតែមួយ ហើយយើងដឹងហើយ អ្នកធ្វើអាជីវកម្ម គឺគាត់គ្មានលទ្ធភាពសងត្រឡប់ទាំងអស់ក្នុងពេលតែមួយនោះទេ»។

លោកស្រី ជា សិរី បញ្ជាក់ថា បញ្ជាក់ថា៖ «ប្រសិនជាអ្នកដាក់ប្រាក់បញ្ញើទាំងអស់មកដកប្រាក់ខ្លួនឯងទាំងអស់ក្នុងពេលតែមួយវាជារឿងធម្មតាទេដែលធនាគារមិនមានសាច់ប្រាក់ ផ្ដល់ទៅឱ្យអតិថិជនដាក់ប្រាក់បញ្ញើ»។

បើតាមទេសាភិបាលធនាគារជាតិ ប្រព័ន្ធធនាគារកម្ពុជា នៅបន្តរឹងមាំដែលអតិថិជននៅបន្តប្រតិបត្តិការបានជាធម្មតា ដោយអំពាវនាវឱ្យអតិថិជនទុកពេលវេលាឱ្យធនាគារជាតិបន្តធ្វើការជាមួយធនាគារដែលពាក់ព័ន្ធ និងរកវិធីដោះស្រាយប្រាក់បញ្ញើអតិថិជនទាំងអស់៕

អត្ថបទ៖ ឡេង ដេត

The post លោកស្រី ជា សិរី៖ ប្រសិនបើអតិថិជនសម្រុកដកប្រាក់ នឹងធ្វើឱ្យធនាគារបង្វិលសងមិនទាន់ appeared first on Kampuchea Thmey Daily.

លោកស្រី ជា សិរី អះអាងថា ស្ត្រីជាដៃគូអភិវឌ្ឍសេដ្ឋកិច្ច សង្គម

deth leng — Fri, 06 Mar 2026 10:59:10 +0000

លោកស្រី ជា សិរី ទេសាភិបាលធនាគារជាតិនៃកម្ពុជា នៅថ្ងៃសុក្រទី ០៦ ខែមីនា ឆ្នាំ ២០២៦ បានលើកទឹកចិត្តឱ្យស្ត្រី និងបុរសមានសិទ្ធិ និងឱកាសស្មើគ្នាក្នុងការទទួលបាននូវការអប់រំ ចំណេះដឹង ជំនាញវិជ្ជាជីវៈ និងការចូលរួមគ្រប់វិស័យ។

លោកស្រីទេសាភិបាលបានលើកឡើង នៅក្នុងឱកាសអបអរសាទរខួបអនុស្សាវរីយ៍លើកទី១១៥ នៃទិវាអន្តរជាតិនារី ៨ មីនា ឆ្នាំ២០២៦។

លោកស្រី ជា សិរី បានបន្តថា ស្ត្រីមិនត្រឹមតែជាកម្លាំងសំខាន់ក្នុងគ្រួសារប៉ុណ្ណោះទេ ប៉ុន្តែក៏ជាដៃគូដ៏មានតម្លៃក្នុងការអភិវឌ្ឍសេដ្ឋកិច្ច សង្គម និងស្ថាប័នផងដែរ ដោយសារស្ត្រីមានភាពអត់ធ្មត់ ប្រាជ្ញាស្មារតីទទួលខុសត្រូវខ្ពស់ ដែលជាគុណតម្លៃដ៏សំខាន់ក្នុងការថែរក្សាសុខសន្តិភាពក្នុងគ្រួសារ សហគមន៍ និងសង្គមជាតិទាំងមូល។

ធនាគារជាតិ តែងតែយកចិត្តទុកដាក់លើការលើកកម្ពស់ស្ត្រី និងសមភាពយេនឌ័រ ទាំងក្នុងក្របខ័ណ្ឌស្ថាប័ន និងក្នុងការគាំទ្រការអភិវឌ្ឍសង្គមជាតិ។

ធនាគារជាតិនៃកម្ពុជា តែងតែសហការជាមួយក្រសួងស្ថាប័នពាក់ព័ន្ធក្នុងការគាំទ្រ និងបង្កើតកម្មវិធីនានាសម្រាប់លើកកម្ពស់ស្រ្តី និងការពង្រឹងឱកាសឱ្យស្ត្រីអាចទទួលបាន និងប្រើប្រាស់សេវាហិរញ្ញវត្ថុប្រកបដោយសុវត្ថិភាព និងប្រសិទ្ធភាព ព្រមទាំងរួមចំណែកជំរុញបរិយាបន្នហិរញ្ញវត្ថុនៅកម្ពុជា។ ការងារនេះ មិនត្រឹមតែជួយពង្រឹងសេដ្ឋកិច្ចគ្រួសារប៉ុណ្ណោះទេ ប៉ុន្តែក៏ជួយលើកកម្ពស់ស្ថិរភាព និងភាពធន់របស់សង្គមផងដែរ។

ទន្ទឹមនេះយុទ្ធសាស្រ្តជាតិស្ដីពីបរិយាបន្នហិរញ្ញវត្ថុ ឆ្នាំ២០១៩-២០២៥ ត្រូវបានដាក់ចេញ ដោយផ្តោតលើការលើកកម្ពស់ស្រ្តីក្នុងភាពជាអ្នកដឹកនាំ ការបញ្ចូលអក្ខរកម្មហិរញ្ញវត្ថុទៅក្នុងកម្មវិធីសិក្សាទូទៅ និងការលើកទឹកចិត្តឱ្យប្រើប្រាស់សេវាហិរញ្ញវត្ថុឌីជីថលជាដើម។

គិតត្រឹមខែមករា ឆ្នាំ២០២៦ ចំនួនអ្នកខ្ចីពីគ្រឹះស្ថានធនាគារ មានប្រមាណ ៥៣.៧% ជាស្រ្តី និងចំនួនអ្នកខ្ចីពីគ្រឹះស្ថានមីក្រូហិរញ្ញវត្ថុមានប្រមាណ ៥៨.៦% ជាស្រ្តី ខណៈចំនួនអ្នកដាក់ប្រាក់បញ្ញើក្នុងគ្រឹះស្ថានធនាគារមានប្រមាណ ៥១.២% ជាស្រ្តី និងចំនួនអ្នកដាក់ប្រាក់បញ្ញើក្នុងគ្រឹះស្ថានមីក្រូហិរញ្ញវត្ថុមានចំនួន ៦៣.៩% ជាស្រ្តី។ ទាំងនេះ បង្ហាញពីសមាមាត្រដែលស្រ្តីបានចូលរួមទទួល និងប្រើប្រាស់សេវាហិរញ្ញវត្ថុប្រហាក់ប្រហែលនឹងបុរស។

