ការស្នើនេះ ធ្វើឡើងនៅក្នុងសិក្ខាសាលាស្ដីពី ភាសាវិទ្យានិងភាសាខ្មែរនៅក្នុងយុគសម័យបញ្ញាសិប្បនិម្មិត លើកទី១ នាព្រឹកថ្ងៃទី២៩ ខែសីហា ឆ្នាំ២០២៤។ លោកអគ្គលេខាធិការ បានបញ្ជាក់ថា ការអភិរក្ស និងអភិវឌ្ឍភាសាវិទ្យា និងអក្សរសាស្ត្រខ្មែរ ត្រូវដើរទន្ទឹមគ្នា ដើម្បីរក្សាអត្តសញ្ញាណជាតិខ្មែរផង និងដើម្បីឆ្លើយតបទៅនឹងការវិវត្តនៃសង្គមជាតិផង។

ជាមួយគ្នានោះ លោកបណ្ឌិតចង់ឱ្យសាលាអន្តរជាតិទាំងអស់នៅក្នុងប្រទេសកម្ពុជា ដាក់បញ្ចូលកម្មវិធីសិក្សាភាសាខ្មែរ នៅក្នុងការបណ្ដុះបណ្ដាលរបស់ខ្លួនផងដែរ។ លោកថា ភាសាពិតជាមានសារៈសំខាន់ ព្រោះបានចារឹកអំពីឥរិយាបថជាតិសាសន៍និងវប្បធម៌ ក៏ដូចជាឫសគល់នៃជាតិសាសន៍នីមួយៗ។ បន្ថែមពីនេះ លោកបណ្ឌិតថា រដ្ឋគួរតែបង្កើតឱ្យមានការប្រឡងអក្សរផ្ចង់ខ្មែរឡើងវិញ ដើម្បីលើកតម្កើងតម្លៃអក្សរសាស្ត្រជាតិ៕

The post លោកបណ្ឌិត យង់ ពៅ ស្នើក្រសួង ស្ថាប័ន និងភាគីពាក់ព័ន្ធ ជំរុញការប្រើប្រាស់ភាសាខ្មែរ ឱ្យត្រឹមត្រូវតាមអក្ខរាវិរុទ្ធ appeared first on Kampuchea Thmey Daily.

ការ​លើក​ឡើង​បែបនេះ បន្ទាប់ពី​អ្នក​ជំនាញ​វិទ្យាសាស្ត្រ​នយោបាយ​រូប​នេះ បាន​មើល​ឃើញ​ថា អ្នក​វិភាគ សង្គម​ស៊ីវិល និង​សហជីព​មួយ​ចំនួន នៅតែ​យក​រឿង​ការ​កាត់ផ្តាច់​ការ​អនុ​គ្រោះ​ពន្ធ Everything But Arm (EBA) ពី​សំណាក់​សហភាព​អឺរ៉ុប​ចំនួន ២០% នា​ពេល​កន្លងទៅ ថា ប៉ះពាល់​ទៅ​ដល់​ការងារ​របស់​កម្មករ-និយោជិត និង​ការ​បិទ​រោងចក្រ​ឧស្សាហកម្ម​នានា​ក្នុង​ប្រទេស​កម្ពុជា។

លោក​បណ្ឌិត បាន​គូស​បញ្ជាក់​បន្ត​ថា បើ​ទោះបី​មាន​ការ​កាត់ផ្តាច់​ការ​អនុ​គ្រោះ​ពន្ធ ប៉ុន្តែ​ការ​បញ្ជា​ទិញ​ទំនិញ​ខាង​វិស័យ​កាត់ដេរ​នៅតែ​រក្សា​ស្ថានភាព​ល្អ ត្បិត​ស្ថានភាព​នយោបាយ​នៅ​លើ​ពិភពលោក​គ្មាន​ស្ថិរភាព និង​បង្ក​ផល​ប៉ះពាល់​ការ​នាំចេញ។ ការ​អនុ​គ្រោះ​ពន្ធ Everything But Arm (EBA វា​នឹង​កាត់​ផ្តាច់​ទាំងស្រុង នៅ​ពេល​ប្រទេស​កម្ពុជា​លោត​ផុត​ពី​ប្រទេស​ក្រីក្រ ដូច្នេះ​កម្ពុជា​ត្រូវ​មាន​ភាព​ក្លាហាន​ក្នុង​ការ​ប្រកួតប្រជែង​ស្មើ​មុខ​ស្មើ​មាត់​ជាមួយ​បណ្ដា​ប្រទេស​ផ្សេងៗ ទៀត ដោយ​មិន​រង់ចាំ​ការ​ផ្តល់​ការ​ដក​ដង្ហើម​ពី​សំណាក់​ភាគី​ណាមួយ​នោះ​ទេ។

អ្នក​ជំនាញ រូប​នេះ​ថា «បុគ្គល​មួយ​ចំនួន នៅតែ​លើក​ឡើង​បញ្ហា​នេះ ដែល​វា​ជា​សារ​នយោបាយ​! ចឹង​ពាក់ព័ន្ធ​នឹង​រឿង​នយោបាយ​របស់​សង្គម​ស៊ីវិល​មួយ​ចំនួន​ដែល​គាត់​ទទួល​បាន​កញ្ចប់​ថវិកា​ពី​បណ្តា​សហគមន៍ និង​ប្រទេស​មួយ​ចំនួន ចឹង​គាត់​ត្រូវតែ​លើក​សារ​នយោបាយ​ណាមួយ​ដែល​ត្រូវ​ទៅ​នឹង​ម្ចាស់​មូលនិធិ​នោះ​ផង​ដែរ ដូច្នេះ​វា​ប៉ះពាល់​ទៅ​ដល់​ឆ្នាំងបាយ​រួម»។

