​​ក្នុង​​រូប​ថត​ដែលត្រូវ​បាន​ប្រមាញ់​ដោយ​អ្នកផ្តិត​យក​រូប​ភាព​​​តំណាង​សារព័ត៌មាន​ទាំងថៃ​និង​អន្តរជាតិ គេសង្កេតឃើញ​លោក ថាក់ស៊ីន មាន​ពាក់​ក្រវ៉ាត់​ក​ពណ៌លឿង ញញឹម​ លើក​ដី​សំពះ​ដល់​អ្នក​គាំទ្រ​ ខណៈកូនស្រី​របស់​លោក បាន​ឈរ​នៅ​ក្បែរនោះ​ទាំងញញឹម​ពព្រាយ ចំពេល​អ្នក​គាំទ្រ​យ៉ាង​ច្រើន​បង្ហាញ​វត្តមាន​នៅទីនោះដែរ។

​​អាជ្ញាធរ​ថៃ​បាន​ដាក់​ពង្រាយ​​​​​កងកម្លាំង​រក្សាសណ្តាប់ធ្នាប់យ៉ាង​ច្រើន​​ផងដែរ​ ដើម្បីធានាដ​ល់​សន្តិសុខ​​សាធារណៈ​។

​លោក ថាក់ស៊ីន ស៊ីណាវ៉ាត្រ បានជាប់បណ្តឹង​​​​ព្រហ្មទណ្ឌ ឬ​ហៅ​ថា «ករណី​​ជាន់ទី១៤​» នេះ​ ដោយសារ​តែ​មាន​ការ​ចោទ​ប្រកាន់​ពី​គណៈកម្មការ​ជាតិប្រឆាំង​អំពើ​ពុករលួយ (​NACC) លើលោក​ថាក់ស៊ីនដែល​​អតី​ត​​នាយករដ្ឋមន្ត្រី លោក​ថាក់ស៊ីន បានធ្វើអន្តរាគមន៍ក្នុង​​​ការ​​សូក​ប៉ាន់​​ប៉ូលីស និងការដោះស្រាយសំណុំរឿងក្នុងអំឡុងពេលកិច្ចប្រជុំនៅជាន់ទី១៤​នៃទីស្នាក់ការប៉ូលីសភូមិន្ទថៃ កាល​ឆ្នាំ ២០០៨។

ក្រោយមក NACC បានបញ្ជូនការរកឃើញរបស់ខ្លួនទៅកាន់ការិយាល័យអគ្គមេធាវី (OAG) ដើម្បីកាត់ទោសនៅក្នុងផ្នែកព្រហ្មទណ្ឌនៃតុលាការកំពូលសម្រាប់អ្នកកាន់មុខតំណែងនយោបាយ។ បន្ទាប់​មកទៀត អ្នកនយោបាយប្រឆាំង និង​គណបក្សប្រជាធិបតេយ្យ បាន​រួម​ចំណែក​​ក្នុងការ​ដាក់​ពាក្យ​ប្តឹងប្រឆាំងលោក​ថាក់ស៊ីន ក្នុងសំណុំរឿងនេះ​។

បន្ទាប់​ពីនោះទៀត ក៏​មាន​សង្គមស៊ីវិល និងក្រុមឃ្លាំមើល​ផ្នែកច្បាប់មួយចំនួនក៏បានដាក់ពាក្យបណ្តឹងទៅ NACC ដោយលើកឡើងពីអំពើពុករលួយ ការជ្រៀតជ្រែកក្នុងយុត្តិធម៌ និងការប្រើប្រាស់អំណាចខុស ដោយ​ចោទ​ប្រកាន់​លោក​ថាក់ស៊ីន​។ ​​

ប៉ុន្តែ​​ លោកថាក់ស៊ីន​ បាន​ធ្វើនិរទេសខ្លួនចាប់ពីឆ្នាំ​នោះ​មក ដើម្បីគេច​​ពី​​ការ​ទទួល​​ទោស​​ និង​ការ​ធ្វើទុកបុកម្នេញ​​លើ​​បញ្ហាផ្លូវ​​ច្បាប់។ ក្រោយ​​​រស់​នៅក្រៅ​ប្រទេស​អស់រយៈពេល​ជាង​​១៥ឆ្នាំ លោក ​ថាក់ស៊ីន ​ក៏បាន​វិល​ចូល​​ប្រទេសកាលថ្ងៃទី​​២២សីហា​​ឆ្នាំ​២០២៣ ហើយ តុលាការ​កំពូល​សម្រេច​​​​កាត់ក្តី​ឲ្យលោក​ថាក់ស៊ីន ជាប់​ទោស​​៨ឆ្នាំ​។

​ប៉ុន្តែ​ក្រោយ​មក ព្រះមហាក្សត្រថៃ​ ក៏បានលើក​លែងទោស​​សម្រាល​មក​នៅត្រឹមតែ​១ឆ្នាំ​ ហើយ​តម្រូវ​ឲ្យលោក​ថាក់ស៊ីន ជាប់​ពន្ធនាគារ​រយៈពេល​៦ខែ​។ ប៉ុន្តែ​លោកថាក់ស៊ី​ន​បាន​គេ​ចវេស​មិនជាប់ពន្ធនាគារ​ ដោយ​​អះអាងថា ​បានឈឺ ហើយ​ត្រូវ​ស្នាក់នៅ​​មន្ទីរពេទ្យរបស់ប៉ូលិស​ដើម្បី​​ព្យាបាល​ផង និង​ជាថ្នូរជាប់ពន្ធ​នាគារ​ផង។

