លោក ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមោងឬស្សីនៃខេត្តបាត់ដំបង តំណាងដ៏ខ្ពង់ខ្ពស់ លោក អង្គ វង្ស វឌ្ឍានា ប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកមោងឬស្សី បានដឹកនាំក្រុមការងាររាជរដ្ឋាភិបាល និងក្រុមការងារគណបក្សប្រជាជនកម្ពុជាចុះជួយស្រុកមោងឬស្សី លើកទឹកចិត្តបែបនេះ  ក្នុងពេលជួបសំណេះសំណាលជាមួយកីឡាករប្រណាំងទូកងសរុបចំនួន៦០នាក់មកពីទូកងចំនួន២មកពីស្រុកមោងឬស្សី នៃខេត្តបាត់ដំបង។

ក្នុងឱកាសនោះ លោក ជិន ម៉ាលីន បាននាំយកថវិកាសរុបចំនួន១៥លានរៀល មី៥០កេះ ត្រីខ២៥០កំប៉ុង ទឹកសុទ្ធ៦០យួ ទឹកភេសជ្ជៈប៉ូវកំលាំង៦០យួ ទឹកត្រី១២យួ ទឹកស៊ីអ៊ីវ៥យួ ព្រមទាំងគ្រឿងសម្ភារៈចាំបាច់មួយចំនួនទៀត ជូនដល់ក្រុមកីឡាករ និងកីឡាការិនី ដែលត្រៀមចូលរួមប្រកួត។

ក្នុងឱកាសនៃការប្រារព្ធពិធីបុណ្យអុំទូកនៅខេត្តបាត់ដំបង ដែលនឹងប្រព្រឹត្តទៅនៅថ្ងៃទី១៦និង១៧ ខែតុលា ឆ្នាំ២០២៤នេះ ស្រុកមោងឬស្សី បានទូកងចំនួន២ចូលរួមប្រកួត គឺទូកងកន្លង់រ័ត្នរំពាត់មាស និង ទូកងកន្លង់ថោងសំរោងពេជ្រ។  

លោក ជិន ម៉ាលីន បានកោតសរសើរចំពោះអាជ្ញាធរមូលដ្ឋាននៃស្រុកមោងឬស្សី យុវជនយុវនារីស្ម័គ្រចិត្តនិងជាពិសេសកីឡាករទូកងស្រុកមោងឬស្សី ដែលបានខិតខំប្រឹងប្រែងឱ្យមានកីឡាករទូកងនៃស្រុកមោងឬស្សីចំនួន៦០នាក់ដែលមានទូកងចំនួន២គ្រឿងចូលរួមក្នុងការប្រណាំងទូកងដើម្បីអបអរសាទរពីធីបុណ្យអុំទូកនៅខេត្តបាត់ដំបង៕

The post លោក ជិន ម៉ាលីន លើកទឹកចិត្តកីឡាករទូកងស្រុកមោងឬស្សីប្រឹងយកជ័យជម្នះថ្នាក់ខេត្តឱ្យបាន ដើម្បីបានទៅប្រកួតថ្នាក់ជាតិ appeared first on Kampuchea Thmey Daily.

លោក ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ បានប្រាប់«កម្ពុជាថ្មី» កាលពីម្សិលមិញនេះថា ក្នុងចំណោម មន្ត្រីសម្រុះសម្រួលដោះស្រាយវិវាទចំនួន ៨៦រូប មានមន្ត្រី​​​សម្រុះ​​​ស​ម្រួ​ល​ដោះស្រាយវិវាទពេញម៉ោងចំនួន ២៧រូប និងមន្ត្រីសម្រុះ​សម្រួល​ដោះ​ស្រាយ​វិវាទ​ស្ម័គ្រ​ចិត្តចំនួន ៥៩រូប។ បន្ទាប់ពីបានឆ្លងកាត់ដោយជោគជ័យនៃវគ្គបណ្តុះ​បណ្តាលដែលរៀបចំដោយ អ.ដ.ក. មន្ត្រីសម្រុះ​ស​ម្រួ​ល​​​​ដោះ​ស្រាយ​វិវាទទាំង ៨៦រូប ត្រូវបានផ្តល់​នីតិ​សម្ប​ទាដោយ អ.ដ.ក. នៅ​ថ្ងៃ​ទី១៥ ខែមិថុនា ឆ្នាំ២០២៤។ លើសពីនេះ អ.ដ.ក. ​បានរៀបចំកសាងលិខិតបទដ្ឋានគតិយុត្តចំនួន១០ ដែលជាមូលដ្ឋាន​​​គតិយុត្តដ៏សំខាន់ដើម្បីធា​នា​នូ​វ​កិច្ចដំណើរការស្ថាប័ន និងកិច្ច​ដំណើរការសម្រុះសម្រួលដោះស្រាយវិវាទក្នុង​​​ក្រប​ខ័​ណ្ឌ​​​នៃ អ.ដ.ក.ផងដែរ។

