ខណៈ​បញ្ហា​គម្រោង​អភិវឌ្ឍ​អត់​ច្បាប់​មាន​ដូចជា​លំនៅឋាន និង​ដីឡូតិ៍​ជាដើម​នៅតែ​បន្ត​កើត​មាន និយ័តករ​អចលនទ្រព្យ​និង​ទ្រព្យ​បញ្ចាំ ប្រកាស​នឹង​ធ្វើ​ការ​សហការ​បន្ថែម​ជាមួយ​អាជ្ញាធរ​ពាក់ព័ន្ធ ជាពិសេស​អាជ្ញាធរ​ដែនដី ដើម្បី​បង្កើន​ការ​គ្រប់គ្រង​គម្រោង​អភិវឌ្ឍ​ឲ្យ​មានប្រសិទ្ធភាព ដើម្បី​ការពារ​ផល​ប្រយោជន៍​របស់​ពលរដ្ឋ។

លោក ជូ វណ្ណៈ អគ្គនាយក​និយ័តករ​អាជីវកម្ម​អចលនវត្ថុ និង​បញ្ចាំ បាន​ទទួល​ស្គាល់​ភាព​ចន្លោះ​ប្រហោង​លើ​ការ​គ្រប់គ្រង​គម្រោង​អភិវឌ្ឍ​មួយ​ចំនួន​ដែល​គ្មាន​ច្បាប់ រហូត​នាំ​ឲ្យ​ពលរដ្ឋ​មួយ​ចំនួន​ត្រូវ​ខាតបង់ ដោយសារ​លង់​ជឿ​លើ​ការ​ឃោសនា​​ពី​ម្ចាស់​គម្រោង​។

យ៉ាងណាមិញ ពាក់ព័ន្ធ​គម្រោង​អភិវឌ្ឍ​អត់​ច្បាប់​កន្លងទៅ លោក ជូ វណ្ណៈ បាន​អះអាង​ថា អាជ្ញាធរ​តែងតែ​ចុះ​បង្ក្រាប​ជា​បន្តបន្ទាប់ ក្រោយ​ទទួល​បាន​​ព័ត៌មាន​តាម​ការ​ផ្សព្វផ្សាយនៅលើបណ្តាញ​សង្គម ​និង​រក​ឃើញតាម​ការ​ចុះ​ស្រាវជ្រាវ​ពី​ក្រុម​ការងារ​។

«គម្រោង​ខ្លះ​ទាល់​តែ​មាន​ការ​ផ្សព្វផ្សាយនៅលើបណ្តាញ​សង្គម ទើប​មន្រ្តី​របស់យើង​បាន​ដឹង​ ហើយ​​ចុះ​ស្រាវជ្រាវ​ថា​អត់មាន​អាជ្ញាប័ណ្ណ​ធ្វើ​អាជីវកម្ម​ រួច​ទើប​បាន​អាជ្ញាធរ​ចេញ​សេចក្ដី​ដំណឹង​ផ្សព្វផ្សាយ​ឲ្យ​ពលរដ្ឋ​ទទួល​ជា​ព័ត៌មាន​»។

លោក​លើកឡើង​ថា មិន​អាច​គ្រប់គ្រងបាន ១០០% ដោយសារ​គម្រោង​ខ្លះ​ដំណើរការ​ដោយ​លួចលាក់។ តែ​យ៉ាងណា អាជ្ញាធរ​នឹង​ពង្រឹង​ការ​ងារ​ចុះ​ត្រួត​ពិនិត្យ​ជាពិសេស​ធ្វើការ​សហការ​ជាមួយ​អាជ្ញាធរ​ដែនដី ដើម្បី​បង្កើន​ប្រសិទ្ធភាព​គ្រប់គ្រង​ដើម្បី​ការពារ​ផល​ប្រយោជន៍ និង​ការ​ខាត​បង់​របស់​ពលរដ្ឋ។

ជាមួយ​គ្នា​នេះ​អាជ្ញាធរ​ ក៏​នឹង​បន្ត​អប់រំ​ណែនាំ​ដល់​ពលរដ្ឋ​ និង​ថ្ងៃខាងមុខ​និយតករ​នឹង​រៀបចំ​យន្តការ​ពង្រឹង​បន្ថែម​ទៀត ដើម្បី​ឲ្យ​ពលរដ្ឋ​ទទួល​បាន​ព័ត៌មាន​គ្រប់​ជ្រុងជ្រោយ​មុន​ទិញ​គម្រោង​ណាមួយ​ ដើម្បី​ចៀសវាង​ការ​ខាត​បង់៕

The post ​និយ័តករ​អាជីវកម្ម​អចលនវត្ថុ​និង​បញ្ចាំ ​បង្កើន​ប្រសិទ្ធភាព​​​គ្រប់គ្រងគម្រោង​អភិវឌ្ឍ​អត់ច្បាប់ appeared first on Kampuchea Thmey Daily.

