លោកស្រី Kamala Harris Archives - Kampuchea Thmey Daily

ហារីស ធ្វើជាអធិបតីភាពក្នុងការបញ្ជាក់លទ្ធផលឆ្នោតដែលខ្លួនចាញ់លោក ត្រាំ

Rann Reuy — Mon, 06 Jan 2025 05:17:55 +0000

សមាជិកសភាសហរដ្ឋអាមេរិកទាំងសមាជិកសភាតំណាងរាស្ត្រ ឬហៅថា «សភាជាន់ទាប» និងព្រឹទ្ធសភា នៃគណបក្សសាធារណៈរដ្ឋ និងគណបក្សប្រជាធិបតេយ្យ នឹងជួបប្រជុំរួមគ្នានៅថ្ងៃចន្ទទី៦ខែមករា ដើម្បីអនុម័តយល់ព្រមលើលទ្ធផលនៃការបោះឆ្នោតកាលពីថ្ងៃថ្ងៃទី៥ខែវិច្ឆិកា ២០២៤ ដែលត្រូវបានមើលឃើញថា គណបក្សប្រជាធិបតេយ្យរបស់ បេក្ខនារីប្រធានាធិបតី កាម៉ឡា ហារីស (Kamala Harris) ចាញ់ឆ្នោតយ៉ាងធ្ងន់ធ្ងរជាពិសេសការចាញ់ឆ្នោតទាំងអស់នៅរដ្ឋប្រទាញប្រទង់គ្នាទាំង៧។

លោកស្រី កាម៉ាឡា ហារីស អនុប្រធាធិបតីឈររង់ចាំតំណាងរាស្រ្តថ្មីៗដែលស្បថចូលកាន់តំណែង។ Reuter

ការប្រជុំរួមគ្នារវាងសមាជិករដ្ឋសភានិងព្រឹទ្ធសភាក្រោមអធិបតីភាព លោកស្រី កាម៉ឡា ហារីស គឺជាដំណើរការរបញ្ជាក់ចុងក្រោយលើលទ្ធផលនៃការបោះឆ្នោតដែលលោក ដូណាល់ ត្រាំ បានឈ្នះបណ្តោះអាសន្ន ក្លាយជាប្រធានាធិបតីជាប់ឆ្នោត និងត្រៀមស្បថចូលកាន់ដំណែងនៅថ្ងៃទី២០ខែមករាឆ្នាំ២០២៥នេះ សម្រាប់ការដឹកនាំសហរដ្ឋអាមេរិករយៈពេល៤ឆ្នាំ បន្ទាប់ពីប្រធានាធិបតីទី៤៦ គឺលោក ចូ បៃដិន។

កាលពីថ្ងៃសុក្រទី៣មករា សភាតំណាងរាស្ត្រសហរដ្ឋអាមេរិកបានជួបប្រជុំគ្នា ដោយបោះឆ្នោតគាំទ្រ លោក Mike Johnson ជាប្រធានសភាតំណាងរាស្ត្រ។ ការបោះឆ្នោតកាលពីថ្ងៃទី៥ខែវិច្ឆិកានេះ បានបង្ហាញឲ្យឃើញពីការកាន់កាប់អំណាចរបស់ផ្តាច់មុខរបស់គណបក្សសាធារណៈរដ្ឋ ដោយសារតែគណបក្សសាធារណៈរដ្ឋមានសមាជិកសភា២២០ ទល់នឹង២១៥នៃគណបក្សប្រជាធិបតេយ្យ។ ជាមួយគ្នានេះគណបក្សសាធារណៈរដ្ឋរបស់លោក ដូណាល់ ត្រាំ មានសមាជិកព្រឹទ្ធសភា៥៣ ទល់នឹងសមាជិកព្រឹទ្ធសភាចំនួន៤៧នៃគណបក្សប្រជាធិបតេយ្យ។

លោក Mike Johnson ជាប់ឆ្នោតជាប្រធានរដ្ឋសភា។ Reuter

មានការកត់សម្គាល់ឃើញថា លោក ចូ បៃដិន ប្រធានាធិបតីជិតផុតអាណត្តិរបស់សហរដ្ឋអាមេរិក បានបង្កើនការផ្តល់ជំនួយដល់អ៊ុយក្រែនដែលលោក ចូ បៃដិន តែងផ្តល់ការគាំទ្រឥតងាករេចាប់តាំងពីសង្គ្រាមបានផ្ទុះឡើងកាលថ្ងៃទី២៤ខែកុម្ភៈឆ្នាំ២០២២។

មិនត្រឹមតែផ្តល់ជំនួយប៉ុណ្ណោះទេ លោក ចូ បៃដិន ក៏អនុញ្ញាតឲ្យអ៊ុយក្រែនប្រើប្រាស់អាវុធរយៈចម្ងាយឆ្ងាយបាញ់ចូលទឹកដីរុស្ស៊ី ដែលធ្វើឲ្យសង្គ្រាមរវាងរុស្ស៊ីនិងអ៊ុយក្រែនកាន់តែផ្ទុះខ្លាំងឡើង ហើយការប្រឈមនៃអាវុធមហាប្រល័យក៏កាន់តែខ្លាំងដូចគ្នា។

ទោះជាបែបណាក្តី ប្រធានាធិបតីជាប់ឆ្នោត លោក ដូណាល់ ត្រាំ ហាក់បានបង្ហាញជំហរផ្ទុះពីលោក ចូ បៃដិន ក្នុងសង្គ្រាមនៅអ៊ុយក្រែន ជាពិសេស លោកក៏ធ្លាប់បានរិះគន់លោក ចូ បៃដិន រឿងផ្តល់ជំនួយដ៏ច្រើនដល់អ៊ុយក្រែន និងការអនុញ្ញាតឲ្យអ៊ុយក្រែនប្រើប្រាស់អាវុធចម្ងាយឆ្ងាយ។

យ៉ាងណាក៏ដោយ ការវិលទៅកាន់អំណាចរបស់លោក ដូណាល់ ត្រាំ ក៏ជាការទន្ទឹងរង់ចាំដែរ ដោយសារតែការសន្យារបស់លោកនៅមុនការបោះឆ្នោតថា លោកនឹងបញ្ចប់សង្គ្រាមរុស្ស៊ី-អ៊ុយក្រែនឱ្យបានឆាប់៕

ដោយ រ៉ាន់ រើយ

The post ហារីស ធ្វើជាអធិបតីភាពក្នុងការបញ្ជាក់លទ្ធផលឆ្នោតដែលខ្លួនចាញ់លោក ត្រាំ appeared first on Kampuchea Thmey Daily.

