លោក វេង សាខុន Archives - Kampuchea Thmey Daily

លោក វេង សាខុន៖ ប្រទេសជាតិមានសន្តិភាពទើបមានសមិទ្ធផល និងការអភិវឌ្ឍពេញលេញ

Din Thary — Sun, 30 Oct 2022 03:26:24 +0000

លោក វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារគណបក្សចុះមូលដ្ឋានបានមានប្រសាសន៍លើកឡើងថា សមិទ្ធផល និងការអភិវឌ្ឍដែលកម្ពុជាទទួលបានដូចសព្វថ្ងៃនេះ គឺដោយសារប្រទេសជាតិមានសុខសន្តិភាព និងស្ថិរភាពនយោបាយពេញលេញក្រោមការដឹកនាំដ៏ឆ្នើមបំផុតរបស់សម្ដេចតេជោ។

ថ្លែងនៅក្នុងពិធីសម្ពោធដាក់ឱ្យប្រើប្រាស់នូវអគារសិក្សា ១ខ្នង ដែលស្ថិតក្នុងបរិវេណសាលាបឋមសិក្សាអំពាក់១ ភូមិរពាក់១ ឃុំសេដា ស្រុកតំបែរ ខេត្តត្បូងឃ្មុំ កាលពីថ្ងៃទី ២៩ ខែតុលា ម្សិលមិញនេះ លោកវេង សាខុន បានលើកឡើងថា សមិទ្ធផល និងការអភិវឌ្ឍដែលកម្ពុជាអាចទទួលបានដូចសព្វថ្ងៃនេះ ព្រមទាំងការអភវិឌ្ឍធនធានមនុស្ស ដើម្បីជួយលើកស្ទួយ និងអភិវឌ្ឍន៍វិស័យអប់រំក៏ជាចំណុចអាទិភាពក្រោមការដឹងនាំរបស់សម្ដេច តេជោផងដែរ។

ម្យ៉ាងវិញទៀតលោកប្រធានក្រុមការងារ ក៏រំពឹងផងថា តាមរយៈ អគារសិក្សាថ្មី ១ខ្នងនេះ នឹងជួយលើកស្ទួយ ផ្តល់បរិយាកាសយ៉ាងល្អសម្រាប់លោកគ្រូ អ្នកគ្រូ ព្រមទាំងសិស្សក្នុងសាលាបឋមសិក្សាអំពាក់១ ទាំងអស់ ដើម្បីពង្រឹង និងពង្រីកចំណេះដឹងបន្ថែមទៀត។ មិនតែប៉ុណ្ណោះលោកក៏បានរំលឹកអំពីសមិទ្ធផលជាច្រើនដែលសម្រេចបានក្នុងរយៈពេលជាង ២០ឆ្នាំមកនេះ នៃការចុះជួយស្រុកតំបែរ ហើយសន្យាថានឹងបន្តចុះជួយ ដោះស្រាយរាល់បញ្ហា ចិញ្ចឹមចលនា និងគាំទ្រប្រជាពលរដ្ឋបន្តទៀត។

សូមជម្រាបថា អគារសិក្សា ១ខ្នង មានទំហំ ៩ម៉ែត្រ×៤០ម៉ែត្រ មានចំនួន ៥បន្ទប់ សាងសង់អស់រយៈពេល ៥ខែ ចាប់ពីខែឧសភា ដល់ ខែតុលាឆ្នាំ២០២២ និងចំណាយថវិកាអស់សរុប ៩៧,៤៧០ ដុល្លារអាមេរិក៕

ដោយ៖ ថារី

The post លោក វេង សាខុន៖ ប្រទេសជាតិមានសន្តិភាពទើបមានសមិទ្ធផល និងការអភិវឌ្ឍពេញលេញ appeared first on Kampuchea Thmey Daily.

ព្រះមហាក្សត្រចេញព្រះរាជក្រឹត្យតែងតាំង លោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី

deth leng — Tue, 11 Oct 2022 09:50:55 +0000

ព្រះករុណា ព្រះបាទ សម្តេចព្រះបរមនាថ នរោត្តម សីហមុនី នៅថ្ងៃទី ១១ ខែតុលានេះ បានចេញព្រះរាជក្រឹត្យត្រាស់បង្គាប់តែងតាំង លោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីបញ្ចប់ពីតំណែងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពេលថ្មីៗនេះ។

The post ព្រះមហាក្សត្រចេញព្រះរាជក្រឹត្យតែងតាំង លោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី appeared first on Kampuchea Thmey Daily.