អ្នក​ជំនាញ រូបនេះ អំពាវនាវ​ឱ្យ​បុគ្គល​ដែល​ជា​សង្គម​ស៊ីវិល​មួយ​ចំនួន​សូម​គិតគូរ​ទៅ​ដល់​ផល​ប្រយោជន៍​រួម ត្រូវ​គិតគូរ​នៅ​ពេល​ធ្វើ​សកម្មភាព​របស់​ខ្លួន ពីព្រោះ​វា​អាច​ធ្វើ​ឱ្យ​ប៉ះពាល់​ទៅដល់​សង្គមជាតិ។ គ្រប់​ភាគី​ទាំងអស់ ត្រូវតែ​គិត​អំពី​ស្ថិរភាព​នយោបាយ សង្គម ដើម្បី​ឱ្យ​ខ្លួនឯង​មាន​លទ្ធភាព​ក្នុង​ការ​បន្ត​និរន្តភាព​សេដ្ឋកិច្ច​ទៅមុខ ដោយ​ពុំ​មាន​បញ្ហា​ក្ដីក្ដាំ​បែបនេះ​មក​បង្អាក់​ដំណើរ​របស់​កម្ពុជា៕

The post លោក យង់ ពៅ ៖ សង្គមស៊ីវិលនៅកម្ពុជាមួយចំនួន មិនគួរយកកម្មករ ផ្សារភ្ជាប់រឿងនយោបាយទេ appeared first on Kampuchea Thmey Daily.

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាអ្នកឃ្លាំមើលបញ្ហាសង្គម មានប្រសាសន៍ប្រាប់កម្ពុជាថ្មីថា លោកសាទរចំពោះកំណែទម្រង់រដ្ឋបាលសាធារណៈ និងការវះកាត់មន្ត្រីខិលខូច ជាបន្តបន្ទាប់មកនេះ។

លោកកត់សម្គាល់ថា នាដើមអាណត្តិទី ៧នេះ រាជរដ្ឋាភិបាលកម្ពុជា បានចាត់វិធានការជាបន្តបន្ទាប់ ទៅលើមន្ត្រីដែលខិលខូច មន្ត្រីដែលពាក់ព័ន្ធនឹងបទល្មើសគ្រឿងញៀន និងបទល្មើសផ្សេងទៀត។ ចំណាត់ការនេះ លោកយល់ថា ជាការបន្តកំណែទម្រង់រដ្ឋបាលសាធារណៈ បន្តពីរាជរដ្ឋាភិបាល អាណត្តិមុន ហើយរាជរដ្ឋាភិបាល អាណត្តិទី ៧នេះ បានដាក់គោលដៅកំណែទម្រង់រដ្ឋបាលសាធារណៈ ស្វាហាប់ មុតស្រួច និងជាក់លាក់ ព្រមទាំងចំគោលដៅបន្ថែមទៀត។

លោកបណ្ឌិត យង់ ពៅ បានបន្ថែមថា «ចំគោលដៅមានន័យថា វះកាត់ ស្អុយកន្លែងណា វះកាត់កន្លែងហ្នឹង ព្យាបាលកន្លែងហ្នឹង ប៉ះប៉ូវកន្លែងហ្នឹងមកវិញ នេះជាគោលដៅ គឺជាការអនុវត្តកំណែទម្រង់រដ្ឋបាលសាធារណៈចំគោលដៅ និងជាក់លាក់»។ ម្យ៉ាងទៀត ការចាត់វិធានការទៅលើមន្ត្រីខិលខូច គឺជាផ្នែកមួយនៃការកសាងមូលធនមនុស្ស នៅក្នុងជួររដ្ឋបាលសាធារណៈ។ លោកថា ប្រសិនបើមិនមានការចាត់វិធានការទេ នោះនឹងធ្វើឲ្យមន្ត្រីផ្សេងទៀតយកលំនាំតាម ហើយដែលអាចធ្វើឲ្យប៉ះពាល់ដល់ការកសាងមូលធនមនុស្ស។

អ្នកតាមដានស្ថានការណ៍សង្គមរូបនេះ បានលើកឡើងថា មន្ត្រីខិលខូចប្រៀបដូចជាដុំគ្រួសនៅនឹងបាតជើងអភិវឌ្ឍ។ ត្រង់ចំណុចនេះ លោកបណ្ឌិត យង់ ពៅ ពន្យល់ថា «កាលណាមានមន្ត្រីខិលខូច មន្ត្រីស្អុយ គឺនឹងរាំងស្ទះដល់ការអភិវឌ្ឍ ដល់គោលដៅអភិវឌ្ឍ ដល់មុខមាត់បក្ស ឬក៏មុខមាត់រាជរដ្ឋាភិបាល»។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានលើកឡើងដែរថា រាជរដ្ឋាភិបាលកម្ពុជា ត្រូវបន្តកសាងមូលធនមនុស្សនៅគ្រប់វិស័យ និងនៅគ្រប់ក្រសួង-ស្ថាប័ន បន្ថែមទៀត។ លោកសង្កត់ធ្ងន់ថា ការកសាងមូលធនមនុស្ស ដែលផ្ដើមចេញពីការវះកាត់មន្ត្រីខិលខូច គឺជាបញ្ហាដ៏សំខាន់មួយ។

