លោក យ៉ង សាំងកុមារ Archives - Kampuchea Thmey Daily

រោងម៉ាស៊ីន ៣ សហការគ្នាទិញស្រូវស្រងែ និងសែនក្រអូបពីកសិករជាង ១០ ម៉ឺនតោន

Din Thary — Mon, 18 Aug 2025 03:45:19 +0000

រោងម៉ាស៊ីនចំនួន ៣ សហការគ្នាគ្រោងទិញស្រូវស្រងែ និងស្រូវសែនក្រអូបសរុបជាង ១០ ម៉ឺនតោន សម្រាប់រដូវប្រមូលផលឆ្នាំនេះ។ ក្នុងនោះស្រូវស្រងែចំនួន ៧៦ ០០០ តោន និងស្រូវសែនក្រអូបចំនួន ៣២ ០០០តោន។

បើតាមលោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ បានឱ្យដឹងនៅព្រឹកថ្ងៃទី១៨ ខែសីហា ឆ្នាំ២០២៥ នេះថា មានរោងម៉ាស៊ីនកិនស្រូវចំនួន ៣ និងសហការគ្នា ក្នុងការប្រមូលទិញស្រូវស្រង៉ែ និងស្រូវសែនក្រអូបពីកសិករ។ ក្នុងនោះ រោងម៉ាស៊ីនគ្រោងទិញស្រូវស្រងែចំនួន ៧៦ ០០០ តោន និងស្រូវសែនក្រអូបចំនួន ៣២ ០០០តោន ពីកសិករ។

រោងម៉ាស៊ីនទាំង ៣ នោះរួមមាន ១.ឈ្មោះរោងម៉ាស៊ីន ឈិត ប៊ុនថន ដែលមានទីតាំងស្ថិតនៅខេត្តព្រៃវែង ដែលគ្រោងទិញស្រូវក្នុងបរិមាណសរុបស្រូវស្រងែក្នុងរដូវនេះប្រមាណ ១ ម៉ឺនតោន ក្នុងតម្លៃទាបបំផុត ៨២០ រៀលមួយគីឡូក្រាម ដឹកដល់រោងម៉ាស៊ីន។

ទី២.រោងម៉ាស៊ីនកិនស្រូវវង្ស ប៊ុនហេង ដែលមានទីតាំងស្ថិតនៅភូមិព្រែកជ្រៃ សង្កាត់ដង្កោ ខណ្ឌដង្កោ រាជធានីភ្នំពេញ ដែលមានគម្រោងទិញស្រូវពីកសិករនូវប្រភេទស្រូវស្រងែ ប្រមាណ ៦ ០០០តោន ក្នុងតម្លៃទាបបំផុត ៨២០ រៀលមួយគីឡូក្រាម ដឹកដល់រោងម៉ាស៊ីន។ ដោយឡែកស្រូវសែនក្រអូប ក្នុងបរិមាណសរុបរដូវនេះ ២ ០០០ តោន ក្នុងតម្លៃទិញដល់រោងម៉ាស៊ីនទាបបំផុត ១០៥០រៀលមួយគីឡូក្រាម។

ទី៣ រោងម៉ាស៊ីន Lay Se Rice Mill (City Rice) ដែលជារោងម៉ាស៊ីនធំមួយនៅស្រុកថ្មគោល ខេត្តបាត់ដំបង គ្រោងទិញស្រូវស្រង៉ែប្រមាណ ៦ ម៉ឺនតោន ក្នុងតម្លៃទាបបំផុត ៨២០ រៀលមួយគីឡូក្រាម ដែលកសិករដឹកដល់រោងម៉ាស៊ីន។ ស្រូវសែនក្រអូប គ្រោងទិញប្រមាណ ៣ ម៉ឺន ក្នុងតម្លៃទិញដឹកដល់រោងម៉ាស៊ីនទាបបំផុត ១០៥០រៀលមួយគីឡូក្រាម។

កាលពីថ្ងៃទី១៣ ខែសីហា នេះ លោកឧកញ៉ា ឡាយ ឈុនហួរ ម្ចាស់រោងម៉ាស៊ីនកិនស្រូវ ស៊ីធីរ៉ាយស៍ អ៉ីមផត អិចផត ខូ អិលធីឌី (City Rice Import Export Co., Ltd) បានបញ្ជាក់ថា ក្នុងគោលការណ៍ថ្មី ក្រោយពេលដែលជួបប្រជុំជាមួយក្រសួងពាណិជ្ជកម្ម ក៏ដូចជាសហព័ន្ធស្រូវអង្ករកម្ពុជារួចមក ទាំងខាងរោងម៉ាស៊ីន និងសហព័ន្ធបានកំណត់ដាក់នៅក្នុងតម្លៃមួយសមរម្យដល់កសិករ។ ក្នុងនោះប្រភេទស្រូវស្រងែ លោកទទួលទិញតម្លៃ ៨០០៛ ក្នុងមួយគីឡូក្រាម នៅនិងស្រែ ហើយ ៨៤០៛ ក្នុងមួយគីឡូក្រាម កសិករដឹកមកដល់រោងម៉ាស៊ីន គឺសម្រាប់ស្រូវស្អាតលេខ១។

បច្ចុប្បន្នរោងម៉ាស៊ីនកិនស្រូវរបស់លោក ទទួលទិញស្រូវស្រងែចូលចន្លោះពី ១ ៣០០ តោន ទៅ ១ ៥០០តោន ក្នុងមួយថ្ងៃ៕

ដោយ៖ ឌិន ថារី

The post រោងម៉ាស៊ីន ៣ សហការគ្នាទិញស្រូវស្រងែ និងសែនក្រអូបពីកសិករជាង ១០ ម៉ឺនតោន appeared first on Kampuchea Thmey Daily.

