លោក គង់ សោភ័ណ្ឌ Archives - Kampuchea Thmey Daily

អភិបាលខេត្តកណ្ដាល ដោះស្រាយបញ្ហាខ្វះទឹកស្រោចស្រពស្រូវប្រាំង ស្រុកកណ្ដាលស្ទឹង

KC Virak — Mon, 29 Jan 2024 02:34:26 +0000

លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានបញ្ជាឱ្យគ្រប់អាជ្ញាធរពាក់ព័ន្ធទាំងអស់ ត្រូវបូមទឹកដើម្បីស្រោចស្រព ផ្ទៃដីស្រូវប្រាំងចំនួន ១៨៩៣ ហិកតា ជូនដល់ប្រជាកសិករដែលកំពុងប្រឈមការខ្វះខាតទឹក នៅស្រុកកណ្ដាលស្ទឹង ឱ្យបានគ្រប់គ្រាន់។

លោក គង់ សោភ័ណ្ឌ បានដាក់បទបញ្ជាយ៉ាងម៉ឺងម៉ាត់បែបនេះ ក្នុងឱកាស អញ្ជើញចុះជួបសំណេះសំណាល សាកសួរសុខទុក្ខជាមួយបងប្អូនប្រជាពលរដ្ឋដែលជួបគ្រោះរាំងស្ងួត និងបូមទឹកសង្គ្រោះស្រូវប្រាំង ស្ថិតក្នុងឃុំដើមឫស ស្រុកកណ្ដាលស្ទឹង ខេត្តកណ្ដាល នាព្រឹកថ្ងៃទី២៨ ខែមករា ឆ្នាំ២០២៤។

លោកអភិបាលខេត្ត បន្តថា មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរធនធានទឹក ព្រមទាំងអាជ្ញាធរស្រុកកណ្ដាលស្ទឹង និងអ្នកពាក់ព័ន្ធទាំងអស់ ត្រូវយកចិត្តទុកដាក់បូមទឹកស្រោចស្រពជូនប្រជាពលរដ្ឋឱ្យបានគ្រប់គ្រាន់ ដោយមិនត្រូវឱ្យស្រែរបស់ប្រជាពលរដ្ឋណាម្នាក់ខ្វះខាតទឹកស្រោចស្រពឡើយ។

ក្នុងឱកាសនោះដែរ លោកអភិបាលខេត្ត បានណែនាំដល់មន្ទីរធនធានទឹកខេត្ត ត្រូវធ្វើការសិក្សាស្ដារប្រឡាយ ស្ទឹង អូរ ដែលមានភូមិសាស្ត្រនៅក្នុងស្រុកកណ្ដាលស្ទឹង ធ្វើយ៉ាងណាដើម្បីឱ្យប្រជាពលរដ្ឋមានទឹកប្រើប្រាស់គ្រប់គ្រាន់ និងបញ្ជៀសនៅការខ្វះខាតទឹកប្រើប្រាស់នាឆ្នាំបន្តបន្ទាប់។

លោក អ៊ូច សៅវឿន អភិបាលស្រុកកណ្ដាលស្ទឹង បានឱ្យដឹងថា ក្នុងស្រុកកណ្ដាលស្ទឹង ប្រជាពលរដ្ឋដែលបង្កបង្កើនផលស្រូវរដូវប្រាំងសរុប ៣ ២៦០ គ្រួសារ ស្មើនឹង ២ ០៨៣ ហិកតា ហើយបច្ចុប្បន្នផ្ទៃដី ដែលប្រឈមខ្វះខាទឹក ដើម្បីស្រោចស្រពចំនួន ១ ៨៩៣ ហិកតា បច្ចុប្បន្នប្រជាពលរដ្ឋកំពុងបូមបញ្ចូលទឹកដាក់ក្នុងស្រែដោយមិនទាន់មានស្រូវខូចខាតនៅឡើយទេ៕

The post អភិបាលខេត្តកណ្ដាល ដោះស្រាយបញ្ហាខ្វះទឹកស្រោចស្រពស្រូវប្រាំង ស្រុកកណ្ដាលស្ទឹង appeared first on Kampuchea Thmey Daily.