ត្រង់ចំណុច លោកបណ្ឌិត យង់ ពៅ ពន្យល់ថា «មានន័យថា មន្ត្រីរដ្ឋបាលសាធារណៈយើង មានច្រើនហើយ​ ច្រើនសមគួរហើយ ប៉ុន្តែប្រសិនបើយើងមិនបានព្យាបាល វះកាត់មន្ត្រីខូច អប់រំមន្ត្រីខិលខូច អញ្ចឹងធ្វើឲ្យមូលធនមនុស្សនៅក្នុងមុខងារសាធារណៈនេះ មានផលប៉ះពាល់ ដូច្នេះជាទស្សនៈផ្ទាល់ខ្លួនខ្ញុំ…ខ្ញុំលើកទឹកចិត្តក្នុងការកសាងមូលធនមនុស្ស គ្រប់ស្ថាប័ន គ្រប់វិស័យ ដែលផ្អែកលើមូលធនដែលមានស្រាប់»។

អ្នកតាមដានស្ថានការណ៍សង្គមរូបនេះ​ បានបន្ថែមទៀតថា រាជរដ្ឋាភិបាលកម្ពុជា នាដើមនីតិកាលទី ៧ ដែលដឹកនាំដោយយុវជនបន្តវេន សម្រេចបានលទ្ធផលគួរជាទីមោទនៈ និងគួរជាទីពេញចិត្ត សម្រាប់ប្រជាពលរដ្ឋហើយ។ ប៉ុន្តែលោកសង្ឃឹមថា រាជរដ្ឋាភិបាលកម្ពុជា នឹងបន្តខិតខំសម្រេចឲ្យបាននូវលទ្ធផលល្អៗបន្ថែមទៀត សម្រាប់ជូនជាតិ និងប្រជាជន។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាលកម្ពុជា នីតិកាលទី ៧ នៃរដ្ឋសភា នឹងប្រកាន់ខ្ជាប់នូវគោលការណ៍ «ហ៊ានស្ដាប់ ហ៊ានថា ហ៊ានទទួលខុសត្រូវ និងហ៊ានវះកាត់»។ ការលើកឡើងនេះ ធ្វើឡើងក្នុងវេទិការាជរដ្ឋាភិបាល និងផ្នែកឯកជនលើកទី ១៩ កាលពីថ្ងៃទី ១៣ ខែវិច្ឆិកា​ ឆ្នាំ ២០២៣កន្លងទៅនេះ។

ចំណែកមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា កាលពីថ្ងៃទី ៩ ដល់ថ្ងៃទី ១០ ខែធ្នូ ឆ្នាំ ២០២៣កន្លងទៅនេះ បានដាក់ទិសដៅបន្តជំរុញដំណើរការកែទម្រង់ស៊ីជម្រៅ ក្នុងវិស័យនានា ប្រកបដោយឆន្ទៈមុតស្រួច និងសង្គតិភាព តាមអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”។

មហាសន្និបាតគណបក្សប្រជាជនកម្ពុជា រយៈពេល ២ថ្ងៃនោះ បានដាក់ចេញនូវទិសដៅការងារសំខាន់ៗ ដែលត្រូវពុះពារអនុវត្តឲ្យបានសម្រេច ដូចជាបន្តជំរុញដំណើរការកែទម្រង់ស៊ីជម្រៅ ក្នុងវិស័យនានាប្រកបដោយឆន្ទៈមុតស្រួច និងសង្គតិភាព តាមអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ដើម្បីធានានូវអភិបាលកិច្ចល្អ យុត្តិធម៌សង្គម និងការអភិវឌ្ឍ។ ពង្រឹងការផ្តល់សេវាសាធារណៈជូនប្រជាពលរដ្ឋ ប្រកបដោយប្រសិទ្ធភាព ភាពស្អាតស្អំ និងឆ្លើយតបទាន់ ពេលវេលាទៅនឹងតម្រូវការរបស់ប្រជាពលរដ្ឋ៕

The post អ្នកឃ្លាំមើលសង្គម សាទរចំពោះការវះកាត់មន្ត្រីខិលខូចជាបន្តបន្ទាប់    appeared first on Kampuchea Thmey Daily.

ម្យ៉ាងទៀត ការលើកឡើងយ៉ាងដូច្នេះ ក៏ព្រោះតែអ្នកឃ្លាំមើលបញ្ហាសង្គម បានមើលឃើញថា សហជីពមួយចំនួននៅកម្ពុជា តែង តែធ្វើរបាយការណ៍រិះគន់ ពីស្ថានភាពកម្មករនៅកម្ពុជា ដែលមិនឆ្លុះបញ្ចាំងពីស្ថានភាពពិតប្រាកដ។

បើតាមលោកបណ្ឌិត យង់ ពៅ សហជីពគួរតែអនុវត្តស្មារតីច្បាប់ ស្តីពី សហជីពដែលបានចែងឲ្យសហជីព ជំរុញឲ្យមានសុខដុមរមនាក្នុងទំនាក់ទំនងវិជ្ជាជីវៈ និងរួមចំណែកក្នុងការអភិវឌ្ឍការងារសមរម្យ បង្កើនផលិតភាព និងការវិនិយោគ បន្ថែមលើកិច្ចការពារសិទ្ធិកម្មករ។

លោកបណ្ឌិត មានប្រសាសន៍ថា «ជាពិសេសនៅក្នុងស្ថានការសេដ្ឋកិច្ច កំពុងមានបញ្ហាដូចពេលបច្ចុប្បន្ននេះ ការចេញរបាយការណ៍របស់ (សហជីព) ទៅខាងក្រៅ ត្រូវមានការប្រយ័ត្នប្រយែង ដែលអាចធ្វើឲ្យប៉ះពាល់ទៅដល់សេដ្ឋកិច្ចជាតិ និងអ្នកវិនិយោគ។ ក្នុងន័យនេះ គឺជាតិរបស់យើងខូចខាត ហើយយើងខាតទាំងអស់គ្នា»។

