មានមតិក្នុងពិធីសំណេះសំណាលជាមួយលោកគ្រូ អ្នកគ្រូមត្តេយ្យសហគមន៍ ដែលមកពីបណ្តាក្រុង-ស្រុកទាំង៩ ចំនួន ១៤៨នាក់ នៅសាលមហាជន សាលាខេត្តកំពត កាលពីថ្ងៃទី១២មេសា លោក ម៉ៅ ធនិន បានលើកឡើងបន្ថែមថា ការសិក្សាអប់រំរបស់ប្រទេសកម្ពុជាត្រូវបានបាត់បង់ទាំងស្រុងក្នុងរបប ៣ឆ្នាំ ៨ខែ និង ២០ថ្ងៃ ដែលពេលនោះអ្នកមានចំណេះដឹងស្ទើរតែត្រូវបាត់បង់ទាំងស្រុង។ ហើយក្រោយថ្ងៃរំដោះ ៧មករា ឆ្នាំ១៩៧៩ ការសិក្សាត្រូវបានរៀបចំឡើងវិញតាមរយៈលោកគ្រូ អ្នកគ្រូ ព្រះសង្ស ដែលមានចំណេះដឹង ហើយនៅមានជីវិតបន្ត តែការសិក្សានោះក៏មិនមានសាលារៀនត្រឹមត្រូវ និងស្អាតដូចបច្ចុប្បន្នដែរ គឺការសិក្សារៀនសូត្រគឺនៅក្នុងទីវត្តអារាម។

លោកអភិបាលខេត្តកំពតបន្តថា ក្រោយពេលប្រទេសកម្ពុជាទទួលបានសន្តិភាពពេញលេញ ពេញផ្ទៃប្រទេសដែល​យកមកដោយលំបាក ពីសំណាក់សម្តេចតេជោ ហ៊ុន សែន អតីតនាយករដ្ឋមន្ត្រី វិស័យសិក្សាធិការត្រូវបានយកចិត្តទុកដាក់ជាចម្បង ដោយបានបង្កើតឡើងឱ្យមានសាលារៀនគ្រប់តំបន់ បំពាក់បំប៉នអោយមានគ្រូបង្រៀនគ្រប់សាលា រហូតដល់ក្នុងភូមិដើម្បីបណ្តុះបណ្តាលកូនក្មួយជំនាន់ក្រោយ។

ដូច្នេះក្នុងនាមយើងជាអ្នកបណ្តុះបណ្តាល និងជាអ្នក់ឆ្លាក់ពុម្ភបង្កើតធនធានមនុស្សសម្រាប់បំរើសង្គមជាតិ យើងត្រូវបណ្តុះឱ្យមានគុណភាពខ្ពស់ មានចំណេះដឹងពិតប្រាកដ ចំណេះធ្វើពិប្រាកដ ដើម្បីចូលរួមបំរើជាតិមាតុភូមិ ពិសេសឱ្យមានមនសិកាស្នេហាជាតិ ដឹងគុណ តបគុណអ្នកដែលផ្តល់ភាពសុខសាន្តដល់យើងទាំងអស់គ្នា ពិសេសស្ថាបនិកសន្តិភាព គឺសម្តេចតេជោ ហ៊ុន សែន។

ក្នុងពិធីសំណេះសំណាលនេះ លោកអភិបាលខេត្ត ក៏បានរៀបចំការចាប់រង្វាន់លើកទឹកចិត្តដល់គ្រូមត្តេយ្យសហគមន៍ទាំងអស់ ដែលរង្វាន់រួមមាន៖ ម៉ូតូ ចំនួន ២គ្រឿង កុំព្យូទ័រឡេបថប ចំនួន ៦គ្រឿង និងទូរទស្សន៍ ចំនួន ១០គ្រឿង។ ក្នុងឱកាសនោះ លោកអភិបាលខេត្ត ក៏បានផ្តល់ជូនថវិកា និងគ្រឿងឧបភោគបរិភោគក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដល់ លោកគ្រូ អ្នកគ្រូ ទាំង ១៤៨នាក់ ដោយក្នុងម្នាក់ៗទទួលបាន ថវិកា ១០ម៉ឺនរៀល, សារ៉ុង២, អង្ករ ៨០គីឡូក្រាម, ទឹកសុទ្ធ ១កេស, ទឹកក្រូច ១កេស, មី ១កេស រួមនឹងអាហារសាមគ្គីថ្ងៃត្រង់ផងដែរ។

