លោកស្រី ផែថងថាន ស៊ីណាវ៉ាត្រ Archives - Kampuchea Thmey Daily

ទូតចិននៅបាងកក បង្ហាញភាពល្អូកល្អិនជាមួយមេដឹកនាំថ្មីនៃបក្សភឿថៃរបស់លោកថាក់ស៊ីន

Rann Reuy — Fri, 07 Nov 2025 04:13:07 +0000

ចិនបង្ហាញភាពល្អូកល្អិនជាមួយគណបក្សភឿថៃ (Pheu Thai) ដែលត្រូវគេដឹងថា បង្កើតឡើងដោយអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ ដែលកំពុងជាប់ពន្ធនាគារដោយសារតែសំណុំរឿងស៊ូកប៉ាន់ បន្ទាប់ពីគណបក្សនេះបានជ្រើសរើសមេដឹកនាំថ្មី និងបង្ហាញពីនយោបាយសេរីនិយម។

ឯកអគ្គរដ្ឋទូតចិន លោក Chang Chianwei (ឆ្វេង) បានជួបជាមួយមេដឹកនាំថ្មីនៃគណបក្សភឿថៃ លោក Chulphan Amrawiwat។ ស្ថានទូតថៃនៅបាងកក

ផ្អែកតាមការបង្ហោះសាររបស់ស្ថានទូតថៃប្រចាំទីក្រុងបាងកក ឯកអគ្គរដ្ឋទូតចិន លោក Chang Chianwei បានជួបជាមួយមេដឹកនាំថ្មីនៃគណបក្សភឿថៃ រួមមាន លោក Chulphan Amrawiwat ប្រធានគណបក្សទើបជាប់ឆ្នោត លោក Chakrapong Saengmani អនុប្រធានគណបក្ស និងលោក Marit Sengiamphong អតីតរដ្ឋមន្ត្រីក្រសួងការបរទេស និងជាថ្នាក់ដឹកនាំនៃគណបក្សនេះ។ គណបក្សភឿថៃបានធ្វើសមាជគណបក្សកាលពីចុងខែតុលា ក្រោយការលាលែងតំណែងប្រធានបក្សរបស់លោកស្រី ផែថងថាន ស៊ីណាវ៉ាត្រ កាលថ្ងៃទី២០ខែតុលា។

គណបក្សភឿថៃជាគណបក្សដ៏មានប្រជាប្រិយភាពក្នុងប្រទេសថៃ ដោយការឈ្នះឆ្នោតជាបន្តបន្ទាប់តាំងពីការរៀបចំការបោះឆ្នោតឡើងវិញក្រោយការគ្រប់គ្រងដោយរបបយោធាជាច្រើនឆ្នាំ។ ក្នុងការបោះឆ្នោតចុងក្រោយកាលឆ្នាំ២០២៣ គណបក្សភឿថៃ ក៏បានឈ្នះឆ្នោតលំដាប់លេខរៀងទី២ និងបានដឹកនាំរដ្ឋាភិបាលចម្រុះថៃ បន្ទាប់ពីតុលាការធម្មនុញ្ញសម្រេចព្យួរបេក្ខភាពរបស់លោក ភីថា លឹមចារើនរ៉ាត ប្រធានគណបក្សឆ្ពៅទៅមុខ (Move Forward Party) ដែលឈ្នះការបោះឆ្នោត ហើយក្រោយមក គណបក្សដ៏មានឥទ្ធិពលនោះក៏ត្រូវរំលាយដោយតុលាការធម្មនុញ្ញ។

ក្នុងជំនួបរវាងឯកអគ្គរដ្ឋទូតចិន និងប្រធានគណបក្សភឿថៃថ្មី តាមការចេញផ្សាយរបស់ស្ថានទូតចិន ឯកអគ្គរដ្ឋទូតចិនបានបញ្ជាក់ជាថ្មីថា ប្រទេសចិនបានយកចិត្តទុកដាក់យ៉ាងខ្លាំងលើការពង្រឹងការផ្លាស់ប្តូរ និងកិច្ចសហប្រតិបត្តិការជាមួយគណបក្សនយោបាយនានាក្នុងប្រទេសថៃ រួមទាំងគណបក្សភឿថៃ ដើម្បីពង្រឹងមូលដ្ឋានគ្រឹះនយោបាយរបស់ប្រជាជនចិន-ថៃ សម្រាប់អនាគតគ្នាទៅវិញទៅមក និងជំរុញការអភិវឌ្ឍន៍ទំនាក់ទំនងចិន-ថៃ។

តាមការចេញផ្សាយនោះ មេដឹកនាំគណបក្សភឿថៃបានលើកឡើងថា ខ្លួនតែងតែផ្តល់អាទិភាពដល់ភាពជាដៃគូជាមួយគណបក្សប្រជាជនថៃ (People’s Party) ហើយក្រុមមេដឹកនាំថៃថ្មីនឹងពង្រឹងការផ្លាស់ប្តូររវាងគណបក្សទាំងពីរ។

គណបក្សប្រជាជនថៃដែលជាគណបក្សប្រឆាំងធំបំផុត ទើបបង្កើតឡើងក្រោយរំលាយគណបក្សឆ្ពោះទៅមុខ ហើយគណបក្សនេះក៏បានបោះឆ្នោតគាំទ្រ លោក អានុទីន ឆានវីរៈគុល ឲ្យឡើងធ្វើជានាយករដ្ឋមន្ត្រីដឹកនាំរដ្ឋាភិបាលក្រោមកិច្ចសន្យារយៈពេលត្រឹម៤ខែប៉ុណ្ណោះ។

តាមការគ្រោងទុក រដ្ឋាភិបាលថៃបច្ចុប្បន្ននឹងមានអាយុដល់ថ្ងៃទី៣១ខែមករាឆ្នាំ២០២៦ ជាពេលដែល នាយករដ្ឋមន្ត្រីអានុទីន សន្យាប្រកាសរំលាយសភាដើម្បីបើកផ្លូវឲ្យមានការបោះឆ្នោតឡើងវិញ៕

រ៉ាន់ រើយ

The post ទូតចិននៅបាងកក បង្ហាញភាពល្អូកល្អិនជាមួយមេដឹកនាំថ្មីនៃបក្សភឿថៃរបស់លោកថាក់ស៊ីន appeared first on Kampuchea Thmey Daily.