ទន្ទឹមនេះ ធនាគារជាតិនៃកម្ពុជាបាននិងកំពុងរៀបចំបង្កើតទារកដ្ឋាននៅអគារសែនសុខ និងអគារស្នាក់ការកណ្តាលដែលយើងកំពុងសាងសង់ក្នុងគោលបំណងលើកទឹកចិត្ត ជួយសម្រាលបន្ទុក និងលើកកម្ពស់តុល្យភាពរវាងជីវិតការងារ និងជីវិតគ្រួសារដល់មន្ត្រីជាស្ត្រីព្រមទាំងអាចឱ្យស្ត្រីមានលទ្ធភាពធ្វើការងារប្រកបដោយប្រសិទ្ធភាព និងមានពេលវេលាថែទាំទារកប្រកបដោយសុវត្ថិភាព គុណភាព និងស្ដង់ដារ។

ជាមួយគ្នានេះ ធនាគារជាតិនៃកម្ពុជាក៏បានស្នើសុំឱ្យមន្ត្រីជំនាញធ្វើការសិក្សាអំពីលទ្ធភាពក្នុងការតម្រូវឱ្យគ្រឹះស្ថានក្រោមឱវាទ មានសមាជិកក្រុមប្រឹក្សាភិបាលជាស្ត្រីយ៉ាងតិចម្នាក់ ក្នុងគោលដៅចម្បងចូលរួមចំណែកលើកកម្ពស់សមភាពយេនឌ័រនៅក្នុងវិស័យហិរញ្ញវត្ថុ ដោយបង្កើនតួនាទីស្ត្រីក្នុងការសម្រេចចិត្ត និងភាពជាអ្នកដឹកនាំ។

ការចូលរួមរបស់ស្ត្រីក្នុងការដឹកនាំគ្រឹះស្ថានធនាគារ និងហិរញ្ញវត្ថុ គឺជាកត្តាមួយក្នុងការរួមចំណែកបង្កើនប្រសិទ្ធភាព វឌ្ឍនភាព និងនវានុវត្តភាពក្នុងវិស័យហិរញ្ញវត្ថុផងដែរ។

រដ្ឋាភិបាលកំពុងបន្តបំពេញកិច្ចការក្នុងការការពារសន្តិភាព អធិបតេយ្យភាព និងបូរណភាពទឹកដី សម្រាប់បម្រើឧត្តមប្រយោជន៍ជាតិ និងប្រជាជន ដែលជាធាតុផ្សំមិនអាចខ្វះបានក្នុងការបន្តគោលនយោបាយ និងយុទ្ធសាស្ត្រ ផ្ដោតយ៉ាងជាក់លាក់ទៅលើការលើកកម្ពស់ សមភាពយេនឌ័រ ការបង្កើនភាពអង់អាចរបស់ស្រ្តី និងក្មេងស្រី សំដៅធានាបាននូវគុណតម្លៃរបស់ស្រ្តីក្នុងសង្គម ប្រកបដោយសីលធម៌ សមធម៌ បរិយាបន្ន និងការអភិវឌ្ឍជាតិ៕

អត្ថបទ៖ សំអឿន

The post លោកស្រី ជា សិរី អះអាងថា ស្ត្រីជាដៃគូអភិវឌ្ឍសេដ្ឋកិច្ច សង្គម appeared first on Kampuchea Thmey Daily.

ធនាគារជាតិ ព្យាករថា ឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុងរង្វង់ ៥%

Din Thary — Tue, 27 Jan 2026 07:06:51 +0000

យោងតាមរបាយការណ៍ចុងក្រោយរបស់ធនាគារជាតិនៃកម្ពុជា បានព្យាករថា ក្នុងឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុង រង្វង់ ៥% និងអត្រាអតិនរណា ២,៣% ទោះបីជាកម្ពុជា និងបណ្តាប្រទេសនានានៅតែបន្តប្រឈមនឹងបញ្ហានៃការអូសបន្លាយពេលនៃកត្តភូមិសាស្រ្តនយោបាយ និងសង្រ្គាមពាណិជ្ជកម្មនៃប្រទេសមហាអំណាចនៅលើពិភពលោកក្តី។

លោកស្រី ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា ទស្សនវិស័យនៅឆ្នាំ២០២៦ កម្ពុជានឹងត្រូវខិតខំប្រឹងប្រែងដោះស្រាយបញ្ហាប្រឈម និងទាញយកអត្ថប្រយោជន៍ពីឱកាសថ្មីៗ។ ពហុភាគីកម្មសេដ្ឋកិច្ច ការវិនិយោគបន្តបន្ទាប់លើហេដ្ឋាចេនាសម្ព័ន្ធ និងការជ្រៀតចូលកាន់តែស៊ីជម្រៅទៅក្នុងតំបន់ និងសេដ្ឋកិច្ចពិភពលោក បានផ្តល់ជាមូលដ្ឋានរឹងមាំសម្រាប់កំណើនរយៈពេលមធ្យម។

ស្រមតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា កិច្ចខិតខំប្រឹងប្រែងក្នុងការលើកកម្ពស់ផលិតភាព ការពង្រឹងធនធានមនុស្ស ការកែលម្អបរិយាកាសអាជីវកម្ម និងវិនិយោគ និងការធ្វើទំនើបកម្មស្ថាប័នសេដ្ឋកិច្ច និងជួយគាំទ្រដល់ការអភិវឌ្ឍសកម្មភាពសេដ្ឋកិច្ចដែលមានតម្លៃបន្ថែម និងកំណើនដែលមានភាពធន់កាន់តែខ្លាំង។

«ជាក់ស្តែង នៅឆ្នាំ២០២៦ នេះ ធនាគារនៃកម្ពុជា បានព្យាករថា សេដ្ឋកិច្ចកម្ពុជានឹងអាចសម្រេចបានក្នុង រង្វង់ ៥% និងអត្រាអតិនរណា ២,៣%។ នយោបាយរូប័យវត្ថុនឹងត្រូវបន្តអនុវត្តប្រកបដោយ ភាពប្រុងប្រយ័ត្ន ក្នុងគោលដៅរក្សាស្ថិរភាពថ្លៃនិងអត្រាប្តូរប្រាក់ ដែលនឹងគាំទ្រដល់ការអាក្សាស្តីការ រាំត្រសេដ្ឋកិច្ច»។ លោកស្រី ជា សិរី បន្ថែមបែបនេះ។

