ការបន្តយុទ្ធនាការចុះបង្ក្រាបបទល្មើសបច្ចេកវិទ្យា (Online Scams) របស់គណៈ​បញ្ជាការ​ឯកភាព​រដ្ឋ​បាលខេត្តប៉ៃលិន គឺក្នុងគោលបំណងរឹតបន្តឹងនៃការអនុវត្តរបបសន្តិសុខសង្គម របៀប​រៀប​រយ ​និងសណ្តាប់ធ្នាប់សាធារណៈនៅក្នុងខេត្តទាំងមូល ស្របតាម​វិធាន​ការ​ចាំបាច់​របស់​រាជ​រដ្ឋាភិបាល ​ដោយត្រូវយកចិត្តទុកដាក់ខ្ពស់ លើការងារគ្រប់គ្រងសុវត្ថិភាព តាម​ទីតាំង​រស់​នៅ​ប្រមូល​ផ្តុំ ​ការពិនិត្យការតាំងទីលំនៅរបស់ជនបរទេស, ទីតាំងកាស៊ីណូ ដើម្បីទប់ស្កាត់ និង​បង្ក្រាប​សកម្ម​ភាព​ជួញដូ​រ​មនុស្ស ជាពិសេសបទល្មើសបច្ចេកវិទ្យា ឱ្យមានប្រសិទ្ធភាពខ្ពស់។

ក្រោមគោលនយោបាយ និងឆន្ទៈដឹកនាំប្រកបដោយភាពម៉ឺងម៉ាត់ ច្បាស់​លាស់​របស់​រាជ​រដ្ឋាភិបាល​ដែល​មានសម្ដេច​មហា​បវរ​ធិបតី ហ៊ុន ម៉ាណែត ជានាយករដ្ឋមន្ត្រី បាន​កំពុង​អនុវត្ត​ច្បាប់ ​លើ​ករណី​ឆបោកតាមប្រព័ន្ធអនឡាញដោយឃាត់ខ្លួនឧក្រិដ្ឋជន និងអ្នក​ពាក់​ព័ន្ធ​បញ្ជូន​ទៅ​តុលាការ ដើម្បី​ផ្ដន្ទាទោស និងអនុវត្តនីតិវិធី បណ្ដេញចេញទៅប្រទេសកំណើតជាបន្តបន្ទាប់ ជា​ពិសេ​​សបាន​សហការផ្ដល់ព័ត៌មានអំពីខ្សែបណ្ដាញមេខ្លោង ទៅកាន់​ប្រទេ​សក្នុ​ង​តំបន់ និង​ក្រៅ​តំបន់​ជា​ច្រើន​ករណី​។

បន្ទាប់ពីកងកម្លាំងគណៈបញ្ចាការឯកភាពខេត្តប៉ៃលិន បន្ត​ចុះ​ពិនិត្យ​នៅ​តាមទី​តាំង​ស្នាក់​នៅ​ប្រមូល​ផ្តុំ ​បានរកឃើញទីតាំងមួយកន្លែង សង្ស័យមានលួចបង្កប់បទល្មើសបច្ចេកវិទ្យា (Online Scams) ដោយឃាត់ខ្លួនជនជាតិចិន ចំនួន ០៧នាក់ និងវត្ថុតាងមួយចំនួនរួមមានកុំព្យូទ័រ ALL in ​ONE ចំនួន១៨គ្រឿង,MONITER ចំនួន ៤គ្រឿង, ទូរស័ព្ទដៃ ចំនួន ១៤៧ គ្រឿង, CPU ចំនួន​ ៣គ្រឿង, អាគុយទប់ភ្លើង ចំនួន ២គ្រឿង, តុ ចំនួន ១១តុ, ស៊ីមស្មាត ចំនួន ១៣ស៊ីម, និង​អត្ត​សញ្ញាណប័ណ្ណជនជាតិចិន ចំនួន ១សន្លឹក ហើយសូមរំលឹកថាទីតាំងនេះកន្លងមក បាន​កាត់​ផ្តាច់​ប្រព័ន្ធ​ខ្សែកាបអុបទិចអ៊ីនធើណេត ប៉ុន្តែជនសង្ស័យបានប្រើប្រាស់ស៊ីមកាតជំនួសវិញ៕

The post អាជ្ញាធរខេត្តប៉ៃលិន បន្តចុះត្រួតពិនិត្យទីតាំងស្នាក់នៅប្រមូលផ្តុំ និង​ឃាត់​ខ្លួន​ជន​ជាតិ​ចិន​ ៧នាក់ សង្ស័យលួចបង្កប់បទល្មើស Online Scams appeared first on Kampuchea Thmey Daily.

ក្នុងការចុះពិនិត្យផ្ទាល់នេះដែរ ក៏មានការអញ្ជើញចូលរួមពីលោកស្រី បាន ស្រីមុំ អភិបាលខេត្តប៉ៃលិន អមដំណើរដោយក្រុមការងារបច្ចេកទេស និងមន្ត្រីជំនាញពាក់ព័ន្ធជាច្រើននាក់ផងដែរ។

