លោក ប៉ែន សុវិជាតិ Archives - Kampuchea Thmey Daily

ពោត ដំឡូងមី កន្ទក់ កញ្ចុងអង្ករ ទិញពីកសិករខ្មែរមួយឆ្នាំ ១ លានតោន កែច្នៃផលិតជាចំណីសត្វ

Dy Bunnara — Sat, 10 Jan 2026 01:26:00 +0000

ក្នុងឆ្នាំ ២០២៥ ក្រសួងពាណិជ្ជកម្មបានចុះអនុស្សរណៈយោគយល់គ្នា (MOU) ជាមួយក្រុមហ៊ុនផលិតចំណីសត្វក្នុងស្រុកចំនួន ១០ ដើម្បីពង្រីកទីផ្សារកសិផលក្នុងស្រុក តាមរយៈការទិញផលកសិកម្មពីកសិករដើម្បីកែច្នៃផលិតជាចំណីសត្វ។

នៅក្នុងសន្និបាតបូកសរុបលទ្ធផលការងារពាណិជ្ជកម្មឆ្នាំ ២០២៥ និងលើកទិសដៅការងារពាណិជ្ជកម្មឆ្នាំ ២០២៦ លោក លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានឲ្យដឹងថា ក្នុងឆ្នាំ ២០២៥ ក្រសួងពាណិជ្ជកម្មបានសម្របសម្រួលចុះអនុស្សរណៈយោគយល់គ្នា (MoU) ជាមួយក្រុមហ៊ុនឯកជនចំនួន ១០ ដើម្បីស្រូបទិញផលកសិកម្មពីកសិករខ្មែរដែលជាផ្នែកមួយក្នុងការជួយពង្រីកទីផ្សារកសិផលក្នុងស្រុក។

លោកថា តាមរយៈការចុះអនុស្សរណៈយោគយល់ជាមួយក្រុមហ៊ុនផលិតចំណីសត្វចំនួន ១០ មានលទ្ធភាពអាចស្រូបទិញផលកសិកម្មពីកសិករខ្មែរក្នុងមួយឆ្នាំបានជាង ១ លានតោនដែលក្នុងនោះរួមមាន ពោតក្រហមស្ងួតចំនួន ៤៩៣,០០០ តោន/ឆ្នាំ ដំឡូងមីស្ងួតចំនួន ២៤៩,០០០ តោន/ឆ្នាំ កញ្ចុងអង្ករចំនួន ១១៣,០០០ តោន/ឆ្នាំ និងកន្ទក់ ចំនួន ១៤៧,០០០ តោន/ឆ្នាំ។

ជាមួយគ្នានេះ ក្រសួងក៏បានខិតខំជំរុញការនាំចេញដំឡូងមីស្ងួតទៅទីផ្សារប្រទេសចិនចំនួន ៥០ ម៉ឺនតោនសម្រាប់ឆ្នាំ ២០២៥ និង ២០២៦ ដែលនេះជាបើកច្រកទីផ្សារដំឡូងផ្ទាល់រវាងប្រទេសកម្ពុជា និងសាធារណរដ្ឋប្រជាមានិតចិន។

ដោយឡែកទីផ្សារប្រទេសវៀតណាម ក្រសួងបានសម្របសម្រួលចុះអនុស្សរណៈរវាងសហព័ន្ធដំឡូងមីកម្ពុជា និងសហព័ន្ធដំឡូងមីវៀតណាម ដើម្បីជំរុញការនាំចេញដំឡូងមីស្រស់ក្នុងបរិមាណប្រមាណ ១០ លានតោនក្នុងមួយឆ្នាំ។

ក្នុងវេទិកានិងពិព័រណ៍កសិកម្ម ២០២៥ លោក វ៉ា រុនសាត រដ្ឋលេខាធិការក្រសួងពាណិជ្ជកម្មបានលើកឡើងពីការរៀបចំគោលនយោបាយជាតិ សម្រាប់កសិផលសក្ដានុពលរបស់កម្ពុជាដូចជា គោលនយោបាយជាតិស្រូវអង្ករ, គោលនយោបាយស្តីពីស្វាយចន្ទី, ដំឡូងមី, ម្រេច, និងស្វាយជាដើម។

លោកថា ការរៀបចំគោលនយោបាយ គឺដើម្បីជៀសវាងការផលិតលើសតម្រូវការ។ «តាមរយៈការរៀបចំគោលនយោបាយជាតិ យើងនឹងដឹងថាផលិតផលណាឆ្អែត ផលិតផលណាដែលផលិតលើសតម្រូវការទីផ្សារ»។

បើតាមមន្រ្តីក្រសួងពាណិជ្ជកម្ម ការរៀបចំគោលនយោបាយជាតិ ប្រៀបដូចជាមានផែនទីបង្ហាញផ្លូវដែលអាចដឹងថាផ្លូវណាពិបាក ផ្លូវណាស្រួលដើម្បីអាចរកដំណោះស្រាយឬរកច្រកជួយកសិករបាន៕

The post ពោត ដំឡូងមី កន្ទក់ កញ្ចុងអង្ករ ទិញពីកសិករខ្មែរមួយឆ្នាំ ១ លានតោន កែច្នៃផលិតជាចំណីសត្វ appeared first on Kampuchea Thmey Daily.

កម្ពុជានឹងចូលរួមកិច្ចប្រជុំលើកទី៤ គណៈកម្មការសេដ្ឋកិច្ចចម្រុះកម្ពុជា-តួកគីយ៉េ ខាងមុខនេះ

Din Thary — Wed, 22 Oct 2025 03:28:14 +0000

កម្ពុជា តាមរយៈក្រសួងពាណិជ្ជកម្ម នឹងដឹកនាំគណៈប្រតិភូ ចូលរួមនូវកិច្ចប្រជុំលើកទី៤ នៃគណៈកម្មការសេដ្ឋកិច្ចចម្រុះរវាងកម្ពុជា-តួកគីយ៉េ ដែលនឹងរៀបចំឡើងនាខែវិច្ឆិកា ខាងមុខនេះ។

បើតាមក្រសួងពាណិជ្ជកម្មកម្ពុជា កិច្ចប្រជុំលើកទី៤ នៃគណៈកម្មការសេដ្ឋកិច្ចចម្រុះរវាងកម្ពុជា-តួកគីយ៉េ ដែលនឹងរៀបចំនាពេលខាងមុខនេះនៅរដ្ឋធានីអង់ការ៉ា សាធារណរដ្ឋតួកគីយ៉េ គ្រប់ដណ្តប់វិស័យពាក់ព័ន្ធ ១៧ សំខាន់ៗ។

លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម នឹងដឹកនាំគណៈប្រតិភូ ដើម្បីត្រៀមចូលរួមក្នុងកិច្ចប្រជុំលើកទី៤ នេះ ដែលគ្រោងនឹងរៀបចំឡើងនាថ្ងៃទី៣-៤ ខែវិច្ឆិកា ឆ្នាំ២០២៥ ខាងមុខនេះ នៅរដ្ឋធានីអង់ការ៉ា សាធារណរដ្ឋតួកគីយ៉េ ដោយមានវត្តមានចូលរួមពីថ្នាក់ដឹកនាំនៃអន្តរក្រសួង-ស្ថាប័នពាក់ព័ន្ធ។

កិច្ចប្រជុំនេះត្រូវបានរៀបចំឡើង ក្នុងគោលបំណងពិនិត្យ និងពិភាក្សាលើសេចក្តីព្រាងកំណត់ហេតុរួម នៃកិច្ចប្រជុំលើកទី៤ នៃគណៈកម្មការសេដ្ឋកិច្ចចម្រុះរវាងកម្ពុជា-តួកគីយ៉េ ដែលគ្រប់ដណ្តប់លើវិស័យពាក់ព័ន្ធ រួមមាន៖ ពាណិជ្ជកម្ម, វិនិយោគ, កិច្ចសហប្រតិបត្តិការគយ, ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ប្រៃសណីយ៍, ទូរគមនាគមន៍ និងបច្ចេកវិទ្យាទំនាក់ទំនងព័ត៌មាន, ហាឡាល, ស្តង់ដារនីយកម្ម, មាត្រាសាស្រ្ត, សហគ្រាសធុនតូច និងមធ្យម, កសិកម្ម រុក្ខាប្រមាញ់ និងនេសាទ, ធនធានទឹក, ជីវចម្រុះ, ការដឹកជញ្ជូន, សុខាភិបាល, ការអប់រំ និងទេសចរណ៍ ជាដើម៕

The post កម្ពុជានឹងចូលរួមកិច្ចប្រជុំលើកទី៤ គណៈកម្មការសេដ្ឋកិច្ចចម្រុះកម្ពុជា-តួកគីយ៉េ ខាងមុខនេះ appeared first on Kampuchea Thmey Daily.

កម្ពុជា បន្តពង្រឹងគុណភាពផលិតកម្មក្នុងស្រុក ដើម្បីអាចដណ្តើមបានភាពប្រកួតប្រជែងនាំចេញទៅទីផ្សារបរទេស

Din Thary — Mon, 11 Aug 2025 02:37:38 +0000

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជា បានគូសបញ្ជាក់ថា កម្ពុជា ជាពិសេសក្រសួងពាណិជ្ជកម្ម បានបន្តខិតខំប្រឹងប្រែងធ្វើប្រព្រឹត្តិកម្មទំនិញ ក៏ដូចជាធ្វើយ៉ាងណាឱ្យផលិតផលផលិតនៅកម្ពុជា អាចដណ្ដើមបានទីផ្សារក្នុងភាពប្រកួតប្រជែងមួយ ដើម្បីនាំចេញទៅលក់នៅទីផ្សារបរទេសកាន់តែទូលំទូលាយ។

អ្នកនាំពាក្យក្រសួងពាណិជ្ជកម្មរូបនេះ បានលើកឡើងថា វិនិយោគិនដែលចូលមកវិនិយោគនៅក្នុងប្រទេសកម្ពុជានាពេលសព្វថ្ងៃនេះ តែងតែទទួលបានការយកចិត្តទុកដាក់ ហើយតែងទទួលបានការលើកទឹកចិត្តឱ្យកសាងនូវកេរ្តិ៍ឈ្មោះទៅលើការរៀបចំជា Brand name ថ្មី ជាពិសេសគឺជាម៉ាកសញ្ញាដែលផលិតនៅកម្ពុជា (Made in Cambodia) ឬក៏ធ្វើយ៉ាងណាជំរុញឱ្យផលិតផលដែលផលិតនៅក្នុងប្រទេសកម្ពុជានេះ ត្រូវបានលក់ចែកចាយ ឬក៏ត្រូវបាននាំចេញទៅកាន់ទីផ្សារពិភពលោកកាន់តែទូលំទូលាយ។

«នៅក្នុងចំណុចនេះ យើងតែងសង្កេតឃើញថា ម៉ាកផលិតផលបរទេសមួយចំនួនតែងតែទទួលបានការពេញនិយមនៅក្នុងទីផ្សារក្រៅប្រទេស ដែលម៉ាកបរទេសទាំងអស់ត្រូវបានគេធ្វើការកសាងឡើងនៅក្នុងរយៈពេលយូរទាំងការឃោសនា ទំាងការប្រឹងប្រែងជំរុញគុណភាព និងស្រោមសំបកវិចខ្ចប់»។ លោក ប៉ែន សុវិជាតិ បន្ថែមបែបនេះ។

ទន្ទឹមនេះ លោក ប៉ែន សុវិជាតិ ក៏បានគូសបញ្ជាក់ដែរថា ជាក់ស្តែងប្រទេសកម្ពុជា ជាពិសេសក្រសួងពាណិជ្ជកម្មក៏មានវិធានការជំរុញ បង្កើនគុណភាពផលិតកម្មឱ្យមានគុណភាពផលិតផល និងការវិចខ្ចប់ឱ្យមានសោភណភាពដើម្បីដណ្តើមភាពប្រកួតប្រជែងដែរ ក៏ដូចជាការផ្សព្វផ្សាយជាលក្ខណៈទីផ្សារ និងស្រោមសំបកវិចខ្ចប់ដែលជាការរួមចំណែកអាចធ្វើឱ្យការផ្សព្វផ្សាយនេះអាចអនុវត្តទៅបានមានប្រសិទ្ធភាព៕

ដោយ៖ ឌិន ថារី

The post កម្ពុជា បន្តពង្រឹងគុណភាពផលិតកម្មក្នុងស្រុក ដើម្បីអាចដណ្តើមបានភាពប្រកួតប្រជែងនាំចេញទៅទីផ្សារបរទេស appeared first on Kampuchea Thmey Daily.