ជាមួយគ្នានេះ ធនគារជាតិនៃកម្ពុជានឹងបន្តដាក់ចេញនូវគោលនយោបាយ និងវិធានការបុរេសកម្មស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០២៥-២០៣០ សំដៅរួមចំណែកសម្រេចបាននូវចក្ខុវិស័យកម្ពុជាឆ្នាំ២០៥០។ ក្នុងទិសដៅនេះ ការរក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុ ការពង្រឹងភាពរឹងមាំប្រព័ន្ធធនគារ និងប្រសិទ្ធភាពប្រព័ន្ធទូទាត់ ការលើកកម្ពស់បរិយាបន្ន និងនវានវត្តន៍ហិរញ្ញវត្ថុ និងការអភិវឌ្ឍហិរញ្ញប្បទានបៃតងនឹងត្រូវបន្តយកចិត្តទុកដាក់អនុវត្តឱ្យមានប្រសិទ្ធភាព។

លោកស្រី ជា សិរី បានបន្តថា ធនាគារជាតិនៃកម្ពុជានឹងបន្តពង្រឹងភាពធន់ប្រព័ន្ធធនាគារ តាមរយៈការពង្រឹងក្របខណ្ឌបទប្បញ្ញត្តិ និងការត្រួតពិនិត្យផ្អែកលើហានីភ័យ និងទស្សនៈអនាគត ដើម្បីបន្តការពារស្ថិរភាពហិរញ្ញវត្ថុ។ លើសពីនេះ ប្រព័ន្ធទូទាត់នឹងត្រូវបានធ្វើទំនើបកម្មជាលំដាប់ សំទៅរួមកំណែក លើកកម្ពស់ការអភិវឌ្ឍសេដ្ឋកិច្ចឌីជីថល ស្របតាមយុទ្ធសាស្ត្របញ្ចកោណ ដំណាក់កាលទី១។

ទន្ទឹមនឹងនេះ ធនាគារជាតិនៃកម្ពុជា ក៏នឹងបន្តពង្រឹងក្របខណ្ឌច្បាប់ និងបទប្បញ្ញត្តិ ព្រមទាំងបន្តពង្រឹង និងពង្រីកកិច្ចសហប្រតិបត្តិការក្នុងស្រុក និងអន្តរជាតិ ព្រមទាំងការផ្សព្វផ្សាយ និងបណ្តុះបណ្តាល ក្នុងគោលដៅពង្រឹងការយល់ដឹង ជំរុញការចូលរួមទប់ស្កាត់និងបង្ការ ក៏ដូចជាបង្កើនប្រសិទ្ធភាពនៃការប្រឆាំងការសម្អាតប្រាក់ និងហិរញ្ញប្បទានភេវកម្ម។

លោកស្រីទេសាភិបាល ជឿជាក់ថា គ្រប់ភាគីពាក់ព័ន្ធនានា និងបន្តគាំទ្រ និងរួមចំណែកសម្រេចបាននូវសមិទ្ធផលថ្មីៗ បន្ថែមទៀត ក្នុងការអភិវឌ្ឍសេដ្ឋកិច្ចនិងប្រព័ន្ធធនាគារ ដែលនឹងបម្រើជាប្រយោជន៍រួមសម្រាប់ជាតិ មាតុភូមិ និងប្រជាជនកម្ពុជា។

គួរគូសបញ្ជាក់ថា ស្ថានភាពសេដ្ឋកិច្ចពិភពលោកនៅឆ្នាំ២០២៥ នៅតែស្ថិតក្រោមភាពមិនប្រាកដប្រជាខ្ពស់ ដោយសារតែស្ថានភាពភូមិសាស្ត្រនយោបាយដែលបន្តមានភាពតានតឹង លក្ខខណ្ឌហិរញ្ញវត្ថុសកលដែលតឹងរឹង និងអត្រាកំណើនសេដ្ឋកិច្ចសម្រេចក្នុងល្បឿនទិសដៅផ្សេងគ្នា។

បញ្ហាប្រឈមទាំងនេះ កំណើនសេដ្ឋកិច្ចពិភពលោកឆ្នាំ២០២៥ ត្រូវបានព្យាករថា មានកម្រិត ៣,២% (៣,៣% នាឆ្នាំ២០២៨) ក្នុងនោះសេដ្ឋកិច្ចប្រទេសអភិវឌ្ឍន៍មានកំណើន ១,៦% និងប្រទេសកំពុងលូតលាស់ និងកំពុងអភិវឌ្ឍ ៤,២% ។

រីឯក្នុងតំបន់សេដ្ឋកិច្ចអាស៊ានបានថមថយបន្តិចមកត្រឹម ៨,៣%។ អត្រាអតិផរណាពិភពលោកបានថមថយមកត្រឹម៤,២% ដែលបានអនុញ្ញាតឱ្យធនាគារកណ្តាលនៃប្រទេសចម្បងៗបន្ទាបអត្រាការប្រាក់គោល ដើម្បីជំរុញកំណើនសេដ្ឋកិច្ច។ ទន្ទឹមនេះ ការពន្លឿនការបញ្ជាទិញមុនសុពលភាពនៃពន្ធគយបដិការ បានជំរុញឱ្យទំហំពាណិជ្ជកម្មជាតិមានកំណើន ៣,៦%៕

The post ធនាគារជាតិ ព្យាករថា ឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុងរង្វង់ ៥% appeared first on Kampuchea Thmey Daily.

គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើន ១,២ ដង ដល់ ១.៣២៥,៦៥ លាន

Din Thary — Mon, 26 Jan 2026 08:41:00 +0000

ធនាគារជាតិនៃកម្ពុជាបានឱ្យដឹងថា គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើនឡើង ១,២ ដង ដល់ ១.៣២៥,៦៥ លានប្រតិបត្តិការ ដែលក្នុងនោះ ៧៧១,២ លានប្រតិបត្តិការជាប្រាក់រៀល និង ៥៥៤,៥ លានប្រតិបត្តិការ ជាប្រាក់ដុល្លារអាមេរិក ខណៈដែលចំនួនគណនីកាបូបអេឡិចត្រូនិក មានប្រមាណ ១៨,៩ លានគណនី។

លោកស្រី ជា សិរី ទេសាភិបាលនៃធនាគារជាតិនៃកម្ពុជា បានមានប្រសាសន៍ថា បរិយាបន្នហិរញ្ញវត្ថុត្រូវបានបន្តលើកកម្ពស់ និងមានវឌ្ឍនភាពល្អប្រសើរ ដែលឆ្លុះបញ្ចាំង តាមរយៈកំណើនអ្នកប្រើប្រាស់សេវាហិរញ្ញវត្ថុផ្លូវការ។ ជាក់ស្តែង ចំនួនអ្នកដាក់ប្រាក់បញ្ញើបានកើនដល់ ១៨,៦ លាននាក់ និងចំនួនអ្នកប្រើប្រាស់សេវាឥណទានកើនដល់ ៤,៣ លាននាក់។ លើសពីនេះ ចំនួនស្ត្រីដែលបានប្រើប្រាស់សេវាហិរញ្ញវត្ថុផ្លូវការក្នុងវិស័យធនាគារមានប្រមាណ ៥៣% សម្រាប់ សេវាឥណទាន និង ៥១% សម្រាប់សេវាប្រាក់បញ្ញើ។

លោកស្រី ជា សិរី បានបន្ថែមថា «ប្រតិបត្តិការតាមរយៈប្រព័ន្ធបាគងបានកើនឡើង ១,២ ដង ដល់ ១.៣២៥,៦៥ លានប្រតិបត្តិការ នៅក្នុងឆ្នាំ២០២៥ ដែលក្នុងនោះ ៧៧១,២ លានប្រតិបត្តិការជាប្រាក់រៀល និង ៥៥៤,៥ លានប្រតិបត្តិការជាប្រាក់ដុល្លារអាមេរិក ខណៈដែលចំនួនគណនីកាបូបអេឡិចត្រូនិក មានប្រមាណ ១៨,៩ លានគណនី»។

ជាមួយគ្នានេះ លោកស្រីទេសាភិបាល បានបន្តថា យុទ្ធសាស្ត្រជាតិស្តីពីបរិយាបន្នហិរញ្ញវត្ថុកំពុងត្រូវបានធ្វើបច្ចុប្បន្នកម្មសម្រាប់ឆ្នាំ២០២៦-២០៣០ ដើម្បីបន្តធានាបានការអភិវឌ្ឍវិស័យហិរញ្ញវត្ថុប្រកបដោយបរិយាបន្ន និងចីរភាព។

ដោយឡែក ចំពោះកិច្ចការពារអតិថិជន ធនាគារជាតិនៃកម្ពុជាបានទទួល ឮបណ្តឹងអតិថិជនតាមរយៈប្រព័ន្ធហតឡាញចំនួន ៧២១ ករណី ក្នុងនោះ ៦៨៣ ករណី ត្រូវបានដោះស្រាយរួចរាល់ ១២ ករណី កំពុងត្រូវបានដោះស្រាយ និង ២៦ ករណី ស្ថិតក្នុងនីតិវិធីតុលាការ។

លោកស្រី ជា សិរី បន្តថា កិច្ចសហប្រតិបត្តិការទ្វេភាគី និងពហុភាគី ត្រូវបានបន្តពង្រឹង និងពង្រីក តាមរយៈការចុះ អនុស្សរណៈនៃការយោគយល់ ការផ្លាស់ប្តូរចំណេះដឹងនិងបទពិសោធ និងការអនុវត្តគម្រោងជំនួយ បច្ចេកទេស។

លោក តូច ចៅចេក ជាសមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារ ប្រៃសណីយ៍កម្ពុជា បានមានប្រសាសន៍ថា របាយការណ៍របស់ធនាគារជាតិនៃកម្ពុជា បានឆ្លុះបញ្ចាំងជាមធ្យមរបស់ឧស្សាហកម្ម (industry) ហើយធនាគារប្រៃសណីយ៍ដែលធ្វើប្រតិបត្តិការក៏ប្រហាក់ប្រហែលទៅនឹងរបាយការណ៍ពីឧស្សាហកម្មនេះដូចគ្នាដែរ។

លោក តូច ចៅចេក ក៏បានបញ្ជាក់ថា នៅឆ្នាំ២០២៦ នេះ ធនាគារប្រៃសណីយ៍ក៏មាននូវផែនការបង្កើននូវកំណែសេវាធនាគាររបស់ខ្លួនឱ្យកាន់តែមានភាពងាយស្រួល រលូន និងសុវត្ថិភាពជាងមុនផងដែរ។

ធនាគារជាតិនៃកម្ពុជា បានបន្តចូលរួមពង្រឹងកិច្ចសហប្រតិបត្តិការក្នុងក្របខណ្ឌអាស៊ាន និងអាស៊ាន+៣ ព្រមទាំងចុះអនុស្សរណៈយោគយល់ និងសហការជាមួយស្ថាប័នអន្តរជាតិនិងដៃគូ អភិវឌ្ឍន៍នានា ដើម្បីជំរុញការតភ្ជាប់ប្រព័ន្ធទូទាត់ទាំងក្នុង និងក្រៅតំបន់ ហិរញ្ញប្បទានឌីជីថលបៃតង និងការគ្រប់គ្រងវិបត្តិ ជាដើម។

កិច្ចសហប្រតិបត្តិការទាំងនេះក៏បានលើកកម្ពស់សមត្ថភាពមន្ត្រី ជំនាញស្របតាមការវិវត្តនៃវិស័យហិរញ្ញវត្ថុ និងបច្ចេកវិទ្យាជាសកល និងបានរួមចំណែកយ៉ាងសំខាន់ ក្នុងការអភិវឌ្ឍប្រព័ន្ធធនាគារ ជាពិសេសពង្រឹងសំណាញ់សុវត្ថិភាពហិរញ្ញវត្ថុទាំងក្នុងស្រុក និងតំបន់៕

The post គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើន ១,២ ដង ដល់ ១.៣២៥,៦៥ លាន appeared first on Kampuchea Thmey Daily.