ក្រោយបាត់បង់ទាំងសភា និងសេតវិមាន លោកស្រី កាម៉ាឡា ហារីស ទំនងដាក់ខ្លួនជាមេដឹកនាំបក្សប្រឆាំងនយោបាយ

Bun sopheap — Wed, 18 Dec 2024 10:27:48 +0000

លោកស្រី កាម៉ាឡា ហារីស បានថ្លែងជំរុញឱ្យអ្នកដែលខកចិត្តចំពោះការបរាជ័យរបស់លោកស្រីនៅក្នុងការបោះឆ្នោតកាលពីខែមុន «រក្សាការប្រយុទ្ធ» ដែលការថ្លែងនេះទំនងជាដាក់ខ្លួនលោកស្រីជាមេដឹកនាំគណបក្សប្រឆាំងនយោបាយ ខណៈដែលលោក ដូណាល់ ត្រាំ ត្រៀមឡើងកាន់តំណែង។

(រូបភាព៖ AP)

សារព័ត៌មាន AP បានដកស្រង់ការថ្លែងរបស់អនុប្រធានប្រធាធិបតី លោកស្រី កាម៉ាឡា ហារីស ចំពោះសិស្សនៅក្នុងកម្មវិធី Maryland Corps ដោយមិនបានបង្ហាញពីគម្រោងផ្ទាល់ខ្លួនរបស់លោកស្រីសម្រាប់បន្ទាប់ពីបញ្ចប់អាណត្តិនោះទេ ប៉ុន្តែលោកស្រីបាននិយាយអំពី «ការប្តេជ្ញាចិត្តរួមរបស់លោកស្រីចំពោះការងារខាងមុខ»។

សុន្ទរកថានេះជាការពិភាក្សាដ៏ល្អមួយនៅពេលដែលលោក ត្រាំ ត្រឡប់មកកាន់កៅអីសេតវិមានវិញ ហើយគណបក្សសាធារណរដ្ឋបានគ្រប់គ្រងពេញលេញពីសភា ដែលជាលទ្ធផលដ៏អាក្រក់សម្រាប់គណបក្សប្រជាធិបតេយ្យ។

លោកស្រី ហារីស បាននិយាយថា៖«មនុស្សជាច្រើនបានមករកខ្ញុំ ដោយប្រាប់ខ្ញុំថា ពួកគេមានអារម្មណ៍ហត់នឿយ ពួកគេមិនប្រាកដថា តើពួកគេមានកម្លាំង ដើម្បីបន្តប្រយុទ្ធនោះទេ»។ លោកស្រីថា«គ្មាននរណាម្នាក់អាចដើរចេញបានទេ យើងត្រូវតែនៅក្នុងការប្រយុទ្ធ»។ លោកស្រីបានបន្ថែមថា៖ «ការសាកល្បងពិតនៃចរិតរបស់យើងគឺថាតើយើងមានភាពធន់និងការតស៊ូប៉ុណ្ណាដើម្បីបន្តទៅអនាគតដែលយើងទាំងអស់គ្នាអាចមើលឃើញ»។

(រូបភាព៖ AP)

លោកស្រីហារីស មិនបានលើកឡើងពី លោកត្រាំ ក្នុងសុន្ទរកថារបស់លោកស្រីទេ ប៉ុន្តែការលើកឡើងនេះអាចជាជំហានដំបូងឆ្ពោះទៅរកការដាក់ខ្លួនលោកស្រីជាមេដឹកនាំគណបក្សប្រឆាំងនយោបាយ។ មានការរំពឹងទុកផងដែរថាលោកអាចឈរឈ្មោះជាអភិបាលរដ្ឋក្នុងរដ្ឋកាលីហ្វ័រញ៉ាដែលជាស្រុកកំណើតរបស់លោកស្រីដែលការបោះឆ្នោតបន្ទាប់គឺនៅឆ្នាំ ២០២៦ ខណៈគណបក្សប្រជាធិបតេយ្យនៅតែព្យាយាមរកវិធីល្អបំផុតឆ្ពោះទៅមុខសម្រាប់គណបក្សរបស់ពួកគេទោះបីជាចាញ់ឆ្នោតក៏ដោយ។

គួរបញ្ជាក់ថាពេលកំពុងបម្រើនៅក្រោមប្រធានាធិបតី ចូ បៃដិន លោក ហារីស បានទស្សនាបរិវេណមហាវិទ្យាល័យ ហើយផ្តោតលើបញ្ហាដែលទាក់ទងនឹងសិស្ស ដូចជាអំពើហិង្សាដោយកាំភ្លើង និងការប្រែប្រួលអាកាសធាតុ។ លោកស្រីក៏បានធ្វើឱ្យប្រាកដថានឹងបានជួបជាមួយយុវជននៅបរទេសនៅទ្វីបអាហ្រ្វិក និងអាស៊ី នៅពេលដែលលោកស្រីធ្វើការលើកិច្ចខិតខំប្រឹងប្រែងការទូតរបស់សហរដ្ឋអាមេរិក៕

(រូបភាព៖ AP)

អត្ថបទ៖ ប៊ុន សុភាព

The post ក្រោយបាត់បង់ទាំងសភា និងសេតវិមាន លោកស្រី កាម៉ាឡា ហារីស ទំនងដាក់ខ្លួនជាមេដឹកនាំបក្សប្រឆាំងនយោបាយ appeared first on Kampuchea Thmey Daily.

ហារីសជំរុញអ្នកគាំទ្រទទួលយកលទ្ធផលបោះឆ្នោតនិងលើកទឹកចិត្តឱ្យបន្តការតស៊ូទៅមុខ

Bun sopheap — Thu, 07 Nov 2024 06:45:53 +0000

ប្រឈមមុខនឹងការបដិសេធយ៉ាងខ្លាំងពីសំណាក់អ្នកបោះឆ្នោតអាមេរិក អនុប្រធានាធិបតីសហរដ្ឋអាមេរិក លោកស្រី កាំម៉ាឡា ហារីស បានទទួលស្គាល់លទ្ធផលបោះឆ្នោតប្រធានាធិបតីដែលលោក ដូណាល់ ត្រាំ បានឈ្នះឆ្នោតកាលពីថ្ងៃពុធ ហើយបានលើកទឹកចិត្តអ្នកគាំទ្រឱ្យបន្តការតស៊ូដើម្បីចក្ខុវិស័យរបស់ប្រទេស។

(រូបភាព៖ AP)

