លោក ជី សិលា Archives - Kampuchea Thmey Daily

រោងភាពយន្ត Major Cineplex បានប្តូរឈ្មោះទៅជា Sabay Cinema ក្រោមកម្មសិទ្ធិរបស់កូនខ្មែរទាំងស្រុង

អុន ស្រីមាន — Thu, 05 Mar 2026 10:17:48 +0000

នៅរសៀលថ្ងៃទី ០៥ ខែមីនា ឆ្នាំ២០២៥ រោងភាពយន្ត Major Cineplex ត្រូវបានប្តូរឈ្មោះទៅជា Sabay Cinema ក្រោមកម្មសិទ្ធិរបស់កូនខ្មែរទាំងស្រុង ទាំងការរៀបចំបច្ចេកទេស និងការគ្រប់គ្រង។

ក្នុងសន្និសីទសារព័ត៌មាន និងពិធីសម្ពោធជាផ្លូវការនៃរោងភាពយន្ត Sabay នៅថ្ងៃទី០៥ ខែមីនា នេះ លោក ជី សិលា ស្ថាបនិក នាយកប្រតិបត្តិក្រុមហ៊ុន Sabay បានលើកឡើង ថា បន្ទាប់ពី Major Cineplex Thailand ចង់ដកខ្លួនពីប្រទេសកម្ពុជា ក្រុមហ៊ុន Sabay បានចរចាទិញយកភាគហ៊ុនទាំងអស់របស់ Major Cineplex ព្រមទាំងប្តូរឈ្មោះទៅជា Sabay Cinema វិញដែលដឹកនាំ និងគ្រប់គ្រងដោយកូនខ្មែរទាំងស្រុងដើម្បីបម្រើដល់ប្រជាជនខ្មែរក្នុងវិស័យឧស្សាហកម្មភាពយន្ត។

លោកបាននិយាយថា៖ “ក្នុងនាមក្រុមហ៊ុន Sabay Digital Group ថ្ងៃនេះគឺជាទំព័រប្រវត្តិសាស្ត្រថ្មីមួយសម្រាប់យើងទាំងអស់គ្នា។ ការប្រកាសដាក់ឱ្យដំណើរការ Sabay Cinema និង Sabay Rhythm & Bowl មិនមែនត្រឹមតែជាការផ្លាស់ប្តូរឈ្មោះនោះទេ ប៉ុន្តែវាគឺជាការប្រកាសពី «មោទនភាព និងកម្មសិទ្ធិរបស់ខ្មែរទាំងស្រុង» នៅក្នុងវិស័យកម្សាន្តកម្រិតពិភពលោក”។

ចំពោះការផ្លាស់ប្តូរនេះ លោក ជី សិលា បានបញ្ជាក់ពីការប្តេជ្ញានឹងពង្រឹងឧស្សាហកម្មភាពយន្តឱ្យកាន់តែរឹងមាំ និងពង្រីកវិស័យផលិតមាតិកានៅកម្ពុជាឱ្យមានភាពរីកចម្រើន។ តាមរយៈការវិនិយោគរយៈពេលវែង Sabay នឹងផ្តល់ឱកាសមាសដល់អ្នកមានសមត្ថភាព និងទេពកោសល្យថ្មីៗ ឱ្យបានចូលរួមយ៉ាងសកម្មក្នុងវិស័យភាពយន្ត និងការច្នៃប្រឌិត ។ ជាមួយគ្នានេះ លោកថា អតិថិជននឹងនៅតែទទួលបានសេវាកម្ម និងបច្ចេកវិទ្យាទំនើបៗចុងក្រោយបង្អស់ ដូចជា IMAX Laser និង ScreenX ដែលមានទំហំធំជាងគេ។ អ្វីដែលកាន់តែពិសេសនោះ គឺការកែលម្អបរិយាកាសឱ្យកាន់តែមានភាពស្និទ្ធស្នាល រស់រវើក និងមានស្តង់ដារខ្ពស់ជាងមុន។ លោកសង្កត់ធ្ងន់ថា៖ “យើងប្តេជ្ញាបន្តនាំយកបច្ចេកវិទ្យា និងបទពិសោធន៍ល្អៗបំផុតមកបម្រើជូនទស្សនិកជនជាបន្តបន្ទាប់”។

ក្រៅពីរោងភាពយន្ត លោក ជី សិលា ក៏គ្រោងបន្ថែមនូវហាងកាហ្វេ និងកន្លែងធ្វើការរួមគ្នា (Co-working space) ដើម្បីក្លាយជាមជ្ឈមណ្ឌលជួបជុំបែបយុវវ័យសម័យថ្មី មានទីធ្លាធំទូលាយក្នុងការជួបជុំគ្នាថែមទៀតផង។ អ្វីដែលកាន់តែពិសេសនោះ លោកបានឱ្យដឹងដែរថា ចំពោះតម្លៃសំបុត្រគឺមិនមានការឡើងថ្លៃឡើយ ហើយថែមទាំងអាចនឹងចុះតម្លៃទាបជាងមុនថែមទៀតផង។

“នេះគ្រាន់តែជាការចាប់ផ្តើមនៃដំណើរថ្មីតែប៉ុណ្ណោះ។ យើងមានមោទនភាពដែលបានបោះជំហានទៅមុខរួមគ្នាជាមួយលោកអ្នក ដើម្បីលើកកម្ពស់វិស័យកម្សាន្តជាតិឱ្យកាន់តែរុងរឿង” ។ នេះ បើតាមលោក ជី សិលា៕

The post រោងភាពយន្ត Major Cineplex បានប្តូរឈ្មោះទៅជា Sabay Cinema ក្រោមកម្មសិទ្ធិរបស់កូនខ្មែរទាំងស្រុង appeared first on Kampuchea Thmey Daily.

ពីរទៅបីឆ្នាំទៀត កម្ពុជានឹងមានក្រុមហ៊ុនផលិតទឹកដោះគោថែមទៀត បង្កើនបរិមាណផ្គត់ផ្គង់តម្រូវការក្នុងស្រុក

Dy Bunnara — Tue, 16 Dec 2025 03:10:47 +0000

នៅពីរទៅបីឆ្នាំទៀត កម្ពុជានឹងមានក្រុមហ៊ុនផលិតទឹកដោះគោមួយចំនួនថែមទៀត ដែលមានលទ្ធភាពបង្កើនបរិមាណផ្គត់ផ្គង់ទឹកដោះគោស្រស់បំពេញតម្រូវការក្នុងស្រុកបន្ថែម។

ឧកញ៉ា តែ តាំងប៉ ប្រធានក្រុមប្រឹក្សាភិបាលសម័្ពន្ធសមាគមសហគ្រាសធុនតូច និងមធ្យមកម្ពុជា (FASMEC) បានថ្លែងថា ដោយសារតម្រូវការទឹកដោះគោស្រស់កើនឡើង នៅប្រមាណពីរទៅបីឆ្នាំទៀតនេះនឹងមានក្រុមហ៊ុនបីទៅបួនទៀតនឹងបង្កើតខ្សែសង្វាក់ផលិតកម្មក្នុងប្រទេសកម្ពុជា ដែលអាចបង្កើនការផលិតទឹកដោះស្រស់ផ្គត់ផ្គង់ទីផ្សារក្នុងស្រុក។

