លោក ឌិត ទីណា Archives - Kampuchea Thmey Daily

លោក ឌិត ទីណា៖ សង្គ្រាមតំបន់មជ្ឍិមបូព៌ា តម្លៃទំនិញនឹងកើនឡើង

deth leng — Fri, 20 Mar 2026 02:32:54 +0000

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា សង្គ្រាមនៅតំបន់មជ្ឈិមបូព៌ា នឹងធ្វើឱ្យអតិផរណាកើនឡើង ខណៈក្រសួងកសិកម្ម ក៏ត្រៀមវាយតម្លៃស្ថានភាពនេះដែរ។

លោករដ្ឋមន្ត្រី ឌិត ទីណា បានលើកឡើងនៅក្នុងសន្និបាតបូកសរុបលទ្ធផលការងាររបស់ក្រសួងកសិកម្ម នៅថ្ងៃទី ១៩ ខែមីនា ឆ្នាំ ២០២៦ថា ក្រសួងកសិកម្មនឹងត្រៀមចូលរួមវាយតម្លៃនូវស្ថានភាពពិភពលោក ខណៈសង្គ្រាមឈូងសមុទ្រ ដែលបានធ្វើឱ្យប៉ះពាល់ទៅដល់ថ្លៃប្រេង និងប៉ះពាល់ទៅដល់ទំនិញផ្សេងៗ។

លោកយល់ឃើញថា៖ «ពេលនោះអត្រានៃអតិផរណា នឹងមានការកើនឡើងមួយចំនួន ពេលនោះចាំពិនិត្យជាមួយគ្នា តើយើងចង់បានម្ហូបថោក ឬយើងចង់បានកសិផលថ្លៃ»។

នៅក្នុងឆ្នាំ២០២៥ កន្លងទៅនេះ វិស័យកសិកម្មកម្ពុជាបានបង្ហាញពីភាពធន់ និងការរីកចម្រើនគួរឱ្យកត់សម្គាល់ ដោយបានដើរតួនាទីយ៉ាងសំខាន់ក្នុងការធានាសន្តិសុខស្បៀង បង្កើតការងារ និងទ្រទ្រង់កំណើនសេដ្ឋកិច្ចជាតិ ទោះបីជាពិភពលោក និងតំបន់ជួបប្រទះនឹងបញ្ហាប្រឈមជាច្រើនក៏ដោយ។

យោងតាមក្រសួងកសិកម្ម នៅក្នុងឆ្នាំ ២០២៥ វិស័យកសិកម្មបានរួមចំណែកប្រមាណ ១៦,១% ក្នុងផលិតផលសរុបក្នុងស្រុក (GDP) ជាមួយនឹងកំណើនប្រចាំឆ្នាំ ១,២% ដែលធ្វើឱ្យតម្លៃបន្ថែមសរុបនៃវិស័យនេះកើនឡើងដល់ជាង ៨,៣ពាន់លានដុល្លារអាមេរិក។

ការនាំចេញម្រេចបានទឹកប្រាក់ជិត ៦,៥ ពាន់លានដុល្លារ (កើនឡើងជាង ៣២០លានដុល្លារ ធៀបនឹងឆ្នាំ២០២៤) ក្នុងនោះ អនុវិស័យដំណាំមានទំហំធំជាងគេគឺជាង ៥,៦ពាន់លានដុល្លារ។

ផលិតផលកសិកម្មកម្ពុជាដែលមានសក្តានុពលនាំចេញរួមមាន ស្រូវ អង្ករ កៅស៊ូ ដំឡូងមី គ្រាប់ស្វាយចន្ទី ស្វាយ ម្រេច ចេក និងទុរេនជាដើម៕

អត្ថបទ៖ ឡេង ដេត

The post លោក ឌិត ទីណា៖ សង្គ្រាមតំបន់មជ្ឍិមបូព៌ា តម្លៃទំនិញនឹងកើនឡើង appeared first on Kampuchea Thmey Daily.