អ្នកនាំពាក្យ៖ ពន្ធ ១៩% អាចឱ្យកម្ពុជាប្រកួតប្រជែងជាមួយប្រទេសក្នុងតំបន់លើផលិតផលនាំចេញទៅអាមេរិក

Din Thary — Wed, 06 Aug 2025 06:40:05 +0000

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជាបានគូសបញ្ជាក់ថា អត្រាពន្ធ ១៩ % របស់ប្រធានាធិបតីអាមេរិក លោក ដូណាល់ ត្រាំ បានធ្វើឱ្យកម្ពុជាក្លាយទៅជាប្រទេសមួយដែលអាចប្រកួតប្រជែងជាមួយប្រទេសក្នុងតំបន់លើផលិតផលនាំចេញទៅកាន់ទីផ្សារសហរដ្ឋអាមេរិក។

ពាក់ព័ន្ធអត្រាពន្ធ ១៩% លើការនាំចេញទៅកាន់ទីផ្សារអាមេរិក លោក ប៉ែន សុវិជាតិ បានមានប្រសាសន៍ថា ទីផ្សារសហរដ្ឋអាមេរិក គឺជាទីផ្សារធំសម្រាប់វិស័យវាយនភណ្ឌកម្ពុជា ហើយកម្ពុជាក៏គ្រោងនាំចេញទំនិញផ្សេងៗទៀតតាមរយៈការធ្វើពិពិធកម្មទំនិញទៅកាន់ទីផ្សារសហរដ្ឋអាមេរិកដូចគ្នាដែរ ដែលទំនាក់ទំនងនេះ គឺជាទំនាក់ទំនងមួយដែលមានសក្ដានុពលដោយសារអាមេរិកមានកម្លាំងទិញធំ ដូច្នេះចំពោះទីផ្សារមានសក្ដានុពលបែបនេះ កម្ពុជាចាំបាច់ត្រូវថែរក្សា ហើយកម្ពុជាចាំបាច់ត្រូវធ្វើយ៉ាងណាត្រូវប្រឹងប្រែងរក្សា និងពង្រឹងទីផ្សារនេះឱ្យបាន។

លោក បានលើកឡើងថា កន្លងមកអ្នកបញ្ជាទិញរបស់កម្ពុជា ក៏ដូចជាក្រុមហ៊ុនធំៗដែលជាអ្នកទិញនៅសហរដ្ឋអាមេរិក មានទំនុកចិត្តមកលើវិស័យកាត់ដេរ សំលៀកបំពាក់ និងស្បែកជើង កាបូប ធ្វើដំណើរ និងវិស័យឧស្សាហកម្មផ្សេងៗទៀត ដែលជាឧស្សាហកម្មវិនិយោគនៅក្នុងប្រទេសនៅពេលដែលអត្រាពន្ធរបស់លោក ដូណាល់ ត្រាំ ឡើងខ្ពស់ ក៏បានធ្វើឱ្យពួកគេមានការព្រួយបារម្ភខ្លះដែរ ក្នុងចំណោមអ្នកនាំចេញរបស់កម្ពុជាដែលធ្លាប់នាំចេញទៅកាន់ទីផ្សារអាមេរិក។

ប៉ុន្តែ ក្រោមការដឹកនាំរបស់រាជរដ្ឋាភិបាលកម្ពុជា ដែលបានចាត់តាំងក្រុមការងារដោះស្រាយបញ្ហាពន្ធលោក ត្រាំ ដែលមានឧបនាយករដ្ឋមន្ត្រី ស៊ុន ចាន់ថុល លោកស្រី ចម និម្មល និងអ្នកពាក់ព័ន្ធផ្សេងទៀត បានធ្វើឱ្យការចរចាទៅលើបញ្ហាពន្ធនេះ បានធ្លាក់ចុះតាំងពី ៤៩% មកនៅ ៣៦% ហើយចុងក្រោយនេះការចរចារបស់យើងទទួលបានលទ្ធផលផ្លែផ្កាគួរឱ្យកត់សម្គាល់ គឺអត្រាពន្ធធ្លាក់មកនៅត្រឹម ១៩% ប៉ុណ្ណោះ។

លោកបានអះអាងថា៖«កត្តាពន្ធ ១៩% នេះ បានធ្វើឱ្យកម្ពុជា ក្លាយទៅជាប្រទេសមួយដែលមានលក្ខណៈប្រកួតប្រជែងជាមួយប្រទេសមួយចំនួន ដែលជាប្រទេសស្ថិតនៅក្នុងខ្សែសង្វាក់ផ្គត់ផ្គង់ សំលៀកបំពាក់ ស្បែកជើង ផលិតផលធ្វើដំណើរ និងកាបូប ដូច្នេះនៅពេលដែលកម្ពុជាមានលក្ខណៈប្រកួតប្រជែងបែបនេះ គឺសញ្ញាមួយល្អ ដែលអាចឱ្យកម្ពុជាអាចទាក់ទាញវិនិយោគបានបន្ថែមទៀត តាមរយៈបរិយាកាសវិនិយោគនៅកម្ពុជាមានលក្ខណៈអំណោយផល ហើយកម្លាំងពលកម្មក៏នៅក្មេង ព្រមទាំងបរិយាកាសធុរកិច្ច និងការងារមានលក្ខណៈអំណោយផលច្រើនសម្រាប់ការរីកចម្រើន»។

លោកសង្ឃឹមថា ជាមួយនិងអត្រាពន្ធដែលមានលក្ខណៈប្រហាក់ប្រហែលគ្នាទៅនិងប្រទេសដែលស្ថិតនៅក្នុងខ្សែសង្វាក់ផ្គត់ផ្គង់ដូចគ្នា កម្ពុជាអាចនឹងមានព្រាបខ្លះនៅក្នុងការរក្សាបាននូវការវិនិយោគ ព្រមទាំងការទាក់ទាញវិនិយោគថ្មីៗបន្ថែមទៀតនៅក្នុងវិស័យនេះឱ្យមកបោះទុនវិនិយោគនៅកម្ពុជា។

លោក ក៏បានបន្តថា បើទោះបីជាជាក់ស្តែង ស្ថិតនៅក្នុងការចរចាក៏ដោយ ក៏យើងឃើញថា ក្រុមប្រឹក្សាអភិវឌ្ឍន៍កម្ពុជាបន្តបន្ទាប់នៅតែអាចសម្រេចបានទៅលើគម្រោងវិនិយោគបានច្រើនពាន់លានដុល្លារ ហើយក្នុងនោះក៏មានការវិនិយោគទៅលើវិស័យកាត់ដេរ សំលៀកបំពាក់ និងធ្វើដំណើរផងដែរ។

«ដូច្នេះ កុំព្រួយបារម្ភយើងអាចនិយាយបានថាអត្រាពន្ធ ១៩% នៅតែអាចធ្វើឱ្យប្រទេសកម្ពុជាជាប្រទេសដែលមានភាពប្រកួតប្រជែងនៅក្នុងតំបន់ ជាពិសេសភាពប្រកួតប្រជែងជាមួយដៃគូរធ្លាប់ផ្គត់ផ្គង់ទៅកាន់ទីផ្សារសហរដ្ឋអាមេរិកនៅក្នុងវិស័យដូចគ្នានៅក្នុងខ្សែសង្វាក់តម្លៃ»។ លោក ប៉ែន សុវិជាតិ បន្ថែមបែបនេះ។