«ឆ្នាំក្រោយនឹងមានក្រុមហ៊ុនចិញ្ចឹមគោបីទៅបួនក្រុមហ៊ុនទៀត ហើយដែលត្រូវការដីរាប់ម៉ឺនហិកតាដើម្បីចិញ្ចឹមគោយកទឹកដោះ»។ ឧកញ៉ា តែ តាំងប៉ បញ្ជាក់។

បើតាមឧកញ៉ា តែ តាំងប៉ ទឹកដោះគោស្រស់ជាទំនិញយុទ្ធសាស្ត្រដ៏ចាំបាច់មួយ ខណៈបច្ចុប្បន្នសមត្ថភាពផលិតក្នុងស្រុកស្ថិតនៅក្នុងកម្រិតមួយមិនទាន់អាចបំពេញតម្រូវការគ្រប់គ្រាន់នោះទេ។

ក្នុងដំណើរការទស្សនកិច្ចរបស់លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) នៅប្រទេសម៉ាឡេស៊ី កាលពីអំឡុងខែតុលា ឆ្នាំ ២០២៥ ក្រុមហ៊ុនមកពីកម្ពុជាបានចុះអនុស្សរណៈនៃការយោគយល់គ្នា (MoU) ជាមួយក្រុមហ៊ុនម៉ាឡេស៊ី ក្នុងការដាក់ទុនវិនិយោគបង្កើតកសិដ្ឋានចិញ្ចឹមគោយកទឹកដោះ និងបង្កើតរោងចក្រផលិតទឹកដោះគោឆៅកំប៉ុងនៅកម្ពុជា។

ក្រុមហ៊ុនទឹកដោះគោស្រស់ម៉ាឡេស៊ី Farm Fresh Berhad បានចាប់ដៃជាមួយក្រុមហ៊ុនមកពីប្រទេសកម្ពុជា Alpha group ខណៈដែល Farm Fresh Group គឺជាក្រុមហ៊ុនធំជាងគេនៅប្រទេសម៉ាឡេស៊ីដែលមានកសិដ្ឋាន ចិញ្ចឹមគោយកទឹកដោះដោយមានគោប្រមាណ ១ ម៉ឺន ៤ ពាន់ក្បាល។

លោក លី ឃុនថៃ ប្រធានក្រុមប្រឹក្សាភិបាល Alpha group បានចាត់ទុកការចាប់ដៃវិនិយោគជាមួយក្រុមហ៊ុនរបស់ម៉ាឡេស៊ីគឺជាការពង្រីកការផលិតទឹកដោះគោស្រស់ និងទឹកដោះគោឆៅ ដើម្បីបំពេញតម្រូវការទឹកដោះគោស្រស់ និងទឹកដោះគោឆៅដែលកំពុងមានកំណើនខ្ពស់។

តម្រូវការទឹកដោះគោស្រស់ក្នុងស្រុកបានបង្កើនចំណែកទីផ្សារផ្គត់ផ្គង់កើនឡើងពី ៥ ដល់ ២៥% ក្រោយការធ្វើពហិការការប្រើប្រាស់ទំនិញថៃក្នុងចំណោមពលរដ្ឋកម្ពុជា។

បច្ចុប្បន្នកម្ពុជាមានតម្រូវការទឹកដោះគោស្រស់ប្រមាណ ១០ ម៉ឺនលីត្រ ក្នុងមួយថ្ងៃ ខណៈកសិដ្ឋានចិញ្ចឹមគោយកទឹកដោះធំៗទាំង ៤ របស់កម្ពុជា មានសមត្ថភាពផលិតបានប្រមាណ ២ ម៉ឺនលីត្រ ក្នុងមួយថ្ងៃ។ នេះបើតាមលោក ជី សិលា សហស្ថាបនិកកសិដ្ឋានគិរីសួគ៌ប្រាប់កម្ពុជាថ្មីកន្លងទៅ។

កសិដ្ឋានគិរីសួគ៌មានគោអាចផលិតទឹកដោះបានប្រមាណ ៥០០-៦០០ ក្បាលក្នុងចំណោមគោក្នុងកសិដ្ឋានជាង ១ ពាន់ក្បាល ជាមួយលទ្ធភាពផលិតទឹកដោះគោស្រស់បានប្រមាណជាង ១ ម៉ឺន ៤ ពាន់លីត្រ សម្រាប់បញ្ចេញលក់នៅលើទីផ្សារ។

លោក ជី សិលា បានបញ្ជាក់ថា កសិដ្ឋានគ្រោងនាំចូលគោបន្ថែម ស្របតម្រូវការចេះតែកើនឡើងដើម្បីបង្កើនការផលិតឲ្យបានដល់ទៅ ៣ ម៉ឺនលីត្រ ឬ ៤ ម៉ឺនលីត្រក្នុងរយៈពេល ១ ឆ្នាំទៅមុខទៀត។

បច្ចុប្បន្នកសិដ្ឋានក្នុងស្រុកចំនួន ៤ កំពុងផលិតផ្គត់ផ្កង់ទឹកដោះគោស្រស់លក់លើទីផ្សារ ក្នុងនោះមានកសិដ្ឋានគិរីសួគ៌នៅភ្នំតាម៉ៅ ស្រុកបាទី ខេត្តតាកែវ ដែលមានសមត្ថភាពផលិតទឹកដោះគោស្រស់បានចន្លោះពី ១២ ០០០-១៥ ០០០ លីត្រក្នុងមួយថ្ងៃ។

កសិដ្ឋាន មូមូ ហ្វាម ស្ថិតនៅក្រុងអរិយក្សត្រ ខេត្តកណ្ដាល មានលទ្ធភាពផលិតទឹកដោះគោស្រស់បានជិត ១ ពាន់លីត្រ ក្នុងមួយថ្ងៃ។

កសិដ្ឋានតេជោសែនឫស្សីត្រឹបស្ថិតនៅឃុំឆែប ២ ស្រុកឆែប ខេត្តព្រះវិហារ មានសមត្ថភាពផលិតទឹកដោះគោះស្រស់បានចន្លោះពី ១០០ លីត្រ ទៅ ២០០ លីត្រ ក្នុងមួយថ្ងៃ និងកសិដ្ឋាន អូម៉ ស្ថិតនៅសង្កាត់ព្រែកលៀប ខណ្ឌជ្រោយចង្វារ ដែលកសិដ្ឋានមានគោជាង ៨០ ក្បាល ចិញ្ចឹមផ្គត់ផ្គង់ទឹកដោះគោស្រស់ចេញពីគោធម្មជាតិ៕

The post ពីរទៅបីឆ្នាំទៀត កម្ពុជានឹងមានក្រុមហ៊ុនផលិតទឹកដោះគោថែមទៀត បង្កើនបរិមាណផ្គត់ផ្គង់តម្រូវការក្នុងស្រុក appeared first on Kampuchea Thmey Daily.