ទន្ទឹមនេះ អ.ដ.ក.​ បានរៀបចំរួចរាល់ និងបានចាប់ផ្តើមអនុវត្តព្រមៗគ្នានូវគម្រោងសំខាន់ចំនួន២ នាដើមខែសីហា គឺទី១. គម្រោងឆ្ពោះទៅកាន់មូលដ្ឋាន និងទី២. គម្រោង​ចុះដោះស្រាយវិវាទជូនប្រ​ជា​ពលរដ្ឋនៅតំបន់​ជនជា​តិ​ដើម​​ភាគ​តិច និងតំបន់ដាច់ស្រយាល។ ក្នុងក្របខ័ណ្ឌនៃការអនុវត្តគម្រោងទាំងពីរនេះ គិតត្រឹមខែកញ្ញា ឆ្នាំ២០២៤ នេះ អ.ដ.ក. បានធ្វើការចុះផ្សព្វផ្សា​យ​អំពីបេសកកម្មរបស់ អ.ដ.ក. និងបានធ្វើការបណ្តុះបណ្តាលជំនាញប​ច្ចេកទេសដោះស្រាយវិវាទជូនដល់​មន្ត្រី​មូលដ្ឋាន បានចំនួន ៤ខេត្ត ​​​រួម​មាន ​ខេ​ត្តបាត់ដំបង ខេត្តកណ្តាល ខេត្តបន្ទាយមានជ័យ និងខេត្តព្រៃវែង។ ព្រមទាំងបានចុះសិក្សាស្រាវជ្រាវអំពីអភិក្រ​ម​នៃ​​​កា​រ​ដោះស្រាយវិវាទរបស់ជនជាតិដើមភាគតិចនៅចំនួន ៣ខេត្តដែលរួមមាន ខេត្តរតនគីរី ខេត្តមណ្ឌលគិរី និងខេត្តស្ទឹងត្រែង ហើយ អ.ដ.ក.នឹងបន្ត​ចុះ​ទៅតាមបណ្តារាជធានី ខេត្តទូទាំងប្រទេសដើម្បី​បន្ត​អនុវ​ត្ត​គម្រោង​ទាំង​២ ខាងលើ។

បើតាមមន្ត្រីជាន់ខ្ពស់រូបនេះ ដើម្បីឱ្យការដោះស្រាយវិវាទជូនប្រជាពល​រដ្ឋ​ មានលក្ខណៈសម្បូរបែប និងកាន់តែទូលំទូលាយ និង​ងាយ​ស្រួល អ.ដ.ក. បានធ្វើកិច្ចសហប្រតិបតិ្តការជាមួយស្ថាប័នពាក់ព័ន្ធ ក្នុងនោះ អ.ដ.ក. បានចុះអនុស្សរណៈ​នៃ​ការ​យោគ​យល់​គ្នា(MOU) ជាមួយគណៈមេធាវី និងមជ្ឈមណ្ឌលជាតិនៃមជ្ឈតការផ្នែកពាណិជ្ជកម្ម។

តាមរយៈ​ MOU នេះ មេធាវី ឬមជ្ឈតករ អាចនាំយកវិវាទដែលខ្លួនបានសម្រុះសម្រួលបញ្ចប់ដោយជោគជ័យមក អ.ដ.ក. ដើម្បីស្នើសុំការទទួលស្គាល់ និង​រៀប​ចំ​ចេញជា​កំណត់​ហេតុព្រមព្រៀង​​បញ្ចប់វិវាទ ដើម្បីឱ្យលទ្ធផលនៃការព្រមព្រៀងបញ្ចប់វិវាទដែលរៀបចំដោយមេធាវី ឬ មជ្ឈ​តករ អាច​ទទួល​បាន​អានុភាពគតិយុត្តិ ដូចកំណត់ហេតុព្រមព្រៀងបញ្ចប់វិវាទដែលរៀបចំដោយ អ.ដ.ក. ផ្ទាល់។ បន្ថែមពីនេះ អ.ដ.ក. ក៏បានចាប់ផ្តើមធ្វើការជាមួយរដ្ឋបាលថ្នាក់ក្រោមជាតិលើការចុះ MOU នេះ ដើម្បីអាចឱ្យ អ.ដ.ក. អាចចុះដោះស្រាយវិវាទនៅមូលដ្ឋានផ្ទាល់ជូនប្រជាពលរដ្ឋ៕

អត្ថបទ៖ គេន ម៉ាលិះ

The post ក្នុងរយៈពេល ៨ខែ ឆ្នាំនេះ អ.ដ.ក. បានជ្រើសរើស និងបណ្តុះបណ្តាលមន្ត្រីសម្រុះសម្រួលដោះស្រាយវិវាទចំនួន ៨៦រូប appeared first on Kampuchea Thmey Daily.

អ្នកនាំពាក្យក្រសួងយុត្តិធម៌ ក៏បានថ្លែងអំណរគុណដល់អាជ្ញាធរមានសមត្ថកិច្ច ព្រមទាំងសាលាដំបូង និងអយ្យការអមសាលាដំបូងរាជធានី ខេត្ត ដែលបានចាត់វិធានការ ក្នុងការអនុវត្តច្បាប់យ៉ាងម៉ឺងម៉ាត់ ក្នុងសំណុំរឿងពាក់ព័ន្ធនឹងករណីគ្រឿងញៀន ប្រកបដោយការយកចិត្តទុកដាក់ និងស្មារតីទទួលខុសត្រូវខ្ពស់ ដើម្បីការការពារសន្តិសុខ និងសុវត្ថិភាពរបស់សង្គមជាតិ ព្រមទាំងភាពសុខសាន្តរបស់ប្រជាពលរដ្ឋ។