កម្ពុជា-ឡាវ ដាក់ឱ្យដំណើការប្រព័ន្ធទូទាត់ឆ្លងដែនដំណាក់កាលទី២

Din Thary — Fri, 19 Dec 2025 08:06:43 +0000

នៅថ្ងៃទី១៩ ខែធ្នូ ឆ្នាំ២០២៥ នេះ ធនាគារ អេស៊ីលីដា និង ធនាគារ អេស៊ីលីដា ឡាវ លីមីតធីត បានសម្រេចដាក់ឱ្យប្រើប្រាស់ជាផ្លូវការ ប្រព័ន្ធទូទាត់ឆ្លងដែនតាមឃ្យូអរកូត នៅក្នុងប្រទេសកម្ពុជា (ដំណាក់កាលទី២៖ ឡាវស្កេន ខេអេចឃ្យូអរកូត) ក្នុងគោលបំណងផ្សព្វផ្សាយជាសាធារណៈអំពីការពង្រីកវិសាលភាព និងការជំរុញការទូទាត់ជាឌីជីថលសំដៅពង្រឹងទំនាក់ទំនងសេដ្ឋកិច្ចរវាងប្រទេសកម្ពុជា និងប្រទេសឡាវ ព្រមទាំងរួមចំណែកលើកកម្ពស់វិស័យទេសចរណ៍នៃប្រទេសទាំងពីរ ជាពិសេសសម្រេចបាននូវទស្សនៈវិស័យរបស់អាស៊ាន ក្នុងការផ្សារភ្ជាប់ទំនាក់ទំនងរវាងប្រព័ន្ធទូទាត់ឌីជីថលនៅក្នុងសហគមន៍។

កិច្ចសហប្រតិបត្តិការនេះ រៀបចំឡើងក្រោមអធិបតីភាពដ៏ខ្ពង់ខ្ពស់របស់ លោកស្រី ជា សិរី ទេសាភិបាលធនាគារជាតិនៃកម្ពុជា និង លោកស្រី Bounkham Vorachit ទេសាភិបាលធនាគារកណ្តាលឡាវ។

ធនាគារ អេស៊ីលីដា ភីអិលស៊ី និង ធនាគារ អេស៊ីលីដា ឡាវ លីមីតធីត ត្រូវបានជ្រើសរើសជាធនាគារទូទាត់ សម្រាប់ការទូទាត់ឆ្លងដែនរវាងកម្ពុជា និងឡាវ សម្រាប់ប្រតិបត្តិការទទួលយកការទូទាត់ជារូបិយប័ណ្ណក្នុងស្រុក (ប្រាក់រៀល និងឡាវគីប) ដោយត្រូវបានផ្តួចផ្តើមដោយធនាគារជាតិនៃកម្ពុជា និងធនាគារកណ្តាលឡាវ។

គួររំលឹកផងដែរថា កាលពីថ្ងៃទី១៨ ខែសីហា ឆ្នាំ២០២៣ ធនាគារ អេស៊ីលីដា បានប្រកាសដាក់ឱ្យប្រើប្រាស់ជាផ្លូវការ ប្រព័ន្ធទូទាត់តាម QR Code ឆ្លងដែន នៅក្នុងប្រទេសឡាវ ដំណាក់កាលទី១៖ កម្ពុជាស្កេនឡាវ QR Code ប្រកបដោយភាពជោគជ័យ ក្នុងគោលបំណងដើម្បីលើកកម្ពស់ការប្រើប្រាស់ប្រាក់រៀល សម្រាប់ការទូទាត់នៅក្នុងតំបន់អាស៊ាន និងបរិយាប័ន្នហិរញ្ញវត្ថុ ស្របតាមសមាហរណកម្មសហគមន៍សេដ្ឋកិច្ចអាស៊ាន។

កិច្ចសហប្រតិបត្តិការឆ្លងដែនរវាងកម្ពុជា (KHQR) និងឡាវ (Lao QR) គឺសរបញ្ជាក់ពីការអភិវឌ្ឍរបស់ធនាគារ អេស៊ីលីដា ដែលទទួលនូវភាពជោគជ័យជាបន្តបន្ទាប់ជាមួយនឹងការដាក់ឱ្យដំណើរការទូទាត់ឃ្យូអរឆ្លងដែនរវាងប្រទេសកម្ពុជា ជាមួយនឹងបណ្តាប្រទេសនានានៅក្នុងតំបន់អាស៊ាននាពេលកន្លងមកនេះ។

ការដាក់ឱ្យដំណើរការជាផ្លូវការនូវការទូទាត់ឆ្លងដែនរវាងប្រទេសកម្ពុជា និងប្រទេសឡាវ ដំណាក់កាលទី២៖ ឡាវស្កេនខេអេចឃ្យូអរកូត នឹងពង្រីកលទ្ធភាពឱ្យប្រជាជនឡាវដែលធ្វើដំណើរមកប្រទេសកម្ពុជាអាចធ្វើប្រតិបត្តិការទូទាត់ថ្លៃទំនិញ និង/ឬសេវាកម្ម ដោយប្រើប្រាស់កម្មវិធីធនាគារចល័តរបស់គ្រឹះស្ថានធនាគារ និងហិរញ្ញវត្ថុនៅប្រទេសឡាវ ដើម្បីស្កេនខេអេចឃ្យូអរកូតរបស់ពាណិជ្ជករនៅទូទាំងប្រទេសកម្ពុជា។

ការទូទាត់ឆ្លងដែនតាមរយៈ QR Code អនុញ្ញាតឱ្យអតិថិជន និងសាធារណជនដែលជាប្រជាជនឡាវ អាចទិញទំនិញ និងធ្វើការទូទាត់ថ្លៃទំនិញនៅពេលធ្វើដំណើរមកកាន់ប្រទេសកម្ពុជាដោយគ្រាន់តែស្កេន ខេអេចឃ្យូអរកូត បានកាន់តែមានភាពងាយស្រួល និងមានសុវត្ថិភាព។ ប្រព័ន្ធទូទាត់ឌីជីថលនេះ នឹងធ្វើឱ្យការទូទាត់កាន់តែប្រសើរឡើង សម្រាប់ភ្ញៀវទេសចរ និងក្រុមហ៊ុន ក៏ដូចជាពង្រឹងរូបិយប័ណ្ណក្នុងស្រុកនៃប្រទេសទាំងពីរ ព្រមទាំងសម្រួលដល់ប្រតិបត្តិការទូទាត់ និងកាត់បន្ថយចំណាយប្រតិបត្តិការ។

