លោក ម៉េង ហុង Archives - Kampuchea Thmey Daily

ផែនការប្រតិបត្តិស្ដីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ ២០២៤-២០២៦ ដាក់ឱ្យប្រើប្រាស់ជាផ្លូវការ

អ៊ិន ពិសី — Mon, 24 Mar 2025 23:00:00 +0000

លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីព្រឹកថ្ងៃទី ២៤ ខែមីនា ឆ្នាំ ២០២៥ បានអញ្ជើញចូលរួមជាគណៈអធិបតីក្នុងពិធីប្រកាសដាក់ឱ្យប្រើប្រាស់ជាផ្លូវការ “ផែនការប្រតិបត្តិ ស្ដីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ ២០២៤-២០២៦” នៅសណ្ឋាគារ Fairfield by Marriott Phnom Penh ក្រោមអធិបតីភាព លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ។

ពិធីនេះរៀបចំឡើងក្នុងគោលបំណងដើម្បីចូលរួមពង្រីកការគ្របដណ្ដប់កិច្ចគាំពារសង្គម សន្តិសុខសង្គម ដល់កម្មករ-និយោជិត និងអ្នកសេដ្ឋកិច្ចក្រៅប្រព័ន្ធ ស្របតាមក្របខណ្ឌគោលនយោបាយជាតិគាំពារសង្គម និងយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ ២០២៣-២០២៨ ក៏ដូចជាគោលនយោបាយ អាទិភាពរបស់រាជរដ្ឋាភិបាលនីតិកាលទី ៧ នៃរដ្ឋសភា។

ក្នុងឱកាសនោះ លោកប្រតិភូរាជរដ្ឋាភិបាល បានអញ្ជើញទទួលសៀវភៅផែនការប្រតិបត្តិស្ដីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គមឆ្នាំ ២០២៤-២០២៦ ដោយផ្ទាល់ពីសំណាក់ លោករដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ជាមួយគ្នានោះដែរ លោក លៀង ពន្លក ប្រធាននាយកដ្ឋានគោលនយោបាយសន្តិសុខសង្គម នៃ ប.ស.ស បានធ្វើបទបង្ហាញចែករំលែកចំណេះដឹងអំពីការអនុវត្តរបបសន្តិសុខសង្គមនៅកម្ពុជា រួមទាំងអត្ថប្រយោជន៍ផ្សេងៗ ដែលមានចែងក្នុងបទប្បញ្ញត្តិ នៃច្បាប់ស្តីពីរបបសន្តិសុខសង្គម ជូនដល់អ្នកចូលរួមទាំងអស់ឱ្យយល់ដឹងកាន់តែស៊ីជម្រៅបន្ថែមទៀត៕

អត្ថបទ ៖ សំអឿន

The post ផែនការប្រតិបត្តិស្ដីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ ២០២៤-២០២៦ ដាក់ឱ្យប្រើប្រាស់ជាផ្លូវការ appeared first on Kampuchea Thmey Daily.

ប.ស.ស តម្រូវឲ្យមូលដ្ឋានសុខាភិបាលអនុវត្ត ១០ ចំណុច ដើម្បីផ្ដល់សេវាសុខាភិបាលប្រកបដោយប្រសិទ្ធភាព

អ៊ិន ពិសី — Wed, 29 Jan 2025 07:43:08 +0000

បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានតម្រូវឲ្យមូលដ្ឋានសុខាភិបាលដៃគូ ប.ស.ស ទាំងអស់ ត្រូវអនុវត្តតាមរំហូរចំនួន ១០ ចំណុច ដើម្បីផ្ដល់សេវាសុខាភិបាលប្រកបដោយ តម្លាភាព ប្រសិទ្ធភាព និងសង្គតិភាព ជូនសមាជិក ប.ស.ស។