ទេសរដ្ឋមន្ត្រីទទួលបន្ទុកបេសកកម្មពិសេស អ៊ី ឈាន ថ្លែងថាការរៀបចំសណ្តាប់ធ្នាប់សាធារណៈ ការស្ថាបនាផ្លូវ ការដាំដើមឈើលម្អ និងការរៀបចំបរិស្ថានជុំវិញមាត់ច្រកទ្វារ មិនត្រឹមតែ ដើម្បីសម្រួលដល់ការធ្វើដំណើរ និងការដឹកជញ្ជូនទំនិញប៉ុណ្ណោះទេ ប៉ុន្តែគឺជាការបង្ហាញពីមុខមាត់ របស់ជាតិ នៅមាត់ច្រកទ្វារអន្តរជាតិ ដែលតភ្ជាប់ជាមួយប្រទេសជិតខាង។ ជាមួយនិងការរៀបចំឱ្យមានសោភ័ណភាពស្រស់បំព្រង នៅច្រកទ្វារព្រំដែនអន្តរជាតិព្រំ គឺជាមេដែកយ៉ាងសំខាន់ ក្នុងការទាក់ទាញភ្ញៀវទេសចរជាតិ និងអន្តរជាតិ  នៅពេលដែលតំបន់ព្រំដែនមានភាពស្អាត មានសណ្តាប់ធ្នាប់ និងមានបរិយាកាសល្អ វានឹងក្លាយជាគោលដៅទេសចរណ៍ដ៏ទាក់ទាញមួយ ដែលធ្វើឱ្យអ្នកដំណើរមិនត្រឹមតែឆ្លងកាត់ ប៉ុន្តែអាចឈប់សម្រាក កម្សាន្ត និងទស្សនាទិដ្ឋភាពនានា។

លោក អ៊ី ឈាន ក៏បានថ្លែងទៀតថា លំហូរទេសចរ នៅច្រកទ្វារព្រំដែន នឹងនាំមកនូវអត្ថប្រយោជន៍ ជាច្រើនដូចជា ទី១. សេដ្ឋកិច្ចមូលដ្ឋាន  គឺបានបង្កើនចំណូល ដល់ប្រជាពលរដ្ឋ តាមរយៈការលក់ដូរចំណីអាហារ សេវាកម្មស្នាក់នៅ និងការលក់ផលិតផលកសិកម្មក្នុងស្រុក (ដូចជា ធុរេន មៀនប៉ៃលិន និងកសិផលផ្សេងៗ)។ ទី១.ការងារ គឺជាការបង្កើតឱកាសការងារ ដល់យុវជនក្នុងតំបន់ តាមរយៈសេវាកម្មទេសចរណ៍ និងបដិសណ្ឋារកិច្ច និងទី៣.គឺការទំនាក់ទំនងអន្តរជាតិ តាមរយៈការលើកកម្ពស់ទំនាក់ទំនងសហប្រតិបត្តិការ និងការផ្លាស់ប្តូរវប្បធម៌ រវាងប្រជាជន នៃប្រទេសទាំងពីរផងដែរ។

ជាមួយគ្នានេះលោក ក៏បានផ្ដាំផ្ញើ និងជំរុញ ឱ្យក្រុមការងារបច្ចេកទេស ត្រូវអនុវត្តការងារ ឱ្យបានហ្មត់ចត់ និងប្រកបដោយគុណភាពខ្ពស់។

គួររំលឹកដែរថា៖សកម្មភាពចុះពិនិត្យ របស់ថ្នាក់ដឹកនាំនាពេលនេះ គឺជាការប្តេជ្ញាចិត្តយ៉ាងមុតមាំ ក្នុងការប្រែក្លាយតំបន់ព្រំដែនខេត្តប៉ៃលិន ឱ្យទៅជាតំបន់សេដ្ឋកិច្ច និងទេសចរណ៍ដ៏មានសក្តានុពល ដើម្បីជំរុញកំណើនសេដ្ឋកិច្ចជាតិ និងលើកកម្ពស់ជីវភាពរស់នៅ របស់ប្រជាពលរដ្ឋ ឱ្យកាន់តែប្រសើរឡើងជាលំដាប់ផងដែរ៕

អត្ថបទ/សេង សុវណ្ណារិទ្ធ

The post ទេសរដ្ឋមន្ដ្រី អ៊ី ឈាន ៖ ការកសាងហេដ្ឋារចនាសម្ព័ន្ធនៅតំបន់ព្រំដែន គឺជាយុទ្ធសាស្ត្រយូរអង្វែង ដើម្បីបម្រើឱ្យប្រយោជន៍សាធារណៈ សម្រាប់ជាតិ និងប្រជាជន appeared first on Kampuchea Thmey Daily.

ក្នុងឱកាសចុះពិនិត្យនោះ លោកស្រី បាន ស្រីមុំ មានប្រសាសន៍ថា ក្រោមគោលនយោបាយឈ្នះឈ្នះ និងក្រោមមាគ៌ាដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យប្រទេសជាតិទទួលបាននូវសុខសន្តិភាពពេញលើផ្ទៃប្រទេស មានស្ថេរភាពនយោបាយ ជាពិសេសបានធ្វើឱ្យខេត្តប៉ៃលិន ដែលជាខេត្តជាយដែន និងធ្លាប់ជាសមរភូមិយ៉ាងក្តៅគគុកមានការអភិវឌ្ឍ និងរីកចម្រើនលើគ្រប់វិស័យ ហើយជីវភាពរបស់ប្រជាពលរដ្ឋកាន់ តែធូរធាឡើងពីមួយថ្ងៃទៅមួយថ្ងៃគួរជាទីមោទន។

លោកស្រី អភិបាលខេត្ត មានប្រសាសន៍បញ្ជាក់ថា៖« បច្ចុប្បន្ននេះអាជ្ញាធរខេត្តប៉ៃលិន បានកំពុងខិតខំរៀបចំសណ្តាប់ធ្នាប់ និងកែលម្អសោភ័ណភាពនៅក្នុងខេត្តយ៉ាងសស្រាក់សស្រាំដូចជា ការកសាងហេដ្ឋារចនាសម្ព័ន្ធ ការកែលម្អសួនច្បារសាធារណៈ ការដាក់ភ្លើងបំភ្លឺ និងភ្លើងលំអនាពេលរាត្រី ការសម្អាត អនាម័យបរិស្ថាន នៅតាម ទីសាធារណៈ និងតាមតំបន់រមណីយ៍ដ្ឋានទេសចរណ៍នានា»។ លោកស្រីបញ្ជាក់ថា ការរៀបចំទាំងនេះ ដើម្បីឱ្យខេត្តប៉ៃលិនប្រែក្លាយជាខេត្តមួយមានការរីកចម្រើន និងមានទេសភាពស្រស់បំព្រង បរិស្ថានល្អ ព្រមទាំងប្រែក្លាយជាខេត្តគោលដៅទេសចរណ៍សម្រាប់ថ្ងៃអនាគតផងដែរ។