ការផលិតទឹកដោះគោស្រស់ផ្គត់ផ្គង់លើទីផ្សារ នឹងកើនឡើងនៅខែខាងមុខ

Din Thary — Thu, 18 Sep 2025 08:20:05 +0000

លោក ជី សិលា សហស្ថាបនិកកសិដ្ឋានគិរីសួគ៌របស់ក្រុមហ៊ុន Khmer Fresh Milk Co., Ltd ដែលផលិតទឹកដោះគិរីសួគ៍ បានឱ្យ «កម្ពុជាថ្មី» ដឹងថា ការផលិតនៅក្នុងកសិដ្ឋានមិនមានអ្វីដែលប្រែប្រួលខ្លាំងនោះទេ ដោយសារតែចំនួនគោដែលមាននៅក្នុងកសិដ្ឋានមានចំនួនកម្រិត ប៉ុន្តែការផលិត គឺអាចមានការកើនឡើងតិចតួចចន្លោះពីប្រមាណ ៥% ទៅ ១០% នៅខែខាងមុខ។

សហ ស្ថាបនិកកសិដ្ឋានគិរីសួគ៌រូបនេះ បានលើកឡើងថា តម្រូវការទឹកដោះគោស្រស់នៅលើទីផ្សារ គឺនៅតែមានតម្រូវការខ្ពស់ដដែល ដោយសារតែប្រជាពលរដ្ឋមួយចំនួន មានការពហិការមិនប្រើប្រាស់ផលិតផលនាំចូលពីក្នុងប្រទេសថៃ។ ដោយឡែក សម្រាប់ផលិតផលនាំចូលពីប្រទេសដទៃ ក៏នៅមានការនាំចូល ប៉ុន្តែមិនមានការគាំទ្រច្រើនឡើយ ដូច្នេះហើយ ធ្វើឱ្យតម្រូវការទឹកដោះគោស្រស់នៅក្នុងស្រុកមានតម្រូវការច្រើន។

យ៉ាងណាមិញ ចំពោះការផ្គត់ផ្គង់ទឹកដោះគោស្រស់នៅលើទីផ្សារ លោក ជី សិលា បានបញ្ជាក់ថា កសិដ្ឋានរបស់លោកនៅតែមិនអាចផ្គត់ផ្គង់បានគ្រប់គ្រាន់នោះទេ ដោយសារតែកន្លងមកដូចយើងបានដឹងហើយថា ទីផ្សារហាងកាហ្វេ គឺជាតម្រូវមួយចាំបាច់ ទី២ ប្រជាពលរដ្ឋកម្ពុជាដែលធ្លាប់ប្រើផលិតផលបរទេស ហើយងាកមកប្រើប្រាស់ផលិតផលនៅក្នុងស្រុកទើបដឹងថា ផលិតផលក្នុងស្រុកមានគុណភាពល្អ ហើយតម្លៃក៏អាចប្រកួតប្រជែងជាមួយគ្នាបាន កត្តាទាំងនេះហើយដែលជំរុញឱ្យតម្រូវការទឹកដោះគោស្រស់កើនឡើងខ្ពស់។

ក្រោយបិទព្រំដែនគោករវាងប្រទេសទាំងពីរកម្ពុជា-ថៃ បានធ្វើឱ្យតម្រូវការទឹកដោះគោស្រស់នៅក្នុងស្រុកមានការកើនឡើងដល់ ៨ ទៅ ១០ម៉ឺនលីត្រក្នុងមួយថ្ងៃ លើសចំនួនផលិត ដោយក្នុងស្រុកមានសមត្ថភាពផលិតបានប្រមាណជិត ២ ម៉ឺនលីត្រប៉ុណ្ណោះ។

ដើម្បីឱ្យស្របទៅនិងនិន្នាការនៃតម្រូវការទឹកដោះគោនាពេលបច្ចុប្បន្ន កន្លងមក លោក ជី សិលា បញ្ជាក់ថា៖ កសិដ្ឋានគ្រោងនឹងនាំចូលគោបន្ថែមដើម្បីបង្កើនការផលិត ព្រោះក្នុងរយៈពេលប្រហែល ១ឆ្នាំកន្លងមកនេះ ការលក់ស្ថិតនៅក្នុងកម្រិតជាង ៩០%រហូតមក ហើយតម្រូវការក៏ចេះតែកើនមានរហូត ដូច្នេះយើងមិនអាចរងចាំការចិញ្ចឹមគោ ចាំឱ្យកើតកូនដើម្បីឆ្លើយតបទៅនិងតម្រូវការទីផ្សារនោះទេ គឺត្រូវការនាំចូលគោបន្ថែមដើម្បីបង្កើនការផលិតឱ្យបានពី ១ម៉ឺន ៥ ពាន់លីត្រ ទៅ ៣ ម៉ឺនលីត្រ ឬទៅដល់ ៤ម៉ឺនលីត្រ ឱ្យបានក្នុងរយៈពេល ១ឆ្នាំទៅមុខទៀត បើទោះបីជាបច្ចុប្បន្នតម្រូវការទឹកដោះគោនៅក្នុងស្រុកមានតម្រូវការខ្ពស់ក៏ដោយ ក៏កសិដ្ឋានមិនអាចឆ្លើយតមគ្រប់តាមតម្រូវការបានដែរ។

បច្ចុប្បន្ននៅក្នុងកសិដ្ឋាន មានគោដែលអាចផលិតទឹកដោះ ប្រមាណ ៥០០-៦០០ក្បាល ក្នុងនោះទោះគោនៅក្នុងកសិដ្ឋានមានជាង ១ពាន់ក្បាល ក៏ពិតមែន ក៏ប៉ុន្តែមិនមែនបានន័យថាគោទាំង ១ ពាន់ក្បាលនេះ អាចយកទឹកដោះបានរហូតនោះទេ ដូច្នេះនិយាយជាមធ្យម នៅក្នុងកសិដ្ឋានអាចផលិតទឹកដោះគោបានប្រមាណ ១ម៉ឺន ៥ ពាន់លីត្រ ក្នុងមួយថ្ងៃ ជាប្រភេទទឹកដោះគោដែលមិនទាន់កែច្នៃ ហើយបន្ទាប់ពីកែច្នៃរួច អាចផលិតបានប្រមាណជាង ១ម៉ឺន ៤ ពាន់លីត្រ សម្រាប់នាំយកទៅលក់នៅលើទីផ្សារ៕

ដោយ៖ ឌិន ថារី

The post ការផលិតទឹកដោះគោស្រស់ផ្គត់ផ្គង់លើទីផ្សារ នឹងកើនឡើងនៅខែខាងមុខ appeared first on Kampuchea Thmey Daily.