លោកបណ្ឌិត លើកឡើងទៀតថា«បើមិនប្រយ័ត្នប្រយែងនោះទេ នោះគឺវាយឆ្នាំងបាយធំហើយ ប៉ះពាល់ការវិនិយោគ។ ក្នុងលក្ខខណ្ឌនេះបណ្តាប្រទេសខាងក្រៅ គេមានសណ្តាប់ធ្នាប់ជាងយើង នោះអ្នករកស៊ីគេរត់ទៅបណ្តាប្រទេសទាំងនោះ ហើយពីព្រោះប្រទេសទាំងនោះ គេមានស្ថេរភាពលើការគ្រប់គ្រងកម្មករ ហើយគេមានសុវត្ថិភាពជាង»។

លោកបណ្ឌិត យង់ ពៅ ក៏បានជំរុញឲ្យទាំងសហជីព និងរាជរដ្ឋាភិបាល ដែលសុទ្ធតែជាអ្នកការពារប្រយោជន៍ ជូនកម្មករ-និយោជិតដូចគ្នា អាចធ្វើការជាមួយគ្នាបានដោយរលូន និងបង្កើតឲ្យមានយន្តការធ្វើការជាមួយគ្នា ជៀសជាងការប្រើវេទិកាផ្សេងៗ ក្នុងការវាយប្រហារគ្នា ដែលសុទ្ធតែជះឥទ្ធិពល និងលទ្ធផលមិនល្អដល់វិស័យការងារ និយាយដាច់ដោយ ឡែក និងសង្គមជាតិ និយាយជារួម៕

The post អ្នកឃ្លាំមើលបញ្ហាសង្គម៖ សហជីព គួរដើរតួនាទីចូលរួមចំណែករក្សាស្ថេរភាពការងារ បង្កើនផលិតភាព និងការ​វិនិយោគ appeared first on Kampuchea Thmey Daily.

ការបង្ហាញការស្វាគមន៍នេះ បន្ទាប់ពីឯកឧត្ដមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ក្រុមដំបូងដែលឯកឧត្ដមបង្កើតឡើងនោះ គឺក្រុមប្រមូលព័ត៌មាន និងអន្តរាគមន៍ពិសេសមួយ ដើម្បីចុះដោះស្រាយបញ្ហា និងសំណូមពរនានារបស់ប្រជាពលរដ្ឋ។

នៅក្នុងពិធីជួបសំណេះសំណាលជាមួយកម្មករ-និយោជិត នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី ២៩ ខែសីហា ឯកឧត្ដមបណ្ឌិត ហ៊ុន ម៉ាណែត មានប្រសាសន៍បែបនេះថា «ក្រុមដែលខ្ញុំបង្កើតមុនគេ គឺក្រុមសារព័ត៌មាន ដើម្បីប្រមូលព័ត៌មានប្រចាំថ្ងៃឲ្យខ្ញុំ ហើយកុំអន្តរាគមន៍ទៀត នៅក្នុងខុទ្ទកាល័យខ្ញុំហ្នឹង ខ្ញុំបង្កើតក្រុមអន្តរាគមន៍ពិសេសមួយ សម្រាប់ចុះដោះស្រាយការងារ មិនមែនទៅដណ្ដើមការងាររបស់ខេត្តទេ ដើម្បីជួយតាមដានការងាររបស់ខ្ញុំ ពេលខ្លះទៅជួយតាមដានមើលការដោះស្រាយយ៉ាងម៉េច ព្រោះខ្ញុំអត់មានពេល»។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាអ្នកតាមដានស្ថានការណ៍សង្គម និងនយោបាយ មានប្រសាសន៍ប្រាប់កម្ពុជាថ្មីថា ការបង្កើតក្រុមខាងលើនេះឡើង គឺអាចប្រមូលព័ត៌​មានបានលឿនរហ័ស និងអាចដោះស្រា​យបានទាន់ពេលវេលា។

លោកថា នៅក្នុងការដឹកនាំ មិនថាកាលពីពេលមុន ឬក្នុងពេលបច្ចុប្បន្ននេះទេ គឺតែងតែត្រូវការព័ត៌​មានលឿនរហ័ស ដើម្បីដោះស្រាយបញ្ហា និងសំណូមរបស់ប្រជាពលរដ្ឋបានទាន់ពេលវេលា។ ម្យ៉ាងទៀត ប្រជាពលរដ្ឋតែងតែផ្ដល់មតិយោបល់ និងលើកឡើងអំពីបញ្ហា សំណូមពរ នៅលើបណ្ដាញសង្គមនាន។ ដូច្នេះ ប្រសិនបើមិនមានក្រុមប្រមូលព័ត៌មានទេនោះ ប្រាកដជាមិនអាចដោះស្រាយបញ្ហាបានលឿនរហ័យនោះឡើយ។

លោកបណ្ឌិត យង់ ពៅ មានប្រសាសន៍បែបនេះថា «ប្រជាជនតែងតែផ្ដល់មតិយោបល់តាមបណ្ដាញសង្គម ឬក៏រអ៊ូរទាំតាមបណ្ដាញសង្គមជាហូរហែ អញ្ចឹងប្រសិនបើគ្មានក្រុមទទួលព័ត៌មាននេះរហ័សទេ ដូច្នេះមិនអាចដោះស្រាយការងារហ្នឹង បានលឿនរហ័សឲ្យប្រជាជនទេ»។