រដ្ឋមន្ត្រីស្តីទីពេលផ្ទុះអាវុធជាមួយកម្ពុជា ពេលនេះ Natthapol Nakpanich កាន់តំណែងជារដ្ឋមន្ត្រីក្រសួងការពារជាតិថៃពេញលេញ

Rann Reuy — Thu, 02 Oct 2025 07:53:10 +0000

លោក Natthapol Nakpanich បានចូលកាន់តំណែងជា រដ្ឋមន្ត្រីក្រសួងការពារជាតិថៃពេញលេញ ក្រោមរដ្ឋាភិបាលរបស់នាយករដ្ឋមន្ត្រី លោក អានុទីន ចានវីរៈគុល (Anutin Charnvirakul) ដែលអាចកាន់អំណាចត្រឹមតែរយៈពេល៤ខែ ដើម្បីរំលាយសភាបើកផ្លូវឲ្យមានការបោះឆ្នោតឡើងវិញ។

ជារដ្ឋមន្ត្រីស្តីទីក្នុងអំឡុងពេលផ្ទុះអាវុធជាមួយកម្ពុជា លោក Natthapol Nakpanich បានកាន់តំណែងជាអនុរដ្ឋមន្ត្រីក្រោមការដឹកនាំរបស់អតីតនាយករដ្ឋមន្ត្រី សេដ្ឋា ថាវីស៊ីន និង លោកស្រី ផែថងថាន ស៊ីណាវ៉ាត្រ ដែលជាដឹកនាំនៃគណបក្សភឿថៃ ដឹកនាំរដ្ឋាភិបាលចម្រុះប្រកបដោយភាពចម្រូងចម្រាសរយៈពេលជាង២ឆ្នាំ។

លោក Natthapol Nakpanich រដ្ឋមន្ត្រីការពារជាតិថៃ។ The Standard

នាយករដ្ឋមន្ត្រីថៃ លោក អានុទីន ចានវីរៈគុល ដែលប្រកាសរំលាយសភានៅចុងខែមករាឆ្នាំ២០២៦ បានដឹកនាំរដ្ឋាភិបាលសំឡេងភាគតិច និងមិនបានស្វះស្វែងរកការចែករំលែកអំណាចទូលំទូលាយជាមួយគណបក្សផ្សេងៗក្នុងរដ្ឋាភិបាលចម្រុះរបស់លោកនោះទេ ដោយផ្លាស់ប្តូររដ្ឋមន្ត្រីសំខាន់ៗមួយចំនួនប៉ុណ្ណោះ ហើយថ្នាក់ដឹកនាំក្រសួងមួយចំនួនក៏នៅរក្សាទុកតាមរដ្ឋាភិបាលដឹកនាំដោយគណបក្សភឿថៃ។

ក្នុងអំឡុងពេលដែល មហាក្សត្រថៃបានចេញរាជក្រឹត្យតែងតាំងការរុះរើសមាសភាពគណៈរដ្ឋមន្ត្រីថៃរបស់អតីតនាយករដ្ឋមន្ត្រី ផែថងថាន ស៊ីណាវ៉ាត្រ កាលថ្ងៃទី៣០ខែមិថុនា ដោយរដ្ឋមន្ត្រីការពារជាតិ លោក Phumtham Wechayachai ទៅដឹកនាំក្រសួងមហាផ្ទៃ ក្រោយលោក អានុទីន ប្រកាសដកខ្លួនចេញពីរដ្ឋាភិបាលចម្រុះដឹកនាំដោយគណបក្សភឿថៃ ក្រោយបែកសារសន្ទនារបស់លោកស្រី ផែថងថាន ស៊ីណាវ៉ាត្រ ជាមួយសម្តេចតេជោ ហ៊ុន សែន ជុំវិញការចរចាបើកព្រំដែនដែលយោធាថៃ បានសម្រេចបិទជាឯកតោភាគីកាលពីថ្ងៃទី៧ខែមិថុនា២០២៥។

ក្រោយការចាកចេញរបស់ លោក Phumtham Wechayachai ជារដ្ឋមន្ត្រីក្រសួងការពារជាតិ តំណែងនេះត្រូវនៅទំនេរ ដោយ លោក Natthapol Nakphanit កាន់តំណែងជាអនុរដ្ឋមន្ត្រី និងជារដ្ឋមន្ត្រីស្តីទី។

ក្នុងអំឡុងពេលនោះជម្លោះព្រំដែនថៃនិងកម្ពុជា បានកើនឡើងនូវភាពតានតឹងយ៉ាងខ្លាំង ជាពិសេសការប្រើពាក្យសម្តីបង្កហេតុរបស់មេបញ្ជាការភូមិភាគ២ ប៊ុនស៊ីន ផាតក្លាង របស់ថៃ ដែលបានបញ្ជាឲ្យមានសកម្មភាពបង្កហេតុជាច្រើន ដូចជាការរាយបន្លាលួសនៅប្រាសាទតាមាន់ធំ រហូតដល់មានផ្ទុះអាវុធទ្រង់ទ្រាយធំពីថ្ងៃទី២៤ដល់ថ្ងៃទី២៨ខែកក្កដា២០២៥៕

រ៉ាន់ រើយ

The post រដ្ឋមន្ត្រីស្តីទីពេលផ្ទុះអាវុធជាមួយកម្ពុជា ពេលនេះ Natthapol Nakpanich កាន់តំណែងជារដ្ឋមន្ត្រីក្រសួងការពារជាតិថៃពេញលេញ appeared first on Kampuchea Thmey Daily.

ក្រុមការងារលោកស្រី ផែថងថាន ស៊ីណាវ៉ាត្រ រើរបស់របរចេញពីវិមានរដ្ឋាភិបាលថៃ

Rann Reuy — Sat, 06 Sep 2025 04:46:46 +0000

យោងសេចក្តីរាយការណ៍របស់សារព័ត៌មានថៃ ខាវសុត នៅថ្ងៃទី៦ខែកញ្ញានេះ ក្រុមការងាររបស់អតីតនាយករដ្ឋមន្ត្រី ផែថងថាន ស៊ីណាវ៉ាត្រ បានចាប់ផ្តើមរើរបស់របរចេញពីវិមានរដ្ឋាភិបាល ១ថ្ងៃបន្ទាប់ពីសភាបោះឆ្នោតគាំទ្រលោក អានុទីន ចានវីរៈគុល (Anutin Charnvirakul) ឲ្យឡើងជានាយករដ្ឋមន្ត្រីជំនួសលោកស្រី។

