យោងតាមព្រះរាជក្រឹត្យ ចុះថ្ងៃទី២ ខែវិច្ឆិកា ឆ្នាំ២០២៤ ព្រះករុណា ព្រះបាទ សម្ដេចព្រះមរបនាថ នរោត្តម សីហមុនី ព្រះមហាក្សត្រនៃកម្ពុជា បានត្រាស់បង្គាប់តែងតាំង លោក លី ច័ន្ទតុលា ជារដ្ឋលេខាធិការនៃទីស្ដីការគណៈរដ្ឋមន្ដ្រី។

ការតែងតាំងនេះ បន្ទាប់លោក លី ច័ន្ទតុលា បានផុតអាណត្តិជាប្រធានគណៈមេធាវីនៃកម្ពុជា។ មេធាវី លី ច័ន្ទតុលា បានជាប់ឆ្នោតជាប្រធានគណៈមេធាវី ២អាណត្តិជាប់គ្នា គឺអាណត្តិទី១៣ និងទី១៤ ពោលចាប់តាំងពី២០២០៕

The post អតីតប្រធានគណៈមេធាវី លោក លី ច័ន្ទតុលា ត្រូវតែងតាំងជារដ្ឋលេខាធិការទីស្ដីការគណៈរដ្ឋមន្ដ្រី appeared first on Kampuchea Thmey Daily.

ការសម្រេចបង្កើតក្រុមការងាររៀបចំគោលនយោបាយមេធាវីវ័យក្មេងពេលនេះ គឺអនុលោមតាមទិសស្លោក «ចាស់ស្គាល់ផ្លូវ ក្មេងមានកម្លាំង» និងស្របតាមចក្ខុវិស័យ «រួមគ្នាដើម្បីឧត្តមភាព និងកិត្យានុភាពនៃវិជ្ជាជីវៈមេធាវី ក៏ដូចជាការអនុវត្តតាមគោលនយោបាយដឹកនាំទាំង៨ចំណុចរបស់លោក លី ច័ន្ទតុលា ប្រធានគណៈមេធាវីនៃកម្ពុជា។ គណៈមេធាវី ចាត់ទុកថា នេះជាការកសាងថ្នាលរឹងមាំ ដើម្បីគាំទ្រដល់មេធាវីវ័យក្មេង ដែលជាការធានាគុណភាពអ្នកបន្តវេនជំនាន់ក្រោយ និងការកសាងមូលដ្ឋានគ្រឹះដ៏រឹងមាំសម្រាប់វិជ្ជាជីវៈមេធាវីនាពេលអនាគត។

បើតាមគណៈមេធាវី ក្រុមការងាររៀបចំគោលនយោបាយមេធាវីវ័យក្មេង មានភារកិច្ចក្នុងការសិក្សាស្រាវជ្រាវអំពីតម្រូវការជាក់ស្តែង និងបញ្ហាប្រឈមរបស់មេធាវីវ័យក្មេង ចងក្រងគោលការណ៍ គោលនយោបាយ ឬយន្តការពីតាមបណ្តាគណៈមេធាវីបរទេស ព្រមទាំងស្ថាប័នជាតិ និងអន្តរជាតិ លើការគាំទ្រមេធាវីវ័យក្មេង និងរៀបចំសេចក្តីព្រាងផែនទីបង្ហាញផ្លូវ គោលនយោបាយ និងផែនការសកម្មភាពសម្រាប់ជួយពង្រឹងជីវភាព និងតម្រែតម្រង់ទិសដល់មេធាវីវ័យក្មេង។

លើសពីនេះ ក្រុមការងារនេះ នឹងសិក្សារៀបចំយន្តការគាំទ្រមួយចំនួន ជាអាទិ៍៖ ការចងក្រងបណ្ដុំឯកសារមគ្គុទ្ទេសក៍សម្រាប់ការប្រកបវិជ្ជាជីវៈមេធាវី និងដំណើរការការិយាល័យមេធាវី ការផ្តល់ឱកាសអាទិភាពដល់មេធាវីវ័យក្មេង ដើម្បីកសាងសមត្ថភាព ពង្រីកសក្តានុពលការផ្តល់សេវាផ្នែកច្បាប់ទាំងនៅក្នុង និងក្រៅប្រទេស បំនិនជីវិត និងការកសាងថ្នាលចែករំលែកបទពិសោធន៍រវាងមេធាវី ទើបចូលប្រកបវិជ្ជាជីវៈ និងមេធាវីមានបទពិសោធន៍ប្រកបវិជ្ជាជីវៈច្រើនឆ្នាំ ជាដើម។