បើតាមអគ្គលេខាធិការរាជបណ្ឌិត្យសភាកម្ពុជា បញ្ហា និងសំណូមពរ ដែលប្រជាពលរដ្ឋតែងតែលើកឡើងឲ្យអាជ្ញាធរ និងរាជរដ្ឋាភិបាល ជួយដោះស្រាយនោះ គឺបញ្ហាគ្រឿងញៀន ចោរកម្ម និងល្បែងស៊ីសង ជាដើម។ ចំណុចទាំងនេះ គឺរាជរដ្ឋាភិបាល គួរចាត់វិធានការដោះស្រាយមុនគេ។ បន្ទាប់មកគឺបញ្ហាកសិកម្ម ដែលពាក់ព័ន្ធនឹងទីផ្សារកសិផល ផលិតកម្ម ការដាំដុះ ការចិញ្ចឹម និងការទប់ស្កាត់ការនាំចូលខុសច្បាប់ ជាដើម។

បន្ទាប់មកទៀត គឺបញ្ហាយុត្តិធម៌សង្គម ដែលត្រូវអនុវត្តឲ្យមានភាពស្មើៗគ្នា សម្រាប់ប្រជាពលរដ្ឋទាំងអស់។ ចំណែកបញ្ហាជម្លោះដីធ្លី ក៏មានប្រជាពលរដ្ឋតែងតែលើកឡើងផងដែរ ហើយរាជរដ្ឋាភិបាលអាណ​ត្តិថ្មី គួរតែមានវិធានការដោះស្រាយដែរ។ នេះបើតាមការលើកឡើងបន្ថែមពីលោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា៕

The post លោកបណ្ឌិត យង់ ពៅ ស្វាគមន៍ការបង្កើតក្រុមប្រមូលព័ត៌មាន និងអន្តរាគមន៍ដោះស្រាយបញ្ហា និងសំណូមពរពលរដ្ឋ appeared first on Kampuchea Thmey Daily.

ការលើកឡើងនេះ បន្ទាប់ពីសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានចេញសេចក្តីថ្លែងការណ៍ពិសេសមួយ ក្នុងការរៀបចំឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី សម្រាប់នីតិកាលទី ៧។

សេចក្តីថ្លែងការណ៍ពិសេសរបស់សម្ដេចតេជោ ហ៊ុន សែន កាលពីថ្ងៃទី ២៦ ខែកក្កដា ឆ្នាំ ២០២៣ បានបញ្ជាក់ថា សម្ដេច នឹងមិនបន្តមុខតំណែងជានាយករដ្ឋមន្ត្រី សម្រាប់អាណត្តិទី ៧នេះទេ ដោយឯកឧត្តមបណ្ឌិត ហ៊ុន ម៉ាណែត នឹងក្លាយជានាយករដ្ឋមន្ត្រី នៅល្ងាចថ្ងៃទី ២២ ខែសីហា ឆ្នាំ ២០២៣ខាងមុខ។ ក្នុងនោះដែរ សមាសភាពគណៈរដ្ឋមន្ត្រីថ្មី សម្រាប់អាណត្តិទី ៧ នឹងមានយុវជនបន្តវេនច្រើនផងដែរ។

សម្រាប់លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា និងជាតាមដានស្ថានការណ៍នយោបាយ សង្ឃឹមថា សមាសភាពគណៈរដ្ឋមន្ត្រីថ្មី សម្រាប់អាណត្តិទី ៧ ដែលនឹងដឹកនាំដោយឯកឧត្តមបណ្ឌិត ហ៊ុន ម៉ាណែត ហើយភាគច្រើនជាយុវជនបន្តវេន នឹងមានបន្តការអភិវឌ្ឍប្រទេស និងកំណែទម្រង់សង្គម បន្តទៀត។

លោកបណ្ឌិត យង់ ពៅ បានមានប្រសាសន៍ប្រាប់កម្ពុជាថ្មី នៅថ្ងៃទី ២៧ ខែកក្កដានេះថា លោក ចាំនូវសារនយោបាយរបស់ឯកឧត្តមបណ្ឌិត ហ៊ុន ម៉ាណែត ដែលបានលើកឡើងអំពីបញ្ហាជីវិត ក្រពះ និងមុខមាត់ នៅក្នុងជំនួបសំណេះ​សំណាលជាមួយសកម្មជន អ្នកគាំទ្រគណបកប្រជាជនកម្ពុជា និងប្រជពលរដ្ឋនាពេលកន្លង។

នៅមុនសមាសភាពគណៈរដ្ឋមន្ត្រីថ្មី ចាប់ផ្ដើមដំណើរការនោះ លោកបណ្ឌិត យង់ ពៅ ចង់លើកឡើងចំណុចអាទិភាពដែលត្រូវកំណែទម្រង់ និងអភិវឌ្ឍន៍បន្ត គឺបញ្ហាក្រពះ។ បញ្ហាក្រពះនេះមាន ៤ចំណុច ដែលត្រូវគិតជាអាទិភាព សម្រាប់ការធ្វើកំណែទម្រង់ និងជាដំណោះស្រាយ៖