យោងតាមរបាយកាណ៍ពីមន្ទីរអប់រំយុវជន និងកីឡា ខេត្តកំពត មានមត្តេយ្យសហគមន៍ចំនួន ១៣៥កន្លែង ស្មើ ១៤៩ថ្នាក់ គ្រូ ១៤៨នាក់ក្នុងនោះគ្រូជាប់ស្តង់ដា ៨៨នាក់ ប្រមូលសិស្សបាន ៤ ១២៧នាក់ (ស្រី ២ ០២៩នាក់) ស្នើនឹង ៣០% នៃចំនួនកុមារតូចដែលបានចូលរៀនទាំងអស់ ខណៈមត្តេយ្យរដ្ឋប្រមូលសិស្សបាន៦០%  ឯកជន១០%៕

អត្ថបទ៖ សឹង រ៉ាត់់

The post អភិបាលខេត្តកំពត៖ លោកគ្រូ អ្នកគ្រូមត្តេយ្យ​សហគមន៍ គឺជាពុម្ភឆ្លាក់ធនធានមនុស្ស និងធនធានជាតិយ៉ាងសំខាន់ appeared first on Kampuchea Thmey Daily.

លោក ម៉ៅ ធនិន អភិបាលខេត្តកំពតបានបញ្ជាក់ថា នៅពេលដ៏ខ្លីខាងមុខនេះ សមិទ្ធផលទេសចរណ៍ថ្មីមួយនឹងលេចចេញជារូបរាងនៅកណ្តាលក្រុងកំពត នោះគឺជាកន្លែងថតរូបមានរូបរាងជាបាតដៃទ្រវ៉េរ៉ង់ដា មានកម្ពស់ប្រមាណ ១២ ម៉ែត្រ ដែលអាចឱ្យភ្ញៀវទេសចរឡើងថតរូបភ្ជាប់ជាមួយទេសភាពភ្នំបូកគោ ព្រែកកំពង់បាយ ស្ពានឥន្ទធនូ និងស្ពានថ្មថ្មី ជាពិសេសទេសភាពថ្ងៃរៀបលិចដ៏ស្រស់ស្អាត។

លោកថា សមិទ្ធផលនេះត្រូវបានរំពឹងថានឹងសាងសង់រួចរាល់មុន ពិធីបុណ្យចូលឆ្នាំថ្មីប្រពៃណីជាតិខ្មែរ ហើយនឹងក្លាយជាចំណុចទាក់ទាញថ្មីបន្ថែមទៀតសម្រាប់ភ្ញៀវទេសចរ។

ការអភិវឌ្ឍនៅ​ក្នុងខេត្តកំពតនៅតែ​ដំណើរការ ដោយមិនមានការរាំងស្ទះណាមួយឡើយ។ តាមរយៈសមិទ្ធផលថ្មីនេះ គេរំពឹងថាតំបន់មាត់ព្រែកកំពតកាន់តែទាក់ទាញភ្ញៀវមកលេងច្រើនជាងមុន។

លោក ម៉ៅ ធនិន អភិបាលខេត្តកំពតបានគូសបញ្ជាក់ថា បច្ចុប្បន្នខេត្តកំពតនៅតែទទួលបានភ្ញៀវទេសចរមកលេងកម្សាន្តច្រើន​ បើទោះបីខេត្តមួយចំនួនមានការថយចុះនៃចំនួនភ្ញៀវទេសចរក៏ដោយ។

ពាក់ព័ន្ធ​ដំណើរការ​​អភិវឌ្ឍន៍ក្នុង​ខេត្ត លោកថា ខេត្តនៅតែមានគម្រោងអភិវឌ្ឍន៍លើគ្រប់វិស័យពិសេសវិស័យទេសចរណ៍ និងហេដ្ឋារចនាសម្ព័ន្ធ ដូចជា ផ្លូវ ស្ពាន និងការរៀបចំទីតាំងកម្សាន្តនានា ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ ព្រោះប្រជាពលរដ្ឋភាគច្រើនអាចទាញយកចំណូលប្រចាំថ្ងៃពីវិស័យទេសចរណ៍ ដែលជាឧស្សាហកម្មគ្មានផ្សែង​៕

អត្ថបទ៖ សឹង រ៉ាត់

The post សមិទ្ធផលទេសចរណ៍ថ្មីមួយទៀត នឹងលេចរូបរាង​នៅ​ដងព្រែក​កំពត មុនចូលឆ្នាំខ្មែរ appeared first on Kampuchea Thmey Daily.