លោកស្រីបាននិយាយនៅឯសាកលវិទ្យាល័យ Howard ជាកន្លែងលោកស្រីធ្លាប់ទទួលបានការសិក្សាអប់រំដែលនាងសង្ឃឹមថានឹងធ្វើសុន្ទរកថាជ័យជំនះបន្ទាប់ពីការបោះឆ្នោតថា «ពេលខ្លះការប្រយុទ្ធត្រូវចំណាយពេលបន្តិច ហើយនោះមិនមានន័យថា យើងនឹងមិនឈ្នះទេ»។

អនុប្រធានគណបក្សប្រជាធិបតេយ្យ បានបន្ថែមថា ការប្រយុទ្ធនឹងបន្ត «នៅក្នុងកន្លែងបោះឆ្នោតនៅតុលាការ និងនៅតាមទីសាធារណៈ»។

ការបរាជ័យដាច់ឆ្ងាយរបស់ លោកស្រី ហារីស បានបំបែកក្តីសង្ឃឹមដែលថា លោកស្រីអាចជួយសង្គ្រោះឱកាសរបស់គណបក្សប្រជាធិបតេយ្យ បន្ទាប់ពីកិច្ចខិតខំប្រឹងប្រែងក្នុងការប្រជែងការបោះឆ្នោតឡើងវិញរបស់ប្រធានាធិបតី ចូ បៃដិន បានធ្លាក់ប្រជាប្រិយ ហើយដាក់ជំនួសដោយបេក្ខភាពរបស់លោកស្រី។ លោកស្រីបានចេញទៅចូលរួមនៅគ្រប់រដ្ឋដែលប្រទាញប្រទង់ខ្លាំងជាមួយលោកដូណាល់ត្រាំដែលជាគណបក្សសាធារណរដ្ឋដែលលោកស្រីបានពិពណ៌នាថា ជា«គ្រោះថ្នាក់ដល់ស្ថាប័នគ្រឹះរបស់ប្រទេស»។

ទស្សនិកជនមួយចំនួនបានសម្តែងការខកចិត្តដែល Harris មិនអាចបង្កើតប្រវត្តិសាស្ត្រជាប្រធានាធិបតីស្ត្រីស្បែកខ្មៅដំបូងគេរបស់ប្រទេសនេះ។ លោកស្រីហារីស ក៏នឹងក្លាយជាប្រធានាធិបតីអាមេរិកដំបូងគេដែលមានដើមកំណើតអាស៊ីខាងត្បូងផងដែរប្រសិនបើឈ្នះឆ្នោត។ ទោះយ៉ាងណាលោកស្រី បានប្រាប់អ្នកគាំទ្រ ខណៈដែលពួកគេខ្លះជូតទឹកភ្នែកថា «វាមិនអីទេដែលពួកយើងមានអារម្មណ៍សោកសៅ និងខកចិត្ត ប៉ុន្តែសូមដឹងថាវានឹងមិនអីទេ»។

ជាមួយគ្នានេះលោក បៃដិន បានចេញសេចក្តីថ្លែងការណ៍សរសើរ ហារីស បន្ទាប់ពីសុន្ទរកថារបស់លោកស្រីដោយនិយាយថា «លោកស្រីនឹងបន្តការប្រយុទ្ធដោយគោលបំណង ការតាំងចិត្ត និងសេចក្តីរីករាយ លោកស្រីនឹងបន្តក្លាយជាជើងឯកសម្រាប់ជនជាតិអាមេរិកទាំងអស់។ លើសពីនេះទៅទៀត លោកស្រីនឹងបន្តធ្វើជាអ្នកដឹកនាំដែលកូនៗរបស់យើងនឹងសម្លឹងមើលទៅកាន់មនុស្សជំនាន់ក្រោយ ខណៈដែលលោកស្រីដាក់ត្រាលើអនាគតរបស់អាមេរិក»។

(រូបភាព៖ AP)

មុនពេលសុន្ទរកថារបស់លោកស្រីហារីស គាត់បានទូរស័ព្ទទៅលោកត្រាំ ដើម្បីអបអរសាទរត្រាំចំពោះជ័យជំនះរបស់គាត់។ លោកស្រីបានប្រាប់ហ្វូងមនុស្សថា «យើងនឹងចូលរួមក្នុងការផ្ទេរអំណាចដោយសន្តិវិធី»។ លោក បៃដិន គ្រោងនឹងនិយាយអំពីលទ្ធផលបោះឆ្នោតនៅថ្ងៃព្រហស្បតិ៍នេះ ខណៈសេតវិមានបាននឹងអញ្ជើញប្រធានាធិបតីជាប់ឆ្នោតឱ្យជួបជាមួយក្នុងពេលឆាប់ៗនេះ។

ទោះបីជាយ៉ាងណាឥឡូវនេះក្រុមអ្នកប្រជាធិបតេយ្យប្រឈមមុខនឹងការរំពឹងទុកនៃការរើសយកតំណែងពេលលោក ត្រាំ កាន់តំណែងជាប្រធានាធិបតីជាលើកទីពីរ ហើយវាមិនច្បាស់ថាតើតួនាទីអ្វីដែលលោកស្រីហារីស នឹងដើរតួក្នុងអនាគតគណបក្សរបស់លោកស្រី៕

(រូបភាព៖ AP)

អត្ថបទ៖ ប៊ុន សុភាព

The post ហារីសជំរុញអ្នកគាំទ្រទទួលយកលទ្ធផលបោះឆ្នោតនិងលើកទឹកចិត្តឱ្យបន្តការតស៊ូទៅមុខ appeared first on Kampuchea Thmey Daily.

អ្នកគាំទ្រលោកស្រី ហារីស បង្ហាញពីអារម្មណ៍ខកចិត្តនិងស្រក់ទឹកភ្នែក

Bun sopheap — Thu, 07 Nov 2024 06:35:07 +0000

ក្រោយដឹងលទ្ធផលចាញ់ឆ្នោត អ្នកគាំទ្រលោកស្រីហារីសជាច្រើនបានបង្ហាញពីអារម្មណ៍ខកចិត្តនិងស្រក់ទឹកភ្នែកនៅក្នុងពេលលោកស្រីថ្លែងសុន្ទរកថា នៅក្នុងសកលវិទ្យាល័យ Howard ជាទីដែលលោកស្រីរៀនកាលនៅមហាវិទ្យាល័យ។ នេះបើយោងតាមការចេញផ្សាយរបស់ទីភ្នាក់ងារព័ត៌មានAPនៅថ្ងៃទី៧ខែវិច្ឆិកានេះ។

(រូបភាព៖ AP)

