កាល​ពី​ពេល​ថ្មី​ៗ​នេះ លោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង​សាងសង់ផ្លូវជាតិលេខ ៧១សេ និងលោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ក៏​ដូចជាមន្រ្តីជំនាញពាក់ព័ន្ធ បានចុះត្រួតពិនិត្យ និងប្រគល់ទទួលស្ថានីយថ្លឹងយានយន្តដឹកជញ្ជូនលើសទម្ងន់កម្រិតកំណត់ ចំនួន ០២ទីតាំង នៅលើផ្លូវជាតិលេខ៧១សេ រួមមានទីតាំងទី១ ស្ថិតនៅត្រង់គីឡូម៉ែត្រលេខ ៧០+៣០០ ក្នុងភូមិមាឃ១ ឃុំព្រែកកក់ ស្រុកស្ទឹងត្រង់ ខេត្តកំពង់ចាម និងទីតាំងទី២ ស្ថិតនៅត្រង់គីឡូម៉ែត្រលេខ ៣៩+៩៥០ ក្នុងភូមិសោយ១ ឃុំប៉ើស១ ស្រុកក្រូចឆ្មារ ខេត្តត្បូងឃ្មុំ ។

ស្ថានីយទាំងពីរនេះ នឹងចាប់ផ្តើមដំណើរការថ្លឹងយានយន្ដដឹកជញ្ជូនធុនធ្ងន់ នៅពេលឆាប់ៗខាងមុខនេះ ក្នុងគោល​បំណង​ដើម្បីការពារហេដ្ឋារចនាសម្ព័ន្ធផ្លូវថ្នល់ ស្ពាន និងសំណង់សិល្បការ្យផ្លូវថ្នល់ ឱ្យធានាបាននូវការប្រើប្រាស់បានយូរអង្វែង តាមអាយុកាលបច្ចេកទេសកំណត់។

ដើម្បីពង្រឹងការគ្រប់គ្រងរថយន្តដឹកលើសទម្ងន់់ឱ្យកាន់តែមានប្រសិទ្ធភាព កន្លងមកក្រសួងសាធារណការ និងដឹកជញ្ជូន ក៏បាដាក់ចេញវិធានការជាបន្តបន្ទាប់ ​ដើម្បីតាមដានការអនុវត្តការងារ​នៅ​តាម​ស្ថានីយថ្លឹងរថយន្ត ដោយបានដាក់បង្កប់ជញ្ជីង​​ក្រោម​ដី​មុនចូល​ដល់​ស្ថានីយ​ថ្លឹង ហើយ​បំពាក់​កាមេរ៉ា​ជាច្រើន​គ្រឿង ដើម្បី​ចាប់សកម្មភាពរថយន្តទាំងនោះ។ តាម​រយៈ​ប្រព័ន្ធ​បច្ចេកវិទ្យា​ថ្មី អាច​ចាប់​បាននូវ​ព័ត៌មាន​រថយន្ត​ចេញចូល ទម្ងន់​ដឹកជញ្ជូន ការ​ចុះ​បញ្ជិការ​រថយន្ត ព័ត៌មា​នឆៀក និង​ព័ត៌មាន​ផ្សេងៗ​ទៀតជា​ដើម៕

The post ស្ថានីយថ្លឹងយានយន្តដឹកលើសទម្ងន់ ២ ទីតាំង​តាម​ផ្លូវជាតិលេខ ៧១សេ ត្រៀមដំណើរការឆាប់ៗខាង​មុខ appeared first on Kampuchea Thmey Daily.

