លោក ចាស្ទីន ឌ្រូដូ (Justin Trudeau) Archives - Kampuchea Thmey Daily

កាណាដាសន្យាផ្តល់ប្រាក់បង្កកពីទ្រព្យរុស្ស៊ី និងបញ្ជូនទ័ពរក្សាសន្តិភាពអ៊ុយក្រែន

Rann Reuy — Tue, 25 Feb 2025 04:16:47 +0000

នាយករដ្ឋមន្ត្រីកាណាដាបានសន្យាបញ្ជូនជំនួយតម្លៃ៥ពាន់លានដុល្លារដែលរឹបអូសបានពីការបង្កកទ្រព្យរបស់រុស្ស៊ីទៅឲ្យប្រទេសអ៊ុយក្រែន និងសន្យាបញ្ជូនកងរក្សាសន្តិភាពទៅកាន់ប្រទេសដែលញាំញីដោយសារសង្គ្រាមជាមួយប្រទេសរុស្ស៊ីអស់រយៈពេល៣ឆ្នាំ នៅពេលណាមួយដែលបទឈប់បានត្រូវបានព្រមព្រៀងដោយការធានាសន្តិភាពអ៊ុយក្រែនយូរអង្វែង។

នាយករដ្ឋមន្ត្រីកាណាដា លោក Justin Trudeau និងប្រធានាធិបតីអ៊ុយក្រែន។ FB/zelensky

នៅក្នុងដំណើរទស្សនកិច្ចរួមគ្នាជាមួយមេដឹកនាំស្ថាប័នសំខាន់ៗរបស់អឺរ៉ុបទៅកាន់ទីក្រុងកៀវកាលថ្ងៃចន្ទ ជួបមេដឹកនាំអ៊ុយក្រែនដើម្បីបង្ហាញការគាំទ្រដល់អ៊ុយក្រែនក្នុងសង្គ្រាមការពារទឹកដី លោក Justin Trudeau នាយករដ្ឋមន្ត្រីកាណាដា បាននិយាយថា អ្វីៗស្ថិតនៅលើតុរួចស្រេចទៅហើយសម្រាប់ប្រទេសកាណាដា ហើយការបញ្ជូនកងទ័ពគឺត្រូវប្រាកដថាអនុលោមទៅតាមបទឈប់បាញ់ជាមួយលក្ខខណ្ឌសម្រាប់សន្តិភាពជារៀងរហូត។

មេដឹកនាំប្រទេសក្នុងតំបន់អឺរ៉ុបខ្លះ និងប្រធានស្ថាប័នមួយចំនួនទៅគាំទ្រអ៊ុយក្រែនក្នុងថ្ងៃខួប៣ឆ្នាំ។

សារព័ត៌មាន National Post របស់ប្រទេសកាណាដា បានស្រង់សម្តីនាយករដ្ឋមន្ត្រី Justin Trudeau ដូចនិយាយថា៖«នៅពេលយើងបង្កើតមធ្យោបាយដែលយើងនឹងរក្សាសន្តិភាពយូរអង្វែង…កាណាដានឹងចូលរួម ប៉ុន្តែយើងមិនទាន់ទទួលបានលក្ខខណ្ឌបែបនោះនៅឡើយ»។

រដ្ឋាភិបាលទីក្រុងអូតាវ៉ា ក៏បាសន្យាផ្តល់ទឹកប្រាក់៥ពាន់លានដុល្លារដែលជាទឹកប្រាក់បានពីការបង្កទ្រព្យសម្បត្តិ ដែលជាផ្នែកនៃការដាក់ទណ្ឌកម្មប្រឆាំងប្រទេសរុស្ស៊ី ក្រោយការលើកទ័ពចូលលុកលុយប្រទេសអ៊ុយក្រែនកាលពី៣ឆ្នាំមុន។