ឆ្លៀតក្នុងឱកាសនោះផងដែរ លោកស្រី បាន ស្រីមុំ សំណូមពរដល់ប្រជាពលរដ្ឋ ត្រូវរួមគ្នាសម្អាតអនាម័យបរិស្ថាន និងជួយថែរក្សាទ្រព្យសម្បត្តិសាធារណៈរបស់រដ្ឋ ជាពិសេសមេត្តាយោគយល់ និងអធ្យាស្រ័យ ចំពោះផលប៉ះពាល់ ព្រមទាំងចូលរួមសហការជាមួយក្រុមការងារបច្ចេកទេស និងអាជ្ញាធរមូលដ្ឋាន ធ្វើការកែលម្អហេដ្ឋារចនាសម័ន្ធ និងសោភ័ណភាពខេត្តរបស់យើង ដើម្បីទាក់ទាញភ្ញៀវទេសចរជាតិ អន្តរជាតិ មកលេងកម្សាន្តផងដែរ៕

អត្ថបទ៖ សេង សុវណ្ណារិទ្ធ

The post អភិបាលខេត្តប៉ៃលិន ចុះពិនិត្យមើលការរៀបចំកែលម្អហេដ្ឋារចនាសម្ព័ន្ធ និងសោភ័ណភាព នៅច្រកទ្វារព្រំដែនអន្តរជាតិព្រំ appeared first on Kampuchea Thmey Daily.

លោកស្រី បាន ស្រីមុំ លើកឡើងថា រាជរដ្ឋាភិបាលកម្ពុជា បានដាក់ចេញនូវវិធានការម៉ឺងម៉ាត់ជាបន្តបន្ទាប់ ដើម្បីជំរុញឲ្យអាជ្ញាធររាជធានី-ខេត្ត ពង្រឹងសមត្ថភាពមន្ត្រី ក្នុងការបង្ក្រាប និងទប់ស្កាត់បទល្មើសឆបោកតាមប្រព័ន្ធអនឡាញ ដែលបំផ្លាញកិត្តិយសជាតិ។

លោកស្រីអភិបាលខេត្ត បញ្ជាក់ថា គោលបំណង នៃការរឹតបន្តឹងសន្តិសុខនេះ ដើម្បីត្រួតពិនិត្យ និងគ្រប់គ្រងជនបរទេសដែលចូលមកស្នាក់នៅ ឬធ្វើការដោយខុសច្បាប់ ក្នុងភូមិសាស្ត្រខេត្តប៉ៃលិន។ ការបង្ក្រាបបទល្មើសឆ្លងដែន រួមមាន ៖ ការទប់ស្កាត់ការជួញដូរមនុស្ស , ការលួចឆ្លងដែនខុសច្បាប់ , បទល្មើសគ្រឿងញៀនតាមព្រំដែន , ការធានាសុខសុវត្ថិភាពជូនប្រជាពលរដ្ឋ , ការបង្កើនទំនុកចិត្តដល់ប្រជាពលរដ្ឋក្នុងមូលដ្ឋានតាមរយៈការត្រួតពិនិត្យយានយន្តដែលធ្វើចរាចរណ៍ឆ្លងកាត់ខេត្តជាដើម។ ក្នុងកិច្ចប្រតិបត្តិការនេះ សមត្ថកិច្ចបានធ្វើការពិនិត្យឯកសារពាក់ព័ន្ធ ដូចជា លិខិតឆ្លងដែន ទិដ្ឋាការ និងប័ណ្ណស្នាក់នៅ របស់ជនបរទេសគ្រប់រូប ដើម្បីធានាថាពួកគេគោរពតាមច្បាប់ ស្តីពីអន្តោប្រវេសន៍ នៃព្រះរាជាណាចក្រកម្ពុជា។

លោកស្រី បាន ស្រីមុំ ក៏បានសង្កត់ធ្ងន់ទៅកាន់កងកម្លាំងអនុវត្តច្បាប់ទាំងអស់ ត្រូវប្រកាន់ខ្ជាប់នូវក្រមសីលធម៌វិជ្ជាជីវៈ អនុវត្តការងារដោយតម្លាភាព និងភាពម៉ឺងម៉ាត់។ ទន្ទឹមនឹងនោះ លោកស្រី ក៏បានអំពាវនាវដល់ម្ចាស់ផ្ទះសំណាក់ សណ្ឋាគារ និងម្ចាស់អាជីវកម្មនានា ក្នុងខេត្តប៉ៃលិន ត្រូវសហការរាយការណ៍ជាបន្ទាន់ដល់សមត្ថកិច្ច ប្រសិនបើឃើញមានវត្តមានជនបរទេសសង្ស័យគ្មានឯកសារត្រឹមត្រូវ។