ធនាគារ អេស៊ីលីដា មានសាខាបុត្រសម្ព័ន្ធចំនួន ៤ គឺ សាកលវិទ្យាល័យ ពាណិជ្ជសាស្ត្រ អេស៊ីលីដា ឯ.ក, ក្រុមហ៊ុនមូលបត្រ អេស៊ីលីដា ម.ក, ធនាគារ អេស៊ីលីដា ឡាវ លីមីតធីត និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំងការិយាល័យតំណាងនៅមីយ៉ាន់ម៉ា។

គិតត្រឹមដំណាច់ខែកញ្ញា ឆ្នាំ២០២៥ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១១,៩៤ ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៩,២៨ ប៊ីលានដុល្លារអាមេរិក និងមានអតិថិជនប្រមាណជាង ៦,១៨ លាននាក់។

បច្ចុប្បន្ន ធនាគារ អេស៊ីលីដា មានដៃគូអាជីវកម្ម សរុបច្រើនជាង ០,៧១លានដៃគូ និងមានអ្នកប្រើប្រាស់អេស៊ីលីដាស៊ូភើអេប សរុបចំនួនជាង ៥,៣៨លាននាក់៕

The post កម្ពុជា-ឡាវ ដាក់ឱ្យដំណើការប្រព័ន្ធទូទាត់ឆ្លងដែនដំណាក់កាលទី២ appeared first on Kampuchea Thmey Daily.

យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ ២០២៥-២០៣០ ផ្ដោតលើអាទិភាពចម្បងៗ ៦

Din Thary — Thu, 18 Dec 2025 08:16:00 +0000

បើតាមលោកស្រី ជា សិរី ទេសាភិបាលធនាគារជាតិនៃកម្ពុជា បានគូសបញ្ជាក់ឱ្យដឹងថា យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ ត្រូវបានដាក់ចេញដោយផ្ដោតលើអាទិភាពចម្បងៗចំនួន ៦ ។

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ យុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ លោកស្រី ជា សិរី បានលើកឡើងថា ស្ថានភាពជុំវិញពិភពលោកមានការផ្លាស់ប្ដូរលឿន ជាមួយនឹងភាពមិនប្រាកដប្រជាខ្ពស់។ បច្ចេកវិទ្យាហិរញ្ញវត្ថុបានផ្តល់នូវកាលានុវត្តភាពដែលមិនធ្លាប់មានពីមុនមក ប៉ុន្តែក៏នាំមកនូវភាពងាយរងគ្រោះថ្មីៗផងដែរ។

វិបត្តិជំងឺកូវីដ-១៩ និងផលប៉ះពាល់ដែលបន្សល់ទុក បានធ្វើឱ្យប៉ះពាល់ដល់ខ្សែច្រវាក់ផ្គត់ផ្គង់សកល កំណើនសេដ្ឋកិច្ច និងនាំឱ្យប្រជាពលរដ្ឋមួយចំនួនធ្លាក់ទៅក្នុងភាពក្រីក្រ។ ការកើនឡើងនៃភាពតានតឹងភូមិសាស្ត្រនយោបាយ សង្គ្រាមពាណិជ្ជកម្ម និងជម្លោះប្រដាប់អាវុធបានបង្កផលរំខានបន្ថែមដល់ខ្សែច្រវាក់ផ្គត់ផ្គង់ ពាណិជ្ជកម្មអន្តរជាតិ ទំនុកចិត្តវិនិយោគិន និងធ្វើឱ្យស្ថានភាពសេដ្ឋកិច្ចពិភពលោក កាន់តែមានភាពមិនច្បាស់លាស់។

លោកស្រី បានបន្តថា ជាមួយនឹងចក្ខុវិស័យក្នុងការប្រែក្លាយកម្ពុជាឱ្យទៅជាប្រទេសមានចំណូលមធ្យមកម្រិតខ្ពស់ ប្រព័ន្ធហិរញ្ញវត្ថុត្រូវតែមានសមត្ថភាព និងថាមវន្តដើម្បីគាំទ្រសកម្មភាពសេដ្ឋកិច្ច ដែលមានលក្ខណៈប្រទាក់ក្រឡាជាងមុន ការធ្វើសមាហរណកម្ម កាន់តែស៊ីជម្រៅ និងផលិតភាពខ្ពស់ជាងមុនផងដែរ។

ក្នុងទិសដៅនេះ យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០៣០ នឹងឆ្លើយតបទៅនឹងការវិវត្តទាំងនេះ តាមរយៈការផ្តល់ជាផែនទីមគ្គុទេសក៍ ដែលមានចក្ខុវិស័យវែងឆ្ងាយ និងគ្រប់ជ្រុងជ្រោយ។ យុទ្ធសាស្ត្រនេះ ផ្ដោតលើអាទិភាពចម្បងៗចំនួន ៦ រួមមាន ១-ការពង្រឹងស្ថិរភាពហិរញ្ញវត្ថុ ដើម្បីការពារទំនុកចិត្ត និងភាពធន់, ២-ការជំរុញបរិយាបន្នហិរញ្ញវត្ថុ ជាពិសេស សម្រាប់ស្ត្រី យុវជន សហគ្រាសធុនមីក្រូ តូច និងមធ្យម និងសហគមជនបទ។

៣-ការអភិវឌ្ឍទីផ្សារហិរញ្ញវត្ថុឱ្យកាន់តែស៊ីជម្រៅ សំដៅធ្វើពិពិធកម្មប្រភពទុនរយៈពេលវែង, ៤-ការលើកកម្ពស់បរិវត្តកម្មឌីជីថល និងសន្តិសុខសាយប័រ ដើម្បីធានានូវសុវត្ថិភាព និងភាពទុកចិត្តនៃនវានុវត្តន៍បច្ចេកវិទ្យា,៥ -ការគាំទ្រនិងលើកកម្ពស់ហិរញ្ញវត្ថុប្រកបដោយចីរភាព ដែលគាំទ្រដល់បរិស្ថាន និងការប្រែប្រួលអាកាសធាតុ និង ៦-ការពង្រឹងអភិបាលកិច្ច និងកិច្ចសហការរវាងស្ថាប័នទាំងអស់នៅក្នុងវិស័យហិរញ្ញវត្ថុ។

