លោក កាវីន Archives - Kampuchea Thmey Daily

តារាសម្តែង កាវីន បដិសេធការចោទប្រកាន់ពីស្រ្តីខ្មែរអាណិកជនម្នាក់ ដែលថា លោកបោកលុយ ៦ពាន់ដុល្លារ

Chan Sotheavy — Fri, 11 Jul 2025 02:57:45 +0000

នេះគឺមិនមែនជារឿងថ្មីលើករណីនៃការចាញ់បោកតាមបណ្តាញសង្គមទេ ប៉ុន្តែបើតាមការកត់សម្គាល់នៅតែមានជនរងគ្រោះជាបន្តបន្ទាប់ដែលបានចាញ់បោកកលល្បិចលួងលោមរបស់ជនបោកប្រាស់បង់ប្រាក់ជាបន្តបន្ទាប់។ ជាក់ស្តែងករណីនៃការយករូបថតនិងឈ្មោះតារាសម្តែងរូបសង្ហាលោក កាវីន នោះជាដើម រហូតមានអ្នកខ្លះបង់ប្រាក់អស់រាប់ពាន់រាប់ម៉ឺនដុល្លារក៏មាន។

យ៉ាងណាមិញ ថ្មីៗនេះមានស្រ្តីវ័យចំណាក់អាណិកជនខ្មែររស់នៅសហរដ្ឋអាមេរិកម្នាក់ បានទម្លាយប្រាប់តាមរយ:សារព័ត៌មានថា រូបគាត់បានចាញ់បោកអស់លុយប្រមាថ ៦០០០ដុល្លារ ខណ:អ្នកដែលបោកប្រាស់លុយនោះអះអាងខ្លួនថាជាតារានៅស្រុកខ្មែរដែលមានគណនីហ្វេសប៊ុលឈ្មោះ កាវីន ប៉ុន្តែតាមរយ:គណនីធនាគាឈ្មោះ មិច សារុំ ពោលគឺពុំមែនជាឈ្មោះ តារាប្រុស កាវីន ឡើយ។

ពាក់ព័ន្ធករណីខាងលើនេះ តារាសម្តែងលោក កាវីន បានធ្វើការបដិសេធទៃងស្រុងដោយលោកបញ្ជាក់ថាមានជនខិលខូចលួចយកឈ្មោះ និងរូបភាពរបស់ខ្លួនទៅបង្កើត Account Facebook ក្លែងក្លាយដើម្បីបោកប្រាស់គេប៉ុណ្ណោះ។ លោកកាវីន បានឱ្យដឹងថា រឿងនេះលោកមិនដឹងទេព្រោះមានអ្នកយករូបថតរបស់ខ្លួនទៅប្រើប្រាស់ ដើម្បីជាមធ្យោបាយឆបោកជាច្រើនករណីមកហើយកន្លងមក ។

លោកបន្តទៀតថា កន្លងមកលោកក៏បានដាក់ពាក្យបណ្តឹងទៅខាងសមត្ថកិច្ចនាយកដ្ឋានបច្ចេកវិទ្យាផងដែរ ហើយមិនត្រឹមតែប៉ុណ្ណោះ លោកក៏បានចុះផ្សាយតាមរយ:សារព័ត៌មានជាបន្តបន្ទាប់ អំពីរឿងរ៉ាវដែលគេយកថតរូបលោកទៅប្រើប្រាស់ផងដែរ។ ដូច្នេះសូមមហាជនមានការប្រុងប្រយ័ត្នឱ្យបានខ្ពស់ជៀសវាងមានការចាញ់បោកជនខិលខូច។

សូមជម្រាបថា ល្បិចបោកបញ្ឆោតតាមរយៈបណ្តាញសង្គមហ្វេសប៊ុក ដោយការភ្ជាប់ទំនាក់ទំនងស្នេហា តាមរយ:ការប្រើប្រាស់រូបថតនិងវីដេអូរបស់តារាប្រុស-ស្រីល្បីឈ្មោះរូបស្រស់ស្អាតនិងស្រស់សង្ហាមិនមែនជារឿងថ្មី និងចម្លែកទេប៉ុន្តែនៅតែមានមនុស្សជាច្រើនលង់ជឿយ៉ាងងប់ងល់និងទំនាក់ទំនងដែលមានត្រឹមតែតាមរយៈការលេងឆាត ឬការក្លែងជាការខលវីដេអូតាមហ្វេសប៊ុកប៉ុណ្ណោះ។ រូបភាពនេះបានធ្វើឱ្យជនខិលខូចជាច្រើនអាចរកប្រាក់បានរាប់ពាន់រាប់ម៉ឺនដុល្លាររួចមកហើយ ខណៈដែលជនរងគ្រោះខ្លះបានត្រឹមការខកចិត្តខ្លះបានត្រឹមលាក់ទុកមិនហ៊ានបញ្ចេញព្រោះតែខ្លាចខ្មាសគេនោះ៕ ចាន់រ៉ា

The post តារាសម្តែង កាវីន បដិសេធការចោទប្រកាន់ពីស្រ្តីខ្មែរអាណិកជនម្នាក់ ដែលថា លោកបោកលុយ ៦ពាន់ដុល្លារ appeared first on Kampuchea Thmey Daily.

