លោក ធួន ស៊ីណាន Archives - Kampuchea Thmey Daily

ប្រធានសមាគមន៍ទេសចរណ៍ PATA អះអាង សង្គ្រាមមជ្ឈិមបូព៌ា នឹងធ្វើឱ្យប៉ះពាល់ដល់វិស័យទេសចរណ៍កម្ពុជា និងតំបន់អាស៊ាន

Din Thary — Fri, 06 Mar 2026 03:52:43 +0000

លោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីហ្វិកកម្ពុជា (PATA) មានប្រសាន៍ថា សង្គ្រាមនៅក្នុងតំបន់មជ្ឈិមបូព៌ារវាងអាមេរិក អ៊ីស្រាអែល និងអ៊ីរ៉ង់ នឹងបង្កផលប៉ះពាល់យ៉ាងធ្ងន់ធ្ងរទៅដល់វិស័យសេដ្ឋកិច្ច និងវិស័យទេសចរណ៍ នៅកម្ពុជា និងតំបន់អាស៊ាន។

ប្រាប់«កម្ពុជាថ្មី» នៅថ្ងៃទី០៦ ខែមីនា ឆ្នាំ២០២៦ លោក ធួន ស៊ីណាន មានប្រសាសន៍ថា នៅតំបន់មជ្ឈិមបូព៌ា មានជើងហោះហើរចំនួន ៣ ដែលបានតភ្ជាប់ជើងហោះហើរត្រង់នាំភ្ញៀវទេសចរអន្តរជាតិមកកាន់តំបន់អាស៊ាន ក្នុងមាន Qatar Airways-QR (តារយៈ Hub-មជ្ឈមណ្ឌលទីក្រុងដូហា), Emirates Airlines-EK (តារយៈ Hub-មជ្ឈមណ្ឌលទីក្រុងឌូបៃ) និង Etihad Airways-EY (តារយៈ Hub-មជ្ឈមណ្ឌលទីក្រុងអាប៊ូដាប៊ី) ដែលហោះហើរត្រង់មកកាន់តំបន់អាស៊ាន ហើយធ្វើការចែកចាយភ្ញៀវទេសចរមកកាន់ កម្ពុជា ថៃ វៀតណាម និងបណ្តាប្រទេសផ្សេងៗទៀត នៅក្នុងតំបន់អាស៊ាន។

«ដូច្នេះ មានន័យថា ផលប៉ះពាល់ពីសង្គ្រាមឈ្លានពាននៅតំបន់មជ្ឈិមបូព៌ានេះមិនត្រឹមតែបង្កផលប៉ះពាល់ទៅដល់វិស័យសេដ្ឋកិច្ចសកលប៉ុណ្ណោះទេ ប៉ុន្តែវិស័យទេសចរណ៍សកលក៏ត្រូវតែប៉ះទង្កិចធ្ងន់ធ្ងរដូចគ្នាដែរ។ ព្រោះអាកាសយានដ្ឋានដែលជាបណ្តុំនៃការតភ្ជាប់ជើងហោះហើរធំៗមិនអាចធ្វើដំណើរបាននោះវានឹងធ្វើឱ្យមានការរាំងស្ទះជាក់ជាពុំខាន ដែលវានឹងធ្វើឱ្យមានការប៉ះពាល់យ៉ាងធ្ងន់ធ្ងរទៅដល់វិស័យសេដ្ឋកិច្ច ទេសចរណ៍ និងបញ្ហាផ្សេងៗទៀត ហើយនាពេលបន្តិចទៀតវាក៏នឹងធ្វើឱ្យប៉ះពាល់យ៉ាងធ្ងន់ធ្ងរដូចគ្នាទៅលើតម្លៃប្រេងដែរ»។ លោក ធួន ស៊ីណាន បន្ថែមបែបនេះ។

លោក ធួន ស៊ីណាន ក៏បានបន្តថា៖ «កម្ពុជានៅមានច្រកតភ្ជាប់ចូលមកច្រើនតាមរយៈចិន ជាក់ស្តែងមានយន្តហោះចិនជាច្រើនដែលបានតភ្ជាប់ជើងហោះហើរចូលមកកាន់ប្រទេសកម្ពុជា និងបាននាំមកនូវភ្ញៀវទេសចរអន្តរជាតិ ជាពិសេសភ្ញៀវមកពីតំបន់អ៊ឺរ៉ុប ទាំងអស់នេះជាផលមួយដែលធ្វើឱ្យកម្ពុជាមិនរងផលប៉ះពាល់ខ្លាំងពេក»។

ជុំវិញការលើកឡើងថា តើប្រទេសផ្សេងៗ មិនមានច្រកផ្សេងតភ្ជាប់ដូចជាប្រទេសកម្ពុជា? លោក ធួន ស៊ីណាន បានពន្យល់ថា ប្រទេសផ្សេងៗក៏មានច្រកតភ្ជាប់ដូចគ្នាដែរ ប៉ុន្តែត្រង់បញ្ហាលោកចង់បានន័យថា កម្ពុជាមានចំនួនតិច ប៉ុន្តែប្រទេសផ្សេងៗមានចំនួនច្រើនជាងកម្ពុជា។

លោក ស៊ិន ចាន់សិរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ការប៉ះទង្គិចគ្នានៅមជ្ឈិមបូព៌ា (តំបន់ឈូងសមុទ្រ) រយៈពេល ៤ ថ្ងៃ (គិតចាប់ពីថ្ងៃ ២៨ កុម្ភៈ ដល់ត្រឹមថ្ងៃ ៣ មិនា ២០២៦) បានធ្វើឱ្យមានការលុបជើងហោះហើរពាក់ព័ន្ធប្រមាណជាង ៩,៥០០ ជើងដែលឆ្លងកាត់នៅក្នុងតំបន់មជ្ឈិមបូព៌ា៕

ដោយ៖ ឌិន ថារី

The post ប្រធានសមាគមន៍ទេសចរណ៍ PATA អះអាង សង្គ្រាមមជ្ឈិមបូព៌ា នឹងធ្វើឱ្យប៉ះពាល់ដល់វិស័យទេសចរណ៍កម្ពុជា និងតំបន់អាស៊ាន appeared first on Kampuchea Thmey Daily.