បន្ថែមពីនេះ ក្នុងនាមអ្នកនាំពាក្យក្រសួងយុត្តិធម៌ លោកក៏សូមអំពាវនាវដល់ប្រជាពលរដ្ឋទាំងអស់ ចាកឆ្ងាយពីគ្រឿងញៀន ក៏ដូចជាចៀសវាងនូវរាល់សកម្មភាពទាំងឡាយណាដែលបង្កអន្តរាយដល់គ្រួសារ និងសង្គមជាតិ និងចូលរួមអនុវត្ត “៣កុំ ១រាយការណ៍” ដែលមានន័យថា “កុំពាក់ព័ន្ធ កុំអន្តរាគមន៍ កុំលើកលែងក្នុងបទល្មើសនានា និងជួយរាយការណ៍ពីបទល្មើសគ្រឿងញៀន និងបទល្មើសផ្សេងៗទៀត” ដែលកើតមាននៅមូលដ្ឋានរបស់ខ្លួនជូនដល់សមត្ថកិច្ច៕

អត្ថបទ៖ សំណាង

The post លោក ជិន ម៉ាលីន៖ រយៈពេល១សប្ដាហ៍ សាលាដំបូង និងអយ្យការទទួលចាត់ការលើសំណុំរឿងពាក់ព័ន្ធគ្រឿងញៀន៩២ករណី appeared first on Kampuchea Thmey Daily.

ក្នុងពិធីជួបសំណេះសំណាលជាមួយអ្នកសារព័ត៌មាននាព្រឹកថ្ងៃទី៦ ខែសីហា ឆ្នាំ២០២៤ នាទីស្តីការក្រសួងយុត្តិធម៌ លោក ជិន ម៉ាលីន បានលើកឡើងថា ក្នុងចំណោមរឿងក្តីទាំងនេះ គឺក្នុងនោះ មានទាំងសំណុំរឿងដែលមានមុនពេលប្រកាស​បើកយុទ្ធនាការ ចំនួន ៥៧ ៦៨៩ និងសំណុំរឿងដែលចូលថ្មីរយៈពេល ៦ខែ ក្រោយពេលប្រកាសបើកយុទ្ធនាការ ចំនួន ៦៣ ៨៦៤។

លោកបានបញ្ជាក់ថា កន្លងមកនេះ គិតចាប់ពីថ្ងៃប្រកាសបើកយុទ្ធនាការកាលពីថ្ងៃទី៩ ខែមករា រហូតដល់ថ្ងៃទី៩ ខែកក្កដា ឆ្នាំ២០២៤ គឺមានរយៈពេល៦ខែគត់ ដែលក្រសួងយុត្តិធម៌បានប្រកាសដាក់ចេញនូវយុទ្ធនាការចំនួន២ព្រមពេលជាមួយគ្នា នៅក្នុងក្របខណ្ឌនៃការងារកែទម្រង់ប្រព័ន្ធយុត្តិធម៌កម្ពុជា សំដៅពង្រឹង និងលើកកម្ពស់សេវាយុត្តិធម៌ និងគុណភាព នៃយុត្តិធម៌ ដែលក្នុងនោះរួមមាន៖ ទី១យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងទី២ យុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ។

លោកបានលើកឡើងឱ្យដឹងថា សម្រាប់លទ្ធផលរយៈពេល ៦ខែ នៃយុទ្ធនាការជំរុញ និងពន្លឿនរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការនេះដែរ គេក៏ទទួលបានលទ្ធផលមួយចំនួនទៀតដូចជា គណៈបញ្ជាការដឹកនាំយុទ្ធនាការបានប្រកាសទទួលពាក្យបណ្ដឹងពីប្រជាពលរដ្ឋទាំងអស់ ដែលយល់ឃើញថា ចំណាត់ការរបស់តុលាការលើសំណុំរឿងរបស់ខ្លួនមានភាពមិនប្រក្រតី។ លោក ជិន ម៉ាលីន បានអះអាងដែរថា ”រយៈពេល ៦ខែ គិតចាប់តាំងពីពេលប្រកាសបើកយុទ្ធនាការ, ប្រជាពលរដ្ឋបានដាក់ពាក្យបណ្ដឹងមកកាន់លេខាធិការដ្ឋាននៃ គណៈបញ្ជាការដឹកនាំយុទ្ធនាការមានចំនួនសរុប ១ ៤៧៤ ក្នុងនោះពាក្យបណ្តឹងរបស់ប្រជាពលរដ្ឋស្នើសុំឱ្យជំរុញ និងពន្លឿនការដោះស្រាយរឿងក្តីនៅតាមតុលាការ ដែលមានចំនួនសរុប ៧៨៦ ស្មើនឹង ៥៣ភាគរយ។ ក្នុងចំណោមបណ្តឹងស្នើសុំជំរុញ និងពន្លឿនទាំង ៧៨៦ តុលាការបានដោះស្រាយរហូតដល់ទៅ ៦៣០ ករណី ស្មើនឹង ៨០ភាគរយ”។

បើតាមលោក ជិន ម៉ាលីន សម្រាប់ពាក្យបណ្ដឹងដែលប្រជាពលរដ្ឋ ប្តឹងស្នើសុំឱ្យមានការត្រួតពិនិត្យអំពីភាពមិនប្រក្រតីមានចំនួន ៦៩៨ បណ្ដឹង ស្មើនឹង ៤៧ភាគរយ។ គណៈកម្មការដឹកនាំ នឹងអនុវត្តយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការចាត់ការបាន ៣៦ភាគរយ នៃបណ្ដឹងដែលសង្ស័យថា មានភាពមិនប្រក្រតីទាំង ៦៩៨។ក្រៅពីនេះ ក្រុមការងារពិសេសត្រួតពិនិត្យ និងដោះស្រាយភាពមិនប្រក្រតី នៅតាមតុលាការ បានធ្វើការពិនិត្យលើសំណុំរឿងដែលមានភាពស្មុគស្មាញចំនួន ១០០ ករណី ហើយបានរកឃើញថា មាន ៧៣ ករណី ដែលតុលាការបានចេញសេចក្តីសម្រេចដោយមានសំអាងហេតុ និងសំអាងច្បាប់ត្រឹមត្រូវ, ១៤ ករណី មានភាពសង្ស័យថាអាចមានភាពមិនប្រក្រតី ហើយបានស្នើសុំឱ្យតុលាការពិនិត្យឱ្យបានម៉ត់ចត់ និងត្រឹមត្រូវ, ៩ ករណី បានចាត់ឱ្យមានការចុះធ្វើអធិការកិច្ច ហើយ ៤ ករណីទៀត ត្រូវបានរកឃើញថាមានភាពមិនប្រក្រតី ដែលភាគី អាចស្នើសុំឱ្យមានការជំនុំជម្រះសាជាថ្មី។