សម្ដេចតេជោ ហ៊ុន សែន ៖ លោក វេង សាខុន នឹងត្រូវតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី

sopheak khoun — Tue, 11 Oct 2022 01:59:59 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហើបថា សម្ដេច បានទូលថ្វាយទៅព្រះមហាក្សត្រ ដើម្បីត្រាស់បង្គាប់តែងតាំងលោក វេង សាខុន អតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជារដ្ឋមន្ត្រីប្រតិភូអមនាយករដ្ឋមន្ត្រី។

សម្ដេចតេជោ ហ៊ុន សែន បានថ្លែងក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យភ្នំពេញអន្តរជាតិ (PPIU) នៅព្រឹកថ្ងៃទី ១១ ខែតុលានេះថា ប្រហែលជាមានមនុស្សមួយចំនួន ចោទសួរហើយថា ហេតុអ្វីបានជាសម្ដេចស្នើឲ្យបញ្ចប់មុខតំណែង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាណ់ និងនេសាទ។ ក្នុងនោះដែរ ក្រុមគណបក្សប្រឆាំង ក៏បាននិយាយថា ការបញ្ចប់មុខតំណែងលោក វេង សាខុន គឺជារឿងត្រឹមត្រូវហើយ តែខុសរដ្ឋធម្មនុញ្ញ។

សម្ដេចតេជោនាយករដ្ឋមន្ត្រី បានណែនាំឲ្យក្រុមគណបក្សប្រឆាំងទាំងនោះ មើលមាត្រា ២១ ជំពូក ២នៃរដ្ឋធម្មនុញ្ញ ដែលចែងអំពីព្រះមហាក្សត្រ។ បន្ទាប់ទៅសូមអានមាត្រា ២០ជំពូកទី ៣ នៃច្បាប់ ស្តីពី ការរៀបចំ និងការប្រព្រឹត្តទៅនៃគណៈរដ្ឋមន្ត្រី។

សម្ដេចតេជោ ហ៊ុន សែន បានថ្លែងបញ្ជាក់ថា លោក វេង សាខុន មិនមានកំហុសអ្វីធ្ងន់ធ្ងរនោះទេ តែសម្ដេចចង់ឲ្យមានការទទួលខុសត្រូវច្រើនជាងនេះ ហើយសម្ដេចបានបង្ហើបថា លោក វេង សាខុន ត្រូវបានសម្ដេចទូលថ្វាយព្រះមហា ក្សត្រ ដើម្បីត្រាស់បង្គាប់តែងតាំង ជារដ្ឋមន្ត្រីប្រតិភូអមនាយករដ្ឋមន្ត្រី៕

អត្ថបទ៖ ឃួន សុភ័ក្រ

The post សម្ដេចតេជោ ហ៊ុន សែន ៖ លោក វេង សាខុន នឹងត្រូវតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី appeared first on Kampuchea Thmey Daily.

លោក វេង សាខុន រដ្ឋមន្ត្រីក្រសួងកសិកម្ម ត្រូវបានដកចេញពីដំណែង

deth leng — Sat, 08 Oct 2022 11:31:23 +0000

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ត្រូវបានព្រះមហាក្សត្រចេញព្រះរាជក្រឹត្យបញ្ចប់មុខដំណែងនៅថ្ងៃទី ៨ ខែតុលា ឆ្នាំ ២០២២។

សេចក្ដីសម្រេចដាច់ដោយឡែកមួយទៀតរបស់រាជរដ្ឋាភិបាល គឺចាត់តាំងលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុជារដ្ឋមន្ត្រីស្ដីទី នៃក្រសួងកសិកម្ម បន្ថែមមុខងារបច្ចុប្បន្ន។

The post លោក វេង សាខុន រដ្ឋមន្ត្រីក្រសួងកសិកម្ម ត្រូវបានដកចេញពីដំណែង appeared first on Kampuchea Thmey Daily.

សហភាពអឺរ៉ុប ប្តេជ្ញាបន្តជួយអភិវឌ្ឍន៍កម្ពុជាលើវិស័យកសិកម្ម និងជលផល

Din Thary — Sat, 08 Oct 2022 09:14:10 +0000

សហភាពអឺរ៉ុប បានប្តេជ្ញាបន្តជួយកម្ពុជា លើវិស័យកសិកម្ម ដើម្បីឈានទៅសម្រេចបានគោលដៅក្នុងការនាំចេញផលិតផលជលផលកម្ពុជា ទៅកាន់ទីផ្សារអឺរ៉ុបនាពេលអនាគត។