រដ្ឋាភិបាល បន្តលើកលែងពន្ធ សម្រាប់សហគ្រាសទេសចរណ៍ នៅខេត្តសៀមរាប

deth leng — Wed, 18 Feb 2026 08:13:46 +0000

រាជរដ្ឋាភិបាលកម្ពុជាបានប្រកាសបន្តលើកលែងការបង់ពន្ធ ដល់សហគ្រាសក្នុងវិស័យទេសចរណ៍ រួមមាន សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ស្ថិតនៅខេត្តសៀមរាប ចាប់ពីខែមករា រហូតដល់ដំណាច់ខែធ្នូ ឆ្នាំ ២០២៦ ដើម្បីស្ដារវិស័យទេសចរណ៍ឱ្យបានល្អប្រសើរឡើងវិញ។

យោងតាមសេចក្ដីប្រកាស ដែលចុះហត្ថលេខាដោយឧបនាយករដ្ឋមន្ត្រី អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ផ្សព្វផ្សាយកាលពីថ្ងៃច័ន្ទ បញ្ជាក់ថា សហគ្រាសនឹងត្រូវបានលើកលែងពីពន្ធប្រចាំខែគ្រប់ប្រភេទ លើកលែងតែពន្ធលើតម្លៃបន្ថែម និងអាករលើការស្នាក់នៅចាប់ពីខែមករា ដល់ខែធ្នូ ឆ្នាំ២០២៦។

ពន្ធលើប្រាក់ចំណូលសម្រាប់ឆ្នាំ ២០២៦ ក៏នឹងត្រូវបានលើកលែង ហើយពន្ធលើប្រាក់ចំណូលណាមួយដែលបានបង់រួចហើយសម្រាប់ឆ្នាំនោះអាចត្រូវបានយកទៅអនុវត្តជាឥណទានពន្ធសម្រាប់ការកាត់បន្ថយពន្ធលើប្រាក់ចំណូលនៅឆ្នាំ២០២៧ ហើយសហគ្រាសទេសចរណ៍នឹងមិនត្រូវទទួលរងនូវការធ្វើសវនកម្មពន្ធសម្រាប់ឆ្នាំ២០២៦ឡើយ។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) យល់ឃើញថា ក្រោមវិធានការរបស់រដ្ឋាភិបាលគឺជាការចូលរួមជួយគាំទ្រដល់ម្ចាស់អាជីវកម្មក្នុងវិស័យទេសចរណ៍បន្ថែមទៀត។

លោកស៊ីណាន ចង់ឱ្យរដ្ឋាភិបាលពង្រីកការលើកទឹកចិត្តផ្នែកពន្ធឱ្យបានលើសហ្នឹង ដោយសារការប៉ះពាល់មិនមែនមានតែនៅខេត្តសៀមរាបនោះទេ។

ប្រធានសមាគមទេសចររូបនេះ បន្ថែមថា សង្គ្រាមកម្ពុជា-ថៃ និងបញ្ហាភូមិសាស្ត្រនយោបាយនៅលើពិភពលោកបានធ្វើឱ្យភ្ញៀវទេសចរអន្តរជាតិធ្លាក់ចុះ ប៉ុន្តែស្ថានភាពភ្ញៀវទេសចរណ៍មិនអាក្រក់ពេកទេ មានការលុបចោល និងការកក់ជាបន្តបន្ទាប់ ទោះបីមិនមានច្រើនទៅតាមអ្វីដែលយើងចង់បាន។

ភ្ញៀវទេសចរមកលេងខេត្តសៀមរាប ផ្តើមមានការធ្លាក់ចុះ ក្នុងនោះការកក់ថ្មីៗ ក៏លែងមាន ហើយការកក់ចាស់ៗ ក៏ចាប់ផ្តើមលុបជាបណ្តើរៗ ចាប់តាំងពីសង្គ្រាមផ្ទុះឡើងសារជាថ្មីកាលពីឆ្នាំមុន។

យោងតាមគ្រឹះស្ថានអង្គរ នៅក្នុងខែមករា ឆ្នាំ ២០២៦ ភ្ញៀវទេសចរអន្តរជាតិចំនួន ៩៣ ៤៩១ នាក់ បានទិញសំបុត្រចូលទស្សនារមណីយដ្ឋានអង្គរ ដែលនាំឱ្យកម្ពុជារកចំណូលបាន ៤,៥ លានដុល្លារ ធ្លាក់ចុះ ៣៤,៤៨% ធៀបនឹងរយៈពេលដូចគ្នាកាលពីឆ្នាំមុន។

នៅក្នុងឆ្នាំ ២០២៥ មានភ្ញៀវទេសចរអន្តរជាតិជាង ៩៥ ម៉ឺននាក់ បានទិញសំបុត្រចូលទស្សនារមណីយដ្ឋានអង្គរ កើន ៦,៧០% ធៀបនឹងឆ្នាំ ២០២៤ ដែលនាំឱ្យកម្ពុជារកចំណូលបានជិត ៤៥ លានដុល្លារ ធ្លាក់ចុះ ៦,៥១% ធៀបនឹងឆ្នាំ ២០២៤។

យោងតាមក្រសួងទេសចរណ៍ នៅក្នុងឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិចំនួន ៥,៥៧ លាននាក់ ធ្លាក់ចុះ ១៦,៩% ធៀបនឹងឆ្នាំ ២០២៤ និងទេសចរជាតិប្រមាណ ២៥ លាននាក់ ខណៈចំណូលទេសចរណ៍សម្រេចបានប្រមាណ ៣,៧ ពាន់លានដុល្លារ កើន ៣%៕

អត្ថបទ៖ ឡេង ដេត

The post រដ្ឋាភិបាល បន្តលើកលែងពន្ធ សម្រាប់សហគ្រាសទេសចរណ៍ នៅខេត្តសៀមរាប appeared first on Kampuchea Thmey Daily.

តំណាងវិស័យឯកជនជំរុញឱ្យក្រុមហ៊ុនអាកាសចរណ៍ធំៗទាំងអស់ពិចារណាហោះហើរត្រង់មកកាន់កម្ពុជា

Din Thary — Thu, 18 Dec 2025 06:35:22 +0000

លោក ធួន ស៊ីណាន ប្រធានសមាគមន៍ទេសចរណ៍កម្ពុជា នៅថ្ងៃទី១៨ ខែធ្នូ ឆ្នាំ២០២៥ នេះ បានស្នើឱ្យក្រុមហ៊ុនអាកាសចរណ៍ធំៗទាំងអស់ពិចារណក្នុងការហោះហើរត្រង់មកកាន់កម្ពុជា ចៀសវៀងហោះហើរឆ្លងកាត់អាកាសយានដ្ឋានថៃ ដែលថៃតែងតែបង្កការលំបាកដល់អ្នកដំណើរទាំងនោះ។

ពាក់ព័ន្ធនឹងវិស័យអាកាសចរណ៍ លោក ធួន ស៊ីណាន មានប្រសាសន៍ថា នេះជារឿងសំខាន់ណាស់ដែលយើងបានស្នើរសុំយ៉ាងទទូចទៅឱ្យមេដឹកនាំក៏ដូចជាប្រជាជននៅក្នុងពិភពលោកថ្កោលទោសទៅកាន់សកម្មភាពដ៏កម្រោលរបស់យោធាថៃដែលឈ្លាន និងបំផ្លាញសុខសន្តិភាពដែលមាននៅកម្ពុជា។

លោកថា ប្រទេសកម្ពុជាកសាងសុខសន្តិភាពយ៉ាងលំបាកណាស់ ទាំងសេដ្ឋកិច្ច ជាពិសេសទេសចរណ៍កម្ពុជាបាននិងកំពុងតែរីកចម្រើនពីមួយថ្ងៃទៅមួយថ្ងៃ ប៉ុន្តែដោយសារតែមហិច្ចតាដ៏ស្មោកគ្រោករបស់ថៃបានធ្វើឱ្យប្រទេសកម្ពុជា ជាពិសេសខេត្តទាំង ៧ ជាប់ព្រំដែនទទួលរងការបំផ្លាញយ៉ាងខ្ទេចខ្ទាំ ប្រជាជនជម្លៀសទៅរកទីទួលសុវត្ថិភាព ធ្វើឱ្យបាត់បង់សន្តិភាព។