ស្ថានភាពសុខភាពលោក គង់ សោភ័ណ្ឌធូរស្រាលគ្រោងវិលមកស្រុកវិញចុងសប្ដាហ៍នេះ

deth leng — Tue, 20 Jun 2023 11:14:07 +0000

ស្ថានភាពសុខភាពរបស់លោក គង់ សោភ័ណ្ឌ អភិបាលខេត្តកណ្ដាលបានធូរស្រាលច្រើន ខណៈលោកនឹងវិលមកស្រុកវិញនៅចុងសប្ដាហ៍នេះ។

លោក ចាប ច័ន្ទវិទ្យា អភិបាល នៃគណៈអភិបាលស្រុកលើកដែកប្រាប់កម្ពុជាថ្មីនៅថ្ងៃទី ២០ ខែមិថុនានេះថា ស្ថានភាពសុខភាពរបស់លោកអភិបាលខេត្តមិនមានអ្វីធ្ងន់ធ្ងរនោះទេ គឺបានធូរស្រាលហើយ។

លោក គង់ សោភ័ណ្ឌ មានអាការៈមិនស្រួលខ្លួនបានវិលមុខដួលកាលពីថ្ងៃទី ១៦ ខែមិថុនា ក្នុងអំឡុងពេលជួបសំណេះ សំណាលជាមួយប្រជាពលរដ្ឋនៅស្រុកខ្សាច់កណ្ដាល ខេត្តកណ្ដាលដោយសារលោកមមារញឹកការងារ កម្មវិធីជាមួយថ្នាក់ដឹកនាំ និងការងារគណបក្សក្នុងដំណើរឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣។

ដើមឡើយលោកអភិបាលខេត្តបានចូលសង្គ្រោះបន្ទាន់នៅមន្ទីរពេទ្យស្រុកខ្សាច់កណ្ដាល ហើយក៏ត្រូវបានក្រុមគ្រួសារ និងថ្នាក់ដឹកនាំសាលាខេត្តបញ្ជូនបន្តមកព្យាបាលនៅមន្ទីរពេទ្យកាល់ម៉ែត្រ និងបន្តបញ្ជូនទៅទីក្រុងបាងកក ប្រទេសថៃ៕

The post ស្ថានភាពសុខភាពលោក គង់ សោភ័ណ្ឌធូរស្រាលគ្រោងវិលមកស្រុកវិញចុងសប្ដាហ៍នេះ appeared first on Kampuchea Thmey Daily.

អភិបាលខេត្តកណ្តាល ជំរុញឲ្យពន្លឿនការចុះបញ្ជីដីធ្លីឱ្យបានចប់តាមផែនការ

Din Thary — Wed, 19 Apr 2023 10:22:55 +0000

នាថ្ងៃទី១៩ ខែមេសា ឆ្នាំ២០២៣នេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាលបានជំរុញឱ្យអភិបាលក្រុង-ស្រុក និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បន្តសហការគ្នានិងជំរុញការងារចុះបញ្ជីដីធ្លីជាប្រព័ន្ធនៅតាមបណ្ដាក្រុង-ស្រុក ទូទាំងខេត្តឱ្យបានចប់តាមផែនការ។

នៅក្នុងពិធីជួបសំណេះសំណាលជាមួយមន្ត្រី មន្ត្រីជាប់កិច្ចសន្យា អ្នកស្ម័គ្រចិត្ត លើការងារចុះបញ្ជីដីធ្លីមានលក្ខណៈជាប្រព័ន្ធ ទូទាំងខេត្តកណ្ដាលនាព្រឹកមិញ លោក គង់ សោភ័ណ្ឌ បានលើកឡើងថា ការចុះបញ្ជីដីធ្លីមានអត្ថប្រយោជន៍ដល់ប្រជាពលរដ្ឋ ព្រោះអាចធានាបានកម្មសិទ្ធិករស្រប់ច្បាប់លើដី ដោយការផ្ដល់នូវវិញ្ញាបនបត្រសម្គាល់ម្ចាស់អចលនវត្ថុ ព្រមទាំងចូលរួមកាត់បន្ថយ និងលុបបំបាត់នូវវិវាទដីធ្លី ជាក់ស្ដែងជម្លោះព្រំប្រទល់ត្រូវបានកាត់បន្ថយស្ទើរទាំងស្រុង។

មិនតែប៉ុណ្ណោះ វាជាវត្ថុតាងស្របច្បាប់ផ្ដល់នូវទំនុកចិត្តដល់ម្ចាស់ដីនិងអ្នកដែលត្រូវបន្តវេន ក៏ដូចជាបង្កើតទីផ្សារដីប្រកបដោយទំនុកចិត្ត ការវិនិយោគនឹងកើនឡើង ដែលជាកម្លាំងចលករជំរុញដល់កំណើនសេដ្ឋកិច្ច កាត់បន្ថយភាពក្រីក្ររបស់ប្រជាពលរដ្ឋ។

បន្ថែមពីនេះលោកអភិបាលខេត្តបានណែនាំដល់អភិបាលក្រុង-ស្រុក មន្ទីរអង្គភាពពាក់ព័ន្ធ ពិសេសមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ត្រូវបន្តអនុវត្តផែនការចុះបញ្ជីដីរួមទាំងការចុះបញ្ជីដីរដ្ឋ ដីសាធារណៈរបស់រដ្ឋ ដីសម្បទានសេដ្ឋកិច្ច ដើម្បីធានានូវសុវត្ថិភាពនៃការកាន់កាប់ដីធ្លី ដែលជាទុនផ្ដល់ដោយរាជរដ្ឋាភិបាលជូនប្រជាពលរដ្ឋ សម្រាប់រស់នៅ ដាំដុះ និងវិនិយោគដើម្បីបង្កើតមុខរបរនិងបង្កើនប្រាក់ចំណូល។