អ្នកគាំទ្រដែលភាគច្រើនជាស្ត្រីពណ៌សម្បុរ បានស្រក់ទឹកភ្នែក ហើយលើកដៃឡើងក្នុងសាមគ្គីភាព ខណៈដែលអនុប្រធានាធិបតី លោកស្រី កាំម៉ាឡា ហារីសថ្លែងសុន្ទរកថារបស់លោកស្រីសម្រាប់ការបោះឆ្នោតប្រធានាធិបតីឆ្នាំ ២០២៤ កាលពីថ្ងៃពុធនៅបរិវេណសាកលវិទ្យាល័យ Howard ក្នុងទីក្រុងវ៉ាស៊ីនតោន។

មនុស្សជាច្រើនបានកាន់ទូរស័ព្ទដៃ ហើយហាក់ដូចជាកំពុងថតទុកជាប្រវតិ្តសាស្រ្ត ខណៈដែល ហារីស បានប្រាប់ពួកគេថាលោកស្រីបានចាញ់ការប្រណាំងប្រជែងរបស់លោកស្រីជាមួយត្រាំ។ នៅពេលដែលលោកស្រី ហារីស ឡើងឆាកលោកស្រីបាននិយាយថា៖ «មនុស្សគ្រាប់គ្នាកំពុងជួបប្រទះនូវអារម្មណ៍មួយចំនួននាពេលនេះ ខ្ញុំយល់»។

ទស្សនិកជនបានស្រែកហ៊ោបន្ទាប់ពីលោកស្រីបាននិយាយថាលោកស្រីបានអបអរសាទរប្រធានាធិបតីជាប់ឆ្នោត លោក ដូ ណាល់ត្រាំ ចំពោះជ័យជម្នះរបស់គាត់ ខណៈបុរសខ្លះក្នុងហ្វូងមនុស្សមើលទៅស្រងាកចិត្តពេលស្តាប់ ខណៈស្ត្រីមួយក្រុមញញឹមគាំទ្រ។

(រូបភាព៖ AP)

គួរបញ្ជាក់ថាការបរាជ័យយ៉ាងដាច់អហង្ការរបស់លោកស្រី ហារីស បានបំបែកក្តីសង្ឃឹមដែលថាលោកស្រីអាចជួយសង្គ្រោះឱកាសរបស់គណបក្សប្រជាធិបតេយ្យ បន្ទាប់ពីកិច្ចខិតខំប្រឹងប្រែងបោះឆ្នោតឡើងវិញរបស់ប្រធានាធិបតី ចូ បៃដិន បានជាប់គាំង ហើយលោកស្រីបានជំនួស។ លោកស្រីបានដើរតាមគ្រប់រដ្ឋនៃសមរភូមិជាមួយ ត្រាំដែលជាគណបក្សសាធារណរដ្ឋដែលលោកស្រីបានពិពណ៌នាថាជាគ្រោះថ្នាក់ដល់ស្ថាប័នគ្រឹះរបស់ប្រទេស។

ទោះយ៉ាងណាមុនពេលសុន្ទរកថារបស់លោកស្រីហារីស បានទូរស័ព្ទទៅលោកត្រាំ ដើម្បីអបអរសាទរត្រាំចំពោះជ័យជំនះរបស់គាត់។ លោកស្រីបានប្រាប់ហ្វូងមនុស្សថា «យើងនឹងចូលរួមក្នុងការផ្ទេរអំណាចដោយសន្តិវិធី»។ ជាមួយគ្នានេះលោក បៃដិន គ្រោងនឹងនិយាយអំពីលទ្ធផលបោះឆ្នោតនៅថ្ងៃព្រហស្បតិ៍នេះ ខណៈសេតវិមានបាននឹងអញ្ជើញប្រធានាធិបតីជាប់ឆ្នោតឱ្យជួបជាមួយក្នុងពេលឆាប់ៗនេះ៕

(រូបភាព៖ AP)

អត្ថបទ៖ ប៊ុន សុភាព

The post អ្នកគាំទ្រលោកស្រី ហារីស បង្ហាញពីអារម្មណ៍ខកចិត្តនិងស្រក់ទឹកភ្នែក appeared first on Kampuchea Thmey Daily.

កូនលោកត្រាំ ចោទប្រកាន់តារាដែលបោះឆ្នោតឲ្យលោកស្រីហារីសថា សុទ្ធតែពាក់ព័ន្ធនឹងរឿងក្ដី Diddy

សាង ស្រីល័ក្ខ — Wed, 06 Nov 2024 03:36:43 +0000

លោក ដូណាល់ ត្រាំ ជេ អ (Donald Trump Jr.) ដែលជាកូនប្រុសរបស់អតីតប្រធានាធិបតី ដូណាល់ ត្រាំ បានចោទប្រកាន់យ៉ាងធ្ងន់ធ្ងរមួយចំនួនប្រឆាំងនឹងអ្នកគាំទ្រអនុប្រធានាធិបតីកាម៉ាឡា ហារីស ក្នុងការបោះឆ្នោតកាលពីថ្ងៃអង្គារដោយអះអាងថា តារាល្បីៗដែលគាំទ្រហារីសគឺស្ថិតនៅក្នុងបញ្ជី Epstein ឬបញ្ជី Diddy ទាំងអស់។

Sean “Diddy” Combs ត្រូវបានចាប់ខ្លួន និងចោទប្រកាន់ពីបទរំលោភសេពសន្ថវៈ ការជួញដូរផ្លូវភេទ និងការដឹកជញ្ជូនដើម្បីចូលរួមក្នុងអំពើពេស្យាចារនៅឯពិធីជប់លៀង Freak Off ដ៏ល្បីល្បាញរបស់គាត់ ទោះបីជាគាត់បដិសេធមិនធ្វើខុសក៏ដោយ។ ប៉ុន្តែតារារ៉េបប្រុសស្បែកខ្មៅរូបនេះ បានប្រឈមមុខនឹងការចោទប្រកាន់ពីមនុស្សជាង ១២០ នាក់ឯណោះ។

ទន្ទឹមគ្នានោះថែមទៀត តារាហូលីវូដល្បីៗជាច្រើន បានងាកមកគាំទ្របេក្ខភាពគណបក្សប្រជាធិបតេយ្យ រួមមាន Bruce Springsteen, Taylor Swift, Jennifer Aniston, Harrison Ford, Bad Bunny និងជាច្រើនទៀត។ កត្តាទាំងនេះបានធ្វើឲ្យលោកត្រាំ ជេ អ បានបន្តជាមួយនឹងការទាមទារដោយនិយាយថា Diddy ត្រូវបានគេចាប់ខ្លួនតែប៉ុណ្ណោះ ដូច្នេះហារីសអាចបង្ខូចកេរ្តិ៍ឈ្មោះតារាដែលបានទៅចូលរួមពិធីជប់លៀងរបស់គាត់ ដើម្បីងាកមកគាំទ្រដល់រូបនាង។