ជុំវិញបញ្ហានេះ លោក ធួន ស៊ីណាន ស្នើរសុំឱ្យក្រុមហ៊ុនអាកាសចរណ៍ធំៗទាំងអស់ពិចារណាក្នុងការហោះហើរត្រង់មកកាន់កម្ពុជា។ លោកបានសង្កត់ធ្ងន់ថា «សម្រាប់អ្នកដែលធ្វើដំណើរមកកាន់កម្ពុជា កម្ពុជានៅតែជាគោលដៅដែលមានសុវត្ថិភាព ជាពិសេសខេត្តសៀមរាបនៅតែអាចទទួលភ្ញៀវទេសចរបាន ហើយកម្ពុជាក៏នៅតំបន់ផ្សេងៗជាច្រើនទៀត ពីព្រោះកម្ពុជាមាន ២៥ ខេត្ត-ក្រុង តំបន់ដែលមានសុខសន្តិភាពនៅមានច្រើន»។

លោក ធួន ស៊ីណាន បញ្ជាក់ថា សង្គ្រាមដែលថៃបង្ករឡើងជាមួយកម្ពុជា គឺកើតឡើងនៅជាប់ខេត្តព្រំដែនទាំង ៧ ជាប់ថៃប៉ុណ្ណោះ ដូច្នេះសូមប្រជាជនទាំងអស់នៅជុំវិញពិភពលោកដែលចង់ធ្វើដំណើរមកកាន់កម្ពុជានោះអាចធ្វើដំណើរដោយហោះហើរមកត្រង់មកកាន់កម្ពុជា ឬអាចភ្ជាប់ជើងហោះហើរតាមរយៈ សិង្ហបុរី ម៉ាឡេស៊ី ហុងកុង ចិន ជប៉ុន កូរ៉េ ឬក៏វៀតណាមដែលអាចហោះហើរបានយ៉ាងរីករាយមកកាន់ប្រទេសកម្ពុជា ហើយភ្ញៀវទេសចរបរទេសនានាគួរចៀសវៀងការធ្វើដំណើរតាមជើងហោះហើរតាមប្រទេសថៃ ព្រោះថៃតែងតែបង្កការលំបាកជាច្រើនសម្រាប់អ្នកដែលធ្វើដំណើរឆ្លងកាត់ប្រលានយន្តហោះរបស់ខ្លួន។

សូមជម្រាបថា ការលើកឡើងរបស់លោក ធួន ស៊ីណាន នេះ គឺស្របពេលដែល ស្ថានឯកអគ្គរាជទូតកម្ពុជាប្រចាំប្រទេសបារាំង បានចេញសេចក្តីជូនដំណឹងដល់អ្នកដំណើរ ជាពិសេស អ្នកដំណើរអឺរ៉ុបមួយចំនួនដែលបានធ្វើដំណើរទៅប្រទេសកម្ពុជា បានជួបប្រទះនូវបញ្ហា ធ្ងន់ធ្ងរ ពេលឆ្លងកាត់ (transit) នៅអាកាសយានដ្ឋានទីក្រុងបាងកក (ប្រទេសថៃ) ដូចជា៖ ការសួរសំណួររាប់សិបម៉ោង, ការទាមទារហួសហេតុឱ្យបង្ហាញឯកសារបញ្ជាក់ធនធានហិរញ្ញវត្ថុ, ការត្រួតពិនិត្យឯកសារកក់សណ្ឋាគារនៅកម្ពុជា, បរិយាកាសថប់បារម្ភ និងរងការសង្ស័យដោយមិនសមហេតុផល។ នៅក្នុងករណីខ្លះ អ្នកដំណើរបានបាត់វ៉ាលីថែមទៀត ពេលទៅដល់ទីក្រុងភ្នំពេញ។

ដើម្បីជាការប្រុងប្រយ័ត្ន អ្នកដំណើរជៀសវាងការធ្វើដំណើរឆ្លងកាត់ ប្រទេសថៃ និងការប្រើប្រាស់ក្រុមហ៊ុនអាកាសចរណ៍ថៃ នៅអំឡុងពេលធ្វើដំណើរទៅកម្ពុជា។ មានក្រុមហ៊ុនអាកាសចរណ៍ និងផ្លូវហោះហើរអន្តរជាតិផ្សេងទៀត ដែលផ្តល់សេវាកម្មល្អ ប្រសើរ និងការឆ្លងកាត់ (transit) ដោយពុំមានការរើសអើង និងគោរពដល់អ្នកដំណើរ។

បញ្ហាទាំងនេះកើតឡើងនៅក្រៅទឹកដីរបស់កម្ពុជាក៏ពិតមែន ប៉ុន្តែអាចប៉ះពាល់ដល់បទ ពិសោធន៍នៃការធ្វើដំណើរ។ កម្ពុជានៅតែជាប្រទេសមានសុវត្ថិភាព និងផ្តល់ការស្វាគមន៍យ៉ាងរួសរាយរាក់ទាក់៕

The post តំណាងវិស័យឯកជនជំរុញឱ្យក្រុមហ៊ុនអាកាសចរណ៍ធំៗទាំងអស់ពិចារណាហោះហើរត្រង់មកកាន់កម្ពុជា appeared first on Kampuchea Thmey Daily.

អ្នកជំនាញថា Turkish Airline មិនត្រឹមនាំមកនូវភ្ញៀវតួកគីទេ តែថែមទាំងជាច្រកនាំភ្ញៀវអន្តរជាតិមកកម្ពុជា

Din Thary — Thu, 20 Nov 2025 07:34:01 +0000

ប្រធានសមាគមន៍ទេសចរណ៍កម្ពុជា លោក ធួន ស៊ីណាន បានឱ្យ«កម្ពុជាថ្មី» នៅថ្ងៃទី២០ ខែវិច្ឆិកា ឆ្នាំ២០២៥ នេះថា Turkish Airline មិនត្រឹមតែនាំមកនូវភ្ញៀវទេសចរតួកគីមកកាន់ប្រទេសកម្ពុជាប៉ុណ្ណោះ ប៉ុន្តែក្រុមហ៊ុនអាកាសចរណ៍មួយនេះគឺជាច្រកនៃការនាំភ្ញៀវអន្តរជាតិមកកាន់កម្ពុជាបន្ថែមទៀត។

លោកបានគូសបញ្ជាក់ថា មានគោលដៅ ៣ – ៤ ក្រៅតែពីប្រទេសថៃ គឺកម្ពុជាមាន Turkish, Doha, Abu Dhabi ស្ថិតនៅក្នុងតំបន់មជ្ឈិមបូព៌ា ដែលបាននាំភ្ញៀវទេសចរមកកាន់កម្ពុជា ប៉ុន្តែនេះគឺមិននិយាយពីតំបន់អាស៊ាននោះទេ ដូច្នេះមានន័យថា នៅក្នុងតំបន់មជ្ឈឹមបូព៌ា គឺក្រុមហ៊ុនអាកាសចរណ៍ Turkish នេះហើយដែលបាននាំភ្ញៀវទេសចរអន្តរជាតិមកកម្ពុជា។