ប៉ុន្តែ​ក្រោយ​ដោះលែង​ឲ្យ​មានសេរីភាព លោក ត្រូវ​ជាប់បណ្តឹង​ពី​ការ​កុហក​ថា មានជំងឺដែលខ្លួន​លោក​គ្មានជំងឺ ហើយ សាលក្រម​ថ្ងៃនេះ​នឹងពិនិត្យ​មើល​ថាតើ ក្នុងរយៈពេល​៦​ខែ​នេះ លោកថាក់ស៊ីនពិត​ជា​​មានជំងឺមែន ឬ​ក៏​មិនមានជំងឺ​។​

​បើក្នុងតុលាការ​រកឃើញថា លោក មានជំងឺ​ នោះ​លោកថាក់ស៊ីន​នឹងត្រូវ​ទូទាត់​ពេលវេលានោះ ហើយ លោកនឹងរួច​ខ្លួន ប៉ុន្តែ​ក្នុងករណីដែលតុលាការ​ពិនិត្យ​ឃើញថា លោកថាក់ស៊ីន គ្មានជំងឺទេ លោក​អាច​ប្រឈមការបញ្ជូន​ទៅ​ជាប់​ពន្ធនារ​សង​​រយៈពេល​៦ខែ​នោះវិញ៕

រ៉ាន់ រើយ​

The post ​មក​ដឹងពីសំណុំរឿង​ព្រហ្មទណ្ឌ​​​ប្រឆាំង​លោកថាក់ស៊ីន ​ចុងក្រោយនេះ​ appeared first on Kampuchea Thmey Daily.

សារ​ព័ត៌មាន​ថៃ​ The Nation ​បាន​ដកស្រង់សម្តី​មន្ត្រី​នៃ​​ខុទ្ទកាល័យ​​នាយករដ្ឋមន្ត្រី ដែលបាន​និយាយថា នាយក​រដ្ឋមន្ត្រី​​​ត្រៀម​ចូល​តំណែង​ ​លោក Anutin Charnvirakul គ្រោង​នឹង​កែប្រែ​យុទ្ធនាការ «Khon La Khrueng»​ (Let’s Go Halves) ដែល​មាន​ន័យ​ជា​ភាសា​ខ្មែរថា «តស់ ដើរផ្លូវកណ្តាល» ដែល​យុទ្ធនាការ​នេះ​​​បំណង​​​ជំរុញ​ការ​ចំណាយ​របស់​អតិថិជន និង​ដោះស្រាយ​បញ្ហា​ប្រឈម​សេដ្ឋកិច្ច​រយៈពេល​ខ្លី។

​នាយករដ្ឋមន្ត្រី​ដែល​ទើប​ទទួលបាន​ការ​ទុកចិត្ត​ពីសភា លោក Anutin Charnvirakul ត្រូវ​បាន​គេ​រាយការណ៍​ថា​កំពុង​រៀបចំ​កំណែ​ថ្មី​នៃ​គម្រោង​ទិញ​ទំនិញ​ឧបត្ថម្ភធន «Khon La Khrueng (Let’s Go Halves) ដើម្បី​ជំរុញ​ការ​ចំណាយ​របស់​អតិថិជន និង​ដោះស្រាយ​បញ្ហា​ប្រឈម​សេដ្ឋកិច្ច​រយៈពេល​ខ្លី​ បន្ទាប់​ពី​ឡើង​កាន់​តំណែង​ជា​នាយក​រដ្ឋមន្ត្រី។

ប្រភពពីគណបក្ស Bhumjaithai ​(គណបក្ស​មោទនភាព​ថៃ​) បាននិយាយថា នាយករដ្ឋមន្ត្រីដែលនឹង​ចូលកាន់​អំណាច កំពុងរៀបចំវិធានការដែលបានធ្វើបច្ចុប្បន្នភាពនេះ ដើម្បីស្តារអំណាចទិញរបស់ប្រជាពលរដ្ឋឡើងវិញ​ឲ្យ​បាន​ឆាប់រហ័ស។ គំនិតផ្តួចផ្តើមនេះធ្វើឡើងតាមគោលនយោបាយដែលបានអនុវត្តពីមុនក្នុងការគ្រប់គ្រងរបស់អតីតនាយករដ្ឋមន្ត្រី ប្រាយុធ ចាន់អូចា ដែលមានបំណងជំរុញសេដ្ឋកិច្ច និងគាំទ្រទាំងអ្នកប្រើប្រាស់ និងអាជីវកម្មក្នុងស្រុក។