មន្ត្រីកសិកម្មលើកឡើងថា កសិករចាំបាច់អនុវត្តវិធីសាស្ត្រចម្រុះ ដើម្បីកាត់បន្ថយការពឹងផ្អែកលើថ្នាំពុល

Din Thary — Fri, 16 May 2025 07:23:46 +0000

លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើង ២ ចំណុចសំខាន់ៗ ដើម្បីលើកស្ទួយកសិកម្មប្រកបដោយចីរភាព កាត់ជួយបន្ថយ ឬបំបាត់ការពឹងផ្អែកលើថ្នាំពុល។

លោក យ៉ង សាំងកុមារ មានប្រសាសន៍ថា ការប្រើប្រាស់ថ្នាំពុលគីមីលើដំណាំស្រូវយ៉ាងលើសលប់បានបង្កការប្រឈមយ៉ាងធ្ងន់ធ្ងរដល់បរិស្ថាន គុណភាពដី សុខភាពដំណាំ ហើយចុងក្រោយប៉ះពាល់ដល់ជីវភាពរបស់កសិករ។

ក្នុងនោះ ដើម្បីលើកស្ទួយកសិកម្មប្រកបដោយចីរភាព និងការពារធនធានធម្មជាតិ កសិករគឺចាំបាច់ត្រូវតែអនុវត្តន៍នូវវិធីសាស្ត្រចម្រុះ ដែលជួយបន្ថយ ឬបំបាត់ការពឹងផ្អែកលើថ្នាំពុល។

លោកថា នេះបានបង្ហាញពីវិធានការជាក់ស្តែងដែលផ្តោតលើការកែលម្អសុខភាពដី សុខភាពដំណាំ និងការរក្សាតុល្យភាពបរិស្ថាន ដើម្បីបន្ថយការប្រើថ្នាំពុល ខណៈពេលដែលថែរក្សា ឬបង្កើនទិន្នផលស្រូវ និងប្រាក់ចំណូលរបស់កសិករ។

ទី១ ជាវិធានការដែលនាំឱ្យមានការកាត់បន្ថយ ឬលែងបាញ់ថ្នាំស្មៅ កសិករចាំបាច់ត្រូវរៀបចំដីឱ្យបានល្អ ចាំស្មៅដុះខ្លះសិនចាំភ្ជួរ ដាក់ជីសរីរាង្គទ្រាប់បាតដែលជួយឱ្យដីល្អ និងដុះតែស្មៅដែលស្រួលយកចេញឬងាយស្រួលកម្ចាត់។ មួយវិញទៀត ត្រូវរៀបដីឱ្យស្មើ ដោយសារកន្លែងខ្ពស់មានស្មៅដុះ ត្រូវយកស្មៅចេញដោយដៃនិងឧបករណ៍ជំនួយ បើចាំបាច់ត្រូវតែបាញ់ថ្នាំស្មៅគឺបាញ់ឱ្យចំគោលដៅ។

ទី២ វិធានការដែលនាំឱ្យមានការកាត់បន្ថយ ឬអាចឈានដល់ការឈប់ប្រើថ្នាំសត្វល្អិត និងថ្នាំគីមីការពារដំណាំផ្សេងទៀត ក្នុងនោះកសិករចាំបាច់ត្រូវតែ បង្កលក្ខខណ្ឌឱ្យឫសដំណាំ និងដំណាំដុះលូតលាស់បានល្អតាមវិធីសាស្រ្តកាត់បន្ថយ ឬឈប់ប្រើថ្នាំកសិកម្ម។

ជាក់ស្តែង ការមិនបាញ់ថ្នាំកសិកម្មក៏ជួយមិនឱ្យស្រូវរងនូវភាពពុល ដែលធ្វើឱ្យស្រូវមានសុខភាពល្អ និងនាំឱ្យស្រូវដុះមកមានកម្លាំងពេញ។ មួយវិញទៀតការព្រោះស្តើង ក៏នាំឱ្យស្រូវមានចន្លោះគុម្ពអាចលូតលាស់ឫស ទទួលបានទឹក ជី និងខ្យល់ហើយស្លឹកទទួលបានពន្លឺគ្រប់គ្រាន់ដែលនាំឲ្យស្រូវមានសុខភាពល្អ, ការទុកឱ្យមានចង្អូរខ្វាត់ខ្វែងជួយកាត់បន្ថយការផ្ទុះឡើងកត្តាចង្រៃ ងាយស្រួលគ្រប់គ្រងទឹក និងងាយស្រួលដើរត្រួតពិនិត្យស្រែ។ ការទុកឱ្យស្រែមានទឹកតិចហើយមានស្ងួតសើម នាំឱ្យមានខ្យល់ចូលក្នុងដីដែលជួយឱ្យឫសដុះបានល្អ និងសត្វល្អិតក្នុងដី។

លោក បន្ថែមថា ការបង្កលក្ខខណ្ឌឱ្យសត្វមានប្រយោជន៍កើតមានឡើងក្នុងស្រែជាពិសេសកង្កែបដែលជួយការពារស្រូវ។ ការបាញ់ថ្នាំការពារ ដូចជា ថ្នាំពុលធម្មជាតិ ទឹកខ្មេះ អង្កាមជាដើម ជួយការពារស្រូវដោយបណ្តេញសត្វល្អិតមិនឱ្យមកជិត ព្រមទាំងការចុះត្រួតពិនិត្យស្រែឱ្យបានទៀងទាត់ដើម្បីចាត់វិធានការការពារទាន់ពេល និងកម្ចាត់ទាន់នៅតិចដោយប្រើប្រាស់វិធីសាស្រ្តមេកានិក និងវិធីសាស្រ្តផ្សេងទៀតដែលមិនមែនជាថ្នាំកសិកម្ម មិនតែប៉ុណ្ណោះការបាញ់ថ្នាំកសិកម្មជាជម្រើសចុងក្រោយ ដោយបានឱ្យចំគោលដៅ និងបាញ់តែថ្នាំដែលអនុញ្ញាត្តិឱ្យប្រើ។