កូនប្រុសទី៣របស់លោកដូណាល់ត្រាំបានបញ្ចាក់បន្ដែមទៀតថា «ហេតុអ្វីបានជាគ្រប់គ្នា សូម្បីតែតារាសេរីនិយមគាំទ្រ កាម៉ាឡា ហារីស? មែនហើយ ហេតុផលមួយគឺដោយសារតែយើងឃើញចំនួនប្រាក់កម្រៃដែលមិនធ្លាប់មានពីមុនមកសម្រាប់ពួកគេ។ យើងដឹងថាតារាល្បីៗដែលមិនទទួលបានប្រាក់កម្រៃ ប្រហែលជាទទួលបានប្រាក់ខែតាមវិធីផ្សេង ព្រោះពួកគេស្ថិតក្នុងបញ្ជី Epstein ឬបញ្ជី Diddy ឬទាំងពីរតែម្ដង។ យើងទាំងអស់គ្នាបានឃើញពីរបៀបដែល Diddy ត្រូវបានចាប់ខ្លួន ហើយភ្លាមៗនោះ មនុស្សគ្រប់គ្នាបែរងាកទៅគាំទ្រគណបក្សប្រជាធិបតេយ្យទៅវិញ? តើវាចេញពីកន្លែងណា»?

លោកត្រាំ ជេ អ. ហាក់មានភាពច្បាស់លាស់លើជំនឿរបស់គាត់លើបញ្ហានេះ ដោយស្វែងរកចម្លើយថា ហេតុអ្វីបានជាមនុស្សជាច្រើនគាំទ្រគណបក្សប្រជាធិបតេយ្យជំនួសឲ្យគណបក្សសាធារណរដ្ឋ ទោះបីជាគាត់មិនបានបង្ហាញភស្តុតាងជាក់ស្តែងណាមួយ លើសេចក្តីថ្លែងការណ៍របស់គាត់ក៏ដោយ៕

អត្ថបទ៖ សាង ស្រីល័ក្ខ

ចុចអាន៖ស្អែកបោះឆ្នោតអាមេរិក តារាប្រុស-ស្រី បង្ហាញជំហគាំទ្រលោកស្រីហារីស ខណៈផ្សេងទៀតគាំទ្រលោកត្រាំ

The post កូនលោកត្រាំ ចោទប្រកាន់តារាដែលបោះឆ្នោតឲ្យលោកស្រីហារីសថា សុទ្ធតែពាក់ព័ន្ធនឹងរឿងក្ដី Diddy appeared first on Kampuchea Thmey Daily.

ស្អែកបោះឆ្នោតអាមេរិក តារាប្រុស-ស្រី បង្ហាញជំហគាំទ្រលោកស្រីហារីស ខណៈផ្សេងទៀតគាំទ្រលោកត្រាំ

សាង ស្រីល័ក្ខ — Mon, 04 Nov 2024 04:04:15 +0000

នៅថ្ងៃទី ០៥ ខែវិច្ឆិកាស្អែកនេះ គឺជាថ្ងៃបោះឆ្នោតជ្រើសរើសប្រធានាធាបតីទី៤៧របស់សហរដ្ឋអាមេរិក ហើយបេក្ខជនទាំងពីររូបដែលរួមមានអនុប្រធានាធិបតី កាម៉ាឡា ហារីស (Kamala Harris) និងអតីតប្រធានាធិបតី ដូណាល់ ត្រាំ (Donald Trump) កំពុងតែទាក់ទាញសន្លឹកឆ្នោត តាមរយៈការឃោសនានិងបង្ហាញពីគោលនយោបាយផ្សេងៗគ្នា។

យ៉ាងណាក៏ដោយ នៅក្នុងពិភពតារាហូលីវូដដោយយោងតាមបញ្ជីឈ្មោះតារាជួរមុខសំខាន់ៗ និងអ្នកផ្សេងទៀតបានបង្ហាញជំហរៀងៗខ្លួនក្នុងការគាំទ្របេក្ខជនប្រធានាធិបតីសហរដ្ឋអាមេរិក បើទោះជាមានការប្រទាញប្រទង់គ្នានៅយុទ្ធនាការឃោសនាចុងក្រោយយ៉ាងណាក្ដី។

តារាល្បីៗដែលគាំទ្រលោកស្រី កាម៉ាឡា ហារីស មានដូចជា៖ Taylor Swift, Beyoncé, រាជនីប៉ុប Madonna, តារារ៉េប Eminem, Julia Roberts, Jennifer Lopez, Jennifer Aniston, Bon Jovi, Khalid, Maggie Rogers, Gracie Abrams, Billie Eilish, Samuel L Jackson, និង Spike Lee ក៏ស្ថិតក្នុងចំណោមតារាដែលបានគាំទ្រលោកស្រីហារីស យ៉ាងពេញទំហឹងផងដែរ។

ដោយឡែក ងាកមកកាន់អ្នកដែលគាំទ្រលោក ដូណាល់ ត្រាំ ថ្វីដ្បិតតែថាមិនមានតារាល្បីៗដូចលោកស្រី ហារីស ក៏ពិតមែន ប៉ុន្តែគាត់ទទួលបានការអំពាវនាវយ៉ាងខ្លាំងក្លា ដែលរួមមានតារាហូលីវូដនិងឥស្សរជនល្បីៗដូចជា៖ លោក Elon Musk, ដុកទ័រ Phil McGraw, កីឡាករចំបាប់ Hulk Hogan, YouTuber និងជាអ្នកប្រដាល់អាជីព Jake Paul, តារាសម្ដែង Mel Gibson, Jon Voight, Amber Rose, Zachary Levi, Caitlyn Jenner, Kid Rock, Chris Janson និងកីឡាករប្រណាំងរថយន្ត Danica Patrick។

មិនត្រឹមប៉ុណ្ណឹងទេ យោងតាមការស្ទង់មតិរបស់ YouGov នាពេលថ្មីៗនេះ ជនជាតិអាមេរិកម្នាក់ក្នុងចំណោម ១០នាក់ (១១%) និយាយថា តារាល្បីធ្លាប់ធ្វើឲ្យពួកគេពិចារណាឡើងវិញ អំពីជំហរផ្ទាល់ខ្លូនលើបញ្ហានយោបាយ ខណៈដែល ៧% និយាយថា ពួកគេបានគាំទ្របេក្ខជននយោបាយដោយសារតែការយល់ព្រមពីតារាល្បីៗ៕

រូបភាព៖Getty Images

អត្ថបទ៖ សាង ស្រីល័ក្ខ

ចុចអាន៖លោកស្រី ហារីស និង ដូណាល់ ត្រាំ ឃោសនានៅថ្ងៃចុងក្រោយនៅរដ្ឋប្រទាញប្រទង់ North Carolina ដូចគ្នា

The post ស្អែកបោះឆ្នោតអាមេរិក តារាប្រុស-ស្រី បង្ហាញជំហគាំទ្រលោកស្រីហារីស ខណៈផ្សេងទៀតគាំទ្រលោកត្រាំ appeared first on Kampuchea Thmey Daily.