នៅរសៀលថ្ងៃទី ២៩ ខែមករា ឆ្នាំ ២០២៥ នេះ តាមរយៈសេចក្ដីណែនាំស្ដីពី«ការពង្រឹងតួនាទីភារកិច្ចរបស់មូលដ្ឋានសុខាភិបាលដៃគូ ប.ស.ស ក្នុងការផ្តល់សេវាសុខាភិបាលជូនសមាជិក ប.ស.ស» របស់បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ មានកិត្តិយសសូមជម្រាបជូន ឯកឧត្ដម លោកជំទាវ លោក លោកស្រី ជាអគ្គនាយក នាយក និងប្រធានមូលដ្ឋានសុខាភិបាលដៃគូ ប.ស.ស ទាំងអស់ ឲ្យបានជ្រាបថា ដើម្បីផ្ដល់សេវាសុខាភិបាលប្រកបដោយតម្លាភាព ប្រសិទ្ធភាព និងសង្គតិភាព ជូនសមាជិក ប.ស.ស មូលដ្ឋានសុខាភិបាល ត្រូវអនុវត្តតាមរំហូរដូចខាងក្រោម ៖ ១.សាកសួរព័ត៌មានតាមបច្ចេកទេសសុខាភិបាល ដើម្បីកំណត់អំពីបញ្ហាសុខភាពរបស់សមាជិក ប.ស.ស។ ២.ត្រូវប្រតិបត្តិតាមបទដ្ឋានស្តង់ដារ នៃការបែងចែកជំងឺដោយផ្អែកលើលទ្ធផល នៃការវាយតម្លៃអំពីកម្រិត នៃភាពធ្ងន់ធ្ងររបស់អ្នកជំងឺដែលកំណត់ដោយក្រសួងសុខាភិបាល។ ៣.ធ្វើការកំណត់អត្តសញ្ញាណសមាជិក ប.ស.ស ផ្នែកថែទាំសុខភាព និងផ្នែកហានិភ័យការងារ។ ៤.ប្រើប្រាស់ថ្នាលបច្ចេកវិទ្យាគាំពារសុខភាពសង្គមលើវេបផតថល H-SPIS (Health-Social Protection Information System) ឬ កម្មវិធីលើទូរសព្ទដៃ NSSF Agent App ដើម្បីកំណត់អត្តសញ្ញាណ និងពិនិត្យសុពលភាពកាតរបស់សមាជិក ប.ស.ស។ ៥.ឲ្យសមាជិក ប.ស.ស ស្កែនខ្មៅដៃមុនពេលបោះពុម្ពទម្រង់លិខិតប្រើប្រាស់សេវាសុខាភិបាល (Patient Form) លើកលែងករណីសង្គ្រោះបន្ទាន់។ ៦.ធ្វើការជ្រើសរើសមុខងារនីមួយៗ តាមស្ថានភាពជំងឺ និងប្រវត្តិ នៃការចូលព្យាបាលរបស់ជំងឺជាសមាជិក ប.ស.ស ក្នុងប្រព័ន្ធ H-SPIS។ ៧.ពន្យល់ណែនាំពីផលវិបាកដែលសមាជិកចូលប្រើប្រាស់សេវាព្យាបាលច្រើន ឬ មានភាពមិនប្រក្រតី (អាចមានបញ្ហាសុខភាពមិនជាក់លាក់ ឬ ការមកសុំបើកថ្នាំ ឬ ការមកសុំវេជ្ជបញ្ជា)។ ៨.ករណីប្រព័ន្ធ H-SPIS មិនអនុញ្ញាតឲ្យបោះពុម្ពលិខិតប្រើប្រាស់សេវាសុខាភិបាល ប៉ុន្តែស្ថានភាពជំងឺជាក់ស្ដែង ត្រូវការព្យាបាល សូមធ្វើការទំនាក់ទំនងមកកាន់ ប.ស.ស (Hotline 1286 ឬ 1297)។ ៩.បន្តផ្តល់សេវាព្យាបាលទៅកាន់សមាជិក ប.ស.ស តាមរំហូរពិគ្រោះជំងឺក្រៅ សម្រាកពេទ្យ សង្គ្រោះបន្ទាន់ និងករណីបញ្ជូន ដោយប្រតិបត្តិតាមបទដ្ឋានស្តង់ដារ នៃការបែងចែកអ្នកជំងឺ។ ១០.ត្រូវផ្ដល់ការពិគ្រោះព្យាបាល និងថែទាំវេជ្ជសាស្ត្រ ក្រដាសវេជ្ជបញ្ជា ស្របតាមពិធីសារ ឬ សេចក្ដីណែនាំ ប្រតិបត្តិគ្លីនិករបស់ក្រសួងសុខាភិបាល ដើម្បីផ្ដល់សេវាសុខាភិបាលប្រកបដោយគុណភាព សុវត្ថិភាព និង ទាន់ពេលវេលា ជូនសមាជិក ប.ស.ស។

ប.ស.ស សង្ឃឹមយ៉ាងមុតមាំថា ក្នុងភាពជាដៃគូល្អនឹងគ្នា ឯកឧត្ដម លោកជំទាវ លោក លោកស្រី ជាអគ្គនាយក នាយក និងប្រធានមូលដ្ឋានសុខាភិបាលដៃគូ ប.ស.ស ទាំងអស់ សូមមេត្តាចូលរួម អនុវត្តតាមខ្លឹមសារ នៃសេចក្ដីណែនាំខាងលើនេះប្រកបដោយស្មារតីទទួលខុសត្រូវខ្ពស់។