គួររំលឹកដែរថា សកម្មភាពនេះសបញ្ជាក់ឲ្យឃើញពីការប្តេជ្ញាចិត្តយ៉ាងមុតមាំរបស់រដ្ឋបាលខេត្តប៉ៃលិនក្នុងការអនុវត្តតាមគោលការណ៍ណែនាំរបស់រាជរដ្ឋាភិបាលកម្ពុជា ដែលរដ្ឋបាលខេត្ត បានប្រកាសជំហរយ៉ាងច្បាស់ថា នឹងមិនអត់ឱនចំពោះបុគ្គល ឬមេខ្យល់ណានាំជនបរទេសលួចឆ្លងដែនខុសច្បាប់ឡើយ និងពង្រឹងយន្តការការងាររបស់គណៈបញ្ជាការឯកភាពខេត្តជាគន្លឹះ ក្នុងការលុបបំបាត់បទល្មើសគ្រប់ប្រភេទឲ្យអស់ពីទឹកដីកម្ពុជា។ ក្រោមការដឹកនាំប្រកបដោយភាពឈ្លាសវៃរបស់លោកស្រី បាន ស្រីមុំ ខេត្តប៉ៃលិន នៅតែបន្តជាខេត្តមានសុវត្ថិភាព និងមានការគ្រប់គ្រងសន្តិសុខយ៉ាងល្អប្រសើរ ដែលជាមូលដ្ឋានគ្រឹះដ៏សំខាន់សម្រាប់ការអភិវឌ្ឍសេដ្ឋកិច្ច និងជីវភាពប្រជាពលរដ្ឋផងដែរ៕
អត្ថបទ ៖ សេង សុវណ្ណារិទ្ធ

The post រដ្ឋបាលខេត្តប៉ៃលិន បន្តរឹតបន្តឹងការត្រួតពិនិត្យជនបរទេសខុសច្បាប់ ដើម្បីពង្រឹងសន្តិសុខសណ្តាប់ធ្នាប់សាធារណៈ appeared first on Kampuchea Thmey Daily.

លោកស្រី បាន ស្រីមុំ មានប្រសាសន៍នាំមកនូវការផ្ដាំផ្ញើសួរសុខទុក្ខពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែល សម្តេច តែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ក្នុងនោះ លោកស្រី ក៏បានសម្តែងនូវការសោកស្ដាយចំពោះការខូចខាតបាត់បង់ផ្ទះសម្បែង ទ្រព្យសម្បត្តិ ដោយគ្រោះមហន្តរាយ និងលើកទឹកចិត្តដល់ប្រជាពលរដ្ឋរងគ្រោះ សូមកុំអស់សង្ឃឹម ត្រូវខិតខំប្រឹងប្រែងប្រកបមុខរបររកស៊ី ដើម្បីអភិវឌ្ឍន៍សេដ្ឋកិច្ចគ្រួសារទៅថ្ងៃខាងមុខបន្តទៀត។

លោកស្រី លើកឡើងថា គ្រោះថ្នាក់ធម្មជាតិ គឺតែងតែកើតមានឡើងជាយថាហេតុ ជាក់ស្តែងកាលពីរសៀលថ្ងៃទី ២០ ខែមេសា ឆ្នាំ ២០២៦ មានភ្លៀងធ្លាក់ លាយឡំនឹងខ្យល់កន្ត្រាក់ បណ្តាលឱ្យលំនៅឋានរបស់ប្រជាពលរដ្ឋរលំទាំងស្រុង ចំនួន ១២ ខ្នង (ស្មើនឹង ១២ គ្រួសារ) , របើកដំបូលផ្ទះ ចំនួន ៧៥ ខ្នង (ស្មើនឹង ៧៥ គ្រួសារ) ​នៅឃុំស្ទឹងត្រង់ ស្រុកសាលាក្រៅ ប៉ុន្តែមិនប៉ះពាល់ដល់អាយុជីវិតមនុស្ស និងសត្វ នោះទេ ដូច្នេះសូមមានការប្រុងប្រយ័ត្នខ្ពស់។ បន្ថែមនោះ បើមានបញ្ហាអ្វីកើតឡើងក្នុងមូលដ្ឋានរបស់ប្រជាពលរដ្ឋរស់នៅ សូមប្រញាប់រាយការណ៍ទៅកាន់អាជ្ញាធរមូលដ្ឋានដែលនៅជិតបំផុតឱ្យបានលឿន ដើម្បីក្រុមការងារចុះជួយអន្តរាគមន៍ និងផ្តល់អំណោយសង្គ្រោះបន្ទាន់ បានទាន់ពេលវេលាក្នុងការចូលរួមសម្រាលការខ្វះខាតនានាជាបណ្តោះអាសន្ន។

ជាមួយនេះ លោកស្រី បាន ស្រីមុំ ក៏បានក្រើនរំលឹកដល់ប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ ដើម្បីធានាបាននូវសុវត្ថិភាពផ្ទាល់ខ្លួន និងសេចក្តីសុខក្រុមគ្រួសារទាំងមូល ដែលងាយបង្កការគ្រោះថ្នាក់កើតឡើង និងសូមលើកទឹកចិត្តពលរដ្ឋ កុំឱ្យមានការអស់សង្ឃឹម ត្រូវខិតខំប្រឹងប្រែងប្រកបមុខរបររកស៊ី ដើម្បីអភិវឌ្ឍន៍សេដ្ឋកិច្ចគ្រួសារទៅថ្ងៃខាងមុខបន្តទៀត ហើយបើទោះបីជាអំណោយទាំងនេះ មិនអាចដោះស្រាយក្នុងជីវភាពរបស់ពួកគាត់បានយូរអង្វែងក្តី តែក៏អាចដោះស្រាយបានមួយរយៈផងដែរ ជាពិសេសត្រូវយកចិត្តទុកដាក់ថែទាំសុខភាព និងមានការប្រុងប្រយ័ត្នខ្ពស់ចំពោះគ្រោះធម្មជាតិនានា។