១. កាត់បន្ថយគម្លាតសង្គមឲ្យកាន់តែរួមតូច។ ចំណុចនេះលោកបណ្ឌិត យង់ ពៅ លើកឡើងថា គម្លាតសង្គមកាន់តែមានគម្លាតធំ នៅពេលប្រទេសជាតិជួបវិបត្តិជំងឺកូវីដ-១៩, វិបត្តិសង្រ្គាមរុស្ស៊ី-អ៊ុយក្រែន, វិបត្តិអូសបន្លាយផ្សេងៗទៀតរបស់សកលលោក ព្រមទាំងបញ្ហាផ្ទៃក្នុងរបស់កម្ពុជាខ្លះផងដែរ។ លោកបណ្ឌិត លើកឡើងបន្តថា វិបត្តិទាំងអស់នោះ ធ្វើឲ្យគម្លាតក្រីក្រកើនឡើងធំ ដែលនេះជាបញ្ហាធំរបស់ក្រពះប្រជាជន។ ដូច្នេះលោកបណ្ឌិត សង្ឃឹមថា រាជរដ្ឋាភិបាល នីតិកាលទី ៧ នឹងកម្មវិធីនយោបាយ ឬអនុវត្តកម្មវិធីនយោបាយរបស់គណបក្ស ដែលបានដាក់ចេញឲ្យមានប្រសិទ្ធភាព។

២. ដោះស្រាយទំនាស់ដីធ្លីរ៉ាំរ៉ៃ។ ចំណុចនេះលោកបណ្ឌិត យង់ ពៅ លើកឡើងថា ទំនាស់ដីធ្លីដែលកើតមានឡើងជារ៉ាំរ៉ៃនាពេលកន្លងទៅ នាំឲ្យរាំងស្ទះដល់ការបង្កបង្កើនផល ក៏ដូចជាជះឥទ្ធិពលនយោបាយ ផងដែរ។ ដូច្នេះលោកបណ្ឌិត សង្ឃឹមថា រាជរដ្ឋាភិបាល នីតិកាលទី ៧ នឹងដោះស្រាយបញ្ចប់បញ្ហាទំនាស់ដីធ្លីរ៉ាំរ៉ៃនេះ ជាពិសេសរវាងប្រជាជនដែលមានលទ្ធភាពតូចតាច ជាមួយអ្នកមានអំណាច មានឥទ្ធិពល ប្រកបដោយតម្លាភាព និងទទួលបានយកទាំងអស់គ្នា។

៣. ការបណ្ដុះបណ្ដាលវិជ្ជាជីវៈ។ លោកបណ្ឌិត យង់ ពៅ លើកឡើងថា នេះជាចំណុចស្នូលរបស់ប្រជាជន ហើយរាជរដ្ឋាភិបាលដឹកនាំដោយគណបក្សប្រជាជនកម្ពុជា នៅក្នុងកម្មវិធីនយោបាយរបស់ខ្លួន បានដាក់ចេញរួចហើយថា នឹងបណ្ដុះបណ្ដាលយុវជនចំនួន ១លាន ៥សែននាក់ ទៅលើការបណ្ដុះបណ្ដាលវិជ្ជាជីវៈនេះ។ ដូច្នេះលោកបណ្ឌិត សង្ឃឹមថា រាជរដ្ឋាភិបាល នីតិកាលទី ៧ នឹងជំរុញការបណ្ដុះបណ្ដាលនេះ ឲ្យមានប្រសិទ្ធភាព និងមានវិសាលភាពគ្របដណ្ដប់ទូទាំងប្រទេស ដោយមិនរើសអើង។ យុវជន បន្ទាប់ពីទទួលបានការបណ្ដុះបណ្ដាលនេះ នឹងយកចំណេះដឹងទៅប្រកបមុខរបរ ប្រកបដោយជំនាញ និងវិជ្ជាជីវៈច្បាស់លាស់។

៤. ការបញ្ចប់បញ្ហាមន្ត្រីយកមុខ ឬមន្ត្រីរបាយការណ៍និយម។ លោកបណ្ឌិត យង់ ពៅ លើកឡើងថា មូលហេតុដែលមន្ត្រីយកមុខ និងមន្ត្រីរបាយការណ៍និយម ប៉ះពាល់ទៅដល់ក្រពះប្រជាជនដែរនោះ ព្រោះមន្ត្រីប្រភេទនេះ មិនបានធ្វើការជាក់ស្ដែង តែធ្វើរបាយការណ៍យកមុខ ដែលនាំឲ្យប៉ះពាល់ដល់ផលប្រយោជន៍ប្រជាជន។ លោកបណ្ឌិតថា កាលណាប៉ះពាល់ផលប្រយោជន៍ប្រជាជន នោះនឹងប៉ះពាល់ដល់ក្រពះប្រជាជន ប៉ះពាល់ផែនការអភិវឌ្ឍ ឬក៏កម្មវិធីនយោបាយអភិវឌ្ឍន៍ប្រទេសហើយ។ ដូច្នេះលោកបណ្ឌិត សង្ឃឹមថា រាជរដ្ឋាភិបាល នីតិកាលទី ៧ នឹងបញ្ចប់បញ្ហាមន្ត្រីយកមុខនេះ។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា និងជាតាមដានស្ថានការណ៍នយោបាយ បានបញ្ជាក់ថា ចំណុចទាំង ៤ខាងលើនេះ គ្រាន់តែជាទស្សនៈផ្ទាល់ខ្លួនរបស់លោកប៉ុណ្ណោះ។​ ចំពោះការអនុវត្តបែបណានោះ គឺអាស្រ័យលើឆន្ទានុសិទ្ធិរបស់ថ្នាក់ដឹកនាំរាជរដ្ឋាភិបាល អាណត្តិទី ៧៕  

The post លោកបណ្ឌិត យង់ ពៅ លើកឡើងចំណុចអាទិភាព ដែលរាជរដ្ឋាភិបាលអាណត្តិទី ៧ គួរតែដោះស្រាយមុនគេ appeared first on Kampuchea Thmey Daily.