សូមជម្រាបថា លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ធ្លាប់ឲ្យដឹងថា បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានពង្រីកវិសាលភាពផ្នែកថែទាំសុខភាពជាមួយមូលដ្ឋានសុខាភិបាលដែលជាដៃគូរបស់ខ្លួនបានចំនួន ១ ៥៧៣ នៅទូទាំង ២៥ រាជធានី-ខេត្ត សម្រាប់រង់ចាំបម្រើសេវាថែទាំសុខភាព និងព្យាបាលដល់សមាជិក ប.ស.ស និងដាក់ពង្រាយមន្ត្រី និងបុគ្គលិកសុខាភិបាលសរុបចំនួនជាង ៤៦ ០០០ នាក់ នៅទូទាំងប្រទេស ដើម្បីរង់ចាំបម្រើសេវាកម្មជូនប្រជាពលរដ្ឋប្រកបដោយក្រមសីលធម៌ និងរហ័ស៕

អត្ថបទ ៖ ពិសី

The post ប.ស.ស តម្រូវឲ្យមូលដ្ឋានសុខាភិបាលអនុវត្ត ១០ ចំណុច ដើម្បីផ្ដល់សេវាសុខាភិបាលប្រកបដោយប្រសិទ្ធភាព appeared first on Kampuchea Thmey Daily.

ក្រុមការងារអន្តរក្រសួង រៀបចំសេវាអេឡិចត្រូនិកសម្រាប់ធុរកិច្ចបើកកិច្ចប្រជុំជាលើកទី ២

អ៊ិន ពិសី — Wed, 20 Nov 2024 03:35:17 +0000

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាង លោក ម៉េង ហុង អគ្គនាយក ប.ស.ស ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ១៩ ខែវិច្ឆិកា ឆ្នាំ ២០២៤ បានដឹកនាំមន្ត្រីជំនាញចូលរួមកិច្ចប្រជុំពិភាក្សាលើកទី ២ របស់ក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច ក្រោមអធិបតីភាព លោកបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ច នៅទីស្ដីការក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពីតំណាងក្រសួង និងស្ថាប័នពាក់ព័ន្ធប្រមាណជា ១០០ នាក់។

នៅក្នុងកិច្ចប្រជុំពិភាក្សាខាងលើ លោកបណ្ឌិតអគ្គនាយករង ប.ស.ស បានផ្ដល់ជាធាតុចូលសំខាន់ៗ មួយចំនួនទៅកាន់អង្គប្រជុំ ដើម្បីជំរុញកិច្ចសហការរវាងក្រសួង-ស្ថាប័នពាក់ព័ន្ធ ក្នុងការលើកកម្ពស់ប្រសិទ្ធភាព នៃការផ្តល់សេវាអេឡិចត្រូនិកសម្រាប់ធុរកិច្ច និងដើម្បីពិនិត្យពិគ្រោះយោបល់លើការរៀបចំឯកសារ យុទ្ធសាស្ត្រនេះ ឱ្យបានកាន់តែមុតស្រួច និងគ្រប់ជ្រុងជ្រោយ៕

អត្ថបទ ៖ សំអឿន

The post ក្រុមការងារអន្តរក្រសួង រៀបចំសេវាអេឡិចត្រូនិកសម្រាប់ធុរកិច្ចបើកកិច្ចប្រជុំជាលើកទី ២ appeared first on Kampuchea Thmey Daily.

ក្រសួងការងារ និងក្រសួងព័ត៌មាន នឹងរួមគ្នាបង្កើនផ្សព្វផ្សាយពីវិស័យការងារ និងសន្តិសុខសង្គមដល់មហាជន

អ៊ិន ពិសី — Sat, 21 Sep 2024 03:43:27 +0000

ក្រសួងការងារ និងបណ្ដុះបណ្ដាលវិជ្ជាជីវៈ នឹងសហការជាមួយក្រសួងព័ត៌មាន ដើម្បីបង្កើនការផ្សព្វផ្សាយព័ត៌មាន និងមាតិកានានា ពាក់ព័ន្ធទៅនឹងវិស័យការងារសន្តិសុខ និងការបណ្ដុះបណ្ដាលវិជ្ជាជីវៈដល់មហាជនបានយល់ដឹងឱ្យបានកាន់តែទូលំទូលាយបន្ថែមទៀត។