លោកស្រី ហារីស ថាការអត្ថាធិប្បាយរបស់លោក ត្រាំ លើស្ត្រី «ជាការប្រមាថដល់មនុស្សគ្រប់គ្នា»

Bun sopheap — Fri, 01 Nov 2024 08:34:49 +0000

លោកស្រី កាំម៉ាឡា ហារីស បាននិយាយកាលពីថ្ងៃព្រហស្បតិ៍ថា ការអត្ថាធិប្បាយរបស់ លោក ដូណាល់ ត្រាំ ថា លោកនឹងការពារស្ត្រី ដោយចោទសួរថាតើពួកគេ «ចូលចិត្តវាឬអត់»នោះ បង្ហាញថា បេក្ខភាពប្រធានគណបក្សសាធារណរដ្ឋមិនយល់ពីសិទ្ធិរបស់ស្ត្រីនោះទេ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១ខែវិច្ឆិកានេះ។

(រូបភាព៖ AP)

លោកស្រី បាននិយាយមុនពេលលោកស្រីចេញទៅធ្វើយុទ្ធនាការពេញមួយថ្ងៃនៅក្នុងសមរភូមិភាគខាងលិចនៃរដ្ឋ Arizona និង Nevada ថា«ខ្ញុំគិតថាវាជាការប្រមាថដល់មនុស្សគ្រប់គ្នា»។ លោកស្រីបានធ្វើការកត់សម្គាល់ទាំងនោះនៅឯការជួបជុំនៅទីក្រុង Phoenix ថា៖«គាត់មិនគោរពសេរីភាពរបស់ស្ត្រី ឬភាពឆ្លាតវៃរបស់ស្ត្រីក្នុងការដឹងពីអ្វីដែលជាផលប្រយោជន៍ផ្ទាល់ខ្លួនរបស់ពួកគេទេ»។

ការអត្ថាធិប្បាយរបស់លោកត្រាំបានកើតឡើង ខណៈដែលលោកបានព្យាយាមភ្ជាប់ទំនាក់ទំនងជាមួយអ្នកបោះឆ្នោតជាស្ត្រី និង ខណៈពេលលោកស្រី ហារីស ផ្តោតលើសេរីភាពរបស់ស្រ្តី។ លោកស្រីកំពុងបង្កើតទីលានដែលស្ត្រីគួរមានសេរីភាពក្នុងការសម្រេចចិត្តដោយខ្លួនឯងអំពីរូបរាងកាយរបស់ពួកគេ ហើយថាប្រសិនបើលោក ត្រាំ ត្រូវបានជាប់ឆ្នោត នោះការរឹតបន្តឹងកាន់តែច្រើននឹងកើតឡើង។

គួររម្លឹកថា ត្រាំ បានតែងតាំងចៅក្រមបីនាក់នៅតុលាការកំពូលរបស់សហរដ្ឋអាមេរិកដែលបានបដិសេធសិទ្ធិរំលូតកូនរបស់សហព័ន្ធ។ នៅពេលដែលការធ្លាក់ចុះពីការសម្រេចចិត្តឆ្នាំ២០២២ រីករាលដាលដែលថា លោកត្រាំ បានឈានទៅដល់ការអះអាងនៅឯព្រឹត្តិការណ៍សាធារណៈ និងការបង្ហោះតាមប្រព័ន្ធផ្សព្វផ្សាយសង្គមថាគាត់នឹង «ការពារស្ត្រី» និងធានាថាពួកគេនឹងមិន «គិតអំពីការរំលូតកូន» នោះទេ។ ជាមួយគ្នានេះ លោក ត្រាំ បាននិយាយអំឡុងពេលបាតុកម្មនៅ Green Bay រដ្ឋ Wisconsin ថា៖«ខ្ញុំនឹងការពារពួកគេពីជនចំណាកស្រុកដែលចូលមក។ ខ្ញុំនឹងការពារពួកគេពីបរទេសដែលចង់វាយប្រហារយើងដោយមីស៊ីល និងរបស់ជាច្រើនទៀត»។

លោកស្រី បានភ្ជាប់ការអត្ថាធិប្បាយរបស់លោក ត្រាំទៅនឹងវិធីសាស្រ្តរបស់គាត់ចំពោះសិទ្ធិបន្តពូជ ខណៈជាទូទៅ ត្រាំ និយាយច្រើនផ្ដោតលើការការពារស្ត្រីពីឧក្រិដ្ឋជន ភេរវករ និងបច្ចាមិត្តបរទេស ជាជាងការការពារច្បាប់រំលូតកូន។

វាមិនមែនមានតែស្ត្រីប៉ុណ្ណោះទេដែលពណ៌នាការថ្លែងរបស់លោកត្រាំថាជា«ការប្រមាថ»។ នៅឯការប្រមូលផ្តុំគ្នារបស់លោកស្រីហារីស ក្នុងទីក្រុង Phoenix លោក Edison Kinlichenie អាយុ៥០ឆ្នាំ បាននិយាយថាគាត់មើលឃើញថា ត្រាំ និយាយគំរាមកំហែងជាជាងការពារដោយកត់សម្គាល់ថាអតីតប្រធានាធិបតីធ្លាប់មានកំណត់ត្រាចាប់រំលោភលើស្ត្រី។

លោក ត្រាំ ធ្លាប់បានផ្តល់ចម្លើយអំពីជំហររបស់គាត់លើការរំលូតកូន ដែលគាត់បាននិយាយថាស្ត្រីគួរតែត្រូវបានផ្តន្ទាទោសចំពោះការរំលូតកូន។ ប៉ុន្តែប៉ុន្មានសប្តាហ៍ថ្មីៗនេះ លោកបានសន្យាវេតូលើបម្រាមការរំលូតកូនថ្នាក់ជាតិ បន្ទាប់ពីបដិសេធម្តងហើយម្តងទៀតក្នុងការសន្យាបែបនេះ។ គាត់បាននិយាយថារដ្ឋគួរតែគ្រប់គ្រងការថែទាំហើយបាននិយាយថាច្បាប់មួយចំនួន«តឹងតែងពេក»។