ថ្លែងក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តកំពត កាលពីថ្ងៃទី២៩ ខែមករា ឆ្នាំ២០២៦ នៅសាលសន្និសិទ្ធបូកគោ លោក ម៉ៅ ធនិន មានប្រសាសន៍ថា បញ្ហាសន្តិសុខ សណ្តាប់ធ្នាប់សង្គម និងការប្រយុទ្ធប្រឆាំងបទល្មើសនានា ដើម្បីធានាដល់ការរស់នៅដោយសុខសាន្តរបស់ប្រជាពលរដ្ឋនៅក្នុងភូមិសាស្ត្រនៃខេត្តកំពត មានភាពល្អប្រសើរ ហើយអាជ្ញាធរ និងសមត្ថកិច្ចជំនាញពាក់ព័ន្ធបាននិងកំពុងអនុវត្តដូចភ្លៀងរលឹម។

លោកអភិបាលខេត្ត ថា ក្នុងនោះការប្រយុទ្ធប្រឆាំង និងបង្ក្រាបឧក្រិដ្ឋកម្មឆបោកតាមប្រព័ន្ធបច្ចេកវិទ្យា នៅក្នុងខេត្តកំពតមិនទាន់មាននោះទេ  ក៏ប៉ុន្តែក៏ទាមទារឱ្យមន្ត្រីអនុវត្តច្បាប់ត្រូវត្រៀមលក្ខណៈគិតគូរ និងមានវិធានការបង្ការ និងទប់ស្កាត់ឱ្យមានប្រសិទ្ធភាព និងបានទាន់ពេលវេលាជាមុន ព្រោះរាជរដ្ឋាភិបាលបានដាក់ចេញនូវវិធានការម៉ឺងម៉ាត់ និងមុតស្រួចបំផុតដល់ជនល្មើស និងអ្នកជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យានេះ។

លោកក៏បានណែនាំដល់កងកម្លាំងប្រដាប់អាវុធគ្រប់ប្រភេទ អាជ្ញាធរគ្រប់ថ្នាក់ និងអង្គភាពពាក់ព័ន្ធ មន្ត្រីអនុវត្តច្បាប់ ត្រូវមានវិធានការបង្ការ និងទប់ស្កាត់យ៉ាងម៉ឺងម៉ាត់បំផុតចំពោះឧក្រិដ្ឋកម្មឆបោកតាមប្រព័ន្ធបច្ចេកវិទ្យានេះ ពិសេសប្រជាពលរដ្ឋដែលជាម្ចាស់កន្លែងផ្តល់សេវាស្នាក់នៅ សូមចូលរួមសហការឱ្យបានល្អជាមួយអាជ្ញាធរ និងសមត្ថកិច្ចជំនាញ ដើម្បីបង្ការទប់ស្កាត់ឧក្រិដ្ឋកម្មឆបោកតាមប្រព័ន្ធបច្ចេកវិទ្យានៅក្នុងភូមិសាស្ត្រខេត្តកំពតឱ្យមានប្រសិទ្ធភាពខ្ពស់៕

អត្ថបទ៖ សឹង រ៉ាត់

The post ដ្បិតបទល្មើសឆបោកOnline Scams មិនទាន់មានក្នុងមូលដ្ឋាន តែអភិបាលខេត្តកំពត ណែនាំឲ្យអាជ្ញាធររួមគ្នាបង្ការទប់ស្កាត់ឲ្យបានម៉ឺងម៉ាត់ appeared first on Kampuchea Thmey Daily.

ការ​លើក​ឡើង​នេះ ក្នុង​ពិធី​ជួប​សំណេះសំណាល​ជាមួយ​សិស្ស​ជ័យលាភី​ប្រឡង​សញ្ញាបត្រ​មធ្យម​សិក្សា​ទុតិយភូមិ ឆ្នាំ​សិក្សា ២០២៤-២០២៥ ទូទាំង​ខេត្ត​កំពត និង​ផ្ដល់​រង្វាន់​ជូន​សិស្ស​ប្រឡង​ជាប់​និទ្ទេស A ទាំង ៨៩ នាក់ ដែល​បាន​រៀបចំ​ធ្វើ​នៅ​បរិវេណ​ពហុ​កីឡដ្ឋាន​ខេត្ត​កំពត កាលពី​ថ្ងៃ​ទី ១៨ ខែ​តុលា ឆ្នាំ ២០២៥ ម្សិលមិញ។

នា​ឱកាស​នោះ លោក​ឧបនាយករដ្ឋមន្ត្រី សាយ សំអាល់ បាន​លើកទឹកចិត្ត​ដល់​យុវជន និង​សិស្សានុ​សិស្ស ពិសេស​អ្នក​រៀន​មិន​សូវ​ពូកែ សូម​កុំអាល​អស់​សង្ឃឹម ត្រូវ​បន្ត​ប្រឹងប្រែង​រៀន​សូត្រ​ជាប្រចាំ និង​អភិវឌ្ឍន៍​សមត្ថភាព​ជានិច្ច ទាំង​ជំនាញ​ក្នុង​សាលា ចំណេះដឹង បំណិត​ជីវិត​ក្នុង​សង្គម ដើម្បី​ចូលរួម​កសាង​ស្រុកទេស​ឲ្យ​រីកចម្រើន​គង់វង្ស​ត​ជំនាន់​រហូត​ទៅ។