ឯកឧត្តមរដ្ឋលេខាធិការប្រចាំការក្រសួងយុត្តិធម៌បានលើកឡើងដោយបញ្ជាក់បន្ថែមថា ក្នុងក្របខណ្ឌនៃយុទ្ធនាការនេះដែរ លេខាធិការដ្ឋាននៃគណៈបញ្ជាការដឹកនាំយុទ្ធនាការ ក៏បានធ្វើការ សម្របសម្រួលផ្តល់មេធាវីស្ម័គ្រចិត្តដែលជាទីប្រឹក្សាក្រសួងយុត្តិធម៌ ចំនួន ៩២រូប ដើម្បីជួយការពារក្តី ដោយឥតគិតថ្លៃដល់ប្រជាពលរដ្ឋដែលបានដាក់ពាក្យស្នើសុំមកយុទ្ធនាការ៕

អត្ថបទ៖ សំណាង

The post លោក ជិន ម៉ាលីន៖ រយៈពេល៦ខែ តុលាការទូទាំងប្រទេសចាត់ការរឿងក្តីទាំងរឿងព្រហ្មទណ្ឌ និងរដ្ឋប្បវេណីសរុបជាង៧ម៉ឺន៨ពាន់ករណី appeared first on Kampuchea Thmey Daily.

ការបញ្ជាក់នេះ បន្ទាប់ពីគណបក្សភ្លើងទៀន កាលពីពេលថ្មីៗនេះ បានបង្ហាញអំពីបំណងរបស់ខ្លួន នៅក្នុងការជួប ជុំសមាជិក និងអ្នកគាំទ្ររបស់ខ្លួន នៅទីលានប្រជាធិបតេយ្យ ដែលអាចធ្វើឡើងនៅចុងសប្ដាហ៍នេះ ដើម្បីទាមទារចូលរួមការបោះឆ្នោតជ្រើសតាំង តំណាងរាស្រ្ត នីតិកាលទី ៧ ឆ្នាំ ២០​២៣។

កាលពីថ្ងៃទី ២៥ ខែឧសភា ឆ្នាំ ២០២៣ ក្រុមប្រឹក្សាធម្មនុញ បានសម្រេចបដិសេធបណ្ដឹ​ងតវ៉ារបស់គណបក្សភ្លើងទៀន ជុំវិញការមិនចុះបញ្ជីគណបក្សនយោបាយ និងបញ្ជីបេក្ខជនចូលរួមបោះឆ្នោតជ្រើសតាំង តំណាងរាស្ត្រ ពីសំណាក់គណៈកម្មាធិការជាតិរៀបចំការបោះឆ្នោត (គ.ជ.ប)។

ឆ្លើយតបនឹងសំណួរថា បើមិនមានការអនុញ្ញាតពីក្រសួង-ស្ថាប័ន និងអាជ្ញាធរពាក់ព័ន្ធ ចំពោះបំណងនៃការតវ៉ាទេនោះ តើអ្នកពាក់ព័ន្ធនឹងប្រឈមបញ្ហាផ្លូវច្បាប់ដែរឬទេ? លោក ជិន ម៉ាលីន រដ្ឋលេខាធិ​ការ និងជាអ្នកនាំពាក្យក្រសួងយុត្តិធម៌ មានប្រសាសន៍ប្រាប់កម្ពុជាថ្មី នៅថ្ងៃទី ១ ខែមិថុនានេះថា ការធ្វើសកម្មភាពតវ៉ាណាមួយ ដែលប្រឆាំងនឹងការសម្រេចរបស់ស្ថាប័នជាតិ ឬក៏ដាក់សម្ពាធទៅលើស្ថាប័នជាតិនោះ មិនមែនជាការអនុវត្តសិទ្ធិសេរីភាពនោះទេ តែជាការល្មើសទៅនឹងច្បាប់។

លោកមានប្រសាសន៍បែបនេះថា «ការជួបជុំតវ៉ាប្រឆាំងទៅនឹងការសម្រេចរបស់ស្ថាប័នជាតិ ឬក៏ដាក់សម្ពាធទៅលើស្ថាប័នជាតិ បង្កភាពចលាចលនៅក្នុងសង្គម អាហ្នឹងគឺជាអំពើល្មើសទៅនឹងច្បាប់ មិនមែនជាការអនុវត្តសិទ្ធិសេរីភាព នៃការជួបជុំតវ៉ានោះទេ»។

បើតាមអ្នកនាំពាក្យក្រសួងយុត្តិធម៌ អ្នកពាក់ព័ន្ធក្នុងសកម្មភាពតវ៉ាដែលមានដូចជា អ្នករៀបចំ, អ្នកដឹកនាំ, អ្នកចូលរួម និងអ្នកគាំទ្រជាដើម ត្រួវទទួលខុសត្រូវចំពោះមុខច្បាប់ នូវភាពសកម្មភាពល្មើសរបស់ខ្លួន។