​ខុស​ពី​គណបក្ស​ភឿថៃ​ដែល​ទើប​របូតអំណាច​ បាន​ដាក់​ចេញ​គោល​នយោបាយបែង​​ចែកប្រាក់​​ដល់​ពលរដ្ឋ​របស់​ខ្លួន ដែល​មាន​ឈ្មោះ​ថា «​E-wallet» ​ដើម្បី​ជំរុញ​ការ​​​ចំណាយ​របស់​ប្រជាជន​ ​ដែលជា​ផែងការ​ជំរុញ​​ចរន្ត​សេដ្ឋកិច្ច​​។​

រដ្ឋាភិបាលរបស់ប្រទេសថៃពីមុនបានអនុវត្ត «កម្មវិធីកាបូបឌីជីថល»​ ទ្រង់ទ្រាយធំដើម្បីចែកចាយ១ម៉ឺត​បាតដល់ប្រជាពលរដ្ឋសម្រាប់ការជំរុញសេដ្ឋកិច្ច ដោយផ្តោតជាចម្បងទៅលើសុខុមាលភាពរដ្ឋ និងអ្នកកាន់ប័ណ្ណពិការក្នុងដំណាក់កាលដំបូងដែលបានចាប់ផ្តើមនៅចុងឆ្នាំ២០២៤​។ ខណៈដែលផែនការដើមគឺសម្រាប់ការចែកចាយទូទាំងប្រទេសតាមរយៈកម្មវិធីរបស់រដ្ឋាភិបាលហៅថា «Tang Rat app» ត្រូវបានផ្លាស់ប្តូរយ៉ាងសំខាន់ចាប់តាំងពីកម្មវិធីនោះមក។

គំនិតផ្តួចផ្តើម និងការផ្ទេរសាច់ប្រាក់ដោយផ្ទាល់​ដល់​ប្រជាជន​គោលដៅ​ប្រមាណ​៥០​លាននាក់ ដោយ​គ្រោងចាយ​ទឹកប្រាក់​ជាង​១៣​ពាន់​លាន​ដុល្លារ បាន​រាំងស្ទះ​​​ដោយសារ​តែ​វិបត្តិ​នយោបាយ​​ដ៏អាក្រក់​បំផុត​ក្នុង​ប្រទេសថៃ​​តាមយាយី​រដ្ឋាភិបាល​​របស់​លោកស្រី ផែថងថាន ស៊ីណាវ៉ាត្រ​៕

រ៉ាន់ រើយ​

The post លោក Anutin ​គ្រោង​​ដាក់​ចេញ​ផែនការសង្គ្រោះសេដ្ឋកិច្ច​​ថៃ ដោយ​ជំរុញ​ការ​ចំណាយ​របស់​ពលរដ្ឋ appeared first on Kampuchea Thmey Daily.

​គណបក្ស​ប្រតិភូថៃ​ ដឹកនាំ​ដោយ​​នាយករដ្ឋមន្ត្រី​ទី​៣១ និង​ជាស្រ្តីក្មេង​បំផុត​ក្នុងប្រវត្តិសាស្រ្តថៃ បានមកដល់អាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៣ខែមេសា ដោយ​មាន​ការ​ទទួល​ស្វាគមន៍​យ៉ាងកក់​ក្តៅ​​ពី​សំណាក់​ប្រតិភូ​របស់​ប្រទេសកម្ពុជា ​ដឹកនាំ​ដោយ​ លោក ជំទាវ​ ចម និម្មល រដ្ឋមន្ត្រី​ក្រសួង​ពាណិជ្ជកម្ម​។

នៅក្នុងឱកាសដែលលោកស្រីមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៥ តបតាមការអញ្ជើញរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ​កម្ពុជា ហើយទស្សនកិច្ចនេះក៏កើតមានឡើងស្របពេលដែលប្រទេសទាំងពីរ កម្ពុជា-ថៃ ប្រារព្ធខួប៧៥ឆ្នាំនៃទំនាក់ទំនងការទូត។

ការអញ្ជើញមកដល់របស់នាយករដ្ឋមន្ត្រីថៃវ័យក្មេងបំផុត​ នៅឯអាកាសយានដ្ឋានអន្តរជាតិភ្នំពេញកាលពីព្រឹកមិញនេះ លោកស្រីបាន​ស្លៀកសម្លៀកបំពាក់​​ច្នៃ​ចេញ​ពី​ក្រណាត់សូត្រថៃ អម​ដោយ​គ្រឿង​អលង្ការ​តូចៗលម្អ​ខ្លួនជា​ច្រើន ដែល​មើល​ទៅ​សមសួន និងស៊ីវិល័យ​មែនទែន។ ​ក្នុងចំណោម​គ្រឿង​អលង្ការ ដូចជា ​ក្រវិល ចិញ្ចៀន ខ្សែក កន្លាស់​អាវ ២ ពណ៌​មាស និង​ប្រាក់ជាដើមដែល​គេ​មិនអាចដឹង​ពីតម្លៃ​លម្អិត​នោះទេ​ ហើយ​ អ្វី​ដែល​គេ​ចាប់អារម្មណ៍​ខ្លាំង គឺ​នាឡិកា​​ដៃ​ដែល​នាយករដ្ឋមន្ត្រី​វ័យ​៣៩​ឆ្នាំ​ និង​មានទ្រព្យសម្បត្តិសរុប​រហូត​ដល់​៤០០​លានដុល្លារ​នេះ បាន​ពាក់​ជាប់​នឹង​ខ្លួន។​