(រូបភាព៖ AP)

គួរបញ្ជាក់ថា ចាប់តាំងពីឆ្នាំ២០២២មក ការអនុវត្តច្បាប់របស់រដ្ឋស្តីពីការរំលូតកូន បានបង្កើតការថែទាំសុខភាពមិនស្មើគ្នា ដោយស្ត្រីខ្លះបានស្លាប់។ អ្នកផ្សេងទៀតបានហូរឈាមក្នុងចំណតរថយន្តក្នុងបន្ទប់សង្គ្រោះបន្ទាន់ ឬធ្លាក់ខ្លួនឈឺធ្ងន់ធ្ងរដោយសារជំងឺ sepsis ខណៈដែលគ្រូពេទ្យក្នុងរដ្ឋមួយចំនួនមានបម្រាមរំលូតកូនយ៉ាងតឹងរឹង ក្នុងនោះរួមមានស្ត្រីដែលមិនដែលមានបំណងមានផ្ទៃពោះ ខណៈទាំងមរណភាពទារក និងមាតាបានកើនឡើង។ ស្របពេលនេះលោកស្រី ហារីសសង្ឃឹមថា ការរំលូតកូននឹងជាការលើកទឹកចិត្តដ៏ខ្លាំងមួយសម្រាប់ស្ត្រីនៅក្នុងប្រអប់សន្លឹកឆ្នោត។

យោងតាមទិន្នន័យពីក្រុមហ៊ុនវិភាគ TargetSmart បានឱ្យដឹងថា នៅក្នុងការបោះឆ្នោតដំបូង រហូតមកដល់ពេលនេះ ស្ត្រី ១.២ លាននាក់ច្រើនជាងបុរសបានបោះឆ្នោតនៅទូទាំងរដ្ឋសមរភូមិទាំងប្រាំពីរ។ ជាមួយគ្នានេះក្នុងការបោះឆ្នោតប្រធានាធិបតីឆ្នាំ ២០២០ ស្ត្រី ៥៥% បានគាំទ្រគណបក្សប្រជាធិបតេយ្យរបស់លោក ចូ បៃដិន និង លោកស្រីហារីស នេះបើយោងតាម AP VoteCast ដែលជាការស្ទង់មតិរបស់អ្នកបោះឆ្នោតជាង ១១០០០០នាក់៕

(រូបភាព៖ AP)

អត្ថបទ៖ ប៊ុន សុភាព

The post លោកស្រី ហារីស ថាការអត្ថាធិប្បាយរបស់លោក ត្រាំ លើស្ត្រី «ជាការប្រមាថដល់មនុស្សគ្រប់គ្នា» appeared first on Kampuchea Thmey Daily.

ហារីសសន្យាថានឹងតំណាងឱ្យជនជាតិអាមេរិកទាំងអស់បន្ទាប់ពីបៃដិនថាអ្នកគាំទ្រត្រាំជាសំរាម

Bun sopheap — Thu, 31 Oct 2024 10:20:59 +0000

លោកស្រី កាំម៉ាឡាហារីសបានអំពាវនាវឲ្យជនជាតិអាមេរិកបញ្ឈប់ការប្រឈមមុខគ្នាទៅវិញទៅមក ជុំវិញការជជែកដេញដោលបន្ទាប់បីលោកបៃដិនហៅអ្នកគាំទ្រលោកត្រាំថាជាសំរាមអណ្ដែតទឹក។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៣១ខែតុលានេះ។

(រូបភាព៖ AP)

គួររម្លឹកថា ភាពចម្រូងចម្រាសបានចាប់ផ្តើមកាលពីថ្ងៃអង្គារនៅពេលដែល លោក បៃដិន បានចូលរួមក្នុងការអំពាវនាវយុទ្ធនាការមួយដែលរៀបចំដោយក្រុមតស៊ូមតិជនជាតិអេស្ប៉ាញ Voto Latino ។

លោក បៃដិន បានប្រើឱកាសដើម្បីរិះគន់ការប្រមូលផ្តុំគ្នានៅ Madison Square Garden កាលពីថ្ងៃអាទិត្យ ដែលតារាកំប្លែងម្នាក់(លោកត្រាំ)បានពណ៌នាព័រតូរីកូថាជា «កោះសម្រាមអណ្តែតទឹក»។ លោកថា «សំរាមតែមួយគត់ដែលខ្ញុំឃើញអណ្តែតនៅទីនោះ គឺអ្នកគាំទ្ររបស់គាត់»។ ពាក្យសម្ដីទាំងអស់នេះហើយបានធ្វើឲ្យមានភាពចម្រូងសម្រាសជាបន្តបន្ទាប់។

ជុំវិញបញ្ហានេះលោកស្រីហារីសបានប្រាប់អ្នកសារព័ត៌មានមុនពេលឡើងយន្តហោះ Air Force Two សម្រាប់ការហោះហើរទៅកាន់ Raleigh ថាលោកស្រីមិនយល់ស្រប «ជាមួយនឹងការរិះគន់ណាមួយដោយផ្អែកលើអ្វីដែលអ្នកគាំទ្របោះឆ្នោតឱ្យនោះទេ»។ លោកស្រីថា «ខ្ញុំនឹងតំណាងឱ្យជនជាតិអាមេរិកទាំងអស់ រួមទាំងអ្នកដែលមិនបោះឆ្នោតឱ្យខ្ញុំ» ។ ពាក្យសម្ដីរបស់លោកស្រីគឺជាការប៉ុនប៉ងដើម្បីបំភ្លៃភាពចម្រូងចម្រាសជុំវិញការអត្ថាធិប្បាយរបស់ លោក និងដាក់ចម្ងាយខ្លះរវាងខ្លួនលោកស្រី និងលោកប្រធានាធិបតី បៃដិន។

លោកស្រីហារីស បានប្រារព្ធការប្រមូលផ្តុំនៅក្នុងរដ្ឋសមរភូមិឃោសនារកការគាំទ្រចំនួនបីដែលជាផ្នែកមួយនៃការប៉ះទង្គិចដោយពាក្យសម្តីដាក់គ្នានៅក្នុងសប្តាហ៍បិទនៃការបោះឆ្នោតនៅ Raleigh រដ្ឋ North Carolina, Harrisburg រដ្ឋ Pennsylvania; និង Madison រដ្ឋ Wisconsin។