លោក​បណ្ឌិត ប៉ែន ស៊ីម៉ន អ្នក​តំណាងរាស្ត្រ​មណ្ឌល​កំពត និង​ជា​ប្រធាន​ក្រុម​ការងារ​គណបក្ស​ប្រជាជន​ចុះ​មូលដ្ឋាន​ខេត្ត​កំពត លើក​ឡើង​ដែរ​ថា នៅ​ក្នុង​សម័យកាល​ណា​ក៏ដោយ ការ​សិក្សា​អប់រំ បង្កើត​ធនធាន​មនុស្ស ជា​ការងារ​សំខាន់​បំផុត​សម្រាប់​ប្រទេស​ជាតិ​មួយ ព្រោះ​មាន​តែ​ចំណេះវិជ្ជា​ទេ ដែល​អាច​ជួយ​ស្រោចស្រង់​កសាង​ប្រទេស​ឲ្យ​គង់វង្ស​រុងរឿង​បាន។

លោក ម៉ៅ ធនិន អភិបាល​ខេត្ត​កំពត បញ្ជាក់​ថា សម្រាប់​លទ្ធផល នៃ​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ សម័យ​ប្រឡង ២៨ សីហា ឆ្នាំ ២០២៥ ខេត្ត​កំពត មាន​សិស្ស​ប្រឡង​ជាប់​សរុប ចំនួន ៤.៦៩៨ នាក់ ស្រី ២.៧២៥ នាក់ ស្នើ ៩០.៨៥%។ ក្នុង​នោះ សិស្ស​ទទួល​បាន​និទ្ទេស A មាន​ចំនួន ៨៩ នាក់ កើន​ឡើង​ជាង​ឆ្នាំមុន ១១ នាក់ (​និទ្ទេស A ទទួល​បាន​ម៉ូតូ ១ គ្រឿង ថវិកា ៤០ ម៉ឺន​រៀល និង​ឱកាស​ទទួល​បាន​កញ្ចប់​អាហារូបករណ៍​នៅ​ថ្នាក់​ឧត្ដមសិក្សា)៕

អត្ថបទ ៖ សឹង រ៉ាត់

The post លោក សាយ សំអាល់ ៖ «ការងារអប់រំជាកិច្ចការងារមួយសំខាន់មិនអាចខ្វះបាន ហើយអនាគតកម្ពុជាត្រូវពឹងលើវិស័យអប់រំនេះ» appeared first on Kampuchea Thmey Daily.

គោល​នយោបាយ​ដី​ធ្លី​ត្រូវ​បាន​ដាក់​ចេញជា​បន្តបន្ទាប់ដោយសម្តេចតេជោ ក្រោយ​ពី​ប្រទេសកម្ពុជាទទួលបានសន្តិភាពពេញលេញ ដើម្បី​ឱ្យ​ប្រជាពលរដ្ឋ​ទទួល​បាន​នូវសិទ្ធ​ពេញ​លេញ​ក្នុងការប្រើប្រាស់ដីធ្លី កាត់បន្ថយវិវាទ និងជួយលើកកម្ពស់ជីវភាពរស់នៅរបស់ពលរដ្ឋ។

ហើយមកដល់អាណត្តិទី៧នេះ ក្រោមការដឹកនាំរបស់សម្តេចធិបតីនាយករដ្ឋមន្ត្រី គោល​នយោ​បាយ​ដីធ្លី​នេះ នៅតែ​ជា​គោល​នយោបាយ​ចម្បង​សម្រាប់​ប្រជាពលរដ្ឋនៅទូទាំងប្រទេស។