មាន​ការ​ចុះ​ផ្សាយ​​ខ្លះ​បង្ហាញថា លោកស្រីនាយករដ្ឋមន្ត្រី ផែថងថាន ដែល​ជា​កូនស្រីពៅរបស់​លោកថាក់ស៊ីន បានពាក់​នូវនាឡិកាដៃ​​ប្រណីតពណ៌​ប្រាក់-មាស ​ជាម៉ាកយីហោ​ល្បី​លំដាប់​ពិភពលោក​ផលិត​នៅ​ប្រទេសស្វីស នោះគឺ​នាឡិកា​ម៉ាក «Patek Philippe»។

សម្រាប់តម្លៃរបស់នាឡិកាប្រណីតដែលនាយករដ្ឋមន្ត្រីថៃទី៣១ ពាក់មកដំណើរបំពេញទស្សនកិច្ចផ្លូវការក្នុងប្រទេស​កម្ពុជា ដោយយោងទៅតាមគេហទំព័ររបស់នាឡិកាបានបញ្ចាក់ឲ្យដឹងថា មួយគ្រឿងនេះមានតម្លៃ ​ចន្លោះ​ពី ៦២ ០០០ ទៅ​ដល់ ៩៨ ០០០ ដុល្លារ​ឯណោះ។

យ៉ាងណាមិញ នេះក៏មិនមែនជារឿងចម្លែកឡើយ សម្រាប់នាយករដ្ឋមន្ត្រីថៃ ផែថងថាន ដែលតែងតែនិយមបង្ហាញភាពស៊ីវល័យ និងបង្ហាញនូវម៉ាក់យីហោប្រេនៗ រាល់ពេលដែលលោកស្រីមានវត្តមានក្នុងជំនួបជាមួយមេដឹកនាំពិភពលោក។ ស្រ្តីវ័យ៣៨ឆ្នាំរូបនេះ ត្រូវបានសារព័ត៌មានធំៗចុះផ្សាយថា មានទ្រព្យសម្បត្តិសរុបជាង ៤០០លានដុល្លារ ព្រមទាំងកាបូបប្រណីតចំនួន ២០១៧ និងនាឡិកាប្រណីតចំនួន ៧៥ ដែលនោះសបញ្ចាក់ថា លោកស្រីមានជាងគេបង្អស់ក្នុងចំណោមបងប្អូនប្រុស-ស្រីទាំង៣រូប៕

អត្ថបទ៖ សាង ស្រីល័ក្ខ

ចុចអាន៖នាយករដ្ឋមន្ត្រីថៃអរគុណកម្ពុជាដែលបានរួមប្រយុទ្ធប្រឆាំងអំពើឆបោកតាមអនឡាញ

The post ផ្ទុះ​កា​រចាប់​អារម្មណ៍ខ្លាំង​​​ចំពោះ​នាឡិកាដៃ​ប្រណីត​តម្លៃខ្ទង់​១០ម៉ឺន​ដុល្លារ ដែលនាយក​រដ្ឋមន្ត្រីថៃ ពាក់ ពេល​​មកបំពេញទស្សនកិច្ច​នៅកម្ពុជា appeared first on Kampuchea Thmey Daily.

ដំណើរទស្សនកិច្ចផ្លូវការរបស់នាយក​រដ្ឋមន្ត្រី​ថៃ ​ផែថង​ថាន ស៊ីណាវ៉ាត្រា ទៅកាន់ប្រទេសចិន​លើក​ដំបូង​​​ចាប់ពីថ្ងៃទី៥​ខែកុម្ភៈដល់ថ្ងៃទី៨​ខែកុម្ភៈ ចាប់តាំងពីចូលកាន់តំណែងក្នុងខែសីហាឆ្នាំ​មុន​ ​ហើយ​​ក៏​ចំពេល​ប្រទេស​ទាំងពីរ​ប្រារព្ធខួបលើកទី៥០​នៃទំនាក់ទំនងការទូត។

​ទីភ្នាក់ងារ​ព័ត៌មាន​​រ៉យទ័របាន​យោង​ខ្លឹមសារ​ដែល​ផ្សព្វផ្សាយ​ដោយ​ទូរទស្សន៍រដ្ឋចិន CCTV (CCTV) បាន​ឲ្យ​ដឹង​ថា ​ប្រធានាធិបតីចិន​​​ លោក​ ស៊ី ជីនភីង បានលើកឡើងពីគម្រោង​​នៃ​កិច្ច​សហប្រតិបត្តិការ​ ដូចជាផ្លូវរថភ្លើងល្បឿនលឿនដែលគ្រោងតភ្ជាប់ទីក្រុងបាងកកជាមួយទីក្រុងគុនមីងភាគនិរតីនៃប្រទេសចិន ​វិស័យ​​សេដ្ឋកិច្ចឌីជីថល និង​រថយន្តអគ្គិសនីគឺជាផ្នែកបន្ថែមសម្រាប់កិច្ចសហប្រតិបត្តិការកាន់តែខ្លាំង។