លោកស្រី ជា សិរី បានបន្ថែមថា វិស័យហិរញ្ញវត្ថុដែលរឹងមាំ មិនមែនជាគោលដៅចុងក្រោយនោះទេ ប៉ុន្តែជាមូលដ្ឋានគ្រឹះសម្រាប់ការអភិវឌ្ឍសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋកម្ពុជាទាំងអស់។ លោកស្រីសង្ឃឹមយ៉ាងមុតមាំថា ការអនុវត្តប្រកបដោយប្រសិទ្ធភាពនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុនេះ នឹងបន្តពង្រឹងការផ្តល់កាលានុវត្តភាព និងលើកកម្ពស់សហគ្រិនភាព ដែលជំរុញសកម្មភាពអាជីវកម្ម បង្កើនការសន្សំឋនិងវិនិយោគសម្រាប់អនាគត និងគាំទ្រដល់កំណើនប្រកបដោយចីរភាពសម្រាប់មនុស្សជំនាន់ក្រោយ។

ការដាក់ឱ្យប្រើប្រាស់យុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០២៥-២០២៣០ នាថ្ងៃនេះ ពិតជាបញ្ជាក់ពីការប្តេជ្ញាចិត្តរួមគ្នារបស់គ្រប់ភាគីពាក់ព័ន្ធនៅក្នុងវិស័យហិរញ្ញវត្ថុទាំងមូល ក្នុងការបន្តអភិវឌ្ឍប្រព័ន្ធហិរញ្ញវត្ថុមួយដែលមានភាពធន់ ប្រកួតប្រជែង បរិយាបន្ន និងមានចក្ខុវិស័យវែងឆ្ងាយ៕

The post យុទ្ធសាស្រ្តអភិវឌ្ឍន៍វិស័យហិរញ្ញវត្ថុ ឆ្នាំ ២០២៥-២០៣០ ផ្ដោតលើអាទិភាពចម្បងៗ ៦ appeared first on Kampuchea Thmey Daily.

ធនាគារកណ្តាលកម្ពុជា-ចិន គ្រោងនឹងពង្រីកកិច្ចសហការបន្ថែមពាក់ព័ន្ធការចែករំលែកព័ត៌មានឥណទាន

Din Thary — Wed, 10 Dec 2025 02:56:40 +0000

លោក Chen Jinxiang ប្រធានធនាគារកណ្តាលចិន បានគូសបញ្ជាក់ពីគោលបំណងរបស់ខ្លួនក្នុងការពង្រីកកិច្ចសហការបន្ថែមទៀតពាក់ព័ន្ធនឹងការចែករំលែកព័ត៌មានឥណទាននៅកម្ពុជា។

ការលើកឡើងរបស់លោក Chen ធ្វើឡើងក្នុងជំនួបជាមួយលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី០៩ ខែធ្នូ ឆ្នាំ២០២៥ ដោយលោកស្រីបណ្ឌិត បានអនុញ្ញាតឱ្យគណៈប្រតិភូធនាគារកណ្តាលចិន សាខាតំបន់ស្វយ័តក្វាងស៊ី ដឹកនាំដោយលោកប្រធាន Chen Jinxiang ចូលជួបសម្តែងការគួរសម និងពិភាក្សាការងារដើម្បីលើកកម្ពស់កិច្ចសហការទ្វេភាគីឱ្យកាន់តែរឹងមាំថែមទៀត និងពង្រឹងភាពជាដៃគូយូរអង្វែងរវាងធនាគារកណ្ដាលទាំងពីរ។

កិច្ចពិភាក្សាបានផ្តោតលើប្រធានបទសំខាន់ៗដូចជា ការតភ្ជាប់ប្រព័ន្ធទូទាត់ឆ្លងដែន នវានុវត្តន៍ហិរញ្ញវត្ថុ និងការស្វែងរកកិច្ចសហការថ្មីៗថែមទៀត។

ក្នុងជំនួបនេះ លោកប្រធាន Chen Jinxiang បានលើកសសើរពីការអភិវឌ្ឍរបស់កម្ពុជា ជាពិសេសការដាក់ឱ្យដំណើរការអាកាសយាន្ដដ្ឋានអន្តរជាតិតេជោ និងបានវាយតម្លៃខ្ពស់ចំពោះកិច្ចសហប្រតិបត្តិការល្អជាមួយធនាគារជាតិនៃកម្ពុជា នាពេលកន្លងមក។

ទន្ទឹមនេះ លោកប្រធាន ក៏បានគូសបញ្ជាក់បន្ថែមពីគោលបំណងពង្រីកកិច្ចសហការថែមទៀតពាក់ព័ន្ធនឹងការចែករំលែកព័ត៌មានឥណទាននៅកម្ពុជា។

ជាការឆ្លើយតប លោកស្រី ជា សិរី ទេសាភិបាល បានស្វាគមន៍ចំពោះគម្រោងពង្រីកកិច្ចសហការនេះ និងបានមានប្រសាសន៍ពីវឌ្ឍនភាពនៃកិច្ចសហការពាក់ព័ន្ធនឹងការចែករំលែកព័ត៌មានឥណទាន ដែលកម្ពុជាសម្រេចបានជាមួយប្រទេសជាដៃគូសក្តានុពល។

លោកស្រី បានអរគុណដល់ធនាគារកណ្តាលចិន សាខាតំបន់ស្វយ័តក្វាងស៊ី ដែលបានគាំទ្រដល់ការដាក់បញ្ចូលប្រាក់រៀលក្នុងតារាងជួញដូររូបិយប័ណ្ណនៅតំបន់ស្វយ័តក្វាងស៊ី ការជំរុញការប្រើប្រាស់រូបិយវត្ថុជាតិរៀងខ្លួនក្នុងការដោះដូរពាណិជ្ជកម្មទ្វេភាគី និងការតភ្ជាប់ប្រព័ន្ធទូទាត់ឆ្លងដែន។

លោកស្រី ជា សិរី បានលើកឡើងបន្ថែមថា ភាគីទាំងពីរបាន ពិភាក្សាពីកិច្ចសហការរវៀងធនាគារកណ្តាលនៃប្រទេសទាំងពីរ ជាពិសេសក្នុងប្រព័ន្ធទូទាត់ និងបានស្វែងយល់ពីសេដ្ឋកិច្ចរបស់គ្នាទៅវិញទៅមក ជាពិសេសក្នុងគោលដៅជំរុញការវិនិយោគរបស់វិនិយោគិន នៅខេត្តគ័នស៊ី មកកម្ពុជា និងការទូទាត់ទំនិញរវៀងប្រទេសទាំងពីរ ជាប្រាក់យ៉ន់ចិន និងប្រាក់រៀលខ្មែរ។ កន្លងធនាគាកណ្តាលចិនខេត្តគ័នស៊ីតែងតែគាំទ្រយន្តការនេះតាមរយៈការដាក់ឱ្យមានអត្រាប្តូរប្រាក់ផ្ទាល់ផ្លូវការពី ប្រាក់យ៉ន់ចិន មកប្រាក់រៀល ដើម្បីសម្រួលដល់អ្នកជួញដូរ៕

The post ធនាគារកណ្តាលកម្ពុជា-ចិន គ្រោងនឹងពង្រីកកិច្ចសហការបន្ថែមពាក់ព័ន្ធការចែករំលែកព័ត៌មានឥណទាន appeared first on Kampuchea Thmey Daily.