តាមសារអរគុណរបស់ប្រធានាធិបតី អ៊ុយក្រែន លោក Volodymyr Zelensky ប្រទេសកាណាណា បានជួយគាំទ្រអ៊ុយក្រែនក្នុងច្រើនផ្នែកក្នុងវិស័យការពារជាតិ ដូចជា ការបង្វឹកកងទ័ព ការផ្តល់បច្ចេកវិទ្យាសម្រាប់ឧស្សាហកម្មផលិតយន្តហោះគ្មានមនុស្សបើកនៅក្នុងសមរភូមិជាដើម។

នាយករដ្ឋមន្ត្រីកាណាដា Justin Trudeau ដែលនៅជាប់អាមេរិកនិងកំពុងប្រឈមរដ្ឋបាលដូណាល់ត្រាំស្រាប់នោះ បានចេញមុខការពារអ៊ុយក្រែនក្នុងការប្រយុទ្ធជាមួយរុស្ស៊ីដែលដឹកនាំដោយប្រធាធិបតី វ្ល៉ាឌីមៀរ ពូទីន ក្រោយប្រធានាធិបតីសហរដ្ឋអាមេរិក ដូណាល់ ត្រាំ បានចេញសារវាយប្រហារប្រធានាធិបតីអ៊ុយក្រែន លោក Volodymyr Zelensky ដោយហៅថា«ជាជនផ្តាច់ការ» ជាអ្នកធ្វើឲ្យសង្គ្រាមកើតឡើង៕

ដោយ រ៉ាន់ រើយ

The post កាណាដាសន្យាផ្តល់ប្រាក់បង្កកពីទ្រព្យរុស្ស៊ី និងបញ្ជូនទ័ពរក្សាសន្តិភាពអ៊ុយក្រែន appeared first on Kampuchea Thmey Daily.

អាមេរិករាំងខ្ទប់សេចក្តីថ្លែងការណ៍រួមរបស់មេដឹកនាំ G7 ដែលតែងថ្កោលទោសរុស្ស៊ីក្នុងខួបសង្គ្រាម

Rann Reuy — Mon, 24 Feb 2025 03:38:45 +0000

មេដឹកនាំនៃក្រុមប្រទេសរីកចម្រើនឧស្សាហកម្មទាំងប្រាំពីរ ហៅកាន់ថា G7 មិនទាន់បានចេញសេចក្តីថ្លែងការណ៍ថ្មីរួមថ្មីមួយទាក់ទងនឹងជម្លោះអ៊ុយក្រែនក្នុងខួប៣ឆ្នាំនេះថ្ងៃទី២៤ខែកុម្ភៈនេះ ដែលជាធម្មតាពួកគេតែងតែធ្វើក្នុងខួបប្រចាំឆ្នាំ ឬក្នុងឱកាសនៃកិច្ចប្រជុំរបស់ពួកគេក្នុងឆ្នាំកន្លងមក។

ដង់ជាតិតំណាងប្រទេសក្នុងក្រុម G7។ អនឡាញ

ក្រុមប្រទេស G7 មានប្រទេសកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាមេរិក និងតំណាងជាន់ខ្ពស់នៃសហភាពអឺរ៉ុប។ ក្រុមប្រទេស G7 តែងតែផ្តល់ការគាំទ្រដល់អ៊ុយក្រែនដោយឥតលក្ខខណ្ឌក្នុងជម្លោះជាមួយអ៊ុយក្រែន។

ពេលវេលា និងខ្លឹមសារនៃសេចក្តីថ្លៃងការណ៍របស់ក្រុមប្រទេស G7 ស្ថិតនៅក្នុងភាពមិនច្បាស់លាស់ជាខ្លាំងក្នុងខួប៣ឆ្នាំនៃសង្គ្រាមអ៊ុយក្រែនដែលត្រូវបានគេចោទកន្លងមកថា «រុស្ស៊ីជាអ្នកឈ្លានពាន» បន្ទាប់ពីសហរដ្ឋអាមេរិកបានបើកការចរចាទ្វេភាគីជាមួយរុស្ស៊ីនៅមុនខួប៣ឆ្នាំនេះមកដល់ ហើយតាមសេចក្តីរាយការណ៍របស់សារព័ត៌មាន Financial Times កាលថ្ងៃសុក្រសប្តាហ៍មុន សហរដ្ឋអាមេរិកបានជំទាស់នឹងសេចក្តីព្រាងសេចក្តីថ្លែងការណ៍ដែលប្រើឃ្លា «ការឈ្លានពានរបស់រុស្ស៊ី»។