គម្រោងកិច្ចសហប្រតិបត្តិការផ្សព្វផ្សាយព័ត៌មានរួមគ្នានេះ ត្រូវបានតំណាងក្រសួងទាំងពីរ បានបើកកិច្ចប្រជុំពិនិត្យសេចក្ដីព្រាងអនុស្សរណៈ នៃការយោគយល់គ្នាមុននឹងអនុវត្តជាផ្លូវការនាពេលខាងមុខនេះ ដែលកិច្ចប្រជុំនេះ ប្រព្រឹត្តទៅក្រោមសហធិបតីភាព លោកស្រី ហ៊ឹម សុធារ័ត្ន អនុរដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ និង លោក ហួត ឃាងវេង រដ្ឋលេខាធិការ នៃក្រសួងព័ត៌មាន។

បើតាមលោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមកិច្ចប្រជុំពិនិត្យ បានលើកឡើងថា កិច្ចប្រជុំនេះធ្វើឡើងក្នុងគោលបំណង ដើម្បីពិនិត្យ និងពិភាក្សាលើសេចក្ដីព្រាងអនុស្សរណៈ នៃការយោគយល់គ្នារវាងក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងព័ត៌មាន ដែលផ្តល់ឱកាសដល់ក្រសួងទាំងពីរ ក្នុងការបង្កើនកិច្ចសហប្រតិបត្តិការរួមគ្នា ក្នុងការផ្សព្វផ្សាយព័ត៌មាន និងមាតិកានានារបស់ក្រសួងការងារ និងបណ្ដុះបណ្ដាលវិជ្ជាជីវៈទៅក្នុងបណ្ដាញផ្សព្វផ្សាយគ្រប់ប្រភេទរបស់ក្រសួងព័ត៌មាន ក្នុងន័យដើម្បីលើកកម្ពស់ការយល់ដឹងរបស់សាធារណជនអំពីវិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ៕

អត្ថបទ ៖ សំអឿន

The post ក្រសួងការងារ និងក្រសួងព័ត៌មាន នឹងរួមគ្នាបង្កើនផ្សព្វផ្សាយពីវិស័យការងារ និងសន្តិសុខសង្គមដល់មហាជន appeared first on Kampuchea Thmey Daily.

គណៈប្រតិភូ ប.ស.ស ចូលរួមកិច្ចប្រជុំជាន់ខ្ពស់សមាគមសន្តិសុខសង្គមអាស៊ាននៅប្រទេសម៉ាឡេស៊ី

អ៊ិន ពិសី — Fri, 07 Jun 2024 03:16:58 +0000

គណៈប្រតិភូ ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ ដឹកនាំដោយលោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម កាលពីថ្ងៃទី ៦ ខែមិថុនា ឆ្នាំ ២០២៤ បានចូលរួមកិច្ចប្រជុំជាន់ខ្ពស់សមាគមសន្តិសុខសង្គមអាស៊ាន (ASSA) នៅទីក្រុងកូឡាឡាំពួរ នៃប្រទេសម៉ាឡេស៊ី ដោយមានអ្នកចូលរួមសរុបចំនួនប្រមាណ ៤០ រូប មកពីបណ្តាស្ថាប័នជាសមាជិកចំនួន ២០ នៃសមាគមសន្តិសុខសង្គមអាស៊ាន។

លោកបណ្ឌិត ហេង សុផាន់ណារិទ្ធ បាបមានប្រសាសន៍ថា កិច្ចប្រជុំជាន់ខ្ពស់សមាគមសន្តិសុខសង្គមអាស៊ាន (ASSA) នេះ ត្រូវបានរៀបចំឡើងដើម្បីពិនិត្យ និងពិភាក្សាលើសំណើចំនួន ៣ ដែលបានលើកឡើងក្នុងកិច្ចប្រជុំក្រុមប្រឹក្សាភិបាល នៃសមាគមសន្តិសុខសង្គមអាស៊ានលើកទី ៤០ ក្នុងនោះរួមមាន ៖ (១) លក្ខណៈវិនិច្ឆ័យចូលជាសមាជិកភាពរបស់សមាគមសន្តិសុខសង្គមអាស៊ាន (២) ការសន្យាប្រកបដោយចីរភាពរបស់សមាគមសន្តិសុខសង្គមអាស៊ាន និង (៣) ការបង្កើតលេខាធិការដ្ឋានសមាគមសន្តិសុខសង្គមអាស៊ាន។