នៅ​លើ​បណ្ដាញ​សង្គម​ ថ្ងៃ​ទី​០៦ ខែ​កក្កដា ឆ្នាំ​២០២៣​នេះ លោក​បណ្ឌិត​ យង់ ពៅ បាន​លើក​ឡើង​ថា​ ប្រាកដ​ណាស់​ថា​ ប្រជាពលរដ្ឋ​ទូទៅ​មាន​សិទ្ធិ​សេរីភាព​ពេញ​លេញ​នៅ​ក្នុង​ការ​សម្រេច​ចិត្ត​ចូល​រួម​សកម្មភាព​នយោបាយ និង​ជ្រើសរើស​គណបក្ស​ដែល​ខ្លួន​ពេញ​ចិត្ត។

ជាក់ស្ដែង កម្ពុជា​ក៏​ធ្លាប់​ឆ្លង​កាត់​ការ​បោះឆ្នោត​ជា​សកល​ច្រើន​លើក​មក​ហើយ ​គឺ​ចាប់​តាំង​ពី​ឆ្នាំ​១៩៩៣ មក​ម្ល៉េះ។ តែទោះជាបែបនេះក្តី ប្រជាពលរដ្ឋ​ក៏​ដូច​ជា​មនុស្ស​ចាស់​ (លោកតា លោក​យាយ) ភាគ​ច្រើន ៤ ឬ​ ៥​ឆ្នាំ​ម្តង ទើប​មាន​ឱកាស​កាន់​ប៊ិច​គូស​លើ​សន្លឹក​ឆ្នោត ដូចនេះ​សម្រាប់​ការ​បោះឆ្នោត​ ជ្រើស​តាំង​តំណាងរាស្ត្រ​នីតិកាល​ទី​៧ ឆ្នាំ​២០២៣ ដែល​នឹង​ឈាន​មក​ដល់​នៅ​ថ្ងៃទី​២៣ ខែ​កក្កដា នេះ វា​ជា​កត្តា​ដែល​ចាំ​បាច់​មួយ​ ដែល​ត្រូវ​តែ​បង្រៀន​ពួក​គាត់​ឱ្យ​បាន​ដឹង​ពី​របៀប​គូស​សន្លឹក​ឆ្នោត​ឱ្យ​បាន​ត្រឹម​ត្រូវ។ មួយវិញទៀត បើ​មិន​បង្រៀន​គូស គឺ​នៅ​តែ​គូស​មិន​ត្រឹមត្រូវ (ឬ​អាច​ខុស​ពី​ការ​ណែ​នាំ​របស់ គ.ជ.ប)។

គួរ​ជម្រាប​ថា​ ការ​បោះឆ្នោត​ ជ្រើស​តាំង​តំណាងរាស្ត្រ​នីតិកាល​ទី​៧ ឆ្នាំ​២០២៣ នៅ​ថ្ងៃទី​២៣​ ខាង​មុខ​នេះ មាន​គណបក្ស​ចំនួន​ ១៨​ ដែល​បាន​សម្រេច​ដោយ​គណៈកម្មាធិការ​រៀប​ចំ​ការ​បោះឆ្នោត ផ្តល់​សិទ្ធិ​ឱ្យ​ចូលរួម​ប្រកួត​ប្រជែង​ឈរ​ឈ្មោះ​ឱ្យ​គេ​បោះឆ្នោត​ មាន​ដូច​ជា៖ ១.​គណបក្ស​សំបុកឃ្មុំ​សង្គម​ប្រជាធិបតេយ្យ, ២.គណបក្ស​ខ្មែរ​តែមួយ, ៣.គណបក្ស​សញ្ជាតិ​កម្ពុជា, ៤.គណបក្ស ខ្មែរ​រួបរួម​ជាតិ, ៥.គណបក្ស កម្លាំង​ប្រជាធិបតេយ្យ, ៦.គណបក្ស កសិករ, ៧.គណបក្ស ស្ត្រី​ដើម្បី​ស្ត្រី, ៨.គណបក្ស ខ្មែរ​ឈប់​ក្រ, ៩.គណបក្ស ហ្វ៊ិន​ស៊ីនប៉ិច, ១០.គណបក្ស ធម្មាធិបតេយ្យ, ១១.គណបក្ស ប្រជាធិបតេយ្យ​មូលដ្ឋាន, ១២.គណបក្ស បំណង​ពលរដ្ឋ, ១៣.គណបក្ស ខ្មែរ​អភិវឌ្ឍន៍​សេដ្ឋកិច្ច, ១៤.គណបក្ស ឯកភាព​ជាតិ​ខ្មែរ, ១៥.គណបក្ស ខ្មែរ​អភិរក្ស, ១៦.គណបក្ស យុវជន​កម្ពុជា, ១៧.​គណបក្ស ជនជាតិ​ដើម​ប្រជាធិបតេយ្យ​កម្ពុជា​ និង​ ១៨.គណបក្ស​ប្រជាជន​កម្ពុជា៕

The post បណ្ឌិតយង់ ពៅ៖ បើមិនបង្រៀនគូសសន្លឹកឆ្នោតទេ ពលរដ្ឋអាចគូសខុសការណែនាំ គ.ជ.ប appeared first on Kampuchea Thmey Daily.