ការជំទាស់ការប្រើប្រាស់ឃ្លា«ការឈ្លានពានរបស់រុស្ស៊ី» របស់សហរដ្ឋអាមេរិក បានកើតមាននៅក្នុងមន្ត្រីនៃប្រទេស G7 ក្រោយជម្លោះពាក្យសម្តីរវាងប្រធានាធិបតីសហរដ្ឋអាមេរិក លោក ដូណាល់ ត្រាំ និង ប្រធានាធិបតីអ៊ុយក្រែន លោក Volodymyr Zelensky ដោយប្រធានាធិបតីអ៊ុយក្រែនបានបង្ហាញការជំទាស់មិនទទួលស្គាល់កិច្ចព្រមព្រៀងសន្តិភាពអ៊ុយក្រែន ដោយគ្មានវត្តមានអ៊ុយក្រែនចូលរួមចរចាដោយផ្ទាល់នោះ។

ជាការឆ្លើយតបនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បានហៅលោក ហ្សេលេនស្គី ថា«ជនផ្តាច់ការ» និងជាអ្នកបណ្តាលឲ្យសង្គ្រាមកើតឡើង។

កិច្ចប្រជុំតាមតាមអនឡាញនៃមេដឹកនាំ G7 គ្រោងធ្វើឡើងនៅថ្ងៃនេះ ដើម្បីពិភាក្សាអំពីស្ថានភាពនេះ ស្របពេលនឹងខួប៣ឆ្នាំនៃការលុកលុយពេញលេញរបស់រុស្ស៊ីលើប្រទេសអ៊ុយក្រែន។ ទោះជាយ៉ាងណាក៏ដោយ របាយការណ៍បង្ហាញពីការខ្វែងគំនិតផ្ទៃក្នុងក្នុងចំណោមប្រទេសជាសមាជិក G7 ជាពិសេសទាក់ទងនឹងភាសាដែលប្រើដើម្បីពិពណ៌នាអំពីតួនាទីរបស់រុស្ស៊ីនៅក្នុងជម្លោះ។

នៅក្នុងសេចក្តីការណ៍ថ្នាក់រដ្ឋមន្ត្រីក្រសួងការបរទេសដែលបានជួបប្រជុំគ្នានៅលើគែមនៃសន្និសីទស្តីពីសន្តិសុខទីក្រុង Munich ជាលើកដំបូងក្រោមភាពជាប្រធានរបស់ប្រទេសកាណាដាឆ្នាំនៅឆ្នាំ២០២៥នេះ សមាជិកនៃក្រុមប្រទេសG7 បានហៅសង្គ្រាមនោះថា«ជាភាពសាហាវរបស់រុស្ស៊ីនៅអ៊ុយក្រែន»។ ពួកគេបានគូសបញ្ជាក់ពីការប្តេជ្ញាចិត្តរបស់ពួកគេក្នុងការធ្វើការរួមគ្នាដើម្បីជួយឱ្យសម្រេចបាននូវសន្តិភាពយូរអង្វែង និងអ៊ុយក្រែនដ៏រឹងមាំ និងវិបុលភាព ហើយបានបញ្ជាក់សារជាថ្មីអំពីតម្រូវការក្នុងការអភិវឌ្ឍការធានាសន្តិសុខដ៏រឹងមាំ ដើម្បីធានាថាសង្រ្គាមនឹងមិនចាប់ផ្តើមម្តងទៀតទេ៕

ដោយ រ៉ាន់ រើយ

The post អាមេរិករាំងខ្ទប់សេចក្តីថ្លែងការណ៍រួមរបស់មេដឹកនាំ G7 ដែលតែងថ្កោលទោសរុស្ស៊ីក្នុងខួបសង្គ្រាម appeared first on Kampuchea Thmey Daily.