លើសពីនេះទៀត ត្រូវបន្តអនុវត្តឱ្យបានតាមទិសស្លោក «ធ្វើឱ្យបាន ធ្វើឱ្យលឿន និងមានតម្លាភាព» ដើម្បីធានាថាប្រជាពលរដ្ឋទទួលបានសេវាកាន់តែងាយស្រួល, កាន់តែឆាប់រហ័ស, មានតម្លាភាព និងមានគណនេយ្យភាព។

លោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្ដាលបានឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធនៅក្នុងខេត្តបានបញ្ចប់ពីរក្រុងស្រុក មាននៅស្រុកកណ្ដាលស្ទឹង និងក្រុងតាខ្មៅ ហើយបានកំពុងបន្តអនុវត្តនៅស្រុកល្វាឯម ស្រុកស្អាង ស្រុកអង្គស្នួល ស្រុកខ្សាច់កណ្ដាល ស្រុកកោះធំ ស្រុកពញាឮ ស្រុកកៀនស្វាយ ស្រុកមុខកំពូល និងស្រុកលើកដែកបន្តទៀត៕

The post អភិបាលខេត្តកណ្តាល ជំរុញឲ្យពន្លឿនការចុះបញ្ជីដីធ្លីឱ្យបានចប់តាមផែនការ appeared first on Kampuchea Thmey Daily.

ក្រុងតាខ្មៅមានមជ្ឈមណ្ឌលវិជ្ជាជីវៈមួយកន្លែង ផ្តល់ពលរដ្ឋមានជំនាញមួយប្រចាំជីវិត

Din Thary — Sun, 02 Apr 2023 04:19:24 +0000

ពាក់ព័ន្ធទៅហ្នឹងវឌ្ឍនភាពនៃវិស័យការងារ និងបណ្ដុះបណ្ដាលវិជ្ជាជីវៈលើកកម្ពស់ជំនាញពលរដ្ឋឱ្យមានចំណេះជំនាញច្បាស់លាស់ លោក គង់ សោភ័ណ្ឌ អភិបាលខេត្តកណ្ដាលបានឱ្យដឹងថា ក្រុងតាខ្មៅមានមជ្ឈមណ្ឌលបណ្ដុះបណ្ដាលជំនាញវិជ្ជាជីវៈមួយកន្លែង ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ដែលមាន ៧ ជំនាញផ្សេងគ្នា ដល់សិស្សសិក្សា។

លោក គង់ សោភ័ណ្ឌ មានប្រសាសន៍ថា ផ្អែកលើវិស័យការងារ ខេត្តកណ្តាលហាក់មានការរីកចម្រើនគួរឱ្យកត់សម្គាល់ មិនថាតែកំណើនសេដ្ឋកិច្ច ជាក់ស្តែងវិស័យវិនិយោគក៏ដូចជាវិស័យមួយចំនួនទៀតជាបន្តបន្ទាប់។

ដើម្បីអាចជំរុញនិងបំប៉នសមត្ថភាពពលរដ្ឋឱ្យមានការងារធ្វើសមរម្យ រដ្ឋបាលខេត្តបានខិតខំអនុវត្តតាមផែនការយុទ្ធសាស្ត្រអភិវឌ្ឍន៍វិស័យការងារ សំដៅជួយសម្រួលដល់ជីវភាពពលរដ្ឋក្នុងខេត្តឱ្យមានលក្ខណៈល្អប្រសើរ។

លោកអភិបាលខេត្តបានបញ្ជាក់ថា ដើម្បីឱ្យពលរដ្ឋម្នាក់ៗអាចមានជំនាញប្រចាំជីវិតសម្រាប់ប្រកបមុខរបរ អាចតម្រង់ទិស ក្នុងការចូលប្រលូកវិស័យការងារបាន ខេត្តកណ្តាលមានមជ្ឈមណ្ឌលបណ្ដុះបណ្ដាលជំនាញវិជ្ជាជីវៈមួយកន្លែង ដែលបានបណ្ដុះបណ្ដាលលើ ៧ជំនាញ ផ្សេងគ្នា រួមមាន ជំនាញអគ្គិសនី, បរិក្ខារម៉ាស៊ីនត្រជាក់, សំណង់ស៊ីវិល, ព័ត៌មានវិទ្យា, ជំនាញជួសជុលរថយន្ត, ជំនាញបសុពេទ្យ និងជំនាញភាសាអង់គ្លេសជាដើម។