គួរបញ្ជាក់ថា កិច្ចប្រជុំជាន់ខ្ពស់សមាគមសន្តិសុខសង្គមអាស៊ាន (ASSA) ធ្វើឡើងបន្ទាប់ពីពិធីបើកសន្និសីទសុខុមាលភាពសង្គមអន្តរជាតិ (ISWC) ដែលបានប្រព្រឹត្តទៅពីថ្ងៃទី ៤-៥ ខែមិថុនា ឆ្នាំ ២០២៤ ដោយមានការធ្វើបទបង្ហាញពីសំណាក់វាគ្មិនអន្តរជាតិចំនួនប្រមាណជា ២០ រូប និងមានអ្នកចូលរួមសរុបចំនួនប្រមាណជាង ៨០០ រូប មកពីអង្គភាពសន្តិសុខសង្គមក្នុងតំបន់អាស៊ាន និងអន្តរជាតិ ដែលសន្និសីទនេះ ត្រូវបានផ្តល់កិត្តិយសជាអធិបតីបើកដោយលោក Datuk Seri Anwar Ibrahim នាយករដ្ឋមន្ត្រី នៃប្រទេសម៉ាឡេស៊ី៕

អត្ថបទ ៖ សំអឿន

The post គណៈប្រតិភូ ប.ស.ស ចូលរួមកិច្ចប្រជុំជាន់ខ្ពស់សមាគមសន្តិសុខសង្គមអាស៊ាននៅប្រទេសម៉ាឡេស៊ី appeared first on Kampuchea Thmey Daily.

១ ថ្ងៃ មានសមាជិក ២ ម៉ឺននាក់ ទៅប្រើប្រាស់សេវាថែទាំសុខភាពនៅតាមមូលដ្ឋានសុខាភិបាលជាដៃគូរបស់ ប.ស.ស

អ៊ិន ពិសី — Fri, 31 May 2024 09:16:22 +0000

មន្ត្រីជាន់ខ្ពស់ នៃបេឡាជាតិសន្តិសុខសង្គម(ប.ស.ស) បានអះអាងថា ក្នុង ១ ថ្ងៃ មានសមាជិកប្រមាណ ២ ម៉ឺននាក់ បានទៅប្រើប្រាស់សេវាថែទាំសុខភាពនៅតាមមូលដ្ឋានសុខាភិបាលសាធារណៈ និងមូលដ្ឋានសុខាភិបាលឯកជនជាដៃគូរបស់ប.ស.ស។

នៅក្នុងកិច្ចប្រជុំស្តីពី ការពង្រឹងគុណភាព នៃការផ្តល់សេវាព្យាបាល និងថែទាំវេជ្ជសាស្ត្រ និងផ្សព្វផ្សាយសេចក្តីសម្រេចស្ដីពីការកំណត់នីតិវិធី និងលក្ខខណ្ឌតម្រូវការស្នើសុំការឯកភាពរបស់និយ័តករសន្តិសុខសង្គម ក្នុងការចុះកិច្ចព្រមព្រៀងប្រើប្រាស់ និងផ្តល់សេវាសុខាភិបាលរវាងស្ថាប័នប្រតិបត្តិករក្នុងប្រព័ន្ធសន្តិសុខសង្គម និងមូលដ្ឋានសុខាភិបាលឯកជន នៅថ្ងៃទី ៣១ ឧសភានេះ លោក ម៉េង ហុង អគ្គនាយក ប.ស.ស ស្តីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា បច្ចុប្បន្នសមាជិក ប.ស.ស បានប្រើប្រាស់សេវាថែទាំសុខភាព នៅតាមមូលដ្ឋានសុខាភិបាលសាធារណៈ និងមូលដ្ឋានសុខាភិបាលឯកជនដែលជាដៃគូ ប.ស.ស ប្រមាណ ២ ម៉ឺននាក់ ក្នុងមួយថ្ងៃ ដែលទាមទារឱ្យមូលដ្ឋានជាដៃគូទាំងអស់ ត្រូវពង្រឹងការផ្ដល់សេវារបស់ខ្លួនប្រកបដោយការទទួលខុសត្រូវខ្ពស់ ក្នុងនោះត្រូវមានបុគ្គលិកប្រចាំការ ២៤ ម៉ោង ពេញមួយសប្ដាហ៍ ឱសថត្រូវមានគុណភាព រោគវិនិច្ឆ័យច្បាស់លាស់ សម្រាប់ផ្ដល់ការព្យាបាលដល់សមាជិក ប.ស.ស ដែលអនុលោមទៅតាមកិច្ចព្រមព្រៀងមានស្រាប់។

លោកអគ្គនាយក ប.ស.ស ស្តីទី បានបន្ថែមថា កន្លងមក ប.ស.ស បានផ្អាកការចុះកិច្ចព្រមព្រៀងជាមួយមន្ទីរពេទ្យដែលជាដៃគូមួយចំនួន ដែលពុំបានអនុវត្តទៅតាមកិច្ចព្រមព្រៀងត្រឹមត្រូវ តាមរយៈការផ្ដល់សេវាជូនសមាជិក ប.ស.ស ក៏ដូចជាការស្នើសុំទូទាត់ថ្លៃព្យាបាលមិនមានភាពប្រក្រតី និងសុក្រឹតភាពដែលអនុលោមទៅតាមកិច្ចព្រមព្រៀង។