«ដូច្នេះ បានន័យថា កម្ពុជាមិនមែនទទួលបានត្រឹមតែភ្ញៀវទេសចរតួកគីមកកាន់កម្ពុជាប៉ុណ្ណោះទេ ក៏ប៉ុន្តែវាគឺជាច្រក ជាការតភ្ជាប់ទីផ្សារអន្តរជាតិមកកាន់កម្ពុជាតាមរយៈតួកគី»។ លោក ធួន ស៊ីណាន បន្ថែមបែបនេះ។

គួរគូសបញ្ជាក់ថា ក្រុមហ៊ុនអាកាសចរណ៍តួកគី Turkish Airline នឹងតភ្ជាប់ជើងហោះហើរត្រង់ពីទីក្រុង អ៊ីស្តង់ប៊ូល (Istanbul) មកកាន់រាជធានីភ្នំពេញ ចាប់ពីថ្ងៃទី ១១ ខែធ្នូ ឆ្នាំ២០២៥ ខាងមុខនេះ ដើម្បីពង្រឹងទំនាក់ទំនងទេសចរណ៍ ធុរកិច្ច និងវិនិយោគ។

បើតាមលោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា ការតភ្ជាប់ជើងហោះហើរថ្មីនេះ នឹងជួយលើកកម្ពស់វិស័យទេសចរណ៍ និងបើកឱកាសថ្មីៗ សម្រាប់ការផ្លាស់ប្តូរវប្បធម៌ និងសហប្រតិបត្តិការសេដ្ឋកិច្ចរវាងប្រទេសទាំងពីរ ក៏ដូចជាពង្រីកជើងមេឃកម្ពុជាឱ្យកាន់តែទូលាយ ពង្រឹងនូវចំណងការទូតរវាងរាជរដ្ឋាភិបាលកម្ពុជា និងតួគី៕

The post អ្នកជំនាញថា Turkish Airline មិនត្រឹមនាំមកនូវភ្ញៀវតួកគីទេ តែថែមទាំងជាច្រកនាំភ្ញៀវអន្តរជាតិមកកម្ពុជា appeared first on Kampuchea Thmey Daily.

អ្នកជំនាញថា វិស័យទេសចរណ៍កាន់តែរីកចម្រើន ក្រោយតភ្ជាប់ជើងហោះហើរត្រង់កម្ពុជា-ឥណ្ឌា

Din Thary — Wed, 19 Nov 2025 04:12:20 +0000

លោក ធួន ស៊ីណាន ប្រធានសមាគមន៍ទេសចរណ៍កម្ពុជា បានឱ្យដឹងថា នេះគឺជាលើកទីមួយនៅក្នុងប្រវត្តិសាស្ត្រ សម្រាប់ការហោះហើរត្រង់ពីទីក្រុងកុលកាតា ប្រទេសឥណ្ឌា មកកាន់ខេត្តសៀមរាប ដែលមានសារៈសំខាន់ក្នុងការអភិវឌ្ឍខ្សែទស្សនកិច្ច, អភិវឌ្ឍវិស័យទេសចរណ៍ និងការវិនិយោគរវាងកម្ពុជា-ឥណ្ឌា។

ថ្លែងប្រាប់ «កម្ពុជាថ្មី» លោក ធួន ស៊ីណាន បានលើកឡើងថា នេះគឺជាខ្សែទី២ ហើយ ដែលឥណ្ឌាបានតភ្ជាប់ជើងហោះហើរត្រង់មកកាន់កម្ពុជា ដោយខ្សែទី១ ហោះហើរទៅកាន់រាជធានីភ្នំពេញ និងខ្សែទី២ ហោះហើរមកកាន់ខេត្តសៀមរាប។

លោកថា ប្រសិនបើយើងធៀបជាមួយប្រទេសវៀតណាមវិញ ជារៀងរាល់ថ្ងៃ គឺមានការហោះហើរត្រង់មកកាន់ទីក្រុងរបស់គេ ៣ ទៅ ៤ ទីក្រុង ដោយឡែកសម្រាប់កម្ពុជាយើងទើបតែមាន ២ ខ្សែប៉ុណ្ណោះ មកកាន់រាជធានីភ្នំពេញ និងខេត្តសៀមរាបនេះ។

«បើទោះបីជាមិនទាន់មានខ្សែហោះហើរត្រង់ច្រើនជើងក៏ដោយ ប៉ុន្តែនេះ គឺជាសមិទ្ធផលថ្មីដែលយើងត្រូវតែរីករាយអបអរសាទរ ជួយគាំទ្រនៅក្នុងការផ្សព្វផ្សាយដើម្បីធ្វើយ៉ាងណាឱ្យការហោះហើរនេះនឹងពង្រីកការបន្ថែមបន្តបន្ទាប់ទៀត»។ លោក ធួន ស៊ីណាន បន្ថែមយ៉ាងដូច្នេះ។

ទន្ទឹមនេះ លោក ខៀវ ធី ប្រធានសមាគមន៍មគ្គុទេសករខេត្តសៀមរាបក៏បានឱ្យ«កម្ពុជាថ្មី» ដឹងបន្ថែមថា ពាក់ព័ន្ធនឹងជើងហោះហើររបស់ក្រុមហ៊ុនអាកាសចរណ៍ Indigo មកកាន់ខេត្តសៀមរាបនេះ គឺជាកត្តាមួយដែលល្អខ្លាំង ហើយក៏ជាជោគជ័យផ្នែកនយោបាយទេសចរណ៍របស់រាជរដ្ឋាភិបាលកម្ពុជា។ ព្រោះយើងអាចឱ្យអន្តរជាតិហោះត្រង់មកកាន់ប្រទេសកម្ពុជា ជាពិសេសឱ្យមកឃើញប្រសាទសាសនាព្រាហ្មណ៍របស់ខ្មែរយើងនៅសម័យអង្គរ ព្រោះថាភ្ញៀវទេសចរឥណ្ឌា គឺមានមោទនភាពណាស់ដែលមានប្រសាទសាសនាហិណ្ឌូនៅក្រៅប្រទេស។

ម្យ៉ាងទៀត ភ្ញៀវទេសចរឥណ្ឌាក៏ចូលចិត្តទៅលេងនៅភ្នំគូលែន ស្ទឹងលិង្គ ១០០០ ដែលជានិមិត្តរូបនៃសាសនាព្រាហ្មណ៍ ដែលនេះគឺជាទីទាក់ទាញភ្ញៀវទេសចរឥណ្ឌាមកទស្សនាកម្ពុជាកាន់តែច្រើន។ មួយវិញទៀត មិនត្រឹមតែទាក់ទាញភ្ញៀវទេសចរឥណ្ឌាប៉ុណ្ណោះទេ ទេសចរដទៃទៀតដូចជា អឺរ៉ុប អាមេរិក អូស្ត្រាលី កាណាដា ជាដើមនោះ ក៏អាចតជើងហោះហើរត្រង់ពីឥណ្ឌាមកកាន់កម្ពុជាផងដែរ។