កាលពី​ម្សិលមិញនេះ មន្រ្តី​ក្រុមការងារបច្ចេកទេសក្រសួងសាធារណការ និងដឹកជញ្ជូន ដឹកនាំដោយលោក បុង ប៊ុនហួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគម្រោងសាងសង់ផ្លូវជាតិលេខ៧១C បានចុះត្រួតពិនិត្យលក្ខណៈបច្ចេកទេសលម្អិត និងពិធីប្រគល់-ទទួលគម្រោងសាងសង់ផ្លូវជាតិលេខ៧១C។

ការចុះពិនិត្យនេះមានការចូលរួមពីថ្នាក់ដឹកនាំ និងក្រុមការងារបច្ចេកទេសក្រុមហ៊ុនសំណង់សៀងហៃ (SCG) ក្រុមហ៊ុនទីប្រឹក្សាបច្ចេកទេសក្វាងចូវ វ៉ាងអាន (WACC) និងតំណាងមន្ទីរសាធារណការ និងដឹកជញ្ជូនខេត្តកំពង់ចាម និងត្បូងឃ្មុំ។

ផ្លូវជាតិលេខ ៧១C ប្រវែង ១១៤,៦២ គីឡូម៉ែត្រ (ចាប់ពីផ្លូវជាតិលេខ៧ ចំណុច PK154+700 ក្នុងខេត្តត្បូងឃ្មុំ ទៅ​ដល់​ផ្លូវ​ជាតិ​លេខ ៧១ ចំណុច PK30+400 ខេត្តកំពង់ចាម) គឺជាខ្សែផ្លូវដែលពោរពេញដោយទេសភាពខៀវស្រងាត់ត្រជាក់ភ្នែក និងមានសភាពធន់រឹងមាំ និងជាខ្សែផ្លូវដែលមានចរាចរណ៍មមាញឹកនិងការតភ្ជាប់ដ៏សំខាន់។

ផ្លូវជាតិដ៏សំខាន់នេះជាប្រភេទ AC/DBST ដែល​បាន​ចុះកិច្ចសន្យាសាងសង់នៅថ្ងៃទី២០ ខែឧសភា ឆ្នាំ២០២០ ចាប់ផ្តើម​​សាងសង់នៅថ្ងៃទី០២ ខែមេសា ឆ្នាំ២០២១ និងបញ្ចប់ការសាងសង់ នៅថ្ងៃទី០២ ខែតុលា ឆ្នាំ២០២៤ ដែលមានរយៈពេលសាងសង់ ៤២ ខែ និងរយៈពេលថែទាំ (ក្នុងកិច្ចសន្យា) ២៤ខែ៕

បន្ត​ចុចអាន៖ មន្រ្តី​ជាន់​ខ្ពស់​ក្រសួង​សាធារណការ ៤ រូប​ទទួល​ខុសត្រូវ​តាមដាន​គុណភាព​ការដ្ឋាន​ផ្លូវជាតិ​ ៤ ខ្សែ

The post ផ្លូវជាតិលេខ ៧១C បញ្ចប់​ការ​សាងសង់ ១០០% ធ្វើពិធី​ប្រគល់​ទទួល​ជា​ផ្លូវការ appeared first on Kampuchea Thmey Daily.

លោក សូរ វ៉ិចទ័រ រដ្ឋលេខាធិការ​ក្រសួងសាធារណការ​ និង​ដឹកជញ្ជូន ជា​នាយក​ទទួល​ខុសត្រូវ​លើ​ការដ្ឋាន​កំណាត់​ផ្លូវ​ជាតិ​លេខ ៤៨ នៅ​ខេត្ត​កោះកុង។

ផ្លូវ​ជាតិ​លេខ ៤៨ ស្ថាបនា​​ដោយ​ក្រុមហ៊ុន​កូរ៉េ ILSUNG & HANIL Joint Venture មាន​ប្រវែង ១៤៨ គីឡូម៉ែត្រ​​ចាប់​ពី​បំបែកផ្លូវជាតិលេខ ៤ ចំណុចបង្គោលគីឡូម៉ែត្រលេខ ១៤១+៧៥០ (ចំការហ្លួង) រហូតដល់​ក្រុងខេមរភូមិន្ទ នៃខេត្តកោះកុង។

ដោយ​បើកការដ្ឋានសាងសង់​កាលពីថ្ងៃទី ០៣ ខែមករា ឆ្នាំ២០២២ ផ្លូវនេះ​​មាន​ប្រវែង ១៤៨ គីឡូម៉ែត្រ ជាប្រភេទផ្លូវក្រាល​ដោយ​បេតុងកៅស៊ូ (AC) ​​សាងសង់​ក្រោម​​ទឹក​ប្រាក់​ប្រមាណ​ ៧៨ លានដុល្លារ។ គិតត្រឹមថ្ងៃ​ចុង​ឆ្នាំ ២០២៣ សម្រេចការសាងសង់បានប្រមាណ ៤០%។