រដ្ឋមន្ត្រី៖ វិស័យកសិកម្មរួមចំណែក ១៦% នៃផលិតផលក្នុងស្រុកសរុប

deth leng — Thu, 19 Mar 2026 08:07:54 +0000

វិស័យកសិកម្មបានរួមចំណែក ១៦% ដល់ផលិតផលក្នុងស្រុកសរុបរបស់កម្ពុជា ក្នុងឆ្នាំ ២០២៥ ខណៈផលិតកម្មកសិកម្ម ស្រូវ អង្ករ និងដំណាំរួមផ្សំមានលទ្ធភាពគ្រប់គ្រាន់ក្នុងការផ្គត់ផ្គង់តម្រូវការក្នុងស្រុក និងធានាបានូវសន្តិសុខស្បៀងសម្រាប់ប្រជាពលរដ្ឋ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍នៅក្នុងពិធីសន្និបាតបូកសរុបការងារក្រសួងកសិកម្ម រុក្ខាប្រមាញ់ និងនេសាទទូទាំងប្រទេសប្រចាំឆ្នាំ២០២៥ និងទិសដៅអនុវត្តឆ្នាំ ២០២៦ នៅថ្ងៃទី ១៩ ខែមីនា ថា វិស័យកសិកម្មចូលរួមក្នុងសេដ្ឋកិច្ចចំនួន ១៦ ភាគរយ សម្រាប់ឱ្យប្រជាពលរដ្ឋមានហូប។

លោក ឌិត ទីណាបញ្ជាក់ថា៖ «កុំឱ្យថា វិស័យកសិកម្មចូលរួម ៨០% ដូចកាលពីមុន ប៉ុន្តែហូបអត់គ្រាន់ តម្លៃម្ហូបវាថ្លៃ ឥឡូវ ១៦% នៃសេដ្ឋកិច្ចជាតិ ក៏ប៉ុន្តែតម្លៃម្ហូបអាហារ យើងរកហូបាន»។

លោករដ្ឋមន្ត្រីបានពន្យល់ថា៖«កុំឱ្យមានការយល់ច្រលំថា វិស័យកសិកម្មគឺជាវិស័យដែលយើងត្រូវយកទៅធ្វើជាមហាអំណាចសេដ្ឋកិច្ច គឺយើងធ្វើសម្រាប់ឱ្យមានហូប ក្នុងតម្លៃសមរម្យ ដោយមិនចាំបាច់មានការនាំចូល។ មួយផ្នែកមានហូប ហើយមួយផ្នែកទៀតឱ្យគាត់មានបាន ឱ្យគាត់លក់ចំណេញ និងមានប្រើ»។

វិស័យកសិកម្មគឺជាសសរស្តម្ភក្នុងចំណោមសសរស្តម្ភទាំងបួនដែលគាំទ្រដល់កំណើនសេដ្ឋកិច្ចរបស់កម្ពុជា បន្ថែមពីលើការនាំចេញសម្លៀកបំពាក់ ស្បែកជើង វិស័យទេសចរណ៍ វិស័យសំណង់ និងអចលនទ្រព្យ។

រាជរដ្ឋាភិបាលបានប្រកាសពីការអនុវត្តគោលនយោបាយយុទ្ធសាស្ត្រថ្មីមួយ សំដៅធ្វើឱ្យប្រសើរឡើងនូវវិស័យកសិកម្មពីកសិកម្មគ្រួសារទៅជាកសិកម្មពាណិជ្ជកម្ម និងបង្កើនប្រាក់ចំណូលរបស់កសិករតាមរយៈផលិតផលដែលមានតម្លៃបន្ថែម។