បុគ្គលិករបស់អតីតនាយករដ្ឋមន្ត្រី ផែថងថាន បានរើរូបថតចេញពីវិមានរដ្ឋាភិបាល។ Khaosod

លោកស្រី ផែថងថាន ស៊ីណាវ៉ាត្រ បានធ្លាក់ពីអំណាចនាយករដ្ឋមន្ត្រីថៃ ដោយអំណាចសាលក្រមតុលាការធម្មនុញ្ញកាលថ្ងៃទី២៩ខែសីហា ដោយចៅក្រម ៦រូបក្នុងចំណោម៩រូប បានបោះឆ្នោតដកលោកស្រី ផែថងថាន ពីអំណាចជុំការចោទប្រកាន់ពីសមាជិកព្រឹទ្ធសភាដែលប្តឹងលោកស្រីពីបទប្រព្រឹត្តប្រាសចាកក្រមរដ្ឋធម្មនុញ្ញ ដោយសារតែការនិយាយទូរស័ព្ទជាលក្ខណៈឯកជនជាមួយសម្តេច តេជោ ហ៊ុន សែន ប្រធានព្រឹទ្ធសភាកម្ពុជា។

សេចក្តីរាយការណ៍របស់ខាងសុត បានឲ្យដឹងថា សមាជិកនៃអតីតរដ្ឋាភិបាលចម្រុះ របស់លោកស្រី ផែថងថាន ស៊ីណាវ៉ាត្រ (Paetongtarn Shinawatra) បានបញ្ជូនកម្មករឱ្យរើរបស់របរចេញពីវិមានរដ្ឋាភិបាលកាលពីថ្ងៃទី៦ ខែកញ្ញា បន្ទាប់ពីសភាតំណាងបានបោះឆ្នោតជ្រើសរើសលោក Anutin Charnvirakul ជានាយករដ្ឋមន្ត្រីទី៣២កាលថ្ងៃទី៥ខែកញ្ញា។ ទន្ទឹមនឹងនេះ បុគ្គលិកបានមកសម្អាត និងជំនួសម៉ាស៊ីនត្រជាក់ AC ទាំងនៅក្នុងអគារវិមានរដ្ឋាភិបាលថៃ Thai Khu Fah និងអគារផ្សេងៗទៀត។

ទោះជាបែបណា លោក Anutin Charnvirakul ជានាយករដ្ឋមន្ត្រីទី៣២ នឹងកាន់អំណាចត្រឹមតែ៤ខែប៉ុណ្ណោះ មុនការរំលាយសភាដើម្បីបើកផ្លូវឲ្យមានការរៀបចំការបោះឆ្នោតឡើងវិញ តាមលក្ខខណ្ឌយល់ព្រមជាមួយគណបក្សប្រជាជនដែលជាបក្សប្រឆាំងដែលបោះឆ្នោតក្នុងសភាគាំទ្រខ្លួននោះ៕

រថយន្តរបស់កម្មករលោកស្រីផែថងថាន ដឹកសម្ភារៈចេញពីវិមានរដ្ឋាភិបាល។ Khaosod

The post ក្រុមការងារលោកស្រី ផែថងថាន ស៊ីណាវ៉ាត្រ រើរបស់របរចេញពីវិមានរដ្ឋាភិបាលថៃ appeared first on Kampuchea Thmey Daily.

លោក ថាក់ស៊ីន ជួបជុំបក្សនយោបាយក្នុងរដ្ឋាភិបាលចម្រុះល្ងាចនេះ ស្របពេលនយោបាយថៃកាន់តែតានតឹងខ្លាំង

Rann Reuy — Tue, 22 Jul 2025 06:42:43 +0000

លោក ថាក់ស៊ីន ស៊ីណាវ៉ាត្រ ដែលជាឱពុករបស់នាយករដ្ឋមន្ត្រីព្យួរតំណែង ផែថងថាន ស៊ីណាវ៉ាត្រ បន្តបង្ហាញខ្លួនក្នុងព្រឹត្តិការណ៍ធំៗក្នុងប្រទេសថៃ ដោយត្រូវចូលរួមពិសារអាហារពេលល្ងាចរួមគ្នានៅល្ងាចនេះជាមួយបណ្តាមន្ត្រីនៃគណបក្សនយោបាយក្នុងរដ្ឋាភិបាលចម្រុះដែលហាក់មានភាពរង្គោះរង្គើយ៉ាងខ្លាំង។

លោកថាក់ស៊ីន និង កូនស្រី ផែថងថាន ក្នុងពេលបង្ហាញខ្លួនជាសាធារណៈលើកដំបូង ក្រោយការព្យូរអំណាចផែថងថាន។ FB

ការបង្ហាញខ្លួនជាញឹកញាប់ជាសាធារណៈរបស់លោកថាក់ស៊ីននាពេលនេះ គឺស្របគ្នានឹងនយោបាយរបស់ប្រទេសថៃកាន់តែមានភាពមិនច្បាស់លាស់ក្រោមការដឹកនាំរបស់ លោកស្រី ផែថងថាន ស៊ីណាវ៉ាត្រ ដែលជាកូនស្រីពៅរបស់លោក និងស្របពេលដែលរូបលោក ថាក់ស៊ីន ស៊ីណាវ៉ាត្រ ផ្ទាល់ប្រឈមការកាត់ក្តីសំណុំរឿងព្រហ្មទណ្ឌប្រមាថស្តេច និង សំណុំរឿងព្រហ្មទណ្ឌកុហកតុលាការដោយសារតែសម្រាកព្យាបាលនៅមន្ទីរពេទ្យប៉ូលិសដើម្បីគេចវេះពីការជាប់ពន្ធនាគារ ដោយសារក្នុងសំណុំរឿងពុករលួយដែលត្រូវបានផ្តន្ទាទោសក្រោយលោកត្រឡប់ចូលប្រទេសវិញនោះ។

តាមការចេញផ្សាយរបស់កាសែតបាងកកប៉ុស្តិ៍ លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីដែលប្រឈមផ្លូវច្បាប់ដ៏ក្រាស់ខ្មឹកនោះ នឹងចូលរួមពិសាអាហារពេលល្ងាចជាមួយគណបក្សចម្រុះ ដែលគ្រោងធ្វើនៅល្ងាចថ្ងៃអង្គារនេះ។

សារព័ត៌មានថៃនេះ បានដកស្រង់សម្តី លោក Wisut Chainaroon ដែលជាមន្ត្រីនៃគណបក្សភឿថៃ បានបញ្ជាក់ពីវត្តមានរបស់ លោក ថាក់ស៊ីន ស៊ីណាវ៉ាត្រ និងបានច្រានចោលការព្រួយបារម្ភថា វត្តមានរបស់លោក ថាក់ស៊ីន អាចត្រូវបានគេយល់ឃើញថា ជាការប៉ុនប៉ងដើម្បីគ្រប់គ្រងលើគណបក្ស ឬរដ្ឋាភិបាលរបស់លោក។