ទន្ទឹមនេះដែរ លោកអគ្គនាយក ប.ស.ស ស្តីទី បានបញ្ជាក់ថា កិច្ចប្រជុំនាឱកាសនេះ ជាលើកទី ២ ហើយ ដែលជាវេទិការបស់មូលដ្ឋានសុខាភិបាលអាចលើកជាសំណូមពរ បញ្ហាប្រឈមស្តីពីការផ្តល់សេវាជូនសមាជិក ប.ស.ស មកពិភាក្សា និងដោះស្រាយរួមគ្នា ដើម្បីពង្រឹង និងលើកកម្ពស់គុណភាពសេវាសុខាភិបាល សម្រាប់ផ្តល់ជូនសមាជិក ប.ស.ស ទាន់ពេលវេលា ប្រកបដោយប្រសិទ្ធភាព គុណភាពខ្ពស់ និងសុវត្ថិភាព និងដើម្បីបន្ដកិច្ចសហការជាដៃគូជាមួយគ្នាបន្ដទៀត។

គួរបញ្ជាក់ថា គិតត្រឹមចុងឆ្នាំ ២០២៣ ប.ស.ស បានចុះកិច្ចព្រមព្រៀងជាមួយមូលដ្ឋានសុខាភិបាលសរុបចំនួន ១ ៥៣០ មូលដ្ឋានសុខាភិបាលនៅទូទាំងប្រទេស ដែលក្នុងនោះ មូលដ្ឋានសុខាភិបាលសាធារណៈ (មន្ទីរពេទ្យរដ្ឋ) មានចំនួន ១ ៣៩៥ និងមូលដ្ឋានសុខាភិបាលឯកជន (មន្ទីរពេទ្យឯកជន) មានចំនួន ១៣៥៕

អត្ថបទ ៖ សំអឿន

The post ១ ថ្ងៃ មានសមាជិក ២ ម៉ឺននាក់ ទៅប្រើប្រាស់សេវាថែទាំសុខភាពនៅតាមមូលដ្ឋានសុខាភិបាលជាដៃគូរបស់ ប.ស.ស appeared first on Kampuchea Thmey Daily.

ប.ស.ស បើកវគ្គបណ្ដុះបណ្ដាលជំនាញពិធីការជាតិ និងអន្តរជាតិ ជាលើកដំបូង

អ៊ិន ពិសី — Thu, 09 May 2024 08:36:53 +0000

បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានសហការជាមួយវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ បានរៀបចំវគ្គបណ្ដុះបណ្ដាលជំនាញ ស្ដីពី ពិធីការជាតិ និងអន្តរជាតិ ជូនដល់មន្ត្រីរាជការក្រោមឱវាទបេឡាជាតិសន្តិសុខសង្គម រយៈពេល ២ ថ្ងៃ ចាប់ពីថ្ងៃទី ៩-១០ ខែឧសភា ឆ្នាំ ២០២៤ ដើម្បីបង្កើនសមត្ថភាពមន្ត្រី និងបុគ្គលិករបស់ខ្លួន។

ថ្លែងបើកវគ្គបណ្ដុះបណ្ដាលនេះ លោក ម៉េង ហុង អគ្គនាយក ប.ស.ស ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ការអភិវឌ្ឍធនធាន មន្ត្រីរាជការ និងបុគ្គលិក នៅក្នុងបេឡាជាតិសន្តិសុខសង្គម ជាទស្សនវិស័យអាទិភាពចាំបាច់ និងមានសារៈសំខាន់បំផុត។ ជាក់ស្ដែងក្នុងវគ្គបណ្ដុះបណ្ដាលនេះ គឺជាវគ្គបណ្ដុះបណ្ដាលលើកទី ៤៥ ហើយ ដែល ប.ស.ស រៀបចំឡើង ហើយវគ្គបណ្ដុះបណ្ដាលនាឱកាសនេះ ក៏បណ្ដុះបណ្ដាលលើកដំបូងដែលផ្តោតសំខាន់អំពីរបៀបរបប នៃការរៀបចំព្រឹត្តិការណ៍ផ្លូវការនានា ការរៀបចំទស្សនកិច្ចផ្លូវការ ការរៀបចំកិច្ចប្រជុំ សន្និសីទ សិក្ខាសាលា ពិធីចុះហត្ថលេខា និងកម្មវិធីនានា ជាពិសេសការបង្ហាញគន្លឹះពាក់ព័ន្ធ និងរបៀបរៀបចំខ្លួន និងឥរិយាបថ តាមរយៈការស្លៀកពាក់ កាយវិការ ក្នុងកម្មវិធីផ្លូវការផ្សេងៗ ទៀត។