លោកស្រី Charlina Vicheva អគ្គនាយកនៃអគ្គនាយកដ្ឋានកិច្ចការសមុទ្រ និងជលផល នៃសហភាពអឺរ៉ុប បានបញ្ជាក់ថា សហភាពអឺរ៉ុប នឹងនៅតែបន្តធ្វើភាពជាដៃគូអភិវឌ្ឍន៍ជាមួយកម្ពុជា លើវិស័យកសិកម្ម ព្រមទាំងអនុវិស័យជលផលផងដែរ។ លោកស្រី បានអះអាងបែបនេះ នៅក្នុងជំនួបពិភាក្សាការងារ ជាមួយលោក វេង សាខុន រដ្ឋមន្រ្តីក្រសួងកសិកម្ម កាលពីថ្ងៃទី ០៧ ខែតុលា ឆំា្ន២០២២ នៅអគ្គនាយកដ្ឋានកិច្ចការសមុទ្រ និងជលផល ។

ដើម្បីឈានទៅសម្រេចបានគោលដៅរបស់កម្ពុជា ក្នុងការនាំចេញផលិតផលជលផលទៅកាន់ទីផ្សារអឺរ៉ុបនាពេលអនាគត លោកស្រី Charlina Vicheva បានបង្ហាញអំពីឆន្ទ:គាំទ្រ និងសហការជាមួយរាជរដ្ឋាភិបាលកម្ពុជា ក្នុងការអនុវត្តកិច្ចការសំខាន់ៗចាំបាច់មួយចំនួនទាំងគោលនយោបាយ បទដ្ឋានគតិយុត្តិ លក្ខណៈបច្ចេកទេស ដើម្បីឲ្យស្របតាមលក្ខខណ្ឌតម្រូវរបស់គណ:កម្មការសហភាព អឺរ៉ុបទាក់ទងទៅនឹងគុណភាព សុវត្ថិភាពចំណីអាហារ អនាម័យ និងភូតគាមអនាម័យ។ មិនតែប៉ុណ្ណោះ លោកស្រី បានជម្រាបលោក វេង សាខុន ថា សហភាពអឺរ៉ុបរីករាយ និងបន្តគាំទ្រភាគីកម្ពុជាជានិច្ច ទាំងហិរញ្ញប្បទាន បច្ចេកទេស ជាពិសេសការងារគ្រប់គ្រង និងការតាមដានការអនុវត្តនានា ដើម្បីរួមគ្នាបំបាត់ចោលនៃការនេសាទខុសច្បាប់ គ្មានការអនុញ្ញាត និងគ្មានរបាយការណ៍ពីដែនសមុទ្រកម្ពុជា និងនៅដែនសមុទ្រអន្តរជាតិ ដើម្បីធានាបានដល់ការការពារធនធានជលផលសមុទ្រប្រកបដោយនិរន្តរភាព។

ជាការឆ្លើយតប លោក វេង សាខុន បានថ្លែងអំណរគុណយ៉ាងជ្រាលជ្រៅជូនចំពោះគណ:កម្មការសហភាពអឺរ៉ុប តាមរយ:លោកជំទាវជាអគ្គនាយកនៃអគ្គនាយកដ្ឋានកិច្ចការសមុទ្រ និងជល ផល ដែលបានជួយឧបត្ថម្ភគាំទ្រទាំងបច្ចេកទេស និងហិរញ្ញវត្ថុក្នុងការជួយអភិវឌ្ឍន៍វិស័យជលផលកម្ពុជា។ លោករដ្ឋមន្រ្តី បានបញ្ជាក់ថា ជំហររបស់កម្ពុជា ក្នុងការសហការជាមួយសហភាពអឺរ៉ុប គឺដើម្បីសម្រេចការងារនេះ ជាពិសេសពេលដែលច្បាប់ស្តីពីជលផលថ្មីបានចូលជាធរមាននាពេលឆាប់ៗខាងមុននេះ។ មួយវិញទៀត មន្ត្រីជំនាញនៃភាគីទាំងសងខាង រួមជាមួយដៃគូអភិវឌ្ឍន៍ពាក់ព័ន្ធនឹងបន្តកិច្ចសហប្រតិបត្តិការដ៏ល្អនេះ ដើម្បីជាប្រយោជន៍ដល់ការអភិវឌ្ឍវិស័យជលផលកម្ពុជា៕

ដោយ៖ ឌឿនចាន់ ថារី

The post សហភាពអឺរ៉ុប ប្តេជ្ញាបន្តជួយអភិវឌ្ឍន៍កម្ពុជាលើវិស័យកសិកម្ម និងជលផល appeared first on Kampuchea Thmey Daily.