ក្នុងការចេញមុខចេញមាត់ជាសាធារណៈចុងក្រោយនេះ លោក ថាក់ស៊ីន បានបង្ហាញពីផែនការដោះស្រាយវិបត្តិនយោបាយថៃ និង ការដោះស្រាយបញ្ហាសង្គមថៃ ដែលត្រូវបានគេមើលឃើញថា មានការប្រេះឆាយ៉ាងខ្លាំង ដែលអាចនាំទៅដល់វិបត្តិធ្ងន់ធ្ងរនាំទៅអន្តរាយសេដ្ឋកិច្ច និងវិបត្តិសង្គមធ្ងន់ធ្ងរ បណ្តាលមកពីអស្ថេរភាពនយោបាយនាពេលនេះ។

ឆ្លើយតបនឹងការរិះគន់ថា វត្តមានរបស់លោកថាក់ស៊ីន អាចត្រូវបានគេមើលឃើញថាមានឥទ្ធិពល ឬគ្របដណ្ដប់លើគណបក្ស និងរដ្ឋាភិបាល លោក Wisut បានបញ្ជាក់យ៉ាងច្បាស់ថា ការចែករំលែកអាហារ និងការសន្ទនាគ្នា មិនមែនមានន័យថា ការគ្រប់គ្រងនោះទេ។

តាមការដកស្រង់របស់បាងកកប៉ុស្តិ៍ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ភុមថាំ វិច្ឆាយ៉ាឆៃ (Phumtham Wechayachai) ដែលបច្ចុប្បន្នកំពុងកាន់តំណែងជានាយករដ្ឋមន្ត្រីស្តីទី បាននិយាយថា អាហារពេលល្ងាចរបស់សម្ព័ន្ធគណបក្សគឺជាផ្នែកមួយនៃដំណើរការធម្មតាដែលអនុញ្ញាតឱ្យសមាជិកសភាមកពីគណបក្សចម្រុះជួបប្រជុំ បង្កើតទំនាក់ទំនង ជំរុញទំនាក់ទំនង និងផ្លាស់ប្តូរទស្សនៈ និងគំនិត៕

រ៉ាន់ រើយ

លោកថាក់ស៊ីន ស្តាប់កូនស្រី ពន្យល់។

The post លោក ថាក់ស៊ីន ជួបជុំបក្សនយោបាយក្នុងរដ្ឋាភិបាលចម្រុះល្ងាចនេះ ស្របពេលនយោបាយថៃកាន់តែតានតឹងខ្លាំង appeared first on Kampuchea Thmey Daily.

នៅមុនដាក់ការឆ្លើយបំភ្លឺទៅតុលាការធម្មនុញ្ញ ផែថងថាន ប្រឈមសម្ពាធឲ្យចុះចេញពីអំណាច

Rann Reuy — Mon, 14 Jul 2025 03:48:16 +0000

មុនដល់ថ្ងៃឱសានវាទដែលនាយករដ្ឋមន្ត្រី ផែថងថាន ស៊ីណាវ៉ាត្រ ត្រូវដាក់ការឆ្លើយបំភ្លឺទៅកាន់តុលាការធម្មនុញ្ញនៅថ្ងៃទី១៥ខែកក្កដា លទ្ធផលស្ទង់មតិដែលត្រូវបានចេញផ្សាយជាបន្តបន្ទាប់ បង្ហាញឲ្យឃើញថា ប្រជាប្រិយភាពរបស់នាយករដ្ឋមន្ត្រី បានធ្លាក់ចុះយ៉ាងគំហុក និងទាមទារឲ្យចុះចេញពីអំណាច។

លោកស្រី ផែថងថាន ថ្វាយកម្រងផ្កាដល់មហាក្សត្រថៃ។ FB

តុលាការធម្មនុញ្ញបានសម្រេចព្យួរតួនាទីរបស់នាយករដ្ឋមន្ត្រី ផែថងថាន ស៊ីណាវ៉ាត្រ កាលថ្ងៃទី១ខែកក្កដា ដោយលទ្ធផលបោះឆ្នោត៧ទល់២ តបតាមបណ្តឹងរបស់សមាជិកព្រឹទ្ធសភា៣៦រូប ដែលប្តឹងលោកស្រីនាយករដ្ឋមន្ត្រីដោយចោទប្រកាន់រំលោភរដ្ឋធម្មនុញ្ញ ជុំវិញការនិយាយតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

លទ្ធផលស្ទង់មតិ ដែលធ្វើឡើងដោយ វិទ្យាស្ថានជាតិគ្រប់គ្រងអភិវឌ្ឍន៍ (National Institute of Development Administration) បានស្ទង់មតិមនុស្ស១៣១០នាក់ ចន្លោះថ្ងៃទី៤ដល់ថ្ងៃទី៧ខែកក្កដា ដោយបង្ហាញឲ្យឃើញថា ប្រជាជនថៃ ៤៣,៣៧% យល់ថា នាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) គួរចុះចេញពីតំណែងហើយរើសនាយករដ្ឋមន្ត្រីថ្មី ខណៈ ៣៩,៩២% យល់ថានាយករដ្ឋមន្ត្រីត្រូវរំលាយសភាហើយចាត់ចែងបោះឆ្នោតសារជាថ្មី។

ក្នុងករណីរើសនាយករដ្ឋមន្ត្រីថ្មី មតិភាគច្រើនរហូតដល់ទៅ ៣២,៨២% គាំទ្របេក្ខភាពអតីតនាយករដ្ឋមន្ត្រី លោក ប្រាយុធ ចាន់អូចា ខណៈអ្នកឆ្លើយចំនួន ២៧.៩៤% មិនគាំទ្របេក្ខជនដែលមានស្រាប់ក្នុងការបោះឆ្នោតកាលឆ្នាំ២០២៣ ហើយអាចឈរឈ្មោះបានតាមច្បាប់រដ្ឋធម្មនុញ្ញ។

កាសែតបាងកកប៉ុស្តិ៍ បានផ្សាយថា ប្រធានគណបក្ស Bhumjaithai លោក Anutin Charnvirakul ទទួលបានអត្រាអ្នកគាំទ្រ ១១,៥៣ភាគរយ ហើយ ១០,៩២ ភាគរយ ពេញចិត្តចំពោះ លោក Chaikasem Nitisiri ដែលជាបេក្ខជននាយករដ្ឋមន្ត្រីចុងក្រោយនៃគណបក្សភឿថៃដែលកំពុងដឹកនាំរដ្ឋាភិបាលចម្រុះ។