នាយករដ្ឋមន្ត្រីកាណាដាចាប់ដៃជាមួយអឺរ៉ុបបន្តគាំទ្រអ៊ុយក្រែន ក្រោយ ត្រាំ វាយប្រហារហ្សេលេនស្គី

Rann Reuy — Thu, 20 Feb 2025 04:29:46 +0000

ក្រោយប្រធានាធិបតីសហរដ្ឋអាមេរិក ដូណាល់ ត្រាំ បានចេញសារវាយប្រហារប្រធានាធិបតីអ៊ុយក្រែន លោក Volodymyr Zelensky ដោយហៅថា«ជាជនផ្តាច់ការ» ជាតារាកំប្លែង និងជាជនជួញសង្គ្រាមផងនោះ នាយករដ្ឋមន្ត្រីកាណាដា Justin Trudeau ដែលនៅជាប់អាមេរិកស្រាប់និងកំពុងប្រឈមរដ្ឋបាលដូណាល់ត្រាំស្រាប់នោះ បានចេញមុខការពារអ៊ុយក្រែនក្នុងការប្រយុទ្ធជាមួយរុស្ស៊ីដែលដឹកនាំដោយប្រធាធិបតី វ្ល៉ាឌីមៀរ ពូទីន។

នាយករដ្ឋមន្ត្រីកាណាដា Justin Trudeau។ Reuters

ដោយមិនបាននិយាយចំៗប្រឆាំងនឹងប្រធានាធិបតី ដូណាល់ ត្រាំ ដែលបានវាយប្រហារប្រធានាធិបតីអ៊ុយក្រែនយ៉ាងចាស់ដៃមិនធ្លាប់មាន បន្ទាប់ពីប្រធានាធិបតីអ៊ុយក្រែនបានចេញសារជាបន្តបន្ទាប់ច្រានចោលការចរចារវាងរុស្ស៊ីនិងអាមេរិកស្តីពីសន្តិភាពនៅអ៊ុយក្រែន ដោយគ្មានវត្តមានអ៊ុយក្រែននោះ នៅក្នុងសារវីដេអូរយៈពេល១នាទី១០វិនាទីដែលចេញផ្សាយនៅលើបណ្តាសង្គម នាយករដ្ឋមន្ត្រីកាណាដា បានបង្ហាញការគាំទ្រដល់អ៊ុយក្រែន ហើយថា លោកនឹងជួបសន្ទនាជាមួយអឺរ៉ុបដើម្បីផ្តល់ការគាំទ្រនេះ។

នាយករដ្ឋមន្ត្រីកាណាដា Justin Trudeau បាននិយាយថា៖«ប្រជាជនអ៊ុយក្រែនបានប្រយុទ្ធនិងស្លាប់មិនត្រឹមតែដើម្បីការពារអធិបតេយ្យភាពរបស់ពួកគេប៉ុណ្ណោះទេ…ពួកគេក៏កំពុងប្រយុទ្ធដើម្បីការពារសណ្តាប់ធ្នាប់ផ្អែកលើច្បាប់ដែលរក្សាសុវត្ថិភាពយើងទាំងអស់គ្នានៅជុំវិញពិភពលោក ហើយមានរយៈពេលតជិត៨០ឆ្នាំមកដល់ពេលនេះ»។