គួរជម្រាបថា អំណោយសង្គ្រោះបន្ទាន់ដែលផ្តល់ជូនប្រជាពលរដ្ឋរងគ្រោះដោយសារខ្យល់កន្ត្រាក់ រួមមាន ៖ អង្ករ ៥០ គីឡូក្រាម , តង់កៅស៊ូ ២ (4x6m និង2x3m) , ឃីត ១ កញ្ចប់ (ទឹកត្រី និងទឹកស៊ីអ៊ីវ , ត្រី ខ , កន្ទេល មុង ភួយ , ឆ្នាំងបាយ ឆ្នាំងខ្ទះ ចានបាយ វែកបាយ វែកសម្ល ,ទឹកសុទ្ធ) និងថវិកាចំនួន ៥០ ម៉ឺនរៀល៕
អត្ថបទ ៖ សេង សុវណ្ណារិទ្ធ

The post ពលរដ្ឋរងគ្រោះដោយខ្យល់កន្ត្រាក់ជិត ៩០ គ្រួសារ ក្នុងឃុំស្ទឹងត្រង់ ទទួលអំណោយសង្គ្រោះបន្ទាន់សាខាកាកបាទក្រហមកម្ពុជាខេត្តប៉ៃលិន appeared first on Kampuchea Thmey Daily.

ការ​ប្រកួត​កីឡា​សិស្ស​បឋម​សិក្សា-មធ្យម​សិក្សា ប្រចាំ​ឆ្នាំ ២០២៥-២០២៦​ ធ្វើ​ឡើង​ដើម្បី​ជំរុញ​វិស័យ​កីឡា​​ក្នុង​ខេត្ត​ឲ្យ​កាន់​តែ​មាន​សកម្មភាព​ផុល​ផុស និង​រីក​ចម្រើន ព្រម​ទាំង​​បង្កើន​សាមគ្គីភាព មិត្តភាព និង​សុខភាព​សម្រាប់​សិស្សានុសិស្ស​​ក៏ដូច​ជា​មហាជន។

ថ្លែង​ក្នុង​ពិធី​បិទ​ស្ថិត​នៅបរិវេណវិទ្យាល័យ ហ៊ុន សែន ក្រុងទេពនិមិត្តប៉ៃលិន លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន បាន​លើក​ឡើង​ថា បច្ចុប្បន្ន រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បាននិង​កំពុងយកចិត្តទុកដាក់ខ្ពស់ ចំពោះវិស័យកីឡាគ្រប់ប្រភេទ ដែលធ្វើវិស័យកីឡានៅទូទាំងប្រទេស មានការរីកចម្រើនយ៉ាងខ្លាំង ឈាន​ដល់​ការ​ទទួលសមិទ្ធផល​ ជាបន្តបន្ទាប់លើឆាកអន្តរជាតិ។ សមិទ្ធផលទាំងអស់នេះ គឺកើតចេញពីថ្ងៃជ័យជំនះ ៧ មករា ១៩៧៩ ដែលជាថ្ងៃ កំណើតទី២ របស់ប្រជាជនកម្ពុជា និងក្រោមនយោបាយឈ្នះឈ្នះ​របស់សម្តេចតេជោ ហ៊ុន សែន ប្រធាន​ព្រឹទ្ធសភា ដែល មិនអាចកាត់ថ្លៃបាន។

លោកស្រី​អភិបាលខេត្ត បាន​ថ្លែងអំណរគុណយ៉ាងជ្រាលជ្រៅ ចំពោះមន្ទីរអប់រំ យុវជន និងកីឡាខេត្ត ក៏ដូច​ជា​សប្បុរសជននានា ដែលបានចូលរួម​ និង​ឧបត្ថម្ភគាំទ្រ ក្នុងការលើកស្ទួយវិស័យ កីឡាក្នុងខេត្ត ឱ្យមានការរីកចម្រើន។ ជាពិសេសបានផ្តល់ឱកាស ដល់សិស្សានុសិស្សបានបង្ហាញ​សមត្ថភាព ​ដើម្បី​បង្កើន​បទពិសោធ​ ​និង​អភិវឌ្ឍ​សមត្ថភាព​ ឱ្យក្លាយជាកីឡាករ កីឡាការិនី​ដ៏ល្អ សម្រាប់ឆ្ពោះទៅការប្រកួតថ្នាក់ជាតិ។

ជា​មួយ​គ្នា​នេះ លោក​ បាន ស្រីមុំ ​បាន​ជម្រុញដល់មន្ទីរអប់រំ ត្រូវយកចិត្តទុកដាក់ទៅលើហេដ្ឋារចនាសម្ព័ន្ធកីឡា «ឱ្យមានច្រើនប្រភេទទៅតាមតម្រូវការ និងស្ថានភាពជាក់ស្តែងរបស់សាលា»។ ប្រសិន​បើទីលានមានស្រាប់ត្រូវថែរក្សា ជួសជុល និងកែលម្អ ត្រូវបណ្តុះបណ្តាលធន​មនុស្ស អត្តពលិក ឱ្យចេះស្រលាញ់ចូលចិត្តលេងកីឡា ស្របទៅនឹងយុទ្ធសាស្ត្រកំណែទម្រង់លើផ្នែកអប់រំកាយ និងកីឡា ដោយយុវជនម្នាក់ត្រូវមានជំនាញកីឡាមួយប្រភេទយ៉ាងតិចប្រចាំជីវិត។

ជាមួយគ្នានេះ លោកស្រី បាន​ផ្តាំផ្ញើដល់ប្អូនៗ ក្មួយៗ ក្រុមកីឡាករ កីឡាការិនី​​ទាំង​អស់ ត្រូវខិតខំប្រកួត តាមលក្ខណៈបច្ចេកទេស និងត្រូវមានសាមគ្គីភាព យោគយល់អធ្យាស្រ័យគ្នាទៅវិញទៅមក ព្រោះ ថាការប្រកួត តែងតែមានចាញ់ និងឈ្នះ ហើយជៀសមិនផុតពីការប៉ះពាល់គ្នាបន្តិចបន្តូចមិនខានឡើយ ជាពិសេសត្រូវជៀស ឱ្យឆ្ងាយ ពីគ្រឿងញៀន និងអំពើអបាយមុខផ្សេងៗ ដោយនាំគ្នាលេងកីឡាដើម្បីសុខភាព នឹងក្លាយខ្លួនជាទំពាំងស្នងឫស្សីសម្រាប់ ប្រទេសជាតិនាពេលអនាគត់ផងដែរ។