បើតាមលោក យ៉ង សាំងកុមារ វិធានការទាំងអស់បើអនុវត្តឱ្យបានត្រឹមត្រូវ និងផ្គុំចូលគ្នានឹងចូលរួមចំណែកលើកស្ទួយសុខភាពដំណាំ និងការពារដំណាំពីការបំផ្លាញដែលប៉ះពាល់ខ្លាំងដល់ផលិតកម្ម និងប្រាក់ចំណូលកសិករ៕

The post មន្ត្រីកសិកម្មលើកឡើងថា កសិករចាំបាច់អនុវត្តវិធីសាស្ត្រចម្រុះ ដើម្បីកាត់បន្ថយការពឹងផ្អែកលើថ្នាំពុល appeared first on Kampuchea Thmey Daily.

រោងម៉ាស៊ីនក្នុងស្រុក ៤ បង្កើនការទិញស្រូវប្រាំងពីកសិករ ខណៈបញ្ហាតម្លៃកំពុងធ្លាក់ចុះ

Din Thary — Wed, 15 Jan 2025 10:02:36 +0000

បើតាមលោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ឱ្យដឹងថា រោងម៉ាស៊ីនក្នុងស្រុកចំនួន ៤ ក្នុងចំណោមរោងម៉ាស៊ីនធំៗជាង ២០ ដែលក្រសួងកសិកម្មបានកំពុងសម្របសម្រួល ក្នុងការបង្កើនការទិញស្រូវប្រាំងពីកសិករ។

នៅមួយរយៈពេលចុងក្រោយនេះ កសិករកំពុងប្រឈមបញ្ហាតម្លៃស្រូវ ជាពិសេសតម្លៃស្រូវ OM ដែលមានការឆ្លាក់ថ្លៃយ៉ាងគំហុក។ ជុំវិញបញ្ហានេះ ក្នុងរូបភាពដើម្បីជួយដោះស្រាយបញ្ហាស្រូវធ្លាក់ថ្លៃដល់កសិករ លោកបណ្ឌិត យ៉ង សាំង បានឱ្យដឹងថា ក្រសួងកសិកម្មបានកំពុងសម្របសម្រួលជាមួយរោងម៉ាស៊ីនចំនួន ៤ ក្នុងចំណោមរោងចក្រធំៗ ចំនួន ២០ នៅកម្ពុជាឱ្យបង្កើនការទិញស្រូវប្រាំងពីកសិករ។

រោងម៉ាស៊ីនកិនស្រូវទាំង ៤ នោះរួមមាន៖ ទី១. ក្រុមហ៊ុន អៀង ហ៊ាង សង្កែ បាត់ដំបង ទទួលទិញស្រូវស្រង៉ែ និង សែនក្រអូប ក្នុងបរិមាណគ្រោងទិញចំនួន ១៥,០០០ តោន ពីកសិករ។ ទី២ ក្រុមហ៊ុនអេមរុរ៉ាយស៍ សាខាបាត់ដំបង ដែលទទួលទិញស្រូវស្រង៉ែ និង សែនក្រអូបចាប់តាំងពី ថ្ងៃទី០២ មករា ឆ្នាំ២០២៥ រហូត ខែមិនា ២០២៥ សាខាកំពង់ធំ ព្រមទាំងទទួលទិញស្រូវប្រភេទ OM ចាប់តាំងពី ថ្ងៃទី០៣ មករា ឆ្នាំ២០២៥ រហូត ខែមិនា ២០២៥។

ទី៣ រោងម៉ាស៊ីនសេកមាស ជិតនៅ ផ្លូវជាតិលេខ 6A ភូមិតាសែន ស្រុកជើងព្រៃ កំពងចាម ដែលទទួលទិញស្រងនិង OM មានតម្រូវការទិញពីខែមករា ដល់មិនា ២០២៥ ចំនួន ២០០០០ តោន។ និងទី៤ រោងម៉ាស៊ីនឈិតប៊ុនថង ព្រៃវែង ទទួលទិញស្រូវ OM5451 និងស្រូវផ្សេងទៀត នៅក្នុងបរិមាណ ២០០០០តោន ចាប់ពីខែមករា ដល់មិនា ឆ្នាំ២០២៥។

នៅរសៀលថ្ងៃទី១៥ ខែមករា ឆ្នាំ២០២៥ ម្ចាស់រោងម៉ាស៊ីន អៀង ហ៊ាង បានឱ្យ «កម្ពុជាថ្មី» ដឹងថា បច្ចុប្បន្នដើម្បីសម្រួលដល់បញ្ហាស្រូវរបស់កសិករ រោងម៉ាស៊ីនបានទិញស្រូវចូលនូវប្រភេទស្រូវស្រង៉ែ និងសែនក្រអូបពីកសិករ ក្នុងរង្វង់ ៤០០ ទៅ ៥០០ តោនក្នុងមួយថ្ងៃ។ ក្នុងនោះ ស្រូវស្រង៉ែ ទិញចូលក្នុងតម្លៃប្រមាណ ៩៨០រៀល ក្នុង ១គីឡូក្រាម និងសែនក្រអូបក្នុងតម្លៃ ១២២០រៀក ក្នុង ១គីឡូក្រាម។