«រយៈពេលនៃសម័យកាលសន្តិភាព ស្ថិរភាព វិបុលភាពសម្រាប់ពិភពលោកនេះ កើតឡើងដោយសារតែយើងមានច្បាប់ជុំវិញព្រំដែន ជុំវិញការមិនឈ្លានពានប្រទេសជិតខាង ដែលរុស្ស៊ីជ្រើសរើសដោយចេតនាបំពានកាលពីប៉ុន្មានឆ្នាំមុន។ នោះហើយជាមូលហេតុដែលប្រទេសកាណាដា និងសម្ព័ន្ធមិត្តរបស់យើងមានភាពច្បាស់លាស់ក្នុងការក្រោកឈរឡើងប្រឆាំងនឹងការបំពានខុសច្បាប់ អសីលធម៌ និងអយុត្តិធម៌របស់វ្ល៉ាឌីមៀរ ពូទីន លើសណ្តាប់ធ្នាប់អន្តរជាតិ និងជាមូលហេតុដែលខ្ញុំសម្លឹងទៅរកការសន្ទនាជាមួយដៃគូអឺរ៉ុបរបស់ខ្ញុំក្នុងរយៈពេលពីរបីម៉ោងដើម្បីនិយាយអំពីរបៀបដែលយើងនឹងបន្តឈរយ៉ាងច្បាស់លាស់ក្នុងការការពារប្រទេសអ៊ុយក្រែន ប៉ុន្តែក៏នៅក្នុងការការពារច្បាប់ដែលរក្សាសុវត្ថិភាពយើងទាំងអស់គ្នា»។

រដ្ឋបាលថ្មីសហរដ្ឋអាមេរិកដឹកនាំដោយលោកដូណាល់ ត្រាំ បានធ្លាក់ចូលជម្លោះជាមួយកាណាដាដែលនៅក្បែរខាង បន្ទាប់ពីប្រធានាធិបតីដូណាល់ ត្រាំ បានបង្ហាញបំណងយកកាណាដាចំណុះឲ្យសហរដ្ឋអាមេរិកជារដ្ឋទី៥១ ហើយភ្លាមៗក្រោយឡើងកាន់អំណាច លោក ត្រាំ បានចេញបទបញ្ជាប្រតិបត្តិដំឡើងពន្ធនាំចូលលើទំនិញពីកាណាដារហូតដល់២៥%៕

ដោយ រ៉ាន់ រើយ

ប្រធានាធិបតីអាមេរិក លោក ដូណាល់ ត្រាំ។ REUTERS

The post នាយករដ្ឋមន្ត្រីកាណាដាចាប់ដៃជាមួយអឺរ៉ុបបន្តគាំទ្រអ៊ុយក្រែន ក្រោយ ត្រាំ វាយប្រហារហ្សេលេនស្គី appeared first on Kampuchea Thmey Daily.

សង្រ្គាមពាណិជ្ជកម្មអាមេរិកខាងជើងផ្ទុះឡើង ជុំវិញវិធានការពន្ធរបស់ ត្រាំ

Huon Dina — Mon, 03 Feb 2025 02:41:03 +0000

សង្រ្គាមពាណិជ្ជកម្មនៅអាមេរិកខាងជើងបានផ្ទុះឡើង ក្រោយកាណាដាប្រកាស ហើយម៉ិកស៊ិកប្ដេជ្ញា ចាត់វិធានការសងសឹងជាមួយនឹងការដាក់ពន្ធលើទំនិញនាំចូលពីសហរដ្ឋអាមេរិក ដើម្បីជាការឆ្លើយតបទៅនឹងចំណាត់ការពន្ធរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ លើទំនិញនាំចូលពីប្រទេសទាំង២។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

កាណាដាបានប្រកាសដាក់ពន្ធ ២៥ ភាគរយ លើទំនិញនាំចូលពីអាមេរិកកាលពីថ្ងៃសៅរ៍ ដោយគ្របដណ្ដប់លើភេសជ្ជៈ គ្រឿងសម្អាង និងផលិតផលក្រដាស ដែលមានតម្លៃ ២០ ប៊ីលានដុល្លារអាមេរិក។ ក្រៅពីនេះ កាណាដាក៏ត្រៀមចេញបញ្ជីមុខទំនិញអាមេរិកជាប់ពន្ធផ្សេងទៀត ដែលគ្រប់ដណ្ដប់លើរថយន្តដឹកអ្នកដំណើរ ឡានដឹកទំនិញ ផលិតផលដែក និងអាលុយមីញ៉ូម ផ្លែឈើ និងបន្លែមួយចំនួន សាច់គោ សាច់ជ្រូក ផលិតផលទឹកដោះគោ ផលិតផលអាកាស និងទំនិញជាច្រើនមុខទៀត ដែលសរុបជាតម្លៃប្រហែល ៨៥ ប៊ីលានដុល្លារ។