ការស្ទង់មតិរបស់វិទ្យាស្ថានជាតិគ្រប់គ្រងអភិវឌ្ឍន៍នៅដើមខែនេះបានរកឃើញថាជាង៨០ភាគរយ នៃអ្នកឆ្លើយសំណួរចង់ឱ្យនាយករដ្ឋមន្ត្រីផែថងថាន ស៊ីណាវ៉ាត្រ ព្យួរតំណែង ឬរំលាយសភា។

សម្ពាធលើនាយករដ្ឋមន្ត្រី ផែថងថាន ស៊ីណាវ៉ាត្រ បានកើនឡើងយ៉ាងខ្លាំង ក្រោយការបែកធ្លាយសំឡេងចរចាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា កាលថ្ងៃទី១៧ខែមិថុនា ដែលធ្វើឲ្យនយោបាយថៃងាកទៅរកភាពច្របូកច្របល់ផ្ទៃក្នុងក្រោយពួកគេព្យាយាមបង្វែរការប្រឈមនយោបាយផ្ទៃក្នុងមកកាន់ព្រំដែនកម្ពុជា៕

រ៉ាន់ រើយ

The post នៅមុនដាក់ការឆ្លើយបំភ្លឺទៅតុលាការធម្មនុញ្ញ ផែថងថាន ប្រឈមសម្ពាធឲ្យចុះចេញពីអំណាច appeared first on Kampuchea Thmey Daily.

[វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ?

Rann Reuy — Wed, 02 Jul 2025 13:22:10 +0000

តុលាការធម្មនុញ្ញរបស់ប្រទេសថៃបានព្យួរតំណែងនាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) ពីតួនាទីរបស់លោកស្រីដោយរង់ចាំការសម្រេចថាតើលោកស្រីបានរំលោភលើបទដ្ឋានសីលធម៌ក្នុងការរំលោភរដ្ឋធម្មនុញ្ញដែរឬទេ បន្ទាប់ពីមានការសន្ទនាតាមទូរស័ព្ទដ៏ចម្រូងចម្រាសជាមួយ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

នាយករដ្ឋមន្ត្រី ផែថងថាន ចុះទៅយកចិត្តមេយោធាភូមិភាគ២ Boonsin Phaklang ក្រោយបែកសារសំឡេង។ FB

ការព្យួរតំណែងនាយករដ្ឋមន្ត្រីថៃនាពេលនេះ គឺជារបត់នយោបាយថ្មីមួយទៀត បន្ទាប់ពីមានរឿងរ៉ាវជាហូរហែរក្នុងការដឹកនាំរបស់លោកស្រី ផែថងថាន ស៊ីណាវ៉ាត្រក្នុងរយៈពេលត្រឹម១០ខែ ហើយរលកនៃនយោបាយថៃ ទំនងជាមិនអាចឲ្យលោកស្រី ផែថងថាន វិលទៅកាន់អំណាចដឹកនាំរដ្ឋាភិបាលជាថ្មីម្តងទៀតទេក្នុងអាណត្តិនេះ។

តើកត្តាអ្វីខ្លះដែលធ្វើឲ្យលោកស្រី ផែថងថាន មិនអាចវិលមកកាន់តួនាទីជានាយករដ្ឋមន្ត្រីវិញ?

មកដល់ពេលនេះ សំណុំរឿងនាយករដ្ឋមន្ត្រីថៃ ផែថងថាន ស៊ីណាវ៉ាត្រ ស្ថិតនៅក្នុងកណ្តាប់ដៃនៃតុលាការធម្មនុញ្ញដែលត្រូវការពេលវេលា១៥ថ្ងៃ ដើម្បីត្រួតពិនិត្យពាក្យបណ្តឹងរបស់ក្រុមសមាជិកព្រឹទ្ធសភា៣៦រូប បន្ទាប់ពីតុលាការធម្មនុញ្ញ បានសម្រេចទទួលយក និងផ្អាកតួនាទីនាយករដ្ឋមន្ត្រី បណ្តោះអាសន្ន មុនការសម្រេចសាលក្រមជាផ្លូវការនៅពាក់ខែកក្កដានេះ។

សាលដីកាតុលាការធម្មនុញ្ញដែលគេរំពឹងថា នឹងមិនអាចប្រគល់តូនាទីដល់លោកស្រី ផែថងថាន ឲ្យវិលត្រឡប់ទៅកាន់អំណាចវិញនោះទេ ដោយសំអាងលើកត្តាមួយចំនួនដែលលេចធ្លោរក្នុងនយោបាយថៃដែលនាំទៅដល់ភាពវឹកវរ។

ការលេចធ្លាយសំឡេងសន្ទនា

សម្រាប់អ្នកនយោបាយថៃ និងមជ្ឈដ្ឋានប្រជាជនថៃ វាជាករណីដ៏ធ្ងន់ធ្ងរបំផុត ដែលនាយករដ្ឋមន្ត្រីនៃប្រទេសដែលមានសេដ្ឋកិច្ចរីកលួតលាស់លំដាប់លេខ២ក្នុងអាស៊ាន ទៅចរចាជាសម្ងាត់ជាមួយមេដឹកនាំនៃប្រទេសមួយទៀត ដែលតូចជាងខ្លួន ក្នុងលក្ខណៈចាញ់ប្រៀប ដែលនាំទៅដល់ការបាក់មុខបាក់មាត់ក្នុងឆាកអន្តរជាតិ។ ប៉ុន្តែផ្អែកតាមការពិតជាក់ស្តែង នាយករដ្ឋមន្ត្រី ដែលមិនមានអំណាចគ្រប់គ្រាន់ ក្តោបអំណាចពេញលេញក្នុងដៃ មិនអាចបញ្ជាទាហានរបស់ខ្លួន គឺតែងតែប្រើរបៀបចរចាសម្ងាត់ដើម្បីឲ្យភាគីម្ខាងទៀតយោគយល់ល់ខ្លួន ដើម្បីធ្វើឲ្យយ៉ាងឲ្យជីវិតនយោបាយរបស់ខ្លួនបន្តរស់។