បិទព្រំដែនថៃ នាំឲ្យទឹកដោះគោស្រស់ក្នុងស្រុក កើនចំណែកទីផ្សារពី ៥ ទៅ ២៥%

Dy Bunnara — Tue, 19 Aug 2025 03:18:22 +0000

បើតាមសមាគមអ្នកផលិតចំណីអាហារកម្ពុជាបានគូសបញ្ជាក់ថា តម្រូវការទឹកដោះគោស្រស់ក្នុងស្រុកបានបង្កើនចំណែកទីផ្សារផ្គត់ផ្គង់កើនឡើងពី ៥ ដល់ ២៥% ខណៈជម្លោះព្រំដែនកម្ពុជាថៃនាំឲ្យមានការធ្វើពហិការការប្រើប្រាស់ទំនិញថៃក្នុងចំណោមពលរដ្ឋកម្ពុជា។

លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជាបានថ្លែងប្រាប់កម្ពុជាថ្មីកាលពីរសៀលម្សិលមិញថា ក្រោយកងទ័ពថៃបើកការឈ្លានពានចូលទឹកដីប្រទេសកម្ពុជា បានរុញស្មារតីជាតិនិយមរបស់ពលរដ្ឋកម្ពុជាក្នុងការងាកមកគាំទ្រផលិតផលក្នុងស្រុកដោយមានសន្ទុះកើនឡើងយ៉ាងខ្លាំង។

លោកបានលើកឡើងពីផលិតផលទឹកដោះគោស្រស់ដែលផលិតក្នុងស្រុក បានពង្រីកចំណែកទីផ្សារកើនឡើងពី ៥% ដល់ ២០ ទៅ ២៥%។

លោក មៀវ សុខទ្រី បានបញ្ជាក់ថា ក្នុងស្ថានភាពជម្លោះនេះអាចនិយាយបានថាជាលាភក្នុងគ្រោះសម្រាប់សហគ្រិនក្នុងស្រុកក្នុងការខិតខំពង្រីកខ្សែសង្វាក់ផ្គត់ផ្គង់ ស្របពេលស្មារតីគាំទ្រផលិតផលជាតិមានសន្ទុះផុលផុសគ្រប់ទីកន្លែង។

ពាក់ព័ន្ធការបិទខ្ទប់ទំនិញផ្នែកចំណីអាហារពីប្រទេសថៃ លោក មៀវ សុខទ្រី បានអះអាងថា មិនប៉ះពាល់ដល់ការផ្គត់ផ្គង់ក្នុងស្រុកនោះទេ ដោយសារសហគ្រាសខ្មែរមានលទ្ធភាពគ្រប់គ្រាន់ដើម្បីផលិតផលិតផលចំណីអាហារអាចបំពេញតាមតម្រូវការរបស់ពលរដ្ឋ។

យ៉ាងណាមិញ លោកមើលឃើញទំនិញមិនចាំបាច់មួយចំនួនដូចជាផ្នែកគ្រឿងសំអាងអាចមានការខ្វះខាតខ្លះៗ ប៉ុន្តែទំនិញទាំងនោះមិនមែនជាទំនិញយុទ្ធសាស្រ្តគាំទ្រដល់ជីវភាពរស់នៅប្រចាំថ្ងៃរបស់ពលរដ្ឋនោះទេ។

សហស្ថាបនិកក្រុមហ៊ុន Khmer Fresh Milk ដែលជាក្រុមហ៊ុនផលិតទឹកដោះគោស្រស់ក្នុងស្រុកក្រោមស្លាកយីហោគិរីសួគ៍បានបញ្ជាក់ថា តម្រូវការទឹកដោះគោស្រស់នៅក្នុងស្រុកមានប្រមាណ ១០ ម៉ឺនលីត្រក្នុងមួយថ្ងៃ ប៉ុន្តែសមត្ថភាពផលិតក្នុងស្រុកមានប្រហែលជា ២ ម៉ឺនលីត្រប៉ុណ្ណោះ គឺនៅការខ្វះខាតច្រើន មានន័យថាតម្រូវការទីផ្សារមានលក្ខណៈធំធេងហួសពីអ្វីដែលលទ្ធភាពអាចធ្វើទៅបាន។

លោក ជី សិលា សហស្ថាបនិកកសិដ្ឋានគិរីសួគ៌បានបញ្ជាក់ថា បច្ចុប្បន្នពលរដ្ឋកម្ពុជាមានទម្លាប់ទទួលទានទឹកដោះគោស្រស់ ហើយស្របការបិទព្រំដែន ពលរដ្ឋក៏បានងាកមកស្គាល់អំពីផលិតផលទឹកដោះគោក្នុងស្រុកកាន់តែច្រើន និងចាប់ផ្ដើមមានជំនឿជឿជាក់ថាផលិតផលក្នុងស្រុកក៏មានគុណភាពល្អ។

នៅក្នុងកសិដ្ឋានគិរីសួគ៌ មានគោអាចផលិតទឹកដោះបានប្រមាណ ៥០០-៦០០ ក្បាលក្នុងចំណោមគោក្នុងកសិដ្ឋានជាង ១ ពាន់ក្បាល ជាមួយលទ្ធភាពផលិតទឹកដោះគោស្រស់បានប្រមាណជាង ១ម៉ឺន ៤ ពាន់លីត្រ សម្រាប់បញ្ចេញលក់នៅលើទីផ្សារ។

បើតាមលោក ជី សិលា កសិដ្ឋានគ្រោងនាំចូលគោបន្ថែម ស្របតម្រូវការចេះតែកើនឡើង ដើម្បីបង្កើនការផលិតឲ្យបានដល់ទៅ ៣ ម៉ឺនលីត្រ ឬ ៤ម៉ឺនលីត្រក្នុងរយៈពេល ១ ឆ្នាំទៅមុខទៀត។

បច្ចុប្បន្នមានកសិដ្ឋានក្នុងចំនួនចំនួន ៤ ដែលកំពុងផ្គត់ផ្គង់ទឹកដោះគោស្រស់លើទីផ្សារ ក្នុងនោះមានកសិដ្ឋានចិញ្ចឹមគោយកទឹកដោះគិរីសួគ៌នៅភ្នំតាម៉ៅ ស្រុកបាទី ខេត្តតាកែវ ដែលមានសមត្ថភាពផលិតទឹកដោះគោស្រស់បានចន្លោះពី ១២ ០០០-១៥ ០០០ លីត្រក្នុងមួយថ្ងៃ។ កសិដ្ឋានចិញ្ចឹមគោយកទឹកដោះ មូមូ ហ្វាម ស្ថិតនៅក្រុងអរិយក្សត្រ ខេត្តកណ្ដាល ដែលកសិដ្ឋានអាចមានលទ្ធភាពផលិតទឹកដោះគោស្រស់បានជិត ១ ពាន់លីត្រ ក្នុងមួយថ្ងៃ។

កសិដ្ឋានចិញ្ចឹមគោយកទឹកដោះ តេជោសែនឫស្សីត្រឹបស្ថិតនៅឃុំឆែប ២ ស្រុកឆែប ខេត្តព្រះវិហារក្នុងតំបន់ឧទ្យានជាតិរាជបណ្ឌិត្យសភាកម្ពុជាតេជោឫស្សីត្រឹប ដែលបង្កើតឡើងនៅឆ្នាំ ២០១៤ ជាគម្រោងរបស់រាជបណ្ឌិត្យសភាកម្ពុជា មានសមត្ថភាពផលិតទឹកដោះគោះស្រស់បានចន្លោះពី ១០០លីត្រ ទៅ ២០០ លីត្រ ក្នុងមួយថ្ងៃ និងកសិដ្ឋានចិញ្ចឹមគោយកទឹកដោះ អូម៉ មានទីតាំងស្ថិតនៅសង្កាត់ព្រែកលៀប ខណ្ឌជ្រោយចង្វារ ដែលកសិដ្ឋានមានគោចំនួនជាង ៨០ ក្បាល យកមកចិញ្ចឹម ដើម្បីផ្គត់ផ្គង់ទឹកដោះគោស្រស់ចេញពីគោធម្មជាតិ៕

The post បិទព្រំដែនថៃ នាំឲ្យទឹកដោះគោស្រស់ក្នុងស្រុក កើនចំណែកទីផ្សារពី ៥ ទៅ ២៥% appeared first on Kampuchea Thmey Daily.