រដ្ឋមន្ត្រីកសិកម្ម៖ ឧស្សាហកម្មកសិ-ចំណីអាហារដើរតួនាទីយ៉ាងសំខាន់ក្នុងការពន្លឿនកំណើនសេដ្ឋកិច្ច

Sorn Phanith — Tue, 04 Oct 2022 02:13:17 +0000

លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានលើកឡើងថា ឧស្សាហកម្មកសិ-ចំណីអាហារដើរតួនាទីយ៉ាងសំខាន់ក្នុងការពន្លឿនកំណើនសេដ្ឋកិច្ច ហើយក៏ជាស្ពានតភ្ជាប់ដ៏សំខាន់រវាងកសិករ អ្នកផលិត និងអ្នកប្រើប្រាស់ចុងក្រោយផងដែរ។

ថ្លែងក្នុងវេទិកាអន្តរជាតិស្តីពី សុវត្ថិភាពចំណីអាហារ នៅស្នាក់ការកណ្តាលរបស់អង្គការអភិវឌ្ឍន៍ឧស្សាហកម្មសហប្រជាជាតិ (UNIDO) នៅទីក្រុងវីយេន ប្រទេសអូទ្រីសកាលពីថ្ងៃទី០៣ តុលា លោករដ្ឋមន្ត្រីបានបន្តថា ទោះជាយ៉ាងណា ការអភិវឌ្ឍឧស្សាហកម្មកសិ-ចំណីអាហារកម្ពុជានៅមានបញ្ហាប្រឈមមុខមួយចំនួនដូចជាមានកម្រិតនៃគ្រឿងបរិក្ខារកែច្នៃ លទ្ធភាពទទួលបានបច្ចេកវិទ្យា គ្រឿងចក្រ និងហេដ្ឋារចនាសម្ព័ន្ធគាំទ្រ និរន្តរភាពនៃការផ្គត់ផ្គង់វត្ថុធាតុដើមនៅមានកម្រិត និងការយល់ដឹងជាសាធារណៈអំពីស្តង់ដារសុវត្ថិភាពចំណីអាហារ និងបញ្ហាទាក់ទងនឹងភូតគាមអនាម័យ (SPS)។

លោករដ្ឋមន្ត្រីបានបន្តទៀតថា ដើម្បីដោះស្រាយទៅកាន់បញ្ហាប្រឈមទាំងនេះ រាជរដ្ឋាភិបាលកម្ពុជាបានយកចិត្តទុកដាក់ខ្ពស់ ដោយបានផ្តល់ការលើកទឹកចិត្តជាច្រើនដល់ការវិនិយោគក្នុងវិស័យកសិកម្ម ទាំងការដាំដុះ ការចិញ្ចឹមសត្វ និងត្រី ការកែច្នៃ ការវេចខ្ចប់ក្រោយប្រមូលផល ដោយប្រកាន់យកការលើកកម្ពស់ខ្សែច្រវាក់តម្លៃពេញលេញជាខ្លាំងក្នុងរយៈប៉ុន្មានឆ្នាំចុងក្រោយនេះ តាមរយៈការជំរុញការធ្វើទំនើបកម្មកសិកម្ម ជាមួយនឹងសុវត្ថិភាពចំណីអាហារ និងស្តង់ដារនាំចេញអន្តរជាតិជាអាទិភាព។

លោករដ្ឋមន្ត្រីបានបន្ថែមថា សុវត្ថិភាពចំណីអាហារគឺជាកង្វល់ដ៏សំខាន់ និងជាទិដ្ឋភាពប្រឈមសម្រាប់ប្រទេសដែលកំពុងអភិវឌ្ឍន៍ដូចជាកម្ពុជា។ ផ្ទុយទៅវិញ ដោយមានជំនួយពីបច្ចេកវិទ្យាក្នុងយុគសម័យឌីជីថលនេះ កម្ពុជាកំពុងធ្វើការកែលម្អជាបន្តបន្ទាប់លើបញ្ហានេះ ដូចជាការផ្លាស់ប្តូរព័ត៌មាន និងទិន្នន័យអាហារកំពុងត្រូវបានចែករំលែកដោយប្រើបច្ចេកវិទ្យា block chain ជាមួយនឹង QR code និង E-Phytosanitary certificate ក៏ត្រូវបានកំពុងរៀបចំឡើង។ លើសពីនេះ កម្មវិធីទូរស័ព្ទដែលរំលេចផលប៉ះពាល់ និងការណែនាំអំពីការប្រើប្រាស់ថ្នាំសម្លាប់សត្វល្អិតប្រកបដោយសុវត្ថិភាពក៏ត្រូវបានដាក់ឱ្យដំណើរការ ហើយប្រព័ន្ធត្រួតពិនិត្យ និងតាមដានតាមប្រព័ន្ធឌីជីថលនៅក្នុងផលិតផលជលផលក៏ត្រូវបានបង្កើតឡើង និងអនុវត្តផងដែរ។