លោក ខៀវ ធី បន្ថែមដែរថា យើងបានដឹងហើយថា កាលណាមានភ្ញៀវទេសចរចូលមកទស្សនាប្រទេសយើងកាន់តែច្រើន ដូច្នេះវិស័យសេដ្ឋកិច្ច ក៏ដូចជាកសិកម្មនឹងរីកចម្រើនដូចគ្នាដែរ ព្រោះកសិករកម្ពុជា ៨០% ប្រកបរបរដាំដំណាំស្រូវ បន្លែ ផ្លែ ឈើផ្សេងៗ ហើយភ្ញៀវទេសចរត្រូវការអាហារបរិភោគ ដូច្នេះតាមរយៈនេះនឹងជួយរុញច្រានជីវភាពប្រជាជនឱ្យមានការរីកចម្រើនជាបន្តបន្ទាប់។

លោកបានសង្កត់ធ្ងន់ថា ទេសចរណ៍ជាវិស័យបៃតង ដូច្នេះទេសចរណ៍រីកចម្រើន វានឹងទៅជួយទាញវិស័យផ្សេងៗទៀតឱ្យមានការរីកចម្រើនទៅព្រមៗគ្នា។

គួរបញ្ជាក់ថា ក្រុមហ៊ុនអាកាសចរណ៍ IndiGo Airlines របស់ឥណ្ឌា ទើបតែបានតភ្ជាប់ជើងហោះហើរត្រង់លើកដំបូងរបស់ខ្លួនពីទីក្រុង Kolkata មកខេត្តសៀមរាប ចាប់ពីថ្ងៃទី ១៣ ខែវិច្ឆិកា ឆ្នាំ ២០២៥ កន្លងទៅ ដែលធ្វើការហោះហើរចំនួន ៣ ជើងក្នុងមួយសប្តាហ៍។

ការហោះហើរត្រង់មកកម្ពុជាដំណើរការដោយយន្តហោះ Airbus A320neo ដែលនឹងចូលរួម ពង្រឹងវិស័យទេសចរណ៍ និងពាណិជ្ជកម្មទ្វេភាគីកម្ពុជា-ឥណ្ឌា៕

The post អ្នកជំនាញថា វិស័យទេសចរណ៍កាន់តែរីកចម្រើន ក្រោយតភ្ជាប់ជើងហោះហើរត្រង់កម្ពុជា-ឥណ្ឌា appeared first on Kampuchea Thmey Daily.

អ្នកតាមដានសង្គម និងប្រតិបត្តិករទេសចរណ៍ ជំរុញរដ្ឋាភិបាលចាត់វិធានការតឹងរឹងថែមទៀតលើបទល្មើសអនឡាញ

Thoeun Vansong — Wed, 15 Oct 2025 09:18:01 +0000

ក្រោយការស្លាប់យុវជនកូរ៉េខាងត្បូងម្នាក់ ដែលត្រូវបានចាប់ជំរិតក្នុងបទល្មើសអនឡាញប្រព្រឹត្តដោយឧក្រិដ្ឋជនបរទេស ក្នុងខេត្តកំពត បានក្លាយជាប្រធានបទក្ដៅសម្រាប់ការជជែកវែកញែកជាច្រើននៅលើបណ្ដាញសង្គម។ ខណៈរដ្ឋាភិបាលកូរ៉េខាងត្បូងបង្ហាញការប្រតិកម្ម និងស្នើចាត់វិធានការឆ្លើយតបទៅនឹងបញ្ហានេះបន្ទាន់។ សម្រាប់អ្នកតាមដានសង្គមនិងប្រតិបត្តិករក្នុងវិស័យទេសចរណ៍ ក៏ជំរុញរដ្ឋាភិបាលកម្ពុជាខិតខំចាត់វិធានការឱ្យបានតឹងរឹងបន្ថែមទៀតលើករណីឧក្រិដ្ឋកម្មអនឡាញនេះ។

អ្នកតាមដានសង្គមកម្ពុជា លោកបណ្ឌិត ឈត ប៊ុនថង លើកឡើងថា បទល្មើសអនឡាញ គឺជាបញ្ហាសកលដែលកំពុងកើតមានឡើងក្នុងសម័យទំនើបនេះ ហើយកំពុងរីកសាយភាយស្ទើរពាសពេញពិភពលោក រួមទាំងកម្ពុជាក៏ជាប្រទេសរងគ្រោះពីបទល្មើសអនឡាញនេះដែរ។

ជុំវិញការប្រតិកម្មពីរដ្ឋាភិបាលកូរ៉េខាងត្បូង ក្រោយការស្លាប់និស្សិតកូរ៉េខាងត្បូងម្នាក់នៅកម្ពុជានេះ លោកបណ្ឌិត ថា បទល្មើសអនឡាញកំពុងរាលដាលពីប្រទេសមួយទៅប្រទេសមួយ រាប់ទាំងប្រទេសកូរ៉េខាងត្បូងដែលមានប្រជាជនរងគ្រោះនោះ ក៏មានប្រជាជនកូរ៉េជាបណ្ដាញក្នុងការប្រព្រឹត្តនេះដែរ នៅក្នុងប្រទេសកម្ពុជា។ ក្នុងន័យនេះ លោកបានសង្កត់ធ្ងន់ពីភាពចាំបាច់នៃការបង្កើនសមត្ថភាព និងការពួតដៃសហការជាសកល ដើម្បីប្រយុទ្ធប្រឆាំងបទល្មើសនេះ ដែលកំពុងផ្ទុះខ្លាំងក្លាយជាក្ដីបារម្ភសម្រាប់ពិភពលោកទាំងមូល។

បណ្ឌិត ឈត ប៊ុនថង ក៏បានគូសរំលេចពីការខិតខំប្រឹងប្រែងរបស់អាជ្ញាធរកម្ពុជាដែលបានបង្ក្រាបបទល្មើសអនឡាញជាបន្តបន្ទាប់ ទាំងក្របខណ្ឌផ្ទៃក្នុងប្រទេស ជាទ្វេភាគី និងកិច្ចសហប្រតិបត្តិការអន្តរជាតិ។ ជំនួសឱ្យការរុញបញ្ហាដោយដាក់បន្ទុកតែទៅលើប្រទេសណាមួយនោះ ត្រូវបានបណ្ឌិតរូបនេះ និយាយថា៖ «ការរួមគ្នាដើម្បីតាមប្រមាញ់ ដើម្បីពង្រឹងសហប្រតិបត្តិការបង្ក្រាប Scam online គឺជារឿងដែលគួរធ្វើ ជាជាងការស្ដីបន្ទោសដាក់គ្នា»។