ការដាក់សម្ពាធពីគណបក្សនយោបាយប្រឆាំង

គណបក្សនយោបាយក្នុងរដ្ឋាភិបាលចម្រុះ Bhumjaithai បានប្រកាសដកខ្លួនចេញពីរដ្ឋាភិបាល ដោយដាក់ការទាមទារឲ្យនយោបាយរដ្ឋមន្ត្រីចុះចេញពីអំណាច គឺជាទម្ងន់នយោបាយមួយដ៏ធ្ងន់ និងជាបន្ទុកដែលពិបាកដោះខ្លួនរបស់លោកស្រី ផែថងថាន ដោយសារតែគណបក្សដកខ្លួនចេញនេះ ជាគណបក្សដ៏ធំទី២ក្នុងរដ្ឋាភិបាលចម្រុះ។ ក្រៅពីគណបក្សនេះ គណបក្ស United Thai Nation ដែលជាគណបក្សធំលេខ៣ក្នុងរដ្ឋាភិបាលចម្រុះក៏បានទាមទារដាច់ខាតឲ្យ លោកស្រី ផែថងថាន ចុះចេញពីអំណាច បើទោះបីជាខ្លួនបង្ហាញជំហរបន្តរួមរស់ជាមួយរដ្ឋាភិបាលចម្រុះ។ ក្នុងបុព្វហេតុនេះ ធ្វើឲ្យរដ្ឋាភិបាលចម្រុះប្រឈមការដួលរលំដោយសារតំណាងរាស្រ្តក្នុងរដ្ឋាភិបាលចម្រុះតិចជាងក្រៅរដ្ឋាភិបាល។

ការដាក់សម្ពាធពីក្រុមអ្នកតវ៉ាប្រឆាំងរដ្ឋាភិបាល

ក្រុមអ្នកតវ៉ាបានប្រកាសរួចជាស្រេចទៅហើយក្នុងថ្ងៃតវ៉ាលើកដំបូងកាលថ្ងៃទី២៨ខែមិថុនា ពីការទាមទារដាច់ខាតឲ្យលោកស្រី ផែថងថាន ស៊ីណាវ៉ាត្រ ចុះចេញពីអំណាចដាច់ខាត ហើយការតវ៉ារបស់ពួកគេគឺជាផ្នែកមួយនៃការដាក់សម្ពាធលើការសម្រេចរបស់តុលាការធម្មនុញ្ញ។ ក្នុងពេលតវ៉ានោះ ពួកគេបានបេ្តជ្ញាថា «ការតវ៉ារបស់ពួកគេនឹងកាន់តែធំ នៅពេលដែលនាយករដ្ឋមន្ត្រីបដិសេធចុះចេញពីអំណាច»។ បន្ទាប់ពីការតវ៉ានោះ តុលាការធម្មនុញ្ញ បានព្យួរតំណែងនាយករដ្ឋមន្ត្រី ផែថងថាន ដូចការរំពឹងទុក ហើយ លោកស្រី ផែថងថាន ក៏មិនបានរឹងទទឺងបដិសេធការសម្រេចនោះដែរ ដែលជាការបង្ហាញថា លោកស្រី ផែថងថាន ដឹងខ្លួនរួចជាស្រេចអំពីអំណាចដ៏ទន់ខ្សោយរបស់ខ្លួន។

អំណាចព្រឹទ្ធសភា

បណ្តឹងរបស់ព្រឹទ្ធសមាជិកថៃទៅកាន់តុលាការធម្មនុញ្ញមិនមែនជាលើកទី១ទេ សម្រាប់ការបញ្ឈរជើងនាយករដ្ឋមន្ត្រីនោះ។ កាលឆ្នាំមុន អតីតនាយករដ្ឋមន្ត្រីថៃ លោក សេដ្ឋា ថាវីស៊ីន មកពីគណបក្សភឿថៃដូចគ្នា បានរងបណ្តឹងរំលោភរដ្ឋធម្មនុញ្ញនេះ ដោយសារតែការតែងតាំងអតីតមេធាវីដែលស្និទ្ធជាមួយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រឲ្យចូលបម្រើការក្នុងគណៈរដ្ឋមន្ត្រីរបស់លោក។ ពេលនោះ តុលាការធម្មនុញ្ញ បានសម្រេចព្យួរតំណែងនាយករដ្ឋមន្ត្រី លោក សេដ្ឋា ថាវីស៊ីន និងឈានទៅបណ្តេញចេញជាផ្លូវការកាលខែសីហាឆ្នាំ២០២៤ ដោយចោទប្រកាន់ពីការខ្វះសុចរិភាព។ ក្នុងន័យនេះ កំហុសរបស់លោក សេដ្ឋា ថាវីស៊ីន ហាក់តូចតាចណាស់ធៀបនឹងអ្វីដែលកើតមានចំពោះលោស្រី ផែថងថាន ស៊ីណាវ៉ាត្រនៅពេលនេះ។

ជម្លោះជាមួយក្រុមយោធា

នៅក្នុងប្រទេសថៃ គេដឹងយ៉ាងទូលំទូលាយថា ក្រុមមេដឹកនាំយោធាមានទំនាក់ទំនងជិតស្និទ្ធនឹងព្រះរាជវាំងថៃ ដែលមិនអាចអនុញ្ញតឲ្យបុគ្គល ឬគណបក្សណាមួយប្រឆាំងបានឡើយ។ ក្នុងសារសំឡេងបែកធ្លាយ ច្បាស់ណាស់ថា លោកស្រី ផែថងថាន បានទម្លាក់កំហុសទៅលើមេដឹកនាំយោធាថៃ ដែលបង្កភាពល្អក់កករ បង្កអរិភាពនៅតាមព្រំដែនថៃនិងកម្ពុជា ដែលនាំទៅដល់ជម្លោះបង្ហូរឈាមផ្ទុះឡើង និងរាលដាលដល់ជម្លោះពាណិជ្ជកម្មឆ្លងដែន និងជម្លោះផ្សេងៗផ្ទុះឡើងជាបន្តបន្ទាប់។ នៅក្នុងស្ថាប័ន ព្រឹទ្ធសភា និងចៅក្រមតុលាការធម្មនុញ្ញ សុទ្ធតែមានឥទ្ធិពលយ៉ាងខ្លាំងពីក្រុមយោធា ព្រោះថាមេយោធាសំខាន់ៗដែលចូលនិវត្តន៍ គឺបានតួនាទីជាសមាជិកព្រឹទ្ធសភា។

រ៉ាន់ រើយ

The post [វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ? appeared first on Kampuchea Thmey Daily.

បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ

Rann Reuy — Fri, 27 Jun 2025 03:23:12 +0000

យោងសេចក្តីរាយការណ៍របស់សារព័ត៌មានថៃ Khaosod នៅព្រឹកថ្ងៃសុក្រនេះ បេក្ខជននាយករដ្ឋមន្ត្រីទីបីរបស់គណបក្សភឿថៃ លោក ឆៃក្សេម នីតិសិរិ (Chaikasem Nitisiri) បានប្រាប់កម្មវិធីទូរទស្សន៍ក្នុងស្រុកផ្សាយនៅព្រឹកថ្ងៃសុក្រនេះថា លោកបានត្រៀមខ្លួនជាស្រេចដើម្បីក្លាយជានាយករដ្ឋមន្ត្រីបន្ទាប់ ប្រសិនបើវាចាំបាច់សម្រាប់ប្រទេសថៃដែលធ្លាក់ចូលក្នុងវិបត្តិនយោបាយដ៏ធ្ងន់ធ្ងរ។

ការលើកឡើងនេះ ចំពេលមានសម្ពាធកើនឡើងចំពោះនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ ឲ្យចុះចេញពីអំណាច បន្ទាប់ពីមានរឿងអាស្រូវលេចធ្លាយការសន្ទនាជាមួយប្រធានព្រឹទ្ធសភាកម្ពុជា សម្តេចតេជោ ហ៊ុន សែន និង ការដាក់សម្ពាធពីបក្សប្រឆាំង និងស្ថាប័នជាតិសំខាន់ៗរបស់ប្រទេសថៃ។

ប្រវត្តិខ្លីៗរបស់ លោក Chaikasem Nitisiri ដែលទំនងក្លាយជានាយករដ្ឋមន្ត្រីបន្ទាប់របស់ថៃ?

លោក Chaikasem Nitisiri កើតនៅថ្ងៃទី ២៦ ខែសីហា ឆ្នាំ ១៩៤៨ មានអាយុ ៧៧ឆ្នាំ។ គាត់គឺជាអតីតទីប្រឹក្សារបស់អតីតនាយករដ្ឋមន្ត្រី សេដ្ឋា ថាវីស៊ីន (Srettha Thavisin) និង ប្រធានគណៈកម្មាធិការដឹកនាំយុទ្ធសាស្ត្រ និងតម្រង់ទិសនយោបាយ។

លោក Chaikasem Nitisiri ធ្លាប់កាន់តំណែងជារដ្ឋមន្ត្រីក្រសួងយុត្តិធម៌ ក្នុងរដ្ឋបាលរបស់ លោកស្រី យីងឡាក់ ស៊ីណាវ៉ាត្រ ដែលបានកាន់អំណាចចន្លោះឆ្នាំ២០១១ ដល់២០១៤ ជាពេលដែលក្រុមយោធាដឹកនាំដោយ ឧត្តមសេនីយ៍ ប្រាយុធ ចាន់អូចា បានធ្វើរដ្ឋប្រហារទម្លាក់ ហើយប្រកាសដាក់ប្រទេសក្នុងគ្រាអាសន្ន។

លោក Chaikasem Nitisiri ធ្លាប់ជាទីប្រឹក្សាមជ្ឈមណ្ឌលសម្រាប់ដំណោះស្រាយស្ថានការណ៍គ្រាអាសន្នក្រោមការគ្រប់គ្រងរបស់ អតីតនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រ។ គាត់ក៏ជាអតីតសមាជិកសភា អតីតអគ្គមេធាវី និងជាអតីតព្រះរាជអាជ្ញាជាន់ខ្ពស់ (ទីប្រឹក្សាអគ្គមេធាវី) នៅការិយាល័យអគ្គមេធាវី៕

The post បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ appeared first on Kampuchea Thmey Daily.

ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ

Rann Reuy — Tue, 24 Jun 2025 03:25:18 +0000

គណៈកម្មាធិការជាតិប្រឆាំងអំពើពុករលួយ (NACC) បានចាប់ផ្តើមបើកការស៊ើបអង្កេតលើករណីបំពានក្រមសីលធម៌ធ្ងន់ធ្ងរ របស់ នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ (Paetongtarn Shinawatra) ជុំវិញការលេចធ្លាយសារចរចាតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។ ការស៊ើបអង្កេតបឋមនឹងត្រូវរយៈពេល១០ថ្ងៃ។ ក្នុងករណីរកឃើញកំហុសដែលមានចែង លោកស្រី ប្រឈមការដកហូតដំណែង ដូចអតីតនាយករដ្ឋមន្ត្រី សេដ្ឋា ថាវីស៊ីន មកពីគណបក្សភឿថៃដែរ។

លោកស្រី ផែថងថាន ស៊ីណាវ៉ាត្រ និង លោក សេដ្ឋា ថាវីស៊ីន ក្នុងអំឡុងពេលឃោសនាបោះឆ្នោត។ឆ្នាំ២០២៣។ Bangkok Post

នៅថ្ងៃទី២០ខែមិថុនាឆ្នាំ២០២៥ ព្រឹទ្ធសមាជិកនៃប្រទេសថៃបានស្នើសុំជាផ្លូវការឱ្យទាំង NACC និងតុលាការធម្មនុញ្ញពិនិត្យមើលថាតើការប្រព្រឹត្តរបស់នាយករដ្ឋមន្ត្រីគឺស្មើនឹង ការប្រព្រឹត្តខុសក្រមសីលធម៌យ៉ាងធ្ងន់ធ្ងរ»។ ការស៊ើបអង្កេតនេះកើតឡើង ចំពេលមានសម្ពាធកាន់តែខ្លាំងឡើង បន្ទាប់ពីបែកធ្លាយការសន្ទនាតាមទូរស័ព្ទជាមួយសម្តេច ហ៊ុន សែន ដែលបង្កជាព្យុះនយោបាយសម្រាប់ការបន្តតំណែងរបស់នាយករដ្ឋមន្ត្រី ផែថងថាន ក៏ដូចជាអនាគតមិនច្បាស់លាស់នៃការដឹកនាំរដ្ឋាភិបាលចម្រុះរបស់គណបក្សភឿថៃរបស់លោកស្រី។

តាមសេចក្តីរាយការណ៍របស់សារព័ត៌មាន The Nation គណៈកម្មាធិការជាតិប្រឆាំងអំពើពុករលួយ (NACC) នៅថ្ងៃចន្ទ បានឯកភាពជាឯកច្ឆ័ន្ទក្នុងការចាប់ផ្តើមការស៊ើបអង្កេតបឋមលើវីដេអូឃ្លីបដែលលេចធ្លាយនៃការសន្ទនារវាង នាយក្រដ្ឋមន្ត្រី លោកស្រី ផែថងថាន ស៊ីណាវ៉ាត្រ និង សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