គិតមកទល់ពេលនេះ មជ្ឈមណ្ឌលបណ្ដុះបណ្ដាលជំនាញវិជ្ជាជីវៈ មានសិស្សបញ្ចប់ការសិក្សាប្រមាណ ២៣០នាក់ ក្នុងនោះស្រី ៤៤នាក់។ ដោយឡែក ក្នុងឆ្នាំសិក្សាថ្មី ២០២២-២០២៣នេះ មជ្ឈមណ្ឌលកំពុងបណ្ដុះបណ្ដាលនិស្សិតថ្នាក់បរិញ្ញាបត្ររងចំនួន ២៤៤នាក់ ស្រី ៦៥នាក់ ដែលសិក្សារយៈពេលពីរឆ្នាំ។

តាមរយៈការបណ្ដុះបណ្ដាលជំនាញវិជ្ជាជីវៈខាងលើ រដ្ឋបាលខេត្តក៏នឹងរំពឹងដែរថា អាចជួយលើកកម្ពស់ចំណេះដឹង សមត្ថភាព ជំនាញឥរិយាបថការងារ ផលិតភាពខ្ពស់របស់ពលរដ្ឋ ពិសេសសេចក្ដីថ្លៃថ្នូរ ក៏ដូចជាបង្កើនកម្លាំងពលកម្ម ធនធានមនុស្សឱ្យមានលក្ខណៈអាចប្រកួតប្រជែងសម្រាប់ការងារពេញមួយជីវិត និងធានាបានថាពលរដ្ឋម្នាក់ មានជំនាញមួយយ៉ាងតិចប្រចាំជីវិត៕

The post ក្រុងតាខ្មៅមានមជ្ឈមណ្ឌលវិជ្ជាជីវៈមួយកន្លែង ផ្តល់ពលរដ្ឋមានជំនាញមួយប្រចាំជីវិត appeared first on Kampuchea Thmey Daily.

១ ថ្ងៃខេត្តកណ្តាលអាចផលិតបន្លែក្នុងផ្ទះសំណាញ់បានជាង ៦៨ តោន លក់លើទីផ្សារ

Din Thary — Fri, 31 Mar 2023 04:32:04 +0000

ថ្លែងនៅក្នុងសន្និសីទកាលពីម្សិលមិញនេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាលបានលើកពីគោលដៅក្នុងការប្រែក្លាយខេត្តកណ្តាលក្នុងចំណោម ២៥រាជធានី/ខេត្ត ដែលមានការនាំចេញបន្លែទៅលក់នៅលើទីផ្សារច្រើនជាងគេ។

ថ្លែងនៅក្នុងសន្និសីទជិត ៤ ម៉ោងនៅទីស្តីការគណៈរដ្ឋមន្រ្តី លោក គង់ សោភ័ណ្ឌ បានបញ្ជាក់ថា ខេត្តកណ្តាលមានសក្ដានុពលខ្ពស់លើការដាំដុះបន្លែគ្រប់មុខ។ ខេត្តកំពុងជំរុញការធ្វើទំនើបកម្មកសិកម្ម ជាពិសេសការដាំដុះបន្លែដែលអាចផ្ដល់ទិន្នផលខ្ពស់។

លោកអភិបាលខេត្តបានបន្តថា ខេត្តកណ្តាលបានដាក់ចេញផែនទីបង្ហាញផ្លូវស្តីពីការអភិវឌ្ឍមាសបៃតង(២០២៣-២០៣០) ដែលជាត្រីវិស័យសម្រាប់ផលិតកម្មបន្លែ និងផ្លែឈើប្រកប សុវត្ថិភាព និងគុណភាព។ ជាមួយគ្នានេះ បានចងក្រងបណ្ដុំអាជីវកម្មបន្លែសុវត្ថិភាពបានចំនួន ៧៥ បណ្តុំ និងបណ្តុះបណ្តាលសមាជិកបាន ៣,៥៣២នាក់ ក្នុងនោះទទួលបានវិញ្ញាបនបត្រចំនួន ៤៥ នាក់។

ទាក់ទងការដាំដុះបន្លែសុវត្ថិភាពក្នុងផ្ទះសំណាញ់ ខេត្តកណ្តាលអាចផលិតបានក្នុងបរិមាណ ៦៨តោន/១ថ្ងៃ។