លោកអគ្គនាយកស្តីទី បានបន្តថា វគ្គបណ្ដុះបណ្ដាលនាឱកាសនេះ ធ្វើឡើងក្នុងគោលបំណងដើម្បីធានាការងារពិធីការ និងការងារផ្សេងៗ ទៀត ត្រូវបានអនុវត្តតាមស្តង់ដាររួមមួយ និងអនុលោមទៅតាមប្រពៃណី ឬក្រឹត្យក្រមដែលត្រូវបានទទួលស្គាល់ជាលក្ខណៈជាតិ និងអន្តរជាតិ។

លោកអគ្គនាយក ប.ស.ស ស្ដីទី សង្ឃឹមយ៉ាងមុតមាំថា សិក្ខាកាមទាំងអស់ដែលមកពីនាយកដ្ឋាននីមួយៗ នឹងខិតខំសិក្សារៀនសូត្រ នូវចំណុចខ្វះខាតរបស់ខ្លួន និងត្រូវបំពេញបន្ថែមប្រកបដោយការយកចិត្តទុកដាក់ឱ្យបានខ្ពស់ ដើម្បីក្រេបចំណេះដឹងសម្រាប់យកមកអនុវត្តក្នុងអង្គភាពរបស់ខ្លួនឱ្យកាន់តែមានប្រសិទ្ធភាព៕

អត្ថបទ ៖ សំអឿន

The post ប.ស.ស បើកវគ្គបណ្ដុះបណ្ដាលជំនាញពិធីការជាតិ និងអន្តរជាតិ ជាលើកដំបូង appeared first on Kampuchea Thmey Daily.

មន្ត្រីជាន់ខ្ពស់ ប.ស.ស ហាមមន្ត្រីគ្រប់លំដាប់ថ្នាក់មិនត្រូវពាក់ព័ន្ធជាមួយសហគ្រាស ដើម្បីប្រយោជន៍ផ្ទាល់ខ្លួនជាដាច់ខាត

Din Thary — Tue, 23 Apr 2024 08:45:19 +0000

មន្ត្រីជាន់ខ្ពស់នៃបេឡាជាតិសន្ដិសុខសង្គម (ប.ស.ស.) បានដាក់កំហិតដល់ថ្នាក់ដឹកនាំគ្រប់លំដាប់ថ្នាក់មិនត្រូវពាក់ព័ន្ធជាមួយគ្រប់សហគ្រាស គ្រឹះស្ថាន ដើម្បីទាញយកផលប្រយោជន៍ផ្ទាល់ខ្លួនជាដាច់ខាត។

នៅក្នុងកិច្ចប្រជុំផ្ទៃក្នុងជាមួយថ្នាក់ដឹកនាំបេឡាជាតិសន្ដិសុខសង្គមនៅព្រឹកថ្ងៃទី២៣ មេសា នេះ លោក ម៉េង ហុង អគ្គនាយកបេឡាជាតិសន្ដិសុខសង្គមស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវគោលការណ៍ណែនាំមួយចំនួនជូនថ្នាក់ដឹកនាំ និងមន្រ្តីរាជការ នៃ ប.ស.ស. យកទៅអនុវត្តឱ្យមានប្រសិទ្ធភាពពាក់ព័ន្ធនឹងការងារចុះបញ្ជិកាសហគ្រាស គ្រឹះស្ថាន ការចុះធ្វើអធិការកិច្ច និងការផ្សព្វផ្សាយពីអត្ថប្រយោជន៍របបសន្ដិសុខសង្គមទៅកាន់សាធារណជនឱ្យបានត្រឹមត្រូវ, ច្បាស់លាស់, គ្រប់ជ្រុងជ្រោយ, ប្រកបដោយគុណភាព និងប្រសិទ្ធភាព ជាពិសេស បានដាក់កំហិតដល់ថ្នាក់ដឹកនាំគ្រប់លំដាប់ថ្នាក់មិនត្រូវពាក់ព័ន្ធជាមួយគ្រប់សហគ្រាស គ្រឹះស្ថាន ដើម្បីទាញយកផលប្រយោជន៍ផ្ទាល់ខ្លួនជាដាច់ខាត។ ជាមួយនេះ លោកអគ្គនាយក ប.ស.ស.ស្ដីទី ក៏បានផ្តល់ការណែនាំមួយចំនួនពាក់ព័ន្ធនឹងការរៀបចំប្រព័ន្ធ និងលំហូរការងារដោយផ្សារភ្ជាប់ជាមួយនឹងការធ្វើបរិវត្តកម្មឌីជីថលព្រមទាំងការរៀបចំផែនការអភិវឌ្ឍការងារក្នុងអង្គភាព និងផែនការយុទ្ធសាស្ត្រថវិកាប្រចាំឆ្នាំរបស់ខ្លួនឱ្យបានច្បាស់លាស់ផងដែរ។