គណៈកម្មាការជឿជាក់ថា ខ្លឹមសារអាចបង្កើតជាការបំពានយ៉ាងធ្ងន់ធ្ងរលើបទដ្ឋានសីលធម៌ ជាពិសេសទាក់ទងនឹងការកត់សម្គាល់ដែលទាក់ទងនឹងភាពតានតឹងនៅតាមព្រំដែនកម្ពុជា-ថៃ។

តាមសេចក្តីរាយការណ៍នោះ NACC បានកំណត់ពេលវេលា ១០ថ្ងៃដើម្បីបញ្ចប់ការស៊ើបអង្កេតបឋម។ ដំណើរការនេះនឹងរួមបញ្ចូលការចម្លង និងការបកប្រែយ៉ាងត្រឹមត្រូវនូវសំឡេងពីខ្មែរទៅជាភាសាថៃ ការសាកសួរសាក្សីដែលពាក់ព័ន្ធ និងពិនិត្យមើលច្បាប់ជាធរមាន។

ការត្រួតពិនិត្យនេះក៏នឹងយោងទៅលើសេចក្តីសម្រេចរបស់តុលាការធម្មនុញ្ញពីមុន ដែលនាំទៅដល់ការដកសិទ្ធិរបស់អតីតនាយករដ្ឋមន្ត្រី សេដ្ឋា ថាវីស៊ីន ជុំវិញការតែងតាំង លោក Phichit Chuenban ជារដ្ឋមន្ត្រីទីស្តីការគណៈរដ្ឋមន្ត្រី ដ៏ចម្រូងចម្រាស។

លើសពីនេះ គណៈកម្មការនឹងពិនិត្យថាតើតុលាការធម្មនុញ្ញបានទទួលយកញត្តិពាក់ព័ន្ធទាក់ទងនឹងស្ថានភាពរបស់លោកស្រី ផែថងថាន រួចហើយឬនៅ។ ប្រសិនបើការស៊ើបអង្កេតបឋមរកឃើញហេតុផលគ្រប់គ្រាន់ សំណុំរឿងនឹងបន្តទៅការស៊ើបអង្កេតជាផ្លូវការដោយក្រុមប្រឹក្សា NACC ហើយប្រសិនបើចាំបាច់ ការស៊ើបអង្កេតពេញលេញអាចនឹងត្រូវចាប់ផ្តើម។

បណ្ដឹងសីលធម៌ប្រឆាំងនឹងនាយករដ្ឋមន្ត្រីត្រូវបានចុះហត្ថលេខាដោយសមាជិកព្រឹទ្ធសភាជាច្រើនរូប រួមទាំងប្រធានព្រឹទ្ធសភាលោក Mongkol Surasajja ហើយត្រូវបានដាក់ទៅ NACC រួចហើយ។ ពាក្យបណ្តឹងដូចគ្នានេះក៏ត្រូវបានបញ្ជូនទៅតុលាការធម្មនុញ្ញផងដែរ ដើម្បីពិចារណាថាតើតំណែងនាយករដ្ឋមន្ត្រីរបស់ផែថងថាន គួរតែត្រូវបានបញ្ចប់ ដោយផ្អែកលើសកម្មភាពរបស់នាងនៅក្នុងការសន្ទនាដែលលេចធ្លាយនោះដែរទេ៕

រ៉ាន់ រើយ

លោកស្រី ផែថងថាន ស៊ីណាវ៉ាត្រ និង លោក សេដ្ឋា ថាវីស៊ីន ថតជុំគ្នាជាមួយតំណាងរាស្ត្រ បក្សភឿថៃ។

The post ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ appeared first on Kampuchea Thmey Daily.

លោកស្រី ​ផែថងថាន ស៊ីណាវ៉ាត្រ Archives - Kampuchea Thmey Daily

​​​ទូតចិន​នៅបាងកក ​បង្ហាញ​ភាព​ល្អូកល្អិន​ជាមួយ​មេដឹកនាំ​ថ្មីនៃ​បក្ស​ភឿថៃ​របស់​លោកថាក់ស៊ីន​​​

​ក្រុមការងារ​លោកស្រី ផែថងថាន ស៊ីណាវ៉ាត្រ​ ​រើរបស់រប​រ​ចេញ​ពីវិមានរដ្ឋាភិបាល​ថៃ​​

​​​​​នៅ​មុន​ដាក់​ការឆ្លើយ​បំភ្លឺ​​​ទៅតុលាការធម្មនុញ្ញ​ ​ផែថងថាន ប្រឈម​សម្ពាធ​​ឲ្យ​ចុះ​ចេញ​ពីអំណាច​

[វិចារណកថា​] តើ​កត្តាអ្វីខ្លះ​នឹងរារាំង​ ផែថងថាន ស៊ីណាវ៉ាត្រ ​ទទួល​បាន​​អំណាចវិញ​​?​

​​បេក្ខជន​នាយករដ្ឋមន្ត្រី​ទី៣​នៃ​បក្សភឿថៃ បាន​ត្រៀម​ខ្លួន​​​រួច​រាល់ ចំពេលវិបត្តិនយោបាយ​​​

ផែថងថាន ​រងការស៊ើបអង្កេត​លើ​ក្រមសីលធម៌ អាច​​ឈាន​​ទៅដកដំណែង​​ ដូច​​​​លោក ថាវីស៊ីន ដែរ

លោកស្រី ផែថងថាន ស៊ីណាវ៉ាត្រ Archives - Kampuchea Thmey Daily

ទូតចិននៅបាងកក បង្ហាញភាពល្អូកល្អិនជាមួយមេដឹកនាំថ្មីនៃបក្សភឿថៃរបស់លោកថាក់ស៊ីន

ក្រុមការងារលោកស្រី ផែថងថាន ស៊ីណាវ៉ាត្រ រើរបស់របរចេញពីវិមានរដ្ឋាភិបាលថៃ

នៅមុនដាក់ការឆ្លើយបំភ្លឺទៅតុលាការធម្មនុញ្ញ ផែថងថាន ប្រឈមសម្ពាធឲ្យចុះចេញពីអំណាច

[វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ?

បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ

ផែថងថាន រងការស៊ើបអង្កេតលើក្រមសីលធម៌ អាចឈានទៅដកដំណែង ដូចលោក ថាវីស៊ីន ដែរ