យ៉ាងណាមិញសម្រាប់ការទិញចូលនេះ បើតាមលោក អៀង ហ៊ាង បើទោះបីជារោងម៉ាស៊ីនមិនមានតម្រូវការទីផ្សារក្តី ក៏ខាងរោងម៉ាស៊ីននៅតែទិញចូលរាល់ថ្ងៃដើម្បីជួយកសិករ ប៉ុន្តែទិញចូលទៅតាមសមត្ថភាពដែលរោងម៉ាស៊ីនអាចស្តុកទុកបានព្រោះត្រូវចំណាយដើមទុនច្រើន។

ដោយឡែក អ្នកស្រី ឃី ប៉ូនី ម្ចាស់រោងម៉ាស៊ីនកិនស្រូវ អេមរុរ៉ាយស៍សាខាខេត្តកំពង់ធំក៏ឱ្យ «កម្ពុជាថ្មី» ដឹងផងដែរថា រោងម៉ាស៊ីនកិនស្រូវរបស់អ្នកស្រី បានទិញស្រូវប្រភេទ OM ចូលពីកសិករក្នុងរង្វង់ចន្លោះពី ១៥ ទៅ ២០ ឡានក្នុងមួយថ្ងៃ ដោយគិតជាតោនចន្លោះពី ៥២៥ តោន ទៅ ៧០០ តោន ក្នុងមួយថ្ងៃទៅតាមចំនួនស្រូវ និងសមត្ថភាពឡសង្ងួតរបស់រោងម៉ាស៊ីន។

ចំពោះតម្លៃវិញ អ្នកស្រី បានអះអាងថា «តម្លៃស្រូវ OM អាចមានការប្រែប្រួលជារៀងរាល់ថ្ងៃ ដោយតម្លៃគិតទៅតាមជិត ឆ្ងាយ ប៉ុន្តែសម្រាប់ថ្ងៃទី១៥ ខែមករា ឆ្នាំ២០២៥ នេះ តម្លៃដឹកដល់រោងម៉ាស៊ីន អ្នកស្រីទិញចូលក្នុងតម្លៃ ៨៨០ រៀលឡើង ក្នុង ១គីឡូក្រាម»។

អ្នកស្រី បានបន្ថែមថា «ចំនួនស្រូវខ្ញុំទិញចូលទៅតាមខ្នាតឡរបស់ខ្ញុំ ប្រសិនឡសម្ងួតទំនេរបាន ១១ឡាន ខ្ញុំទិញចូល ១១ឡាន ហើយបើឡខ្ញុំទំនេរដល់ ២៥ ឡាន ខ្ញុំទិញចូល ២៥ឡាន ព្រោះប្រសិនបើគ្មានឡធ្វើមិនកើតទេ។ ទី១ ត្រូវការឡ ទី២ ត្រូវការលុយ ទី៣ ត្រូវមានកន្លែងសម្រាប់បញ្ចេកដាក់ ព្រោះបច្ចុប្បន្នពេញទៅដោយស្រូវវស្សា ស្រូវវស្សាលុយមិនទាន់បង្វិលមកវិញ ប្រាំងក៏មកដល់ ដូច្នេះវាផ្ទួនៗគ្នាដែលជាហេតុធ្វើឱ្យខាងរោងម៉ាស៊ីនក៏មានបញ្ហាប្រឈមដូចគ្នា»៕

The post រោងម៉ាស៊ីនក្នុងស្រុក ៤ បង្កើនការទិញស្រូវប្រាំងពីកសិករ ខណៈបញ្ហាតម្លៃកំពុងធ្លាក់ចុះ appeared first on Kampuchea Thmey Daily.

បណ្ឌិត យ៉ង សាំងកុមារ៖ ការពង្រឹងគុណភាពស្រូវ ចាប់ផ្តើមពីការពង្រឹងសមត្ថភាពមន្រ្តីកសិកម្មឃុំ

Din Thary — Tue, 12 Nov 2024 04:19:01 +0000

លោក បណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ការពង្រឹងគុណភាពស្រូវចង់ឲ្យទទួលបានទិន្នផលល្អ ស្របតាមតម្រូវការទីផ្សារ ត្រូវចាប់ផ្ដើមពីការពង្រឹងសមត្ថភាពមន្ត្រីកសិកម្មឃុំលើការងារនេះជាមុនសិន។

លោក បណ្ឌិត យ៉ង សាំងកុមារ បានបញ្ជាក់ថា ការដាក់ពង្រាយមន្រ្តីកសិកម្មឃុំ ដើម្បីធ្វើការជាមួយកសិករ ជាលទ្ធផលមន្រ្តីកសិកម្មឃុំកំពុងសកម្មក្នុងការដោះស្រាយបញ្ហាទីផ្សារ និងរក្សាស្ថិរភាពថ្លៃស្រូវក្នុងកម្រិតសមរម្យ ដោយធ្វើការសម្របសម្រួលតម្រង់ទិសកសិករឲ្យមានការសហការគ្នាជាក្រុមផលិតផ្សារភ្ជាប់មកទីផ្សារ ដោយជ្រើសរើសកសិករផលិតពូជដូចគ្នា ប្រមូលផលពេលដូចគ្នា (ក្រុមសមកាល) ដើម្បីសហការគ្នាច្រូតស្រូវលក់ក្នុងពេលដូចគ្នាដោយបរិមាណសមស្របទៅតាមសមត្ថភាពនៃការដឹកជញ្ជូន និងការបញ្ជារទិញពីរោងម៉ាស៊ីន និងធ្វើការប្រមូលផ្តុំស្រូវនៅកន្លែងកំណត់រួមមួយ។