ដោយ​ឡែក​ផ្លូវ​ជាតិ​លេខ ៧ ពី​ស្គន់​ទៅ​ក្រុង​កំពង់ចាម ស្ថិត​នៅក្រោមការ​គ្រប់គ្រង​របស់​លោក​ លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន។

ផ្លូវជាតិលេខ ៧ ត្រូវ​សាងសង់​ពង្រីកពី ២ គន្លងទៅ ៤ គន្លង លើ​ប្រវែង​ផ្លូវ​ជាង ៤៥ គីឡូម៉ែត្រ ចាប់ពីរង្វង់មូលស្គន់ ដល់​គល់​ស្ពានគីស្សូណា។

យោងតាមការ​សិក្សា ​ស្ថានភាព​នៃ​ខ្សែផ្លូវនេះមានភាពស្មុគស្មាញខ្លាំង ដែលអាច​ជះឥទ្ធិពលដល់ផែនការវឌ្ឍនភាពទាំងមូលរបស់គម្រោង។ 

ដោយឡែក លោក ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន ជាប្រធានគ្រប់គ្រងគម្រោងពង្រីក និងលើកកម្រិតគុណភាពផ្លូវជាតិលេខ ៣៣។

ផ្លូវជាតិលេខ ៣៣ បាន​បើកការដ្ឋានសាងសង់កាលពីថ្ងៃទី ៣០ ខែធ្នូ ឆ្នាំ២០២២។ ផ្លូវ​នេះមានប្រវែង ៥២,៥៧ គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ ៣ ត្រង់ចំណុចគ.ម១៤៨+១០០) ទៅកាន់ច្រកលក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្ត ស្រុកទឹកឈូ និងស្រុកកំពង់ត្រាច នៃខេត្តកំពត ហើយឆ្លងកាត់ភូមិសាស្រ្ត ក្រុងកែប និងស្រុកដំណាក់ចង្អើរ នៃខេត្តកែប។

គិតត្រឹមថ្ងៃទី២៧ ខែតុលា ឆ្នាំ២០២៣ វឌ្ឍនភាពនៃ​គម្រោងបានសម្រេចលទ្ធផលការងារជិត ៤០%។

នៅលើកំណាត់ផ្លូវជាតិលេខ ១០ ដែលជា​ផ្លូវប្រវត្តិ​សាស្រ្ត​ថ្មី​ភ្ជាប់ទឹកដី​ខេត្ត​បាត់ដំបង ពោធិ៍សាត់ និងកោះកុង​ ទទួល​បន្ទុក​តាមដានត្រួតពិនិត្យ​​​ដោយ​លោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន។

ផ្លូវជាតិលេខ ១០ មានប្រវែង ១៩៧,៦៩៧ គីឡូម៉ែត្រ លាតសន្ធឹងពីស្រុកសំឡូត នៃខេត្តបាត់ដំបង ឆ្លងកាត់ស្រុកវាលវែង នៃ​ខេត្តពោធិ៍សាត់ បន្តរហូតដល់ខេត្តកោះកុង។ វឌ្ឍនភាព​ការងារ​មកដល់​ពេលនេះ សម្រេចបានជាង ៧០% និង​​អាច​បញ្ចប់​ទាំង​ស្រុង​នៅ​អំឡុង​ឆ្នាំ ២០២៥។

ក្រៅពីផ្លូវជាតិលេខ ១០ លោក បុង ប៊ុនហួន រដ្ឋលេខាធិការ ក្រសួងសាធារណការ និងដឹកជញ្ជូន ក៏​ជាទទួលបន្ទុក​ដឹកនាំ​ជា​ប្រធានគម្រោង​សាងសង់​ផ្លូវជាតិលេខ៧១C។