យោងតាមសៀវភៅណែនាំស្តីពីការដាំបន្លែក្នុងផ្ទះសំណាញ់របស់គម្រោងឈេន (CHAIN) របស់ស្វ៉ីស (SDC) សហការជាមួយក្រសួងកសិកម្មបានបង្ហាញថា ការដាំដំណាំបន្លែក្នុងផ្ទះសំណាញ់គឺពិតជាមានអត្ថប្រយោជន៍ច្រើនសម្រាប់ប្រជាកសិករ។ កសិករដែលដាំដំណាំបន្លែក្នុងផ្ទះសំណាញ់មានភាពងាយស្រួលក្នុងការមើលថែដំណាំ ចៀសផុតពីការបំផ្លាញរបស់សត្វល្អិតចង្រៃគ្រប់ប្រភេទ ដំណាំលូតលាស់ល្អ ទទួលបានកម្តៅគ្រប់គ្រាន់ជាដើម។ កសិករក៏មានជីវភាពធូរធារជាងមុន ដោយសារដំណាំទទួលបានទិន្នផលខ្ពស់និងមានសុខភាពល្អ រកចំណូលបានខ្ពស់ និងអាចធ្វើការដាំដុះបានពេញមួយឆ្នាំ។

ពាក់ព័ន្ធនឹងវិស័យកសិកម្ម លោក គង់ សោភ័ណ្ឌ បានលើកឡើងថា រដ្ឋបាលខេត្តបានកំណត់ចក្ខុវិស័យច្បាស់លាស់ក្នុងការធ្វើទំនើបកម្មវិស័យកសិកម្ម ឱ្យកាន់តែមានភាពប្រកួតប្រជែង តាមរយៈការផ្តល់បច្ចេកទេសដល់កសិករ ការធ្វើពិពិធកម្មវិស័យកសិកម្មទៅជាកសិ-ទេសចរ និងកសិ-ឧស្សាហកម្ម ដែលធ្វើឲ្យប្រាក់ចំណូលពលរដ្ឋមានការកើនឡើង។

លោក ប៊ុនទួន ស៊ីម៉ូណា ប្រធានមន្ទីរ កសិកម្ម រុក្ខាប្រមាញ់ និងនេសាទខេត្តកណ្តាល បានមានប្រសាសន៍ថា បរិមាណផលនៃការដាំដុះបន្លែនៅក្នុងខេត្តកណ្តាល មានការកើនឡើងគួរឱ្យកត់សម្គាល់។ នៅក្នុងឆ្នាំ ២០១៨ ខេត្តមានលទ្ធភាពផលិតបន្លែបាន ១៤០តោន/មួយថ្ងៃ។ ដោយឡែកមកដល់ឆ្នាំ២០២១ បរិមាណផលមានការកើនឡើងបន្ថែមទៀត ដោយអាចផ្គត់ផ្គង់បាន ២៣០តោន/មួយថ្ងៃ ហើយរហូតមកដល់ឆ្នាំ ២០២២នេះ ខេត្តកណ្ដាលមានលទ្ធភាពផ្គត់ផ្គង់បន្លែបាន ៣១៨តោន/មួយថ្ងៃ។

លោកបញ្ជាក់ថា កន្លងមកខេត្តកណ្ដាលដែលធ្លាប់តែមានភាពល្បីល្បាញខាងបាញ់ថ្នាំកសិកម្ម ប៉ុន្តែអ្វីដែលគួរឱ្យកត់សម្គាល់រយៈពេល ៥ ឆ្នាំកន្លងមក ខេត្តបានខិតខំកែប្រែពីតំបន់ដែលប្រើប្រាស់ថ្នាំថ្នាំកសិកម្មច្រើនជាងគេ មកជាតំបន់ដែលដាំបន្លែសុវត្ថិភាពនិងបន្លែសរីរាង្គ។

លោកបន្តទៀតថា នៅសហគមន៍មួយនៅតំបន់ស្វាយបន្ទាលបានធ្វើកសិកម្មកិច្ចសន្យា ដោយមានក្រុមហ៊ុនចំនួន ៧ បានចុះកិច្ចសន្យា និងក្រុមហ៊ុន ៤ បន្ថែមទៀត ដែលបានចូលមកប្រមូលទិញបន្លែ តែមិនទាន់ចុះកិច្ចសន្យា ព្រមទាំងមានប្រមាណ ២០ ក្រុមហ៊ុនបន្ថែមទៀតផងដែរ។

ដោយទទួលបានជំនួយឥតសំណងពីរាជរដ្ឋាភិបាលជប៉ុន ខេត្តកណ្តាលមានមជ្ឈមណ្ឌលប្រមូលផ្តុំ ត្រួតពិនិត្យគុណភាព និងចែកចាយបន្លែសុវត្ថិភាព ជាមជ្ឈមណ្ឌលតែមួយគត់ក្នុងប្រទេសដែលមានស្តង់ដារបច្ចេកទេស ការត្រួតពិនិត្យ និងបញ្ជាក់គុណភាពបន្លែផ្លែឈើ មុននាំទៅលក់លើទីផ្សារ ដែលមិនត្រឹមតែអាចប្រកួតប្រជែងគុណភាព សុវត្ថិភាព លើទីផ្សារក្នុងនិងក្រៅប្រទេសប៉ុណ្ណោះទេ ប៉ុន្តែអាចធានាបានសុខុមាលភាពអ្នកបរិភោគជាសាធារណៈផងដែរ៕

The post ១ ថ្ងៃខេត្តកណ្តាលអាចផលិតបន្លែក្នុងផ្ទះសំណាញ់បានជាង ៦៨ តោន លក់លើទីផ្សារ appeared first on Kampuchea Thmey Daily.