លោក ឌិត ទីណា ជំរុញកសិករនៅជុំវិញកសិដ្ឋានគិរីសួគ៌ដាំស្មៅបង្កើនចំណូលអភិវឌ្ឍរួមគ្នា

Sophal Tuon — Sat, 25 Feb 2023 01:00:00 +0000

រដ្ឋមន្រ្តីក្រសួងកសិកម្ម មានបំណងផ្សារភ្ជាប់ទំនាក់ទំនងរវាងកសិដ្ឋានគិរីសួគ៌ ជាមួយកសិករនៅជុំវិញកសិដ្ឋាន ដើម្បីទទួលបានប្រយោជន៍ ពីការវិនិយោគទាំងអស់គ្នា។

លោក ឌិត ទីណា រដ្ឋមន្ត្រីក្រសួងកសិកម្ម បានលើកឡើងថា ដើម្បីឱ្យការធ្វើវិនិយោគនៅក្នុងកសិដ្ឋាននេះ មិនត្រឹមតែទទួលបានផលប្រយោជន៍សម្រាប់តែម្ចាស់កសិដ្ឋានខ្លួនឯងទេ ក្រៅពីការផ្តល់អាហារូបត្ថម្ភសម្រាប់ពលរដ្ឋ គឺអាចឱ្យកសិករនៅជុំវិញនេះ ទទួលបានផលប្រយោជន៍ពីការវិនិយោគនេះ ដូចគ្នា។ ប៉ុន្តែចំណុចសំខាន់គឺការកសាងទំនុកចិត្តជាមុន ខ្ញុំនឹងធ្វើកិច្ចការងារនេះ ក្នុងនាមក្រសួងកសិកម្មដើម្បីសម្របសម្រួលសហការជាមួយគ្នា ដោយធានាមិនបាត់ដី និងគ្មានការកេងផលប្រយោជន៍គ្នា។ នេះជាការបន្ថែមរបស់លោក ឌិត ទីណា។

លោករដ្ឋមន្រ្តីលើកឡើងបែបនះ នៅក្នុងដំណើរចុះត្រួតពិនិត្យផ្ទាល់អំពីវឌ្ឍនភាពកសិដ្ឋានគិរីសួគ៌ ស្ថិតនៅក្នុងស្រុកបាទី ខេត្តតាកែវ នាថ្ងៃទី ២៤ ខែកុម្ភៈ ឆ្នាំ ២០២៣។

លើសពីនេះទៀត លោក ឌិត ទីណា ជំរុញដល់កសិករឱ្យមានការធ្វើពិពិធកម្ម ដោយផ្លាស់ប្តូរពីការធ្វើស្រែមកដាំស្មៅជំនួសវិញ តាមបច្ចេកទំនើបរបស់កសិដ្ឋានគិរីសួគ៌។ លោកលើកឡើងដូច្នេះថា« ពេលខ្លះដាំស្មៅបានផលជាងធ្វើស្រែ យើងអាចមិនជឿទេ ប៉ុន្តែដោយសារថា ដាំស្មៅមានបច្ចេកទេស មានប្រភេទពូជស្មៅដែលមិនវិនិយោគអស់ច្រើន ស្មៅមួយចំនួនដាំម្តងទទួលផលបាន៥ឆ្នាំ ហើយមួយឆ្នាំច្រូត ៦ដង បើទោះជាតម្លៃស្មៅថោកជាងស្រូវពិតមែន តែស្រូវធ្វើបានតែពីរដងក្នុងមួយឆ្នាំប៉ុណ្ណោះ។

ទោះយ៉ាងណា លោក ឌិត ទីណា មើលឃើញថា ពលរដ្ឋមិនទុកចិត្តទៅលើការវិនិយោគដាំស្មៅជំនួសស្រូវនោះទេ។ ប៉ុន្តែលោកអះអាងថា នឹងព្យាយាមធ្វើការជាមួយកសិករ ចងក្រងផ្តល់ទំនុកចិត្ត ដើម្បីការអភិវឌ្ឍកាន់តែខ្លាំង។ លោកសង្កត់ធ្ងន់ថា អ្នកដែលចាប់យកឱកាសមុនគេ នឹងទទួលបានផ្តល់ប្រយោជន៍មុនគេដែរ។

លោក ជី សិលា សហស្ថាបនិកកសិដ្ឋានគិរីសួគ៌ គាំទ្រចំពោះការលើកឡើងរបស់លោករដ្ឋមន្រ្តីក្រសួងកសិកម្ម ដែលចង់ឱ្យមានការវិនិយោគរួមគ្នា ដើម្បីផលប្រយោជន៍ទាំងកសិករ និងក្រុមហ៊ុន។ លោកបន្តថា ក្រុមហ៊ុនបានធ្វើកិច្ចការមួយចំនួនជាមួយសហគមន៍កសិករព្រៃកប្បាស ដែលមានចម្ងាយប្រមាណ ២០គីឡូម៉ែត្រពីកសិដ្ឋានគិរីសួគ៌ ដើម្បីសិក្សាលើការដាំស្មៅ ដោយសារសហគមន៍នេះ មានភូមិសាស្រ្តល្អ ទាំងប្រភពទឹក និងដី។

លោក បញ្ជាក់ថា ប្រសិនបើតំបន់ណា ដែលធ្វើស្រែមិនបានផលល្អ អាចងាកមកដាំស្មៅវិញ ទទួលបានចំណូលខ្ពស់។ លោក ជី សិលា លើកឡើងដូច្នេះថា« ស្មៅស្រួលដាំ ហើយដាំម្តងច្រូតបាន៦ដងក្នុងមួយឆ្នាំ ដោយដាំរយៈពេល ៦០ថ្ងៃ អាចច្រូតបាន ហើយអាចប្រមូលផលបាន៥ឆ្នាំ។ បើតាមលោក ជី សិលា ក្នុង១ឆ្នាំ កសិករអាចប្រមូលផលបាន ៤០០ទៅ ៥០០តោន ពីការដាំដុះស្មៅ ក្នុងនោះ ក្នុងមួយតោន អាចរកចំណូលបានចន្លោះពី ៣០ទៅ ៤០ដុល្លារ។

ពាក់ព័ន្ធនឹងកិច្ចការនេះ លោក ជី សិលា បានអះអាងថា លោកនឹងព្យាយាមចំណាយពេលឱយបានច្រើនជាមួយកសិករ ជាពិសេសអ្នករស់នៅជុំវិញកសិដ្ឋានគិរីសួគ៌ ដែលធ្វើស្រែ ឬមានដីទំនេរ អាចសហការដាំដុះស្មៅ ដើម្បីទទួលបានប្រាក់ចំណេញជាជាងទុកដីទំនេរចោល៕

The post លោក ឌិត ទីណា ជំរុញកសិករនៅជុំវិញកសិដ្ឋានគិរីសួគ៌ដាំស្មៅបង្កើនចំណូលអភិវឌ្ឍរួមគ្នា appeared first on Kampuchea Thmey Daily.