​ដោយ​និយាយយោង​ទៅ​លើ​សភាព​ការណ៍បច្ចុប្បន្ន​​​​​ដែល​កំពុង​​តែ​​​ប្រែប្រួល​ខ្លាំង​ ដោយសារតែ​ការ​ចេញ​បទ​បញ្ជា​ប្រតិបត្តិ​ជា​បន្តបន្ទាប់របស់​​​ប្រធានាធិបតី​សហរដ្ឋអាមេរិក​ទើ​ប​ឡើង​កាន់​តំណែង​ថ្មី លោក ដូណាល់ ត្រាំ ធ្វើ​ឲ្យ​ប៉ះពាល់​​ដល់សណ្តាប់​ធ្នាប់​​សកល​លោក លោក​ស៊ី បាន​បង្ហាញ​ពី​​ផែនការ​ប្រុងប្រយ័ត្ន​​ខ្ពស់​។

ទូរទស្សន៍រដ្ឋចិន CCTV (CCTV) បានដកស្រង់សម្តីលោក Xi បាននិយាយដូច្នេះថា «ចំពោះមុខការផ្លាស់ប្តូរដែលមិនធ្លាប់មានពីមុនមក មិនធ្លាប់មានក្នុងរយៈពេល​១០០​ឆ្នាំ ប្រទេសចិន និងថៃគួរតែបង្កើនការជឿទុកចិត្តគ្នាទៅវិញទៅមកលើផលប្រយោជន៍ជាយុទ្ធសាស្រ្ត និងគាំទ្រគ្នាទៅវិញទៅមក»។

​ប្រទេស​​​ចិនក្រោម​ការ​ដឹកនាំ​របស់​បក្ស​កុម្មុយនីស្ត​បច្ចុប្បន្ន​​ក៏​នឹង​ត្រូវ​រៀបចំ​​ខួប​​១០០​ឆ្នាំ​​​នៃ​ការ​បង្កើត​កង​ទ័ព​រំដោះ​ប្រជាជន​ចិន​នៅ​ឆ្នាំ​ ២០២៧ ក៏ត្រូវ​បាន​គេ​មើល​ឃើញ​ថា ​បក្សកុម្មុយនីស្ត​ចិន​ក៏កំពុង​​ប្រឹងប្រែង​ធ្វើ​ឲ្យ​មាន​ការ​ផ្លាស់​ប្តុរ​ក្នុងវិស័យ​យោធា និងអាចឈាន​ទៅបង្រួប​បង្រួម​​ជា​មួយតៃ​វ៉ាន់ ទោះ​ក្នុងមធ្យោបាយ​​ការទូត ឬ​ក៏​ប្រើប្រាស់​កម្លាំង​យោធា​។

​​បទ​ល្មើស​​ឆ្លងដែន​​​​​​តាមប្រព័ន្ធ​បច្ចេកវិទ្យានិងការព្រួយបារម្ភអំពីសុវត្ថិភាព​​ទេសចរ​​​ ​ក៏ត្រូវភាគី​​ទាំងពីរ​ពិភាក្សា​ផងដែរ​​​ក្នុងជំនួប​នៃ​មេដឹកនាំ​​​ប្រទេសដែលមានសេដ្ឋកិច្ច​​ធំ​ពី​រ​ក្នុងតំបន់​​អាស៊ី​​​នេះ​។

តាមសេចក្តីរាយការណ៍​របស់​រ៉យទ័រ ប្រទេសថៃដែលមានការព្រួយបារម្ភអំពីផលប៉ះពាល់លើវិស័យទេសចរណ៍ដ៏សំខាន់របស់ខ្លួនបានស្វែងរកការបន្ធូរបន្ថយការព្រួយបារម្ភអំពីសុវត្ថិភាពក្នុងចំណោមជនជាតិចិនដែលរួមចំណែកជាក្រុមភ្ញៀវដ៏ធំបំផុតទៅកាន់ប្រទេសអាស៊ីអាគ្នេយ៍។

លោក Paetongtarn បាននិយាយថា៖«សុវត្ថិភាព​របស់ប្រជាជន និងអ្នកទេសចរដែលមកទស្សនាប្រទេសថៃ គឺជាអាទិភាពខ្ពស់បំផុតរបស់រដ្ឋាភិបាល» ដោយបន្ថែមថា ប្រទេសទាំងពីរនឹងសហការលើប្រព័ន្ធព្រមានមួយ ដើម្បីប្រយុទ្ធប្រឆាំងនឹងឧក្រិដ្ឋកម្ម។

​សេចក្តីរាយការណ៍​បន្ថែម​ថា៖​«ថៃ​បាន​ត្រៀម​ខ្លួន​ជា​ស្រេច​ដើម្បី​ធ្វើ​ការ​ជាមួយ​ចិន​ដើម្បី​បង្ក្រាប​សកម្មភាព​ឧក្រិដ្ឋកម្ម​ដែល​ឆ្លង​កាត់​ប្រទេស​ថៃ»៕​

ដោយ រ៉ាន់ រើយ​

The post ​ចិន​ស្នើ​ថៃ​​​ចំៗ​ សហការ​ស៊ីជម្រៅ​លើ​​ផ្លូវ​រថភ្លើង​ល្បឿន​លឿន សេដ្ឋកិច្ចឌីជីថល រថយន្តអគ្គីសនី និងបទ​ល្មើស​បច្ចេកវិទ្យា​ appeared first on Kampuchea Thmey Daily.