ពាក់ព័ន្ធទៅនឹងកិច្ចការបង្ក្រាបបទល្មើសអនឡាញនេះ លោក ធួន ស៊ីណាន ប្រធានសមាគមទេសចរណ៍អាស៊ីបាស៊ីហ្វិក (PATA) ក៏បានបង្ហាញទស្សនៈស្រដៀងគ្នានឹងអ្នកតាមដានសង្គមខាងលើ ដោយលោក បានជំរុញឱ្យរដ្ឋាភិបាលកម្ពុជាបង្កើនកិច្ចសហការជាមួយបណ្ដាប្រទេសជាមិត្ត ក្នុងការចាត់វិធានការបង្ក្រាបបទល្មើសអនឡាញនៅកម្ពុជាឱ្យទាន់ពេលវេលា ដើម្បីរក្សាកេរ្តិ៍ឈ្មោះកម្ពុជា ជាពិសេសរក្សាបាននូវស្ថិរភាពក្នុងវិស័យទេសចរណ៍។

លោក ធួន ស៊ីណាន បានលើកឡើងតាមរយៈកម្ពុជាថ្មី នៅថ្ងៃទី១៥ ខែតុលានេះ ថា បទល្មើសអនឡាញដែលបាននិងកំពុងកើតមានឡើងនៅកម្ពុជាពេលនេះ គឺវាបានបង្ហាញនូវភាពមិនល្អជាច្រើន រាប់ទាំងការជះឥទ្ធិពលមួយចំនួនធំទៅលើវិស័យទេសចរណ៍ ជាពិសេសនោះគឺភ្ញៀវទេសចរដែលមកកម្សាន្តនៅកម្ពុជាតែម្ដង។ ខណៈក្រសួងទេសចរណ៍ ដែលជាសេនាធិការរបស់រដ្ឋាភិបាល សហការជាមួយវិស័យឯកជន កំពុងខិតខំយ៉ាងខ្លាំងក្លាក្នុងការកៀរគរទេសចរឱ្យមកកម្ពុជាកាន់តែច្រើនថែមទៀត តាមរយៈការផ្សព្វផ្សាយពីសក្តានុពលដ៏សម្បូរបែបរបស់កម្ពុជា។

ក្នុងន័យនេះ លោកសង្កត់ធ្ងន់ថា រដ្ឋាភិបាលមានកាតព្វកិច្ចចាំបាច់ក្នុងការបង្ក្រាបឱ្យខានតែបាននូវពួកឧក្រិដ្ឋជនអនឡាញ ពីព្រោះវាបានប៉ះពាល់ទាំងសេដ្ឋកិច្ចជាតិ និងថែមទាំងប៉ះពាល់ដល់កិត្តិយស កេរ្តិ៍ឈ្មោះរបស់កម្ពុជាលើវេទិកាអន្តរជាតិ។ ប៉ុន្តែយ៉ាងណាក្ដី លោកក៏បានទទួលស្គាល់ពីការខិតខំប្រឹងប្រែងរបស់រដ្ឋាភិបាលកម្ពុជាដែលបានបើកប្រតិបត្តិការបង្ក្រាបទីតាំងលួចលាក់ធ្វើសកម្មភាពឆបោកតាមប្រព័ន្ធអនឡាញជាច្រើនកន្លែងនៅទូទាំងប្រទេស ដោយឃាត់ខ្លួននូវជនល្មើសរាប់សិបនាក់ ដែលភាគច្រើនជាជនបរទេស។

សម្រាប់ករណីដែលជនជាតិកូរ៉េខាងត្បូងបានស្លាប់នៅកម្ពុជា ដោយសារពាក់ព័ន្ធនឹង Scamming ក៏ដូចជាការចាប់ជំរិត នាពេលថ្មីៗនេះ លោក ធួន ស៊ីណាន ថា ជាការពិតមិនអាចបដិសេធបាន ដែលទង្វើឧក្រិដ្ឋកម្មនេះកើតឡើងនៅលើទឹកដីកម្ពុជា។

ក៏ប៉ុន្តែ លោកទាញការចាប់អារម្មណ៍ពាក់ព័ន្ធនឹងបទសល្មើសអនឡាញដែលកំពុងកើតមានឡើងពេលនេះ ថា អាចមានក្រុមទី៣ ក្នុងការព្យាយាមផ្សព្វផ្សាយមិនល្អពីកម្ពុជា ដោយបំផ្លើសហួសពីការពិត ក្រោមរូបភាពចោទប្រកាន់ដោយដាក់បន្ទុកតែលើកម្ពុជា ក្នុងចេតនាសម្អុយឈ្មោះកម្ពុជាប៉ុណ្ណោះ។ ត្រង់ចំណុចនេះ លោក ថា ត្រូវយកចិត្តទុកដាក់ប្រុងប្រយ័ត្ន និងពិចារណាឱ្យបានគ្រប់ជ្រុងជ្រោយ។ ខណៈបើនិយាយពីចំនួនប្រជាជនខ្មែរស្លាប់នៅកូរ៉េ ដោយសារជនជាតិកូរ៉េធ្វើបាប ឬសម្លាប់នៅក្នុងប្រទេសកូរ៉េនោះ វាច្រើនជាងចំនួនជនជាតិកូរ៉េដែលរងគ្រោះនៅកម្ពុជាទៅទៀត៕

The post អ្នកតាមដានសង្គម និងប្រតិបត្តិករទេសចរណ៍ ជំរុញរដ្ឋាភិបាលចាត់វិធានការតឹងរឹងថែមទៀតលើបទល្មើសអនឡាញ appeared first on Kampuchea Thmey Daily.

PATA៖ ការបិទព្រំដែនគោក កម្ពុជា-ថៃ ធ្វើឱ្យប៉ះពាល់ដល់ទេសចរប្រទេសទាំងពីរស្ទើរ ១០០%

Din Thary — Wed, 25 Jun 2025 07:34:28 +0000

លោក ធួន ស៊ីណាត ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA Cambodia Chapter) បានលើកឡើងថា ការបិទព្រំដែនគោក កម្ពុជា-ថៃ បានធ្វើឱ្យប៉ះពាល់ដល់ទេសចរតាមផ្លូវគោកនៃប្រទេសទាំងពីរស្ទើរតែ ១០០% ទេសចរខ្មែរក៏លែងទៅលេងនៅប្រទេសថៃ ហើយទេសចរថៃក៏លែងមកលេងនៅស្រុកខ្មែរវិញដូចគ្នា។

ថ្លែងមកកាន់ «កម្ពុជាថ្មី» នៅថ្ងៃទី២៥ ខែមិថុនា នេះ លោក ធួន ស៊ីណាន អះអាងថា កម្ពុជា និងថៃ ចាប់តាំងពីថ្ងៃទី២៨ ខែឧសភា កន្លងទៅដែលមានការប៉ះទង្គិចគ្នារវាងប្រទេសទាំងពីររួចមក រហូតមកដល់ពេលបច្ចុប្បន្ននេះ បានធ្វើឱ្យទេសចររវាងប្រទេសទាំងពីររងផលប៉ះពាល់ស្ទើរតែ ១០០% ទៅហើយ មានន័យថា ថៃក៏មិនលេងកម្ពុជា ហើយកម្ពុជាក៏មិនទៅលេងប្រទេសថៃវិញដូចគ្នាដែរ។ «ក្នុងនោះ កញ្ចប់ទេសចរណ៍ផ្សេងៗ ត្រូវបានលុបចោលដូចគ្នាជាបន្តបន្ទាប់ មានន័យថាវាបានប៉ះពាល់រួចទៅហើយ ដោយយើងមិនអាចនិយាយជាភាគរយបាននោះទេ»។