ផ្លូវជាតិលេខ ៧១C ប្រវែង ១១៤,៦២ គីឡូម៉ែត្រ ចាប់ពីផ្លូវជាតិលេខ៧ ចំណុច PK154+700 ក្នុងខេត្តត្បូងឃ្មុំ ទៅដល់ផ្លូវ​ជាតិ​លេខ ៧១ ចំណុច PK30+400 ខេត្តកំពង់ចាម គឺជាខ្សែផ្លូវដែលពោរពេញដោយទេសភាពខៀវស្រងាត់ត្រជាក់ភ្នែក និងមានសភាពធន់រឹងមាំ និងជាខ្សែផ្លូវដែលមានចរាចរណ៍មមាញឹកនិងការតភ្ជាប់ដ៏សំខាន់។

ផ្លូវជាតិដ៏សំខាន់នេះ​បាន​បើក​ការដ្ឋាន​សាងសង់​នៅថ្ងៃទី០២ ខែមេសា ឆ្នាំ២០២១ និងគ្រោង​បញ្ចប់​នៅ​ពាក់កណ្តាល​ឆ្នាំ ២០២៤។

លោក ផែង សុវិជ្ជានោ រដ្ឋលេខាធិការ និងប្រធានគម្រោងស្តារ និងលើកកម្រិតគុណភាពផ្លូវជាតិលេខ ៤។ គម្រោងស្តារ និងលើកកម្រិតគុណភាពផ្លូវជាតិលេខ ៤ (ភ្នំពេញ-ព្រះសីហនុ) សម្រេចបានលទ្ធផល (Physical Progress) ចំនួន ៦៦,០៦% គិតត្រឹមដើមខែសីហា ឆ្នាំ២០២៤ គ្រោងបញ្ចប់នៅថ្ងៃទី ៣១ ខែធ្នូ ឆ្នាំ២០២៦ ខាងមុខនេះ។

គម្រោងស្តារ និងលើកកម្រិតគុណភាពផ្លូវជាតិលេខ៤ អនុវត្តគម្រោង និងកម្មវិធីហិរញ្ញប្បទានដោយធនាគារពិភពលោក (WB) ចំនួន ១១០លានដុល្លារអាមេរិក ដោយគ្រោងនឹងអនុវត្តចំនួន ០៨ ឆ្នាំ (២០១៨-២០២៦) អនុវត្តន៍ដោយក្រសួងសាធារណការ និងដឹកជញ្ជូន។

ក្រសួងសាធារណការ​និង​ដឹកជញ្ជូន បាន​ចាត់វិធានការ​ពង្រឹង​​តាមដានជាប់ជាប្រចាំ​នៅរាល់ការដ្ឋាន​ស្ថាបនា​ផ្លូវដើម្បីធានាគុណភាព​​ស្រប​តាមស្តង់ដា​​បច្ចេកទេស ខណៈ​កន្លង​ទៅធ្លាប់​មាន​ក្រុមហ៊ុន​សាងសង់មួយ​ចំនួនអនុវត្ត​ខុស​បច្ចេកទេស​ត្រូវ​បាន​ព្រមាន​ដាក់​ក្នុង​បញ្ជី​ខ្មៅ​ទៀត​ផង។

កាល​ជំនាន់លោក ស៊ុន ចាន់ថុល កាន់​ជា​រដ្ឋមន្រ្តី លោក​ក៏តែងតែ​ក្រើន​​រំលឹក​​ឲ្យក្រុមហ៊ុន​សាងសង់​​យកចិត្ត​ទុក​ដាក់​លើ​ការ​ពង្រឹង​គុណភាព​​សាងសង់​​​ និង​ប្រកាស​លែង​ទទួល​ផ្លូវ​ធ្វើ​មុខ​ខូចក្រោយ ធ្វើ​ក្រោយ​ខូចមុខ​​តទៅ​ទៀត៕

The post មន្រ្តី​ជាន់​ខ្ពស់​ក្រសួង​សាធារណការ ៥ រូប ​ទទួល​ខុសត្រូវ​តាមដាន​គុណភាព​ការដ្ឋាន​ផ្លូវជាតិ​ ៦ ខ្សែ appeared first on Kampuchea Thmey Daily.