ក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានបេតុងខ្សែកាប ឆ្លងកាត់ទន្លេសាប និងស្ពានអាកាសឫស្សីកែវ កាលពីព្រឹកថ្ងៃទី ៣១ ខែឧសភា សម្ដេចតេជោ ហ៊ុន សែន បានប្រាប់ទៅគណបក្សភ្លើងទៀថា មិនត្រូវដឹកនាំអ្នកគាំទ្ររបស់ខ្លួនធ្វើបាតុកម្ម ឬការតវ៉ាណាមួយ ពាក់ព័ន្ធនឹងការសម្រេចរបស់ គ.ជ.ប និងក្រុមប្រឹក្សាធម្មនុញ្ញ ចំពោះបដិសេធការចុះបញ្ជីគណបក្សនយោបាយ ដោយសារការខ្វះឯកសារនោះឲ្យសោះ។

សម្ដេចតេជោ ហ៊ុន សែន ថ្លែងបែបនេះថា «ហើយសូមកុំរញ៉េរញ៉ៃជាមួយនឹងបាតុកម្ម ឬស្អីៗ កុំរញ៉េរញ៉ៃ ខ្ញុំបានផ្ដល់សារ សារខ្ញុំនៅតែមានតម្លៃ សូមបញ្ជាក់ ខ្ញុំបានផ្ដល់សារ សាររបស់ខ្ញុំនៅតែមានតម្លៃ ខ្ញុំមិនចាំបាច់ចេញសារទីពីរទេ សារទីមួយនៅតែមានតម្លៃ»។

ជាមួយគ្នានេះ សម្ដេចតេជោ ហ៊ុន សែន បានណែនាំទៅអាជ្ញាធរមានសមត្ថកិច្ចថា ត្រូវចាប់យកទាំងអស់នូវអ្នកណាក៏ដោយ ដែលចេញមកបំផ្លាញនូវស្ថេរភាព ទាំងថ្នាក់ជាតិ និងថ្នាក់ក្រោមជាតិ មិនឲ្យរួចខ្លួនឡើយ៕

អត្ថបទ៖ ឃួន សុភ័ក្រ

The post លោក ជិន ម៉ាលីន ៖ ការធ្វើសកម្មភាពតវ៉ាណាមួយ ដែលប្រឆាំងនឹងការសម្រេចរបស់ស្ថាប័នជាតិ គឺជាអំពើល្មើសច្បាប់ appeared first on Kampuchea Thmey Daily.

លោក ជិន ម៉ាលីន រដ្ឋលេខាធិការក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ២៣ ខែមីនានេះថា ជាទូទៅប្រជាពលរដ្ឋ មានសិទ្ធិសេរីភាពក្នុងការសម្ដែងមតិ ហើយសិទ្ធិនេះត្រូវបានការពារដោយច្បាប់ និងរដ្ឋធម្មនុញ្ញរបស់កម្ពុជា។ ប៉ុន្តែ នៅក្នុងច្បាប់ដដែល ក៏បានបញ្ញត្តិដែរថា ការសម្ដែងមតិ ដែលជាសិទ្ធិសេរីភាពនោះ ត្រូវស្ថិតនៅក្រោមក្របខណ្ឌច្បាប់។

លោកថា «ការសម្ដែងមតិមួយចំនួន ​ដែលមិនស្ថិតនៅក្នុង ឬក្រោមក្របខណ្ឌច្បាប់ ឬក៏ការបំពានច្បាប់ ឬក៏ការបំពាននូវសិទ្ធិសេរីភាពរបស់អ្នកដទៃ សេចក្ដីថ្លៃថ្នូរ កេរ្ដិ៍ឈ្មោះ កិត្តិយសរបស់អ្នកដទៃ អាហ្នឹងមិនមែនជាការអនុវត្តសិទ្ធិទេ ហើយច្បាប់អត់ការពារទេ អាហ្នឹង គឺច្បាប់បញ្ញត្តិថា ជាអំពើល្មើស ហើយដែលអ្នកប្រព្រឹត្តហ្នឹង ត្រូវប្រឈមមុខតាមផ្លូវច្បាប់»។

មន្ត្រីជាន់ខ្ពស់ក្រសួងយុត្តិធម៌ បានឲ្យដឹងបន្តថា ការសម្ដែងមតិមួយចំនួនដែលមិនមែនជាសិទ្ធិ ហើយច្បាប់បញ្ញត្តិថា ជាអំពើល្មើសមានដូចជា៖ ការសម្ដែងមតិដែលជាការប្រមាថដល់អង្គព្រះមហាក្សត្រ, ប៉ះពាល់ដល់សិទ្ធិសេរីភាព សេចក្ដីថ្លៃថ្នូរ និងជីវិតឯកជនរបស់អ្នកដទៃ, ការសម្ដែងមតិដែលមានចរិតញុះញង់បង្កឲ្យមានការស្អប់ខ្ពើមជាតិសាសន៍, ការញុះញង់ឲ្យមានការបែកបាក់ និងអំពើហិង្សាក្នុងសង្គម ជាដើម។