រដ្ឋមន្រ្តីក្រសួងកសិកម្មជំរុញបង្កើនការផលិតទឹកដោះគោស្រស់ផ្គត់ផ្គង់ក្នុងស្រុក ដើម្បីផ្តល់អាហារូបត្ថម្ភដល់ពលរដ្ឋខ្មែរ

Sophal Tuon — Fri, 24 Feb 2023 09:52:32 +0000

រដ្ឋមន្ត្រីក្រសួងកសិកម្ម បានលើកឡើងថា រាជរដ្ឋាភិបាល បានជំរុញ និងយកចិត្តទុកដាក់ផ្តល់សិទ្ធិវិនិយោគទាំងក្រុមហ៊ុនធំ និងតូច លើការផលិតទឹកដោះគោស្រស់ដែលមានគុណភាព ដើម្បីអភិវឌ្ឍសុខភាពតាមរយៈការពង្រីកអាហារូបត្ថម្ភដល់ប្រជាពលរដ្ឋទូទៅ។ រដ្ឋមន្រ្តីក្រសួងកសិកម្ម លើកឡើងបែបនេះ នៅក្នុងដំណើរទស្សនកិច្ចទៅកាន់កសិដ្ឋានគិរីសួគ៌ ដែលជាកន្លែងចិញ្ចឹមគោយកទឹកដោះដ៏ធំជាងគេ និងបច្ចេកទេសទំនើបបំផុតនៅកម្ពុជា នាថ្ងៃទី ២៤ ខែកុម្ភៈ ឆ្នាំ ២០២៣។

នៅក្នុងដំណើរទស្សនកិច្ចនេះ លោក ឌិត ទីណា បានសិក្សាស្វែងយល់នៅផ្នែកនីមួយៗ នៃសង្វាក់ផលិតកម្មចិញ្ចឹមគោតាំងពីដើមដល់ចប់ ដោយផ្ដើមពីផ្នែកដាំដុះច្រូតកាត់ស្មៅដោយម៉ាស៊ីនគ្រឿងចក្រ ផ្នែកចម្ការពោត ចម្ការស្មៅម៉ុមបាសាស្រោចស្រពដោយប្រព័ន្ធទឹកស្វ័យប្រវត្តិ ការកែច្នៃចំណីសត្វសម្បូរជីវជាតិ ការកែច្នៃផលិត រហូតដល់ច្រកដបវេចខ្ចប់ជាផលិតផលសម្រេច។

លោក ឌិត ទីណា បានលើកឡើងថា «ការចិញ្ចឹមគោយកទឹកដោះ ស្របតាមបច្ចេកទេសរបស់ប្រទេសអ៊ីស្រាអែលដែលមានបច្ចេកទេសច្បាស់លាស់នេះ បានជួយពង្រីកអាហាររូបត្ថមល្អសម្រាប់ប្រជាពលរដ្ឋ ដោយធ្វើឲ្យក្មេងៗធំធាត់ក្លាយទៅជាកីឡាករ អាចក្លាយជាអ្នកស្រាវជ្រាវដែលមានខួរក្បាលល្អ នៅពេលដែលពួកគេទទួលបានអាហារូបត្ថម្ភគ្រប់គ្រាន់តាំងពីតូច។ ដូច្នេះការអនុញ្ញាតឲ្យមានការវិនិយោគលើទឹកដោះគោ គឺជាផ្នែកមួយសំខាន់ណាស់។ នេះជាការបន្ថែមរបស់លោក ឌិត ទីណា។

ជាមួយគ្នានេះ អគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វលោក តាន់ ផាន់ណារ៉ា បានឲ្យដឹងថា កសិដ្ឋានគិរីសួគ៌ គឺកសិដ្ឋានចិញ្ចឹមគោយកទឹកដោះដែលធំជាងគេក្នុងចំណោមកសិដ្ឋាន ៤ ទៅ ៥កន្លែងនៅទូទាំងប្រទេសកម្ពុជា។ លោកបានលើកឡើងដូច្នេះថា «នៅកន្លែងនេះកសិដ្ឋានធំជាងគេ ហើយល្អជាងគេ ព្រោះអនាម័យ គឺវាត្រូវទៅតាមស្ដង់ដាររបស់គេ គឺមាន GMP និង HACPP ទៀត មានន័យថា ស្របទៅតាមស្ដង់ដារអន្ដរជាតិហើយ»។

លោក ជី សិលា សហស្ថាបនិកកសិដ្ឋានគិរីសួគ៌ បានឲ្យដឹងថា កសិដ្ឋានចិញ្ចឹមគោយកទឹកដោះគិរីសួគ៌ស្ថិតនៅភូមិឱភាសាំង ឃុំកណ្ដឹង ស្រុកបាទី ខេត្តតាកែវ បានដំណើរការរយៈពេលជាង ៤ឆ្នាំមកហើយតាំងពីផ្ដើមការសាងសង់រហូតដល់ទទួលបានតំណក់ទឹកដោះគោដំបូង។ កសិដ្ឋានក៏បានលក់ចែកចាយផលិតផលរបស់ខ្លួនមានទឹកដោះគោស្រស់ និងយ៉ាអួ ច្រើនរសជាតិ នៅលើទីផ្សារ តាមផ្សារទំនើប ផ្សារធម្មតា ប្រហែលបីពាន់កន្លែង ដោយទទួលបានការគាំទ្រយ៉ាងខ្លាំង។

លោក ជី សិលា បានបន្តថា៖ «យើងគិតថា វាជាការជោគជ័យមួយជំហាន ដែលយើងបានឈរក្នុងនាមជាក្រុមហ៊ុនក្នុងស្រុកមួយ ហើយក៏ជាកសិដ្ឋានផលិតទឹកដោះគោទី១ ដែលយើងមានទំហំចែកធំ ហើយមានការផលិតធំ»។