សម្ដេចតេជោ ហ៊ុន សែន ប្រធានព្រឹទ្ធសភា និងជាប្រមុខរដ្ឋស្ដីទីនៃកម្ពុជា បានចាត់ទុកភាពជោគជ័យរបស់លោកស្រី ផែថងថាន ស៊ីណាវ៉ាត់ ក្នុងការទទួលបានតំណែងកំពូលនេះ គឺជាសក្ខីភាពនៃការដឹកនាំ និងការលះបង់ដ៏ពិសេសរបស់លោកស្រីចំពោះបុព្វហេតុជាតិ និងប្រជាជនថៃ។ នេះជាខ្លឹមសារនៃលិខិតរបស់សម្ដេចតេជោ ផ្ញើជូនលោកស្រី ផែថងថាន ស៊ីណាវ៉ាត់។

តាមរយៈលិខិតដដែលនេះ សម្ដេចតេជោ ហ៊ុន សែន ក៏បានលើកឡើងពីទំនាក់ទំនង និងកិច្ចសហប្រតិបត្តិការដ៏ជិតស្និទ្ធរវាង កម្ពុជា និងថៃ ដែលត្រូវបានបន្តពង្រឹង និងពង្រីកបន្ថែមជាបន្តបន្ទាប់ ដោយផ្អែកលើស្មារតីនៃការគោរពគ្នាទៅវិញទៅមក ការជឿទុកចិត្តគ្នា និងការប្តេជ្ញាចិត្តក្នុងការលើកកម្ពស់សន្តិភាព និងវិបុលភាពនៅក្នុងប្រជាជាតិទាំងពីរ និងតំបន់ ជាពិសេសសហគមន៍ អាស៊ាន។ ក្នុងន័យនេះ សម្ដេចតេជោ បានបញ្ជាក់ថា ក្នុងនាមជាប្រទេសជិតខាងល្អ កម្ពុជា-ថៃ បានសហការគ្នាលើបញ្ហាផ្សេងៗ ដែលជាផលប្រយោជន៍រួម ហើយសម្ដេចតេជោ ជឿជាក់យ៉ាងមុតមាំថា ក្នុងតួនាទីថ្មីជានាយករដ្ឋមន្ត្រីរបស់ថៃ លោកស្រី ផែថងថាន នឹងបន្តពង្រឹងបន្ថែមទៀតនូវទំនាក់ទំនងកម្ពុជា-ថៃលើគ្រប់វិស័យ ដើម្បីបង្កើតសក្តានុពលថ្មីៗសម្រាប់កិច្ចសហប្រតិបត្តិការកាន់តែប្រសើរ និងផលប្រយោជន៍ទៅវិញទៅមកជូនប្រជាជាតិ និងប្រជាជនទាំងពីរ។

សម្ដេចតេជោ ក៏បានប្រកាសត្រៀមធ្វើការយ៉ាងជិតស្និទ្ធជាមួយលោកស្រី ផែថងថាន ក៏ដូចជាសភារបស់ថៃ ជាពិសេស ព្រឹទ្ធសភា ដើម្បីពង្រឹងបន្ថែមទៀតនូវភាពជាដៃគូ និងលើកកម្ពស់កិច្ចសហប្រតិបត្តិការរវាងរាជរដ្ឋាភិបាល និងសភានៃប្រទេសទាំងពីរ៕

The post សម្ដេចតេជោ ជឿថា នាយករដ្ឋមន្រ្តីថ្មីរបស់ថៃ នឹងបន្តពង្រឹងបន្ថែមនូវទំនាក់ទំនងល្អជាមួយកម្ពុជា appeared first on Kampuchea Thmey Daily.

នៅ​ថ្ងៃ​ទី​១៦​ ខែ​សីហា ឆ្នាំ២០២៤​នេះ រដ្ឋសភាថៃបានបោះឆ្នោតឱ្យ​លោកស្រី ផែថងថាន ស៊ីណា​វ៉ាត្រា (Paetongtarn Shinawatra) ដែលជាកូន​​ស្រី​ពៅ​របស់​លោក ថាក់ស៊ីន ស៊ីណាវ៉ាត្រា ក្លាយជានាយករដ្ឋមន្ត្រី​ថ្មី​របស់​ថៃ ជំនួសលោក សេដ្ឋា ថាវីស៊ីន ដែលត្រូវបានតុលាការធម្មនុញ្ញថៃសម្រេចដកតំណែងជានាយករដ្ឋមន្រ្តី។

ភ្លាមៗក្រោយការសម្រេចរបស់សភាថៃ នាថ្ងៃនេះ សម្ដេចធិបតី ហ៊ុន ម៉ាណែត បានផ្ញើសារអបអរសាទរជូនចំពោះលោកស្រី ផែថងថាន ស៊ីណា​វ៉ាត្រា (Paetongtarn Shinawatra) ដែលត្រូវបានក្លាយជានាយករដ្ឋមន្ត្រីរបស់ប្រទេសថៃ។