ត្រង់ចំណុចនេះ លោក ជិន ម៉ាលីន បញ្ជាក់បែបនេះថា «ការបញ្ចេញមតិបែបនេះ មិនមែនជាការអនុវត្តសិទ្ធិទេ ហើយច្បាប់ក៏អត់ការពារដែរ តែផ្ទុយទៅវិញច្បាប់បញ្ញត្តិ ថា ជាអំពើល្មើស អញ្ចឹងអ្នកដែលសម្ដែងមតិបែបនេះ ដែលច្បាប់បញ្ញត្តិ ថា ជាអំពើល្មើសនេះ គឺថា ត្រូវប្រឈមមុខតាមផ្លូវច្បាប់ ទទួលខុសត្រូវតាមផ្លូវច្បាប់ដែលមានជាធរមាន»។

សូមជម្រាបថា ចៅក្រមស៊ើបសួរ នៃសាលាដំបូងរាជធានីភ្នំពេញ កាលពីល្ងាចថ្ងៃទី ២២ ខែមីនា ឆ្នាំ ២០២៣ បានសម្រេចឃុំខ្លួន លោក យឹម ស៊ីណន និងលោក ហ៊ុន កុសល ដែលជាសកម្មជនអតីតគណបក្សប្រឆាំង ជាបណ្តោះអាសន្ន ក្រោមការចោទប្រកាន់ចំនួន ២ បទល្មើស។

បុគ្គលទាំង ២នាក់នេះ ត្រូវបានដាក់ឲ្យស្ថិតនៅក្រោមការពិនិត្យពីបទ៖ ប្រមាថចំពោះអង្គព្រះមហាក្សត្រ និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តកាលពីថ្ងៃទី ២១ ខែមីនា ឆ្នាំ ២០២៣ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមមាត្រា ៤៣៧(ស្ទួន) នៃច្បាប់ ស្តីពីវិសោធនកម្មក្រមព្រហ្មទណ្ឌ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។  

កាលពីថ្ងៃទី ២១ ខែមីនា ឆ្នាំ ២០២៣ លោក យឹម ស៊ីណន បានបង្ហោះនៅលើហ្វេសប៊ុករបស់លោកថា  «បើតាមសំលេងពលរដ្ឋតាមហាងកាហ្វេ៖ ថ្ងៃនេះយើងអាច ឃើញច្បាស់ថានរណាជាស្តេច ផែនដីពិតប្រាកដ»។ ចំណែកលោក ហ៊ុន កុសល បង្ហោះសារនៅលើហ្វេសប៊ុករបស់លោកដែរថា«ឃើញពួកគេធ្វើបាបព្រះទ័យ នឹងបន្ទាបព្រះចេស្តាព្រះមហាក្សត្រខ្មែរគ្រប់ ច្រកបែបនេះ។ ទូលបង្គំជាអ្នកនយោ​បាយ​ជំនាន់ក្រោយប្តេជ្ញានឹងប្រើសមត្ថភាព ដែលមានទាំងប៉ុន្មានចូលរួមពូនផ្តុំជាមួយលោកប្រធាន កឹម សុខា ការពារព្រះចេស្ដាក្សត្រ និងព្រះរាជបល្ល័ង្កដែលប្រជារាស្ត្រខ្មែរមិនអាចខ្វះបាន»៕

The post មន្ត្រីជាន់ខ្ពស់ក្រសួងយុត្តិធម៌ បញ្ជាក់អំពីការសម្ដែងមតិដែលមិនមែនជាសិទ្ធិ ហើយច្បាប់បញ្ញត្តិថា ជាអំពើល្មើស appeared first on Kampuchea Thmey Daily.

លោក​ ជិន ម៉ាលីន រដ្ឋលេខាធិការក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជា បានឲ្យដឹងថា ជាទូទៅសមាគមគ្រូបងៀនកម្ពុជាឯករាជ្យ មានសិទ្ធិក្នុងការរៀបចំការជួបជុំ និងហែរក្បួនដោយសន្តិវិធីហើយ តែច្បាប់ក៏តម្រូវឲ្យមានការជូនដំណឹង និងសហការជាមួយអាជ្ញាធរមានសមត្ថកិច្ច ដើម្បីថែរក្សាសន្តិសុខ និងសណ្ដាប់ធ្នាប់សង្គម។

លោក​ ជិន ម៉ាលីន លើកឡើងប្រាប់កម្ពុជាថ្មី នៅថ្ងៃទី ២៤ ខែមករានេះថា ការជួបជុំ ឬហែរក្បួរបស់ស​មា​គមគ្រូបងៀនកម្ពុជាឯករាជ្យ ពេលខ្លះក៏មានការបង្កប់នូវចេតនាទុច្ចរិតនៅពីក្រោយ ដែលអាចឈានទៅដល់ការញុះញ៉ង់​។ ដូច្នេះ ត្រូវតែមានជូនដំណឹង និងសហការជាមួយអាជ្ញាធរមានសមត្ថកិច្ច ដើម្បីមានវិធានការទប់ស្កាត់។

លោកថា «ពីព្រោះការជួបជុំ ការហែរក្បួនរបស់គាត់ហ្នឹង ពេលខ្លះក៏មានការបង្កប់នូវចេតនាទុច្ចរិតពីក្រោយហ្នឹងដែរ ដែលអាចឈានទៅដល់ការញុះញង់ ឲ្យមានការស្អប់ខ្ពើម ការញុះញង់ ឲ្យមានភាពចលាចល ឬមួយអំពើហិង្សាក្នុងសង្គម ឬក៏ការបំភ្លើស និងបំភ្លៃព័ត៌មានមួយចំនួនហ្នឹង ដែលអាចនាំឲ្យមានបាតុភាពក្នុងសង្គម ដែលសមត្ថកិច្ចត្រូវមានវិធានការក្នុងការទប់ស្កាត់»។