លោក​ ម៉ៅ ធនិន អភិបាលខេត្តកំពតបានបន្តឱ្យដឹងថា មកដល់បច្ចុប្បន្ននេះ ក្នុងអាណត្តិទី៧នៃរដ្ឋសភា ក្រោមការដឹកនាំគតិបណ្ឌិត និងស្រលាញ់ប្រជាពលរដ្ឋ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តែងតែដាក់ចេញនូវយន្តការថ្មីៗពាក់ព័ន្ធនឹងវិស័យដីធ្លី ពិសេស​ការ​ជំរុញ​ដោយ​ផ្ទាល់​មក​កាន់​រដ្ឋបាលរាជធានី-ខេត្ត ពិសេសមន្ទីរជំនាញ ឱ្យ​ធ្វើ​យ៉ាង​ណា​ពន្លឿន​ការ​ចេញ​បណ្ណកម្មសិទ្ធ​ដី​ធ្លី​ជូន​ពលរដ្ឋ ស្រប​ទៅ​តាម​ផែនការ​ដែល​បាន​គ្រោង​ទុក​ដើម្បី​ឈាន​ទៅ​សម្រេច​បាននូវ​គោលនយោបាយ​ដីធ្លី​របស់​រាជរដ្ឋាភិបាល ប្រកបដោយ ប្រសិទ្ធភាព ចីរភាព និងបរិយាបន្ន។

លោក​ ម៉ៅ ធនិន អភិបាល​ខេត្ត​កំពត​បាន​បញ្ជាក់​ថា ក្នុងអាណត្តិទី៧នេះ គោលនយោបាយដីធ្លី នៅតែជាគោលនយោបាយចំបងបំផុតសម្រាប់ប្រជាពលរដ្ឋនៅទូទាំងប្រទេស ដែល​នេះគឺ​បាន​បង្ហាញពីការគិតគូរខ្ពស់ពីសំណាក់ប្រមុខថ្នាក់ដឹកនាំប្រទេសក្នុងការផ្តល់នូវភាពស្របច្បាប់​ក្នុង​ការកាន់​កាប់​ដី​ធ្លី។

បើ​យោង​តាម​របាយការណ៍​របស់​លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកំពត បានឱ្យដឹងថា ការ​ចែក​វិញ្ញាបនបត្រ​សម្គាល់​ម្ចាស់​អចលនវត្ថុ​ជូន​ពលរដ្ឋ​ក្នុង​ភូមិ​កំពង់​នង់ ឃុំកូនសត្វ ស្រុកទឹកឈូ មានក្បាលដីសរុបចំនួន ២.២៩០ក្បាលដី ស្មើនឹង ១.០៣០គ្រួសារ។

ចំពោះ​ការ​ប្រកាស​កំណត់​តំបន់​ធ្វើ​ការ​វិនិច្ឆ័យ​ដែល​មាន​៣ភូមិ រួមមាន ភូមិអន្លង់ម៉ាក់ប្រាង្គ ភូមិផ្លិចគល់ និងភូមិកំពង់ចិន ឃុំស្ទឹងកែវ ស្រុកទឹកឈូ មានក្បាលដីប៉ាន់ស្មាន ៦.៤៧២ក្បាលដី ស្មើនឹង ១.៣៦២គ្រួសារ។

ក្នុង​នោះ​ភូមិ​អន្លង់​ម៉ាក់​ប្រាង្គ មានក្បាលដីប៉ាន់ស្មានចំនួន ២.៧០៨ក្បាលដី ស្មើនឹង ៤២៧គ្រួសារ, ភូមិម្លិចគល់ មានក្បាលដីប៉ាន់ស្មានចំនួន ៧៤៦ក្បាលដី ស្មើនឹង ១៨៥គ្រួសារ និងភូមិកំពង់ចិន មានក្បាលដីប៉ាន់ស្មានចំនួន ៣.០១៨ក្បាលដី ស្មើនឹង ៧៥០គ្រួសារ៕

ដោយ ៖ សឹង រ៉ាត់

The post អភិបាល​ខេត្តកំពត​លើកឡើងថា គោលនយោបាយលើវិស័យដីធ្លី គឺជាគោលនយោបាយចម្បង​ក្នុង​អាណត្តិទី៧ appeared first on Kampuchea Thmey Daily.

ថ្លែងនៅកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារបន្ត របស់គណៈចលនាមហាជន នៃគណៈកម្មាធិការគណបក្សប្រជាជនកម្ពុជាខេត្តកំពត ដែលបានរៀបចំធ្វើឡើងនៅមន្ទីរបក្សខេត្ត នៅថ្ងៃទី៤ ខែកុម្ភៈនេះ លោក ម៉ៅ ធនិន សមាជិកគណៈកម្មាធិការកណ្តាល ប្រធាន​គណៈកម្មាធិការគណបក្សប្រជាជនកម្ពុជាខេត្ត និងជាប្រធានគណៈចលនាមហាជនខេត្តកំពត បាន​ថ្លែង​កោតសរសើរ សមាជិក សមាជិកាទាំងអស់ នៃរចនាសម្ព័ន្ធគណៈចលនាមហាជន ព្រមទាំងអង្គការចាត់តាំងបក្សនានា ដែលបានខិតខំ លះបង់ ទាំងកម្លាំង កាយចិត្ត ស្មារតី ក្នុងការអនុវត្តការងារកន្លងមកប្រកបដោយភាពមោះមុត ស្វិតស្វាញ និងទំនួលខុសត្រូវខ្ពស់ ដែលការខិតខំប្រឹងប្រែងទាំងអស់នេះ គឺពិតជាការចូលរួមដ៏មានសារសំខាន់ ក្នុងជ័យជម្នះរបស់គណបក្សប្រជាជនកម្ពុជា លើការបោះឆ្នោត នាពេលកន្លងមក។