រដ្ឋាភិបាលកាណាដានិយាយថា វិធានការសងសឹកដែលនឹងចូលជាធរមាននៅថ្ងៃអង្គារនេះ នឹងអនុវត្តរហូត ទាល់តែសហរដ្ឋអាមេរិកលុបចោលវិធានការពន្ធរបស់ខ្លួន។ ខណៈព្រមានពីផលប៉ះពាល់ទាំងសងខាង នាយករដ្ឋមន្ត្រីកាណាដា លោក ចាស្ទីន ឌ្រូដូ (Justin Trudeau) បានថ្លែងថា៖ «យើងពិតជាមិនរកកំណើននៃភាពតានតឹងនោះទេ ប៉ុន្តែយើងនឹងក្រោកឈរឡើងដើម្បីកាណាដា»។

ចំណែកឯម៉ិកស៊ិកវិញ បានប្ដេជ្ញាថានឹងសងសឹងលើអាមេរិកដូចគ្នា ប៉ុន្តែមិនទាន់បានបញ្ចេញអត្រាពន្ធគយ ឬបញ្ជីមុខទំនិញនៅឡើយទេ។

ទាំងកាណាដា និងម៉ិកស៊ិក សុទ្ធសឹងតែជាដៃគូពាណិជ្ជកម្មកំពូលៗរបស់សហរដ្ឋអាមេរិក។ ការផ្ទុះឡើងនៃសង្រ្គាមពាណិជ្ជកម្មយ៉ាងដូច្នេះ កំពុងបង្កការព្រួយបារម្ភសេដ្ឋកិច្ចពីប្រទេសពាក់ព័ន្ធទាំងសងខាង រួមទាំងផលប៉ះពាល់លើអ្នកប្រើប្រាស់ និងអាជីវកម្មផ្សេងៗ ក៏ដូចជាលទ្ធភាពនៃការបាត់បង់ការងាររាប់លាន។

តាមការប្រកាសរបស់រដ្ឋបាល ត្រាំ សហរដ្ឋអាមេរិកនឹងដាក់ពន្ធ ២៥ ភាគរយលើគ្រប់ទំនិញពីកាណាដា លើកលែងតែប្រេងកាតដែលជាប់ពន្ធត្រឹម ១០ ភាគរយ, ២៥ ភាគរយ លើគ្រប់ទំនិញពីម៉ិកស៊ិក និង ១០ ភាគរយ លើទំនិញពីចិន។ វិធានការនេះនឹងចូលជាធរមានចាប់ពីថ្ងៃអង្គារតទៅ ដោយរដ្ឋបាលអាមេរិកនៅតែសំអាងលើបញ្ហាលំហូរជនអន្តោប្រវេសន៍ខុសច្បាប់ និងថ្នាំញៀនហ្វេនតានីល ក៏ដូចជាឱនភាពពាណិញជ្ជកម្មរបស់អាមេរិកទៅប្រទេសទាំង៣។

អ្នកវិភាគខ្លះលើកឡើងថា ពន្ធរបស់រដ្ឋបាលត្រាំ អាចជាវិធានការបណ្ដោះអាសន្នដោយសារតែផលវិបាកលើសហរដ្ឋអាមេរិក ប៉ុន្តែវានៅតែស្រពិចស្រពិល។ ខណៈភាពចលាចលនៃជម្លោះពាណិជ្ជកម្មកើនឡើង លោក ត្រាំ បាននិយាយកាលពីថ្ងៃអាទិត្យថា ពលរដ្ឋអាមេរិកអាចទទួលរងផលប៉ះពាល់ «ខ្លះៗ» ពីសង្គ្រាមពាណិជ្ជកម្មដែលកំពុងផ្ទុះឡើង ប៉ុន្តែថា លោកគ្រោងនឹងនិយាយជាមួយកាណាដា និងម៉ិកស៊ិក នៅថ្ងៃចន្ទនេះ។