ជាមួយគ្នានោះដែរ លោក ធួន ស៊ីណាន បានបន្តថា៖« សម្រាប់កម្ពុជាដែលទៅថៃ គឺទៅតែអ្នកដែលមានកិច្ចការសំខាន់ ឬទៅពិនិត្យ និងព្យាបាលជំងឺ តែប៉ុណ្ណោះ ហើយថៃចូលមកកម្ពុជា ក៏ដូចគ្នាដែរ ដូច្នេះមានន័យថា ទេសចរណ៍តាមផ្លូវគោក គឺយើងប៉ះពាល់ស្ទើរតែ ១០០% »។

ពាក់ព័ន្ធប្រជាជាតិទាំងពីរប្រសិនបើបញ្ហារវាងប្រទេសទាំងពីរនៅតែបន្តអូសបន្លាយបែបនេះតទៅទៀត លោក ធួន ស៊ីណាន មើលឃើញថា ពីមួយថ្ងៃទៅមួយថ្ងៃបញ្ហាប្រទេសទាំងពីរកាន់តែធ្ងន់ទៅៗ នោះនឹងធ្វើឱ្យកម្ពុជាប៉ះពាល់ដែលវានឹងបង្ករីករាលដាលពីវិស័យមួយទៅវិស័យមួយទៀត បន្តពីទេសចរណ៍ ទៅដល់បន្លែ ផ្លែឈើ សាំង ប្រេងឥន្ធនៈ និងអ្វីផ្សេងៗទៀត វាកាន់តែធ្ងន់ធ្ងរទៅៗ។

ជុំវិញបញ្ហានេះ លោក ធួន ស៊ីណាន បានគូសបញ្ជាក់ថា ផលប៉ះពាល់ទេសចរទៅមកនេះ គឺប៉ះពាល់តែទេសចរណ៍ដែលធ្វើដំណើរតាមផ្លូវគោកតែប៉ុណ្ណោះ ដោយឡែកសម្រាប់កញ្ចប់ទេសចរណ៍តាមផ្លូវអាកាស គឺនៅមិនទាន់មានការប៉ះពាល់នោះទេ មានន័យថា ជើងហោះហើរផ្សេងៗ គឺនៅមានដំណើរការជាធម្មតា មិនមានការលុបចោល ឬប្តូរជើងហោះហើរនោះទេ។

ទន្ទឹមនេះ លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា ក៏បានឱ្យដឹងដែរថា ជុំវិញបញ្ហាជម្លោះព្រំដែនកម្ពុជា-ថៃ អាកាសចរណ៍ស៊ីវិលគឺបានតាមដានសភាពការយ៉ាងយកចិត្តទុកដាក់ ក្នុងនោះចំពោះបញ្ហានៅតាមផ្លូវអាកាសរហូតមកដល់ពេលបច្ចុប្បន្ន គឺនៅមិនទាន់មានបញ្ហា ឬមានការផ្លាស់ប្តូរអ្វីជាធំដុំនោះទេ។

ក្នុងនោះ ចំពោះជើងហោះហើរនៅចន្លោះថ្ងៃទី១ រហូតមកដល់ថ្ងៃទី២៤ ខែមិថុនា នេះ ចំនួនជើងហោះហើរដូចជាមិនមានការថមថយនោះទេ ប៉ុន្តែចំនួនភ្ញៀវអាចថយចុះមួយចំនួនតូច ដោយសារតែទី១ បញ្ហាវិបត្តិព្រំដែនរវាងប្រទេសទាំងពីរ ទី២ ដោយសារនេះជារដូវកាលបៃតងនេះផង ដូច្នេះជាហេតុដែលធ្វើឱ្យពិបាកនៅក្នុងការសន្និដ្ឋានបានថា មូលហេតុអ្វីបានជាធ្វើឱ្យភ្ញៀវមានការថមថយ។

សូមជម្រាបថា កម្ពុជាទទួលបានភ្ញៀវទេសចរអន្តរជាតិជាតិជាង ២,៤ លាននាក់ នៅក្នុងរយៈពេល ៤ ខែ ដើមឆ្នាំ ២០២៥ (មករា-មេសា) កើនឡើង ១៣,៦% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះដែរ ចំណោមភ្ញៀវទេសចរជាង ៦,៧ លាននាក់ ទេសចរណ៍ថៃឈរនៅលំដាប់លេខរៀងទី ១ មានចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេសចរឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

ដោយ៖ ឌិន ថារី

The post PATA៖ ការបិទព្រំដែនគោក កម្ពុជា-ថៃ ធ្វើឱ្យប៉ះពាល់ដល់ទេសចរប្រទេសទាំងពីរស្ទើរ ១០០% appeared first on Kampuchea Thmey Daily.

ការប៉ះទង្គិចគ្នារវាងកម្ពុជា-ថៃ បង្កផលប៉ះដល់លំហូភ្ញៀវក្នុងវិស័យទេសចរណ៍

Din Thary — Sat, 07 Jun 2025 01:08:00 +0000

អ្នកនៅក្នុងឧស្សាហកម្មទេសចរណ៍បានលើកឡើងថា ប៉ុន្មានថ្ងៃបន្ទាប់ពីមានការប៉ះទង្គិចគ្នារវាងប្រទេសជិតខាងទាំងពីរកាលពីថ្ងៃទី២៨ ខែឧសភាកន្លងទៅនេះបានកំពុងជះផលអវិជ្ជមាននៃវិស័យទេសចរណ៍ ខណៈកញ្ចប់គម្រោងទស្សនកិច្ចពីខាងប្រទេសថៃចូលមកកាន់កម្ពុជាត្រូវបានលុបចោលស្ទើរតែទាំងអស់ ហើយសម្រាប់កញ្ចប់ទេសចរណ៍កម្ពុជាទៅកាន់ប្រទេសថៃវិញក៏ត្រូវបានលុបចោលវិញដូចគ្នាដែរ។

ជុំវិញបញ្ហាជម្លោះព្រំដែន រវាងកម្ពុជា-ថៃនេះ លោក ធួន ស៊ីណាន ប្រធានសមាគមទេសចរណ៍អាស៊ី ប៉ាស៊ីហ្វិកកម្ពុជា បានលើកឡើងថា បញ្ហាដែលកំពុងតែប៉ះទង្កិចរវាងប្រទេសទាំងពីរនេះ វាបានបង្កផលប៉ះដល់ដូចគ្នាទៅដល់វិស័យទេសចរណ៍នៃប្រទេសទាំងពីរ។ លោកថា៖«សូម្បីតែសំបុត្រយន្តហោះក៏ត្រូវបានលុបចោល ព្រោះដូចយើងបានដឹងស្រាប់ហើយថាប្រទេសថៃ គឺជាគោលដៅដ៏ពេញនិយមមួយរបស់កម្ពុជា ប៉ុន្តែចាប់តាំងពីមានបញ្ហាមក ប្រជាជនថៃ និងប្រជាជនកម្ពុជា បានផ្អាកការធ្វើដំណើរកម្សាន្ត លើកលែងតែអ្នកដែលត្រូវពិនិត្យជំងឺ និងអ្នកដែលមានការងារសំខាន់ៗដែលពាក់ព័ន្ធទៅនិងបញ្ហាសុខភាព និងពាណិជ្ជកម្មរបស់ខ្លួនប៉ុណ្ណោះ»។