GDP ពលរដ្ឋក្នុងខេត្តកណ្ដាលខ្ពស់មួយឆ្នាំជាងជាង ២ ពាន់ដុល្លារ

Din Thary — Thu, 30 Mar 2023 08:50:07 +0000

ខេត្តកណ្ដាលជាខេត្តមានភាពរីកចម្រើនផ្នែកឧស្សាហកម្ម ដែលនៅមិនឆ្ងាយពីរាជធានីភ្នំពេញ ហើយជីវភាពពលរដ្ឋក៏មានភាពធូរធារ។ ខេត្តដែលមានភូមិសាស្ត្រហ៊ុមព័ទ្ធជុំវិញរាជធានីភ្នំពេញនេះ ខណៈកម្រិតជីវភាពប្រជាពលរដ្ឋនិងមានប្រាក់ចំណូលខ្ពស់បើធៀបខេត្តដទៃទៀត។

លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាលមានប្រសាសន៍នៅក្នុងសន្និសីទនៅព្រឹកថ្ងៃទី ៣០ ខែមីនានេះថា ប្រាក់ចំណូល (GDP) ពលរដ្ឋម្នាក់ៗក្នុងឆ្នាំ ២០២២ មានចំនួន ២ ០៦៤ ដុល្លារ កើនឡើង ២០៤ ដុល្លារ បើធៀបឆ្នាំ ២០១៨ ដែលមានចំនួន ១ ៨៥៩ ដុល្លារ។

ខេត្តកណ្ដាលក្រៅពីការធ្វើកសិកម្ម ក៏ជាខេត្តសក្តានុពលលើការវិនិយោគបង្កើតរោងចក្រសហគ្រាសតូចធំ។ លោកអភិបាលខេត្តបានបន្តថា ខេត្តកណ្តាលមានភូមិសាស្រ្តមិនឆ្ងាយពីរាជធានីភ្នំពេញ ទាក់ទាញរោងចក្រសហគ្រាសតូចធំមកវិនិយោគ ដែលបានផ្ដល់ឱកាសការងារដល់ប្រជាពលរដ្ឋ សម្រួលដល់ជីវភាពឱ្យមានល្អប្រសើរ។

នៅក្នុងសន្និសីទសារព័ត៌មានស្ដីពី «ភាពជោគជ័យរយៈពេល ៥ ឆ្នាំ របស់ខេត្តកណ្ដាល» លោក គង់ សោភ័ណ្ឌ បញ្ជាក់ថា ដោយបានអនុវត្តតាមផែនការយុទ្ធសាស្ត្រអភិវឌ្ឍន៍វិស័យការងារ និងបណ្ដុះបណ្ដាលវិជ្ជាជីវៈ និងផែនការយុទ្ធសាស្ត្រអភិវឌ្ឍជាតិរបស់រាជរដ្ឋាភិបាល ក្នុងការជំរុញឱ្យប្រជាពលរដ្ឋមានការងារសមរម្យ លើកកម្ពស់សេចក្ដីថ្លៃថ្នូរ ជីវភាពរបស់ពលរដ្ឋ រដ្ឋបាលខេត្តបានយកចិត្តទុកដាក់អនុវត្តគោលនយោបាយ និងសម្របសម្រួលការអនុវត្តលក្ខខណ្ឌការងារបានល្អប្រសើរ ដែលបានទាក់ទាញការវិនិយោគក្នុងខេត្ត។

បច្ចុប្បន្នខេត្តកណ្ដាលមាន រោងចក្រសហគ្រាស ៤៨៣ ទីតាំង ដែលមានកម្មករនិយោជិកប្រមាណ ១៥៣,៤០៥នាក់ (សី្រ ១២០,២០៦នាក់) ក្នុងនោះមានរោងចក្រកាត់ដេរសំលៀកបំពាក់ ផលិតស្បែកជើង និងផលិតផលធ្វើដំណើរ-កាបូប មានចំនួន ១៧១ ទីតាំង មានកម្មករនិយោជិក ១៣២,៥៨៧ នាក់ (ស្រី ១១០,១១១នាក់)។

ចំណូលទទួលបានពីវិស័យការងារក្នុងមួយខែមានជាង ៣៦ លានដុល្លារ និងក្នុងមួយឆ្នាំប្រហាក់ប្រហែល ៤៣៤លានដុល្លារ។ ខេត្តកណ្ដាលអត្រាអ្នកមានការងារធ្វើសម្រាប់ពលរដ្ឋដែលមានអាយុ ចាប់ពី ១៨ ដល់ ៦០ឆ្នាំ មានរហូតដល់ ៧៧.៤% ក្នុងឆ្នាំ២០២២៕

The post GDP ពលរដ្ឋក្នុងខេត្តកណ្ដាលខ្ពស់មួយឆ្នាំជាងជាង ២ ពាន់ដុល្លារ appeared first on Kampuchea Thmey Daily.