ដើម្បីធ្វើកិច្ចការនេះជោគជ័យ គឺទាមទារឲ្យមានការសហការចូលរួមពីកសិករ ដោយចាប់ផ្តើមពីក្រុមគំរូណាមួយនៅតាមឃុំគោលដៅមុននឹងឈានទៅដល់រៀបចំរចនាសម្ព័ន្ឌសហគមន៍ផលិតផ្សារភ្ជាប់មកទីផ្សារសម្រាប់កសិករជាងមួយលានគ្រួសារនៅគ្រប់ភូមិឃុំទូទាំងប្រទេស ដែលអាចត្រួវការពេល ៣ ទៅ ៥ ឆ្នាំទៀត។ ដើម្បីសម្រេចបេសកកម្មនេះបានកាន់តែឆាប់ រាជរដ្ឋាភិបាលកំពុងធ្វើការជ្រើសរើសមន្រ្តីកសិកម្មឃុំថែមចំនួន ១០០០ នាក់ទៀតនៅចុងឆ្នាំ២០២៤ និងឈានទៅជ្រើសរើសឲ្យបានចំនួន ១៦០០ នាក់ ដើម្បីដាក់ពង្រាយឲ្យបានគ្រប់ទូទាំងឃុំសង្កាត់ដែលមានសក្តានុពលកសិកម្មទូទាំងប្រទេស។

លោកបណ្ឌិត យ៉ង សាំងកុមារ បានលើកឡើងថា ស្រូវមានគុណភាពល្អនឹងជួយឲ្យកសិករមានទីផ្សារ ទទួលបានតម្លៃល្អ កាត់បន្ថយការបាត់បង់ក្រោយពេលប្រមូលផល និងជួយលើកស្ទួយវិស័យស្រូវអង្កររបស់ជាតិទាំងមូល។ ក្នុងនោះ ពាក់ព័ន្ធនិងកម្រិតនៃកាកសំណល់ថ្នាំកសិកម្មនៅក្នុងគ្រាប់អង្ករ (ការប្រីថ្នាំកសិកម្មហួសកំណត់ ឬការប្រើថ្នាំកសិកម្មខុសស្តង់ដា) ក៏ជាកត្តាដែលមានហានិភ័យដល់ទីផ្សារផងដែរ ជាពិសេសការនាំចេញអង្ករ។

បណ្ឌិត យ៉ង សាំងកុមារ បានចង្អុលបង្ហាញថា ស្រូវមានទីផ្សារ និងមានតម្លៃល្អអាស្រ័យលើកត្តាសំខាន់ៗ ៥ ចំណុច គឺ ប្រភេទពូជ, គុណភាពស្រូវ (កម្រិតនៃភាពសុទ្ធ សំណើម និងកម្រិតនៃភាពទុំ), បរិមាណស្រូវប្រមូលបានក្នុងមួយថ្ងៃ, ទីតាំងដែលប្រមូលផ្តុំស្រូវ និង ពេលវេលាដែលដឹងមុន ឬប្រាប់អំពីការមានស្រូវលក់ (បាន 5 ថ្ងៃមុនល្អ)។ នេះជាកត្តា និងគោលការណ័ ដែលមន្រ្តីកសិកម្មឃុំ ត្រូវយកចិត្តទុកដាក់ក្នុងការធ្វើការជាមួយកសិករដើម្បីដោះស្រាយបញ្ហាទីផ្សារ និងតម្លៃស្រូវផងដែរ៕

The post បណ្ឌិត យ៉ង សាំងកុមារ៖ ការពង្រឹងគុណភាពស្រូវ ចាប់ផ្តើមពីការពង្រឹងសមត្ថភាពមន្រ្តីកសិកម្មឃុំ appeared first on Kampuchea Thmey Daily.

បណ្ឌិត យ៉ង សាំងកុមារ រំពឹង ឆ្នាំ២០២៤ នឹងនាំ មកនូវការអភិវឌ្ឍវិស័យកសិកម្មកាន់តែប្រសើរ

Din Thary — Tue, 02 Jan 2024 07:55:41 +0000

បណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រំពឹងថា ឆ្នាំ២០២៤ គឺជាឆ្នាំដែលនឹងនាំមកនូវការអភិវឌ្ឍលើវិស័យកសិកម្មកាន់តែល្អប្រសើរ។

តាមរយៈបណ្ដាញសង្គមផ្លូវការ នាថ្ងៃទី០១ ខែមករា ឆ្នាំ២០២៤ នេះ បណ្ឌិត យ៉ង សាំងកុមារ បានគូសបញ្ជាក់ថា «ឆ្នាំ ២០២៤ នេះ យើងរំពឹងថា ជាឆ្នាំដែលនាំមកនូវការអភិវឌ្ឍវិស័យកសិកម្ម ដែលរួមចំណែកធ្វើឲ្យជីវភាពកសិករ និងសន្តិសុខស្បៀង កាន់តែប្រសើរថែមទៀត ជាពិសេសតាមរយ:ការអនុវត្តកម្មវិធីគោលនយោបាយអាទិភាពរបស់រាជរដ្ឋាភិបាលក្នុងវិស័យកសិកម្ម»។

បណ្ឌិត យ៉ង សាំងកុមារ ក៏បានលើកឡើងពីគោលការណ៍ ៣ ចំណុចសំខាន់ៗដែលជាចំណែកមួយជួយឲ្យវិស័យកសិកម្មមានការអភិវឌ្ឍជាបន្តបន្ទាប់ដូចជា ទី១ ការកសាងច្រវាក់តម្លៃផលិតកម្មកសិកម្មដើម្បីផលប្រយោជន៍តួអង្គទាំងអស់ ទី២ ការដាក់ពង្រាយមន្រ្តីកសិកម្មឃុំឲ្យបានជាង ១ ០០០ ឃុំដើម្បីជួយដោះស្រាយបញ្ហាប្រឈមនានារបស់កសិករ និងសម្របសម្រួលការចូលរួមរបស់កសិករក្នុងការកសាងច្រវាក់តម្លៃផលិតកម្ម និងទី៣ ការកសាងសហគមន៍ទំនើបដើម្បីដោះស្រាយបញ្ហា សំខាន់ៗដូចជា ទុន ទីផ្សារ ធាតុចូលកសិកម្ម និងបង្កើនប្រសិទ្ធភាពសេដ្ឋកិច្ច។