លោកបានបញ្ជាក់ទៀតថា៖ «យើងមិនត្រឹមតែថាប្រើម៉ាស៊ីនច្រើនទេ យើងថែមទាំងប្រើផ្នែក Big Data Technology ដូចជា AI ដើម្បីឱ្យដឹងថា គោមានជំងឺ ឬក៏សុខភាពល្អ ឬក៏ផឹកទឹក មិនផឹកទឹក ហើយសូម្បីតែការស្រោចស្រពដំណាំរបស់យើងគឺយើងប្រើបច្ចេកវិទ្យាតាម IOT ( Internet of Thing)»។

សូមបញ្ជាក់ថា សត្វគោដែលចិញ្ចឹមនៅកសិដ្ឋានគិរីសួគ៌ ត្រូវបានដឹកតាមយន្តហោះពីអូស្ត្រាលីចំនួន ៥០០ជាងក្បាលមកកម្ពុជា។ មកដល់សព្វថ្ងៃនេះ សត្វគោបានកើតកូនចៅរហូតដល់ជំនាន់ទី៣ហើយ ដោយចំនួនសរុបមានជាង ១ពាន់ក្បាល។

បើតាមលោក ជី សិលា ក្នុង១ថ្ងៃ កសិដ្ឋានគិរីសួគ៌ផលិតទឹកដោះគោស្រស់ បានប្រហែលពី ១២០០០ ទៅ ១៥០០០លីត្រ ដើម្បីឆ្លើយតបទៅនឹងកំណើនតម្រូវការទីផ្សារ។ ថ្មីៗនេះក្រុមហ៊ុនខ្មែរហ្វ្រេស មីល ឯ.ក បានផលិតនូវប័រ និងក្រែមទឹកដោះគោ ហើយក៏គ្រោងនឹងផលិតទឹកដោះគោរក្សាទុកបាន និងយ៉ាអួប្រភេទផឹកបានផងដែរ។

លោក ជី សិលា បានសង្កត់ធ្ងន់ថា៖ «ក្ដីស្រមៃរបស់ខ្ញុំ ខ្ញុំគិតថា ខ្ញុំចង់ឱ្យមានឱកាសអញ្ជើញថ្នាក់ដឹកនាំ រដ្ឋមន្ត្រីឱ្យបានកាន់តែច្រើន ឱ្យបានចូលរួម ជាពិសេសរដ្ឋមន្ត្រីក្រសួងកសិកម្ម បើអាចសម្ដេចនាយករដ្ឋមន្ត្រីលោកអាចមកទស្សនកិច្ចនៅកសិដ្ឋានទឹកដោះគោយើងគឺកាន់តែប្រពៃមែនទែន»៕

The post រដ្ឋមន្រ្តីក្រសួងកសិកម្មជំរុញបង្កើនការផលិតទឹកដោះគោស្រស់ផ្គត់ផ្គង់ក្នុងស្រុក ដើម្បីផ្តល់អាហារូបត្ថម្ភដល់ពលរដ្ឋខ្មែរ appeared first on Kampuchea Thmey Daily.

លោក ឈរ រិទ្ធី មានមហិច្ឆតាផលិតទឹកដោះគោស្រស់ផ្គត់ផ្គង់ក្នុងស្រុកជំនួសការនាំចូលឱ្យបាន ៥០ភាគរយ

Sophal Tuon — Fri, 06 Jan 2023 03:51:12 +0000

កសិដ្ឋានគិរីសួគ៌ បានផលិតទឹកដោះគោស្រស់ផ្គត់ផ្គង់ក្នុងស្រុក បានប្រមាណ ១៥ភាគរយ បើធៀបនឹងការនាំចូល។ នេះជាការបញ្ជាក់របស់លោក ឈរ រិទ្ធី អគ្គនាយកក្រុមហ៊ុន ខ្មែរ ហ្វ្រេស មិល និងកសិដ្ឋានគិរីសួគ៌។

ជាមួយនឹងការផ្គត់ផ្គង់ក្នុងស្រុកនៅមានកម្រិតនេះ លោក រិទ្ធី មានមហិច្ឆតាបង្កើតការផលិតទឹកដោះគោស្រស់ ដើម្បីបំពេញតម្រូវការក្នុងស្រុកជំនួសការនាំចូលឱ្យបាន ៥០ភាគរយ នៅពេលខាងមុខ។

ថ្លែងនៅក្នុងកម្មវិធី Grow under peace របស់កម្ពុជាថ្មី អគ្គនាយកក្រុមហ៊ុន ខ្មែរ ហ្វ្រេស មិល និងកសិដ្ឋានគិរីសួគ៌ បានលើកឡើងថា បច្ចុប្បន្នកសិដ្ឋានគិរីសួគ៌ មានគោផលិតទឹកដោះប្រមាណ ៦០០ក្បាល ក្នុងចំណោមជាង ១ពាន់ក្បាល។ បើតាមលោក ឈរ រិទ្ធី ក្នុងមួយថ្ងៃ កសិដ្ឋានផលិតទឹកដោះគោបានប្រមាណ ១ម៉ឺន ៧ពាន់លីត្រ និងបានចែកចាយទៅតាមហាងចំនួន ២៥០០ហាង នៅក្នុងប្រទេសកម្ពុជា។

កសិដ្ឋានគិរីសួគ៌ បានដើរមុនគេក្នុងការផលិតទឹកដោះគោស្រស់សម្រាប់ផ្គត់ផ្គង់ទីផ្សារក្នុងស្រុក ត្រួតពិនិត្យតាមបែបបច្ចេកទេសទំនើប និងធានាគុណភាពខ្ពស់។ លោក ឈរ រិទ្ធី ទើបទទួលបានពានមាសក្នុងកម្មវិធីប្រកួតសហគ្រិនថ្នាក់ជាតិ ឆ្នាំ ២០២២ បន្ទាប់ពីកសិដ្ឋានទើបតែទទួលបានពានរង្វាន់ GREEN AWARD ពីកម្មវិធី ASEAN Young Entrepreneur Awards ២០២២។

លោក ជី សិលា សហស្ថាបនិកក្រុមហ៊ុន Khmer Fresh Milk និងកសិដ្ឋានគិរីសួគ៌ បានឱ្យដឹងថា បច្ចុប្បន្នកសិដ្ឋាន មានផលិតដូចជា ទឹកដោះគោស្រស់ យ៉ាអួ និងទឹកយ៉ាអួ(សម្រាប់ផឹក) ដោយក្នុងនោះក៏មានបែងចែកទៅតាមផ្នែក ដូចជា ទឹកដោះគោគ្មានជាតិខ្លាញ់ យ៉ាអួ ទឹកដោះគោមានជាតិសូកូឡា ស្តបបឺរី និងទឹកដោះគោយ៉ាអួ សម្រាប់ផឹក ជាដើម។ ក្រៅពីនេះ ក៏មានបឺ សម្រាប់ញ៉ាំជាមួយនំប៉័ងផងដែរ។

សូមបញ្ជាក់ថា រោងចក្រផលិតទឹកដោះគោស្រស់របស់កសិដ្ឋានគិរីសួគ៌ បង្កើតនៅឆ្នាំ ២០១៨ និងចាប់ផ្តើមនាំយកគោចូលកសិដ្ឋាននៅឆ្នាំ ២០២០។ រយៈពេល ២ឆ្នាំ មានការគាំទ្រច្រើនពីសំណាក់ប្រជាពលរដ្ឋខ្មែរ និងមានតម្រូវការខ្ពស់នៅលើទីផ្សារ។

កសិដ្ឋានគិរីសួគ៌មានផ្ទៃដីទំហំ ៣០០ហិកតា មានទីតាំងស្ថិតនៅជ្រលងភ្នំតាម៉ៅ ស្រុកបាទី ខេត្តតាកែវ ចម្ងាយជាង ៣០គីឡូម៉ែត្រ ពីភាគខាងត្បូងរាជធានីភ្នំពេញ៕

The post លោក ឈរ រិទ្ធី មានមហិច្ឆតាផលិតទឹកដោះគោស្រស់ផ្គត់ផ្គង់ក្នុងស្រុកជំនួសការនាំចូលឱ្យបាន ៥០ភាគរយ appeared first on Kampuchea Thmey Daily.