យោងតាមក្រសួងកសិកម្ម នៅក្នុងឆ្នាំ ២០២៥ កម្ពុជារកចំណូលបាន ៦,៤៦ ពាន់លានដុល្លារ ពីការនាំចេញផលិតផលកសិកម្ម កើនឡើង ៧,៣ ភាគរយ ធៀបនឹងឆ្នាំ ២០២៤។ ផលិតផលមានសក្តានុពលនាំចេញរួមមាន ស្រូវ អង្ករ កៅស៊ូ ដំឡូងមី គ្រាប់ស្វាយចន្ទី ស្វាយ ម្រេច ចេក និងទុរេនជាដើម៕

The post រដ្ឋមន្ត្រី៖ វិស័យកសិកម្មរួមចំណែក ១៦% នៃផលិតផលក្នុងស្រុកសរុប appeared first on Kampuchea Thmey Daily.

ធនាគារស្ថាបនា ចុះ MoU ជាមួយក្រសួងកសិកម្មផ្ដល់ទុនកម្ចីការប្រាក់ទាបដល់សហគមន៍កសិកម្មទំនើប

Din Thary — Wed, 21 Jan 2026 03:12:17 +0000

ធនាគារ ស្ថាបនា (Sathapana Bank Plc.) បានក្លាយជាធនាគារដៃគូទី៥ ដែលបានចុះ MoU ជាមួយក្រសួងកសិកម្មដើម្បីផ្ដល់ទុនកម្ចីការប្រាក់ទាបជូនដល់សហគមន៍កសិកម្មទំនើប ដោយនឹងត្រៀមកញ្ចប់ថវិកាពិសេសចំនួន ៣ លានដុល្លារអាមេរិកសម្រាប់ផ្តល់ជាឥណទានជូនដល់សហគមន៍ក្នុងលក្ខខណ្ឌសមស្របមួយ។

នៅថ្ងៃទី២០ ខែមករា ឆ្នាំ២០២៦ នេះ ក្រសួងកសិកម្ម រុក្ខាប្រមាញ់ និងនេសាទ បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយធនាគារ ស្ថាបនា និងក្រុមហ៊ុន ខាបូន ខេភីថល ឯ.ក (Carbon Capital Co., Ltd)។

ក្នុងឱកាសនោះលោករដ្ឋមន្ត្រីក្រសួងកសិកម្ម ឌិត ទីណា បានមានប្រសាសន៍ស្វាគមន៍ក្នុងការបង្កើតកិច្ចសហប្រត្តិបត្តិការថ្មីជាមួយវិស័យឯកជន ដោយអនុស្សរណៈនៃការយោគយល់គ្នាទាំងពីរនេះនឹងចូលរួមចំណែកយ៉ាងសំខាន់ ក្នុងបង្កើនការអភិវឌ្ឍវិស័យកសិកម្ម លើកកម្ពស់ជីវភាពប្រជាពលរដ្ឋ និងបង្កើននិរន្តភាព។

បន្ទាប់ពីការចុះ MoU នេះ ធនាគារ ស្ថាបនា បានក្លាយជាធនាគារដៃគូទី៥ ដែលបានចុះ MoU ជាមួយក្រសួងកសិកម្មដើម្បីផ្ដល់ទុនកម្ចីការប្រាក់ទាបជូនដល់សហគមន៍កសិកម្មទំនើប ដោយធនាគារ ស្ថាបនា នឹងត្រៀមកញ្ចប់ថវិកាពិសេសចំនួន ៣ លានដុល្លារអាមេរិកសម្រាប់ផ្តល់ជាឥណទានជូនដល់សហគមន៍ក្នុងលក្ខខណ្ឌសមស្របមួយ។

ចំណែកឯក្រុមហ៊ុន ខាបូន ខេភីថល គឺជាក្រុមហ៊ុនដែលធ្វើការប្រមូលកាកសំណល់លាមកពីកសិដ្ឋានចិញ្ចឹមជ្រូកមកធ្វើផលិតកម្មជីកំប៉ុស ក្នុងបំណងកាត់បន្ថយការបំភាយឧស្ម័នកាបូន ផ្គត់ផ្គង់ជីកំប៉ុសគុណភាពខ្ពស់ បង្កើតប្រភពចំណូលបន្ថែមជូនកសិករចិញ្ចឹមជ្រូក ព្រមទាំងធ្វើអាជីវកម្មឥណទានកាបូនផងដែរ។