គួរជម្រាបថា កាលពីពេលកន្លងទៅ បណ្ឌិត យ៉ង សាំងកុមារ បានគូសបញ្ជាក់ផងដែរថា ការរៀបចំឲ្យមានមន្រ្តីកសិកម្មឃុំល្អធ្វើការបម្រើប្រជាកសិករគ្រប់ ភូមិ ឃុំ នឹងជួយលើកស្ទួយជីវភាពរបស់ប្រជាកសិករ សន្តិសុខស្បៀង និងសេដ្ឋកិច្ចជាតិទាំងមូល៕

The post បណ្ឌិត យ៉ង សាំងកុមារ រំពឹង ឆ្នាំ២០២៤ នឹងនាំ មកនូវការអភិវឌ្ឍវិស័យកសិកម្មកាន់តែប្រសើរ appeared first on Kampuchea Thmey Daily.

បណ្ឌិត យ៉ង សាំងកុមារ ៖ រយៈពេល ១ឆ្នាំ ជាមួយរាជរដ្ឋាភិបាល យើងខ្ញុំទទួលបានឱកាស និងការគាំទ្រ លើសពីការរំពឹងទុក

sopheak khoun — Tue, 28 Nov 2023 09:55:53 +0000

លោកបណ្ឌិត យ៉ង សាំងកុមារ បានបង្ហាញលទ្ធផលរយៈពេល ១ឆ្នាំ ក្រោយពីលោក និងក្រុមការងារបានចូលរួមជីវភាពនយោបាយ ជាមួយគណបក្សប្រជាជនកម្ពុជា។

តាមរយៈលិខិតរបស់ខ្លួន ចុះថ្ងៃទី ២៨ ខែវិច្ឆិកា ឆ្នាំ ២០២៣នេះ លោកបណ្ឌិត យ៉ង សាំងកុមារ ដែលបច្ចុប្បន្នជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា «ជារួម តាមរយៈការងាររយៈពេល ១ឆ្នាំ ជាមួយរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា យើងខ្ញុំទទួលបានឱកាស ការផ្តល់ទំនុកចិត្ត និងការគាំទ្រពីថ្នាក់ដឹកនាំរាជរដ្ឋាភិបាល និងថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ លើសពីការរំពឹងទុក»។

លោកថា «បន្ថែមពីនេះទៀត យើងខ្ញុំទទួលបានឱកាសគ្រប់គ្រាន់ ក្នុងការបំពេញការងារបម្រើកសិករនិងប្រទេសជាតិ ស្របតាមចំណេះដឹង ជំនាញ និងចំណង់ចំណូលចិត្ត ដែលការងារទាំងនេះ ទាមទារឲ្យមានភាពបុរេសកម្ម ដោយចាប់ផ្តើមពីអ្វីដែលមាន និងអ្វីដែលអាចធ្វើបាន»។

លោកបណ្ឌិត យ៉ង សាំងកុមារ និងក្រុមការងាររបស់លោក បានគោរពថ្លែងអំណរគុណ ចំពោះថ្នាក់ដឹកនាំរាជរដ្ឋាភិបាល និងគណបក្សប្រជាជនកម្ពុជា ជាពិសេសសម្តេចតេជោ ហ៊ុន សែន, សម្តេចធិបតី ហ៊ុន ម៉ាណែត និងលោក ឌិត ទីណា ចំពោះការផ្តល់ឱកាស និងការគាំទ្រ។

លោកបន្ថែមថា «កាយវិការ និងទឹកចិត្តរបស់ថ្នាក់ដឹកនាំទាំងអស់ បានផ្តល់នូវកម្លាំងចិត្ត កាន់តែខ្លាំងថែមទៀតដល់យើងខ្ញុំ ក្នុងការបន្តបំពេញបេសកកម្មជូនប្រទេសជាតិ ជាពិសេសការអភិវឌ្ឍវិស័យកសិកម្ម ធន់នឹងការប្រែប្រួលអាកាសធាតុ ប្រកបដោយភាតរៈបរិស្ថាន ដើម្បីជីវភាពគ្រួសារ កសិករ សន្តិសុខស្បៀង និងសេដ្ឋកិច្ចជាតិទាំងមូល»៕

The post បណ្ឌិត យ៉ង សាំងកុមារ ៖ រយៈពេល ១ឆ្នាំ ជាមួយរាជរដ្ឋាភិបាល យើងខ្ញុំទទួលបានឱកាស និងការគាំទ្រ លើសពីការរំពឹងទុក appeared first on Kampuchea Thmey Daily.