លោករដ្ឋមន្ត្រីបានបញ្ជាក់ថា ស្ថិតក្នុងស្ថានភាពនៃវិបត្តិជំងឺឆ្លងសកលកូវីដ-១៩ ការប្រែប្រួលអាកាសធាតុ និងវិបត្តិសេដ្ឋកិច្ចពិភពលោកដែលបណ្តាលមកពីសង្គ្រាមរុស្សី និងអ៊ុយក្រែន បាននិងកំពុងកើតមានឡើងនាពេលបច្ចុប្បន្ន ធ្វើឲ្យប៉ះពាល់ដល់ដំណើរការអភិវឌ្ឍន៍កសិកម្ម និងពាណិជ្ជកម្មស្បៀងអាហារទូទាំងពិភពលោក។ លោករដ្ឋមន្ត្រីបានអំពាវនាវដល់ប្រទេសជាសមាជិកគួរសហការ គាំទ្រគ្នាទៅវិញទៅមក ពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្ម។

ទន្ទឹមនឹងនេះ វិទ្យាសាស្ត្រ ឌីជីថលភាវូបនីយកម្ម បច្ចេកវិទ្យាជឿនលឿន និងការអប់រំក្នុងវិស័យកសិកម្ម ជាពិសេសទៅកាន់ប្រទេសដែលកំពុងអភិវឌ្ឍន៍ក៏ត្រូវចាត់ទុកជាអាទិភាពផងដែរ ដែលទាំងអស់នេះបានបញ្ជាក់ថានឹងជួយរក្សាបាននូវការអភិវឌ្ឍវិស័យកសិកម្មប្រកបដោយស្ថិរភាព លើកកម្ពស់ខ្សែច្រវាក់ផ្គត់ផ្គង់កសិកម្ម និងធានាសុវត្ថិភាពចំណីអាហារ និងសន្តិសុខស្បៀងក្នុងស្រុក និងអន្តរជាតិ។

លោក Gerd Muller អគ្គលេខាធិការអង្គការ UNIDO បានថ្លែងថា វេទិកាអន្តរជាតិស្តីពី “សុវត្ថិភាពចំណីអាហារ” ដែលបាននិងកំពុងដំណើរការនាពេលនេះ គឺក្នុងបំណងសំខាន់រួមគ្នាគិតគូរ ដោះស្រាយឲ្យបានទាន់ពេលវេលា ច្បាស់លាស់ និងមានប្រសិទ្ធភាពចំពោះវិបត្តិសន្តិសុខស្បៀង ភាពអត់ឃ្លាន កង្វះអាហារូបត្ថម្ភ និងសុវត្ថិភាពចំណីអាហារដែលពិភពលោកកំពុងប្រឈម។

លោកអគ្គលេខាធិការ បានអំពាវនាវឲ្យគ្រប់បណ្តាលប្រទេសសមាជិក ត្រូវតែសហការគ្នាដោះស្រាយបញ្ហានេះឲ្យបានទាន់ពេលវេលា និងមានប្រសិទ្ធភាពតាមរយៈបង្កើនផលិតភាពផលិតកម្ម ការអនុវត្តបច្ចេកវិទ្យាកសិកម្មទំនើប លើកកម្ពស់ការកែលម្អហេដ្ឋារចនាសម្ព័ន្ធប្រកបដោយគុណភាព និងសុវត្ថិភាពចំណីអាហារ និងការប្រែប្រួលអាកាសធាតុ៕

អត្ថបទ៖ សំអឿន

The post រដ្ឋមន្ត្រីកសិកម្ម៖ ឧស្សាហកម្មកសិ-ចំណីអាហារដើរតួនាទីយ៉ាងសំខាន់ក្នុងការពន្លឿនកំណើនសេដ្ឋកិច្ច appeared first on Kampuchea Thmey Daily.