ទន្ទឹមនេះ លោក ក៏បានអះអាងដែរថា ទៅអនាគត យើងក៏រំពឹងថា វិស័យនេះនិងជួយរួមចំណែកធ្វើឱ្យប្រទេសកម្ពុជាអាចកសាងសេដ្ឋកិច្ចដែលមានលទ្ធភាពសម្រេចតាមផែនការ នៅឆ្នាំ២០២៩ ត្រូវចេញឋានៈប្រទេសដែលកំពុងអភិវឌ្ឍន៍តិចតួចទៅជាប្រទេសកំពុងអភិវឌ្ឍន៍ ហើយនៅក្នុងឆ្នាំ២០៣០ ប្រឹងប្រែងជំរុញឱ្យក្លាយទៅជាប្រទេសមានចំណូលមធ្យមកម្រិតខ្ពស់។ ហេតុនេះហើយ ពន្ធនេះ កម្ពុជានៅមានសង្ឃឹមច្រើន ហើយអាចនិងជួយកម្ពុជាឱ្យមានការកសាងនូវទំនុកចិត្តនៅក្នុងការទាក់ទាញវិនិយោគិនឱ្យមកវិនិយោគ និងធ្វើធុរកិច្ចនៅកម្ពុជាបន្តទៀត៕

ដោយ៖ ឌិន ថារី

The post អ្នកនាំពាក្យ៖ ពន្ធ ១៩% អាចឱ្យកម្ពុជាប្រកួតប្រជែងជាមួយប្រទេសក្នុងតំបន់លើផលិតផលនាំចេញទៅអាមេរិក appeared first on Kampuchea Thmey Daily.

កម្ពុជា បង្វែរទិសនាំចេញទំនិញ ក្រោយថៃបិទព្រំដែនជាមួយកម្ពុជា

Din Thary — Thu, 10 Jul 2025 04:15:31 +0000

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានថ្លែងប្រាប់ «កម្ពុជាថ្មី» នៅថ្ងៃទី១០ ខែកក្កដា ឆ្នាំ២០២៥ នេះថា ពាក់ព័ន្ធនឹងទំនិញនាំចេញពីកម្ពុជាទៅទីផ្សារថៃ ក្រោយមានជម្លោះព្រំដែនមក បច្ចុប្បន្នកម្ពុជាបានបង្វែរទិសនាំចេញតាមប្រទេសវៀតណាម ដើម្បីជំរុញការនាំចេញដោយផ្ទាល់ទៅកាន់ទីផ្សារប្រទេសចិន។

ក្រោយពីមានជម្លោះព្រំដែនកម្ពុជា-ថៃ ពាក់ព័ន្ធទៅនឹងការដោះដូរទំនិញរវាងប្រទេសទាំងពីរ លោក ប៉ែន សុវិជាតិ បានមានប្រសាសន៍ថា ចំពោះទំនិញដែលនាំចេញពីកម្ពុជាទៅកាន់ទីផ្សារប្រទេសថៃក្តី ទៅប្រទេសវៀតណាមក្តី ទីផ្សារចុងក្រោយ នៅតែជាប្រទេសចិន ពីព្រោះប្រទេសទាំងពីរនេះ បានចូលទំនិញពីកម្ពុជាទៅដើម្បីធ្វើការកែច្នៃលក់ទៅកាន់ទីផ្សារចិន។

លោកបានបញ្ជាក់ថា នាពេលបច្ចុប្បន្ននេះកិច្ចការរបស់កម្ពុជាយើង គឺយើងបង្វែរទិសអ្វីដែលធ្លាប់លក់ទៅឱ្យថៃនោះ បង្វែរទិសតាមផ្លូវវៀតណាម ជំរុញការលក់ត្រង់ទៅកាន់ទីផ្សារចិនតាមរយៈការរៀបចំពិធីសារថ្មីៗ។

ជាក់ស្តែង កាលពីពេលថ្មីៗនេះ យើងបានដឹងហើយថា ក្រសួងកសិកម្មទើបតែប្រកាសពីការអាចនាំចេញផ្លែទុរេនស្រស់ពីកម្ពុជា នាំចេញដោយផ្ទាល់ទៅកាន់ទីផ្សារប្រទេសចិន។

«កន្លងមក កម្ពុជាគឺមានអនុស្សរណៈជាមួយភាគីចិនជាច្រើនពិធីសារទៅលើទំនិញកសិកម្មនាំចេញទៅចិន ដូចជា ចេក ដំឡូង និងទំនិញវារីវប្បកម្ម មានត្រី ជាដើមនោះ ហើយនិងទំនិញមួយចំនួនទៀតដែលជាផលិតផលកសិផលក៏កម្ពុជាបាននាំចេញទៅចិនរួចហើយ ដូច្នេះហើយកម្ពុជាមានលទ្ធភាពនៅក្នុងការពង្រីកទីផ្សារនាំចេញទៅចិនបន្ថែមទៀត រួមទាំងអង្ករកម្ពុជាក៏នាំចេញទៅចិនដូចគ្នាដែរ»។ លោក ប៉ែន សុវិជាតិ បន្ថែមបែបនេះ។

ដោយឡែកប្រទេសវៀតណាមក៏បង្កើនការទិញរបស់ខ្លួនដើម្បីនាំចេញទៅកាន់ប្រទេសផ្សេងទៀត ដូចជានាំចូលពីកម្ពុជា ហើយនៅក្នុងករណីនេះ នៅក្នុងការនាំចេញរបស់វៀតណាមប្រហែលជាត្រូវពឹងផ្អែកវត្ថុធាតុដើមមួយចំនួនធំពីកម្ពុជាក្នុងករណីផលិតផលកសិកម្ម។

ទន្ទឹមនេះ ក្រៅតែពីការងារដើម្បីជំរុញការនាំចេញទៅក្រៅប្រទេស លោក ប៉ែន សុវិជាតិ បានឱ្យដឹងបន្តថា ក្រសួងពាណិជ្ជកម្មក៏បានធ្វើការជំរុញទីផ្សារក្នុងស្រុក ដោយក្នុងនោះនៅតាមផ្សារទំនើបមួយចំនួននៅកម្ពុជា នៅពេលដែលពិបាកនៅក្នុងការនាំបន្លែផ្លែឈើពីប្រទេសថៃមក គឺងាកមកទិញផលិតផលក្នុងស្រុកយកទៅលក់។

