លោក តេង ប៉េងស៊ាង ស្ថាបនិកសហព័ន្ធ និងជាប្រធានសហព័ន្ធកីឡាហោះហើរកម្ពុជា បានមានប្រសាសន៍ប្រាប់ឱ្យ កម្ពុជាថ្មី ដឹងថា «កីឡាហោះហើរ មិនត្រឹមតែជាប្រភេទកីឡាសម្រាប់ការកម្សាន្តនោះទេ​ ប៉ុន្តែវាក៏ជាកីឡាមួយប្រភេទដែលសហព័ន្ធកីឡាហោះហើរកម្ពុជា កំពុងតែសិក្សា និងត្រៀមដាក់បញ្ចូលទៅក្នុងការប្រកួតផ្សេងៗ នាពេលខាងមុខផងដែរ»។

លោក តេង ប៉េងស៊ាង មានប្រសាសន៍បន្តថា ជាមួយនឹងការហ្វឹកហាត់ សិក្ខាកាមទាំងអស់ ត្រូវចុះឈ្មោះផ្ទាល់ និងមានសុខភាពរឹងមាំ ដោយពុំមានជំងឺទាក់ទងនឹង ផ្នែកបេះដូង ជាដើម។ ក្រៅពីនេះ សិក្ខាកាម ត្រូវតែឆ្លងកាត់ការបណ្ដុះបណ្ដាល ចាប់ពី ១២ ទៅ ១៥ ថ្ងៃ ចំណែកការសិក្សាទៀតសោត គឺសិក្សាសម្រាប់តែថ្ងៃសៅរ៍ និង អាទិត្យ តែប៉ុណ្ណោះ។ សម្រាប់ការបញ្ចប់វគ្គសិក្សា សិក្ខាកាម ដែលជាកីឡាករ​-កីឡាការនី នឹងទទួលបានវិញ្ញាបនបត្រ ទទួលស្គាល់ពីសហព័ន្ធកីឡាកម្ពុជាផ្ទាល់ និងអាចមានឱកាសហ្វឹកហាត់ជំនាញមួយនេះ បន្ថែមទៀតផងដែរ។

ជាមួយគ្នានោះ ប្រធានសហព័ន្ធកីឡាហោះហើរកម្ពុជា រូបនេះ ក៏បានបញ្ជាក់ដែរថា កីឡាហោះហើរនេះ មានដើមកំណើតមកពីប្រទេសខាងប៉ែកអឺរ៉ុប តាំងពីចន្លោះឆ្នាំ ១៩៩០ មកម្ល៉េះ។ លោកបន្ថែមទៀតថា កីឡាហោះហើរ នេះ ចូលមកប្រទេសកម្ពុជា តាំងពីឆ្នាំ ២០១៣ មកម្ល៉េះ ប៉ុន្តែពុំសូវទទួលបានការចាប់អារម្មណ៍ និងពេញនិយមពីសំណាក់ប្រជាជនខ្មែរប៉ុន្មាននោះទេ។ បច្ចុប្បន្ន កីឡាហោះហើរ មានសិក្ខាកាមហ្វឹកហាត់ចំនួន ២០ នាក់ កំពុងទទួលការបណ្ដុះបណ្ដាលទៅលើមេរៀនផ្សេងៗ ទាក់ទងនឹងប្រភេទកីឡាមួយនេះ។

គួរជម្រាបថា កីឡាហោះហើរ គឺជាកីឡាមួយប្រភេទ មានប្រភពមកពីប្រទេសមួយចំនួននៅបែកខាងអឺរ៉ុប ដែលតម្រូវឱ្យអ្នកហ្វឹកហាត់ ត្រូវមានស្មារតីខ្ពស់ និងមិនមានបញ្ហាបេះដូង ព្រោះការហោះហើរក្នុងរយៈកម្ពស់ខ្ពស់ ស្រដៀងទៅនឹងការលោតឆ័ត្រយោង ខុសប្លែកគ្នាត្រង់មានម៉ាស៊ីនជំនួយ (Paramotor) នៅពីក្រោយខ្នង តែប៉ុណ្ណោះ៕

អត្ថបទ ៖ សួស សិត

The post សហព័ន្ធកីឡាហោះហើរកម្ពុជា កំពុងសិក្សាត្រៀមដាក់បញ្ចូល កីឡាប្រភេទនេះ ក្នុងការប្រកួតផ្សេងៗ នាពេលខាងមុខ appeared first on Kampuchea Thmey Daily.