បារាំងនឹងបន្តជួយក្រសួងកសិកម្មលើការអភិវឌ្ឍអនុវិស័យវារីវប្បកម្ម ដំណាំកៅស៊ូ និងផលិតកម្មពោត

deth leng — Wed, 21 Sep 2022 01:35:50 +0000

ទីភ្នាក់ងារបារាំងសម្រាប់អភិវឌ្ឍន៍ (AFD)នឹងបន្តជួយក្រសួងកសិកម្ម រុក្ខាប្រមាញ់ និងនេសាទលើការអភិវឌ្ឍអនុវិស័យវារីវប្បកម្ម ដំណាំកៅស៊ូ និងផលិតកម្មពោតដែលនឹងចូលរួមចំណែកលើក កម្ពស់កម្រិតជីវភាពប្រជាពលរដ្ឋក៏ដូចជាសេដ្ឋកិច្ចជាតិកាន់តែប្រសើរ។

នៅក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពីរសៀលថ្ងៃទី ២០ កញ្ញា លោក Jean Pierre Marcelli នាយកទីភ្នាក់ងារបារាំងសម្រាប់អភិវឌ្ឍន៍បប្រចាំតំបន់អាស៊ីអាគ្នេឃ៍បានលើកឡើងថា AFD មានគម្រោងពីរដែលនឹងជួយដល់ក្រសួងកសិកម្មគឺទី ១.ទាក់ទងនឹងការអភិវឌ្ឍអនុវិស័យវារីវប្បកម្ម ដែលគ្រោងនឹងអនុម័តនៅចុងឆ្នាំនេះ និងទី២. ទាក់ទងនិងដំណាំកៅស៊ូ និងផលិតកម្មពោតដែលនឹងអនុមតិនៅឆ្នាំ២០២៣។

លោករដ្ឋមន្ត្រីបានគាំទ្រចំពោះគម្រោងពីរដែលទីភ្នាក់បារាំងនឹងជួយក្រសួងក្នុងនោះមានអនុវិស័យវារីវប្បកម្មកម្ពុជាទាំងទឹកសាប និងសមុទ្រ ត្រូវធ្វើការអភិវឌ្ឍជាចាំបាច់ ធ្វើយ៉ាងណាឲ្យស្របតាម កំណើនសេដ្ឋកិច្ច តម្រូវការទីផ្សារ កំណើនប្រជាជន និងការប្រែប្រួលអាកាសធាតុ ដែលជះឥទ្ធិពលជាអវិជ្ជមានដល់បរិមាណផលចាប់រៀងរាល់ឆ្នាំ។

ដោយឡែកផលិតកម្មកៅស៊ូគ្រូសារនិងផលិតកម្មពោត ដែលបានចូលរួមចំណែកលើកកម្ពស់កម្រិតជីវភាព លើកកម្ពស់ផលិតកម្មចំណីសត្វ និងកាត់បន្ថយការនាំចូល។

នៅក្នុងជំនួបនោះដែរលោកនាយក Jean Pierre Marcelli បានបង្ហាញអំពីទស្សនផ្ទាល់ខ្លួនពីការពិនិត្យ និងវាយតម្លៃលើសមិទ្ធផលកន្លងមកដែលភាគីទាំងពីរបានសហការរួមគ្នាអនុវត្ត និងសិក្សាស្វែងយល់បន្ថែមអំពីសេចក្តីត្រូវការចាំបាច់នាពេលបច្ចុប្បន្ននៃវិស័យកសិកម្មបន្ទាប់ពីមានវិបត្តិជំងឺកូវីដ១៩ក៏ដូចជាពិនិត្យមើលគម្រោងអាទិភាពសំខាន់ៗ មួយចំនួនសម្រាប់អនុវិស័យនីមួយៗដែលត្រូវការចាំបាច់ និងចង់ឲ្យ AFD ជួយទាំងបច្ចេកទេស និងហិរញ្ញវត្ថុ និងពង្រឹងកិច្ចសហប្រតិបត្តិការលើវិស័យកសិកម្មឲ្យកាន់តែរឹងមាំ និងល្អប្រសើរថែមទៀត។

លោករដ្ឋមន្រ្តី បានស្នើឲ្យ AFD ពិនិត្យពិចារណាលើការលើកគម្រោងចាំបាច់ដែលទាក់ទងទៅដល់លើកកម្ពស់ខ្យែច្រវ៉ាក់ផលិតកម្មកសិកម្មនរួមទាំង ហេដ្ឋារចនាសម្ព័ន្ធគាំទ្រសំខាន់ៗ បម្រើដល់ការផលិតនិងការកែច្នៃដែលជាតម្លៃតម្លៃបន្ថែម ដែលមានលក្ខណប្រទាក់ក្រឡាគ្នា ដែលទាមទារចាំបាច់អនុវត្តបច្ចេកវិទ្យាកសិកម្មទំនើបទាំងទាំងខ្សែច្រវ៉ាក់ផលិតកម្ម និងការកែច្នៃ ហើយករណីនេះ យើងត្រូវការការគាំទ្រជំនួយឧបត្ថម្ភ និងកិច្ចសហការពីដៃគូអភិវឌ្ឍន៍ និងវិស័យឯកជនរួមទាំងការផ្តល់ឥណទានដែលមានការប្រាក់ទាបសម្រាប់វិស័យឯកជន៕