បើតាមការលើកឡើងរបស់លោក លី ច័ន្ទតុលា គោលនយោបាយជួយមេធាវីវ័យក្មេងនេះ នឹងរួមចំណែកដល់ការសម្រេចបានយុទ្ធសាស្ត្របញ្ចកោណដំណាក់កាលទី១ ជាពិសេសការបម្រើវិស័យយុត្តិធម៌ ដែលជាបេសកកម្មរបស់គណៈមេធាវី មានចែងនៅក្នុងមាត្រា១នៃច្បាប់ស្តីពីលក្ខន្តិកៈមេធាវី។ លោក បន្តថា កិច្ចការនេះ គឺជាការជួយពង្រឹងជីវភាពមេធាវីនិងជាការត្រួសត្រាយផ្លូវនិងកសាងមូលដ្ឋាន គ្រឹះរឹងមាំសម្រាប់អ្នកជំនាន់ក្រោយនៃវិជ្ជាជីវៈមេធាវី ដែលជាទំនួលខុសត្រូវដ៏សំខាន់ ក្នុងនាមជាថ្នាក់ដឹកនាំស្ថាប័នគណៈមេធាវី និងក្នុងនាមលោកផ្ទាល់៕

The post គោលនយោបាយមេធាវីវ័យក្មេង នឹងរៀបចំឡើង ដើម្បីគាំទ្រមេធាវីជំនាន់ក្រោយ​ប្រកបដោយគុណភាព appeared first on Kampuchea Thmey Daily.

លោក លី ច័ន្ទតុលា ប្រធានគណៈមេធាវីកម្ពុជា នៅក្នុងកិច្ចសម្ភាសជាមួយ«កម្ពុជាថ្មី» បានឱ្យដឹងថា ក្នុងករណីគូវិវាទមិនពេញចិត្តនឹងការសម្របសម្រួលក្នុងការដោះស្រាយវិវាទក្រៅប្រព័ន្ធតុលាការ ហើយចង់ប្តឹងទៅតុលាការវិញ គឺតុលាការអាចទទួលយកពាក្យបណ្តឹងនោះ ប៉ុន្តែ តុលាការនឹងសិក្សាលើមូលហេតុដែលពួកគាត់មិនសុខចិត្តក្នុងកិច្ចព្រមព្រៀងនេះ។ លោកបញ្ជាក់ថា នៅក្នុងព្រះរាជក្រឹត្យស្តីពី​«ការបង្កើត ការរៀបចំ និង​កិច្ច​ដំណើរ​ការ​របស់​អាជ្ញាធរជាតិ​ដោះ​ស្រាយ​វិវាទ​ក្រៅ​ប្រព័ន្ធ​តុលាការ» គឺបានកំណត់យ៉ាងតឹងរឹង ប្រសិនបើគូវិវាទចង់លុបចោលកិច្ចព្រមព្រៀងនោះ លុះត្រាតែកំណត់ហេតុដែលព្រមព្រៀង ធ្វើឡើងដោយការបង្ខិតបង្ខំ មានការបន្លំបោកប្រាស់។ ដូច្នេះ បើមិនមានករណីទាំងអស់នេះទេ ទោះបីជាអាចប្តឹងទៅតុលាការបាន ប៉ុន្តែ តុលាការនៅតែកាត់ក្តីឱ្យចាញ់ដដែល។

សូមបញ្ជាក់ថា ព្រះរាជក្រឹត្យ ស្តីពី ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ជាយុន្ធការបំពេញបន្ថែមឱ្យប្រព័ន្ធដោះស្រាយវិវាទនៅព្រះរាជាណាចក្រកម្ពុជា សំដៅលើកកម្ពស់គុណភាព ប្រសិទ្ធភាព និងភាពឆាប់រហ័សនៃការដោះស្រាយវិវាទ តាមរយៈការសម្រុះសម្រួលផ្សះផ្សាក្រៅប្រព័ន្ធតុលាការ ក្នុងគោលបំណងជួយកាត់បន្ថយការកកស្ទះសំណុំរឿងនៅតាមសាលាជម្រះក្តី បង្ខិតសេវាដោះស្រាយវិវាទឱ្យកាន់តែទៅកៀកនឹងប្រជាពលរដ្ឋនៅមូលដ្ឋាន និងធានាបាននូវភាពសុខដុមរមរា និងយុត្តិធម៌ក្នុងសង្គមជាតិ៕

The post តើការដោះស្រាយវិវាទក្រៅប្រព័ន្ធតុលាការ បើមានភាគគីណាមិនពេញចិត្ត អាចប្តឹងទៅតុលាការបានដែរ ឬទេ? appeared first on Kampuchea Thmey Daily.