លោករដ្ឋមន្ត្រី សង្ឃឹមថា តាមរយៈMoUនេះ ក្រុមហ៊ុន ខានបូន ខេភីថល នឹងធ្វើវិភាគទានប្រាក់ចំណូលមួយផ្នែកសម្រាប់គាំទ្រដល់មូលនិធិអភិវឌ្ឍន៍សហគមន៍កសិកម្ម។

ជាមួយគ្នានេះ លោករដ្ឋមន្ត្រី ឌិត ទីណា ក៏បានអរគុណធនាគារ ស្ថាបនា ចំពោះការបង្ហាញទំនុកចិត្តផ្ដល់ទុនកម្ចីដើម្បីគាំទ្រសហគមន៍កសិកម្មទំនើប ព្រមទាំងក្រុមហ៊ុន ខាបូន ខេភីថល ចំពោះការវិនិយោគប្រកបដោយទំនួលខុសត្រូវខ្ពស់ ដែលចែករំលែកចំណូលដើម្បីគាំទ្រផលប្រយោជន៍រួមរបស់សង្គម ជាពិសេសការគាំទ្រមូលនិធិអភិវឌ្ឍន៍សហគមន៍កសិកម្ម។ បន្ថែមពីនេះ លោកក៏លើកទឹកចិត្តឱ្យស្ថាប័នវិស័យឯកជនដទៃទៀតចូលរួមលើកស្ទួយវិស័យកសិកម្មតាមគំរូរបស់ដៃគូទាំងពីរនេះ៕

The post ធនាគារស្ថាបនា ចុះ MoU ជាមួយក្រសួងកសិកម្មផ្ដល់ទុនកម្ចីការប្រាក់ទាបដល់សហគមន៍កសិកម្មទំនើប appeared first on Kampuchea Thmey Daily.

កម្ពុជាកំពុងជំរុញការតភ្ជាប់ទីផ្សារអង្ករថ្មី ទៅហ្វីលីពីន

Din Thary — Thu, 04 Dec 2025 03:16:22 +0000

កម្ពុជាកំពុងជំរុញការតភ្ជាប់ទីផ្សារអង្ករថ្មី ទៅកាន់ប្រទេសហ្វីលីពីន តាមរយៈកិច្ចសហប្រតិបត្តិការយ៉ាងជិតស្និត និងក្រោមការសម្របសម្រួលដោយផ្ទាល់ពីសំណាក់ក្រសួងកសិកម្មកម្ពុជា និងហ្វីលីពីន។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៣ ខែធ្នូ ឆ្នាំ ២០២៥ បានជួបពិភាក្សាការងារជាមួយគណៈប្រតិភូក្រុមហ៊ុនហ្វីលីពីន ដឹកនាំដោយលោក Joseph Rudolf Lo ប្រធាននិងជានាយកប្រតិបត្តិក្រុមហ៊ុន Food Terminal Incorporated ក្នុងគោលបំណងពិនិត្យលទ្ធភាពនៃការបញ្ជាទិញអង្ករដោយផ្ទាល់ពីកម្ពុជា ដើម្បីផ្គត់ផ្គង់ដល់ទីផ្សារប្រទេសហ្វីលីពីន ដែលជាការបើកច្រកទីផ្សារស្រូវបន្ថែមទៀតដល់កសិករកម្ពុជា។