លោក យ៉ង សាំងកុមារ ណែនាំសមាជិកអ្នកផលិតពូជស្រូវ ឲ្យបង្កើនការផលិតពូជស្រូវ ៣ ប្រភេទ មានទីផ្សារខ្ពស់ តម្លៃល្អ

អ៊ិន ពិសី — Sat, 25 Nov 2023 02:09:33 +0000

លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានណែនាំដល់សមាជិកអ្នកផលិតពូជស្រូវទាំងអស់ ឲ្យព្យាយាមបន្ត និងបង្កើនការផលិតពូជស្រូវមានតម្លៃល្អសម្រាប់ទីផ្សារទៅតាមប្រព័ន្ធពូជសុទ្ធ ពិសេសពូជស្រូវ «ផ្ការំដួល សែនក្រអូប ០១ និងពូជចំប៉ីស ៧០» ដែលមានទីផ្សារខ្ពស់ និងតម្លៃល្អ។

កាលពីថ្ងៃទី ២៤ ខែវិច្ឆិកា ឆ្នាំ ២០២៣ លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារពីនាយកដ្ឋានកសិកម្ម ដើម្បីលើកទឹកចិត្តដល់កសិករ នៃសហគមន៍អង្គបក្សី ស្ថិតនៅភូមិអង្គបក្សី ឃុំជាងទង ស្រុកត្រាំកក់ ឲ្យចូលរួមបន្ថែមទៀតក្នុងការផលិតស្រូវពូជសុទ្ធ ជាពិសេសកសិករដែលមានផ្ទៃដីទំហំតូច។

នាឱកាសនោះ លោកបណ្ឌិត យ៉ង សាំងកុមារ ក៏បានណែនាំដល់សមាជិកអ្នកផលិតពូជស្រូវទាំងអស់ ឲ្យព្យាយាមបន្ត និងបង្កើនការផលិតពូជសុទ្ធឲ្យបានជាប្រចាំ ដើម្បីធានានូវស្រូវមានគុណភាពល្អ ទិន្នផលខ្ពស់ និងទទួលបានប្រាក់ចំណូលច្រើន ដែលអាចជួយសេដ្ឋកិច្ចគ្រួសារ និងសហគមន៍ទាំងមូលផងដែរ។ លោកបណ្ឌិត ណែនាំទៀតថា «ត្រូវបង្កើនការផលិតពូជដែលមានតម្លៃល្អសម្រាប់ទីផ្សារទៅតាមប្រព័ន្ធពូជសុទ្ធ ជាពិសេសពូជស្រូវ ផ្ការំដួល សែនក្រអូប ០១ និងពូជចំប៉ីស ៧០ ដែលជាពូជស្រូវប្រណីត និងមានតម្រូវការទីផ្សារខ្ពស់ និងតម្លៃល្អ»។ ទន្ទឹមនោះ ត្រូវអនុវត្តឲ្យបាននូវការធ្វើស្រែតាមបច្ចេកទេស ដូចជាធ្វើដីរាបស្មើល្អ មានចង្អួរខ្វាត់ខ្វែង ប្រព័ន្ធបញ្ចេញបញ្ចូលទឹក ដើម្បីងាយស្រួលក្នុងការធ្វើតាមបច្ចេកទេសស្ងួតសើម។ ហើយត្រូវរក្សាទុកស្រូវសម្រាប់ហូបជាប្រចាំ ចៀសវាងប្រមូលផលបានហើយលក់ទៅវិញទាំងអស់ ដោយទៅទិញអង្ករពីផ្សារមកហូបមិនដឹងប្រភពច្បាស់លាស់នោះ។

ជាមួយគ្នានោះ លោកបណ្ឌិត យ៉ង សាំងកុមារ ក៏បានដឹកនាំសហគមន៍ ច្រូតស្រូវពូជស្រែបង្ហាញ ដើម្បីជាគំរូដល់សហគមន៍ និងបង្កើនភាពស្និទ្ធស្នាលផងដែរ។

គួរជម្រាបថា កសិករ នៃសហគមន៍អង្គបក្សី ស្ថិតក្នុងភូមិអង្គបក្សី ឃុំជាងទង ស្រុកត្រាំកក់ បានអនុវត្តការច្រូតស្រូវពូជស្រែបង្ហាញពូជសុទ្ធផ្ការំដួល លើដី ៨,៥ ហិតា ដោយទទួលបានផលសរុប ២៤ តោន។ ក្នុងនោះ កសិករ នៃសហគមន៍ឣង្គបក្សី ក៏បានបង្ហាញនូវស្នាមញញឹមគ្រប់ៗ គ្នា ដោយសារការធ្វើស្រែផលិតពូជនេះ ទទួលបានទិន្នផលល្អ ប្រាក់ចំណេញខ្ពស់ លក់បានតម្លៃថ្លៃ (តម្លៃជាង ១ ៧០០ រៀល ក្នុងមួយគីឡូក្រាម)។

សូមបញ្ជាក់ថា នៅភូមិអង្គបក្សី មានកសិករចំនួន ៣៣ នាក់ ចូលរួមផលិតពូជសុទ្ធផ្ការំដួល លើដី ៨,៥ ហិតា បានផលសរុប ២៤ តោន។ បើធៀបនឹងឆ្នាំ ២០២២ មានកសិករ ២១ នាក់ ចូលរួមការផលិតពូជ។ នៅឆ្នាំ ២០២៤ ខាងមុខ សហគមន៍ រំពឹងថា ចំនួនអ្នកចូលរួម នឹងកើនឡើងកាន់តែច្រើនថែមទៀត ដោយមើលឃើញថា ការធ្វើស្រែ ផលិតពូជ ទទួលផលចំណេញខ្ពស់ គឺបានទិន្នផលខ្ពស់ លក់បានថ្លៃ។ សហគមន៍ ក៏មានផែនការពង្រីកវិសាលភាព ដើម្បីឲ្យក្លាយជាសហគមន៍ឈានមុខគេមួយក្នុងការផលិតគ្រាប់ពូជស្រូវផ្ការំដួលផងដែរ។

ចំណែក ក្រសួងកសិកម្ម រុក្ខាប្រមាញ់ និងនេសាទ កំពុងបង្កើនការគាំទ្រដល់កសិករធ្វើការផលិតគ្រាប់ពូជសុទ្ធផ្ការំដួល ដើម្បីឲ្យកសិករគ្រប់រូបទទួលបានពូជសុទ្ធល្អសម្រាប់ផលិតស្រូវអង្ករប្រកបដោយគុណភាព ដែលជាកត្តាសំខាន់ក្នុងការបង្កើនប្រាក់ចំណូលរបស់កសិករ និងសមត្ថភាពប្រកួតប្រជែងរបស់អង្ករកម្ពុជា៕

អត្ថបទ ៖ ពិសី

The post លោក យ៉ង សាំងកុមារ ណែនាំសមាជិកអ្នកផលិតពូជស្រូវ ឲ្យបង្កើនការផលិតពូជស្រូវ ៣ ប្រភេទ មានទីផ្សារខ្ពស់ តម្លៃល្អ appeared first on Kampuchea Thmey Daily.