​តាមរបាយការណ៍របស់លោក តង់ ធារ៉ា ប្រធានមន្ទីរអប់រំ យុវជន និងកីឡាបានឱ្យដឹងថាការ ការប្រកួត​ចាប់ពីថ្ងៃទី២១ ដល់ ៣០ ខែមីនាឆ្នាំ២០២៦ ដោយសាលា​​​ចំនួន ២៧ ក្នុងនោះមាន​សាលាបឋមសិក្សា​ចំនួន ១៧  សាលា និងសាលាមធ្យមសិក្សា​ចំនួន ១០ សាលា ស្មើ​នឹង​កីឡាករ ៩១២ នាក់ និង​កីឡាការីនី​ ៤៤៦ នាក់។

លទ្ធផល​​ផ្នែក​បឋម​សិក្សា

វិញ្ញាសា​បាល់ទះនារី

• លេខ១៖ ក្រុមវិទ្យាល័យ ហ៊ុន សែន ក្រុងទេពនិម្មិតប៉ៃលិន
• លេខ២៖ ក្រុម​វិទ្យាល័យហ៊ុន សែន សាលាក្រៅ
• លេខ៣៖ ក្រុមអនុវិទ្យាល័យ បយ៉ាខា

វិញ្ញាសា​បាល់ទះបុរស

• លេខ១៖ ក្រុម​វិទ្យាល័យ ហ៊ុន សែន ក្រុងទេពនិម្មិតប៉ៃលិន
• លេខ២៖ ក្រុមវិទ្យាល័យ ហ៊ុន សែន សាលាក្រៅ
• លេខ៣៖ ក្រុម​វិទ្យាល័យ ពន្លឺប៉ៃលិន។

លទ្ធផលផ្នែក​មធ្យម​សិក្សា

វិញ្ញាសា​បាល់ទះ​នារី

• លេខ ១៖ ក្រុមវិទ្យាល័យ ហ៊ុន សែន ក្រុងទេពនិម្មិតប៉ៃលិន
• លេខ ២៖ ក្រុម វិទ្យាល័យ ហ៊ុន សែន សាលាក្រៅ
• លេខ ៣៖ ក្រុមវិទ្យាល័យ សន្តិភាព។

វិញ្ញាសា​បាល់ទាត់​នារី

• លេខ ១៖ ក្រុម​ វិទ្យាល័យ ហ៊ុន សែន ក្រុងទេពនិម្មិតប៉ៃលិន
• លេខ ២៖ ក្រុម អនុវិទ្យាល័យ ភ្នំកុយ
• លេខ៣៖ ក្រុម អនុវិទ្យាល័យ ភ្នំយ៉ាត។

វិញ្ញាសា​បាល់ទាត់​បុរស

• លេខ១៖ ក្រុម​វិទ្យាល័យ ហ៊ុន សែន ក្រុងទេពនិម្មិតប៉ៃលិន
• លេខ២៖ ក្រុម​វិទ្យាល័យ មរតក ប៊ុន សុថា ផ្សារព្រំ
• លេខ៣៖ ក្រុមវិទ្យាល័យ ហ៊ុន សែន សាលាក្រៅ

អត្ថបទ ៖ សេង សុវណ្ណារិទ្ធ

The post លោកស្រីអភិបាល​ខេត្តប៉ៃលិន ជំរុញមន្ទីរ​អប់រំ​ខេត្ត​យក​ចិត្ត​ទុក​ដាក់​អភិវឌ្ឍ​វិស័យ​កីឡា appeared first on Kampuchea Thmey Daily.

ការចេញមកបញ្ជាក់របស់អភិបាលខេត្តប៉ៃលិន នាព្រឹកថ្ងៃទី១៣ ខែមករា  នេះ គឺបន្ទាប់ពីកាលពីថ្ងៃទី១២ ខែមករា មានគណនីហ្វេសប៊ុកដែលមានប្រជាប្រិយភាពមួយឈ្មោះ «អវតារស» បង្ហោះសាថា«ទំនិញថៃចូលតាមប៉ៃលិនជាមធ្យម 200 – 300 Containers(កុងតឺន័រ) ក្នុង1ថ្ងៃ..បន្តបណ្ដាញចែកចាយដូចសរសៃឈាម»។

ឆ្លើយតបនឹងការផ្សព្វផ្សាយបែបនេះ អភិបាលខេត្តប៉ៃលិន លោកស្រី បាន ស្រីមុំ សរសេរលើទំព័រហ្វេសប៊ុកដូច្នេះ៖«នេះជាព័ត៌មានក្លែងក្លាយ សូមសាធារណៈជន ជាពិសេសអ្នកក្នុងខេត្តផ្ទាល់ មុនជឿលើព័ត៌មានអ្វីមួយសូមមេត្តាតាមដានពិនិត្យមើលផេកអ្នកបង្ហោះឱ្យបានច្បាស់លាស់ តើអ្នកនោះជាខ្មែរនៅក្នុងស្រុក ឬផេកនោះជាផេកបិទមុខក្លែងខ្លួន មានគោលបំណងបំពុលសង្គមមានការភាន់ច្រឡំ។ នាងខ្ញុំសូមជម្រាបថា បើសិនម្ចាស់ផេក ឬ បងប្អូនទាំងក្នុងស្រុក អ្នកក្រៅស្រុក មានភស្តុតាងឃើញមានបទល្មើសទាំងនេះសូមមេត្តាជូនព័ត៌មានដល់យើងខ្ញុំផង។»។