ជាក់ស្តែង ដូចជា ផ្សារទំនើបអ៊ីអន ផ្សារទំនើបជិបម៉ុង ផ្សារថៃហួត ផ្សារឡាកគី ផ្សារកសិកម្មរបស់អ្នកឧកញ៉ាម៉ុងរិទ្ធី បានស្រូបយកនូវបរិមាណបន្លែ ផ្លែឈើមួយចំនួនដែលធ្លាប់លក់ចេញទៅថៃយកមកលក់នៅក្នុងស្រុកវិញ។ ក្នុងករណីនេះ បើទោះបីជាមានកន្លែងមួយចំនួនតម្រូវឱ្យមានគុណភាពឆ្លើយតបក្តី ក៏កសិករខិតខំពង្រឹង រៀបចំគុណភាពទៅតាមតម្រូវការទីផ្សារទាំងអស់នេះ។

លោក ប៉ែន សុវិជាតិ ក៏បានបន្ថែមដែរថា ជាបន្តបន្ទាប់ស្របតាមការណែនាំរបស់ក្រសួងពាណិជ្ជកម្មបញ្ហានេះនឹងប្រព្រឹត្តិទៅមានភាពល្អប្រសើរឡើងវិញ គឺវិធានការនៃការបង្វែរទិស និងវិធានការដែលយើងអាចឱ្យទីផ្សារក្នុងស្រុកជួយស្រូបយកទំនិញកសិផលទាំងអស់នោះរបស់កសិករ៕

ដោយ៖ ឌិន ថារី

The post កម្ពុជា បង្វែរទិសនាំចេញទំនិញ ក្រោយថៃបិទព្រំដែនជាមួយកម្ពុជា appeared first on Kampuchea Thmey Daily.

បណ្តាពាណិជ្ជករថៃបង្វែរទិសនាំចូលទំនិញមកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក

Din Thary — Wed, 09 Jul 2025 06:52:09 +0000

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានលើកឡើងថាពាក់ព័ន្ធនិងការបិទព្រំដែនគោកទាំងអស់ជាមួយកម្ពុជា ជាឯកតោភាគីរបស់ភាគីថៃ បច្ចុប្បន្ននេះ សភាពការពាណិជ្ជកម្ម ក៏ដូចជាភាគីថៃ ជាពិសេសអ្នករកស៊ី បានបង្វែរទិសការនាំចូលទំនិញគ្រឿងឧបភោគបរិភោគដទៃទៀតមកកម្ពុជាទៅតាមផ្លូវទឹកវិញ លើកលែងតែប្រភេទទំនិញដែលកម្ពុជាបិទការនាំចូលពីថៃប៉ុណ្ណោះ។

ថ្លែងប្រាប់«កម្ពុជាថ្មី» នៅថ្ងៃទី០៩ ខែកក្កដា ឆ្នាំ២០២៥ លោក ប៉ែន សុវិជាតិ បានមានប្រសាសន៍ថា៖«ជាការពិតណាស់ការបិទព្រំដែនរវាងប្រទេសនីមួយៗ ការដឹកជញ្ជូនផ្លូវគោករវាងប្រទេសជិតខាង គឺមានតម្លៃថោកជាងការដឹកជញ្ជូនតាមផ្លូវទឹក ក៏ប៉ុន្តែបន្ទាប់ពីការបិទព្រំដែននៅតាមច្រកទាំង ៧ ព្រំដែនកម្ពុជា-ថៃ នេះមក សូមបញ្ជាក់ថា កម្ពុជាបិទនេះមិនមែនជាចេតនានោះទេ ក៏ប៉ុន្តែដោយសារតែភាគីថៃបិទព្រំដែនដោយខ្លួនឯងជាឯកតោភាគី»។

លោក បានមានប្រសាសន៍ថា តាមរយៈព័ត៌មានដែលទទួលបាន ខាងសមាគមពាណិជ្ជកម្មថៃ ក៏ដូចជាសភាពាណិជ្ជកម្មថៃ បានដាក់ញត្តិស្នើទៅកាន់រាជរដ្ឋាភិបាល ក៏ដូចជាយោធាថៃឱ្យមកចរចាជាមួយកម្ពុជាម្តងហើយម្តងទៀត ដើម្បីសុំបើកច្រកព្រំដែនទាំងអស់ជាមួយកម្ពុជាឡើងវិញ ដើម្បីដោះដូរសកម្មភាពពាណិជ្ជកម្មឡើងវិញ។ យ៉ាងណាមិញ ជុំវិញបញ្ហានេះ ជំហររបស់រាជរដ្ឋាភិបាលកម្ពុជា ថៃបានបិទជាឯកតោភាគី ដូច្នេះថៃមានកាតព្វកិច្ចត្រូវបើកឡើងវិញ ហើយកម្ពុជានឹងតាមក្រោយនៅរយៈពេល ៥ ម៉ោងក្រោយពីថៃបានបើកព្រំដែនឱ្យដំណើរការទាំងដូចដើមវិញ។

លោក ប៉ែន សុវិជាតិ បានបញ្ជាក់ថា «សូមជម្រាបថា សភាពការពាណិជ្ជកម្មនាពេលបច្ចុប្បន្ននេះ ទាំងភាគីថៃ ជាពិសេសអ្នករកស៊ីបានបង្វែរការនាំចូលទៅតាមផ្លូវទឹកវិញ ពីព្រោះកម្ពុជាបិទការនាំចូលពីថៃទាំងស្រុងទៅលើប្រភេទ ប្រេងឥន្ធនៈ ឧស្ម័ន អគ្គិសនី និងបន្លែ ផ្លែឈើប៉ុណ្ណោះ ហើយគ្រឿងឧបភោគបរិភោគដទៃទៀត នៅដំណើរការជាធម្មតា គឺដឹកជញ្ជូនតាមផ្លូវទឹកឆ្ពោះមកកម្ពុជាតាមកំពង់ផែក្រុងព្រះសីហនុ»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ក៏បានឱ្យ«កម្ពុជាថ្មី» ដឹងបន្ថែមថា រហូតមកដល់ពេលនេះទំនិញនាំចូលពីថៃដូចជាមិនទាន់មានការឡើងថ្លៃអ្វីគួរឱ្យកត់សម្គាល់នោះ គឺអាចឡើងថ្លៃទៅដោយមុខទំនិញមួយចំនួន ហើយកម្ពុជាយើងមានការខ្វះខាតលើបញ្ហាទឹកដោះគោជាដើម។