បណ្ឌិត យ៉ង សាំងកុមារ ៖ រាជរដ្ឋាភិបាល បានយកចិត្តទុកដាក់លើការកសាងហេដ្ឋារចនាសម្ព័ន្ធបម្រើដល់វិស័យកសិកម្មជាច្រើន

sopheak khoun — Thu, 26 Oct 2023 09:50:51 +0000

លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា រាជរដ្ឋាភិ បាលកម្ពុជា បានយកចិត្តទុកដាក់ដល់ការកសាងហេដ្ឋារចនាសម្ព័ន្ធ បម្រើដល់វិស័យកសិកម្មជាច្រើន។

ការលើកឡើងនេះ នៅពេលដែលលោករដ្ឋលេខាធិការ បានអញ្ជើញជាអធិបតីក្នុងពិធីសិក្ខាសាលាប្រកាសផ្តើមអនុវត្តគម្រោង “ការលើកកម្ពស់ជីវភាព ធន់នឹងអាកាសធាតុនៃសហគមន៍ផលិតស្រូវ នៅតំបន់បឹងទន្លេសាប” នៅថ្ងៃទី ២៦ ខែតុលា ឆ្នាំ ២០២៣នេះ។

នៅក្នុងសិក្ខាសាលានេះ លោកបណ្ឌិត យ៉ង សាំងកុមារ មានប្រសាសន៍ថា វិស័យកសិកម្មកម្ពុជា នៅមានកាលានុវត្តភាពធំ គោលនយោបាយ និងយុទ្ធសាស្ត្ររបស់រាជរដ្ឋាភិបាលកម្ពុជា ក៏បានតម្រង់ទិសដាក់ឲ្យអនុវត្តច្បាស់លាស់ ក្នុងការគាំទ្រដល់ការអភិវឌ្ឍកសិកម្ម ហើយក្រសួង និងគ្រប់ភាគីពាក់ព័ន្ធមានការប្តេជ្ញាចិត្តខ្ពស់ ក្នុងការអភិវឌ្ឍវិស័យកសិកម្ម ឲ្យទទួលបានជោគជ័យ។

លោកថា «រាជរដ្ឋាភិបាលកម្ពុជា បានយកចិត្តទុកដាក់ដល់ការកសាងហេដ្ឋារចនាសម្ព័ន្ធបម្រើដល់វិស័យកសិកម្ម ជាពិសេសការបង្កើនវិនិយោគលើការស្តារ និងកសាងប្រព័ន្ធធារាសាស្ត្រ ផ្លូវជនបទ បណ្តាញអគ្គិសនី ឥណទានជនបទជាដើម ដើម្បីជំរុញផលិតកម្មកសិកម្ម ការកែច្នៃប្រកបដោយគុណភាពប្រកួតប្រជែង និងការនាំចេញកសិផល»។

លោករដ្ឋលេខាធិការ បានបន្តថា រាជរដ្ឋាភិបាលកម្ពុជា ក៏បានកំណត់នូវតម្រូវការជាក់លាក់ ក្នុងការជួយដល់កសិករខ្នាតតូច ដើម្បីលើកកម្ពស់ជីវភាព សន្តិសុខស្បៀងជាតិ សេដ្ឋកិច្ច និងប្រព័ន្ធកសិកម្មដែលធន់នឹងអាកាសធាតុ។

ម្យ៉ាទៀត តាមប្រសាសន៍ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្តី បានដាក់ចេញនូវកម្មវិធីគោលនយោបាយអាទិភាពចំនួន ២ សម្រាប់វិស័យកសិកម្ម ដែលនឹងត្រូវដាក់ឲ្យដំណើរការនៅដំណាច់ឆ្នាំ ២០២៣នេះ ទី១. យន្តការសម្របសម្រួល និងកម្មវិធីសមហេតុផល។ ទី.២ ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ។

ពាក់ព័ន្ធនឹងគម្រោង “ការលើកកម្ពស់ជីវភាព ធន់នឹងអាកាសធាតុនៃសហគមន៍ផលិតស្រូវ នៅតំបន់បឹងទន្លេសាប” នេះ លោកបណ្ឌិត យ៉ង សាំងកុមារ យល់ថា គឺជាគម្រោងដែលមានសារៈសំខាន់ ដើម្បីកសាងសមត្ថភាពប្រជាសហគមន៍ដាំស្រូវ ឲ្យកាន់តែធន់នឹងអាកាសធាតុ ហើយលោកសង្ឃឹមថា គម្រោងនេះ នឹងដំណើរការប្រកបដោយប្រសិទ្ធភាព និងមានប្រសិទ្ធផលខ្ពស់៕

The post បណ្ឌិត យ៉ង សាំងកុមារ ៖ រាជរដ្ឋាភិបាល បានយកចិត្តទុកដាក់លើការកសាងហេដ្ឋារចនាសម្ព័ន្ធបម្រើដល់វិស័យកសិកម្មជាច្រើន appeared first on Kampuchea Thmey Daily.