ស្របពេលជាមួយគ្នានេះ លោក ខៀវ ធី ប្រធានសមាគមមគ្គុទេសក៍ទេសចរអង្គរ បានឱ្យដឹងថា ចាប់តាំងពីប្រសាទព្រះវិហារបានចូលជាសម្បត្តិ បេតិកភណ្ឌពិភពលោកកាលពីឆ្នាំ២០០៨ មក ទេសចរថៃ ដែលចូលមកទស្សនាប្រសាទអង្ករវត្តមានការធ្លាក់ចុះច្រើន បើទោះបីជាមានក៏ក្នុងរង្វង់តិចតួចប៉ុណ្ណោះ។

ដោយសារតែភ្ញៀវទេសចរថៃថយចុះជាបន្តបន្ទាប់ ក្នុងនោះមគ្គុទ្ទេសក៍ទេសចរភាសាថៃ ក៏ងាកមកចាប់ផ្តើមរៀនភាសាផ្សេងៗមួយចំនួនវិញផងដែរ។

ប៉ុន្តែប្រសិនបើនិយាយពីកាស៊ីណូ នៅតាមបណ្តោយព្រំដែនវិញ លោក ខៀវ ធី បានមានប្រសាសន៍ថា «តាមកាស៊ីណូគឺនៅតែមានជនជាតិថៃឆ្លងដែនចូលមកលេងខ្លះៗ ប៉ុន្តែសម្រាប់ភ្ញៀវទេសចរដែលដើរកម្សាន្តនៅប្រសាទអង្គរវត្ត និងចូលជ្រៅមកកាន់កម្ពុជា គឺមិនមាននោះទេ»។

លោក ខៀវ ធី បានលើកឡើងថា «ខ្ញុំយល់ថា ដោយសារជនជាតិថៃ ជាជនជាតិ ជាតិនិយម ដូច្នេះនៅពេលដែលមាន អរិភាពជាមួយប្រទេសណាហើយ តែងតែមានចិត្តឆេវឆាវ ហើយការប៉ះទង្គិចគ្នារវាងកម្ពុជា-ថៃ នេះទៀតសោទ ពិតណាស់ថាជនជាតិនេះនឹងមិនចូលមកទស្សនាកម្ពុជាច្រើនដូចនៅមុនឆ្នាំ២០០៨ កន្លងមកអញ្ចឹង»។

«ដោយឡែកចំពោះស្ថានភាពភ្ញៀវទេសចរទូទៅវិញ ដូចជាភ្ញៀវទេសចរអឺរ៉ុប អូស្ត្រាលី អាមេរិក កាណាដា ជប៉ុន និងទេសចរមួយចំនួន គឺនៅតែចូលមកទស្សនាប្រទេសកម្ពុជាដដែល មិនមានអ្វីគួរឱ្យព្រួយបារម្ភនោះទេ។ ក្នុងនោះចំពោះភ្ញៀវទេសចរថៃ យើងមិនបារម្ភនោះទេថា ពួកគេមកឬមិនមកទស្សនានៅកម្ពុជា ព្រោះយើងផ្តោតសំខាន់ទៅលើភ្ញៀវជនជាតិអឺរ៉ុបតែប៉ុណ្ណោះ»។ លោក ខៀវ ធី បន្ថែមបែបនេះ។

លោកបានអះអាងថា «ភ្ញៀវទេសចរអឺរ៉ុប ចូលចិត្តវប្បធម៌ ប្រពៃណី ទំនៀមទម្លាប់ខ្មែរ និងអង្គរវត្តរបស់ខ្មែរ ដូច្នេះច្បាស់ណាស់ថាគេនឹងនៅតែមកលេងកម្ពុជា។ មួយវិញទៀត ទេសចរចិន តាមរយៈការធ្វើគោលនយោបាយរបស់រាជរដ្ឋាភិបាល លោកសង្ឃឹមថា ភ្ញៀវទេសចរចិននឹងចូលមកទស្សនាកម្ពុជាកាន់តែច្រើន តាមរយៈការដោះដូរប្រជាជន និងប្រជាជនរវាងប្រទេសទាំងពីរ»។

ជាមួយគ្នានេះ លោក រនតា នរិន្ទ អ្នកគ្រប់គ្រងទូទៅនៃសណ្ឋាគារ ភីតអេលីត ប៊ូទិក ខេត្តសៀមរាប បានឱ្យដឹងថា ទាក់ទងទៅនិងការកក់បន្ទប់សណ្ឋាគារនាពេលបច្ចុប្បន្ននេះគឺនៅមានចំនួនថេរនៅឡើយមិនទាន់មានការថយចុះនោះទេ ដែលភាគច្រើនជាជនខ្មែរ និងជនបរទេសជាដើម គឺមិនមានភ្ញៀវជាជនជាតិថៃនោះទេ។

ក្នុងនោះ នៅក្នុងខែឧសភា កន្លងទៅនេះ មានភ្ញៀវប្រមាណជាង ៦០០នាក់ ដែលបានចូលមកកក់សណ្ឋាគារនៅ ក្នុងខេត្តសៀមរាបផ្ទាល់។

ដោយឡែក ផ្ទះសំណាក់ព្រះសំណាក់មរតព្រះវិហារ នាខេត្តព្រះវិហារឯណោះវិញ ក៏បានឱ្យដឹងដែរថា បច្ចុប្បន្នការចូលស្នាក់គឺមិនសូវជាមានចំនួនច្រើននោះទេ ក្នុងនោះមានភ្ញៀវមានប្រមាណ ២០% ដែលធ្វើការកក់ចូលស្នាក់នៅ និងភ្ញៀវប្រមាណ ៨០% ទៀត ចូលមកស្នាក់នៅផ្ទាល់ៗ ទាំងភ្ញៀវទេសចរនៅក្នុងស្រុក និងជនជាតិបរទេសជាដើម។

យោងតាមក្រសួងទេសចរណ៍ បានឱ្យដឹងថា កម្ពុជាទទួលបានភ្ញៀវទេសចរអន្តរជាតិជាង ២,៤ លាននាក់ នៅក្នុងរយៈពេល ៤ ខែ ដើមឆ្នាំ ២០២៥ (មករា-មេសា) កើនឡើង ១៣,៦% ធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមភ្ញៀវទេសចរជាង ៦,៧ លាននាក់ ទេសចរណ៍ថៃឈរនៅលំដាប់លេខរៀងទី ១ មានចំនួន ២,១៤ លាននាក់ កើនជិត ១៨%៕

The post ការប៉ះទង្គិចគ្នារវាងកម្ពុជា-ថៃ បង្កផលប៉ះដល់លំហូភ្ញៀវក្នុងវិស័យទេសចរណ៍ appeared first on Kampuchea Thmey Daily.