ទន្ទឹមនេះ លោកអគ្គនាយក ប.ស.ស.ស្ដីទី ក៏បានលើកទឹកចិត្តដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ បន្តបង្កើនសមត្ថភាពការងារ សាមគ្គីភាពផ្ទៃក្នុង និងអង្គភាពជំនាញត្រូវសហការរៀបចំវគ្គបណ្ដុះបណ្ដាលលើការងារដែលចាំបាច់ក្នុងអង្គភាពនីមួយៗ ដើម្បីពង្រឹងសមត្ថភាពដល់ថ្នាក់ដឹកនាំ និងបុគ្គលិកនៃបេឡាជាតិសន្ដិសុខសង្គមផងដែរ។

គួរបញ្ជាក់ថា កិច្ចប្រជុំផ្ទៃក្នុងជាមួយថ្នាក់ដឹកនាំបេឡាជាតិសន្ដិសុខសង្គមធ្វើឡើងក្នុងគោលបំណងស្វែងរកបញ្ហាប្រឈមនានាដែលអនុវត្តកន្លងមក និងរកនូវដំណោះស្រាយសមស្រប ដើម្បីធ្វើការកែលម្អបន្ថែម ក្នុងន័យលើកកម្ពស់គុណភាព, ប្រសិទ្ធភាព និងការអនុវត្តការងារប្រចាំថ្ងៃរបស់បេឡាជាតិសន្ដិសុខសង្គមឱ្យកាន់តែល្អប្រសើរបន្ថែមទៀត៕

អត្ថបទ៖សំអឿន

The post មន្ត្រីជាន់ខ្ពស់ ប.ស.ស ហាមមន្ត្រីគ្រប់លំដាប់ថ្នាក់មិនត្រូវពាក់ព័ន្ធជាមួយសហគ្រាស ដើម្បីប្រយោជន៍ផ្ទាល់ខ្លួនជាដាច់ខាត appeared first on Kampuchea Thmey Daily.

លោក ម៉េង ហុង Archives - Kampuchea Thmey Daily

ប.ស.ស តម្រូវឲ្យមូលដ្ឋានសុខាភិបាលអនុវត្ត ១០ ចំណុច ដើម្បីផ្ដល់សេវាសុខាភិបាលប្រកបដោយប្រសិទ្ធភាព

ក្រុមការងារអន្តរក្រសួង រៀបចំសេវាអេឡិចត្រូនិកសម្រាប់ធុរកិច្ចបើកកិច្ចប្រជុំជាលើកទី ២

ក្រសួងការងារ និងក្រសួងព័ត៌មាន នឹងរួមគ្នាបង្កើនផ្សព្វផ្សាយ​ពីវិស័យការងារ និងសន្តិសុខសង្គមដល់មហាជន

គណៈប្រតិភូ ប.ស.ស ចូលរួមកិច្ចប្រជុំជាន់ខ្ពស់សមាគមសន្តិសុខសង្គមអាស៊ាន​នៅប្រទេសម៉ាឡេស៊ី

១ ថ្ងៃ មានសមាជិក ២ ម៉ឺននាក់ ទៅប្រើប្រាស់សេវាថែទាំសុខភាពនៅតាមមូលដ្ឋានសុខាភិបាល​ជាដៃគូរបស់ ប.ស.ស

ប.ស.ស បើកវគ្គបណ្ដុះបណ្ដាលជំនាញពិធីការជាតិ និងអន្តរជាតិ ជាលើកដំបូង

ក្រសួងការងារ និងក្រសួងព័ត៌មាន នឹងរួមគ្នាបង្កើនផ្សព្វផ្សាយពីវិស័យការងារ និងសន្តិសុខសង្គមដល់មហាជន

គណៈប្រតិភូ ប.ស.ស ចូលរួមកិច្ចប្រជុំជាន់ខ្ពស់សមាគមសន្តិសុខសង្គមអាស៊ាននៅប្រទេសម៉ាឡេស៊ី

១ ថ្ងៃ មានសមាជិក ២ ម៉ឺននាក់ ទៅប្រើប្រាស់សេវាថែទាំសុខភាពនៅតាមមូលដ្ឋានសុខាភិបាលជាដៃគូរបស់ ប.ស.ស