ដើម្បីធ្វើឱ្យកិច្ចការនេះកាន់តែមានប្រសិទ្ធភាព ក្រសួងកសិកម្មបានសម្របសម្រួលឱ្យមានជំនួបដោយផ្ទាល់រវាងគណៈប្រតិភូក្រុមហ៊ុនហ្វីលីពីន និងសហព័ន្ធស្រូវអង្ករកម្ពុជា ដើម្បីចរចាលម្អិតអំពីលទ្ធភាពនៃការនាំចេញ និងជំរុញឱ្យការបញ្ជាទិញនេះអាចកើតឡើងក្នុងពេលឆាប់ៗ។

លោក ឌិត ទីណា មានប្រសាសន៍ថា ការតភ្ជាប់ទំនាក់ទំនងកសិពាណិជ្ជកម្មថ្មីនេះ នឹងផ្តល់ផលប្រយោជន៍ទៅវិញទៅមកសម្រាប់ប្រទេសទាំងពីរ។ ភាគីហ្វីលីពីននឹងទទួលបានប្រភពផ្គត់ផ្គង់អង្ករដែលមានគុណភាពខ្ពស់ ខណៈដែលកម្ពុជានឹងទទួលបានទីផ្សារអន្តរជាតិថ្មីមួយទៀត។

ការបើកទីផ្សារអង្ករថ្មីនេះ ក៏នឹងជួយឱ្យរោងម៉ាស៊ីនកិនស្រូវដៃគូរបស់ក្រសួងកសិកម្មមានលទ្ធភាពក្នុងការប្រមូលទិញស្រូវពីបងប្អូនប្រជាកសិកររបស់យើងបានកាន់តែច្រើន និងទូលំទូលាយជាងមុន។

default

យោងតាមសហព័ន្ធស្រូវអង្ករកម្ពុជា គិតត្រឹមរយៈពេល ៩ ខែ ឆ្នាំ ២០២៥ កម្ពុជាបាននាំចេញអង្ករចំនួន ៥៩៦ ៣៤១ តោន គិតជាទឹកប្រាក់ បានចំនួនជិត ៤០៩ លានដុល្លារ ទៅកាន់គោលដៅចំនួន ៦៩៕

The post កម្ពុជាកំពុងជំរុញការតភ្ជាប់ទីផ្សារអង្ករថ្មី ទៅហ្វីលីពីន appeared first on Kampuchea Thmey Daily.

រដ្ឋមន្រ្តីក្រសួងកសិកម្ម៖ «តាមរយៈសហគមន៍កសិកម្មទំនើប ជួយធានាការទិញស្រូវកសិករបានតម្លៃសមរម្យ»

Dy Bunnara — Sun, 02 Nov 2025 09:06:16 +0000

លោក ឌិត ទីណា រដ្ឋមន្រ្តីក្រសួងកសិកម្ម បានជំរុញឲ្យកសិកររៀបចំបង្កើតសហគមន៍កសិកម្មទំនើប ដើម្បីធានាបានទីផ្សារផលកសិកម្ម និងរក្សាបានតម្លៃសមរម្យ។

លោករដ្ឋមន្ត្រីបានលើកឡើងបែបនេះ ក្រោយពីមានការត្អូញត្អែរពីកសិករលើការធ្លាក់ចុះតម្លៃផលស្រូវ ក្រោយចាប់ផ្តើមដល់រដូវប្រមូលផល។

លោករដ្ឋមន្រ្តីបានគូសបញ្ជាក់ថា កន្លងមកក្រសួងកសិកម្មបានធ្វើការផ្សព្វផ្សាយលើការជំរុញរៀបចំបង្កើតសហគមន៍កសិកម្មទំនើប ដើម្បីធានាថ្លៃផលកសិកម្មរបស់កសិករនិងការស្វែងរកទីផ្សារមុនចាប់ផ្ដើមដាំដុះ។

លោកថា កសិករទូទាំំងប្រទេសមានប្រមាណ ១,៧ លានគ្រួសារ ហើយផ្ទៃដីដាំដុះមានជាង ៣ លានហិកតា ខណៈសហគមន៍កសិកម្មទំនើបមិនទាន់មានគ្រប់ឃុំនៅឡើយទេ។