ហើយ​ដើម្បី​បន្ត​បម្រើ​ប្រជាពលរដ្ឋ បម្រើ​បក្ស ពិសេស​បន្ត​ដណ្តើម​យក​ជ័យ​ជម្នះ​លើ​ការ​បោះឆ្នោតជ្រើសរើសមាជិកក្រុមប្រឹក្សាឃុំសង្កាត់ អាណត្តិទី៦ ឆ្នាំ២០២៧ខាងមុខ លោកប្រធានគណៈចលនាមហាជនខេត្តកំពត បានណែនាំដល់សមាជិក សមាជិកាគណៈចលនាមហាជន គណៈចលនាយុវជន និងក្រុមចលនាស្ត្រីនៅគ្រប់មូលដ្ឋាន បង្កើនការយកចិត្តទុកដាក់លើកការងារសំខាន់ៗ៦ចំណុច។

នៅ​ក្នុង​ឱកាស​នោះ​ដែរ លោក ម៉ៅ ធនិន ក៏បានលើកទឹកចិត្តដល់ក្រុមយុវជនបន្តវេន ដែលចង់ចូលរួមចំណែក ក្នុងកិច្ចការងារដឹកនាំនៅគ្រប់កម្រិតថ្នាក់ទាំងបក្ស និងរដ្ឋ សូមបន្តខិតខំប្រឹងប្រែងអភិវឌ្ឍសមត្ថភាព បំពេញកិច្ចការងារ និងតួនាទីរបស់ខ្លួនឲ្យបានល្អប្រសើរ ដើម្បីធ្វើជាគំរូល្អ (យុវជនគំរូ ពលរដ្ឋគំរូ មន្ត្រី ឬបុគ្គិលគំរូ)ដែលអាចធ្វើឲ្យប្រជាពលរដ្ឋទូទៅ ពេញចិត្ត និងទទួលស្គាល់សមត្ថភាព និងគុណសម្បត្តិរបស់ខ្លួនក្នុងភាពជាអ្នកដឹកនាំ៕

ដោយ ៖ សឹង រ៉ាត់

The post អភិបាល​ខេត្ត​កំពត​ជំរុញ​ឱ្យសមាជិក​គណៈចលនាមហាជន នៅគ្រប់មូលដ្ឋាន​ត្រូវបង្កើនការយកចិត្ត​ទុកដាក់​លើការងារសំខាន់ៗ៦ចំណុច appeared first on Kampuchea Thmey Daily.

អាជ្ញាធរ​ខេត្ត​កំពត​ បាន​បន្ត​អភិវឌ្ឍ​តំបន់ឆ្នេរព្រែក​កំពង់​បាយ​ត្រើយ​ខាងលិច ក្នុងដំណាក់កាលទី២ ដោយស្ថាបនាផ្លូវចាប់ពីចំណុចគល់ស្ពានឥន្ទធនូដល់គល់ស្ពានមិត្តភាពកម្ពុជា-កូរ៉េ (ស្ពានកំពង់បាយ) ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ហើយតម្រូវ​ឱ្យ​ប្រជាពលរដ្ឋ​ទាំង ៣៥​គ្រួសារ​ដែល​រស់​នៅ​ជាប់​ព្រែក​ចូលរួម​រុះរ៉ើ​សំណង់​ដែល​ប៉ះពាល់​ចំណី​ព្រែក​ដែល​ជាដី​សាធារណៈរបស់រដ្ឋ។

មាន​មតិ​សំណេះសំណាល​ក្នុង​ឱកាស​នោះ លោក ម៉ៅ ធនិន អភិបាលខេត្ត បាន​លើក​ឡើង​ថា ក្នុង​អាណត្តិ​ទី​៧ ក្រោម​ការ​ដឹកនាំដ៏ឈ្លៀសវៃរបស់សម្តេចធិបតី ហ៊ុន ម៉ាណែត សម្តេច​បាន​ចង្អុល​ទិស​ឱ្យនៅតាមបណ្តាខេត្តដែលជាគោលដៅទេសចរណ៍ ត្រូវ​ពង្រីក​សក្តានុពល ដើម្បីស្រូបយកទេសចរ​ឱ្យមកលេងកម្សាន្តកាន់តែច្រើន ទាំងក្នុងប្រទេស ក្រៅប្រទេស ទាំងក្នុងតំបន់ និងក្រៅតំបន់ ដើម្បីលើកកម្ពស់ជីវភាពរស់នៅរបស់បងប្អូនប្រជាពលរដ្ឋ។