លោក លី ច័ន្ទតុលា ជាកូនពៅក្នុងចំណោមបងប្អូន ១០នាក់ ដែលមានឪពុកជាមេឃុំ និងម្ដាយជាអ្នកលក់បន្លែនៅផ្សារ ច្បារអំពៅ។ លោកគឺកូនតែម្នាក់គត់ដែលបានសិក្សារៀនសូត្របានជ្រៅជ្រះ និងមានក្ដីស្រមៃចង់បន្តវេនពីលោកឪពុក។ លោកបានសិក្សារថ្នាក់ឧត្តមសិស្សានៅសាកលវិទ្យាល័យភូមិន្ទនីតិសាស្រ្ត​​ និងវិទ្យាសាស្រ្តសេដ្ឋកិច្ច ទៅលើមុខជំនាញ ផ្នែកច្បាប់។

លោក លី ច័ន្ទតុលា គឺជាប្រធានគណៈមេធាវីអាណត្តិទី១៤ ដែលដឹកនាំស្ថានប័ននេះចំនួនពីរអាណត្តិជាប់គ្នា។ លោកជា បញ្ញវន្តកើតចេញពីគ្រួសារ ដែលពេញដោយការតស៊ូផ្នែកហិរញ្ញវត្ថុ។

ដោយមានឪពុកជាមន្ត្រីឃុំ និងអ្នកម្តាយជាអ្នកលក់បន្លែ យុវជន លី ច័ន្ទតុលា មានទំនោរនិស្ស័យចូលចិត្តសិក្សារៀន សូត្រ និងអានសៀវភៅ។ ក្រោយពីបញ្ចប់កម្រិតឧត្តមនៅសាកលវិទ្យាល័យនីតិសាស្ត្រ និង​វិទ្យា​សាស្ត្រ​សេដ្ឋកិច្ច លី ច័ន្ទតុលា បានជាប់អាហារូបករណ៍បន្តការសិក្សានៅប្រទេសបារាំង និងទទួលបានសញ្ញាបត្រអនុបណ្ឌិត ឯកទេស នីតិឯកជន និងបរិញ្ញាបត្រជាន់ខ្ពស់ផ្នែកនីតិជំនួញ ។

លោក លី ច័ន្ទតុលា បានលើកឡើងដូច្នេះថា «ទោះបីជាស្ថិតនៅក្នុងស្ថានភាពគ្រួសារមិនសូវមានធនធានច្រើនយ៉ាងក្ដី និងឪពុកម្ដាយមានការរវល់ច្រើនទៅលើកិច្ចការងារ និងមុខរបររកស៊ី ប៉ុន្តែខ្ញុំជឿលើការខិតខំប្រឹងប្រែង ដូច្នេះខ្ញុំមានតែ ពាក្យការតាំងចិត្តប៉ុណ្ណោះ។ ម្យ៉ាងវិញទៀត ខ្ញុំចាំសុភាសិតមួយលើកឡើងថា «បើឪពុកម្ដាយចែកទ្រព្យនោះវាអាចបាត់ បង់ តែបើចែកជាចំណេះដឹង គឺអាចប្រើប្រាស់ និងជាមូលធនមួយ សម្រាប់ពេញមួយជីវិត»»។

ជាមួយគ្នានេះ លោកបានលើកទឹកចិត្ត សម្រាប់យុវជនសម័យបច្ចុប្បន្ន ត្រូវតែមានការកំណត់គោលដៅមួយឱ្យបាន ច្បាស់លាស់ និងត្រូវខំប្រឹងសិក្សារៀនសូត្រ ដើម្បីបង្កើនសមត្ថភាព ស្របតាមតម្រូវការទីផ្សារការងារ។ លោកបាន បញ្ជាក់ថា តម្លៃនៃការខិតខំប្រឹងប្រែង​ គឺមួលធនមួយដ៏សំខាន់ ក្នុងការអភិវឌ្ឃខ្លូន៕

អត្ថបទ៖ ផល ធារិត

The post ប្រធានគណៈមេធាវី លោក លី ច័ន្ទតុលា ជានរណា? appeared first on Kampuchea Thmey Daily.