យ៉ាងណាមិញពាក់ព័ន្ធបញ្ហាចំពោះមុខនេះ លោករដ្ឋមន្ត្រីឲ្យប្រែក្លាយការអាណិតអាសូរទៅជាសកម្មភាពជាក់ស្តែង ដើម្បីជួយដោះស្រាយបញ្ហាប្រឈមថ្លៃស្រូវដល់កសិករ។

លោកអំពាវនាវឲ្យគ្រប់ភាគីពាក់ព័ន្ធចូលរួមក្នុងការជួយដោះស្រាយបញ្ហារបស់កសិករដូចជា រោងម៉ាស៊ីនជួយទិញស្រូវពីកសិករក្នុងតម្លៃសមរម្យ ម្ចាស់ដេប៉ូជីថ្នាំជួយពន្យាការទូទាត់សងជំពាក់ ម្ចាស់ដីជួយកាត់បន្ថយថ្លៃឈ្នួលដី រួមទាំងពលរដ្ឋជួយទិញអង្ករនិងគាំទ្រដល់រោងម៉ាស៊ីនដៃគូដែលបានទិញស្រូវពីកសិករនិងសហគមន៍៕

The post រដ្ឋមន្រ្តីក្រសួងកសិកម្ម៖ «តាមរយៈសហគមន៍កសិកម្មទំនើប ជួយធានាការទិញស្រូវកសិករបានតម្លៃសមរម្យ» appeared first on Kampuchea Thmey Daily.

ក្រោយបញ្ចប់ការសិក្សា និស្សិតកសិកម្មស្ទើរ១០០% ទទួលបានការងារធ្វើ

Thoeun Vansong — Tue, 16 Sep 2025 06:38:42 +0000

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា នៅថ្ងៃអង្គារនេះ បាននិយាយថា អត្រានិស្សិតដែលសិក្សាជំនាញនានាក្នុងវិស័យកសិកម្មស្ទើរតែ១០០% គឺទទួលបានឱកាសការងារធ្វើគ្រប់ៗគ្នាក្រោយបញ្ចប់ការសិក្សាតាមជំនាញរបស់ខ្លួនដោយជោគជ័យ។

លោករដ្ឋមន្ត្រី ឌិត ទីណា បានថ្លែងឱ្យដឹងថា រយៈពេល៤០ឆ្នាំកន្លងមកនេះ គ្រឹះស្ថានឧត្តមសិក្សាកសិកម្មទាំង៣ ក្រោមចំណុះក្រសួងកសិកម្ម រុក្ខាប្រមាញ់ និងនេសាទ បានរួមចំណែកកសាងធនធានមនុស្សសរុបចំនួន៣១ ៨៤១នាក់ (នារី៨ ៤២២នាក់ ស្មើនឹង២៤%) ដែលក្នុងនោះ សាកលវិទ្យាល័យភូមិន្ទកសិកម្ម ចំនួន ១៤ ៩៨១នាក់ វិទ្យាស្ថានជាតិកសិកម្មព្រែកលៀប ចំនួន១១ ៦៥១នាក់ និងវិទ្យាស្ថានជាតិកសិកម្មកំពង់ចាម ចំនួន៥ ២០៩នាក់ ជាមួយនឹងអត្រានិស្សិតបញ្ចប់ការសិក្សាជាមធ្យមប្រមាណ៨០០នាក់ក្នុងមួយឆ្នាំ។

លោករដ្ឋមន្ត្រី បន្តឱ្យដឹងថា គ្រឹះស្ថានឧត្តមសិក្សាកសិកម្មទាំង៣ ក៏កំពុងបន្តបណ្តុះបណ្តាលនិស្សិតចំនួន៥ ៨៦២នាក់ ក្នុងឆ្នាំសិក្សា២០២៤-២០២៥ រួមទាំងនិស្សិតអាហារូបករណ៍សម្តេចតេជោ និងសម្តេចកិត្តិព្រឹទ្ធបណ្ឌិត ចំនួន១១៩នាក់ (នារី៥៦នាក់) ផងដែរ។