ក្រៅពីនេះ ពាក់ព័ន្ធបន្លែ ផ្លែឈើ អ្នកឧកញ៉ា មើលឃើញថា បច្ចុប្បន្នមានតែចង់លើសតម្រូវការនៅក្នុងស្រុកទៅទៀត ហើយបន្លែ ត្រីសាច់បែរជាមានការចុះថោកទៅវិញ ហេតុដូចនេះហើយអ្នកផលិតនៅក្នុងស្រុកនៅតែមិនទាន់មានឱកាសផលិត ដើម្បីអាចប្រកួតប្រជែងទៅនិងទីផ្សារនាំចូលពីបណ្តាប្រទេសវៀតណាម ក៏ដូចជាបណ្តាប្រទេសផ្សេងៗក្នុងអាស៊ានដូចគ្នាដែរ។

អ្នកឧកញ៉ា បានបញ្ជាក់ថា «បើទោះបីជាកម្ពុជាមិនមានការនាំចូលពីប្រទេសថៃក៏ពិតមែន ប៉ុន្តែកម្ពុជានៅមានបណ្តាប្រទេសក្នុងអាស៊ានដែលជាសហគមន៍សេដ្ឋកិច្ចអាស៊ាន ដូច្នេះហើយប្រសិនបើថៃបង្វែរទិសក្នុងការដឹកជញ្ជូនមកកាន់កម្ពុជា ដូច្នេះប្រាកដណាស់ថានិងបង្កើនថ្លៃដើម។

ក្រោយយោធាថៃបិទព្រំដែនទាំងជាមួយកម្ពុជាជាឯកតោភាគីអស់រយៈពេលជាង ១ខែ កាលពីថ្ងៃទី០៧ ខែកក្កដា កន្លងទៅ អាជីវករនិងពាណិជ្ជករថៃបានចាប់ផ្តើមប្រមូលផ្តុំគ្នាតវ៉ាដ៏កម្រមួយនៅច្រកទ្វារព្រំដែនអន្តរជាតិក្នុងទឹកដីថៃ ទាមទារឲ្យបើកច្រកព្រំដែនឡើងវិញ។

ក្នុងការបិទច្រកព្រំដែននេះ យោធារបស់ថៃបានចេញបញ្ជាឲ្យបិទច្រកព្រំដែនជាឯកតោភាគីជាលើកដំបូងកាលថ្ងៃទី៧ខែមិថុនា ក្រោយពីការផ្ទុះអាវុធដែលបង្កឡើងដោយយោធាថៃនៅតំបន់មុំបីនៅឯខេត្តព្រះវិហារ ហើយ ការប្រឈមមុខដាក់គ្នារវាងកងទ័ពនៃប្រទេសថៃនិងកម្ពុជាក៏បានកើនឡើងជាបន្តបន្ទាប់ និងបានរីករាលដាលដល់វិស័យផ្សេងៗទៀត ដែលភាគីថៃមានទំនាស់ផ្ទៃក្នុងនោះចង់បង្វែរស្ថានការផ្ទៃក្នុងងាកមកទម្លាក់កំហុសដាក់កម្ពុជា។

ជុំវិញការបិទព្រំដែននេះដែរសម្ដេចនាយករដ្ឋមន្ត្រី ហ៊ុន ម៉ាណែត បានបញ្ជាក់ជំហរមិនចរចាជាមួយភាគីថៃ ពាក់ព័ន្ធនឹងការបិទបើកច្រកព្រំដែនរវាងប្រទេសទាំងពីរឡើយ ដោយសម្ដេច ប្រាប់ឱ្យថៃបើកច្រកព្រំដែនមុន ហើយកម្ពុជានឹងបើកតាមក្រោយ ព្រោះថៃជាអ្នកបិទជាឯកតោភាគីមុន។ សម្ដេចធិបតី បានគូសបញ្ជាកថា កម្ពុជាមានសិទ្ធិគ្រប់គ្រាន់ក្នុងការបិទព្រំដែនជាមួយថៃជាអចិន្រ្តៃយ៍ ប៉ុន្តែកម្ពុជាមិនធ្វើដូច្នោះទេ គឺកម្ពុជាធ្វើសម្បទានឱ្យថៃបើកវិញមុន កម្ពុជាក៏បើកព្រំដែនវិញដែរ៕

ដោយ៖ ឌិន ថារី

The post បណ្តាពាណិជ្ជករថៃបង្វែរទិសនាំចូលទំនិញមកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក appeared first on Kampuchea Thmey Daily.

អ្នកនាំពាក្យក្រសួងពាណិជ្ជកម្ម៖ បច្ចុប្បន្ន កម្ពុជាមានប្រេងគ្រប់គ្រាន់សម្រាប់ផ្គត់ផ្គង់តម្រូវការក្នុងប្រទេស

Din Thary — Tue, 08 Jul 2025 08:29:52 +0000

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជា បានបញ្ជាក់ថា បើទោះបីជាកម្ពុជាបិទការនាំចូលប្រេងទាំងស្រុងពីប្រទេសថៃក៏ដោយ ក៏បច្ចុប្បន្នកម្ពុជានៅតែមានប្រេងគ្រប់គ្រាន់សម្រាប់ផ្គត់ផ្គង់ទៅតាមតម្រូវការនៅក្នុងប្រទេស។

ប្រាប់«កម្ពុជាថ្មី» នៅថ្ងៃទី០៨ ខែកក្កដា ឆ្នាំ២០២៥ នេះ លោក ប៉ែន សុវិជាតិ បានឱ្យដឹងថា បច្ចុប្បន្នក្រសួងរ៉ែ និងថាមពល បានធ្វើកិច្ចការនេះរួចរាល់មួយចំនួនធំហើយជាមួយក្រុមហ៊ុននាំចូលប្រេង។ ជាក់ស្តែង មកទល់ពេលនេះ កម្ពុជាមិនមានការខ្វះខាតប្រេងសម្រាប់លក់ចែកចាយនោះទេ ដោយក្រុមហ៊ុនប្រេងក្នុងស្រុកទាំងអស់ បានបង្វែរទិសនាំចូលប្រេងពីប្រភពខាងក្រៅ ដូចជា ពីសិង្ហបុរី ម៉ាឡេស៊ី និងវៀតណាមជាដើម។

លោកបានអះអាងថា «សព្វថ្ងៃក្រុមហ៊ុនក្នុងស្រុកទាំងអស់ គឺមានប្រភពប្រេងគ្រប់គ្រាន់សម្រាប់លក់ចែកចាយ ដោយរក្សាបាននូវសន្និធិពាណិជ្ជកម្ម អាចមានលទ្ធភាពគ្រប់គ្រាន់នៅក្នុងការលក់ចែកចាយ បើទោះបីជាមិនមានការនាំចូលប្រេងសោះរយៈពេល ១ខែក៏ដោយ»។