អត្ថបទ៖ សំអឿន

The post បារាំងនឹងបន្តជួយក្រសួងកសិកម្មលើការអភិវឌ្ឍអនុវិស័យវារីវប្បកម្ម ដំណាំកៅស៊ូ និងផលិតកម្មពោត appeared first on Kampuchea Thmey Daily.

រដ្ឋមន្ត្រីជំរុញមន្ទីរកសិកម្មអនុវត្តសាកល្បងកសិកម្មអភិរក្ស និងប្រពលវប្បកម្មនិរន្តរភាព

KC Virak — Tue, 20 Sep 2022 04:40:00 +0000

លោក វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានជំរុញឱ្យមន្ទីរកសិកម្មខេត្តទាំងអស់ ត្រូវជំរុញឱ្យមានការអនុវត្តសាកល្បងការងារកសិកម្មអភិរក្ស និងប្រពលវប្បកម្មនិរន្តរភាពនៅក្នុងខេត្តនីមួយៗប្រកបដោយប្រសិទ្ធភាពខ្ពស់ ព្រោះវិស័យនេះមានតួនាទីសំខាន់ក្នុងការបង្កើនភាពធន់ទ្រាំនៃប្រព័ន្ធផលិតកម្ម។

ពិធីបើកសិក្ខាសាលា ផ្សព្វផ្សាយអំពី កសិកម្មអភិរក្ស និងប្រពលវប្បកម្មនិរន្តរភាពនៅកម្ពុជា នៅព្រឹកថ្ងៃទី២០ ខែកញ្ញានេះ លោករដ្ឋមន្ត្រីបានមានប្រសាសន៍ថា កសិកម្មអភិរក្ស និងប្រពលវប្បកម្មនិរន្តរភាពមានតួនាទីសំខាន់ក្នុងការបង្កើនភាពធន់ទ្រាំ នៃប្រព័ន្ធផលិតកម្មដោយសារសម្ពាធជីវៈ និងអជីវៈ ព្រមទាំងផ្តល់ផលប្រយោជន៍ជាច្រើនដូចជា ជួយកម្ចាត់ស្មៅ កែប្រែស្ថានភាពដី និងទប់ស្កាត់ការហូរច្រោះដីជាដើម។

លោករដ្ឋមន្ត្រីបានបន្តថា យន្តការដែលបានប្រើប្រាស់ប្រកបដោយប្រសិទ្ធភាពនោះ គឺតាមរយៈបង្កើតជាវេទិកាថ្នាក់ជាតិមួយតាមអភិក្រម “រដ្ឋ-ឯកជន-ដៃគូអភិវឌ្ឍន៍ និងសហគមន៍” សម្រាប់ផ្តល់ការគាំទ្រ និងសម្របសម្រួលជាមួយគ្រប់ភាគីពាក់ព័ន្ធទាំងអស់រួមមាន៖ អង្គភាពស្រាវជ្រាវ គ្រឹះស្ថានអប់រំ គ្រឹះស្ថានហិរញ្ញវត្ថុ អ្នកផ្តល់ពូជដំណាំ សហគមន៍កសិកម្ម អ្នកផ្តល់សេវាកម្មគ្រឿងយន្តកសិកម្ម និងដៃគូអភិវឌ្ឍន៍។ល។ អាចប្រាស្រ័យទាក់ទងគ្នា សហការគ្នា ដើម្បីលើកកម្ពស់កសិកម្មអភិរក្ស និងប្រពលវប្បកម្មនិរន្តរភាពនៅកម្ពុជា តាមរយៈការស្រាវជ្រាវ ការផ្សព្វផ្សាយចំណេះដឹង ការសម្របសម្រួល និងការចងក្រងបណ្តាញការងារ ឱ្យមានលក្ខណៈប្រទាក់ក្រឡាគ្នាប្រកបដោយប្រសិទ្ធផល។