កសិដ្ឋានគិរីសួគ៌ឈ្នះពានមាសប្រកួតសហគ្រិនថ្នាក់ជាតិឆ្នាំ ២០២២

Sophal Tuon — Fri, 25 Nov 2022 02:39:33 +0000

កសិដ្ឋានគិរីសួគ៌ មានលោក ឈរ រិទ្ធី ជាអគ្គនាយក បានឈ្នះពានមាសក្នុងកម្មវិធីប្រកួតសហគ្រិនថ្នាក់ជាតិ ឆ្នាំ ២០២២។ ពានរង្វាន់សហគ្រិនថ្នាក់ជាតិឆ្នាំ២០២២ ត្រូវបានបង្កើតឡើង ដើម្បីលើកតម្កើងសហគ្រិនឆ្នើម ដែលបានជំរុញអាជីវកម្មប្រកបដោយចីរភាព និងទំនួលខុសត្រូវសង្គម។

នេះគឺជាពានទី២ របស់កសិដ្ឋានគិរីសួគ៌ ដែលកាលពីថ្ងៃទី ១២-១៣ វិច្ឆិកា កសិដ្ឋានទើបតែទទួលបានពានរង្វាន់ GREEN AWARD ពីកម្មវិធី ASEAN Young Entrepreneur Awards 2022 ដោយមានការចូលរួមពីវាគ្មិនសំខាន់ៗមកពីប្រទេសអូស្ត្រាលី ឥណ្ឌា និងជប៉ុន ដែលសម្របសម្រួលដោយ លោកបណ្ឌិត ឆេង គឹមឡុង នាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យនៃវិទ្យាស្ថានចក្ខុវិស័យអាស៊ី ។

លោក ជី សិលា សហស្ថាបនិកក្រុមហ៊ុន Khmer Fresh Milk និងកសិដ្ឋានគិរីសួគ៌ សម្តែងមោទនភាពខណៈទទួលបានពាននេះ។ លោកបានប្រាប់កម្ពុជាថ្មីថា មានក្រុមហ៊ុនជាច្រើនបានធ្វើការប្រកួតប្រជែង។ ក្នុងនោះ ក៏មានហេតុផល និងបទបង្ហាញជាច្រើន ទម្រាំទទួលបានពានមាសពីកម្មវិធីប្រកួតសហគ្រិនថ្នាក់ជាតិ ឆ្នាំ ២០២២នេះ។

កសិដ្ឋានគិរីសួគ៌ គឺជាកសិដ្ឋានផលិតទឹកដោះគោស្រស់ធំជាងគេនៅកម្ពុជា។ ម្ចាស់កសិដ្ឋាន មានចក្ខុវិស័យចែកចាយផលិតផលទឹកដោះគោស្រស់ដែលមានគុណភាព សម្រាប់ពលរដ្ឋខ្មែរ ឱ្យបានទទួលទានទាំងអស់គ្នានៅទូទាំងប្រទេស។

លោក ជី សិលា បានគូសបញ្ជាក់ថា ទឹកគោនៅកសិដ្ឋានគិរីសួគ៌សុទ្ធស្រស់ នាំមុខគេនៅក្នុងប្រទេសកម្ពុជា។ បើតាមលោក ជី សិលា បានរំលឹកថា ដំបូងឡើយ កសិដ្ឋាន នាំចូលគោពូជ Holstein heifers ពីប្រទេសអូស្រ្តាលីជាង ៥០០ក្បាលប៉ុណ្ណោះ ប៉ុន្តែរហូតមកដល់ពេលនេះ កើនឡើងជាង ១ពាន់ក្បាល ដោយទទួលបានទឹកដោះគោប្រមាណជាង ១ម៉ឺន៥ពាន់លីត្រ ក្នុងមួយថ្ងៃជាមធ្យម និងបានបង្កើនប្រភេទផលិតភាពទឹកដោះគោចំនួនបីប្រភេទធំៗ គឺ ទឹកដោះគោស្រស់ យ៉ាអួ និងទឹកយ៉ាអួ(សម្រាប់ផឹក) ដោយក្នុងនោះក៏មានបែងចែកទៅតាមផ្នែក ដូចជា ទឹកដោះគោគ្មានជាតិខ្លាញ់ យ៉ាអួ ទឹកដោះគោមានជាតិសូកូឡា ស្តបបឺរី និងទឹកដោះគោយ៉ាអួ សម្រាប់ផឹក ជាដើម។ ក្រៅពីនេះ ក៏មានបឺ សម្រាប់ញ៉ាំជាមួយនំប៉័ងផងដែរ។

លោក ជី សិលា បានបញ្ជាក់ថា បច្ចុប្បន្នមានការចែកចាយទៅជាង ១ពាន់ទីតាំង មាននៅផ្សារទំនើប និងទីតាំងលក់ចាប់ហួយនានា ពោលគឺផ្គត់ផ្គង់បានប្រមាណ ៥០ភាគរយនៅទូទាំងប្រទេស។ បើធៀបនឹងការនាំចូលប្រហែល ១៥ភាគ នៃផលិតផលទឹកដោះគោស្រស់នាំចូលពីក្រៅប្រទេស។ ចំនួននេះ បើតាមលោក ជី សិលា នៅមានឱកាសច្រើនទៀត សម្រាប់ការផលិតផ្គត់ផ្គង់ក្នុងស្រុក។

រោងចក្រផលិតទឹកដោះគោស្រស់របស់កសិដ្ឋានគិរីសួគ៌ បង្កើតឆ្នាំ ២០១៨ និងចាប់ផ្តើមនាំយកគោចូលកសិដ្ឋាននៅ ឆ្នាំ ២០២០។ រយៈពេល ២ឆ្នាំ មានការគាំទ្រច្រើនពីសំណាក់ប្រជាពលរដ្ឋខ្មែរ និងមានតម្រូវការខ្ពស់នៅលើទីផ្សារ។

The post កសិដ្ឋានគិរីសួគ៌ឈ្នះពានមាសប្រកួតសហគ្រិនថ្នាក់ជាតិឆ្នាំ ២០២២ appeared first on Kampuchea Thmey Daily.