សេចក្ដីប្រកាសព័ត៌មាន របស់សមាគមគ្រូបងៀនកម្ពុជាឯករាជ្យ កាលពីថ្ងៃទី ២០ ខែមករា ឆ្នាំ ២០២៣ បានឲ្យដឹងថា សមាគមរបស់ខ្លួន នឹងធ្វើការហែធម្មយាត្រាស្តីពី «សីលធម៌សង្គម» ដឹកនាំដោយលោក រ៉ុង ឈុន ប្រធានសហភាពសហជីពកម្ពុជា ដែលប្រព្រឹត្តិទៅនៅថ្ងៃទី ១ ខែកុម្ភៈ ឆ្នាំ ២០២៣ ដោយជួបជុំគ្នានៅកន្លែងរូបសំណាកលោកយាយពេញ នៅរាជធានីភ្នំពេញ បន្ទាប់មកនឹងដង្ហែធម្មយាត្រាចេញឆ្ពោះទៅបូជនីយដ្ឋានប្រវត្តិសាស្ត្រលោកឧកញ្ញ៉ា ឃ្លាំង មឿង ខេត្តពោធិ៍សាត់ ហើយមានរៀបចំពិធីសាសនារួចបញ្ចប់កម្មវិធី។

សេចក្ដីប្រកាសព័ត៌មាន បានឲ្យដឹងទៀតថា ការដង្ហែក្បួនធម្មយាត្រានេះ នឹងត្រូវធ្វើឡើងតាមផ្លូវជាតិលេខ ៥ ដោយឆ្លងកាត់រាជធានីភ្នំពេញ ខេត្តកណ្តាល ខេត្តកំពង់ ស្ពឺ ខេត្តកំពង់ឆ្នាំង និងខេត្តពោធិ៍សាត់។ សេចក្ដីប្រកាសព័ត៌មាន របស់សមាគមគ្រូបងៀនកម្ពុជាឯករាជ្យ បានបញ្ជាក់ថា ការហែធម្មយាត្រានេះ ក្នុងគោលបំណង លើកកម្ពស់សីលធម៌សង្គម៕

The post លោក​ ជិន ម៉ាលីន ឲ្យសមាគមគ្រូបងៀនជូនដំណឹង និងសហការជាមួយអាជ្ញាធរ បើចង់ជួបជុំណាមួយនោះ appeared first on Kampuchea Thmey Daily.

ការអះអាងនេះ បន្ទាប់ពីគណបក្សភ្លើងទៀន និងអ្នកនយោបាយ នៃគណបក្សប្រឆាំងមួយចំនួន​ទៀត បាននិយាយថា ​ការឃាត់ខ្លួន និងឃុំខ្លួនលោក ថាច់ សេដ្ឋា អនុប្រធានគណបក្សភ្លើងទៀន ពាក់ព័ន្ធនឹងការចេញសែកគ្មានសាច់ប្រាក់នោះថា ជារឿងនយោបាយ និងជារូបភាពគំរាមកំហែង។

លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ មានប្រសាសន៍ដោយទៅលើសេចក្ដីប្រកាសព័ត៌មានរបស់អ្នកនាំពាក្យ នៃអយ្យការអមសាលាដំបូងរាជធានីភ្នំពេញថា ការឃាត់ខ្លួន និងឃុំខ្លួនលោក ថាច់​ សេដ្ឋា អនុប្រធានគណបក្សភ្លើងទៀន គឺជាការអនុវត្តច្បាប់សុទ្ធសាធ ដោយមិនពាក់ព័ន្ធនឹងរឿងនយោបាយឡើយ ទោះបីជាជនត្រូវចោទជាអ្នកនយោបាយ ក៏ដោយ។

លោក ជិន ម៉ាលីន មានប្រសាសន៍ប្រាប់កម្ពុជាថ្មី នៅថ្ងៃទី ១៨ ខែមករានេះថា ការឃាត់ខ្លួន និងឃុំខ្លួនលោក ថាច់​ សេដ្ឋា គឺបន្ទាប់មានបណ្ដឹងពីជនរងគ្រោះ ពាក់ព័ន្ធនឹងការចេញសែកគ្មានសាច់ប្រាក់។ «ដំណើរការនីតិវិធីរបស់តុលាការ គឺតាំងពីឆ្នាំ ២០១៩មកម្លេះ ហើយក្នុងនោះ ការចេញដីកាឲ្យចូលខ្លួនចំនួន ២ដង ហើយគាត់មិនព្រមចូលខ្លួនតាមការកោះរបស់តុលាការ ចឹងហើយទើបមានការចេញដីកានាំខ្លួននៅលើកទី ៣នេះ ហើយក្រោយពីការសួរនាំ ពិនិត្យមើលទៅលើអង្គហេតុនៃសំណុំរឿងនេះទៅ បានឈានដល់ការសម្រេចឃុំខ្លួនបណ្ដោះអាសន្ន»។ នេះជាការឲ្យដឹងបន្ថែបពីអ្នកនាំពាក្យក្រសួងយុត្តិធម៌។

លោករដ្ឋលេខាធិការ ជិន ម៉ាលីន បានបញ្ជាក់ថា វិធានការទៅលើអនុប្រធានគណបក្សភ្លើងទៀនមួយរូប គឺលោក ថាច់ សេដ្ឋា គឺជាការអនុវត្តច្បាប់សុទ្ធសាធ។ ដូច្នេះ ដើម្បីការពារខ្លួនបាន គឺមានតែការចូលរួមក្នុងដំណើរការនីតិវិធីរបស់តុលាការទេ ដោយអាចរកមេធាវី ភស្ដុតាង សក្ខីកម្ម និងមូលដ្ឋានច្បាប់ឲ្យបានរឹង ដើម្បីដោះបន្ទុកតាមផ្លូវច្បាប់។