ទន្ទឹមនេះ លោក ប៉ែន សុវិជាតិ បានបន្ថែមថា សូម្បីតែក្រុមហ៊ុនដែលធ្លាប់នាំចូលពីថៃ ក៏បង្វែរទិសធ្វើការនាំចូលប្រេងពីប្រភពផ្សេងដូចគ្នាដែរ។

«រហូតមកដល់ពេលនេះ ដូចយើងបានសង្កេតឃើញហើយថា នៅតាមស្ថានីយប្រេងនៅក្នុងស្រុកមិនមានការឡើងថ្លៃនោះទេ ហើយក៏មិនមានការខ្វះខាតប្រេងនៅក្នុងការលក់ចែកចាយដូចគ្នាដែរ ដោយយើងបានឃើញហើយថាតម្លៃប្រេងអន្តរជាតិមានការធ្លាក់ចុះបន្តិច ដូច្នេះកាលណាប្រេងឆៅមានការធ្លាក់ចុះមកនៅក្រោម ៧០ដុល្លារ/បារ៉ែល នោះប្រេងដែលចម្រាញ់រួច លក់នៅតាមស្ថានីយក៏ធ្លាក់ចុះដែរ។ ដូច្នេះនៅរយៈពេល ១០ថ្ងៃក្រោយ ប្រសិនបើតម្លៃប្រេងអន្តរជាតិមានការធ្លាក់ចុះបន្តទៀត នោះតម្លៃប្រេងនៅតាមស្ថានីយក៏អាចមានការធ្លាក់ចុះជាងនេះបន្តទៀតដែរ»។ លោក ប៉ែន សុវិជាតិ បន្ថែមបែបនេះ។

សូមជម្រាបថា កាលពីយប់ថ្ងៃអាទិត្យ ទី ២២ ខែមិថុនា សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃប្រទេសកម្ពុជា បានប្រកាសថា៖ «ចាប់ពីម៉ោង ១២ យប់នេះទៅ ការនាំចូលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃ ត្រូវផ្អាកទាំងស្រុង»។

លើកឡើងក្នុងបណ្តាញទំនាក់ទំនងសង្គមផ្លូវការ សម្ដេចធិបតីនាយករដ្ឋមន្ត្រី ហ៊ុន ម៉ាណែត បានគូសបញ្ជាក់ថា «បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈ និងឧស្ម័នឥន្ធនៈពីប្រភពផ្សេង គ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា»។

ការបោះជំហានយ៉ាងដូច្នេះរបស់កម្ពុជា ធ្វើឡើងក្នុងបរិបទនៃភាពកាន់តែតានតឹងកម្ពុជា-ថៃជុំវិញបញ្ហាព្រំដែន ក្រោយមានការគំរាមកំហែងពីអ្នកនយោបាយថៃ ដែលស្នើឱ្យរដ្ឋាភិបាលខ្លួន កាត់ផ្ដាច់ការផ្គត់ផ្គង់ប្រេងឱ្យកម្ពុជា។ ឆ្លើយតបនឹងបញ្ហានេះ សម្ដេច ហ៊ុន សែន ប្រធានព្រឹទ្ធសភាកម្ពុជា បានបង្ហោះសារនៅលើបណ្ដាញសង្គម យ៉ាងដូច្នេះថា «យើងមិនស្លាប់ដោយសារមិននាំប្រេងពីថៃមកនោះទេ ប៉ុន្តែអ្នកដែលស្លាប់គឺក្រុមហ៊ុន PTT របស់ថៃទៅវិញទេ។ តើអ្នកចង់ឲ្យក្រុមហ៊ុនថៃ PTT ស្លាប់មែនទេ? បើចង់ សូមឲ្យអ្នកធ្វើតាមបំណងចុះ»៕

ដោយ៖ ឌិន ថារី

The post អ្នកនាំពាក្យក្រសួងពាណិជ្ជកម្ម៖ បច្ចុប្បន្ន កម្ពុជាមានប្រេងគ្រប់គ្រាន់សម្រាប់ផ្គត់ផ្គង់តម្រូវការក្នុងប្រទេស appeared first on Kampuchea Thmey Daily.

ការនាំចេញរបស់កម្ពុជាទៅកាន់ទីផ្សារអឺរ៉ុប សម្រេចបានជិត២ពាន់លានដុល្លារក្នុងរយៈពេល៥ខែឆ្នាំនេះ

May Kunmakara — Tue, 24 Jun 2025 03:39:00 +0000

កម្ពុជាបាននាំចេញទៅកាន់សហភាពអឺរ៉ុប មានទំហំទឹកប្រាក់ ១,៩ ពាន់លានដុល្លារក្នុងរយៈពេល៥ខែឆ្នាំនេះ កើនជាង ២៣ ភាគរយធៀបនឹង រយៈពេលដូចគ្នាកាលពីឆ្នាំមុន ជាបញ្ហាប្រឈមនានាជាពិសេសការការងើបឡើងវិញនៃសង្រ្គាមពាណិជ្ជកម្មសកល និងប្រកួតប្រជែងនៃភូមិសាស្រ្តនយោបាយក្តី។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករការនាំចូលរបស់កម្ពុជាពីសហភាពអឺរ៉ុបជាង១,៨៨លានដុល្លារក្នុងរយៈ៥ខែដូចគ្នាកាលពីឆ្នាំមុនថយចុះ ៦,៧៥% ខណៈដែរពាណិជ្ជកម្មទ្វេភាគីសម្រេចបានទឹកប្រាក់ជាង២,២ពាន់លានដុល្លារបានកើនឡើងជាង១៨% ។

របាយការណ៍បានបញ្ជាក់ថា ប្រទេសអាល្លឺម៉ង់ និងអេស្បាញជាដៃគូពាណិជ្ជកម្មធំបំផុតរបស់កម្ពុជានៅសហភាពអឺរ៉ុបដែលមានទំហំពាណិជ្ជកម្មទ្វេភាគីចំនួនជាង ៣៦៩ លានដុល្លារ និង ៤១៤ លានដុល្លាររៀងៗខ្លួន។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានថ្លែងប្រាប់កម្ពុជាថ្មីកាលពីពេលថ្មីៗនេះថា តួលេខទាំងនេះបង្ហាញពីសារៈសំខាន់របស់សហភាពអឺរ៉ុបជាទិសដៅនាំចេញសម្រាប់កម្ពុជា ប៉ុន្តែកំណើននាប៉ុន្មានខែដើមឆ្នាំនេះគឺពុំទាន់ស្មើនឹងតម្លៃមុនការផ្ទុះរីករាលដាលនៃជំងឺកូវីដឡើយ។