ក្រោយលាចាកសិក្ខាបទ ! តារាសម្ដែង កាវីន រម្លឹករឿងឈឺចាប់ គ្រាម្ដាយចូលសង្គ្រោះនៅមន្ទីរពេទ្យ

អ៊ិន ពិសី — Mon, 25 Dec 2023 01:57:13 +0000

តារាសម្ដែងលោក កាវីន បន្ទាប់ពីអ្នកម្តាយជាទីស្រលាញ់ បានចែកឋានទៅ លោកក៏សម្រេចចិត្តចូលសាងផ្នួសរយៈពេល ៣ ខែ ១០ ថ្ងៃ (១០០ ថ្ងៃ) ដើម្បីកាន់ទុក្ខ និងជាការតបស្នងសងគុណចំពោះអ្នកមានគុណ។ យ៉ាងណាក្រោយគ្រប់កាលកំណត់ថ្មីៗនេះ លោក កាវីន ក៏បានលាចាកសិក្ខាបទដូចការគ្រោងទុក។

ជាមួយគ្នាដែលតារាសម្តែងលោក កាវីន បានលាចាកសិក្ខាបទប៉ុន្មានថ្ងៃ ស្រាប់តែលោកចេញមករម្លឹករឿងឈឺចាប់គ្រាម្តាយចូលសង្គ្រោះនៅមន្ទីរពេទ្យ។ លោក កាវីន បានលើកឡើងថា «ខ្ញុំឆ្អែតហើយពេទ្យនឹង ម៉ាក់ខ្ញុំដោយសារចង់ឲ្យគាត់ជា ជឿតាមគេយកមកនឹង ចុងក្រោយអន់លើសដើមជាងនៅផ្ទះ អន់រហូតដល់ម៉ាក់បាត់បង់ជីវិត មានអាពេទ្យសម្តីឈ្លើយទៀត គង់តែពេលនឹងខ្លាចវាធ្វើបាបម៉ាក់ខ្ញុំទេ បានខន្តីឲ្យ»។

លោកបន្តថា «អត់លុយថាពិបាក មានលុយក៏រឹតតែយ៉ាប់ ពេទ្យស្រុកខ្មែរ ហើយពេទ្យមួយចំនួនអស់នេះ ចុងក្រោយម្តាយខ្ញុំក៏លាចាកលោកទៅ….ខ្ញុំជិះកាត់ពេទ្យនេះ ខ្ញុំមានអារម្មណ៍ថា កើតជំងឺផ្លូវចិត្ត នឹកដល់រឿងកន្លង ខ្លាចពេទ្យនឹង មេរៀនខ្ញុំម្តងហើយ មិនរាង ព្រោះតែចង់ឲ្យម៉ាក់ជាទីស្រលាញ់ស្មើរជីវិតជា គេឲ្យធ្វើអីក៏ធ្វើដែរ»។

សូមបញ្ជាក់ថា បន្ទាប់ពីសាងផ្នួសបាន ១០០ ថ្ងៃ តារាប្រុសលោក កាវីន បានបញ្ជាក់កាលពីថ្មីៗ ថា «សូមអនុមោទនាថ្ងៃឧបោសថសីល ខ្ញុំព្រះករុណា នឹងធ្វើការលាចាកសិក្ខាបទថ្ងៃនេះ មុនអរុណរះ ២០.១២.២០២៣ ខ្ញុំព្រះករុណា បានបំពេញតួនាទីកាតព្វកិច្ចជាបុណ្យកុសលជូនញោមស្រី(អ្នកម៉ាក់) ហ៊ិន ដាន អស់រយៈពេល ៣ ខែ ១០ ថ្ងៃ (ក្នុងភេទជាបព្វជិត) ដោយគិតចាប់ពីថ្ងៃទី ៩.៩.២០២៣-១៧.១២.២០២៣ គឺ គម្រប់ខួប ១០០ ថ្ងៃរួចរាល់»។ លោកបន្ថែមថា «បន្ទាប់ពីលាចាកសិក្ខាបទ នឹងវិលចូលសិល្បៈបំពេញការងារវិញជាធម្មតា សូមសំណូមពរជូនដល់បងៗ ផលិតករ នៅតែបន្តជួយគាំទ្រ និងផ្តល់ឱកាសសម្រាប់រូបខ្ញុំព្រះករុណាអាត្មាភាពបានបង្ហាញសមត្ថភាពបន្តការងារក្នុងជួរសិល្បៈវិញផង ហើយក៏សូមអគុណយ៉ាងក្រៃលែងដល់ញោមញាតិហ្វេនៗ ដែលតែងតែគាំទ្រ និងសួរសុខទុក្ខទាំងបារម្ភកន្លងមក»៕

អត្ថបទ ៖ ចាន់រ៉ា

The post ក្រោយលាចាកសិក្ខាបទ ! តារាសម្ដែង កាវីន រម្លឹករឿងឈឺចាប់ គ្រាម្ដាយចូលសង្គ្រោះនៅមន្ទីរពេទ្យ appeared first on Kampuchea Thmey Daily.