សារលិខិតរបស់សម្ដេចធិបតី ជាភាសាអង់គ្លេស បកប្រែជាភាសាខ្មែរក្រៅផ្លូវការ លើកឡើងថា៖ «ក្នុងនាមរាជរដ្ឋាភិបាល និងប្រជាជនកម្ពុជា ខ្ញុំសូមចូលរួមអបអរសាទរយ៉ាងស្មោះស្ម័គ្រចំពោះការតែងតាំងលោកស្រីជានាយករដ្ឋមន្ត្រីនៃព្រះរាជាណាចក្រថៃ។ នេះ​ជា​សក្ខីភាព​បញ្ជាក់​ពី​ជឿជាក់ និង​ទំនុក​ចិត្ត​ដែល​ប្រជាជន​ថៃ​មាន​សម្រាប់​ការ​ដឹក​នាំ​របស់​លោកស្រី»។

សម្ដេចធិបតី បានរំលេចដែរថា ផ្អែកលើប្រវត្តិសាស្រ្តនៃទំនាក់ទំនងវប្បធម៌ និងការគោរពគ្នាទៅវិញទៅមក កម្ពុជា និងថៃ មានទំនាក់ទំនងទ្វេភាគី និងកិច្ចសហប្រតិបត្តិការយ៉ាងជិតស្និទ្ធ ដែលបាននាំមកនូវប្រយោជន៍ជាក់ស្តែងសម្រាប់ប្រជាជននៃប្រទេសទាំងពីរ កម្ពុជា-ថៃ​ ជាបន្តបន្ទាប់។ ក្នុងន័យនេះ សម្ដេចធិបតី នាយករដ្ឋមន្ត្រីនៃកម្ពុជា បង្ហាញក្ដីជឿជាក់យ៉ាងមុតមាំថា ក្រោមការដឹកនាំរបស់លោកស្រី ផែថងថាន ស៊ីណា​វ៉ាត្រា កម្ពុជា និងថៃ នឹងបន្តពង្រឹងភាពជាដៃគូយុទ្ធសាស្ត្របន្តទៀត។

ក្នុងស្មារតីនេះ សម្ដេចធិបតី ប្រកាសរង់ចាំធ្វើការយ៉ាងជិតស្និទ្ធជាមួយលោកស្រី ផែថងថាន ស៊ីណា​វ៉ាត្រា ដើម្បីជំរុញទំនាក់ទំនង និងកិច្ចសហប្រតិបត្តិការប្រទេសទាំងពីរបន្ថែមទៀត ដើម្បីផលប្រយោជន៍ទៅវិញទៅមក ដែលជាការរួមចំណែកដល់សន្តិភាព ស្ថិរភាព និងវិបុលភាពនៅក្នុងតំបន់ និងអន្តរជាតិ។

សម្ដេចធិបតី ថែមទាំងបានជូនពរឱ្យនាយករដ្ឋមន្រ្តីថ្មីរបស់ថៃរូបនេះទទួលបានជោគជ័យក្នុងការចាប់ផ្តើមដំណើរឆ្ពោះទៅរកភាពជាអ្នកដឹកនាំដ៏មានកិត្យានុភាពនេះ៕

The post នាយករដ្ឋមន្ត្រីកម្ពុជា អបអរសាទរកូនស្រីរបស់លោក ថាក់ស៊ីន ដែលក្លាយជានាយករដ្ឋមន្ត្រីថៃ appeared first on Kampuchea Thmey Daily.

ក្នុងឱកាសនៃជំនួប លោកស្រីផេថងថាន ស៊ីណាវ៉ាត់ត្រា បានថ្លែងអំណរគុណជូនចំពោះ សម្តេចធិបតី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោកស្រីនិងគណៈប្រតិភូ ចូលជួបសម្តែងការគួរសម ព្រមទាំងបានអបអរសាទរចំពោះសម្ដេចធិបតី ដែលត្រូវបានរដ្ឋសភាបោះឆ្នោតជ្រើសតាំងជានាយករដ្ឋមន្រ្តី នៃព្រះរាជាណាចក្រកម្ពុជា នីតិកាលទី៧ កាលពីខែសីហា ឆ្នាំ២០២៣ កន្លងទៅនេះ។ លោកជំទាវក៏បានអបអរសាទរផងដែរចំពោះជោគជ័យនៃការបោះឆ្នោតព្រឹទ្ធសភា នៅប្រទេសកម្ពុជា កាលពីថ្ងៃទី២៥ ខែកុម្ភៈ ឆ្នាំ២០២៤។

លោកជំទាវបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ដែលបានផ្ដល់ផលប្រយោជន៍ទៅវិញទៅមកចំពោះប្រជាជន និងប្រទេសទាំងពីរ។ ជាមួយគ្នានេះ លោកជំទាវក៏បានសម្តែងអំណរគុណជូនចំពោះសម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា ដែលបានអញ្ជើញលោកជំទាវមកបំពេញទស្សនកិច្ចនៅកម្ពុជា។ លោកជំទាវបានបង្ហាញនូវក្តីសង្ឃឹមយ៉ាងមុតមាំថា ទំនាក់ទំនង និងកិច្ចសហប្រតិបត្តិការនៃប្រទេសទាំងពីរ នឹងកាន់តែរឹងមាំបន្ថែមទៀត និងត្រូវបានពង្រីកលើវិស័យសំខាន់ផ្សេងៗទៀត រួមទាំង ការលើកកម្ពស់តួនាទីរបស់ស្រ្តី។