​

លើកឡើងនៅ​ក្នុងបាឋកថាដែលរៀបចំដោយរាជបណ្ឌិតសភាកម្ពុជា លោកបណ្ឌិត យង់ ពៅ មាន​ប្រសាសន៍ថា ការឈ្វេង​យល់ពីកិច្ចការនយោបាយអន្តរជាតិជារឿងមួយចំបាច់បំផុត។ អ្វី​គួរ​កត់សម្គាល់ ​ពលរដ្ឋ​មួយចំនួនតូចមិន​បាន​ឈ្វេងយល់​ពី​កិច្ចការ​អន្តរជាតិ​បាន​ច្បាស់ អាច​នាំ​ឱ្យ​ពួក​គេ​យល់​ខុស​ឆ្គង​នូវ​រឿង​រ៉ាវ និង​សភាព​ការ​អន្តរជាតិមួយ​ចំនួនជាដើម​។

​ដើម្បី​ឱ្យ​ស្របតាមការលើកឡើងខាងលើនេះ បណ្ឌិត យង់​ ពៅ បាន​លើក​ឧទាហរណ៍​​ថា៖​ «​ចំពោះ​រូប​ខ្ញុំ​ផ្ទាល់ ពលរដ្ឋ​មួយ​ចំនួន​បាន​រិះគន់​ថា ហេតុ​អ្វី​ត្រូវ​គិត​អ្វី​វែង​ឆ្ងាយ​ម្ល៉េះ គិត​ពី​អាមេរិក​ផង ថៃផង និង​អាស៊ាន​ផង​ បាន​អ្វី​មក​វិញ។ ប៉ុន្តែ​ យើង​មិន​ដឹង​ទេ​ថា កាល​ដែល​យើង​មិន​ដឹង​ពី​គេ វា​គឺជារឿង​ដែល​គ្រោះ​ថ្នាក់​បំផុត»។

​លោកបណ្ឌិត​បន្ត​ទៀត​ថា​ «ប្រសិន​បើ​យើង​មិន​បាន​​យល់​ពី​កិច្ចការ​អន្តរជាតិ ​យល់​ពី​នយោបាយ​មហាអំណាច នឹង​ធ្វើ​ឱ្យ​ខ្លួន​ឯង​ដើរ​ចូល​ទៅ​ក្នុង​អន្លុងនៃ​សង្គ្រាម​។ ដូច្នេះ​ មិន​ថា​យើង​ជា ​ធុរជន អ្នក​ស្រាវជ្រាវ ឬ​អ្នក​រាជការ​ផ្សេង​ទៀត​នោះ​ទេ ចាំ​បាច់​ត្រូវ​តែឈ្វេង​យល់​ កិច្ចការ​អន្តរជាតិ ​ដើម្បី​សម្រប​ខ្លួន រៀប​ចំ​គោលនយោបាយ​ឱ្យ​ត្រូវ​ជា​មួយ​និង​សម័យ​កាល​​»។

បន្ថែមពី​នេះ ពាក់ព័ន្ធ​ទៅ​នឹង​បញ្ហា​នយោបាយ​នៅ​ក្នុងប្រទេស​ថៃ ​​ជម្លោះ​គូប្រជែង​ភូមិសាស្ត្រ​នយោបាយ​រវាង​ចិន-សហរដ្ឋ​អាមេរិក​, អាមេរិក-រុស្សី, រុស្សី​-អ៊ុយក្រែន ​ពលរដ្ឋ​ក៏​ត្រូវ​សិក្សា​ស្វែង​យល់​ឱ្យ​បាន​ច្បាស់​ ​និង​ដើរ​ឱ្យ​ទាន់​សភាព​ការ កិច្ចការ​នយោបាយ​អន្តរជាតិ​ ​ព្រោះប្រទេសកម្ពុជា​ មិន​មែន​រស់​នៅ​តែ​ម្នាក់​ឯង​ឡើយ ទាំង​សេដ្ឋកិច្ច និង​កម្លាំង​ពលកម្ម​ គឺ​សុទ្ធ​សឹង​តែត្រូវការ​ពឹង​ពាក់​គ្នា​ទៅ​វិញ​ទៅ​មក។

បណ្ឌិត យង់ ពៅ បាន​​បន្ត​ថា ​កម្ពុជា​ត្រូវ​ការ​ពឹង​ផ្អែក​គ្នា​ទៅ​វិញ​ទៅ​មក ជាមួយបណ្តាប្រទេសក្នុង និងក្រៅតំបន់ ​​រួមមាន​ ការ​លក់​ផលិត​ផល​ទៅ​កាន់​ប្រទេស​ដទៃ, ការ​នាំ​ចូល​វត្ថុធាតុ​ដើម​មួយ​ចំនួន និង​​​ផលិតផល​សម្រេច​មួយ​ចំនួន​ទៅ​កាន់​ទី​ផ្សារ​ខាង​ក្រៅជាដើម​។ ដូច​នេះ ប្រសិន​បើ យើង​មិន​បាន​​យល់​ពី​នយោបាយ​របស់​មហាអំណាច, នយោបាយ​ក្នុង​ពិភព​លោក និង​នយោបាយ​នៅ​ក្នុង​តំបន់បានច្បាស់ទេ នោះ​កម្ពុជា ក៏​មិន​​អាច​ធ្វើ​ពាណិជ្ជកម្ម​បាន​​ដែរ៕

​

The post បណ្ឌិត​ យង់ ពៅ​៖ ​ចាំ​បាច់ណាស់ ពលរដ្ឋ​ត្រូវរៀន​​ឈ្វេង​យល់​រាល់​​កិច្ចការ​អន្តរជាតិ​ទាំង​ក្នុង​ និង​ក្រៅ​តំបន់ appeared first on Kampuchea Thmey Daily.