លោកបានគូសបញ្ជាក់ថា បច្ចុប្បន្ន គុណភាពនៃផលិតផលកម្ពុជាមានភាពប្រសើរឡើងក្នុងរយៈពេលប៉ុន្មានឆ្នាំមកនេះ ដោយប្រកាន់ខ្ជាប់នូវស្តង់ដារអន្តរជាតិ ដែលបានបង្កើនទំនុកចិត្តក្នុងចំណោមអ្នកប្រើប្រាស់នៅអឺរ៉ុប ។

លោកបានថ្លែងបញ្ជាក់ថា៖«ទោះបីជាការស្ទុះងើបសេដ្ឋកិច្ចដែលកំពុងបន្តរបស់ប្លុកសហភាពអឺរ៉ុបមិនឈានដល់កម្រិតមុនជំងឺកូវីដ១៩ក៏ដោយ ការនាំចេញរបស់យើងទៅកាន់ប្លុកនេះបានកើនឡើងជាលំដាប់។ យើងនៅតែទទួលបានការបញ្ជាទិញសម្លៀកបំពាក់ ស្បែកជើង និងផលិតផលកសិកម្មពីអឺរ៉ុប»។

គួររំលឹកផងដែរនៅឆ្នាំ២០២០ សហភាពអឺរ៉ុបបានដកប្រព័ន្ធអនុគ្រោះពន្ធEBA ប្រហែល ២០ភាគរយពីកម្ពុជា។ ការណ៍នេះមានន័យថាផលិតផលនាំចេញចម្បងរបស់កម្ពុជាមួយចំនួនមានដូចជា សម្លៀកបំពាក់ ស្បែកជើង និងផលិតផលធ្វើដំណើរ ពេលនេះត្រូវជាប់កាតព្វកិច្ចពន្ធគយរបស់សហភាពអឺរ៉ុប។

ភាគច្រើនកម្ពុជានាំចេញ ផលិតផលវាយនភណ្ឌ ស្បែកជើង កង់ គ្រឿងឧបភោគបរិភោគ អង្ករ និងផលិតផលកសិកម្មផ្សេងទៀតទៅកាន់សហភាពអឺរ៉ុប ក្រោមប្រព័ន្ធអនុគ្រោះពាណិជ្ជកម្មអ្វីៗគ្រប់យ៉ាងលើកលែងតែអាវុធ (EBA)។

ពាណិជ្ជកម្មសរុបកម្ពុជា-សហភាពអឺរ៉ុបមានតម្លៃ៤,៦១ពាន់លានដុល្លារក្នុងឆ្នាំ២០២៣ ធ្លាក់ចុះជិត៥ភាគរយពី៤,៨៥ពាន់លានដុល្លារក្នុងឆ្នាំ២០២២។ ក្នុងនោះ កម្ពុជាបាននាំចេញទំនិញដែលមានទំហំទឹកប្រាក់ ៣,៦៦ ពាន់លានដុល្លារទៅសហភាពអឺរ៉ុប ធ្លាក់ចុះ ៩ ភាគរយធៀបនឹង ៤,០៤ពាន់លានដុល្លារក្នុងឆ្នាំ២០២២។ នេះបើតាមក្រសួងពាណិជ្ជកម្ម៕

កាលពីឆ្នាំ២០២៤ ពាណិជ្ជកម្មទ្វេភាគីរវាងកម្ពុជា-សហភាពអឺរ៉ុបសម្រេចបានទឹកប្រាក់ជាង៥,៣២៩ ពាន់លានដុល្លារបានកើនឡើងជាង១៥ ភាគរយធៀបនឹងឆ្នាំ២០២៣។ ក្នុងនោះកម្ពុជាបាននាំចេញទៅកាន់សហភាពអឺរ៉ុប មានទំហំទឹកប្រាក់ ៤,៤១ ពាន់លានដុល្លារ កើនឡើងជាង២០ ភាគរយធៀបនឹងឆ្នាំ២០២៣ ខណៈការនាំចូលរបស់កម្ពុជាពីសហភាពអឺរ៉ុបជិត ៩១៨លានដុល្លារក្នុងឆ្នាំមុនថយចុះជាង៣ភាគរយ៕

The post ការនាំចេញរបស់កម្ពុជាទៅកាន់ទីផ្សារអឺរ៉ុប សម្រេចបានជិត២ពាន់លានដុល្លារក្នុងរយៈពេល៥ខែឆ្នាំនេះ appeared first on Kampuchea Thmey Daily.

លោក ប៉ែន សុវិជាតិ Archives - Kampuchea Thmey Daily

ពោត ដំឡូងមី កន្ទក់ កញ្ចុងអង្ករ ទិញ​ពីកសិករ​ខ្មែរ​មួយឆ្នាំ ១ លាន​តោន​ កែច្នៃ​ផលិតជា​ចំណីសត្វ

កម្ពុជានឹងចូលរួមកិច្ចប្រជុំលើកទី៤ គណៈកម្មការសេដ្ឋកិច្ចចម្រុះកម្ពុជា-តួកគីយ៉េ ខាងមុខនេះ

កម្ពុជា បន្តពង្រឹងគុណភាពផលិតកម្មក្នុងស្រុក ដើម្បីអាចដណ្តើមបានភាពប្រកួតប្រជែងនាំចេញទៅទីផ្សារបរទេស

អ្នកនាំពាក្យ៖ ពន្ធ ១៩% អាចឱ្យកម្ពុជាប្រកួតប្រជែងជាមួយប្រទេសក្នុងតំបន់លើផលិតផលនាំចេញទៅអាមេរិក

កម្ពុជា បង្វែរទិសនាំចេញទំនិញ ក្រោយថៃបិទព្រំដែនជាមួយកម្ពុជា

បណ្តាពាណិជ្ជករថៃបង្វែរទិសនាំចូលទំនិញ​មកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក

​ការនាំចេញរបស់កម្ពុជាទៅកាន់ទីផ្សារអឺរ៉ុប សម្រេចបានជិត២​ពាន់លាន​ដុល្លារក្នុងរយៈពេល៥ខែឆ្នាំនេះ

ពោត ដំឡូងមី កន្ទក់ កញ្ចុងអង្ករ ទិញពីកសិករខ្មែរមួយឆ្នាំ ១ លានតោន កែច្នៃផលិតជាចំណីសត្វ

បណ្តាពាណិជ្ជករថៃបង្វែរទិសនាំចូលទំនិញមកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក

ការនាំចេញរបស់កម្ពុជាទៅកាន់ទីផ្សារអឺរ៉ុប សម្រេចបានជិត២ពាន់លានដុល្លារក្នុងរយៈពេល៥ខែឆ្នាំនេះ