លោកស្រី អភិបាលខេត្តប៉ៃលិន អំពាវនាវទៅអ្នកកាន់អ្នកប្រើប្រាស់បណ្ដាញសង្គម មេត្តាកុំបង្កើតព័ត៌មានមិនពិត បង្កប់ចេតនាមិនល្អ។ លោកស្រីអះអាងថា មន្ត្រីជំនាញនៅខេត្តប៉ៃលិន គឺអនុវត្តទៅតាមការណែនាំរបស់រាជរដ្ឋាភិបាលជានិច្ច។

លោកស្រី បាន ស្រីមុំ អះអាងថា៖«យើងជាមន្រ្តីជំនាញទទួលខុសត្រូវនៅទីនេះ គោរពតាមច្បាប់ បទបញ្ជា និង គាំទ្រជឿជាក់លើការដឹកនាំ និងការសម្រេចរបស់ប្រមុខរាជរដ្ឋាភិបាលយើងដោយភាពទទួលខុសត្រូវ និង រួមសុខរួមទុក្ខជាមួយប្រជាពលរដ្ឋគ្រប់កាលៈទេសៈ ។ »។

កងទ័ពថៃ នៅថ្ងៃទី៧ ខែមិថុនា គឺជាអ្នកចាប់ផ្ដើមលែងល្បែងបិទច្រកព្រំដែន និងកែប្រែពេលវេលានៃការបិទ-បើកច្រកព្រំដែនរវាងប្រទេសទាំងពីរជាឯកតោភាគី ដោយមិនបានគិតអំពីផលប៉ះពាល់ដល់ការធ្វើដំណើរឆ្លងកាត់របស់ប្រជាជននៃប្រទេសទាំងពីរឡើយ។ បន្ទាប់មកនៅថ្ងៃទី២៣ ខែមិថុនា ឆ្នាំ២០២៥ កងទ័ពថៃ បិទច្រកទ្វារព្រំដែនចេញចូលជាមួយកម្ពុជាទាំងអស់នៅតាមបណ្ដោយព្រំដែននៃប្រទេសទាំងពីរប្រវែងជាង៨០០គីឡូម៉ែត្រ គ្របដណ្ដប់លើខេត្តចំនួន៧របស់កម្ពុជា។ ជាការឆ្លើយតប ដោយសារតែថៃជាអ្នកច្រកព្រំដែនមុន កម្ពុជា ក៏បានបិទច្រកទ្វារព្រំដែនតាមក្រោយ។

ដោយសារតែការបិទព្រំដែនជាឯកតោភាគីថៃពីសំណាក់ថៃ, កម្ពុជា បានកំណត់ការឈប់នាំចូលបន្លែ ផ្លែឈើ ពីប្រទេសថៃចាប់ពីថ្ងៃទី១៧ ខែមិថុនា និងបន្ទាប់មកបានបិទការនាំចូលប្រេងពីប្រទេសថៃ ចាប់ពីម៉ោង១២៖ថ្ងៃទី២២ ខែមិថុនា ឆ្នាំ២០២៥។ ក្រៅពីបន្លែ ផ្លែឈើ ប្រេង​​ និងឧស្ម័នឥន្ធនៈ អគ្គនាយកដ្ឋានគយ និងរដ្ឋាករកម្ពុជា  អះអាងថា ឈ្មួញអាចនាំចូលទំំនិញផ្សេងៗទៀតចូលមកកម្ពុជា តាមច្រកដឹកជញ្ជូនផ្សេងៗ និង​តាមមាត់ច្រកផ្លូវការនានា លើកលែងតែមាត់ច្រកព្រំដែនផ្លូវគោកកម្ពុជា-ថៃ៕

ដោយ៖ ង៉ិល ណារ៉ាត់​

The post អភិបាលខេត្តប៉ៃលិនថា គ្មានទំនិញថៃចូលមកកម្ពុជាតាមច្រកប៉ៃលិនមួយថ្ងៃ២០០​-៣០០ កុងតឺន័រឡើយ appeared first on Kampuchea Thmey Daily.

លោកស្រី បាន ស្រីមុំ អភិបាល​ខេត្ត​ប៉ៃលិន លើក​ឡើង​ថា រាជរដ្ឋាភិបាល​កម្ពុជា ក្រោម​ការ​ដឹកនាំ​របស់ សម្តេច​មហា​បវរ​ធិបតី ហ៊ុន ម៉ាណែត ជា​នាយករដ្ឋមន្ត្រី គឺ​បាន​បន្ត​ខិតខំ​ប្រឹងប្រែង​ដោះស្រាយ​នូវ​រាល់​ការ​លំបាក និង​សំណូមពរ​របស់​ប្រជាពលរដ្ឋ ព្រមទាំង​បាន​ខិតខំ​កសាង​អភិវឌ្ឍន៍​ប្រទេស​ជាតិ​ឱ្យមាន​ការ​រីកចម្រើន​លើ​គ្រប់​វិស័យ ជាពិសេស​ការ​កសាង​ហេដ្ឋារចនាសម្ព័ន្ធ​រូបវន្ត​នានា​ដូចជា ៖ ផ្លូវ ស្ពាន សាលារៀន មន្ទីរពេទ្យ ជាដើម។ បច្ចុប្បន្ន រដ្ឋបាល​ខេត្ត​ប៉ៃលិន បាន​ខិតខំ​កែលម្អ​ហេដ្ឋារចនាសម្ព័ន្ធ​សាធារណៈ​នានា រួម​ទាំង​ការ​ដាំ​ដើមឈើ ការ​ដាំ​ផ្កា​លំអ​បន្ថែម និង​ការ​ថែទាំ ព្រម​ទាំង​ការ​កែលម្អ​ហេដ្ឋារចនាសម្ព័ន្ធ​សួនច្បារ សួន​ពុះ​ចែក​ទ្រូងផ្លូវ ឱ្យ​បាន​កាន់តែ​ល្អ​ឡើង ដើម្បី​ឆ្លើយ​តប​ទៅ​នឹង​តម្រូវការ​របស់​ប្រជាពលរដ្ឋ​លើ​ផ្នែក​បរិស្ថាន និង​សុខភាព ក៏​ដូចជា​បន្ថែម​ក្រវាត់​ពណ៌​បៃតង​ក្នុង​ទីក្រុង ប្រកប​ដោយ​សោភ័ណភាព​ស្រស់បំព្រង ក្នុង​ការ​ទាក់ទាញ​ភ្ញៀវ​ជាតិ និង​អន្តរជាតិ មក​កម្សាន្ត​ក្នុង​ខេត្ត​ប៉ៃលិន​កាន់តែ​ច្រើន​ឡើង ដែល​ជា​កត្តា​មួយ​ចូលរួម​ចំណែក​ក្នុង​ការ​ជំរុញ​កំណើន​សេដ្ឋកិច្ច​ជីវភាព​ពលរដ្ឋ​កាន់តែ​ប្រសើរ​ឡើង។