តាមការស្ទង់មតិ ដែលអះអាងឱ្យដឹងដោយរដ្ឋមន្ត្រីកសិកម្ម និស្សិតដែលបានបញ្ចប់ការសិក្សាប្រមាណ៩៨,៨% ទទួលបានការងារធ្វើ ដែលក្នុងនោះភាគច្រើនលើសលប់បម្រើការក្នុងវិស័យឯកជន និងចំនួនប្រមាណ៩៨៣នាក់ បានប្រឡងជាប់ជាមន្រ្តីកសិកម្មឃុំ ខណៈដែលមួយចំនួនទៀតបានបង្កើតអាជីវកម្មដោយខ្លួនឯង។

ការលើកឡើងខាងលើរបស់លោករដ្ឋមន្ត្រី ឌិត ទីណា បានធ្វើឡើងក្នុងពិធីប្រគល់សញ្ញាបត្រដល់និស្សិតជ័យលាភីបញ្ចប់ការសិក្សានៃគ្រឹះស្ថានឧត្តមសិក្សាកសិកម្មទាំង៣ ដែលរួមមាន សាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម ដែលប្រព្រឹត្តទៅនៅព្រឹកថ្ងៃទី១៦ ខែកញ្ញា ឆ្នាំ២០២៥ ក្រោមអធិបតីភាពលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា៕

ដោយ៖ ធឿន វ៉ាន់សុង

The post ក្រោយបញ្ចប់ការសិក្សា និស្សិតកសិកម្មស្ទើរ១០០% ទទួលបានការងារធ្វើ appeared first on Kampuchea Thmey Daily.

កម្ពុជា-ទីម័រឡេស្តេ បន្តពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ

Din Thary — Thu, 04 Sep 2025 03:15:00 +0000

កម្ពុជា-ទីម័រឡេស្ត បានឯកភាពគ្នាក្នុងការបន្តពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសលើវិស័យកសិកម្ម ដែលប្រទេសកម្ពុជាកំពុងក្លាយជាតួអង្គសំខាន់មូយនៃការផ្គត់ផ្គង់ស្បៀងអាហារទាំងក្នុងតំបន់ និងសកល។

នៅរសៀលថ្ងៃទី០៣ ខែកញ្ញា ឆ្នាំ២០២៥ នេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបជាមួយ លោក Marcos dos Reis da Costa ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យទីម័រឡេស្តេ ប្រចាំព្រះរាជាណាចក្រកម្ពុជា ក្នុងជំនួបសម្តែងការគួរសម និងពិភាក្សាការងារ នៅទីស្តីការក្រសួងកសិកម្ម។

លោករដ្ឋមន្ត្រី បានសម្តែងការស្វាគមន៍ និងអបអរសាទរឯកអគ្គរដ្ឋទូត ក្នុងការកាន់តំណែងថ្មី ហើយបានពិភាក្សាការពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសការពិនិត្យលទ្ធភាពជំរុញកសិ-ពាណិជ្ជកម្ម ការធានាសន្តិសុខស្បៀង និងការផ្លាស់ប្តូរកម្មសិក្សាកសិករប្រទេសទាំងពីរ៕

The post កម្ពុជា-ទីម័រឡេស្តេ បន្តពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ appeared first on Kampuchea Thmey Daily.