ឆ្នាំ ២០២៤ ពលរដ្ឋក្រុងតាខ្មៅ នឹងមានទឹកស្អាតប្រើប្រាស់គ្រប់គ្រាន់ មិនខ្វះទៀតទេ

Dy Bunnara — Thu, 30 Mar 2023 04:22:53 +0000

តាមការអះអាងរបស់អភិបាលខេត្តកណ្តាល ក្រុងតាខ្មៅនឹងមានទឹកស្អាតប្រើប្រាស់គ្រប់គ្រាន់ ក្រោយស្ថានីយប្រព្រឹត្តិកម្មទឹកស្អាតតម្លៃ ៣០ លានដុល្លារបញ្ចប់ការសាងសង់។

លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាលបានថ្លែងនៅក្នុងសន្និសីទជោគជ័យរយៈពេល ៥ ឆ្នាំរបស់រដ្ឋបាលខេត្តកណ្តាលនៅព្រឹកនេះថា ចំពោះការងារផ្គត់ផ្គង់ទឹកស្អាតនៅតាមបណ្តាក្រុងស្រុក មានក្រុមហ៊ុនរដ្ឋ និងឯកជន មានអាជ្ញាបណ្ណចំនួន ៥៥ មូលដ្ឋាន គ្របដណ្តប់ ១ ០១០ភូមិ។ បច្ចុប្បន្នការតបណ្តាញទឹកស្អាតបានចំនួន ៩៤៥ភូមិ និងមានខ្នងផ្ទះចំនួន ៦៦,១៨៦ខ្នងផ្ទះ ដែលមានទឹកស្អាតប្រើប្រាស់ ធៀបនឹងឆ្នាំ២០១៨ ខ្នងផ្ទះមានទឹកស្អាតប្រើប្រាស់មានចំនួន ១៥,០០០ ខ្នងផ្ទះ។

នៅឆ្នាំ ២០២៤ ក្រុងតាខ្មៅនឹងមិនមានបញ្ហាប្រឈមការខ្វះខាតទឹកស្អាតប្រើប្រាស់ទៀតទេ តាមរយៈរោងចក្រផលិតកម្មទឹកស្អាតតម្លៃប្រមាណ ៣០លានដុល្លារ។

លោក គង់ សោភ័ណ្ឌ បានបញ្ជាក់ថា រោងចក្រផលិតទឹកស្អាតក្រុងតាខ្មៅ មានសមត្ថភាពផលិតទឹកស្អាតបានជាង ៣ ម៉ឺនម៉ែត្រគូបក្នុងមួយថ្ងៃ។ នៅពេលរោងចក្របញ្ចប់ការសាងសង់នៅចុងឆ្នាំ២០២៤ នឹងអាចផ្គត់ផ្គង់ដល់ប្រជាពលរដ្ឋនៅក្រុងតាខ្មៅទាំងមូល និងជាយក្រុងតាខ្មៅ មានទឹកស្អាតប្រើប្រាស់គ្រប់គ្រាន់។

បច្ចុប្បន្នទឹកស្អាតដែលកំពុងប្រើប្រាស់ក្នុងក្រុងតាខ្មៅ ត្រូវបានផ្គត់ផ្គង់ជាចម្បងពីរាជធានីភ្នំពេញ។ តាមរយៈរោងចក្រផលិតទឹកស្អាតនៅក្រុងតាខ្មៅដែលសាងសង់បញ្ចប់នៅឆ្នាំ២០២៤ មិនត្រឹមតែផ្គត់ផ្គង់នៅក្នុងក្រុងតាខ្មៅ និងតំបន់ជុំវិញប៉ុណ្ណោះទេ ប៉ុន្តែថែមទាំងជួយកាត់បន្ថយការផ្គត់ផ្គង់ទឹកស្អាតពីរាធានីភ្នំពេញផងដែរ។

រាជរដ្ឋាភិបាលកម្ពុជា បានដាក់ផែនការយុទ្ធសាស្ត្រអភិវឌ្ឍជាតិលើវិស័យផ្គត់ផ្គង់ទឹកស្អាត ១០០ភាគរយ នៅក្នុងទីប្រជុំជនត្រឹមឆ្នាំ២០២៥ ក្នុងផែនការយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា៕

The post ឆ្នាំ ២០២៤ ពលរដ្ឋក្រុងតាខ្មៅ នឹងមានទឹកស្អាតប្រើប្រាស់គ្រប់គ្រាន់ មិនខ្វះទៀតទេ appeared first on Kampuchea Thmey Daily.