ទោះជាយ៉ាងណាក៏ដោយ ប្រធានាធិបតីដដែល បាននិយាយជុំវិញការឆ្លើយតបរបស់កាណាដា ថា៖ «ប្រសិនបើពួកគេចង់លេង ខ្ញុំមិនប្រកាន់ទេ។ យើងអាចលេងតាមអ្វីដែលពួកគេចង់បាន»។ ទន្ទឹមនឹងនោះ លោកក៏គំរាមជាថ្មី អំពីវិធានការពន្ធចំពោះសហភាពអឺរ៉ុប និងចក្រភពអង់គ្លេសផងដែរ។

ងាកទៅមើលកាណាដា និងម៉ិកស៊ិកវិញ បានប្រកាសពីការព្រមព្រៀងគ្នា «ដើម្បីពង្រឹងទំនាក់ទំនងទ្វេភាគីដ៏រឹងមាំ» រវាងប្រទេសទាំង២ ក្រោយ ឌ្រូដូ និងប្រធានាធិបតីម៉ិកស៊ិក លោកស្រី ខ្លូតឌីយ៉ា ស្ហេនប៊ម (Claudia Sheinbaum) បានពិភាក្សាគ្នាតាមទូរស័ព្ទកាលពីថ្ងៃសៅរ៍័ ក្រោយពន្ធរបស់ ត្រាំ ត្រូវបានប្រកាសឡើង។

ក្រៅពីការសងសឹករបស់កាណាដា លោក ឌ្រូដូ ក៏បានអំពាវនាវផងដែរ ឱ្យពលរដ្ឋកាណាដាប្រើប្រាស់ផលិតប្រទេសរបស់ខ្លួន។ លោកនិយាយលើបណ្ដាញសង្គម X របស់លោកកាលពីថ្ងៃអាទិត្យ យ៉ាងដូច្នេះថា៖ «ពេលនេះ ជាពេលវេលាដែលត្រូវប្រើផលិតផលដែលផលិតក្នុងស្រុកកាណាដា។ សូមពិនិត្យមើលពិនិត្យស្លាកសញ្ញា។ ចូរយើងធ្វើផ្នែកយើង។ សូមជ្រើសរើសផលិតផលកាណាដា នៅកន្លែងណាដែលយើងអាចធ្វើបាន»៕

The post សង្រ្គាមពាណិជ្ជកម្មអាមេរិកខាងជើងផ្ទុះឡើង ជុំវិញវិធានការពន្ធរបស់ ត្រាំ appeared first on Kampuchea Thmey Daily.

លោក ចាស្ទីន ឌ្រូដូ​ (Justin Trudeau) Archives - Kampuchea Thmey Daily

កាណាដាសន្យា​ផ្តល់​​ប្រាក់​​បង្កក​ពី​​ទ្រព្យ​រុស្ស៊ី និង​​បញ្ជូនទ័ព​​​រក្សា​សន្តិភាព​អ៊ុយក្រែន

សង្រ្គាមពាណិជ្ជកម្មអាមេរិកខាងជើងផ្ទុះឡើង ជុំវិញ​​វិធានការពន្ធ​របស់​ ត្រាំ

លោក ចាស្ទីន ឌ្រូដូ (Justin Trudeau) Archives - Kampuchea Thmey Daily

កាណាដាសន្យាផ្តល់ប្រាក់បង្កកពីទ្រព្យរុស្ស៊ី និងបញ្ជូនទ័ពរក្សាសន្តិភាពអ៊ុយក្រែន

សង្រ្គាមពាណិជ្ជកម្មអាមេរិកខាងជើងផ្ទុះឡើង ជុំវិញវិធានការពន្ធរបស់ ត្រាំ