សហព័ន្ធស្រូវអង្ករកម្ពុជា យល់ព្រមជួយសម្រួលទិញស្រូវស្រង៉ែក្នុងតម្លៃសមរម្យពីកសិករ

Din Thary — Mon, 11 Aug 2025 10:08:31 +0000

នៅរសៀលថ្ងៃទី១១ ខែសីហា ឆ្នាំ២០២៥ នេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ឱ្យដឹងថា សហព័ន្ធស្រូវអង្ករកម្ពុជាបានយល់ព្រមជួយសម្រួលដល់តម្លៃស្រូវស្រង៉ែឱ្យសមរម្យជូនប្រជាកសិករកម្ពុជាដែលកំពុងជួបប្រទះបញ្ហាស្រូវធ្លាក់ថ្លៃ។

ក្នុងកិច្ចប្រជុំពិភាក្សាវាយតម្លៃលើស្ថានភាពទីផ្សារ និងតម្លៃស្រូវ-អង្ករ លោក ឌិត ទីណា បានមានប្រសាសន៍ថា កិច្ចប្រជុំនេះរៀបចំឡើងដើម្បីជួបប្រជុំជាមួយសហព័ន្ធស្រូវអង្ករកម្ពុជា ដើម្បីកំណត់មូលហេតុនៃការធ្លាក់ថ្លៃស្រូវស្រង៉ែនាពេលថ្មីៗនេះ និងរៀបចំយុទ្ធសាស្ត្រដំណោះស្រាយប្រកបដោយប្រសិទ្ធភាព។

ជាលទ្ធផល សហព័ន្ធស្រូវអង្ករកម្ពុជា បានឯកភាពជួយសម្រួលការប្រមូលទិញស្រូវស្រង៉ែក្នុងតម្លៃសមរម្យ ដែលប្រជាកសិករ និងរោងម៉ាស៊ីនកិនស្រូវអាចទទួលយកបាន។

លោករដ្ឋមន្ត្រី ឌិត ទីណា បានលើកឡើងថា ជាវិធានការណ៍រយៈពេលមធ្យម និងរយៈពេលវែង ក្រសួងនឹងធ្វើពិពិធកម្មពង្រីកទីផ្សារនាំចេញឱ្យទូលំទូលាយជាងទីផ្សារសព្វថ្ងៃ ហើយពិនិត្យលទ្ធភាពផ្ដល់ប្រាក់កម្ចីជូនរោងម៉ាស៊ីនស្រូវ ដើម្បីជួយសម្រាលបន្ទុក និងបង្កើនសមត្ថភាពរបស់រោងម៉ាស៊ីនក្នុងការប្រមូលទិញស្រូវពីប្រជាកសិករ។

ទៅមុខ ក្រសួងនឹងបន្តពន្លឿនការចងក្រងសហគមន៍កសិកម្មទំនើប ដើម្បីកាត់បន្ថយថ្លៃដើមផលិតកម្ម ធានាតម្លៃ និងទីផ្សារ តាមការចុះកិច្ចសន្យាទិញលក់ទុកមុន ធានាគុណភាព ដែលជាកត្តាផ្ដល់ផលចំណេញច្រើនជូនប្រជាកសិករ។

សូមជម្រាបថា កិច្ចប្រជុំនាពេលនេះ ត្រូវបានរៀបចំឡើងក្នុងគោលបំណងពិភាក្សាជាមួយសហព័ន្ធស្រូវអង្ករកម្ពុជា អំពីមូលហេតុនៃការធ្លាក់ថ្លៃស្រូវស្រង៉ែនាពេលថ្មីៗនេះ និងស្វែងរកដំណោះស្រាយប្រកបដោយប្រសិទ្ធភាពរយៈពេលមធ្យម និងរយៈពេលវែង សំដៅទីផ្សារនាំចេញឱ្យទូលំទូលាយជាងមុន និងបង្កើនសមត្ថភាពក្នុងការប្រមូលទិញស្រូវពីប្រជាកសិករ៕

ដោយ៖ ឌិន ថារី

The post សហព័ន្ធស្រូវអង្ករកម្ពុជា យល់ព្រមជួយសម្រួលទិញស្រូវស្រង៉ែក្នុងតម្លៃសមរម្យពីកសិករ appeared first on Kampuchea Thmey Daily.