ប៉ុន្តែប្រសិនបើគ្រាន់តែយកលេសថា ជារឿងនយោបាយ ឬជាការគំរាមកំហែងនោះ គឺជាការលើកឡើងដោយគ្មានមូលដ្ឋានតាមផ្លូវច្បាប់ ក្នុងការការពារខ្លួននោះទេ។ នេះជាការគូសបញ្ជាក់បន្ថែមពីលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ដដែល។

គួររំលឹកថា អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានចេញសេចក្ដីប្រកាសព័ត៌មាន ឲ្យដឹងថា នៅថ្ងៃទី ១៦ ខែមករា ឆ្នាំ ២០២៣ កងកម្លាំងនគរបាល នៃស្នងការដ្ឋាននគរបាលរាជធានីភ្នំពេញ បានធ្វើការឃាត់ខ្លួនឈ្មោះ ថាច់ សេដ្ឋា ភេទប្រុស ដោយអនុវត្តទៅតាមដីកាបង្គាប់ឲ្យនាំខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ លេខ ៣៨ “ឈ១” ព្រ.ទ ចុះថ្ងៃទី ១៦ ខែមករា ឆ្នាំ ២០២៣ ។

បើតាមអ្នកនាំពាក្យ នៃអយ្យការអមសាលាដំបូងរាជធានីភ្នំពេញ កាលពីថ្ងៃទី ២៦ ខែវិច្ឆិកា ឆ្នាំ ២០១៩ តំណាងអយ្យការ បានទទួលពាក្យបណ្តឹងពីក្រុមហ៊ុន រិន ឆាយ ផនសប បានប្តឹងពីឈ្មោះ ថាច់ សេដ្ឋា ភេទប្រុស ពីបទ៖ មិនបំពេញកាតព្វកិច្ចចំពោះឧបករណ៍អាចជួញដូរបាន (ការចេញសែកដោយគ្មានសាច់ប្រាក់ចំនួន ០៥សន្លឹក)។

បន្ទាប់ពីបានធ្វើការស៊ើបអង្កេត ស្តាប់ចម្លើយរបស់ភាគីពាក់ព័ន្ធ ព្រមទាំងពិនិត្យលើភស្តុតាងនានា តាមនីតិវិធីរួចមក អយ្យការអមសាលាដំបូងរាជធានីភ្នំពេញ បានសម្រេចបើកការស៊ើបសួរលើឈ្មោះ ថាច់ សេដ្ឋា ភេទប្រុស ពីបទ៖ មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីកំឡុងឆ្នាំ ២០១៩។

បទល្មើសនេះ មានចែងឲ្យផ្តន្ទាទោសតាមបញ្ញត្តិមាត្រា ២៣១ នៃច្បាប់ ស្តីពី ឧបករណ៍ដែលអាចជួញដូរបាន និងប្រតិបត្តិការទូរទាត់សងប្រាក់ តាមដីកាសន្និដ្ឋានបញ្ជូនរឿង ឲ្យស៊ើបសួរលេខ ២០២៣ អយញ ចុះថ្ងៃទី ២២ ខែមេសា ឆ្នាំ ២០២១។

សេចក្ដីប្រកាសព័ត៌មានរបស់អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានបញ្ជាក់ថា ក្នុងដំណាក់កាលស៊ើបសួរ ជនត្រូវចោទឈ្មោះ ថាច់ សេដ្ឋា ខកខានមិនបានចូលខ្លួនបំភ្លឺ តាមដីកាបង្គាប់ឲ្យចូលខ្លួនចំនួន ២លើក របស់ចៅក្រមស៊ើបសួរដែលមានលេខ ៦៤ “ម” ព្រ.ទ ចុះ ថ្ងៃទី ២៨ ខែកុម្ភៈ ឆ្នាំ ២០២១ និងដីកាបង្គាប់ឲ្យចូលខ្លួនលេខ ១៩ “ឈ១“ព្រ.ទ ចុះថ្ងៃទី ២២ ខែមិថុនា ឆ្នាំ ២០២១ ដោយពុំមានមូលហេតុ។

រហូតមកដល់ថ្ងៃទី ១៦ ខែមករា ឆ្នាំ ២០២៣ ចៅក្រមស៊ើបសួរ បានសម្រេចចេញដីកាបង្គាប់ឲ្យនាំខ្លួនលើជនត្រូវចោទ ថាច់ សេដ្ឋា ដើម្បីស្តាប់ចម្លើយតាមនីតិវិធី។ ក្រោយពីបានស្តាប់ចម្លើយ និងពិនិត្យលើភស្តុតាងនានា ចៅក្រមស៊ើបសួរបានសម្រេចឃុំខ្លួនជនត្រូវចោទ ថាច់ សេដ្ឋា តាមដីកាបង្គាប់ឲ្យឃុំខ្លួនលេខ ៤១២ “ឈ១” ដ.ឃ.ដ ចុះថ្ងៃទី ១៦ ខែមករា ឆ្នាំ ២០២៣៕

The post លោក ជិន ម៉ាលីន ៖ វិធានការលើលោក ថាច់ សេដ្ឋា ជាការអនុវត្តច្បាប់សុទ្ធសាធ ទោះលោកជាអ្នកនយោបាយក៏ដោយ appeared first on Kampuchea Thmey Daily.