ជាការឆ្លើយតប សម្តេចធិបតី បានសម្តែងនូវការស្វាគមន៍ចំពោះលោកស្រីផេថងថាន ស៊ីណាវ៉ាត់ត្រា និងគណៈប្រតិភូ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា ព្រមទាំងបានសម្តែងការអបអរសាទរជូនចំពោះលោកជំទាវដែលត្រូវបានតែងតាំងជាប្រធានគណបក្សភឿថៃ ព្រមទាំងបានផ្តាំផ្ញើសាកសួរសុខទុក្ខជូនចំពោះឯកឧត្តម ថាក់ស៊ីន ស៊ីណាវ៉ាត់ត្រា ផងដែរ។

សម្ដេចធិបតី ក៏បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ និងបានជម្រាបជូនអំពីលទ្ធផលប្រកបដោយផ្លែផ្កានៃដំណើរទស្សនកិច្ចផ្លូវការរបស់សម្ដេចធិបតីទៅកាន់ព្រះរាជាណាចក្រថៃ កាលពីខែកុម្ភៈ កន្លងទៅ ដែលបានរួមចំណែកពង្រឹង និងពង្រីកទំនាក់ទំនងរវាងប្រទេសទាំងពីរលើវិស័យជាច្រើនរួមទាំង វិស័យសេដ្ឋកិច្ច ពាណិជ្ជកម្ម ទេសចរណ៍ ការងារ ជាដើម។

ជាទីបញ្ចប់ សម្តេចធិបតី បានជូនពរលោកស្រីផេថងថាន ស៊ីណាវ៉ាត់ត្រា និងគណៈប្រតិភូ ឱ្យទទួលបានជោគជ័យក្នុងដំណើរទស្សនកិច្ច និងទទួលបានក្តីសោមនស្សរីករាយក្នុងការស្នាក់នៅព្រះរាជាណាចក្រកម្ពុជា ព្រមទាំងធ្វើមាតុភូមិនិវត្តន៍ប្រកបដោយសុខសុវត្ថិភាព៕

The post ប្រធានគណបក្សភឿថៃ វាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងថៃ-កម្ពុជា appeared first on Kampuchea Thmey Daily.

ដំណើរទស្សនកិច្ចរបស់លោកស្រីប្រធានគណបក្សភឿថៃមកកាន់កម្ពុជានាពេលនេះ គឺតបតាមការអញ្ជើញរបស់ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ក្នុងពេលដែលសម្ដេចតេជោ​ អញ្ជើញទៅសួរសុខទុក្ខបងធម៌របស់សម្ដេចគឺលោក ថាក់ ស៊ីន ដែលត្រូវជាឳពុករបស់លោកស្រី ផែ តុងតាន នៅប្រទេសថៃកាលពីថ្ងៃទី២១ ខែកុម្ភៈ ឆ្នាំ២០២៤។

តាមការគ្រោងទុកក្នុងដំណើរទស្សនកិច្ចមកកាន់កម្ពុជានេះ លោកស្រី ផែតុងតាន ស៊ីណាវ៉ាត្រា នឹងជួបពិភាក្សាទ្វេភាគីជាមួយនឹង សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជួបសម្តែងការគួរសមជាមួយនឹង សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា។ កូនស្រីលោកថាក់ស៊ីន ក៏នឹងមានជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។

តាមសេចក្ដីប្រកាសព័ត៌មានគណបក្សប្រជាជនកម្ពុជា បានអះអាងថា ការផ្លាស់ប្តូរទស្សនកិច្ចជាន់ខ្ពស់រវាងគណបក្សទាំងពីរនេះ គឺក្នុងគោលបំណងផ្លាស់ប្តូរយោបល់លើកិច្ចសហប្រតិបត្តិការនៃប្រទេសជាប់ភូមិផងរបងគ្នា ដើម្បីបម្រើផលប្រយោជន៍រួមរបស់ប្រជាជន និងគណបក្សទាំងពីរ ដោយផ្អែកលើចំណងមិត្តភាព និងកិច្ចសហប្រតិបត្តិការជិតស្និតរវាងគណបក្សទាំងពីរ។

សូមភ្ជាប់ជូនយ៉ាងខ្លីថា សម្តេចតេជោ ហ៊ុន សែន និងលោក ថាក់ស៊ីន ឳពុករបស់លោកស្រី ផែ តុងតាន បានរាប់អានគ្នាជាបងប្អូនធម៌ ហើយមានទំនាក់ទំនងយ៉ាងជិតស្និទ្ធ តាំងពីឆ្នាំ១៩៩២ ពោលគឺនៅមុនពេលដែលលោក ថាក់ស៊ីន ធ្វើជានាយករដ្ឋមន្ត្រីថៃមកម៉្លេះ៕

The post ថ្ងៃនេះ កូនស្រីពៅលោកថាក់ ស៊ីន នឹងមកបំពេញទស្សនកិច្ចនៅកម្ពុជា appeared first on Kampuchea Thmey Daily.