លោកស្រី​អភិបាល​ខេត្ត បញ្ជាក់​ថា ការ​ស្ថាបនា​សួនច្បារ​ដាក់​ឈ្មោះ​សួន«​ប៉ៃលិន​មរតក​តេ​ជោ​» គឺ​ក្នុង​គោលបំណង​បង្ហាញ​ពី​វប្បធម៌​កតញ្ញូ សម្ដែង​នូវ​ការ​ដឹងគុណ និង​ការ​ចងចាំ​រំឭក​ដល់​វីរភាព ស្នាដៃ និង​ភាព​ឈ្លាសវៃ​របស់ សម្តេច​តេ​ជោ ហ៊ុន សែន និង​ថ្នាក់ដឹកនាំ​ដទៃ​ទៀត ក្នុង​ការ​ស្វែងរក​សុខ​សន្តិភាព ដែល​បាន​លះបង់​សាច់​ស្រស់ ឈាម​ស្រស់ ដើម្បី​បុព្វហេតុ​សន្តិភាព ព្រមទាំង​បង្ហាញ​ពី​ព្រឹត្តិការណ៍​ប្រវត្តិសាស្ត្រ​ជាតិ និង​បញ្ជាក់​ពី​សច្ចភាព​ប្រវត្តិសាស្ត្រ​ពិត​សម្រាប់​មនុស្ស​ជំនាន់​ក្រោយ​បាន​ស្វែងយល់​ប្រវត្តិសាស្ត្រ​របស់​ខេត្ត​ប៉ៃលិន ដែល​ជា​ចំណុច​ឈ្នួន​ផ្ទុះ​សន្តិភាព និង​សមត្ថភាព ចំណេះដឹង​ពិតប្រាកដ នៃ​មគ្គុទ្ទេសក៍​អ្នក​ដឹកនាំ​កម្ពុជា។

លោកស្រី បាន ស្រីមុំ បាន​សំណូមពរ​ដល់​ប្រជាពលរដ្ឋ ត្រូវ​រួមគ្នា​ជួយ​ថែរក្សា​ទ្រព្យសម្បត្តិ​សាធារណៈ​របស់​រដ្ឋ ជាពិសេស​ហេដ្ឋារចនាសម្ព័ន្ធ ព្រោះថា​ការ​ស្ថាបនា និង​ជួសជុល​ហេដ្ឋារចនាសម្ព័ន្ធ គឺ​ត្រូវ​ចំណាយ​ថវិកា​យ៉ាង​ច្រើន​សន្ធឹកសន្ធាប់ ហើយ​ក្នុង​នោះ​អ្នក​ដែល​រស់​នៅ​តាម​ដងស្ទឹង​ប៉ៃលិន សូម​មេត្តា​យោគយល់ និង​អធ្យាស្រ័យ ចំពោះ​ផល​ប៉ះពាល់ ព្រមទាំង​ចូលរួម​សហការ​ជាមួយ​ក្រុមការងារ​បច្ចេកទេស និង​អាជ្ញាធរ​មូលដ្ឋាន ដើម្បី​ឱ្យ​សមិទ្ធផល​ថ្មី​នេះ​សម្រេច​បាន​ទៅ​តាម​ការ​គ្រោងទុក និង​ឆាប់​បាន​ប្រើប្រាស់​ជា​ប្រយោជន៍​សាធារណៈ​ទាំងអស់​គ្នា។

សូម​បញ្ជាក់​ថា សួន«​ប៉ៃលិន​មរតក​តេ​ជោ​» ដែល​កំពុង​ស្ថាបនា​នា​ពេលនេះ មាន​ប្រវែង ១៨០០ ម៉ែត្រ នៅ​អម​សងខាង​ដងស្ទឹង​ប៉ៃលិន ចាប់ពី​ចំណុច​ស្ពាន​សន្តិភាព ភូមិ​ក្ងោក ឃុំ​ស្ទឹង​កាច់ ស្រុក​សាលា​ក្រៅ រហូត​មក​ដល់​ស្ពាន​អូរ​ច្រា ស្ថិត​ក្នុង​ភូមិ​ទួល​ល្វា សង្កាត់​ប៉ៃលិន ក្រុងប៉ៃលិន៕

អត្ថបទ ៖ សេង សុវណ្ណារិទ្ធ

The post អភិបាលខេត្តប៉ៃលិន ពិនិត្យមើលវឌ្ឍនភាពការស្ថាបនា «សួនប៉ៃលិនមរតកតេជោ» appeared first on Kampuchea Thmey Daily.