ជុំវិញបញ្ហានេះ លោក ជូ វណ្ណៈ អគ្គនាយកនៃនិយ័តករអាជីវកម្មអចលនវត្ថុ និងបញ្ចាំ បានឱ្យដឹងថា ជាធម្មតានិយ័តករ​តែងផ្តល់អាជ្ញាបណ្ណដល់ម្ចាស់អាជីវកម្មអចលនវត្ថុ ឬដីឡូតិ៍ ក្រោយពេលដែលពិនិត្យឃើញថា មានប្លង់កម្មសិទ្ធិច្បាស់​លាស់ និងត្រឹមត្រូវ។ ប៉ុន្តែភាពមិនប្រក្រីដែលកើតឡើងនោះ គឺម្ចាស់អាជីវកម្ម បានបង្កប់ផែនការផ្ទៃក្នុងផ្សេង ដោយធ្វើ​កិច្ចព្រមព្រៀងជាមួយអតិថិជន ដូចករណីឱ្យអតិថិជនទៅខ្ចីលុយធនាគារ ដើម្បីបង្កើតគម្រោងវិនិយោគរួម នោះគឺជាកិច្ចការខុសច្បាប់។

លោកបានគូសបញ្ជាក់ដូច្នេះថា«តាមពិតទៅយើងបានឱ្យនិតិវិធីក្នុងក្របខណ្ឌនៃការផ្តល់ឱ្យអាជីវកម្មដីឡូតិ៍ស្របច្បាប់ហើយ ប៉ុន្តែយើងមិនដឹងថា ផ្ទៃក្នុងពួកគាត់មានកិច្ចព្រមព្រៀងដាច់ដោយឡែកទៀត រវាងក្រុមហ៊ុន និងអតិថិជន ជាមួយ​ធនាគារ ក្នុងការខ្ចីលុយយកមកវិនិយោគគម្រោង ដែលនេះជាបញ្ហាត្រូវត្រួតពិនិត្យត និងដោះស្រាយបន្តទៀត»។

​​​​​​បើតាមលោក ជូ វណ្ណៈ កន្លងទៅ និយ័តករតែងតែត្រួតពិនិត្យ និងតាមដានជាប្រចាំ ជាពិសេសនៅពេល​ដែលឃើញក្រុម​ហ៊ុនអចលនវត្ថុណាមួយធ្វើការផ្សព្វផ្សាយនៅលើបណ្តាញសង្គម នឹងចាត់តាំងក្រុមការងារឱ្យត្រួតពិនិត្យ ប្រសិនឃើញថា ពុំទាន់មានអាជ្ញាបណ្ណនោះទេ នឹងអញ្ជើញពួកគេឱ្យចូលមកដាក់ពាក្យស្នើសុំអាជ្ញាបណ្ណឱ្យបានត្រឹមត្រូវ។

ពាក់ព័ន្ធនឹងបញ្ហានេះ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើង​ហេតុផលតាមរយៈការស្រាវជ្រាវថា សព្វថ្ងៃនេះ អាជីវករ ឬម្ចាស់អាជីវកម្មពិបាកក្នុងការសុំអាជ្ញាបណ្ណ។ ពិបាកសុំច្បាប់​មានកត្តាច្រើន ពោលគឺអាជ្ញាធរធ្វើឱ្យមានការលំបាកដើម្បីឱ្យមានការសម្របសម្រួល មានន័យថា បង្កើតបញ្ហា ដើម្បីដោះស្រាយបញ្ហា។ ជាមួយគ្នានេះ អាជីវករខ្លះ ជាប្រភេទអាជីវកម្មធ្វើនំអត់ម្សៅ។ លោកបណ្ឌិត សង្កត់ធ្ងន់ថា ការមិនគោរពច្បាប់ រួមផ្សំនឹងភាពធូររលុងនៃច្បាប់ ដោយមិនបានអនុវត្តឱ្យបានតឹងរឹង ធ្វើឱ្យម្ចាស់អាជីវកម្មប្រឈម​នឹងការដួលរលំ ខណៈដែលអាជីវកម្មដែលមានច្បាប់ទាំងឡាយ មិនដួលនោះទេ។

ចំពោះករណីពាក្យបណ្តឹងរវាងអតិថិជន និងម្ចាស់បុរីរឹបអូសលំនៅឋាន បានកើនឡើងជាង ៤០០បណ្តឹងហើយ គិតត្រឹមពាក់កណ្តាលខែ មិថុនា។ នេះបើតាមការបញ្ជាក់របស់លោក ជូ វណ្ណៈ ដែលទទួលបានទិន្នន័យនេះ ពីក្រុមប្រឹក្សាអភិវឌ្ឍន៍កម្ពុជា CDC និយ័តករអាជីវកម្មអចលនវត្ថុ និងបញ្ចាំ និងតាមរយៈអនឡាញ។

សូមបញ្ជាក់ថា ការកើនឡើងនៃពាក្យបណ្តឹងនេះ ក្រោយពីសម្តេចតេជោ ហ៊ុន សែន នាយករដ្ឋមន្រ្តីបាន​អំពាវនាវដល់ម្ចាស់បុរី បញ្ឈប់ការរឹបអូសផ្ទះពលរដ្ឋដែលបង់យឺតយ៉ាវ ឬពុំមានលទ្ធភាពបង់រំលស់បន្ត ដោយធ្វើការសម្របសម្រួល ក្នុងយន្តការឈ្នះឈ្នះទាំងអស់គ្នា។ ករណីនេះ សម្តេចតេជោ បានបញ្ជាឱ្យស្ថាបន​ពាក់ព័ន្ធរួមមានក្រុមប្រឹក្សាអភិវឌ្ឍន៍កម្ពុជា និងក្រសួងសេដ្ឋកិច្ច ដោះស្រាយជាបន្ទាន់៕

​

The post និយ័តករបញ្ជាក់មូលហេតុនាំឱ្យកើតមានទំនាស់រវាងអតិថិជន និងម្ចាស់អាជីវកម្មអចលនវត្ថុ appeared first on Kampuchea Thmey Daily.