លោក​បាន​បន្ត​ថា ការអភិវឌ្ឍលើវិស័យទេសចរណ៍​នេះ គឺ​ជា​គោលនយោបាយរបស់រាជរដ្ឋាភិបាល ដូច្នេះគឺតម្រូវឱ្យបងប្អូនប្រជាពលរដ្ឋចូលរួមសហការជាមួយអាជ្ញាធរមូលដ្ឋាន ដើម្បីធ្វើការ​រុះរ៉ើ​សំណង់​ដែលប៉ះពាល់ដល់ចំណីព្រែកកំពង់បាយ ហើយការ​អភិវឌ្ឍនេះ គឺមិន​ឱ្យ​ប៉ះពាល់ដល់ដីកម្មសិទ្ធិស្របច្បាប់របស់ពលរដ្ឋនោះឡើយ។

ក្រោយ​ពី​កិច្ចប្រជុំរួចមក លោកអភិបាលខេត្ត ក៏បានដឹកនាំមន្ត្រីជំនាញពាក់ព័ន្ធ រួមនឹងប្រជាពលរដ្ឋទាំង ៣៥គ្រួសារចុះពិនិត្យទីតាំង និងផលប៉ះពាល់ជាក់ស្តែង និងទទួលយកសំណើ សំណូមពររបស់ពលរដ្ឋផងដែរ។

ក្រោយ​ពី​បាន​ពិភាក្សា ក៏​ដូច​ជា​ទទួល​យក​មតិ​យោបល់​ពី​ពលរដ្ឋទាំង ៣៥គ្រួសាររួចមក ប្រជាពលរដ្ឋទាំងអស់ ក៏​យល់​ព្រម​ឯកភាព​តាមការកំណត់របស់អាជ្ញាធរខេត្ត​ក្នុងការរុះរ៉ើសំណង់ដែលប៉ះពាល់ដល់ការអភិវឌ្ឍ និង​សំដែង​ក្តី​សប្បាយរីករាយក្នុងការ​ចូលរួមផងដែរ។

សូម​បញ្ជាក់​ថា រដ្ឋបាលខេត្ត​បាន​បែងចែក​ការ​អភិវឌ្ឍតំបន់ឆ្នេរព្រែកកំពង់បាយ​ត្រើយខាង​លិចជា​៣​ដំណាក់​កាល ដែល​ដំណាក់​កាលទី១ ចាប់​ពី​គល់​ស្ពានត្រើយកោះដល់គល់ស្ពានឥន្ទធនូ, ដំណាក់កាលទី២ ចាប់ពីគល់ស្ពានឥន្ទធនូដល់គល់ស្ពានមិត្តភាពកម្ពុជា-កូរ៉េ (ស្ពានកំពង់បាយ) និងដំណាក់កាលទី៣ ចាប់ពីគល់ស្ពានមិត្តភាពកម្ពុជា-កូរ៉េ (ស្ពានកំពង់បាយ)រហូតដល់ស្ពានរថភ្លើង។

នៅក្នុងថ្ងៃដដែល​ម៉ៅ ធនិន អភិបាលខេត្ត ក៏​បានបន្តចុះពិនិត្យទីតាំងស្ពានក្បាលរមាសចាស់ ស្ថិតក្នុងស្រុកទឹកឈូ ដើម្បីរៀបចំធ្វើជាផ្សារគ្រឿងសមុទ្រនាពេលឆាប់ៗខាងមុខនេះផងដែរ៕

ដោយ ៖ សឹង រ៉ាត់

The post អាជ្ញាធរខេត្ត​កំពត​ឱ្យ​ពលរដ្ឋ ៣៥គ្រួសារ ចូល​រួម​រុះរ៉ើ​សំណង់​ដែល​ប៉ះពាល់​ចំណី​ព្រែកត្រើយ​ខាងលិច ដើម្បី​រៀបចំ​សោភ័ណភាព​ក្រុង appeared first on Kampuchea Thmey Daily.