អាមេរិក គ្រោងពង្រីកប្រតិបត្តិការវិស័យហិរញ្ញវត្ថុនៅកម្ពុជា

Din Thary — Wed, 03 Dec 2025 04:16:32 +0000

សហរដ្ឋអាមេរិកមានបំណងពង្រីកប្រតិបត្តិការក្នុងវិស័យហិរញ្ញវត្ថុបន្ថែមទៀតនៅកម្ពុជា សំដៅពង្រឹង និងពង្រីកកិច្ចសហប្រតិបត្តិការឱ្យបានកាន់តែរឹងមាំ។

លោកស្រី ជា សិរី ទេសាភិបាល ធនាគារជាតិនៃកម្ពុជា នៅរសៀលថ្ងៃទី២ ខែធ្នូ ឆ្នាំ២០២៥ បានទទួលជួបពិភាក្សាការងារ ជាមួយគណៈប្រតិភូនៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ABC) ដឹកនាំដោយ លោក Ted Osius អនុប្រធានជាន់ខ្ពស់ និងជានាយកគ្រប់គ្រងប្រចាំតំបន់នៃ US-ABC ដើម្បីស្វែងយល់ពីវឌ្ឍនភាពសេដ្ឋកិច្ច និងសក្តានុពលវិនិយោគក្នុងវិស័យហិរញ្ញវត្ថុកម្ពុជា សំដៅពង្រឹង និងពង្រីកកិច្ចសហប្រតិបត្តិការឱ្យបានកាន់តែរឹងមាំថែមទៀត។

កិច្ចពិភាក្សាបានគូសបញ្ជាក់ពីសារៈសំខាន់នៃការសម្រេចបានកិច្ចព្រមព្រៀងពាណិជ្ជកម្មកម្ពុជា-អាមេរិក ការបន្តលើកកម្ពស់តម្លាភាពក្នុងវិស័យធុរកិច្ច និងសុចរិតភាពហិរញ្ញវត្ថុ និងការបង្កើតបរិយាកាសវិនិយោគល្អ សម្រាប់ទាក់ទាញគម្រោងវិនិយោគសហរដ្ឋអាមេរិកនៅកម្ពុជាឱ្យបានកាន់តែច្រើន។

ក្នុងជំនួបនេះ លោក Ted Osius បានលើកឡើងពីកត្តាអំណោយផលនៃគោលនយោបាយគាំទ្រធុរកិច្ចរបស់រាជរដ្ឋា ភិបាលកម្ពុជា ក្រោមការដឹកនាំរបស់រដ្ឋាភិបាលកម្ពុជា និងបញ្ជាក់ពីការទទួលបានការស្វាគមន៍យ៉ាងកក់ក្តៅពីសម្តេចធិបតី និងការលើកទឹកចិត្តឱ្យមានការសន្ទនាដោយបើកចំហ។

បន្ថែមលើនេះ សមាជិកគណៈប្រតិភូ US-ABC ដែលជាតំណាងក្រុមហ៊ុនអាមេរិកធំៗកំពុងមានប្រតិបត្តិការនៅកម្ពុជា ក៏បានជម្រាបជូនពីវឌ្ឍនភាពនៃប្រតិបត្តិការនៅកម្ពុជា និងបញ្ជាក់ពីគម្រោងពង្រីកប្រតិបត្តិការថែមទៀតក្នុងវិស័យហិរញ្ញវត្ថុ ព្រមទាំងបានថ្លែងអំណរគុណធនាគារជាតិនៃកម្ពុជា ដែលតែងផ្ដល់កិច្ចសហការ និងការគាំទ្រនាពេលកន្លងមក។

ជាការឆ្លើយតប លោកស្រី ទេសាភិបាល បានបង្ហាញការស្វាគមន៍យ៉ាងកក់ក្តៅចំពោះទស្សនកិច្ចធុរកិច្ចរបស់គណៈប្រតិភូ US-ABC មកកាន់កម្ពុជា និងបានជម្រាបជូនពីប្រវត្តិសេដ្ឋកិច្ចកម្ពុជា និងវឌ្ឍនភាពសេដ្ឋកិច្ចនាពេលបច្ចុប្បន្ន។

លោកស្រីបានមានប្រសាសន៍ពីសារៈសំខាន់នៃការសន្ទនាដោយបើកចំហជាមួយគ្រប់ដៃគូសហការ រួមទាំងវិនិយោគិនសហរដ្ឋអាមេរិក និងបានលើកឡើងពីបទពិសោធជោគជ័យនៃការអភិវឌ្ឍប្រព័ន្ធទូទាត់បាគងរបស់កម្ពុជា ដោយមានកិច្ចសហការជាមួយវិស័យឯកជន ដែលជាឧទាហរណ៍គំរូសម្រាប់បង្ហាញវិនិយោគិនសហរដ្ឋអាមេរិកពីសក្តានុពលវិនិយោគនៅកម្ពុជាក៏ដូចជាឱកាសក្នុងការបង្កើនកិច្ចសហការក្នុងវិស័យបច្ចេកវិទ្យាហិរញ្ញវត្ថុ និងនវានុវត្តន៍៕

The post អាមេរិក គ្រោងពង្រីកប្រតិបត្តិការវិស័យហិរញ្ញវត្ថុនៅកម្ពុជា appeared first on Kampuchea Thmey Daily.

លោកស្រី ជា​ សិរី Archives - Kampuchea Thmey Daily

​លោកស្រី ​ជា សិរី៖ ​ប្រសិនបើ​អតិថិជន​សម្រុក​ដកប្រាក់​ នឹង​ធ្វើ​ឱ្យ​ធនាគារ​បង្វិល​សង​មិនទាន់​