លោករដ្ឋមន្ត្រីបានបន្តទៀតថា ជាលទ្ធផល តាមរយៈការសម្របសម្រួលដោយសម្ព័ន្ធកសិកម្មអភិរក្ស និងប្រពលវប្បកម្មនិរន្តរភាពកម្ពុជាជាមួយគ្រប់ភាគីពាក់ព័ន្ធទាំងអស់ បានធ្វើឱ្យផ្ទៃដីអនុវត្តតាមបែបកសិកម្មអភិរក្សនៅតាមបណ្តាខេត្តគោលដៅ រួមមានខេត្តបាត់ដំបង (ស្រុករតនៈមណ្ឌល ស្រុកបាណន់ និងស្រុកសង្កែ) ខេត្តកំពង់ធំ (ស្រុកសន្ទុក) និងខេត្តព្រះវិហារ (ស្រុករវៀង) មានចំនួនកើនឡើងគួរឱ្យចាប់អារម្មណ៍ គឺមានផ្ទៃដីប្រមាណ ៥០០ ហិកតា នៅឆ្នាំ២០១៩ កើនឡើងដល់ ១ ៣៩៣ ហិកតា នៅឆ្នាំ២០២០ និងជាង ២ ០០០ ហិកតា នៅឆ្នាំ២០២១។

លោករដ្ឋមន្ត្រីបានណែនាំដល់សម្ព័ន្ធកសិកម្មអភិរក្ស និងប្រពលវប្បកម្មនិរន្តរភាពកម្ពុជា គួរសហការជាមួយអង្គភាពពាក់ព័ន្ធក្រោមឱវាទក្រសួងកសិកម្ម រុក្ខាប្រមាញ់ និងនេសាទ ពិនិត្យលទ្ធភាពរៀបចំឱ្យមានកញ្ចប់ថវិកាពីកម្មវិធីថវិការបស់ក្រសួងទៅតាមលទ្ធភាព ដើម្បីជួយ និងសម្របសម្រួលជាមួយតួអង្គពាក់ព័ន្ធនានា សំដៅជំរុញការអនុវត្តកសិកម្មអភិរក្សនិងប្រពលវប្បកម្មនិរន្តរភាពនៅកម្ពុជាឱ្យកាន់តែទូលំទូលាយ។

ជាមួយគ្នានេះដែរគម្រោង ឬកម្មវិធីអភិវឌ្ឍន៍វិស័យកសិកម្មទាំងអស់ដែលទទួលបានហិរញ្ញប្បទានពីរាជរដ្ឋាភិបាល និងពីគ្រប់ដៃគូអភិវឌ្ឍន៍នានា ត្រូវពិចារណាអំពីការបញ្ជ្រាបឱ្យមានសកម្មភាពការងារកសិកម្មអភិរក្ស និងប្រពលវប្បកម្មនិរន្តរភាពនៅក្នុងនោះផងដែរ ដើម្បីចូលរួមចំណែកដល់ការលើកកម្ពស់កសិកម្មអភិរក្ស និងប្រពលវប្បកម្មនិរន្តរភាព និងកសិកម្មអេកូឡូស៊ីស្របតាមគោលនយោបាយជាតិអភិវឌ្ឍន៍វិស័យកសិកម្ម ឆ្នាំ២០២២-២០៣០។

លើសពីនេះទៀត មន្ទីរកសិកម្ម រុក្ខាប្រមាញ់ និងនេសាទខេត្តទាំងអស់ ត្រូវជំរុញឱ្យមានការអនុវត្តសាកល្បងការងារកសិកម្មអភិរក្ស និងប្រពលវប្បកម្មនិរន្តរភាពនៅក្នុងខេត្តនីមួយៗ តាមរយៈគំនិតផ្តួចផ្តើម ដោយសហការជាមួយដៃគូអភិវឌ្ឍន៍ ក៏ដូចជាក្រុមហ៊ុនឯកជន និងសហគមន៍កសិកម្ម៕

អត្ថបទ៖ សំអឿន

The post រដ្ឋមន្ត្រីជំរុញមន្ទីរកសិកម្មអនុវត្តសាកល្បងកសិកម្មអភិរក្ស និងប្រពលវប្បកម្មនិរន្តរភាព appeared first on Kampuchea Thmey Daily.

លោក វេង សាខុន Archives - Kampuchea Thmey Daily

លោក​ វេង សាខុន៖ ប្រទេសជាតិមានសន្តិភាពទើបមានសមិទ្ធផល និង​ការ​អភិវឌ្ឍ​ពេញលេញ

ព្រះមហាក្សត្រ​ចេញព្រះរាជក្រឹត្យតែងតាំង លោក វេង សាខុន ជារដ្ឋមន្ត្រីប្រតិភូអមនាយករដ្ឋមន្ត្រី