ខេត្តកណ្តាលមានអគ្គិសនីគ្របដណ្តប់គ្រប់ភូមិស្មើ ១០០%

Dy Bunnara — Thu, 30 Mar 2023 04:02:52 +0000

ខេត្តកណ្តាលស្ថិតនៅភូមិភាគនិរតីដែលមានភូមិសាស្ត្រហ៊ុំព័ទ្ធជុំវិញរាជធានីភ្នំពេញ ការផ្គត់ផ្គង់ថាមពលអគ្គិសនីបានគ្របដណ្តប់គ្រប់ភូមិទូទាំងខេត្ត។

លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាលបានថ្លែងនៅក្នុងសន្និសីទនៅព្រឹកនេះថា ខេត្តកណ្តាលហ៊ុំព័ទ្ធជុំវិញរាជធានីភ្នំពេញ ហើយមានភូមិសាស្រ្តបែងចែកជា ១០ ស្រុក មាន ៣ ក្រុង មាន ១០១ ឃុំ ២៦ សង្កាត់ និង ១,០១០ភូមិ។

ដោយឡែកទាក់ទងការផ្គត់ផ្គង់ថាមពលអគ្គិសនី លោក គង់ សោភ័ណ្ឌបានបញ្ជាក់ថា ខេត្តកណ្តាលដែលមានប្រជាជនសរុប ១,៣៤៨,៨៥១ នាក់ ការផ្គត់ផ្គង់អគ្គិសនីបានតភ្ជាប់លើភូមិទាំង ១០១០ ភូមិ ស្មើនឹង ១០០%។

លោកអភិបាលខេត្តបន្តទៀតថា ក្រៅពីការយកចិត្តទុកដាក់ក្នុងការផ្គត់ផ្គង់ថាមពលអគ្គិសនីដល់គ្រប់ខ្នងផ្ទះប្រជាពលរដ្ឋ រដ្ឋបាលខេត្តក៏គិតគូរក្នុងការលើកកម្ពស់សោភណភាពតាមមូលដ្ឋាន តាមរយៈការរៀបចំបង្គោលភ្លើងបំភ្លឺផ្លូវសាធារណៈនៅតាមទីប្រជុំជននិងបណ្តាស្រុក ដើម្បីគាំទ្រចលនាភូមិឃុំមានសុវត្ថិភាព និងការអភិវឌ្ឍលើកកម្ពស់ជីវភាពរបស់ប្រជាពលរដ្ឋ៕

The post ខេត្តកណ្តាលមានអគ្គិសនីគ្របដណ្តប់គ្រប់ភូមិស្មើ ១០០% appeared first on Kampuchea Thmey Daily.

លោក គង់ សោភ័ណ្ឌ Archives - Kampuchea Thmey Daily

អភិបាលខេត្តកណ្ដាល ដោះស្រាយបញ្ហាខ្វះទឹកស្រោចស្រពស្រូវប្រាំង ស្រុកកណ្ដាលស្ទឹង

ស្ថានភាពសុខភាពលោក គង់ សោភ័ណ្ឌធូរស្រាលគ្រោងវិល​មកស្រុកវិញ​ចុងសប្ដាហ៍នេះ

អភិបាល​ខេត្ត​កណ្តាល​ ជំរុញ​ឲ្យ​ពន្លឿន​ការ​ចុះ​បញ្ជី​ដី​ធ្លី​​ឱ្យ​បាន​ចប់​តាម​ផែនការ

ក្រុង​តាខ្មៅ​មាន​មជ្ឈមណ្ឌល​​វិជ្ជាជីវៈ​មួយកន្លែង ​ផ្តល់​​​ពលរដ្ឋ​មាន​ជំនាញ​មួយ​​ប្រចាំ​ជីវិត

១​ ថ្ងៃ​ខេត្ត​កណ្តាលអាច​​ផលិត​បន្លែក្នុងផ្ទះសំណាញ់​​បាន​ជាង ៦៨​ តោន លក់​លើ​ទីផ្សារ

GDP ពលរដ្ឋក្នុងខេត្តកណ្ដាល​ខ្ពស់​មួយ​ឆ្នាំ​ជាង​ជាង ២ ពាន់ដុល្លារ

ឆ្នាំ ២០២៤​ ពលរដ្ឋ​ក្រុង​តាខ្មៅ នឹង​មាន​ទឹកស្អាត​ប្រើប្រាស់​គ្រប់គ្រាន់​ មិន​ខ្វះទៀតទេ