កាលពីចុងសប្តាហ៍កន្លងទៅនេះ លោក ម៉ៅ ធនិន អភិបាលខេត្តកំពតបានដឹកនាំអាជ្ញាធរក្រុងស្រុក និងមន្ត្រីជំនាញពាក់ព័ន្ធ ចុះពិនិត្យទីតាំងពង្រីកផ្លូវមាត់ព្រែក១ខ្សែ ចាប់ពីចំណុចរូបសំណាកត្រីផ្សោតក្នុងសង្កាត់កំពង់កណ្តាល ក្រុងកំពត តភ្ជាប់ទៅផ្លូវបេតុងឆ្នេរកោះស្មៅ ស្ថិតក្នុងឃុំជុំគ្រៀល ស្រុកទឹកឈូ។

ក្រៅពីបានពិនិត្យសកម្មភាពសាងសងពង្រីកផ្លូវ ការផ្តាស់ប្តូរដំឡើងប្រព័ន្ធភ្លើងអគ្គិសនី និងប្រព័ន្ធទឹកស្អាត លោក ម៉ៅ ធនិន ក៏បានបន្តជួបសំណេះសំណាលជាមួយប្រជាពលរដ្ឋរស់នៅសងខាងផ្លូវផងដែរ ដោយលោកស្នើឲ្យប្រជាពលរដ្ឋ មានការចូលរួមសហការជួយសម្រួល ពិសេសសូមមានការយោគយល់ខ្ពស់អំឡុងពេលស្ថាបនាពង្រីកផ្លូវនេះ អាចនឹងបង្កការលំបាកដល់ការរស់នៅ និងការប្រកបមុខរបររកទទួលទានប្រចាំថ្ងៃមួយរយៈពេល។

ឆ្លៀតក្នុងឱកាសនោះលោកអភិបាលខេត្តក៏បានថ្លែងអំណរគុណដល់ប្រជាពលរដ្ឋ ដែលតែងតែចូលរួមសហការយ៉ាងល្អជាមួយអាជ្ញាធរ ក្នុងសកម្មភាពរួមអភិវឌ្ឍខេត្តកំពត ឲ្យកាត់តែមានភាពរីកចម្រើន និងទាក់ទាញទេសចរកាន់តែច្រើន។លោកបានបញ្ជាក់ថា នឹងជំរុញឲ្យក្រុមការងារធ្វើយ៉ាងណាពន្លឿនការស្ថាបនាផ្លូវឲ្យបានឆាប់រហ័ស ពោលគឺរួចរាល់នៅមុនថ្ងៃបុណ្យសមុទ្រចូលមកដល់។

ទន្ទឹមគ្នានោះដែរលោក អភិបាលខេត្ត ក៏បានណែនាំដល់អាជ្ញាធរ និងក្រុមការងារសាងសង់ត្រូវយកចិតទុកដាក់ខ្ពស់ ក្នុងនោះនៅជំហ៊ានទី១ ត្រូវពន្លឿងការពង្រីកផ្លូវបេតុងអាមេ ពីចំណុចរូបសំណាកត្រីផ្សោត ទៅស្ពានកំពង់កណ្តាលស្ថិតក្នុងក្រុងកំពត (ទទឹង១៣ បណ្តោយប្រវែង៧៥០ម៉ែត្រ)។ ជំហ៊ានទី២ ចាប់ពីចំណុចស្ពានកំពង់កណ្តាលដល់ផ្លូវបេតុងឆ្នេរកោះស្មោះ ប្រវែងជិត២គីឡូម៉ែត្រ ទទឹងប្រែប្រួលពី ១៦ម៉ែត្រ និង២៣ម៉ែត្រ (តាមទីតាំងជាក់ស្តែង)។

សូមបញ្ជាក់ថា ពិធីបុណ្យសមុទ្រលើកទី១១ ជុំទី៣ នៅខេត្តកំពត នឹងប្រារព្ធនៅថ្ងៃទី១៣-១៥ ខែធ្នូ ឆ្នាំ២០២៤ ក្រោមប្រធានបទ «អបអរសាទរបេតិកភណ្ឌ និងចីរភាពនៃតំបន់ឆ្នេរ»។ កម្មវិធីបើកជាផ្លូវការនឹងប្រព្រឹត្តិឡើងនាថ្ងៃទី១៤ ខែធ្នូ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជចន្ទមុន្នី-ហ៊ុនម៉ាណែត៕

អត្ថបទ៖ សឹង រ៉ាត់

The post អភិបាលខេត្តកំពត ចុះពិនិត្យ និងពន្លឿនការស្ថាប​នាពង្រីកផ្លូវស្របមាត់ព្រែកកំពង់កណ្តាលទៅឆ្នេរកោះស្មៅឲ្យរួចរាល់មុនពិធីបុណ្យសមុទ្រ appeared first on Kampuchea Thmey Daily.