លោកស្រីបានសង្កត់ធ្ងន់លើការរួបរួម និងមូលដ្ឋានរួម ដោយពង្រីកលើសុន្ទរកថារបស់លោកស្រីកាលពីថ្ងៃអង្គារនៅទីក្រុងវ៉ាស៊ីនតោន និងបានដាក់ចេញនូវយុទ្ធនាការ«ការបញ្ចប់ជម្លោះ»។

លោកស្រីថា «យើងដឹងថាយើងមានឱកាសនៅក្នុងការបោះឆ្នោតនេះដើម្បីបង្វែរទំព័រមួយទសវត្សរ៍របស់ ដូណាល់ ត្រាំ ដែលបានព្យាយាមធ្វើឱ្យពួកយើងបែកគ្នា និងខ្លាចគ្នាទៅវិញទៅមក»។ ហើយលោកស្រីថាថា «ខ្ញុំមិនស្វែងរកពិន្ទុនយោបាយទេ ខ្ញុំកំពុងស្វែងរកការរីកចំរើន»។

(រូបភាព៖ AP)

ទន្ទឹមនឹងនេះ សេតវិមានបានប្រញាប់ប្រញាល់ពន្យល់ថា ការអត្ថាធិប្បាយរបស់ប្រធានាធិបតីចូបៃដិនអំពី «សំរាម»គឺជាការយោងទៅលើវោហាសាស្ត្រពីសម្ព័ន្ធមិត្ត ត្រាំ មិនមែនអ្នកគាំទ្រ ត្រាំ ខ្លួនឯងនោះទេ។ លេខាធិការសារព័ត៌មាន Karine Jean-Pierre បាននិយាយថា លោក បៃដិន «មិនចាត់ទុកអ្នកគាំទ្រ ត្រាំ ឬនរណាម្នាក់ដែលគាំទ្រ ត្រាំជាសំរាមនោះទេ»។

ចំណែកលោកត្រាំ បាននិយាយនៅឯការប្រមូលផ្តុំរបស់គាត់នៅ Rocky Mount រដ្ឋ North Carolina កាលពីថ្ងៃពុធថាព្រោះមើលទៅរបៀបដែលពួកគេបានប្រព្រឹត្តចំពោះខ្ញុំ«ពួកគេបានចាត់ទុកអ្នកគាំទ្រខ្ញុំដូចជាសំរាម ការពិតគឺពួកគេបានចាត់ទុកប្រទេសរបស់យើងទាំងមូលដូចជាសំរាម»។

បន្ទាប់ពីបានចុះចតនៅ Green Bay រដ្ឋ Wisconsin សម្រាប់ការជួបជុំមួយផ្សេងទៀតនៅថ្ងៃបន្ទាប់ លោក ត្រាំបានថតរូបពេលពាក់អាវកាក់ពណ៌ទឹកក្រូច និងលឿង ហើយអង្គុយនៅកៅអីអ្នកដំណើរនៃឡានដឹកសំរាមដែលមានទង់ជាតិអាមេរិក និងស្លាកសញ្ញាយុទ្ធនាការ។ លោកត្រាំបាននិយាយទៅកាន់អ្នកសារព័ត៌មានថា៖«តើអ្នកចូលចិត្តឡានសំរាមរបស់ខ្ញុំដោយរបៀបណា?» និងបានបន្ថែមថា «ចូ បៃដិន គួរតែខ្មាសខ្លួនឯង ប្រសិនបើគាត់ដឹងពីអ្វីដែលគាត់កំពុងធ្វើ»។

គួរបញ្ជាក់ថាការបោះឆ្នោតជ្រើរើសប្រធានាធិបតីអាមេរិកនៅសល់តែ ៥ ថ្ងៃទៀតប៉ុណ្ណោះ ខណៈបេក្ខភាពទាំងពីររវាងលោកស្រី ហារីស និងលោកត្រាំ កាន់តែស្វិតស្វាញក្នុងឃោសនាស្វែងការទាក់ទាញប្រជាប្រិយភាពរៀងៗខ្លួនឲ្យប្រជាជនតាមរដ្ឋនីមួយៗបោះឆ្នោតឲ្យខ្លួន៕

(រូបភាព៖ AP)

អត្ថបទ៖ ប៊ុន សុភាព

The post ហារីសសន្យាថានឹងតំណាងឱ្យជនជាតិអាមេរិកទាំងអស់បន្ទាប់ពីបៃដិនថាអ្នកគាំទ្រត្រាំជាសំរាម appeared first on Kampuchea Thmey Daily.

លោកស្រី Kamala Harris Archives - Kampuchea Thmey Daily

ហារីស​ ធ្វើ​ជាអធិបតី​ភាព​ក្នុងការ​បញ្ជាក់​លទ្ធផលឆ្នោត​​ដែលខ្លួនចាញ់​​​លោក ត្រាំ​

ហារីស​​ជំរុញ​អ្នក​​គាំទ្រ​ទទួលយកលទ្ធផល​បោះ​ឆ្នោត​​និង​លើក​ទឹក​ចិត្ត​ឱ្យ​បន្តការតស៊ូ​​ទៅមុខ​

អ្នកគាំទ្រលោកស្រី​ ហារីស បង្ហាញពីអារម្មណ៍ខកចិត្តនិងស្រក់ទឹកភ្នែក

កូនលោកត្រាំ ចោទប្រកាន់តារាដែលបោះឆ្នោតឲ្យលោកស្រីហារីសថា សុទ្ធតែពាក់ព័ន្ធនឹងរឿងក្ដី Diddy

ស្អែកបោះឆ្នោតអាមេរិក តារាប្រុស-ស្រី បង្ហាញជំហគាំទ្រលោកស្រីហារីស ខណៈផ្សេងទៀតគាំទ្រលោកត្រាំ

លោកស្រី ហារីស ថាការអត្ថាធិប្បាយរបស់លោក ត្រាំ លើស្ត្រី «ជាការប្រមាថដល់មនុស្សគ្រប់គ្នា»

ហារីសសន្យាថានឹងតំណាងឱ្យជនជាតិអាមេរិកទាំងអស់បន្ទាប់ពីបៃដិនថាអ្នកគាំទ្រត្រាំជាសំរាម

ហារីស ធ្វើជាអធិបតីភាពក្នុងការបញ្ជាក់លទ្ធផលឆ្នោតដែលខ្លួនចាញ់លោក ត្រាំ

ហារីសជំរុញអ្នកគាំទ្រទទួលយកលទ្ធផលបោះឆ្នោតនិងលើកទឹកចិត្តឱ្យបន្តការតស៊ូទៅមុខ

អ្នកគាំទ្រលោកស្រី ហារីស បង្ហាញពីអារម្មណ៍ខកចិត្តនិងស្រក់ទឹកភ្នែក